← претходни дан | Минеј — Октобар | следећи дан →
10 октября: Преподобного Амвросия, старца Оптинского
Мѣ́сѧца тогѡ́же въ і҃-й де́нь.
Преставле́нїе прпⷣбнагѡ ѻ҆тца̀ на́шегѡ а҆мвро́сїа, ста́рца ѻ҆́птинскагѡ и҆ всеѧ̀ рѡссі́и чꙋдотво́рца.
На вели́цѣй вече́рни.
Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и воззва́хъ, стїхи̑ры на и҃, гла́съ и҃.
Подо́бенъ: Ѽ пресла́внагѡ чꙋдесѐ:
Дне́сь свѣ́тлѡ торжествꙋ́етъ свѧ́то-введе́нскаѧ пꙋ́стынь, прославлѧ́ющи своего̀ вели́каго моли́твенника прпⷣбнаго ста́рца ѻ҆́птинскаго а҆мвро́сїа чꙋдотво́рца, и҆́же здѣ̀ подвиза́сѧ ре́вностнѡ и҆ возше́дъ на лѣ́ствицꙋ дꙋхо́внꙋю, просїѧ́лъ є҆́сть ꙗ҆́кѡ свѣти́льникъ ѻ҆гнезра́чный по все́й землѝ рѡссі́йстѣй.
Прїиди́те вѣ́рнїи лю́дїе, воздади́мъ досто́йное поклоне́нїе ны́нѣ просла́вленномꙋ ста́рцꙋ бж҃їю и҆ согла́снѡ воспои́мъ є҆мꙋ̀: прпⷣбне ѻ҆́тче на́шъ а҆мвро́сїе, моли́твенниче на́шъ пред̾ прⷭ҇то́ломъ цр҃ѧ̀ нбⷭ҇нагѡ, не забꙋ́ди на́съ, ᲂу҆бо́гихъ ча́дъ твои́хъ, ча́ющихъ твоеѧ̀ ще́дрыѧ по́мощи, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Что́ тѧ нарече́мъ, прпⷣбне а҆мвро́сїе, въ по́двизѣхъ бо возше́лъ є҆сѝ на го́рꙋ ст҃ости и҆ соверше́нства, ꙗ҆́кѡ земны́й а҆́гг҃лъ и҆ человѣ́къ нбⷭ҇ный, ны́нѣ же ра́дꙋешисѧ и҆ весели́шисѧ въ черто́зѣхъ цр҃ѧ̀ ца́рствꙋющихъ и҆ та́мѡ зри́ши сла́вꙋ и҆ добро́тꙋ неизрече́ннꙋю и҆ съ го́рними си́лами непреста́ннѡ воспѣва́еши трист҃ꙋ́ю пѣ́снь бг҃ꙋ въ трⷪ҇цѣ сла́вимомꙋ.
Пра́зднꙋющи па́мѧть бг҃оно́снагѡ а҆мвро́сїа вели́кагѡ ста́рца ѻ҆́птинскагѡ, всерѡссі́йскагѡ наста́вника бл҃гоче́стїѧ, воспо́йте лю́дїе пѣ́снь но́вꙋю, бл҃же́нъ є҆сѝ, прпⷣбне ѻ҆́тче на́шъ, сотвори́вый всѧ̑ заповѣ̑даннаѧ хрⷭ҇то́мъ, ны́нѣ бо ты̀ прославлѧ́емь въ совѣ́тѣ ст҃ы́хъ, созерца́еши сла́вꙋ вседержи́телѧ бг҃а, прославлѧ́ющагѡ просла́вльшихъ є҆го̀.
И҆́ны стїхи̑ры, гла́съ в҃: Подо́бенъ: Є҆гда̀ ѿ дре́ва.
Прпⷣбне ѻ҆́тче а҆мвро́сїе, кто̀ и҆сповѣ́сть трꙋды̀ и҆ болѣ̑зни твоѧ̑, ꙗ҆̀же поне́слъ є҆сѝ ра́ди црⷭ҇твїѧ нбⷭ҇нагѡ; и҆ бы́лъ є҆сѝ ѻ҆́бразъ терпѣ́нїѧ и҆ смире́нїѧ, кро́тости и҆ воздержа́нїѧ, цѣломꙋ́дрїѧ и҆ послꙋша́нїѧ, тѣ́миже ѡ҆богати́лъ є҆сѝ дꙋ́шꙋ твою̀ и҆ стѧжа́лъ є҆сѝ да́ры дх҃а всест҃а́гѡ и҆́мже всѧ́ка дꙋша̀ живи́тсѧ.
Благословлѧ́лъ є҆сѝ гдⷭ҇а на всѧ́кое вре́мѧ въ ра́дости и҆ печа́ли земна́гѡ житїѧ̀, всегда̀ хвала̀ є҆гѡ̀ бы́сть во ᲂу҆стѣ́хъ твои́хъ, да ᲂу҆слы́шатъ кро́тцыи и҆ немощствꙋ́ющїи гла́съ тво́й и҆ возвеселѧ́тсѧ, взыска́лъ бо є҆сѝ гдⷭ҇а и҆ ᲂу҆слы́ша тѧ̀, и҆ ѿ всѣ́хъ скорбе́й твои́хъ и҆зба́ви тѧ̀, пристꙋ́пимъ и҆ мы̀, бра́тїе, къ бг҃ꙋ и҆ просвѣти́мсѧ, и҆ ли́ца на́ша не постыдѧ́тсѧ.
Ст҃ы́й ᲂу҆го́дниче бж҃їй, вѣ́ры правосла́вныѧ ревни́телю, сосꙋ́де бл҃года́ти и҆збра́нный, ди́внымъ житїе́мъ твои́мъ пꙋ́стынь ѻ҆́птина просла́висѧ и҆ всѝ концы̀ землѝ на́шеѧ возра́довашасѧ, тебѣ́ бо всѝ стѧжа́хомъ стѣ́нꙋ и҆ ᲂу҆твержде́нїе, моли́сѧ при́снѡ ко гдⷭ҇ꙋ всеми́лостивомꙋ бг҃ꙋ на́шемꙋ, да сп҃се́тъ дꙋ́шы на́шѧ.
Бг҃облаже́нне ѻ҆́тче а҆мвро́сїе, сꙋ́єтнаѧ и҆ лѡ́жнаѧ мі́ра сегѡ̀ ѿве́рглъ є҆сѝ, непоколеби́мѡ ѡ҆блекі́йсѧ въ ри̑зы мона́шєскїѧ, препобѣди́лъ є҆сѝ въ себѣ̀ вѣ́тхаго человѣ́ка, ᲂу҆гаси́въ разжжє́нныѧ стрѣ́лы вра̑жїѧ, дꙋ́шꙋ свою̀ ꙗ҆́кѡ зѣ́ницꙋ ѻ҆́ка соблю́лъ є҆сѝ невреди́мꙋ, тѣ́мже тѧ̀ всѝ ᲂу҆бл҃жа́емъ.
Сла́ва, гла́съ а҃:
Прїиди́те мона́хѡвъ мно́жество, хвале́бными пѣ́сньми па́мѧть почти́мъ бг҃оно́снагѡ ста́рца а҆мвро́сїа, ѻ҆́птины пꙋ́стыни ᲂу҆краше́нїе, се́ бо ꙗ҆́кѡ фі́нїѯъ насажде́нный въ домꙋ̀ бж҃їемъ процвѣ́лъ и҆ возбл҃гоꙋха́лъ є҆́сть ꙗ҆́кѡ цвѣ́тъ неꙋвѧда́емый, и҆ ны́нѣ предстои́тъ пред̾ цр҃е́мъ нбⷭ҇нымъ, молѧ́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ: Всемі́рнꙋю сла́вꙋ:
Вхо́дъ, прокі́менъ днѐ, и҆ чтє́нїѧ г҃.
Премꙋ́дрости соломѡ́новы чте́нїе.
[Главы̑ є҃ и҆ ѕ҃] Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: и҆ занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѻрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ̑лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе и҆ разꙋмѣ́йте, навы́кните сꙋдїѝ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
Премꙋ́дрости соломѡ́новы чте́нїе.
[Глава̀ г҃] Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ, а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ и҆̀хъ. и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь, разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́новы чте́нїе.
[Глава̀ д҃] Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ́та дѡ́лга: ᲂу҆го́дна бо бѣ̀ гдⷭ҇ви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи́ра хра́ма: и҆ ст҃а́гѡ, гла́съ ѕ҃.
Прпⷣбне ѻ҆́тче на́шъ а҆мвро́сїе, всеѧ̀ рѡссі́и наста́вниче бг҃омꙋ́дрый, же́зле немощны́хъ и҆ стра́ждꙋщихъ, ѻ҆́бразе вѣ́ры и҆ бл҃гоче́стїѧ, проповѣ́дниче смире́нїѧ и҆ терпѣ́нїѧ, моли́твенниче за ѻ҆те́чества на́ше правосла́вное, дне́сь ᲂу҆бл҃жа́емъ чⷭ҇тнꙋ́ю твою̀ па́мѧть, съ вѣ́рою и҆ любо́вїю притека́юще взыва́емъ тѝ дерзнове́ннѡ: молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, гла́съ и҃. Прїиди́те, вѣ́рнїи лю́дїе:
[пи́сана на Гдⷭ҇и воззва́хъ]
И҆ ны́нѣ, бг҃оро́диченъ: Безневѣ́стнаѧ дв҃о:
На стїхо́внѣ стїхи̑ры, гла́съ є҃.
Подо́бенъ: Ра́дꙋйсѧ, живоно́сный крⷭ҇те:
Пѣ́снь воспои́мъ лю́дїе ᲂу҆чи́телю дꙋшесп҃си́тельнагѡ жи́тельства, и҆сто́чникꙋ любвѐ хрⷭ҇то́вой, вели́комꙋ ста́рцꙋ а҆мвро́сїю, мона́хѡвъ пꙋтеводи́телю, а҆́лчꙋщихъ пита́телю, бѣ́дствꙋющымъ помо́щникꙋ, всѣ̑мъ хрⷭ҇тїа́нѡмъ прибѣ́жищꙋ: прїимѝ, ᲂу҆го́дниче бж҃їй, на́шѧ молє́нїѧ, вѣ́рныхъ ча́дъ твои́хъ. чтꙋ́щихъ ст҃ꙋ́ю па́мѧть твою̀.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Пра́зднꙋюще, прпⷣбне ѻ҆́тче, ст҃ꙋ́ю па́мѧть твою̀, бл҃года́рнꙋю пѣ́снь воспѣва́емъ тѝ, ты́ бо вѣ́си нꙋ́жды на́съ ча́дъ твои́хъ, ѡ҆бремене́нныхъ скорбьмѝ мно́гими, помога́еши на́мъ си́лою свы́ше и҆ ѡ҆гражда́еши ꙗ҆́кѡ щи́тъ ѿ всѧ́кихъ де́монскихъ нахожде́нїй, низпосыла́ѧ ве́лїю ми́лость.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Притеце́мъ, бра́тїе, къ и҆сто́чникꙋ свѣ́та и҆́стины бг҃облаже́нномꙋ а҆мвро́сїю, просвѣти́мсѧ є҆гѡ̀ ᲂу҆че́нїѧми дꙋхо́вными и҆ съ вѣ́рою возопїи́мъ кꙋ́пнѡ: прїимѝ на́шѧ моли̑твы и҆ и҆зба́ви на́съ ѿ всѧ́кихъ ѕѡ́лъ и҆ скорбе́й.
Сла́ва, гла́съ и҃:
Наста́вниче всѣ́хъ приходѧ́щихъ къ тебѣ̀, ѻ҆́тче на́шъ а҆мвро́сїе, любвѐ насади́телю, ни́щихъ корми́телю, жа́ждꙋщихъ напои́телю, грѣ́шникѡвъ до́брый и҆справи́телю, невѣ́рныхъ вразꙋми́телю, при́зри на на́съ ча́дъ твои́хъ, чтꙋ́щихъ ст҃ꙋ́ю па́мѧть твою̀.
И҆ ны́нѣ, бг҃оро́диченъ: Безневѣ́стнаѧ дв҃о.
Тропа́рь, гла́съ є҃:
Ꙗ҆́кѡ къ цѣле́бномꙋ и҆сто́чникꙋ притека́емъ къ тебѣ̀, а҆мвро́сїе ѻ҆́тче на́шъ, ты́ бо на пꙋ́ть сп҃се́нїѧ на́съ вѣ́рнѡ наставлѧ́еши, моли́твами ѿ бѣ́дъ и҆ напа́стей ѡ҆хранѧ́еши, въ тѣле́сныхъ и҆ дꙋше́вныхъ ско́рбехъ ᲂу҆тѣша́еши, па́че же смире́нїю, терпѣ́нїю и҆ любвѝ наꙋча́еши, молѝ чл҃вѣколю́бца хрⷭ҇та̀ и҆ застꙋ́пницꙋ ᲂу҆се́рднꙋю сп҃сти́сѧ дꙋша́мъ на́шымъ.
На ᲂу҆́трени,
На Бг҃ъ гдⷭ҇ь: тропа́рь два́жды.
Сла́ва, и҆ ны́нѣ, бг҃оро́диченъ:
По а҃-мъ стїхосло́вїи сѣда́ленъ, гла́съ и҃:
Цр҃ковь ст҃а́ѧ ны́нѣ пра́зднꙋетъ твою̀ честнꙋ́ю па́мѧть, ѻ҆́тче на́шъ а҆мвро́сїе, почита́ющи по́двиги твоегѡ̀ земна́гѡ житїѧ̀, ты́ бо ꙗ҆ви́лсѧ є҆сѝ вои́стиннꙋ ꙗ҆́кѡ рѣка̀ бл҃года́ти дх҃а ст҃а́гѡ, врачꙋ́ѧ не́мѡщи тѣлє́сныѧ и҆ дꙋшє́вныѧ всѣ́хъ прибѣга́ющихъ къ тебѣ̀ съ вѣ́рою и҆ наде́ждою. тѣ́мъ взыва́емъ тебѣ̀ непреста́ннѡ: моли́сѧ хрⷭ҇тꙋ̀ бг҃ꙋ ѡ҆ сп҃се́нїи дꙋ́шъ на́шихъ.
Сла́ва, и҆ ны́нѣ, бг҃оро́диченъ:
Оу҆пова́нїе и҆ прибѣ́жище хрⷭ҇тїа́нѡмъ, бг҃оро́дице приснодв҃о марі́е, не пре́зри ᲂу҆пова́ющихъ на тѧ̀, рабѡ́въ твои́хъ, тре́бꙋемъ во всегда̀ твоеѧ̀ по́мощи и҆ застꙋпле́нїѧ, ꙗ҆́кѡ мт҃и зижди́телѧ всѣ́хъ хрⷭ҇та̀ бг҃а на́шегѡ: тѣ́мъ и҆ велича́емъ ржⷭ҇тво̀ твоѐ, пречⷭ҇таѧ, и҆ вопїе́мъ: ра́дꙋйсѧ, бг҃ора́дованнаѧ влⷣчце: ра́дꙋйсѧ, сп҃се́нїе дꙋша́мъ на́шымъ и҆ ве́лїѧ ми́лость.
И҆ чте́нїе ѿ житїѧ̀.
По в҃-мъ стїхосло́вїи сѣда́ленъ, гла́съ а҃:
Любо́вїю хрⷭ҇то́вою привле́клъ є҆сѝ всѧ̑ концы̀ землѝ на́шеѧ и҆ ᲂу҆чи́лъ є҆сѝ до́бромꙋ хрⷭ҇тїа́нскомꙋ жи́тельствꙋ, терпѣ́нїе и҆ смире́нїе насажда́ѧ въ дꙋша́хъ а҆́лчꙋщихъ сп҃се́нїѧ. наипа́че помога́еши на́мъ, предстоѧ̀ ны́нѣ ᲂу҆ цр҃ѧ̀ ца́рствꙋющихъ и҆ влⷣки жи́зни вѣ́чныѧ, да поми́лꙋетъ недосто́йныхъ ра̑бъ свои́хъ и҆ сп҃се́тъ дꙋ́шы на́шѧ.
Сла́ва, и҆ ны́нѣ: бг҃оро́диченъ:
Тѧ̀, прест҃а́ѧ бг҃оро́дице, а҆́гг҃ли пою́тъ непреста́ннѡ, ꙗ҆́кѡ содѣ́телѧ тѣ́хъ и҆ бг҃а на́шего несказа́ннѡ во чре́вѣ твое́мъ заче́нши, родила̀ є҆сѝ неискꙋсомꙋ́жнѡ во сп҃се́нїе на́ше и҆ и҆збавле́нїе: є҆го́же и҆ мо́лиши при́снѡ, сꙋ́щымъ на землѝ здра́вїе дарова́ти, и҆ мі́рꙋ всемꙋ̀ ᲂу҆мире́нїе. тѣ́мже и҆ зове́мъ тѝ: ра́дꙋйсѧ, всѣ́хъ родѡ́въ весе́лїе: ра́дꙋйсѧ, дв҃о, хрⷭ҇тїа́нъ похвало̀.
По полѷеле́и сѣда́ленъ, гла́съ и҃:
Досто́йнѡ восхва́лимъ, бра́тїе, по́двиги всеѧ̀ рѡссі́и чꙋдотво́рца прпⷣбнагѡ ѻ҆тца̀ на́шегѡ а҆мвро́сїа, возше́дшагѡ на высотꙋ̀ лѣ́ствицы дꙋхо́вныѧ и҆ просла́вльшагѡ бг҃а соверше́нствомъ добродѣ́телей дꙋшесп҃си́тельныхъ, и҆ па́ки воспои́мъ со ᲂу҆миле́нїемъ серде́цъ на́шихъ, зовꙋ́щихъ: ра́дꙋйсѧ, а҆мвро́сїе. ѻ҆́тче ст҃ы́й, до́брый наста́вниче бл҃гоче́стїѧ.
Сла́ва, и҆ ны́нѣ: бг҃оро́диченъ:
Дв҃о пренепоро́чнаѧ и҆ неискꙋсобра́чнаѧ марі́е, при́зри и҆ посѣтѝ рабѡ́въ твои́хъ, вѣ́рнѡ пою́щихъ и҆ хва́лѧщихъ тѧ̀ во хра́мѣ твое́мъ, препѣ́таѧ: ра́дꙋйсѧ, бг҃облагода́тнаѧ бг҃оро́дице всепѣ́таѧ: ра́дꙋйсѧ сп҃се́нїе на́ше и҆ ᲂу҆твержде́нїе: ра́дꙋйсѧ, просвѣти́вшаѧ ро́дъ на́шъ свѣтоно́снымъ ржⷭ҇тво́мъ сн҃а твоегѡ̀ и҆ бг҃а на́шегѡ, и҆́мже и҆скорени́сѧ ле́сть бѣсо́вскаѧ: ра́дꙋйсѧ, совокꙋпи́вшаѧ дѡ́льнаѧ нбⷭ҇нымъ. ра́дꙋйсѧ, невѣ́сто неневѣ́стнаѧ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Є҆ѵⷢ҇лїе ѿ матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃.
Бг҃оно́сный ѻ҆́тче на́шъ а҆мвро́сїе, въ хрⷭ҇топодража́тельномъ житїѝ свое́мъ стѧжа́лъ є҆сѝ плоды̀ дꙋхѡ́вныѧ, любо́вь, ми́ръ, ра́дость, долготерпѣ́нїе, бла́гость, милосе́рдїе, вѣ́рꙋ, кро́тость, воздержа́нїе, пло́ть распѧ́въ со страстьмѝ и҆ похотьмѝ, тѧготы̀ дрꙋги́хъ поне́слъ є҆сѝ и҆ та́кѡ и҆спо́лнилъ є҆сѝ зако́нъ хрⷭ҇то́въ, достобл҃же́нне ѻ҆́тче, моли́сѧ ѡ҆ сп҃се́нїи дꙋ́шъ на́шихъ.
Канѡ́нъ бг҃оро́дицы и҆ ст҃а́гѡ, гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ крⷭ҇тоѡбра́знѡ порази́въ и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща.
Цр҃ковь ны́нѣ торжествꙋ́етъ, свѣ́тло пра́зднꙋющи твою̀ ст҃ꙋ́ю па́мѧть, и҆ съ ра́достїю воспѣва́етъ тѝ хвале́бнꙋю пѣ́снь, сла́вѧщи гдⷭ҇а, ди́внаго во ст҃ы́хъ свои́хъ.
Позна́лъ є҆сѝ сла́дость жи́зни во хрⷭ҇тѣ̀ и҆ неѡбинꙋ́ѧсѧ ѡ҆ста́вилъ є҆сѝ пре́лесть земны́хъ бла̑гъ и҆ сꙋетꙋ̀ мі́ра, всего̀ себѐ покори́въ бг҃ꙋ.
Кто̀ и҆зочте́тъ по́двиги твоѧ̑, ꙗ҆̀же поне́слъ є҆сѝ ра́ди црⷭ҇твїѧ нбⷭ҇нагѡ, въ пѣ́нїи, бдѣ́нїи и҆ поще́нїи ᲂу҆твержда́ѧ дꙋ́хъ сво́й.
Восходи́лъ є҆сѝ ѿ си́лы въ си́лꙋ въ добродѣ́ланїи за́повѣдей хрⷭ҇то́выхъ и҆ стѧжа́лъ є҆сѝ да́ръ дх҃а ст҃а́гѡ, є҆гѡ́же дѣ́йствїемъ сп҃слъ є҆сѝ мнѡ́гїѧ дꙋ́шы хрⷭ҇тїа̑нскїѧ.
Бг҃оро́диченъ:
Бг҃оро́дице приснодв҃о, марі́е, простри́ ми ми́лостивнѣ десни́цꙋ на по́мощь, ᲂу҆молѧ́ющи сн҃а твоего̀ и҆ бг҃а: ꙗ҆́кѡ ᲂу҆ѧ́звленъ є҆́смь лю́тѣ, и҆ на тѧ̀ то́чїю наде́ждꙋ мою̀ положи́хъ, ты́ мѧ ᲂу҆ще́дри.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃.
І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ па́че тебє̀, є҆ди́не чл҃вѣколю́бче.
Послꙋша́нїемъ соверше́ннымъ ѿве́рглсѧ є҆сѝ во́ли своеѧ̀ и҆ тѣ́мъ стра̑сти сꙋщества̀ па́дшагѡ а҆да́ма ѿри́нꙋлъ є҆сѝ, всего̀ себѐ преда́въ води́тельствꙋ бг҃омꙋ́дрыхъ ста́рцєвъ и҆ ѻ҆тцє́въ пꙋ́стыни, и҆̀же и҆ возрасти́ тѧ въ мѣ́рꙋ во́зраста дꙋхо́внагѡ.
Цѣломꙋ́дрїѧ красотꙋ̀ стѧжа́ла є҆́сть твоѧ̀ чи́стаѧ дꙋша̀, си́лою покаѧ́нїѧ совле́кшисѧ вѣ́тхагѡ человѣ́ка и҆ въ дꙋхо́вномъ преꙋспѣ́ѧнїи ѡ҆бле́кшисѧ во хрⷭ҇та̀.
Бога̑тства тлѣ́ннагѡ мі́ра возненави́дѣлъ є҆сѝ и҆ бы́лъ ꙗ҆́кѡ стра́нникъ и҆ прише́лецъ на землѝ, взыскꙋ́ѧ гра́да нбⷭ҇нагѡ, тѣ́мже домовлⷣка введе́ тѧ въ черто́гъ сла́вы своеѧ̀.
Хрⷭ҇то́съ бг҃ъ ѡ҆богати́ тѧ да́ромъ чꙋде́съ и҆ мнѡ́гїѧ болѣ̑зни стра́ждꙋщихъ и҆сцѣли́лъ є҆сѝ, не ѡ҆ста́ви на́съ, ча́ющихъ ѿ тебѐ бл҃года́тнꙋю по́мощь.
Бг҃оро́диченъ:
Наде́жда и҆ ᲂу҆пова́нїе на́ше, влⷣчце мі́ра, бл҃га́ѧ помо́щнице, сп҃сѝ и҆ въ крѣ́пости ро́гъ вознесѝ правосла́вныхъ и҆ лю́ди на́шѧ ѿ всѧ́кихъ бѣ́дъ и҆ ѿ разли́чныхъ ѡ҆бстоѧ́нїй свободѝ.
Сѣда́ленъ, гла́съ д҃:
Ли́къ мона́хѡвъ ны́нѣ славосло́витъ тѧ̀, прпⷣбне ѻ҆́тче на́шъ а҆мвро́сїе, ᲂу҆бл҃жа́ѧ честнꙋ́ю па́мѧть твою̀, и҆ всѧ̀ ѻ҆би́тель въ ра́дости торжествꙋ́етъ, почита́ющи твоѐ чи́стое въ добродѣ́телѧхъ житїѐ и҆ мно́жество чꙋдотворе́нїй, тобо́ю произлива́емыхъ, тѣ́мже мы̀ всѝ вкꙋ́пѣ вопїе́мъ: сп҃са́й на́съ моли́твами твои́ми, а҆мвро́сїе, ѻ҆́тче на́шъ.
Два́жды.
Сла́ва, и҆ ны́нѣ, бг҃оро́диченъ:
Под̾ твоѐ бл҃гоꙋтро́бїе притека́юще, мо́лимъ, бг҃оро́дице дв҃о, не пре́зри рыда́нїѧ на́шегѡ и҆ моли́твы, но ᲂу҆скорѝ и҆зба́вити ѿ бѣ́дъ и҆ скорбе́й лю́ди без̾ѿвѣ̑тныѧ: ты́ бо є҆ди́на є҆сѝ и҆звѣ́стнѣйшее хрⷭ҇тїа́нѡмъ ᲂу҆пова́нїе, и҆ къ тебѣ̀ прибѣга́юще всѝ спаса́емсѧ.
Пѣ́снь д҃.
І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
И҆збра́нный сосꙋ́дъ дх҃а ст҃а́гѡ бы́лъ є҆сѝ и҆ то́ки чꙋде́съ и҆зли́лъ є҆сѝ, прїимѝ на́шѧ моли̑твы и҆ и҆сцѣлѝ на́съ ѿ ра́нъ грѣхо́вныхъ и҆ страсте́й.
Позна́вый си́лꙋ моли́твы во сп҃се́нїе дꙋшѝ, наꙋчѝ на́съ дꙋшеполе́знѡ моли́тисѧ ко и҆зба́вителю всѣ́хъ ми́лостивомꙋ сп҃сꙋ.
Вѣ́рꙋ и҆́стиннꙋю правосла́внꙋю ᲂу҆твердѝ въ лю́дехъ твои́хъ, чтꙋ́щихъ тѧ̀ ꙗ҆́кѡ ревни́телѧ хрⷭ҇то́ва.
Что̀ воздади́мъ тѝ, пребл҃же́нне ѻ҆́тче на́шъ, за всѧ̑ ꙗ҆̀же возда́лъ є҆сѝ на́мъ, ча́дѡмъ твои̑мъ, чтꙋ́щымъ твою̀ честнꙋ́ю па́мѧть.
Бг҃оро́диченъ:
И҆зъ твои́хъ пречⷭ҇тыхъ чре́слъ, бг҃ороди́тельнице, сло́во бж҃їе произы́де несказа́ннѡ, є҆го́же ѡ҆б̾е́мши, ѿ ѕѡ́лъ и҆зба́вити ᲂу҆молѝ зовꙋ́щихъ: сла́ва си́лѣ твое́й, гдⷭ҇и.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆̀ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Свѣ́томъ ᲂу҆че́нїѧ хрⷭ҇то́ва просвѣще́нный, мра́къ заблꙋжде́нїѧ грѣхо́внагѡ ѿме́лъ є҆сѝ, наста́ви во свѣ́тѣ повелѣ́нїй бж҃їихъ и҆ на́съ, ѡ҆мраче́нныхъ страстьмѝ.
Но́ваѧ свѣща̀ возсїѧ̀ тобо́ю, ѻ҆́тче, на землѝ рѡссі́йстѣй, ѡ҆зарѧ́ѧ свѣ́томъ любвѐ бж҃е́ственныѧ всѧ̀ дѡ́льнаѧ. просвѣтѝ, бг҃оно́се, на́съ, недосто́йныхъ ча́дъ твои́хъ, свѣ́томъ за́повѣдей хрⷭ҇та̀.
Возлюби́лъ є҆сѝ бли́жнѧго и҆ под̾ѧ́лъ є҆сѝ є҆гѡ̀ бре́мѧ грѣхѡ́въ и҆ скорбе́й, да ᲂу҆́зритъ свѣ́тъ и҆́стины и҆ и҆спра́витъ стопы̑ своѧ̑ къ дѣ́ланїю за́повѣдей хрⷭ҇то́выхъ.
Оу҆наслѣ́довалъ є҆сѝ црⷭ҇тво нбⷭ҇ное, и҆дѣ́же пра́зднꙋющихъ гла́съ непреста́нный и҆ безконе́чнаѧ сла́дость зрѧ́щихъ лица̀ добро́тꙋ бг҃а неизрече́ннꙋю.
Бг҃оро́диченъ:
Нескве́рнаѧ а҆́гница и҆ бг҃оѻтрокови́це марі́е, твои́ми моли́твами ᲂу҆крѣпи́вшисѧ, ст҃і́и побѣди́ша бѣсѡ́вскїѧ си̑лы: тѣ́мже и҆ на́мъ, ᲂу҆пова́ющымъ на тѧ̀, ско́рѡ предста́ни въ по́мощь, да посра́мѧтсѧ и҆ падꙋ́тъ всѝ, ꙗ҆влѧ́ющїи рабѡ́мъ ѕла̑ѧ.
Пѣ́снь ѕ҃.
І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Крѣ́пкое застꙋпле́нїе бꙋ́ди всѣ̑мъ, притека́ющымъ къ твое́й по́мощи въ недꙋ́зѣхъ и҆ печа́лехъ, ѻ҆́тче на́шъ а҆мвро́сїе, ѻ҆́птинскїѧ ѡ҆би́тели вели́кїй ста́рче.
И҆зба́ви на́съ ѿ кова́рства лꙋка́выхъ дꙋхѡ́въ и҆ и҆зведѝ и҆зъ глꙋбины̀ грѣхо́вныѧ, да ѡ҆чи́ститъ на́съ хрⷭ҇то́съ бг҃ъ ѿ беззако́нїй на́шихъ и҆ сп҃се́тъ дꙋ́шы на́шѧ.
Ка́кѡ рце́мъ твоѧ̀ благодѣѧ̑нїѧ лю́демъ, стра́ждꙋщымъ и҆ ᲂу҆ничижє́ннымъ; ка́кѡ воспои́мъ тѝ бл҃года́рственнꙋю пѣ́снь; прїимѝ ны́нѣ пѣ́снь хвале́бнꙋю недосто́йныхъ ча́дъ твои́хъ.
Посѣтѝ на́шѧ не́мѡщи по ми́лости твое́й, и҆сцѣлѝ ꙗ҆́звы дꙋхѡ́вныѧ си́лою да́нною тѝ свы́ше бл҃года́ти, да воста́немъ ѿ ме́ртвеннагѡ сна̀ грѣхо́внагѡ.
Бг҃оро́диченъ:
Пѣсносло́вѧще, чⷭ҇таѧ, и҆зъ ᲂу҆тро́бы твоеѧ̀ вопло́щшагосѧ, тѧ̀ славосло́вимъ, ꙗ҆́кѡ бж҃їю мт҃рь.
Конда́къ, гла́съ в҃:
Завѣ́тъ пастыренача́льника и҆спо́лнивъ, ста́рчества бл҃года́ть наслѣ́довалъ є҆сѝ, болѣ́знꙋѧ се́рдцемъ ѡ҆ всѣ́хъ съ вѣ́рою притека́ющихъ къ тебѣ̀, тѣ́мже и҆ мы̀, ча̑да твоѧ̑, съ любо́вїю вопїе́мъ тѝ: ѻ҆́тче ст҃ы́й а҆мвро́сїе, молѝ хрⷭ҇та̀ бг҃а сп҃сти́сѧ дꙋша́мъ на́шымъ.
І҆́косъ:
Доброзра́чное житїѐ показа́лъ є҆сѝ и҆ свои́ми добродѣ́тельми ѡ҆зари́лъ є҆сѝ всю̀ зе́млю рꙋ́сскꙋю, привле́клъ є҆сѝ къ себѣ̀ всѧ̑ концы̀ ѻ҆те́чества на́шегѡ, ѡ҆кормлѧ́ѧ неизче́тнꙋю па́ствꙋ вѣ́рныхъ ча́дъ твои́хъ, и҆̀хже съ любо́вїю призрѣ́лъ є҆сѝ ꙗ҆́кѡ ѻ҆те́цъ чадолюби́вый и҆ ми́лостивый. тѣ́мже сте́кшисѧ въ де́нь преставле́нїѧ твоегѡ̀, во ᲂу҆миле́нїи зове́мъ: ра́дꙋйсѧ, подви́жниче бл҃гоче́стїѧ, воспрїе́мый бога̑тыѧ да́ры дх҃а всест҃а́гѡ: ра́дꙋйсѧ, высото̀ смире́нїѧ и҆ терпѣ́нїѧ, и҆́миже наꙋча́еши вѣ́рныхъ ча́дъ свои́хъ: ра́дꙋйсѧ, дре́во плодоно́сное, и҆́мже напита́лъ є҆сѝ мно́жество а҆́лчꙋщихъ жи́зни вѣ́чныѧ: ра́дꙋйсѧ, цвѣ́те бл҃гоꙋха́нный любвѐ бж҃е́ственныѧ, є҆́юже ᲂу҆тѣша́ютсѧ скорбѧ́щїи и҆ болѣ́знꙋющїи. ра́дꙋйсѧ, и҆сто́чниче приснотекꙋ́щїй чꙋде́съ и҆ бл҃готворе́нїй, ѿ ни́хже болѧ́щїи и҆сцѣлева́ютъ и҆ ги́бнꙋщїи сп҃са́ютсѧ: ра́дꙋйсѧ, дерзнове́нный хода́таю на́шъ пред̾ пра́веднымъ сꙋдїе́ю: ра́дꙋйсѧ, помо́щниче на́шъ пресла́вный во всѣ́хъ ѡ҆бстоѧ́нїихъ. ра́дꙋйсѧ, бг҃омꙋ́дре а҆мвро́сїе, вели́кїй ста́рче всерѡссі́йскїй.
Пѣ́снь з҃.
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Пресели́лсѧ є҆сѝ въ гѡ́рнїѧ черто́ги и҆ та́мѡ зри́ши сла́вꙋ неизрече́ннꙋю превѣ́чнагѡ бг҃а, зовѧ̀: бл҃гослове́нъ є҆сѝ, бж҃е ѻ҆тє́цъ на́шихъ.
Въ со́нмѣ ст҃ы́хъ ᲂу҆го́дникѡвъ ны́нѣ прославлѧ́еши премꙋ́драго творца̀ и҆ гдⷭ҇а си́лъ, воспѣва́ѧ: бл҃гослове́нъ є҆сѝ, бж҃е ѻ҆тє́цъ на́шихъ.
Съ ли́ки а҆́гг҃лѡвъ и҆ а҆рха́гг҃лѡвъ предстои́ши пред̾ лице́мъ вседержи́телѧ и҆ та́мѡ немо́лчнѡ пое́ши: бл҃гослове́нъ є҆сѝ, бж҃е ѻ҆тє́цъ на́шихъ.
Вни́де въ ра́дость гдⷭ҇а, ꙗ҆́кѡ до́брый и҆ вѣ́рный ра́бъ є҆гѡ̀ бы́лъ на землѝ, и҆ ны́нѣ на нб҃сѣ́хъ взыва́еши: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Ви́ждь, влⷣчце, дꙋшѝ моеѧ̀ ѕлосмра̑дныѧ ра̑ны и҆́хже самохо́тнѣ под̾ѧ́хъ ѻ҆каѧ́нный, и҆ не могꙋ̀ приложи́ти пла́стырѧ, но є҆́ле жи́въ сы́й вопїю̀: ми́лостива мнѣ̀ врача̀ всѣ́хъ и҆ бг҃а ма́терними твои́ми мл҃твами сотворѝ, ꙗ҆́кѡ да воспою́ ти: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̀ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Цр҃ковь ны́нѣ ликовствꙋ́етъ, пра́зднꙋюще бл҃же́ннꙋю па́мѧть твою̀, достохва́льне ѻ҆́тче, и҆ съ ра́достїю пое́тъ: да бл҃гослови́тъ всѧ̀ тва́рь гдⷭ҇а и҆ превозно́ситъ є҆го̀ во вѣ́ки.
Собра́шасѧ ны́нѣ въ ѻ҆би́тели ст҃ѣ́й мона́хѡвъ мно́жество, ᲂу҆бл҃жа́ющихъ твою̀ честнꙋ́ю па́мѧть и҆ пою́щихъ съ ра́достїю: да бл҃гослови́тъ всѧ̀ тва́рь гдⷭ҇а и҆ превозно́ситъ є҆го̀ во вѣ́ки.
Па́стырїе и҆ ᲂу҆чи́телїе стеко́шасѧ въ се́й гра́дъ ѻ҆би́тельный, и҆дѣ́же въ добродѣ́телехъ ты̀ процвѣ́лъ є҆сѝ, поѧ̀: да бл҃гослови́тъ тва́рь всѧ̀ гдⷭ҇а и҆ превозно́ситъ є҆го̀ во вѣ́ки.
Ста́рїи и҆ младі́и, си́льнїи и҆ немощні́и прїидо́ша ны́нѣ въ до́мъ гдⷭ҇ень просла́вити прпⷣбнаго ста́рца и҆ ѻ҆тца̀, вопїю́ще: да бл҃гослови́тъ тва́рь всѧ̀ гдⷭ҇а и҆ превозно́ситъ є҆го̀ во вѣ́ки.
Бг҃оро́диченъ:
Ѿ тебѐ, прест҃а́ѧ бг҃оро́дице, и҆злїѧ́сѧ вода̀ живо́тнаѧ, на ѡ҆мове́нїе скве́рны всемі́рныѧ, є҆́юже бл҃говолѝ и҆ моѐ се́рдце прохлади́ти, и҆ ѡ҆кропи́ти росо́ю моли́твъ въ кро́вѣ кри́лъ твои́хъ во всѧ̑ вѣ́ки.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ чл҃вѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀, бг҃оро́дицꙋ, а҆́гг҃лѡвъ и҆ чл҃вѣ̑къ чинонача̑лїѧ велича́ютъ.
Проповѣ́дꙋетъ ны́нѣ правосла́внаѧ цр҃ковь по́двиги твоѧ̑, ꙗ҆́кѡ всерѡссі́йскагѡ ᲂу҆го́дника бж҃їѧ, и҆ чти́тъ твою̀ па́мѧть, восхвалѧ́ющи твоѐ а҆гг҃лоподо́бное житїѐ.
При́зри съ нб҃сѐ, ѻ҆́тче на́шъ а҆мвро́сїе, на вѣ̑рныѧ лю́ди твоѧ̑ и҆ низпослѝ свы́ше рꙋ́кꙋ по́мощи всѣ̑мъ, покланѧ́ющымсѧ честно́мꙋ ѻ҆́бразꙋ твоемꙋ̀.
Оу҆слы́ши гла́съ моле́нїѧ на́шегѡ, посѣтѝ ми́лостїю твое́ю болѣ̑зни и҆ не́мѡщи ча́дъ твои́хъ, съ вѣ́рою къ тебѣ̀ прибѣга́ющихъ, досточꙋ́дне ѻ҆́тче на́шъ.
Припа́даемъ во ᲂу҆миле́нїи серде́цъ на́шихъ къ стопа́мъ твои̑мъ, вели́кїй ста́рче землѝ на́шеѧ, про́симъ и҆ мо́лимъ: не забꙋ́ди посѣща́ти чтꙋ́щыѧ пречестнꙋ́ю па́мѧть твою̀.
Бг҃оро́диченъ:
Ко́е тебѣ̀ дарова́нїе принесе́мъ, бг҃оро́дице: и҆лѝ что̀ вѣща́ти и҆́мамы грѣ́шнїи: то́чїю ᲂу҆ми́льнѡ вопїе́мъ молѧ́щесѧ: сп҃сѝ рабы̑ твоѧ̑, бг҃облагода́тнаѧ ѻ҆трокови́це, ꙗ҆́кѡ да тѧ̀ при́снѡ велича́емъ.
Свѣти́ленъ:
Мона́шескагѡ ѻ҆́браза житїѐ и҆збра́въ непрело́жнѡ, и҆ ѿри́нꙋвъ мі́ра сегѡ̀ сꙋетꙋ̀ и҆ сла́вꙋ, всели́лсѧ є҆сѝ въ ѻ҆би́тель бг҃оро́дицы, прпⷣбне ѻ҆́тче на́шъ а҆мвро́сїе, и҆ процвѣ́лъ є҆сѝ ꙗ҆́кѡ крі́нъ се́льный, мы́ же чтꙋ́ще ст҃ꙋ́ю па́мѧть твою̀, зове́мъ тѝ: бꙋ́ди на́мъ помо́щникъ и҆ застꙋ́пникъ въ бѣда́хъ и҆ ско́рбехъ ѡ҆бстоѧ́щихъ.
Сла́ва и҆ ны́нѣ, бг҃оро́диченъ:
Ра́дꙋйсѧ, тебѣ̀ зове́мъ, бл҃гослове́ннаѧ бг҃оро́дице дв҃о, ꙗ҆́кѡ тобо́ю присносꙋ́щныѧ ра́дости прича̑стницы бы́хомъ. живо́тъ бо на́шъ и҆ сп҃се́нїе недомы́слимо и҆ превы́шѣ є҆стества̀ родила̀ є҆сѝ, сегѡ̀ ра́ди непреста́ннѡ ᲂу҆бл҃жа́ютъ тѧ̀ ро́дове родѡ́въ, ꙗ҆́коже пре́жде прорекла̀ є҆сѝ.
На хвали́техъ стїхи̑ры на д҃, гла́съ ѕ҃:
Восхва́лимъ, вѣ́рнїи лю́дїе, достобл҃же́ннꙋю па́мѧть прпⷣбнагѡ а҆мвро́сїа, вели́кагѡ ста́рца ѻ҆́птинскагѡ, всеѧ̀ рѡссі́и чꙋдотво́рца, то́й бо сконча́въ земно́е стра́нствїе, вни́де въ ѻ҆би́тель цр҃ѧ̀ нбⷭ҇нагѡ и҆ зри́тъ та́мѡ красотꙋ̀ неизрече́ннꙋю, вчини́всѧ съ ли̑ки безпло́тныхъ, пое́тъ съ ни́ми пѣ́снь трист҃ꙋ́ю въ трⷪ҇цѣ сла́вимомꙋ бг҃ꙋ.
Возра́дꙋемсѧ, бра́тїе, пра́зднꙋюще свѣ́тлꙋю па́мѧть бг҃оно́снагѡ ста́рца а҆мвро́сїа, ᲂу҆чи́телѧ бл҃гоче́стїѧ, проповѣ́дника любвѐ хрⷭ҇то́вой, є҆го́же бг҃ъ сотворѝ сосꙋ́домъ и҆збра́ннымъ бл҃года́ти своеѧ̀ живоно́сныѧ. воспои́мъ, зовꙋ́ще: молѝ, ѻ҆́тче, всеще́драго бг҃а сп҃сти́сѧ дꙋша́мъ на́шымъ.
Пребл҃же́нне ѻ҆́тче а҆мвро́сїе, вонмѝ гла́сꙋ дꙋ́шъ на́шихъ, ча́ющихъ твоеѧ̀ ми́лости, се́ бо скѡ́рби и҆ нꙋ́жды превзыдо́ша главꙋ̀ на́шꙋ и҆ нѣ́сть и҆сцѣле́нїѧ пло́ти на́шеѧ. прїидѝ и҆ помозѝ всѣ̑мъ, чтꙋ́щымъ твою̀ ст҃ꙋ́ю па́мѧть.
Цр҃ковь рꙋ́сскаѧ ны́нѣ пра́зднꙋетъ твою̀ прехва́льнꙋю па́мѧть, бг҃омꙋ́дре ѻ҆́тче а҆мвро́сїе, прославлѧ́ѧ твоѐ земно́е житїѐ. є҆́же ᲂу҆краси́лъ є҆сѝ добродѣ̑тели хрⷭ҇то́выми. не премолчѝ за ны̀ ко гдⷭ҇ꙋ въ твои́хъ те́плыхъ моли́твахъ, да сп҃се́тъ дꙋ́шы на́шѧ.
Сла́ва, гла́съ и҃:
Бꙋ́ди помо́щникъ и҆ застꙋ́пникъ на́мъ, ѡ҆бꙋрева́ємымъ въ пꙋчи́нѣ жите́йскагѡ мо́рѧ, бг҃облаже́нне ѻ҆́тче а҆мвро́сїе, до́брый па́стырю и҆ дѣ́лателю жа́твы мно́гїѧ, тебе́ бо всѝ вѣ́мы ꙗ҆́кѡ ми́лостиваго чꙋдотво́рца, ско́раго врача̀ дꙋ́шъ и҆ тѣле́съ на́шихъ, крѣ́пкаго моли́твенника пред̾ бг҃омъ ѡ҆ сп҃се́нїи дꙋ́шъ на́шихъ.
И҆ ны́нѣ, бг҃оро́диченъ:
Влⷣчце, прїимѝ моли̑твы ра́бъ твои́хъ и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Славосло́вїе вели́кое, и҆ ѿпꙋ́стъ.
На лїтꙋргі́и.
Бл҃жє́нны ѿ канѡ́на, пѣ̑сни г҃ и҆ ѕ҃.
Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.