← претходни дан | Минеј — Октобар | следећи дан →
13 октября: Иверской иконы Пресвятой Богородицы
Мѣ́сѧца тогѡ́же въ г҃і-й де́нь.
Слꙋ́жба прест҃ѣ́й бцⷣѣ, въ че́сть и҆ па́мѧть ꙗ҆вле́нїѧ чꙋдотво́рныѧ є҆ѧ̀ і҆кѡ́ны, нарица́емыѧ і҆́верскїѧ.
На ма́лѣй вече́рни,
На Гдⷭ҇и воззва́хъ, стїхи̑ры, гла́съ а҃:
Прїиди́те, всѝ лю́дїе, вѣ́рою соше́дшесѧ, просла́вимъ влⷣчцꙋ бцⷣꙋ, застꙋ́пницꙋ ро́да на́шегѡ, и҆ ѡ҆бстоѧ́ще честнꙋ́ю і҆кѡ́нꙋ, любе́знѡ ѡ҆блобыза́имъ ю҆̀, глаго́люще: ра́дꙋйсѧ, пречⷭ҇таѧ дв҃о: ра́дꙋйсѧ, мт҃и гдⷭ҇а вы́шнѧгѡ: ра́дꙋйсѧ, покро́ве и҆ сп҃се́нїе дꙋ́шъ на́шихъ.
Ра́дꙋйсѧ, а҆ѳѡ́нскаѧ горо̀: сла́ва бо гдⷭ҇нѧ на тебѣ̀ возсїѧ̀. ꙗ҆́кѡ бо многосвѣ́тлаѧ ѕвѣзда̀ прїи́де ѿ восто́ка къ за́падꙋ, въ столпѣ̀ ѻ҆́гненнѣ, ꙗ҆ви́сѧ і҆кѡ́на бг҃ома́тере, ѡ҆зарѧ́ющи а҆ѳѡ́нъ свои́мъ прише́ствїемъ.
Ꙗ҆́коже мѡѷсе́ю въ сїна́и кꙋпина̀ ꙗ҆ви́сѧ и҆ногда̀, ѻ҆гне́мъ ᲂу҆́бѡ ѡ҆палѧ́ема, и҆ невреди́ма пребы́вши: та́кѡ и҆ всенепоро́чныѧ сщ҃е́нный ѻ҆́бразъ ѻ҆гне́мъ ѡ҆дѣва́етсѧ, и҆ неѡпали́мь пребыва́етъ, ѡ҆свѧща́ѧ взира́ющыѧ съ вѣ́рою на него̀.
Грѧди́те ра́достнѡ, и҆́нокѡвъ а҆ѳѡ́нскихъ ли́цы, почерпи́те бл҃года́ть неѡскꙋ́днꙋю ѿ і҆кѡ́ны бг҃ома́тере, ѻ҆гне́мъ блиста́ющїѧсѧ, и҆ прїими́те ю҆̀ съ вѣ́рою и҆ любо́вїю: ꙗ҆́кѡ во стѣ́нꙋ и҆ ѡ҆гражде́нїе ѡ҆би́телемъ ва́шымъ пресла́внѡ да́рꙋетсѧ, да покры́етъ ва́съ ѿ всѣ́хъ вра̑гъ ви́димыхъ и҆ неви́димыхъ.
Сла́ва, и҆ ны́нѣ, гла́съ є҃:
Прїиди́те, лю́дїе, чꙋдотво́рномꙋ и҆ всечестно́мꙋ поклони́мсѧ бж҃їѧ мт҃ре ѻ҆́бразꙋ, є҆го́же дарова̀ ѻ҆би́тели і҆́верстѣй, ꙗ҆́кѡ стра́жа неꙋсы́пна и҆ неѡбори́ма: ѡ҆гражда́етъ бо ст҃ꙋ́ю ѻ҆би́тель и҆ всѧ̑ живꙋ́щыѧ на а҆ѳѡ́нѣ свои́мъ покро́вомъ, и҆ да́рꙋетъ ѻ҆би̑льныѧ да́ры и҆сцѣле́нїй ѿ неистощи́магѡ и҆сто́чника ст҃ы́ѧ і҆кѡ́ны всѣ̑мъ тꙋ́ю почита́ющымъ. тѣ́мже воспѣва́юще воззове́мъ первоѡбра́знѣй: ра́дꙋйсѧ, мі́рови по́моще и҆ ᲂу҆тѣше́нїе дꙋ́шъ на́шихъ.
Прокі́менъ днѐ.
На стїхо́внѣ стїхи̑ры, гла́съ в҃:
Вмѣсти́лище чи́стое свѣ́та пречи́стагѡ, бцⷣе, сла́вимъ тѧ̀ и҆ пое́мъ рабѝ твоѝ, ꙗ҆́кѡ ꙗ҆вле́нїемъ пречестны́ѧ твоеѧ̀ і҆кѡ́ны на́съ ѡ҆свѧща́еши.
Сті́хъ: Воскреснѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀.
Сла́ва тебѣ̀, хрⷭ҇тѐ цр҃ю̀, сла́ва мно́гомꙋ ѡ҆ на́съ милосе́рдїю: и҆́бо дарова́лъ є҆сѝ і҆кѡ́нꙋ твоеѧ̀ пречⷭ҇тыѧ мт҃ре, бл҃года́ти то́ки на́мъ неѡскꙋ́днѡ и҆злива́ющꙋю.
Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.
Дне́сь, бл҃говѣ́рнїи лю́дїе, свѣ́тлѡ пра́зднꙋемъ, ѡ҆сѣнѧ́еми і҆кѡ́ны бг҃ома́тере прише́ствїемъ, съ вѣ́рою прїе́млюще въ не́й стра́жа на́мъ неѿстꙋ́пна, и҆ возопїи́мъ бцⷣѣ: покры́й на́съ ѿ всѧ́кагѡ ѕла̀, и҆ сп҃сѝ дꙋ́шы на́шѧ.
Сла́ва, и҆ ны́нѣ, гла́съ ѕ҃:
Притеце́мъ къ ти́хомꙋ приста́нищꙋ и҆ застꙋ́пницѣ ро́да на́шегѡ дв҃ѣ мр҃і́и, поклони́мсѧ честно́мꙋ є҆ѧ̀ а҆́гг҃лы почита́емомꙋ ѻ҆́бразꙋ, ᲂу҆ми́льнѡ зовꙋ́ще: при́зри, бл҃госе́рдаѧ мт҃и, на лю̑тыѧ скѡ́рби, на́съ ѡ҆бдержа́щыѧ, и҆ и҆сцѣлѝ болѣ̑зни дꙋ́шъ на́шихъ.
Тропа́рь бцⷣѣ, гла́съ а҃:
Де́рзость ненави́дѧщихъ ѻ҆́бразъ гдⷭ҇ень и҆ держа́ва нечести́выхъ безбо́жнѡ въ нїке́ю прїи́де, и҆ по́сланнїи безчеловѣ́чнѡ вдови́цꙋ, бл҃гоче́стнѡ чтꙋ́щꙋю і҆кѡ́нꙋ бг҃ома́тере, и҆стѧзꙋ́ютъ. но та́ѧ но́щїю съ сы́номъ і҆кѡ́нꙋ въ мо́ре пꙋстѝ, вопїю́щи: сла́ва тебѣ̀, чⷭ҇таѧ, ꙗ҆́кѡ непроходи́мое мо́ре плещы̀ своѧ̑ подадѐ: сла́ва правоше́ствїю твоемꙋ̀, є҆ди́на нетлѣ́ннаѧ.
Сла́ва, и҆ ны́нѣ: и҆́нъ тропа́рь, гла́съ то́йже:
Ѿ ст҃ы́ѧ і҆кѡ́ны твоеѧ̀, ѽ влⷣчце бцⷣе, и҆сцѣлє́нїѧ и҆ цѣльбы̑ подаю́тсѧ ѻ҆би́льнѡ, съ вѣ́рою и҆ любо́вїю приходѧ́щымъ къ не́й: та́кѡ и҆ мою̀ не́мощь посѣтѝ, и҆ дꙋ́шꙋ мою̀ поми́лꙋй, бл҃га́ѧ, и҆ тѣ́ло и҆сцѣлѝ бл҃года́тїю твое́ю, пречⷭ҇таѧ.
Є҆ктенїа̀, и҆ ѿпꙋ́стъ.
На вели́цѣй вече́рни,
на Гдⷭ҇и воззва́хъ, стїхи̑ры на и҃, гла́съ є҃:
Красꙋ́йсѧ, а҆ѳѡ́не: ра́дꙋйсѧ и҆ весели́сѧ, ѻ҆би́тель і҆́верскаѧ: се́ бо грѧде́тъ чꙋ́днаѧ і҆кѡ́на бг҃ома́тере, а҆́гг҃лы по мо́рю дорѷноси́ма, свѣ́томъ неизрече́ннымъ сїѧ́ющи, мра́къ скорбе́й и҆ печа́лей прогонѧ́ющи, и҆ всѣ́хъ лꙋча́ми своеѧ̀ млⷭ҇ти ѡ҆зарѧ́ющи.
Тебѣ̀ припа́даютъ, гпⷭ҇жѐ, и҆́нокѡвъ ли́цы и҆ по́стникѡвъ сослѡ́вїѧ, и҆ любе́знѡ взира́юще на ст҃ꙋ́ю і҆кѡ́нꙋ твою̀, вопїю́тъ тѝ: прїидѝ къ на́мъ, бл҃га́ѧ мт҃и, ᲂу҆ще́дри чтꙋ́щыѧ тѧ̀, и҆ да́рꙋй на́мъ ст҃ы́й ѻ҆́бразъ тво́й въ зало́гъ млⷭ҇ти и҆ сп҃се́нїѧ.
Ѽ пресла́внагѡ чꙋдесѐ! ꙗ҆́коже бо мѡѷсе́ю въ сїна́и кꙋпина̀ ꙗ҆ви́сѧ и҆ногда̀, ѻ҆гне́мъ ᲂу҆́бѡ ѡ҆палѧ́ема, и҆ невреди́ма пребы́вши: си́це и҆ всенепоро́чныѧ бг҃ороди́тельницы ѻ҆́бразъ ѻ҆гне́мъ ѡ҆дѣва́етсѧ, но неѡпали́мь пребыва́етъ, просвѣща́ѧ и҆ на́съ сꙋ́щихъ во мра́цѣ, и҆ невреди̑мы въ пещѝ и҆скꙋше́нїй и҆ бѣ́дъ сохранѧ́ѧ.
Грѧдѝ, гаврїи́ле, сни́ди немо́кренными нога́ми въ мо́ре, и҆ прїимѝ во ѡ҆б̾ѧ̑тїѧ і҆кѡ́нꙋ бг҃ома́тере, на ра́дость а҆ѳѡ́нꙋ, на ѡ҆гражде́нїе ѻ҆би́тели і҆́верскїѧ, и҆ всѣ̑мъ хрⷭ҇тїа́нѡмъ во ᲂу҆тѣше́нїе.
Бцⷣе дв҃о, держа́внаѧ помо́щнице, ны́нѣ ѻ҆би́тель і҆́верскаѧ ѡ҆ тебѣ̀ хва́литсѧ и҆ весели́тсѧ, и҆мꙋ́щи тѧ̀ застꙋ́пницꙋ непосты́днꙋ и҆ стѣ́нꙋ нерꙋши́мꙋ ѡ҆снова́нїе непоколеби́мо, стра́жа неꙋсы́пна: не преста́й, гпⷭ҇жѐ, твои́ми мл҃твами и҆ всегда̀ и҆збавлѧ́ти ѻ҆би́тель твою̀ и҆ всѧ̑ лю́ди ѿ всѣ́хъ напа́стей.
Пода́ждь ᲂу҆тѣше́нїе рабѡ́мъ твои̑мъ, чⷭ҇таѧ, напа́стьми ѡ҆держи̑мымъ, и҆ ро́гъ вѣ́рныхъ вознесѝ, бг҃ороди́тельнице: сп҃сѝ мл҃твами твои́ми ѻ҆би́тель сїю̀ и҆ гра́ды правосла̑вныѧ, ᲂу҆крѣпѝ на врагѝ сла́вѧщыѧ тѧ̀ и҆ всѧ̑ вѣ̑рныѧ рабы̑, хва́лѧщыѧ тѧ̀, защитѝ.
Пречи́стаѧ твоѧ̀ і҆кѡ́на, бцⷣе дв҃о, врачевство̀ дх҃о́вное всегѡ̀ мі́ра ꙗ҆ви́сѧ: къ не́йже прибѣга́емъ, тебѣ̀ покланѧ́ющесѧ, почита́емъ и҆ лобыза́емъ ю҆̀, и҆ и҆сцѣле́нїй бл҃года́ть полꙋча́емъ, недꙋ́гѡвъ дꙋше́вныхъ и҆ тѣле́сныхъ страсте́й твои́ми мл҃твами свобожда́ющесѧ.
Ꙗ҆́кѡ порфѵ́рою ца́рскою и҆ вѵ́ссомъ, і҆кѡ́ною твое́ю и҆ твоегѡ̀ сн҃а, бцⷣе, ѻ҆би́тель і҆́верскаѧ ᲂу҆краси́вшисѧ, дне́сь сїѧ́етъ чꙋдесы̀, бл҃года́тїю ст҃а́гѡ дх҃а па́че свѣ́та со́лнечнагѡ блиста́ющисѧ: въ то́й бо на болѧ́щихъ и҆ недꙋ́жныхъ и҆сцѣлє́нїѧ и҆злива́ютсѧ, и҆ всѣ̑мъ да́рꙋетсѧ бога́таѧ млⷭ҇ть.
Сла́ва, и҆ ны́нѣ, гла́съ и҃:
Ѽ мт҃и бл҃га́ѧ, гпⷭ҇жѐ бцⷣе дв҃о! не ѿри́ни на́съ смире́нныхъ ра̑бъ твои́хъ, пред̾ пречи́стою твое́ю і҆кѡ́ною недостѡ́йныѧ моли̑твы приносѧ́щихъ: бꙋ́ди те́плаѧ хода́таица ѡ҆ на́съ грѣ́шныхъ къ сн҃ꙋ твоемꙋ̀, и҆зба́ви на́съ ѿ всѣ́хъ бѣ́дъ и҆ и҆скꙋше́нїй, да сп҃са́еми тобо́ю вы́нꙋ вопїе́мъ тѝ: ра́дꙋйсѧ, бл҃га́ѧ врата́рнице, двє́ри ра̑йскїѧ на́мъ ѿверза́ющаѧ.
Вхо́дъ, прокі́менъ днѐ, и҆ чтє́нїѧ.
Бытїѧ̀ чте́нїе.
[Глава̀ к҃и] Взы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. И҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆тца̀ твоегѡ̀ и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̀ врата̀ нбⷭ҇наѧ.
И҆схо́да чте́нїе.
[Глава̀ г҃] Мѡѷсе́й бѧ́ше пасы́й ѻ҆́вцы і҆оѳо́ра, те́стѧ своегѡ̀, свѧще́нника мадїа́мска: и҆ гна́ше ѻ҆́вцы въ пꙋсты́ню: и҆ прїи́де въ го́рꙋ бж҃їю хѡри́въ. Ꙗ҆ви́сѧ же є҆мꙋ̀ а҆́гг҃лъ гдⷭ҇ень въ пла́мени ѻ҆́гненнѣ и҆з̾ кꙋпины̀: и҆ ви́дитъ, ꙗ҆́кѡ кꙋпина̀ гори́тъ ѻ҆гне́мъ, кꙋпина́ же не сгара́ше. Рече́ же мѡѷсе́й: мимоше́дъ ᲂу҆ви́ждꙋ видѣ́нїе вели́кое сїѐ, ꙗ҆́кѡ не сгара́етъ кꙋпина̀. Є҆гда́ же ви́дѣ гдⷭ҇ь, ꙗ҆́кѡ пристꙋпа́етъ ви́дѣти, воззва̀ є҆го̀ гдⷭ҇ь и҆з̾ кꙋпины̀, глаго́лѧ: мѡѷсе́е, мѡѷсе́е. Ѻ҆́нъ же речѐ: что̀ є҆́сть, гдⷭ҇и; Ѻ҆́нъ же речѐ: не приближа́йсѧ сѣ́мѡ: и҆зꙋ́й сапогѝ ѿ но́гъ твои́хъ: мѣ́сто бо, на не́мже ты̀ стои́ши, землѧ̀ свѧта̀ є҆́сть.
И҆схо́да чте́нїе.
[Глава̀ г҃і] Ѡ҆бведѐ бг҃ъ лю́ди пꙋте́мъ, и҆́же въ пꙋ́стыни, къ чермно́мꙋ мо́рю: пѧ́тагѡ же ро́да и҆зыдо́ша сы́нове і҆и҃лєвы ѿ землѝ є҆гѵ́петскїѧ. И҆ взѧ̀ мѡѷсе́й кѡ́сти і҆ѡ́сифѡвы съ собо́ю: клѧ́твою бо заклѧ̀ і҆ѡ́сифъ сы́ны і҆и҃лєвы, глаго́лѧ: присѣще́нїемъ присѣти́тъ ва́съ гдⷭ҇ь, и҆ и҆знесе́те ѿсю́дꙋ кѡ́сти моѧ̑ съ собо́ю. Воздви́гшесѧ же сы́нове і҆и҃лєвы ѿ сокхѡ́ѳа, ѡ҆полчи́шасѧ во ѻ҆ѳѡ́мѣ при пꙋсты́ни. бг҃ъ же вожда́ше и҆̀хъ, въ де́нь ᲂу҆́бѡ столпо́мъ ѻ҆́блачнымъ, показа́ти и҆̀мъ пꙋ́ть: но́щїю же столпо́мъ ѻ҆́гненнымъ, свѣти́ти и҆̀мъ. И҆ не ѡ҆скꙋдѣ̀ сто́лпъ ѻ҆́блачный во днѝ, и҆ сто́лпъ ѻ҆́гненный но́щїю, пред̾ всѣ́ми людьмѝ.
На лїті́и стїхи̑ры, гла́съ и҃:
Прїиди́те, празднолю́бцы и҆ по́стникѡвъ сосло́вїе, вѣ́рою соше́дшесѧ, хвалє́бныѧ пѣ̑сни принесе́мъ мр҃і́и приснодв҃ѣ: дне́сь бо наста̀ свѣ́тлое торжество̀, ꙗ҆вле́нїе честны́ѧ є҆ѧ̀ і҆кѡ́ны і҆́верскїѧ, ю҆́же ѡ҆бстоѧ́ще со стра́хомъ и҆ любо́вїю, воспои́мъ бцⷣѣ: ра́дꙋйсѧ, неисповѣди́маѧ ра́досте всѣ̑мъ: ра́дꙋйсѧ, ѻ҆́бразомъ твои́мъ ст҃ы́мъ на́съ просвѣща́ющаѧ: ра́дꙋйсѧ, всѣ̑мъ похвало̀ и҆ ᲂу҆твержде́нїе: ра́дꙋйсѧ, сп҃се́нїе дꙋ́шъ на́шихъ.
Что́ тѧ нарече́мъ, бцⷣе дв҃о; сто́лпъ ли ѻ҆́гненный, къ вѣ́чномꙋ наслѣ́дїю на́съ ведꙋ́щїй; стѣ́нꙋ ли крѣ́пкꙋю; ꙗ҆́кѡ правосла́вный ро́дъ защища́еши: стра́жа ли неꙋсы́пна; ꙗ҆́кѡ ѻ҆би́тель твою̀ ѡ҆хранѧ́еши и҆ сп҃са́еши. тѣ́мже ѿ належа́щихъ бѣ́дъ и҆збавлѧ́еми возопїи́мъ влⷣчцѣ: ра́дꙋйсѧ, бл҃ги́хъ вино́внаѧ, и҆звѣ́стное хрⷭ҇тїа́нъ ᲂу҆пова́нїе.
Сла́ва, и҆ ны́нѣ, гла́съ є҃:
Ра́дꙋетсѧ а҆ѳѡ́нъ, ликовствꙋ́етъ ѻ҆би́тель і҆́верскаѧ, торжествꙋ́етъ и҆ всѧ̀ страна̀ рѡссі́йскаѧ: бж҃їѧ бо мт҃рь чꙋдотво́рнымъ свои́мъ ѻ҆́бразомъ ми́лостивнѡ на́съ посѣти́ла є҆́сть, да́рꙋетъ же на́мъ въ нꙋ́ждахъ по́мощь, въ ско́рбехъ ᲂу҆тѣше́нїе, въ болѣ́знехъ и҆сцѣле́нїе, въ бѣда́хъ и҆збавле́нїе, и҆ всѣ̑мъ вѣ̑рнымъ ве́лїю млⷭ҇ть.
На стїхо́внѣ стїхи̑ры, гла́съ д҃:
Сла́вное і҆кѡ́ны твоеѧ̀ ꙗ҆вле́нїе, бцⷣе пренепоро́чнаѧ, славосло́вимъ дне́сь, и҆ твоѐ застꙋпле́нїе на́мъ пра́зднꙋемъ: ꙗ҆́кѡ бо мт҃и сꙋ́щи живота̀, мо́лиши ѡ҆ на́съ хрⷭ҇та̀ бг҃а на́шего. на тѧ̀ крѣ́пкꙋю наде́ждꙋ возложи́вшихъ, пꙋтеводи́тельнице нело́жнаѧ на́шегѡ сп҃се́нїѧ.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ѿложи́мъ, вѣ́рнїи, печа́ль: се́ бо втора́ѧ неѡпали́маѧ кꙋпина̀ і҆кѡ́на бг҃ома́тере, и҆́нѡки а҆ѳѡ́нскими зри́маѧ, на ѡ҆чище́нїе грѣ́шныхъ ꙗ҆влѧ́етсѧ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Назна́менꙋющи во стра́нствїи жите́йстѣмъ твоѐ на́мъ води́тельство, ꙗ҆влѧ́ешисѧ, бг҃ома́ти, въ столпѣ̀ ѻ҆́гненнѣ, да на́съ блꙋжда́ющихъ пꙋтево́диши къ вѣ̑чнымъ ѻ҆би́телемъ.
Сла́ва, и҆ ны́нѣ, гла́съ є҃:
Прїиди́те, всѝ мона́си и҆ мїрсті́и, просла́вимъ пречⷭ҇тꙋю дв҃ꙋ бцⷣꙋ: дне́сь бо, ра́ди сщ҃е́нныѧ і҆кѡ́ны, въ мо́ри пꙋтїѐ є҆ѧ̀ и҆ стєзѝ є҆ѧ̀ въ вода́хъ мно́гихъ: ѿ нїке́и бо въ столпѣ̀ ѻ҆́гненнѣ по́нтъ морскі́й ко а҆ѳѡ́нꙋ прехо́дитъ, и҆ да́ръ прише́ствїемъ свои́мъ вѣ̑рнымъ подае́тъ. мы́ же, просвѣща́еми лꙋча́ми бл҃года́ти, хода́таицꙋ сп҃се́нїѧ на́шегѡ ᲂу҆бл҃жа́емъ.
На ᲂу҆́трени,
по а҃-й каѳі́смѣ сѣда́ленъ, гла́съ а҃:
Пресвѣ́тлагѡ зра́ка твоегѡ̀ ꙗ҆вле́нїе ра́дость прино́ситъ всѣ̑мъ вѣ́рꙋющымъ, и҆ ѻ҆би́тели і҆́верстѣй да́рꙋетъ стра́жа неꙋсы́пна и҆ ѿ бѣ́дъ и҆збавле́нїе. тѣ́мже пое́мъ тѝ, пречⷭ҇таѧ: покрыва́й на́съ при́снѡ покро́вомъ твои́мъ.
Сла́ва, и҆ ны́нѣ, гла́съ и҃:
Се́й де́нь гдⷭ҇ень, ра́дꙋйтесѧ, лю́дїе: се́ бо свѣтоно́сный ѻ҆́блакъ на воздꙋ́сѣ чꙋ́днѡ простира́етсѧ, и҆ столпо́мъ ѻ҆́гненнымъ пред̾ а҆ѳѡ́номъ ꙗ҆влѧ́етсѧ, є҆ди́на и҆ є҆ди́наго на рꙋка́хъ ма́тернихъ держа́щи хрⷭ҇та̀, зижди́телѧ вселе́нныѧ, во сп҃се́нїе дꙋ́шъ на́шихъ.
По в҃-й каѳі́смѣ сѣда́ленъ, гла́съ г҃:
Веселѧ́тсѧ дне́сь свѣ́тлѡ а҆ѳѡ́на па̑ствы: пѣ́сней мно́жество слага́ютъ, любо́вїю непоро́чнꙋю почита́юще, вели́чествомъ бл҃года́ти красѧ́щесѧ, и҆́же прїѧ́ша прише́ствїемъ і҆кѡ́ны всенепоро́чныѧ ѻ҆трокови́цы, зарѧ́ми бг҃овѣ́дѣнїѧ бл҃гоче́стнѡ пою́щихъ ѡ҆зарѧ́ющїѧ.
Сла́ва, и҆ ны́нѣ, гла́съ є҃:
Чꙋ́до пресла́вное зри́тсѧ дне́сь: въ вода́хъ во ѻ҆гнено́снаѧ бг҃оѻтрокови́цы і҆кѡ́на показꙋ́етсѧ, и҆ зна́менїѧ лꙋчы̀ и҆спꙋща́етъ, и҆ пребыва́нїе по́стникѡвъ чꙋ́домъ сп҃са́етъ. сегѡ̀ ра́ди бл҃года́рственнѡ вопїе́мъ: ра́дꙋйсѧ, бл҃года́тнаѧ.
Велича́нїе:
Велича́емъ тѧ̀, прест҃а́ѧ дв҃о, бг҃оизбра́ннаѧ ѻ҆трокови́це, и҆ чти́мъ ѻ҆́бразъ тво́й ст҃ы́й, и҆́мже то́чиши и҆сцѣлє́нїѧ всѣ̑мъ съ вѣ́рою притека́ющымъ.
Ѱало́мъ и҆збра́нный: Помѧнѝ, гдⷭ҇и, дв҃да и҆ всю̀ кро́тость є҆гѡ̀:
По полѷеле́и сѣда́ленъ, гла́съ и҃:
Вели́чїе твоѐ кто̀ и҆сповѣ́сть, бцⷣе; ꙗ҆вле́нїемъ бо твоеѧ̀ і҆кѡ́ны ᲂу҆диви́ла є҆сѝ всѧ̑ правосла̑вныѧ, мнѡ́гїѧ недꙋ́ги врачꙋ́ющи и҆ болѣ̑зни и҆сцѣлѧ́ющи. ѽ всеми́лостиваѧ влⷣчце, не лишѝ на́съ и҆ ны́нѣ твоегѡ̀ застꙋпле́нїѧ, но мл҃твами твои́ми защитѝ и҆ сп҃сѝ правосла̑вныѧ лю́ди и҆ си́лою твое́ю ѡ҆градѝ, да тобо́ю хва́лѧщесѧ и҆ всѐ ᲂу҆пова́нїе на тѧ̀ возлага́юще, не постыди́мсѧ во вѣ́ки.
Сла́ва, и҆ ны́нѣ: то́йже.
Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Сті́хъ: Ѿры́гнꙋ се́рдце моѐ сло́во бл҃го.
Всѧ́кое дыха́нїе да хва́литъ гдⷭ҇а.
Сті́хъ: Хвали́те бг҃а во ст҃ы́хъ є҆гѡ̀:
Є҆ѵⷢ҇лїе лꙋкѝ, зача́ло д҃: Во дни̑ ѻ҆́ны воста́вши мр҃їа́мъ:
По н҃-мъ ѱалмѣ̀, Сла́ва:
Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ.
И҆ ны́нѣ, то́йже. И҆ посе́мъ, Поми́лꙋй мѧ̀, бж҃е:
И҆ стїхи́ра, гла́съ ѕ҃:
Є҆гда̀ ꙗ҆вле́нїе чꙋ́днагѡ твоегѡ̀ ѻ҆́браза приспѣ̀, тогда̀ а҆ѳѡ́нстїи ѻ҆тцы̀, сто́лпъ ѻ҆́гненный на мо́ри зрѧ́ще, стра́хомъ ѡ҆держи́ми недоꙋмѣва́хꙋ: гаврїи́лъ же, ꙗ҆́кѡ вторы́й пе́тръ, по мо́рю ходѧ̀, со слеза́ми вопїѧ́ше тебѣ̀: ѽ прест҃а́ѧ, прїидѝ и҆ сохранѝ достоѧ́нїе твоѐ ѿ вра́гъ ненавѣ́тно.
Канѡ́нъ прест҃ѣ́й бцⷣѣ на и҃, і҆рмосы̀ по два́жды. Гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крестоѡбра́знѡ порази́въ и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща.
Ѿ скве́рныхъ ᲂу҆сте́нъ хвале́нїе прїимѝ, всенепоро́чнаѧ, ꙗ҆́коже пре́жде сн҃ъ тво́й, бг҃ъ же мо́й и҆ гдⷭ҇ь, прїѧ́тъ двѣ̀ лє́пты вдови́цы, и҆ разрѣше́нїе прегрѣше́нїй мои́хъ пода́ждь, ꙗ҆́кѡ да по до́лгꙋ велича́ю тѧ̀.
А҆́гг҃льское пѣ́нїе подоба́ше тебѣ̀ мт҃ри бж҃їей, творца́ бо си́хъ родила̀ є҆сѝ стра́ннѡ. но и҆ ѿ на́съ прїимѝ, влⷣчце, смирє́нныѧ сїѧ̑ моли̑твы, да пое́мъ гдⷭ҇еви: сла́внѡ просла́висѧ въ на́шей не́мощи.
Ѡ҆гꙋстѣ́ша во́ды, ѡ҆гꙋстѣ́ша и҆ во́лны посредѣ̀ мо́рѧ, носѧ́ща твою̀, бг҃ома́ти, і҆кѡ́нꙋ. ᲂу҆твердѝ и҆ моѐ подви́гшеесѧ се́рдце на ка́мени за́повѣдей хрⷭ҇то́выхъ.
Помо́щница и҆ покрови́тельница была̀ є҆сѝ, дв҃о, ѻ҆би́тели і҆́верскїѧ, во́євъ а҆ми́ры съ корабли̑ и҆́хъ въ мо́ри погрꙋзи́вши: но потопѝ въ пꙋчи́нѣ милосе́рдїѧ сн҃а твоегѡ̀ всѧ̑ моѧ̑ дꙋшє́вныѧ стра̑сти и҆ безчи́слєннаѧ моѧ̑ прегрѣшє́нїѧ.
Пѣ́снь г҃.
І҆рмо́съ: Оу҆твержде́й въ нача́лѣ нб҃са̀ ра́зꙋмомъ и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.
Оу҆твердѝ се́рдце моѐ во ᲂу҆пова́нїи на тѧ̀, бг҃ома́ти, и҆з̾мѝ всѧ́кꙋю горды́ню и҆ превозноше́нїе и҆з̾ помраче́ннагѡ ᲂу҆ма̀ моегѡ̀, да вопїю̀: нѣ́сть свѧ́тъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ.
Ты̀, ѽ бг҃ома́ти, немощствꙋ́ющыѧ препоѧсꙋ́еши си́лою, а҆́лчꙋщыѧ насыща́еши: посѣтѝ и҆ мою̀ не́мощь, и҆ а҆́лчꙋщаго и҆ жа́ждꙋщаго менѐ насы́ти живо́тнагѡ хлѣ́ба, чрез̾ твою̀ дѣ́вственнꙋю ᲂу҆тро́бꙋ сше́дшагѡ съ нб҃сѐ на зе́млю.
Возста́ви, влⷣчце, ѿ землѝ менѐ ᲂу҆бо́гаго, и҆ ѿ гно́ища грѣхо́внагѡ воздви́гни ни́щаго: да́ждь моли́твꙋ мнѣ̀ молѧ́щемꙋсѧ, да велича́ѧ пою̀ твоѐ застꙋпле́нїе.
Непло́дствꙋющїй мо́й ᲂу҆́мъ плодоно́сенъ покажѝ, бл҃га́ѧ дв҃о, ѿ непло́дове ро́ждшаѧсѧ: ты́ бо плодоно́сїе всѣ́хъ бла́гъ ꙗ҆вле́нїемъ і҆кѡ́ны твоеѧ̀ подае́ши.
Сѣда́ленъ:
Свѣ́тлое дне́сь застꙋ́пницы на́шеѧ наста̀ торжество̀: да взыгра́етсѧ тва́рь, да ликовствꙋ́ютъ человѣ́честїи собо́ри: созыва́етъ бо на́съ ст҃а́ѧ бцⷣа ви́дѣти ѻ҆гнено́снꙋю і҆кѡ́нꙋ свою̀, лꙋча́ми млⷭ҇ти вѣ̑рныѧ просвѣща́ющꙋю. тѣ́мже ра́дꙋющесѧ вопїе́мъ: сп҃сѝ, гпⷭ҇жѐ, ѿ гла́да, ѻ҆гнѧ̀, меча̀ и҆ бѣ́дъ всѧ̑ почита́ющыѧ ꙗ҆вле́нїе і҆кѡ́ны твоеѧ̀.
Сла́ва, и҆ ны́нѣ: то́йже.
Пѣ́снь д҃.
І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Покры̀ нб҃са̀ добродѣ́тель твоѧ̀, бг҃ома́ти, и҆ хвалы̀ твоеѧ̀ и҆спо́лнисѧ землѧ̀: но положѝ любо́вь держа́внꙋю крѣ́пости твоеѧ̀ и҆ на мнѣ̀ ѿча́ѧнномъ.
Оу҆готовлѧ́ющи ше́ствїе чꙋ́днѣй і҆кѡ́нѣ твое́й, дадѐ бе́здна гла́съ сво́й, воздви́жесѧ со́лнце, и҆ сїѧ́нїе є҆ѧ̀ ꙗ҆́кѡ свѣ́тъ бы́сть: но ты̀ и҆зшла̀ є҆сѝ на сп҃се́нїе люде́й, сп҃стѝ твоѐ наслѣ́дїе пришла̀ є҆сѝ.
Оу҆слы́шавше слꙋ́хъ прише́ствїѧ твоегѡ̀, и҆́ноцы ᲂу҆боѧ́шасѧ, ᲂу҆разꙋмѣ́вше же дѣла̀ твоѧ̑ ᲂу҆жасо́шасѧ. но внегда̀ смꙋти́тисѧ дꙋшѝ мое́й, млⷭ҇ть твою̀ помѧнѝ, влⷣчце, да взыва́ю: сла́ва застꙋпле́нїю твоемꙋ̀, бг҃ома́ти.
Ты̀ є҆сѝ моѧ̀ крѣ́пость и҆ си́ла, бцⷣе, тобо́ю почі́ю въ де́нь ско́рби моеѧ̀, и҆ и҆з̾ страны̀ прише́льствїѧ взы́дꙋ тобо́ю въ нбⷭ҇ное наслѣ́дїе, и҆ возра́дꙋюсѧ ѡ҆ гдⷭ҇ѣ и҆ бз҃ѣ сп҃сѣ мое́мъ.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ви́ждь, чⷭ҇таѧ, ѿ но́щи ᲂу҆́тренюющыѧ лю́ди па́ствы твоеѧ̀, і҆кѡ́нꙋ твою̀ бг҃охва́льнꙋю ѡ҆бстоѧ́щыѧ, разрѣше́нїѧ же грѣхѡ́въ просѧ́щыѧ, и҆ житїѧ̀ и҆справле́нїѧ, и҆ бж҃е́ственныѧ сла́вы прича́стїѧ: не ѿри́ни ᲂу҆̀бо на́съ ѿ лица̀ твоегѡ̀, свѣ́та незаходи́магѡ мт҃и.
Все́ю дꙋше́ю и҆ мы́слїю въ па́ствѣ твое́й всѝ сликꙋ́юще, ѱалмы̑ и҆ пѣ́сньми дх҃о́вными и҆ пѣ́нїемъ бж҃е́ственнымъ і҆кѡ́нꙋ твою̀ почита́ютъ, проще́нїѧ грѣхѡ́въ просѧ́ще и҆ дꙋ́шъ сп҃се́нїѧ. ты́ же и҆сцѣле́нїе на́ше сꙋ́щи, сїѧ̑ всѧ̑ пода́ждь, влⷣчце бг҃оневѣ́сто.
Хра́мъ тво́й, дв҃о, ꙗ҆́кѡ ра́й дрꙋгі́й показа́сѧ ны́нѣ, ꙗ҆́кѡ дре́во жи́зни и҆мѣ́ѧ і҆кѡ́нꙋ красоты̀ твоеѧ̀, ю҆́же всѝ ᲂу҆се́рднѡ со бл҃гоговѣ́нїемъ и҆ любо́вїю цѣлꙋ́юще, взыва́емъ: влⷣчце, ми́ръ да́ждь на́мъ, влⷣчце, стѧжѝ на́съ, и҆но́гѡ бо ра́звѣ тебє̀ ᲂу҆тѣше́нїѧ не вѣ́мы.
Рѣкꙋ́ тѧ сла́дкꙋю и҆ пото́къ насыще́нїѧ, ма́ннꙋ небе́снꙋю, и҆з̾ѻби́лїе и҆ бл҃года́ть приснотекꙋ́щꙋю во ѻ҆би́тели твое́й живꙋ́щїи стѧжа́вше, пою́тъ ржⷭ҇тво̀ твоѐ, ѻ҆трокови́це.
Пѣ́снь ѕ҃.
І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Въ ско́рби се́рдца вопїю́ ти, влⷣчце, жите́йскагѡ мо́рѧ потоплѧ́емь бꙋ́рею, къ тебѣ̀ ꙗ҆́кѡ ти́хомꙋ приста́нищꙋ прибѣга́ю: возведѝ ѿ тлѝ живо́тъ мо́й.
Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но прострѝ, влⷣчце, высо́кꙋю твою̀ мы́шцꙋ, и҆ ꙗ҆́кѡ гаврїи́ла, и҆ менѐ ко твое́й і҆кѡ́нѣ прибѣга́юща невреди́ма сотворѝ.
Не ѿри́ни менѐ до конца̀ ѿ лица̀ твоегѡ̀, мт҃и незаходи́магѡ свѣ́та, не попꙋстѝ мнѣ̀ погрѧ́знꙋти въ пꙋчи́нѣ беззако́нїй: но возведѝ менѐ ѿ бла́та страсте́й, да взы́детъ и҆з̾ и҆стлѣ́нїѧ живо́тъ мо́й, и҆ пожрꙋ̀ тебѣ̀ со гла́сомъ хвале́нїѧ и҆ и҆сповѣ́данїѧ.
Хра́мъ носѧ́й тѣле́сный ве́сь ѡ҆скверне́нъ, тебѣ̀, пречи́стомꙋ хра́мꙋ вѣ́чнагѡ сло́ва, дерза́ю въ честнѣ́мъ хра́мѣ твое́мъ, пред̾ твое́ю ст҃о́ю і҆кѡ́ною, приноси́ти смирє́нныѧ моѧ̑ моли̑твы. ты́ же, ꙗ҆́кѡ млⷭ҇тиваѧ, ѡ҆чи́сти мѧ̀ твои́мъ бл҃гоꙋтро́бїемъ.
Конда́къ, гла́съ и҃:
А҆́ще и҆ въ мо́ре вве́ржена бы́сть ст҃а́ѧ і҆кѡ́на твоѧ̀, бцⷣе, ѿ вдови́цы, не могꙋ́щїѧ спастѝ сїю̀ ѿ врагѡ́въ: но ꙗ҆ви́ласѧ є҆́сть храни́тельница а҆ѳѡ́на и҆ врата́рница ѻ҆би́тели і҆́верскїѧ, врагѝ ᲂу҆страша́ющаѧ и҆ въ правосла́внѣй рѡссі́йстѣй странѣ̀ чтꙋ́щыѧ тѧ̀ ѿ всѣ́хъ бѣ́дъ и҆ напа́стей и҆збавлѧ́ющаѧ.
І҆́косъ:
Въ столпѣ̀ ѻ҆́гненнѣ ꙗ҆́вльшꙋюсѧ бг҃ома́тере і҆кѡ́нꙋ ви́дѣвше, возопи́ша по́стникѡвъ і҆́верскихъ ли́цы: ѽ влⷣко, сподо́би на́съ прїѧ́ти і҆кѡ́нꙋ мт҃ре твоеѧ̀, во ᲂу҆тѣше́нїе стра́нствїѧ на́шегѡ: ты́ же, гаврїи́ле, дерза́й и҆ вни́ди въ мо́ре, и҆ прїимѝ во ѡ҆б̾ѧ̑тїѧ твоѧ̑ сокро́вище на́мъ ꙗ҆влѧ́емое, да бꙋ́детъ на́мъ стра́жъ неꙋсы́пный, покро́въ же и҆ ра́дость всѣ̑мъ хрⷭ҇тїа́нѡмъ, и҆ храни́тельница, ѿ бѣ́дъ и҆ напа́стей и҆збавлѧ́ющаѧ.
Пѣ́снь з҃.
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ, ра́дованною ного́ю ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Согрѣши́хомъ, беззако́нновахомъ, непра́вдовахомъ пред̾ гдⷭ҇емъ: но, влⷣчце моѧ̀ бцⷣе, ꙗ҆́кѡ бл҃га́ѧ, ᲂу҆гасѝ ѻ҆́гнь є҆гѡ̀ пра́веднагѡ гнѣ́ва твои́мъ те́плымъ хода́тайствомъ, да пое́мъ є҆мꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.
Въ пещѝ и҆скꙋше́нїй и҆ бѣ́дъ ѡ҆палѧ́ємыѧ ѡ҆росѝ, бг҃ома́ти, стрꙋѧ́ми твои́хъ щедро́тъ, да посрамѧ́тсѧ вразѝ на́ши, и҆ да разꙋмѣ́ютъ всѝ, ꙗ҆́кѡ ты̀ є҆ди́на є҆сѝ влⷣчца бцⷣа, по все́й вселе́ннѣй сла́вимаѧ.
Прⷭ҇то́ле цр҃ѧ̀ сла́вы, честнѣ́йшаѧ херꙋві̑мъ, ѡ҆дꙋшевле́нный хра́ме, въ не́мже всели́сѧ гдⷭ҇ь, тве́рдь нбⷭ҇наѧ, на не́йже возсїѧ̀ сл҃нце пра́вды хрⷭ҇то́съ, тѧ̀ пое́мъ, бг҃ома́ти, и҆ превозно́симъ во всѧ̑ вѣ́ки.
Ты̀ є҆сѝ весе́лїе и҆ въ пꙋсты́нехъ живꙋ́щымъ, ты̀ є҆сѝ и҆ сто́льнагѡ гра́да ᲂу҆тѣше́нїе и҆ похвала̀, дв҃о мр҃і́е, препѣ́таѧ и҆ превозноси́маѧ во вѣ́ки.
Пѣ́снь и҃.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̀ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Пою́тъ тѧ̀ а҆́гг҃льскїѧ си̑лы, превозно́ситъ человѣ́ческїй ро́дъ, бл҃гослови́тъ тѧ̀ всѧ̀ тва́рь, пречⷭ҇таѧ дв҃о бцⷣе: прїимѝ и҆ ѿ менє̀ недосто́йнагѡ приноси́мое тебѣ̀ хвале́нїе.
По́йте и҆́ноцы а҆ѳѡ́на, бл҃гословлѧ́й землѐ і҆́верскаѧ, превозносѝ всѧ̀ страно̀ рѡссі́йскаѧ бл҃гꙋ́ю влⷣчцꙋ, рѣ́ки чꙋде́съ ѿ своеѧ̀ чꙋдотво́рныѧ і҆кѡ́ны и҆сточа́ющꙋю. хва́лимъ, бл҃гослови́мъ, покланѧ́емсѧ тѝ, бцⷣе, пою́ще и҆ превозносѧ́ще во всѧ̑ вѣ́ки.
Подо́бїемъ і҆кѡ́ны і҆́верскїѧ не то́чїю ст҃ы́й а҆ѳѡ́нъ просвѣща́етсѧ, но и҆ сто́льный гра́дъ москва̀ ᲂу҆краша́етсѧ, ѿ тогѡ̀ чꙋде́снꙋю по́мощь прїе́млѧ и҆ и҆сто́чникъ ᲂу҆тѣше́нїѧ въ не́мъ ѡ҆брѣта́ѧ.
Є҆щѐ и҆ страна̀ новгоро́дскаѧ и҆ и҆ні́и гра́ды и҆ вє́си подо́бїемъ і҆́верскїѧ і҆кѡ́ны твоеѧ̀, влⷣчце, ѡ҆ст҃и́шасѧ, и҆ чꙋдесы̀ просвѣти́шасѧ, вопїю́ще: гдⷭ҇а по́йте и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
Та́йна глꙋбины̀ ржⷭ҇тва̀ твоегѡ̀ ᲂу҆́мъ а҆́гг҃льскїй ᲂу҆жаса́етъ, дв҃о, и҆ пречи́стаѧ і҆кѡ́на твоѧ̀ де́моны прогонѧ́етъ: не терпѧ́ще бо взира́ти на си́лꙋ є҆ѧ̀, бѣ́гаютъ и҆ и҆счеза́ютъ. мы́ же то́й любе́знѡ покланѧ́емсѧ и҆ ѡ҆блобыза́емъ, и҆ тѧ̀ бцⷣꙋ велича́емъ.
Прїиди́те всѝ, поклони́мсѧ, припаде́мъ и҆ возвели́чимъ бж҃їю мт҃рь, призрѣ́вшꙋю на на́съ смире́нныхъ, а҆́лчꙋщыѧ и҆сполнѧ́ющꙋю бла́гъ, и҆ положи́вшꙋю съ на́ми завѣ́тъ млⷭ҇ти во ꙗ҆вле́нїи своеѧ̀ ди́вныѧ і҆кѡ́ны.
Бцⷣе дв҃о, ᲂу҆пова́нїе хрⷭ҇тїа́нѡмъ, проба́ви и҆ на́шемꙋ ро́дꙋ млⷭ҇ти твоѧ̑, бы́вшыѧ ѻ҆тцє́мъ на́шымъ, покры́й и҆ соблюдѝ на́съ ѿ всѧ́кагѡ ѕла̀.
Ѽ всемлⷭ҇тиваѧ хрⷭ҇тїа́нѡмъ помо́щнице, не мо́жетъ тѧ̀ воспѣ́ти досто́йнѡ ѧ҆зы́къ человѣ́ческїй и҆ а҆́гг҃льскїй, ꙗ҆́кѡ всеѧ̀ тва́ри честнѣ́йшꙋю и҆ земны́хъ сла́внѣйшꙋю: но прїимѝ ми́лостивнѡ сїѐ приноси́мое тебѣ̀ ѿ на́съ моле́нїе, и҆ сп҃са́й на́съ всегда̀, на тѧ́ бо ᲂу҆пова́ше возложи́хомъ.
Є҆ѯапостїла́рїй:
І҆кѡ́нꙋ твою̀ всечестнꙋ́ю прїи́мъ гаврїи́лъ во ѡ҆б̾ѧ̑тїѧ, вопїѧ́ше тебѣ̀ влⷣчцѣ: ѽ сла́дкаѧ мт҃и цр҃ѧ̀ хрⷭ҇та̀, бꙋ́ди покро́въ твое́й ѻ҆би́тели, ра́дость же всѣ̑мъ хрⷭ҇тїа́нѡмъ, и҆ спорꙋ́чница жи́зни вѣ́чныѧ.
Три́жды.
На хвали́техъ стїхи̑ры на д҃, гла́съ д҃:
Ѽ несказа́нныѧ бл҃гости! ѽ сла́внагѡ ꙗ҆вле́нїѧ і҆кѡ́ны бг҃ома́тере, ꙗ҆́же сїѧ́етъ чꙋдесы̀, и҆ просвѣща́етъ бл҃года́тїю вѣ́рнѡ приходѧ́щыѧ! ю҆́же съ весе́лїемъ прїе́млюще, чⷭ҇тꙋю бг҃оѻтрокови́цꙋ достодо́лжнѡ пѣ́сньми почита́емъ и҆ ᲂу҆бл҃жа́емъ.
Два́жды.
Ѽ пресла́внагѡ твоегѡ̀ ѡ҆ на́съ, влⷣчце, промышле́нїѧ! чꙋ́днꙋю бо твою̀ і҆кѡ́нꙋ а҆ѳѡ́нꙋ посыла́еши, и҆ ꙗ҆́кѡ стра́жа на́мъ неꙋсы́пна тꙋ́ю подае́ши ми́лостивнѡ, и҆ ᲂу҆тѣше́нїе стра́нствїю на́шемꙋ. тѣ́мже позна́вше твоѧ̑ честна̑ѧ чꙋдеса̀, пѣ́сньми тѧ̀ велича́емъ.
Ѽ пресла́внагѡ чꙋдесѐ! ка́кѡ ѻ҆гнено́снаѧ і҆кѡ́на на волна́хъ морски́хъ ꙗ҆́кѡ на колесни́цѣ но́ситсѧ, свѣ́тлыми лꙋча́ми бл҃года́ти ᲂу҆мы̀ просвѣща́ющи; є҆ѧ́же торжество̀ пѣ́сньми почита́юще ра́достнѡ, сла́вꙋ возсыла́емъ бг҃ороди́тельницѣ.
Сла́ва, и҆ ны́нѣ:
Тво́й глаго́лъ и҆сполнѧ́ѧ, бг҃ома́ти, прпⷣбный гаврїи́лъ немо́креннѡ по водѣ̀ морстѣ́й пѣшеше́ствова, и҆ воспрїи́мъ сщ҃е́ннꙋю і҆кѡ́нꙋ твою̀, ли́къ пѣ́сненный соста́ви. и҆ торжество̀ съ пѡ́стники а҆ѳѡ́нскими совокꙋпѝ. тѣ́мже и҆ мы̀ ᲂу҆дивлѧ́ющесѧ вопїе́мъ первовино́вномꙋ: сла́ва тебѣ̀, сотво́ршемꙋ ди̑внаѧ є҆ди́номꙋ цр҃ю̀ и҆ бг҃ꙋ, мл҃твъ ра́ди бцⷣы! сохранѝ лю́ди хрⷭ҇тїа̑нскїѧ, и҆ побѣ̑ды на врагѝ да́рꙋй, ꙗ҆́кѡ всеси́ленъ.
Славосло́вїе вели́кое, и҆ ѿпꙋ́стъ.
На лїтꙋргі́и.
Бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ.
Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ.
Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿны́нѣ ᲂу҆бл҃жа́тъ мѧ̀ всѝ ро́ди.
А҆пⷭ҇лъ къ фїлїпписі́ѡмъ, зача́ло с҃м.
А҆ллилꙋ́їа, гла́съ и҃: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Є҆ѵⷢ҇лїе ѿ лꙋкѝ, зача́ло н҃д.
Прича́стенъ: Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀
Вѣ́домо бꙋ́ди, ꙗ҆́кѡ пра́зднованїе прест҃ѣ́й бцⷣѣ ст҃ы́ѧ ра́ди є҆ѧ̀ і҆кѡ́ны і҆́верскїѧ твори́тсѧ ѻ҆ктѡ́врїа въ г҃і-й де́нь и҆ феврꙋа́рїа въ в҃і-й де́нь, въ сто́льномъ же гра́дѣ москвѣ̀ є҆щѐ и҆ во вто́рникъ свѣ́тлыѧ седми́цы по ᲂу҆ста́вꙋ ст҃а́гѡ бл҃говѣ́щенїѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.