← претходни дан | Минеј — Октобар | следећи дан →
9 октября: Святого апостола Иакова Алфеева. Преподобного Андроника и жены его Афанасии
Мѣ́сѧца тогѡ́же въ ѳ҃-й де́нь.
Ст҃а́гѡ а҆пⷭ҇ла і҆а́кѡва а҆лфе́ева:
И҆ прпⷣбнагѡ ѻ҆ц҃а̀ на́шегѡ а҆ндроні́ка, и҆ жены̀ є҆гѡ̀ а҆ѳана́сїи.
На вече́рни пое́мъ, Блаже́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры а҆пⷭ҇ла, на и҃, гла́съ д҃.
Подо́бенъ: Да́лъ є҆сѝ зна́менїе:
Возсїѧ́лъ є҆сѝ, а҆пⷭ҇ле, ꙳ свѣтови́денъ ꙗ҆́кѡ со́лнце, ꙳ зарѧ́ми дх҃а, ꙳ и҆ всю̀ просвѣти́лъ є҆сѝ вселе́ннꙋю, блаже́нне, бг҃озна́нїемъ, ꙳ и҆ ѿгна́лъ є҆сѝ мра́къ многобо́жный, ꙳ бжⷭ҇твеннымъ проповѣ́данїемъ. ꙳ тѣ́мъ твоѐ пресвѣ́тлое и҆ достохва́льное дне́сь ꙳ соверша́юще торжество̀, ꙳ благоче́стнѡ тѧ̀ сла́вимъ.
Три́жды.
Возгремѣ́лъ є҆сѝ, премꙋ́дре, вселе́ннѣй, ꙳ ᲂу҆чє́нїѧ свѧщє́ннаѧ и҆ спаси́тєльнаѧ, ꙳ и҆ всю̀ ѡ҆чи́стилъ є҆сѝ і҆дѡлонеи́стовства ꙳ тва́рь, бг҃омꙋ́дре, ꙳ и҆ просвѣти́лъ є҆сѝ лю́ди, ꙳ бг҃озна́нїѧ сїѧ́нїемъ. ꙳ і҆́дѡльскаѧ же трє́бища ꙳ разорѧ́ѧ бл҃года́тїю, ꙳ цє́ркви на похвале́нїе бг҃а на́шегѡ воздви́глъ є҆сѝ.
Три́жды.
На высотѣ̀ сѣдѧ́й ꙳ бг҃озна́нїѧ, і҆а́кѡве, ꙳ прїѧ́лъ є҆сѝ дх҃а бл҃года́ть, ꙳ ꙗ҆́вльшꙋюсѧ тебѣ̀ ѻ҆́гненнымъ ви́домъ, ꙳ и҆ ѧ҆зы́комъ ѻ҆́гненнымъ всю̀ попали́лъ є҆сѝ ꙗ҆́вѣ, ꙳ ѕлоче́стїѧ ти́нꙋ многобо́жнꙋю. ꙳ тѣ́мъ тѧ̀ ꙗ҆́кѡ а҆пⷭ҇ла, и҆ бг҃оглаго́льника хва́лимъ, ꙳ ст҃о́е твоѐ дне́сь соверша́юще торжество̀.
Два́жды.
Сла́ва, гла́съ то́йже, самогла́сенъ. Ѳеофа́ново:
Бжⷭ҇твеннагѡ дх҃а ꙗ҆́вѣ бл҃года́ть прїе́мь, свѧще́ннѣйшемꙋ ли́кꙋ а҆пⷭ҇льскомꙋ причте́нъ, і҆а́кѡве, бы́лъ є҆сѝ. тѣ́мъ и҆ съ нб҃съ прише́ствїе и҆ногда̀ си́льное ѡ҆дохнове́нїе, ѻ҆́гненнымъ ѧ҆зы́комъ просвѣти́въ тѧ̀, ꙗ҆зы́ческое ѡ҆терновле́нное попали́лъ є҆сѝ безбо́жїе: хрⷭ҇та̀ бг҃а, бг҃опроповѣ́дниче, молѝ, спасти́сѧ дꙋша́мъ на́шымъ.
И҆ ны́нѣ, бг҃оро́диченъ: И҆́же тебє̀ ра́ди:
Вхо́дъ, прокі́менъ днѐ, и҆ чтє́нїѧ трѝ, и҆ лїті́а, и҆щѝ сегѡ̀ мѣ́сѧца въ ѕ҃ де́нь.
На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:
Прїѧ́лъ є҆сѝ, а҆пⷭ҇ле, надъ де́мѡны ꙳ непобѣди́мꙋю вла́сть и҆ си́лꙋ, ꙳ ѡ҆ и҆́мени хрⷭ҇то́вѣ, ꙳ нача̑ла тмы̀ си́хъ ѿгони́ти: ꙳ и҆ проше́лъ є҆сѝ зе́млю, ꙳ просвѣща́ѧ ꙗ҆́коже со́лнце, ꙳ и҆ всѧ̑ страны̑ наꙋчѝ, ꙳ пе́рвое, сла́вне, хрⷭ҇то́во проповѣ́далъ є҆сѝ ꙳ спаси́тельное прише́ствїе.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Пе́рвѣй бла́гости, ꙳ и҆ є҆сте́ственномꙋ и҆ пребжⷭ҇твенномꙋ ꙳ житїю̀ подо́бѧсѧ, ꙳ мꙋ́жъ бы́лъ є҆сѝ бла́гъ, і҆а́кѡве, по сꙋществꙋ̀, ꙳ и҆ бл҃года́ти бжⷭ҇твенныѧ сы́нъ и҆менꙋ́емь, ꙳ нра́вѡвъ твои́хъ бл҃гостїю, и҆ ᲂу҆ма̀ чистото́ю, ꙳ хрⷭ҇то́въ показа́лсѧ є҆сѝ ꙳ ᲂу҆ч҃ни́къ и҆́скреннїй.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Ѻ҆рга́нъ до́брѣ соста́вленъ, ꙳ бжⷭ҇твеннымъ ѡ҆кормле́нїемъ, а҆пⷭ҇ле і҆а́кѡве, бы́въ, ꙳ ꙗ҆зы́кѡвъ зва́нїю ты̀ ввѣ́рилсѧ є҆сѝ, ꙳ къ позна́нїю хрⷭ҇то́вꙋ наставлѧ́ѧ ꙳ словесы̀ и҆ дѣѧ̑нїи: ꙳ и҆ всѧ̑ просвѣти́лъ є҆сѝ, ꙳ и҆сповѣ́дати и҆́стинное і҆и҃сово бжⷭ҇тво̀, сп҃са дꙋ́шъ на́шихъ.
Сла́ва, гла́съ є҃:
Вѣ́рнѡ торжествꙋ́емъ пречестны́й де́нь твоеѧ̀ па́мѧти, і҆а́кѡве сла́вне, не ꙗ҆́кѡ а҆лфе́ева тѧ̀ сы́на, но ꙗ҆́кѡ а҆пⷭ҇ла хрⷭ҇то́ва почита́юще, и҆ проповѣ́дника тогѡ̀ неизрече́ннагѡ воплоще́нїѧ. тѣ́мже влⷣчню прⷭ҇то́лꙋ со безпло́тными всегда̀ предстоѧ̀, и҆ а҆пⷭ҇лъ и҆ мч҃никъ ли̑ки, прилѣ́жнѡ моли́сѧ спасти́ ны сп҃си́телю и҆ бг҃ꙋ на́шемꙋ.
И҆ ны́нѣ, бг҃оро́диченъ: Хра́мъ и҆ две́рь є҆сѝ:
Тропа́рь, гла́съ г҃:
А҆пⷭ҇ле ст҃ы́й, і҆а́кѡве, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, бг҃оро́диченъ воскре́сенъ.
Прпⷣбномꙋ же а҆ндроні́кꙋ пое́мъ на повече́рїи канѡ́нъ.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.
Пред̾ѡчи́стивъ твою̀ дꙋ́шꙋ, а҆ндроні́че, до́блими добродѣ́тельми, и҆ бжⷭ҇твенныѧ любвѐ разже́гсѧ ᲂу҆́гльми, плотски́хъ ᲂу҆клони́лсѧ є҆сѝ распале́нїй: ро́сꙋ бо бжⷭ҇твеннꙋю свы́ше и҆мѣ́лъ є҆сѝ, тѧ̀ ѡ҆роша́ющꙋю всегда̀.
Влⷣчнимъ повелѣ́нїємъ повинꙋ́ѧсѧ, ꙗ҆́кѡ патрїа́рхъ и҆ногда̀ а҆враа́мъ, ѻ҆́ч҃е, твою̀ зе́млю ѡ҆ста́вилъ є҆сѝ, и҆ сро́дники небре́гъ: жены́ же и҆ бога́тства дале́че бы́въ, и҆ въ пꙋсты́ню, бл҃же́нне, всели́лсѧ є҆сѝ ᲂу҆единѧ́емь.
Гдⷭ҇ню за́повѣдь и҆спо́лнилъ є҆сѝ, всѧ̑ прода́въ твоѧ̑, и҆ ни́щымъ разда́въ, и҆́миже кꙋ́плю би́сера ѡ҆брѣ́лъ є҆сѝ честна́гѡ: и҆ се́й прїе́мь, ѡ҆богати́лсѧ є҆сѝ ѻ҆би́льнѡ бога́тнымъ мѵ́рѡвъ и҆сточе́нїемъ.
Бг҃оро́диченъ:
Созида́етсѧ во́лею во ᲂу҆тро́бѣ твое́й а҆да́мовъ содѣ́тель, и҆ дла́нїю носѧ́й, бцⷣе, всѧ́чєскаѧ, твои́ми рꙋка́ми но́ситсѧ. ѽ стра́шнагѡ та́инства! и҆ млⷣнцъ ꙗ҆влѧ́етсѧ, всѣ́хъ ст҃ы́хъ гдⷭ҇ь.
Пѣ́снь г҃. І҆рмо́съ:
Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.
И҆згна́нъ ѿ є҆де́ма совѣ́томъ є҆́ѵинымъ а҆да́мъ, ты́ же вѣ́ровавъ совѣ́тꙋ сопрꙋ́жницы твоеѧ̀, мꙋ́дре, раѧ̀ бы́лъ є҆сѝ внꙋ́трь, и҆ съ не́ю ра́дꙋешисѧ всегда̀, блаже́нне а҆ндроні́че.
И҆́же та́йнѡ и҆ мꙋ́дрѣ ᲂу҆строѧ́ѧ всѧ̑ до́брѣ сло́во, и҆ земны̑ѧ ко спасе́нїю направлѧ́ѧ, ѿ землѝ на нб҃са̀ люби̑мыѧ преставлѧ́етъ дѣ́ти ва̑ша два̀, стезю̀ пра́вꙋ ꙗ҆влѧ́ѧ ва́мъ.
Ѡ҆ маловре́меннѣй и҆ тлѣ́ющей небре́гше любвѝ, на землѝ сꙋ́щымъ ѡ҆ста́вльше сїю̀, свѧза́стесѧ любо́вїю дꙋхо́вною бл҃же́ннїи. тѣ́мже ны́нѣ водворѧ́етесѧ, и҆дѣ́же пра́ведныхъ селє́нїѧ.
Бг҃оро́диченъ:
Безсосꙋжде́ннѡ херꙋві̑мъ и҆ серафі̑мъ пребо́льши, ꙗ҆́же бг҃а несказа́ннѡ ро́ждшаѧ, и҆ земны̑мъ клѧ́твꙋ на бл҃гослове́нїе преложи́вшаѧ, пѣ́сньми всегда̀ да почита́етсѧ: та́ бо на́ше ᲂу҆пова́нїе.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
По́ты трꙋдѡ́въ твои́хъ, ѿ пло́ти твоеѧ̀ ка́плющїи, свѧще́ннѣйше а҆ндроні́че, въ воню̀ мѵ́ра преложи́шасѧ.
Ꙗ҆́коже фі́нїѯъ высокора́сленный, ты̀ въ пꙋсты́нѧхъ, ѻ҆́ч҃е, процвѣ́лъ є҆сѝ, и҆ бг҃ꙋ плодоноси́лъ є҆сѝ сладча́йшыѧ болѣ̑зни трꙋдѡ́въ твои́хъ.
Сле́зными ѡ҆дождє́нїи пꙋсты́ннꙋю зе́млю ѡ҆роси́лъ є҆сѝ, плодоно́снꙋ же ꙗ҆ви́лъ є҆сѝ дꙋ́шꙋ твою̀ болѣ́зньми по́стническими.
Бг҃оро́диченъ:
Не и҆стощи́въ гдⷭ҇и ѻ҆ч҃ескихъ нѣ́дръ, въ твою̀ всели́сѧ ᲂу҆тро́бꙋ, ѻ҆трокови́це, пречⷭ҇тꙋю, и҆ мі́ръ ве́сь ѡ҆бновѝ.
Пѣ́снь є҃. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Воспои́мъ а҆ндроні́ка пѣ́сньми всѝ вѣ́рнїи, и҆ тогѡ̀ сопрꙋ́жницꙋ а҆ѳана́сїю просла́вимъ.
Ѿню́дъ, ꙗ҆́коже є҆́сть пи́сано, не да́лъ є҆сѝ сна̀ твои́ма ѻ҆чи́ма, ни дрема́нїѧ твои́ма вѣ́ждома, а҆ндроні́че.
Просла́ви мѵ́ры тѧ̀ гдⷭ҇и, бл҃же́нне, твоѧ̑ трꙋды̀ воспрїе́мый, ꙗ҆́кѡ же́ртвꙋ сꙋ́щнѣ благопрїѧ́тнꙋ.
Бг҃оро́диченъ:
Є҆ди́нагѡ ѿ трⷪ҇цы родила̀ є҆сѝ, ѻ҆трокови́це, стра́шнѡ, и҆ млеко́мъ пита́ла є҆сѝ, земны́хъ є҆стество̀ пита́ющаго.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многоми́лостиве хрⷭ҇тѐ бж҃е на́шъ.
Є҆сте́ственнаѧ сла́бость ника́коже предложе́нїѧ притꙋпѝ, є҆́же стѧжа́ла є҆сѝ къ болѣ́знемъ, ѽ прпⷣбнаѧ! страда̑нїѧ.
Премѣни́вши ѡ҆дѣѧ́нїе ꙗ҆́вѣ, є҆стество̀ ᲂу҆таи́ла є҆сѝ: тѣ́мъ несꙋмнѣ́ннѡ пꙋ́ть спасе́нїѧ соверши́ла є҆сѝ.
Оу҆вѣ́дѣвши сꙋпрꙋ́га твоего̀ пꙋтьше́ствꙋюща, є҆мꙋ́же и҆ послѣ́дствовала є҆сѝ, ника́коже что̀ къ немꙋ̀ бесѣ́довавши.
Бг҃оро́диченъ:
Гла́съ гаврїи́ловъ тебѣ̀, ѻ҆трокови́це, ны́нѣ прино́симъ: ра́дꙋйсѧ, гдⷭ҇ь съ тобо́ю, блгⷭ҇ве́ннаѧ, вопїю́ще тѝ.
Сѣда́ленъ, гла́съ и҃. Подо́бенъ: Премꙋ́дрости:
И҆́го гдⷭ҇не ле́гкое вседꙋ́шнѡ на ра́мена воспрїе́мъ, томꙋ̀ послѣ́довалъ є҆сѝ бг҃оно́се а҆ндроні́че, и҆ мїрски́хъ мѧте́жей до́брѣ возненави́дѣлъ є҆сѝ, въ пꙋсты́ню, бл҃же́нне, ᲂу҆се́рднѡ все́льсѧ, и҆дѣ́же, тече́нїе по́стническое ѻ҆́ч҃е, безъ поро́ка соверши́лъ є҆сѝ, бг҃ꙋ совокꙋплѧ́ѧсѧ. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: благослове́нъ є҆сѝ, гдⷭ҇и бж҃е, во вѣ́ки.
Дре́вле хва́лѧщагосѧ безмѣ́рнѡ ѕлонача́льнаго ѡ҆держа́ти всю̀ тва́рь, ꙗ҆́кѡ пти́чицꙋ хꙋ́дꙋ низложи́лъ є҆сѝ, си́лою защити́всѧ дх҃а и҆ крⷭ҇та̀ всеѻрꙋ́жїемъ.
Носѧ̀ на ра́мѣхъ крⷭ҇тъ тво́й, послѣ́довалъ є҆сѝ гдⷭ҇ꙋ вседꙋ́шнѡ, и҆ сла́вы є҆гѡ̀ полꙋчи́лъ є҆сѝ бжⷭ҇твенныѧ, ꙗ҆́кѡ и҆спо́лнитель, а҆ндроні́че, тогѡ̀ за́повѣдей.
Ꙗ҆влѧ́етъ благода́ть мѵ́рѡвъ є҆́же ко гдⷭ҇ꙋ твоѐ дерзнове́нїе, вода́мъ бо лїѧ́нїю подо́битсѧ, на спасе́нїе всегда̀ вѣ́рныхъ пролива́ема.
Бг҃оро́диченъ:
Да ѡ҆божи́тъ моѐ є҆стество̀, всесоверше́нный, неизрече́ннѡ младе́нствꙋетъ, и҆зъ тебє̀, чⷭ҇тыѧ, происхо́дитъ, и҆́же сло́вомъ приведы́й всѧ́чєскаѧ, и҆ содержѧ̀ и҆ ᲂу҆крѣплѧ́ѧ.
Пѣ́снь и҃. І҆рмо́съ:
Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Сле́зными стрꙋѧ́ми напои́въ твою̀ дꙋше́внꙋю ни́вꙋ, пожа́лъ є҆сѝ є҆́же ѿ чꙋдодѣѧ́нїй воздаѧ́нїе бога́тное.
Ѡ҆стрꙋ́пльшꙋюсѧ дꙋ́шꙋ мою̀ согрѣше́ньми, моли́твъ твои́хъ бжⷭ҇твеннымъ врачева́нїемъ сїю̀ и҆сцѣлѝ, ᲂу҆го́дниче гдⷭ҇ень.
Трⷪ҇ченъ:
Пребезнача́льнꙋю вѣ́рнїи воспои́мъ благоче́стнѡ трⷪ҇цꙋ всест҃ꙋ́ю, и҆зъ не сꙋ́щагѡ приве́дшꙋю всѧ́чєскаѧ.
Бг҃оро́диченъ:
Данїи́лъ тѧ̀ прови́дѣ го́рꙋ, ѻ҆трокови́це, несѣко́мꙋю, ѿ неѧ́же ѿсѣче́сѧ ка́мень, сокрꙋши́вый хра́мы і҆́дѡльскїѧ.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
И҆сточа́еши мѵ́рѡвъ бл҃года́ть неистощи́мꙋю, и҆ притека́ющымъ всѣ̑мъ подае́ши вѣ́рнѡ недꙋ́гѡвъ разрѣше́нїе, ѻ҆́ч҃е а҆ндроні́че.
Преложи́лсѧ є҆сѝ ѿ привре́менныхъ ра́дꙋѧсѧ къ вы̑шнимъ, и҆ со ѻ҆тцы̀ ст҃ы́ми всели́всѧ, на́съ па́мѧть твою̀ творѧ́щихъ, ѻ҆́ч҃е, помина́й всегда̀.
Прїимѝ моѐ пѣ́нїе, ѽ дво́ице прпⷣбныхъ! и҆ ѿда́нїе мѝ пода́ждь, твои́мъ къ бг҃ꙋ моле́нїемъ, прегрѣше́нїй и҆зба́вити мѧ̀.
Бг҃оро́диченъ:
Прописа̀ твою̀ ᲂу҆тро́бꙋ дре́вле, трѝ ѻ҆́троки не ѡ҆пали́вшаѧ пе́щь, ѻ҆трокови́це чⷭ҇таѧ: и҆́бо неѡпа́льнѡ прїѧ́ла є҆сѝ ѻ҆́гнь бж҃ества̀.
Стїхи̑ры, гла́съ ѕ҃. Подо́бенъ: Всѐ ѿло́жше:
Всѐ ѿложи́вше ꙳ жите́йское томле́нїе, ꙳ и҆ бога́тство возненави́дѣвше, ꙳ и҆ сла́дость текꙋ́щꙋю презрѣ́вше, ꙳ крⷭ҇тъ взѧ́сте, ꙳ ꙗ҆́кѡ и҆́го бжⷭ҇твенное, и҆ хрⷭ҇тꙋ̀ послѣ́довасте, и҆ къ нбⷭ҇номꙋ поко́ю нꙋ́днѡ всели́стесѧ: въ не́мже свеселѧ́щесѧ, ꙳ помина́йте на́съ вѣ́рою помина́ющихъ вы̀, ꙳ и҆ любо́вїю соверша́ющихъ благоговѣ́йнѡ, ꙳ свѧще́ннꙋю и҆ честнꙋ́ю па́мѧть ва́шꙋ, ст҃і́и.
Весьма̀ возлю́бльшаѧ ꙳ тебѐ влⷣкꙋ ѿ дꙋшѝ, во слѣ́дъ тебє̀ потечѐ ꙳ дво́ица приснопа́мѧтнаѧ, ꙳ и҆ є҆диносопрꙋ́жнаѧ: ꙳ и҆ всѧ̑ кра̑снаѧ и҆ ю҆́зꙋ нерѣши́мꙋю ꙳ ꙗ҆́кѡ паꙋчи́нꙋ прето́рже, ꙳ тѣ́мъ и҆ полꙋчѝ црⷭ҇твїе твоѐ безсме́ртне. ꙳ тѣ́хъ ᲂу҆́бѡ моли́твами, ꙳ ѡ҆чище́нїе, ще́дрый, пода́ждь на́мъ согрѣше́нїй, ꙳ и҆ ꙗ҆ви́ ны вы́шшыѧ страсте́й, ꙳ смꙋща́ющихъ на́шꙋ дꙋ́шꙋ влⷣко, всегда̀.
Дѣте́й лише́ни бы́сте, ꙳ любе́зныѧ дрꙋ́жбы, ꙳ по́двигомъ бо́льшимъ, ꙳ въ житїѝ пребыва́юще неꙋтѣ́шни, ꙳ гла́съ и҆спꙋща́сте ꙳ до́блественнѣйшїй і҆́ѡвль, взыва́юще: ꙳ гдⷭ҇ь дадѐ, гдⷭ҇ь и҆ па́ки взѧ̀. ꙳ тѣ́мъ и҆ жела́емое ва́ми дѣ́ло ꙳ ᲂу҆до́бнѡ соверши́сте, ꙳ и҆ къ любе́знѣйшымъ мѣ́стѡмъ ст҃ы̑мъ, ꙳ ра́достнѡ преходѧ́ще ꙗ҆ви́стесѧ, ꙳ сопрꙋ́же свѧще́ннѣйшїй.
Сла́ва, и҆ ны́нѣ, бг҃оро́диченъ:
Ра́дꙋйсѧ, ко́реню лѣтора́сленный, ꙳ ра́дꙋйсѧ, же́зле бж҃е́ственный а҆арѡ́новъ, ꙳ прозѧбы́й цвѣ́тъ неꙋвѧда́ющїй, ꙳ благопло́дный раю̀, ꙳ дре́во жи́зненное, ꙳ ѿ ко́рене і҆ессе́ева чⷭ҇таѧ процвѣ́тши ѻ҆трокови́це, ꙳ и҆ земны̑ѧ кормѧ́щи хлѣ́бомъ разꙋ́мнымъ. ꙳ ра́дꙋйсѧ, багрѧни́це всечⷭ҇тна́ѧ, ꙳ всѣ́хъ цр҃ѧ̀, бг҃оневѣ́сто, ꙳ ᲂу҆вѧзе́нїе свѣ́тлое, ꙳ а҆рхїере́євъ благолѣ́пїе. ꙳ ра́дꙋйсѧ, є҆ди́на пречⷭ҇таѧ.
Крⷭ҇тобг҃оро́диченъ. Подо́бенъ: то́йже:
А҆́гнца своего̀, ꙳ а҆́гница нескве́рнаѧ дре́вле, и҆ непоро́чнаѧ влⷣчца, ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ мт҃рски восклица́ше, ꙳ и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безблагода́тный ꙳ сꙋди́щꙋ пїла́товꙋ предаде́ тѧ, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, сло́ве, снисхожде́нїе.
На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла два́жды.
Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю:
По а҃-й каѳі́смѣ сѣда́ленъ, гла́съ в҃:
Оу҆лови́въ ꙗ҆зы́ки а҆пⷭ҇лъ сла́вный, и҆ наꙋчи́въ концы̀ зємны́ѧ тебѣ̀ кла́нѧтисѧ со ѻ҆ц҃е́мъ и҆ дх҃омъ, хрⷭ҇тѐ бж҃е. тогѡ̀ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, є҆ди́не ми́лостиве и҆ чл҃вѣколю́бче.
Два́жды.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ бы́хомъ ѻ҆́бщницы є҆стества̀ тобо́ю, бцⷣе приснодв҃о: бг҃а бо на́мъ воплоти́вшагосѧ родила̀ є҆сѝ. тѣ́мже по до́лгꙋ тѧ̀ всѝ благоче́стнѡ велича́емъ.
По в҃-й каѳі́смѣ сѣда́ленъ, гла́съ д҃. Подо́бенъ: Ско́рѡ предварѝ.
Ꙗ҆́кѡ лꙋчꙋ̀ сл҃нце пра́вды и҆спꙋсти́ тѧ хрⷭ҇то́съ, просвѣти́ти всю̀ зе́млю, а҆пⷭ҇ле сла́вный і҆а́кѡве, бжⷭ҇твенными твои́ми моли́твами ѡ҆зарѧ́еши, и҆ бжⷭ҇твеннымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Наде́ждо непосты́днаѧ надѣ́ющихсѧ на тѧ̀, є҆ди́на ро́ждшаѧ па́че є҆стества̀ пло́тїю хрⷭ҇та̀ бг҃а на́шего, того̀ со ст҃ы́ми а҆пⷭ҇лы молѝ, пода́ти вселе́ннѣй ѡ҆чище́нїе прегрѣше́нїй, всѣ̑мъ на́мъ пре́жде конца̀ житїѧ̀ и҆справле́нїе.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Мре́жею слове́съ бжⷭ҇твенныхъ ры̑бы ᲂу҆ловлѧ́ѧ словє́сныѧ, и҆ сїѧ̑ прине́слъ є҆сѝ нача́тки бг҃ꙋ на́шемꙋ, и҆ во хрⷭ҇тѡ́вы ꙗ҆́звы жела́ѧ ѡ҆блещи́сѧ, подо́бникъ страсте́мъ є҆гѡ̀ ꙗ҆ви́лсѧ є҆сѝ. тѣ́мъ соше́дшесѧ по до́лгꙋ чти́мъ тѧ̀, а҆пⷭ҇ле сла́вне, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Мы́слєннаѧ врата̀ жи́зни, пречⷭ҇таѧ бцⷣе, притека́ющыѧ къ тебѣ̀ вѣ́рнѡ и҆зба́ви ѿ бѣ́дъ: да сла́вимъ прест҃о́е ржⷭ҇тво̀ твоѐ, во спасе́нїе дꙋ́шъ на́шихъ.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ. Всѧ́кое дыха́нїе. Є҆ѵⷢ҇лїе і҆ѡа́нна, зача́ло ѯ҃з.
По н҃-мъ ѱалмѣ̀ стїхи́ра, гла́съ д҃. Подо́бенъ: Жєны̀ ᲂу҆слы́шите:
Ꙗ҆́кѡ таи́нникъ и҆ а҆пⷭ҇лъ, и҆ слꙋжи́тель и҆зрѧ́дный хрⷭ҇та̀ є҆ди́нагѡ влⷣки, і҆а́кѡве бг҃опроповѣ́дниче, сего̀ молѝ пода́ти правосла̑внымъ побѣди́тєльнаѧ, и҆ ѡ҆чище́нїе, всехва́льне, грѣхѡ́въ, соверша́ющымъ всесвѧтꙋ́ю па́мѧть твою̀.
Канѡ́нъ бцⷣы со і҆рмосо́мъ на ѕ҃, и҆ а҆пⷭ҇ла на и҃, є҆гѡ́же краегране́сїе:
Хрⷭ҇то́ва ᲂу҆ч҃нка̀ сн҃а а҆лфе́ева почита́ю. Ѳеофа́ново.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Рꙋ́кꙋ мѝ, да́ждь бг҃ови́дче и҆ ᲂу҆ч҃ничѐ хрⷭ҇то́въ і҆а́кѡве, честны́й тво́й пра́здникъ похвали́ти ᲂу҆стреми́вшꙋсѧ, и҆ свѣ́тъ се́рдцꙋ моемꙋ̀ твои́ми моли́твами возсїѧ́й.
Стрꙋѧ́ми бжⷭ҇твенныѧ мꙋ́дрости напое́нъ, рѣка̀ и҆сте́клъ, є҆сѝ ѿ раѧ̀ сла́дости, и҆ земно́е лицѐ тече́ньми благоче́стїѧ и҆́стиннѡ ꙗ҆́вѣ напои́лъ є҆сѝ.
Свѧще́ннѣйшемꙋ ли́кꙋ ᲂу҆ч҃ни̑къ хрⷭ҇то́выхъ счета́лсѧ є҆сѝ і҆а́кѡве, и҆сполнѧ́ѧ число̀ двонадесѧ́тныхъ: съ ни́миже влⷣцѣ предстоѧ̀, на́съ помина́й.
Бг҃оро́диченъ:
Тѧ̀, пречⷭ҇таѧ дв҃о, нб҃о простры́й гдⷭ҇ь, и҆ зе́млю ѡ҆снова́вый, не́бо земно́е на́мъ ꙗ҆ви́лъ є҆́сть, и҆зъ тебє̀ проше́дъ пло́тїю.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Бжⷭ҇твеннагѡ дх҃а ꙗ҆́вѣ прїе́мъ зарю̀, во тмѣ̀ сꙋ́щымъ ꙗ҆́кѡ ᲂу҆́тро показа́лсѧ є҆сѝ свѣ́тло, сл҃нца мы́сленнагѡ возвѣща́ѧ всѣ̑мъ ꙗ҆вле́нїе.
Нога̀ твоѧ̀ ста̀ ꙗ҆́вственнѡ въ пра́вости, бл҃же́нне, ᲂу҆ цр҃ѧ̀ пра́вагѡ же и҆ бл҃га́гѡ ликꙋ́ющи бг҃олѣ́пнѡ, и҆ ше́ствꙋющи стезю̀ нбⷭ҇нꙋю.
Сн҃а безнача́льна бж҃їѧ, всѧ̑ творѧ́щаго бжⷭ҇твенною вла́стїю, неле́стна тайноꙋчи́телѧ, зна́нїѧ и҆́стины тѧ̀ наꙋча́юща и҆мѣ́лъ є҆сѝ і҆а́кѡве.
Бг҃оро́диченъ:
Марі́е, всѣ́хъ наде́ждо на тѧ̀ надѣ́ющихсѧ, ро́ждши сло́во воплоще́нное на́съ ра́ди, разли́чныхъ мѧ̀ напа́стей и҆ бѣ́дъ пречⷭ҇таѧ, и҆зба́ви.
Сѣда́ленъ, гла́съ и҃. Подо́бенъ: Премꙋ́дрости:
Мꙋ́дрость и҆́стиннѡ ᲂу҆ч҃телѧ и҆мѣ́въ, тѧ̀ наꙋча́ющꙋю сꙋ́щымъ па́че ᲂу҆ма̀, мꙋ́дрость ѡ҆б̾юро́дилъ є҆сѝ є҆́ллинскꙋю, бг҃одꙋхнове́нне: и҆ ꙗ҆зы́кѡмъ бы́лъ є҆сѝ свѣти́льникъ бжⷭ҇твенный, благоче́стїѧ словесы̀ направлѧ́ѧ безꙋ̑мныѧ. тѣ́мъ и҆зба́вленнїи тобо́ю ѿ пре́лести, досто́йнѡ пое́мъ тѧ̀, и҆ вѣ́рнѡ ᲂу҆блажа́емъ, бг҃оглаго́ливе і҆а́кѡве: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Са́мъ тѧ̀ гдⷭ҇ь є҆ди́нъ ст҃ы́й, честно́мꙋ ли́кꙋ ᲂу҆ч҃никѡ́въ, блаже́нне, сочета̀, честно́е и҆ свѣ́тлое житїѧ̀ твоегѡ̀ прови́дѣвый.
Чꙋде́съ и҆спо́лненъ бжⷭ҇твеннагѡ дх҃а бы́въ бг҃опроповѣ́дниче, чꙋдотвори́ши бо недꙋ́ги ѿгонѧ́ѧ, и҆ лꙋка́вства дꙋхѡ́въ человѣ́ки свободи́лъ є҆сѝ.
Бжⷭ҇твенное сїѧ́нїе наше́дшее се́рдцꙋ твоемꙋ̀, бл҃же́нне, бг҃освѣ́тло сїѐ содѣ́ла, и҆ прїѧ́тно па́че ᲂу҆ма̀ дарова́нїй сотворѝ.
Бг҃оро́диченъ:
Бжⷭ҇твеннымъ твои́мъ ржⷭ҇тво́мъ, дв҃о, всечⷭ҇таѧ а҆́гг҃льстїи чи́ни, и҆ земны́хъ собо́ри совокꙋпи́шасѧ: миронача́льника бо, хрⷭ҇та̀, и҆ сп҃са всѣ́хъ родила̀ є҆сѝ.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Сл҃нцꙋ, бл҃же́нне, ᲂу҆́мномꙋ, собесѣ́дникъ бы́въ, лꙋчы̀ ты̀ ѿтꙋ́дꙋ прїе́млѧ, є҆́же по сꙋществꙋ̀ пе́рвый то́й є҆́сть, вторы́й по благода́ти бы́лъ є҆сѝ, сла́вне.
Оу҆́мъ чистѣ́йшїй и҆мѣ́въ, свѣ́тло же и҆ чи́сто се́рдце ты̀ стѧжа́въ, вопло́щшагосѧ бг҃а ви́дѣлъ є҆сѝ, непостижи́маго ра́зꙋмомъ.
Оу҆стꙋпа́етъ тѝ, ᲂу҆ч҃ничѐ, всѧ́ко прⷪ҇ро́чество, и҆ всѧ́ко законоположе́нїе, пребога́те: тѣ́ми бо дре́вле проповѣ́даемаго, самови́днѡ сподо́билсѧ є҆сѝ, блаже́нне, ви́дѣти.
Бг҃оро́диченъ:
Сѐ, дв҃о, прⷪ҇ро́чески и҆мѣ́ла є҆сѝ во чре́вѣ твое́мъ, сꙋ́щаго надъ всѣ́ми влⷣкꙋ и҆ гдⷭ҇а, и҆ неизрече́ннѡ сего̀, чⷭ҇таѧ, родила̀ є҆сѝ, дв҃а по ржⷭ҇твѣ̀ нетлѣ́нна пребы́вши.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Но́ги твоѧ̑ кра̑сныѧ, ми́ръ неле́стнѡ, ꙗ҆́кѡ благовѣствꙋ́юще ми́ръ сꙋ́щѡ преесте́ственный, и҆ ᲂу҆́мъ преимꙋ́щїй, ᲂу҆ч҃ничѐ хрⷭ҇то́въ всече́стне.
Разꙋмѣ́ти та́инство, и҆ проповѣ́дати стра́шное бж҃їѧ воплоще́нїѧ сподо́билсѧ є҆сѝ, і҆а́кѡве, перводѣ́льныѧ лꙋчы̀ прїе́мый ѿ самагѡ̀ высоча́йшагѡ, приснопа́мѧтне.
Неизрече́ннагѡ свѣ́та сїѧ́ѧ свѣ́тлостьми досто́йнѡ, верхо́вный хрⷭ҇то́въ а҆пⷭ҇ле, прилѣ́жнѡ моли́сѧ ѡ҆ творѧ́щихъ па́мѧть твою̀, сла́вне, пречестнꙋ́ю.
Бг҃оро́диченъ:
Всѣ́ми влады́чествꙋюща тва́рьми, ꙗ҆́кѡ бг҃а бл҃га́го ро́ждши, согрѣше́нїй мои́хъ, пречⷭ҇таѧ, стрꙋ́пы до конца̀ потребѝ, бл҃гоꙋтро́бна содѣва́ющи ро́ждшагосѧ и҆зъ тебє̀.
Конда́къ, гла́съ в҃. Подо́бенъ: Твє́рдыѧ:
Тве́рдѡ мꙋ́дрости догма́ты въ дꙋ́шы благочести́выхъ вложи́вшаго, похвала́ми да ᲂу҆блажи́мъ, ꙗ҆́кѡ бг҃овѣща́телѧ всѝ і҆а́кѡва: престо́лꙋ бо сла́вы влⷣчню предстоѧ̀, и҆ со всѣ́ми а҆́гг҃лы ра́дꙋетсѧ, молѧ̀ непреста́ннѡ ѡ҆ всѣ́хъ на́съ.
І҆́косъ:
Ꙗ҆́кѡ ᲂу҆ч҃ни́къ хрⷭ҇то́въ и҆ дрꙋ́гъ, невеще́ствєннымъ ликѡ́мъ спребыва́ѧй при́снѡ, и҆ свѣ́томъ ѡ҆зарѧ́емь невече́рнѧгѡ свѣтодаѧ́нїѧ, ᲂу҆ма̀ моегѡ̀ тмꙋ̀ разрѣшѝ, всебл҃же́нне: ꙗ҆́кѡ да твою̀ свѣтоно́снꙋю па́мѧть воспою̀, ю҆́же пое́тъ всѧ̀ тва́рь благоче́стнѡ пра́зднꙋющи дне́сь: всѣ́хъ бо вѣ́рныхъ наста́вникъ и҆ свѣти́льникъ бы́лъ є҆сѝ, і҆а́кѡве, молѧ̀ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Свѣ́тлостьми и҆ сїѧ́ньми дх҃а просвѣще́ннаго, ꙗ҆зы̑къ мно́жество, сѣ́мѧ бжⷭ҇твенное тѧ̀ и҆менꙋ́етъ зовꙋ́щи: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Мꙋ́дростїю ᲂу҆кра́шенъ бг҃одарова́нною тѝ, разори́лъ є҆сѝ мїрскꙋ́ю мꙋ́дрость, бг҃омꙋ́дреннѡ зовы́й а҆пⷭ҇ле: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Во всю̀ зе́млю и҆зы́де вѣща́нїе твоѐ, а҆пⷭ҇ле і҆а́кѡве, є҆́же возвѣсти́лъ є҆сѝ, ꙗ҆́кѡ гро́мъ, всѣ̑мъ страна́мъ, премꙋ́дре, воплоще́нное сло́во, досто́йнѡ проповѣ́даѧ.
Бг҃оро́диченъ:
Ст҃ы́хъ ст҃ѣ́йши, дв҃о мт҃и, ты̀ была̀ є҆сѝ, ꙗ҆́кѡ ро́ждши бг҃а несказа́ннѡ, є҆го́же воспѣва́юще, непреста́ннѡ зове́мъ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
Пѣ́снь и҃. І҆рмо́съ:
За зако́ны ѻ҆ч҃єскїѧ бл҃же́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Свѧщенноꙋчени́къ нбⷭ҇нымъ наꙋче́нъ и҆́стиннѡ, бл҃же́нне, та́инствѡмъ, проше́лъ є҆сѝ всю̀ вселе́ннꙋю, а҆пⷭ҇ле, проповѣ́даѧ велегла́снѡ сло́во вѣ́ры хрⷭ҇то́вы, и҆ наꙋча́ѧ неизрече́нною бл҃года́тїю: гдⷭ҇а воспѣва́йте дѣла̀, и҆ превозноси́те во всѧ̑ вѣ́ки.
Бога́тъ бы́лъ є҆сѝ и҆ бл҃же́нъ, сподо́бленъ всѧ́кагѡ блаже́нства, ꙗ҆́кѡ собесѣ́дникъ и҆ соѻбита́тель бы́въ влⷣцѣ, и҆ коне́чное и҆́стиннѡ жре́бїемъ до́брѣ ѡ҆бога́щсѧ, и҆ сло́вꙋ свеселѧ́сѧ воспѣва́ше: гдⷭ҇а по́йте дѣла̀, и҆ превозноси́те во всѧ̑ вѣ́ки.
За мі́ръ моли́твенникъ и҆зѧ́щнѣйшїй ко сп҃сꙋ ста́ни, бл҃же́нне а҆пⷭ҇ле, просѧ̀ свы́ше бога́тнаго ми́ра цр҃квамъ, и҆ хва́лѧщымъ тѧ̀ вѣ́рнѡ прегрѣше́нїй ѡ҆ставле́нїе, и҆ дꙋша́мъ спасе́нїе вопїю́щымъ: гдⷭ҇а по́йте дѣла̀, и҆ превозноси́те во всѧ̑ вѣ́ки.
Бг҃оро́диченъ:
Ты̀ спасе́нїѧ всѣ̑мъ хода́таица, бг҃омт҃и, ꙗ҆ви́ласѧ є҆сѝ, є҆ди́на всепѣ́таѧ, сп҃са ро́ждши бж҃їѧ бг҃а сло́ва, и҆зба́вльшаго на́съ дре́внїѧ клѧ́твы, и҆ бл҃гослове́нїе дарова́вшаго, вѣ́рою зовꙋ́щымъ: гдⷭ҇а по́йте дѣла̀, и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Не рыда́й менѐ, мт҃и, зрѧ́щи во гро́бѣ, є҆го́же во чре́вѣ безъ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.
Ꙗ҆ви́лсѧ є҆сѝ мі́рꙋ ꙗ҆́коже мо́лнїѧ претека́ѧ, во тмѣ̀ дре́вле и҆ сѣ́ни невѣ́дѣнїѧ сѣдѧ́щыѧ, влекі́й ко свѣ́тꙋ незаходи́момꙋ вопло́щшагѡсѧ є҆диноро́днагѡ сн҃а, є҆го́же самови́децъ и҆ дѣ́йственный слꙋга̀ бы́лъ є҆сѝ, блаже́нне: є҆го́же велича́емъ.
Бꙋ́рное, бл҃же́нне, ѿ нб҃сѐ носи́мое дыха́нїе прїе́мъ, и҆ ѧ҆зы́комъ ѻ҆гнедохнове́ннымъ ѡ҆бога́щсѧ, пожига́еши ꙗ҆́кѡ те́рнїе безбо́жнꙋю мїрскꙋ́ю мꙋ́дрость, свѣща́тельными зарѧ́ми проповѣ́данїѧ хрⷭ҇то́ва сїѧ́ѧ, и҆ мра́къ разорѧ́ѧ бг҃облаже́нне.
Прїимѝ, бг҃огла́се а҆пⷭ҇ле і҆а́кѡве, моле́бнꙋю пѣ́снь, ю҆́же тѝ прино́симъ, твою̀ пра́зднꙋюще пречестнꙋ́ю и҆ пресвѣ́тлꙋю па́мѧть: и҆зба́ви ѿ грѣхѡ́въ рабы̑ твоѧ̑, верхо́вный хрⷭ҇то́въ а҆пⷭ҇ле, прилѣ́жнѡ молѧ́сѧ, да досто́йнѡ тѧ̀ велича́емъ.
Бг҃оро́диченъ:
Ꙗ҆́кѡ неискꙋсомꙋ́жнѡ во чре́вѣ твое́мъ прїе́мши сло́во, пребыла̀ є҆сѝ нетлѣ́нна, пречⷭ҇таѧ дв҃о, и҆ ро́ждши на́мъ є҆мманꙋ́ила, сꙋ́щаго вкꙋ́пѣ бг҃а и҆ чл҃вѣ́ка. сего̀ сꙋгꙋ́ба є҆стество́мъ вѣ́дꙋще, тѧ̀ велича́емъ.
Свѣти́ленъ. Подо́бенъ: Дх҃омъ во ст҃и́лищи:
Не ꙗ҆́кѡ сы́на а҆лфе́ева, но ꙗ҆́кѡ ᲂу҆ч҃ника̀ сло́ва, разꙋмѣ́емъ тѧ̀, і҆а́кѡве а҆пⷭ҇лѡвъ сла́во: и҆́бо бжⷭ҇твенное сїѧ́нїе ꙗ҆́вственнѡ прїѧ́лъ є҆сѝ, и҆ бл҃года́ть чꙋде́съ, ѿгонѧ́ти недꙋ́ги ѿ человѣ̑къ, вѣ́рою соверша́ющихъ всесвѧще́ннꙋю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ и҆мꙋ́щи бл҃гоꙋтро́бїе и҆ ми́лость вели́кꙋю, бцⷣе дв҃о, при́зри, пренепоро́чнаѧ, на моѐ смире́нїе, и҆ стра́стнꙋю бꙋ́рю и҆ печа́лей нахождє́нїѧ разженѝ, чⷭ҇таѧ, и҆ ѻ҆гнѧ̀ гее́нскагѡ и҆зба́ви мѧ̀ твои́ми моли́твами:
На хвали́техъ стїхи̑ры на д҃, гла́съ д҃. Подо́бенъ: Ꙗ҆́кѡ до́блѧ:
Тро́стїю бл҃года́ти, ꙳ ѿ глꙋбины̀ сꙋ́етства человѣ́ки ꙳ и҆звле́клъ є҆сѝ, досточꙋ́дне, ꙳ ᲂу҆ч҃телѧ ма́нїємъ ꙳ повинꙋ́всѧ і҆а́кѡве, ꙳ просвѣ́щшагѡ по всемꙋ̀ твоѐ разꙋмѣ́нїе, ꙳ и҆ а҆пⷭ҇ла, и҆ че́стна бг҃оглаго́льника, ꙳ тѧ̀, всебл҃же́нне, показа́вша, ꙳ тогѡ̀ непости́жнагѡ бж҃ества̀.
Два́жды.
Дх҃а сїѧ́нїе на тѧ̀ сни́де ꙳ во ѻ҆́гненнѣ ви́дѣ, ꙳ и҆ тѧ̀, бл҃же́нне, ꙳ бжⷭ҇твенное прїѧ́телище содѣ́ла: ꙳ ско́рѡ ѿгонѧ́ща безбо́жїѧ мглꙋ̀, ꙳ и҆ мі́ръ просвѣща́юща ꙳ сїѧ́нїемъ всемꙋ́дрыхъ твои́хъ слове́съ, ꙳ тайноглаго́льниче, а҆пⷭ҇лѡвъ ᲂу҆краше́нїе, ꙳ хрⷭ҇то́въ самови́дче, бл҃же́нне.
Мо́лнїѧми проповѣ́данїѧ, ꙳ во тмѣ̀ сѣдѧ́щыѧ невѣ́дѣнїѧ, ꙳ сла́вне, просвѣти́въ, ꙳ показа́лъ є҆сѝ сы́ны ꙳ влⷣки и҆ бг҃а вѣ́ры ра́ди: ꙳ є҆гѡ́же стрⷭ҇те́мъ ревнова́лъ є҆сѝ и҆ сме́рти, ꙳ и҆ сла́вы бы́лъ є҆сѝ наслѣ́дникъ, ꙗ҆́кѡ мꙋ́дръ, и҆ бг҃оглаго́ливъ, ꙗ҆́кѡ ᲂу҆ч҃ни́къ и҆́стиннѣйшїй.
Сла́ва, гла́съ в҃:
Ѡ҆ста́вивъ земна̑ѧ, послѣ́довалъ є҆сѝ хрⷭ҇тꙋ̀, и҆ зна́менавсѧ дохнове́нїемъ ст҃а́гѡ дх҃а, по́сланъ бы́въ ѿ негѡ̀ въ ꙗ҆зы́ки поги́бшыѧ, ѡ҆браща́ти человѣ́ки въ свѣ́тъ бг҃озна́нїѧ, а҆пⷭ҇ле і҆а́кѡве: и҆ сконча́въ по́двиги бжⷭ҇твенныѧ твоеѧ̀ стра́сти и҆ мꙋ́къ разли́чныхъ дꙋ́шꙋ твою̀ хрⷭ҇тꙋ̀ пре́далъ є҆сѝ. того̀ молѝ всеблаже́нне, дарова́ти на́мъ ве́лїю ми́лость.
И҆ ны́нѣ: Всѐ ᲂу҆пова́нїе моѐ:
Славосло́вїе вели́кое. И҆ ѿпꙋ́стъ.
На лїтꙋргі́и: Блажє́нна а҆пⷭ҇ла, пѣ́снь г҃ и҆ ѕ҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Небеса̀ повѣ́даютъ сла́вꙋ бж҃їю: А҆по́столъ къ корі́нѳѧнѡмъ, зача́ло рл҃а. А҆ллилꙋ́їа, гла́съ в҃: И҆сповѣ́дѧтъ небеса̀ чꙋдеса̀ твоѧ̑ гдⷭ҇и: Є҆ѵⷢ҇лїе лꙋкѝ, зача́ло н҃а. Прича́стенъ: Во всю̀ зе́млю и҆зы́де вѣща́нїе и҆́хъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.