← претходни дан | Минеј — Октобар | следећи дан →
8 октября: Преподобной матери нашей Пелагии
Мѣ́сѧца тогѡ́же во и҃-й де́нь.
Прпⷣбныѧ ма́тере на́шеѧ пелагі́и.
На Гдⷭ҇и, воззва́хъ, стїхи̑ры, гла́съ и҃. Поⷣ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ вмꙋжи́вшисѧ жена̀, врага̀ попра̀, ꙳ и҆ стра̑сти ᲂу҆гасѝ тѣлє́сныѧ ꙳ воздержа́нїемъ мно́гимъ: ꙳ и҆ на ра́мѣхъ гдⷭ҇ень крⷭ҇тъ ꙳ воспрїе́мши пелагі́а те́плѣ, ꙳ тѧ́гость ѿложѝ ꙳ жите́йскагѡ и҆мѣ́нїѧ, ꙳ мꙋ́драгѡ нѡ́на ᲂу҆че́ньми послѣ́дова хрⷭ҇тꙋ̀.
Но́ваѧ ѳе́кла на́мъ ꙗ҆ви́ласѧ є҆сѝ: ꙳ ꙗ҆́коже бо и҆но́го па́ѵла, ꙳ ѡ҆брѣ́тши нѡ́на ᲂу҆чи́телѧ, ꙳ и҆ тогѡ̀ поревнова́ла є҆сѝ ᲂу҆че́нїємъ, сла́внаѧ, ꙳ приложи́вшисѧ покаѧ́нїю те́плѣ, ꙳ и҆ совокꙋпи́ласѧ є҆сѝ воздержа́нїемъ хрⷭ҇тꙋ̀, ѽ пребл҃же́ннаѧ пелагі́е всечестна́ѧ! ꙳ тѣ́мъ хрⷭ҇та̀ не преста́й молѧ́щи, ꙳ спасти́сѧ на́мъ.
Ра́дꙋйсѧ, пелагі́е всечестна́ѧ, ꙳ ты̀ ко бжⷭ҇твенною ре́вностїю ꙳ разже́гшисѧ всече́стнѣ, ꙳ блꙋ́днꙋю ѿве́ргла є҆сѝ сла́сть, пребл҃же́ннаѧ, ꙳ и҆ прите́кше къ нѡ́нꙋ взыва́ла є҆сѝ: ꙳ ѿвѣ́тъ возда́си ѡ҆ дѣѧ́нїихъ мои́хъ, ꙳ а҆́ще не зна́менаеши мѧ̀ зна́менїемъ, сла́вне, хрⷭ҇то́вымъ, ꙳ креще́нїемъ ѡ҆дѣва́ѧ мѧ̀ ꙳ чи́стыѧ ѻ҆де́жды.
Сла́ва, гла́съ д҃. І҆ѡа́нна мона́ха:
И҆дѣ́же ᲂу҆мно́жисѧ грѣ́хъ преизли́шествова бл҃года́ть, ꙗ҆́коже ᲂу҆́читъ а҆пⷭ҇лъ: въ моли́твахъ бо и҆ слеза́хъ, мно́гихъ согрѣше́нїй, пелагі́е, пꙋчи́нꙋ и҆зсꙋши́ла є҆сѝ, и҆ наконе́цъ благопрїѧ́тное покаѧ́нїе гдⷭ҇ꙋ принесла̀ є҆сѝ, и҆ въ се́мъ мо́лишисѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:
А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше. ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
На стїхо́внѣ ѻ҆ктѡ́иха. Тропа́рь, гла́съ и҃:
Въ тебѣ̀ ма́ти и҆звѣ́стнѡ спасе́сѧ, є҆́же по ѻ҆́бразꙋ: прїи́мши бо кре́стъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ пелагі́е, дꙋ́хъ тво́й.
На ᲂу҆́трени ѻ҆́ба канѡ́на ѻ҆ктѡ́иха: и҆ ст҃ы́ѧ на д҃, є҆гѡ́же краегране́сїе: Любо́вїю че́ствꙋю мꙋ́дрꙋю пелагі́ю.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Предложи́вши ꙗ҆́кѡ многопи́ршественнꙋю дне́сь, бжⷭ҇твеннꙋю па́мѧть свою̀, вселе́ннѣй все́й та́инственнѡ пелагі́а, повелѣва́етъ напита́тисѧ всѣ̑мъ снѣ́дей по́двигѡвъ є҆ѧ̀.
Жела́нїе є҆́же па́че всѧ́кагѡ хотѣ́нїѧ, всели́вшеесѧ въ дꙋ́шꙋ твою̀, честна́ѧ, ѡ҆зарѝ ᲂу҆́мъ, и҆ пла́мень дх҃а вже́гъ тебѐ просвѣтѝ, и҆ страсте́й ти́нꙋ попалѝ.
Мо́рѧ грѣхо́внагѡ волне́нїѧ и҆збѣ́гши, честна́ѧ, къ ти́хомꙋ приста́нищꙋ хрⷭ҇то́вꙋ, пелагі́е, приста́ла є҆сѝ: тѣ́мъ покаѧ́нїемъ твои́мъ наслѣ́довала є҆сѝ кро́ткихъ зе́млю.
Бг҃оро́диченъ:
Тишина̀ сꙋ́щихъ въ житїѝ, чⷭ҇таѧ, вла́ющихсѧ земны́хъ, ты̀ тве́рдаѧ и҆ крѣ́пкаѧ а҆гкѵ́ра: и҆ приста́нище и҆ ѡ҆кормле́нїе є҆сѝ, всегда̀ къ тебѣ̀ рꙋководѧ́щи и҆ спаса́ющи.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Возлетѣ́ла є҆сѝ на нб҃са̀ хрⷭ҇то́ва голꙋби́це, крила́ми воздержа́нїѧ, и҆ болѣ́зньми мно́гими возвы́сившисѧ.
Ти̑ны стра̑стныѧ ты̀ ѕлосмра́дное, хрⷭ҇то́вою водо́ю ѡ҆мы́вши, честна́ѧ, мѵ́ро, пелагі́е, ꙗ҆ви́ласѧ є҆сѝ є҆мꙋ̀.
Ѻ҆рꙋ́жїе врагꙋ̀ смертоно́сное и҆́стиннѡ бы́сть, къ бг҃ꙋ твоѧ̀, честна́ѧ, разжже́ннаѧ любо́вь и҆ жела́нїе.
Бг҃оро́диченъ:
Ꙗ҆́кѡ роса̀ ᲂу҆́треннѧѧ весе́лїе твоѐ, чⷭ҇таѧ, ка́плющи, страсте́й пе́щь тебѐ пою́щымъ ᲂу҆гаша́етъ всегда̀.
Сѣда́ленъ, гла́съ и҃. Подо́бенъ: Премꙋ́дрости:
Покаѧ́нїѧ росо́ю страсте́й ᲂу҆гаси́вши пла́мень, тво́й живо́тъ возложи́ла є҆сѝ хрⷭ҇тꙋ̀ и҆ сп҃сꙋ твоемꙋ̀, и҆ є҆гѡ̀ ра́ди мі́ра и҆збѣ́гши, ᲂу҆едини́ласѧ є҆сѝ въ пꙋсты̑ни, житїѐ а҆́гг҃льское доше́дши: тѣ́мъ и҆ кончи́нꙋ со сла́вою вели́кою ѡ҆брѣ́тши ѿ бг҃а почита́емꙋ, позна́ласѧ є҆сѝ концє́мъ, пелагі́е равноа́гг҃льнаѧ. молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти пра́зднꙋющымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, непра́веднѡ воздви́жена, пла́чꙋщисѧ го́рькѡ взыва́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости, бж҃е преблагі́й, безгрѣ́шне гдⷭ҇и. є҆́йже вѣ́рнѡ возопїи́мъ: бл҃гоꙋтро́бїе покажѝ, дв҃о, на ны̀, и҆ согрѣше́нїй ѡ҆ставле́нїе да́рꙋй, покланѧ́ющымсѧ тогѡ̀ страда́нїємъ.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Ꙗ҆́кѡ кади́ло пречестно́е, пелагі́е, воздержа́нїѧ ᲂу҆́глїемъ, всесожега́емо благово́нїе была̀ є҆сѝ хрⷭ҇тꙋ̀ бг҃ꙋ на́шемꙋ, въ воню̀ те́кши мѵ́ра є҆гѡ̀.
Тѣле́сное благолѣ́пїе, пелагі́е, грѣхѡ́вныѧ ти̑ны пре́жде бы́вшее, всѐ преложи́ла є҆сѝ въ добро́тꙋ нескве́рнꙋю, є҆ѧ́же тво́й жени́хъ восхотѣ̀ хрⷭ҇то́съ.
Дх҃а все́льшаѧсѧ, пелагі́е, бл҃года́ть въ дꙋшѝ твое́й, ꙗ҆́кѡ и҆́скра сло́ва, пла́мень высо́къ возжжѐ вѣ́ры, и҆ грѣ́хъ и҆зварѝ.
Бг҃оро́диченъ:
Же́злъ прозѧбла̀ є҆сѝ, бцⷣе, и҆зъ негѡ́же цвѣ́тъ мы́сленный возрастѐ, бжⷭ҇твеннагѡ благово́нїѧ и҆спо́лнивъ всѧ́чєскаѧ, хрⷭ҇то́съ бг҃ъ на́шъ, мѵ́ро сы́й неистоще́нное честно́е.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Вода́ми та́инственными ᲂу҆масти́вшисѧ дх҃а, процвѣла̀ є҆сѝ въ вѣ́рѣ добродѣ́телей благопло́дїемъ, и҆ болѣ́зньми поще́нїѧ.
Ты̀, гдⷭ҇и, свѣ́тъ во тмѣ̀ лежа́щихъ человѣ́кѡвъ, ты̀ возсїѧ́лъ є҆сѝ въ се́рдце преподо́бныѧ, свѣ́тлость бжⷭ҇твеннагѡ разꙋмѣ́нїѧ.
Болѣ̑зни твоѧ̑, честна́ѧ пелагі́е, со слеза́ми сѣ́емы, весе́лїемъ и҆ ра́достїю ѻ҆би́лїѧ на нб҃сѣ́хъ собра́шасѧ.
Бг҃оро́диченъ:
Оу҆дивле́на и҆́стиннѡ бл҃года́ть твоѧ̀ показа́сѧ, пречⷭ҇таѧ, пресла́внѡ дѣ́йствꙋющи си̑лы и҆ чꙋдеса̀ по все́й землѝ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Ꙗ҆́вльшейсѧ невече́рнѣй зарѝ хрⷭ҇та̀ бг҃а на́шегѡ въ дꙋшѝ пелагі́и, тмы̀ кнѧ́зь ѿгна́нъ бы́сть: и҆ всели́сѧ дх҃а благода́ть, и҆ вѣ́ра є҆гѡ̀.
Дре́вле ᲂу҆ловле́ннаѧ ѕмі́емъ, сѣ́ть є҆мꙋ̀ показа́сѧ, си́лꙋ є҆гѡ̀ ѡ҆бдержа́щи, и҆ попира́ющи тогѡ̀ лꙋка́вствїе си́лою бж҃їею.
Жениха̀ хрⷭ҇та̀ возлюби́вши и҆ бг҃а, добродѣ́тельми ᲂу҆краси́ласѧ є҆сѝ, и҆ ᲂу҆пещре́на трꙋды̑ бжⷭ҇твенными, черто́га є҆гѡ̀, пелагі́е, сподо́биласѧ є҆сѝ.
Бг҃оро́диченъ:
Ви́дѣти, бцⷣе, сла́вꙋ твою̀ неизрече́ннꙋю дре́вле возжелѣ́ша бжⷭ҇твеннїи прⷪ҇ро́цы всѝ: но напослѣ́докъ на́мъ ꙗ҆ви́ласѧ є҆сѝ лю́бѧщымъ тѧ̀, всѣ́хъ пребо́льши.
Конда́къ, гла́съ в҃. Подо́бенъ: Вы́шнихъ и҆щѧ̀:
Тѣ́ло твоѐ поста́ми и҆знꙋри́вши, бдѣ́нными моли́твами творца̀ ᲂу҆моли́ла є҆сѝ ѡ҆ дѣѧ́нїихъ твои́хъ, ꙗ҆́кѡ да прїи́меши соверше́нное ѡ҆ставле́нїе: є҆́же и҆ ѡ҆брѣла̀ є҆сѝ ма́ти ꙗ҆́вѣ, пꙋ́ть покаѧ́нїѧ показа́вши.
І҆́косъ:
Є҆ли́цы въ житїѝ во грѣсѣ́хъ ѡ҆скверни́стесѧ, прїиди́те со мно́ю, и҆ потща́вшесѧ поревнꙋ́имъ покаѧ́нїю, слеза́мъ и҆ подвигѡ́мъ прпⷣбныѧ ма́тере на́шеѧ пелагі́и: да вско́рѣ ѿ бг҃а проще́нїе прїи́мемъ, ꙗ҆́коже блаже́ннаѧ, є҆щѐ жива̀ сꙋ́щи, скве́рнꙋ ѿмы̀ грѣха̀, и҆ прїѧ́тъ ѿ бг҃а соверше́нное проще́нїе, пꙋ́ть покаѧ́нїѧ показа́вши.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Пꙋчи́на показа́ласѧ є҆сѝ бжⷭ҇твенныхъ и҆справле́нїй ты̀ и҆́стиннѡ, всю̀ вра́жїю погрꙋзи́вши въ не́й крѣ́пость. тѣ́мъ воспѣва́ла є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Въ пещѝ воздержа́нїѧ тѣ́ло и҆ дꙋ́шꙋ, бжⷭ҇твеннѡ ꙗ҆́кѡ зла́то чи́сто и҆звари́вши, и҆ пе́рвꙋю добро́тꙋ показа́ла є҆сѝ, свѣтлѣ́йшꙋ, честна́ѧ пелагі́е, кра́йнимъ воздержа́нїемъ.
Ба́нею бжⷭ҇твенною совле́кшисѧ ты̀ и҆́стиннѡ пе́рвагѡ ѡ҆дѣѧ́нїѧ страсте́й, и҆ тлѣ́ющагѡ тѧ̀ человѣ́ка, въ но́ваго же, сла́внаѧ, ѡ҆дѣ́ѧсѧ, хрⷭ҇тꙋ̀ соѡбразꙋ́ющисѧ.
Бг҃оро́диченъ:
На прⷭ҇то́лѣ ѻ҆ч҃естѣмъ сѣдѧ́й сло́во бж҃їе, стра́ннѡ въ тѧ̀ всели́сѧ и҆ стра́шнѡ, бцⷣе, и҆ возведѐ на́ше смѣше́нїе, въ себѣ̀ возвы́сивъ, ꙗ҆́кѡ бл҃гоꙋтро́бенъ.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Свѣ́тѧтсѧ лꙋчы̀ свѣ́тлѡ чꙋде́съ твои́хъ ꙗ҆́коже со́лнце, и҆ житїѧ̀ твоегѡ̀ всю̀ ꙗ҆влѧ́ютъ свѣ́тлость, и҆ сїѧ́ющꙋю въ тебѣ̀ бжⷭ҇твеннꙋю вѣ́рꙋ, и҆ вопїю́тъ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
Неразрѣши́мымъ сою́зомъ ко хрⷭ҇тꙋ̀ вѣ́рнѡ привѧза́вшисѧ, прилѣпи́ласѧ є҆сѝ къ немꙋ̀, и҆ неѿлꙋ́чна пребыла̀ є҆сѝ є҆дине́нїемъ любвѐ є҆гѡ̀: є҆мꙋ́же сочлени́ласѧ є҆сѝ мы́сленнѡ, вѣ́рою є҆гѡ̀, пелагі́е, неразлꙋ́чнѣ томꙋ̀ пребы́вши.
Ра́зꙋмъ прїе́мши и҆́стинный въ се́рдцы твое́мъ, ꙗ҆́вѣ дꙋ́хомъ ѡ҆ста́вила є҆сѝ всю̀ жите́йскꙋю сꙋетꙋ̀: тѣ́мъ ᲂу҆диви́ла є҆сѝ земны̑ѧ внеза́пнымъ, честна́ѧ, преложе́нїемъ, и҆ нб҃са̀ весе́лїѧ и҆спо́лнила є҆сѝ.
Бг҃оро́диченъ:
Пою́тъ, пречⷭ҇таѧ дв҃о, вели̑чїѧ твоѧ̑ ᲂу҆́мнаѧ вѡ́инства, проповѣ́дꙋютъ всѝ патрїа́рси и҆ прⷪ҇ро́цы ꙗ҆́снѡ со а҆пⷭ҇лы, та́кожде и҆ мꙋ́чєникъ ли́цы, и҆ прпⷣбныхъ всѐ мно́жество: съ ни́миже покланѧ́емсѧ тебѣ̀.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.
Ви́дѣти восхотѣ́ла є҆сѝ и҆́стиннѡ рачи́телѧ хрⷭ҇та̀ добро́тꙋ, є҆гѡ́же ра́ди распѧ́ласѧ є҆сѝ мі́рꙋ, и҆ кра́сный цвѣ́тъ тѣле́сный, прпⷣбнаѧ, и҆зсꙋши́ла є҆сѝ, и҆ жите́йскꙋю возненави́дѣла є҆сѝ любо́вь.
Всю̀ тѣле́снꙋю тѧ́гость ѿло́жши, пелагі́е, воздержа́нїемъ и҆ болѣ́зньми, къ нбⷭ҇нымъ ѻ҆би́телємъ востекла̀ є҆сѝ: въ ни́хже люби́мыѧ тебѣ̀ наслажда́ешисѧ добро́ты, сла́внаѧ.
Ны́нѣ тебѐ почита́ющихъ любо́вїю всѣ́хъ, прпⷣбнаѧ, назира́еши, и҆ лѣ́тнюю соверша́ющихъ твою̀ па́мѧть сїю̀: моли́сѧ творцꙋ̀ и҆ созда́телю твоемꙋ̀, прича́стникѡмъ бы́ти и҆ на́мъ сла́вы є҆гѡ̀.
Бг҃оро́диченъ:
Пою̀ твою̀ бл҃года́ть, дв҃о, велича́ю сла́вꙋ твою̀: ты́ бо просвѣще́нїе дꙋшѝ моеѧ̀ є҆сѝ и҆́стиннѡ, и҆ ᲂу҆тѣше́нїе, и҆ ско́раѧ помо́щница, и҆ спасе́нїе и҆ защище́нїе.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.