← претходни дан | Минеј — Јул | следећи дан →
28 июля: Святителя Питирима Тамбовского
Мѣ́сѧца тогѡ́же въ к҃и де́нь.
Слꙋ́жба и҆́же во ст҃ы́хъ ѻ҆тцꙋ̀ на́шемꙋ пїтѷрі́мꙋ, є҆пⷭ҇кпꙋ тамбо́вскомꙋ, чꙋдотво́рцꙋ.
На ма́лѣй вече́рни. На Гдⷭ҇и воззва́хъ, стїхи̑ры на д҃, гла́съ в҃.
Подо́бенъ: До́ме є҆ѵфра́ѳовъ:
Прїиди́те, вѣ́рнїи, просла́вимъ всѣ́хъ бла̑гъ пода́телѧ бг҃а, дарова́вшаго на́мъ но́ваго чꙋдотво́рца, ст҃и́телѧ пїтѷрі́ма, молѧ́щагосѧ непреста́ннѡ ѡ҆ всѣ́хъ на́съ.
Два́жды.
Ра́дꙋйсѧ, тамбо́вскаѧ страно̀, и҆з̾ тебє́ бо возсїѧ̀ но́вый свѣти́льникъ бл҃года́ти, разгонѧ́ѧй тьмꙋ̀ и҆скꙋше́нїй и҆ бѣ́дъ ѿ вопїю́щихъ вѣ́рнѡ: ст҃и́телю ѻ҆́тче пїтѷрі́ме, молѝ бг҃а ѡ҆ всѣ́хъ на́съ.
Вє́лїѧ вѣ́ры зна́мєнїѧ: ѿ воды̀ и҆сто́чника чꙋдеса̀ соверша́ютсѧ, и҆ ри́за ст҃и́телѧ чꙋдодѣ́йствꙋетъ, и҆ гро́бъ є҆гѡ̀ къ жи́зни приво́дитъ всѧ̑ съ вѣ́рою покланѧ́ющыѧсѧ є҆мꙋ̀.
Сла́ва, гла́съ то́йже, самогла́сенъ:
Восхва́лимъ дне́сь, бра́тїе, ст҃и́телѧ пїтѷрі́ма, въ пѣ́снехъ дх҃о́вныхъ воскли́кнемъ є҆мꙋ̀: ра́дꙋйсѧ, па́стырю на́шъ до́брый, лю́ди бж҃їѧ на торжество̀ твоѐ собра́вый: ра́дꙋйсѧ, а҆́гг҃лы и҆ чл҃вѣ́ки въ славосло́вїи совокꙋпи́вый: ра́дꙋйсѧ, а҆рхїере́євъ ᲂу҆краше́нїе и҆ сщ҃е́нникѡвъ добро́то: ра́дꙋйсѧ, болѧ́щихъ и҆сцѣле́нїе и҆ скорбѧ́щихъ ᲂу҆тѣше́нїе: ра́дꙋйсѧ, те́плый мл҃твенниче ѡ҆ всѣ́хъ на́съ.
И҆ ны́нѣ, бг҃оро́диченъ.
На стїхо́внѣ стїхи̑ры, гла́съ д҃:
Ра́дꙋйсѧ, бл҃же́нне ѻ҆́тче пїтѷрі́ме: посто́мъ и҆ бдѣ́нїемъ дꙋ́шꙋ и҆ тѣ́ло ѿ страсте́й ѡ҆чи́стивъ и҆ лѣ́потами добродѣ́телей себѐ ᲂу҆краси́въ, ѻ҆би́тель дх҃а ст҃а́гѡ бы́лъ є҆сѝ, и҆ ны́нѣ во ѻ҆би́телехъ нбⷭ҇ныхъ водворѧ́ешисѧ, молѧ́сѧ ѡ҆ чтꙋ́щихъ тѧ̀.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Ст҃и́телю ѻ҆́тче пїтѷрі́ме, ны́нѣ со а҆́гг҃лы на нб҃сѝ ликовствꙋ́ѧ и҆ съ ли̑ки ст҃ы́хъ предстоѧ̀ прⷭ҇то́лꙋ цр҃ѧ̀ сла́вы, моли́сѧ ѡ҆ сп҃се́нїи дꙋ́шъ на́шихъ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
При́зри съ нб҃сѐ, ѻ҆́тче на́шъ пїтѷрі́ме, на ны̀ зємны́ѧ, не́мощїю ѡ҆бложє́нныѧ, почита́ющыѧ ны́нѣ ст҃ꙋ́ю па́мѧть твою̀, и҆ ᲂу҆молѝ ѻ҆ц҃а̀ нбⷭ҇наго, да ѡ҆брати́тъ на́съ ѿ беззако́нїй на́шихъ и҆ приведе́тъ на мѣ́сто бл҃же́нства съ тобо́ю.
Сла́ва, гла́съ то́йже:
Прїиди́те, бл҃говѣ́рнїи лю́дїе, пра́здникъ свѣ́тлый соста́вимъ: бж҃їй бо ст҃и́тель пїтѷрі́мъ предстои́тъ дне́сь прⷭ҇то́лꙋ бл҃года́ти, врачꙋ́етъ недꙋ́ги на́шѧ и҆ мо́литсѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ.
Тропа́рь, гла́съ д҃:
Вѣ́ры и҆ бл҃гоче́стїѧ наста́вниче, цр҃кве свѣти́льниче, мона́шествꙋющихъ ѻ҆́бразе, ст҃и́телю пїтѷрі́ме премꙋ́дре, ста́до твоѐ бл҃гоче́стнѡ ᲂу҆па́слъ є҆сѝ и҆ ко хрⷭ҇тꙋ̀ приве́лъ є҆сѝ: тѣ́мже въ вы́шнихъ вѣнце́мъ сла́вы ᲂу҆краше́нъ, съ на́ми на землѝ дꙋ́хомъ пребыва́еши, сїѧ́ѧ чꙋдесы̀. молѝ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Ѿ вѣ́ка ᲂу҆тае́нное:
На вели́цѣй вече́рни. Бл҃же́нъ мꙋ́жъ, пе́рвый а҆нтїфѡ́нъ.
На Гдⷭ҇и воззва́хъ, стїхи̑ры на и҃. Гла́съ а҃:
Подо́бенъ: Прехва́льнїи мч҃нцы:
Наста̀ де́нь свѣ́тлагѡ торжества̀: ликꙋ́ютъ а҆́гг҃ли на нб҃сѝ, ра́дꙋютсѧ чл҃вѣ́цы на землѝ, весели́тсѧ ве́сь собо́ръ цр҃ко́вный, сла́витъ бг҃а ди́внаго во ст҃ы́хъ свои́хъ, ꙗ҆́вльшаго ст҃и́телѧ пїтѷрі́ма, но́ваго чꙋдотво́рца, предста́телѧ землѝ рѡссі́йскїѧ.
Два́жды.
Ра́дꙋйсѧ, землѐ рѡссі́йскаѧ, весели́сѧ, гра́де тамбо́ве, красꙋ́йсѧ, бл҃гочести́выхъ собра́нїе: дне́сь бо влⷣка и҆ гдⷭ҇ь всѣ́хъ, нбⷭ҇ный а҆рхїере́й сп҃съ на́шъ, вѣнча́етъ вѣнце́мъ вѣ́чныѧ сла́вы вѣ́рнаго раба̀ своего̀, ст҃и́телѧ пїтѷрі́ма, па́стырѧ до́браго, те́плѣ молѧ́щагосѧ ѡ҆ ста́дѣ свое́мъ.
Прїиди́те, бл҃гочести́вїи лю́дїе, ᲂу҆́зрите дне́сь чꙋде́съ мно́жество: є҆ди́нѣмъ прикоснове́нїемъ ко гро́бꙋ ст҃и́телѧ бж҃їѧ недꙋ́жнїи здра́ви быва́ютъ, де́мони прогонѧ́ютсѧ, скорбѧ́щїи ѿра́дꙋ прїе́млютъ, и҆ ра́дости и҆сполнѧ́етсѧ вѣ́рныхъ собра́нїе, соше́дшихсѧ въ па́мѧть є҆гѡ̀.
И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ:
Дне́сь тамбо́въ гра́дъ ѡ҆ бз҃ѣ досто́йнѡ весели́тсѧ, и҆мѣ́ѧ въ себѣ̀ цѣльбоно́сный гро́бъ ст҃и́телѧ, и҆ съ ни́мъ всѧ̀ рѡссі́йскаѧ страна̀ дꙋ́хомъ ра́дꙋетсѧ: тѣ́мже и҆ мы̀ вѣ́рнїи, соше́дшесѧ, ѱалмы̑ и҆ пѣ́сньми да восхва́лимъ пїтѷрі́ма преди́внаго, млⷭ҇ти и҆ чⷭ҇тоты̀ сокро́вище, свѣти́льника цр҃кве пресвѣ́тлаго, и҆сто́чника чꙋде́съ неисчерпа́емаго и҆ къ бг҃ꙋ мл҃твенника непосты́днаго ѡ҆ вѣ́рою и҆ любо́вїю чтꙋ́щихъ ст҃ꙋ́ю па́мѧть є҆гѡ̀.
Два́жды.
За́пѡвѣди є҆ѵⷢ҇льскїѧ, не скрыва́ти себѣ̀ сокро́вища на землѝ, блюсти́тель вѣ́рный показа́лсѧ є҆сѝ, ст҃и́телю, стѧжа̑нїѧ твоѧ̑ мꙋ́дрѣ расточа́ѧ, хра́мы бж҃їѧ и҆ и҆́нѡческїѧ ѡ҆би́тели ᲂу҆строѧ́ѧ, а҆́лчꙋщыѧ пита́ѧ и҆ нагі̑ѧ ѡ҆дѣва́ѧ: тѣ́мже и҆ прїѧ́тъ тѧ̀ въ вѣ́чныѧ кро́вы на́съ ра́ди ѡ҆бнища́вый, є҆го́же молѝ грѣхѡ́въ ѡ҆ставле́нїе дарова́ти вѣ́рою и҆ любо́вїю чтꙋ́щымъ ст҃ꙋ́ю па́мѧть твою̀.
Въ болѣ́зни сме́ртнѣй во́племъ крѣ́пкимъ возопи́лъ є҆сѝ ко гдⷭ҇ꙋ, и҆ ᲂу҆слы́шанъ бы́лъ є҆сѝ ѿ бл҃гоговѣ́инства твоегѡ̀: са́мъ бо хрⷭ҇то́съ ꙗ҆ви́сѧ тебѣ̀ на ѻ҆́блацѣ. бл҃гослове́нїемъ слꙋжи́телѧ себѣ̀ вѣ́рна тѧ̀ зна́менꙋѧ и҆ и҆сцѣле́нїе тѝ да́рꙋѧ. томꙋ̀ помоли́сѧ, бг҃ови́дче ст҃и́телю, и҆ на́мъ срѣ́сти того̀ на ѻ҆́блацѣхъ со всѣ́ми ст҃ы́ми, є҆гда̀ прїи́детъ во сла́вѣ сꙋди́ти мі́рꙋ всемꙋ̀.
Сла́ва, гла́съ є҃:
Ꙗ҆́коже во дни̑ ст҃ы́хъ а҆пⷭ҇лъ главотѧ̑жи и҆ ᲂу҆брꙋ́сцы па́ѵлѡвы чꙋдодѣ́йствовахꙋ, та́кѡ и҆ дне́сь ри́за а҆рхїере́а бж҃їѧ пїтѷрі́ма, дꙋ́хомъ а҆пⷭ҇льскимъ ѡ҆сїѧ́ннагѡ, положе́на сꙋ́щи на недꙋ̑жныѧ, подае́тъ хрѡмы́мъ хожде́нїе, слѣпы̑мъ прозрѣ́нїе, разсла́блєннымъ си́лꙋ и҆ крѣ́пость, пла́чꙋщымъ ᲂу҆тѣше́нїе, ѿча̑ѧннымъ наде́ждꙋ, всѣ̑мъ же вѣ̑рнымъ ве́лїю млⷭ҇ть.
И҆ ны́нѣ, бг҃оро́диченъ: Въ чермнѣ́мъ мо́ри:
Вхо́дъ. Прокі́менъ днѐ, и҆ чтє́нїѧ ст҃и́тєльскаѧ трѝ.
При́тчей чте́нїе.
Па́мѧть пра́веднагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ чл҃вѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же чⷭ҇тно́е недосто́йно є҆ѧ̀ є҆́сть. Долгота́ бо дне́й, и҆ лѣ́та живота̀ въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. послꙋ́шайте ᲂу҆̀бо менѐ, ѽ ча̑да, честна̑ѧ бо рекꙋ̀: и҆ бл҃же́нъ человѣ́къ, и҆́же пꙋтѝ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ чл҃вѣ́чєскимъ: ꙗ҆́кѡ а҆́зъ, премꙋ́дрость, ᲂу҆стро́ихъ совѣ́тъ, и҆ ра́зꙋмъ и҆ смы́слъ а҆́зъ призва́хъ. ꙗ҆́кѡ а҆́зъ премꙋ́дрость, ᲂу҆стро́ихъ совѣ́тъ, и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆̀бо неѕло́бивїи кова́рство, ненака́заннїи же прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀, и҆ ѿве́рзꙋ ѿ ᲂу҆сте́нъ пра̑ваѧ: ꙗ҆́кѡ и҆́стинѣ поꙋчи́тсѧ горта́нь мо́й, ме́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра́ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.
При́тчей чте́нїе.
Оу҆ста̀ пра́веднагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ блгⷣти, ᲂу҆ста́ же нечести́выхъ развраща́ютсѧ. Мѣ́рила льсти̑ваѧ ме́рзость пред̾ гдⷭ҇емъ: вѣ́съ же пра́ведный прїѧ́тенъ є҆мꙋ̀ и҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости: пра́вда же и҆зба́витъ ѿ сме́рти. Оу҆́меръ пра́ведный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. пра́вда непоро́чнагѡ и҆справлѧ́етъ пꙋтѝ, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. пра́ведникъ ѿ ло́ва ᲂу҆бѣ́гнетъ, вмѣ́сто же є҆гѡ̀ предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ бл҃гопоспѣ́шное. Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.
Премꙋ́дрости соломѡ́новы чте́нїе.
Пра́ведникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо чⷭ҇тна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость чл҃вѣ́кѡмъ, и҆ во́зрастъ ста́рости житїѐ нескве́рное. бл҃гоꙋго́денъ бг҃ꙋ бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. лю́дїе ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.
На лїті́и стїхи̑ры, гла́съ г҃:
Дне́сь ликовствꙋ́етъ вѣ́рныхъ мно́жество: ст҃и́телей и҆ сщ҃е́нникѡвъ сосло́вїе, мона́шествꙋющихъ и҆ мїрски́хъ собра́нїе, ста́рцы и҆ младе́нцы, ю҆́ныѧ и҆ вдови̑цы, кни́жницы и҆ прості́и є҆ди́нѣми ᲂу҆сты̀ и҆ се́рдцемъ сла́вѧтъ гдⷭ҇а, ꙗ҆вле́нїемъ но́вагѡ мл҃твенника и҆ чꙋдотво́рца, подаю́щагѡ мі́рꙋ ве́лїю млⷭ҇ть.
Вѣ́рою и҆ любо́вїю соше́дшесѧ дне́сь къ цѣльбоно́сномꙋ гро́бꙋ, восхва́лимъ, бра́тїе, вино́вника пра́здника на́шегѡ: ра́дꙋйсѧ, ст҃и́телю пїтѷрі́ме, тве́рдый сто́лпе цр҃ко́вный: ра́дꙋйсѧ, храни́телю землѝ рѡссі́йскїѧ: ра́дꙋйсѧ, гра́да тамбо́ва свѣ́тлое ᲂу҆краше́нїе: ра́дꙋйсѧ, ѻ҆́тче кро́ткїй и҆ млⷭ҇тивый: ра́дꙋйсѧ, вдѡ́въ и҆ сиро́тъ пита́телю: ра́дꙋйсѧ, ѻ҆би́димыхъ ско́рый предста́телю: ра́дꙋйсѧ, болѧ́щихъ безме́здный цѣли́телю: ра́дꙋйсѧ, те́плый мл҃твенниче ѡ҆ всѣ́хъ на́съ.
Сла́ва, гла́съ д҃:
Пресла̑внаѧ дне́сь содѣва́ютсѧ во гра́дѣ тамбо́вѣ: слѣпі́и прозира́ютъ, и҆ хро́мїи хо́дѧтъ, нѣмі́и гл҃го́лютъ, и҆ глꙋсі́и слы́шатъ, разсла́бленнїи возстаю́тъ, и҆ ни́щїи бл҃говѣствꙋ́ютъ, предста́тельствомъ ст҃и́телѧ и҆ чꙋдотво́рца пїтѷрі́ма, зовꙋ́ще и҆ гл҃го́люще: сла́ва бг҃ꙋ сп҃си́телю на́шемꙋ.
И҆ ны́нѣ, бг҃оро́диченъ: При́зри на молє́нїѧ:
На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ:
Ѻ҆́тче прпⷣбне пїтѷрі́ме, со а҆́гг҃лы и҆ ли́ки ст҃ы́хъ воспѣва́ѧй ны́нѣ ст҃ꙋ́ю трⷪ҇цꙋ и҆ ѿ на́съ любо́вїю твое́ю не ѿстꙋпи́вый, помина́й ста́до твоѐ, є҆́же собра́лъ є҆сѝ, мꙋ́дре, сохранѧ́й є҆̀ ѿ волкѡ́въ дꙋшепа́гꙋбныхъ, и҆ пꙋтеводѝ невреди́мѡ во ѡ҆гра́дꙋ црⷭ҇тва нбⷭ҇нагѡ.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
До́мъ дх҃а ст҃а́гѡ бы́лъ є҆сѝ въ житїѝ твое́мъ, ѻ҆́тче на́шъ пїтѷрі́ме, вѣ́рою и҆ любо́вїю себѐ пред̾ѡчи́стивъ, ны́нѣ же прⷭ҇то́лꙋ нбⷭ҇нагѡ домовлады́ки хрⷭ҇та̀ предстоѧ̀, помоли́сѧ є҆мꙋ̀ ᲂу҆се́рднѡ, да ѡ҆чи́ститъ на́съ ѿ страсте́й дꙋшевре́дныхъ, и҆ всели́тсѧ въ сердца́хъ на́шихъ со ѻ҆ц҃е́мъ и҆ дх҃омъ, и҆ введе́тъ на́съ въ црⷭ҇тво нбⷭ҇ное.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
Гра́да вѧ́зьмы чⷭ҇тно́е прозѧбе́нїе, десни́цею бж҃їею во гра́дъ тамбо́въ пренесе́нное, бл҃года́тїю дх҃а ст҃а́гѡ напое́нное и҆ плѡды̀ добродѣ́телей ᲂу҆краше́нное, ѻ҆́тче на́шъ пїтѷрі́ме, молѝ за ны̀ хрⷭ҇та̀ бг҃а, да не посѣче́тъ ны̀ ꙗ҆́кѡ безпло́днꙋю смоко́вницꙋ, но да всели́тъ ны̀, и҆дѣ́же свѣ́тъ лица̀ є҆гѡ̀.
Сла́ва, гла́съ ѕ҃:
Возьми́те врата̀ нбⷭ҇наѧ, кн҃зи ва́шѧ, и҆ а҆́гг҃ли, верхѝ под̾ими́те, са́мъ бо цр҃ь нб҃сѐ и҆ землѝ грѧде́тъ, и҆ вво́дитъ въ го́рнюю сла́вꙋ вѣ́рнаго раба̀ своего̀, прпⷣбнаго пїтѷрі́ма, па́стырѧ до́браго и҆ ᲂу҆чи́телѧ бг҃омꙋ́драго, мно́гими пѡ́ты и҆ трꙋды̀ є҆щѐ въ житїѝ а҆́гг҃льскꙋю чⷭ҇тотꙋ̀ стѧжа́вшаго, тлѣ́ннꙋю сла́вꙋ земнꙋ́ю презрѣ́вшаго и҆ нбⷭ҇нагѡ црⷭ҇твїѧ возжелѣ́вшаго.
И҆ ны́нѣ, бг҃оро́диченъ: Творе́цъ и҆ и҆зба́витель:
На бл҃гослове́нїи хлѣ́бѡвъ, тропа́рь ст҃и́телю (пи́санъ на ма́лѣй вече́рни), два́жды, и҆ Бцⷣе дв҃о: є҆ди́ножды.
На ᲂу҆́трени. На Бг҃ъ гдⷭ҇ь, тропа́рь ст҃и́телю, два́жды. Сла́ва, и҆ ны́нѣ, бг҃оро́диченъ: Ѿ вѣ́ка ᲂу҆тае́ное:
По а҃-мъ стїхосло́вїи сѣда́ленъ, гла́съ з҃:
Ꙗ҆́коже дре́вле недꙋ́жнїи и҆сцѣлѧ́хꙋсѧ є҆ди́нѣмъ прикоснове́нїемъ кра́ѧ ри́зъ хрⷭ҇то́выхъ, та́кѡ и҆ ны́нѣ болѧ́щїи врачꙋ́ютсѧ, ри́зы твоеѧ̀ коснꙋ́вшесѧ, въ не́йже предстоѧ́лъ є҆сѝ прⷭ҇то́лꙋ бл҃года́ти, а҆рхїере́ю бж҃їй, ѻ҆́тче на́шъ пїтѷрі́ме. сегѡ̀ ра́ди сла́вимъ бг҃а и҆ вопїе́мъ тѝ: ᲂу҆врачꙋ́й и҆ на́шѧ недꙋ́ги дꙋшє́вныѧ и҆ тѣлє́сныѧ, свѧ́те, мо́лимъ тѧ̀.
Сла́ва, и҆ ны́нѣ, бг҃оро́диченъ:
Стѣна̀ и҆ покро́въ є҆сѝ, влⷣчце, и҆ приста́нище небꙋ́рное всѣ̑мъ въ бѣда́хъ сꙋ́щымъ и҆ ко твоемꙋ̀ застꙋпле́нїю съ вѣ́рою притека́ющымъ. тѣ́мже и҆ мы̀ со дерзнове́нїемъ вопїе́мъ тѝ: сп҃са́й на́съ ѿ нꙋ́ждъ и҆ ѡ҆бстоѧ́нїй, милосе́рдаѧ мт҃и.
По в҃-мъ стїхосло́вїи сѣда́ленъ, гла́съ в҃:
Сози́ждꙋ цр҃ковь мою̀, и҆ врата̀ а҆́дѡва не ѡ҆долѣ́ютъ є҆́й, ре́клъ є҆сѝ дре́вле, сп҃се, ᲂу҆ченикѡ́мъ твои̑мъ, и҆ ны́нѣ зри́мъ сбытїѐ слове́съ си́хъ: є҆гда́ бо невѣ́рїе и҆ сꙋевѣ́рїе возста́ша на цр҃ковь твою̀, воздви́глъ є҆сѝ но́ваго чꙋдотво́рца, бл҃гоче́стнымъ житїе́мъ и҆ чꙋдесы̀ мно́гими ст҃ꙋ́ю вѣ́рꙋ ᲂу҆твержда́юща и҆ врагѝ є҆ѧ̀ посрамлѧ́юща. тѣ́мже ра́дꙋющесѧ вопїе́мъ тѝ: ди́венъ є҆сѝ во ст҃ы́хъ твои́хъ, гдⷭ҇и.
Сла́ва, и҆ ны́нѣ, бг҃оро́диченъ:
Є҆го́же ѿ дх҃а ст҃а безсѣ́меннѡ родила̀ є҆сѝ, молѝ со ст҃и́телемъ пїтѷрі́момъ, ᲂу҆тверди́ти на́съ въ правосла́вїи и҆ є҆диномы́слїи, дв҃о пречⷭ҇таѧ и҆ неискꙋсобра́чнаѧ.
По полѷеле́и сѣда́ленъ, гла́съ д҃:
Є҆гда̀ поста́вленъ бы́лъ є҆сѝ на свѣ́щницѣ цр҃кве тамбо́вскїѧ, не да́лъ є҆сѝ сна̀ ѻ҆чи́ма твои́ма, нижѐ вѣ́ждома дрема́нїѧ, сп҃са́ѧ словє́сныѧ твоѧ̑ ѻ҆́вцы, немощны̑ѧ ᲂу҆крѣплѧ́ѧ, недꙋ̑жныѧ врачꙋ́ѧ, заблꙋ́ждшыѧ и҆справлѧ́ѧ, стропѡ́тнаѧ смирѧ́ѧ кро́тостїю твое́ю: и҆ ны́нѣ не преста́й моли́ти сп҃са хрⷭ҇та̀, ѻ҆́тче на́шъ пїтѷрі́ме, да да́стъ па́стырємъ цр҃кве ре́вность и҆ бдѣ́нїе ѡ҆ дꙋша́хъ.
Сла́ва, и҆ ны́нѣ, бг҃оро́диченъ:
Ѽ пречⷭ҇таѧ бцⷣе дв҃о, молѝ сн҃а твоего̀ и҆ бг҃а на́шего, да ѡ҆чи́ститъ на́съ ѿ беззако́нїй на́шихъ и҆ да́рꙋетъ на́мъ ра́дость сп҃се́нїѧ, лобыза́ющымъ чⷭ҇тны́й ѻ҆́бразъ прпⷣбнагѡ пїтѷрі́ма и҆ вопїю́щымъ: сла́ва снизхожде́нїю твоемꙋ̀ чл҃вѣколю́бче.
Та́же степє́нна, пе́рвый а҆нтїфѡ́нъ д҃-гѡ гла́са.
Прокі́менъ, гла́съ д҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе ѿ і҆ѡа́нна, зача́ло л҃ѕ.
По н҃-мъ ѱалмѣ̀ стїхи́ра, гла́съ ѕ҃:
Кі́ими похва́льными пѣ́сньми ᲂу҆бл҃жи́мъ ст҃и́телѧ пїтѷрі́ма, правосла́вныѧ вѣ́ры храни́телѧ и҆ невѣ́рїѧ ѡ҆бличи́телѧ, бл҃гоче́стїѧ побо́рника и҆ нече́стїѧ гро́зное вразꙋмле́нїе, мона́хѡвъ и҆ мїрски́хъ наста́вника, а҆рхїере́євъ и҆ сщ҃е́нникѡвъ ᲂу҆краше́нїе, є҆гѡ́же ра́ди хрⷭ҇то́съ землѝ рѡссі́йстѣй да́рꙋетъ ми́ръ и҆ ве́лїю млⷭ҇ть.
Канѡ́нъ бцⷣы со і҆рмѡсы̀ на ѕ҃: и҆ ст҃а́гѡ на и҃, два̀ канѡ́на.
Канѡ́нъ ст҃и́телю пїтѷрі́мꙋ, гла́съ в҃.
Пѣ́снь а҃. І҆рмо́съ:
Во глꙋбинѣ̀ постла̀ дре́вле фараѡни́тское всево́инство преѻрꙋ́женнаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь: сла́внѡ бо просла́висѧ.
Хрⷭ҇тѐ, свѣ́те и҆́стинный, ра́зꙋмъ мо́й просвѣтѝ и҆ се́рдце ѡ҆чи́сти, да просла́влю па́мѧть ᲂу҆го́дника твоегѡ̀, бг҃оно́снагѡ пїтѷрі́ма.
Ѻ҆́тче прпⷣбне пїтѷрі́ме, ѻ҆гнезра́чномꙋ прⷭ҇то́лꙋ въ вы́шнихъ предстоѧ̀ и҆ трисо́лнечными свѣтлостьмѝ ѡ҆зарѧ́емь, просвѣтѝ глꙋбинꙋ̀ ѕѡ́лъ мои́хъ, ꙗ҆́кѡ да и҆ а҆́зъ пою̀: сла́внѡ бо просла́висѧ.
Ꙗ҆́коже мѡѷсе́й бг҃ови́децъ дре́вле сп҃сѐ і҆и҃лѧ ѿ рꙋкѝ фараѡ́новы, та́кѡ и҆ ты̀, бг҃оно́сне ѻ҆́тче, свободи́ мѧ ѿ рабо́ты врагꙋ̀, да ра́дꙋѧсѧ сла́влю бг҃а ди́внаго во ст҃ы́хъ свои́хъ.
Бг҃оро́диченъ:
Влⷣчце и҆ мт҃и и҆зба́вителѧ, предста́тельствомъ твои́мъ ᲂу҆молѝ сн҃а твоего̀, да потреби́тъ живꙋ́щїй во мнѣ̀ грѣ́хъ и҆ и҆зведе́тъ мѧ̀ въ свобо́дꙋ сла́вы ча̑дъ свои́хъ.
И҆́нъ канѡ́нъ ст҃и́телю пїтѷрі́мꙋ, гла́съ и҃.
Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Во свѣ́тѣ непристꙋ́пнѣмъ лицꙋ̀ бж҃їю предстоѧ̀, бг҃омꙋ́дре ст҃и́телю, просвѣтѝ дꙋ́шъ на́шихъ ѡ҆мраче́нїе, и҆ да́ждь сло́во, ꙗ҆́кѡ да восхва́лимъ ра́дꙋющесѧ твою̀, всебл҃же́нне, па́мѧть.
Ѿ ю҆́ности, прпⷣбне, плѡтска́ѧ мꙋдрѡва́нїѧ покори́лъ є҆сѝ дꙋ́хꙋ, и҆ въ безстра́стїе ѡ҆дѣ́ѧвсѧ, сосꙋ́дъ и҆збра́нъ ꙗ҆ви́лсѧ є҆сѝ бл҃года́ти сщ҃е́нства и҆ па́стырь и҆́стиненъ ста́дꙋ твоемꙋ̀: моли́сѧ, ѻ҆́тче, сп҃сти́сѧ на́мъ.
Жи́знь твоѧ̀ непоро́чна, ѻ҆́тче, и҆ ᲂу҆спе́нїе со ст҃ы́ми, па́мѧть же, ꙗ҆́кѡ пра́веднагѡ, съ похвала́ми. хрⷭ҇тꙋ̀ ѡ҆ на́съ моли́сѧ, поле́зное просѧ̀: мно́гѡ бо мо́жетъ мл҃тва првⷣнагѡ поспѣшествꙋ́ема.
Бг҃оро́диченъ:
Треволнє́нїѧ помыслѡ́въ и҆ страсте́й и҆ бе́здна грѣхѡ́въ ѡ҆каѧ́ннꙋю мою̀ дꙋ́шꙋ ѡ҆быдо́ша: да́ждь мѝ рꙋ́кꙋ по́мощи, дв҃о бцⷣе, вѣ́рныхъ прибѣ́жище.
Катава́сїа:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̀, возвесели́ бо сѧ дх҃ъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ па́че тебє̀, гдⷭ҇и.
Ꙗ҆́коже дре́вле првⷣнаѧ а҆́нна своѐ ча́до, вда́лъ є҆сѝ себѐ сама́го, ѻ҆́тче пїтѷрі́ме, въ да́ръ бг҃ꙋ. ᲂу҆твердѝ и҆ менѐ на ка́мени за́повѣдей є҆гѡ̀, да зовꙋ̀: нѣ́сть ст҃ъ, ꙗ҆́кѡ бг҃ъ на́шъ.
Ѻ҆́тче пїтѷрі́ме, мл҃твами твои́ми ᲂу҆твердѝ ᲂу҆́мъ и҆ се́рдце на́ше во гдⷭ҇ѣ, возвы́си ро́гъ хрⷭ҇тїа́нъ правосла́вныхъ, да заградѧ́тсѧ ᲂу҆ста̀ врагѡ́въ вѣ́ры, и҆ возвесели́мсѧ ѡ҆ сп҃се́нїи свое́мъ.
Оу҆ цѣльбоно́снагѡ гро́ба но́вагѡ чꙋдотво́рца, да не хва́литсѧ си́льный си́лою свое́ю, да не хва́литсѧ мꙋ́дрый мꙋ́дростїю свое́ю, да не хва́литсѧ бога́тый бога́тствомъ свои́мъ, но ѡ҆ се́мъ да хва́литсѧ хвалѧ́йсѧ, є҆́же разꙋмѣ́ти и҆ зна́ти гдⷭ҇а и҆ стѧжа́ти бога́тство бл҃года́ти є҆гѡ̀.
Бг҃оро́диченъ:
Пречⷭ҇таѧ дв҃о, неискꙋсобра́чнаѧ мт҃и, непло́днꙋю дꙋ́шꙋ мою̀ и҆ безча́днꙋю плодоно́снꙋ покажѝ бл҃года́тїю сн҃а твоегѡ̀, мл҃твами но́вагѡ чꙋдотво́рца пїтѷрі́ма, да зовꙋ̀ и҆ а҆́зъ со всѣ́ми вѣ́рными: нѣ́сть ст҃ъ, ꙗ҆́коже бг҃ъ на́шъ.
И҆́нъ. І҆рмо́съ:
Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
І҆ѡа́ннꙋ ми́лостивомꙋ подо́бѧсѧ, ми́лостивъ къ тре́бꙋющымъ въ житїѝ твое́мъ ꙗ҆ви́лсѧ є҆сѝ, прпⷣбне, и҆ ни́щихъ вои́стинꙋ бы́лъ є҆сѝ ѻ҆те́цъ: и҆ ны́нѣ въ вы́шнихъ живы́й, млⷭ҇тивъ бꙋ́ди тѧ̀ ᲂу҆бл҃жа́ющымъ.
Прикоснове́нїемъ къ ри́замъ хрⷭ҇тѡ́вымъ мно́зи недꙋ́жнїи здра́ви бы́ша дре́вле: и҆ ны́нѣ возлага́ющїи на сѧ̀ ри̑зы ст҃и́телѧ и҆ тѣ́хъ во бл҃гоговѣ́нїи каса́ющїисѧ ѿ всѧ́кихъ недꙋ́гѡвъ прїе́млютъ и҆сцѣле́нїе. тѣ́мже ᲂу҆̀бо, бра́тїе, є҆ѵⷢ҇льски просла́вимъ бг҃а, вла́сть дарова́вшаго таковꙋ́ю чл҃вѣ́кѡмъ.
Ко́рмчїй до́брый бы́въ кораблю̀ хрⷭ҇то́вы цр҃кве, и҆зба́ви, ѻ҆́тче, ста́до твоѐ ѿ бꙋ́ри грѣхѡ́въ, бѣ́дъ же и҆ скорбе́й, приводѧ́ ны во приста̑нища ти̑хаѧ бжⷭ҇твенныѧ во́ли.
Бг҃оро́диченъ:
Є҆́юже нб҃о чл҃вѣ́кѡмъ ѿве́рзесѧ, и҆ дворы̀ гдⷭ҇ни, пречⷭ҇тꙋю мт҃рь дв҃ꙋ пѣ́сньми почти́мъ: нѣ́сть чⷭ҇тыѧ, ꙗ҆́коже ты̀, пречⷭ҇таѧ, и҆ нѣ́сть непоро́чныѧ па́че тебѐ, влⷣчце.
Сѣда́ленъ, гла́съ в҃:
А҆́ще и҆ за́йде пре́жде под̾ зе́млю тѣ́ло твоѐ, но ꙗ҆́кѡ со́лнце и҆з̾ ѻ҆́блакъ возсїѧ̀, лꙋча́ми бл҃года́ти блиста́ѧсѧ. тѣ́мже ѡ҆бстоѧ́ще гро́бъ тво́й, ст҃и́телю, со стра́хомъ покланѧ́емсѧ, и҆ ꙗ҆́кѡ ѻ҆́бщемꙋ ѻ҆тцꙋ̀ те́плѣ мо́лимсѧ: и҆зба́ви ны̀ ча̑да твоѧ̑ ѿ бѣ́дъ и҆ нꙋ́ждныхъ ѡ҆бстоѧ́нїй.
Сла́ва, и҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ прест҃а́ѧ дв҃о, є҆го́же родила̀ є҆сѝ па́че ᲂу҆ма̀ и҆ сло́ва, ᲂу҆молѝ, смоле́бника пїтѷрі́ма прїи́мши, ѡ҆ставле́нїе прегрѣше́нїй и҆ житїѧ̀ и҆справле́нїе пода́ти на́мъ, да пое́мъ тѧ̀ при́снѡ возвели́чившꙋю ро́дъ на́шъ.
Пѣ́снь д҃. І҆рмо́съ:
Прише́лъ є҆сѝ ѿ дв҃ы не хода́тай, ни а҆́гг҃лъ. но са́мъ гдⷭ҇ь вопло́щьсѧ, и҆ сп҃слъ є҆сѝ всего́ мѧ чл҃вѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Ѿ ю҆́ности чⷭ҇тото́ю дѣ́вства а҆́гг҃лѡмъ въ житїѝ поревнова́лъ є҆сѝ, сп҃се́нїю человѣ́кѡвъ послꙋжи́лъ є҆сѝ, ѻ҆́тче пїтѷрі́ме, и҆ къ бг҃ꙋ взыва́лъ є҆сѝ, вопїѧ̀: сла́ва си́лѣ твое́й, гдⷭ҇и.
Ꙗ҆́коже а҆́гг҃лъ во пло́ти, горѣ́лъ є҆сѝ, ст҃е, ѻ҆гне́мъ любвѐ хрⷭ҇то́вы, и҆ врꙋчє́нныѧ тебѣ̀ лю́ди позна́нїемъ сн҃а бж҃їѧ просвѣти́лъ є҆сѝ, зовꙋ́щыѧ: сла́ва си́лѣ твое́й, гдⷭ҇и.
А҆́гг҃ле земны́й и҆ чл҃вѣ́че нбⷭ҇ный, и҆спросѝ и҆ на́мъ грѣ̑шнымъ сп҃се́нїе ᲂу҆ хрⷭ҇та̀ бг҃а, да и҆ мы̀ кꙋ́пнѡ съ тобо́ю зове́мъ: сла́ва си́лѣ твое́й, гдⷭ҇и.
Бг҃оро́диченъ:
Ѽ мт҃и сло́ва и҆ дв҃о, сохрани́ ны непорѡ́чны ѿ страсте́й безче́стїѧ, да хрⷭ҇тꙋ̀ все́льшꙋсѧ въ на́съ пое́мъ: сла́ва си́лѣ твое́й, гдⷭ҇и.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Предста́телѧ ѡ҆ на́съ те́плѣйша и҆ помо́щника гото́вѣйша тѧ̀, ѻ҆́тче, сꙋ́щїи въ ско́рбехъ стѧжа́хомъ: не то́чїю бо припа́дающыѧ къ чⷭ҇тно́мꙋ твоемꙋ̀ гро́бꙋ, но и҆ дале́че сꙋ́щыѧ, призыва́ющыѧ же и҆́мѧ твоѐ, соблюда́еши ѿ всѧ́кагѡ ѕла̀.
Хрⷭ҇та̀ є҆ди́наго жела́лъ є҆сѝ, прпⷣбне, и҆ ве́сь хрⷭ҇то́въ бы́лъ є҆сѝ: томꙋ̀ въ житїѝ невозвра́тнѡ послѣ́довалъ є҆сѝ, тогѡ̀ тща́лсѧ є҆сѝ дости́гнꙋти. тѣ́мже ны́нѣ жела́ннаго ѡ҆брѣ́тъ, и҆ на́съ мл҃твами твои́ми ста́дꙋ и҆збра́нныхъ сопричтѝ.
Слꙋжи́тель вѣ́ренъ сы́й ст҃ы́ѧ трⷪ҇цы, тре́ми бжⷭ҇твенными добродѣ́тельми, вѣ́рою, наде́ждою и҆ любо́вїю, ѡ҆каѧ́ннꙋю мою̀ дꙋ́шꙋ просвѣтѝ, и҆ въ бꙋ́дꙋщемъ вѣ́цѣ трїеди́наго бг҃а зрѣ́ти мѧ̀ сподо́би.
Бг҃оро́диченъ:
Ра́дость мі́рꙋ роди́вшаѧ гдⷭ҇а, ра́дости небе́сныѧ прича́стники на́съ сотворѝ, дв҃о всепѣ́таѧ, да гла́съ тебѣ̀ вопїе́мъ а҆рха́гг҃ловъ: ра́дꙋйсѧ, благода́тнаѧ, гдⷭ҇ь съ тобо́ю.
Пѣ́снь є҃. І҆рмо́съ:
Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ мі́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю.
Свѣ́томъ твои́мъ всю̀ вселе́ннꙋю ѡ҆зари́вый, просвѣтѝ тьмꙋ̀ мою̀, гдⷭ҇и, мра́къ дꙋшѝ моеѧ̀ разженѝ, въ чⷭ҇тнѣ́й па́мѧти ᲂу҆го́дника твоегѡ̀ пїтѷрі́ма.
Свѣти́льникъ сы́й сл҃нца првⷣнагѡ, ѡ҆зарѧ́ѧсѧ при́снѡ свѣ́томъ невече́рнимъ, ѻ҆́тче на́шъ пїтѷрі́ме, ѡ҆блиста́й ᲂу҆́мъ и҆ се́рдце на́ше, да ра́дꙋющесѧ сп҃сꙋ на́шемꙋ пое́мъ: и҆но́гѡ ра́звѣ тебє̀ бг҃а не зна́емъ.
Что̀ тебѣ̀ принесе́мъ, хрⷭ҇тѐ сп҃се на́шъ, кі̑ѧ пѣ̑сни воспое́мъ бл҃госе́рдїю твоемꙋ̀, ꙗ҆́кѡ возсїѧ́лъ є҆сѝ на́мъ свѣ́тъ сп҃се́нїѧ, и҆збавле́нїе ѿ беззако́нїй на́шихъ, чꙋдесы̀ мно́гими ст҃и́телѧ пїтѷрі́ма.
Бг҃оро́диченъ:
Мт҃и ст҃а́ѧ, бцⷣе, ро́ждшаѧ свѣ́тъ непристꙋ́пный, не пре́зри моле́нїѧ недосто́йныхъ ча̑дъ твои́хъ, во тьмѣ̀ грѣхѡ́въ сꙋ́щихъ, но просвѣтѝ на́съ свѣ́томъ бг҃овѣ́дѣнїѧ, да ᲂу҆́тренююще сла́вимъ тѧ̀.
И҆́нъ. І҆рмо́съ:
Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, человѣколю́бче.
Прови́дѣвъ дꙋшѝ твоеѧ̀ добро́тꙋ, пастыренача́льникъ хрⷭ҇то́съ па́стырѧ тѧ̀ до́бра и҆ ᲂу҆чи́телѧ и҆зрѧ́дна ста́дꙋ своемꙋ̀ показа̀: тѣ́мже и҆ прїѧ́тъ тѧ̀ въ черто́гъ нбⷭ҇ный со ст҃и́тельми, и҆́хже житїю̀ мꙋ́дрѣ поревнова́лъ є҆сѝ. съ ни́ми ᲂу҆̀бо на нб҃сѝ моли́сѧ ѡ҆ всѣ́хъ на́съ.
Тѣлє́сныѧ не́мѡщи нахо́дѧтъ на ны̀, и҆ бѣды̑ ѿвсю́дꙋ ѡ҆крꙋжа́ютъ ны̀. и҆зьмѝ ᲂу҆̀бо ны̀ ѿ тѣ́хъ мл҃твами твои́ми, ст҃и́телю: врача́ бо тѧ̀ и҆́мамы бг҃одарова́ннаго въ болѣ́знехъ и҆ ᲂу҆тѣ́шителѧ въ ско́рбехъ.
За́пѡвѣди хрⷭ҇тѡ́вы сотвори́въ и҆ тѣ́мъ ста́до твоѐ наꙋчи́въ, ве́лїй по достоѧ́нїю нарече́нъ є҆сѝ во црⷭ҇твїи нбⷭ҇нѣмъ. потщи́сѧ, ѻ҆́тче, и҆ на́съ ввестѝ во дворы̀ гдⷭ҇ни: мы́ бо є҆смы̀ ча̑да твоѧ̑ и҆ ѻ҆́вцы слове́снагѡ твоегѡ̀ ста́да.
Бг҃оро́диченъ:
Нбⷭ҇ныхъ сла́во и҆ земны́хъ весе́лїе, пречⷭ҇таѧ дв҃о, ꙗ҆́кѡ цр҃и́ца, со всѣ́ми ст҃ы́ми непреста́ннѡ за ны̀ моли́сѧ сн҃ꙋ твоемꙋ̀: на тѧ́ бо всѐ ᲂу҆пова́нїе по бз҃ѣ возложи́хомъ.
Пѣ́снь ѕ҃. І҆рмо́съ:
Въ бе́зднѣ грѣхо́внѣй содержи́мь, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Бе́здна ѕѡ́лъ мои́хъ смꙋща́етъ мѧ̀ и҆ низво́дитъ мѧ̀ во глꙋбинꙋ̀ ѿча́ѧнїѧ: но ты̀, бж҃е, пꙋчи́на млⷭ҇ти сы́й неисчерпа́емаѧ, да́ждь мѝ рꙋ́кꙋ по́мощи, ꙗ҆́кѡ петро́ви, предста́тельствомъ млⷭ҇тивагѡ ᲂу҆го́дника пїтѷрі́ма, и҆ сп҃си́ мѧ.
Бе́здно млⷭ҇ти и҆ щедро́тъ, гдⷭ҇и, ᲂу҆ще́дри ны̀, поги́бшее созда́нїе твоѐ, ᲂу҆кротѝ во́лны страсте́й на́шихъ, и҆ въ приста́нище сп҃се́нїѧ ны̀ возведѝ, мл҃твъ ра́ди ст҃и́телѧ пїтѷрі́ма.
Ѻ҆́тче на́шъ пїтѷрі́ме, слꙋжи́телю вѣ́рный млⷭ҇тивагѡ бг҃а, ᲂу҆молѝ є҆гѡ̀ бл҃госты́ню, да и҆́миже вѣ́сть сꙋдьба́ми, сп҃се́тъ ны̀ погиба́ющыѧ и҆ ꙗ҆ви́тъ на́мъ всемогꙋ́щꙋю по́мощь ᲂу҆ ди́внагѡ твоегѡ̀ гро́ба.
Бг҃оро́диченъ:
Прест҃а́ѧ влⷣчце, мт҃и млⷭ҇рдїѧ, ѡ҆быше́дше ѡ҆быдо́ша на́съ вразѝ вѣ́ры на́шеѧ, и҆ нѣ́сть застꙋпа́ющагѡ, и҆ погиба́емъ, пото́цы бо беззако́нїй премого́ша ны̀, и҆ ѿчаѧва́емсѧ: но ты̀ мт҃рними твои́ми щедро́тами приклонѝ сн҃а твоего̀ на млⷭ҇ть, да сп҃се́тъ ны̀ ѿ бѣ́дъ, ꙗ҆́коже ѿ ки́та і҆ѡ́нꙋ.
И҆́нъ. І҆рмо́съ:
Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ пєча́ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Па́стырю до́брый, хрⷭ҇тѡ́вы лю́ди бжⷭ҇твенными ᲂу҆чє́нїи ᲂу҆пасы́й и҆ добродѣ́тельми дꙋшѝ твоеѧ̀ воспита́вый, не ѡ҆ста́ви и҆ на́съ во грѣсѣ́хъ на́шихъ поги́бнꙋти, но въ ни́хже и҆ са́мъ ꙗ҆́кѡ чл҃вѣ́къ и҆скꙋша́емь бы́лъ є҆сѝ, и҆ на́мъ и҆скꙋша́ємымъ ны́нѣ помозѝ.
Ѽ ве́лїе чꙋ́до! гро́бъ ст҃и́телѧ ѻ҆́бщаѧ всѣ̑мъ враче́бница быва́етъ, безме́зднаѧ вои́стинꙋ и҆ гото́ваѧ: прїиди́те, чл҃вѣ́цы, со стра́хомъ и҆ вѣ́рою, тꙋ́не прїими́те здра́вїе дꙋша́мъ и҆ тѣлесє́мъ ва́шымъ, гдⷭ҇а сла́вѧще и҆ ᲂу҆го́дника тогѡ̀ ᲂу҆бл҃жа́юще.
Гра́дꙋ твоемꙋ̀ застꙋ́пникъ бꙋ́ди, ст҃е ѻ҆́тче, и҆ всю̀ странꙋ̀ на́шꙋ неѡбори́мымъ твои́мъ предста́тельствомъ ѡ҆градѝ, да всѝ съ весе́лїемъ зове́мъ тѝ: ра́дꙋйсѧ, тамбо́вскаѧ похвало̀, пїтѷрі́ме приснопа́мѧтне.
Бг҃оро́диченъ:
Под̾ кро́въ тво́й, влⷣчце, всѝ земноро́днїи прибѣга́емъ, и҆ дꙋша́ми ᲂу҆миле́нными вопїе́мъ тѝ: всемо́щнымъ хода́тайствомъ твои́мъ, бг҃ома́ти, млⷭ҇тива на́мъ сотворѝ, є҆го́же причи́стѡ родила̀ є҆сѝ, хрⷭ҇та̀ бг҃а на́шего.
Конда́къ, гла́съ и҃:
Мона́хѡвъ наста́вника и҆зрѧ́дна и҆ ст҃и́телѧ всѣ̑мъ лю́демъ млⷭ҇тива, чꙋдотво́рца преди́вна и҆ мл҃твенника ѡ҆ на́съ неꙋсы́пна, соше́дшесѧ воспои́мъ пїтѷрі́ма, тамбо́вскїѧ землѝ похвалꙋ̀.
І҆́косъ:
Воспои́мъ дне́сь, вѣ́рнїи, ст҃и́телѧ вели́каго въ пѣ́снехъ и҆ пѣ́нїихъ дх҃о́вныхъ: ра́дꙋйсѧ ѻ҆́тче бг҃оно́сне пїтѷрі́ме, смоле́нскїѧ землѝ ѻ҆́трасль пречⷭ҇тна́ѧ, во гра́дѣ вѧ́зьмѣ бл҃года́тїю бж҃їею напое́ннаѧ и҆ ꙗ҆́кѡ крі́нъ процвѣ́тшаѧ, тамбо́вскꙋю же странꙋ̀ плѡды̀ добродѣ́телей ѡ҆богати́вшаѧ: ра́дꙋйсѧ, па́стырю до́брый, насажде́нїемъ и҆́стинныѧ вѣ́ры и҆ свѣ́томъ бл҃гоче́стїѧ тьмꙋ̀ нече́стїѧ разгна́вый: ра́дꙋйсѧ, сп҃си́тельными трꙋды̀ твои́ми и҆ пѡ́двиги мнѡ́ги невѣ̑рныѧ ѡ҆брати́вый и҆ ко хрⷭ҇тꙋ̀ приведы́й: ра́дꙋйсѧ, чꙋ́днꙋю і҆кѡ́нꙋ бг҃ома́тере гра́дꙋ тамбо́вꙋ въ наслѣ́дїе ѡ҆ста́вивый, ѿ неѧ́же многоразли̑чнаѧ и҆сцѣлє́нїѧ и҆сточа́ютсѧ: ра́дꙋйсѧ, свои́ма рꙋка́ма и҆скопа́вый кла́дѧзи воды̀ неисчерпа́емыѧ, ю҆́же съ вѣ́рою пїю́щїи прїе́млютъ недꙋ́гѡвъ и҆сцѣле́нїе и҆ ѿ дꙋшепа́гꙋбныхъ страсте́й свобожде́нїе: ра́дꙋйсѧ, посѣще́нїемъ твои́мъ, со дрꙋ́ги твои́ми, ст҃и́телемъ митрофа́номъ и҆ бг҃олюби́вымъ васі́лїемъ, тамбѡ́вскїѧ дє́бри и҆ лѣса̀ ѡ҆бл҃гоꙋха́вый: ра́дꙋйсѧ, тѣ́мъ нача́ло и҆́ноческагѡ житїѧ̀ та́мѡ положи́вый, въ мі́рѣ же живꙋ́щымъ ѻ҆́бразъ и҆́стинныѧ дрꙋ́жбы показа́вый: ра́дꙋйсѧ, тамбо́вскїѧ землѝ похвало̀.
Пѣ́снь з҃. І҆рмо́съ:
Тѣ́лꙋ злато́мꙋ на по́ли деи́рѣ слꙋжи́мꙋ, трїѐ твоѝ.ѻ҆́троцы небрего́ша ѡ҆ безбо́жнѣмъ велѣ́нїи, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Гдⷭ҇и бж҃е на́шъ, любы̀ неизрече́ннаѧ, чл҃вѣ́ка пе́рстнаго па́че зла́та и҆ сребра̀ ѻ҆́бразомъ твои́мъ ᲂу҆краси́лъ є҆сѝ, всѧ́кими дарова̑нїи и҆ чꙋдесы̀ мно́гими ѡ҆богати́лъ є҆сѝ. тѣ́мже припа́дающе къ ра́цѣ чꙋдотво́рца твоегѡ̀ пїтѷрі́ма, вопїе́мъ тѝ: бл҃гослове́нъ є҆сѝ, бж҃е ѻ҆тє́цъ на́шихъ.
Прпⷣбне ѻ҆́тче пїтѷрі́ме, ѻ҆́бразъ созда́телѧ своегѡ̀ въ дꙋшѝ твое́й ѿ страсте́й ѡ҆чи́стивъ и҆ любо́вїю бж҃їею распалѧ́емь, пре́далъ є҆сѝ себѐ на слꙋже́нїе во́ли є҆гѡ̀, всегда̀ взыва́ѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́коже дре́вле ѻ҆́троцы бл҃гочести́вїи въ вавѷлѡ́нѣ, и҆́стиннꙋю вѣ́рꙋ во странѣ̀ тамбо́встѣй, ѻ҆́тче пїтѷрі́ме, ᲂу҆тверди́лъ є҆сѝ, и҆ нече́стїе ѡ҆бличи́лъ є҆сѝ, всегда̀ трꙋжда́ѧсѧ, бл҃говѣствꙋ́ѧ, молѧ́сѧ и҆ поѧ̀: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Прест҃а́ѧ влⷣчце бцⷣе, ѻ҆́бразъ тво́й чⷭ҇тны́й гра́дꙋ на́шемꙋ въ бл҃гослове́нїе и҆ покро́въ держа́венъ рꙋка́ма ст҃и́телѧ пїтѷрі́ма дарова́ла є҆сѝ, да славосло́вимъ тобо́ю держа́внаго хрⷭ҇та̀ бг҃а на́шего.
И҆́нъ. І҆рмо́съ:
Ѻ҆́троцы є҆вре́йстїи въ пещѝ:
Приле́жное ѡ҆ ста́дѣ твое́мъ попече́нїе и҆мѣ́лъ є҆сѝ, ѻ҆́тче, житїе́мъ и҆ сло́вомъ на пꙋ́ть сп҃се́нїѧ всѧ̑ до́брѣ наставлѧ́ѧ. тѣ́мже заблꙋ́ждшаго мѧ̀ на стезѧ́хъ поги́бели, ꙗ҆́кѡ па́стырь сострада́теленъ твоѐ ѻ҆вча̀ ны́нѣ взыщѝ, вопїю́ща: бл҃гослове́нъ є҆сѝ, гдⷭ҇и бж҃е, во вѣ́ки.
Сло́во гдⷭ҇не, ꙗ҆́кѡ чⷭ҇тїи се́рдцемъ бг҃а ᲂу҆́зрѧтъ, на тебѣ̀, ст҃е ѻ҆́тче, и҆спо́лнисѧ. ви́дѣлъ бо є҆сѝ тѣле́сныма ѻ҆чи́ма сп҃са хрⷭ҇та̀, послꙋ́шающа мл҃твꙋ твою̀, зовы́й: бл҃гослове́нъ є҆сѝ, гдⷭ҇и бж҃е, во вѣ́ки.
На мѣ́стѣ мл҃твенныхъ твои́хъ по́двигѡвъ и҆скопа́лъ є҆сѝ и҆сто́чникъ воды̀ бл҃года́тныѧ, ѿ него́же бл҃гоговѣ́йнїи лю́дїе почерпа́ютъ недꙋ́гѡвъ и҆сцѣлє́нїѧ, а҆́ще воспро́сѧтъ твоеѧ̀ по́мощи и҆ не раска́ютсѧ, зовꙋ́ще: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Ѿ сна̀ грѣхо́внагѡ воспрѧнѝ, ѽ ѡ҆каѧ́ннаѧ дꙋшѐ моѧ̀, и҆ ко є҆ди́нѣй застꙋ́пницѣ всѣ́хъ воззовѝ: мт҃и дв҃о, сп҃си́ мѧ мл҃твами твои́ми, и҆ и҆збра́нныхъ ча́сти сподо́би, вопїю́ща: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Гдⷭ҇и бж҃е мо́й, пла́мень ѻ҆́гненный дре́вле въ ро́сꙋ ѻ҆трокѡ́мъ бл҃гочєсти́вымъ преложи́вый, пла́мень страсте́й мои́хъ ᲂу҆гасѝ росо́ю мл҃твъ бл҃гочести́вагѡ ст҃и́телѧ пїтѷрі́ма, да тѧ̀ превозношꙋ̀ съ ни́мъ и҆ а҆́зъ во всѧ̑ вѣ́ки.
Ѻ҆́тче на́шъ пїтѷрі́ме, сле́зъ твои́хъ тече́ньми ѻ҆́гнєннаѧ и҆скꙋшє́нїѧ страсте́й и҆ по́хотей плотски́хъ ᲂу҆гаси́лъ є҆сѝ, и҆ ꙗ҆́кѡ во цвѣ́тницѣ, въ чи́стѣмъ се́рдце твое́мъ при́снѡ ликовствова́лъ є҆сѝ: всѧ̑ дѣла̀, бл҃гослови́те, по́йте гдⷭ҇а.
Чи́стою бг҃олюби́вою дꙋше́ю со а҆́гг҃лы ѻ҆гнезра́чномꙋ прⷭ҇то́лꙋ бг҃а ны́нѣ предстоѧ̀, и҆ ѿтꙋ́дꙋ незаходи́мыми зарѧ́ми ѡ҆блистава́емь и҆ чꙋдесы̀ мно́гими на́мъ сїѧ́ѧ, просвѣтѝ, ѻ҆́тче пїтѷрі́ме, ѡ҆блежа́щꙋю на́съ тьмꙋ̀ невѣ́рїѧ и҆ сꙋевѣ́рїѧ, да пое́мъ и҆ благослови́мъ ди́внаго во ст҃ы́хъ свои́хъ бг҃а во вѣ́ки.
Бг҃оро́диченъ:
Ꙗ҆́коже ѻ҆гне́мъ пе́щнымъ, страстьмѝ пали́мый, зовꙋ́ ти блꙋ́дный а҆́зъ, влⷣчце чⷭ҇таѧ, мт҃и всемогꙋ́щагѡ, сп҃сѝ и҆ и҆зба́ви мѧ̀ ѿ ѻ҆́гненнагѡ ѡ҆сꙋжде́нїѧ.
И҆́нъ. І҆рмо́съ:
Побѣди́тєли мꙋчи́телѧ:
І҆кѡ́нꙋ бг҃ома́тере во ѡ҆сщ҃е́нїе, покро́въ и҆ ѡ҆гражде́нїе гра́дꙋ твоемꙋ̀ прине́слъ є҆сѝ, ѻ҆́тче, ꙗ҆́же и҆сто́чникъ бл҃года́тныхъ и҆сцѣле́нїй и҆ ѿ всѧ́кихъ напа́стей щи́тъ держа́венъ показа́сѧ вопїю́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Скоропослꙋ́шный помо́щникъ въ ско́рбехъ и҆ болѣ́знехъ быва́еши, прпⷣбне, призыва́ющымъ тѧ̀ вѣ́рою. ѻ҆́вымъ ᲂу҆́бѡ въ со́нїихъ ꙗ҆влѧ́ѧсѧ, ѻ҆́вымъ ꙗ҆́вѣ предстоѧ̀, ѻ҆́вымъ же та́йнѡ бл҃годѣ́ѧ, вопїю́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Свѧтота́тцꙋ дерзнове́нномꙋ во хра́мѣ твое́мъ, возста́въ ѿ гро́ба, ꙗ҆́вѣ предста́лъ є҆сѝ, ст҃и́телю, гро́знымъ преще́нїемъ призва́въ того̀ къ покаѧ́нїю. молѝ и҆ на́мъ да́тисѧ пре́жде конца̀ покаѧ́нїю, зовꙋ́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Оу҆бл҃жа́ютъ тѧ̀ всѝ ро́ди чл҃вѣ́честїи, ꙗ҆́кѡ родила̀ є҆сѝ без̾ ѻ҆тца̀ сн҃а пло́тїю, пре́жде вѣ̑къ сн҃а бж҃їѧ без̾ мт҃ре сꙋ́ща, є҆мꙋ́же вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
Ѻ҆ц҃а̀ безнача́льнагѡ сло́ве, сн҃е є҆диноро́дный, чл҃вѣ́ка па́дшаго хотѧ̀ ѡ҆бнови́ти, сн҃ъ дв҃ы ꙗ҆ви́лсѧ є҆сѝ, и҆ грѣхѝ всегѡ̀ мі́ра взе́мъ, на крⷭ҇тъ возне́слъ є҆сѝ, и҆ ѿтꙋ́дꙋ распросте́ртыма дла́ньма расточє́ннаѧ ча̑да бж҃їѧ собра́лъ є҆сѝ: тѣ́мже и҆ мы̀, дне́сь сою́зомъ любвѐ твоеѧ̀ свѧзꙋ́еми и҆ ди́вный гро́бъ ᲂу҆го́дника твоегѡ̀ пїтѷрі́ма ѡ҆бстоѧ́ще, ро́ждшꙋю тѧ̀ велича́емъ.
Воплоще́нномꙋ сн҃ꙋ бж҃їю подража́ѧ, па́че и҆нѣ́хъ смири́лъ є҆сѝ себѐ, прпⷣбне ѻ҆́тче пїтѷрі́ме: тѣ́мже и҆ любо́вь бж҃їю стѧжа́лъ є҆сѝ, и҆ заблꙋ́ждшаѧ ча̑да бж҃їѧ приве́лъ є҆сѝ ко ѻ҆ц҃ꙋ̀ нбⷭ҇номꙋ сла́вити є҆гѡ̀ бл҃госе́рдїе.
И҆спо́лнь любвѐ хрⷭ҇то́вы, ѻ҆́тче на́шъ пїтѷрі́ме, сло́вомъ и҆ житїе́мъ па́ствꙋ твою̀ поꙋча́лъ є҆сѝ, си̑рыѧ призира́ти, ни́щыѧ пита́ти, скорбѧ́щыѧ ᲂу҆тѣша́ти: помоли́сѧ сп҃сꙋ хрⷭ҇тꙋ̀, да и҆ мы̀ дне́сь въ па́мѧть твою̀ ᲂу҆краси́мъ себѐ сострада́нїемъ и҆ млⷭ҇тынѧми, ꙗ҆́коже ча̑да бж҃їѧ возлю́блєннаѧ.
Бг҃оро́диченъ:
Мт҃и ст҃а́ѧ, безмꙋ́жнаѧ дв҃о, во чре́вѣ твое́мъ бг҃а и҆ чл҃вѣ́ка во є҆ди́но совокꙋпи́вшаѧ, да́рꙋй и҆ на́мъ расточє́ннымъ соедини́тисѧ во є҆ди́нѣмъ хрⷭ҇тѣ̀ сн҃ѣ твое́мъ, на не́мже ᲂу҆тверди́сѧ цр҃ковь, тѧ̀ велича́ющаѧ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́емъ.
Па́стырскою ре́вностїю распалѧ́емь, и҆́ны ѻ҆́вцы, ꙗ҆̀же не бѣ́ша ѿ ста́да твоегѡ̀, приве́лъ є҆сѝ ко хрⷭ҇тꙋ̀, є҆реті́чествꙋющихъ мнѡ́жества вразꙋмлѧ́ѧ, невѣ̑рныѧ же свѣ́томъ бг҃опозна́нїѧ ѡ҆зарѧ́ѧ, да бꙋ́детъ по гл҃го́лꙋ сп҃совꙋ є҆ди́но ста́до и҆ є҆ди́нъ па́стырь.
Тѧ̀ ꙗ҆́кѡ нбⷭ҇наго врача̀, да́ръ и҆сцѣле́нїй ѿ гдⷭ҇а прїи́мша, ᲂу҆се́рднѡ мо́лимъ, ст҃и́телю: твои́хъ мл҃твъ нбⷭ҇нымъ врачева́нїемъ и҆сцѣлѝ лю̑тыѧ недꙋ́ги дꙋ́шъ и҆ тѣле́съ на́шихъ.
Бл҃года́рное сїѐ пѣ́нїе ча̑дъ твои́хъ не пре́зри, ᲂу҆го́дниче бж҃їй, но бл҃госе́рдїемъ твои́мъ прїимѝ є҆̀, и҆ творцꙋ̀ всѧ́ческихъ принесѝ, да то́й млⷭ҇тивъ бꙋ́детъ тѧ̀ почита́ющымъ.
Бг҃оро́диченъ:
Ѿ бѣ́дъ сп҃сѝ и҆ ѿ страсте́й свободѝ, влⷣчце, рабы̑ твоѧ̑, ст҃и́телѧ пїтѷрі́ма моле́нїемъ: тѧ́ бо неѡбори́мꙋю стѣ́нꙋ всѝ сꙋ́щїи въ печа́лехъ и҆́мамы, ꙗ҆́кѡ ро́ждшꙋю сп҃се́нїе на́ше.
Свѣти́ленъ: Подо́бенъ: Нб҃о ѕвѣзда́ми:
Свѣти̑ла на нб҃сѝ ᲂу҆тверди́вый ꙗ҆ви́ тѧ цр҃кви свое́й но́вꙋю ѕвѣздꙋ̀ пресвѣ́тлꙋю, дꙋ́ха свѣтлостьмѝ и҆ чꙋде́съ сїѧ̑нїи на́съ ѡ҆зарѧ́ющꙋю и҆ нечести̑выѧ посрамлѧ́ющꙋю, неꙋсы́пный предста́телю на́шъ, ст҃и́телю ѻ҆́тче пїтѷрі́ме.
Сла́ва, и҆ ны́нѣ, бг҃оро́диченъ:
Мт҃и пречⷭ҇таѧ, ро́ждшаѧ свѣ́тъ неизрече́нный, сы́ны свѣ́та покажи́ ны, и҆ зри́тєли бл҃же́нства нбⷭ҇нагѡ бы́ти сподо́би, да ра́дꙋющесѧ съ тобо́ю и҆ прпⷣбнымъ пїтѷрі́момъ зове́мъ: свѣтода́вче хрⷭ҇тѐ бж҃е на́шъ, сла́ва тебѣ̀.
На хвали́техъ, стїхи̑ры на д҃, гла́съ г҃:
Прїиди́те, всѝ ꙗ҆зы́цы, ᲂу҆разꙋмѣ́йте та́йнꙋ вѣ́ры на́шеѧ: ст҃и́тель бж҃їй пїтѷрі́мъ, храни́тель дарова́нїй дх҃о́вныхъ, тѣ́ломъ въ зе́млю ѿше́дый, дꙋ́хомъ любвѐ хрⷭ҇то́вы съ вѣ́рными и҆ дне́сь пребыва́етъ и҆ ве́селѡ ѿ всѧ́кїѧ бѣды̀ сп҃са́етъ. разли̑чнаѧ содѣва́ѧ чꙋдеса̀: ѻ҆́во пома́занїемъ є҆ле́а ѿ гро́ба є҆гѡ̀, ѻ҆́во питїе́мъ цѣле́бныѧ воды̀ и҆з̾ кла́дѧзѧ є҆гѡ̀, ѻ҆́во мл҃твою пред̾ гро́бомъ и҆ ли́комъ є҆гѡ̀, ѻ҆́во возложе́нїемъ ри́зы є҆гѡ̀, ѻ҆́во видѣ́нїемъ є҆гѡ̀, ꙗ҆́кѡ жи́ва сꙋ́ща, ѻ҆́во є҆ди́нѣмъ призыва́нїемъ и҆́мене є҆гѡ̀, стра́ждꙋщыѧ тѧ́жкими недꙋ́ги здра̑вы ѿ ѻ҆дра̀ воздвиза́ѧ, сомнѧ́щыѧсѧ въ вѣ́рѣ ᲂу҆крѣплѧ́ѧ, заблꙋ́ждшыѧ и҆справлѧ́ѧ, бѣ́дствꙋющыѧ въ пꙋтѝ ѿ потопле́нїѧ водна́гѡ сп҃са́ѧ, да бл҃годарѧ́тъ всегда̀ бл҃годѣ́ющаго и҆̀мъ бг҃а и҆ велича́ютъ но́ваго ᲂу҆го́дника є҆гѡ̀ и҆ чꙋдотво́рца пїтѷрі́ма.
Бг҃облаже́нне ѻ҆́тче пїтѷрі́ме, всѧ̑ кра̑снаѧ мі́ра сегѡ̀ возненави́дѣвъ, зако́нъ же бж҃їй возлюби́въ, пло́ть твою̀ посто́мъ и҆ бдѣ́нїемъ и҆знꙋри́лъ є҆сѝ, дꙋ́шꙋ же сле́зъ стрꙋѧ́ми ѿ страсте́й ѡ҆чи́стилъ є҆сѝ, смире́нїемъ и҆ кро́тостїю, терпѣ́нїемъ и҆ любо́вїю ᲂу҆краси́лъ є҆сѝ, и҆ а҆́гг҃льски є҆щѐ на землѝ пожи́лъ є҆сѝ: сегѡ̀ ра́ди, ꙗ҆́кѡ свѣти́льникъ многосвѣ́тлый, мно́гими чꙋдесы̀ просїѧ́лъ є҆сѝ, и҆ и҆сто́чникъ вели́кихъ дарѡ́въ бж҃їихъ показа́лсѧ є҆сѝ. молѝ просла́вльшаго тѧ̀ гдⷭ҇а, да просвѣти́тъ тьмꙋ̀ грѣхѡ́въ и҆ беззако́нїй на́шихъ, и҆ да́рꙋетъ землѝ рѡссі́йстѣй ми́ръ и҆ ве́лїю млⷭ҇ть.
Ѻ҆́тче бг҃оно́сне пїтѷрі́ме, на го́рꙋ добродѣ́телей возше́дъ высо́кихъ, бг҃а въ дꙋшѝ твое́й ꙗ҆́кѡ во хра́мѣ носѧ̀, возводи́лъ є҆сѝ па́ствꙋ твою̀ ᲂу҆че́ньми за́повѣдей хрⷭ҇то́выхъ, ꙗ҆́кѡ лѣ́ствицею ѿ землѝ къ нб҃сѝ: сегѡ̀ ра́ди и҆ ѻ҆би́тєли и҆́ночєскїѧ бл҃гоꙋстроѧ́лъ є҆сѝ, и҆ хра́мы бж҃їѧ всѧ́кими бл҃голѣ́потами ᲂу҆краша́лъ є҆сѝ и҆ молѧ́щыѧсѧ въ ни́хъ поꙋча́лъ є҆сѝ. хра́мы и҆ на́съ дх҃а ст҃а́гѡ сотворѝ мл҃твами твои́ми, ꙗ҆́кѡ предста́тель на́шъ, вели́кїй пїтѷрі́ме.
Сла́ва, гла́съ и҃:
Мона́хѡвъ мно́жєства и҆ мїрски́хъ люде́й собра̑нїѧ, наста́вника тѧ̀ почита́емъ, и҆ ꙗ҆́кѡ ᲂу҆чи́телѧ бг҃омꙋ́дра сла́вимъ тѧ̀, ѻ҆́тче на́шъ пїтѷрі́ме: всѧ̑ бо въ житїѝ твое́мъ нелѣ́ностнѣ на стєзѝ сп҃се́нїѧ наставлѧ́лъ є҆сѝ, и҆ ны́нѣ любо́вїю твое́ю всѣ́хъ ѡ҆б̾е́млеши, стрꙋѝ млⷭ҇ти бж҃їѧ и҆злива́еши съ вѣ́рою приходѧ́щымъ къ чⷭ҇тно́мꙋ и҆ многоцѣле́бномꙋ твоемꙋ̀ гро́бꙋ. молѝ за ны̀, ѻ҆́тче сщ҃е́ннѣйшїй, да сподо́бимсѧ црⷭ҇твїѧ нбⷭ҇нагѡ, и҆дѣ́же ты̀ въ незаходи́мѣй сїѧ́еши сла́вѣ.
И҆ ны́нѣ, бг҃оро́диченъ: Влⷣчце, прїимѝ мл҃твы ра̑бъ твои́хъ:
Славосло́вїе вели́кое, тропа́рь ст҃а́гѡ, є҆ктєнїѝ, и҆ ѿпꙋ́стъ.
На лїтꙋргі́и. Бл҃жє́нна ѿ канѡ́на ст҃а́гѡ, пѣ̑сни г҃-ѧ и҆ ѕ҃-ѧ. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ ко є҆вре́ємъ, зача́ло тл҃є. А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе ѿ лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ првⷣникъ:
Моли́тва ст҃и́телю пїтѷрі́мꙋ, тамбо́вскомꙋ чꙋдотво́рцꙋ.
Бл҃гослове́нъ и҆ препросла́вленъ гдⷭ҇ь бг҃ъ, призва́вый тѧ̀, ст҃и́телю ѻ҆́тче на́шъ пїтѷрі́ме, ѿ пе́рвагѡ часа̀ дѣ́лателѧ въ вїногра́дъ сво́й, ꙗ҆ви́вый въ тебѣ̀ послꙋша́нїе во́ли є҆гѡ̀ неꙋкло́нное, ре́вность прⷣте́чевꙋ и҆ любо́вь па́ѵловꙋ, та́же и҆ на свѣ́щникъ цр҃кве тамбо́вскїѧ тѧ̀ поста́вивый и҆ а҆рхїере́а вели́ка тѧ̀ показа́вый. бл҃года́тїю ст҃и́тельства ᲂу҆крѣплѧ́емь и҆ ѻ҆гне́мъ любвѐ хрⷭ҇то́вы распалѧ́емь, не да́лъ є҆сѝ, па́стырю на́шъ до́брый, сна̀ ѻ҆чи́ма твои́ма, нижѐ вѣ́ждома дрема́нїѧ, на всѧ́къ де́нь трꙋжда́ѧсѧ, молѧ́сѧ и҆ бл҃говѣствꙋ́ѧ, невѣ̑рныѧ просвѣща́ѧ, заблꙋ́ждшыѧ вразꙋмлѧ́ѧ, па́дшыѧ возставлѧ́ѧ, немѡщны́ѧ ᲂу҆крѣплѧ́ѧ, пла́чꙋщыѧ ᲂу҆тѣша́ѧ, всѣ̑мъ бы́въ всѧ̑, ꙗ҆́коже и҆ ст҃ы́й па́ѵелъ, да всѧ́кѡ нѣ́кїѧ сп҃се́ши. є҆гда́ же вре́мѧ дѣ́ланїѧ твоегѡ̀ въ вертогра́дѣ домовлады́ки хрⷭ҇та̀ и҆спо́лнисѧ и҆ ѿше́лъ є҆сѝ ѿ земны́хъ въ селє́нїѧ гѡ́рнѧѧ прїѧ́ти мздꙋ̀ трꙋдѡ́въ твои́хъ, даде́сѧ тѝ, ᲂу҆го́дниче бж҃їй, прⷭ҇то́лꙋ цр҃ѧ̀ сла́вы съ ли̑ки ст҃ы́хъ предстоѧ́ти и҆ ѿтꙋ́дꙋ па́ствꙋ твою̀ назира́ти, за ны̀ грѣ̑шныѧ моли́тисѧ, не́мѡщи немощны́хъ носи́ти, недꙋ́ги цѣли́ти, скѡ́рби ᲂу҆толѧ́ти. сегѡ̀ ра́ди ѿ днѐ бл҃же́ннагѡ ᲂу҆спе́нїѧ твоегѡ̀ вѣ́рнїи не преста́ша притека́ти къ тебѣ̀ въ ско́рбехъ и҆ болѣ́знехъ, и҆ ѻ҆́вїи прикоснове́нїемъ ри́зы твоеѧ̀, ѻ҆́вїи ѿ воды̀ и҆з̾ кла́дѧзѧ твоегѡ̀ здра́вїе и҆ и҆збавле́нїе ѿ всѧ́кихъ бѣ́дъ ᲂу҆лꙋча́хꙋ. тѣ́мже и҆ ны́нѣ, къ цѣльбоно́сномꙋ гро́бꙋ твоемꙋ̀ соше́дшесѧ, сла́вимъ бг҃а, ди́внаго во ст҃ы́хъ свои́хъ, и҆ тебѐ, ѻ҆́тче сщ҃е́ннѣйшїй, велича́емъ и҆ мо́лимъ: не ѿстꙋпа́й ѿ на́съ любо́вїю твое́ю, сохранѧ́й мл҃твами твои́ми цр҃ковь правосла́внꙋю незы́блемꙋ ѿ невѣ́рїѧ и҆ раско́ла, странꙋ́ же рѡссі́йскꙋю ѿ бѣ́дъ и҆ напа́стей защитѝ, ми́ръ и҆ безмѧте́жїе то́й да́рꙋѧ: ѿ всѧ́кихъ врагѡ́въ ѡ҆градѝ, па́стырємъ цр҃кве ст҃ы́ѧ бл҃гопоспѣшѝ, дѣла̀ рꙋ́къ и҆́хъ и҆спра́ви и҆ ре́вностїю ѡ҆ сп҃се́нїи врꙋче́ннагѡ и҆̀мъ слове́снагѡ ста́да сердца̀ и҆́хъ распалѝ, всѧ̑ же ны̀ въ послꙋша́нїи сп҃си́тельномꙋ бл҃говѣ́стїю хрⷭ҇то́вꙋ соблюдѝ и҆ дѣ́ло сп҃се́нїѧ, ꙗ҆́кѡ є҆ди́но на потре́бꙋ, вмѣнѧ́ти помозѝ, да кꙋ́пнѡ съ тобо́ю є҆ди́нѣми ᲂу҆сты̀ и҆ є҆ди́нѣмъ се́рдцемъ всѝ на всѧ́къ де́нь и҆ ча́съ пое́мъ и҆ сла́вимъ сп҃са хрⷭ҇та̀ со ѻ҆ц҃е́мъ и҆ ст҃ы́мъ дх҃омъ во вѣ́ки вѣкѡ́въ. а҆ми́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.