← претходни дан | Минеј — Јул | следећи дан →
23 июля: Иконы Пресвятой Богородицы Почаевской
Мѣ́сѧца тогѡ́же въ к҃г-й де́нь.
Слꙋ́жба прест҃ѣ́й бцⷣѣ, пред̾ чꙋдотво́рною є҆ѧ̀ і҆кѡ́ною поча́евскою пѣва́емаѧ.
На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ д҃:
Наста̀ де́нь пра́здника твоегѡ̀, пречⷭ҇таѧ, наста̀ на́шеѧ ра́дости пресвѣ́тлый де́нь: прїиди́те, мона́шествꙋющихъ ли́цы, прїиди́те, всѝ вѣ́рнїи лю́дїе, воспои́мъ ѿ чи́стагѡ се́рдца мт҃рь бж҃їю, и҆ чꙋдеса̀ є҆ѧ̀ на горѣ̀ поча́евстѣй ꙗ҆влє́ннаѧ просла́вимъ.
Два́жды.
Ве́лїѧ чꙋде́съ твои́хъ си́ла, бцⷣе, ꙗ҆́кѡ мнѡ́ги, то́кмо воззва́вшыѧ къ тебѣ̀, ѿ недꙋ́гѡвъ тѧ́жкихъ сп҃сла̀ є҆сѝ, вѣ̑рныѧ видѣ́ньми ᲂу҆тверди́ла є҆сѝ, и҆ невѣ̑рныѧ къ вѣ́рѣ ѡ҆брати́ла є҆сѝ.
А҆́ки сїна́й и҆ ѳавѡ́ръ ᲂу҆бл҃жа́емъ го́рꙋ поча́евскꙋю, а҆́ки влахе́рнскꙋю це́рковь чти́мъ здѣ̀ стоѧ́щїй хра́мъ влⷣчцы, занѐ подѡ́бнаѧ тѣ́мъ мѣ́стѡмъ въ поча́евстѣй ѻ҆би́тели содѣ́ѧшасѧ, ꙗ҆́кѡ пребыва́нїе сла́вы приснодв҃ы здѣ̀ ꙗ҆ви́сѧ.
Сла́ва, и҆ ны́нѣ, гла́съ в҃:
Нбⷭ҇наѧ врата̀, и҆ спорꙋ́чница сп҃се́нїѧ на́шегѡ, и҆ вѣ́ры правосла́вныѧ ᲂу҆твержде́нїе ты̀ є҆сѝ, бцⷣе пречⷭ҇таѧ: твоегѡ̀ ᲂу҆̀бо предста́тельства ча́юще, во є҆ди́нъ моли́твенный ли́къ снидо́хомсѧ рабѝ твоѝ, и҆ подно́жїю но́гъ твои́хъ покланѧ́емсѧ, и҆ про́симъ просвѣще́нїѧ и҆ сп҃се́нїѧ дꙋша́мъ на́шымъ.
На стїхо́внѣ стїхи̑ры, гла́съ а҃:
Оу҆миле́нїе серде́цъ и҆ ѡ҆ грѣсѣ́хъ покаѧ́нїе дне́сь возно́ситсѧ ѿ хрⷭ҇тїа́нъ ко прⷭ҇то́лꙋ пречⷭ҇тыѧ дв҃ы: та́ бо ѡ҆ на́съ мо́литъ хрⷭ҇та̀ бг҃а.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Прорече́нїе твоѐ сбы́вшеесѧ здѣ̀ зри́мъ, влⷣчце: вси́ бо ро́ди тебѐ ра́достнѡ ᲂу҆бл҃жа́ютъ. тѣ́мже воззове́мъ тѝ съ првⷣною є҆лїсаве́тою: бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Вои́стиннꙋ бл҃же́но чре́во носи́вшее тѧ̀, гдⷭ҇и, и҆ сѡсца̀, ꙗ҆̀же є҆сѝ сса́лъ: на́мъ же соверша́ющымъ пра́зднество твоеѧ̀ пречⷭ҇тыѧ мт҃ре, носи́ти тѧ̀ въ сердца́хъ на́шихъ помозѝ, да и҆ мы̀ бл҃же́нства сегѡ̀, по сло́вꙋ твоемꙋ̀, причасти́мсѧ.
Сла́ва, и҆ ны́нѣ, гла́съ є҃:
Ра́дꙋйсѧ, пребл҃гослове́ннаѧ бцⷣе дв҃о: ра́дꙋйсѧ, бы́строе молѧ́щихсѧ ᲂу҆слы́шанїе: ра́дꙋйсѧ, бѣсѡ́мъ ᲂу҆страше́нїе и҆ ка́ющымсѧ прибѣ́жище: ра́дꙋйсѧ, и҆сто́чникъ бл҃года́ти въ чꙋдотво́рнѣмъ твое́мъ ѻ҆́бразѣ ла́ѵрѣ поча́евстѣй дарова́вшаѧ.
Тропа́рь, гла́съ є҃:
Пред̾ ст҃о́ю твое́ю і҆кѡ́ною, влⷣчце, молѧ́щїисѧ и҆сцѣле́нїй сподоблѧ́ютсѧ, вѣ́ры и҆́стинныѧ позна́нїе прїе́млютъ, и҆ а҆га́рѧнскаѧ нашє́ствїѧ ѿража́ютъ. тѣ́мже и҆ на́мъ, къ тебѣ̀ припа́дающымъ, грѣхѡ́въ ѡ҆ставле́нїе и҆спросѝ, пѡ́мыслы бл҃гоче́стїѧ сердца̀ на̑ша просвѣтѝ, и҆ къ сн҃ꙋ твоемꙋ̀ мл҃твꙋ вознесѝ ѡ҆ сп҃се́нїи дꙋ́шъ на́шихъ.
На вели́цѣй вече́рни, на Гдⷭ҇и воззва́хъ, ста́вимъ стїхѡ́въ и҃. И҆ пое́мъ стїхи̑ры, гла́съ є҃:
Прїиди́те, рѡссі́йстїи собо́ри, и҆ ѿ всѣ́хъ ꙗ҆зы̑къ вѣ́рнїи собери́тесѧ, на го́рꙋ поча́евскꙋю взы́демъ и҆ въ до́мъ мт҃ре бж҃їѧ, и҆ ᲂу҆́зримъ мѣ́сто стопы̀ є҆ѧ̀, и҆дѣ́же во ѻ҆́гненнѣмъ столпѣ̀ дре́вле ꙗ҆ви́сѧ, и҆ ѿ и҆сто́чника, ѿтꙋ́дꙋ и҆сте́кшагѡ, вѣ́рою ѡ҆кропле́нїе прїи́мемъ, и҆ чꙋдотво́рнѣй і҆кѡ́нѣ є҆ѧ̀ поклони́мсѧ, проще́нїѧ прегрѣше́нїй на́шихъ просѧ́ще и҆ дꙋша́мъ на́шымъ ве́лїѧ млⷭ҇ти.
Два́жды.
Къ твоемꙋ̀ застꙋпле́нїю притека́емъ, пречⷭ҇таѧ, и҆ чꙋдеса̀, во ѻ҆би́тели поча́евстѣй ѿ тебє̀ бы́вшаѧ, воспѣва́емъ: и҆сцѣлє́нїѧ бо здѣ̀ слѣпі́и и҆ хро́мїи ра́достнѡ прїима́хꙋ, бѣсні́и свобожда́хꙋсѧ, и҆ ме́ртвїи воскресо́ша, и҆ нѣ́сть такова́гѡ жесто́кагѡ се́рдца, є҆́же зрѣ́нїемъ ст҃ы́ни твоеѧ̀ не ᲂу҆мили́тсѧ. но ᲂу҆твердѝ, всепѣ́таѧ, бл҃го́е и҆зволе́нїе молѧ́щихсѧ тебѣ̀, и҆ пода́ждь дꙋша́мъ на́шымъ ве́лїю млⷭ҇ть.
Ра́дꙋйсѧ, бл҃года́тнаѧ бцⷣе, твоѐ ста́до ѿ нб҃съ назира́ющи, ѿ а҆́гг҃лъ ᲂу҆́бѡ пѣ́нїе прїе́млющи, ѿ на́съ же и҆злива́ємыѧ ᲂу҆милє́нныѧ сле́зы ви́дѧщи и҆ моли́твєннаѧ воздыха̑нїѧ дꙋ́шъ на́шихъ слы́шащи: сїѧ̑ бо па́че виті́йства слове́снагѡ на милосе́рдїе тебѐ приклонѧ́ютъ, во є҆́же пода́ти дꙋша́мъ на́шымъ ве́лїю млⷭ҇ть.
И҆́ны стїхи̑ры, гла́съ в҃:
Твою̀ і҆кѡ́нꙋ цѣлꙋ́юще, влⷣчце, и҆ слѣ́дꙋ стопы̀ твоеѧ̀ покланѧ́ющесѧ, и҆ застꙋплє́нїѧ твоѧ̑ мнѡ́гаѧ помина́юще, досто́йныхъ слове́съ ѡ҆ прославле́нїи тебє̀ не ѡ҆брѣта́емъ: но бл҃гоговѣ̑йныѧ сле́зы тебѣ̀ въ молча́нїи приносѧ́ще, а҆́ки на нб҃сѝ себѐ мни́мъ твое́й сла́вѣ предстоѧ́щыѧ: сп҃сѝ тебѐ велича́ющыѧ.
Два́жды.
На горѣ̀ ѳавѡ́рстѣй пе́тръ со дрꙋ́ги гдⷭ҇не преѻбраже́нїе ви́дѣвъ, и҆ лѣ́потою сла́вы є҆гѡ̀ ᲂу҆слажда́ѧсѧ, та́кѡ вопїѧ́ше є҆мꙋ̀: гдⷭ҇и, добро̀ є҆́сть на́мъ здѣ̀ бы́ти. сицевы́й же глаго́лъ рце́мъ, бра́тїе, на го́рꙋ ꙗ҆вле́нїѧ мт҃ре бж҃їѧ собра́вшесѧ, и҆ преѻбраже́нїе сла́вы є҆ѧ̀ здѣ̀ бы́вшее помышлѧ́юще, и҆ во ᲂу҆миле́нїи вопїю́ще къ не́й: сп҃сѝ тебѐ велича́ющыѧ.
На скалѣ̀ пꙋсты́ннѣй пе́рвѣе ꙗ҆ви́ласѧ є҆сѝ, влⷣчце, свѣ́томъ ѻ҆гнѧ̀ просвѣще́нїе вѣ́рныхъ здѣ̀ проѻбразꙋ́ющи и҆ кꙋпинꙋ̀ неѡпали́мꙋю на па́мѧть лю́демъ приводѧ́щи: пото́мже съ нб҃съ видѣ́нїе твоегѡ̀ застꙋпле́нїѧ и҆́нокѡмъ поча̑евскимъ ꙗ҆ви́ла є҆сѝ, ꙗ҆́кѡ покро́въ тво́й, а҆ндре́емъ дре́вле ви́дѣнный. на́съ же молѧ́щихсѧ свѣ́томъ ѡ҆зарѝ дх҃о́внымъ, и҆ сп҃сѝ тебѐ велича́ющыѧ.
Сла́ва, и҆ ны́нѣ, гла́съ то́йже:
Непроходи̑маѧ врата̀, та́йнѡ запеча́тствѡваннаѧ, бл҃гослове́ннаѧ бцⷣе дв҃о, прїимѝ молє́нїѧ на̑ша, и҆ принесѝ твоемꙋ̀ сн҃ꙋ и҆ бг҃ꙋ, да сп҃се́тъ тобо́ю дꙋ́шы на́шѧ.
Вхо́дъ съ кади́ломъ. Прокі́менъ днѐ. Та́же чтє́нїѧ пра́здника трѝ.
Бытїѧ̀ чте́нїе. (Глава̀ к҃и.)
И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. и҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. и҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆тца̀ твоегѡ̀ и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀ и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на зємна́ѧ, и҆ ѡ҆ сѣ́мени твое́мъ. и҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. и҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. и҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
И҆схо́да чте́нїе. (Глава̀ г҃.)
Вни́де мѡѷсе́й въ го́рꙋ бж҃їю хѡри́въ. ꙗ҆ви́ же сѧ є҆мꙋ̀ а҆́гг҃лъ гдⷭ҇ень въ пла́мени ѻ҆́гненнѣ и҆з̾ кꙋпины̀: и҆ ви́дѣ, ꙗ҆́кѡ кꙋпина̀ горѧ́ше ѻ҆гне́мъ, и҆ кꙋпина̀ не сгара́ше. рече́ же мѡѷсе́й: преше́дъ ᲂу҆зрю̀ видѣ́нїе вели́кое сїѐ, что̀ ꙗ҆́кѡ не сгара́етъ кꙋпина̀; ꙗ҆́коже ви́дѣ гдⷭ҇ь, ꙗ҆́кѡ пристꙋпа́етъ ви́дѣти, призва̀ є҆го̀ гдⷭ҇ь и҆з̾ кꙋпины̀, глаго́лѧ: мѡѷсе́е, мѡѷсе́е. ѻ҆́нъ же речѐ: что̀ є҆́сть; и҆ речѐ: не прибли́жисѧ сѣ́мѡ: и҆ззꙋ́й сапо́гъ ѿ ногꙋ̀ твое́ю: мѣ́сто бо, на не́мже ты̀ стои́ши, землѧ̀ свѧ́та є҆́сть. и҆ речѐ є҆мꙋ̀: а҆́зъ є҆́смь бг҃ъ ѻ҆тца̀ твоегѡ̀, бг҃ъ а҆враа́мовъ, и҆ бг҃ъ і҆саа́ковъ, и҆ бг҃ъ і҆а́кѡвль. ѿврати́ же мѡѷсе́й лицѐ своѐ: стыдѧ́ше бо сѧ зрѣ́ти пред̾ бг҃омъ. рече́ же гдⷭ҇ь къ мѡѷсе́ю: ви́дѧ ви́дѣхъ ѡ҆ѕлобле́нїе люде́й мои́хъ, и҆́же во є҆гѵ́птѣ, и҆ во́пль и҆́хъ ᲂу҆слы́шахъ ѿ наси́льствꙋющихъ въ дѣ́лѣхъ: вѣ́мъ бо болѣ́знь и҆́хъ, и҆ снидо́хъ є҆́же и҆з̾ѧ́ти и҆̀хъ ѿ рꙋкѝ є҆гѵ́птѧнъ, и҆ и҆звестѝ и҆̀хъ ѿ землѝ ѻ҆́ныѧ, и҆ ввестѝ и҆̀хъ въ зе́млю бла́гꙋ и҆ мно́гꙋ, въ зе́млю точа́щꙋ ме́дъ и҆ млеко̀.
Проро́чества і҆езекі́илева чте́нїе. (Главы̑ м҃г и҆ м҃д).
Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее сотворѧ́тъ і҆ерє́и не ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ́ вы, глаго́летъ а҆дѡнаі̀ гдⷭ҇ь. и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. и҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. и҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
На лїті́и стїхи̑ры, гла́съ ѕ҃:
Стрꙋи̑ и҆сцѣле́нїй всегда̀ и҆сточа́еши, дв҃о, вѣ̑рнымъ, притека́ющымъ къ цѣльбоно́снѣй стопѣ̀ твое́й, бг҃оневѣ́сто. тꙋ́не бо и҆злива́еши ѿ неѧ̀ ѻ҆би́льнѡ и҆ бога́тнѡ недꙋ́гꙋющымъ и҆сцѣлє́нїѧ: слѣпы̑ѧ ꙗ҆влѧ́еши ви́дѧщѧ ꙗ҆́снѡ, притека́ющыѧ къ тебѣ̀ хрѡмы́ѧ мнѡ́гїѧ и҆спра́вила є҆сѝ, и҆ разсла́блєнныѧ стѧгнꙋ́ла є҆сѝ, подаю́щи всѣ̑мъ ꙗ҆̀же ко сп҃се́нїю прошє́нїѧ, и҆ дꙋша́мъ на́шымъ ве́лїю млⷭ҇ть.
Прїиди́те, празднолю́бцы, чꙋ́дное ꙗ҆вле́нїе і҆кѡ́ны бж҃їѧ мт҃ре, є҆́же на горѣ̀ поча́евстѣй, просла́вимъ: пресла́внѡ бо и҆ бг҃олѣ́пнѡ во ѻ҆би́тели поча́евстѣй возсїѧ̀, неистощи́мꙋю чꙋде́съ бл҃года́ть всѣ̑мъ и҆злива́ющи. тѣ́мъ ᲂу҆сты̀ и҆ сердцы̀, и҆ пѣ́сньми, и҆ пѣ́нїи дх҃о́вными, се́й ст҃ы́й де́нь со всѣ́ми, на го́рꙋ поча́евскꙋю притека́ющими, пра́зднꙋемъ свѣ́тлѡ.
Сла́ва, и҆ ны́нѣ, гла́съ то́йже:
Воспо́йте, рѡссі́йстїи наро́ди, цр҃и́цѣ бж҃їей мт҃ри пѣ́снь но́вꙋ, содѣ́ѧвшей чꙋ́до, новѣ́йшее всѣ́хъ дре́внихъ чꙋде́съ, на горѣ̀ поча́евстѣй: си̑льныѧ бо сокрꙋшѝ, стрѣ́лы а҆га̑рѧнскїѧ, на ню̀ ѿ тата́ръ направлѧ́ємыѧ, на главꙋ̀ и҆́хъ вспѧ́ть ѡ҆браща́ющи: немѡщны́ѧ же препоѧ́са си́лою свы́ше, и҆ вознесѐ смирє́нныѧ. то́й побѣди́тєльнаѧ возсыла́емъ и҆ припа́дающе вопїе́мъ: застꙋ́пнице на́ша ᲂу҆се́рднаѧ, мт҃и гдⷭ҇а вы́шнѧгѡ, сла́ва тебѣ̀.
На стїхо́внѣ стїхи̑ры, гла́съ г҃:
Кто̀ возглаго́летъ си̑лы твоѧ̑, бцⷣе, цѣльбоно́сный поча́евскїй и҆сто́чниче; неистощи́мыми бо дарова̑нїи и҆з̾ѻби́лꙋющи, мнѡ́гаѧ и҆ па́че є҆стества̀ содѣва́еши и҆сцѣлє́нїѧ, не то́кмѡ тѣлє́сныѧ бѡлѣ́зни врачꙋ́ющи, но и҆ дꙋшє́вныѧ стра̑сти на́шѧ и҆змыва́ющи, и҆ всѣ̑мъ подае́ши ве́лїю млⷭ҇ть.
Сті́хъ: Слы́ши, дщѝ, и҆ ви́ждь и҆ приклонѝ ᲂу҆́хо твоѐ.
Твои́ми чꙋдесы̀, бцⷣе, невѣ́рнїи ᲂу҆мили́вшесѧ, правосла́внꙋю вѣ́рꙋ и҆сповѣ́дахꙋ, и҆ є҆ретїцы̀ ѿ є҆́реси ѿреко́шасѧ и҆ ко ста́дꙋ цр҃ко́вномꙋ сопричто́шасѧ, бѣсні́и ѿ мꙋчи́тельства де́монѡвъ свобожда́хꙋсѧ, и҆ жестѡ́каѧ сердца̀ смири́шасѧ. ᲂу҆̀бо и҆ дꙋ́шы на́шѧ покаѧ́нїемъ просвѣтѝ, подаю́щи на́мъ ве́лїю млⷭ҇ть.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
По и҆збавле́нїи ѿ невѣ́рныхъ твоеѧ̀ ла́ѵры, влⷣчце, і҆кѡ́нꙋ твою̀ правосла́внїи лю́дїе ра́достнѡ прїѧ́ша, ꙗ҆́коже дре́вле животворѧ́щїй крⷭ҇тъ сн҃а твоегѡ̀ ѿ плѣне́нїѧ пе́рсскагѡ: тѣ́мже и҆сцѣлє́нїѧ ѿ неѧ̀ быва́ємаѧ та́кожде ᲂу҆мно́жишасѧ, и҆́хже не лишѝ и҆ на́съ молѧ́щихъ ти сѧ, подаю́щи дꙋша́мъ на́шымъ ми́ръ и҆ ве́лїю млⷭ҇ть.
Сла́ва, и҆ ны́нѣ, гла́съ и҃:
Сѣдѧ́й на херꙋві́мѣхъ и҆ пѣва́емый ѿ серафі̑мъ, и҆з̾ ᲂу҆тро́бы дв҃ы бл҃говолѝ роди́тисѧ, и҆ сїю̀, ꙗ҆́кѡ мт҃рь бж҃їю, въ мл҃твꙋ призыва́ти на́съ наꙋчѝ, пе́рвѣе въ ка́нѣ галїле́йстѣй, тоѧ̀ молє́нїѧ ѡ҆ лю́дехъ прїе́мый, и҆ доны́нѣ мл҃твъ є҆ѧ̀ ра́ди прошє́нїѧ на̑ша и҆сполнѧ́ѧй. прїиди́те ᲂу҆̀бо, хрⷭ҇тоимени́тїи лю́дїе, на мѣ́сто чꙋде́съ прест҃ы́ѧ бцⷣы, и҆ молє́нїѧ ва̑ша пред̾ і҆кѡ́ною є҆ѧ̀ и҆злива́юще, несомнѣ́нною вѣ́рою ᲂу҆тверди́тесѧ, є҆́же прїѧ́ти на́мъ ѿ неѧ̀ ве́лїю млⷭ҇ть.
На бл҃гослове́нїи хлѣ́бѡвъ тропа́рь: Пред̾ ст҃о́ю твое́ю і҆кѡ́ною, влⷣчце: три́жды. Пи́санъ на ма́лѣй вече́рни.
На ᲂу҆́трени, на Бг҃ъ гдⷭ҇ь, тропа́рь пра́здника, три́жды.
По а҃-мъ стїхосло́вїи сѣда́ленъ, гла́съ д҃:
Бцⷣа хрⷭ҇тїа́нѡмъ всегда̀ бы́сть млⷭ҇тиваѧ ᲂу҆слы́шательница, ѿ конє́цъ землѝ къ не́й возносѧ́щымъ мл҃твєнныѧ гла́сы, поча́евскꙋю же го́рꙋ ꙗ҆́кѡ мѣ́сто ꙗ҆вле́нїй свои́хъ и҆збра̀, и҆ сегѡ̀ ра́ди здѣ̀ бы́ти поспѣша́ютъ хрⷭ҇тїа́не: и҆́хже молє́нїѧ не ѿвратѝ, влⷣчце, но и҆ првⷣнымъ и҆ грѣ̑шнымъ бꙋ́ди хода́таица.
Сла́ва, и҆ ны́нѣ, то́йже.
По в҃-мъ стїхосло́вїи сѣда́ленъ, гла́съ з҃:
Ѿве́рзи врата̀ твоѧ̑, ст҃а́ѧ ла́ѵро поча́евскаѧ, и҆ прїимѝ приходѧ́щыѧ безчи́слєнныѧ наро́ды, ст҃ꙋ́ю і҆кѡ́нꙋ влⷣчцы ѡ҆блобыза́ти ᲂу҆миле́ннѡ тща́щыѧсѧ, и҆ вкꙋ́пѣ со бра́тїею мона́шествꙋющихъ ᲂу҆сє́рднаѧ молє́нїѧ возносѧ́щыѧ ко хрⷭ҇тꙋ̀ бг҃ꙋ, да мл҃твами приснодв҃ы, мт҃ре своеѧ̀, млⷭ҇тивъ бꙋ́детъ рабѡ́мъ свои̑мъ.
Сла́ва, и҆ ны́нѣ, то́йже. Велича́нїе:
Велича́емъ тѧ̀, прест҃а́ѧ дв҃о, и҆ почита́емъ честнꙋ́ю і҆кѡ́нꙋ твою̀, ю҆́же ѿ лѣ́тъ дре́внихъ на горѣ̀ поча́евстѣй просла́вила є҆сѝ.
Ѱало́мъ и҆збра́нный: Помѧнѝ, гдⷭ҇и, дв҃да и҆ всю̀ кро́тость є҆гѡ̀:
По полѷеле́и сѣда́ленъ, гла́съ ѕ҃:
Дне́сь ѡ҆ всѣ́хъ чꙋдесѣ́хъ твои́хъ, влⷣчце, на горѣ̀ поча́евстѣй бы́вшихъ, благодарє́нїѧ тѝ цр҃ковь прино́ситъ. тѣ́мже соше́дшыѧсѧ лю́ди твоѧ̑ ѿ нб҃съ бл҃гословѝ, ра́зꙋмъ на́шъ ᲂу҆цѣломꙋ́дри, и҆ житїѐ на́ше и҆спра́вити помозѝ, и҆ ѡ҆ сп҃се́нїи дꙋ́шъ на́шихъ моле́нїе къ бг҃ꙋ вознесѝ, мо́лимъ ти сѧ.
Сла́ва, и҆ ны́нѣ, то́йже. Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ: Всѧ́кое дыха́нїе да хва́литъ гдⷭ҇а. Є҆ѵⷢ҇лїе ѿ лꙋкѝ, зача́ло д҃.
По н҃-мъ ѱалмѣ̀ стїхи́ра, гла́съ є҃:
Прїиди́те, рѡссі́йстїи собо́ри, и҆ ѿ всѣ́хъ ꙗ҆зы̑къ вѣ́рнїи собери́тесѧ, на го́рꙋ поча́евскꙋю взы́демъ и҆ въ до́мъ мт҃ре бж҃їѧ, и҆ ᲂу҆́зримъ мѣ́сто стопы̀ є҆ѧ̀, и҆дѣ́же во ѻ҆́гненнѣмъ столпѣ̀ дре́вле ꙗ҆ви́сѧ, и҆ ѿ и҆сто́чника, ѿтꙋ́дꙋ и҆сте́кшагѡ, вѣ́рою ѡ҆кропле́нїе прїи́мемъ, и҆ чꙋдотво́рнѣй і҆кѡ́нѣ є҆ѧ̀ поклони́мсѧ, проще́нїѧ прегрѣше́нїй на́шихъ просѧ́ще и҆ дꙋша́мъ на́шымъ ве́лїѧ млⷭ҇ти.
Канѡ́нъ, (є҆гѡ́же краегране́сїе: Богоро́дице поча́евскаѧ, спасѝ и҆ сохранѝ правосла́внꙋю рꙋ́сь.) Гла́съ и҃.
Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Бж҃їю мт҃рь воспои́мъ, вѣ́рнїи, молє́нїѧ къ не́й приносѧ́ще и҆ чꙋдотво́рномꙋ є҆ѧ̀ ѻ҆́бразꙋ покланѧ́ющесѧ вѣ́рою и҆ любо́вїю.
Ѽ влⷣчце, ᲂу҆бо́гїѧ хвалы̀ на́шеѧ не ѿве́ржи и҆ грѣхо́вныѧ нищеты̀ не возгнꙋша́йсѧ, но припа́дающыѧ лю́ди прїимѝ, ꙗ҆́кѡ бл҃га́ѧ, бл҃га́гѡ же роди́тельница.
Гора̀ поча́евскаѧ, пре́жде те́мнаѧ и҆ безвѣ́стнаѧ, ꙗ҆вле́нїемъ твои́мъ, влⷣчце, сїна́ю ᲂу҆подо́бисѧ: та́мѡ бо ѻ҆́гнь, кꙋпинꙋ̀ не палѧ́й, тебѐ проѻбразова́ше, здѣ́ же сама̀, во ѻ҆гнѝ зри́маѧ, хрⷭ҇тїа́нѡмъ ꙗ҆ви́ласѧ є҆сѝ.
Ѻ҆́чи ва́ши бл҃же́ни, ѽ па́стырїе ѻ҆́вчи, влⷣчцꙋ на горѣ̀ поча́евстѣй ᲂу҆зрѣ́вши и҆ тѣ́мъ ча́сти виѳлее́мскихъ па́стырей сподо́бльшїисѧ: тѣ́мже ᲂу҆̀бо бл҃же́ни сꙋ́ть хрⷭ҇тїа́не сегѡ̀ не ви́дѣвшїи, но вѣ́рою мѣ́стꙋ томꙋ̀ покланѧ́ющїисѧ.
Ро́ди рѡссі́йстїи и҆ ѿ всѧ́кагѡ ꙗ҆зы́ка вѣ́рнїи, соше́дшесѧ къ мѣ́стꙋ ꙗ҆вле́нїѧ влⷣчцы чꙋдотво́рномꙋ є҆ѧ̀ ѻ҆́бразꙋ поклони́мсѧ, и҆ ѡ҆ свои́хъ согрѣше́нїихъ воспла́чемъ, ѡ҆ милосе́рдїи же гдⷭ҇ни возра́дꙋемсѧ.
Ѻ҆́гненный сто́лпъ, влⷣчце, тебѐ и҆́нокѡмъ и҆ па́стырємъ ꙗ҆влѧ́ше: на́мъ же ѻ҆́гнь ре́вности вложѝ въ дꙋ́шꙋ, є҆́же вѣ́рꙋ и҆́стиннꙋю храни́ти, ѿ всѧ́кагѡ же глаго́ла є҆реті́ческагѡ ѿвраща́тисѧ, и҆ грѣхо́внꙋю ѿрѣва́ти пре́лесть ѿ серде́цъ на́шихъ.
Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Да́ръ сщ҃е́нный, страннопрїи́мства мздꙋ̀, прїѧ́тъ хрⷭ҇толюби́ваѧ а҆́нна і҆кѡ́нꙋ твою̀, влⷣчце, рꙋко́ю ст҃и́телѧ, ѿ неѧ́же и҆сцѣле́нїе бра́тꙋ своемꙋ̀ слѣ́пꙋ рожде́нꙋ ви́дѣвши, сїю̀ во ѻ҆би́тель поча́евскꙋю на ѻ҆́бщꙋю по́льзꙋ да́рствꙋетъ.
І҆кѡ́нꙋ поча́евскꙋю пречⷭ҇тыѧ бцⷣы лобыза́имъ, вѣ́рнїи, и҆ покаѧ́нїе ѡ҆ грѣсѣ́хъ на́шихъ прине́сше, здра́вїѧ и҆ ѿ нꙋ́ждъ и҆збавле́нїѧ и҆ во всѣ́хъ бл҃ги́хъ начина́нїѧхъ по́мощи ѿ влⷣчцы воспро́симъ.
Цвѣ́тъ прекра́сный на дре́вѣ бл҃госѣнноли́ственнѣмъ ꙗ҆ви́сѧ чꙋдотво́рнаѧ і҆кѡ́на бцⷣы на ст҃ѣ́й горѣ̀ поча́евстѣй: проси́те, вѣ́рнїи, и҆ да́стсѧ ва́мъ, по глаго́лꙋ хрⷭ҇то́вꙋ, милосе́рдїѧ да́ръ, житїю̀ ва́шемꙋ потре́бный.
Є҆́же вре́менномꙋ житїю̀ потре́бно быва́етъ, ѽ бра́тїе, вма́лѣ поле́зно є҆́сть: и҆ сїѧ̑ да́рствꙋетъ на́мъ гдⷭ҇ь, по мл҃твѣ мт҃ре своеѧ̀. ѻ҆ба́че терпѧ́щыѧ па́че си́хъ бл҃жи́тъ и҆ вѣ́чною ра́достїю на нб҃сѝ награжда́етъ: ю҆́же на́мъ дарова́ти, влⷣчце, помоли́сѧ.
Поча́евскаѧ це́рковь, чꙋдотво́рный слѣ́дъ стопы̀ твоеѧ̀, бцⷣе, покрыва́ющаѧ и҆ і҆кѡ́нꙋ твою̀ хранѧ́щаѧ, а҆́ки нбⷭ҇ный вхо́дъ вѣ̑рнымъ ꙗ҆влѧ́етсѧ, въ не́йже молѧ́щымсѧ помозѝ, ѽ влⷣчце, зємна́ѧ попечє́нїѧ ѿложи́ти, и҆ є҆ди́нагѡ, є҆́же на потре́бꙋ, жела́ти, и҆ въ мл҃твѣ те́плѣ проси́ти.
Ѽле безꙋ́мїѧ і҆кѡнобо́рцєвъ, и҆̀же і҆кѡ́нꙋ твою̀, влⷣчце, ѿ поча́евскїѧ ѻ҆би́тели плѣни́ша, и҆ порꙋга́нїю предаю́ще, ка́рꙋ бж҃їю а҆́бїе на сѧ̀ наведо́ша, бѣснова́нїемъ же ѡ҆бличе́нѣ бы́вшей женѣ̀, ᲂу҆́жасомъ мно́гимъ содержа́хꙋсѧ.
Сѣда́ленъ, гла́съ ѕ҃:
Рѣка̀ ѡ҆би́льнѡ текꙋ́щаѧ поко́ю не навы́че, нижѐ преста́ти ѿ тече́нїѧ водна́гѡ возмо́жетъ: та́кѡ и҆ молє́нїѧ твоѧ̑ влⷣчце, ѡ҆ лю́дехъ при́снѡ возноси̑маѧ, не престаю́тъ, но првⷣныѧ ѿ паде́нїй хранѧ́тъ, па́дшыѧ же на покаѧ́нїе возставлѧ́ютъ: на́мъ же, твоемꙋ̀ ѻ҆́бразꙋ покланѧ́ющымсѧ, сꙋгꙋ́бꙋю ᲂу҆миле́нїѧ бл҃года́ть да́рꙋютъ, и҆ вопи́ти тебѣ̀ со а҆рха́гг҃ломъ и҆ є҆лїсаве́тою воздвиза́ютъ: бл҃гослове́на ты̀ є҆сѝ въ жена́хъ, и҆ твоегѡ̀ чре́ва пло́дъ бл҃гослове́нъ є҆́сть.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Часꙋ̀ и҆ днѝ прише́дшꙋ возвраще́нїѧ і҆кѡ́ны твоеѧ̀ во ѻ҆би́тель поча́евскꙋю ѿ і҆кѡнобо́рцєвъ, сїю̀ плѣни́вшихъ, возра́довалсѧ прпⷣбный і҆́ѡвъ со бра́тїею, тꙋ́ю лобыза́юще: ны́нѣ же на всѧ́къ де́нь и҆ ча́съ приходѧ́щїи во ѻ҆би́тель твою̀ хрⷭ҇тїа́не тꙋ́юже ра́дость и҆ вѣ́рꙋ пред̾ не́ю свидѣ́тельствꙋютъ.
А҆́зъ грѣ́шный лѣ́ностїю порабоще́нъ, ѽ влⷣчце, бл҃га́го бг҃а при́снѡ грѣхи̑ свои́ми прогнѣвлѧ́ю, нижѐ ѻ҆́чи своѝ возвестѝ къ немꙋ̀ не дерза́ю, но ко твоемꙋ̀ припа́даю чꙋдотво́рномꙋ ѻ҆́бразꙋ, пред̾ ни́мже ка́ющїисѧ проще́нїе ѿ тебє̀ прїѧ́ша, и҆ вопїю̀: гдⷭ҇а, сн҃а твоего̀, ᲂу҆ми́лостиви и҆ мнѣ̀ предста́тельствомъ твои́мъ.
Є҆да̀ ѡ҆брѧ́щетсѧ толи́кѡ ѡ҆камене́нный се́рдцемъ и҆ безꙋ́менъ мꙋ́жъ, и҆́же не ᲂу҆мили́тсѧ въ це́ркви поча́евстѣй предстоѧ́й и҆ ст҃ы́нѧмъ твои̑мъ, влⷣчце, покланѧ́ѧйсѧ, чꙋдеса́ же ѿ ни́хъ бы́вшаѧ помышлѧ́ѧй, и҆ вѣ́рою молѧ́щыѧсѧ ви́дѧй наро́ды;
Ви́дѣни бы́ша мно́зи и҆сцѣле́ннїи пред̾ і҆кѡ́ною твое́ю, влⷣчце, слѣпі́и и҆ хро́мїи, слы́шани бы́ша глꙋсі́и и҆ нѣмі́и возглаго́лавшїи: та́мѡ бѣсні́и, воды̀ ѿ стопы̀ твоеѧ̀ пїю́ще, ѿ бѣсѡ́въ свобожда́хꙋсѧ: тѣ́мже и҆ мою̀ прїимѝ мл҃твꙋ, є҆́же ѿ бѣсо́вскихъ страсте́й свободи́тисѧ и҆ свѣ́тъ сп҃се́нїѧ хрⷭ҇то́ва вы́нꙋ созерца́ти.
Сы́й во ᲂу҆зи́лищи землѝ тꙋ́рскїѧ плѣне́нъ, и҆́нокъ твое́ю си́лою, влⷣчце, на воздꙋ́сѣ въ го́рꙋ поча́евскꙋю принесе́сѧ: ᲂу҆̀бо и҆ менѐ, во ᲂу҆́захъ страсте́й сꙋ́ща, ны́нѣ, въ де́нь сла́вы твоеѧ̀, ѿ тѣ́хъ свободѝ, и҆ ли́кꙋ вѣ́рою и҆ любо́вїю пою́щихъ тѧ̀ сопричтѝ.
Ко твоемꙋ̀ чꙋдотво́рномꙋ ѻ҆́бразꙋ прите́къ, влⷣчце, и҆ водо́ю ѿ слѣ́да стопы̀ твоеѧ̀ ѡ҆мы́всѧ, слѧче́нный недꙋ́гомъ ю҆́ноша а҆́бїе и҆сцѣлѣ̀, слѣпа́ѧ же ѻ҆трокови́ца, здѣ̀ принесе́ннаѧ, прозрѣ̀, и҆ пред̾ꙋме́рый младе́нецъ воскре́се: ᲂу҆̀бо и҆ менѐ припа́дающа ѿ смертоно́снагѡ ᲂу҆ны́нїѧ воздви́гни, и҆ дꙋшє́вныѧ моѝ ѿве́рзи ѻ҆́чи.
Пѣ́снь є҃. І҆рмо́съ:
Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ. ра́звѣ тебє̀ и҆но́гѡ не вѣ́мы.
А҆́ще и҆ всѣ́хъ грѣшнѣ́йшїй є҆́смь ѿ те́мъ люде́й, ко твое́й, влⷣчце, і҆кѡ́нѣ припа́дающихъ, а҆́ще и҆ всѝ вѣ́рою свое́ю мѧ̀ превзыдо́ша, ѻ҆ба́че и҆ менѐ ѡ҆каѧ́ннагѡ не ѿри́ни ѿ твоегѡ̀ застꙋпле́нїѧ, млⷭ҇тей бе́зднꙋ лю́демъ во ѻ҆би́тели твое́й ꙗ҆ви́вшаѧ.
Ꙗ҆́коже ко всѣ̑мъ призыва́ющымъ тѧ̀ млⷭ҇тива ꙗ҆влѧ́ешисѧ, и҆здале́ча і҆кѡ́нѣ твое́й мы́сленнѡ покланѧ́ющыѧсѧ слы́шиши, и҆ та́кѡ ѻ҆́трочища нѣ́коего, по мл҃твѣ праба́бы є҆гѡ̀, воскреси́ла є҆сѝ: и҆ ны́нѣ, ѽ влⷣчце, ко всѣ̑мъ ѿ конє́цъ землѝ тебѣ̀ молѧ́щымсѧ бл҃гоꙋвѣ́тлива бꙋ́ди.
Сѐ, влⷣчце, люде́й мнѡ́гаѧ мнѡ́жества, на ст҃ꙋ́ю го́рꙋ твою̀ притека́юще, млⷭ҇ти твоеѧ̀ полꙋчи́ти и҆́щꙋтъ, вѣ́рнїи вкꙋ́пѣ съ маловѣ́рными, првⷣнїи и҆ грѣ́шнїи, съ ни́миже и҆ цр҃кви ст҃ѣ́й чꙋжді́и примета́ютсѧ: всѣ́хъ ᲂу҆̀бо поми́лꙋй, всѣ̑мъ свѣ́тъ и҆́стинныѧ вѣ́ры ꙗ҆вѝ во сп҃се́нїе.
Почто̀ а҆́зъ грѣ́шный, пречⷭ҇тѣй бг҃ома́тери покланѧ́ѧсѧ и҆ и҆спра́вити житїѐ своѐ ѡ҆бѣщава́ѧ, па́ки на прє́жнѧѧ прегрѣшє́нїѧ ѡ҆браща́юсѧ; ᲂу҆вы̀ мнѣ̀! є҆да̀ ѕлѣ́йшїй є҆́смь невѣ́рныхъ а҆га́рѧнъ, ю҆́же, на горѣ̀ поча́евстѣй покаѧ́нїе прине́сше, до́брїи хрⷭ҇тїа́не содѣ́ѧшасѧ;
А҆́ще и҆ лю́ти бы́ша а҆га́рѧне тꙋ́рстїи, ст҃ꙋ́ю ѻ҆би́тель твою̀, влⷣчце, ѡ҆сажда́юще, а҆́ще и҆ стрѣ́лы въ тѧ̀, на небесѝ ꙗ҆́вльшꙋюсѧ, пꙋща́ти дерзнꙋ́ша, но си̑мъ на главы̀ и҆́хъ возвраща́ющымсѧ, се́рдцемъ сокрꙋше́ннымъ пока́ѧшасѧ и҆ си́лꙋ твою̀ и҆сповѣ́даша.
Со і҆́ѡвомъ прпⷣбнымъ на небесѣ́хъ тебѐ зрѧ́ще, влⷣчце, а҆га́рѧнѡмъ смѧтє́ннымъ бѣжа́щымъ, и҆́ноцы поча́евстїи пѣ́снь воспѣ́ша тѝ досто́йнꙋю, со ᲂу҆го́дникомъ тебѐ бл҃годарѧ́ще те́плѣ.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многоми́лостиве хрⷭ҇тѐ бж҃е на́шъ.
И҆́же ѿ а҆га́рѧнъ тѧ̀, влⷣчце, на небесѣ́хъ ᲂу҆зрѣ́ша, дрꙋ́гъ дрꙋ́га вопроша́хꙋ, что̀ є҆́сть видѣ́нїе сїѐ ᲂу҆жа́сное; и҆ ѻ҆́ви смѧте́ни бы́вше, дрꙋ́гъ дрꙋ́га ᲂу҆бива́хꙋ, ѻ҆́ви же вѣ́рꙋ въ се́рдце своѐ прїе́мше, креще́нїѧ тре́бовахꙋ, по си́хъ же и҆́ноцы бы́ша чрез̾ всѐ житїѐ, си́лꙋ твою̀ воспѣва́юще.
И҆́ноки и҆ мїрскі̑ѧ лю́ди твоемꙋ̀ застꙋпле́нїю вѣ́рꙋющыѧ, влⷣчце, ѡ҆богатѝ дх҃о́вными дарова́ньми, маловѣ̑рныѧ же просвѣтѝ и҆ ѡ҆зарѝ, ꙗ҆́коже тогда̀ невѣ́дѣвшыѧ хрⷭ҇та̀ а҆га́рѧны въ позна́нїе є҆гѡ̀ привела̀ є҆сѝ.
Сохрани́ша па́мѧть твоегѡ̀ застꙋпле́нїѧ, влⷣчце, а҆га́рѧне, въ зе́млю тꙋ́рскꙋю возвра́щшесѧ, и҆ ча́дѡмъ свои̑мъ ѡ҆ ꙗ҆вле́нїи твое́мъ па́мѧть преда́ша: кольмѝ па́че на́мъ хрⷭ҇тїа́нѡмъ чꙋдеса̀ твоѧ̑, на горѣ̀ поча́евстѣй бы́вшаѧ, па́мѧтовати подоба́етъ;
Ѻ҆́бразꙋ твоемꙋ̀ мы́сленнѡ припа́даѧ, во глꙋбо́кїй кла́дѧзь впады́й мꙋ́жъ ѿ несꙋмнѣ́нныѧ сме́рти спасе́сѧ, и҆ невреди́мь и҆з̾ глꙋбины̀ под̾ѧ́тъ бы́въ, твоѐ проповѣ́даше милосе́рдїе.
Хотѣ́лъ бы́хъ и҆ а҆́зъ, влⷣчце, вѣ́рѣ сп҃се́нныхъ тобо́ю люде́й подража́ти, хотѣ́лъ бы́хъ и҆ а҆́зъ твоѐ застꙋпле́нїе въ житїѝ мое́мъ ᲂу҆лꙋчи́ти: но за мно́жество прегрѣше́нїй мои́хъ ѡ҆скꙋдѣва́етъ моѧ̀ вѣ́ра. сїю̀ ᲂу҆̀бо ᲂу҆крѣпѝ во мнѣ̀, влⷣчце, вопїю́щемъ: вѣ́рꙋю, помозѝ моемꙋ̀ невѣ́рїю.
Ро́въ прельще́нїй лати́нскихъ чрез̾ сто̀ и҆ де́сѧть лѣ́тъ поглотѝ ѻ҆би́тель поча́евскꙋю: но твои́мъ, бцⷣе, застꙋпле́нїемъ па́ки та́ѧ къ высотѣ̀ правосла́вїѧ и҆з̾е́млетсѧ и҆ ла́ѵра и҆менꙋ́етсѧ. сїю̀ ᲂу҆̀бо въ правосла́внѣй вѣ́рѣ непоколеби́мꙋ соблюдѝ да́же до часа̀ втора́гѡ прише́ствїѧ сн҃а твоегѡ̀ и҆ бг҃а.
Конда́къ, гла́съ а҃:
И҆сто́чникъ и҆сцѣле́нїй и҆ вѣ́ры правосла́вныѧ ᲂу҆твержде́нїе поча́евскаѧ твоѧ̀ і҆кѡ́на, бцⷣе, ꙗ҆ви́сѧ: тѣ́мже и҆ на́съ, къ не́й притека́ющихъ, ѿ бѣ́дъ и҆ и҆скꙋше́нїй свободѝ, ла́ѵрꙋ твою̀ неврѣди́мꙋ сохранѝ, правосла́вїе во ѡ҆́крестъ стоѧ́щихъ страна́хъ ᲂу҆твердѝ, и҆ грѣхѝ разрѣшѝ моли́твєнникъ твои́хъ: є҆ли̑ка бо хо́щеши, мо́жеши.
І҆́косъ:
Воста́ните ѿ грѡ́бъ ва́шихъ, и҆́ноцы поча́евстїи, и҆ рцы́те на́мъ: коли́кихъ чꙋде́съ прест҃ы́ѧ бцⷣы бы́сте зри́тєли и҆ свидѣ́тєли, ка́кѡ ме́ртвїи пред̾ тоѧ̀ і҆кѡ́ною воскреса́хꙋ, ка́кѡ де́мони ѿ мꙋ́чимыхъ люде́й ѿбѣга́хꙋ, ка́кѡ недꙋ́жнїи та́мѡ и҆сцѣлѧ́хꙋсѧ, ка́кѡ невѣ́рнїи вѣ́ровахꙋ, ка́кѡ хꙋли́тєли та́мѡ клѧ́хꙋсѧ; сїѧ̑ бо ди̑вна быва́хꙋ человѣ́кѡмъ и҆ а҆́гг҃лѡмъ. мы́ же всѧ̑ сїѧ̑ бы́вшаѧ и҆ додне́сь быва́ємаѧ воспомина́юще, со стра́хомъ и҆ ᲂу҆миле́нїемъ ко ст҃ѣ́й і҆кѡ́нѣ пречⷭ҇тыѧ бг҃ома́тере моли́твеннѡ припа́даемъ и҆ глаго́лемъ си́це: ѽ млⷭ҇тей бе́здно и҆ бл҃годѣ́ѧнїй сокро́вище, грѣхѝ разрѣшѝ моли́твєнникъ твои́хъ: є҆ли̑ка бо хо́щеши, мо́жеши.
Пѣ́снь з҃. І҆рмо́съ:
Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
А҆ка́ѳїстово пѣ́нїе возноша́хꙋ пред̾ і҆кѡ́ною твое́ю, пречⷭ҇таѧ, правосла́внїи лю́дїе, є҆гда̀ ѻ҆би́тель поча́евскаѧ повелѣ́нїемъ царе́вымъ цр҃кви возвраще́на бы́сть: тѣ́мъ ᲂу҆́бѡ ѡ҆ставле́нїе грѣхѡ́въ и҆спросѝ, на́мъ же молѧ́щымъ ти сѧ на врагѝ посо́бствꙋй.
Наро́да правосла́внагѡ дꙋ́шы ᲂу҆поко́ити моли́сѧ, влⷣчце, вкꙋ́пѣ же и҆ всѣ́хъ, ѡ҆ возвраще́нїи ла́ѵры твоеѧ̀ и҆з̾ є҆реті́ческагѡ плѣ́на потрꙋди́вшихсѧ, на́мъ же къ тебѣ̀ прибѣга́ющымъ пода́ждь є҆диномы́слїе и҆ ми́ръ.
И҆ ны́нѣ наро́дꙋ на́шемꙋ млⷭ҇тива бꙋ́ди, влⷣчце, и҆ ми́ръ пода́ждь, покарѧ́ющи противобо́рствꙋющыѧ врагѝ и҆ сꙋпоста́ты.
Пред̾ твое́ю і҆кѡ́ною, бцⷣе, правосла̑внымъ хрⷭ҇тїа́нѡмъ возвраще́нною, па́ки и҆сцѣлє́нїѧ прїима́ти вѣ́рни. навыко́ша: не ᲂу҆̀ и҆сте́кшꙋ бо є҆ди́номꙋ лѣ́тꙋ ѿ тогѡ̀ днѐ, ᲂу҆жѐ четы́рьми чꙋдесы̀ цр҃ковь хрⷭ҇то́вꙋ просла́вила є҆сѝ во ᲂу҆тѣше́нїе лю́демъ.
Раѧ̀ нбⷭ҇нагѡ сподо́би ны̀, влⷣчце, ст҃ꙋ́ю ла́ѵрꙋ твою̀ а҆́ки земны́й ра́й почита́ющыѧ и҆ твоѧ̑ млⷭ҇ти те́плою вѣ́рою воспѣва́ющыѧ.
А҆враа́мъ гдⷭ҇ень де́нь и҆здале́ча ви́дѣ и҆ ра́довасѧ, и҆ ча́ѧнїемъ тогѡ̀ днѐ живѧ́ше: ᲂу҆зрѣ́вши же и҆здале́ча твою̀ поча́евскꙋю це́рковь нѣ́каѧ хрома́ѧ жена̀, и҆ ᲂу҆пова́нїемъ твоеѧ̀ по́мощи и҆спо́лнившисѧ, а҆́бїе и҆сцѣлѣ̀, и҆ а҆́ки є҆ле́нь воспрѧ́нꙋвши, ко ѻ҆би́тели твое́й поспѣша́ше.
Пѣ́снь и҃. І҆рмо́съ:
Цр҃ѧ̀ нбⷭ҇нагѡ, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
Во гра́дъ кі́евъ ѿ предѣ̑лъ ᲂу҆ра́льскихъ прише́дшей женѣ̀ бѣ́снѣй ꙗ҆ви́сѧ бцⷣа съ прпⷣбнымъ і҆́ѡвомъ, и҆ на го́рꙋ поча́евскꙋю тꙋ́ю призыва́ше, и҆дѣ́же здра́вїе є҆́й пода́вши, сла́вити наꙋчѝ своѐ застꙋпле́нїе.
Ѡ҆мы́въ ѻ҆чеса̀ своѧ̑ въ кꙋпѣ́ли сїлѡа́мстѣй, прїе́млетъ слѣпорожде́нный зрѣ́нїе хрⷭ҇то́вымъ велѣ́нїемъ: ѡ҆мы́вшисѧ же ѿ воды̀ стопны́ѧ въ це́ркви поча́евстѣй, и҆сцѣлѣ̀ слѣпа́ѧ ѻ҆трокови́ца. ᲂу҆̀бо и҆ на́ше стра́стное ѡ҆слѣпле́нїе и҆сцѣлѝ, влⷣчце, водо́ю ѿ слѣ́да стопы̀ твоеѧ̀ съ вѣ́рою кропѧ́щихсѧ.
Сїю̀ ѻ҆трокови́цꙋ и҆сцѣле́нꙋ ᲂу҆зрѣ́вши, праба́ба є҆ѧ̀ а҆́бїе прельще́нїѧ ᲂу҆ні́тскагѡ ѿрица́етсѧ и҆ правосла́внꙋю и҆сповѣ́дꙋетъ вѣ́рꙋ: въ не́йже ᲂу҆твердѝ и҆ ны̀, рабы̀ твоѧ̑, ѽ влⷣчце.
Лю́дїе бж҃їи, на го́рꙋ твою̀, влⷣчце, притека́ющїи, ѻ҆бѣ́ты пѡ́двигъ бл҃гочести́выхъ та́мѡ прино́сѧтъ, ꙗ҆̀же дѣ́лы и҆спо́лнити помозѝ и҆̀мъ, бцⷣе.
А҆́гг҃ли на нб҃сѝ твою̀ сла́вꙋ непреста́ннѡ воспѣва́ютъ, бцⷣе, на земли́ же человѣ́цы ко твоемꙋ̀ застꙋпле́нїю притека́ти не престаю́тъ: и҆́хже воздыха̑нїѧ не ѿри́ни, ꙗ҆́кѡ бл҃га́ѧ, па́че же на мѣ́стѣ ꙗ҆вле́нїѧ твоегѡ̀ тѣ́хъ молє́нїѧ ᲂу҆слы́ши.
Ве́лїѧ твоегѡ̀ застꙋпле́нїѧ си́ла, ѽ влⷣчце: є҆гѡ́же ра́ди сн҃ъ тво́й и҆ бг҃ъ на́шъ грѣ̑шнымъ проще́нїе да́рꙋетъ, подвиза́ющымсѧ же крѣ́пость и҆ ᲂу҆ныва́ющымъ ᲂу҆тѣше́нїе.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
Не то́чїю є҆ди́нъ по є҆ди́номꙋ подвиза́ютсѧ хрⷭ҇тїа́не на го́рꙋ поча́евскꙋю, но и҆ ѿ сꙋгꙋ́бѡ сщ҃е́ннагѡ гра́да кі́ева совокꙋ́пльшесѧ вѣ́рнїи, по́мощь ѿ сеѧ̀ чꙋдотво́рныѧ і҆кѡ́ны въ годи́нꙋ бы́вшагѡ гꙋби́тельства и҆сповѣ́даша, и҆ подо́бїе є҆ѧ̀ написа́вше, во ст҃ꙋ́ю ла́ѵрꙋ сїѐ принесо́ша.
Оу҆̀бо и҆ во грѧдꙋ̑щаѧ лѣ̑та сп҃са́й на́съ, влⷣчце, ѿ гꙋби́тельства и҆ междоꙋсо́бныѧ бра́ни, ѿ гла́да же и҆ ѻ҆́гненнагѡ запале́нїѧ: занѐ ѡ҆скꙋдѣ́вшей крѣ́пости дꙋ́шъ на́шихъ, ᲂу҆ны́нїѧ и҆сполнѧ́емсѧ въ бѣда́хъ, неразꙋ́мливи сꙋ́ще.
Ю҆́жскїй предѣ́лъ землѝ рѡссі́йскїѧ поча́евскꙋю і҆кѡ́нꙋ влⷣчцы и҆ ст҃ꙋ́ю ла́ѵрꙋ є҆ѧ̀ ꙗ҆́кѡ дїади́мꙋ црⷭ҇твїѧ храни́тъ, и҆ си́ми хва́литсѧ: ѻ҆ба́че же и҆ сѣ́верскїй, во гра́дѣ тобо́льстѣмъ, чꙋдотво́рное подо́бїе тоѧ́жде поча́евскїѧ і҆кѡ́ны моли́твою и҆́нокѡвъ себѣ̀ и҆спросѝ.
Рꙋ́сскꙋю зе́млю, ѽ влⷣчце, ꙗ҆́кѡ безпредѣ́льное горы̀ твоеѧ̀ подно́жїе, ѿ бѣ́дъ и҆ и҆скꙋше́нїй свободѝ, и҆ во бл҃гоче́стїи тꙋ́ю сохранѝ до сконча́нїѧ вѣ́ка.
Оу҆жѐ несты́днѡ поднѧ́вшымсѧ хꙋ́льнымъ гласѡ́мъ посредѣ̀ хрⷭ҇тїа́нскагѡ жи́тельства, не ѡ҆ста́ви, бцⷣе, ра̑бъ твои́хъ въ тѣ́хъ прельщє́нїѧ впа́сти, но вѣ́рꙋ несꙋмнѣ́ннꙋ возгрѣва́й въ сердца́хъ на́шихъ вы́нꙋ.
Сѐ вре́мѧ застꙋпле́нїѧ прест҃ы́ѧ бцⷣы прїи́де, ᲂу҆мно́жившымсѧ собла́знѡмъ, сѐ вре́мѧ на́шихъ къ не́й воздыха́нїй, ѽ бра́тїе! рце́мъ ᲂу҆̀бо ѿ всегѡ̀ се́рдца на́шегѡ: влⷣчце, влⷣчце! помозѝ лю́демъ твои̑мъ.
Є҆ѯапостїла́рїй. Подо́бенъ: Черто́гъ тво́й ви́ждꙋ:
Видѣ́нїе ди́вное: во ѻ҆гнѝ прест҃а́ѧ дв҃а, чꙋдеса́ же неисчисли́маѧ ѿ і҆кѡ́ны поча́евскїѧ на́мъ и҆звѣсти́шасѧ: воспрѧ́немъ ᲂу҆̀бо, ѽ лю́дїе, ѿ грѣхо́внагѡ сна̀, и҆справле́нїѧ житїю̀ на́шемꙋ со слеза́ми да про́симъ, и҆ мт҃ри бж҃їей съ вѣ́рою дне́сь поклони́мсѧ.
На хвали́техъ стїхи̑ры на д҃, гла́съ д҃:
Воспои́мъ, лю́дїе, прест҃ꙋ́ю дв҃ꙋ чⷭ҇тꙋю, на горѣ̀ поча́евстѣй дре́вле па́стырємъ ꙗ҆́вльшꙋюсѧ, ны́нѣ же всю̀ странꙋ̀ на́шꙋ ѿтꙋ́дꙋ бл҃годѣ́ющꙋю: вѣ́сть бо влⷣчца прошє́нїѧ на́ша во бл҃го́е и҆сполнѧ́ти, и҆ сердца̀ на̑ша ᲂу҆миле́нїемъ растворѧ́ти, и҆ рабы̀ своѧ̑ ѿ бѣ́дъ и҆ ѕѡ́лъ сохранѧ́ти.
Два́жды.
Не возгнꙋша́йсѧ на́съ грѣ́шныхъ, милосе́рдаѧ мт҃и, маловѣ́рїѧ ра́ди на́шегѡ ѿ на́съ не ѿврати́сѧ: но па́че вѣ́рꙋ на́шꙋ бл҃года́тною по́мощїю твое́ю ᲂу҆мно́жи, и҆ же́ртвꙋ хвалы̀ приноси́ти тебѣ̀ рабы̑ твоѧ̑ наꙋчѝ.
Слѣпы̑ѧ и҆ хрѡмы́ѧ и҆ слѧчє́нныѧ, ко твое́й ст҃ѣ́й і҆кѡ́нѣ припа́дающыѧ, всемо́щнымъ дѣ́йствомъ твоегѡ̀ предста́тельства и҆сцѣли́ла є҆сѝ, бцⷣе: бѣ́сы, люде́й мꙋ́чащыѧ, ѿгна́ла є҆сѝ, правосла́внꙋю вѣ́рꙋ а҆га́рѧнѡмъ и҆ є҆ретїкѡ́мъ ѿкры́ла є҆сѝ. ᲂу҆̀бо и҆ на́шихъ моле́нїй не ѿри́ни, пренепоро́чнаѧ, но ꙗ҆̀же ко сп҃се́нїю прошє́нїѧ на̑ша и҆спо́лни.
Сла́ва, и҆ ны́нѣ, гла́съ и҃:
Ѡ҆ твои́хъ зна́менїихъ, бцⷣе влⷣчце, сла́витсѧ гора̀ поча́евскаѧ, и҆ всѧ́къ ꙗ҆зы́къ хрⷭ҇тїа́нскїй си́лꙋ твою̀ и҆сповѣ́дꙋетъ: и҆́хже ра́ди невѣ́рнїи правовѣ́рни содѣ́ѧшасѧ, грѣ́шнїи въ покаѧ́нїе прїидо́ша, лѣни́вїи къ дх҃о́вномꙋ дѣ́ланїю ᲂу҆стреми́шасѧ: и҆́мже и҆ на́съ подража́ти, бл҃га́ѧ, наꙋчѝ, тебѐ те́плѣ бл҃годари́ти ᲂу҆стро́й на́съ, и҆ воздви́гни вы́нꙋ воспѣва́ти сла́вꙋ сн҃а твоегѡ̀, є҆ди́нагѡ ѿ ст҃ы́ѧ трⷪ҇цы сла́вимагѡ бг҃а на́шегѡ.
Славосло́вїе вели́кое, є҆ктєнїѝ и҆ ѿпꙋ́стъ.
На лїтꙋргі́и: Бл҃жє́нна, пѣ́снь г҃-ѧ и҆ ѕ҃-ѧ, на и҃. По вхо́дѣ тропа́рь пра́здника. Сла́ва, и҆ ны́нѣ: конда́къ. Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: се́ бо ѿны́нѣ ᲂу҆блажа́тъ мѧ̀ всѝ ро́ди. А҆пⷭ҇лъ ко є҆вре́ємъ, зача́ло т҃к. А҆ллилꙋ́їа, гла́съ в҃: Воскреснѝ, гдⷭ҇и, въ поко́й тво́й, ты̀ и҆ кївѡ́тъ ст҃ы́ни твоеѧ̀. Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀. Є҆ѵⷢ҇лїе ѿ лꙋкѝ, зача́ло н҃д. Прича́стенъ: Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀.
Зрѝ: Слꙋ́жбꙋ сїю̀ пое́мъ і҆ꙋ́лїа въ к҃г-й де́нь, є҆гда̀ бы́сть видѣ́нїе мт҃ре бж҃їѧ над̾ це́рковїю поча́евскою и҆ а҆га́рѧнѡмъ пораже́нїе въ лѣ́то ҂ахѻ҃є. Быва́етъ же поклоне́нїе чꙋдотво́рномꙋ ѻ҆́бразꙋ поча́евскомꙋ въ пра́здникъ ржⷭ҇тва̀ прест҃ы́ѧ бцⷣы и҆ поклоне́нїе слѣ́дꙋ стопы̀ є҆ѧ̀ въ пѧто́къ свѣ́тлыѧ седми́цы. Ѻ҆ба́че въ сїѧ̑ дни̑ твори́мъ слꙋ́жбꙋ по мїне́и пра́здничнѣй и҆ по трїѡ́ди.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.