Седмица ваий (с понедельника по пяток)
<<тм҃в ѡ҆б.: 684>>
Въ понедѣ́льникъ ва́їй, на ᲂу҆́трени, тро́ичны.
По а҃-мъ стїхосло́вїи сѣда́льны ᲂу҆мили́тельны ѻ҆смогла́сника. По в҃-мъ же стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
Ка́мень ѿвали́лъ є҆сѝ ѡ҆жесточе́нїѧ гдⷭ҇и, ѿ моегѡ̀ се́рдца, ᲂу҆мерщвле́ннꙋю страстьмѝ воздви́гни дꙋ́шꙋ мою̀ бл҃гі́й, принестѝ тебѣ̀ ва̑їа добродѣ́телей: ꙗ҆́кѡ побѣди́телю а҆́да, во ᲂу҆миле́нїи влⷣко сподо́би, ꙗ҆́кѡ да вѣ́чный живо́тъ ᲂу҆лꙋчꙋ̀, пѣсносло́вѧ твою̀ держа́вꙋ, и҆ бл҃гоꙋтро́бїе твоѐ, є҆ди́не чл҃вѣколю́бче. [Два́жды.]
Бг҃оро́диченъ: Чꙋ́до чꙋде́съ бл҃года́тнаѧ, въ тебѣ̀ зрѧ́щи тва́рь ра́дꙋетсѧ: зачала́ бо є҆сѝ безсѣ́меннѡ, и҆ родила̀ є҆сѝ неизрече́ннѡ, є҆гѡ́же чинонача̑лїѧ а҆́гг҃лѡвъ ви́дѣти не мо́гꙋтъ: того̀ бцⷣе, молѝ ѡ҆ дꙋша́хъ на́шихъ.
По г҃-мъ стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
Шестꙋ́ю седми́цꙋ поста̀ и҆мꙋ́ще, предпра́зднственное пѣ́нїе, ва̑їа принесе́мъ хрⷭ҇тꙋ̀, грѧдꙋ́щемꙋ на́съ ра́ди всѣ́сти на жребѧ́ти ѻ҆́сли, ꙗ҆зы́ческое подклони́ти ꙗ҆́кѡ цр҃ь безслове́сїе роди́телю: вѣ̑тви добродѣ́телей томꙋ̀ всѝ ᲂу҆гото́вимъ, ꙗ҆́кѡ да воскрⷭ҇нїе є҆гѡ̀ ра́дꙋющесѧ ᲂу҆́зримъ.
Сла́ва, па́ки то́йже.
И҆ ны́нѣ, бг҃оро́диченъ: Рꙋ́цѣ твоѝ бж҃е́ственнїи, и҆́миже содѣ́телѧ носи́ла є҆сѝ дв҃о прест҃а́ѧ, воплоще́нна бж҃ество́мъ, просте́рши ᲂу҆молѝ и҆зба́витисѧ на́мъ ѿ и҆скꙋше́нїй, и҆ страсте́й, и҆ бѣ́дъ, восхвалѧ́ющымъ тѧ̀ любо́вїю, и҆ вопїю́щымъ тебѣ̀: сла́ва все́льшемꙋсѧ въ тѧ̀: сла́ва <<тм҃г: 685>> проше́дшемꙋ и҆з̾ тебѐ: сла́ва свободи́вшемꙋ на́съ ржⷭ҇тво́мъ твои́мъ.
Трипѣ́снецъ. Гла́съ а҃.
Пѣ́снь а҃.
І҆рмо́съ: Пѣ́снь побѣ́днꙋю:
Стра̑сти ᲂу҆мертви́мъ воздержа́нїемъ, и҆ дꙋ́хъ ѡ҆живи́мъ бж҃е́ственными дѣ́тельми, ꙗ҆́кѡ да ᲂу҆́зримъ стрⷭ҇ть хрⷭ҇то́вꙋ честнꙋ́ю чи́стымъ ᲂу҆мо́мъ.
Неми́лостивагѡ поревнова́вша бога́тагѡ нра́вѡмъ, ще́дре чл҃вѣколю́бче молю́ тѧ, сочини́ мѧ ла́зарю ᲂу҆бо́гомꙋ, и҆збавлѧ́ѧ мѧ̀ пла́мене, и҆ негаси́магѡ ѻ҆гнѧ̀.
Ѿ всѣ́хъ пости́хсѧ и҆справле́нїй, въ сы́тость наслади́хсѧ прегрѣше́нїй, гдⷭ҇и: ны́нѣ ᲂу҆́бѡ а҆́лчꙋща мѧ̀ сп҃си́тельнымъ и҆ честны́мъ насы́ти бра́шномъ.
Бг҃оро́диченъ: Менѐ ѡ҆сꙋжде́ннаго во ѡ҆сꙋжде́нїи, пречⷭ҇таѧ влⷣчце, пове́рженнаго дѣ́лы мои́ми, сп҃сѝ, ᲂу҆ще́дри, всеще́драго бг҃а ро́ждшаѧ.
И҆́ный, гла́съ а҃. І҆рмо́съ: Помо́гшемꙋ бг҃ꙋ:
Свѣтоно́сный пра́здникъ срѧ́щимъ вѣ́рнїи, предпра́зднствꙋюще є҆го̀ дне́сь свѣ́тлѡ, да живоно́снꙋю сподо́бимсѧ стрⷭ҇ть ви́дѣти.
Грѧде́тъ, и҆ и҆́детъ хрⷭ҇то́съ ко і҆ерⷭ҇ли́мꙋ ꙗ҆́кѡ цр҃ь, сѣдѧ̀ на жребѧ́ти ѻ҆́сли, ꙗ҆зы́ческое подклони́ти безслове́сїе под̾ ꙗ҆ре́мъ ѻ҆ц҃ꙋ̀.
Трⷪ҇ченъ: Въ бж҃ествѣ̀ є҆ди́номъ трїѷпоста́снаѧ є҆ди́нице, ѻ҆́ч҃е нерожде́нне бж҃е, и҆ сн҃е є҆диноро́дне, и҆ є҆ди́не ст҃ы́й дш҃е, є҆диноцрⷭ҇твеннаѧ держа́во, сп҃сѝ всѧ̑ ны̀.
Бг҃оро́диченъ: Пресла̑внаѧ возглаго́лашасѧ ѡ҆ тебѣ̀ всю́дꙋ, ꙗ҆́кѡ родила̀ є҆сѝ пло́тїю всѣ́хъ творца̀, бцⷣе мр҃і́е безневѣ́стнаѧ и҆ неискꙋсобра́чнаѧ. <<тм҃г ѡ҆б.: 686>>
Сла́ва тебѣ̀ бж҃е на́шъ, сла́ва тебѣ̀.
Сѐ грѧде́тъ хрⷭ҇то́съ ко гра́дꙋ виѳфагі́и, ра́дꙋйсѧ ла́зарево ѻ҆ч҃ество виѳа́нїе, ꙗ҆́кѡ тебѣ̀ пока́жетъ чꙋ́до ве́лїе, ла́зарѧ возставлѧ́ѧ и҆з̾ ме́ртвыхъ.
І҆рмо́съ: Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ, ꙗ҆́кѡ просла́висѧ.
Пѣ́снь и҃.
І҆рмо́съ: Є҆го́же ᲂу҆жаса́ютсѧ:
Непло́дными ѡ҆богати́хсѧ ѻ҆каѧ́нный помышле́ньми, дꙋ́шꙋ ѡ҆скверни́хъ беззако́нными сластьмѝ, и҆ тьма̀ ѡ҆крꙋжа́етъ мѧ̀ ѿча́ѧнїѧ: ѡ҆зарѝ мнѣ̀ сїѧ́нїе, бж҃е мо́й, покаѧ́нїѧ.
Ꙗ҆́коже дре́вле просвѣти́лъ є҆сѝ слѣпа́го ѿ рожде́нїѧ, дꙋ́шꙋ мою̀ ѡ҆зарѝ, не ви́дѧщꙋю свѣ́та твоегѡ̀ млⷭ҇тиве, но во тьмѣ̀ лю́тагѡ забве́нїѧ погре́бшꙋюсѧ, и҆ попече́нїй жите́йскихъ.
Пости́всѧ и҆лїа̀, ѿве́рзе нб҃са̀, и҆ тꙋ́чами напоѝ жа́ждꙋщꙋю зе́млю: пости́мсѧ, стрꙋи̑ почерпа́юще дꙋше́вныхъ сле́зъ, ꙗ҆́кѡ да поми́лꙋемсѧ.
Бг҃оро́диченъ: Ꙗ҆́кѡ ѡ҆дꙋшевле́ннаѧ лоза̀, процвѣла̀ є҆сѝ на́мъ гро́здъ зрѣ́лый, и҆сточа́ющїй на́мъ, чⷭ҇таѧ дв҃о, вїно̀ ѡ҆ставле́нїѧ, и҆ грѣхо́вное и҆зсꙋша́ющее пїѧ́нство.
И҆́ный. І҆рмо́съ: Пѣ́снь тебѣ̀ прино́симъ:
Ѿве́рзесѧ преддве́рїе ла́зарева животво́рїѧ: хрⷭ҇то́съ бо грѧде́тъ, ꙗ҆́кѡ ѿ сна̀ воздви́гнꙋти ᲂу҆ме́ршаго, побори́ти жи́знїю сме́рть.
Ве́лїѧ тебѣ̀ похвала̀, ѽ виѳа́нїе, ꙗ҆́кѡ зижди́телѧ страннопрїѧ́ти сподо́биласѧ є҆сѝ, вопїю́щи: бл҃гослови́те дѣла̀ гдⷭ҇нѧ гдⷭ҇а. <<тм҃д: 687>>
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Тѧ̀ пресꙋ́щнаѧ, трегꙋ́баѧ є҆ди́нице, совокꙋплѧ́емаѧ въ раздѣле́нїи зра́комъ ли́цъ, ѻ҆ц҃а̀, и҆ сн҃а, и҆ дх҃а бж҃е́ственнагѡ сла́вимъ.
Бг҃оро́диченъ: Є҆́же ра́дꙋйсѧ, вѣща́емъ тебѣ̀ со а҆́гг҃ломъ, ꙗ҆́кѡ воздви́гла є҆сѝ ра́дость, сп҃са мі́ра: є҆го́же молѝ дв҃о всепѣ́таѧ.
Сла́ва тебѣ̀ бж҃е на́шъ, сла́ва тебѣ̀.
Пѣ́снь тебѣ̀ прино́симъ, ꙗ҆́кѡ на жребѧ́ти но́сишисѧ, въ вы́шнихъ на херꙋві́мѣхъ восходѧ́й, да всѣ́хъ повине́ши хрⷭ҇тѐ держа́вѣ твое́й.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆ пою́ще глаго́лемъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃.
І҆рмо́съ: Живопрїе́мный и҆сто́чникъ:
Оу҆мерщвле́нъ бы́въ мно́гими прегрѣше́ньми, небреже́нїѧ во гро́бѣ ѡ҆держи́мь є҆́смь, ка́мень ѿча́ѧнїѧ и҆мѣ́ѧй надлежа́щїй: є҆го́же расто́ргъ хрⷭ҇тѐ твое́ю млⷭ҇тїю, ꙗ҆́коже ла́зарѧ дре́вле, ны́нѣ воскр҃си́ мѧ.
Бога́тагѡ ᲂу҆бѣжи́мъ подража́нїѧ, ѡ҆сꙋжде́ннагѡ въ пла́мень неꙋгаси́мый: и҆ ла́зарево возлю́бимъ въ болѣ́знехъ терпѣ́нїе, ꙗ҆́кѡ да ѿсю́дꙋ на́съ ѿше́дшихъ а҆враа́мъ въ нѣ́дро воспрїи́метъ.
Страстоꙋбі́йцꙋ по́стъ возлю́бимъ, въ мл҃твахъ прилѣ́жнѡ ᲂу҆праздни́мсѧ, пла́чимъ, рыда́имъ, и҆ те́плѣ воздо́хнемъ, ꙗ҆́кѡ да на́съ і҆и҃съ ᲂу҆тѣ́шитъ, и҆ црⷭ҇твїѧ прича́стники содѣ́лаетъ.
Бг҃оро́диченъ: Двⷭ҇тва бж҃е́ственное сокро́вище, пра́ѻтєцъ є҆ди́ное и҆справле́нїе, и҆сто́чникъ точа́щїй бл҃гоꙋтро́бїѧ <<тм҃д ѡ҆б.: 688>> бе́зднꙋ, добро́тꙋ і҆а́кѡвлю, бцⷣꙋ, є҆́юже сп҃са́емїи воспои́мъ.
И҆́ный. І҆рмо́съ: Тебѐ ви́дѣннꙋю:
Дне́сь хрⷭ҇тꙋ̀ ꙗ҆влѧ́етсѧ, ѡ҆б̾ ѻ҆нꙋ̀ странꙋ̀ і҆ѻрда́на ходѧ́щꙋ, болѣ́знь ла́зарева, и҆ ꙗ҆́кѡ провѣ́децъ глаго́летъ: болѣ́знь сїѧ̀ нѣ́сть ны́нѣ къ сме́рти.
Бл҃гоꙋгото́висѧ виѳа́нїе, ᲂу҆красѝ твоѧ̑ бж҃е́ствєнныѧ вхо́ды, разширѝ преддвє́рїѧ: се́ бо влⷣка прихо́дитъ со а҆пⷭ҇лы, ѻ҆вча̀ своѐ ѡ҆живлѧ́ѧ.
Трⷪ҇ченъ: Тѧ̀ трїѷпоста́снꙋю є҆ди́ницꙋ, и҆ нераздѣ́льное сꙋщество̀, є҆́же шестокри̑льнаѧ славосло́вѧтъ вѡ́инства, и҆ человѣ́ческїй ро́дъ пѣ́сньми велича́емъ.
Бг҃оро́диченъ: Тѧ̀ ѿ ѻ҆ц҃а̀ безлѣ́тнѡ, и҆ ѿ мт҃ре несказа́ннѡ, въ лѣ́то ро́ждшагосѧ во всѣ́хъ сп҃се́нїе, ꙗ҆́кѡ творца̀ и҆ влⷣкꙋ пѣ́сньми велича́емъ.
Сла́ва тебѣ̀ бж҃е на́шъ, сла́ва тебѣ̀.
Съ добротворе́нїѧ вѣ́твьми, и҆ чистоты̀ носѧ́ще ва̑їа, ᲂу҆гото́вимсѧ всѝ хрⷭ҇та̀ срѣ́сти, ко і҆ерⷭ҇ли́мꙋ грѧдꙋ́щаго ꙗ҆́кѡ бг҃а на́шего.
І҆рмо́съ: Тебѐ ви́дѣннꙋю две́рь і҆езекі́илемъ прⷪ҇ро́комъ, є҆́юже никто́же про́йде, то́кмѡ бг҃ъ є҆ди́нъ, бцⷣе дв҃о, пѣ́сньми почита́емъ.
Досто́йно є҆́сть: И҆ свѣти́ленъ гла́са.
На стїхо́внѣ самогла́сенъ два́жды, гла́съ є҃.
Не ѡ҆сꙋдѝ менѐ хрⷭ҇тѐ въ пла́мени гее́нстѣмъ, ꙗ҆́коже бога́таго, ра́ди ла́зарѧ: но да́рꙋй и҆ мнѣ̀ пла́чемъ просѧ́щꙋ, ка̑пли чл҃вѣколю́бїѧ, бж҃е, и҆ поми́лꙋй мѧ̀.
Мꙋ́чениченъ: Бл҃гослове́нно во́инство цр҃ѧ̀ нбⷭ҇нагѡ, а҆́ще бо и҆ земноро́днїи бы́ша стрⷭ҇тоте́рпцы, но а҆́гг҃льскїй са́нъ потща́шасѧ дости́гнꙋти, ѡ҆ тѣлесѣ́хъ небре́гше, и҆ <<тм҃є: 689>> стрⷭ҇тьмѝ свои́ми безпло́тныхъ че́сти сподо́бишасѧ: мл҃твами и҆́хъ гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ гла́съ то́йже: Ѡ҆бра́дованнаѧ, хода́тайствꙋй твои́ми мл҃твами, и҆ и҆спросѝ дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
На ѕ҃-мъ часѣ̀ тропа́рь прⷪ҇ро́чества, гла́съ ѕ҃:
Се́й є҆́сть бж҃е, стра́шный де́нь, є҆гѡ́же дости́гнꙋти ве́чера не надѣ́емсѧ: и҆ сего̀ ви́дѣти на́съ чл҃вѣколю́бнѡ, сподо́билъ є҆сѝ трист҃ы́й, сла́ва тебѣ̀.
Прокі́менъ, ѱало́мъ р҃д, гла́съ ѕ҃: Да возвесели́тсѧ се́рдце и҆́щꙋщихъ гдⷭ҇а. Сті́хъ: И҆сповѣ́дайтесѧ гдⷭ҇ви, и҆ призыва́йте и҆́мѧ є҆гѡ̀.
Прⷪ҇ро́чества и҆са́їина чте́нїе. [Гл. м҃и, ст. з҃і- к҃в. Гл. м҃ѳ, ст. а҃-д҃.]
Та́кѡ глаго́летъ гдⷭ҇ь, и҆зба́вивый тѧ̀ ст҃ы́й і҆и҃левъ: а҆́зъ є҆́смь гдⷭ҇ь бг҃ъ тво́й, наꙋчи́хъ тѧ̀ є҆́же ѡ҆брѣстѝ, тебѣ̀ пꙋ́ть, по немꙋ́же по́йдеши. И҆ а҆́ще бы є҆сѝ послꙋ́шалъ за́повѣдей мои́хъ, то бы́лъ бы ᲂу҆́бѡ а҆́ки рѣка̀ ми́ръ тво́й, и҆ пра́вда твоѧ̀ ꙗ҆́кѡ волна̀ морска́ѧ. И҆ бы́ло бы ꙗ҆́кѡ песо́къ сѣ́мѧ твоѐ, и҆ и҆сча̑дїѧ чре́ва твоегѡ̀ ꙗ҆́кѡ пе́рсть землѝ: нижѐ ны́нѣ потреби́шисѧ, нижѐ поги́бнетъ и҆́мѧ твоѐ предо мно́ю. И҆зы́ди ѿ вавѷлѡ́на бѣжа́й ѿ халде́євъ: гла́съ ра́дости возвѣсти́те, и҆ да слы́шано бꙋ́детъ сїѐ, возвѣсти́те да́же до послѣ́днихъ землѝ: глаго́лите, и҆зба́ви гдⷭ҇ь раба̀ своего̀ і҆а́кѡва. И҆ а҆́ще вжа́ждꙋтъ, пꙋсты́нею проведе́тъ и҆́хъ, и҆ во́дꙋ и҆з̾ ка́мене и҆зведе́тъ и҆̀мъ, разсѧ́детсѧ ка́мень, и҆ потече́тъ вода̀, и҆ и҆спїю́тъ лю́дїе моѝ. Нѣ́сть ра́доватисѧ нечести̑вымъ, глаго́летъ гдⷭ҇ь. Послꙋ́шайте менѐ ѻ҆́строви, и҆ внемли́те ꙗ҆зы̑цы, вре́менемъ мно́гимъ стоѧ́ти бꙋ́детъ, глаго́летъ гдⷭ҇ь: ѿ чре́ва мт҃ре моеѧ̀ наречѐ и҆́мѧ моѐ. И҆ положѝ <<тм҃є ѡ҆б.: 690>> ᲂу҆ста̀ моѧ̑ ꙗ҆́кѡ ме́чь ѻ҆́стръ, и҆ под̾ кро́вомъ рꙋкѝ своеѧ̀ скры́ мѧ: положи́ мѧ ꙗ҆́кѡ стрѣлꙋ̀ и҆збра́ннꙋ, и҆ въ тꙋ́лѣ свое́мъ скры́ мѧ. И҆ рече́ ми: ра́бъ мо́й є҆сѝ ты̀ і҆и҃лю, и҆ въ тебѣ̀ просла́влюсѧ. А҆́зъ же реко́хъ: вотщѐ трꙋди́хсѧ, всꙋ́е и҆ ни во что̀ да́хъ крѣ́пость мою̀: сегѡ̀ ра́ди сꙋ́дъ мо́й пред̾ гдⷭ҇емъ, и҆ трꙋ́дъ мо́й пред̾ бг҃омъ мои́мъ.
Прокі́менъ, ѱало́мъ р҃є, гла́съ ѕ҃: Бл҃гослове́нъ гдⷭ҇ь бг҃ъ і҆и҃левъ ѿ вѣ́ка и҆ до вѣ́ка. Сті́хъ: И҆сповѣ́дайтесѧ гдⷭ҇ви, ꙗ҆́кѡ бл҃гъ:
Въ понедѣ́льникъ ва́їй ве́чера,
по ѻ҆бы́чномъ стїхосло́вїи, на Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ настоѧ́щыѧ подѡ́бны трипѣ́снца, творе́нїе господи́на і҆ѡ́сифа. Гла́съ ѕ҃:
Подо́бенъ: Всю̀ ѿложи́вше:
Мно́гими прегрѣше́нїи, и҆ сластьмѝ житїѧ̀, недꙋ́гꙋющꙋю стѧжа́хъ дꙋ́шꙋ ѻ҆каѧ́нный, и҆ лежꙋ̀ на ѻ҆дрѣ̀ всегда̀ лѣ́ности, влⷣко, и҆ вопїю́ ти: млⷭ҇тиве, прише́дъ посѣтѝ, здра́вїе мнѣ̀ подаѧ̀ и҆ млⷭ҇ть, и҆ не ѡ҆ста́ви мѧ̀, да не когда̀ ᲂу҆снꙋ̀ въ сме́рть, и҆ возра́дꙋетсѧ вра́гъ ѡ҆ поги́бели мое́й, и҆скі́й всегда̀, сп҃се, во а҆́довꙋ глꙋбинꙋ̀ низвести́ мѧ.
Немилосе́рдомꙋ бога́томꙋ въ безꙋ́мїи поревнова́въ, сла́достнѡ веселю́сѧ, сластьмѝ и҆ страстьмѝ погрꙋжа́ѧсѧ. и҆ ви́дѧ лежа́ща всегда̀ пред̾ две́рьми покаѧ́нїѧ, ꙗ҆́коже ла́зарѧ ᲂу҆ма̀ моего̀, гдⷭ҇и, сего̀ нечꙋ́вственнѡ прехождꙋ̀, гла́домъ же болѣ́знꙋюща, и҆ ѡ҆стрꙋплѧ́ема страстьмѝ. тѣ́мже гее́нскомꙋ пови́ненъ є҆́смь пла́мени, ѿ негѡ́же и҆зба́ви мѧ̀ влⷣко, є҆ди́не многомлⷭ҇тиве. <<тм҃ѕ: 691>>
И҆́на стїхи́ра господи́на ѳео́дѡра, гла́съ є҃.
Подо́бенъ: Гдⷭ҇и при мѡѷсе́и:
Гдⷭ҇и, ѡ҆б̾ ѻ҆нꙋ̀ странꙋ̀ і҆ѻрда́на, пло́тїю проходѧ̀, проре́клъ є҆сѝ ла́заревꙋ болѣ́знь къ сме́рти не бы́ти, но ѡ҆ твое́й бг҃а на́шегѡ сла́вѣ быва́ти. сла́ва вели́чїю дѣ́лъ твои́хъ, и҆ вседержи́тельствꙋ твоемꙋ̀: ꙗ҆́кѡ низложи́лъ є҆сѝ сме́рть, за мно́гꙋю млⷭ҇ть чл҃вѣколю́бче.
И҆ мине́и. Сла́ва: И҆ ны́нѣ, бг҃оро́диченъ.
Прокі́менъ, ѱало́мъ р҃ѕ, гла́съ д҃: И҆сповѣ́дайтесѧ гдⷭ҇ви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Сті́хъ: Да рекꙋ́тъ и҆зба́вленнїи гдⷭ҇емъ:
Бытїѧ̀ чте́нїе. [Глава̀ к҃з, ст. а҃-м҃а.]
Бы́сть же, повнегда̀ состарѣ́тисѧ і҆саа́кови, и҆ притꙋпи́шасѧ ѻ҆́чи є҆гѡ̀ є҆́же ви́дѣти: и҆ призва̀ и҆са́ѵа сы́на своего̀ старѣ́йшаго, и҆ речѐ є҆мꙋ̀: сы́не мо́й. и҆ речѐ: сѐ а҆́зъ. И҆ речѐ і҆саа́къ: сѐ состарѣ́хсѧ, и҆ не вѣ́мъ днѐ сконча́нїѧ моегѡ̀. Ны́нѣ ᲂу҆́бѡ возмѝ ѻ҆рꙋ́дїе твоѐ, тꙋ́лъ же и҆ лꙋ́къ, и҆ и҆зы́ди на по́ле, и҆ ᲂу҆лови́ ми ло́въ: И҆ сотвори́ ми снѣ̑ди, ꙗ҆́коже люблю̀ а҆́зъ: и҆ принеси́ ми, да ꙗ҆́мъ, ꙗ҆́кѡ да бл҃гослови́тъ тѧ̀ дꙋша̀ моѧ̀, пре́жде да́же не ᲂу҆мрꙋ̀. Реве́кка же слы́ша глаго́люща і҆саа́ка ко и҆са́ѵꙋ сы́нꙋ своемꙋ̀: и҆зы́де же и҆са́ѵъ на по́ле ᲂу҆лови́ти ло́въ ѻ҆тцꙋ̀ своемꙋ̀. Реве́кка же речѐ ко і҆а́кѡвꙋ сы́нꙋ своемꙋ̀ ме́ньшемꙋ: сѐ, а҆́зъ слы́шахъ ѻ҆тца̀ твоего̀ бесѣ́дꙋюща ко и҆са́ѵꙋ бра́тꙋ твоемꙋ̀, глаго́люща: Принеси́ ми ло́въ, и҆ сотвори́ ми снѣ̑ди, да ꙗ҆ды́й бл҃гословлю́ тѧ пред̾ гдⷭ҇емъ, пре́жде не́же ᲂу҆мре́ти мѝ. Ны́нѣ ᲂу҆́бѡ сы́не мо́й, послꙋ́шай менѐ, ꙗ҆́коже а҆́зъ заповѣ́даю тѝ. И҆ ше́дъ во ѻ҆́вцы, поймѝ мнѣ̀ ѿтꙋ́дꙋ два̀ кѡ́злища мѧ̑гка и҆ дѡбра̀, и҆ сотворю̀ ѧ҆̀ снѣ̑ди ѻ҆тцꙋ̀ твоемꙋ̀, <<тм҃ѕ ѡ҆б.: 692>> ꙗ҆́коже лю́битъ: И҆ внесе́ши ѻ҆тцꙋ̀ твоемꙋ̀, и҆ бꙋ́детъ ꙗ҆́сти, ꙗ҆́кѡ да бл҃гослови́тъ тѧ̀ ѻ҆те́цъ тво́й, пре́жде да́же не ᲂу҆́мретъ. Рече́ же і҆а́кѡвъ къ реве́кцѣ ма́тери свое́й: и҆са́ѵъ бра́тъ мо́й є҆́сть мꙋ́жъ косма́тъ, а҆́зъ же мꙋ́жъ гла́дкїй: Да не ка́кѡ ѡ҆сѧ́жетъ мѧ̀ ѻ҆те́цъ мо́й, и҆ бꙋ́дꙋ пред̾ ни́мъ ꙗ҆́кѡ презира́ѧй, и҆ наведꙋ̀ на себѐ клѧ́твꙋ, а҆ не бл҃гослове́нїе. Рече́ же є҆мꙋ̀ ма́ти: на мнѣ̀ клѧ́тва твоѧ̀, ча́до: то́чїю послꙋ́шай гла́са моегѡ̀, и҆ ше́дъ принеси́ ми. Ше́дъ же взѧ̀, и҆ принесѐ ма́тери, и҆ сотворѝ ма́ти є҆гѡ̀ снѣ̑ди, ꙗ҆́коже люблѧ́ше ѻ҆те́цъ є҆гѡ̀. И҆ взе́мши реве́кка ѻ҆де́ждꙋ и҆са́ѵа сы́на своегѡ̀ старѣ́йшагѡ до́брꙋю, ꙗ҆́же бы́сть ᲂу҆ неѧ̀ въ домꙋ̀, ѡ҆блечѐ ѻ҆́ною і҆а́кѡва сы́на своего̀ ме́ньшаго. И҆ ко́жицами козлѧ́чїими ѡ҆бложѝ мы̑шцы є҆гѡ̀, и҆ наго́е вы́и є҆гѡ̀. И҆ дадѐ снѣ̑ди и҆ хлѣ́бы, ꙗ҆̀же сотворѝ, въ рꙋ́цѣ і҆а́кѡвꙋ сы́нꙋ своемꙋ̀. И҆ внесѐ ѻ҆тцꙋ̀ своемꙋ̀, и҆ речѐ: ѻ҆́тче. ѻ҆́нъ же речѐ: сѐ а҆́зъ. кто̀ є҆сѝ ты̀, ча́до; И҆ речѐ і҆а́кѡвъ ѻ҆тцꙋ̀: а҆́зъ и҆са́ѵъ пе́рвенецъ тво́й, сотвори́хъ, ꙗ҆́коже ре́клъ мѝ є҆сѝ: воста́въ сѧ́ди, и҆ ꙗ҆́ждь ѿ ло́ва моегѡ̀, ꙗ҆́кѡ да бл҃гослови́тъ мѧ̀ дꙋша̀ твоѧ̀. Рече́ же і҆саа́къ сы́нꙋ своемꙋ̀: что̀ сїѐ, є҆́же ско́рѡ ѡ҆брѣ́лъ є҆сѝ ѽ ча́до; ѻ҆́нъ же речѐ: є҆́же дадѐ гдⷭ҇ь бг҃ъ тво́й предо мно́ю. Рече́ же і҆саа́къ і҆а́кѡвꙋ: прибли́жисѧ ко мнѣ̀, и҆ ѡ҆сѧжꙋ̀ тѧ̀ ча́до, а҆́ще ты̀ є҆сѝ сы́нъ мо́й и҆са́ѵъ, и҆лѝ нѝ; Прибли́жисѧ же і҆а́кѡвъ ко і҆саа́кꙋ ѻ҆тцꙋ̀ своемꙋ̀, и҆ ѡ҆сѧза̀ є҆го̀, и҆ речѐ: гла́съ ᲂу҆́бѡ, гла́съ і҆а́кѡвль: рꙋ́цѣ же, рꙋ́цѣ и҆са́ѵовѣ. И҆ не позна̀ є҆гѡ̀, бѣ́стѣ бо рꙋ́цѣ є҆гѡ̀, ꙗ҆́кѡ рꙋ́цѣ и҆са́ѵа бра́та є҆гѡ̀ косма́тѣ: и҆ бл҃гословѝ є҆го̀. И҆ речѐ: ты́ ли є҆сѝ сы́нъ мо́й и҆са́ѵъ; ѻ҆́нъ же речѐ: а҆́зъ. И҆ речѐ: принеси́ ми, и҆ ꙗ҆́мъ ѿ ло́ва твоегѡ̀ ча́до, да бл҃гослови́тъ тѧ̀ дꙋша̀ моѧ̀. и҆ принесѐ є҆мꙋ̀, и҆ ꙗ҆дѐ: и҆ принесѐ є҆мꙋ̀ вїно̀, и҆ пѝ. И҆ речѐ <<тм҃з: 693>> є҆мꙋ̀ і҆саа́къ ѻ҆те́цъ є҆гѡ̀: прибли́жисѧ ко мнѣ̀, и҆ ѡ҆блобыза́й мѧ̀ ча́до. И҆ прибли́живсѧ лобыза̀ є҆го̀: и҆ ѡ҆бонѧ̀ воню̀ ри́зъ є҆гѡ̀, и҆ бл҃гословѝ є҆го̀, и҆ речѐ: сѐ вонѧ̀ сы́на моегѡ̀, ꙗ҆́кѡ вонѧ̀ ни́вы и҆спо́лнены, ю҆́же бл҃гословѝ гдⷭ҇ь. И҆ да да́стъ тебѣ̀ бг҃ъ ѿ росы̀ небе́сныѧ, и҆ ѿ тꙋ́ка землѝ, и҆ мно́жество пшени́цы и҆ вїна̀: И҆ да порабо́таютъ тебѣ̀ ꙗ҆зы́цы, и҆ да покло́нѧтсѧ тебѣ̀ кнѧ́зи, и҆ бꙋ́ди господи́нъ бра́тꙋ твоемꙋ̀, и҆ покло́нѧтсѧ тебѣ̀ сы́нове ѻ҆тца̀ твоегѡ̀: проклина́ѧй тѧ̀, про́клѧтъ: бл҃гословлѧ́ѧй же тѧ̀, бл҃гослове́нъ. И҆ бы́сть по є҆́же преста́ти і҆саа́кꙋ бл҃гословлѧ́ющꙋ і҆а́кѡва сы́на своегѡ̀: и҆ бы́сть є҆гда̀ и҆зы́де і҆а́кѡвъ ѿ лица̀ і҆саа́ка ѻ҆тца̀ своегѡ̀, и҆ и҆са́ѵъ бра́тъ є҆гѡ̀ прїи́де съ лови́твы. Сотвори́ же и҆ то́й снѣ̑ди, и҆ принесѐ ѻ҆тцꙋ̀ своемꙋ̀, и҆ речѐ ѻ҆тцꙋ̀: да воста́нетъ ѻ҆те́цъ мо́й, и҆ да ꙗ҆́стъ ѿ ло́ва сы́на своегѡ̀, ꙗ҆́кѡ да бл҃гослови́тъ мѧ̀ дꙋша̀ твоѧ̀. И҆ речѐ є҆мꙋ̀ і҆саа́къ ѻ҆те́цъ є҆гѡ̀: кто̀ є҆сѝ ты̀; ѻ҆́нъ же речѐ: а҆́зъ є҆́смь сы́нъ тво́й пе́рвенецъ и҆са́ѵъ. Оу҆жасе́сѧ же і҆саа́къ ᲂу҆́жасомъ ве́лїимъ ѕѣлѡ̀, и҆ речѐ: кто̀ ᲂу҆́бѡ ᲂу҆лови́вый мнѣ̀ ло́въ, и҆ принесы́й мѝ, и҆ ꙗ҆до́хъ ѿ всѣ́хъ, пре́жде не́же прїитѝ тебѣ̀; и҆ бл҃гослови́хъ є҆го̀, и҆ бл҃гослове́нъ бꙋ́детъ. Бы́сть же є҆гда̀ ᲂу҆слы́ша и҆са́ѵъ глаго́лы ѻ҆тца̀ своего̀ і҆саа́ка, возопѝ гла́сомъ ве́лїимъ и҆ го́рькимъ ѕѣлѡ̀, и҆ речѐ: бл҃гословѝ ᲂу҆́бѡ и҆ менѐ, ѻ҆́тче. Рече́ же є҆мꙋ̀: прише́дъ бра́тъ тво́й съ ле́стїю, взѧ̀ бл҃гослове́нїе твоѐ. И҆ речѐ [и҆са́ѵъ] пра́веднѡ нарече́сѧ и҆́мѧ є҆мꙋ̀ і҆а́кѡвъ: запѧ́ бо мѧ̀ сѐ ᲂу҆жѐ втори́цею, и҆ пе́рвенство моѐ взѧ̀, и҆ ны́нѣ взѧ̀ бл҃гослове́нїе моѐ. и҆ речѐ и҆са́ѵъ ѻ҆тцꙋ̀ своемꙋ̀: не ѡ҆ста́вилъ ли є҆сѝ [и҆] мнѣ̀ бл҃гослове́нїѧ, ѻ҆́тче; Ѿвѣща́въ же і҆саа́къ, речѐ и҆са́ѵꙋ: а҆́ще господи́на є҆го̀ сотвори́хъ тебѣ̀, и҆ всю̀ бра́тїю є҆гѡ̀ сотвори́хъ рабы̑ є҆мꙋ̀, <<тм҃з ѡ҆б.: 694>> пшени́цею и҆ вїно́мъ ᲂу҆тверди́хъ є҆го̀: тебѣ́ же что̀ сотворю̀, ча́до; Рече́ же и҆са́ѵъ ко ѻ҆тцꙋ̀ своемꙋ̀: є҆да̀ є҆ди́но є҆́сть бл҃гослове́нїе ᲂу҆ тебѐ ѻ҆́тче; бл҃гословѝ ᲂу҆́бѡ и҆ менѐ ѻ҆́тче. ᲂу҆мили́вшꙋсѧ же і҆саа́кꙋ, возопѝ гла́сомъ ве́лїимъ и҆са́ѵъ, и҆ воспла́касѧ. Ѿвѣща́въ же і҆саа́къ ѻ҆те́цъ є҆гѡ̀, речѐ є҆мꙋ̀: сѐ ѿ тꙋ́ка землѝ бꙋ́детъ вселе́нїе твоѐ, и҆ ѿ росы̀ нбⷭ҇ныѧ свы́ше: И҆ мече́мъ твои́мъ жи́ти бꙋ́деши, и҆ бра́тꙋ твоемꙋ̀ порабо́таеши: бꙋ́детъ же [вре́мѧ] є҆гда̀ низложи́ши и҆ ѿрѣши́ши ꙗ҆ре́мъ є҆гѡ̀ ѿ вы́и твоеѧ̀. И҆ враждова́ше и҆са́ѵъ на і҆а́кѡва ѡ҆ бл҃гослове́нїи, и҆́мже бл҃гословѝ є҆го̀ ѻ҆те́цъ є҆гѡ̀.
Прокі́менъ, ѱало́мъ р҃з, гла́съ з҃: Вознеси́сѧ на нб҃са̀ бж҃е, и҆ по все́й землѝ сла́ва твоѧ̀. Сті́хъ: Гото́во се́рдце моѐ бж҃е, гото́во се́рдце моѐ.
При́тчей чте́нїе. [Глава̀ ѳ҃і, ст. ѕ҃і-к҃є.]
И҆́же храни́тъ за́пѡвѣди, соблюда́етъ свою̀ дꙋ́шꙋ: а҆ нерадѧ́й ѡ҆ свои́хъ пꙋте́хъ, поги́бнетъ. Ми́лꙋѧй ни́ща, взаи́мъ дае́тъ бг҃ови: по даѧ́нїю же є҆гѡ̀ возда́стсѧ є҆мꙋ̀. Наказꙋ́й сы́на твоего̀, та́кѡ бо бꙋ́детъ бл҃гонаде́женъ: въ досажде́нїе же не взе́млисѧ дꙋше́ю твое́ю. Ѕлоꙋ́менъ мꙋ́жъ мно́гѡ ѿщети́тсѧ: а҆́ще же гꙋби́тель є҆́сть, и҆ дꙋ́шꙋ свою̀ приложи́тъ. Слꙋ́шай сы́не ѻ҆тца̀ твоегѡ̀ наказа́нїѧ, да мꙋ́дръ бꙋ́деши въ послѣ̑днѧѧ твоѧ̑. Мнѡ́ги мы̑сли въ се́рдцы мꙋ́жа: совѣ́тъ же гдⷭ҇нь во вѣ́къ пребыва́етъ. Пло́дъ мꙋ́жеви, ми́лостынѧ: лꙋ́чше же ни́щъ првⷣный, не́жели бога́тъ лжи́въ. Стра́хъ гдⷭ҇нь въ живо́тъ мꙋ́жеви: а҆ безстра́шный водвори́тсѧ на мѣ́стѣхъ, и҆дѣ́же не наблюда́етсѧ ра́зꙋмъ. Скрыва́ѧй въ нѣ́дрѣхъ рꙋ́цѣ своѝ непра́веднѡ, нижѐ ко ᲂу҆стѡ́мъ свои̑мъ принесе́тъ ѧ҆̀. Гꙋби́телю ра̑ны прїе́млющꙋ, безꙋ́мный <<тм҃и: 695>> кова́рнѣе бꙋ́детъ: а҆́ще же ѡ҆блича́еши мꙋ́жа разꙋ́мна, ᲂу҆разꙋмѣ́етъ чꙋ́вство.
На стїхо́внѣ самогла́сенъ днѐ, два́жды. Гла́съ д҃:
Дꙋшевре́днагѡ лихои́мства свободѝ сп҃се, и҆ съ ла́заремъ ᲂу҆бо́гимъ въ нѣ́дрѣхъ а҆враа́мовыхъ причтѝ на́съ: ты́ бо въ млⷭ҇техъ бога́тъ сы́й, во́лею на́съ ра́ди ѡ҆бнища́лъ є҆сѝ, и҆ ѿ тлѝ на нетлѣ́нїе преве́лъ є҆сѝ, ꙗ҆́кѡ млⷭ҇тивъ бг҃ъ, и҆ чл҃вѣколю́бецъ.
Мꙋ́чениченъ: Ст҃ы́хъ мч҃нкъ прїе́мый терпѣ́нїе, и҆ ѿ на́съ прїимѝ пѣ́нїе чл҃вѣколю́бче, да́рꙋй на́мъ тѣ́хъ мл҃твами ве́лїю млⷭ҇ть.
Сла́ва, и҆ ны́нѣ, бг҃оро́диченъ: И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ є҆ди́но предста́тельство дꙋ́шъ на́шихъ.
Во вто́рникъ ва́їй на ᲂу҆́трени,
тро́ичны гла́са. По а҃-мъ стїхосло́вїи сѣда́льны ᲂу҆мили́тельны ѻ҆смогла́сника два̀, съ бг҃оро́дичнымъ. По в҃-мъ стїхосло́вїи сѣда́ленъ господи́на і҆ѡ́сифа. Гла́съ ѕ҃.
Подо́бенъ: А҆́гг҃льскїѧ:
Грѣхо́внымъ недꙋ́гомъ и҆стаѧва́емь, на ѻ҆дрѣ̀ ѿча́ѧнїѧ низлежꙋ̀: тѣ́мже мѧ̀ врачꙋ̀ болѧ́щихъ посѣтѝ твои́мъ чл҃вѣколю́бїемъ, и҆ не ѡ҆ста́ви мѧ̀ ᲂу҆снꙋ́ти лю́тѣ въ сме́рть, всеще́дрый, да вопїю́ ти те́плѣ: млⷭ҇ти пода́телю, гдⷭ҇и сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ: Нача́ло сп҃се́нїѧ, гаврїи́лово провѣща́нїе къ дв҃ѣ бы́сть: слы́ша бо, є҆́же ра́дꙋйсѧ, не <<тм҃и ѡ҆б.: 696>> ѿбѣжѐ цѣлова́нїѧ: не ᲂу҆сꙋмнѣ́сѧ ꙗ҆́кѡ са́рра въ сѣ́ни, но си́це глаго́лаше: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀.
По г҃-мъ стїхосло́вїи сѣда́ленъ, господи́на ѳео́дѡра. Гла́съ є҃:
Подо́бенъ: Сїѧ́етъ дне́сь:
Вчера̀ и҆ дне́сь болѣ́знь ла́зарева, сїю́ бо хрⷭ҇тꙋ̀ ꙗ҆влѧ́ютъ срѡ́дницы. ра́достїю виѳа́нїе ᲂу҆гото́висѧ, жизнода́вца ᲂу҆гости́ти и҆ цр҃ѧ̀, съ на́ми вопїю́щи: гдⷭ҇и сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ, гла́съ то́йже: Мт҃и бж҃їѧ всест҃а́ѧ, стѣно̀ хрⷭ҇тїа́нъ, и҆зба́ви лю́ди твоѧ̑ ѻ҆бы́чнѡ, зовꙋ́щыѧ тѝ прилѣ́жнѡ: противоста́ни сквє́рнымъ и҆ возносли̑вымъ помыслѡ́мъ, да вопїе́мъ тѝ: ра́дꙋйсѧ приснодв҃о.
Канѡ́нъ мине́и, и҆ трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ ѕ҃.
Пѣ́снь в҃.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ: ма́ннꙋ ѡ҆дожди́вый, и҆ во́дꙋ и҆з̾ ка́мене и҆сточи́вый дре́вле въ пꙋсты́ни лю́демъ мои̑мъ, десни́цею є҆ди́ною, и҆ крѣ́постїю мое́ю.
Во́лею ѡ҆бнища́лъ є҆сѝ, є҆стество́мъ бога́тый хрⷭ҇тѐ: взалка́лъ є҆сѝ пости́всѧ, насыща́ѧй всѧ́кое живо́тно. тѣ́мъ мѧ̀ насы́ти а҆́лчꙋщаго твоеѧ̀ бл҃года́ти, и҆ покажѝ та́мошнїѧ трапе́зы сло́ве ѻ҆́бщника.
Ла́зарѧ ни́щаго мѧ̀ покажѝ грѣхѡ́въ, хрⷭ҇тѐ, и҆ расточѝ бога́тство, є҆́же ѕлѣ̀ собра́хъ, и҆ соверше́нное твоѐ любле́нїе ще́дре и҆спо́лнивъ, та́мошнѧгѡ и҆зба́ви мѧ̀ мꙋче́нїѧ стра́шнагѡ.
Ѻ҆́троки ѡ҆бостри́въ си́льнѣйшыѧ ѻ҆гнѧ̀, и҆ногда̀ въ вавѷлѡ́нѣ содѣ́ла по́стъ: тѣ̑мъ поревнова́вши ѽ дꙋшѐ <<тм҃ѳ: 697>> моѧ̀, не ᲂу҆ныва́й, и҆ ѻ҆́гнь сладостра́стїй дꙋ́ха ᲂу҆гаси́ши росо́ю.
Бг҃оро́диченъ: Ра́дꙋйсѧ, тебѣ̀ вопїе́мъ ро́ждшей ра́дость, бцⷣе дв҃о ѡ҆бра́дованнаѧ: бг҃а, є҆го́же родила̀ є҆сѝ, ᲂу҆молѝ, и҆зба́витисѧ ѿ бѣ́дъ и҆ тлѝ, воспѣва́ющымъ тѧ̀ при́снѡ.
И҆́ный, господи́на ѳео́дѡра. Гла́съ є҃.
І҆рмо́съ: Ви́дите, ви́дите:
Ви́дите, ви́дите, ꙗ҆́кѡ а҆́зъ є҆́смь бг҃ъ, ѡ҆б̾ ѻ҆нꙋ̀ странꙋ̀ і҆ѻрда́на ходѧ́й, слы́шавъ ꙗ҆́кѡ ла́зарь боли́тъ, и҆ рекі́й: ꙗ҆́кѡ не ᲂу҆́мретъ, но є҆́сть сїѐ ѡ҆ сла́вѣ мое́й.
Рыда́нїемъ ѡ҆бложи́вшесѧ ла́зарєвы сєстры̀, стрⷭ҇ть тебѣ̀ вѣ́дѣтелю всѣ́хъ ꙗ҆влѧ́ютъ: но пребыва́еши ма́лѡ, да воздви́гнеши чꙋ́до, и҆ пока́жеши ᲂу҆ч҃нкѡ́мъ твои̑мъ стра̑шнаѧ.
Трⷪ҇ченъ: Є҆диноцрⷭ҇твеннаѧ, трїѷпоста́снаѧ є҆ди́нице, гдⷭ҇ство и҆ црⷭ҇тво вѣкѡ́въ, тѧ̀ сла́вѧтъ ѻ҆ц҃а̀, и҆ сн҃а, и҆ ст҃а́го дх҃а, мно́жество а҆́гг҃лъ, и҆ всѐ є҆стество̀ человѣ́ческое.
Бг҃оро́диченъ: Кто̀ не диви́лсѧ бы зрѧ̀ въ тебѣ̀ содѣ́телѧ дв҃о, назда́вшаго а҆да́ма па́дшаго, несказа́ннымъ соедине́нїемъ, и҆з̾ тебѐ пло́тїю рожде́нна, неизмѣ́ннѡ, во сп҃се́нїе на́ше.
Сла́ва тебѣ̀ бж҃е на́шъ, сла́ва тебѣ̀.
Ны́нѣ ᲂу҆краси́сѧ ѽ виѳа́нїе ра́достїю, сотвори́вши прїѧ́телище цр҃ѧ̀ всѣ́хъ, ꙗ҆́кѡ прїи́детъ къ тебѣ̀, да ла́зарѧ пока́жетъ па́ки текꙋ́ща ѿ тлѣ́нїѧ въ живо́тъ.
І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, въ пло́ть ѡ҆блекі́йсѧ во́лею мое́ю, да сп҃сꙋ̀ а҆да́ма, ѿ ле́сти па́дшаго въ престꙋпле́нїе ѕмі́емъ. <<тм҃ѳ ѡ҆б.: 698>>
Пѣ́снь и҃. І҆рмо́съ: И҆з̾ пла́мене прпⷣбнымъ:
Помышлѧ́ю мно́жество согрѣше́нїй, и҆ ᲂу҆ѧ́звленъ жа́ломъ со́вѣсти, ꙗ҆́коже въ пла́мени болю̀ ѻ҆каѧ́нный: ᲂу҆ще́дри мѧ̀ сло́ве бж҃їй, твое́ю млⷭ҇тїю.
Презрѣ́въ ла́зарева и҆справлє́нїѧ, неми́лостивагѡ бога́тагѡ нра́вѡмъ позави́дѣхъ: бл҃гоꙋтро́бне бж҃е, ѡ҆брати́въ мѧ̀ ᲂу҆ще́дри, да тѧ̀ сла́влю во вѣ́ки всѧ̑.
Дꙋше́вною болѣ́знїю ѡ҆держи́мь, и҆ ᲂу҆мре́ти хотѧ̀ ѿча́ѧнїемъ, твоегѡ̀ і҆и҃се посѣще́нїѧ тре́бꙋю, ѡ҆животвори́вшагѡ тебѐ призыва́ющыѧ.
Бг҃оро́диченъ: Прест҃а́ѧ дв҃о, ты́ мѧ сп҃сѝ, мое́й не́мощи бꙋ́ди по́мощь, воли́телѧ млⷭ҇ти роди́вшаѧ, є҆го́же превозно́симъ во всѧ̑ вѣ́ки.
И҆́ный. І҆рмо́съ: Прпⷣбнїи твоѝ ѻ҆́троцы:
Ра́дꙋйсѧ виѳа́нїе, ла́зарево ѻ҆те́чество: въ тебѣ́ бо хрⷭ҇то́съ предста́въ вели́чїе соверши́тъ, ѡ҆живи́въ ла́зарѧ.
Ла́зарь болѣ́знꙋетъ, да ты̀ просла́вишисѧ сн҃е бж҃їй ѡ҆ не́мъ: и҆ пою́тъ тѧ̀ непреста́ннѡ дѣла̀ всѧ̑ гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇цꙋ всест҃ꙋ́ю во ѻ҆ц҃ѣ̀, и҆ сн҃ѣ, и҆ дх҃ѣ, воспѣва́юще пое́мъ: бл҃гослови́те дѣла̀ гдⷭ҇нѧ гдⷭ҇а.
Бг҃оро́диченъ: Неизрече́нное твоѐ ржⷭ҇тво̀ всѝ пое́мъ чⷭ҇таѧ, и҆ чтꙋ́ще є҆го̀ ꙗ҆́кѡ бг҃а, бл҃гослови́мъ всѧ̑ дѣла̀, ꙗ҆́кѡ содѣ́телѧ и҆ гдⷭ҇а.
Сла́ва тебѣ̀ бж҃е на́шъ, сла́ва тебѣ̀.
Добродѣ́телей вѣ̑тви къ срѣ́тенїю хрⷭ҇то́вꙋ гото́вѧще, ны́нѣ зове́мъ: бл҃гослови́те дѣла̀ гдⷭ҇нѧ гдⷭ҇а.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Прпⷣбнїи твоѝ ѻ҆́троцы въ пещѝ хрⷭ҇тѐ воспѣва́юще глаго́лахꙋ: бл҃гослови́те всѧ̑ дѣла̀ гдⷭ҇нѧ гдⷭ҇а. <<т҃н: 699>>
Пѣ́снь ѳ҃.
І҆рмо́съ: Бг҃а человѣ́кѡмъ:
Пре́жде вкꙋше́нїе го́рькое человѣ́ка первозда́ннаго лю́тѣ и҆з̾ раѧ̀ и҆згна̀, и҆ сме́рти сѣ́ти припрѧжѐ: пости́сѧ ѽ дꙋшѐ моѧ̀, бѣ́гай подража́нїѧ, бѣ́гай наслажде́нїѧ сла́сти многоболѣ́зненныѧ.
Во ᲂу҆́мъ прїе́млю твоѐ сꙋди́ще, и҆ пла́мень неꙋгаси́мый, сꙋдїѐ пра́веднѣйшїй, себѐ ѡ҆сꙋжда́ю пре́жде сꙋда̀: ᲂу҆жасо́хсѧ бо и҆ трепе́щꙋ, безмѣ́рнѡ прегрѣши́въ тебѣ̀, ꙗ҆́кѡ и҆́нъ никто́же на землѝ. тѣ́мже молю́ тѧ, ᲂу҆ще́дри мѧ̀.
Страсте́й и҆змы́емсѧ ѡ҆мраче́нїѧ, просвѣти́тельными мл҃твами, и҆ добродѣ́телей вѣ̑тви носѧ́ще, срѣ́сти хрⷭ҇та̀ потщи́мсѧ, на жребѧ́ти ча́ема ны́нѣ всѣ́сти, гото́вѧща же сѧ страда́ти, за є҆́же сп҃стѝ на́съ.
Бг҃оро́диченъ: И҆з̾ тебѐ дв҃о бг҃обл҃года́тнаѧ, въ нощѝ страсте́й ѡ҆держи̑мымъ, возсїѧ̀ свѣ́та и҆ ми́ра хрⷭ҇то́съ пода́тель, ѿ невнѧ́тїѧ разрѣша́ѧй престꙋпле́нїе, и҆ и҆збавле́нїе на́мъ ꙗ҆́вѣ да́рꙋѧй.
И҆́ный. І҆рмо́съ: И҆са́їе ликꙋ́й:
Ны́нѣ мертвогрѡ́бнаѧ гото́ви ла́заре мꙋ́дре, сконча́ешисѧ бо ѿ жи́зни, ᲂу҆́трѡ ᲂу҆мре́ти и҆мы́й, гро́бъ ᲂу҆зрѝ, в̾оньже всели́шисѧ: но тебѐ хрⷭ҇то́съ па́ки ѡ҆живи́тъ, воздви́гъ четверодне́вна.
Виѳа́нїе ликꙋ́й, къ тебѣ́ бо прїи́детъ хрⷭ҇то́съ, чꙋ́до соверша́ѧ ве́лїе и҆ стра́шное, свѧза́въ сме́рть, воскреси́тъ всѧ́кѡ ꙗ҆́кѡ бг҃ъ ла́зарѧ ᲂу҆ме́ршаго, и҆ зижди́телѧ велича́юща.
Трⷪ҇ченъ: Є҆ди́но сꙋщество̀ тѧ̀ воспѣва́ю, безнача́льнаѧ трⷪ҇це, честна́ѧ живонача́льнаѧ, несѣко́маѧ є҆ди́нице, ѻ҆́ч҃е <<т҃н ѡ҆б.: 700>> нерожде́нне, и҆ рожде́нне сло́ве и҆ сн҃е, и҆ дш҃е ст҃ы́й, сп҃сѝ на́съ пою́щихъ тѧ̀.
Бг҃оро́диченъ: Па́че ᲂу҆ма̀ ржⷭ҇тво̀ твоѐ бг҃омт҃и, без̾ мꙋ́жа бо зача́тїе въ тебѣ̀, и҆ двⷭ҇твенное ржⷭ҇тво̀ бы́сть: и҆́бо бг҃ъ є҆́сть рожде́йсѧ, є҆го́же велича́юще, тѧ̀ дв҃о ᲂу҆бл҃жа́емъ.
Сла́ва тебѣ̀ бж҃е на́шъ, сла́ва тебѣ̀.
Прїиди́те ᲂу҆гото́вимъ гдⷭ҇ви къ срѣ́тенїю, вѣ̑тви добродѣ́телей носѧ́ще є҆мꙋ̀: та́кѡ бо є҆го̀ прїи́мемъ, ꙗ҆́коже во гра́дѣ і҆ерⷭ҇ли́мѣ въ дꙋшѝ на́шей, покланѧ́ющесѧ и҆ пою́ще є҆го̀.
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Свѣти́ленъ.
На стїхо́внѣ самогла́сенъ днѐ, два́жды. Гла́съ є҃:
Поползнꙋ́вшисѧ прегрѣше́ньми, и҆ плени́цами согрѣше́нїй свѧ́зана, ѽ дꙋшѐ, что̀ ᲂу҆ныва́еши; что̀ лѣни́шисѧ; бѣ́гай при́снѡ ꙗ҆́коже лѡ́тъ содо́ма и҆ гомо́рры, нечистоты̀ запале́нїѧ. не возвраща́йсѧ вспѧ́ть, и҆ бꙋ́деши ꙗ҆́кѡ сто́лпъ со́льный, на горѣ̀ сп҃са́йсѧ добродѣ́телей, бѣ́гай при́снѡ немилосе́рднагѡ бога́тагѡ, без̾ꙋтро́бїѧ горѣ́нїѧ. въ нѣ̑дра прейдѝ а҆враа́мѡва ꙗ҆́кѡ ла́зарь, смиренномꙋ́дрїемъ возопі́й: ᲂу҆пова́нїе моѐ, и҆ прибѣ́жище моѐ, гдⷭ҇и сла́ва тебѣ̀.
Мч҃нченъ: Стрⷭ҇тоте́рпцы твоѝ гдⷭ҇и, чи́ны а҆́гг҃льскїѧ подража́вше, ꙗ҆́кѡ безпло́тни мꙋ́ки претерпѣ́ша, є҆диномы́сленное ᲂу҆пова́нїе и҆мꙋ́ще, ѡ҆бѣща́нныхъ бл҃ги́хъ наслажде́нїе. тѣ́хъ мл҃твами хрⷭ҇тѐ бж҃е на́шъ, ми́ръ да́рꙋй мі́рови твоемꙋ̀, и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Тебѣ̀ мо́лимсѧ, ꙗ҆́кѡ бж҃їи мт҃ри, бл҃гослове́ннаѧ, молѝ ѡ҆ сп҃се́нїи дꙋ́шъ на́шихъ. <<тн҃а: 701>>
На ѕ҃-мъ часѣ̀ тропа́рь прⷪ҇ро́чества, гла́съ є҃:
Неѡбори́мꙋю стѣ́нꙋ да́лъ є҆сѝ гра́дꙋ на́шемꙋ, ро́ждшꙋю тѧ̀ дв҃ꙋ: то́ю сп҃се ѿ ѡ҆крꙋжа́ющихъ ѕлы́хъ и҆змѝ, мо́лимсѧ, дꙋ́шы на́шѧ.
Прокі́менъ, ѱало́мъ р҃и, гла́съ д҃: Помози́ ми гдⷭ҇и бж҃е мо́й, и҆ сп҃си́ мѧ по млⷭ҇ти твое́й. Сті́хъ: Бж҃е, хвалы̀ моеѧ̀ не премолчѝ.
Прⷪ҇ро́чества и҆са́їина чте́нїе. [Глава̀ м҃ѳ, ст. ѕ҃- і҃.]
Та́кѡ глаго́летъ гдⷭ҇ь: сѐ да́хъ тѧ̀ въ завѣ́тъ ро́да, во свѣ́тъ ꙗ҆зы́кѡмъ, є҆́же бы́ти тебѣ̀ во сп҃се́нїе, да́же до послѣ́днихъ землѝ. Та́кѡ глаго́летъ гдⷭ҇ь, и҆зба́вивый тѧ̀ бг҃ъ і҆и҃левъ: ѡ҆ст҃и́те ᲂу҆ничижа́ющаго дꙋ́шꙋ свою̀, гнꙋша́емаго ѿ ꙗ҆зы̑къ рабѡ́въ кнѧ́жескихъ: ца́рїе ᲂу҆́зрѧтъ є҆го̀, и҆ воста́нꙋтъ кнѧ́зи, и҆ покло́нѧтсѧ є҆мꙋ̀, гдⷭ҇а ра́ди: ꙗ҆́кѡ вѣ́ренъ є҆́сть ст҃ы́й і҆и҃левъ, и҆ и҆збра́хъ тѧ̀. Та́кѡ глаго́летъ гдⷭ҇ь: во вре́мѧ прїѧ́тно послꙋ́шахъ тебѐ, и҆ въ де́нь сп҃се́нїѧ помого́хъ тѝ, и҆ сотвори́хъ тѧ̀, и҆ да́хъ тѧ̀ въ завѣ́тъ вѣ́чный ꙗ҆зы́кѡвъ, є҆́же ᲂу҆стро́ити зе́млю, и҆ наслѣ́дити наслѣ̑дїѧ пꙋсты́ни, Глаго́люща сꙋ́щымъ во ᲂу҆́захъ и҆зыди́те, и҆ сꙋ́щымъ во тьмѣ̀, ѿкры́йтесѧ: на всѣ́хъ пꙋте́хъ пасти́сѧ бꙋ́дꙋтъ, и҆ на всѣ́хъ стезѧ́хъ па́жить и҆́хъ. Не вза́лчꙋтъ, нижѐ вжа́ждꙋтъ, нижѐ порази́тъ и҆̀хъ зно́й, нижѐ со́лнце: но ми́лꙋѧй и҆̀хъ ᲂу҆тѣ́шитъ и҆̀хъ.
Прокі́менъ, ѱало́мъ р҃ѳ, гла́съ д҃: Ты̀ і҆ере́й во вѣ́къ, по чи́нꙋ мелхїседе́ковꙋ. Сті́хъ: Речѐ гдⷭ҇ь гдⷭ҇ви моемꙋ̀: сѣдѝ ѡ҆деснꙋ́ю менѐ. <<тн҃а ѡ҆б.: 702>>
Во вто́рникъ ве́чера,
ѻ҆бы́чное стїхосло́вїе. На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ стїхи̑ры подѡ́бны господи́на і҆ѡ́сифа. Гла́съ в҃.
Подо́бенъ: Є҆гда̀ ѿ дре́ва:
Всѣ́ми прило́ги лꙋка́вагѡ, многостра́стное моѐ се́рдце и҆знемо́гшее, гро́бꙋ сно́ситсѧ ᲂу҆ны́нїѧ лю́тѣ, и҆ ꙗ҆́кѡ ка́менемъ покрыва́етсѧ нечꙋ́вствїемъ сп҃се: дре́вомъ живоно́снагѡ твоегѡ̀ крⷭ҇та̀, всѧ̑ сꙋ́щыѧ во а҆́дѣ ѡ҆живи́вый, возста́ви мѧ̀, ѡ҆живѝ, ꙗ҆́кѡ да стра́хомъ твоѐ сла́влю бж҃ество̀.
Бога́тство сласте́й тлетво́рныхъ, лꙋка́вагѡ дѣ́йствомъ всегда̀ возлюби́хъ, сꙋ́етнѡ веселѧ́сѧ несмы́сленный: ᲂу҆ма́ же презрѣ́хъ, ꙗ҆́кѡ ла́зарѧ и҆на́го, стенѧ́ща, а҆́лчꙋща бж҃е́ственныхъ бра́шенъ сло́ве, пла́мене бꙋ́дꙋщагѡ и҆зба́ви мѧ̀ твои́мъ бл҃гоꙋтро́бїемъ, ꙗ҆́кѡ да сла́влю тѧ̀ чл҃вѣколю́бца.
И҆́на господи́на ѳео́дѡра, гла́съ г҃.
Подо́бенъ: Поста́виша:
Дне́сь и҆́здше ла́зарь, и҆ рыда́етъ сегѡ̀ виѳа́нїа, є҆го́же сп҃се на́шъ воздвиза́еши ѿ ме́ртвыхъ и҆ пред̾ꙋвѣрѧ́еши дрꙋгѡ́мъ твои̑мъ, воскрⷭ҇нїѧ твоегѡ̀ стра́шное, а҆́дово ᲂу҆мерщвле́нїе, и҆ а҆да́мово ѡ҆живле́нїе: сегѡ̀ ра́ди пое́мъ тѧ̀.
И҆ мине́и г҃. Сла́ва, и҆ ны́нѣ, бг҃оро́диченъ.
Прокі́менъ, ѱало́мъ р҃і, гла́съ д҃: Нача́ло премꙋ́дрости стра́хъ гдⷭ҇нь. Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ.
Бытїѧ̀ чте́нїе. [Глава̀ л҃а, ст. г҃-ѕ҃і.]
Речѐ гдⷭ҇ь ко і҆а́кѡвꙋ: возврати́сѧ въ зе́млю ѻ҆тца̀ твоегѡ̀, и҆ въ ро́дъ тво́й, и҆ бꙋ́дꙋ съ тобо́ю. Посла́въ же і҆а́кѡвъ, призва̀ лі́ю и҆ рахи́ль на по́ле, и҆дѣ́же бѧ́хꙋ <<тн҃в ѡ҆б.: 704>> стада̀. И҆ речѐ и҆̀мъ: ви́ждꙋ а҆́зъ лицѐ ѻ҆тца̀ ва́шегѡ, ꙗ҆́кѡ нѣ́сть ко мнѣ̀, ꙗ҆́коже вчера̀ и҆ тре́тїѧгѡ днѐ: бг҃ъ же ѻ҆тца̀ моегѡ̀ бѣ̀ со мно́ю. И҆ вы̀ са́ми вѣ́сте, ꙗ҆́кѡ все́ю си́лою мое́ю рабо́тахъ ѻ҆тцꙋ̀ ва́шемꙋ. Ѻ҆те́цъ же ва́шъ ѡ҆би́дѣ мѧ̀, и҆ и҆змѣнѝ мздꙋ̀ мою̀ десѧтѝ а҆́гнцєвъ: но не дадѐ є҆мꙋ̀ бг҃ъ ѕла̀ сотвори́ти мнѣ̀. А҆́ще си́це рече́тъ: пє́стрыѧ бꙋ́детъ твоѧ̀ мзда̀: и҆ родѧ́тсѧ всѧ̑ ѻ҆́вцы пє́стрыѧ. а҆́ще же рече́тъ: бѣ̑лыѧ бꙋ́детъ твоѧ̀ мзда̀: и҆ родѧ́тсѧ всѧ̑ ѻ҆́вцы бѣ̑лыѧ. И҆ ѿѧ̀ бг҃ъ всѧ̑ скоты̀ ѻ҆тца̀ ва́шегѡ, и҆ дадѐ ѧ҆̀ мнѣ̀. И҆ бы́сть є҆гда̀ зачина́хꙋ ѻ҆́вцы во чре́вѣ прїе́млюще: и҆ ви́дѣхъ ѻ҆чи́ма мои́ма во снѣ̀: и҆ сѐ козлы̀ и҆ ѻ҆вны̀ восходѧ́ще бѧ́хꙋ на ѻ҆́вцы и҆ ко́зы, бѣлова̑тыѧ и҆ пє́стрыѧ, и҆ пепелови̑дныѧ пє́стрыѧ. И҆ рече́ ми а҆́гг҃лъ бж҃їй во снѣ̀: і҆а́кѡве. а҆́зъ же рѣ́хъ, что́ є҆сть, И҆ речѐ: воззрѝ ѻ҆чи́ма твои́ма, и҆ ви́ждь козлы̀ и҆ ѻ҆вны̀ восходѧ́щыѧ на ѻ҆́вцы и҆ ко́зы бѣ̑лыѧ, и҆ пє́стрыѧ, и҆ пепелови̑дныѧ пє́стрыѧ: ви́дѣхъ бо, є҆ли̑ка тебѣ̀ лава́нъ твори́тъ. А҆́зъ є҆́смь бг҃ъ ꙗ҆ви́выйсѧ тебѣ̀ на мѣ́стѣ бж҃їи, и҆дѣ́же пома́залъ мѝ є҆сѝ та́мѡ сто́лпъ, и҆ ѡ҆бѣтова́лъ мѝ є҆сѝ та́мѡ ѡ҆бѣ́тъ: ны́нѣ ᲂу҆̀бо воста́ни и҆ и҆зы́ди ѿ землѝ сеѧ̀, и҆ и҆дѝ въ зе́млю рожде́нїѧ твоегѡ̀, и҆ бꙋ́дꙋ съ тобо́ю. И҆ ѿвѣща́вше рахи́ль и҆ лі́а, реко́стѣ є҆мꙋ̀: є҆да̀ є҆́сть на́мъ є҆щѐ ча́сть и҆лѝ наслѣ́дїе въ домꙋ̀ ѻ҆тца̀ на́шегѡ; Не ꙗ҆́кѡ ли чꙋжды̑ѧ вмѣни́хомсѧ є҆мꙋ̀; продаде́ бо на́съ, и҆ снѣдѐ снѣ́дїю сребро̀ на́ше. Всѐ бога́тство и҆ сла́ва, ю҆́же ѿѧ̀ бг҃ъ ѿ ѻ҆тца̀ на́шегѡ, на́мъ бꙋ́детъ и҆ ча́дѡмъ на́шымъ: ны́нѣ ᲂу҆́бѡ є҆ли̑ка тебѣ̀ речѐ бг҃ъ, творѝ.
Прокі́менъ, ѱало́мъ ра҃і гла́съ д҃: Млⷭ҇тивъ, и҆ ще́дръ, и҆ првⷣнъ: Сті́хъ: Бл҃же́нъ мꙋ́жъ боѧ́йсѧ гдⷭ҇а. <<тн҃в ѡ҆б.: 704>>
При́тчей чте́нїе. [Глава̀ к҃а, ст. г҃-к҃а.]
Сы́не, твори́ти пра́вєднаѧ, и҆ и҆́стинствовати, ᲂу҆гѡ́дна бг҃ꙋ па́че не́жели же́ртвъ кро́вь. Велемꙋ́дрый во ᲂу҆кори́знѣ дерзосе́рдъ: свѣти́ло же нечести́выхъ грѣсѝ. Помышлє́нїѧ тщали́вагѡ во и҆з̾ѻби́лїи: и҆ всѧ́къ неради́вый въ лише́нїи. Дѣ́лаѧй сокрѡ́вища ѧ҆зы́комъ лжи́вымъ, сꙋ́єтнаѧ го́нитъ въ сѣ̑ти смє́ртныѧ. Всегꙋби́тельство на нечести̑выѧ ᲂу҆стремлѧ́етсѧ: не хотѧ́тъ бо твори́ти пра́вєднаѧ. Къ стро́пѡтнымъ стро́пѡтныѧ пꙋти̑ посыла́етъ бг҃ъ: чи́ста бо и҆ пра́ва дѣла̀ є҆гѡ̀. Лꙋ́чше жи́ти во ᲂу҆́глѣ непокрове́нномъ, не́жели въ пова́пленныхъ съ непра́вдою, и҆ въ хра́минѣ ѻ҆́бщей. Дꙋша̀ нечести́вагѡ не поми́лꙋетсѧ ни ѿ є҆ди́нагѡ ѿ человѣ́кѡвъ. Тщетꙋ̀ прїе́млющꙋ невозде́ржномꙋ, кова́рнѣйшїй бꙋ́детъ неѕло́бивый: разꙋмѣва́ѧй же мꙋ́дрый прїи́метъ ра́зꙋмъ. Разꙋмѣва́етъ пра́ведный сердца̀ нечести́выхъ, и҆ ᲂу҆ничтожа́етъ нечести̑выѧ въ ѕлы́хъ. И҆́же затыка́етъ ᲂу҆шеса̀ своѧ̑, є҆́же не послꙋ́шати немощна́гѡ, и҆ то́й призове́тъ, и҆ не бꙋ́детъ послꙋ́шаѧй є҆гѡ̀. Даѧ́нїе та́йно ѿвраща́етъ гнѣ́вы, щадѧ́й же дарѡ́въ воздвиза́етъ ꙗ҆́рость крѣ́пкꙋю. Весе́лїе пра́ведныхъ твори́ти сꙋ́дъ: преподо́бный же нечи́стъ ᲂу҆ ѕлодѣ́євъ. Мꙋ́жъ заблꙋжда́ѧй ѿ пꙋтѝ пра́вды, въ со́нмищи и҆споли́нѡвъ почі́етъ. Мꙋ́жъ скꙋ́денъ лю́битъ весе́лїе, любѧ́й же вїно̀ и҆ є҆ле́й не ѡ҆богати́тсѧ. Ѡ҆тре́бїе же пра́ведникꙋ беззако́нникъ. Лꙋ́чше жи́ти въ землѝ пꙋ́стѣ, не́же жи́ти съ жено́ю сварли́вою, и҆ ѧ҆зы́чною и҆ гнѣвли́вою. Сокро́вище вожделѣ́нно почі́етъ во ᲂу҆стѣ́хъ мꙋ́драгѡ: безꙋ́мнїи же мꙋ́жи пожира́ютъ є҆̀. Пꙋ́ть пра́вды и҆ ми́лостыни ѡ҆брѧ́щетъ живо́тъ и҆ сла́вꙋ. <<тн҃г: 705>>
На стїхо́внѣ самогла́сенъ днѐ, два́жды. Гла́съ а҃:
Въ багрѧни́цꙋ самоде́ржства бг҃отка́ннꙋю, и҆ въ червлени́цꙋ нетлѣ́нїѧ ѡ҆дѣ́ѧвшисѧ, ѽ дꙋшѐ моѧ̀, своѐ досто́инство порꙋга́ла є҆сѝ, бога́тство и҆ наслажде́нїе, грѣ́хъ сотвори́вши, и҆ презира́ющи своего̀ сплеме́нника, ꙗ҆́коже презрѣ̀ ни́щаго ла́зарѧ бога́тый. но да не со ѻ҆́нѣмъ мꙋ́чена бꙋ́деши, ѡ҆бнища́й дх҃омъ, и҆ ѡ҆бнища́вшемꙋ тебѐ ра́ди гдⷭ҇ви возопі́й: багрѧни́цею порꙋга́нїѧ пре́жде распѧ́тїѧ ѡ҆болкі́йсѧ, и҆ на́гъ на крⷭ҇тѣ̀ распны́йсѧ менѐ ра́ди, твоегѡ̀ црⷭ҇твїѧ ѡ҆дѣѧ́нїемъ, ѿ стꙋда̀ вѣ́чнагѡ хрⷭ҇тѐ и҆зба́ви мѧ̀.
Мꙋ́чениченъ: Ѽ до́брыѧ кꙋ́пли ва́шеѧ ст҃і́и! ꙗ҆́кѡ крѡ́ви да́сте, и҆ нб҃са̀ наслѣ́довасте: и҆ вре́меннѡ и҆скꙋси́вшесѧ, вѣ́чнѡ ра́дꙋетесѧ. вои́стиннꙋ до́браѧ ва́ша кꙋ́плѧ: тлѣ̑ннаѧ бо ѡ҆ста́вльше, нетлѣ̑ннаѧ воспрїѧ́сте, и҆ со а҆́гг҃лы ликꙋ́юще, пое́те непреста́ннѡ трⷪ҇цꙋ є҆диносꙋ́щнꙋю.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Прехва́льнїи мч҃нцы:
Ме́чь про́йде, ѽ сн҃е, дв҃а глаго́лаше, на дре́вѣ ꙗ҆́кѡ ᲂу҆зрѣ̀ хрⷭ҇та̀ ви́сѧща, моѐ се́рдце, и҆ терза́етъ влⷣко, ꙗ҆́коже дре́вле сѷмеѡ́нъ мнѣ̀ предречѐ: но воста́ни, и҆ спросла́ви безсме́ртне, мт҃рь и҆ рабꙋ̀ твою̀, молю́сѧ.
Въ сре́дꙋ ва́їй, на ᲂу҆́трени
трⷪ҇чны гла́са. По а҃-мъ стїхосло́вїи сѣда́льны кре́стны ѻ҆смогла́сника два̀, съ крⷭ҇тобг҃оро́дичнымъ. По в҃-мъ же стїхосло́вїи сѣда́ленъ господи́на і҆ѡ́сифа. Гла́съ в҃. Подо́бенъ: Ка́мень гро́бный:
Ꙗ҆́кѡ ка́менемъ ѡ҆тѧгче́нъ мно́гими грѣха́ми, во гро́бѣ лежꙋ̀ небреже́нїѧ ще́дре: ѿ негѡ́же мѧ̀ возведѝ, бл҃гоꙋтро́бне гдⷭ҇и. [Два́жды.] <<тн҃г ѡ҆б.: 706>>
Крⷭ҇тобг҃оро́диченъ.
Подо́бенъ: Милосе́рдїѧ:
Чⷭ҇тны́мъ крⷭ҇то́мъ сн҃а твоегѡ̀ соблюда́еми влⷣчце чⷭ҇таѧ бцⷣе, всѧ́кїй прило́гъ бори́телѧ, всѝ ᲂу҆до́бь ѿража́емъ. тѣ́мже тѧ̀ по до́лгꙋ прославлѧ́емъ ꙗ҆́кѡ мт҃рь свѣ́та, и҆ є҆ди́нꙋ наде́ждꙋ дꙋ́шъ на́шихъ.
По г҃-мъ стїхосло́вїи сѣда́ленъ, господи́на ѳео́дѡра. Гла́съ г҃.
Подо́бенъ: Красотѣ̀ дѣ́вства:
Дне́сь ла́зарь ᲂу҆ме́рый погреба́етсѧ, и҆ рыда́нїе пою́тъ сегѡ̀ срѡ́дницы, ꙗ҆́коже прови́децъ и҆ бг҃ъ, стрⷭ҇ть предре́клъ є҆сѝ: ла́зарь ᲂу҆́спе, ᲂу҆ч҃нкѡ́мъ провѣща́ѧ, но ны́нѣ и҆дꙋ̀ воскреси́ти є҆го́же созда́хъ. сегѡ̀ ра́ди тебѣ̀ всѝ вопїе́мъ: сла́ва держа́вѣ крѣ́пости твоеѧ̀. [Два́жды.]
Крⷭ҇тобг҃оро́диченъ: Неискꙋсобра́чнаѧ чⷭ҇таѧ, и҆ мт҃и твоѧ̀ хрⷭ҇тѐ, зрѧ́щи тѧ̀ ме́ртва ви́сѧща на дре́вѣ, мт҃рски рыда́ющи глаго́лаше: что́ ти воздадѐ є҆вре́йскїй беззако́нный собо́ръ безбл҃года́тный, мно́гихъ и҆ вели́кихъ твои́хъ дарѡ́въ, сн҃е мо́й, наслажде́йсѧ; пою̀ твоѐ бж҃е́ственное снизхожде́нїе.
Канѡ́нъ въ мине́и: и҆ трипѣ́снецъ, господи́на і҆ѡ́сифа, гла́съ в҃.
Пѣ́снь г҃.
І҆рмо́съ: Непло́дствовавшїй мо́й ᲂу҆́мъ:
Си́лою крⷭ҇та̀ твоегѡ̀ ᲂу҆крѣпи́въ ᲂу҆́мъ мо́й, и҆знемо́гшїй прило́гми лꙋка́выми, къ хотѣ́нїю твоемꙋ̀ напра́ви гдⷭ҇и.
Оу҆ны́нїѧ дрема́нїемъ, на ѻ҆дрѣ̀ спѧ́ща мѧ̀ сласте́й воздви́гни гдⷭ҇и, и҆ твои̑мъ стрⷭ҇те́мъ покло́нника покажѝ.
Просвѣти́вшесѧ дꙋша́ми, посто́мъ чи́сты ᲂу҆срѣ́сти по́йдемъ хрⷭ҇та̀, ко і҆ерⷭ҇ли́мꙋ грѧдꙋ́щаго пло́тїю. <<тн҃д: 707>>
Бг҃оро́диченъ: Неѡпали́вшаѧсѧ ѻ҆гне́мъ бж҃ества̀ чⷭ҇таѧ, попалѝ моѧ̑ вє́щнаѧ стремлє́нїѧ страсте́й, ꙗ҆́кѡ да вѣ́рнѡ чⷭ҇таѧ сла́влю тѧ̀.
И҆́ный. Гла́съ г҃. І҆рмо́съ: Непло́днаѧ дꙋшѐ:
Дне́сь ла́зарь ᲂу҆ме́рый, не ᲂу҆таи́сѧ всеви́дѧщагѡ ѻ҆́ка і҆и҃сова. тѣ́мже сказꙋ́етъ сїѐ ᲂу҆ч҃нкѡ́мъ, вопїѧ̀: ла́зарь дрꙋ́гъ на́шъ ᲂу҆́спе, воскреси́ти є҆го̀ и҆дꙋ̀.
Во і҆ꙋде́ю гдⷭ҇и па́ки и҆тѝ ре́къ, ᲂу҆ч҃нкѝ ᲂу҆страши́лъ є҆сѝ, но де́рзостнѡ вопїѧ́ше ѳѡма̀: живо́тъ є҆́сть, и҆́демъ, а҆́ще ᲂу҆́бѡ и҆ ᲂу҆́мремъ, а҆́бїе ѡ҆живе́мъ.
Трⷪ҇ченъ: Трⷪ҇це є҆диносꙋ́щнаѧ, вседержи́телю ѻ҆́ч҃е, сн҃е собезнача́льный, съ сопресто́льнымъ бж҃е́ственнымъ дх҃омъ, є҆ди́но поклоне́нїе, бж҃ество̀ несозда́нное, тебѐ пое́мъ всѝ человѣ́цы.
Бг҃оро́диченъ: Дв҃о мт҃и пречⷭ҇таѧ, ко́реню і҆ессе́овъ, ѿ негѡ́же хрⷭ҇то́съ возсїѧ̀, живоно́сный цвѣ́тъ земноро́дныхъ, є҆́юже и҆зба́вихомсѧ тлѝ и҆ сме́рти, тѧ̀ пое́мъ всѝ чⷭ҇таѧ.
Сла́ва тебѣ̀ бж҃е на́шъ, сла́ва тебѣ̀.
Ра́дꙋйсѧ сїѡ́не, ны́нѣ грѧде́тъ цр҃ь тво́й кро́токъ, ꙗ҆́коже прⷪ҇ро́къ возопѝ, и҆ но́ситъ жребѧ̀ сего̀ пло́тски, рꙋко́ю свое́ю всѧ̑ содержа́щаго: пое́мъ держа́вꙋ є҆гѡ̀.
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть пра́веденъ, па́че тебѐ гдⷭ҇и.
Пѣ́снь и҃.
І҆рмо́съ: Въ кꙋпинѣ̀ мѡѷсе́ю:
Смире́нныѧ моеѧ̀ дꙋшѝ тѧ́жкїй ка́мень лю́тагѡ ᲂу҆ны́нїѧ ѿвалѝ хрⷭ҇тѐ, и҆ воздви́гни мѧ̀ ѿ гро́ба нечꙋ́вствїѧ въ сла́вꙋ твою̀ сло́ве. <<тн҃д ѡ҆б.: 708>>
Сме́рть дрꙋ́га твоегѡ̀ предсказа́лъ є҆сѝ дрꙋгѡ́мъ, за млⷭ҇рдїе млⷭ҇ти, прови́дче и҆ бж҃е: є҆го́же и҆мѣ́лъ є҆сѝ воздви́гнꙋти и҆з̾ гро́ба четверодне́вна, къ твоемꙋ̀ славосло́вїю.
Во і҆ꙋде́ю па́ки хрⷭ҇тѐ грѧде́ши, и҆́щꙋщꙋю жи́зни тѧ̀ дре́во, дре́вомъ ᲂу҆би́ти, жела́ѧ ѡ҆безсме́ртвити ᲂу҆мерщвлє́нныѧ дре́ва снѣ́дїю.
Бг҃оро́диченъ: Въ тебѣ̀ дв҃о чⷭ҇таѧ, ви̑дѣна бы́ша всѧ̑ шє́ствїѧ бг҃а, сохра́ншагѡ твою̀ чистотꙋ̀ по ржⷭ҇твѣ̀, запечатлѣ́ннꙋ ꙗ҆́вѣ во всѧ̑ вѣ́ки.
И҆́ный. І҆рмо́съ: И҆з̾ безнача́льнагѡ ѻ҆ц҃а̀:
Ла́зарь дне́сь ᲂу҆ме́рый и҆зно́ситсѧ, дрꙋ́гъ хрⷭ҇то́въ, и҆ рыда́ютъ сꙋ́щїи съ марі́ею и҆ ма́рѳою всѝ: хрⷭ҇то́съ же ра́достїю прихо́дитъ къ немꙋ̀, показа́ти лю́демъ, ꙗ҆́кѡ то́й є҆́сть живо́тъ всѣ́хъ.
Ꙗ҆́кѡ и҆з̾ горы̀ є҆леѡ́нскїѧ, ѿ высоты̀ ми́лостыней, добродѣ́телей вѣ́твїе лю́дїе сѣкꙋ́ще, прїиди́те ᲂу҆гото́вимъ къ на́мъ мы́сленнѡ прише́ствїе хрⷭ҇то́во, пою́ще, бл҃гословѧ́ще є҆го̀, и҆ превозносѧ́ще во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Трїѷпоста́снаѧ є҆ди́нице, ѻ҆́ч҃е, сн҃е и҆ дш҃е живы́й, є҆ди́но бж҃ество̀, є҆ди́но црⷭ҇тво, тѧ̀ хва́лѧтъ незаходи́маго свѣ́та а҆́гг҃льскаѧ вѡ́инства, и҆ мы̀ земні́и пое́мъ, бл҃гослови́мъ, и҆ превозно́симъ во всѧ̑ вѣ́ки.
Бг҃оро́диченъ: Сѐ всѝ ро́дове бл҃жи́мъ тѧ̀ пречⷭ҇таѧ, вели̑чїѧ твоѧ̑ зрѧ́ще: ты́ бо ражда́еши преесте́ственнѡ всѣ́хъ творца̀ бг҃а сꙋ́ща и҆ человѣ́ка. тѣ́мже тѧ̀ бл҃гослови́мъ, и҆ превозно́симъ во вѣ́ки.
Сла́ва тебѣ̀ бж҃е на́шъ, сла́ва тебѣ̀.
Со ѻ҆́троки и҆ мы̀ ᲂу҆срѧ́щимъ хрⷭ҇та̀ бг҃а, вмѣ́стѡ ва́їй приносѧ́ще ми́лостыню, въ мл҃твѣ серде́чнѣй, съ <<тн҃є: 709>> вѣ́твьми ѡ҆са́нна вопїю́ще: бл҃гослови́те, и҆ превозноси́те є҆го̀ во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: И҆з̾ безнача́льнагѡ ѻ҆ц҃а̀ рожде́ннаго пре́жде вѣ̑къ бг҃а, и҆ въ послѣ̑днѧѧ ѿ бцⷣы въ пло́ть ѡ҆бле́кшасѧ, ꙗ҆́кѡ соверше́нна человѣ́ка, и҆ бг҃а и҆́стинна, по́йте, бл҃гослови́те, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ѿ земноро́дныхъ кто̀:
Данїи́лъ посто́мъ ѡ҆гражде́нъ, заградѝ ᲂу҆ста̀ ѕвѣре́й: семꙋ̀ ревнꙋ́ющи дꙋшѐ моѧ̀, рыка́ющаго ꙗ҆́коже льва̀ ѕмі́ѧ, и҆ и҆́щꙋщаго бра́шно сотвори́ти всѧ́кꙋю дꙋ́шꙋ, крⷭ҇тною по́мощїю ѿженѝ.
Сло́ве бж҃їй, ᲂу҆мерщвле́ннꙋю грѣха́ми дꙋ́шꙋ мою̀, и҆ затворе́ннꙋю во гро́бѣ престꙋпле́нїѧ, животода́тельнымъ твои́мъ сло́вомъ воскреси́въ, принестѝ тебѣ̀ вѣ̑тви добродѣ́телей, побѣди́телю сме́рти, сподо́би.
Нб҃о ꙗ҆́кѡ прⷭ҇то́лъ и҆мѣ́ѧй, и҆ подно́жїе зе́млю: бг҃а ѻ҆ц҃а̀ сло́во, на жребѧ́ти носи́мь, во гра́дъ вхо́дитъ ст҃ы́й и҆з̾ ᲂу҆́стъ младе́нєцъ хвалꙋ̀ кра́снꙋю, ꙗ҆́кѡ цр҃ь всѣ́хъ соверши́ти.
Бг҃оро́диченъ: Въ жена́хъ ты̀ є҆ди́на ᲂу҆краси́ласѧ є҆сѝ, ѽ пречꙋ́днаѧ чⷭ҇таѧ! краснѣ́йшее сло́во роди́вши, па́че всѣ́хъ человѣ̑къ ꙗ҆́вльшагосѧ краснѣ́йша: того̀ ᲂу҆̀бо молѝ, скве́рнꙋ ѡ҆чи́стити, дв҃о, се́рдца моегѡ̀.
И҆́ный. І҆рмо́съ: На сїна́йстѣй горѣ̀:
Надгрѡ́бныѧ сле́зы и҆злива́ютъ ла́зарєвы сєстры̀, зрѧ́щыѧ сро́дника дне́сь под̾ ка́менемъ го́рькимъ: хрⷭ҇то́съ же мо́й и҆здале́ча сїѐ сказꙋ́ѧ, глаго́лаше а҆пⷭ҇лѡмъ свои̑мъ, ра́дꙋюсѧ ва́съ ра́ди, не бѣ́хъ бо пло́тїю та́мѡ. <<тн҃є ѡ҆б.: 710>>
Па́ки грѧде́тъ къ тебѣ̀, ᲂу҆бі́йце і҆ꙋде́е, хрⷭ҇то́съ, сп҃си́тельнꙋю стрⷭ҇ть жела́ѧ и҆спо́лнити ꙗ҆́кѡ бг҃ъ: є҆го́же и҆ска́ла є҆сѝ ка́менїемъ ᲂу҆би́ти, сѐ къ тебѣ̀ самозва́нъ хотѧ̀ прихо́дитъ ко ᲂу҆бі́йствꙋ твоемꙋ̀, во є҆́же сп҃стѝ на́съ.
Трⷪ҇ченъ: Бж҃ество̀ є҆ди́ница, и҆ трⷪ҇ца є҆́сть: ѽ пресла́внагѡ ѡ҆браще́нїѧ! соединѧ́емаѧ є҆стество́мъ, дѣли́тсѧ ли́цы, сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ: сїѧ̀ ѻ҆ц҃ъ є҆́сть, сн҃ъ, и҆ дх҃ъ живы́й, соблюда́ющаѧ всѐ.
Бг҃оро́диченъ: Дѣторо́днꙋю дв҃ꙋ кто̀ слы́ша, и҆ мт҃рь без̾ мꙋ́жа; мр҃і́е соверша́еши чꙋ́до: но скажи́ ми, ка́кѡ; не и҆спытꙋ́й глꙋбины̀ бг҃орожде́нїѧ моегѡ̀: сїѐ всеи́стинное, па́че человѣ́ча ᲂу҆ма̀ постиже́нїе.
Сла́ва тебѣ̀ бж҃е на́шъ, сла́ва тебѣ̀.
Ѿ фі̑нїкъ ва̑їа спле́тше мы́сленнѡ, и҆ чꙋ́вственнѡ срѣ́тенїе влⷣцѣ сотвори́мъ, грѧдꙋ́щемꙋ къ на́мъ: и҆́бо бл҃гослове́нъ грѧды́й во и҆́мѧ гдⷭ҇а же и҆ ѻ҆ц҃а̀, ꙗ҆́кѡ сн҃ъ и҆́стинный.
І҆рмо́съ: На сїна́йстѣй горѣ̀, ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.
Свѣти́ленъ гла́са.
На стїхо́внѣ стїхи́ра самогла́сна днѐ, два́жды. Гла́съ а҃:
І҆и҃ль въ порфѵ́рꙋ и҆ червлени́цꙋ ѡ҆блача́шесѧ, ѻ҆де́ждами сщ҃е́нными и҆ црⷭ҇кими сїѧ́ѧ: зако́номъ же и҆ прⷪ҇ро́ки богатѣ́ѧ, зако́нными слꙋ́жбами веселѧ́шесѧ: но тебѐ ѡ҆бнища́вшаго распе́нъ внѣ̀ вра́тъ бл҃годѣ́телю, и҆ жи́ва по распѧ́тїи ѿмета́ѧсѧ, въ нѣ́драхъ бг҃а ѻ҆ц҃а̀ присносꙋ́щнагѡ, жа́ждетъ ка́пли бл҃года́ти: ꙗ҆́коже бога́тый неми́лостивый ѿ ла́зарѧ ᲂу҆бо́гагѡ, и҆́же въ порфѵ́рѣ и҆ червлени́цѣ, въ негаси́мый ѻ҆́гнь вше́дъ: и҆ ви́дѧ болѣ́знꙋетъ, пе́рвѣе крꙋпи́цъ и҆́стины скꙋ̑дныѧ лю́ди ꙗ҆зы́чєскїѧ, ны́нѣ въ нѣ́дрѣхъ вѣ́ры а҆враа́ма грѣ́ющыѧсѧ, <<тн҃ѕ: 711>> твоеѧ̀ кро́ве багрѧни́цꙋ съ червлени́цею кр҃ще́нїѧ носѧ́щыѧ, и҆ твои́ми ѡ҆би́лꙋющыѧ и҆ наслажда́ющыѧсѧ дарова́нїи, и҆ глаго́лющыѧ: хрⷭ҇тѐ бж҃е на́шъ сла́ва тебѣ̀.
Мꙋ́чениченъ: Ва́съ прехва́льнїи мч҃нцы, ни ско́рбь, ни тѣснота̀, ни гла́дъ, ни гоне́нїе нижѐ ра̑ны, ни ꙗ҆́рость ѕвѣре́й, ни ме́чь, нижѐ ѻ҆́гнь претѧ́й, разлꙋчи́ти ѿ бг҃а возмого́ша: любо́вїю же па́че къ немꙋ̀, ꙗ҆́кѡ въ чꙋжди́хъ подви́гшесѧ тѣлесѣ́хъ є҆стество̀ забы́сте, сме́рть презрѣ́вше. тѣ́мже и҆ по достоѧ́нїю болѣ́зней ва́шихъ мздꙋ̀ прїѧ́сте, нбⷭ҇нагѡ црⷭ҇твїѧ наслѣ̑дницы бы́сте, моли́тесѧ ѡ҆ дꙋша́хъ на́шихъ.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Всехва́льнїи мч҃нцы:
Ви́дѧщи ви́сима хрⷭ҇тѐ, чи́стѡ ро́ждшаѧ тѧ̀, повѣ́сившаго на вода́хъ зе́млю чл҃вѣколю́бче, взыва́ше: ᲂу҆вы̀ мнѣ̀, что̀ стра́нное видѣ́нїе, ка́кѡ за́йде добро́та твоѧ̀, сладча́йшїй сн҃е, безмѣ́рнаѧ, велича́ю твою̀ млⷭ҇ть, ꙗ҆́кѡ стра́ждеши во́лею за всѣ́хъ.
На ѕ҃-мъ часѣ̀ тропа́рь прⷪ҇ро́чества. Гла́съ є҃:
Млⷭ҇ти твоѧ̑ гдⷭ҇и сотворѝ съ на́ми, и҆ не преда́ждь на́съ беззако́нїемъ на́шымъ, ст҃ы́й влⷣко вседержи́телю, тебѣ̀ мо́лимсѧ.
Прокі́менъ,ѱало́мъ рв҃і. Гла́съ д҃: Хвали́те ѻ҆́троцы гдⷭ҇а, хвали́те и҆́мѧ гдⷭ҇не. Сті́хъ: Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка.
Прⷪ҇ро́чества и҆са́їина чте́нїе. [Глава̀ н҃и, ст. а҃- а҃і.]
Та́кѡ глаго́летъ гдⷭ҇ь: возопі́й крѣ́постїю и҆ не пощадѝ: ꙗ҆́кѡ трꙋбꙋ̀ возвы́си гла́съ тво́й и҆ возвѣстѝ лю́демъ мои̑мъ грѣхѝ и҆́хъ и҆ до́мꙋ і҆а́кѡвлю беззакѡ́нїѧ и҆́хъ. Менѐ де́нь ѿ днѐ и҆́щꙋтъ и҆ разꙋмѣ́ти пꙋти̑ моѧ̑ жела́ютъ, ꙗ҆́кѡ лю́дїе пра́вдꙋ сотвори́вшїи и҆ сꙋда̀ бг҃а своегѡ̀ не ѡ҆ста́вившїи: про́сѧтъ ны́нѣ <<тн҃ѕ ѡ҆б.: 712>> ᲂу҆ менє̀ сꙋда̀ пра́ведна, и҆ прибли́житисѧ ко гдⷭ҇ꙋ жела́ютъ, глаго́люще: Что̀ ꙗ҆́кѡ пости́хомсѧ, и҆ не ᲂу҆ви́дѣлъ є҆сѝ; смири́хомъ дꙋ́шы на́шѧ, и҆ не ᲂу҆вѣ́дѣлъ є҆сѝ; во дни̑ бо поще́нїй ва́шихъ ѡ҆брѣта́ете вѡ́ли ва́шѧ, и҆ всѧ̑ подрꙋ̑чныѧ ва́шѧ томитѐ. А҆́ще въ сꙋдѣ́хъ и҆ сва́рѣхъ постите́сѧ, и҆ бїе́те пѧстьмѝ смире́ннаго, вскꙋ́ю мнѣ̀ постите́сѧ ꙗ҆́коже дне́сь, є҆́же ᲂу҆слы́шанꙋ бы́ти съ во́племъ гла́сꙋ ва́шемꙋ; Не сицева́гѡ поста̀ а҆́зъ и҆збра́хъ, и҆ днѐ, є҆́же смири́ти человѣ́кꙋ дꙋ́шꙋ свою̀, нижѐ а҆́ще слѧче́ши ꙗ҆́кѡ се́рпъ вы́ю твою̀, и҆ вре́тище и҆ пе́пелъ посте́леши, нижѐ та́кѡ нарече́те по́стъ прїѧ́тенъ. Не такова́гѡ [бо] поста̀ а҆́зъ и҆збра́хъ, глаго́летъ гдⷭ҇ь: но разрѣша́й всѧ́къ соꙋ́зъ непра́вды, разрꙋша́й ѡ҆бдолжє́нїѧ наси́льныхъ писа́нїй, ѿпꙋстѝ сокрꙋшє́нныѧ въ свобо́дꙋ, и҆ всѧ́кое писа́нїе непра́ведное раздерѝ. Раздроблѧ́й а҆́лчꙋщымъ хлѣ́бъ тво́й, и҆ ни́щыѧ безкрѡ́вныѧ введѝ въ до́мъ тво́й: а҆́ще ви́диши на́га, ѡ҆дѣ́й, и҆ ѿ сво́йственныхъ пле́мене твоегѡ̀ не пре́зри. Тогда̀ разве́рзетсѧ ра́нѡ свѣ́тъ тво́й, и҆ и҆сцѣлє́нїѧ твоѧ̑ ско́рѡ возсїѧ́ютъ: и҆ пред̾и́детъ пред̾ тобо́ю пра́вда твоѧ̀, и҆ сла́ва бж҃їѧ ѡ҆б̾и́метъ тѧ̀. Тогда̀ воззове́ши, и҆ бг҃ъ ᲂу҆слы́шитъ тѧ̀, и҆ є҆щѐ глаго́лющꙋ тѝ, рече́тъ: сѐ прїидо́хъ. а҆́ще ѿи́меши ѿ себѐ соꙋ́зъ, и҆ рꙋкобїе́нїе, и҆ глаго́лъ ропта́нїѧ, И҆ да́си а҆́лчꙋщемꙋ хлѣ́бъ ѿ дꙋшѝ твоеѧ̀, и҆ дꙋ́шꙋ смире́ннꙋю насы́тиши: тогда̀ возсїѧ́етъ во тьмѣ̀ свѣ́тъ тво́й, и҆ тьма̀ твоѧ̀ бꙋ́детъ ꙗ҆́кѡ полꙋ́дне. И҆ бꙋ́детъ бг҃ъ тво́й съ тобо́ю при́снѡ.
Прокі́менъ ѱало́мъ рг҃і. Гла́съ ѕ҃. Бл҃гослове́ни вы̀ гдⷭ҇ви сотво́ршемꙋ нб҃о и҆ зе́млю. Сті́хъ: Нб҃о нб҃сѐ гдⷭ҇ви, зе́млю же дадѐ сыновѡ́мъ человѣ́чєскимъ. <<тн҃з: 713>>
Въ сре́дꙋ ве́чера
ѻ҆бы́чное стїхосло́вїе. На Гдⷭ҇и воззва́хъ, поста́вимъ стїхѡ́въ і҃. и҆ пое́мъ настоѧ́щїй самогла́сенъ днѐ два́жды.
Гла́съ є҃:
Бога́тый въ страсте́хъ сы́й, преле́стною лицемѣ́рїѧ ѡ҆бложе́нъ є҆́смь ѻ҆де́ждою, веселѧ́сѧ въ ѕлы́хъ невоздержа́нїѧ, и҆ безмѣ́рное немилосе́рдїе показꙋ́ю, презира́ѧ мо́й ᲂу҆́мъ, пред̾ две́рьми пове́рженный покаѧ́нїѧ, а҆́лчꙋщїй всѧ́кагѡ бл҃га, и҆ болѧ́щїй невнима́нїемъ мои́мъ: но ты̀ гдⷭ҇и ла́зарѧ мѧ̀ сотворѝ, ни́щаго грѣха́ми, да не ка́кѡ тре́бꙋѧй, не полꙋчꙋ̀ пе́рста ѡ҆роша́юща, болѣ́знꙋющꙋ моемꙋ̀ ѧ҆зы́кꙋ въ негаси́момъ ѻ҆гнѝ: въ нѣ́дрѣхъ же патрїа́рха а҆враа́ма вселѝ менѐ, ꙗ҆́кѡ чл҃вѣколю́бецъ.
Мч҃нченъ: Несы́тною любо́вїю дꙋшѝ хрⷭ҇та̀ не ѿверго́стесѧ ст҃і́и мч҃нцы, и҆̀же разли́чныѧ ра̑ны стрⷭ҇те́й претерпѣ́вше, мꙋчи́телей де́рзость низложи́сте: непрекло́ннꙋ и҆ невреди́мꙋ вѣ́рꙋ сохра́нше, на нб҃са̀ преста́вистесѧ. тѣ́мже и҆ дерзнове́нїе полꙋчи́вше къ немꙋ̀, проси́те дарова́ти на́мъ ве́лїю млⷭ҇ть.
И҆́ны стїхи̑ры господи́на і҆ѡ́сифа. Гла́съ є҃.
Подо́бенъ: Ра́дꙋйсѧ по́стникѡмъ:
Ѡ҆б̾ ѻ҆нꙋ̀ странꙋ̀ і҆ѻрда́на пло́тїю ходѧ̀ і҆и҃се, съ тобо́ю сꙋ́щымъ вопи́лъ є҆сѝ: дрꙋ́гъ ла́зарь ᲂу҆жѐ ᲂу҆́мре, и҆ погребе́нїю ны́нѣ предаде́сѧ. тѣ́мже ра́дꙋюсѧ дрꙋ́зи моѝ ва́съ ра́ди, да вѣ́сте, ꙗ҆́кѡ всѧ̑ вѣ́мъ, бг҃ъ сы́й непрело́жный, а҆́ще и҆ ꙗ҆влѧ́юсѧ ви́димый человѣ́къ. и҆́демъ ᲂу҆̀бо ѡ҆живи́ти є҆го̀, ꙗ҆́кѡ да сме́рть ѡ҆щꙋти́тъ сегѡ̀ <<тн҃з ѡ҆б.: 714>> побѣ́дꙋ, и҆ соверше́нное разрꙋше́нїе, ꙗ҆́вѣ є҆̀ сотворю̀, подаѧ̀ мі́рови ве́лїю млⷭ҇ть.
Ма́рѳꙋ и҆ марі́ю вѣ́рнїи подража́юще, ко гдⷭ҇ꙋ по́слемъ бж҃е́ствєннаѧ дѣѧ̑нїѧ ꙗ҆́кѡ мл҃твы, ꙗ҆́кѡ да прише́дъ на́шъ ᲂу҆́мъ воскр҃си́тъ, ме́ртвъ лежа́щїй лю́тѣ во гро́бѣ лѣ́ности нечꙋ́вственный, стра́ха бж҃е́ственнагѡ ника́коже ѡ҆щꙋща́ющїй, и҆ дѣ́йствъ живо́тныхъ ны́нѣ не и҆мꙋ́щїй, зовꙋ́ще: ви́ждь гдⷭ҇и, и҆ ꙗ҆́коже дрꙋ́га твоего̀ ла́зарѧ дре́вле ще́дре, предста́нїемъ воздви́глъ є҆сѝ стра́шнымъ, си́це всѣ́хъ ѡ҆живѝ, подаѧ́й ве́лїю млⷭ҇ть.
И҆́на стїхи́ра господи́на ѳео́дѡра, гла́съ ѕ҃.
Подо́бенъ: Гдⷭ҇и на гро́бъ:
Двоеде́нствꙋетъ ла́зарь во гро́бѣ, сꙋ́щыѧ ѿ вѣ́ка ви́дитъ ᲂу҆ме́ршыѧ, та́мѡ зри́тъ стра́хи стра̑нныѧ, мно́жество неисче́тное а҆́довыми держи́мое ᲂу҆́зами: тѣ́мже срѡ́дницы рыда́ютъ го́рькѡ, предви́дѧще гро́бъ є҆гѡ̀. хрⷭ҇то́съ же и҆́детъ ѡ҆живи́ти дрꙋ́га своего̀, є҆ди́но ѿ всѣ́хъ соверши́ти согла́сїе: бл҃гослове́нъ є҆сѝ сп҃се, поми́лꙋй на́съ.
И҆ въ мине́и д҃.
Прокі́менъ, ѱало́мъ рд҃і. Гла́съ д҃: Бл҃гоꙋгождꙋ̀ пред̾ гдⷭ҇емъ во странѣ̀ живы́хъ. Сті́хъ: Возлюби́хъ, ꙗ҆́кѡ ᲂу҆слы́шитъ гдⷭ҇ь гла́съ моле́нїѧ моегѡ̀.
Бытїѧ̀ чте́нїе. [Глава̀ м҃г, ст. к҃ѕ-л҃а, глава̀ м҃ѕ, ст. а҃-ѕ҃і.]
Принесо́ша і҆ѡ́сифꙋ бра́тїѧ є҆гѡ̀ да́ры, ꙗ҆̀же и҆мѧ́хꙋ въ рꙋка́хъ свои́хъ, въ до́мъ: и҆ поклони́шасѧ є҆мꙋ̀ лице́мъ до землѝ. И҆ вопросѝ и҆̀хъ: здра́ви ли є҆стѐ; и҆ речѐ и҆̀мъ: здра́въ ли є҆́сть ѻ҆те́цъ ва́шъ ста́рецъ, є҆го́же реко́сте, є҆ще́ ли жи́въ є҆́сть; Ѻ҆ни́ же реко́ша: здра́въ є҆́сть ра́бъ тво́й ѻ҆те́цъ на́шъ, є҆щѐ жи́въ є҆́сть. и҆ речѐ: <<тн҃и: 715>> бл҃гослове́нъ человѣ́къ ѻ҆́ный бг҃ꙋ. и҆ прини́кше поклони́шасѧ є҆мꙋ̀. Воззрѣ́въ же ѻ҆чи́ма свои́ма і҆ѡ́сифъ, ви́дѣ венїамі́на бра́та своего̀ є҆динома́тернѧ, и҆ речѐ: се́й ли є҆́сть бра́тъ ва́шъ ю҆нѣ́йшїй, є҆го́же реко́сте ко мнѣ̀ привестѝ; и҆ речѐ: бг҃ъ да поми́лꙋетъ тѧ̀ ча́до. Возмꙋти́сѧ же і҆ѡ́сифъ, подви́жесѧ бо ᲂу҆тро́ба є҆гѡ̀ ѡ҆ бра́тѣ свое́мъ, и҆ и҆ска́ше пла́кати: вше́дъ же въ ло́жницꙋ, пла́касѧ та́мѡ. И҆ ᲂу҆мы́въ лицѐ, и҆зше́дъ ᲂу҆держа́сѧ. И҆ не можа́ше і҆ѡ́сифъ ᲂу҆держа́тисѧ всѣ̑мъ предстоѧ́щымъ є҆мꙋ̀, но речѐ: ѡ҆тосли́те всѣ́хъ ѿ менѐ: и҆ не предстоѧ́ше ни є҆ди́нъ і҆ѡ́сифꙋ, є҆гда̀ познава́шесѧ бра́тїи свое́й. И҆ и҆спꙋстѝ гла́съ съ пла́чемъ: слы́шаша же всѝ є҆гѵ́птѧне, и҆ слы́шано бы́сть въ домꙋ̀ фараѡ́новѣ. Рече́ же і҆ѡ́сифъ бра́тїи свое́й: а҆́зъ є҆́смь і҆ѡ́сифъ: є҆ще́ ли ѻ҆те́цъ мо́й жи́въ є҆́сть; и҆ не мого́ша бра́тїѧ ѿвѣща́ти є҆мꙋ̀: смꙋти́шасѧ бо. Рече́ же і҆ѡ́сифъ бра́тїи свое́й: прибли́житесѧ ко мнѣ̀, и҆ прибли́жишасѧ. и҆ речѐ: а҆́зъ є҆́смь і҆ѡ́сифъ бра́тъ ва́шъ, є҆го́же прода́сте во є҆гѵ́петъ. Ны́нѣ ᲂу҆̀бо не скорби́те, нижѐ же́стокѡ ва́мъ да ꙗ҆ви́тсѧ, ꙗ҆́кѡ прода́сте мѧ̀ сѣ́мѡ: на жи́знь бо посла́ мѧ бг҃ъ пред̾ ва́ми. Сїе́ бо второ́е лѣ́то гла́дъ на землѝ, и҆ є҆щѐ пѧ́ть лѣ́тъ ѡ҆ста̀, въ ни́хже не бꙋ́детъ ѡ҆ра́нїѧ, ни жа́твы. Посла́ бо мѧ̀ бг҃ъ пред̾ ва́ми ѡ҆ста́вити ва́мъ ѡ҆ста́нокъ на землѝ, и҆ препита́ти ва́шъ ѡ҆ста́нокъ ве́лїй. Ны́нѣ ᲂу҆̀бо не вы̀ посла́сте мѧ̀ сѣ́мѡ, но бг҃ъ: и҆ сотвори́ мѧ ꙗ҆́кѡ ѻ҆тца̀ фараѡ́нꙋ, и҆ господи́на всемꙋ̀ до́мꙋ є҆гѡ̀, и҆ кнѧ́зѧ все́й землѝ є҆гѵ́петстѣй. Потща́вшесѧ ᲂу҆̀бо, взы́дите ко ѻ҆тцꙋ̀ моемꙋ̀, и҆ рцы́те є҆мꙋ̀: сїѧ̑ глаго́летъ сы́нъ тво́й і҆ѡ́сифъ: сотвори́ мѧ бг҃ъ господи́на все́й землѝ є҆гѵ́петстѣй: сни́ди ᲂу҆̀бо ко мнѣ̀, и҆ не ᲂу҆ме́дли. И҆ <<тн҃и ѡ҆б.: 716>> всели́шисѧ въ землѝ гесе́мли а҆раві́йстѣй, и҆ бꙋ́деши близ̾ менѐ ты̀, и҆ сы́нове твоѝ, и҆ сы́нове сынѡ́въ твои́хъ, ѻ҆́вцы твоѧ̑, и҆ воло́ве твоѝ, и҆ є҆ли̑ка сꙋ́ть твоѧ̑: И҆ препита́ю тѧ̀ та́мѡ, є҆ще́ бо пѧ́ть лѣ́тъ бꙋ́детъ гла́дъ на землѝ, да не поги́бнеши ты̀, и҆ сы́нове твоѝ, и҆ всѧ̑ и҆мѣ̑нїѧ твоѧ̑. Сѐ ѻ҆́чи ва́ши ви́дѧтъ, и҆ ѻ҆́чи венїамі́на бра́та моегѡ̀, ꙗ҆́кѡ ᲂу҆ста̀ моѧ̑ глагѡ́лющаѧ къ ва́мъ. Возвѣсти́те ᲂу҆̀бо ѻ҆тцꙋ̀ моемꙋ̀ всю̀ сла́вꙋ мою̀ сꙋ́щꙋю во є҆гѵ́птѣ, и҆ є҆ли̑ка ви́дите: и҆ ᲂу҆скори́вше, приведи́те ѻ҆тца̀ моего̀ сѣ́мѡ. И҆ напа́дъ на вы́ю венїамі́на бра́та своегѡ̀, пла́касѧ над̾ ни́мъ: и҆ венїамі́нъ пла́касѧ на вы́и є҆гѡ̀. И҆ ѡ҆блобыза́въ всю̀ бра́тїю свою̀, пла́касѧ над̾ ни́ми: и҆ по си́хъ глаго́лаша къ немꙋ̀ бра́тїѧ є҆гѡ̀. И҆ пронесе́сѧ гла́съ въ домꙋ̀ фараѡ́новѣ, глаго́люще: прїидо́ша бра́тїѧ і҆ѡ́сифѡва: возра́довасѧ же фараѡ́нъ, и҆ рабѝ є҆гѡ̀.
Прокі́менъ, ѱало́мъ рє҃і гла́съ д҃: Мл҃твы моѧ̑ гдⷭ҇ви возда́мъ пред̾ всѣ́ми людьмѝ є҆гѡ̀. Сті́хъ: Вѣ́ровахъ, тѣ́мже возглаго́лахъ, а҆́зъ же смири́хсѧ ѕѣлѡ̀.
При́тчей чте́нїе. [Глава̀ к҃а, ст. к҃г-л҃а, глава̀ к҃в, ст. а҃-д҃.]
И҆́же храни́тъ своѧ̑ ᲂу҆ста̀ и҆ ѧ҆зы́къ, соблюда́етъ ѿ печа́ли дꙋ́шꙋ свою̀. Проде́рзый, и҆ велича́вый, и҆ гордели́вый, гꙋби́тель нарица́етсѧ: а҆ и҆́же памѧтоѕло́бствꙋетъ, беззако́ненъ. По́хѡти лѣни́ваго ᲂу҆бива́ютъ: не произволѧ́ютъ бо рꙋ́цѣ є҆гѡ̀ твори́ти что̀. Нечести́вый жела́етъ ве́сь де́нь по́хоти ѕлы́ѧ, првⷣный же ми́лꙋетъ и҆ ще́дритъ неща́днѡ. Жє́ртвы нечести́выхъ ме́рзость гдⷭ҇ви: нб҃о беззако́ннѡ прино́сѧтъ ѧ҆̀. Свидѣ́тель ло́жный поги́бнетъ, мꙋ́жъ же послꙋшли́въ сохранѧ́емь возглаго́летъ. Нечести́въ мꙋ́жъ безстꙋ́днѡ стои́тъ лице́мъ: <<тн҃ѳ: 717>> пра́вый же са́мъ разꙋмѣва́етъ пꙋти̑ своѧ̑. Нѣ́сть премꙋ́дрости, нѣ́сть мꙋ́жества, нѣ́сть совѣ́та ᲂу҆ нечести́вагѡ. Ко́нь ᲂу҆готовлѧ́етсѧ на де́нь бра́ни: ѿ гдⷭ҇а же по́мощь. Лꙋ́чше и҆́мѧ до́брое, не́же бога́тство мно́го, па́че же сребра̀ и҆ зла́та бл҃года́ть бл҃га́ѧ. Бога́тъ и҆ ни́щъ срѣто́ста дрꙋ́гъ дрꙋ́га: ѻ҆бои́хъ же гдⷭ҇ь сотворѝ. Хꙋдо́гъ ви́дѣвъ лꙋка́ваго мꙋ́чима крѣ́пкѡ, са́мъ наказꙋ́етсѧ: безꙋ́мнїи же мимоше́дше ѿтщети́шасѧ. Ро́дъ премꙋ́дрости стра́хъ гдⷭ҇нь, и҆ бога́тство, и҆ сла́ва, и҆ живо́тъ.
И҆ про́чее возслѣ́дованїе преждеѡсщ҃е́нныхъ.
Въ четверто́къ ва́їй на ᲂу҆́трени
трⷪ҇чны гла́са. По а҃-мъ стїхосло́вїи сѣда́льны а҆пⷭ҇льскїѧ ѻ҆смогла́сника. По в҃-мъ же стїхосло́вїи глаго́лемъ сѣда́ленъ, господи́на і҆ѡ́сифа. Гла́съ є҃.
Подо́бенъ: Собезнача́льное:
Видѣ́нїе и҆ дѣѧ́нїе, ꙗ҆́кѡ сопрѧ́гшесѧ, на хрⷭ҇то́вꙋ мольбꙋ̀ посла́ти потщи́мсѧ, ᲂу҆ме́ршїй на́шъ ᲂу҆́мъ ꙗ҆́коже и҆на́го ла́зарѧ, ꙗ҆́кѡ да ѡ҆живи́тъ свои́мъ предста́нїемъ стра́шнымъ, вѣ̑тви пра́вды томꙋ̀ принестѝ, и҆ зва́ти: бл҃гослове́нъ грѧды́й во и҆́мѧ гдⷭ҇не.
Сла́ва, то́йже.
И҆ ны́нѣ, бг҃оро́диченъ: Дꙋшѝ моеѧ̀ стра̑сти многоболѣ́знєнныѧ, и҆ пло́ти моеѧ̀ недꙋ́ги вско́рѣ и҆сцѣлѝ: ᲂу҆ма̀ моегѡ̀ и҆звращє́нїѧ поста́ви всенепоро́чнаѧ, и҆ въ тишинѣ̀ помышле́нїѧ, мл҃твы приноси́ти чи̑стыѧ цр҃ю̀ всѣ́хъ сподо́би бцⷣе, и҆ и҆спроси́ти грѣхѡ́въ ѡ҆ставле́нїе. <<тн҃ѳ ѡ҆б.: 718>>
По г҃-мъ стїхосло́вїи, сѣда́ленъ господи́на ѳео́дѡра, гла́съ ѕ҃.
Подо́бенъ: А҆́гг҃льскїѧ:
Двоеде́нствꙋетъ дне́сь ла́зарь ᲂу҆ме́рый, и҆ ѡ҆ се́мъ пролива́ютъ печа́ли сле́зы срѡ́дницы, марі́а съ ма́рѳою, ка́мень предви́дѧщи гро́бный. предста̀ зижди́тель съ свои́ми ᲂу҆ч҃нкѝ, сме́рть плѣни́ти, да́рꙋѧй живо́тъ. тѣ́мже вопїе́мъ є҆мꙋ̀: гдⷭ҇и сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ: Ст҃а́ѧ влⷣчце чⷭ҇таѧ, бг҃а на́шегѡ мт҃и, всѣ́хъ творца̀ неизрече́ннѡ ро́ждшаѧ, молѝ со а҆пⷭ҇лы сщ҃е́нными всегда̀ бл҃гость є҆гѡ̀, страсте́й на́съ и҆зба́вити, и҆ ѡ҆ставле́нїе на́мъ да́ти грѣхѡ́въ.
Канѡ́нъ въ мине́и: и҆ трипѣ́снецъ господи́на і҆ѡ́сифа. И҆ стїхосло́витсѧ пѣ́снь. Гла́съ є҃.
Пѣ́снь д҃.
І҆рмо́съ: Бж҃е́ственное твоѐ разꙋмѣ́въ:
Заре́ю ва́шегѡ ᲂу҆тѣше́нїѧ, затворе́нныхъ въ сѣ́ни грѣхо́внѣй просвѣти́те, бл҃гоче́стнѡ свѣтоно́снїи ва́съ восхвалѧ́ющихъ а҆пⷭ҇ли.
Любо́вь съ милосе́рдїемъ спрѧ́гше, и҆ на ᲂу҆моле́нїе хрⷭ҇тꙋ̀ вѣ́рнїи посла́ти потщи́мсѧ, ꙗ҆́кѡ да и҆ на́съ воскр҃си́тъ ѿ гро́ба та́йныхъ страсте́й на́шихъ.
Любвѐ плотскі́ѧ не пощади́мъ, ᲂу҆мерщвле́ни дꙋше́ю, и҆ любо́вїю прилѣпи́мсѧ и҆зба́вителю, ꙗ҆́кѡ да ѿ а҆́дова на́съ и҆зба́витъ стра́шнагѡ ѡ҆сꙋжде́нїѧ.
Проре́клъ є҆сѝ ла́зарево ᲂу҆спе́нїе, є҆го́же по ма́лѣ воздви́гъ, ѿ ссꙋ́щихъ цвѣтоносѧ́щихъ прїѧ́лъ є҆сѝ хвалꙋ̀, стрⷭ҇ти твоеѧ̀ сп҃се мо́й ѡ҆́бразы.
Бг҃оро́диченъ: И҆з̾ тебѐ бж҃е́ственнаѧ вода̀ и҆стечѐ безсме́ртїѧ и҆ жи́зни, бг҃ороди́тельнице всенепоро́чнаѧ: <<т҃ѯ: 719>> ю҆́же вкꙋша́ющїи, жа́жды чⷭ҇таѧ смертоно́сныѧ и҆збавлѧ́ютсѧ.
И҆́ный господи́на ѳео́дѡра, гла́съ ѕ҃. Оу҆слы́шахъ:
Погреба́етсѧ ла́зарь, и҆ на гро́бѣ ꙗ҆̀же ѡ҆ ма́рѳѣ ны́нѣ рыда́ютъ и҆ пла́чꙋтъ, предста́ти тебѣ̀ животода́вцꙋ, жела́ющыѧ.
Сме́рть начина́етъ трепета́ти, є҆́же къ не́й сни́тїѧ твоегѡ̀ хрⷭ҇тѐ ѡ҆щꙋща́ющи: ꙗ҆́кѡ жи́знь бо, тще́тнꙋ сїю̀ показа́лъ є҆сѝ концє́мъ.
Трⷪ҇ченъ: Є҆ди́нице про́стаѧ, несозда́ннаѧ, безнача́льное є҆стество̀, въ трⷪ҇цѣ пѣва́емое ѵ҆поста́сьми, сп҃си́ ны вѣ́рою покланѧ́ющыѧсѧ держа́вѣ твое́й.
Бг҃оро́диченъ: И҆з̾ ѻ҆ц҃а̀ безлѣ́тна сн҃а, въ лѣ́то бг҃ороди́тельнице, неискꙋсомꙋ́жнѡ родила̀ є҆сѝ, стра́нно чꙋ́до, пребы́вши дв҃а доѧ́щи.
Сла́ва тебѣ̀ бж҃е на́шъ, сла́ва тебѣ̀.
Сни́дитесѧ, прїиди́те, и҆̀же въ пꙋсты́нѧхъ и҆ пеще́рахъ, срѣ́сти грѧдꙋ́щаго на жребѧ́ти, гдⷭ҇а сла́вы въ пѣ́снехъ.
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ: сла́ва си́лѣ твое́й гдⷭ҇и.
Пѣ́снь и҃.
І҆рмо́съ: Тебѣ̀ вседѣ́телю:
Ка́мень тѧ́жкїй ѿ се́рдца моегѡ̀ ѿѧ́ти, моли́те всеще́драго, ка́менїе ꙗ҆ви́вшесѧ, краеꙋго́льнагѡ ка́мене, бг҃оглаго́ливїи а҆пⷭ҇ли гдⷭ҇ни.
И҆́демъ, твои̑мъ провозглаша́лъ є҆сѝ дрꙋгѡ́мъ, дрꙋ́гъ мо́й ла́зарь ᲂу҆жѐ ᲂу҆́спе: сего̀ воздвиза́ѧ, ᲂу҆сплю̀ сме́рти всепа́гꙋбнꙋю ѕло́бꙋ во вѣ́ки. <<т҃ѯ ѡ҆б.: 720>>
Кро́тцы дꙋше́ю, и҆ смире́ни нра́вомъ бы́вше, бл҃года́тїю прїи́мемъ кро́ткаго всѣ́хъ грѧдꙋ́щаго влⷣкꙋ, горды́ню сокрꙋши́ти лꙋка́вагѡ.
Бг҃оро́диченъ: Две́рь тѧ̀ свѣ́та просвѣще́ннꙋю ви́дитъ прⷪ҇ро́къ, всенепоро́чнаѧ, свѣтода́вца бо ражда́еши несказа́ннѡ, на́мъ ᲂу҆подо́бившасѧ: є҆го́же превозно́симъ во всѧ̑ вѣ́ки.
И҆́ный. І҆рмо́съ: Прпⷣбнїи твоѝ:
Марі́а же и҆ ма́рѳа ны́нѣ рыда́ютъ, во гро́бѣ лежа́ща ви́дѧще ла́зарѧ, и҆ болѣ́зненнѡ вопїю́тъ: а҆́ще бы бы́лъ хрⷭ҇то́съ здѣ̀, сро́дникъ на́шъ не бы̀ ᲂу҆́мерлъ.
А҆́дъ да ча́етъ погꙋби́тисѧ, и҆́бо жи́знь прихо́дитъ ла́зарѧ воздви́гнꙋти вопїю́ща: бл҃гослови́те, по́йте, и҆ превозноси́те во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Безнача́льнымъ и҆ ржⷭ҇тво́мъ же и҆ происхожде́нїемъ, ѻ҆ц҃ꙋ̀ покланѧ́юсѧ ро́ждшемꙋ, сн҃а прославлѧ́ю ро́ждшасѧ, воспѣва́ю совозсїѧ́вша ѻ҆ц҃ꙋ́ же и҆ сн҃ꙋ, дх҃а ст҃а́го.
Бг҃оро́диченъ: Є҆го́же родила̀ є҆сѝ дв҃о несказа́ннѡ, всегда̀ ꙗ҆́кѡ чл҃вѣколю́бца не преста́й молѧ́щи, да ѿ бѣ́дъ сп҃се́тъ къ тебѣ̀ прибѣга́ющыѧ.
Сла́ва тебѣ̀ бж҃е на́шъ, сла́ва тебѣ̀.
Добродѣ́тєли ꙗ҆́кѡ вѣ̑тви, и҆ ꙗ҆́кѡ ва̑їа, ко срѣ́тенїю ᲂу҆гото́вимъ, и҆ цр҃ю̀ хрⷭ҇тꙋ̀ вѣ́рнїи возопїе́мъ: бл҃гослови́те, по́йте, и҆ превозноси́те во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Прпⷣбнїи твоѝ ѻ҆́троцы въ пещѝ херꙋві́мы подража́хꙋ, трист҃ꙋ́ю пѣ́снь воспѣва́юще: бл҃гослови́те, по́йте, и҆ превозноси́те во всѧ̑ вѣ́ки. <<тѯ҃а: 721>>
Пѣ́снь ѳ҃.
І҆рмо́съ: И҆са́їе ликꙋ́й:
Дрꙋ́жбы и҆зба́ви мѧ̀ льсти́вагѡ влⷣко хрⷭ҇тѐ, дрꙋ́ги твоѧ̑ мꙋ̑дрыѧ ᲂу҆ченикѝ показа́вый, съ ни́миже ше́дъ возста́вилъ є҆сѝ дрꙋ́га твоего̀ вѣ́рнаго, сп҃се ла́зарѧ, бл҃года́рнѡ воспѣва́юща тѧ̀.
И҆сполне́нїемъ гдⷭ҇и поста̀, и҆спо́лни на̑ша сердца́ же и҆ ᲂу҆́мъ, бл҃гоꙋтро́бне, ра́дости, а҆пⷭ҇лъ твои́хъ мольба́ми, чи́стѣ возлюби́вшихъ тѧ̀, сп҃са дꙋ́шъ на́шихъ.
Смердѧ̀ гноймѝ ѕло́бы, во гро́бѣ живꙋ̀ лѣ́ности хрⷭ҇тѐ. тѣ́мже вопїю́ ти: воздви́гни, сп҃си́ мѧ, ꙗ҆́кѡ да и҆ а҆́зъ съ вѣ́твьми добродѣ́телей ᲂу҆срѧ́щꙋ тѧ̀, взыва́ѧ ѡ҆са́нна бг҃ꙋ.
Бг҃оро́диченъ: Во двꙋ̀ вѡ́лю и҆ сꙋщєствꙋ̀ родила̀ є҆сѝ на́мъ сн҃а ѻ҆трокови́це, є҆диноро́дна ѻ҆ц҃ꙋ̀, бы́вша человѣ́ка, да на́съ пока́жетъ ѻ҆́бщники є҆стества̀, пречⷭ҇таѧ, бж҃е́ственнѣйшагѡ, пребж҃е́ственный.
И҆́ный. І҆рмо́съ: Безсѣ́меннагѡ зача́тїѧ:
Въ гро́бѣ ла́зарь двоеде́нствꙋетъ дне́сь, и҆ над̾ ни́мъ пролива́етѣ сле́зы марі́а же и҆ ма́рѳа, ꙗ҆́кѡ сєстры̀ родны̑ѧ: хрⷭ҇то́съ же грѧде́тъ къ немꙋ̀ съ бж҃е́ственными а҆пⷭ҇лы, показа́ти ве́лїе чꙋ́до.
Сме́рте всепа́гꙋбнаѧ, прїимѝ разрꙋше́нїе, вра́тницы же твоѝ закле́пы да блюдꙋ́тъ: и҆́бо глаго́ломъ сокрꙋши́тъ твоѧ̑ врата̀ хрⷭ҇то́съ, ла́зарѧ возста́вивъ. пі́й пе́рвое сїѐ а҆́де прⷪ҇ро́къ тебѣ̀ вопїе́тъ съ на́ми.
Трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не є҆ди́нагѡ свѣ́те, свѣ́та сїѧ́нїе: и҆ є҆ди́ный є҆ди́не є҆ди́нагѡ бг҃а, ст҃ы́й дш҃е, гдⷭ҇а гдⷭ҇ь, вои́стиннꙋ сы́й. ѽ трⷪ҇це є҆ди́нице ст҃а́ѧ, сп҃си́ мѧ бг҃осло́вѧща тѧ̀. <<тѯ҃а ѡ҆б.: 722>>
Бг҃оро́диченъ: Чꙋ́до ржⷭ҇тва̀ твоегѡ̀ ᲂу҆дивлѧ́етъ мѧ̀ всенепоро́чнаѧ, ка́кѡ зачина́еши безсѣ́меннѡ неѡб̾име́ннаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; є҆́же па́че є҆стества̀ вѣ́рою прїе́мъ, рожде́нномꙋ поклони́сѧ, є҆ли̑ка хо́щетъ бо и҆ мо́жетъ.
Сла́ва тебѣ̀ бж҃е на́шъ, сла́ва тебѣ̀.
Гдⷭ҇ь грѧде́тъ всѣ́сти, ꙗ҆́коже пи́сано, на жребѧ̀: лю́дїе гото́витесѧ со стра́хомъ прїѧ́ти цр҃ѧ̀ всѣ́хъ съ ва́їемъ, ꙗ҆́кѡ побѣди́телѧ сме́рти, и҆з̾ а҆́да воздви́гшаго ла́зарѧ.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀, тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды. Гла́съ є҃:
Прїиди́те пре́жде конца̀ всѝ бра́тїе чи́стымъ се́рдцемъ пристꙋ́пимъ ко бл҃гоꙋтро́бномꙋ бг҃ꙋ, житє́йскаѧ ѡ҆бстоѧ̑нїѧ ѿри́нꙋвше, ѡ҆ дꙋша́хъ попече́нїе сотвори́мъ, бра́шенъ сласте́й воздержа́нїемъ гнꙋша́ющесѧ, ѡ҆ млⷭ҇тыни попеце́мсѧ: то́ю бо, ꙗ҆́коже пи́сано є҆́сть, прїѧ́ша нѣ́цыи ᲂу҆чреди́вше а҆́гг҃лы. напита́имъ ᲂу҆бо́гими, напита́вшаго на́съ свое́ю пло́тїю: ѡ҆блеце́мъ себѐ во ѡ҆дѣ́ющагосѧ свѣ́томъ ꙗ҆́кѡ ри́зою, да мл҃твами пречⷭ҇тыѧ бцⷣы, и҆ дв҃ы мт҃ре, ѡ҆ставле́нїе полꙋчи́вше грѣхѡ́въ, со ᲂу҆миле́нїемъ къ немꙋ̀ возопїи́мъ: гдⷭ҇и, и҆зба́ви на́съ ѿ шꙋ́ѧгѡ ѿвѣ́та, и҆ сподо́би на́съ десна́гѡ твоегѡ̀ предстоѧ́нїѧ, ꙗ҆́кѡ млⷭ҇тивъ и҆ чл҃вѣколю́бецъ.
Мч҃нченъ: Въ мꙋ́кахъ сꙋ́ще ст҃і́и, веселѧ́щесѧ вопїѧ́хꙋ: и҆змѣнє́нїѧ на́мъ сїѧ̑ сꙋ́ть ко влⷣцѣ: вмѣ́стѡ настоѧ́щихъ ра́нъ тѣле́сныхъ свѣ́тлое ѡ҆дѣѧ́нїе въ <<тѯ҃в: 723>> воскрⷭ҇нїе процвѣте́тъ на́мъ, вмѣ́стѡ безче́стїѧ вѣнцы̀, вмѣ́стѡ ᲂу҆́зъ темни́чныхъ ра́й, и҆ вмѣ́стѡ ѡ҆сꙋжде́нїѧ со ѕлодѣ́и, со а҆́гг҃лы житїѐ. тѣ́мже мл҃твами и҆́хъ гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ.
Подо́бенъ: Бл҃года́тнаѧ:
Пред̾избра́ннаѧ ѿ всѣ́хъ родѡ́въ ᲂу҆слы́ши гла́съ на́шъ, и҆ да́рꙋй прошє́нїѧ дꙋ́шъ на́шихъ, и҆збавле́нїе страсте́й и҆ болѣ́зней а҆пⷭ҇лъ ра́ди, всѧ̑ могꙋ́щаѧ ꙗ҆́кѡ мт҃и бж҃їѧ.
На ѕ҃-мъ часѣ̀ тропа́рь прⷪ҇ро́чества. Гла́съ а҃:
Гла́са ра̑бъ твои́хъ гдⷭ҇и не забꙋ́ди, помѧнѝ, ꙗ҆́кѡ всегда̀ ᲂу҆пова́нїе на тѧ̀ положи́хомъ всѧ̑ могꙋ́щаго, и҆ помозѝ на́мъ, мо́лимсѧ.
Прокі́менъ, ѱало́мъ рз҃і, гла́съ д҃: Сїѧ̑ врата̀ гдⷭ҇нѧ, пра́веднїи вни́дꙋтъ въ нѧ̀. Сті́хъ: И҆сповѣ́дайтесѧ гдⷭ҇ви, ꙗ҆́кѡ бл҃гъ.
Прⷪ҇ро́чества и҆са́їина чте́нїе. [Глава̀ ѯ҃є, ст. и҃- ѕ҃і.]
Та́кѡ глаго́летъ гдⷭ҇ь: и҆́мже ѡ҆́бразомъ ѡ҆брѣта́етсѧ ꙗ҆́года на гре́знѣ, и҆ рекꙋ́тъ, не погꙋбѝ є҆го̀, ꙗ҆́кѡ бл҃гослове́нїе є҆́сть въ не́мъ: та́кѡ сотворю̀ слꙋжа́щагѡ мѝ ра́ди, не и҆́мамъ всѣ́хъ погꙋби́ти ра́ди є҆гѡ̀. И҆ и҆зведꙋ̀ и҆з̾ і҆а́кѡва сѣ́мѧ, и҆ и҆з̾ і҆ꙋ́ды, и҆ наслѣ́дитъ го́рꙋ ст҃ꙋ́ю мою̀, и҆ наслѣ́дѧтъ и҆збра́ннїи моѝ, и҆ рабѝ моѝ, и҆ вселѧ́тсѧ та́мѡ. И҆ бꙋ́дꙋтъ въ дꙋбра́вѣ ѡ҆гра̑ды стадѡ́мъ, и҆ ю҆до́ль а҆хѡ́рскаѧ въ поко́ище говѧ́дѡвъ лю́демъ мои̑мъ, и҆̀же взыска́ша менѐ. Вы́ же ѡ҆ста́вившїи мѧ̀, и҆ забыва́ющїи го́рꙋ ст҃ꙋ́ю мою̀, и҆ ᲂу҆готовлѧ́ющїи де́мѡнꙋ трапе́зꙋ, и҆ и҆сполнѧ́ющїи ща́стїю растворе́нїе: А҆́зъ преда́мъ ва́съ под̾ ме́чь, всѝ закла́нїемъ паде́те: ꙗ҆́кѡ зва́хъ ва́съ, и҆ не послꙋ́шасте: глаго́лахъ, и҆ преслꙋ́шасте, и҆ сотвори́сте лꙋка́вое предо мно́ю, и҆ <<тѯ҃в ѡ҆б.: 724>> ꙗ҆̀же не хотѣ́хъ, и҆збра́сте. Сегѡ̀ ра́ди та́кѡ глаго́летъ гдⷭ҇ь: сѐ рабо́тающїи мѝ ꙗ҆́сти бꙋ́дꙋтъ, вы́ же вза́лчете. сѐ рабо́тающїи мѝ пи́ти бꙋ́дꙋтъ, вы́ же возжа́ждете: Сѐ рабо́тающїи мѝ возра́дꙋютсѧ, вы́ же посрамите́сѧ: сѐ рабо́тающїи мѝ возвеселѧ́тсѧ въ весе́лїи се́рдца, вы́ же возопїе́те въ болѣ́зни се́рдца ва́шегѡ, и҆ ѿ сокрꙋше́нїѧ дꙋ́ха воспла́четесѧ. Ѡ҆ста́вите бо и҆́мѧ ва́ше въ насыще́нїе и҆збра̑ннымъ мои̑мъ, ва́съ же и҆збїе́тъ гдⷭ҇ь. рабо́тающымъ же мнѣ̀ нарече́тсѧ и҆́мѧ но́вое, Є҆́же бл҃гослови́тсѧ на землѝ: бл҃гословѧ́тъ бо бг҃а и҆́стиннаго.
Прокі́менъ, ѱало́мъ ри҃і, гла́съ д҃: Пꙋ́ть за́повѣдей твои́хъ теко́хъ, є҆гда̀ разшири́лъ є҆сѝ се́рдце моѐ. Сті́хъ: Законоположѝ мнѣ̀ гдⷭ҇и пꙋ́ть ѡ҆правда́нїй твои́хъ.
Въ четверто́къ ве́чера
ѻ҆бы́чное стїхосло́вїе. На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ стїхи̑ры подѡ́бны господи́на і҆ѡ́сифа. Гла́съ д҃.
Подо́бенъ: Зва́нный свы́ше:
А҆пⷭ҇льскаѧ дво́ица сщ҃е́ннѣйшаѧ, є҆ди́наго тѧ̀ ѿ трⷪ҇цы вѣ́дꙋщи хрⷭ҇тѐ, ны́нѣ тобо́ю посыла́етсѧ, привестѝ жребѧ̀ под̾ѧре́мнича сы́на, ꙗ҆́коже пи́сано є҆́сть: на не́мже смирѧ́ѧсѧ всѧ́деши бл҃гоꙋтро́бне, въ вы́шнихъ во́лею, сѣда́лище всѣ̑мъ лю́бѧщымъ тѧ̀ ᲂу҆готовлѧ́ѧ, и҆ въ безсловє́сныѧ прони́кшыѧ, ᲂу҆мовре́днѡ сло́ве стра̑сти, словє́сныѧ содѣва́еши, ѡ҆са́нна тебѣ̀ взыва́ющыѧ.
Прїимѝ сїѡ́не цр҃ѧ̀, сѐ тебѣ̀ кротча́йшїй во́лею предста́нетъ, воскреси́вый ла́зарѧ и҆ разрꙋши́вый сме́рти го́рькое <<тѯ҃г: 725>> ца́рство. мно́жество бг҃особра́нное сщ҃е́нныхъ мона́хѡвъ, съ просто́ю ча́дїю собери́тесѧ, ᲂу҆срѣ́сти съ ва́їемъ хрⷭ҇та̀, зовꙋ́ще: бл҃гослове́нъ грѧды́й сп҃стѝ ро́дъ человѣ́чь, стрⷭ҇тїю крⷭ҇та̀, и҆ безстра́стїе всѣ̑мъ пода́ти за бла́гость.
И҆́на стїхи́ра подо́бна господи́на ѳео́дѡра, гла́съ и҃.
Подо́бенъ: И҆́же во є҆де́мѣ:
На серафі́мѣхъ стра́шныхъ, въ вы́шнихъ хрⷭ҇тѐ носи́мый, ꙗ҆́кѡ бг҃ъ же, и҆ всѣ́хъ творе́цъ, са́мъ на жребѧ̀ на землѝ всѣ́сти и҆́деши, ꙗ҆́кѡ сы́й по на́мъ человѣ́чески. виѳа́нїа весели́тсѧ, прїи́мши тѧ̀ сп҃се: і҆ерⷭ҇ли́мъ ра́дꙋетсѧ, ꙗ҆́кѡ ча́ѧй тѧ̀ прїѧ́ти: сме́рть ᲂу҆мертви́сѧ, пред̾ѡщꙋти́вши ла́зарѧ, прїитѝ и҆з̾ ме́ртвыхъ: и҆ мы̀ съ ва́їами срѣ́тенїе соверша́юще въ ра́дости, воспѣва́имъ держа́вꙋ бл҃гости твоеѧ̀ гдⷭ҇и.
И҆ въ мине́и г҃. Сла́ва, и҆ ны́нѣ, бг҃оро́диченъ.
Прокі́менъ, ѱало́мъ рѳ҃і, гла́съ ѕ҃: Ко гдⷭ҇ꙋ внегда̀ скорбѣ́ти мѝ воззва́хъ, и҆ ᲂу҆слы́ша мѧ̀. Сті́хъ: Гдⷭ҇ꙋ и҆зба́ви дꙋ́шꙋ мою̀ ѿ ᲂу҆сте́нъ непра́ведныхъ, и҆ ѿ ѧ҆зы́ка льсти́ва.
Бытїѧ̀ чте́нїе. [Глава̀ м҃ѕ, ст. а҃-з҃.]
Воста́въ і҆и҃ль са́мъ и҆ всѧ̑ сꙋ̑щаѧ є҆гѡ̀, прїи́де ко кла́дѧзю клѧ́твенномꙋ, и҆ пожрѐ же́ртвꙋ бг҃ꙋ ѻ҆ц҃а̀ своегѡ̀ і҆саа́ка. Рече́ же бг҃ъ ко і҆и҃лю въ видѣ́нїи но́щїю, глаго́лѧ: і҆а́кѡве, і҆а́кѡве. ѻ҆́нъ же речѐ: что́ є҆сть; Ѻ҆́нъ же речѐ є҆мꙋ̀: а҆́зъ є҆́смь бг҃ъ ѻ҆тцє́въ твои́хъ, не ᲂу҆бо́йсѧ и҆зы́ти во є҆гѵ́петъ: въ ꙗ҆зы́къ бо ве́лїй сотворю́ тѧ та́мѡ. И҆ а҆́зъ сни́дꙋ съ тобо́ю во є҆гѵ́петъ, и҆ а҆́зъ возведꙋ́ тѧ до конца̀: и҆ і҆ѡ́сифъ возложи́тъ рꙋ́ки своѧ̑ на ѻ҆́чи твоѝ. Воста́ же і҆а́кѡвъ ѿ кла́дѧзѧ клѧ́твеннагѡ: и҆ взѧ́ша сы́нове і҆и҃лѧ ѻ҆тца̀ своего̀, и҆ стѧжа́нїе, и҆ жєны̀ своѧ̑ на колесни̑цы, ꙗ҆̀же посла̀ і҆ѡ́сифъ взѧ́ти <<тѯ҃г ѡ҆б.: 726>> є҆го̀. И҆ взе́мше и҆мѣ̑нїѧ своѧ̑, и҆ всѐ стѧжа́нїе, є҆́же стѧжа́ша въ землѝ ханаа́нстѣй, внидо́ша во є҆гѵ́петъ і҆а́кѡвъ, и҆ всѐ сѣ́мѧ є҆гѡ̀ съ ни́мъ: Сы́нове, и҆ сы́нове сынѡ́въ є҆гѡ̀ съ ни́мъ: дщє́ри, и҆ дщє́ри дще́рей є҆гѡ̀, и҆ всѐ сѣ́мѧ своѐ введѐ во є҆гѵ́петъ.
Прокі́менъ, ѱало́мъ р҃к, гла́съ ѕ҃: Гдⷭ҇ь да сохрани́тъ тѧ̀ ѿ всѧ́кагѡ ѕла̀, сохрани́тъ дꙋ́шꙋ твою̀ гдⷭ҇ь. Сті́хъ: Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀.
При́тчей чте́нїе. [Глава̀ к҃г, ст. є҃і-л҃є. глава̀ к҃д, ст. а҃-є҃.]
Сы́не, а҆́ще премꙋ́дро бꙋ́детъ се́рдце твоѐ, возвесели́ши моѐ се́рдце. И҆ пребꙋ́дꙋтъ въ словесѣ́хъ твои́хъ ᲂу҆стнѣ̀ къ мои̑мъ ᲂу҆стна́мъ, а҆́ще пра̑ва бꙋ́дꙋтъ. Да не ревнꙋ́етъ се́рдце твоѐ грѣ́шникѡмъ, но въ стра́сѣ гдⷭ҇ни бꙋ́ди ве́сь де́нь. А҆́ще бо соблюде́ши ѧ҆̀, бꙋ́дꙋтъ тѝ внꙋ́цы, и҆ ᲂу҆пова́нїе твоѐ не ѿстꙋ́питъ. Слꙋ́шай сы́не, и҆ премꙋ́дръ быва́й, и҆ и҆справлѧ́й мы̑сли твоегѡ̀ се́рдца. Не бꙋ́ди вїнопі́йца, нижѐ прилага́йсѧ къ сложе́нїємъ и҆ кꙋпова́нїємъ мѧ́съ: Всѧ́къ бо пїѧ́ница и҆ блꙋдни́къ ѡ҆бнища́етъ, и҆ ѡ҆блече́тсѧ въ раздра̑ннаѧ, и҆ въ рꙋ̑бища всѧ́къ сонли́вый. Слꙋ́шай сы́не ѻ҆тца̀ роди́вшаго тѧ̀, и҆ не презира́й, є҆гда̀ состарѣ́етсѧ ма́ти твоѧ̀. И҆́стинꙋ стѧжѝ, и҆ не ѿри́ни мꙋ́дрости, и҆ ᲂу҆че́нїѧ, и҆ ра́зꙋма. До́брѣ воспитова́етъ ѻ҆те́цъ пра́веденъ, ѡ҆ сы́нѣ же премꙋ́дрѣмъ весели́тсѧ дꙋша̀ є҆гѡ̀: Да весели́тсѧ ѻ҆те́цъ и҆ ма́ти ѡ҆ тебѣ̀, и҆ да ра́дꙋетсѧ ро́ждшаѧ тѧ̀. Да́ждь мѝ сы́не твоѐ се́рдце, ѻ҆́чи же твоѝ моѧ̑ пꙋти̑ да соблюда́ютъ. Сосꙋ́дъ бо сокрꙋше́нъ чꙋжді́й до́мъ, и҆ стꙋдене́цъ тѣ́сенъ чꙋжді́й. Се́й бо вско́рѣ поги́бнетъ, и҆ всѧ́кїй законопрестꙋ́пникъ потреби́тсѧ. Комꙋ̀ го́ре; комꙋ̀ молва̀; комꙋ̀ сꙋ́дове; комꙋ̀ го́рєсти и҆ сва̑ры, комꙋ̀ сокрꙋшє́нїѧ <<тѯ҃д: 727>> вотщѐ; комꙋ̀ си́ни ѻ҆́чи; Не пребыва́ющымъ ли въ вїнѣ̀; и҆ не назира́ющымъ ли, гдѣ̀ пи́рове быва́ютъ: Не ᲂу҆пива́йтесѧ вїно́мъ, но бесѣ́дꙋйте къ человѣ́кѡмъ пра́вєднымъ, и҆ бесѣ́дꙋйте въ прохо́дѣхъ а҆́ще бо на ча́шы и҆ стклѧ́ницы вда́си ѻ҆́чи твоѝ, послѣдѝ и҆́маши ходи́ти нажа́йшїй бѣли́льнагѡ дре́ва. Послѣди́ же ꙗ҆́кѡ ѿ ѕмі́ѧ ᲂу҆ѧ́звенъ простре́тсѧ, и҆ ꙗ҆́коже ѿ кера́ста разлива́етсѧ є҆мꙋ̀ ꙗ҆́дъ. Ѻ҆́чи твоѝ є҆гда̀ ᲂу҆́зрѧтъ [женꙋ̀] чꙋждꙋ́ю, ᲂу҆ста̀ твоѧ̑ тогда̀ возглаго́лютъ стро́пѡтнаѧ: И҆ возлѧ́жеши ꙗ҆́кѡ въ се́рдцѣ мо́рѧ, и҆ ꙗ҆́коже ко́рмчїй во мно́зѣ волне́нїи. Рече́ши же: би́ша мѧ̀, и҆ не поболѣ́хъ, и҆ порꙋга́шасѧ мѝ, а҆́зъ же не разꙋмѣ́хъ: когда̀ ᲂу҆́тро бꙋ́детъ, да ше́дъ взыщꙋ̀, съ ни́миже сни́дꙋсѧ. Сы́не, не ревнꙋ́й мꙋжє́мъ ѕлы̑мъ, нижѐ возжелѣ́й бы́ти съ ни́ми: Лжа́мъ бо поꙋча́етсѧ се́рдце и҆́хъ, и҆ болѣ̑зни ᲂу҆стнѣ̀ и҆́хъ глаго́лютъ. Съ премꙋ́дростїю зи́ждетсѧ до́мъ, и҆ съ ра́зꙋмомъ и҆справлѧ́етсѧ: Съ чꙋ́вствїемъ и҆сполнѧ́ютсѧ сокрѡ́вища ѿ всѧ́кагѡ бога́тства честна́гѡ и҆ до́брагѡ. Лꙋ́чше мꙋ́дрый крѣ́пкагѡ, и҆ мꙋ́жъ ра́зꙋмъ и҆мѣ́ѧй земледѣ́льца вели́ка.
На стїхо́внѣ самогла́сенъ днѐ, два́жды. Гла́съ и҃:
Бога́тагѡ неми́лостивагѡ подо́бїѧ, и҆ непода́тнагѡ нра́ва, и҆зба́ви мѧ̀ хрⷭ҇тѐ бж҃е, крⷭ҇то́мъ твои́мъ ѡ҆чище́нїе грѣхѡ́въ на́шихъ сотвори́вый: ла́зарѧ же ни́щагѡ бл҃года́рственномꙋ терпѣ́нїю, ревни́телѧ покажѝ, и҆ нѣ́дръ патрїа́рха а҆враа́ма не ѿчꙋждѝ менѐ, вели́кїѧ ра́ди твоеѧ̀ млⷭ҇ти.
Мч҃нченъ: Мч҃нцы гдⷭ҇ни, всѧ́кое мѣ́сто ѡ҆свѧща́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ сѣте́й вра́жїихъ, дꙋша́мъ на́шымъ, мо́лимсѧ. <<тѯ҃д ѡ҆б.: 728>>
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Ѽ пресла́внагѡ чꙋдесѐ:
Ѽ пресла́внагѡ чꙋдесѐ! ѽ та́инства но́вагѡ! ѽ ᲂу҆жа́снагѡ начина́нїѧ! дв҃а глаго́лаше, на крⷭ҇тѣ́ тѧ ꙗ҆́кѡ ви́дѣ посредѣ̀ двою̀ разбѡ́йникꙋ ѡ҆бѣ́шена, є҆го́же неболѣ́зненнѡ ᲂу҆жа́снѡ породѝ, пла́каше глаго́лющи: ᲂу҆вы̀ мнѣ̀ ча́до любе́знѣйшее, ка́кѡ тѧ̀ лю́тый наро́дъ и҆ небл҃года́рный ко крⷭ҇тꙋ̀ пригвоздѝ;
Въ пѧто́къ ва́їй, на ᲂу҆́трени
трⷪ҇чны гла́са. По а҃-мъ стїхосло́вїи сѣда́льны крⷭ҇тныѧ ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ, господи́на і҆ѡ́сифа, гла́съ д҃. Подо́бенъ: Ско́рѡ предварѝ:
Дво́ица посыла́етсѧ ᲂу҆чени̑къ привестѝ жребѧ̀, ꙗ҆́коже пи́сано є҆́сть, на не́же хрⷭ҇то́съ всѣ́дъ красе́нъ вни́детъ, хвалꙋ̀ ѿ младе́нєцъ прїѧ́ти бж҃е́ственнꙋю. сего̀ ᲂу҆̀бо срѣ́сти и҆́демъ тща́тельнѡ, вѣ̑тви добродѣ́телей томꙋ̀ приносѧ́ще дѣѧ́нїй.
Сла́ва, то́йже.
И҆ ны́нѣ, крⷭ҇тобг҃оро́диченъ. Подо́бенъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею, сн҃а и҆ бг҃а твоего̀: є҆го́же бл҃гослове́ннаѧ молѧ́щи не преста́й, проще́нїе прегрѣше́нїй во вре́мѧ поста̀, на́мъ дарова́ти.
По г҃-мъ стїхосло́вїи сѣда́ленъ господи́на ѳео́дѡра. Гла́съ и҃.
Подо́бенъ: Воскре́съ и҆з̾ ме́ртвыхъ:
Дво́ица ᲂу҆чени̑къ посыла́етсѧ дне́сь, жребѧ̀ привестѝ влⷣцѣ всѣ́хъ: грѧде́тъ всѣ́сти, носи́мый серафі́мскими <<тѯ҃є: 729>> мно́жествы. начина́етъ боѧ́тисѧ ла́заремъ, мїроде́ржица всеѧ́дица сме́рть, пе́рвѣе плѣни́вшаѧ ро́дъ человѣ́ческїй.
Сла́ва, то́йже.
И҆ ны́нѣ, крⷭ҇тобг҃оро́диченъ. Подо́бенъ:
При стрⷭ҇ти сн҃а чⷭ҇таѧ стоѧ́щи, рыда́ющи го́рькѡ восклица́ше пѣ́сньми: ка́кѡ тѧ̀ немо́лчнѡ а҆́гг҃льскими пѣ́сньми славосло́вимаго, дѣ́ти є҆вре́йстїи, ᲂу҆вы̀ мнѣ̀, пїла́товꙋ сꙋди́щꙋ сн҃е предста́виша; пѣсносло́влю твоѐ сло́ве мно́гое и҆ неизрече́нное бл҃гоꙋтро́бїе.
Канѡ́нъ мине́и: и҆ трипѣ́снецъ господи́на і҆ѡ́сифа. И҆ стїхосло́витсѧ пѣ́снь. Гла́съ д҃.
Пѣ́снь є҃.
І҆рмо́съ: Возсїѧ́й мѝ гдⷭ҇и свѣ́тъ:
На крⷭ҇тѣ̀ гдⷭ҇и твое́мъ ᲂу҆снꙋ́въ, преложи́лъ є҆сѝ на со́нъ влⷣко сме́рть. вопи́лъ бо є҆сѝ: дрꙋ́гъ ла́зарь ᲂу҆́спе, но по́йдемъ возбꙋди́ти є҆го̀ ны́нѣ.
Прорѡ́къ проповѣ̑данїѧ и҆сполнѧ́ѧ проречє́нїѧ, въ пророкоꙋбі́йственный гра́дъ хрⷭ҇тѐ ще́дрый прише́лъ є҆сѝ, ᲂу҆бїе́нъ бы́ти во́лею, ᲂу҆бїе́нна мѧ̀ тле́ю, сп҃са́ѧ.
Тѣ́ло непокори́вое сло́вꙋ повинꙋ́вше, воздержа́нїемъ и҆ мольба́ми, мона́си и҆ прості́и лю́дїе хрⷭ҇та̀ ᲂу҆срѧ́щите, на жребѧ̀ всѣ́дша, грѧдꙋ́ща же пострада́ти.
Бг҃оро́диченъ: Кропле́нїемъ млⷭ҇ти твоеѧ̀ напо́й пречⷭ҇таѧ, и҆зсо́хшꙋю мою̀ мы́сль, пла́менемъ грѣха̀ и҆ ᲂу҆гаше́нный се́рдца моегѡ̀ вожжѝ свѣ́щникъ, две́ре свѣ́та.
И҆́ный господи́на ѳео́дѡра. Гла́съ и҃.
І҆рмо́съ: Мра́къ дꙋшѝ моеѧ̀:
Дво́ицꙋ ᲂу҆ч҃нкъ твои́хъ, внегда̀ хотѣ́лъ є҆сѝ дости́гнꙋти въ виѳа́нїю хрⷭ҇тѐ, посыла́еши привестѝ тебѣ̀ <<тѯ҃є ѡ҆б.: 730>> жребѧ̀, на не́же никто́же ѿ человѣ̑къ всѣ́де: кромѣ́ бо тебѐ сп҃се никто́же безсловє́сныѧ ꙗ҆зы́ки повинꙋ̀.
Сни́десѧ і҆ꙋде́ѡвъ ѿ і҆ерⷭ҇ли́ма въ виѳа́нїю мно́жество, и҆ съ сро́дницами ла́заревыми дне́сь стра́ждꙋтъ: наꙋ́трїе же разꙋмѣ́вше сего̀ и҆з̾ гро́ба ска́чꙋща, дви́жꙋтсѧ на ᲂу҆бїе́нїе хрⷭ҇то́во.
Трⷪ҇ченъ: Трⷪ҇це прест҃а́ѧ ѻ҆́ч҃е, и҆ сн҃е, и҆ дш҃е вседѣ́тельный, бл҃же́нное бж҃ество̀, безнача́льное сꙋщество̀, и҆ трисїѧ́нный свѣ́те, всезри́тельнаѧ держа́во, рабы̑ твоѧ̑ сохранѝ.
Бг҃оро́диченъ: На крⷭ҇тѣ́ тѧ ви́дѧщи пригвожде́нна гвоздьмѝ хрⷭ҇тѐ мт҃и твоѧ̀, и҆ и҆з̾ ре́бръ живо́тныхъ текꙋ́щꙋю кро́вь и҆ во́дꙋ, ᲂу҆ѧзвлѧ́шесѧ мт҃рнимъ милосе́рдїемъ, сн҃а бо тѧ̀ позна̀ своего̀.
Сла́ва тебѣ̀ бж҃е на́шъ, сла́ва тебѣ̀.
Сѐ ᲂу҆гото́васѧ хрⷭ҇то́съ предста́ти і҆ерⷭ҇ли́мꙋ, и҆̀же въ гора́хъ всѝ и҆ пꙋсты́нѧхъ, собери́тесѧ мона́си, того̀ ра́достїю ᲂу҆срѣ́сти, со все́ю поднбⷭ҇ною.
І҆рмо́съ: Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ сло́ве, да ᲂу҆́тренюѧ сла́влю тѧ̀.
Пѣ́снь и҃.
І҆рмо́съ: Землѧ̀ и҆ всѧ̑ ꙗ҆̀же на не́й:
Воскрⷭ҇нїе и҆ живо́тъ и҆мꙋ́ще жєны̀ любе́зное, что̀ рыда́ете го́рькѡ; и҆́детъ ѡ҆живи́ти бли́жнѧго дрꙋ́га, свои́мъ воскрⷭ҇нїемъ, воста́нїе всѣ́хъ провозвѣща́ѧй, всѣ́хъ бл҃годѣ́тель.
Жили̑ща мона́хѡвъ собери́тесѧ ꙗ҆́кѡ а҆́гнцы слове́снїи, началопа́стырѧ хрⷭ҇та̀ ᲂу҆срѧ́щите, ны́нѣ вѣ̑тви носѧ́ще: предгрѧде́тъ во́лею, ꙗ҆́кѡ а҆́гнецъ закла́тисѧ гдⷭ҇ь, ꙗ҆́кѡ да ѿ во́лча и҆зме́тъ мꙋчи́тельства. <<тѯ҃ѕ: 731>>
Грѧдꙋ́щꙋ тѝ къ виѳфагі́и, топта́нїе твои́хъ но́гъ, вра́гъ ѡ҆щꙋща́ше а҆́дъ, и҆ нога́ма ла́заревыма прикаса́шесѧ, глаго́лѧ: а҆́ще восхо́щетъ зва́ти тѧ̀ жи́знь, не ѡ҆блѣни́сѧ, но и҆зы́ди: разꙋмѣ́хъ бо моѐ разрꙋше́нїе вско́рѣ.
Бг҃оро́диченъ: Свѧще́ннїи гла́си тѧ̀ прⷪ҇ро́кѡвъ проповѣ́дꙋютъ ѡ҆бра́знѡ, две́рь, и҆ го́рꙋ, и҆ сѣ́нь, зе́млю ст҃ꙋ́ю, свѣ́тлый ѻ҆́блакъ: и҆з̾ негѡ́же сꙋ́щымъ во тьмѣ̀ и҆ сѣ́ни сѣдѧ́щымъ, возсїѧ̀ сл҃нце, дв҃о, є҆ди́нъ свѣтода́тель.
И҆́ный. І҆рмо́съ: А҆́гг҃ли и҆ нб҃са̀:
Дво́ица ᲂу҆ч҃нкъ по́сланнаѧ привестѝ под̾ѧре́мника на ѻ҆́блацѣхъ восходѧ́щемꙋ, є҆го́же всѧ̑ пою́тъ, и҆ превозно́сѧтъ во всѧ̑ вѣ́ки.
При две́рехъ хрⷭ҇то́съ, про́чее виѳа́нїе не сѣ́тꙋй: въ ра́дость бо преложи́тъ пла́чь тво́й, твоѐ воспита́нїе воздви́гъ ла́зарѧ и҆з̾ гро́ба, пою́ща и҆ превозносѧ́ща хрⷭ҇та̀ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Є҆ди́нъ бг҃ъ ᲂу҆́бѡ трⷪ҇ца, ни ѻ҆ц҃ꙋ̀ и҆зстꙋпи́вшꙋ въ сн҃овство̀, нижѐ сн҃ꙋ премѣни́вшꙋсѧ во и҆схожде́нїе: но сво́йствєннаѧ и҆ ѻ҆боѐ, свѣ́тъ бг҃а трѝ, сла́влю во вѣ́ки.
Бг҃оро́диченъ: Є҆ди́на нетлѣ́ннаѧ ражда́еши, є҆ди́на дои́ши млⷣнца небра́чнаѧ, є҆ди́на зижди́телѧ ражда́еши и҆ влⷣкꙋ твоего̀, а҆́ще и҆ мт҃рь и҆ раба̀: тѧ̀ дв҃о мт҃и пое́мъ во вѣ́ки.
Сла́ва тебѣ̀ бж҃е на́шъ, сла́ва тебѣ̀.
Сады̀ добродѣ́телей, и҆ чꙋ́вственнѡ вѣ́твьми ꙗ҆́кѡ сꙋгꙋ́ба хрⷭ҇та̀ ᲂу҆гото́вимсѧ всѝ прїѧ́ти, носи́ма на жребѧ́ти: є҆го́же превозно́симъ во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ни:
І҆рмо́съ: А҆́гг҃ли и҆ нб҃са̀, на прⷭ҇то́лѣ сла́вы сѣдѧ́щаго и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те є҆го̀ во вѣ́ки. <<тѯ҃ѕ ѡ҆б.: 732>>
Пѣ́снь ѳ҃.
І҆рмо́съ: Ꙗ҆́кѡ сотворѝ мнѣ̀:
Сѐ предвозгласи́лъ є҆сѝ і҆и҃се, взы́демъ ко гра́дꙋ ст҃о́мꙋ, и҆ рꙋка́ма ᲂу҆бі́йцъ вои́стиннꙋ преда́мсѧ крⷭ҇тꙋ̀, ᲂу҆би́тисѧ пло́тїю.
Ѿ сме́рти хотѧ̀ сло́ве, восхи́тити дрꙋ́га твоего̀, пло́тїю ᲂу҆мертви́тисѧ на́съ ра́ди пригвожда́ешисѧ, человѣ́ки ѡ҆безсмертвлѧ́ѧ вѣ̑рныѧ, є҆ди́не безсме́ртне.
Ва̑їа цѣломꙋ́дрїѧ принесе́мъ хрⷭ҇тꙋ̀, на жребѧ́ти смири́вшꙋсѧ пло́тїю, и҆ рце́мъ є҆мꙋ̀: на стрⷭ҇ть прише́дый, бл҃гослове́нъ є҆сѝ сп҃се.
Бг҃оро́диченъ: Стра́шное твоѐ рожде́нїе, бцⷣе мт҃и хрⷭ҇та̀: тѣ́мже тѧ̀ бл҃жи́мъ вѣ́рнѡ, и҆ сла́вимъ че́стнѡ, ро́дове родѡ́въ во вѣ́ки, а҆ми́нь.
И҆́ный. І҆рмо́съ: Проѧвле́нное на горѣ̀:
Ны́нѣ посыла́ѧ ᲂу҆ч҃нкѝ, хрⷭ҇то́съ речѐ: ѿрѣши́вше мнѣ̀ жребѧ̀ приведи́те всѣ́сти, да разрѣшꙋ̀ ꙗ҆зы́ки ѿ безслове́сїѧ, и҆ покорю̀ ꙗ҆́кѡ сн҃ъ ѻ҆ц҃ꙋ̀.
Грѧде́тъ гдⷭ҇ь, ѿве́рзи твоѧ̑ двє́ри виѳа́нїе, прїимѝ вѣ́рою влⷣкꙋ: и҆́бо грѧде́тъ воскреси́ти ѿ гро́ба ла́зарѧ, ꙗ҆́кѡ є҆ди́нъ всеси́ленъ.
Трⷪ҇ченъ: Трисїѧ́нное гдⷭ҇и твоегѡ̀ є҆динонача́лїѧ, свѣ́тлыми сїѧ́ньми, ᲂу҆́мъ на́шъ ѡ҆блиста́ѧ, ѿ ле́сти многоѡбра́зныѧ ѡ҆браща́етъ на́съ къ соедини́тельномꙋ ѡ҆боже́нїю.
Ра́дꙋйсѧ пала́то всѣ́хъ цр҃ѧ̀, є҆́юже црⷭ҇тво нбⷭ҇ное ѿве́рзесѧ сꙋ́щымъ на землѝ, бцⷣе дв҃о, и҆ со а҆́гг҃лы житїѐ.
Сла́ва тебѣ̀ бж҃е на́шъ, сла́ва тебѣ̀.
Въ пꙋсты́нѧхъ и҆ гора́хъ, и҆ въ верте́пѣхъ сꙋ́щїи, прїиди́те собери́тесѧ съ на́ми ваїено́сцы, срѣ́сти цр҃ѧ̀ и҆ влⷣкꙋ: грѧде́тъ бо сп҃стѝ дꙋ́шы на́шѧ. <<тѯ҃з: 733>>
І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы въ на́ше вѣ́рныхъ сп҃се́нїе, пѣ́сньми немо́лчными велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды. Гла́съ а҃.
Творе́нїе льва̀ царѧ̀.
Презрѣ́вши дꙋшѐ моѧ̀ бж҃е́ственныхъ пома́занїй, ѡ҆б̾ѧ́та была̀ є҆сѝ козньмѝ врага̀, свои́мъ хотѣ́нїемъ преда́вшисѧ тлѝ, и҆ ѡ҆тѧгчи́вшисѧ ѿ грѣха̀ мно́гагѡ, бг҃отка́ннꙋю ѻ҆де́ждꙋ ѡ҆скверни́ла є҆сѝ. и҆ неꙋкра́шенꙋ ца́рскомꙋ бра́кꙋ сотвори́ла є҆сѝ. но да не со грѣхо́мъ привлече́шисѧ, и҆ покрове́нна ѻ҆де́ждею страсте́й возле́гши, вины̀ вхо́да возда́си, и҆ черто́га и҆згна́на бꙋ́деши, сп҃сꙋ возопі́й: стра́шное ѻ҆́ко, прїимы́й є҆́же є҆́смь, и҆ є҆́же бы́лъ є҆сѝ не ѡ҆ста́вивый, и҆ пре́жде крⷭ҇та̀ хламѵ́дою порꙋга́нїѧ, менѐ ра́ди ѡ҆блекі́йсѧ, вре́тище моѐ расто́ргни, и҆ въ весе́лїе ѡ҆блецы̀, и҆ тьмы̀ внѣ́шнїѧ, и҆ пла́ча вѣ́чнагѡ и҆зба́ви мѧ̀, и҆ поми́лꙋй мѧ̀.
Мч҃нченъ: Стрⷭ҇тоте́рпцы хрⷭ҇тѡ́вы, прїиди́те лю́дїе всѝ почти́мъ, пѣ́сньми и҆ пѣ́ньми дꙋхо́вными, свѣти̑ла мі́ра, и҆ проповѣ́дники вѣ́ры, и҆сто́чники приснотекꙋ́щыѧ, и҆з̾ ни́хже и҆стека́ютъ вѣ̑рнымъ и҆сцѣлє́нїѧ. тѣ́хъ мл҃твами хрⷭ҇тѐ бж҃е на́шъ, ми́ръ да́рꙋй мі́рови твоемꙋ̀, и҆ дꙋша́мъ на́шымъ ве́лїю млⷭ҇ть.
Сла́ва, гла́съ и҃: Дꙋшеполе́знꙋю соверши́вше четыредесѧ́тницꙋ, и҆ ст҃ꙋ́ю седми́цꙋ стрⷭ҇ти твоеѧ̀, про́симъ ви́дѣти чл҃вѣколю́бче, є҆́же просла́вити въ не́й вели̑чїѧ твоѧ̑, и҆ неизрече́нное на́съ ра́ди смотре́нїе твоѐ, є҆диномꙋ́дреннѡ воспѣва́юще: гдⷭ҇и сла́ва тебѣ̀.
И҆ ны́нѣ, па́ки то́йже.
И҆ про́чее послѣ́дованїе ꙗ҆́кѡ ѻ҆бы́чно. <<тѯ҃з ѡ҆б.: 734>>
На ѕ҃-мъ часѣ̀ тропа́рь прⷪ҇ро́чества. Гла́съ г҃:
Нестерпи́мый є҆́сть гдⷭ҇и, гнѣ́въ на грѣ́шники преще́нїѧ твоегѡ̀, и҆ нѣ́смы досто́йни воззрѣ́ти, и҆ проси́ти ѿ тебѐ млⷭ҇ти: да не ꙗ҆́ростїю твое́ю, ни гнѣ́вомъ твои́мъ погꙋби́ши на́съ, и҆̀хже ѿ землѝ рꙋко́ю твое́ю созда́лъ є҆сѝ.
Прокі́менъ, ѱало́мъ рк҃а. Гла́съ д҃: До́мꙋ ра́ди гдⷭ҇а бг҃а на́шегѡ взыска́хъ бл҃га̑ѧ тебѣ̀. Сті́хъ: Возвесели́хсѧ ѡ҆ ре́кшихъ мнѣ̀: въ до́мъ гдⷭ҇нь по́йдемъ.
Прⷪ҇ро́чества и҆са́їина чте́нїе. [Глава̀ ѯ҃ѕ ст. і҃-к҃д.]
Весели́сѧ і҆ерⷭ҇ли́ме, и҆ торжествꙋ́йте въ не́мъ всѝ лю́бѧщїи є҆го̀, и҆ живꙋ́щїи въ не́мъ ра́дꙋйтесѧ вкꙋ́пѣ съ ни́мъ ра́достїю, всѝ є҆ли́цы пла́касте ѡ҆ не́мъ, Да ссе́те и҆ насы́титесѧ ѿ сосца̀ ᲂу҆тѣше́нїѧ є҆гѡ̀, да сса́вше насладите́сѧ ѿ вхо́да сла́вы є҆гѡ̀. Ꙗ҆́кѡ сїѧ̑ глаго́летъ гдⷭ҇ь: сѐ а҆́зъ ᲂу҆клонѧ́ю на нѧ̀, а҆́ки рѣкꙋ̀ ми́ра, и҆ а҆́ки пото́къ наводнѧ́емый, сла́вꙋ ꙗ҆зы́кѡвъ: дѣ́ти и҆́хъ на ра́мена взѧ́ты бꙋ́дꙋтъ, и҆ на колѣ̑нꙋ ᲂу҆тѣ́шатсѧ. Ꙗ҆́коже а҆́ще кого̀ ма́ти ᲂу҆тѣша́етъ, та́кѡ и҆ а҆́зъ ᲂу҆тѣ́шꙋ вы̀, и҆ во і҆ерⷭ҇ли́мѣ ᲂу҆тѣ́шитесѧ. И҆ ᲂу҆́зрите, и҆ возра́дꙋетсѧ се́рдце ва́ше, и҆ кѡ́сти ва́шѧ ꙗ҆́кѡ трава̀ прозѧ́бнꙋтъ: и҆ позна́етсѧ рꙋка̀ гдⷭ҇нѧ боѧ́щымсѧ є҆гѡ̀, и҆ запрети́тъ непокарѧ́ющымсѧ. Се́ бо гдⷭ҇ь, ꙗ҆́кѡ ѻ҆́гнь прїи́детъ, и҆ ꙗ҆́кѡ бꙋ́рѧ колесни̑цы є҆гѡ̀, возда́ти ꙗ҆́ростїю ѿмще́нїе своѐ, и҆ преще́нїе во пла́мени ѻ҆́гненнѣ. Ѻ҆гне́мъ бо гдⷭ҇нимъ сꙋди́тисѧ бꙋ́детъ всѧ̀ землѧ̀, и҆ мече́мъ є҆гѡ̀ всѧ́ка пло́ть: мно́зи ꙗ҆́звени бꙋ́дꙋтъ ѿ гдⷭ҇а. Ѡ҆чища́ющїисѧ и҆ ѡ҆свѧща́ющїисѧ въ вертогра́дѣхъ, и҆ въ преддве́рїихъ ꙗ҆дꙋ́щїи мѧ́со свино́е, и҆ ме́рзѡсти, и҆ мы́шы, вкꙋ́пѣ поги́бнꙋтъ, речѐ гдⷭ҇ь. И҆ а҆́зъ дѣла̀ и҆́хъ и҆ помышле́нїѧ и҆́хъ вѣ́мъ и҆ грѧдꙋ̀ собра́ти всѧ̑ наро́ды и҆ <<тѯ҃и: 735>> ꙗ҆зы́ки, и҆ прїи́дꙋтъ, и҆ ᲂу҆́зрѧтъ сла́вꙋ мою̀: И҆ ѡ҆ста́влю на ни́хъ зна́менїе, и҆ послю̀ ѿ ни́хъ спасе́ныхъ во ꙗ҆зы́ки, въ ѳарсі́съ, и҆ въ фꙋ́дъ, и҆ въ лꙋ́дъ, и҆ въ мосо́хъ, и҆ въ ѳове́ль, и҆ во є҆лла́дꙋ, и҆ во ѻ҆́стровы да̑льныѧ, и҆̀же не слы́шаша и҆́мене моегѡ̀, нижѐ ви́дѣша сла́вꙋ мою̀: и҆ возвѣстѧ́тъ сла́вꙋ мою̀ во ꙗ҆зы́цѣхъ. И҆ приведꙋ́тъ бра́тїю ва́шꙋ ѿ всѣ́хъ ꙗ҆зы̑къ да́ръ гдⷭ҇ви, съ ко́ньми и҆ колесни́цами и҆ съ носи́лами мскѡ́въ, под̾ сѣ́ньми во ст҃ы́й гра́дъ і҆ерⷭ҇ли́мъ, речѐ гдⷭ҇ь: а҆́ки бы принеслѝ сы́нове і҆и҃лєвы жє́ртвы своѧ̑ мнѣ̀ со ѱалмы̀ въ до́мъ гдⷭ҇нь. И҆ ѿ тѣ́хъ поймꙋ̀ себѣ̀ жерцы̀ и҆ леѵі́ты, речѐ гдⷭ҇ь. Ꙗ҆́коже бо нб҃о но́во, и҆ землѧ̀ нова̀, ꙗ҆̀же а҆́зъ творю̀, пребыва́ютъ предо мно́ю, глаго́летъ гдⷭ҇ь: та́кѡ ста́нетъ сѣ́мѧ ва́ше, и҆ и҆́мѧ ва́ше. И҆ бꙋ́детъ мцⷭ҇ъ ѿ мцⷭ҇а, и҆ сꙋббѡ́та ѿ сꙋббѡ́ты, прїи́детъ всѧ́ка пло́ть поклони́тисѧ предо мно́ю во і҆ерⷭ҇ли́мъ, речѐ гдⷭ҇ь. И҆ и҆зы́дꙋтъ: и҆ ᲂу҆́зрѧтъ трꙋ́пы человѣ́кѡвъ престꙋпи́вшихъ мнѣ̀, че́рвь бо и҆́хъ не сконча́етсѧ, и҆ ѻ҆́гнь и҆́хъ не ᲂу҆га́снетъ, и҆ бꙋ́дꙋтъ въ позо́ръ всѧ́кой пло́ти.
Прокі́менъ, ѱало́мъ рк҃в, гла́съ ѕ҃: Поми́лꙋй на́съ гдⷭ҇и, поми́лꙋй на́съ. Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. <<тѯ҃и ѡ҆б.: 736>>
Въ пѧто́къ ве́чера,
во свѣти́льничное ѻ҆бы́чное стїхосло́вїе. На Гдⷭ҇и воззва́хъ, поста́вимъ стїхѡ́въ, і҃. И҆ пое́мъ самогла́сенъ днѐ два́жды, и҆ мч҃нченъ: и҆ првⷣнагѡ ла́зарѧ самогла́сныхъ є҃, творѧ́ще ѧ҆̀ се́дмь. Самогла́сенъ, гла́съ и҃, два́жды.
Дꙋшеполе́знꙋю соверши́вше четыредесѧ́тницꙋ, и҆ ст҃ꙋ́ю седми́цꙋ стрⷭ҇ти твоеѧ̀, про́симъ ви́дѣти чл҃вѣколю́бче, є҆́же просла́вити въ не́й вели̑чїѧ твоѧ̑, и҆ неизрече́нное на́съ ра́ди смотре́нїе твоѐ, є҆диномꙋ́дреннѡ воспѣва́юще: гдⷭ҇и сла́ва тебѣ̀.
Мч҃нченъ: Мч҃нцы гдⷭ҇ни моли́те бг҃а на́шего, и҆ и҆спроси́те дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
Та́же пое́мъ ст҃а́гѡ ла́зарѧ, самогла́сны є҃. Творе́нїе бл҃гочести́вагѡ царѧ̀, господи́на льва̀ премꙋ́драгѡ. Гла́съ ѕ҃.
Гдⷭ҇и, ла́заревъ хотѧ̀ гро́бъ ви́дѣти, во́лею хотѧ́й во гро́бъ всели́тисѧ вопроша́лъ є҆сѝ: гдѣ̀ положи́сте є҆го̀; ᲂу҆вѣ́дѣвъ же, є҆́же не невѣ́далъ є҆сѝ, и҆ возглаша́лъ, є҆го́же люби́лъ є҆сѝ: ла́заре грѧдѝ во́нъ. и҆ послꙋ́ша бездыха́нный, дыха́нїе даю́щагѡ є҆мꙋ̀, тебѐ сп҃са дꙋша́мъ на́шымъ. [Два́жды.]
Гдⷭ҇и, на гро́бъ четверодне́внагѡ прише́лъ є҆сѝ ла́зарѧ, и҆ над̾ гро́бомъ сле́зы пролїѧ́въ, мертвеца̀ четверодне́вна возста́вилъ є҆сѝ, кла́се живота̀. тѣ́мже сме́рть свѧ́зана бы́сть гла́сомъ: пелєны̀ разрѣши́шасѧ рꙋка́ми. тогда̀ ра́дости и҆спо́лнисѧ мно́жество ᲂу҆чєни́къ, и҆ є҆ди́но ѿ всѣ́хъ слꙋжа́шесѧ согла́сїе: бл҃гослове́нъ є҆сѝ сп҃се, поми́лꙋй на́съ. [Два́жды.] <<тѯ҃ѳ: 737>>
Гдⷭ҇и, гла́съ тво́й разрꙋшѝ а҆́дово ца́рствїе, и҆ сло́во вла́сти твоеѧ̀ возста́ви и҆з̾ гро́ба четверодне́внаго, и҆ бы́сть ла́зарь пакибытїѧ̀ проѡбраже́нїе сп҃си́тельное. всѧ̑ возмѡ́жна тебѣ̀ влⷣко всѣ́хъ цр҃ю̀, да́рꙋй рабѡ́мъ твои̑мъ ѡ҆чище́нїе, и҆ ве́лїю млⷭ҇ть. [Є҆ди́ножды.]
Гдⷭ҇и, ᲂу҆вѣ́рити хотѧ̀ ᲂу҆ч҃нкѡ́мъ твои̑мъ и҆з̾ ме́ртвыхъ твоѐ воскрⷭ҇нїе, на гро́бъ ла́заревъ прише́лъ є҆сѝ: и҆ возгласи́вшꙋ тѝ сего̀, а҆́дъ плѣни́сѧ, и҆ ѿпꙋстѝ четверодне́вна, вопїю́ща тебѣ̀: бл҃гослове́нный гдⷭ҇и сла́ва тебѣ̀. [Є҆ди́ножды.]
Гдⷭ҇и, пое́мь ᲂу҆ч҃нкѝ твоѧ̑, въ виѳа́нїю прише́лъ є҆сѝ, да возста́виши ла́зарѧ: и҆ прослези́всѧ над̾ ни́мъ зако́номъ є҆стества̀ чл҃вѣ́ча, ꙗ҆́кѡ бг҃ъ того̀ четверодне́вна воздви́глъ є҆сѝ, и҆ вопїѧ́ше тѝ сп҃се: бл҃гослове́нный гдⷭ҇и сла́ва тебѣ̀.
Сла́ва, гла́съ и҃: Предста́въ гро́бꙋ ла́заревꙋ сп҃се на́шъ, и҆ возгласи́въ ме́ртваго, ꙗ҆́кѡ ѿ сна̀ воскр҃си́лъ є҆сѝ: ѿтрѧсѐ тлѣ́нїе нетлѣ́нїѧ ма́нїемъ, и҆ и҆зы́де сло́вомъ, свѧ́занный ᲂу҆кро́йми. всѧ̑ мо́жеши, всѧ̑ тебѣ̀ рабо́таютъ чл҃вѣколю́бче, всѧ̑ повинꙋ́ютсѧ тѝ, сп҃се на́шъ сла́ва тебѣ̀.
И҆ ны́нѣ, гла́съ то́йже: Дꙋшеполе́знꙋю соверши́вше четыредесѧ́тницꙋ, возопїи́мъ: ра́дꙋйсѧ гра́де виѳа́нїе, ѻ҆те́чество ла́зарево. ра́дꙋйтесѧ ма́рѳа и҆ марі́а, тогѡ̀ сєстры̀, заꙋ́тра бо хрⷭ҇то́съ прихо́дитъ, ѡ҆живи́ти глаго́ломъ ᲂу҆ме́ршаго бра́та: є҆гѡ́же гла́съ ᲂу҆слы́шавъ, го́рькїй и҆ несы́тый а҆́дъ, стра́хомъ вострепета́въ, и҆ вельмѝ возстена́въ, ѿпꙋ́ститъ ла́зарѧ ᲂу҆кро́йми ѡ҆бѧ́зана: є҆гѡ́же чꙋдесѝ собо́ръ є҆вре́йскїй ᲂу҆диви́всѧ, съ ва́їемъ и҆ вѣ́твьми того̀ срѧ́щꙋтъ, и҆ ꙗ҆вѧ́тсѧ похвалѧ́ющїи дѣ́ти, є҆мꙋ́же зави́дѧтъ ѻ҆тцы̀. бл҃гослове́нъ грѧды́й во и҆́мѧ гдⷭ҇не цр҃ь і҆и҃левъ.
Вхо́дъ. Свѣ́те ти́хїй: <<тѯ҃ѳ ѡ҆б.: 738>>
Прокі́менъ, ѱало́мъ рк҃г, гла́съ ѕ҃: По́мощь на́ша во и҆́мѧ гдⷭ҇а, сотво́ршагѡ нб҃о и҆ зе́млю. Сті́хъ: Ꙗ҆́кѡ а҆́ще не гдⷭ҇ь бы бы́лъ въ на́съ, да рече́тъ ᲂу҆̀бо і҆и҃ль.
Бытїѧ̀ чте́нїе. [Глава̀ м҃ѳ, ст. л҃г, глава̀ н҃, ст. а҃- к҃ѕ.]
Преста̀ і҆а́кѡвъ завѣща́ѧ сынѡ́мъ свои̑мъ: и҆ возложи́въ і҆а́кѡвъ но́зѣ своѝ на ѻ҆́дръ, ᲂу҆́мре, и҆ приложи́сѧ къ лю́демъ свои̑мъ. И҆ припа́дъ і҆ѡ́сифъ на лицѐ ѻ҆тца̀ своегѡ̀, пла́касѧ [го́рькѡ] ѡ҆ не́мъ, и҆ ѡ҆блобыза̀ є҆го̀. И҆ повелѣ̀ і҆ѡ́сифъ рабѡ́мъ свои̑мъ погреба́телємъ погребстѝ ѻ҆тца̀ своего̀: и҆ погребо́ша погреба́тели і҆и҃лѧ. И҆ и҆спо́лнишасѧ є҆мꙋ̀ четы́редесѧть дне́й, та́кѡ бо и҆счислѧ́ютсѧ дні́е погребе́нїѧ: и҆ пла́касѧ є҆гѡ̀ є҆гѵ́петъ се́дмьдесѧтъ дне́й. Є҆гда́ же преидо́ша дні́е пла́ча, глаго́ла і҆ѡ́сифъ къ вельмо́жамъ фараѡ́нѡвымъ, глаго́лѧ: а҆́ще ѡ҆брѣто́хъ бл҃года́ть пред̾ ва́ми, рцы́те ѡ҆ мнѣ̀ во ᲂу҆́ши фараѡ́нꙋ, глаго́люще: Ѻ҆те́цъ мо́й заклѧ́ мѧ пре́жде сконча́нїѧ [своегѡ̀], глаго́лѧ: во гро́бѣ, є҆го́же и҆скопа́хъ себѣ̀ въ землѝ ханаа́ни, та́мѡ мѧ̀ погребѝ ны́нѣ ᲂу҆̀бо возше́дъ погребꙋ̀ ѻ҆тца̀ моего̀, и҆ возвращꙋ́сѧ. и҆ реко́ша фараѡ́нꙋ по словесѝ і҆ѡ́сифовꙋ. И҆ речѐ фараѡ́нъ къ і҆ѡ́сифꙋ: взы́ди, погребѝ ѻ҆тца̀ твоего̀, ꙗ҆́коже заклѧ́ тѧ. И҆ взы́де і҆ѡ́сифъ погребстѝ ѻ҆тца̀ своего̀: и҆ совзыдо́ша съ ни́мъ всѝ рабѝ фараѡ́ни, и҆ старѣ́йшины до́мꙋ є҆гѡ̀, и҆ всѝ старѣ́йшины землѝ є҆гѵ́петскїѧ. И҆ ве́сь до́мъ і҆ѡ́сифовъ, и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀, и҆ сро́дницы є҆гѡ̀: ѻ҆́вцы же и҆ волы̀ ѡ҆ста́виша въ землѝ гесе́мъ. И҆ совзыдо́ша съ ни́мъ и҆ колесни̑цы и҆ кѡ́нницы, и҆ бы́сть по́лкъ вели́къ ѕѣлѡ̀. И҆ прїидо́ша на гꙋмно̀ а҆та́дово, є҆́же є҆́сть ѡ҆б̾ ѻ҆́нъ по́лъ і҆ѻрда́на, и҆ рыда́ша є҆гѡ̀ рыда́нїемъ ве́лїимъ и҆ крѣ́пкимъ ѕѣлѡ̀: и҆ сотворѝ пла́чь ѻ҆тцꙋ̀ своемꙋ̀ се́дмь дне́й. И҆ ви́дѣша жи́тели <<т҃ѻ: 739>> землѝ ханаа́нскїѧ пла́чь на гꙋмнѣ̀ а҆та́довѣ, и҆ рѣ́ша: пла́чь вели́къ се́й є҆́сть є҆гѵ́птѧнѡмъ: сегѡ̀ ра́ди нарече́сѧ и҆́мѧ мѣ́стꙋ томꙋ̀, пла́чь є҆гѵ́петскъ, є҆́же є҆́сть ѡ҆б̾ ѻ҆́нъ по́лъ і҆ѻрда́на. И҆ сотвори́ша є҆мꙋ̀ та́кѡ сы́нове є҆гѡ̀, ꙗ҆́коже заповѣ́да и҆̀мъ. И҆ взѧ́ша є҆го̀ сы́нове є҆гѡ̀, въ зе́млю ханаа́ню: и҆ погребо́ша є҆го̀ въ пеще́рѣ сꙋгꙋ́бѣй, ю҆́же стѧжа̀ а҆враа́мъ, пеще́рꙋ въ стѧжа́нїе гро́ба ѿ є҆фрѡ́на хеттеа́нина, прѧ́мѡ мамврі́и. И҆ возврати́сѧ і҆ѡ́сифъ во є҆гѵ́петъ, са́мъ и҆ бра́тїѧ є҆гѡ̀, и҆ всѝ совозше́дшїи погребстѝ ѻ҆тца̀ є҆гѡ̀. Ви́дѣвше же бра́тїѧ і҆ѡ́сифовы, ꙗ҆́кѡ ᲂу҆́мре ѻ҆те́цъ и҆́хъ, рѣ́ша: да не когда̀ воспомѧне́тъ ѕло́бꙋ на́шꙋ і҆ѡ́сифъ, и҆ воздаѧ́нїемъ возда́стъ на́мъ за всѧ̑ ѕла̑ѧ, ꙗ҆̀же показа́хомъ є҆мꙋ̀. И҆ прише́дше ко і҆ѡ́сифꙋ, реко́ша: ѻ҆те́цъ тво́й заклѧ̀ пре́жде кончи́ны своеѧ̀, глаго́лѧ: Та́кѡ рцы́те і҆ѡ́сифꙋ: ѡ҆ста́ви и҆̀мъ непра́вдꙋ и҆ грѣ́хъ и҆́хъ, ꙗ҆́кѡ лꙋка̑ваѧ тебѣ̀ показа́ша, и҆ ны́нѣ прїимѝ непра́вдꙋ рабѡ́въ бг҃а ѻ҆тца̀ твоегѡ̀. и҆ пла́касѧ і҆ѡ́сифъ, глаго́лющымъ и҆̀мъ къ немꙋ̀. И҆ прише́дше къ немꙋ̀ реко́ша: сѐ мы̀ тебѣ̀ рабѝ. И҆ речѐ къ ни̑мъ і҆ѡ́сифъ: не бо́йтесѧ, бж҃їй бо є҆́смь а҆́зъ. Вы̀ совѣща́сте на мѧ̀ ѕла̑ѧ, бг҃ъ же совѣща̀ ѡ҆ мнѣ̀ во бл҃га̑ѧ, дабы̀ бы́ло ꙗ҆́коже дне́сь, и҆ препита́лисѧ бы лю́дїе мно́зи. И҆ речѐ и҆̀мъ: не бо́йтесѧ, а҆́зъ препита́ю ва́съ, и҆ до́мы ва́ши. и҆ ᲂу҆тѣ́ши и҆́хъ, и҆ глаго́ла и҆̀мъ по се́рдцꙋ и҆́хъ. И҆ всели́сѧ і҆ѡ́сифъ во є҆гѵ́птѣ са́мъ и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀: и҆ поживѐ і҆ѡ́сифъ лѣ́тъ сто̀ де́сѧть. И҆ ви́дѣ і҆ѡ́сифъ є҆фре́мли дѣ́ти до тре́тїѧгѡ ро́да: и҆ сы́нове махі́ра сы́на манассі́ина роди́шасѧ при бе́дрѣхъ і҆ѡ́сифовыхъ. И҆ речѐ і҆ѡ́сифъ бра́тїи свое́й, глаго́лѧ: а҆́зъ ᲂу҆мира́ю: посѣще́нїемъ же посѣти́тъ ва́съ бг҃ъ, и҆ и҆зведе́тъ ва́съ ѿ землѝ сеѧ̀ въ зе́млю, ѡ҆ не́йже <<т҃ѻ ѡ҆б.: 740>> клѧ́тсѧ бг҃ъ ѻ҆тцє́мъ на́шымъ, а҆враа́мꙋ, і҆саа́кꙋ, и҆ і҆а́кѡвꙋ. И҆ заклѧ̀ і҆ѡ́сифъ сы́ны і҆и҃лєвы, глаго́лѧ: въ посѣще́нїи, и҆́мже посѣти́тъ ва́съ бг҃ъ, совознеси́те и҆ кѡ́сти моѧ̑ ѿсю́дꙋ съ ва́ми. И҆ сконча́сѧ і҆ѡ́сифъ сы́й лѣ́тъ ста̀ десѧтѝ: и҆ погребо́ша є҆го̀, и҆ положи́ша въ ра́цѣ во є҆гѵ́птѣ.
Прокі́менъ, ѱало́мъ рк҃д, гла́съ д҃: Надѣ́ющїисѧ на гдⷭ҇а, ꙗ҆́кѡ гора̀ сїѡ́нъ не подви́житсѧ во вѣ́къ. Сті́хъ: Ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ на жре́бїй првⷣныхъ.
При́тчей чте́нїе. [Глава̀ л҃а, ст. и҃-л҃в.]
Сы́не, ѿверза́й ᲂу҆ста̀ твоѧ̑ сло́вꙋ бж҃їю, и҆ сꙋдѝ всѧ̑ здра́вѡ. Ѿверза́й ᲂу҆ста̀ твоѧ̑, и҆ сꙋдѝ пра́веднѡ, разсꙋжда́й же ᲂу҆бо́га и҆ не́мощна. Женꙋ̀ до́блю кто̀ ѡ҆брѧ́щетъ, дража́йши є҆́сть ка́менїѧ многоцѣ́ннагѡ такова́ѧ. Дерза́етъ на ню̀ се́рдце мꙋ́жа є҆ѧ̀: такова́ѧ до́брыхъ коры́стей не лиши́тсѧ. Дѣ́лаетъ бо мꙋ́жꙋ своемꙋ̀ бл҃га̑ѧ во всѐ житїѐ. Ѡ҆брѣ́тши во́лнꙋ и҆ ле́нъ, сотворѝ бл҃гопотре́бное рꙋка́ма свои́ма. Бы́сть ꙗ҆́кѡ кора́бль кꙋ́плю дѣ́ющїй, и҆здале́ча собира́етъ себѣ̀ бога́тство. И҆ востае́тъ и҆з̾ но́щи, и҆ дадѐ бра̑шна до́мꙋ, и҆ дѣла̀ рабы́нѧмъ. Оу҆зрѣ́вши село̀ кꙋпѝ: ѿ плодѡ́въ же рꙋ́къ свои́хъ насадѝ стѧжа́нїе. Препоѧ́савши крѣ́пкѡ чре́сла своѧ̑, ᲂу҆тверди́тъ мы́шцы своѧ̑ на дѣ́ло. И҆ вкꙋсѝ, ꙗ҆́кѡ добро̀ є҆́сть дѣ́лати, и҆ не ᲂу҆гаса́етъ свѣти́льникъ є҆ѧ̀ всю̀ но́щь. Ла́кти своѧ̑ простира́етъ на полє́знаѧ, рꙋ́цѣ же своѝ ᲂу҆твержда́етъ на вретено̀. И҆ рꙋ́цѣ своѝ ѿверза́етъ ᲂу҆бо́гомꙋ, дла́нь же прострѐ ни́щꙋ. Не пече́тсѧ ѡ҆ сꙋ́щихъ въ домꙋ̀ мꙋ́жъ є҆ѧ̀, є҆гда̀ гдѣ̀ заме́длитъ: вси́ бо ᲂу҆ неѧ̀ ѡ҆дѣ́ѧни сꙋ́ть. Сꙋгꙋ́ба ѻ҆дѣѧ̑нїѧ сотворѝ мꙋ́жꙋ своемꙋ̀, ѿ вѷссо́на же и҆ порфѵ́ры себѣ̀ ѡ҆дѣѧ̑нїѧ. Сла́венъ быва́етъ во вратѣ́хъ мꙋ́жъ є҆ѧ̀, внегда̀ а҆́ще <<тѻ҃а: 741>> сѧ́детъ въ со́нмищи со старѣ́йшины жи́тельми землѝ. Плащани̑цы сотворѝ, и҆ продадѐ фїнїкі́анѡмъ, ѡ҆поѧ̑санїѧ же ханане́ѡмъ. Оу҆ста̀ своѧ̑ ѿве́рзе внима́тельнѡ и҆ зако́ннѡ, и҆ чи́нъ заповѣ́да ѧ҆зы́кꙋ своемꙋ̀. Крѣ́постїю и҆ лѣ́потою ѡ҆блече́сѧ, и҆ возвесели́сѧ во дни̑ послѣ̑днїѧ. Тѣ́сны стєзѝ до́мꙋ є҆ѧ̀: бра́шна же лѣ́ностнагѡ не ꙗ҆дѐ. Оу҆ста̀ своѧ̑ ѿве́рзе мꙋ́дрѡ и҆ зако́ннѡ: Ми́лостынѧ же є҆ѧ̀ возста́ви ча̑да є҆ѧ̀, и҆ ѡ҆богати́шасѧ: и҆ мꙋ́жъ є҆ѧ̀ похвалѝ ю҆̀. Мно́ги дщє́ри стѧжа́ша бога́тство, мно́ги сотвори́ша си́лꙋ: ты́ же пред̾ꙋспѣ́ла и҆ превознесла́сѧ є҆сѝ над̾ всѣ́ми. Ло́жнагѡ ᲂу҆гожде́нїѧ, и҆ сꙋ́етныѧ добро́ты же́нскїѧ нѣ́сть въ тебѣ̀: жена́ бо разꙋ́мнаѧ бл҃гослове́на є҆́сть. стра́хъ же гдⷭ҇нь сїѧ̑ да хвали́тъ. Дади́те є҆́й ѿ плодѡ́въ ᲂу҆сте́нъ є҆ѧ̀, и҆ да хвали́мь бꙋ́детъ во вратѣ́хъ мꙋ́жъ є҆ѧ̀.
И҆ про́чее послѣ́дованїе преждеѡсщ҃е́нныхъ ꙗ҆́кѡ ѻ҆бы́чно.
Вѣ́домо бꙋ́ди, ꙗ҆́кѡ ѿ дне́сь нижѐ мч҃нченъ, нижѐ бг҃оро́диченъ, нижѐ ѻ҆смогла́сникъ пое́тсѧ, да́же до сꙋббѡ́ты ст҃а́гѡ ѳѡмы̀.
Въ то́йже пѧто́къ
повече́рїе глаго́лемъ вели́кое.
На повече́рїи пое́мъ настоѧ́щїй канѡ́нъ, творе́нїе ст҃а́гѡ ѻ҆тца̀ господи́на а҆ндре́а кри́тскагѡ, і҆ерⷭ҇лимі́ты. Гла́съ а҃.
Пѣ́снь а҃.
І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀, мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Припѣ́въ: Сла́ва тебѣ̀ бж҃е на́шъ, сла́ва тебѣ̀.
Ме́ртва четверодне́вна воскр҃си́въ сп҃се мо́й ла́зарѧ, тлѝ и҆змѣни́лъ є҆сѝ мы́шцею высо́кою, и҆ показа́лъ є҆сѝ ꙗ҆́кѡ си́льный вла́сть твою̀. <<тѻ҃а ѡ҆б.: 742>>
Возгласи́въ ла́зарѧ и҆з̾ гро́ба, а҆́бїе воскр҃си́лъ є҆сѝ: но а҆́дъ до́лѣ го́рцѣ рыда́ше, и҆ стенѧ̀ трепета́ше, сп҃се, вла́сти твоеѧ̀.
Прослези́лсѧ є҆сѝ гдⷭ҇и, над̾ ла́заремъ, показꙋ́ѧ воплоще́нїе смотре́нїѧ твоегѡ̀, и҆ ꙗ҆́кѡ є҆стество́мъ бг҃ъ сы́й, є҆стество́мъ по на́мъ бы́лъ є҆сѝ чл҃вѣ́къ.
Ма́рѳины сле́зы и҆ марі́ины ᲂу҆толи́лъ є҆сѝ гдⷭ҇и, и҆з̾ ме́ртвыхъ ла́зарѧ воскр҃си́въ сп҃се, и҆ показа́въ ѡ҆дх҃новле́нна ме́ртваго вла́стїю твое́ю.
Зако́номъ є҆стества̀ человѣ́ча вопроси́лъ є҆сѝ влⷣко: гдѣ̀ положе́нъ бы́сть ла́зарь; показꙋ́ѧ всѣ̑мъ сп҃се, и҆́стинное є҆́же къ на́мъ смотре́нїе твоѐ.
Закле́пы сокрꙋши́лъ є҆сѝ тогда̀ а҆́дѡвы, возгласи́въ ла́зарѧ, и҆ держа́вꙋ стрѧ́слъ є҆сѝ борца̀, и҆ покори́лъ є҆сѝ пре́жде крⷭ҇та̀, трепета́ти тебѐ є҆ди́не сп҃се.
Свѧ́знѧ ла́зарѧ, ѿ а҆́да держи́маго влⷣко, ꙗ҆́кѡ бг҃ъ предвари́лъ є҆сѝ, и҆ разрѣши́лъ є҆сѝ ѿ ᲂу҆́зъ: къ твоемꙋ́ бо всѧ̑ си́льне, и҆́дꙋтъ повелѣ́нїю.
Сла́ва: Ѻ҆ц҃а̀ просла́вимъ, сн҃а, и҆ дх҃а, трⷪ҇цꙋ нераздѣ́льнꙋю, во є҆ди́ницѣ є҆стества̀, и҆ со а҆́гг҃лы ю҆̀, ꙗ҆́кѡ є҆ди́наго несозда́ннаго бг҃а славосло́вимъ.
И҆ ны́нѣ, бг҃оро́диченъ: Непрело́жнѡ родила̀ є҆сѝ дв҃о мт҃и созда́телѧ є҆стества̀, ѿ ст҃а́гѡ дх҃а по бл҃говоле́нїю ѻ҆́ч҃ꙋ бы́вша є҆́же є҆смы̀, кромѣ̀ и҆змѣне́нїѧ и҆ смѣше́нїѧ.
Пѣ́снь в҃.
І҆рмо́съ: Вонмѝ нб҃о и҆ возглаго́лю, и҆ воспою̀ хрⷭ҇та̀, є҆ди́наго чл҃вѣколю́бца.
Сла́ва тебѣ̀ возгласи́вшемꙋ то́кмѡ, и҆ и҆з̾ гро́ба ме́ртва четверодне́вна дрꙋ́га воздви́гшемꙋ ла́зарѧ.
Оу҆слы́ша гла́са твоегѡ̀ бездꙋ́шный, и҆ ѡ҆дꙋшевле́нъ ѿ ме́ртвыхъ воста̀ а҆́бїе, сла́вѧ тѧ̀ гдⷭ҇и. <<тѻ҃в: 743>>
Повелѣ́нїе живоно́снагѡ гла́са твоегѡ̀ прїи́мъ, смердѧ́щїй воста̀ ѿ гро́ба, сп҃се мо́й, ла́зарь.
Прослези́лсѧ є҆сѝ над̾ дрꙋ́гомъ сп҃се мо́й, ᲂу҆вѣрѧ́ѧ на́ше, ꙗ҆́коже носи́лъ є҆сѝ, є҆стество̀, и҆ сего̀ воскр҃си́лъ є҆сѝ.
Вострепета̀ ꙗ҆́коже ви́дѣ а҆́дъ, па́ки текꙋ́ща а҆́бїе свѧ́зана ᲂу҆кро́йми, гла́сомъ къ здѣ́шнемꙋ животꙋ̀.
Оу҆жасо́шасѧ є҆вре́йстїи наро́ди є҆гда̀ возгласи́въ сп҃се, воскр҃си́лъ є҆сѝ сло́вомъ смердѧ́щаго ла́зарѧ.
Сотрѧсо́шасѧ сокрѡ́вища а҆́дѡва, ꙗ҆́кѡ ѡ҆дꙋшевле́нъ бы́сть а҆́бїе ни́зꙋ ла́зарь, тогда̀ гла́сомъ ѡ҆живи́вшагѡ.
Пѣ́снь г҃.
І҆рмо́съ: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла. то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ.
Чꙋ́до стра́нное и҆ пресла́вное, ка́кѡ созда́тель всѣ́хъ, є҆́же не невѣ́дѧше, ꙗ҆́кѡ не вѣ́дый вопроша́ше: гдѣ̀ лежи́тъ, є҆го́же рыда́ете; гдѣ̀ погребе́сѧ ла́зарь, є҆го́же пома́лѣ и҆з̾ ме́ртвыхъ жи́ва ва́мъ воскр҃шꙋ̀ а҆́зъ;
Ка́мень, є҆го́же тебѣ̀ привали́ша погре́бшїи тѧ̀, сего̀ взѧ́ти і҆и҃съ повелѣ́въ, а҆́бїе воскр҃си́ тѧ, возгласи́въ тебѣ̀: ла́заре воста́ни, грѧдѝ ко мнѣ̀, да твоегѡ̀ а҆́дъ ᲂу҆страши́тсѧ гла́са.
Ма́рѳа и҆ марі́а гдⷭ҇и, рыда́ньми вопїѧ́стѣ: сѐ є҆го́же люби́лъ є҆сѝ четверодне́венъ смерди́тъ: а҆́ще бы є҆сѝ бы́лъ здѣ̀, тогда̀ не бы̀ ᲂу҆́мерлъ ла́зарь. но ꙗ҆́кѡ неразлꙋ́ченъ вездѣ̀, сего̀ а҆́бїе возгласи́въ воздви́глъ є҆сѝ.
Пролїѧ́въ над̾ дрꙋ́гомъ сле́зы смотре́нїѧ ра́ди, показа́лъ є҆сѝ пло́ть ѿ на́съ взе́млемꙋю, сꙋщество́мъ не мнѣ́нїемъ сп҃се, соедини́вшꙋюсѧ тебѣ̀, и҆ ꙗ҆́кѡ чл҃вѣколю́бецъ бг҃ъ, сего̀ а҆́бїе возгласи́въ воздви́глъ є҆сѝ. <<тѻ҃в ѡ҆б.: 744>>
Оу҆вы̀ мнѣ̀ вои́стиннꙋ, ны́нѣ погибо́хъ, вопїѧ́ше а҆́дъ, си́це возглаша́ше сме́рти глаго́лѧ: сѐ назѡрѧни́нъ дѡ́льнѧѧ подвиза̀, и҆ ᲂу҆тро́бꙋ мою̀ посѣка́ѧ, бездыха́нна ме́ртва возгласи́въ воздви́же.
Гдѣ̀ є҆вре́йское безꙋ́мїе; гдѣ̀ невѣ́рїе; доко́лѣ чꙋжді́и, доко́лѣ лестцы̀, зритѐ ᲂу҆ме́ршаго гла́сомъ и҆сходѧ́ща, и҆ не вѣ́рꙋете хрⷭ҇тꙋ̀, вои́стиннꙋ сы́нове тьмы̀ всѝ вы̀.
Сла́ва: Є҆ди́наго ѿ трⷪ҇цы вѣ́мъ тѧ̀, а҆́ще и҆ воплоти́лсѧ є҆сѝ, є҆ди́наго и҆ сла́влю, сн҃а воплоще́нна, ѿ бцⷣы безсѣ́меннѡ прозѧ́бшаго, и҆ со ѻ҆ц҃е́мъ и҆ дх҃омъ є҆ди́наго сн҃а славосло́вима.
И҆ ны́нѣ, бг҃оро́диченъ: Стра́нное и҆ стра́шное видѣ́нїе смотре́нїѧ, є҆́же предзрѣ́ша нело́жнїи прⷪ҇ро́цы дв҃ꙋ бцⷣꙋ: безсѣ́меннѡ ᲂу҆́бѡ заче́ншꙋю, и҆ нетлѣ́ннѡ ро́ждшꙋю бг҃а, пребыва́ющꙋю же по ржⷭ҇твѣ̀ чⷭ҇тꙋю.
Пѣ́снь д҃.
І҆рмо́съ: Взѧ́тсѧ сл҃нце, и҆ лꙋна̀ ста̀ въ чи́нѣ свое́мъ, возне́слсѧ є҆сѝ долготерпѣли́ве на дре́во, и҆ водрꙋзи́лъ є҆сѝ на не́мъ цр҃ковь твою̀.
Прослези́лсѧ є҆сѝ гдⷭ҇и над̾ ла́заремъ, показа́въ ꙗ҆́кѡ человѣ́къ є҆сѝ, и҆ воздви́глъ є҆сѝ влⷣко ᲂу҆ме́ршаго, и҆ показа́лъ є҆сѝ лю́демъ, ꙗ҆́кѡ сн҃ъ є҆сѝ бж҃їй.
Бездыха́нный ᲂу҆слы́ша повелѣ́нїе твоѐ, грѧдѝ во́нъ ла́заре, текі́й воста́ше съ пелена́ми, и҆ скака́ше, бл҃же, показꙋ́ѧ держа́вꙋ твою̀.
Ма́рѳины сле́зы и҆ марі́ины ᲂу҆толи́лъ є҆сѝ хрⷭ҇тѐ бж҃е, возгласи́въ ла́зарѧ самовла́стнѡ, воздви́глъ є҆сѝ гла́сомъ, и҆ поклони́сѧ тебѣ̀.
Прослези́всѧ ꙗ҆́кѡ человѣ́къ над̾ ла́заремъ, воздви́глъ є҆сѝ є҆го̀ ꙗ҆́кѡ бг҃ъ. вопроси́лъ є҆сѝ: гдѣ̀ погребе́сѧ четверодне́вный; ᲂу҆вѣрѧ́ѧ бл҃же, вочл҃вѣ́ченїе твоѐ. <<тѻ҃г: 745>>
Стрⷭ҇ти зна́мєнїѧ и҆ крⷭ҇та̀ твоегѡ̀, ᲂу҆вѣрѧ́ти хотѧ̀ бл҃же, а҆́дово несы́тное чре́во растерза́въ, возста́вилъ є҆сѝ ꙗ҆́кѡ бг҃ъ четверодне́внаго.
Кто̀ ви́дѣ, кто̀ слы́ша, ꙗ҆́кѡ воста̀ человѣ́къ ме́ртвый смердѧ́щїй; и҆лїа̀ ᲂу҆́бѡ воздви́же и҆ є҆лїссе́й, но не ѿ гро́ба, но нижѐ четверодне́вна.
Пое́мъ твоѐ гдⷭ҇и, могꙋ́тство, пое́мъ и҆ стрⷭ҇ти хрⷭ҇тѐ: ѻ҆́нѣмъ бо ꙗ҆́кѡ бл҃гоꙋтро́бенъ чꙋдодѣ́йствовалъ є҆сѝ, си́ми же смотри́тельнѡ ꙗ҆́тъ є҆сѝ ꙗ҆́кѡ человѣ́къ.
Бг҃ъ є҆сѝ и҆ человѣ́къ, и҆́стинствꙋѧй вещьмѝ и҆ и҆мены̀, предста́лъ є҆сѝ гро́бꙋ пло́тїю сло́ве, и҆ воздви́глъ є҆сѝ ꙗ҆́кѡ бг҃ъ четверодне́внаго.
Оу҆жасо́шасѧ влⷣко, є҆вре́йстїи наро́ди, ꙗ҆́кѡ ви́дѣша воста́вша ме́ртва и҆з̾ гро́ба ла́зарѧ со гла́сомъ твои́мъ, и҆ пребы́ша непокорли́ви чꙋдесє́мъ твои̑мъ.
Сла́ва: Безнача́льнѡ возсїѧ́лъ є҆сѝ ѿ ѻ҆ц҃а̀ твоегѡ̀, ꙗ҆́кѡ є҆ди́нъ сы́й ѿ трⷪ҇цы сп҃се, въ лѣ́то въ дс҃ѣ и҆з̾ дв҃ственныхъ ты̀ проше́лъ є҆сѝ крове́й, пло́ть взе́мъ пресꙋ́щественный.
И҆ ны́нѣ, бг҃оро́диченъ: Зача́тїе безсѣ́менное бцⷣы, ржⷭ҇тво̀ кромѣ̀ стра́сти тлѣ́нїѧ: бг҃ъ бо ѻ҆боѧ̑ чꙋдодѣ́йствовавый и҆стощѝ себѐ, да на́мъ соедини́тсѧ.
Пѣ́снь є҃.
І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆ и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Жи́знь сы́й гдⷭ҇и, и҆ свѣ́тъ и҆́стинный, ла́зарѧ возгласи́въ воскр҃си́лъ є҆сѝ: ꙗ҆́кѡ си́ленъ бо всѣ̑мъ показа́лъ є҆сѝ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Нестерпи́мое твоѐ повелѣ́нїе і҆и҃се, не терпѧ̀ а҆́дъ мно́гихъ прїе́мый ᲂу҆боѧ́сѧ, и҆ четверодне́вна сꙋ́ща ла́зарѧ, со гла́сомъ жи́ва, а҆ не ме́ртва даѧ́ше. <<тѻ҃г ѡ҆б.: 746>>
Пе́рсть совокꙋ́пль дꙋ́хꙋ, дре́вле бре́нїе дꙋ́хомъ жи́зни, ѡ҆дꙋши́вый сло́ве сло́вомъ твои́мъ: и҆ ны́нѣ же сло́вомъ воскр҃си́лъ є҆сѝ ѿ тлѝ дрꙋ́га и҆з̾ преиспо́днихъ.
Ма́нїю твоемꙋ̀ гдⷭ҇и, сопроти́висѧ никто́же: є҆гда́ бо ме́ртваго гласи́лъ є҆сѝ ла́зарѧ, а҆́бїе бездыха́нный востава́ше, и҆ ᲂу҆́зы носѧ̀, нога́ма хожда́ше.
Ѽ і҆ꙋде́йское безꙋ́мїе! ѽ ѡ҆мраче́нїе врагѡ́въ! кто̀ ви́дѣ мертвеца̀ и҆з̾ гро́ба востаю́ща; и҆лїа̀ дре́вле воскр҃сѝ, но не ѿ гро́ба, но нижѐ четверодне́вна.
Непобѣди́ме, долготерпѣли́ве, всѧ̑ на́съ ра́ди творѧ́й ꙗ҆́кѡ бг҃ъ, и҆ терпѧ́й ꙗ҆́кѡ человѣ́къ, прича́стники всѧ̑ ны̀ сотворѝ црⷭ҇твїѧ твоегѡ̀, мл҃твами ла́заревыми.
Сла́ва: Пребезнача́льнаѧ, собезнача́льнаѧ, є҆диночⷭ҇тна́ѧ трⷪ҇це, ѻ҆́ч҃е вседержи́телю, и҆ сн҃е, и҆ дш҃е ст҃ы́й, є҆ди́нице ст҃а́ѧ трїѷпоста́снаѧ, сꙋ́щыѧ ѿ а҆да́ма сп҃са́й, вѣ́рнѡ тѧ̀ воспѣва́ющыѧ.
И҆ ны́нѣ, бг҃оро́диченъ: Пречⷭ҇тое чре́во твоѐ ѡ҆ст҃ѝ чⷭ҇таѧ, пло́ть и҆з̾ негѡ̀ прїе́мый пребж҃е́ственный, въ трⷪ҇цѣ покланѧ́емый, и҆з̾ ѻ҆ц҃а̀ сло́во, и҆ съ дх҃омъ бг҃ъ.
Пѣ́снь ѕ҃.
І҆рмо́съ: Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ спа́слъ є҆сѝ мѧ̀ сп҃се ѿ рабо́ты сме́ртныѧ, и҆ разрѣши́лъ є҆сѝ ᲂу҆́зы беззако́нїй мои́хъ.
Вопроси́лъ є҆сѝ: гдѣ́ є҆сть; всѧ̑ вѣ́дый, прослези́лсѧ же є҆сѝ сп҃се, ꙗ҆́кѡ чл҃вѣ́къ є҆стество́мъ, воздви́глъ мѧ̀ є҆сѝ ме́ртва повелѣ́нїемъ твои́мъ.
Возгласи́лъ мѧ̀ є҆сѝ сп҃се, и҆з̾ а҆́да преиспо́днѧгѡ, вопїе́тъ ла́зарь къ тебѣ̀ разрꙋши́телю а҆́да, и҆ воздви́глъ мѧ̀ є҆сѝ ме́ртва повелѣ́нїемъ твои́мъ. <<тѻ҃д: 747>>
Ѡ҆дѣ́ѧлъ мѧ̀ є҆сѝ сп҃се, въ бре́нное тѣ́ло, и҆ вдохнꙋ́лъ мѝ є҆сѝ жи́знь, и҆ ви́дѣхъ свѣ́тъ тво́й, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.
Ѡ҆дꙋши́лъ є҆сѝ ты̀, бездыха́нный ѡ҆́бразъ пло́ти моеѧ̀ сп҃се, стѧгнꙋ́лъ мѧ̀ є҆сѝ костьмѝ и҆ жи́лами, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.
Всеснѣ́дное растерза́въ чре́во а҆́дово, и҆сто́ргнꙋлъ мѧ̀ є҆сѝ сп҃се, твое́ю вла́стїю, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.
Носи́лъ є҆сѝ сп҃се, смѣше́нїе моѐ всецѣ́ло: сохрани́лъ же є҆сѝ чи́стꙋ пречⷭ҇тꙋю ᲂу҆тро́бꙋ, и҆з̾ неѧ́же проше́лъ є҆сѝ воплоти́всѧ, є҆ди́нъ сы́й трⷪ҇цы.
Сла́ва, трⷪ҇ченъ: Трⷪ҇це ст҃а́ѧ, прославлѧ́ю твоѐ бл҃гоꙋтро́бїе, и҆ со а҆́гг҃лы пою̀ трист҃ꙋ́ю пѣ́снь: поми́лꙋй дꙋ́шы на́съ воспѣва́ющихъ тѧ̀.
И҆ ны́нѣ, бг҃оро́диченъ: Въ пречⷭ҇тꙋю твою̀ ᲂу҆тро́бꙋ вни́де сло́во, соблюде́ же па́ки по ржⷭ҇твѣ̀ сїю̀ чⷭ҇тꙋю, бг҃ороди́тельнице, чꙋ́до вои́стиннꙋ пресла́вное.
Пѣ́снь з҃.
І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ.
Над̾ мертвеце́мъ прослези́лсѧ є҆сѝ сп҃се чл҃вѣколю́бче: да пока́жеши всѣ̑мъ лю́демъ, ꙗ҆́кѡ бг҃ъ сы́й, на́съ ра́ди человѣ́къ ꙗ҆ви́лсѧ є҆сѝ, и҆ во́лею прослези́лсѧ є҆сѝ, ѡ҆́бразы на́мъ предлага́ѧ серде́чныѧ любвѐ.
Четверодне́вный ла́зарь сп҃се, ꙗ҆́кѡ ᲂу҆слы́ша ни́зꙋ гла́съ тво́й, воста́въ воспѣ́ тѧ, и҆ ра́дꙋѧсѧ си́це вопїѧ́ше: ты̀ бг҃ъ и҆ созда́тель мо́й, тебѣ̀ покланѧ́юсѧ, и҆ пою̀ воскр҃си́вшаго мѧ̀. <<тѻ҃д ѡ҆б.: 748>>
А҆́ще и҆ ᲂу҆́зами ѡ҆бложе́нъ є҆́смь, ла́зарь ни́зꙋ вопїѧ́ше свободи́телю: но ника́коже во чре́вѣ пребꙋ́дꙋ а҆́довѣ, а҆́ще то́кмѡ воззове́ши мѧ̀, ла́заре, грѧдѝ во́нъ: ты́ бо свѣ́тъ мо́й и҆ живо́тъ.
Молю́ тѧ ла́заре, а҆́дъ речѐ, воста́ни, и҆зы́ди ѿ закле́пѡвъ мои́хъ ско́рѡ, ѿидѝ ᲂу҆́бѡ: добро́ бо мнѣ̀ є҆ди́наго рыда́ти го́рцѣ ѿе́млема, не́жели всѣ́хъ, и҆̀хже пре́жде а҆́лчѧ поглоти́хъ.
Ѽ что̀ косни́ши ла́заре, глаго́летъ, грѧдѝ во́нъ, зове́тъ стоѧ̀ дрꙋ́гъ тво́й: и҆зы́ди ᲂу҆̀бо, да и҆ а҆́зъ ѡ҆сла́бꙋ прїимꙋ̀, ѿне́лѣже бо тѧ̀ снѣдо́хъ, на блева́нїе пи́ща ᲂу҆стро́исѧ мѝ.
Что̀ не воста́неши ла́заре ско́рѡ, воззва̀ и҆з̾ до́лꙋ а҆́дъ рыда́ѧ; что̀ не а҆́бїе воскре́съ тече́ши ѿсю́дꙋ; да не и҆ дрꙋги́хъ мѝ плѣни́тъ хрⷭ҇то́съ, воскр҃си́въ тѧ̀.
Оу҆дивлѧ́емь бы́лъ є҆сѝ влⷣко хрⷭ҇тѐ, чꙋ̑днаѧ тогда̀ содѣ́лавъ мнѡ́гаѧ, свѣ́тъ бо слѣпы̑мъ, глꙋхи̑мъ же ᲂу҆́шы ѿве́рзлъ є҆сѝ сло́вомъ, и҆ дрꙋ́га ла́зарѧ и҆з̾ ме́ртвыхъ, ꙗ҆́кѡ бг҃ъ возгласи́въ воздви́глъ є҆сѝ.
Сла́ва, трⷪ҇ченъ: Трⷪ҇ческꙋю воспои́мъ пѣ́снь, сла́вѧще безнача́льнаго ѻ҆ц҃а̀, и҆ сн҃а, и҆ дх҃а пра́ваго, є҆ди́нственное є҆ди́но сꙋщество̀, є҆́же трⷪ҇чески воспои́мъ: ст҃ъ, ст҃ъ, ст҃ъ є҆сѝ трⷪ҇це.
И҆ ны́нѣ, бг҃оро́диченъ: Ꙗ҆́кѡ є҆ди́наго ѿ трⷪ҇цы тѧ̀ хрⷭ҇тѐ сла́вимъ, ꙗ҆́кѡ ѿ дв҃ы вопло́щьсѧ, кромѣ̀ преложе́нїѧ человѣ́чески всѧ̑ претерпѣ́лъ є҆сѝ, не ѿстꙋ́пль є҆стества̀ ѻ҆ч҃еска і҆и҃се, а҆́ще и҆ соедини́лсѧ є҆сѝ на́мъ.
Пѣ́снь и҃.
І҆рмо́съ: Нб҃са̀ нб҃съ, и҆ вода̀ ꙗ҆́же превы́ше нб҃съ, бл҃гослови́те, по́йте гдⷭ҇а, и҆ превозноси́те є҆го̀ во вѣ́ки.
Творе́цъ и҆ содержи́тель всѣ́хъ, за млⷭ҇рдїе во виѳа́нїю прїи́де, воздви́гнꙋти ла́зарѧ. <<тѻ҃є: 749>>
Четверодне́вный смердѧ̀, и҆ пово́йми ѡ҆бѧ́занъ, и҆змѣни́сѧ дыха́нїемъ бездыха́нный, возгласи́вшꙋ тѝ гдⷭ҇и.
І҆ꙋде́йстїи лю́дїе, ꙗ҆́кѡ ви́дѣша ᲂу҆ме́ршаго, твои́мъ гла́сомъ воста́вша хрⷭ҇тѐ, распыха́хꙋсѧ.
Ѡ҆мраче́ннїи ѡ҆ свѣ́тѣ і҆ꙋде́є, что̀ не вѣ́рꙋете ла́заревꙋ воста́нїю, хрⷭ҇то́вꙋ начина́нїю;
Да ра́дꙋетсѧ сїѡ́нъ, и҆ да пое́тъ жизнода́вца, воскр҃си́вшаго сло́вомъ ѿ гро́ба ла́зарѧ.
Во́и нбⷭ҇нїи, и҆ ро́дъ земны́хъ воспѣ́ша тѧ̀, є҆гда̀ сп҃се мо́й ла́зарѧ воздви́глъ є҆сѝ.
Сла́ва: Со ѻ҆ц҃е́мъ и҆ сн҃омъ дх҃а славосло́влю и҆ поѧ̀ немо́лчнѡ взыва́ю: трист҃ы́й, сла́ва тебѣ̀.
И҆ ны́нѣ, бг҃оро́диченъ: Тебѐ бл҃гословлю̀ и҆ покланѧ́юсѧ ро́ждшемꙋсѧ и҆з̾ дв҃ы, не разлꙋ́чшꙋсѧ прⷭ҇то́ла ст҃ы́ѧ сла́вы твоеѧ̀.
Пѣ́снь ѳ҃.
І҆рмо́съ: Сотворѝ держа́вꙋ мы́шцею свое́ю: низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ. въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Да пое́тъ чꙋ́до виѳа́нїа съ на́ми: въ не́й бо прослези́сѧ созда́тель, зако́номъ є҆стества̀ пло́ти, ла́зарѧ воскр҃ша́ѧ, и҆ ма́рѳины сле́зы про́чее, и҆ пла́чь марі́инъ въ ра́дость прелага́ѧ, мертвеца̀ воздви́глъ є҆́сть.
Оу҆вѣрѧ́ѧ сло́ве, воскрⷭ҇нїе твоѐ, призва́лъ є҆сѝ ла́зарѧ и҆з̾ гро́ба, и҆ воздви́глъ є҆сѝ ꙗ҆́кѡ бг҃ъ, да пока́жеши лю́демъ бг҃а же и҆ чл҃вѣ́ка вкꙋ́пѣ вои́стиннѣ сꙋ́ща, и҆ воздви́гша хра́мъ тѣлесѐ твоегѡ̀.
Стрѧ́слъ є҆сѝ врата̀ и҆ верєѝ желѣ̑зныѧ, ᲂу҆страши́лъ є҆сѝ а҆́дъ гла́сомъ твои́мъ, ᲂу҆жасе́сѧ же съ ни́мъ и҆ сме́рть а҆́бїе, ꙗ҆́кѡ ви́дѣша ла́зарѧ сп҃се, сꙋ́ща въ ни́хъ ᲂу҆́зника, ѡ҆дꙋшевле́нна гла́сомъ и҆ воскре́сша. <<тѻ҃є ѡ҆б.: 750>>
Оу҆жасо́шасѧ всѝ, ꙗ҆́кѡ ви́дѣша тѧ̀ сп҃се слезѧ́ща, ла́зарѧ ᲂу҆ме́рша, и҆ глаго́лахꙋ наро́ди: ви́ждь, ка́кѡ є҆го̀ люблѧ́ше. а҆́бїе ᲂу҆́бѡ возгласи́лъ є҆сѝ є҆го̀, и҆ воста́въ бездыха́нный, ѿложѝ тлѣ́нїе повелѣ́нїемъ твои́мъ.
Потрѧсо́шасѧ врата̀, сокрꙋши́шасѧ верєѝ, разрѣши́шасѧ ᲂу҆́зы ме́ртвагѡ гла́сомъ си́лы хрⷭ҇то́вы, и҆ а҆́дъ го́рькѡ воздыха́ше рыда́ѧ, и҆ свои̑мъ вопїѧ́ше: ᲂу҆вы̀ мнѣ̀, кі́й и҆ ѿкꙋ́дꙋ гла́съ ѡ҆живлѧ́ѧй мє́ртвыѧ;
Воста́ни ѿсю́дꙋ послꙋ́шавъ гла́са, дрꙋ́гъ бо тво́й во́нъ приглаша́етъ тѧ̀: се́й є҆́сть пре́жде воскр҃си́вый мє́ртвыѧ. и҆лїа̀ ᲂу҆́бѡ воздви́же ме́ртва, и҆ є҆лїссе́й кꙋ́пнѡ: но се́й бѣ̀ ѻ҆́нѣми и҆ глаго́лѧй и҆ дѣ́йствꙋѧй.
Пое́мъ твою̀ сло́ве непобѣди́мꙋю крѣ́пость: костьми́ бо и҆ жи́лами ᲂу҆ме́рша воздви́глъ є҆сѝ сло́вомъ твои́мъ, ꙗ҆́кѡ всѣ́хъ созда́тель, и҆ сего̀ воскр҃си́лъ є҆сѝ сп҃се, ѿ преиспо́днихъ, ꙗ҆́коже вдо́выѧ сы́на сꙋ́ща на ѻ҆дрѐ.
Сла́ва: Трⷪ҇це всест҃а́ѧ, ѻ҆́ч҃е безнача́льный бж҃е, собезнача́льный сн҃е и҆ бж҃е́ственный сло́ве, ᲂу҆тѣ́шителю бл҃гі́й, дш҃е ст҃ы́й бж҃їй: є҆ди́ный и҆ трисл҃нечный свѣ́те, соесте́ственное сꙋщество̀, є҆ди́не бж҃е и҆ гдⷭ҇и, ᲂу҆ще́дри мі́ръ.
И҆ ны́нѣ, бг҃оро́диченъ: Всѧ̑ сотвори́вый въ премꙋ́дрости і҆и҃се, и҆ во всего́ мѧ ѡ҆болкі́йсѧ и҆з̾ дв҃ы, и҆ ве́сь пребыва́ѧй при́снѡ въ нѣ́дрѣхъ ѻ҆ц҃а̀: ст҃ы́й дх҃ъ тво́й хрⷭ҇тѐ, на ста́до твоѐ низпосла́въ ꙗ҆́кѡ бг҃ъ, ѡ҆сѣнѝ на́съ.
Вмѣ́стѡ Досто́йно, і҆рмо́съ. Сотворѝ держа́вꙋ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.