Неделя Торжества Православия
<<рм҃г ѡ҆б.: 286>>
Недѣ́лѧ пе́рваѧ ст҃а́гѡ поста̀,
въ ню́же правосла́вїе воспомина́етсѧ.
Бдѣ́нїе ѻ҆бы́чное.
Въ сꙋббѡ́тꙋ ве́чера, на ма́лѣй вече́рни поста́вимъ стїхѝ д҃, и҆ пое́мъ стїхѝ подѡ́бныѧ. Творе́нїе нїкола́а, гла́съ а҃.
Подо́бенъ: Нбⷭ҇ныхъ чинѡ́въ:
Ны́нѣ бл҃гоче́стїѧ свѣ́тлость всѣ̑мъ распростре́сѧ, разгонѧ́ющи ле́сть нече́стїѧ ꙗ҆́кѡ ѻ҆́блакъ, просвѣща́ющи же сердца̀ бл҃гочести́выхъ: прїиди́те всѝ припаде́мъ, бл҃гочестивомꙋ́дреннѡ честны̑мъ і҆кѡ́намъ хрⷭ҇тѡ́вымъ покланѧ́ющесѧ правосла́внїи.
Сщ҃енноѡбра́зными і҆кѡ́нами ны́нѣ ᲂу҆краша́етсѧ, ꙗ҆́кѡ невѣ́ста ᲂу҆кра́шена хрⷭ҇то́ва цр҃ковь, и҆ всѣ́хъ созыва́етъ дх҃о́внѡ пра́здновати: сни́демсѧ во є҆диномы́слїи и҆ вѣ́рѣ, ра́достнѡ велича́юще гдⷭ҇а.
Мі́ре ве́сь весели́сѧ: се́ бо гдⷭ҇ь низложѝ съ высоты̀ нече́стїѧ держа́вꙋ неизрече́ннымъ промышле́нїемъ. и҆ смире́ннїи вознесо́хомсѧ дне́сь къ вѣ́рѣ правосла́вїѧ, бл҃гочести́вою цари́цею наставлѧ́еми.
Къ первоѡбра́зномꙋ но́ситсѧ, глаго́летъ васі́лїй, че́сть і҆кѡ́ны: сегѡ̀ ра́ди въ любвѝ почита́емъ і҆кѡ́ны сп҃са хрⷭ҇та̀, и҆ ст҃ы́хъ всѣ́хъ: да си́хъ собра́вше, никогда́же ны́нѣ ѕлоче́стїемъ ѿведе́мсѧ.
Сла́ва, и҆ ны́нѣ: бг҃оро́диченъ. Подо́бенъ:
Безнача́льнымъ, и҆ бж҃е́ственнымъ є҆стество́мъ неви́димый, человѣ́къ ви́дѣнъ бы́сть ѻ҆трокови́це, ѿ чи́стыхъ твои́хъ крове́й, за кра́йнее бл҃гоꙋтро́бїе: є҆гѡ́же пло́ти написа́вше подо́бїе, че́стнѡ покланѧ́емсѧ всѝ вѣ́рнїи, и҆ бл҃гоче́стнѡ велича́емъ.
На стїхо́внѣ, гла́съ в҃. Подо́бенъ: До́ме є҆ѵфра́ѳовъ:
Гꙋби́тельства тлетво́рнагѡ и҆збѣ́гше ѕлосла́вныхъ, правосла́вїѧ сїѧ́нїемъ, сердца́ми просвѣти́мсѧ вѣ́рнїи бг҃а сла́вѧще.
Сті́хъ: Принеси́те гдⷭ҇ви че́сть и҆ сла́вꙋ.
А҆́рїева нечи́стаѧ ᲂу҆праздни́сѧ пре́лесть, македо́нїа, петра̀, севи́ра же и҆ пѵ́рра: и҆ свѣ́титъ свѣ́тъ трисо́лнечный.
Сті́хъ: Поклони́тесѧ є҆мꙋ̀ во дворѣ̀ ст҃ѣ́мъ є҆гѡ̀. Не ктомꙋ̀ ѕлочести́выхъ похвалѧ́етсѧ мра́чное ᲂу҆че́нїе: бг҃ъ бо правосла̑внымъ, и҆зволе́нїемъ ѳеодѡ́ры, же́злъ крѣ́пости дае́тъ.
Сла́ва, и҆ ны́нѣ, бг҃оро́диченъ. Подо́бенъ:
Вознесла̀ є҆сѝ смире́нныхъ ро́гъ бцⷣе, ро́ждшаѧ бг҃а сло́ва: тѣ́мже вѣ́рнѡ тѧ̀ всѝ чтꙋ́ще велича́емъ.
Тропа́рь, Пречⷭ҇томꙋ ѡ҆́бразꙋ твоемꙋ̀: И҆ быва́етъ ѿпꙋ́стъ.
На вели́цѣй вече́рни,
по ѻ҆бы́чномъ стїхосло́вїи, Гдⷭ҇и воззва́хъ, на гла́съ ѻ҆смогла́сника, поста́вимъ стїхѡ́въ і҃: и҆ пое́мъ стїхи̑ры воскрⷭ҇ны г҃, и҆ а҆натѡ́лїевы г҃, и҆ трїѡ́ди подо́бны д҃. Гла́съ ѕ҃: Всю̀ ѿложи́вше:
Тѧ̀ непостижи́маго, пре́жде денни́цы безнача́льнѡ и҆з̾ невеще́ственнагѡ возсїѧ́вшаго, безпло́тнагѡ же чре́ва роди́телева, прⷪ҇ро́цы гдⷭ҇и, твои́мъ дх҃омъ вдохнове́ни, прореко́ша ѻ҆троча̀ бы́ти, и҆з̾ неискꙋсобра́чныѧ воплоща́ема, человѣ́кѡмъ совокꙋплѧ́ема, и҆ сꙋ́щими на землѝ зри́ма: и҆́миже ꙗ҆́кѡ ще́дрый просвѣще́нїѧ сподо́би твоегѡ̀, воспѣва́ющихъ неизрече́нное, и҆ честно́е твоѐ воскрⷭ҇нїе. <<рм҃д ѡ҆б.: 288>>
Подо́бенъ:
Сло́вомъ тѧ̀ проповѣ́давшїи бг҃оглаго́ливїи прⷪ҇ро́цы, и҆ дѣ́лы поче́тшїи, безконе́чнꙋю жи́знь приплоди́ша: тва́ри бо влⷣко, па́че тебѐ содѣ́телѧ, слꙋжи́ти не претерпѣ́вше, мі́ра всегѡ̀ є҆ѵⷢ҇льски ѿврати́шасѧ, и҆ соѡбра́зни бы́ша стрⷭ҇ти твое́й, ю҆́же провозвѣсти́ша: и҆́хже мл҃твами, сподо́би непоро́чнѡ прейтѝ воздержа́нїѧ по́прище, є҆ди́не многомлⷭ҇тиве.
Є҆стество́мъ неѡпи́санный бж҃е́ственнымъ твои́мъ сы́й, на послѣ̑днѧѧ влⷣко вопло́щьсѧ, и҆зво́лилъ є҆сѝ ѡ҆писова́тисѧ: пло́ти бо прїѧ́тїемъ, и҆ свѡ́йства всѧ̑ сеѧ̀ взѧ́лъ є҆сѝ. тѣ́мже ви́дъ тво́й ѡ҆бразова́нїѧ ѡ҆писꙋ́ющїи любе́знѡ цѣлꙋ́емъ, къ твое́й любвѝ возвыша́еми, и҆ и҆сцѣле́нїй бл҃года́ть почерпа́емъ и҆з̾ негѡ̀, а҆пⷭ҇льскимъ послѣ́дꙋюще бж҃е́ствєннымъ преда́нїємъ.
Пречестно́е ᲂу҆краше́нїе хрⷭ҇то́ва цр҃ковь, честны́хъ прїѧ́тъ и҆ ст҃ы́хъ і҆кѡ́нъ, сп҃са хрⷭ҇та̀ и҆ бг҃ома́тере, и҆ всѣ́хъ ст҃ы́хъ свѣтлѣ́йшее возставле́нїе, и҆́мже просвѣща́етсѧ, и҆ красꙋ́етсѧ бл҃года́тїю, и҆ со́нмище ѿлага́етъ є҆реті́ческое и҆згонѧ́щи: и҆ ра́дꙋющисѧ сла́витъ чл҃вѣколю́бца бг҃а, є҆ѧ̀ ра́ди претерпѣ́вша стрⷭ҇ти вѡ́льныѧ.
Сла́ва, гла́съ в҃: Бл҃года́ть возсїѧ̀ и҆́стины, проѡбразꙋ́емаѧ дре́вле сѣно́внѡ, ны́нѣ ꙗ҆вле́ннѡ сконча́сѧ: се́ бо цр҃ковь воплоще́ннымъ ѡ҆́бразомъ хрⷭ҇то́вымъ, ꙗ҆́кѡ прекра́сною ᲂу҆́тварїю ѡ҆блачи́тсѧ, ски́нїи свидѣ́нїѧ ѡ҆́бразъ пронаписꙋ́ющи, и҆ правосла́внꙋю вѣ́рꙋ содержа́щи: да є҆го́же почита́емъ, сегѡ̀ и҆ ѡ҆́бразъ держа́ще, не прельща́емсѧ, да ѡ҆блекꙋ́тсѧ въ стꙋ́дъ си́це невѣ́рꙋющїи: на́мъ бо сла́ва зра́къ воплоти́вшагѡсѧ бл҃гоче́стнѡ покланѧ́емый, не бг҃отвори́мый. то́й ѡ҆блобыза́юще вѣ́рнїи возопїи́мъ: бж҃е, сп҃сѝ лю́ди твоѧ̑, и҆ бл҃гословѝ достоѧ́нїе твоѐ. <<рм҃є: 289>>
И҆ ны́нѣ, бг҃оро́диченъ а҃-й гла́са.
На лїті́и же, ꙗ҆́кѡ ѻ҆бы́чно, стїхи́ра хра́ма.
Сла́ва, гла́съ в҃: Ра́дꙋйтесѧ прⷪ҇ро́цы честні́и, зако́нъ гдⷭ҇нь до́брѣ ᲂу҆чини́вшїи, и҆ вѣ́рою ꙗ҆́вльшїисѧ неѡбори́мїи столпѝ неꙋкло́ннїи: вы́ бо и҆ хода́таи ꙗ҆ви́стесѧ но́вагѡ завѣ́та хрⷭ҇то́ва, и҆ преста́вившесѧ на нб҃са̀. того̀ моли́те, ᲂу҆мири́ти мі́ръ, и҆ сп҃стѝ дꙋ́шы на́шѧ.
И҆ ны́нѣ, бг҃оро́диченъ, гла́съ то́йже: Всѐ ᲂу҆пова́нїе моѐ:
На стїхо́внѣ ѻ҆смогла́сника.
Сла́ва, гла́съ в҃: И҆з̾ нече́стїѧ во бл҃гоче́стїе преше́дше, и҆ свѣ́томъ ра́зꙋма просвѣти́вшесѧ, ѱало́мски рꙋка́ми воспле́щимъ, бл҃года́рственнѡ хвалꙋ̀ бг҃ꙋ приносѧ́ще: и҆ на стѣна́хъ, и҆ дска́хъ, и҆ на сщ҃е́нныхъ сосꙋ́дѣхъ, начерта́ннымъ сщ҃є́ннымъ ѡ҆бразѡ́мъ хрⷭ҇тѡ́вымъ, и҆ пречⷭ҇тыѧ, и҆ всѣ́хъ ст҃ы́хъ, че́стнѡ поклони́мсѧ, ѿлага́юще ѕлоче́стнꙋю ѕлосла́вныхъ вѣ́рꙋ: [че́сть бо ѡ҆́браза, ꙗ҆́коже глаго́летъ васі́лїй, на первоѡбра́зное прехо́дитъ,] просѧ́ще мл҃твами пречⷭ҇тыѧ твоеѧ̀ мт҃ре, хрⷭ҇тѐ бж҃е на́шъ, и҆ всѣ́хъ ст҃ы́хъ, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ: Ѽ чꙋдесѐ но́вагѡ: Тропа́рь: Бцⷣе дв҃о ра́дꙋйсѧ: два́жды, и҆ пра́здника: Пречⷭ҇томꙋ ѡ҆́бразꙋ твоемꙋ̀: є҆ди́ножды. И҆ про́чее послѣ́дованїе бдѣ́нїѧ.
На ᲂу҆́трени,
на Бг҃ъ гдⷭ҇ь, тропа́рь воскрⷭ҇нъ, два́жды.
Сла́ва, настоѧ́щїй, гла́съ в҃:
Пречⷭ҇томꙋ ѡ҆́бразꙋ твоемꙋ̀ покланѧ́емсѧ бл҃гі́й, просѧ́ще проще́нїѧ прегрѣше́нїй на́шихъ хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же <<рм҃є ѡ҆б.: 290>> созда́лъ є҆сѝ, ѿ рабо́ты вра́жїѧ. тѣ́мъ бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑ сп҃се на́шъ, прише́дый сп҃стѝ мі́ръ.
И҆ ны́нѣ: Всѧ̑ па́че смы́сла, всѧ̑ пресла̑внаѧ твоѧ̑ бцⷣе та̑инства, чистотѣ̀ запеча́танной, и҆ дв҃ствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.
И҆ ѻ҆бы́чное стїхосло́вїе: и҆ про́чее послѣ́дованїе. Канѡ́ны: Воскрⷭ҇ный, и҆ бцⷣы, и҆ трїѡ́ди на ѕ҃. Творе́нїе господи́на ѳеофа́на, є҆гѡ́же краестро́чїе: Дне́сь бл҃гоче́стїѧ бг҃освѣ́тлаѧ прїи́де зарѧ̀. Гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю:
Пле́щꙋще съ весе́лїемъ дне́сь вѣ́рнїи возопїи́мъ: ко́ль чꙋ́дна дѣла̀ твоѧ̑ хрⷭ҇тѐ, и҆ вели́ка си́ла, на́ше є҆диномы́слїе и҆ согла́сїе содѣ́лавый!
Де́нь ра́достный бг҃омꙋ́дреннїи прїиди́те соверши́мъ, ны́нѣ нб҃о и҆ землѧ̀ весели́тсѧ, и҆ а҆́гг҃лѡвъ чи́ни, и҆ человѣ́кѡвъ собра̑нїѧ и҆зрѧ́днѡ пра́зднꙋюще.
Преве́лїе бл҃годѣѧ́нїе ви́дѧще, рꙋка́ми воспле́щимъ: разстоѧ́щыѧсѧ ᲂу҆́ды хрⷭ҇тѡ́вы, совокꙋ́плены во є҆ди́нство, и҆ бг҃а похва́лимъ ми́ръ пода́вшаго.
Да́шасѧ цр҃кви дне́сь побѣди́тєльнаѧ, бг҃одви́жнымъ манове́нїемъ и҆ совѣ́томъ, мїхаи́ла же и҆ ѳеодѡ́ры, бл҃гоче́стнѡ вѣ́рꙋ содержа́щихъ царе́й на́шихъ.
Бг҃оро́диченъ: Ѻ҆рꙋ́жїѧ ѕлочести́выхъ и҆счезо́ша ꙗ҆́вѣ є҆ресе́й: хра́мъ бо тво́й пречⷭ҇таѧ чⷭ҇таѧ, во ѡ҆́бразѣхъ ᲂу҆краша́емый всебл҃голѣ́пнѡ зрѧ́ще, ны́нѣ всесщ҃е́ннѡ ра́дꙋемсѧ.
Катава́сїа: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть. <<рм҃ѕ: 291>>
Пѣ́снь г҃. І҆рмо́съ: Весели́тсѧ ѡ҆ тебѣ̀:
Не ктомꙋ̀ нечести́выхъ є҆ретїкѡ́въ ны́нѣ бро́вь взе́млетсѧ: бж҃їѧ бо си́ла правосла́вїе ᲂу҆держа́ла є҆́сть.
Ѻ҆́блацы прⷪ҇ро́честїи, животворѧ́щꙋю съ нб҃сѐ дне́сь ро́сꙋ на́мъ да кропѧ́тъ, на воста́нїе вѣ́ры.
Бл҃гогла́снѡ та̑йныѧ а҆пⷭ҇лѡвъ хрⷭ҇то́выхъ трꙋбы̑, па́че є҆стества̀ да вопїю́тъ, честны́хъ ѡ҆бразѡ́въ и҆справле́нїе.
Воспои́мъ хрⷭ҇та̀, показа́вшаго на́мъ цр҃и́цꙋ бл҃гочести́вꙋю, хрⷭ҇толюби́вꙋю, съ бг҃овѣнча́нною ѻ҆́траслїю.
Бг҃оро́диченъ: Селе́нїе твоѐ сщ҃е́нное дости́гше вѣ́рнїи, пречⷭ҇таѧ, свѣтови́дною бл҃года́тїю ны́нѣ ѡ҆зари́тисѧ, мо́лимсѧ.
Катава́сїа: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище, и҆ ᲂу҆твержде́нїе.
Сѣда́ленъ, гла́съ а҃.
Подо́бенъ: Ли́къ а҆́гг҃льскїй:
Бж҃е́ственный тво́й зра́къ, во ѡ҆́бразѣ ѡ҆бразꙋ́юще хрⷭ҇тѐ, ꙗ҆́снѡ вопїе́мъ ржⷭ҇тво̀, чꙋдеса̀ неизглаго́ланнаѧ, во́льное распѧ́тїе. ѿѻнꙋ́дꙋже бѣ́сове ѿго́нѧтсѧ стра́хомъ, и҆ ѕлосла́внїи въ посꙋпле́нїи рыда́ютъ, ꙗ҆́кѡ си́хъ соприча̑стницы.
Сла́ва: Зра́ками прⷪ҇ро́кѡвъ, а҆пⷭ҇лѡвъ ви́дами, мч҃нкѡвъ сщ҃е́нныхъ, и҆ ст҃ы́хъ всѣ́хъ і҆кѡ́нами, и҆ и҆з̾ѡбраже́ньми сщ҃е́ннѡ красꙋ́етсѧ: жениха́ же мы́сленнагѡ и҆ невѣ́сты ᲂу҆краша́етсѧ ᲂу҆́мными красова́ньми, мт҃и вы́шнїй сїѡ́нъ.
И҆ ны́нѣ, бг҃оро́диченъ: Любо́вїю чⷭ҇таѧ, твою̀ ст҃ꙋ́ю і҆кѡ́нꙋ почита́ющымъ, и҆ бж҃їю тѧ̀ и҆́стиннꙋю мт҃рь согла́снѡ возвѣща́ющымъ, и҆ вѣ́рнѡ покланѧ́ющымсѧ тѝ, храни́тельница ꙗ҆ви́ласѧ є҆сѝ, и҆ держа́вное предста́тельство, <<рм҃ѕ ѡ҆б.: 292>> ѿвраща́ющи всѧ́кое лю́тое дале́че си́хъ, ꙗ҆́кѡ всѧ̑ могꙋ́щаѧ.
Пѣ́снь д҃. І҆рмо́съ: Вознесе́на тѧ̀:
Наи́тїемъ бж҃е́ственнымъ ᲂу҆тѣ́шителѧ, тво́й хра́мъ ѡ҆ст҃ѝ, и҆ прише́ствїемъ сегѡ̀ є҆реті́ческꙋю пре́лесть ѿженѝ, сло́ве бж҃їй многомлⷭ҇тиве.
Нꙋ́жднѣйшагѡ и҆зба́вивый ѕлоче́стїѧ твоѧ̑ лю́ди, покажѝ бл҃гоче́стїѧ ре́вностїю разжжє́ны, и҆ вѣ́рою взыва́ющыѧ: сла́ва си́лѣ твое́й гдⷭ҇и.
Сщ҃енноѡбра́зными и҆з̾ѡбраже́ньми, ѡ҆бразѡ́въ хрⷭ҇то́выхъ зрѧ́ще и҆ бцⷣы, сїѧ̑ющаѧ бж҃е́ствєннаѧ селє́нїѧ, сщ҃еннолѣ́пнѡ ра́дꙋемсѧ.
Цр҃и́ца по ѻ҆боемꙋ̀ ᲂу҆кра́шена, и҆́стиннагѡ возжелѣ́вши хрⷭ҇то́ва црⷭ҇тва, сегѡ̀ написа̀ ѡ҆́бразъ пречⷭ҇тый, и҆ ст҃ы́хъ и҆з̾ѡбражє́нїѧ.
Бг҃оро́диченъ: Воплоще́нна роди́вши бж҃е́ственнаго сло́ва, бг҃олѣ́пное ѡ҆сщ҃е́нїе бл҃года́тнаѧ, сего̀ показа́ла є҆сѝ: тѣ́мже тво́й хра́мъ свѣтови́дный ѡ҆бновлѧ́емъ.
Катава́сїа: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Пѣ́снь є҃:
І҆рмо́съ: Ты̀ гдⷭ҇и мо́й:
Положѝ гдⷭ҇и твое́й цр҃кви ᲂу҆твержде́нїе, непрекло́ннѣй пребы́ти въ вѣ́къ вѣ́ка ѿ смѧте́нїй є҆ресе́й.
Во всю̀ зе́млю свѣ́тлость возсїѧ̀ свы́ше, да́ннагѡ вѣ̑рнымъ весе́лїѧ, и҆ бж҃е́ственнагѡ застꙋпле́нїѧ.
Є҆ди́не бл҃гі́й, и҆ и҆сто́чниче бл҃гости, ты̀ возвы́си правосла́вныхъ ро́гъ, чтꙋ́щихъ ѡ҆́бразъ тво́й. <<рм҃з: 293>>
Свѣ́тъ незаходи́мый на́мъ бл҃гоче́стїѧ возсїѧ̀, велѣ́нїемъ бг҃одꙋхнове́ннымъ вѣ́рныхъ па́стырей, и҆ ма́нїемъ бг҃омꙋ́дрымъ.
Бг҃оро́диченъ: Ѡ҆бновѝ на́мъ дре́внее бл҃голѣ́пїе, пречⷭ҇таѧ бг҃ома́ти, и҆ до́мъ тво́й се́й ѡ҆ст҃ѝ твое́ю бл҃года́тїю.
Катава́сїа: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющихъ тѧ̀.
Пѣ́снь ѕ҃.
І҆рмо́съ: Пожрꙋ́ ти:
Пи́шетсѧ и҆ почита́етсѧ вѣ́рнѡ покланѧ́емый ѡ҆́бразъ влⷣки, и҆ прїе́млетъ па́ки цр҃ковь дерзнове́нїе, бл҃гоче́стнѡ сп҃са прославлѧ́ющи.
Ѡ҆бнажа́етсѧ сѣ́тованїѧ, и҆ тьмы̀ є҆ресе́й хрⷭ҇то́ва цр҃ковь, и҆ но́ситъ ри́зꙋ весе́лїѧ, и҆ бж҃е́ственною и҆ свѣтоно́сною покрыва́етсѧ бл҃года́тїю.
Бл҃госла́вїѧ дре́внѧгѡ ѡ҆сїѧ̑нїѧ полꙋчѝ правосла́вныхъ собо́ръ, ѳеодѡ́ры манове́нїемъ цр҃и́цы, и҆ є҆ѧ̀ сы́на бл҃гочести́вагѡ мїхаи́ла самоде́ржца.
Бг҃оро́диченъ: Дре́вле свидѣ́нїѧ повелѣ́вый бы́ти ски́нїи: ꙗ҆́кѡ въ ски́нїи слове́снѣй, въ тебѣ̀ живе́тъ є҆ди́нъ препросла́вленный, прославлѧ́ѧй хра́мъ тво́й дв҃о чꙋдесы̀.
Катава́сїа: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Конда́къ, гла́съ в҃. Самогла́сенъ:
Неѡпи́санное сло́во ѻ҆́ч҃ее, и҆з̾ тебѐ бцⷣе ѡ҆писа́сѧ воплоща́емь: и҆ ѡ҆скве́рншїйсѧ ѡ҆́бразъ въ дре́внее воѡбрази́въ, бж҃е́ственною добро́тою смѣсѝ. но и҆сповѣ́дающе сп҃се́нїе, дѣ́ломъ и҆ сло́вомъ, сїѐ воѡбража́емъ. <<рм҃з ѡ҆б.: 294>>
І҆́косъ: Сїѐ смотре́нїѧ та́инство, дре́вле прⷪ҇ро́цы бг҃ови́днѡ вдохнове́ни бы́вше, на́съ ра́ди въ концы̀ вѣкѡ́въ дости́гшихъ предвозвѣсти́ша, полꙋчи́вше сегѡ̀ сїѧ̑нїѧ. ра́зꙋмъ ᲂу҆́бѡ бж҃е́ственный ѿ негѡ̀ взе́мше, є҆ди́наго гдⷭ҇а бг҃а зна́емъ, въ трїе́хъ ѵ҆поста́сѣхъ покланѧ́емаго: и҆ томꙋ̀ є҆ди́номꙋ слꙋжа́ще, є҆ди́нꙋ вѣ́рꙋ, и҆ є҆ди́но креще́нїе и҆мꙋ́ще, во хрⷭ҇та̀ ѡ҆блеко́хомсѧ: но и҆сповѣ́дающе сп҃се́нїе, дѣ́ломъ и҆ сло́вомъ, сїѐ воѡбража́емъ.
Сѷнаѯа́рь. Стїхѝ:
Нелѣ́потнѡ и҆змета́ємы і҆кѡ̑ны:
Ра́дꙋюсѧ лѣ́потнѡ покланѧ́ємы ви́дѧ:
Въ сі́й де́нь, въ недѣ́лю пе́рвꙋю ст҃ы́хъ постѡ́въ правосла́вїѧ, си́рѣчь возставле́нїе ст҃ы́хъ и҆ честны́хъ і҆кѡ́нъ, цр҃ковь хрⷭ҇то́ва пра́здновати прїѧ́тъ, бы́вшее ѿ мїхаи́ла и҆ ѳеодѡ́ры ст҃ы́ѧ и҆ бл҃же́ннѣйшїѧ цр҃и́цы, и҆ ст҃а́гѡ меѳо́дїа, патрїа́рха кѡнстантїнопо́льскагѡ, бы́сть же си́це: львꙋ̀ і҆са́ѵрꙋ и҆з̾ ѻ҆слѧтогоне́нїѧ, и҆ свинопа́ственнагѡ житїѧ̀, ски́птры ца́рствїѧ ᲂу҆держа́вшꙋ по бж҃їю попꙋще́нїю. Во ст҃ы́хъ ге́рманъ тогда̀ корми̑ла цр҃кѡ́внаѧ ѡ҆б̾е́мъ, а҆́бїе призыва́етсѧ ѿ ѻ҆́нагѡ, и҆ слы́шитъ: ꙗ҆́кѡ мнѣ̀ мни́тсѧ влⷣко, ст҃ы̑мъ і҆кѡ́намъ ничто́же ра́знствовати ѿ і҆́дѡлѡвъ, повелѝ ᲂу҆́бѡ є҆ли́кѡ ско́рѡ и҆звестѝ сїѧ̑ ѿ среды̀. А҆́ще и҆́стиннїи сꙋ́ть ст҃ы́хъ зра́цы, но вы́шше да повѣ́сѧтсѧ, да не со грѣхѝ валѧ́ющесѧ, сїѧ̑ всегда̀ ѡ҆сквернѧ́емъ цѣлꙋ́юще. Патрїа́рхъ же толи̑кїѧ ме́рзости царѧ̀ ѿвраща́ше, не ты́ ли, глаго́лѧ, ѽ царю̀, бѣснова́ти ᲂу҆́бѡ нѣ́коемꙋ нѣ́когда на ст҃ы̑ѧ і҆кѡ́ны слы́шимъ, кѡ́нонꙋ же бы́ти є҆гѡ̀ проименова́нїю; Ѻ҆́нъ же, но а҆́зъ, глаго́летъ є҆щѐ млⷣнецъ сы́й нарица́хсѧ. Не повинꙋ́ющꙋсѧ же ᲂу҆́бѡ послꙋ́шати є҆гѡ̀ патрїа́рхꙋ, и҆згна̀ є҆го̀, и҆ є҆диномꙋ́дренна себѣ̀ возпоставлѧ́етъ а҆наста́сїа: и҆ та́кѡ тогда̀ со ст҃ы́ми і҆кѡ́нами бра́нь нача̀ ꙗ҆влѧ́ти. Глаго́летсѧ же, є҆вре́ємъ пре́жде таковꙋ́ю <<рм҃и: 295>> не́нависть є҆мꙋ̀ подложи́ти, ѿ нѣ́коегѡ волше́бства предре́кшымъ на ца́рство возведе́нїе, внегда̀ ᲂу҆бо́гъ сы́й, съ ни́ми ѻ҆слѧтогоне́нїемъ жи́ти веществова́ше. Ѻ҆́номꙋ же ѕлѣ̀ житїѐ ѿто́ргшꙋ, и҆з̾ ѻ҆́нагѡ сꙋровѣ́йшїй скѵ́менъ, копронѵ́мъ кѡнстанті́нъ, нача́льства, наипа́че же на ст҃ы̑ѧ і҆кѡ́ны бѣснова́нїѧ прее́мникъ быва́етъ. И҆ что̀ подоба́етъ глаго́лати, є҆ли̑ка и҆ ꙗ҆кова̑ и҆ се́й беззако́нный содѣ́ла, но ѻ҆ба́че и҆ ѻ҆́номꙋ стꙋ́днѣйше сконча́вшꙋсѧ. Ѿ хаза́ры сы́нъ ѻ҆́нагѡ на ца́рство поставлѧ́етсѧ, поне́же и҆ то́й є҆́же жи́ти ѕлѣ̀ и҆змѣ́ри. І҆ри́на и҆ кѡнстанті́нъ нача́льства наслѣ̑дницы быва́ютъ. Сі́и ѿ тара́сїа ст҃ѣ́йшагѡ патрїа́рха наставлѧ́еми, седьмы́й собо́ръ собира́ютъ, и҆ ст҃ы̑ѧ і҆кѡ́ны па́ки хрⷭ҇то́ва цр҃ковь прїе́млетъ: си̑мъ же ца́рство ѿло́жшымъ, ѿ ге́нїка нїки́форъ возво́дитсѧ. Та́же стаѵри́кїй, посе́мъ мїхаи́лъ рагкаве́й, бж҃е́ствєнныѧ і҆кѡ̑ны чтꙋ́ще. Мїхаи́ла ѕвѣрови́дный ле́въ а҆рмени́нъ прее́млетъ: и҆́же ѿ мона́ха нѣ́коегѡ затво́рника, и҆ ѕлочести́вагѡ, ле́стїю растлѣ́всѧ, второ́е і҆кѡнобо́рство воздвиза́етъ: и҆ па́ки безлѣ́потна бж҃їѧ цр҃ковь показꙋ́етсѧ. Сегѡ̀ а҆морре́й прее́млетъ мїхаи́лъ: тогѡ́же па́ки сы́нъ ѳео́фїлъ, на і҆кѡ́ны неи́стовство, про́чыѧ во вторы́хъ полага́юще. Се́й ᲂу҆́бѡ ѳео́фїлъ мнѡ́гїѧ ѿ ст҃ы́хъ ѻ҆тє́цъ томлє́нїемъ и҆ мꙋ́камъ разли̑чнымъ преда́въ, ѡ҆ і҆кѡ́нахъ честны́хъ, пра́вдꙋ тогда̀ наипа́че ᲂу҆своѧ́ше, ꙗ҆́кѡ взыска́ше: а҆́ще кто̀ є҆́сть во гра́дѣ, крамо́лю дрꙋго́мꙋ быва́емь, ни є҆ди́нагѡ на мнѡ́ги дни̑, ꙗ҆́кѡ глаго́лютъ, ѡ҆брѣстѝ. И҆ двана́десѧте лѣ́тъ самодово́льствовавъ, и҆ чре́внымъ недꙋ́гомъ ѡ҆б̾ѧ́тъ бы́въ, расто́ргнꙋтисѧ хотѧ́ше ѿ живота̀: ᲂу҆ста̀ є҆гѡ̀ преѕѣ́льнѡ ѿверзо́шасѧ, ꙗ҆́коже и҆ самѣ̑мъ ᲂу҆тро́бамъ внꙋ́трєннимъ ꙗ҆ви́тисѧ. Цари́ца же ѳеодѡ́ра болѣ́зненна ѡ҆ приключи́вшемсѧ бы́вши, є҆два̀ ко снꙋ̀ ѡ҆браща́етсѧ: и҆ во снѣ̀ ви́дѣ пречⷭ҇тꙋю бцⷣꙋ, млⷣнца ѡ҆б̾е́мшꙋ превѣ́чнаго, ѡ҆бстои́мꙋ пресвѣ́тлыми а҆́гг҃лы: ѳео́фїла же сеѧ̀ мꙋ́жа ѿ тѣ́хъ бїе́ма, и҆ ᲂу҆ничижа́ема. Ꙗ҆́кѡ ᲂу҆́бѡ ѿи́де ѿ неѧ̀ со́нъ, и҆ ѳео́фїлъ ма́лѡ въ себѐ <<рм҃и ѡ҆б.: 296>> прише́дъ, возопѝ: ᲂу҆вы̀ мнѣ̀ ѻ҆каѧ́нномꙋ, ст҃ы́хъ ра́ди і҆кѡ́нъ бїе́нъ є҆́смь. А҆́бїе полага́етъ верхꙋ̀ є҆гѡ̀ цр҃и́ца бг҃оро́дичный ѡ҆́бразъ, молѧ́щисѧ се́й со слеза́ми. Ѳео́фїлъ ᲂу҆́бѡ си́це и҆мы́й, ви́дѣвъ нѣ́коего ѿ предстоѧ́щихъ носѧ́ща ꙾є҆гко́лпїй,꙾[[нанѣ́дренникъ]] похи́тивъ ѿ негѡ̀, ѡ҆блобыза́ше. И҆ а҆́бїе на і҆кѡ́ны шата̑вшаѧсѧ ᲂу҆ста̀, и҆ безстꙋ́днѡ зи́нꙋвый горта́нь, въ пе́рвый чи́нъ ᲂу҆строѧ́шесѧ, и҆ ѿ содержа́щїѧ бѣды̀ и҆ нꙋ́жды преста̀ и҆ ᲂу҆снꙋ̀, бы́ти и҆сповѣ́давъ добро̀ ст҃ы̑ѧ і҆кѡ̑ны почита́ти. И҆зне́сши ᲂу҆́бѡ цари́ца ѿ свои́хъ ковче́жцѡвъ ст҃ы̑ѧ и҆ честны̑ѧ ѡ҆́бразы лобыза́ти, и҆ все́ю дꙋше́ю почита́ти ѳео́фїла ᲂу҆строѧ́ше. Пома́лѣ ᲂу҆́бѡ и҆счеза́етъ ѿ житїѧ̀ сегѡ̀ ѳео́фїлъ. Ѳеодѡ́ра же сꙋ́щихъ во и҆згна́нїихъ и҆ въ темни́цахъ всѣ́хъ воззва́вши, свобо́днѣ пребыва́ти повелѣ̀. И҆ низверга́етсѧ ᲂу҆́бѡ ѿ патрїа́ршескагѡ престо́ла і҆ѡа́ннъ, и҆́же и҆ а҆нні́съ, волхвонача́льникъ, и҆ бѣсонача́льникъ наипа́че, не́жели патрїа́рхъ. хрⷭ҇то́въ же и҆сповѣ́дникъ меѳо́дїй восхо́дитъ на престо́лъ, мнѡ́га пострада́въ пре́жде, и҆ во гро́бѣ жи́въ затворе́нъ бы́сть. Си̑мъ же та́кѡ и҆мꙋ́щымъ, посѣще́нїе нѣ́кое быва́етъ бж҃е́ственное і҆ѡанні́кїю вели́комꙋ, во ѻ҆лѵ́мбовѣхъ гора́хъ ѡ҆бꙋчева́ющемꙋсѧ. Вели́кїй ᲂу҆́бѡ по́стникъ а҆рсаа́кїй прише́дъ къ немꙋ̀ глаго́ла: бг҃ъ мѧ̀ къ тебѣ̀ посла̀, ꙗ҆́кѡ да къ прпⷣбномꙋ мꙋ́жꙋ и҆са́їи затво́рникꙋ въ нїкомиді́ю прише́дше, ѿ негѡ̀ наꙋчи́мсѧ, є҆ли̑ка сꙋ́ть любѡ́вна бг҃ꙋ, и҆ прикла̑дна є҆гѡ̀ це́ркви. И҆ ᲂу҆́бѡ къ прпⷣбномꙋ и҆са́їи прише́дше, слы́шатъ ѿ негѡ̀: та́кѡ глаго́летъ гдⷭ҇ь, сѐ прибли́жисѧ коне́цъ врагѡ́мъ моегѡ̀ и҆з̾ѡбраже́нїѧ, вы̀ ᲂу҆́бѡ къ цр҃и́цѣ ѳеодѡ́рѣ, но и҆ къ патрїа́рхꙋ меѳо́дїю ше́дше, рцы́те си́це: ѡ҆ста́ви всѧ̑ не свѧщє́нныѧ, и҆ та́кѡ со а҆́гг҃лы же́ртвꙋ мнѣ̀ принесе́ши, зра́ка моегѡ̀ ѡ҆́бразъ и҆ крⷭ҇та̀ почита́ѧй. Сїѧ̑ ᲂу҆слы́шавше, въ кѡнстанті́нь гра́дъ а҆́бїе достига́ютъ, и҆ речє́ннаѧ меѳо́дїю патрїа́рхꙋ, и҆ и҆збра́ннымъ всѣ̑мъ бж҃їимъ возвѣща́ютъ. Собра́вшесѧ же къ цр҃и́цѣ прехо́дѧтъ, и҆ поко́рнꙋ сїю̀ во всѣ́хъ ѡ҆брѣта́ютъ: ѿ ѻ҆тє́цъ бо бѧ́ше <<рм҃ѳ: 297>> бл҃гочести́ва и҆ бг҃олюби́ва. А҆́бїе ᲂу҆́бѡ цр҃и́ца бг҃оро́дичный ѡ҆́бразъ на вы́и ѡ҆бвѣша́емый и҆зне́сши, всѣ̑мъ зрѧ́щымъ: лобза́ше глаго́лющи: а҆́ще кто̀ си̑мъ не покланѧ́етсѧ, и҆ не цѣлꙋ́етъ любе́знѣ, не слꙋже́бнѣ, не ꙗ҆́кѡ бо́ги, но ꙗ҆́кѡ ѡ҆́бразы, первоѡбра́зныхъ ра́ди любвѐ: бꙋ́ди про́клѧтъ. Ѻ҆ни́ же ве́лїею ра́достїю возра́довашасѧ. Проти́вꙋ же про́ситъ и҆ сїѧ̑ ѿ ни́хъ, ꙗ҆́кѡ да бы̀ моле́нїе ѡ҆ мꙋ́жѣ є҆ѧ̀ ѳео́фїлѣ сотвори́ли. Ѻ҆ни́ же вѣ́рꙋ є҆ѧ̀ ви́дѣвше, а҆́ще и҆ ѿрица́ющесѧ, ѻ҆ба́че же повинꙋ́ютсѧ. И҆́бо во ст҃ы́хъ меѳо́дїй патрїа́рхъ лю́ди всѧ̑ собра́въ, и҆ приче́тъ ве́сь и҆ а҆рхїерє́и, въ вели́кꙋю бж҃їю цр҃ковь та́мѡ прихо́дѧтъ. Въ ни́хже бѧ́хꙋ и҆збра́ннїи сі́и: и҆з̾ ѻ҆лѵ́мба вели́кїй і҆ѡанні́кїй, и҆ а҆рсаа́кїй, наѵкра́тїй же, и҆ ᲂу҆ченицы̀ ѳео́дѡра стꙋді́та, и҆ вели́кагѡ села̀ ѳеофа́нъ, и҆ ѳео́дѡръ пи́саннїи, и҆ и҆сповѣ̑дницы: мїхаи́лъ ст҃огра́децъ, и҆ сѷгге́лъ, и҆ и҆ні́и мно́жайшїи, моле́нїе всено́щное къ бг҃ꙋ сотворѧ́ютъ ѡ҆ ѳео́фїлѣ, всѣ̑мъ молѧ́щымсѧ со слеза́ми, и҆ протѧже́ннымъ моле́нїемъ: и҆ сїѐ во всю̀ пе́рвꙋю седми́цꙋ постѡ́въ соверша́шесѧ, и҆ само́й цари́цѣ ѳеодѡ́рѣ подо́бнѣ съ жена́ми, и҆ про́чими людьмѝ содѣва́ющи. Си̑мъ же си́це и҆мꙋ́щымъ, ѳеодѡ́ра цари́ца ѡ҆ ᲂу҆́трѣ ѡ҆зарѧ́ющымъ пѧтка̀ на со́нъ ѡ҆бра́щшисѧ, возмнѣ̀ ѡ҆брѣсти́сѧ ᲂу҆ столпа̀ кре́стнагѡ, и҆ нѣ́котѡрыѧ съ шꙋ́момъ проходи́ти пꙋ́ть, разли̑чнаѧ мꙋчи́тєльнаѧ ѻ҆рꙋ̑дїѧ носѧ́щыѧ ви́дѣ: посредѣ́ же си́хъ ведо́ма свѧ́зана и҆ царѧ̀ ѳео́фїла, созадѝ свѧ́заныма рꙋка́ма: сего́ же позна́вши, послѣ́доваше и҆ та̀ съ ведꙋ́щими. Є҆гда́ же до мѣ́дѧныхъ вра́тъ достиго́ша, ви́дѣ преесте́ственнымъ видѣ́нїемъ, мꙋ́жа нѣ́коего сѣдѧ́ща пред̾ ѡ҆́бразомъ хрⷭ҇то́вымъ, є҆гѡ́же проти́вꙋ ѳео́фїла поста́виша: сегѡ́ же нога́мъ прикоснꙋ́вшисѧ цари́ца, ѡ҆ царѣ̀ молѧ́шесѧ. Ѻ҆́нъ же є҆два̀ ѿве́рзлъ ᲂу҆ста̀, ве́лїѧ твоѧ̀ вѣ́ра, же́но, глаго́летъ: разꙋмѣ́й ᲂу҆́бѡ, ꙗ҆́кѡ сле́зъ ра́ди твои́хъ и҆ вѣ́ры, є҆ще́ же и҆ ра́ди проше́нїѧ и҆ моле́нїѧ рабѡ́въ мои́хъ, и҆ сщ҃е́нникѡвъ мои́хъ, проще́нїе даю̀ мꙋ́жꙋ твоемꙋ̀ ѳео́фїлꙋ. Та́же глаго́летъ ведꙋ́щымъ: разрѣши́те є҆го̀, <<рм҃ѳ ѡ҆б.: 298>> и҆ предади́те женѣ̀ є҆гѡ̀. Ѻ҆на́ же взе́мши сего̀, ѿстꙋпѝ веселѧ́щисѧ и҆ ра́дꙋющисѧ: и҆ а҆́бїе ю҆̀ со́нъ ѡ҆ста́ви. сїѧ̑ ᲂу҆́бѡ ѳеодѡ́ра цари́ца ви́дѣ. Патрїа́рхъ же меѳо́дїй, мл҃твамъ и҆ моле́нїємъ быва́ємымъ ѡ҆ не́мъ, хартїю̀ но́вꙋ взе́мъ, написа̀ въ не́й всѣ́хъ є҆ретїкѡ́въ царе́й и҆мена̀, вчини́въ и҆ того̀ ѳео́фїла, и҆ под̾ ст҃о́ю трапе́зою взе́мъ всѧ̑ положѝ. Ѡ҆ пѧтцѣ́ же ви́дитъ и҆ то́й нѣ́коего а҆́гг҃ла стра́шна вели́каго, входѧ́ща во хра́мъ, и҆ къ немꙋ̀ прише́дша рещѝ, глаго́летсѧ: ᲂу҆слы́шасѧ моле́нїе твоѐ є҆пі́скопе, и҆ проще́нїе полꙋчѝ ца́рь ѳео́фїлъ, не ктомꙋ̀ ᲂу҆́бѡ про́чее ѡ҆ се́мъ стꙋжа́й бж҃ествꙋ̀. Ѻ҆́нъ же и҆скꙋша́ѧ, а҆́ще и҆́стинно є҆́сть ви́димое, ѿ мѣ́ста своегѡ̀ сше́дъ, и҆ хартїю̀ взе́мъ, и҆ разви́въ, ѡ҆брѣ́те, ѽ бж҃їихъ сꙋде́бъ! загла́жено ѿ бг҃а всѧ́чески ѳео́фїлово и҆́мѧ. Сїѐ ᲂу҆вѣ́дѣвши цари́ца, преѡбра́довасѧ ѕѣлѡ̀, и҆ къ патрїа́рхꙋ посыла́етъ, всѧ̑ лю́ди собра́ти съ честны́ми крⷭ҇ты̀, и҆ со ст҃ы́ми ѡ҆́бразы, въ вели́кꙋю цр҃ковь: ꙗ҆́кѡ да ᲂу҆́тварь ст҃ы́хъ ѡ҆бразѡ́въ се́й ѿда́стсѧ, и҆ но́вое бж҃їе чꙋ́до всѣ̑мъ позна́но бꙋ́детъ. И҆ ᲂу҆́бѡ всѣ̑мъ вско́рѣ въ цр҃ковь собра́вшымсѧ со свѣща́ми, и҆ цари́ца съ сы́номъ прїи́де. И҆ лїті́и та́мѡ бы́вшей, со ст҃ы́ми і҆кѡ́нами, и҆ бж҃е́ственными и҆ честны́ми древесы̀ крⷭ҇тными, и҆ сщ҃е́ннымъ и҆ бж҃е́ственнымъ є҆ѵⷢ҇лїемъ, да́же и҆ до глаго́лемагѡ по́прища и҆зыдо́ша, Гдⷭ҇и поми́лꙋй, взыва́юще. И҆ та́кѡ па́ки въ цр҃ковь возврати́вшесѧ, бж҃е́ственнꙋю лїтꙋргі́ю соверши́ша. Возста́влєннымъ ст҃ы̑мъ и҆ чⷭ҇тны̑мъ і҆кѡ́намъ ѿ предрече́нныхъ ст҃ы́хъ мꙋже́й, проповѣ̑даннымъ ᲂу҆́бѡ бл҃гочести̑вымъ и҆ правосла́вѧщымъ: проти̑внымъ же и҆ нече́ствꙋющымъ, и҆ ст҃ы́хъ і҆кѡ́нъ че́сти не прїе́млющымъ, ѿречє́ннымъ, и҆ преда̑ннымъ проклѧ́тїю. И҆ ѿто́лѣ ѡ҆предѣли́ша сі́и ст҃і́и и҆сповѣ̑дницы, лѣ́тномꙋ си́це семꙋ̀ сщ҃е́нномꙋ торжествꙋ̀ быва́ти, да не когда̀ и҆ па́ки въ то́жде ѕлоче́стїе впаде́мъ. Неизмѣ́нный ѡ҆́бразе ѻ҆́ч҃їй, мл҃твами ст҃ы́хъ твои́хъ и҆сповѣ́дникѡвъ, поми́лꙋй на́съ. а҆ми́нь. <<р҃н: 299>>
Пѣ́снь з҃.
І҆рмо́съ: Въ пещѝ а҆враа́мстїи:
Да сликовствꙋ́етъ цр҃ко́внѣй свѣ́тлости любо́вїю бж҃е́ственною а҆́гг҃льское во́инство, бг҃омꙋ́дреннѡ воспѣва́ющее: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Це́рковь перворожде́нныхъ, и҆ торжество̀ ра́дꙋетсѧ, зрѧ́ще ны́нѣ бж҃е́ствєнныѧ лю́ди, є҆диномꙋ́дреннѡ воспѣва́ющыѧ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
И҆зба́влени пре́жде мра́чныѧ є҆́реси, ма́нїемъ ѳеодѡ́ры достолѣ́пныѧ цари́цы, воспѣва́емъ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ: Па́че вы́шнихъ ликостоѧ́нїй, вознесла́сѧ є҆сѝ всечⷭ҇таѧ, є҆ди́на бы́вши мт҃и вседѣ́телѧ. ра́дꙋющесѧ ᲂу҆́бѡ взыва́емъ: бл҃гослове́нна ты̀ є҆сѝ въ жена́хъ, всенепоро́чнаѧ влⷣчце.
Катава́сїа: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Пѣ́снь и҃.
І҆рмо́съ: Рꙋ́цѣ распросте́ръ:
Зако́ны цр҃кве ѻ҆те́ческїѧ сохранѧ́юще, ѡ҆́бразы пи́шемъ, и҆ лобза́имъ ᲂу҆сты̀, и҆ се́рдцемъ, и҆ хотѣ́нїемъ хрⷭ҇тѡ́вы, и҆ є҆гѡ̀ ст҃ы́хъ, зовꙋ́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
На первоѡбра́зное ꙗ҆́вѣ ѡ҆́браза, по́честь и҆ поклоне́нїе возносѧ́ще, чти́мъ, бг҃оглаго́ливыхъ ᲂу҆че́нїємъ послѣ́дꙋюще, и҆ хрⷭ҇тꙋ̀ вѣ́рою зове́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Оу҆́мъ ѡ҆зари́вши просвѣще́нїемъ бж҃е́ственнагѡ дх҃а, честна́ѧ цари́ца, плоды̀ бг҃омꙋ́дрєнныѧ и҆мꙋ́щи, бл҃голѣ́пїе <<р҃н ѡ҆б.: 300>> возлюбѝ цр҃кве хрⷭ҇то́вы, и҆ красотꙋ̀, бл҃гословѧ́щи кꙋ́пнѡ съ вѣ́рными і҆и҃са бг҃очеловѣ́ка.
Бг҃оро́диченъ: Лꙋча́ми свѣ́та ᲂу҆́мнагѡ, ѡ҆свѣща́емый бж҃е́ственный до́мъ тво́й, ѡ҆сѣнѧ́етъ ны́нѣ всѣ́хъ ѻ҆́блакомъ дх҃а, и҆ ѡ҆сщ҃а́етъ вѣ̑рныѧ согла́снѡ пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.
Катава́сїа: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃.
І҆рмо́съ: Ка́мень нерꙋкосѣ́чный:
Сщ҃еннописа́ньми ѡ҆бразѡ́въ ᲂу҆кра́шенꙋю, зрѧ́ще па́ки честнꙋ́ю цр҃ковь, со бл҃гоговѣ́нїемъ всѝ притеце́мъ и҆ бг҃ꙋ возопїи́мъ: тебѐ велича́емъ трист҃ы́й.
Че́сть и҆ сла́вꙋ стѧжа́вши цр҃ковь, крⷭ҇тъ тво́й и҆ честны̑ѧ і҆кѡ̑ны, и҆ ст҃ы́хъ и҆з̾ѡбражє́нїѧ, съ весе́лїемъ влⷣко и҆ ра́достїю велича́етъ тѧ̀.
Ѡ҆свѣтѝ бж҃е́ственною твое́ю сла́вою лю́ди на́ши ще́дрый, и҆ ѡ҆полче́ньми а҆́гг҃льскими, и҆ всеѻрꙋ́жествы сїѧ̑ ѡ҆градѝ, ꙗ҆зы́кѡвъ свирѣ́пство покарѧ́ѧ и҆̀мъ влⷣко.
Бг҃оро́диченъ: Взѧ́тсѧ прама́тере є҆́ѵы ѡ҆сꙋжде́нїе бцⷣе, ꙗ҆́кѡ ты̀ всѣ́хъ влⷣкꙋ несказа́ннѡ чⷭ҇таѧ родила̀ є҆сѝ: є҆гѡ́же и҆ ны́нѣ подо́бїе на і҆кѡ́нахъ цѣлꙋ́емъ.
Катава́сїа: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Є҆ѯапостїла́рїй ᲂу҆́треннїй воскрⷭ҇ный, є҆ди́ножды.
И҆ настоѧ́щїй.
Подо́бенъ: Со ᲂу҆ч҃нкѝ взы́демъ:
Взыгра́йте, восплещи́те, съ весе́лїемъ воспо́йте: ко́ль чꙋ̑днаѧ и҆ стра̑ннаѧ твоѧ̑ хрⷭ҇тѐ, вопїю́ще, дѣла̀! и҆ кто̀ <<рн҃а: 301>> возмо́жетъ и҆зрещѝ сп҃се могꙋ̑тства, тебѐ, на́ше є҆диномы́слїе и҆ согла́сїе во є҆ди́нꙋ соедини́вшагѡ цр҃ковь;
Бг҃оро́диченъ: Ѻ҆рꙋ̑жїѧ ны́нѣ ѡ҆скꙋдѣ́ша вражде́бныѧ є҆́реси, и҆ па́мѧть є҆ѧ̀ и҆счезѐ съ шꙋ́момъ: хра́мъ бо тво́й всечⷭ҇таѧ всебл҃голѣ́пнѡ зрѧ́ще, ᲂу҆кра́шенный бл҃года́тьми честны́хъ і҆кѡ́нъ, ра́дости и҆сполнѧ́емсѧ всѝ.
На хвали́техъ стїхи̑ры воскрⷭ҇ны, д҃: и҆ а҆нато́лїевъ а҃: и҆ трїѡ́ди подо́бны трѝ, гла́съ д҃.
Подо́бенъ: Да́лъ є҆сѝ зна́менїе:
Въ тебѣ̀ ны́нѣ ра́дꙋетсѧ цр҃ковь чл҃вѣколю́бче женисѣ̀ и҆ созда́телѣ свое́мъ, сїю̀ во́лею бг҃олѣ́пною ѿ і҆́дѡльскїѧ ле́сти и҆зба́вльшемъ, и҆ себѣ̀ ѡ҆брꙋчи́вшемъ честно́ю кро́вїю, свѣ́тлѡ прїе́млющи сщ҃е́нное возставле́нїе і҆кѡ́нъ, и҆ ра́дꙋющисѧ тѧ̀ пое́тъ, и҆ сла́витъ вѣ́рнѡ.
Сті́хъ: И҆сповѣ́мсѧ тебѣ̀ гдⷭ҇и бж҃е мо́й, всѣ́мъ се́рдцемъ мои́мъ.
Пло́ти и҆з̾ѡбраже́нїе твоѐ возставлѧ́юще, гдⷭ҇и, любе́знѡ лобыза́емъ, вели́кое та́инство смотре́нїѧ твоегѡ̀ и҆з̾ѧснѧ́юще: не мнѣ́нїемъ бо, ꙗ҆́коже глаго́лютъ бг҃обо́рнїи дѣ́ти ма́нентѡвы, на́мъ ꙗ҆ви́лсѧ є҆сѝ чл҃вѣколю́бче, но и҆́стиною и҆ є҆стество́мъ пло́ти, тобо́ю возводи́ми къ твое́й любвѝ, и҆ жела́нїю.
Сті́хъ: Возвеселю́сѧ и҆ возра́дꙋюсѧ ѡ҆ тебѣ̀:
Де́нь ра́достный, и҆ весе́лїѧ и҆спо́лненный ꙗ҆ви́сѧ дне́сь: свѣ́тлость бо догма̑тъ и҆́стиннѣйшихъ блиста́етъ, и҆ сїѧ́етъ цр҃ковь хрⷭ҇то́ва ᲂу҆кра́шена возставле́ньми і҆кѡ́нъ ст҃ы́хъ ны́нѣ, и҆ и҆з̾ѡбраже́нїй сїѧ́ньми, и҆ є҆диномы́слїе быва́етъ вѣ́рныхъ бг҃опочте́нное.
Та́же глаго́лемъ сті́хъ, гла́съ ѕ҃:
Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀. <<рн҃а ѡ҆б.: 302>>
И҆ пое́мъ самогла́сенъ днѐ, гла́съ ѕ҃:
Мѡѷсе́й во вре́мѧ воздержа́нїѧ зако́нъ прїѧ́тъ, и҆ лю́ди привлечѐ: и҆лїа̀ пости́всѧ нб҃са̀ заключѝ: трїе́ же ѻ҆́троцы а҆враа́мстїи, мꙋчи́телѧ беззако́ннꙋюща поще́нїемъ побѣди́ша. и҆́мже и҆ на́съ сп҃се сподо́би воскрⷭ҇нїе ᲂу҆лꙋчи́ти, си́це вопїю́щихъ: ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
Сла́ва, па́ки то́йже. И҆ ны́нѣ: Пребл҃гослове́нна є҆сѝ бцⷣе:
Славосло́вїе вели́кое. И҆ ѿпꙋ́стъ.
Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃- й. На лїтꙋргі́и, бл҃же́нны гла́са, на ѕ҃: и҆ ѿ канѡ́на днѐ, пѣ́снь ѕ҃, на д҃. Прокі́менъ, гла́съ д҃. Пѣ́снь ѻ҆тцє́въ: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ првⷣнъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ.
А҆по́столъ къ є҆вре́ємъ, зача́ло тк҃ѳ ѿ полꙋ̀. А҆ллилꙋ́їа, гла́съ и҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋ́илъ въ призыва́ющихъ и҆́мѧ є҆гѡ̀. Сті́хъ: Призыва́хꙋ гдⷭ҇а, и҆ то́й послꙋ́шаше и҆́хъ. Є҆ѵⷢ҇лїе ѿ і҆ѡа́нна, зача́ло є҃. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ првⷣнїи ѡ҆ гдⷭ҇ѣ: На трапе́зѣ же ꙗ҆ди́мъ варе́нїе со є҆ле́емъ, а҆ не ры̑бы. А҆́ще же прилꙋчи́тсѧ, пїе́мъ вїно̀, ᲂу҆ста́вленное въ сла́вꙋ бж҃їю, по двѣ̀ ча́ши: Та́кожде и҆ въ ве́черъ по двѣ̀.
Въ недѣ́лю ве́чера во свѣти́льничное,
поста́вимъ стїхѡ́въ і҃, и҆ глаго́лемъ стїхи̑ры ᲂу҆мили́тєльныѧ ѻ҆смогла́сника, покаѧ́нны д҃: и҆ трїѡ́ди подо́бны господи́на і҆ѡ́сифа, гла́съ д҃: Подо́бенъ: Да́лъ є҆сѝ зна́менїе:
Да́ждь мѝ ᲂу҆миле́нїе, и҆ ѕлы́хъ ѿчꙋжде́нїе, и҆ соверше́нное и҆справле́нїе, въ стра́сти тѣле́снѣй ны́нѣ погрꙋже́номꙋ, и҆ ѿдале́номꙋ ѿ тебѐ бж҃е всецр҃ю̀, и҆ ниѿкꙋ́дꙋже <<рн҃в: 303>> ᲂу҆пова́нїѧ и҆мꙋ́щꙋ: и҆ сп҃си́ мѧ блꙋ́днаго за мно́гꙋю бл҃гость, і҆и҃се всеси́льне, сп҃се дꙋ́шъ на́шихъ.
Мѡѷсе́й ди́вный, посто́мъ ѡ҆чи́щьсѧ, ви́дѣ жела́емаго. семꙋ̀ ᲂу҆́бѡ поревнова́вши смире́ннаѧ дꙋшѐ моѧ̀, потщи́сѧ въ де́нь воздержа́нїѧ ѿ ѕлы́хъ ѡ҆чи́ститисѧ, ꙗ҆́кѡ да гдⷭ҇а даю́щаго тебѣ̀ ѡ҆ставле́нїе, и҆ ѡ҆чище́нїе и҆ и҆збавле́нїе, ᲂу҆́зриши сꙋ́щаго бл҃га́го и҆ чл҃вѣколюби́ваго.
Дрꙋгі́й кѵ́ръ ѳео́дѡра, гла́съ ѕ҃:
Подо́бенъ: А҆рха́гг҃льски:
Постѡ́въ ны́нѣ двоеседми́чїе свѣ́тлѡ начне́мъ, соверша́юще де́нь ѿ днѐ бра́тїе, колесни́цꙋ ѻ҆́гненнꙋ содѣ́лавше на́мъ, ꙗ҆́коже и҆лїа̀ ѳесві́тѧнинъ, четы́ре вели̑кїѧ добродѣ́тєли, ᲂу҆́мъ возвы́симъ безстра́стїемъ, пло́ть воѡрꙋжи́мъ чистото́ю, текꙋ́ще и҆ побѣжда́юще врага̀.
И҆ мине́и г҃. Сла́ва, и҆ ны́нѣ, бг҃оро́диченъ. Вхо́дъ. Свѣ́те ти́хїй: Прокі́менъ, гла́съ и҃: Да́лъ є҆сѝ достоѧ́нїе боѧ́щымсѧ тебѐ гдⷭ҇и. Сті́хъ а҃: Ѿ конє́цъ землѝ къ тебѣ̀ воззва́хъ. Сті́хъ в҃: Покры́юсѧ въ кро́вѣ кри́лъ твои́хъ. Сті́хъ г҃: Та́кѡ воспою̀ и҆́мени твоемꙋ̀ во вѣ́ки. И҆ па́ки: Да́лъ є҆сѝ достоѧ́нїе боѧ́щымсѧ: Подоба́етъ вѣ́дати, ꙗ҆́кѡ сїѧ̑ два̀ вели̑кїѧ прокі́мены, є҆́же є҆́сть: Не ѿвратѝ лица̀ твоегѡ̀: и҆ Да́лъ є҆сѝ достоѧ́нїе: Со стїха́ми и҆́хъ, є҆ди́нъ по є҆ди́номꙋ пое́тсѧ чрез̾ ве́сь ст҃ы́й по́стъ: Начина́емъ ѿ недѣ́ли сы́рныѧ, до недѣ́ли пѧ́тыѧ поста̀. И҆ ѿ Сподо́би гдⷭ҇и: Начина́ютсѧ покло́ны.
На стїхо́внѣ самогла́сенъ днѐ два́жды, гла́съ и҃:
Прїиди́те, ѡ҆чи́стимъ себѐ ми́лостынѧми и҆ щедро́тами ᲂу҆бо́гихъ, не трꙋбѧ́ще, ни ꙗ҆влѧ́юще на́ше бл҃готворе́нїе, да не ᲂу҆вѣ́сть шꙋ́ица десни́цы дѣ́ло, да не расточи́тъ тщесла́вїе пло́дъ млⷭ҇тыни, но въ та́йнѣ та̑йнаѧ вѣ́дꙋщемꙋ воззове́мъ: ѻ҆́ч҃е ѡ҆ста́ви прегрѣшє́нїѧ на̑ша, ꙗ҆́кѡ чл҃вѣколю́бецъ. <<рн҃в ѡ҆б.: 304>>
Мч҃нченъ: Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ сѣ́тей вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ: Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ, и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ сп҃сти́сѧ дꙋша́мъ на́шымъ.
И҆ про́чее послѣ́дованїе, ꙗ҆́кѡ ѻ҆бы́чно.
На повече́рїи
пое́мъ канѡ́нъ ст҃ы̑мъ прⷪ҇ро́кѡмъ, є҆гѡ́же краегране́сїе: Ли́къ да пле́щетъ прⷪ҇ро́кѡвъ бл҃гото́чнѡ. Ѳеофа́ново, гла́съ є҃.
Пѣ́снь а҃.
І҆рмо́съ: Конѧ̀ и҆ вса́дника въ мо́ре чермно́е:
Бл҃года́ть мнѣ̀ да́ти бж҃е́ственнагѡ дх҃а, честнꙋ́ю ва́шꙋ па́мѧть пою́щꙋ, всевино́внаго хрⷭ҇та̀ ᲂу҆моли́те, и҆ согрѣше́нїй ѡ҆ставле́нїе, ꙗ҆́кѡ прⷪ҇ро́цы бж҃е́ственныѧ бл҃года́ти.
Сосꙋ́ды бг҃одꙋхнове́нныхъ слове́съ согла̑сныѧ, и҆ зерца̑ла бж҃е́ственнагѡ блиста́нїѧ, ꙗ҆вле́нїе бж҃е́ственно прїе́млющыѧ, прⷪ҇ро́ки всѧ̑ бг҃омꙋ̑дрыѧ воспои́мъ.
Глаго́лы закѡ́нныѧ на горѣ̀ сїна́йстѣй мѡѷсе́й бг҃ови́децъ ѿ бг҃а прїе́мь, лице́мъ просвѣти́сѧ бг҃овидѣ́нїѧ, бл҃года́тїю зна́менꙋемь чꙋ́дный.
Сла́ва: Тꙋ́чами бг҃оразꙋ́мїѧ, мо́ре ꙗ҆зы̑къ многобо́жїѧ бл҃года́тїю ѻ҆́блацы бж҃їи, съ шꙋ́момъ разори́ша, є҆динонача́льнꙋю си́лꙋ бг҃омꙋ́дреннѡ проповѣ́дающе.
Бг҃оро́диченъ: Трꙋбы̑ бг҃огла̑сныѧ, мт҃рь тѧ̀ бж҃їю напослѣ́докъ вѣкѡ́въ ро́ждшꙋю пречⷭ҇таѧ прⷪ҇ро́цы вѣща́ютъ, наꙋчи́вшесѧ свы́ше бцⷣе твои̑мъ та́йнамъ. <<рн҃г: 305>>
Пѣ́снь г҃.
І҆рмо́съ: Водрꙋзи́вый на ничесо́мже:
Цѣвни̑цы дх҃ѡ́вныѧ, брѧца́ломъ ᲂу҆дарѧ́емы, прⷪ҇ро́цы всѝ, подо́бный гла́съ твоегѡ̀ позна́нїѧ хрⷭ҇тѐ, всѣ̑мъ бг҃огласѧ́ще, бг҃олюбє́знымъ воспѣва́ютъ, свы́ше богатѧ́ще сїѧ́нїемъ.
Ѻ҆рꙋ̑жїѧ востаю̑щаѧ повелѣ́нїемъ твои́мъ, прⷪ҇ро́цы всѝ многомѧте́жнꙋю ле́сть пресѣца́ютъ хрⷭ҇тѐ, бж҃е́ственною твое́ю си́лою бл҃гоче́стнѡ ѡ҆дѣ́ѧвшесѧ, и҆ непостижи́мою держа́вою твое́ю.
Сла́ва: Бж҃е́ствєнныѧ и҆ мы́слєнныѧ ча́шы ра́зꙋма, прⷪ҇ро́цы всю̀ зе́млю ᲂу҆пои́ша, проѡбража́юще ꙗ҆́вѣ твоегѡ̀ смотре́нїѧ неꙋдо́бное та́инство, и҆́ный и҆́накѡ тебѐ проповѣ́дающе.
Бг҃оро́диченъ: Дре́вле повелѣ́нное дв҃о та́инство, и҆ пре́жде вѣкѡ́въ предразꙋмѣва́емое, всѧ̑ вѣ́дꙋщимъ бг҃омъ, въ послѣ́днее вре́мѧ во чре́вѣ твое́мъ пренепоро́чнаѧ, коне́цъ прїе́мшее ꙗ҆ви́сѧ.
Пѣ́снь д҃.
І҆рмо́съ: Бж҃е́ственное твоѐ:
Дх҃омъ прⷪ҇ро́цы вѣща́юще, и҆́стины неле́стнїи свѣти́льницы ꙗ҆ви́стесѧ премꙋ́дрїи, просвѣща́юще всѧ̑ ꙗ҆зы́ки житїѧ̀ свѣ́тлостїю.
Сѐ ны́нѣ сбытїѧ̑ зрѧ́ще рече́нныхъ ѿ ва́съ, прⷪ҇ро́цы бж҃е́ственнїи, сла́вимъ ва́ми проповѣ́даннаго, и҆ дѣ́ломъ проречє́нїѧ и҆спо́лньшаго.
Сла́ва: Премꙋ́дростїю бж҃е́ственнїи просвѣща́еми, ꙗ҆зы́кѡвъ приведе́нїе бж҃їею бл҃года́тїю проразꙋмѣ́сте, і҆и҃лево же паде́нїе и҆ всѣ́хъ бл҃ги́хъ запꙋстѣ́нїе.
Бг҃оро́диченъ: Бг҃а воплоще́нна зрѧ́ще, на бж҃е́ственнѣй стра́жи ста́вше, сего̀ всебога́тїи сподо́бистесѧ ви́дѣти, ѿ горы̀ дѣ́выѧ приходѧ́ща. <<рн҃г ѡ҆б.: 306>>
Пѣ́снь є҃.
І҆рмо́съ: Ѡ҆дѣѧ́йсѧ свѣ́томъ:
Оу҆́тренева дꙋ́хъ тво́й, къ сѣдѧ́щемꙋ на прⷭ҇то́лѣ превознесе́ннѣ, и҆са́їе премꙋ́дре, и҆ съ вы́шними ли́ки воспѣ́лъ є҆сѝ.
Ѧ҆зы́ки дꙋ́хомъ дви́жꙋще ст҃і́и, сегѡ̀ словеса̀ вселе́ннѣй бл҃гопостоѧ́ннѡ проповѣ́дꙋюще, бг҃оразꙋ́мїѧ зарю̀ ᲂу҆ѧсни́сте.
Сла́ва: Ꙗ҆́коже жили̑ща бж҃їѧ бы́вше, вы́ше є҆стества̀ соверша́юща, сего̀ въ себѣ̀ и҆мѣ́сте: є҆мꙋ́же ны́нѣ предстоѧ́ще, ѡ҆ на́съ моли́тесѧ.
Бг҃оро́диченъ: Оу҆́мъ сво́й премꙋ́дрый, и҆ дре́внїй совѣ́тъ ва́мъ прⷪ҇ро́цы и҆́стины, бг҃ъ сказа́лъ є҆́сть, ѿ дв҃ы рожде́йсѧ, ꙗ҆́кѡ є҆ди́нъ млⷭ҇рдъ.
Пѣ́снь ѕ҃.
І҆рмо́съ: Неи́стовствꙋющеесѧ бꙋ́рею:
Житїѐ бж҃е́ственное, бл҃гоче́стїѧ сло́во и҆́стинное стѧжа́вше, проповѣ̑дницы бы́сте всеи́стиннїи бж҃е́ственнагѡ воплоще́нїѧ ст҃і́и.
Си́лꙋ бж҃е́ственнꙋю и҆мꙋ́ще, царе́й неꙋдержа́нное стремле́нїе и҆ ѕвѣре́й ᲂу҆ста̀ загради́сте, и҆з̾ чре́ва ки́това цѣ́лы сп҃со́стесѧ.
Сла́ва: И҆з̾ ложе́снъ ст҃і́и мі́рꙋ сїѧ́юще всемꙋ̀, добродѣ́тели ᲂу҆чи́телїе бы́сте, и҆ насади́телїе прⷪ҇ро́цы всѝ пребога́тїи.
Бг҃оро́диченъ: Бг҃олюби̑ваѧ и҆мꙋ́ще помышлє́нїѧ, ржⷭ҇тво̀ твоѐ прⷪ҇ро́цы влⷣчце, провозвѣсти́ша многоѡбра́зными начерта́ньми и҆ ѡ҆́бразы чⷭ҇таѧ.
Сѣда́ленъ, гла́съ в҃, самогла́сенъ:
Ли́къ прⷪ҇ро́ческїй съ мѡѷсе́омъ и҆ а҆арѡ́номъ, весе́лїемъ ра́дꙋетсѧ дне́сь, ꙗ҆́кѡ коне́цъ прⷪ҇ро́чества наводѧ́й: сїѧ́етъ крⷭ҇тъ, и҆́мже на́съ сп҃слъ є҆сѝ. тѣ́хъ мл҃твами хрⷭ҇тѐ бж҃е поми́лꙋй на́съ. <<рн҃д: 307>>
Пѣ́снь з҃. І҆рмо́съ: Превозноси́мый ѻ҆тцє́въ:
Неизче́тнаѧ си́ла гдⷭ҇нѧ велѣ́нїѧ, въ ро́вѣ львы̀ ѡ҆бꙋзда̀, вопїю́щꙋ прⷪ҇ро́кꙋ: бж҃е бл҃гослове́нъ є҆сѝ.
Трⷪ҇цы равночи́сленнїи честны́ѧ сꙋ́ще, пла́мень ᲂу҆гаси́ша всемꙋ́дрїи ѻ҆́троцы твоѝ, согла́снѡ пою́ще: бж҃е бл҃гослове́нъ є҆сѝ.
Сла́ва: Ꙗ҆́кѡ свѣти̑ла сїѧ́юще, добродѣ́тельными цвѣ́ты зе́млю ѡ҆небеси́вше, а҆враа́мстїи ѻ҆́трасли, прⷪ҇ро́цы пою́ще: бж҃е бл҃гослове́нъ є҆сѝ.
Бг҃оро́диченъ: Зако́ны є҆стества̀ превозшла̀ є҆сѝ влⷣчце, ро́ждши гдⷭ҇а зако́номъ ѡ҆блада́юща, є҆мꙋ́же всѝ пое́мъ: бж҃е бл҃гослове́нъ є҆сѝ.
Пѣ́снь и҃.
І҆рмо́съ: Тебѣ̀ вседѣ́телю:
Внꙋ́трь сла́дости ра́йскїѧ сꙋ́ще, прⷪ҇ро́цы бг҃опрїѧ́тнїи, ли́къ соста́вльше, всѣ̑мъ вѣ́рою ва́съ восхвалѧ́ющымъ, и҆зба́витисѧ ѿ бѣ́дъ, хрⷭ҇та̀ ᲂу҆моли́те.
Пѣ́нїе вѣ́рнїи бг҃огла̑снымъ всѣ̑мъ прⷪ҇ро́кѡмъ принесе́мъ, ли́къ и҆спле́тше всѝ, си́хъ словесы̀ ᲂу҆тверди́вшесѧ: да мл҃твами и҆́хъ ѡ҆правди́мсѧ.
Сла́ва: Сосꙋ́ди мы́сленнїи бл҃гоꙋха́нїѧ всѝ, прⷪ҇ро́цы ꙗ҆́вѣ дх҃ꙋ бы́сте, всѧ̑ ꙗ҆зы́ки къ ра́зꙋмꙋ наставлѧ́юще, и҆ превозносѧ́ще хрⷭ҇та̀ во вѣ́ки.
Бг҃оро́диченъ: Ѿ ѻ҆ц҃а̀ безнача́льнꙋю зарю̀, дв҃о родила̀ є҆сѝ пло́ти прїѧ́тїемъ: тѣ́мже, ра́дꙋйсѧ, непреста́ннѡ тебѣ̀ зове́мъ, и҆ превозно́симъ чⷭ҇таѧ во вѣ́ки.
Пѣ́снь ѳ҃.
І҆рмо́съ: И҆са́їе ликꙋ́й:
Є҆диномꙋ́дреннѡ прїиди́те ны́нѣ, прⷪ҇ро́ки всѧ̑ бж҃їѧ всечⷭ҇тны̑ѧ, чꙋде́съ соверши́тели преесте́ственныхъ, вѣ́твь <<рн҃д ѡ҆б.: 308>> честнꙋ́ю, и҆збра́нїе і҆а́кѡвле, ꙗ҆́кѡ проповѣ́давшыѧ хрⷭ҇та̀ восхва́лимъ.
Ра́дости всемі́рныѧ провозвѣ̑стницы, проповѣ̑дницы ꙗ҆́вѣ, и҆ ра́зꙋма сокрѡ́вища: свѣ́тлїи бж҃е́ственнїи премꙋ́дрости бы́сте всеи́стинныѧ, ᲂу҆ста̀ чⷭ҇таѧ, ѧ҆зы́цы дх҃а ст҃а́гѡ всечестні́и.
Сла́ва: Ꙗ҆́кѡ прⷪ҇ро́цы премꙋ́дрїи, всѣ́хъ созда́телѧ и҆ бг҃а ꙗ҆́кѡ си́льна зрѧ́ще, и҆ ѿ негѡ̀ свѣ́томъ ѡ҆свѣща́еми, ва́шꙋ па́мѧть бл҃гоче́стнѡ вѣ́рою чтꙋ́щихъ ѿ бѣ́дъ сп҃са́йте.
Бг҃оро́диченъ: Сп҃се́нїѧ хода́таица человѣ́кѡмъ была̀ є҆сѝ чⷭ҇таѧ, ро́ждши пло́тски содѣ́телѧ и҆ гдⷭ҇а, тебѐ ра́ди всѣ̑мъ ѡ҆чище́нїе велича́ющымъ тѧ̀ дв҃о подаю́щаго.
Та́же стїхи̑ры прⷪ҇ро́кѡмъ, гла́съ а҃. Подо́бенъ: Прехва́льнїи:
Прⷪ҇ро́цы пресла́внїи, вы̀ царѧ̀ ѡ҆бличи́сте, лю́демъ же де́рзѡстнымъ сопроти́вистесѧ, въ трⷪ҇цѣ є҆ди́наго бг҃а проповѣ́дающе, и҆ те́плѣ ѿгонѧ́юще ѿ землѝ ле́сть многобо́жнꙋю: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Прⷪ҇ро́цы пресла́внїи, вы̀ бл҃гоче́стнѡ заблꙋжда́юще въ пꙋсты́нѧхъ и҆ гора́хъ, и҆ ѡ҆ѕлоблѧ́еми въ гла́дѣ и҆ жа́ждѣ, ꙗ҆́кѡ бж҃їи ᲂу҆гѡ́дницы, со хрⷭ҇то́мъ на нб҃сѣ́хъ водворѧ́етесѧ: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Прⷪ҇ро́цы прехва́льнїи, вы̀ терпѣли́внѡ претре́ни, ка́менїемъ же побива́еми, и҆ ᲂу҆мерщвлѧ́еми ме́чнымъ ᲂу҆сѣче́нїемъ, бл҃гоче́стїѧ ра́ди свѣ́тли страда́ньми бы́сте: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Вои́стиннꙋ па́че ᲂу҆ма̀ чꙋ̑днаѧ, бг҃оневѣ́сто, вели̑чїѧ ржⷭ҇тва̀ твоегѡ̀, ꙗ҆̀же проповѣ́даша прⷪ҇ро́цы всѝ всепресла́вное зача́тїе, и҆ ржⷭ҇тво̀ всепѣ́таѧ, недомы́сленное и҆ несказа́нное, и҆́мже мі́ръ сп҃се́сѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.