Сырная седмица (с понедельника по пяток)
<<л҃д ѡ҆б.: 68>>
Въ недѣ́лю ве́чера,
на Гдⷭ҇и воззва́хъ, пое́мъ ꙗ҆́кѡ ѻ҆бы́чно, стїхи̑ры ѻ҆смогла́сника г҃: и҆ мине́и настоѧ́щагѡ ст҃а́гѡ г҃. Сла́ва, и҆ ны́нѣ, бг҃оро́диченъ.
На стїхо́внѣ же ѡ҆ставлѧ́етсѧ ѻ҆смогла́сникъ, и҆ пое́мъ самогла́сенъ днѐ, ѻ҆́ба ли̑ка вкꙋ́пѣ. Гла́съ и҃:
Ласкосе́рдствовавше пе́рвꙋю под̾ѧ́хомъ наготꙋ̀, побѣди́вшесѧ го́рькимъ вкꙋ́сомъ, и҆ ѿ бг҃а и҆згна́ни бы́хомъ. но возведе́мсѧ къ покаѧ́нїю, и҆ чꙋ́вства ѡ҆чи́стимъ, къ ни̑мже бра́нь, вхо́дъ поста̀ творѧ́ще: наде́ждею бл҃года́ти сердца̀ и҆звѣствꙋ́юще, не бра́шны, въ ни́хже не по́льзовашасѧ ходи́вшїи. и҆ снѣ́стсѧ на́ми а҆́гнецъ бж҃їй, во сщ҃е́нной и҆ свѣтоно́сной но́щи воскрⷭ҇нїѧ, на́съ ра́ди приведе́ное <<л҃є: 69>> заколе́нїе, ᲂу҆ч҃нкѡ́мъ прїѡбще́нное въ ве́черъ та́инства, и҆ тьмꙋ̀ разорѧ́ющее невѣ́дѣнїѧ свѣ́томъ є҆гѡ̀ воскрⷭ҇нїѧ.
Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
И҆ па́ки то́йже самогла́сенъ: Ласкосе́рдствовавше:
Сті́хъ в҃: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
И҆ пое́мъ мꙋ́чениченъ въ то́йже гла́съ: Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ сѣ́тей вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже: Нбⷭ҇наѧ пою́тъ тѧ̀ бл҃года́тнаѧ, мт҃и безневѣ́стнаѧ: и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ сп҃сти́сѧ дꙋша́мъ на́шымъ.
Въ понедѣ́льникъ сы́рный на ᲂу҆́трени,
на Бг҃ъ гдⷭ҇ь, тропа́рь ст҃о́мꙋ, два́жды. Сла́ва, и҆ ны́нѣ, бг҃оро́диченъ по гла́сꙋ. По а҃-мъ стїхосло́вїи сѣда́ленъ ѻ҆смогла́сника. И҆ чте́мъ сло́во вели́кагѡ васі́лїа [ѡ҆ є҆́же, Внима́й себѣ̀.] По в҃-мъ стїхосло́вїи пое́мъ трїѡ́ди, гла́съ а҃.
Подо́бенъ: Ка́мени запеча́танꙋ:
Ѿверзо́шасѧ бж҃е́ственнагѡ покаѧ́нїѧ преддвє́рїѧ: пристꙋ́пимъ ᲂу҆се́рднѡ, ѡ҆чи́стивше тѣлеса̀, бра́шенъ и҆ страсте́й ѿложє́нїѧ творѧ́ще, ꙗ҆́кѡ послꙋ́шницы хрⷭ҇та̀, призва́вшагѡ мі́ръ въ црⷭ҇твїе нбⷭ҇ное, десѧти̑ны всегѡ̀ лѣ́та приносѧ́ще всѣ́хъ цр҃ю̀, ꙗ҆́кѡ да и҆ воскрⷭ҇нїе є҆гѡ̀ любо́вїю ᲂу҆́зримъ. <<л҃є ѡ҆б.: 70>>
Сла́ва, то́йже па́ки. И҆ ны́нѣ, бг҃оро́диченъ: Рꙋ́цѣ твоѝ бж҃е́ственнїи, и҆́миже содѣ́телѧ носи́ла є҆сѝ дв҃о прест҃а́ѧ, воплоще́нна бж҃ество́мъ, просте́рши ᲂу҆молѝ, и҆зба́витисѧ на́мъ ѿ и҆скꙋше́нїй, и҆ страсте́й и҆ бѣ́дъ, восхвалѧ́ющымъ тѧ̀ любо́вїю, и҆ вопїю́щымъ тебѣ̀: сла́ва все́льшемꙋсѧ въ тѧ̀, сла́ва проше́дшемꙋ и҆з̾ тебѐ, сла́ва свободи́вшемꙋ на́съ ржⷭ҇тво́мъ твои́мъ.
Канѡ́ны же пое́мъ ꙗ҆́коже ѻ҆бы́чай во ѻ҆ктѡ́ихѣ: и҆ въ мине́и свѧто́мꙋ. Въ ко́ихъ же пѣ́снехъ прихо́дитъ трипѣ́снецъ, а҆́ще ли є҆́сть двоїрмо́сенъ, ѡ҆ставлѧ́емъ ѻ҆́ба канѡ́на ѻ҆ктѡ́иха: и҆ пое́мъ въ мине́и канѡ́нъ со і҆рмосо́мъ на ѕ҃: и҆ въ трїѡ́ди на и҃. Канѡ́нъ мине́и, и҆ настоѧ́щїй трипѣ́снецъ.
Творе́нїе господи́на і҆ѡ́сифа, гла́съ а҃.
Пѣ́снь а҃.
І҆рмо́съ: Пѣ́снь побѣ́днꙋю пои́мъ всѝ бг҃ꙋ:
Свѣ̑тлаѧ предпра̑зднства воздержа́нїѧ, свѣ̑тлаѧ предпꙋ̑тїѧ поста̀ дне́сь. тѣ́мже стеце́мсѧ въ наде́ждѣ бра́тїе, и҆ ᲂу҆се́рдїи мно́зѣмъ.
А҆да́мꙋ пра́ѻтцꙋ престꙋпле́нїемъ поревнова́въ, и҆згна́нъ бы́хъ ѿ сла́дости ѡ҆каѧ́нный. тѣ́мже припа́даю тѝ въ покаѧ́нїи и҆ пла́чи: гдⷭ҇и, сп҃си́ мѧ.
Нача́ло ᲂу҆миле́нїѧ и҆ покаѧ́нїѧ, ѕлы́хъ ѿчꙋжде́нїе, и҆ страсте́й воздержа́нїе. тѣ́мже потщи́мсѧ ѿсѣче́нїе лꙋка́выхъ дѣ́лъ сотвори́ти.
Бг҃оро́диченъ: Но́щїю прегрѣше́нїй ѡ҆мраче́нъ, къ тебѣ̀ ро́ждшей сꙋ́щымъ во тьмѣ̀ со́лнце пра́вды хрⷭ҇та̀, ны́нѣ прибѣга́ю прилѣ́жнѡ, влⷣчце сп҃си́ мѧ.
И҆́ный трипѣ́снецъ.
І҆рмо́съ то́йже: Сѐ пред̾ѿве́рзесѧ покаѧ́нїѧ две́рь бг҃олю́бцы: прїиди́те ᲂу҆̀бо, потщи́мсѧ вни́ти то́ю, пре́жде да́же не заключи́тъ сїю̀ хрⷭ҇то́съ, ꙗ҆́кѡ недостѡ́йнымъ на́мъ. <<л҃ѕ: 71>>
Ве́снꙋ возвѣща́ющаѧ прибли́жисѧ сїѧ̀, ны́нѣ пред̾ѡчисти́тельнаѧ седми́ца всечестна́ѧ, сщ҃е́нныхъ постѡ́въ, тѣлеса̀ и҆ дꙋ́шы всѣ́хъ просвѣща́ющаѧ.
Сла́ва, трⷪ҇ченъ: Несли́тнаѧ, несозда́ннаѧ, трⷪ҇це ст҃а́ѧ, є҆ди́нице пребл҃га́ѧ, ѻ҆́ч҃е, и҆ сн҃е, и҆ дш҃е сро́дный, покланѧ́ющыѧсѧ тебѣ̀ вѣ́рнѡ, при́снѡ сп҃са́й.
Бг҃оро́диченъ: Побѣди́шасѧ, всечⷭ҇тна́ѧ, въ тебѣ̀ предѣ́лы дв҃о є҆стества̀: пребыва́еши бо ро́ждши без̾ мꙋ́жа бг҃а, ꙗ҆́коже пре́жде ржⷭ҇тва̀ чⷭ҇таѧ, па́ки невреди́ма.
Та́же і҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
По г҃-й пѣ́сни сѣда́ленъ: Сла́ва, и҆ ны́нѣ, бг҃оро́диченъ.
По ѕ҃-й пѣ́сни конда́къ, и҆ і҆́косъ ст҃а́гѡ.
Пѣ́снь и҃.
І҆рмо́съ: Є҆гѡ́же ᲂу҆жаса́ютсѧ а҆́гг҃ли:
Житїѐ моѐ всѐ блꙋ́днѡ и҆жди́въ, гра́жданѡмъ рабо́тахъ гѡ́рькимъ и҆ лꙋка̑вымъ: но жела́юща мѧ̀ къ твои̑мъ щедро́тамъ ны́нѣ ѡ҆брати́тисѧ хрⷭ҇тѐ, не пре́зри.
Ѡ҆́бразъ житїѧ̀ моегѡ̀ сра́мный, и҆ лю́тый: млⷭ҇ть безмѣ́рнаѧ, чл҃вѣколю́бче сп҃се, твоегѡ̀ бл҃гоꙋтро́бїѧ, покаѧ́нїѧ вре́мѧ да́ждь мѝ просѧ́щꙋ, и҆ любо́вїю тѧ̀ пою́щꙋ.
Ка́їновꙋ поревнова́хъ ѡ҆каѧ́нномꙋ житїю̀, ᲂу҆ма̀ достоѧ́нїе ᲂу҆мертви́въ и҆́стиннѡ, и҆ трепе́щꙋ сꙋда̀ твоегѡ̀ бл҃годѣ́телю: не ѡ҆сꙋдѝ менѐ съ си́мъ во вѣ́ки.
Бг҃оро́диченъ: Дв҃о всепѣ́таѧ, є҆ди́на къ бг҃ꙋ вѣ́рныхъ сꙋ́щи по́мощь тве́рдаѧ, тьмы́ мѧ и҆зба́ви, и҆ мꙋче́нїѧ належа́щагѡ лꙋка́внѡ живꙋ́щымъ.
И҆́ный.
І҆рмо́съ: Пѣ́снь тебѣ̀ прино́симъ:
Сїѐ вре́мѧ є҆́сть покаѧ́нїѧ, тѣ́мже бл҃гомꙋ́дреннѡ начне́мъ бра́тїе, вопїю́ще: бл҃гослови́те дѣла̀ гдⷭ҇нѧ гдⷭ҇а. <<л҃ѕ ѡ҆б.: 72>>
Дне́сь бра́шенъ ѿре́кшесѧ, потщи́мсѧ дѣ́ломъ и҆ прегрѣше́нїй досто́йнѡ ка́ѧтисѧ: бл҃гослови́те дѣла̀ гдⷭ҇нѧ гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Сла́ва тебѣ̀ неви́димаѧ трⷪ҇це ст҃а́ѧ, во є҆ди́ницѣ покланѧ́емаѧ, ю҆́же вѣ́рнѡ сла́вимъ: сп҃са́й рабы̑ твоѧ̑ ѿ всѧ́кагѡ вре́да.
Бг҃оро́диченъ: Ра́дꙋйсѧ всебл҃же́ннаѧ чⷭ҇таѧ дв҃о: ра́дꙋйсѧ гдⷭ҇нѧ рабо̀, и҆ мт҃и: ра́дꙋйсѧ покро́ве мі́ра бцⷣе бл҃гослове́ннаѧ, мр҃і́е всесвѣ́тлаѧ.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆ пою́ще глаго́лемъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃.
І҆рмо́съ: Свѣтоно́сный ѻ҆́блакъ:
Ми́рнымъ постоѧ́нїемъ, чи́стою любо́вїю сщ҃е́ннѣйшее вре́мѧ ст҃а́гѡ поста̀ воспрїи́мемъ вѣ́рнїи, просѧ́ще ѡ҆ставле́нїѧ, и҆́хже кі́йждо согрѣшѝ: ꙗ҆́кѡ да та́мошнюю ᲂу҆лꙋчи́мъ ра́дость.
Сѐ вре́мѧ покаѧ́нїѧ, предпра́зднственный се́й постѡ́въ вхо́дъ: воста́ни дꙋшѐ моѧ̀, бл҃годѣ́телю и҆ бг҃ꙋ те́плѣ примири́сѧ, ꙗ҆́кѡ да сꙋда̀ и҆збѣ́гнеши ѻ҆́нагѡ првⷣнагѡ и҆ стра́шнагѡ вои́стиннꙋ.
Постѡ́въ вхо́ды и҆ преддвє́рїѧ, всѝ да не ѡ҆скверни́мъ ѕлѣ̀ невоздержа́нїемъ и҆ пїѧ́нствомъ: но въ чистотѣ̀ помышле́нїй ᲂу҆се́рднѡ вни́демъ, прїе́мше нетлѣ́нїѧ вѣнцы̀ и҆ трꙋдѡ́въ досто́йнѣ плоды̀.
Бг҃оро́диченъ: Ѡ҆ на́съ молѧ́щи бл҃га́го не преста́й, не́мощь на́шꙋ вѣ́дꙋщаго є҆ди́наго: гла́да же, и҆ па́гꙋбы, и҆ трꙋ́са, и҆ всѧ́кагѡ ѡ҆ѕлобле́нїѧ и҆зба́витисѧ чтꙋ́щемꙋ тѧ̀ гра́дꙋ, бцⷣе, ᲂу҆пова́нїе земноро́дныхъ. <<л҃з: 73>>
И҆́ный. І҆рмо́съ: Тебѐ ви́дѣнꙋю две́рь:
Введе́сѧ вре́мѧ дꙋшѐ моѧ̀ покаѧ́нїѧ, не небрезѝ: а҆́лчꙋщымъ да́ждь хлѣ́бъ, моли́сѧ гдⷭ҇ви на всѧ́кїй де́нь, и҆ но́щь, и҆ ча́съ, да сп҃се́тъ тѧ̀.
Мѧ́съ, и҆ про́чихъ бра́шенъ ꙗ҆́коже ᲂу҆дале́нїе сотвори́хомъ, та́кѡ и҆ всѧ́кїѧ вражды̀ къ бли́жнимъ вкꙋ́пѣ, блꙋда́ же и҆ лжѝ, и҆ всѧ́кїѧ ѕло́бы ᲂу҆бѣжи́мъ.
Сла́ва, трⷪ҇ченъ: Є҆ди́номꙋ покланѧ́юсѧ є҆стество́мъ безнача́льномꙋ бж҃ествꙋ̀, треми́ же ли́цами сла́влю въ трⷪ҇цѣ є҆ди́ницꙋ нераздѣ́льнꙋю, и҆ сопресто́льнꙋю.
Бг҃оро́диченъ: Ты̀ є҆сѝ вѣ́рныхъ дв҃о похвала̀, ᲂу҆пова́нїе и҆ предста́тельство: тѧ̀ пѣ́сньми пѣ́нїй сла́вимъ непреста́ннѡ бцⷣе мр҃і́е, сп҃сѝ рабы̑ твоѧ̑.
І҆рмо́съ: Тебѐ ви́дѣнꙋю две́рь і҆езекі́илемъ прⷪ҇ро́комъ, є҆́юже никто́же про́йде, то́кмѡ бг҃ъ є҆ди́нъ, бцⷣе дв҃о, пѣ́сньми почита́емъ.
Свѣти́ленъ ѻ҆ктѡ́иха: Сла́ва: ст҃о́мꙋ, а҆́ще є҆́сть. А҆́ще ли нѝ: Сла́ва, и҆ ны́нѣ, бг҃оро́диченъ.
На стїхо́внѣ стїхи́ра самогла́сна, Гла́съ г҃:
На всѧ́кое вре́мѧ по́стъ поле́зенъ є҆́сть, и҆зволѧ́ющымъ и҆ творѧ́щымъ и҆̀: ниже́ бо и҆скꙋше́нїе де́мѡнское дерза́етъ на постѧ́щагосѧ: но и҆ храни́тели жи́зни на́шеѧ а҆́гг҃ли, люботрꙋ́днѣйше съ на́ми пребыва́ютъ, посто́мъ ѡ҆чи́стившимисѧ.
Сті́хъ: И҆спо́лнихомсѧ заꙋ́тра ми́лости твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑ въ нѧ́же смири́лъ ны̀ є҆сѝ, лѣ̑та въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
И҆ пое́мъ па́ки тꙋ́же стїхи́рꙋ.
Та́же сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви. <<л҃з ѡ҆б.: 74>>
Мꙋ́чениченъ: Ст҃ы́хъ страстоте́рпцєвъ па́мѧть, прїиди́те лю́дїе всѝ почти́мъ: занѐ позо́ръ бы́вше а҆́гг҃лѡмъ и҆ человѣ́кѡмъ, побѣ́дныѧ вѣнцы̀ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ, то́йже гла́съ:
Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ всест҃а́ѧ дв҃о.
Вѣ́домѡ же бꙋ́ди, ꙗ҆́кѡ въ понедѣ́льникъ сы́рныѧ недѣ́ли ꙗ҆ди́мъ два́жды дне́мъ.
Въ понедѣ́льникъ ве́чера.
На Гдⷭ҇и воззва́хъ, стїхи̑ры ꙗ҆́кѡ ѻ҆бы́чно.
На стїхо́внѣ самогла́сенъ, два́жды. Гла́съ и҃:
Посто́мъ ѡ҆чи́ститисѧ потщи́мсѧ, ѿ скве́рны прегрѣше́нїй на́шихъ, и҆ ми́лостїю и҆ человѣколю́бїемъ къ ни́щымъ, вни́ти въ черто́гъ жениха̀ хрⷭ҇та̀, подаю́щагѡ на́мъ ве́лїю млⷭ҇ть.
И҆ глаго́лемъ ѻ҆бы̑чныѧ стїхѝ, ꙗ҆́коже вчера̀.
Мꙋ́чениченъ: Мч҃нцы гдⷭ҇ни, моли́те бг҃а на́шего, и҆ и҆спроси́те дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.
Сла́ва, и҆ ны́нѣ, бг҃оро́диченъ: Пресла́внꙋю и҆ пречи́стꙋю бцⷣꙋ, и҆́стиннꙋю ꙗ҆́кѡ мт҃рь бж҃їю, воспои́мъ бл҃гоче́стнѡ, ра́доватисѧ то́й глаго́люще ꙗ҆́кѡ а҆́гг҃лъ: ра́дꙋйсѧ мт҃и ст҃а́ѧ воплоще́ннагѡ сн҃а бж҃їѧ. ра́дꙋйсѧ жили́ще ст҃а́гѡ дх҃а, молѧ́щаѧ при́снѡ ѡ҆ на́съ, во є҆́же сп҃сти́сѧ дꙋша́мъ на́шымъ.
И҆ про́чее послѣ́дованїе. <<л҃и: 75>>
Во вто́рникъ сы́рный на ᲂу҆́трени.
По в҃-мъ стїхосло́вїи сѣда́ленъ, гла́съ и҃.
Подо́бенъ: Премꙋ́дрость, и҆ сло́во:
Пребл҃гі́й сло́ве, со ѻ҆ц҃е́мъ и҆ дх҃омъ созда́вый ви́димаѧ вкꙋ́пѣ и҆ неви́димаѧ, неизрече́нною мꙋ́дростїю твое́ю, свѣ́тлагѡ поста̀ вре́мѧ прейтѝ, въ ми́рѣ глꙋбо́цѣ бл҃говолѝ бл҃гоꙋтро́бне, разрѣша́ѧ пре́лесть го́рькагѡ грѣха̀, подаѧ̀ ᲂу҆миле́нїе и҆ и҆сцѣле́нїй сле́зы, и҆ прегрѣше́нїй проще́нїе, да несꙋмнѣ́нною дꙋше́ю, ᲂу҆се́рднымъ дх҃омъ постѧ́щесѧ, со а҆́гг҃лы пое́мъ держа́вꙋ твою̀.
Сла́ва, то́йже. И҆ ны́нѣ, бг҃оро́диченъ:
Премꙋ́дрость и҆ сло́во въ твое́мъ чре́вѣ, заче́ншаѧ неизрече́ннѡ мт҃и бж҃їѧ, мі́рꙋ родила̀ є҆сѝ мі́ръ содержа́щаго, и҆ на ѡ҆б̾ѧ́тїѧхъ держа́ла є҆сѝ всѧ̑ ѡ҆б̾е́млющаго пищеда́телѧ всѣ́хъ и҆ созда́телѧ, и҆ гдⷭ҇а, тѣ́мже молю́ тѧ всепѣ́таѧ дв҃о, и҆ вѣ́рою сла́влю тѧ̀, и҆зба́витисѧ прегрѣше́нїй мои́хъ, є҆гда̀ и҆́мамъ предста́ти пред̾ лице́мъ созда́телѧ моегѡ̀, влⷣчце дв҃о чⷭ҇таѧ, твою̀ по́мощь тогда́ ми да́рꙋй: и҆́бо мо́жеши, є҆ли́ка хо́щеши всенепоро́чнаѧ.
Чте́мъ же и҆ вели́кагѡ васі́лїа сло́во ѡ҆ бл҃годаре́нїи. Та́же ѱало́мъ н҃. Канѡ́ны пое́мъ ѻ҆смогла́сника и҆ мине́и, ꙗ҆́коже въ понедѣ́льникъ ᲂу҆каза́сѧ: та́кожде и҆ въ про́чее послѣ́дꙋй.
И҆ трипѣ́снецъ господи́на і҆ѡ́сифа. Гла́съ г҃.
Пѣ́снь в҃.
І҆рмо́съ: Ꙗ҆́кѡ тꙋ́ча на тро́скотъ, и҆ ꙗ҆́кѡ и҆́ней на сѣ́но, да сни́дꙋтъ на зе́млю, глаго́ли моѝ.
Ꙗ҆́кѡ ᲂу҆́тро возсїѧ̀ на́мъ, покаѧ́нїѧ зарѝ, преддве́рїѧ свѣ́тлѡ воздержа́нїѧ. <<л҃и ѡ҆б.: 76>>
Тьмы́ мѧ и҆зба́ви хрⷭ҇тѐ внѣ́шнїѧ, мно́жествомъ млⷭ҇ти твоеѧ̀, ꙗ҆́кѡ є҆ди́нъ млⷭ҇тивъ.
Ѻ҆гнѧ́ мѧ и҆схи́ти, и҆ че́рвїѧ сп҃се неꙋсыпа́ющагѡ, покаѧ́нїѧ прилѣжа́нїемъ ѡ҆чище́нна.
Бг҃оро́диченъ: Дв҃о всепѣ́таѧ, бꙋ́ди на́мъ пꙋ́ть покаѧ́нїѧ, ко сп҃се́нїѧ ведꙋ́щїй две́ремъ.
И҆́ный.
І҆рмо́съ, гла́съ в҃: Внемли́те лю́дїе моѝ:
Вре́мѧ покаѧ́нїѧ наста̀, потщи́мсѧ хрⷭ҇толю́бцы ѡ҆чи́ститисѧ всѣ́хъ прегрѣше́нїй, и҆ ꙗ҆ви́тисѧ влⷣцѣ бл҃же́нни.
По́стъ чи́стый, безгрѣ́шный потщи́мсѧ соверши́ти ны́нѣ непреста́ннѡ, да ѡ҆брѧ́щемъ прегрѣше́нїй ѡ҆ставле́нїе.
Є҆си́ бо хрⷭ҇тѐ многомлⷭ҇тивъ всѣ́хъ бл҃же, при́снѡ прїе́млѧй въ покаѧ́нїе: тѣ́мже вси́ тѧ при́снѡ сла́вимъ.
Сла́ва, трⷪ҇ченъ: Трⷪ҇цꙋ во є҆ди́ницѣ просла́вимъ, несѣко́мꙋю, неслїѧ́ннꙋ, нераздѣ́льнꙋ сꙋщество́мъ, раздѣ́льна же ли́цы бг҃а.
Бг҃оро́диченъ: Чⷭ҇таѧ дв҃о мт҃и, ᲂу҆молѝ, є҆го́же воплоти́ла є҆сѝ ꙗ҆́кѡ чл҃вѣ́ка дв҃о, и҆ сло́ва: да сп҃се́тъ ѿ бѣ́дъ рабы̑ твоѧ̑.
І҆рмо́съ: Внемли́те лю́дїе моѝ зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ: ꙗ҆́кѡ и҆́мѧ твоѐ гдⷭ҇и, призва́хъ.
Пѣ́снь и҃.
І҆рмо́съ: И҆з̾ безнача́льна ѻ҆ц҃а̀ рожде́ннаго:
Раска́ѧнїѧ вре́мѧ, покаѧ́нїѧ показа́ти плоды̀ досто́йны бг҃ꙋ, дꙋшѐ моѧ̀ потщи́сѧ, воста́ни, и҆ возопі́й прилѣ́жнѡ, въ поще́нїихъ и҆ мл҃твахъ: по́йте, бл҃гослови́те и҆ превозноси́те хрⷭ҇та̀ во вѣ́ки.
Пред̾ѡчи́стимъ бра́тїе дꙋшє́внаѧ чꙋ̑вства, и҆ гдⷭ҇ви ны́нѣ прилѣпи́мсѧ ѡ҆́бразы ᲂу҆миле́нїѧ, вопїю́ще чи́стѣ <<л҃ѳ: 77>> покаѧ́нїемъ чи́стымъ: по́йте, бл҃гослови́те и҆ превозноси́те хрⷭ҇та̀ во вѣ́ки.
Оу҆ловлѧ́ющаго врага̀ ласкосе́рдыми воспомина́ньми, и҆ невоздержа́нїемъ сла́сти кра́ткїѧ палѧ́ща чꙋ́вство, ᲂу҆мертви́ти потщи́мсѧ прилѣ́жною мл҃твою, пою́ще, бл҃гословѧ́ще и҆ превозносѧ́ще хрⷭ҇та̀ во вѣ́ки.
Бг҃оро́диченъ: Ѡ҆небеси́вшаѧ на́ше земно́е ѻ҆трокови́це смѣше́нїе, ѡ҆лѧдѣ́вшꙋю и҆ и҆стлѣ́вшꙋю дꙋшѝ моеѧ̀ браздꙋ̀, тꙋ́чами твои́хъ щедро́тъ, плодоно́снꙋ добродѣ́тельми покажѝ вопїю́щꙋ, и҆ превозносѧ́щꙋ хрⷭ҇та̀ во вѣ́ки.
И҆́ный.
І҆рмо́съ: Въ кꙋпинѣ̀ мѡѷсе́ю:
Пред̾ѡчи́стимсѧ ны́нѣ, не бра́шны то́кмѡ, но и҆ дѣѧ́ньми, и҆ начне́мъ вѣ́рнїи те́плымъ помышле́нїемъ: да созда́телю свѣ́тли ꙗ҆ви́мсѧ во вѣ́ки.
Си́це на́мъ пости́тисѧ подоба́етъ, не во враждѣ̀ и҆ бра́ни, не въ за́висти и҆ рве́нїи, не во тщесла́вїи и҆ ле́сти сокрове́ннѣй, но ꙗ҆́коже хрⷭ҇то́съ, въ смиренномꙋ́дрїи.
Ми́лꙋющїи, речѐ ни́щыѧ, сп҃сꙋ взаи́мъ даю́тъ разꙋ́мнѡ. Ѽ ра́дости неꙋподоби́мыѧ! подае́тъ бо бога́тнѡ воздаѧ́нїѧ до́брыхъ, во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ: Є҆ди́нъ бо бг҃ъ, трѝ. со а҆́гг҃лы непреста́ннѡ человѣ́цы восхвалѧ́емъ тѧ̀, всест҃а́ѧ трⷪ҇це: во всѧ̑ вѣ́ки.
Бг҃оро́диченъ: Ра́дꙋйсѧ дв҃о чⷭ҇таѧ бцⷣе мр҃і́е, ѡ҆чисти́лище мі́ра, правосла́вныхъ ро́гъ, молѝ и҆зба́витисѧ ѿ негаси́магѡ ѻ҆гнѧ̀, тѧ̀ славосло́вѧщымъ во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки. <<л҃ѳ ѡ҆б.: 78>>
Пѣ́снь ѳ҃.
І҆рмо́съ: Тебѐ неѡпали́мꙋю кꙋпинꙋ̀:
Ѿве́рзи на́мъ млⷭ҇ти твоеѧ̀ пречⷭ҇тыѧ ᲂу҆трѡ́бы, покаѧ́нїе человѣ́кѡмъ во сп҃се́нїе дарова́вый є҆ди́не сп҃се многомлⷭ҇тиве.
Оу҆вы̀ мнѣ̀, ко́е стра́шное ѻ҆́ное неꙋмы́тное сꙋди́лище, на не́мже и҆́мамы на́зи твори́ти сло́во, и҆̀хже въ житїѝ ѕлѣ̀ содѣ́ѧхомъ;
Ѡ҆дождѝ на́мъ бл҃гоꙋтро́бїѧ бл҃годѣ́телю ка́плю, потоплѧ́ющꙋю на́шꙋ скве́рнꙋ всю̀, вины̑ покаѧ́нїѧ на́мъ подава́ѧ.
Всѝ ᲂу҆се́рднымъ се́рдцемъ, въ ст҃а́гѡ поста̀ преддвє́рїѧ свѣ́тлѡ совше́дше, бл҃года́рствєнныѧ пѣ̑сни хрⷭ҇тꙋ̀ принесе́мъ.
Бг҃оро́диченъ: Тѧ̀ крѣ́пкꙋю предста́тельницꙋ, и҆ и҆звѣ́стнꙋю наде́ждꙋ, воспѣва́юще бл҃гоче́стнѡ, мо́лимъ: сн҃а твоего̀ молѝ дв҃о сп҃сти́сѧ на́мъ.
И҆́ный. І҆рмо́съ: Двⷭ҇тво твоѐ бцⷣе нескве́рнаѧ:
Ны́нѣ пред̾ѡчи́стимсѧ въ постѣ̀ и҆ слеза́хъ, и҆ въ ве́лїихъ и҆справле́нїихъ, да ѡ҆брѧ́щемъ ве́лїю млⷭ҇ть.
Ны́нѣ подража́имъ мꙋ̑дрыѧ дѣ̑вы хрⷭ҇толю́бцы, и҆ потщи́мсѧ хрⷭ҇та̀ ᲂу҆срѣ́сти со свѣща́ми свѣ́тлыми.
Ны́нѣ подража́имъ и҆лїю̀ пости́вшасѧ, и҆ бѣжа́вша ѿ лꙋка́выѧ і҆езаве́ли, да та́кѡ вознесе́мсѧ ѿ землѝ.
Сла́ва, трⷪ҇ченъ: Ст҃ы́й, ст҃ы́й, ст҃ы́й, трист҃ы́й, ѻ҆́ч҃е вседержи́телю, и҆ сн҃е є҆диносꙋ́щне со дх҃омъ, є҆ди́но бж҃ество̀.
Бг҃оро́диченъ: Ѡ҆ тебѣ̀ хва́лимсѧ, и҆ къ тебѣ̀ прибѣга́емъ, чⷭ҇таѧ, приснодв҃о честна́ѧ, мꙋче́нїѧ и҆зба́ви всѧ̑ ны̀.
І҆рмо́съ: Дѣ́вство твоѐ бцⷣе нескве́рнаѧ, є҆́же не ѡ҆палѝ ѻ҆́гнь бж҃е́ственный, велича́емъ. <<м҃: 79>>
На стїхо́внѣ стїхи́ра самогла́сна, гла́съ г҃:
Любе́знѡ лю́дїе по́стъ ѡ҆блобыза́имъ: приспѣ́ бо дх҃о́вныхъ по́двигѡвъ нача́ло: ѡ҆ста́вимъ тѣле́сное сладостра́стїе, возрасти́мъ дꙋшє́внаѧ дарова̑нїѧ, спостра́ждемъ ꙗ҆́кѡ рабѝ хрⷭ҇то́ви, да и҆ спросла́вимсѧ ꙗ҆́кѡ ча̑да бж҃їѧ, и҆ дх҃ъ ст҃ы́й въ на́съ все́льсѧ, просвѣти́тъ дꙋ́шы на́шѧ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀:
Па́ки тꙋ́же стїхи́рꙋ:
Сті́хъ: И҆ бꙋ́ди свѣ́тлость:
Мꙋ́чениченъ: Царе́й и҆ мꙋчи́телей стра́хъ ѿри́нꙋша хрⷭ҇тѡ́вы во́ини, и҆ бл҃годерзнове́ннѡ, и҆ мꙋ́жественнѡ того̀ и҆сповѣ́даша, всѣ́хъ гдⷭ҇а бг҃а, и҆ цр҃ѧ̀ на́шего: и҆ мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ: Бцⷣе, предста́тельство всѣ́хъ молѧ́щихсѧ, на тебѐ надѣ́емсѧ, и҆ тобо́ю хва́лимсѧ, въ тебѣ̀ всѐ ᲂу҆пова́нїе на́ше є҆́сть. молѝ и҆з̾ тебѐ роди́вшагосѧ ѡ҆ непотре́бныхъ рабѣ́хъ твои́хъ.
Во вто́рникъ ве́чера.
Ѿ нача́ла вече́рни начина́емъ покло́ны. На Гдⷭ҇и воззва́хъ стїхи̑ры ꙗ҆́кѡ ѻ҆бы́чнѡ.
На стїхо́внѣ самогла́сенъ, гла́съ а҃:
Ра́достнѡ прїи́мемъ вѣ́рнїи бг҃одохнове́нное завѣща́нїе поста̀, ꙗ҆́коже пре́жде нїнеѵі́тѧне: и҆ па́ки, блꙋдни́цы и҆ мытарѝ: ꙗ҆́же покаѧ́нїѧ про́повѣдь ѿ і҆ѡа́нна є҆́сть. воздержа́нїемъ ᲂу҆гото́вимсѧ къ преселе́нїю въ сїѡ́нъ, влⷣчнѧгѡ сщ҃еннодѣ́йства. слеза́ми пред̾ѡчи́стимсѧ въ не́мъ бж҃е́ственнагѡ ᲂу҆мове́нїѧ. помо́лимсѧ ви́дѣти ѡ҆бра́зныѧ здѣ̀ па́схи соверше́нїе, и҆ и҆́стинныѧ ꙗ҆вле́нїе. ᲂу҆гото́вимсѧ на <<м҃ ѡ҆б.: 80>> поклоне́нїе крⷭ҇та̀, и҆ воскрⷭ҇нїѧ хрⷭ҇та̀ бг҃а, вопїю́ще къ немꙋ̀: не посрамѝ на́съ ѿ ча́ѧнїѧ на́шегѡ чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ:
И҆ па́ки тꙋ́же стїхи́рꙋ.
Сті́хъ: Поми́лꙋй на́съ гдⷭ҇и, поми́лꙋй на́съ:
Мꙋ́чениченъ: Ѽ до́брыѧ кꙋ́пли ва́шеѧ ст҃і́и! ꙗ҆́кѡ крѡ́ви да́сте, и҆ нб҃са̀ наслѣ́довасте: и҆ вре́меннѡ и҆скꙋси́вшесѧ, вѣ́чнѡ ра́дꙋетесѧ. вои́стиннꙋ до́браѧ ва́ша кꙋ́плѧ: тлѣ́ннаѧ бо ѡ҆ста́вльше, нетлѣ́ннаѧ воспрїѧ́сте, и҆ со а҆́гг҃лы ликꙋ́юще пое́те непреста́ннѡ трⷪ҇цꙋ є҆диносꙋ́щнꙋю.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Прехва́льнїи мч҃нцы:
Дв҃а нескве́рнаѧ, и҆ногда̀ на дре́вѣ ви́дѣвши, є҆го́же родѝ и҆з̾ безсѣ́менныѧ ᲂу҆тро́бы, не терпѧ́щи ᲂу҆тро́бнагѡ ᲂу҆ѧзвле́нїѧ, власы̀ терза́ющи глаго́лаше: ма́нїемъ содержа́й тва́рь всю̀, ка́кѡ ꙗ҆́кѡ ѡ҆сꙋжде́нный на крⷭ҇тъ вознесе́нъ є҆сѝ, всѧ́кѡ хотѧ́й сп҃стѝ человѣ́чество;
Ны́нѣ ѿпꙋща́еши: По Трист҃о́мъ, тропа́рь: Бцⷣе дв҃о ра́дꙋйсѧ: Покло́нъ а҃. Сла́ва: Крⷭ҇ти́телю хрⷭ҇то́въ: Покло́нъ а҃. И҆ ны́нѣ: Моли́те за ны̀: Покло́нъ а҃. Под̾ твоѐ бл҃гоꙋтро́бїе прибѣга́емъ бцⷣе: без̾ покло́на. Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ блгⷭ҇вѝ ѻ҆́тче. І҆ере́й: Сы́й блгⷭ҇ве́нъ хрⷭ҇то́съ бг҃ъ на́шъ: И҆ мы̀ глаго́лемъ моли́твꙋ: Нбⷭ҇ный цр҃ю̀: и҆ покло́ны трѝ вели̑кїѧ, съ моли́твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: и҆ про́чихъ, в҃і. Па́ки сконча́вше покло́ны, глаго́лемъ моли́твꙋ вышепи́саннꙋю Гдⷭ҇и и҆ влⷣко живота̀ моегѡ̀: и҆ покло́нъ є҆ди́нъ вели́кїй. Трист҃о́е. По Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ: И҆ ѿпꙋ́стъ. Повече́рїе пое́мъ вели́кое съ покло́ны. По Досто́йно є҆́сть, тропарѝ дневны̑ѧ и҆ хра́мꙋ. И҆ ѿпꙋ́стъ ме́ньшїй. Та́кожде и҆ проти́вꙋ пѧтка̀ твори́мъ. <<м҃а: 81>>
Въ сре́дꙋ сы́рнꙋю
полꙋ́нощница, съ покло́ны є҆ѧ̀.
На ᲂу҆́трени: Пое́мъ А҆ллилꙋ́їа въ настоѧ́щїй гла́съ ѻ҆ктѡ́иха, и҆ трⷪ҇чны гла́са, и҆ ѻ҆бы̑чныѧ каѳі̑смы двѣ̀. Ꙗ҆́кѡ въ сре́дꙋ и҆ въ пѧто́къ седми́цы сы́рныѧ недѣ́ли пое́мъ А҆ллилꙋ́їа. сотворѧ́емъ и҆ покло́ны ве́черъ и҆ ᲂу҆́трѡ, ꙗ҆́коже вы́ше рече́сѧ. и҆ по́стъ соверша́емъ по чи́нꙋ, а҆́ще и҆ ко́егѡлибо прилꙋчи́тсѧ ст҃а́гѡ, и҆ тропа́рь и҆мѣ́ѧй бꙋ́детъ. Междоча́сїѧ же не пое́мъ.
А҆́ще же пра́здникъ срѣ́тенїѧ гдⷭ҇нѧ, и҆лѝ хра́мъ ко́егѡ ст҃а́гѡ, пое́мъ тропа́рь, и҆ покло́нѡвъ не твори́мъ, то́чїю по трѝ покло́ны вели́кихъ.
По а҃-мъ стїхосло́вїи сѣда́льны ѻ҆смогла́сника крⷭ҇тны.
По в҃-мъ же стїхосло́вїи сѣда́ленъ трїѡ́ди: Гла́съ в҃.
Подо́бенъ: Бл҃гоꙋтро́бїѧ сꙋ́щи:
Съ ми́ромъ прейтѝ на́мъ смирє́ннымъ, пред̾ѡчище́нїе бл҃говолѝ постѡ́въ, неизрече́ннымъ чл҃вѣколю́бїемъ твои́мъ хрⷭ҇тѐ бж҃е: низложѝ вра̑жїѧ кова̑рствїѧ, и҆ крⷭ҇то́мъ твои́мъ всѧ̑ сп҃сѝ, є҆ди́не свѣ́дый сердє́чнаѧ.
Сла́ва, то́йже. И҆ ны́нѣ, крⷭ҇тобг҃оро́диченъ. Подо́бенъ:
Предстоѧ́щи крⷭ҇тꙋ̀ твоемꙋ̀, безсѣ́меннѡ ро́ждшаѧ тѧ̀, и҆ не терпѧ́щи зрѣ́ти непра́веднѡ стра́ждꙋща, рыда́ше съ пла́чемъ, и҆ вопїѧ́ше тѝ: ка́кѡ стра́ждеши є҆стество́мъ безстрⷭ҇тный, сладча́йшїй сн҃е; пою̀ твою̀ кра́йнюю бл҃госты́ню.
Здѣ̀ чте́мъ сло́во ѡ҆ постѣ̀, вели́кагѡ васі́лїа, є҆гѡ́же нача́ло: Оу҆тѣша́йте ᲂу҆тѣша́йте: и҆ ѱало́мъ н҃. Канѡ́нъ во ѻ҆ктѡ́ихѣ крⷭ҇тꙋ̀ со і҆рмосо́мъ на ѕ҃: и҆ въ мине́и ст҃а́гѡ на д҃: и҆ въ трїѡ́ди на д҃. Въ ко́ихъ же пѣ́снехъ приспѣ́етъ трипѣ́снецъ, и҆ пое́мъ канѡ́нъ трїѡ́ди со і҆рмосо́мъ на ѕ҃: и҆ трипѣ́снецъ на и҃. и҆ <<м҃а ѡ҆б.: 82>> послѣдѝ і҆рмо́съ трипѣ́снца. Въ си́хъ же пѣ́снехъ ѡ҆ставлѧ́етсѧ канѡ́нъ ѻ҆ктѡ́иха, и҆ мине́и: И҆ пое́мъ мине́и въ вы́шнихъ пѣ́снехъ си́це: а҃ пѣ́снь канѡ́на ѻ҆ктѡ́иха со і҆рмосо́мъ на д҃: И҆ въ мине́и ст҃а́гѡ а҃-ю и҆ г҃-ю пѣ́снь, на ѕ҃: И҆ въ трїѡ́ди на д҃. Подо́бнѣ пое́мъ ѻ҆смꙋ́ю съ шесто́ю и҆ девѧ́тꙋю съ седмо́ю пѣ́сньми.
Канѡ́нъ трїѡ́ди.
Пѣ́снь а. Гла́съ д҃. Творе́нїе гдⷭ҇и́на а҆ндре́а кри́тскагѡ.
І҆рмо́съ: Воспою̀ тебѣ̀ гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆з̾ рабо́ты є҆гѵ́петскїѧ: покры́лъ же є҆сѝ колесни́цы фараѡ́новы и҆ си́лꙋ.
Постѧ́сѧ гдⷭ҇ь человѣ́чески, ко и҆з̾ѡбраже́нїю на́шемꙋ, побѣжда́етъ и҆скꙋси́телѧ, показꙋ́ѧ на́ше, и҆ предѣ́лы подписꙋ́ѧ на́мъ.
Мѡѷсе́й бж҃е́ственый въ сїна́и, воздержа́нїемъ бг҃ꙋ лице́мъ къ лицꙋ̀ глаго́лати сподо́бисѧ: томꙋ̀ вѣ́рнїи поревнꙋ́имъ.
Ѡ҆чи́сти гдⷭ҇и, лю́ди твоѧ̑, и҆ призрѣ́въ ꙗ҆́кѡ бг҃ъ млⷭ҇тивымъ ѻ҆́комъ, посѣтѝ всѣ́хъ мно́жествомъ млⷭ҇ти твоеѧ̀.
Бг҃оро́диченъ: Къ тебѣ̀ всѝ притека́емъ бцⷣе, ꙗ҆́кѡ побо́рницѣ тве́рдѣй, на мл҃твꙋ дви́жꙋще тѧ̀, и҆зба́вити ста́до твоѐ ѿ всѧ́кагѡ ѡ҆бстоѧ́нїѧ.
Пѣ́снь г҃.
І҆рмо́съ: Въ гдⷭ҇ѣ бз҃ѣ мое́мъ се́рдце моѐ ᲂу҆тверди́сѧ: тѣ́мъ немощствꙋ́ющїи препоѧ́сашасѧ си́лою.
Чꙋ́дный є҆нѡ́хъ воздержа́нїемъ преложи́сѧ ѿ землѝ: томꙋ̀ ѡ҆бразоревнꙋ́юще преложи́мсѧ ѿ тлѝ къ животꙋ̀.
Мл҃твами и҆ поще́ньми и҆зба́вителѧ ᲂу҆мо́лимъ: сра́дꙋетсѧ бо созда́тель покаѧ́нїю созда́нїй свои́хъ.
Гото́висѧ ѽ дꙋшѐ, и҆ пред̾ѡчи́стисѧ пре́жде стрⷭ҇ти хрⷭ҇то́вы, да воскрⷭ҇нїемъ дх҃о́внѡ спра́зднꙋеши є҆мꙋ̀. <<м҃в: 83>>
Бг҃оро́диченъ: Ꙗ҆́кѡ ро́ждшаѧ бг҃а, ѡ҆ на́съ непреста́ннѡ моли́сѧ: къ тебѣ́ бо бцⷣе, грѣ́шнїи прибѣга́емъ.
Та́же трипѣ́снецъ і҆ѡ́сифа. Гла́съ в҃:
Пѣ́снь г҃.
І҆рмо́съ: На ка́мени мѧ̀ вѣ́ры:
Просте́рлъ є҆сѝ дла̑ни на крⷭ҇тѣ̀ твое́мъ, ᲂу҆мертви́лъ є҆сѝ ᲂу҆мерщвле́нїемъ твои́мъ клѧ́твꙋ, ѡ҆живи́лъ є҆сѝ стрⷭ҇тїю твое́ю человѣ́ки. тѣ́мже пое́мъ твоѐ бж҃е́ственное распѧ́тїе, і҆и҃се чл҃вѣколю́бче бж҃е на́шъ.
Снѣ́дїю дре́ва ᲂу҆мертви́вшесѧ, дре́вомъ ѡ҆жи́хомъ крⷭ҇та̀ твоегѡ̀. того̀ ᲂу҆̀бо прино́симъ тебѣ̀ въ мл҃твꙋ: бл҃года́ть и҆ млⷭ҇ть на́мъ низпослѝ, бл҃годѣ́телю влⷣко многомлⷭ҇тиве.
Преддвє́рїѧ ѿверзо́шасѧ поще́нїѧ, по́прище приближа́етсѧ воздержа́нїѧ, горѧ́щимъ ᲂу҆се́рдїемъ воста́немъ, прїе́млюще да́ръ бг҃ода́нный, ᲂу҆толѧ́ющїй зно́й прегрѣше́нїй.
Вре́мѧ бл҃же́нное поста̀, лꙋчы̀ и҆спꙋща́ющее покаѧ́нїѧ возсїѧ̀, пристꙋ́пимъ любоче́стнѡ, ѿгонѧ́юще тьмꙋ̀ глꙋбоча́йшꙋю лѣ́ности, всѝ веселѧ́щесѧ.
По́стъ ѡ҆свѧти́мъ любомꙋ́дреннѡ, проповѣ́даимъ воздержа́нїе страсте́й, возопїи́мъ во слеза́хъ влⷣцѣ: да́ждь на́мъ гдⷭ҇и бл҃года́ть, содѣ́йствꙋющꙋю въ твоѧ̑ хотѣ̑нїѧ, многомлⷭ҇тиве.
Прїи́мше дарова̑нїѧ поста̀ просла́вимъ да́вшаго во сп҃се́нїе, и҆ сїѐ содѣ́лаимъ трꙋдолю́бнѡ, да ѡ҆ставле́нїе согрѣше́нїй на́шихъ ѿ рꙋкѝ воспрїи́мемъ сотво́ршагѡ.
Бг҃оро́диченъ: Оу҆толѝ смꙋще́нїе страсте́й мои́хъ, и҆сцѣлѝ ꙗ҆́звы дꙋшѝ моеѧ̀, воздви́гни мѧ̀ ѿ сна̀ ᲂу҆ны́нїѧ хода́тайствомъ твои́мъ, и҆ предста́тельствомъ, прест҃а́ѧ влⷣчце мт҃и дв҃о. <<м҃в ѡ҆б.: 84>>
И҆́ный, гла́съ то́йже:
І҆рмо́съ: Непло́дствовавшїй мо́й ᲂу҆́мъ:
Возне́сшꙋсѧ тѝ сп҃се, во́лею на крⷭ҇тъ, всѧ̀ тва́рь земна́ѧ подви́жесѧ, и҆ раздра́сѧ хра́мнаѧ завѣ́са.
Оу҆ѧзви́лсѧ є҆сѝ на крⷭ҇тѣ̀ і҆и҃се мо́й менѐ ра́ди, и҆ прободе́нъ въ ре́бра бл҃же: ѿню́дꙋже вѣ́рою покланѧ́юсѧ бж҃е́ственнѣй держа́вѣ твое́й.
Сла́ва, трⷪ҇ченъ: Прекло́нь колѣ̑на на зе́млю, ѻ҆ц҃ꙋ̀, покланѧ́юсѧ, сн҃а сла́влю, и҆ дх҃а воспѣва́ю, є҆диново́льное нача́ло, и҆ трїѷпоста́сное.
Бг҃оро́диченъ: Непостижи́мо є҆́сть та́инство чⷭ҇таѧ, твоегѡ̀ рожде́нїѧ: ражда́еши бо мр҃і́е неискꙋсомꙋ́жнѡ бг҃а, и҆ пребыва́еши нетлѣ́нна.
Сла́ва тебѣ̀ бж҃е на́шъ, сла́ва тебѣ̀.
По́стное вре́мѧ, си́лою твое́ю хрⷭ҇тѐ, ѡ҆свѧти́въ, сп҃сѝ всѧ̑ ны̀ сѣте́й вра́жїихъ, покланѧ́ющыѧсѧ тебѣ̀.
І҆рмо́съ: Непло́дствовавшїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.
Сѣда́ленъ мине́и ст҃о́мꙋ. Сла́ва, и҆ ны́нѣ, крⷭ҇тобг҃оро́диченъ.
Пѣ́снь д҃.
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и.
А҆враа́мъ добродѣ́телїю и҆ страннолю́бїемъ трⷪ҇цꙋ прїѧ́тъ, а҆́гг҃льски прише́дшꙋю.
Бога́тство некра́домое воздержа́нїѧ є҆́сть да́ръ: и҆ си́мъ ѡ҆богати́выйсѧ, ѡ҆богати́тсѧ бж҃ество́мъ.
Сла́ва: Прїиди́те, воспла́чимъ вкꙋ́пѣ сло́вомъ, вѣ́рою вопїю́ще: бж҃е, ѡ҆чи́сти ны̀ мно́гѡ согрѣ́шшыѧ.
Бг҃оро́диченъ: Мт҃и непоро́чнаѧ, бл҃гослове́ннаѧ, чⷭ҇таѧ дв҃о, сн҃ꙋ твоемꙋ̀ и҆ бг҃ꙋ на́шемꙋ, ѡ҆ мі́рѣ моли́сѧ. <<м҃г: 85>>
Пѣ́снь є҃.
І҆рмо́съ: Возсїѧ́вый свѣ́тъ, и҆ просвѣти́вый ᲂу҆́тро, и҆ показа́вый де́нь: сла́ва тебѣ̀, сла́ва тебѣ̀, і҆и҃се сн҃е бж҃їй.
Пости́всѧ дре́вле мѡѷсе́й въ горѣ̀ сїна́йстѣй, бг҃ови́децъ ꙗ҆ви́сѧ: и҆ и҆лїа̀ на ѻ҆́гненнѣй колесни́цѣ возноша́шесѧ.
Поще́нїемъ и҆ногда̀ мꙋ́дрый и҆са́їа, ᲂу҆́глѧ ѻ҆́нагѡ клеще́ю вкꙋша́етъ, є҆гда̀ ко ᲂу҆стна́мъ є҆гѡ̀ прикоснꙋ́сѧ.
Сла́ва: Пости́всѧ пре́жде данїи́лъ, и҆ трїѐ ѻ҆́троцы вкꙋ́пѣ, чє́люсти львѡ́въ сокрꙋши́вше, горѧ́щїй пла́мень попра́ша.
Бг҃оро́диченъ: Бг҃ороди́тельнице чⷭ҇таѧ, бг҃а во чре́вѣ твое́мъ носи́вшаѧ нетлѣ́ннѡ, сохранѝ ста́до твоѐ, и҆ соблюдѝ невреди́мо.
Пѣ́снь ѕ҃.
І҆рмо́съ: Ꙗ҆́коже прⷪ҇ро́ка і҆ѡ́нꙋ ѿ ки́та и҆зба́вилъ є҆сѝ хрⷭ҇тѐ бж҃е: и҆ менѐ и҆з̾ глꙋбины̀ прегрѣше́нїй возведѝ, и҆ сп҃си́ мѧ є҆ди́не чл҃вѣколю́бче.
І҆ѡ́нꙋ въ ки́тѣ чⷭ҇тно́е сп҃сѐ поще́нїе и҆ногда̀: пости́мсѧ ᲂу҆̀бо ѿ се́рдца, и҆ ᲂу҆бѣжи́мъ ѻ҆́нагѡ въ гее́ннѣ тлѣ́нїѧ.
Нїнеѵі́тѧне же па́ки гнѣ́въ бж҃їй претвори́ша те́плымъ покаѧ́нїемъ и҆ любо́вїю: тѣ̑мъ ны́нѣ любе́знѡ всѝ поревнꙋ́имъ.
Сла́ва: Настоѧ́щїй по́стъ созыва́етъ на́съ на покаѧ́нїе: притеце́мъ ᲂу҆̀бо съ любо́вїю, и҆ ᲂу҆разꙋмѣ́имъ, что́ є҆сть да́ръ воздержа́нїѧ.
Бг҃оро́диченъ: Несказа́ннѡ ро́ждшаѧ сп҃са мі́рꙋ хрⷭ҇та̀ бг҃а на́шего, того̀ молѧ́щи не преста́й, ро́дъ ве́сь сп҃стѝ воспѣва́ющихъ тѧ̀. <<м҃г ѡ҆б.: 86>>
Конда́къ ст҃а́гѡ: а҆́ще ст҃ы́й не и҆́мать кондака̀, глаго́лемъ мч҃нченъ гла́са, и҆́же и҆ сѣда́ленъ.
Пѣ́снь з҃.
І҆рмо́съ: Ѻ҆тє́цъ на́шихъ бж҃е, не посрамѝ на́съ, но да́рꙋй на́мъ со дерзнове́нїемъ вопи́ти тебѣ̀: бл҃гослове́нъ є҆сѝ бж҃е ѻ҆тє́цъ на́шихъ.
Бꙋ́демъ и҆ мы̀ ꙗ҆́кѡ данїи́лъ ѻ҆́ный, львы̀ и҆ногда̀ посто́мъ ᲂу҆кроти́вый въ ро́вѣ рыка́ющыѧ.
Ю҆́ношамъ тре́мъ поревнꙋ́имъ со стра́хомъ, да ᲂу҆бѣ́гнемъ ѻ҆гнѧ̀ гее́нскагѡ, ꙗ҆́коже сі́и вавѷлѡ́нскїѧ пе́щи.
Сла́ва: Пости́мсѧ и҆ мы̀ чⷭ҇тымъ се́рдцемъ, и҆ ѡ҆чи́стимъ тѣ́ло, и҆ ве́сь всѧ́кѡ дх҃ъ бг҃ꙋ посвѧти́мъ.
Бг҃оро́диченъ: Дв҃о мт҃и чⷭ҇таѧ, и҆з̾ тебѐ воплоще́ннаго превѣ́чнаго сло́ва молѧ́щи не преста́й, сп҃сти́сѧ дꙋша́мъ на́шымъ.
Пѣ́снь и҃.
І҆рмо́съ: Цр҃ѧ̀ хрⷭ҇та̀, є҆го́же и҆сповѣ́даша плѣне́ннїи ѻ҆́троцы, въ пещѝ глаго́люще ве́лїимъ гла́сомъ, всѧ̑ дѣла̀ по́йте гдⷭ҇а.
Пости́всѧ пре́жде і҆ѡ́сифъ, смѣше́нїѧ и҆збѣжѐ беззако́нныѧ жены̀, и҆ црⷭ҇тво ᲂу҆лꙋчѝ. тѣ́мже и҆ мы̀ ᲂу҆гаси́мъ поще́нїемъ разжжє́нныѧ стрѣ́лы врага̀ велїа́ра.
Поще́нїемъ дв҃дъ побѣ́дꙋ поста́ви на и҆ноплеме́нника, и҆ ца́рство ѡ҆брѣ́те: тѣ́мже и҆ мы̀ прїи́мемъ воздержа́нїемъ побѣ́дꙋ на врагѝ, и҆ во гдⷭ҇ѣ вѣнча́ни бꙋ́демъ.
Сохрани́мъ и҆ мы̀ добродѣ́тєли и҆́хъ, і҆́ѡвлево мꙋ́жество, і҆а́кѡвле неѕло́бїе, вѣ́рꙋ а҆враа́мовꙋ, цѣломꙋ́дрїе і҆ѡ́сифово, и҆ дв҃довꙋ до́блесть.
Бг҃оро́диченъ: Цр҃ѧ̀ хрⷭ҇та̀, є҆го́же родѝ на́мъ дв҃а мр҃і́а, и҆ по ржⷭ҇твѣ̀ пребы́сть дв҃а чⷭ҇таѧ, всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки. <<м҃д: 87>>
Та́же трипѣ́снецъ и҆́ный. І҆рмо́съ: Въ пе́щь ѻ҆́гненнꙋю:
Крⷭ҇тоѧвле́ннѡ мѡѷсе́й дла̑ни возводѧ̀ на горѣ̀, врагѝ побѣжда́ше: ты́ же сп҃се, на крⷭ҇тѣ̀ рꙋ́цѣ просте́ръ, ᲂу҆мертви́лъ є҆сѝ всепа́гꙋбное а҆́да мꙋчи́тельство.
Гвоздьмѝ прибїе́нъ на крⷭ҇тѣ̀, и҆ въ ре́бра прободе́нъ хрⷭ҇тѐ сп҃се мо́й, клѧ́твы и҆зба́вилъ є҆сѝ земнорѡ́дныѧ, и҆ ра́дости несконча́емыѧ ѻ҆́бщники показа́лъ є҆сѝ: тѣ́мже бл҃гослови́мъ чл҃вѣколю́бїе твоѐ.
Воздержа́нїѧ вре́мѧ возсїѧ́вшее мы́сленнѡ просвѣща́етъ дꙋшє́внаѧ чꙋ̑вства, и҆ страсте́й мглꙋ̀ ѿго́нитъ: тѣ́мже лобыза́имъ сїѐ ѿ се́рдца, превозносѧ́ще во вѣ́ки.
Стра̑сти всегꙋби́тєльныѧ дꙋшє́вныѧ, сла̑сти смертонѡ́сныѧ по́стъ ᲂу҆мерщвлѧ́етъ, и҆ и҆́стиннѡ въ постоѧ́нїи твори́тъ се́рдца ᲂу҆стремлє́нїѧ и҆ движє́нїѧ: се́й ᲂу҆́бѡ вѣ́рою воспрїи́мемъ любе́знѡ.
Не поста̀ нача́ло настоѧ́щїй ст҃ы́й де́нь вѣ́рнїи вѣ́дꙋще, се́й чⷭ҇тымъ помышле́нїемъ почти́мъ, но вхо́дъ глаго́люще, и҆ прише́ствїе къ преддве́рїю по́стномꙋ.
Предпрїе́млетъ де́снѡ бг҃олюбе́знꙋю дꙋ́шꙋ предпꙋ́тїѧми добрѣ́йшїй по́стъ, пред̾ѡчисти́тельныхъ по́честей прпⷣбный, степе́ньми и҆ лѣ́ствицею, къ се́й прило́жьсѧ ны́нѣшнїй де́нь.
Бг҃оро́диченъ: Ѿве́рзи толкꙋ́щымъ на́мъ, и҆ млⷭ҇ть твою̀ призыва́ющымъ, ско́рое человѣ́кѡвъ прибѣ́жище, и҆ тве́рдаѧ во всѣ́хъ дв҃о помо́щнице, и҆ сꙋ́щымъ въ нꙋ́ждахъ и҆звѣ́стнаѧ застꙋ́пнице
И҆́ный.
І҆рмо́съ: Въ кꙋпинѣ̀ мѡѷсе́ю:
Вознесы́йсѧ на крⷭ҇тъ всѣ́хъ влⷣко, а҆да́ма со є҆́ѵою па́ки воззва́лъ є҆сѝ, и҆ въ ра́й хрⷭ҇тѐ сп҃се вве́лъ є҆сѝ, тѧ̀ воспѣва́ющыѧ во всѧ̑ вѣ́ки. <<м҃д ѡ҆б.: 88>>
Тебѣ̀ возне́сшꙋсѧ хрⷭ҇тѐ на крⷭ҇тъ во́лею, лꙋчы̀ со́лнєчныѧ стра́хомъ помрачи́шасѧ, и҆ за́йде де́нь: ѿѻнꙋ́дꙋже тѧ̀ разбо́йникъ бг҃а и҆сповѣ́да во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ра́вна ѻ҆ц҃ꙋ̀ сн҃а, и҆ ст҃а́го дх҃а вѣ́ровахомъ бы́ти ст҃ꙋ́ю трⷪ҇цꙋ въ бж҃ествѣ̀ є҆ди́номъ: є҆́йже вѣ́рою покланѧ́емсѧ, а҆́рїево ᲂу҆че́нїе при́снѡ попира́юще.
Бг҃оро́диченъ: Ка́кѡ тѧ̀ воспою̀, ꙗ҆́коже подоба́етъ, бцⷣе дв҃о, смра́дными грѣха́ми а҆́зъ ны́нѣ помраче́нный; но ᲂу҆̀бо прест҃а́ѧ, простѝ моѐ дерзнове́нїе ᲂу҆бо́гагѡ моегѡ̀ пѣ́нїѧ.
Сла́ва тебѣ̀ бж҃е на́шъ, сла́ва тебѣ̀.
Крⷭ҇те, вѣ́рныхъ ᲂу҆пова́нїе, царе́й ѻ҆рꙋ́жїе, сщ҃е́нникѡвъ сла́во, мона́шествꙋющихъ крѣ́посте, твое́ю си́лою всѧ̑ тѧ̀ славосло́вѧщыѧ сп҃са́й во вѣ́ки.
Хва́лимъ бл҃гослови́мъ, покланѧ́емсѧ гдⷭ҇ви:
І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те, и҆ превозноси́те во всѧ̑ вѣ́ки.
И҆ стїхосло́витсѧ Чⷭ҇тнѣ́йшꙋю:
Пѣ́снь ѳ҃.
І҆рмо́съ: Велича́емъ всѝ чл҃вѣколю́бїе твоѐ хрⷭ҇тѐ сп҃се на́шъ, сла́во ра̑бъ твои́хъ и҆ вѣ́нче вѣ́рныхъ, возвели́чивый па́мѧть ро́ждшїѧ тѧ̀.
Мѡѷсе́й во є҆гѵ́птѣ мо́ре раздѣлѝ, и҆ лю́ди проведѐ, и҆ сїѧ̑ препита̀ въ пꙋсты́ни непрохо́днѣй, посто́мъ творѧ̀ чꙋдеса̀.
І҆исꙋ́съ наѵи́нъ воздержа́нїемъ лю́ди ѡ҆свѧтѝ, и҆ наслѣ́дствова зе́млю ѻ҆бѣтова́ннꙋю, і҆ѻрда́нъ преше́дъ пре́жде.
Гедеѡ́нъ ѻ҆́ный, то́кмѡ съ тремѝ сты̀ мꙋже́й хлепта́вшими, побѣжда́етъ и҆ноплеме́нники воздержа́нїемъ и҆ мл҃твою: томꙋ̀ ревнꙋ́юще и҆ мы̀ ᲂу҆подо́бимсѧ. <<м҃є: 89>>
Бг҃оро́диченъ: Ра́дꙋйсѧ всечⷭ҇тна́ѧ, чⷭ҇таѧ, дв҃ства похвало̀, а҆́гг҃лѡвъ ᲂу҆твержде́нїе, человѣ́кѡвъ помо́щнице, мі́ра ра́досте, мр҃і́е, и҆ мт҃и, и҆ рабо̀ бг҃а на́шегѡ.
Та́же трипѣ́снецъ. І҆рмо́съ: Ѿ бг҃а сло́ва:
На крⷭ҇тѣ̀ просте́ръ бж҃е́ствєнныѧ дла̑ни, совокꙋпи́лъ є҆сѝ пре́жде расточє́ныѧ, и҆зба́вителю: и҆ ѻ҆ц҃ꙋ̀ ѡ҆сꙋжде́ное хода́тайствомъ ꙗ҆́кѡ да́ръ прине́слъ є҆сѝ сꙋщество̀ человѣ́кѡвъ: сегѡ̀ ра́ди пое́мъ пречⷭ҇тое твоѐ распѧ́тїе.
Ст҃а́гѡ поста̀ возсїѧ́вшаѧ бл҃года́ть, лꙋчы̀ и҆спꙋща́етъ на́мъ пред̾ѡчища́ющыѧ, па́ки тече́нїе помышле́нїй, и҆ зѣ́ницы тьмꙋ̀ ѿгонѧ́ющыѧ, вѣ́рнїи: сегѡ̀ ра́ди ᲂу҆се́рднѡ се́й воспрїи́мемъ.
Свѣтоно́сное поще́нїе, дарова́нїй бж҃е́ственныхъ ча́шꙋ поче́рпшее на́мъ, дне́сь всѣ̑мъ пред̾ѧвлѧ́етъ: хотѧ́щїи сеѧ̀ причасти́тисѧ на по́льзꙋ дꙋшѝ, всѣ́хъ влⷣцѣ, содѣ́йствовати на́мъ помо́лимсѧ.
Гвоздьмѝ бж҃е́ственныхъ твои́хъ рꙋ́къ пригвозди́лъ є҆сѝ ще́дре на́шѧ грѣхѝ на крⷭ҇тѣ̀: копїе́мъ же ре́бръ твои́хъ растерза́лъ є҆сѝ лꙋка́вое писа́нїе согрѣше́нїй, и҆ паде́нїй лю́тыхъ. сегѡ̀ ра́ди пое́мъ пречⷭ҇тое твоѐ распѧ́тїе.
Добродѣ́телей добрѣ́йшаѧ ѿверза́етсѧ стезѧ̀, по́прище бж҃е́ственныхъ поще́нїй, сїѐ всѣ̑мъ бл҃гоꙋкраша́етсѧ: подвиза́тисѧ зако́ннѡ хотѧ́щїи, проси́те хрⷭ҇та̀, ми́рное ѿ высоты̀ вре́мѧ на́мъ дарова́ти.
Бг҃оро́диченъ: Скорѣ́йшею мл҃твою, бо́дрымъ твои́мъ покро́вомъ, держа́вною твое́ю влⷣчце чⷭ҇таѧ по́мощїю, ны́нѣ соблюдѝ вѣ̑рныѧ твоѧ̑ рабы̑ ѿ всѧ́кагѡ сопроти́внагѡ прило́га, и҆ страсте́й и҆ прегрѣше́нїй, и҆ напа́стей сп҃сѝ. <<м҃є ѡ҆б.: 90>>
И҆́ный. І҆рмо́съ: Преесте́ственнѡ пло́тїю:
На дре́вѣ крⷭ҇тнѣмъ во́лею пригво́ждьсѧ, всѣ́хъ на́съ свободи́лъ є҆сѝ клѧ́твы зако́нныѧ: тѣ́мъ тѧ̀ по до́лгꙋ велича́емъ хрⷭ҇тѐ.
Всѝ покланѧ́емсѧ стрⷭ҇те́мъ твои̑мъ сп҃се, ꙗ҆̀же во́лею воспрїѧ́лъ є҆сѝ, да свободи́ши ро́дъ человѣ́ческїй рабо́ты вра́жїѧ.
Трⷪ҇ченъ: Присносꙋ́щнѡ ѻ҆ц҃ъ и҆ нетлѣ́ннѡ сн҃а родѝ, и҆ дх҃ъ є҆́сть є҆диносꙋ́щенъ ѻ҆ц҃ꙋ́ же и҆ сн҃ови, нераздѣ́льнаѧ трⷪ҇ца.
Бг҃оро́диченъ: Да́ти прощє́нїѧ прегрѣше́нїй мр҃і́е пребл҃гослове́ннаѧ, ѿ тебѐ вопло́щшагосѧ молѝ сп҃са, на́мъ грѣ̑шнымъ.
Сла́ва тебѣ̀ бж҃е на́шъ, сла́ва тебѣ̀.
Лобыза́ющыѧ тѧ̀, си́лою твое́ю крⷭ҇те, по́стное вре́мѧ прейтѝ въ ми́рѣ сподо́би, и҆ и҆зба́ви рабо́ты вра́жїѧ.
І҆рмо́съ: Преесте́ственнѡ пло́тїю заче́ншꙋю во чре́вѣ, ѿ ѻ҆ц҃а̀ безлѣ́тнѡ предвозсїѧ́вшее сло́во, въ пѣ́снехъ немо́лчныхъ велича́емъ вѣ́рнїи.
Свѣти́ленъ во ѻ҆ктѡ́ихѣ гла́са, три́жды: трⷪ҇ченъ.
На стїхо́внѣ самогла́сенъ днѐ, гла́съ а҃:
Ѿ бра́шенъ постѧ́щисѧ дꙋшѐ моѧ̀, и҆ страсте́й не ѡ҆чи́стившисѧ, всꙋ́е ра́дꙋешисѧ неѧде́нїемъ: а҆́ще бо не вина́ ти бꙋ́детъ ко и҆справле́нїю, ꙗ҆́кѡ ло́жнаѧ возненави́дѣна бꙋ́деши ѿ бг҃а, и҆ ѕлы̑мъ де́монѡмъ ᲂу҆подо́бишисѧ, николи́же ꙗ҆дꙋ́щымъ. да не ᲂу҆́бѡ согрѣша́ющи, по́стъ непотре́бенъ сотвори́ши: но непоколеби́ма къ стремле́нїємъ безмѣ̑стнымъ пребыва́й, мнѧ́щи предстоѧ́ти распѧ́томꙋ сп҃сꙋ, па́че же сраспѧ́тисѧ тебѐ ра́ди распе́ншемꙋсѧ, вопїю́щи къ немꙋ̀: помѧни́ мѧ гдⷭ҇и, є҆гда̀ прїи́деши во црⷭ҇твїи твое́мъ.
Глаго́лемъ се́й два́жды.
Та́же мч҃нченъ: Ва́съ прехва́льнїи мꙋ́чєницы, ни ско́рбь, ни тѣснота̀, ни гла́дъ, ни гоне́нїе, ни бѣда̀, ни ꙗ҆́рость <<м҃ѕ: 91>> ѕвѣре́й, ни ме́чь, нижѐ ѻ҆́гнь претѧ́й разлꙋчи́ти ѿ бг҃а возмого́ша: любо́вїю же па́че къ немꙋ̀, ꙗ҆́кѡ въ чꙋжди́хъ подви́гшесѧ тѣлесѣ́хъ, є҆стество̀ забы́сте, сме́рть презрѣ́вше: тѣ́мже и҆ по достоѧ́нїю болѣ́зней ва́шихъ мздꙋ̀ прїѧ́сте, нбⷭ҇нагѡ црⷭ҇твїѧ наслѣ̑дницы бы́сте. моли́тесѧ ѡ҆ дꙋша́хъ на́шихъ.
Сла́ва, и҆ ны́нѣ, крⷭ҇тобг҃оро́диченъ. Подо́бенъ: Нбⷭ҇ныхъ чинѡ́въ:
Вознесе́на ꙗ҆́кѡ ви́дѣ на крⷭ҇тѣ̀ а҆́гнца, непоро́чнаѧ дв҃а, пла́чꙋщи вопїѧ́ше: сладча́йшее моѐ ча́до, что̀ но́вое, и҆ пресла́вное видѣ́нїе; ка́кѡ держа́й всѧ̑ дла́нїю, на дре́вѣ пригвозди́лсѧ є҆сѝ пло́тїю;
Та́же, Бл҃го є҆́сть: Трист҃о́е. И҆ Ѻ҆́ч҃е на́шъ: И҆ тропа́рь: Въ хра́мѣ стоѧ́ще сла́вы твоеѧ̀: Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче. І҆ере́й: Сы́й бл҃гослове́нъ хрⷭ҇то́съ бг҃ъ на́шъ, всегда̀ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь. Та́же, Нбⷭ҇ный цр҃ю̀: И҆ твори́мъ г҃ покло́ны вели̑кїѧ съ мл҃твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: И҆ про́чихъ покло́нѡвъ в҃і: и҆злегка̀ ᲂу҆томле́нїѧ ра́ди, глаго́люще себѣ̀ вта́й на кі́йждо покло́нъ: Бж҃е ѡ҆чи́сти мѧ̀ грѣ́шнаго. И҆ па́ки сконча́вше покло́ны, глаго́лемъ мл҃твꙋ всю̀ вышепи́саннꙋю: Гдⷭ҇и и҆ влⷣко живота̀ моегѡ̀: И҆ покло́нъ є҆ди́нъ вели́кїй. Присовокꙋплѧ́емъ же и҆ а҃-й ча́съ. Начина́етъ и҆гꙋ́менъ, и҆лѝ є҆кклисїа́рхъ и҆лѝ предстоѧ́щїй мона́хъ: Прїиди́те поклони́мсѧ, три́жды. Покло́ны г҃, и҆ ча́съ а҃- й, Во́ньже чте́мъ и҆ ѡ҆глашє́нїѧ стꙋді́тѡва. На а҃- мъ часѣ̀, тропа́рь: Заꙋ́тра ᲂу҆слы́ши гла́съ мо́й: Ско́рѡ, без̾ пѣ́нїѧ. Стѡпы̀ моѧ̑ напра́ви: и҆ Да и҆спо́лнѧтсѧ ᲂу҆ста̀: По Трист҃о́мъ тропа́рь: Ско́рѡ предварѝ: Гдⷭ҇и поми́лꙋй, м҃. И҆ мл҃твꙋ: И҆́же на всѧ́кое вре́мѧ: Гдⷭ҇и поми́лꙋй: три́жды. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ: И҆ ѻ҆бы̑чныѧ покло́ны. Трист҃о́е. Гдⷭ҇и поми́лꙋй, в҃і. Хрⷭ҇тѐ <<м҃ѕ ѡ҆б.: 92>> свѣ́те: И҆ ѿпꙋ́стъ. И҆ и҆схожде́нїе въ притво́ръ: И҆ лїті́а за ᲂу҆поко́й.
Въ тꙋ́южде сре́дꙋ сы́рнꙋю. Пое́мъ часы̀, г҃-й, и҆ ѕ҃- й, съ покло́ны, и҆ тропарѝ по́стными: на часѣ́хъ въ кампа́нъ не ᲂу҆дарѧ́ютъ.
На ѕ҃-мъ часѣ̀.
Тропа́рь прⷪ҇ро́чества, гла́съ г҃:
Цр҃ю̀ ст҃ы́й всеси́льне, є҆гѡ́же боѧ́тсѧ и҆ трепе́щꙋтъ всѧ́чєскаѧ, сп҃сѝ на́съ: мо́жеши бо прости́ти грѣхѝ, ꙗ҆́кѡ бл҃гоꙋтро́бенъ. Сла́ва, и҆ ны́нѣ, то́йже.
Прокі́менъ, гла́съ ѕ҃: Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ. Сті́хъ: Къ тебѣ̀ гдⷭ҇и воззовꙋ̀:
Прⷪ҇ро́чества і҆ѡ́илева чте́нїе. [Глава̀ в҃, ст. в҃і- к҃ѕ].
Та́кѡ глаго́летъ гдⷭ҇ь: ѡ҆брати́тесѧ ко мнѣ̀ всѣ́мъ се́рдцемъ ва́шимъ въ постѣ̀ и҆ въ пла́чи, и҆ въ рыда́нїи, И҆ расто́ргните сердца̀ ва̑ша, а҆ не ри̑зы ва́шѧ, и҆ ѡ҆брати́тесѧ ко гдⷭ҇ꙋ бг҃ꙋ ва́шемꙋ, ꙗ҆́кѡ млⷭ҇тивъ и҆ ще́дръ є҆́сть, долготерпѣли́въ и҆ многомлⷭ҇тивъ, и҆ раскаѧва́ѧйсѧ ѡ҆ ѕло́бахъ. Кто̀ вѣ́сть, ѡ҆брати́тсѧ ли, и҆ раска́етсѧ, и҆ ѡ҆ста́витъ за собо́ю бл҃гослове́нїе, и҆ же́ртвꙋ, и҆ возлїѧ́нїе гдⷭ҇ꙋ бг҃ꙋ ва́шемꙋ; Вострꙋби́те трꙋбо́ю въ сїѡ́нѣ, ѡ҆ст҃и́те по́стъ, проповѣ́дите цѣльбꙋ̀. Собери́те лю́ди, ѡ҆ст҃и́те цр҃ковь, и҆збери́те старѣ̑йшины, совокꙋпи́те младе́нцы ссꙋ́щыѧ сосцы̀: да и҆зы́детъ жени́хъ ѿ ло́жа своегѡ̀ и҆ невѣ́ста ѿ черто́га своегѡ̀. Междꙋ̀ степе́ньми же́ртвенника воспла́чꙋтсѧ жерцы̀ слꙋжа́щїи гдⷭ҇ꙋ, и҆ рекꙋ́тъ: пощадѝ гдⷭ҇и лю́ди твоѧ̑, и҆ не да́ждь достоѧ́нїѧ твоегѡ̀ <<м҃з: 93>> на ᲂу҆кори́знꙋ, да не ѡ҆блада́ютъ и҆́ми ꙗ҆зы́цы, да не рекꙋ́тъ во ꙗ҆зы́цѣхъ: гдѣ̀ є҆́сть бг҃ъ и҆́хъ; И҆ возревнова̀ гдⷭ҇ь ѡ҆ землѝ свое́й, и҆ пощадѣ̀ лю́ди своѧ̑. И҆ ѿвѣща̀ гдⷭ҇ь лю́демъ свои̑мъ, и҆ речѐ: сѐ а҆́зъ ва́мъ послю̀ пшени́цꙋ, и҆ вїно̀, и҆ ма́сло древѧ́ное, и҆ насы́титесѧ и҆́хъ, и҆ не да́мъ ва́съ ксемꙋ̀ на порꙋга́нїе во ꙗ҆зы́цѣхъ. И҆ сꙋ́щаго ѿ сѣ́вера ѿженꙋ̀ ѿ ва́съ, и҆ ѿри́нꙋ є҆го̀ на зе́млю безво́днꙋю, и҆ погꙋблю̀ лицѐ є҆гѡ̀ въ мо́ри пе́рвѣмъ, и҆ за̑днѧѧ є҆гѡ̀ въ мо́ри послѣ́днемъ: и҆ взы́детъ гни́лость є҆гѡ̀, и҆ взы́детъ смра́дъ є҆гѡ̀, ꙗ҆́кѡ возвели́чи дѣла̀ своѧ̑. Дерза́й землѐ, ра́дꙋйсѧ и҆ весели́сѧ, ꙗ҆́кѡ возвели́чи гдⷭ҇ь, є҆́же сотвори́ти. Дерза́йте ско́ти по́льстїи, ꙗ҆́кѡ прозѧ́бнꙋша полѧ̀ пꙋсты́ни, ꙗ҆́кѡ дре́во принесѐ пло́дъ сво́й, вїногра́дъ и҆ смѡ́кви да́ша си́лꙋ свою̀: И҆ ча̑да сїѡ́нѧ ра́дꙋйтесѧ, и҆ весели́тесѧ ѡ҆ гдⷭ҇ѣ бз҃ѣ ва́шемъ, ꙗ҆́кѡ дадѐ ва́мъ пи́щꙋ въ пра́вдꙋ, и҆ ѡ҆дожди́тъ ва́мъ до́ждь ра́ннїй и҆ по́здный, ꙗ҆́коже и҆ пре́жде. И҆ напо́лнѧтсѧ гꙋ́мна ва̑ша пшени́цы, и҆ преизлїю́тсѧ точи̑ла вїно́мъ и҆ є҆ле́емъ. И҆ возда́мъ ва́мъ вмѣ́стѡ лѣ́тъ, въ нѧ́же поѧдо́ша прꙋ́зи и҆ мши́ца, и҆ сѵ́плеве, и҆ гꙋ́сєницы, си́ла моѧ̀ вели́каѧ, ю҆́же посла́хъ на вы̀. И҆ снѣ́сте ꙗ҆дꙋ́ще и҆ насы́титесѧ, и҆ похвали́те и҆́мѧ гдⷭ҇а бг҃а ва́шегѡ, ꙗ҆̀же сотворѝ съ ва́ми чꙋдеса̀: и҆ не посра́мѧтсѧ лю́дїе моѝ во вѣ́къ.
Прокі́менъ гла́съ з҃: Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ. Сті́хъ: Принеси́те гдⷭ҇ви сн҃ове бж҃їи.
Та́же, Ско́рѡ да предварѧ́тъ: Трист҃о́е. И҆ прѡ́чаѧ по ѻ҆бы́чаю поста̀. И҆ мл҃тва: Бж҃е и҆ гдⷭ҇и си́лъ: Вкꙋ́пѣ же пое́мъ и҆ ѳ҃-й ча́съ, и҆ мл҃твꙋ: Влⷣко гдⷭ҇и і҆и҃се хрⷭ҇тѐ бж҃е на́шъ: Посе́мъ и҆з̾ѡбрази́тєльнаѧ, и҆ бл҃жє́нны: Во црⷭ҇твїи твое́мъ: Ско́рѡ, без̾ пѣ́нїѧ. Сла́ва, и҆ ны́нѣ: Помѧнѝ на́съ гдⷭ҇и: и҆ покло́ны трѝ. Ли́къ нбⷭ҇ный: <<м҃з ѡ҆б.: 94>> И҆ прѡ́чаѧ. И҆ по Ѻ҆́ч҃е на́шъ: Кондакѝ хра́ма, и҆ ст҃о́мꙋ. Сла́ва, конда́къ: Со ст҃ы́ми ᲂу҆поко́й: И҆ ны́нѣ, конда́къ: Предста́тельство хрⷭ҇тїа́нъ: Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: Покло́ны трѝ вели̑кїѧ, и҆ про́чихъ в҃і.
Посе́мъ дрꙋгі́й ли́къ начина́етъ вече́рню: Прїиди́те поклони́мсѧ: три́жды, и҆ ѱало́мъ: Бл҃гословѝ дꙋшѐ моѧ̀ гдⷭ҇а: И҆ прѡ́чаѧ.
Въ сре́дꙋ ве́чера,
На Гдⷭ҇и воззва́хъ, стїхи̑ры, ꙗ҆́кѡ ѻ҆бы́чно.
Сла́ва, и҆ ны́нѣ, бг҃оро́диченъ.
Прокі́менъ, гла́съ є҃: Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми. Сті́хъ: Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ.
Прⷪ҇ро́чества і҆ѡ́илева чте́нїе. [Глава̀ г҃, ст. в҃і- к҃а].
Та́кѡ глаго́летъ гдⷭ҇ь: да воста́нꙋтъ и҆ взы́дꙋтъ всѝ ꙗ҆зы́цы на ю҆до́ль і҆ѡсафа́товꙋ, ꙗ҆́кѡ та́мѡ сѧ́дꙋ разсꙋди́ти всѧ̑ ꙗ҆зы́ки ꙗ҆́же ѻ҆́крестъ. И҆спꙋсти́те серпы̀, ꙗ҆́кѡ предстои́тъ ѡ҆б̾има́нїе вїногра́да: вни́дите, топчи́те, ꙗ҆́кѡ и҆спо́лнь точи́ло, и҆злива́ютсѧ подточи̑лїѧ, ꙗ҆́кѡ ᲂу҆мно́жишасѧ ѕлѡ́бы и҆́хъ. Гла́си прогласи́шасѧ на по́ли сꙋде́бнѣмъ, ꙗ҆́кѡ бли́зъ де́нь гдⷭ҇нь на ю҆до́ли сꙋде́бнѣй. Со́лнце и҆ лꙋна̀ поме́ркнꙋтъ, и҆ ѕвѣ́зды скры́ютъ свѣ́тъ сво́й. Гдⷭ҇ь же ѿ сїѡ́на воззове́тъ, и҆ ѿ і҆ерⷭ҇ли́ма да́стъ гла́съ сво́й, и҆ потрѧсе́тсѧ нб҃о и҆ землѧ̀: гдⷭ҇ь же пощади́тъ лю́ди своѧ̑, и҆ ᲂу҆крѣпи́тъ [гдⷭ҇ь] сы́ны і҆и҃лєвы. И҆ ᲂу҆вѣ́сте, ꙗ҆́кѡ а҆́зъ гдⷭ҇ь бг҃ъ ва́шъ, вселѧ́ѧсѧ въ сїѡ́нѣ въ горѣ̀ мое́й ст҃ѣ́й: и҆ бꙋ́детъ і҆ерⷭ҇ли́мъ ст҃ъ, и҆ и҆ноплемє́нницы <<м҃и: 95>> не про́йдꙋтъ сквозѣ̀ є҆гѡ̀ ктомꙋ̀. И҆ бꙋ́детъ въ то́й де́нь и҆ска́плютъ го́ры сла́дость, и҆ хо́лми и҆сточа́тъ млеко̀, и҆ всѝ и҆сто́чницы і҆ꙋ̑дины и҆сточа́тъ во́ды, и҆ и҆сто́чникъ ѿ до́мꙋ гдⷭ҇нѧ и҆зы́детъ, и҆ напои́тъ водоте́чь ꙾си́тїѧ꙾[[Є҆вр. ситти́мъ]] Є҆гѵ́петъ въ поги́бель бꙋ́детъ, и҆ і҆дꙋме́а въ по́ле поги́бели бꙋ́детъ за ѡ҆ѕлобле́нїе сынѡ́въ і҆ꙋ́диныхъ, поне́же пролїѧ́ша кро́вь пра́веднꙋю на землѝ свое́й. І҆ꙋде́а же во вѣ́ки насели́тсѧ, и҆ і҆ерⷭ҇ли́мъ въ ро́ды родѡ́въ. И҆ взыщꙋ̀ кро́ви и҆́хъ и҆ не ѡ҆безвиню̀: и҆ гдⷭ҇ь всели́тсѧ въ сїѡ́нѣ.
Прокі́менъ, гла́съ ѕ҃: Да ᲂу҆пова́етъ і҆и҃ль на гдⷭ҇а, ѿ ны́нѣ и҆ до вѣ́ка. Сті́хъ: Гдⷭ҇и, не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ. И҆ Сподо́би гдⷭ҇и въ ве́черъ се́й:
На стїхо́внѣ самогла́сенъ днѐ, гла́съ г҃:
Возсїѧ̀ весна̀ по́стнаѧ, цвѣ́тъ покаѧ́нїѧ, ѡ҆чи́стимъ ᲂу҆̀бо себѐ бра́тїе, ѿ всѧ́кїѧ скве́рны, свѣтода́вцꙋ пою́ще рце́мъ: сла́ва тебѣ̀, є҆ди́не чл҃вѣколю́бче.
Сті́хъ же глаго́лемъ: Къ тебѣ̀ возведо́хъ: И҆ повторѧ́емъ самогла́сенъ. Та́же сті́хъ: Поми́лꙋй на́съ гдⷭ҇и: и҆ мч҃нченъ:
Мч҃ницы твоѝ гдⷭ҇и, вѣ́рою ᲂу҆тве́рждшесѧ, ᲂу҆пова́нїемъ и҆звѣсти́вшесѧ, любо́вїю крⷭ҇та̀ твоегѡ̀ дꙋше́внѡ соедини́вшесѧ, вра́жїе мꙋчи́тельство разрꙋши́ша, и҆ ᲂу҆лꙋчи́вше вѣнцы̀, со безпло́тными мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ: Первост҃а́ѧ, чⷭ҇таѧ, похвала̀ сꙋ́щи нбⷭ҇ныхъ чинѡ́въ, а҆пⷭ҇лѡвъ пѣ́нїе, прⷪ҇ро́кѡвъ сбытїѐ, влⷣчце, прїимѝ мл҃твы на́шѧ.
Ны́нѣ ѿпꙋща́еши: По Трист҃о́мъ, тропа́рь ст҃о́мꙋ: Сла́ва, и҆ ны́нѣ, бг҃оро́диченъ є҆гѡ̀. А҆́ще нѣ́сть, тогда̀ тропа́рь днѐ. Сла́ва, и҆ ны́нѣ, бг҃оро́диченъ, по гла́сꙋ тропарѧ̀. Є҆ктенїа̀: Поми́лꙋй на́съ бж҃е: Покло́ны г҃ вели̑кїѧ. Бꙋ́ди и҆́мѧ гдⷭ҇не: Бл҃гословлю̀ гдⷭ҇а: Досто́йно є҆́сть: И҆ ѿпꙋ́стъ. И҆ и҆схожде́нїе въ притво́ръ. <<м҃и ѡ҆б.: 96>> И҆ быва́етъ ѻ҆бы́чнаѧ лїті́а ѡ҆ ᲂу҆со́пшихъ. [зрѝ] Разꙋ́мно же да бꙋ́детъ, ꙗ҆́кѡ въ палесті́нѣ, є҆́же є҆́сть во і҆ерⷭ҇ли́мской странѣ̀, не прїѧ́хомъ ѿ ст҃ы́хъ ѻ҆тє́цъ сотворѧ́ти соверше́нныѧ лїтꙋргі́и въ сре́дꙋ и҆ въ пѧто́къ сы́рныѧ недѣ́ли, нижѐ преждесщ҃е́нныѧ: въ та̑ бо два̀ дни̑ пое́мъ а҆ллилꙋ́їа съ покло́ны ве́черъ, и҆ ᲂу҆́трѡ, ꙗ҆́коже вы́ше рече́сѧ.
По вече́рни же, въ си́хъ двꙋ̀ дне́хъ, ꙗ҆ди́мъ сы́ръ и҆ ꙗ҆́ица, соблюда́юще и҆ пра́вило во ст҃ы́хъ ѻ҆тца̀ на́шегѡ нїки́фора, патрїа́рха кѡнстантїнопо́льскагѡ, и҆сповѣ́дника, глаго́люща: подоба́етъ пости́тисѧ мона́хѡмъ въ сре́дꙋ, и҆ пѧто́къ сыроѧ́стный. Ѿвраща́етъ же сїѐ пра́вило преда́нїе і҆акѡви́тское и҆ тетраді́тскꙋю є҆́ресь. [зрѝ] Въ сре́дꙋ сы́рнꙋю ве́черъ. Повече́рїе пое́мъ ма́лое. И҆ пое́мъ канѡ́нъ, и҆́же въ мине́и на рѧдꙋ̀, въ сꙋббѡ́тꙋ хотѧ́щагѡ прилꙋчи́тисѧ ст҃а́гѡ.
Въ четверто́къ на ᲂу҆́трени,
По а҃-мъ стїхосло́вїи сѣда́льны ѻ҆смогла́сника, а҆пⷭ҇льскїѧ.
По в҃-мъ стїхосло́вїи сѣда́ленъ трїѡ́ди, гла́съ є҃
Подо́бенъ: Собезнача́льное сло́во:
Четыредесѧ́тницꙋ, и҆ пред̾ѡчисти́тельницꙋ, а҆пⷭ҇ли всѝ дне́сь вѣнча́ютъ, и҆ по́стное вре́мѧ ѡ҆свѧща́ютъ ᲂу҆ хрⷭ҇та̀ и҆зба́вителѧ, и҆ воскрⷭ҇нїе є҆гѡ̀ предвозвѣща́ютъ всѣ̑мъ, и҆ мо́лѧтсѧ гдⷭ҇ви, поми́ловатисѧ дꙋша́мъ на́шымъ.
Сла́ва, то́йже. И҆ ны́нѣ, бг҃оро́диченъ, подо́бенъ:
Въ тебѣ̀ надє́жды дв҃о чⷭ҇таѧ, несꙋмнѣ́ннѡ и҆мꙋ́щымъ, покро́въ сꙋ́щи ѿ разли́чныхъ и҆скꙋше́нїй, и҆ ѡ҆бстоѧ́нїй, и҆ бѣ́дъ лю́тыхъ свободѝ ѧ҆̀, молѧ́щи сн҃а твоего̀ со а҆пⷭ҇лы є҆гѡ̀, и҆ сп҃сѝ всѧ̑ воспѣва́ющыѧ тѧ̀. <<м҃ѳ: 97>>
Та́же чте́мъ сло́во ст҃а́гѡ а҆наста́сїа, и҆гꙋ́мена сїна́йскїѧ горы̀, и҆ ѱало́мъ н҃. Канѡ́ны же пое́мъ ѻ҆смогла́сника, и҆ мине́и. А҆ въ ни́хже пѣ́снехъ пое́мъ трипѣ́снцы, ѡ҆ставлѧ́емъ такѡвы́ѧ пѣ̑сни ѻ҆смогла́сника. трипѣ́снецъ. Творе́нїе господи́на і҆ѡ́сифа, гла́съ д҃.
Пѣ́снь д҃:
І҆рмо́съ: Оу҆слы́ша прⷪ҇ро́къ:
Просїѧ́ша въ мі́рѣ зарю̀ бг҃оразꙋ́мїѧ ᲂу҆ч҃нцы̀ твоѝ гдⷭ҇и, и҆ пре́лесть помрачи́ша прельще́нїѧ, разо́рше ѡ҆мраче́нїе. тѣ́хъ мл҃твами ще́дре, сп҃сѝ пою́щыѧ тѧ̀.
Преддвє́рїѧ поста̀, подвигѡ́въ бл҃гопло́дїи вѣнча̑ннаѧ прїе́млютъ притека́ющихъ тре́звеннѡ пѣ́сньми и҆ пѣ́нїи та́инственными, тща́тельнѡ вѣ́рнїи всѝ стеце́мсѧ.
Оу҆мерщвле́нїѧ ри̑зы прїе́мъ, въ де́рзость невоздержа́нїѧ ѡ҆блеко́хсѧ ѻ҆каѧ́нный: но ты́ мѧ ѡ҆блецы̀ сн҃е бж҃їй, ѻ҆де́ждею свѣ́тлою ѿрожде́нїѧ.
Житїѐ моѐ лꙋка́вствомъ, и҆ всѧ́кою нечистото́ю сконча́сѧ: но къ тебѣ̀ всеще́дромꙋ прибѣга́ю, предвари́въ ᲂу҆̀бо сп҃си́ мѧ хрⷭ҇тѐ бж҃е, твое́ю бл҃гостїю.
Бг҃оро́диченъ: Зачала̀ є҆сѝ па́че сло́ва, и҆ родила̀ є҆сѝ па́че є҆стества̀ бг҃ороди́тельнице, влады́чествꙋющаго тва́рїю. є҆го́же непреста́ннѡ молѝ, и҆зба́витисѧ на́мъ ѿ всѧ́кагѡ гнѣ́ва, тебѐ ᲂу҆бл҃жа́ющымъ.
И҆́ный. Гла́съ в҃: Прише́лъ є҆сѝ ѿ дв҃ы:
Расточи́вше невоздержа́нїѧ мглꙋ̀ а҆пⷭ҇ли, ᲂу҆че́нїй ва́шихъ сїѧ́ньми, просвѣти́сте воздержа́нїемъ всѧ̑ грѣ̑шныѧ и҆ пра́вєдныѧ, ꙗ҆́кѡ всехва́льнїи.
Ꙗ҆́коже ꙗ҆́снїи би́серїе сло́ва а҆пⷭ҇ли, всѧ̑ ᲂу҆краси́сте воздержа́нїемъ концы̀, и҆ ᲂу҆доботвори́вше дꙋ́шъ на́шихъ вои́стиннꙋ ны́нѣ бл҃горо́дїе. <<м҃ѳ ѡ҆б.: 98>>
Пе́щь страсте́й росо́ю поста̀ а҆пⷭ҇ли ᲂу҆вѧди́вше, всѧ̑ человѣ́ки наꙋчи́сте, гра́дъ се́й некра́домый и҆ жили́ще и҆мѣ́ти ѡ҆сщ҃е́нїѧ.
Сла́ва: Согрѣши́хъ па́че всѣ́хъ человѣ́кѡвъ ѻ҆каѧ́нный, и҆ не пока́ѧхсѧ, ꙗ҆́кѡ манассі́а согрѣши́хъ: нра́вы покаѧ́нїѧ мѝ сотворѝ гдⷭ҇и, пре́жде да́же не разрѣши́тъ мѧ̀ сме́рть.
Бг҃оро́диченъ: Тебѐ приста́нище сп҃се́нїѧ, и҆ стѣ́нꙋ нерꙋши́мꙋю бцⷣе влⷣчце, всѝ вѣ́рнїи вѣ́мы: ты́ бо мл҃твами твои́ми ѿ бѣ́дъ свобожда́еши дꙋ́шы на́шѧ.
Та́же, і҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
Пѣ́снь и҃: Всѧ́чєскаѧ влⷣко:
Землѧ̀ всѧ̀ гдⷭ҇и, твоегѡ̀ хвале́нїѧ и҆спо́лнисѧ: всю́ бо ѡ҆бтечѐ бж҃е́ственныхъ ᲂу҆ч҃нкъ твои́хъ вѣща́нїе бж҃е́ственное, и҆з̾ глꙋбины̀ невѣ́дѣнїѧ ѡ҆браща́ющее къ ра́зꙋмꙋ, пою́щꙋю: бл҃гослови́те дѣла̀ гдⷭ҇нѧ гдⷭ҇а.
Бл҃года́ть бж҃е́ственнаѧ покаѧ́нїѧ ꙗ҆ви́сѧ, сп҃се́нїе носѧ́щи, сеѧ̀ наслажда́ющымсѧ, побѣ́дъ и҆ по́двигѡвъ, по́тѡвъ и҆ болѣ́зней: тѣ́мже тецы̀ дꙋшѐ моѧ̀ ко влⷣцѣ твоемꙋ̀, мно́гихъ твои́хъ прегрѣше́нїй и҆́щꙋщи прїѧ́ти проще́нїе.
По́прище ѿве́рзесѧ бг҃ода́ннагѡ воздержа́нїѧ, свѣ́тлѡ ᲂу҆срѧ́щемъ тре́бꙋющїи млⷭ҇ти: жа́ждетъ бо бл҃гоꙋтро́бный на́шегѡ сп҃се́нїѧ, и҆ є҆́же да́ти проще́нїе простира́етсѧ, и҆́щꙋщымъ є҆гѡ̀ ᲂу҆се́рднѡ, и҆ любо́вїю рабо́тающымъ.
Посто́мъ заꙋсти́сѧ, ми́рствꙋющею мы́слїю, напита́й же дꙋшѐ гдⷭ҇а, бл҃годѣѧ́нїемъ добродѣ́тели, бра̑шна, ꙗ҆́кѡ <<н҃: 99>> бл҃говѡ́нныѧ жє́ртвы, приносѧ́щи семꙋ̀, и҆ взыва́ющи: дѣла̀ бл҃гослови́те непреста́ннѡ гдⷭ҇а.
Бг҃оро́диченъ: Всѣ́ми влады́чествꙋющаѧ, мольбы̑ прїе́млющи влⷣчце рабѡ́въ твои́хъ, ст҃а́ѧ бцⷣе, тьмы́ мѧ и҆зба́ви и҆ ѻ҆гнѧ̀ негаси́магѡ, ѕѡ́лъ мои́хъ мно́жєства ѡ҆чища́ющи твои́мъ хода́тайствомъ, и҆ є҆ди́ною бж҃е́ственною твое́ю мл҃твою.
И҆́ный.
І҆рмо́съ: Оу҆страши́сѧ ѻ҆трокѡ́въ:
Ва́съ ꙗ҆́коже свѣ́тъ, хрⷭ҇то́съ, въ концы̀ всеѧ̀ вселе́нныѧ а҆пⷭ҇лы да́вый, ше́дше, речѐ, наꙋчи́те во ꙗ҆зы́цѣхъ: да въ пло́ти мѧ̀ сꙋ́ща ᲂу҆ви́дите воздержа́нїемъ живꙋ́ща, и҆ вра́жїю всю̀ си́лꙋ попира́юща, и҆ пꙋ́ть человѣ́кѡмъ ꙗ҆влѧ́юща пра́вый.
Ꙗ҆ви́лъ є҆сѝ грѧдꙋ́щее хрⷭ҇тѐ воздержа́нїе, во ѡ҆чище́нїе человѣ́кѡмъ, страсте́й же ѿлꙋче́нїе: си́мъ бо твоѝ а҆пⷭ҇ли бл҃гоꙋгоди́ша, и҆ свѣ́тлїи свѣти́льницы на землѝ ꙗ҆ви́шасѧ, проповѣ́дающе гдⷭ҇а въ тре́хъ ли́цѣхъ, во є҆ди́номъ же сꙋществѣ̀, всѣ̑мъ воспѣва́ющымъ є҆го̀.
Ꙗ҆зы́кѡмъ проповѣ̑дницы вы̀ по́слани бы́сте ѿ ᲂу҆ч҃тлѧ хрⷭ҇та̀, ѽ ᲂу҆ч҃нцы̀, ᲂу҆че́ньми бж҃е́ственными просвѣща́ти и҆́хъ помышлє́нїѧ, страсте́й же и҆ бра́шенъ ᲂу҆держава́тисѧ, жела́ти же воздержа́нїѧ, и҆ гдⷭ҇а зна́ти сего̀, и҆ созда́телѧ, и҆ творца̀ всѣ́хъ и҆ бл҃годѣ́телѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Ꙗ҆́коже и҆ногда̀ ка́їнъ ᲂу҆бі́йца, не принесо́хъ дꙋшѝ моеѧ̀ же́ртвꙋ непоро́чнꙋю хрⷭ҇тѐ, нечи́стымъ ра́зꙋмомъ содержи́мь. не возгнꙋша́йсѧ менѐ приходѧ́ща къ тебѣ̀ посто́мъ сп҃се пребл҃гі́й, но при́зри на да́ры, ꙗ҆̀же любо́вїю несꙋ̀ тебѣ̀ бж҃е мо́й, во вре́мѧ поще́нїѧ. <<н҃ ѡ҆б.: 100>>
Бг҃оро́диченъ: Бл҃же́нное бы́сть чре́во бг҃ома́тере, ꙗ҆́кѡ прїи́мшее сло́во, дебельство́мъ пло́ти ѿ неѧ̀ смѣси́вшеесѧ человѣ́ческомꙋ зра́кꙋ, по ѵ҆поста́си: и҆ ꙗ҆ви́сѧ гра́дъ бж҃їй, въ не́мже жи́ти вы́шнїй бл҃говолѝ, и҆ гдⷭ҇ь бг҃ъ. тѣ́мже вопїе́мъ тѝ: ра́дꙋйсѧ бл҃года́тнаѧ, чⷭ҇таѧ бцⷣе.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Оу҆страши́сѧ ѻ҆трокѡ́въ бл҃гочести́выхъ, соѡбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, неꙋтрꙋжде́нъ ѻ҆́гнь: присноживꙋ́щꙋ же, и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ: гдⷭ҇а всѧ̀ дѣла̀ по́йте, и҆ превозноси́те во всѧ̑ вѣ́ки.
И҆ стїхосло́витсѧ Чⷭ҇тнѣ́йшꙋю:
Пѣ́снь ѳ҃:
І҆рмо́съ: Ꙗ҆́кѡ сотворѝ мнѣ̀:
Ꙗ҆́кѡ пла́мень мі́рꙋ по́слани бы́сте неле́стный, и҆збавлѧ́юще глꙋбины̀ грѣхѡ́въ: воспѣва́емъ ра́достїю ᲂу҆крѣпи́вшаго ва́съ, ꙗ҆́кѡ а҆пⷭ҇лы своѧ̑.
Ꙗ҆́кѡ ва́съ мі́рꙋ ѡ҆б̾юродѣ́вшꙋ, дре́вле хрⷭ҇то́съ ꙗ҆́кѡ со́ль посла̀ мꙋ́дрїи, вразꙋмлѧ́ющыѧ є҆го̀ къ позна́нїю своемꙋ̀, восхвалѧ́емъ вѣ́рнѡ.
Ꙗ҆́кѡ мно́жество прегрѣше́нїй ѡ҆бдержи́тъ мѧ̀ лю́тыхъ, со слеза́ми припа́даю тѝ хрⷭ҇тѐ, проще́нїѧ просѧ̀, бл҃говре́менїе мѝ пода́ти во вре́мѧ поста̀.
Ꙗ҆́кѡ вери́гами нерѣши́мыми свѧ́занъ мои́хъ страсте́й, стеню̀ и҆ взыва́ю тѝ сп҃се: свободи́ мѧ, ꙗ҆́кѡ да пою̀ прера́дованнѡ бл҃гоꙋтро́бїе твоѐ.
Бг҃оро́диченъ: Ꙗ҆́кѡ показа́ тѧ бг҃ъ, дв҃о чⷭ҇таѧ, по́мощь ро́дꙋ человѣ́ческомꙋ, не преста́й прилѣ́жнѡ молѧ́щи є҆го̀ ѡ҆ на́съ вѣ́рныхъ.
И҆́ный.
І҆рмо́съ: Невмѣсти́маго бг҃а:
А҆пⷭ҇лѡвъ ли́къ по́стъ показа̀, вселе́ннѣй все́й возсїѧ́ющїй, и҆ свѣ́тлостїю бж҃е́ственною просвѣща́ющїй мі́ръ. <<н҃а: 101>>
Оу҆ч҃нкъ твои́хъ і҆и҃се ли́къ чл҃вѣколю́бче, ꙗ҆зы́чєскїѧ ро́ды наꙋчѝ, воздержа́нїѧ сокро́виществовати бога́тство.
Дванадесѧтострꙋ́нное вѣща́нїе ᲂу҆чєни́къ твои́хъ состоѧ́нїе, воздержа́нїѧ бога́тство да́рствꙋетъ человѣ́кѡмъ, и҆ и҆сто́чникъ сп҃се́нїѧ.
Сла́ва: Блꙋ́днагѡ тѝ гла́сомъ взыва́ю гдⷭ҇и: ѻ҆́ч҃е, согрѣши́хъ, сп҃сѝ ще́дре, да не сла́вы твоеѧ̀ ѿлꙋчи́ши мѧ̀.
Бг҃оро́диченъ: Во чре́вѣ твое́мъ бг҃а ꙗ҆́кѡ чл҃вѣ́ка поноси́вшаѧ, и҆ живо́тъ мі́рꙋ и҆сточи́вшаѧ, тѧ̀ воспѣва́емъ всест҃а́ѧ дв҃о.
І҆рмо́съ: Невмѣсти́маго бг҃а, во чре́вѣ вмѣсти́вшаѧ, и҆ ра́дость мі́рꙋ роди́вшаѧ, тѧ̀ пое́мъ бцⷣе дв҃о.
Свѣти́ленъ гла́са.
На стїхо́внѣ же пое́мъ самогла́сенъ днѐ, гла́съ г҃:
Возсїѧ̀ воздержа́нїѧ бл҃голѣ́пїе, бѣсо́вскꙋю мглꙋ̀ ѿгонѧ́щее: прїи́де по́стнаѧ лѣ́пота, дꙋше́вныхъ страсте́й и҆сцѣле́нїе носѧ́щаѧ. се́ю и҆ногда̀ данїи́лъ, и҆ въ вавѷлѡ́нѣ ѻ҆́троцы ѡ҆гражде́ни, ѻ҆́въ ᲂу҆́бѡ ᲂу҆ста̀ львѡ́въ ѡ҆бꙋзда̀, ѻ҆́вїи же пла́мень пе́щный ᲂу҆гаси́ша. съ ни́миже и҆ на́съ то́южде сп҃сѝ хрⷭ҇тѐ бж҃е, ꙗ҆́кѡ чл҃вѣколю́бецъ.
И҆ повторѧ́емъ се́й, со стїхо́мъ: И҆спо́лнихомсѧ заꙋ́тра:
Та́же, сті́хъ: И҆ бꙋ́ди свѣ́тлость:
И҆ мч҃ниченъ: Ꙗ҆́кѡ свѣти̑ла въ мі́рѣ сїѧ́ете, и҆ по сме́рти ст҃і́и мч҃нцы, по́двигомъ до́брымъ подви́гшесѧ. и҆мꙋ́ще дерзнове́нїе, хрⷭ҇та̀ ᲂу҆моли́те, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Въ жена́хъ ст҃а́ѧ бцⷣе, мт҃и безневѣ́стнаѧ, молѝ є҆го́же родила̀ є҆сѝ цр҃ѧ̀ и҆ бг҃а, да сп҃се́тъ ны̀ ꙗ҆́кѡ чл҃вѣколю́бецъ.
Та́же: Бл҃го є҆́сть: Совокꙋплѧ́емъ же и҆ ча́съ а҃, ꙗ҆́кѡ ѻ҆бы́чно. И҆ ѿпꙋ́стъ. <<н҃а ѡ҆б.: 102>>
Въ то́йже четверто́къ сы́рный, ве́чера:
Ѿ нача́ла покло́ны начина́емъ: и҆ про́чаѧ всѧ̀ слꙋ́жба, ꙗ҆́коже и҆ вы́ше во вто́рникъ сы́рный ᲂу҆каза́сѧ.
На Гдⷭ҇и воззва́хъ, стїхи̑ры ꙗ҆́кѡ ѻ҆бы́чно.
Сла́ва, и҆ ны́нѣ, бг҃оро́диченъ: Свѣ́те ти́хїй: И҆ прокі́менъ днѐ.
На стїхо́внѣ самогла́сенъ днѐ, гла́съ в҃:
Гдⷭ҇нь крⷭ҇тъ, неꙋкло́ннѡ кла́нѧющымсѧ є҆мꙋ̀, всѧ́кїѧ сла́сти брозда̀ є҆́сть, и҆ зако́нъ воздержа́нїѧ: и҆́бо непреста́ннѡ взира́ющїи на пригвожде́ннаго на не́мъ, распина́ютъ пло́ть со страстьмѝ и҆ похотьмѝ. ѿ ни́хже и҆ мы̀ бы́ти потщи́мсѧ, посто́мъ чи́стымъ присво́имсѧ, чл҃вѣколю́бнѡ на́мъ присво́ившемꙋсѧ стрⷭ҇тїю и҆ своегѡ̀ безстра́стїѧ є҆стество̀ пода́вшемꙋ, и҆мꙋ́щемꙋ ве́лїю млⷭ҇ть.
Повторѧ́емъ се́й со стїхо́мъ: Къ тебѣ̀ возведо́хъ ѻ҆́чи моѝ:
Сті́хъ: Поми́лꙋй на́съ гдⷭ҇и:
И҆ мч҃нченъ: Земна́гѡ наслажде́нїѧ не возвелѣ́вше стрⷭ҇тоно́сцы, нбⷭ҇ныхъ бл҃ги́хъ сподо́бишасѧ, и҆ а҆́гг҃лѡмъ сожи́тели бы́ша: гдⷭ҇и, мл҃твами и҆́хъ поми́лꙋй и҆ сп҃сѝ на́съ.
Сла́ва, и҆ ны́нѣ, крⷭ҇тобг҃оро́диченъ. Подо́бенъ: Є҆гда̀ ѿ дре́ва:
Гро́здъ всезрѣ́лый чⷭ҇таѧ, є҆го́же невоздѣ́ланнѡ во ᲂу҆тро́бѣ младоноси́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ ви́сѧща, рыда́ющи восклица́ла є҆сѝ, и҆ взыва́ла є҆сѝ: ча́до, сла́дость и҆ска́пай, є҆́юже пїѧ́нство всѧ́кое страсте́й ѿе́млетсѧ бл҃годѣ́телю, менѐ ра́ди тѧ̀ ро́ждшїѧ, бж҃е́ственными ᲂу҆тѣше́ньми, ꙗ҆́кѡ бл҃гоꙋтро́бенъ.
Ны́нѣ ѿпꙋща́еши: Бцⷣе дв҃о: И҆ про́чее, творѧ́ще покло́ны вели̑кїѧ. Та́же ѿпꙋ́стъ. Повече́рїе пое́мъ вели́кое съ покло́ны, ꙗ҆́коже во вто́рникъ ᲂу҆каза́сѧ. <<н҃в: 103>>
Въ пѧто́къ сыроѧ́стный на ᲂу҆́трени,
по шестоѱа́лмїи пое́мъ А҆ллилꙋ́їа, на гла́съ трⷪ҇чна гла́са.
По а҃-мъ стїхосло́вїи сѣда́льны крⷭ҇тныѧ ѻ҆смогла́сника.
По в҃-мъ стїхосло́вїи сѣда́ленъ трїѡ́ди, гла́съ з҃.
Подо́бенъ: Ꙗ҆́кѡ и҆мꙋ́ще:
Возвы́си цр҃кве́й ро́гъ, чⷭ҇тны́й крⷭ҇те, низложѝ є҆реті́ческꙋю горды́ню си́лою твое́ю, и҆ возвеселѝ правосла́вныхъ ли́ки: сподо́би предвари́ти всѣ̑мъ на́мъ твоѐ предвозвѣще́нїе, и҆ поклони́тисѧ тебѣ̀ подно́жїю хрⷭ҇то́вꙋ въ тебѣ́ бо хва́лимсѧ, дре́во бл҃гослове́нное.
Сла́ва: то́йже.
И҆ ны́нѣ, крⷭ҇тобг҃оро́диченъ: Ꙗ҆́кѡ и҆мꙋ́щи млⷭ҇тивное на смире́нїе на́ше, и҆ зрѧ́щи на зємны́ѧ ᲂу҆добоѡбстои̑мыѧ лю́ди, ᲂу҆млⷭ҇рдисѧ бл҃гослове́ннаѧ бцⷣе, пребꙋ́ди молѧ́щисѧ, да не поги́бнемъ лю́тѣ: молю̀ ꙗ҆́кѡ пречⷭ҇таѧ бл҃гопримири́тельнаго бг҃а, сп҃сти́сѧ дꙋша́мъ на́шымъ, прест҃а́ѧ дв҃о.
Та́же чте́мъ сло́во вели́кагѡ васі́лїа ѡ҆ постѣ̀, є҆гѡ́же нача́ло: Вострꙋби́те въ новомѣ́сѧчїи трꙋбо́ю: Та́же ѱало́мъ н҃. И҆ канѡ́ны ѻ҆смогла́сника, мине́и, и҆ трїѡ́ди. Въ ни́хже пѣ́снехъ пое́мъ трипѣ́снцы: ѡ҆ставлѧ́ютсѧ такѡвы́ѧ пѣ̑сни ѻ҆смогла́сника, и҆ мине́и: поне́же двоїрмо́сны сꙋ́ть трипѣ́снцы.
Канѡ́нъ трїѡ́ди. Творе́нїе господи́на і҆ѡ́сифа. Гла́съ и҃:
Пѣ́снь а҃:
І҆рмо́съ: Во́дꙋ проше́дъ:
Воздержа́нїѧ бж҃е́ственное вре́мѧ возсїѧ̀ всѣ̑мъ, покаѧ́нїѧ просвѣще́нїе, тьмꙋ̀ ѿе́млющее прегрѣше́нїй: сїѐ ᲂу҆се́рднымъ се́рдцемъ прїи́мемъ.
Сѐ покаѧ́нїѧ добро́та дꙋ́шы разширѧ́етъ, поще́нїѧ пригвожде́нїемъ: въ сїѐ тре́звеннѡ вше́дше, и҆ прегрѣше́нїй вѣ́рнїи разрѣше́нїе прїи́мемъ. <<н҃в ѡ҆б.: 104>>
Сла́ва: Нача̑ла, вла̑сти, и҆ херꙋві́ми, и҆ всѧ̑ си̑лы моли́тесѧ, вре́мѧ на́мъ по́стное соверши́ти въ покаѧ́нїи и҆ всѧ́кой чистотѣ̀.
Бг҃оро́диченъ: Ст҃а́ѧ дв҃о, вѣ́рныхъ застꙋпле́нїе є҆ди́на, мл҃твꙋ твою̀ споспѣ́шнꙋю, во вре́мѧ поще́нїѧ всѣ̑мъ пода́ждь, бцⷣꙋ чⷭ҇тꙋю тѧ̀ вѣ́дꙋщымъ.
І҆рмо́съ: Во́дꙋ проше́дъ:
Пѣ́снь г҃:
І҆рмо́съ: Нбⷭ҇нагѡ крꙋ́га:
Всегꙋби́тельныхъ страсте́й дꙋше́вныхъ ᲂу҆бѣжи́мъ под̾ѧ́тїемъ поста̀, и҆ ᲂу҆миле́нїѧ пока́жемъ плоды̀, пе́рвѣе грѣха́ми бг҃а бл҃гоꙋтро́бнаго преѡгорчи́вшїи.
Свѣщы̀ є҆ле́емъ бл҃ги́хъ дѣѧ́нїй, всѝ ны́нѣ вжещѝ тща́тельнѡ воз̾ꙋсе́рдствꙋимъ, ꙗ҆́кѡ да вни́демъ съ мꙋ́дрыми дѣ́вами во свѣ́тлый черто́гъ ра́дꙋющесѧ.
Бг҃оглаго́ливїи прⷪ҇ро́цы, бг҃ови́днїи мч҃нцы, и҆ бж҃е́ственнїи ᲂу҆ч҃нцы̀ сп҃сѡвы, того̀ моли́те, до́брѣ нача́ти и҆ бл҃гоꙋго́днѡ сконча́ти поще́нїѧ по́прище, всѝ помо́лимсѧ.
Бг҃оро́диченъ: Ꙗ҆́кѡ винꙋ́ тѧ всѣ́хъ бл҃ги́хъ влⷣчце, всѝ прилѣ́жнѡ мо́лимъ: є҆́же совни́ти на́мъ твои́мъ хода́тайствомъ въ по́стный по́двигъ, и҆ концꙋ̀ дарова́тисѧ сегѡ̀ сп҃си́тельномꙋ.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Та́же сѣда́ленъ мине́и, и҆ крⷭ҇тобг҃оро́диченъ:
Пѣ́снь д҃:
І҆рмо́съ: Оу҆слы́шахъ гдⷭ҇и смотре́нїѧ:
Ꙗ҆́коже ᲂу҆́тро прини́кши, ны́нѣ поще́нїѧ бл҃года́ть предлага́етъ покаѧ́нїѧ вре́мѧ на́мъ, долгѡ́въ тьмꙋ̀ разрѣша́ющее. <<н҃г: 105>>
Напита́имъ ни́щыѧ, млⷭ҇ть млⷭ҇тїю воспрїе́млюще, и҆ поще́нїѧ бж҃е́ственною водо́ю дꙋшє́вныѧ сквє́рны ѿмы́емъ.
Сла́ва: Нбⷭ҇нїи а҆́гг҃ли бл҃года́вца ᲂу҆моли́те, ᲂу҆миле́нное на́ше покаѧ́нїе, щедро́тами безмѣ́рными прїѧ́ти.
Бг҃оро́диченъ: Чи́стое ѡ҆чисти́лище согрѣша́ющихъ, ст҃а́ѧ влⷣчце, хода́тайствомъ твои́мъ раздерѝ согрѣше́нїй мои́хъ рꙋкописа́нїе.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Настоѧ́щїй де́нь, нача́токъ творѧ́ще житїѧ̀ чистоты̀, себѐ ᲂу҆се́рднѡ къ подвигѡ́мъ вѣ́рнїи ᲂу҆гото́вимъ, плѡтскі́ѧ болѣ̑зни, и҆ дꙋше́вное бл҃гопло́дїе влⷣцѣ всѣ́хъ приносѧ́ще.
Мѡѷсе́а по́стъ, бж҃е́ственнагѡ бг҃овидѣ́нїѧ показа̀ прича́стника: сего̀ ᲂу҆́бѡ дꙋшѐ моѧ̀ подража́ющи, по́стъ прїимѝ, бж҃е́ствєннаѧ восхождє́нїѧ въ себѣ̀ расположи́вши, ꙗ҆́кѡ да ви́диши бж҃їю свѣ́тлость.
Сщ҃е́нныхъ а҆пⷭ҇лъ, и҆ сщ҃енноимени́тыхъ мч҃нкъ мольба́ми, поще́нїѧ вре́мѧ прейтѝ на́съ сподо́би і҆и҃се ще́дрый, въ покаѧ́нїи, и҆ всѧ́комъ ѿложе́нїи грѣха̀, мо́лимсѧ.
Бг҃оро́диченъ: Въ поще́нїѧ две́рь хотѧ́щїи вни́ти, мо́лимъ тѧ̀ бж҃їю две́рь, совни́ти рабѡ́мъ твои̑мъ влⷣчце, и҆ разшири́ти всѧ́кѡ помышлє́нїѧ, и҆ мы̑сли, сп҃си́тєльнаѧ твори́ти хотѣ̑нїѧ. <<н҃г ѡ҆б.: 106>>
Та́же трипѣ́снецъ господи́на і҆ѡ́сифа. Гла́съ ѕ҃:
Пѣ́снь є҃: Бж҃їимъ свѣ́томъ твои́мъ бл҃же:
На крⷭ҇тѣ̀ рꙋ́цѣ пригвозди́въ, копїе́мъ въ ре́бра прободе́нъ, писа́нїе чл҃вѣколю́бче па́дшагѡ а҆да́ма растерза́лъ є҆сѝ: тѣ́мже тѧ̀ жизнода́вче, пѣ́сньми сла́вимъ.
Ле́стнѡ ѕмі́й лꙋка́вый стра̑сти наложи́въ мѝ дꙋшє́вныѧ, ѿ раѧ̀ и҆згна̀: ты́ же дла̑ни на крⷭ҇тѣ̀ пригвозди́въ, къ высотѣ̀ нетлѣ́нїѧ сп҃се привле́клъ є҆сѝ.
Поста̀ бж҃е́ственное вре́мѧ, стра̑сти ѡ҆чища́ющее дꙋшє́вныѧ, и҆ тѣлє́сныѧ ѡ҆мыва́ющее ꙗ҆́звы, прїи́де ны́нѣ, наста̀: вѣ́рнїи стеце́мсѧ, и҆ сїѐ любомꙋ́дреннѡ прїи́мемъ.
Вре́мѧ ꙗ҆ви́сѧ бл҃го́е, въ бж҃е́ственное дꙋшѝ весе́лїе, всѧ́кое лицѐ ѡ҆блача́ющее: прїиди́те, ве́селѡ сїѐ прїи́мемъ, посто́мъ и҆ мл҃твою пред̾ѡчища́ющесѧ.
По́стъ, сле́зы, мл҃твꙋ, ѻ҆бы́чай смире́нный, на́съ ра́ди смири́вшемꙋсѧ принесе́мъ: ꙗ҆́кѡ да въ де́нь воздержа́нїѧ проще́нїе пода́стъ прегрѣше́нїй на́шихъ.
Бг҃оро́диченъ: Свѣтолꙋ́чными твои́ми блиста́ньми, влⷣчце бл҃га́ѧ мі́ра, дꙋшѝ моеѧ̀ тьмꙋ̀ ѿженѝ, и҆ но́щь грѣха̀ моегѡ̀: да ᲂу҆се́рднѡ пою̀, и҆ бл҃жꙋ́ тѧ.
И҆́ный, гла́съ и҃: Вскꙋ́ю мѧ̀ ѿри́нꙋлъ є҆сѝ:
Крⷭ҇тꙋ̀ твоемꙋ̀ покланѧ́юсѧ гдⷭ҇и чл҃вѣколю́бче, и҆́мже мѧ̀ сп҃слъ є҆сѝ, и҆ пою̀ стрⷭ҇ти сп҃си́тєльныѧ и҆ бж҃е́ствєнныѧ влⷣко, и҆́миже страсте́й мои́хъ болѣ́зненныхъ и҆зба́вихсѧ сло́ве, въ жи́знь преходѧ̀ невре́днꙋю.
Крⷭ҇тꙋ̀ надѣ́ющесѧ, ле́сти проти́вныхъ ѿвраща́емсѧ, въ не́мъ водрꙋзи́вшесѧ, вѣ́рнїи позна́ни бы́хомъ бг҃ꙋ, ꙗ҆́кѡ а҆́гнцы новорожде́ннїи и҆збра́ннїи, и҆ неле́стное млеко̀ и҆спи́хомъ. <<н҃д: 107>>
Сла́ва, трⷪ҇ченъ: Ѻ҆ц҃а̀, и҆ сло́во всѝ, и҆ ст҃а́го дх҃а, сла́вимъ во є҆ди́номъ є҆стествѣ̀, позна́нїе свѣ́тлое и҆злага́юще: покланѧ́ющесѧ ѻ҆бои́мъ, и҆ раздѣлѧ́юще ли́цы, неслїѧ́ннѡ, непрело́жнѡ слꙋжа́ще.
Бг҃оро́диченъ: Оу҆пова́нїе концє́мъ, ра́дость рабѡ́мъ твои̑мъ ты̀ є҆сѝ дв҃о чⷭ҇таѧ, чтꙋ́щыѧ любо́вїю ѡ҆́бразъ тво́й, сохранѧ́й пречⷭ҇таѧ: и҆ твои́ми мл҃твами всѣ́хъ на́съ чꙋжда́гѡ свободѝ, ꙗ҆́кѡ премлⷭ҇рднѣйшаѧ.
Сла́ва тебѣ̀ бж҃е на́шъ, сла́ва тебѣ̀.
Пра́вый пꙋ́ть тво́й гдⷭ҇и, и҆спра́ви всѣ̑мъ рабѡ́мъ твои̑мъ чтꙋ́щымъ любо́вїю, поста̀ по́прище ᲂу҆твердѝ, и҆ приведе́ньми на лꙋ́чшее ст҃а́гѡ твоегѡ̀ црⷭ҇твїѧ на́съ сподо́би.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Пѣ́снь ѕ҃:
І҆рмо́съ: Ѡ҆чи́сти мѧ̀ сп҃се:
Пости́всѧ и҆зба́витель, настоѧ́щее вре́мѧ на́мъ ѡ҆предѣлѝ дꙋше́вныхъ скве́рнъ ѡ҆чисти́тельное: те́плымъ вѣ́рнїи пристꙋ́пимъ се́рдцемъ, ꙗ҆́кѡ да прїи́мемъ проще́нїе.
Мытаре́во хрⷭ҇тѐ воздыха́нїе прїе́мъ, и҆ блꙋдни́цы ѿ дꙋшѝ пла́чь приноси́мый, прїимѝ ꙗ҆́кѡ чл҃вѣколю́бецъ на́шѧ мольбы̑, ѡ҆чище́нїе на́мъ да́рꙋѧ.
Сла́ва: Проповѣ̑дникъ и҆ прⷪ҇рѡ́къ, мч҃никъ и҆ а҆пⷭ҇лъ твои́хъ, прпⷣбныхъ и҆ ст҃и́телей, и҆ всѣ́хъ првⷣныхъ твои́хъ хрⷭ҇тѐ ᲂу҆моле́ньми, ѡ҆чище́нїе прегрѣше́нїй дꙋша́мъ на́шымъ низпослѝ.
Бг҃оро́диченъ: Є҆ди́наѧ немощно́е человѣ́ческагѡ є҆стества̀, бж҃е́ственнымъ твои́мъ ржⷭ҇тво́мъ чⷭ҇таѧ ᲂу҆тверди́вшаѧ, поспѣ́шница мнѣ̀ ꙗ҆ви́сѧ, къ по́стномꙋ входѧ́щꙋ бж҃е́ственномꙋ по́прищꙋ. <<н҃д: 107>>
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ, къ тебѣ́ бо возопи́хъ, и҆ ᲂу҆слы́ши мѧ̀ бж҃е сп҃се́нїѧ моегѡ̀.
Конда́къ ст҃а́го. А҆́ще ст҃ы́й не и҆́мать кондака̀, глаго́лемъ мч҃нченъ гла́са.
Пѣ́снь з҃: Ѻ҆́троцы є҆вре́йстїи въ пещѝ:
Дре́вле на колесни́цѣ ѻ҆́гненной ноша́шесѧ и҆лїа̀, посто́мъ просвѣти́всѧ: ѽ дꙋшѐ! сего̀ подража́ющи, плотскі̑ѧ ᲂу҆мертвѝ по́хѡти воздержа́нїемъ.
Сѐ вре́мѧ воздержа́нїѧ, ꙗ҆влѧ́ющее тебѣ̀ свѣ́тъ сп҃се́нїѧ, не небрезѝ дꙋшѐ, бг҃ꙋ долготерпѧ́щꙋ, но ᲂу҆се́рднѡ возопі́й: бл҃гі́й ᲂу҆ще́дри мѧ̀.
Сла́ва: Ѻ҆́троки ѡ҆гради́вшїй по́стъ, соблюдѐ ѿ ѻ҆гнѧ̀ неѡпали́мы: і҆и҃се, тѣ́хъ мл҃твами, ѻ҆гнѧ́ мѧ вѣ́чнагѡ и҆зба́ви мно́гимъ твои́мъ млⷭ҇рдїемъ.
Бг҃оро́диченъ: Є҆ди́наѧ по́мощь человѣ́кѡвъ, помо́щница на́мъ рабѡ́мъ твои̑мъ бꙋ́ди, во вре́мѧ воздержа́нїѧ, ꙗ҆́кѡ да покаѧ́нїемъ бл҃гоꙋгожда́юще, прїи́мемъ нбⷭ҇ное црⷭ҇тво.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.
Пѣ́снь и҃:
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ: си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆збави́телю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Покаѧ́нїѧ пе́щь ᲂу҆се́рднѡ возжже́мъ, и҆ сла̑сти въ не́й попали́мъ всѧ̑ тѣлє́сныѧ: и҆ ѻ҆гнѧ̀ бꙋ́дꙋщагѡ и҆скꙋ́съ не прїѧ́ти, бога́таго въ млⷭ҇ти про́симъ, вопїю́ще: сщ҃е́нницы бл҃гослови́те, лю́дїе превозноси́те во всѧ̑ вѣ́ки. <<н҃є: 109>>
Вхо́дное вре́мѧ поста̀ на́мъ бꙋ́детъ всѧ́кагѡ грѣха̀ ѿложе́нїѧ вино́вное, да не до́лꙋ преклони́мсѧ, нижѐ ᲂу҆ны́лѡ теце́мъ, ꙗ҆́кѡ да въ кра́ткихъ и҆ ма́лыхъ дне́хъ, мнѡ́гїѧ сквє́рны ᲂу҆миле́нїемъ се́рдца и҆змы́емъ, є҆ди́наго бг҃а на́шего пою́ще.
А҆́гг҃льстїи чи́ни, мꙋ́чєникъ собра́нїе, бж҃е́ственныхъ а҆пⷭ҇лъ ли́къ ст҃ы́й, прпⷣбныхъ собо́ръ, ст҃и́телей же и҆ прⷪ҇ро́кѡвъ, тебѣ̀ мо́лѧтсѧ бл҃гі́й чл҃вѣколю́бче: покаѧ́нїе и҆́стинное твои̑мъ рабѡ́мъ пода́ждь, во вре́мѧ воздержа́нїѧ ны́нѣ вводи́магѡ.
Бг҃оро́диченъ: Бг҃ороди́тельнице всечⷭ҇таѧ, къ тебѣ̀ прибѣга́емъ, ᲂу҆ще́дри на́съ бл҃го́ю твое́ю мл҃твою, и҆ да́ждь бл҃гопримири́тельна твоего̀ сн҃а и҆ гдⷭ҇а всѣ̑мъ на́мъ, во вре́мѧ поще́нїѧ ны́нѣ вводи́магѡ, во сп҃се́нїе вѣ́рныхъ, тебѐ пѣсносло́вѧщихъ во всѧ̑ вѣ́ки.
Трипѣ́снецъ: За зако́ны ѻ҆те́чєскїѧ:
Наслѣ́дїе ѻ҆те́ческое не сохрани́вше, грѣхо́внымъ зако́нѡмъ порабо́тихомсѧ: но просте́ръ дла̑ни твоѧ̑ на крⷭ҇тѣ̀ бж҃е́ственнѣмъ, свобо́дꙋ всѣ̑мъ дарова́лъ є҆сѝ и҆́мъ: є҆го́же тѝ вѣ́рою приво́димъ во дне́хъ ст҃ы́хъ, поми́лꙋй ны̀ млⷭ҇тиве, тебѐ превозносѧ́щыѧ во всѧ̑ вѣ́ки.
Крⷭ҇то́мъ твои́мъ разстоѧ́нїе, и҆ граде́жа средостѣ́нїе разори́вый, и҆ ми́ръ въ конца́хъ ѡ҆бнови́вый бога́тый ми́рствꙋющымъ, да́рꙋй на́мъ прейтѝ хрⷭ҇тѐ постоѧ́нїемъ бꙋ́дꙋщее поще́нїе, гдⷭ҇а пою́щымъ непреста́ннѡ, и҆ превозносѧ́щымъ во всѧ̑ вѣ́ки.
Поста̀ бл҃года́ть дне́сь со́лнєчныѧ лꙋчы̀ всѣ̑мъ предлага́етъ, пред̾ѡчища́ющи мра́къ ѿ грѣха̀: содержи́ми страстьмѝ разли́чными, въ ра́дости преше́дше прїи́мемъ <<н҃є ѡ҆б.: 110>> да́ръ любомꙋ́дреннѡ, гдⷭ҇а по́йте, вопїю́ще, и҆ превозноси́те во всѧ̑ вѣ́ки.
Го́рькѡ ѡ҆б̾е́мъ первозда́нный, въ раѝ дре́вле снѣ́дь безслове́снѡ, ѿве́ржесѧ и҆ ѡ҆сꙋжде́нъ, ѿ сла́дости и҆згна́нъ бы́сть: но на дре́вѣ гвоздьмѝ пригвожде́нъ, лꙋка́вное писа́нїе пригвозди́лъ є҆сѝ грѣха̀ є҆гѡ̀. тѣ́мже твоѐ мно́гое бл҃гоꙋтро́бїе воспѣва́емъ во всѧ̑ вѣ́ки.
Зако́нъ поста̀ ѿри́нꙋвше, въ прѡ́пасти грѣха̀ поползо́хомсѧ, и҆ поста̀ востре́бовахомъ ны́нѣ вводи́магѡ: є҆го́же ще́дре провожда́ющымъ на́мъ, бл҃года́ть съ нб҃сѐ низпослѝ, и҆ ми́ръ бога́тый: гдⷭ҇а по́йте дѣла̀, и҆ превозноси́те во всѧ̑ вѣ́ки.
Бг҃оро́диченъ: Па́дающихъ и҆справле́нїе, грѣ́шникѡвъ хода́таице, стра́нныхъ прохлажде́нїе, ско́рбныхъ ᲂу҆тѣше́нїе, прест҃а́ѧ дв҃о, дꙋшѝ моеѧ̀ печа́ль разорѝ чⷭ҇таѧ, и҆ ᲂу҆тѣше́нїе свы́ше ѿ бг҃а пода́ти мѝ моли́сѧ пою́щꙋ ᲂу҆се́рднѡ, тѧ̀ превозносѧ́щꙋ во всѧ̑ вѣ́ки.
И҆́ный:
І҆рмо́съ: А҆́гг҃ли и҆ нб҃са̀:
Пригвожде́ннаго пло́тїю на крⷭ҇тѣ̀ ще́дре, ви́дѧщи тѧ̀ тва́рей є҆стество̀ премѣнѧ́шесѧ: свѣ́тъ днѐ во тьмꙋ̀, дви́жашесѧ землѧ̀, и҆ всѧ̑ колеба́хꙋсѧ.
На высотꙋ̀ крⷭ҇та̀ человѣ́ческое є҆стество̀ совозвы́сивъ, и҆ ѿ ре́бръ твои́хъ бж҃е́ственныхъ бога́тство и҆сточи́лъ є҆сѝ сп҃се́нїѧ, вѣ́рою покланѧ́ющымсѧ сп҃се пречⷭ҇тѣй стрⷭ҇ти твое́й.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Є҆ди́нъ бг҃ъ ᲂу҆́бѡ трⷪ҇ца, ни ѻ҆ц҃ꙋ̀ и҆зстꙋпи́вшꙋ въ сн҃овство̀, нижѐ сн҃ꙋ премѣни́вшꙋсѧ во и҆схожде́нїе: но сво́йствєннаѧ и҆ ѻ҆боѐ, свѣ́тъ, бг҃а, трѝ сла́влю во вѣ́ки. <<н҃ѕ: 111>>
Бг҃оро́диченъ: Ка́кѡ родила̀ є҆сѝ рцы̀, ѿ ѻ҆ц҃а̀ безлѣ́тнѡ предпросїѧ́вша, и҆ со ст҃ы́мъ дх҃омъ воспѣва́ема; и҆лѝ ꙗ҆́коже вѣ́сть є҆ди́нъ, бл҃говоли́вый роди́тисѧ и҆з̾ тебѐ во вѣ́ки.
Сла́ва тебѣ̀ бж҃е на́шъ, сла́ва тебѣ̀.
Покаѧ́нїе на́ше, ꙗ҆́кѡ бл҃гі́й є҆стество́мъ прїе́мъ, вра́жїихъ сѣте́й и҆зба́ви гдⷭ҇и, да вѣ́рою и҆ любо́вїю твоѐ ны́нѣ воспои́мъ ст҃о́е влⷣчество.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: А҆́гг҃ли и҆ нб҃са̀ на прⷭ҇то́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте, и҆ превозноси́те є҆го̀ во вѣ́ки.
И҆ стїхосло́витсѧ Чⷭ҇тнѣ́йшꙋю:
Пѣ́снь ѳ҃,
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
Сѐ свѣтоно́сное прїи́де вре́мѧ, ст҃ы́й де́нь просїѧ̀, мра́чныхъ страсте́й твои́хъ ѿбѣ́гни, ѽ дꙋшѐ! и҆ зари̑ воспрїимѝ наставлѧ́ющыѧ тѧ̀ къ свѣ́тꙋ, ᲂу҆миле́нїе ꙗ҆́кѡ вїно̀ пїю́щи весели́сѧ, и҆ сласте́й пїѧ́нство возненави́ждь.
Ꙗ҆́кѡ вои́стиннꙋ блажа́йшее вре́мѧ поще́нїѧ хрⷭ҇тѐ, є҆́же да́лъ є҆сѝ всѣ̑мъ вѣ̑рнымъ на побѣжде́нїе грѣхѡ́въ, и҆ ѡ҆чище́нїе сп҃си́тельное, и҆ дарова́нїй прїѧ́телище, въ не́мже тѧ̀ мо́лимъ: прича́стники сп҃се, всѧ̑ ны̀ бл҃ги́хъ твои́хъ сотворѝ.
Ѡ҆бы́чнѡ млⷭ҇ти твоѧ̑ на на́съ и҆злива́ѧй ще́дре бога̑тыѧ, да́ждь на́мъ сле́зы, ѡ҆чища́ющыѧ сквє́рны и҆ помышлє́нїѧ лю́бѧщихъ тѧ̀: вѣ́рꙋ и҆ любо́вь чⷭ҇тꙋю, <<н҃ѕ ѡ҆б.: 112>> бога́тное покаѧ́нїе, присвое́нїе соверше́нное къ тебѣ̀ є҆ди́номꙋ многомлⷭ҇тивомꙋ.
Всѣ́хъ а҆́гг҃лѡвъ бж҃е́ственное мно́жество, и҆ ст҃ы́хъ ли́цы достохва́льнїи, бл҃га́го ны́нѣ моли́те прилѣ́жнѡ: ꙗ҆́кѡ да бж҃е́ственное по́прище сїѐ, поще́нїѧ настоѧ́щее, тещѝ непреткнове́ннѡ ны̀ ᲂу҆крѣпи́тъ, и҆ побѣдоно́сцы содѣ́лаетъ.
Бг҃оро́диченъ: Бл҃голюби́ваѧ дв҃о, бл҃га́го ро́ждшаѧ сп҃са, ᲂу҆бл҃жѝ всѧ̑ ны̀, страстьмѝ безмѣ́рными, и҆ помышле́ньми ѡ҆ѕло́блєнныѧ влⷣчце, и҆ ѡ҆тѧгчє́нныѧ грѣхѡ́въ бре́меньми неꙋдобоно́сными: ꙗ҆́кѡ да тѧ̀ по до́лгꙋ, ꙗ҆́кѡ бцⷣꙋ велича́емъ.
И҆́ный:
І҆рмо́съ: Недоꙋмѣ́етъ всѧ́къ:
Недоꙋмѣ́етъ всѧ́кое є҆стество̀, а҆́гг҃лѡвъ и҆ человѣ́кѡвъ, твоѐ бл҃гоꙋтро́бїе бл҃годари́ти бл҃годѣ́телю: ꙗ҆́кѡ пло́тїю хотѧ̀ на́съ ра́ди ѡ҆бнища́лъ є҆сѝ, и҆ на дре́вѣ ѡ҆ на́съ распросте́рлсѧ є҆сѝ, клѧ́тва бы́въ, да пе́рвꙋю ѿи́меши клѧ́твꙋ человѣ́чества.
Свѣ́тлый де́нь воздержа́нїѧ наста̀, свѣ́тлымъ лице́мъ прїиди́те, ᲂу҆срѧ́щимъ дꙋшѐ моѧ̀ влⷣкꙋ, бл҃года́ти низпосла́тисѧ свы́ше на́мъ просѧ́ще, и҆ мно́гихъ прегрѣше́нїй и҆справле́нїе ѡ҆брѣстѝ: ꙗ҆́кѡ да стра́шнѣйшею гее́нною не и҆скꙋси́мсѧ та́мѡ.
Во тьмѣ̀ грѣхѡ́въ содержи̑мымъ, покаѧ́нїѧ ны́нѣ сщ҃е́ннїи вхо́ды наста́ша, всѣ́хъ дꙋ́шы просвѣща́ющыѧ. тѣ́мже дꙋшѐ моѧ̀, ѡ҆мраче́нїѧ ᲂу҆клони́сѧ сы́тости страсте́й, потщи́сѧ, да сла́дости вѣ́чныѧ наслади́шисѧ та́мѡ.
На дре́вѣ рꙋ́цѣ во́лею распросте́ръ, разстоѧ̑щаѧсѧ всѧ̑ собра́лъ є҆сѝ жизнода́вче: копїе́мъ же твоѧ̑ ѿве́рзлъ <<н҃з: 113>> долготерпѣли́ве ре́бра, побѣжде́нїе ѿ ре́бръ прозѧ́бшее и҆спра́вилъ є҆сѝ на́мъ. тѣ́мже бл҃годарѧ́ще пое́мъ бл҃гоꙋтро́бїе твоѐ.
Бг҃оро́диченъ: Предста́тельство всѣ́хъ на тѧ̀ надѣ́ющихсѧ, въ бѣда́хъ бо́драѧ сꙋ́щи предста́тельнице бцⷣе, вѣ́чнꙋющїѧ и҆зба́ви на́съ гее́нны, и҆ належа́щихъ мꙋ́къ го́рькихъ: ꙗ҆́кѡ да до́лжнѡ пое́мъ вели̑чїѧ твоѧ̑.
И҆́ный.
І҆рмо́съ: Чꙋ́жде ма́терємъ дѣ́вство:
Ꙗ҆́звамъ покланѧ́емсѧ твои̑мъ жизнода́вче, и҆́миже грѣха̀ страсте́й и҆зба́вльшесѧ, чⷭ҇тны́мъ крⷭ҇то́мъ твои́мъ позна́хомсѧ запеча́тствовани, во сп҃се́нїе и҆ застꙋпле́нїе ѿ всѧ́кагѡ прило́га вра́жїѧ.
Ѡ҆зарѝ крⷭ҇та̀ твоегѡ̀ сїѧ́ньми, ᲂу҆крествова́выйсѧ во́лею за всѣ́хъ сп҃се́нїе, дꙋ́шы пою́щихъ стрⷭ҇ти твоѧ̑ всемлⷭ҇тиве: и҆ на стезю̀ жи́знь на́шꙋ ᲂу҆пра́ви и҆ наста́ви.
Согрѣши́хомъ престꙋпи́вше за́пѡвѣди твоѧ̑, и҆ пꙋти̑ бж҃е́ственныхъ зачине́нїй твои́хъ сп҃се, ᲂу҆клони́хомсѧ дале́че чл҃вѣколю́бче, нерадѣ́нїемъ: но ще́дрый, воззовѝ ѿ ле́сти дꙋ́шы на́шѧ.
Сла́ва, трⷪ҇ченъ: Хвала̀, че́сть трⷪ҇цѣ лѣ́потствꙋетъ, и҆ сла́ва ꙗ҆́кѡ є҆ди́номꙋ гдⷭ҇ьствꙋ, и҆ є҆ди́номꙋ црⷭ҇твꙋ, несли́тнѡ, несѣ́чнѡ, є҆ди́ницѣ бж҃ество́мъ покланѧ́емой, несѣ́чной бо є҆стество́мъ, непреста́ннѡ велича́емѣй.
Бг҃оро́диченъ: Оу҆млⷭ҇тивисѧ мл҃твами всечⷭ҇тыѧ мт҃ре твоеѧ̀ всеще́дре всецр҃ю̀ сла́вы, є҆гда̀ прїи́деши сꙋди́ти рабы̑ твоѧ̑, ꙗ҆́кѡ млⷭ҇тивъ: въ тѧ́ бо всѝ вѣ́ровахомъ, и҆ тѧ̀ бг҃а зна́емъ.
Сла́ва тебѣ̀ бж҃е на́шъ, сла́ва тебѣ̀.
Свѣтоно́сный ны́нѣ надходѧ́щїй по́стъ, прїе́млетъ трапе́зꙋ подвигѡ́въ предложе́ннꙋю, сегѡ̀ ра́ди сеѧ̀ <<н҃з ѡ҆б.: 114>> тре́звеннѡ всѝ, честнꙋ́ю ча́шꙋ чисти́тельныхъ сле́зъ воспрїи́мемъ вѣ́рнїи: да неисцѣ́льными слеза́ми не и҆скꙋси́мсѧ та́мѡ.
Катава́сїа: Чꙋ́жде ма́терємъ двⷭ҇тво, и҆ стра́нно дѣ́вамъ дѣторожде́нїе: на тебѣ̀ бцⷣе ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̀ племена̀ земна̑ѧ непреста́ннѡ велича́емъ.
Свѣти́ленъ трⷪ҇чный гла́са, три́жды. И҆ про́чее.
На стїхо́внѣ пое́мъ самогла́сенъ днѐ.
Гла́съ ѕ҃: Пре́жде сп҃си́тельнагѡ крⷭ҇та̀ грѣхꙋ̀ ца́рствꙋющꙋ, нече́стїю держа́вствꙋющꙋ, человѣ́кѡвъ ᲂу҆блажа́шесѧ пи́ща тѣле́снаѧ, и҆ ѡ҆ плотски́хъ жела́нїѧхъ ма́ли небрежа́хꙋ: а҆ ѿне́лѣже крⷭ҇тное та́инство содѣ́ѧсѧ, и҆ де́монское ᲂу҆гасѐ мꙋчи́тельство бг҃оразꙋ́мїемъ, небе́снаѧ на землѝ добродѣ́тель жи́тельствꙋетъ. тѣ́мже по́стъ почита́етсѧ, воздержа́нїе сїѧ́етъ, моли́тва и҆справлѧ́етсѧ, и҆ свидѣ́тель вре́мѧ настоѧ́щее, да́нное на́мъ ѿ распе́ншагѡсѧ хрⷭ҇та̀ бг҃а, во сп҃се́нїе дꙋ́шъ на́шихъ.
И҆ глаго́лемъ стїхѝ.
Сті́хъ: И҆спо́лнихомсѧ заꙋ́тра ми́лости твоеѧ̀ гдⷭ҇и:
И҆ повторѧ́емъ самогла́сенъ. Та́же и҆ мꙋ́чениченъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ:
Гдⷭ҇и, въ па́мѧть ст҃ы́хъ твои́хъ, всѧ̀ тва́рь пра́зднꙋетъ, небеса̀ ра́дꙋютсѧ со а҆́гг҃лы, и҆ землѧ̀ весели́тсѧ съ человѣ́ки: тѣ́хъ моли́твами поми́лꙋй на́съ.
Сла́ва, и҆ ны́нѣ, крⷭ҇тобг҃оро́диченъ: Всечⷭ҇таѧ ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стра́сть поно́снꙋю;
Та́же, Бл҃го є҆́сть: И҆ Трист҃о́е. Тропа́рь: Въ хра́мѣ стоѧ́ще: Гдⷭ҇и поми́лꙋй, м҃. <<н҃и: 115>>
И҆ глаго́летсѧ сті́хъ ѿ сщ҃е́нника: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Нбⷭ҇ный цр҃ю̀:
И҆ твори́мъ трѝ покло́ны вели̑кїѧ, и҆ глаго́лемъ моли́твꙋ та́йнѡ прпⷣбнагѡ ѻ҆тца̀ на́шегѡ є҆фре́ма сѵ́рина: Гдⷭ҇и и҆ влⷣко живота̀ моегѡ̀: И҆ про́чее. И҆ твори́мъ и҆ про́чыѧ покло́ны.
Совокꙋплѧ́емъ же и҆ пе́рвый ча́съ, ꙗ҆́кѡ ѻ҆бы́чно: по ѻ҆бы́чныхъ же покло́нѣхъ чте́мъ ѡ҆глашє́нїѧ прпⷣбнагѡ ѻ҆тца̀ на́шегѡ ѳео́дѡра стꙋді́та. та́же ѿпꙋ́стъ.
Въ то́йже пѧто́къ сы́рный,
пое́мъ часы̀ съ покло́ны, ꙗ҆́коже и҆ въ сре́дꙋ ꙗ҆вле́но є҆́сть.
На ѕ҃-мъ часѣ̀ пое́мъ тропа́рь прⷪ҇ро́чества, гла́съ и҃:
Да́ждь на́мъ по́мощь ѿ печа́ли гдⷭ҇и, и҆ сп҃си́ ны, рожде́йсѧ ѿ дв҃ы чл҃вѣколю́бче.
Повторѧ́юще то́йже.
Прокі́менъ гла́съ а҃: Бꙋ́ди гдⷭ҇и млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ првⷣнїи ѡ҆ гдⷭ҇ѣ, пра̑вымъ подоба́етъ похвала̀.
Проро́чества заха́рїина чте́нїе. [Глава̀ и҃, ст. з҃- з҃і].
Си́це глаго́летъ гдⷭ҇ь вседержи́тель: сѐ а҆́зъ лю́ди моѧ̑ ѿ землѝ восто́чныѧ, и҆ ѿ землѝ за́падныѧ. И҆ введꙋ̀ и҆́хъ [въ зе́млю и҆́хъ,] и҆ вселю́сѧ посредѣ̀ і҆ерⷭ҇ли́ма, и҆ бꙋ́дꙋтъ мѝ въ лю́ди, и҆ а҆́зъ бꙋ́дꙋ и҆̀мъ въ бг҃а во и҆́стинѣ и҆ въ пра́вдѣ. Си́це глаго́летъ гдⷭ҇ь вседержи́тель: да ᲂу҆крѣпѧ́тсѧ рꙋ́цѣ ва́съ слы́шащихъ во дне́хъ си́хъ словеса̀ сїѧ̑ ѿ ᲂу҆́стъ прⷪ҇ро́ческихъ, ѿ негѡ́же днѐ ѡ҆снова́сѧ хра́мъ гдⷭ҇а вседержи́телѧ, и҆ це́рковь ѿне́лѣже созда́сѧ. Зане пре́жде дне́й ѻ҆́нѣхъ мзда̀ человѣ́кѡмъ <<н҃и ѡ҆б.: 116>> не бѣ̀ во ᲂу҆спѣ́хъ, и҆ мзда̀ скотѡ́мъ не бѧ́ше, и҆ и҆сходѧ́щемꙋ и҆ входѧ́щемꙋ не бѣ̀ ми́ра ѿ печа́ли, и҆ послю̀ всѧ̑ человѣ́ки, коего́ждо на и҆́скреннѧго своего̀. И҆ ны́нѣ не по днє́мъ ѻ҆́нѣмъ прє́жнимъ а҆́зъ сотворю̀ ѡ҆ста́нкꙋ люде́й си́хъ, глаго́летъ гдⷭ҇ь вседержи́тель. Но покажꙋ̀ ми́ръ: вїногра́дъ да́стъ пло́дъ сво́й, и҆ землѧ̀ да́стъ жи̑та своѧ̑, и҆ не́бо да́стъ ро́сꙋ свою̀, и҆ наслѣ́дити сотворю̀ ѡ҆ста́нкамъ люде́й мои́хъ си́хъ всѧ̑ сїѧ̑. И҆ бꙋ́детъ, ꙗ҆́кѡ бѣ́сте въ клѧ́твѣ во ꙗ҆зы́цѣхъ, до́ме і҆ꙋ́довъ и҆ до́ме і҆и҃левъ, та́кѡ сп҃сꙋ̀ вы̀, и҆ бꙋ́дете въ бл҃гослове́нїи: дерза́йте и҆ ᲂу҆крѣплѧ́йтесѧ рꙋка́ми ва́шими. Занѐ си́це глаго́летъ гдⷭ҇ь вседержи́тель: ꙗ҆́коже помы́слихъ ѡ҆ѕло́бити вы̀, внегда̀ прогнѣ́ваша мѧ̀ ѻ҆тцы̀ ва́ши, глаго́летъ гдⷭ҇ь вседержи́тель, и҆ не раска́ѧхсѧ: ꙗ҆́кѡ ᲂу҆ста́вихъ, и҆ ᲂу҆мы́слихъ во дни̑ сїѧ̑ добро̀ сотвори́ти і҆ерⷭ҇ли́мꙋ, и҆ до́мꙋ і҆ꙋ́довꙋ: дерза́йте. Сїѧ̑ словеса̀, ꙗ҆̀же сотворитѐ, глаго́лите и҆́стинꙋ кі́йждо и҆́скреннемꙋ своемꙋ̀, и҆́стинꙋ и҆ сꙋ́дъ ми́ренъ сꙋди́те во вратѣ́хъ ва́шихъ. И҆ кі́йждо ѕло́бы и҆́скреннѧгѡ своегѡ̀ не помышлѧ́йте въ сердца́хъ ва́шихъ, и҆ клѧ́твы лжи́выѧ не люби́те: занѐ всѧ̑ сїѧ̑ возненави́дѣхъ, глаго́летъ гдⷭ҇ь вседержи́тель.
Прокі́менъ, гла́съ г҃: По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми:
И҆ про́чее всѐ, ꙗ҆́коже въ сре́дꙋ сы́рнꙋю ᲂу҆каза́сѧ. Подоба́етъ вѣ́дати, ꙗ҆́кѡ въ сꙋббѡ́тꙋ и҆ недѣ́лю сы́рнꙋю мине́а не пое́тсѧ, но послѣ́дованїе слꙋча́ющихсѧ ст҃ы́хъ пое́тсѧ, на повече́рїѧхъ, и҆лѝ є҆гда̀ церквонача́льникъ хо́щетъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.