[глⷡ҇а л҃ѳ] Чи́нъ бл҃гослове́нїѧ и҆ ѡ҆сщ҃е́нїѧ новосоѡрꙋже́ннагѡ крⷭ҇та̀.
[глⷡ҇а л҃ѳ] Чи́нъ бл҃гослове́нїѧ и҆ ѡ҆сщ҃е́нїѧ новосоѡрꙋже́ннагѡ крⷭ҇та̀.
Поста́вленꙋ бы́вшꙋ столꙋ̀ че́стнѡ покрове́ннꙋ пред̾ ст҃ы́ми враты̀, і҆ере́й въ є҆пїтрахи́ль и҆ фелѡ́нь ѡ҆дѣ́ѧнъ, и҆схо́дитъ, и҆ крⷭ҇тоѡбра́знѡ покади́въ но́вый крⷭ҇тъ, начина́етъ ѻ҆бы́чнѡ: Бл҃гослове́нъ бг҃ъ на́шъ: Ли́къ пое́тъ: Цр҃ю̀ небе́сный. Чте́цъ: Трист҃о́е. Ѻ҆́ч҃е на́шъ: и҆ по ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.
И҆ ѱало́мъ рл҃а:
Помѧнѝ гдⷭ҇и дв҃да, и҆ всю̀ кро́тость є҆го̀. Ꙗ҆́кѡ клѧ́тсѧ гдⷭ҇еви, ѡ҆бѣща́сѧ бг҃ꙋ і҆а́кѡвлю: А҆́ще вни́дꙋ въ селе́нїе до́мꙋ моегѡ̀, и҆лѝ взы́дꙋ на ѻ҆́дръ посте́ли моеѧ̀: А҆́ще да́мъ со́нъ ѻ҆чи́ма мои́ма, и҆ вѣ́ждома мои́ма дрема́нїе, и҆ поко́й скранїа́ма мои́ма: До́ндеже ѡ҆брѧ́щꙋ мѣ́сто гдⷭ҇еви, селе́нїе бг҃ꙋ і҆а́кѡвлю. Сѐ слы́шахомъ ѧ҆̀ во є҆ѵфра́ѳѣ, ѡ҆брѣто́хомъ ѧ҆̀ въ полѧ́хъ дꙋбра́вы. Вни́демъ въ селє́нїѧ є҆гѡ̀, поклони́мсѧ на мѣ́сто, и҆дѣ́же стоѧ́стѣ но́зѣ є҆гѡ̀. Воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀. Сщ҃е́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. дв҃да ра́ди раба̀ твоегѡ̀, не ѿвратѝ лицѐ пома́заннагѡ твоегѡ̀. Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: ѿ плода̀ чре́ва твоегѡ̀ посаждꙋ̀ на прⷭ҇то́лѣ твое́мъ. А҆́ще сохранѧ́тъ сы́нове твоѝ завѣ́тъ мо́й, и҆ свидѣ̑нїѧ моѧ̑ сїѧ̑, и҆̀мже наꙋчꙋ̀ ѧ҆̀, и҆ сы́нове и҆́хъ до вѣ́ка сѧ́дꙋтъ на прⷭ҇то́лѣ твое́мъ. Ꙗ҆́кѡ и҆збра̀ гдⷭ҇ь сїѡ́на, и҆зво́ли и҆̀ въ жили́ще себѣ̀. Се́й поко́й мо́й во вѣ́къ вѣ́ка, здѣ̀ вселю́сѧ, ꙗ҆́кѡ и҆зво́лихъ и҆̀. Лови́твꙋ є҆гѡ̀ бл҃гословлѧ́ѧй бл҃гословлю̀, ни́щыѧ є҆гѡ̀ насыщꙋ̀ хлѣ́бы, Сщ҃е́нники є҆гѡ̀ ѡ҆блекꙋ̀ во сп҃се́нїе, и҆ прпⷣбнїи є҆гѡ̀ ра́достїю возра́дꙋютсѧ. Та́мѡ возращꙋ̀ ро́гъ дв҃дови, ᲂу҆гото́вахъ свѣти́льникъ пома́занномꙋ моемꙋ̀. Врагѝ є҆гѡ̀ ѡ҆блекꙋ̀ стꙋдо́мъ, на не́мже процвѣте́тъ ст҃ы́нѧ моѧ̀.
Та́же, ѱало́мъ н҃ѳ:
Бж҃е, ѿри́нꙋлъ ны̀ є҆сѝ, и҆ низложи́лъ є҆сѝ на́съ: разгнѣ́валсѧ є҆сѝ, и҆ ᲂу҆ще́дрилъ є҆сѝ на́съ. Стрѧ́слъ є҆сѝ зе́млю, и҆ смꙋти́лъ є҆сѝ ю҆̀: и҆сцѣлѝ сокрꙋше́нїе є҆ѧ̀, ꙗ҆́кѡ подви́жесѧ. Показа́лъ є҆сѝ лю́демъ твои̑мъ жестѡ́каѧ, напои́лъ є҆сѝ на́съ вїно́мъ ᲂу҆миле́нїѧ. Да́лъ є҆сѝ боѧ́щымсѧ тебѐ зна́менїе, є҆́же ᲂу҆бѣжа́ти ѿ лица̀ лꙋ́ка. Ꙗ҆́кѡ да и҆зба́вѧтсѧ возлю́бленнїи твоѝ, сп҃сѝ десни́цею твое́ю, и҆ ᲂу҆слы́ши мѧ̀. Бг҃ъ возглаго́ла во ст҃ѣ́мъ свое́мъ: возра́дꙋюсѧ, и҆ раздѣлю̀ сїки́мꙋ, и҆ ю҆до́ль жили́щъ размѣ́рю. Мо́й є҆́сть галаа́дъ, и҆ мо́й є҆́сть манассі́й, и҆ є҆фре́мъ крѣ́пость. главы̀ моеѧ̀, і҆ꙋ́да ца́рь мо́й. Мѡа́въ коно́бъ ᲂу҆пова́нїѧ моегѡ̀: на і҆дꙋме́ю прострꙋ̀ сапо́гъ мо́й, мнѣ̀ и҆ноплемє́нницы покори́шасѧ. Кто̀ введе́тъ мѧ̀ во гра́дъ ѡ҆гражде́нїѧ; и҆лѝ кто̀ наста́витъ мѧ̀ до і҆дꙋме́и; Не ты́ ли бж҃е ѿри́нꙋвый на́съ; и҆ не и҆зы́деши бж҃е въ си́лахъ на́шихъ; Да́ждь на́мъ по́мощь ѿ ско́рби, и҆ сꙋ́етно сп҃се́нїе человѣ́ческо. Ѡ҆ бз҃ѣ сотвори́мъ си́лꙋ, и҆ то́й ᲂу҆ничижи́тъ стꙋжа́ющыѧ на́мъ.
Та́же, ѱало́мъ ч҃и:
Гдⷭ҇ь воцр҃и́сѧ, да гнѣ́ваютсѧ лю́дїе: сѣдѧ́й на херꙋві́мѣхъ, да подви́житсѧ землѧ̀. Гдⷭ҇ь въ сїѡ́нѣ вели́къ, и҆ высо́къ є҆́сть над̾ всѣ́ми людьмѝ. Да и҆сповѣ́дѧтсѧ и҆́мени твоемꙋ̀ вели́комꙋ: ꙗ҆́кѡ стра́шно и҆ ст҃о є҆́сть. И҆ че́сть царе́ва сꙋ́дъ лю́битъ: ты̀ ᲂу҆гото́валъ є҆сѝ правѡты̀, сꙋ́дъ и҆ пра́вдꙋ во і҆а́кѡвѣ ты̀ сотвори́лъ є҆сѝ. Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть. Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋ́илъ въ призыва́ющихъ и҆́мѧ є҆гѡ̀: призыва́хꙋ гдⷭ҇а, и҆ то́й послꙋ́шаше и҆̀хъ. Въ столпѣ̀ ѻ҆́блачнѣ глаго́лаше къ ни̑мъ: ꙗ҆́кѡ хранѧ́хꙋ свидѣ̑нїѧ є҆гѡ̀ и҆ повелѣ̑нїѧ є҆гѡ̀, ꙗ҆̀же дадѐ и҆̀мъ. Гдⷭ҇и бж҃е на́шъ, ты̀ послꙋ́шалъ є҆сѝ и҆̀хъ: Бж҃е, ты̀ млⷭ҇тивъ быва́лъ є҆сѝ и҆̀мъ, и҆ мща́ѧ на всѧ̑ начина̑нїѧ и҆́хъ. Возноси́те гдⷭ҇а бг҃а на́шего, и҆ покланѧ́йтесѧ въ горѣ̀ ст҃ѣ́й є҆гѡ̀: ꙗ҆́кѡ ст҃ъ гдⷭ҇ь бг҃ъ на́шъ.
Сла́ва, и҆ ны́нѣ: А҆ллилꙋ́їа, три́жды. Гдⷭ҇и поми́лꙋй, три́жды.
И҆ тропа́рь, гла́съ а҃:
Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ, побѣ̑ды бл҃говѣ́рномꙋ і҆мпера́торꙋ на́шемꙋ нїкола́ю а҆леѯа́ндровичꙋ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство. Три́жды.
Сла́ва, конда́къ, гла́съ д҃:
Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй хрⷭ҇тѐ бж҃е: возвеселѝ си́лою твое́ю бл҃говѣ́рнаго і҆мпера́тора на́шего нїкола́ѧ а҆леѯа́ндровича, побѣ̑ды даѧ̀ є҆мꙋ̀ на сопоста́ты, посо́бїе и҆мꙋ́щꙋ твоѐ ѻ҆рꙋ́жїе ми́ра, непобѣди́мꙋю побѣ́дꙋ.
И҆ ны́нѣ, гла́съ то́йже:
Животворѧ́щїй крⷭ҇тъ твоеѧ̀ бл҃гости, є҆го́же дарова́лъ є҆сѝ на́мъ недостѡ́йнымъ, гдⷭ҇и, тебѣ̀ прино́симъ въ мл҃твꙋ, сп҃сѝ царѧ̀ и҆ вѣ̑рныѧ лю́ди бцⷣы ра́ди, ѡ҆ на́съ тебѣ̀ молѧ́щыѧсѧ, є҆ди́не чл҃вѣколю́бче.
А҆́бїе же посе́мъ пою́тъ три́жды тропа́рь се́й, гла́съ ѕ҃:
Послѝ бл҃года́ть твою̀ жизнода́вче, и҆ крⷭ҇тъ се́й ѡ҆ст҃ѝ, и҆ всѣ̑мъ лю́демъ твои̑мъ ꙗ҆вѝ є҆го̀ бы́ти по́мощь и҆ ᲂу҆твержде́нїе:
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й чте́тъ мл҃твꙋ сїю̀:
Гдⷭ҇и бж҃е сла́вы, ѻ҆́ч҃е вседержи́телю, бж҃е саваѡ́ѳъ, и҆́же дре́вомъ живота̀ посредѣ̀ раѧ̀ сꙋ́щагѡ, проѡбрази́лъ є҆сѝ животво́рный крⷭ҇тъ є҆диноро́днагѡ сн҃а твоегѡ̀: и҆ вмѣ́стѡ дре́ва преслꙋша́нїѧ, є҆гѡ́же вкꙋ́сомъ вселꙋка́вый ѕмі́й пра́ѻтцы на́шѧ, и҆ съ ни́ми ве́сь ро́дъ человѣ́ческїй и҆з̾ раѧ̀ и҆згна̀, и҆ въ сме́рть привлечѐ, зна́менїе ѻ҆́нагѡ живоно́снагѡ крⷭ҇та̀, на не́мже возлю́бленный тво́й сн҃ъ пригвожде́нъ бы́въ ᲂу҆́мре, и҆ сме́ртїю сме́рть ᲂу҆мертвѝ, и҆ всю̀ си́лꙋ дїа́волю ᲂу҆празднѝ, и҆ живо́тъ мі́рꙋ дарова̀, цр҃кви свое́й ѻ҆рꙋ́жїе непобѣди́мое, ѡ҆сщ҃е́нїе же и҆ покро́въ держа́венъ, и҆ вѣ́рѣ ᲂу҆твержде́нїе, и҆ ѿ всѣ́хъ дїа́вольскихъ ко́зней и҆зба́вꙋ, и҆ крѣ́пкое сп҃се́нїѧ ᲂу҆пова́нїе, и҆ живота̀ полꙋче́нїѧ непосты́днꙋю наде́ждꙋ дарова́лъ є҆сѝ. Тѣ́мже мы̀ рабѝ твоѝ, толи́кїѧ бл҃года́ти твоеѧ̀ тꙋ́не сподо́бльшесѧ, бл҃года́рни сꙋ́ще, сла́вꙋ и҆ бл҃годаре́нїе и҆ смире́нное поклоне́нїе прино́симъ твоемꙋ̀ вели́чествꙋ, и҆ мо́лимсѧ ᲂу҆ми́льнѡ, ꙗ҆́кѡ да млⷭ҇тивнѡ при́зриши на зна́менїе сїѐ крⷭ҇тное, є҆́же вѣ́рнїи рабѝ твоѝ ѿ ᲂу҆се́рдїѧ и҆ тве́рдыѧ вѣ́ры и҆ любвѐ, ꙗ҆́же къ тебѣ̀, соѡрꙋжи́ша, въ зна́менїе побѣ́ды сн҃а твоегѡ̀, гдⷭ҇а на́шегѡ і҆и҃са хрⷭ҇та̀, свобо́ды же и҆ и҆збавле́нїѧ на́шегѡ: и҆ низпослѝ на нѐ нбⷭ҇ное твоѐ бл҃гослове́нїе, и҆ бл҃гословѝ и҆ ѡ҆свѧтѝ є҆̀, и҆ и҆спо́лни си́лы и҆ бл҃гослове́нїѧ ѻ҆́нагѡ дре́ва, на не́мже пригвожде́но бы́сть прест҃о́е тѣ́ло гдⷭ҇а на́шегѡ і҆и҃са хрⷭ҇та̀ є҆диноро́днагѡ сн҃а твоегѡ̀, и҆́мже си́ла дїа́волѧ попра́сѧ, и҆ земні́и свобо́дꙋ ᲂу҆лꙋчи́хомъ, и҆ живота̀ сподо́бихомсѧ. Є҆́й, мо́лимъ тѧ̀ влⷣко прест҃ы́й, ст҃ы́хъ ра́ди стрⷭ҇те́й, и҆ ст҃ы́ѧ кро́ве и҆злїѧ́нїѧ, и҆ животво́рныѧ сме́рти є҆диноро́днагѡ сн҃а твоегѡ̀, гдⷭ҇а на́шегѡ і҆и҃са хрⷭ҇та̀, ю҆́же совѣ́томъ тебѐ бг҃а ѻ҆ц҃а̀ безнача́льнагѡ, и҆ прест҃а́гѡ твоегѡ̀ дх҃а во́лею, сп҃се́нїѧ на́шегѡ ра́ди на дре́вѣ крⷭ҇тномъ претерпѣ̀, и҆ тѣ́ми дре́во крⷭ҇тное, є҆́же и҆ногда̀ согрѣша́ющымъ и҆ ѕлотвѡ́рнымъ ка́знь бѧ́ше, бл҃гослове́но, ст҃о, животода́тельно же, и҆ и҆зба́вꙋ согрѣша́ющымъ бы́ти сотворѝ, є҆́же въ мольбꙋ̀ тѝ прино́симъ: послѝ ны́нѣ бл҃года́ть прест҃а́гѡ твоегѡ̀ дх҃а, на зна́менїе сїѐ крⷭ҇тное, и҆ бл҃гословѝ и҆ ѡ҆ст҃ѝ є҆̀, и҆ да́ждь є҆мꙋ̀ бы́ти зна́менїемъ стра́шнымъ и҆ крѣ́пкимъ на всѧ̑ врагѝ ви̑димыѧ и҆ неви̑димыѧ, прогна́нїе же и҆ ѿраже́нїе всѣ́хъ ко́зней, навѣ́тѡвъ же и҆ прило́гѡвъ дїа́вольскихъ: лю́демъ же твои̑мъ да бꙋ́детъ покро́въ держа́венъ, вѣ́рѣ ᲂу҆твержде́нїе, наде́ждѣ подкрѣпле́нїе, во бране́хъ побѣ́да, и҆ во всѣ́хъ добродѣ́телехъ преспѣ́ѧнїе, и҆ всѣ̑мъ пред̾ си́мъ зна́менїемъ тебѣ̀ кла́нѧющымсѧ и҆ мольбы̑ приносѧ́щымъ млⷭ҇тивенъ послꙋ́шатель, и҆ всѣ́хъ ꙗ҆̀же ко сп҃се́нїю проше́нїй бога́тый пода́тель бꙋ́ди. И҆ ꙗ҆́коже крⷭ҇то́мъ мі́ръ ѿ грѣхо́внагѡ ѡ҆сꙋжде́нїѧ свободи́лъ є҆сѝ: си́це рабѡ́въ твои́хъ, сїѐ крⷭ҇тное зна́менїе тебѣ̀ ѿ дꙋшѝ вѣ́рнѡ приносѧ́щихъ, си́лою крⷭ҇та̀ возлю́бленнагѡ сн҃а твоегѡ̀, всегда̀ побѣди́тели бы́ти грѣха̀ ꙗ҆вѝ, и҆ всѧ̑ земна̑ѧ и҆ небє́снаѧ твоѧ̑ бл҃га̑ѧ и҆̀мъ да́рꙋй, и҆ крⷭ҇то́мъ всегда̀ къ бл҃го́мꙋ всѣ́хъ вѣ́рныхъ наставлѧ́ѧ, къ воспрїѧ́тїю нбⷭ҇нагѡ вѣнца̀ приведѝ. Ты́ бо є҆сѝ ѡ҆сщ҃е́нїѧ и҆сто́чникъ, и҆ всѣ́хъ бл҃ги́хъ бога́тый пода́тель, и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же чте́тъ та́йнѡ мл҃твꙋ сїю̀:
Бж҃е и҆ ѻ҆́ч҃е гдⷭ҇а на́шегѡ і҆и҃са хрⷭ҇та̀, и҆́же крⷭ҇то́мъ є҆гѡ̀ дїа́вола побѣди́въ и҆ сме́рть ᲂу҆мертви́въ, ро́дъ человѣ́ческїй ѿ ле́сти и҆ мꙋчи́тельства є҆гѡ̀ свободи́лъ є҆сѝ: при́зри ны́нѣ на мл҃твꙋ на́шꙋ и҆ на зна́менїе сїѐ крⷭ҇тное, въ сла́вꙋ тебѐ бг҃а ѻ҆ц҃а̀ и҆ є҆диносꙋ́щнагѡ твоегѡ̀ сн҃а и҆ соесте́ственнагѡ твоегѡ̀ дх҃а, и҆ въ воспомина́нїе ѻ҆́ныѧ бы́вшїѧ пресла́вныѧ над̾ дїа́воломъ, сме́рти же и҆ а҆́да побѣ́ды, и҆ на́шегѡ и҆збавле́нїѧ соѡрꙋже́нное, дх҃омъ твои́мъ ст҃ы́мъ, въ ѡ҆кропле́нїи воды̀ сеѧ̀ сщ҃е́нныѧ бл҃гословѝ и҆ ѡ҆ст҃ѝ. И҆ и҆зле́й на нѐ бл҃гослове́нїе твоѐ ст҃о́е и҆ си́лꙋ, ю҆́же ѡ҆кропле́нїемъ кро́ве и҆ пригвожде́нїемъ тѣ́ла возлю́бленнагѡ сн҃а твоегѡ̀ ѻ҆́но пребл҃гослове́нное дре́во стѧжа́ло є҆́сть: и҆ томꙋ̀ пода́ждь, во є҆́же бы́ти вѣ̑рнымъ лю́демъ твои̑мъ въ стѣ́нꙋ и҆ покро́въ, и҆ въ сто́лпъ крѣ́пости ѿ лица̀ вра́жїѧ, во ѿгна́нїе же всѧ́кагѡ ѕла̀ сопроти́внагѡ, и҆ во и҆сцѣле́нїе дꙋше́вныхъ, и҆ тѣле́сныхъ недꙋ́гѡвъ, и҆ во є҆́же ᲂу҆слы̑шаннымъ бы́ти мольба́мъ и҆ моле́нїѧмъ всѣ́хъ вѣ́рнѡ пред̾ си́мъ зна́менїемъ молѧ́щихъ ти сѧ.
И҆ возглаша́етъ: Ты́ бо є҆сѝ бг҃ъ млⷭ҇ти, и҆ щедро́тъ, и҆ чл҃вѣколю́бїѧ, и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ съ прест҃ы́мъ, бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й же кропи́тъ сщ҃е́нною водо́ю, глаго́лѧ:
Ѡ҆сщ҃а́етсѧ крⷭ҇тное сїѐ зна́менїе бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
И҆ а҆́бїе посе́мъ ста́въ бл҃гоговѣ́йнѡ пред̾ ст҃ы́мъ крⷭ҇тнымъ зна́менїемъ, кади́льницꙋ же взе́мъ кади́тъ є҆̀ крⷭ҇тоѡбра́знѡ, поѧ̀ сїѧ̑ стїхи̑ры, гла́съ и҃:
Крⷭ҇тъ храни́тель все́й вселе́ннѣй, крⷭ҇тъ красота̀ цр҃ко́внаѧ: крⷭ҇тъ царє́мъ держа́ва: крⷭ҇тъ вѣ̑рнымъ ᲂу҆твержде́нїе: крⷭ҇тъ а҆́гг҃лѡмъ сла́ва, и҆ бѣсѡ́мъ ꙗ҆́зва.
Сла́ва, и҆ ны́нѣ, гла́съ д҃: Ѡ҆ тебѣ̀, требл҃же́нне и҆ жизнода́вче крⷭ҇те, лю́дїе пита́еми спра́зднꙋютъ: съ безпло́тными ли́ки, чи́нъ а҆рхїере́йскїй бл҃гоговѣ́йнѡ пое́тъ: мно́жество же и҆́ночествꙋющихъ и҆ по́стникѡвъ покланѧ́етсѧ, хрⷭ҇та́ же на тебѣ̀ распе́ншагосѧ всѝ прославлѧ́емъ.
Посе́мъ поѧ̀ стїхи́рꙋ сїю̀ два́жды: Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ.
Покланѧ́етсѧ бл҃гоговѣ́йнѡ до землѝ, и҆ лобза́етъ чⷭ҇тны́й и҆ сщ҃е́нный крⷭ҇тъ. По лобза́нїи же па́ки, трети́цею поѧ̀ то́жде, покланѧ́етсѧ.
Та́кожде и҆ всѝ предстоѧ́щїи покланѧ́ютсѧ, и҆ лобза́ютъ чⷭ҇тны́й крⷭ҇тъ:
Ли́кꙋ пою́щꙋ стїхи́рꙋ сїю̀, гла́съ в҃:
Прїиди́те вѣ́рнїи, крⷭ҇та̀ си́лѣ поклони́мсѧ: дре́во бо въ раѝ сме́рть прозѧбѐ, сїе́ же жи́знь процвѣтѐ, безгрѣ́шна и҆мꙋ́щее пригвожде́нна на себѣ̀ гдⷭ҇а. ѿ негѡ́же всѝ ꙗ҆зы́цы нетлѣ́нїе ѡ҆б̾е́млюще, зове́мъ: крⷭ҇то́мъ сме́рть ᲂу҆праздни́вый, и҆ на́съ ѿ пре́лести и҆ мꙋчи́тельства дїа́волѧ свободи́вый, гдⷭ҇и сла́ва тебѣ̀.
А҆́бїе же посе́мъ твори́тъ ѿпꙋ́стъ, ре́кшꙋ дїа́конꙋ: Премꙋ́дрость. и҆ ли́кꙋ: Чⷭ҇тнѣ́йшꙋю херꙋві̑мъ. Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.
І҆ере́й: И҆́же на дре́вѣ крⷭ҇тномъ сп҃се́нїѧ на́шегѡ ра́ди распны́йсѧ, и҆ сме́рть под̾ѧ́ти и҆зво́ливый, и҆ тридне́внѡ и҆з̾ ме́ртвыхъ воскр҃сы́й: хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, си́лою чⷭ҇тна́гѡ и҆ животворѧ́щагѡ крⷭ҇та̀, и҆ всѣ́хъ ра́ди ст҃ы́хъ свои́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.
Ли́къ: А҆ми́нь.
І҆ере́й же, взе́мъ крⷭ҇тъ, вно́ситъ є҆го̀ въ ѻ҆лта́рь црⷭ҇кими враты̀, и҆ ѡ҆бра́щьсѧ къ лю́демъ, бл҃гословлѧ́етъ и҆̀хъ крⷭ҇то́мъ, глаго́лѧ:
Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ:
И҆ поставлѧ́етъ крⷭ҇тъ на прⷭ҇то́лѣ, и҆ ѿхо́дитъ бл҃годарѧ̀ бг҃а.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.