[глⷡ҇а л҃а] Мл҃тва над̾ поти́ромъ є҆ди́нымъ. сі́есть, ча́шею но́вою.
[глⷡ҇а л҃а] Мл҃тва над̾ поти́ромъ є҆ди́нымъ. сі́есть, ча́шею но́вою.
Нача́ло ѻ҆бы́чное, и҆ ѱало́мъ к҃в.
Та́же дїа́конꙋ ре́кшꙋ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й чте́тъ мл҃твꙋ сїю̀:
Влⷣко вседержи́телю, гдⷭ҇и бж҃е ѻ҆тє́цъ на́шихъ, тебѣ̀ мо́лимсѧ, и҆ тебѐ призыва́емъ, и҆ прилѣ́жнѡ про́симъ: низпослѝ бл҃года́ть прест҃а́гѡ всеѡсщ҃а́ющагѡ и҆ животворѧ́щагѡ твоегѡ̀ дх҃а на ча́шꙋ сїю̀, [а҆́ще сꙋ́ть покро́вцы и҆ лжи́ца, глаго́ли и҆ сїѐ: и҆ на всѐ ᲂу҆краше́нїе є҆гѡ̀,] и҆ бл҃гословѝ, ѡ҆чи́сти, и҆ ѡ҆ст҃ѝ ю҆̀, ꙗ҆́коже бл҃гослови́лъ, ѡ҆чи́стилъ и҆ ѡ҆ст҃и́лъ є҆сѝ ча́шꙋ сщ҃е́нника твоегѡ̀ мелхїседе́ка, и҆ ча́шꙋ ст҃ы́хъ а҆пⷭ҇лъ на та́йной ве́чери хрⷭ҇та̀ твоегѡ̀ и҆ досто́йнꙋ же́ртвенника твоегѡ̀ бы́ти сотворѝ, во є҆́же приноси́тисѧ въ не́й тебѣ̀ бг҃ꙋ и҆ ѻ҆ц҃ꙋ̀ ᲂу҆милостиви́тельной безкро́вной же́ртвѣ, тѣ́ла и҆ кро́ве є҆диноро́днагѡ сн҃а твоегѡ̀, гдⷭ҇а бг҃а и҆ сп҃са на́шегѡ і҆и҃са хрⷭ҇та̀: съ ни́мже тебѣ̀, и҆ прест҃о́мꙋ и҆ животворѧ́щемꙋ твоемꙋ̀ дх҃ꙋ, подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Про́чее же, ка́къ въ к҃и главѣ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.