[глⷡ҇а к҃ѳ] Чи́нъ бл҃гослове́нїѧ и҆ ѡ҆сщ҃е́нїѧ сосꙋ́дѡвъ слꙋже́бныхъ:

сі́есть ді́скоса, ча́ши, ѕвѣзди́цы и҆ лжи́цы, съ тремѧ̀ и҆́хъ покро́вцы, предложе́нныхъ вкꙋ́пѣ.

Поста́вленꙋ сꙋ́щꙋ столꙋ̀ и҆ че́стнѡ покры́тꙋ пред̾ ст҃ы́ми враты̀, полага́ютсѧ на не́мъ сосꙋ́ды. І҆ере́й, ѡ҆дѣ́ѧнъ въ є҆пїтрахи́ль и҆ фелѡ́нь, съ кади́льницею и҆схо́дитъ ст҃ы́ми враты̀, и҆ покади́въ крⷭ҇тоѡбра́знѡ, начина́етъ ѻ҆бы́чнѡ:

Бл҃гослове́нъ бг҃ъ на́шъ: Чте́цъ же чте́тъ: Цр҃ю̀ нбⷭ҇ный: Трист҃о́е: И҆ по Ѻ҆́ч҃е на́шъ: І҆ере́й: Ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.

И҆ ѱало́мъ к҃в:

Гдⷭ҇ь пасе́тъ мѧ̀, и҆ ничто́же мѧ̀ лиши́тъ. На мѣ́стѣ ѕла́чнѣ, та́мѡ всели́ мѧ, на водѣ̀ поко́йнѣ воспита́ мѧ. Дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды, и҆́мене ра́ди своегѡ̀. А҆́ще бо и҆ пойдꙋ̀ посредѣ̀ сѣ́ни сме́ртныѧ, не ᲂу҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ᲂу҆тѣ́шиста. Оу҆гото́валъ є҆сѝ предо мно́ю трапе́зꙋ сопроти́въ стꙋжа́ющымъ мнѣ̀: ᲂу҆ма́стилъ є҆сѝ є҆ле́омъ главꙋ̀ мою̀, и҆ ча́ша твоѧ̀ ᲂу҆поѧва́ющи мѧ̀, ꙗ҆́кѡ держа́вна. И҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀, и҆ є҆́же всели́ти ми сѧ въ до́мъ гдⷭ҇ень, въ долготꙋ̀ дні́й.

Сла́ва, и҆ ны́нѣ: А҆ллилꙋ́їа, три́жды.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

І҆ере́й же чте́тъ мл҃твꙋ сїю̀:

Влⷣко вседержи́телю гдⷭ҇и бж҃е на́шъ, пода́вый мѡѷсе́ю рабꙋ̀ твоемꙋ̀ зако́нъ, ѡ҆правда̑нїѧ же и҆ слꙋ̑жбы, и҆ въ ст҃и́лищи твое́мъ, въ сла́вꙋ прест҃о́мꙋ и҆́мени твоемꙋ̀ соѡрꙋже́нномъ, сосꙋ́ды зла́ты и҆ сре́брѧны къ приноше́нїю разли́чныхъ же́ртвъ тебѣ̀ и҆́стинномꙋ бг҃ꙋ на́шемꙋ [ꙗ҆̀же бы́ша сѣ́нь и҆ ѡ҆́бразъ ны́нѣшней и҆́стинной безкро́вной на́шей же́ртвы] твори́ти и҆ ѡ҆ст҃и́ти повелѣ́лъ є҆сѝ. Ты̀ са́мъ и҆ ны́нѣ чл҃вѣколю́бче гдⷭ҇и, бл҃гословѝ ді́скосъ се́й, ча́шꙋ, ѕвѣзди́цꙋ и҆ лжи́цꙋ съ покро́вами и҆́хъ, и҆ ѡ҆ст҃ѝ ѧ҆̀ си́лою, дѣ́йствомъ и҆ бл҃года́тїю всест҃а́гѡ и҆ животворѧ́щагѡ твоегѡ̀ дх҃а, ꙗ҆́кѡ да прино́ситсѧ тебѣ̀ на ни́хъ и҆́стиннаѧ, жива́ѧ, безкро́внаѧ и҆ слове́снаѧ же́ртва, прест҃о́е тѣ́ло вели́кагѡ бг҃а и҆ сп҃са на́шегѡ і҆и҃са хрⷭ҇та̀, сн҃а твоегѡ̀, и҆́же на́съ дѣ́лѧ и҆ на́шегѡ ра́ди сп҃се́нїѧ тебѣ̀ бг҃ꙋ и҆ ѻ҆ц҃ꙋ̀ своемꙋ̀ є҆ди́ною самаго̀ себѐ въ же́ртвꙋ бл҃гопрїѧ́тнꙋ на кре́стномъ же́ртвенницѣ принесѐ. Тебѣ́ бо съ ни́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, подоба́етъ всѧ́ческаѧ сла́ва, че́сть и҆ поклоне́нїе ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

І҆ере́й: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Дїа́конъ: Главы̑ ва́шѧ гдⷭ҇еви приклони́те.

Ли́къ: Тебѣ̀ гдⷭ҇и.

І҆ере́й же, прекло́нь главꙋ̀, глаго́летъ мл҃твꙋ сїю̀ та́йнѡ:

Гдⷭ҇и бж҃е на́шъ, при́зри ны́нѣ на мл҃твꙋ недосто́йнагѡ менѐ раба̀ твоегѡ̀, и҆ низпослѝ бога́тство бл҃гослове́нїѧ твоегѡ̀ на сосꙋ́ды сїѧ̑, и҆ ѡ҆ст҃ѝ ѧ҆̀ дх҃омъ твои́мъ ст҃ы́мъ во ѡ҆кропле́нїи сщ҃е́нныѧ сеѧ̀ воды̀, во є҆́же бы́ти и҆̀мъ досто́йное вмѣсти́лище пречⷭ҇тагѡ тѣ́ла, и҆ чⷭ҇тны́ѧ кро́ве хрⷭ҇та̀ твоегѡ̀.

И҆ возглаша́етъ: Ты́ бо є҆сѝ и҆сто́чникъ ѡ҆сщ҃е́нїѧ, и҆ тебѣ̀ со є҆диноро́днымъ сн҃омъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

И҆ а҆́бїе кропи́тъ сосꙋ́ды сщ҃е́нною водо́ю, глаго́лѧ:

Ѡ҆сщ҃а́ютсѧ сосꙋ́ды сїѧ̑ бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.

А҆́ще ᲂу҆́бѡ слꙋжи́ти а҆́бїе и҆́мать, взе́млетъ са́мъ сосꙋ́ды, и҆ вно́ситъ ѧ҆̀ въ ѻ҆лта́рь, и҆ поста́вивъ на же́ртвенницѣ, слꙋ́житъ и҆́ми. А҆́ще же слꙋжи́ти не бꙋ́детъ, сотвори́въ ѻ҆бы́чнѡ дневны́й ѿпꙋ́стъ, вно́ситъ сосꙋ́ды въ ѻ҆лта́рь.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.