[глⷡ҇а а҃] Мл҃тва на всѧ́кꙋю не́мощь.

Влⷣко вседержи́телю, врачꙋ̀ дꙋ́шъ и҆ тѣле́съ, смирѧ́ѧй и҆ возносѧ́й, наказꙋ́ѧй и҆ па́ки и҆сцѣлѧ́ѧй, бра́та на́шего и҆́мⷬ҇къ, немощствꙋ́юща посѣтѝ млⷭ҇тїю твое́ю: прострѝ мы́шцꙋ твою̀ и҆спо́лненꙋ и҆сцѣле́нїѧ и҆ врачбы̀: и҆ и҆сцѣлѝ є҆го̀, возставлѧ́ѧй ѿ ѻ҆дра̀ и҆ не́мощи, запретѝ дꙋ́хꙋ не́мощи, ѿста́ви ѿ негѡ̀ всѧ́кꙋ ꙗ҆́звꙋ, всѧ́кꙋ болѣ́знь, всѧ́кꙋ ра́нꙋ, всѧ́кꙋ ѻ҆гне́вицꙋ и҆ трѧса́вицꙋ: и҆ а҆́ще є҆́сть въ не́мъ согрѣше́нїе, и҆лѝ беззако́нїе, ѡ҆сла́би, ѡ҆ста́ви, простѝ твоегѡ̀ ра́ди человѣколю́бїѧ. є҆́й гдⷭ҇и, пощадѝ созда́нїе твоѐ во хрⷭ҇тѣ̀ і҆и҃сѣ гдⷭ҇ѣ на́шемъ, съ ни́мже бл҃гослове́нъ є҆сѝ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.