[глⷡ҇а л҃д] Бл҃гослове́нїе ро́євъ пче́льныхъ, во ᲂу҆́лїѧ нѡ́ва всажде́нныхъ.
[глⷡ҇а л҃д] Бл҃гослове́нїе ро́євъ пче́льныхъ, во ᲂу҆́лїѧ нѡ́ва всажде́нныхъ.
Нача́ло ꙗ҆́коже и҆ въ пред̾идꙋ́щей главѣ̀, по ѱалмѣ́хъ же мл҃тва сїѧ̀:
Бж҃е всемогі́й, предвѣ́чный, содержа́й го́рстїю всю̀ тва́рь, ѡ҆блада́ѧй нб҃омъ и҆ земле́ю, и҆ всѣ́ми ꙗ҆̀же на ни́хъ, всѧ́комꙋ же созда́нїю, є҆́же на по́льзꙋ бы́ти ще́дрѡ подаѧ́й: ᲂу҆миле́ннѡ мо́лимъ ти сѧ всебл҃же, ꙗ҆́коже дре́вле і҆и҃льтѧнѡмъ зе́млю ме́домъ и҆ млеко́мъ текꙋ́щꙋю дарова́ти, въ пꙋсты́ни і҆ѡа́нна крⷭ҇ти́телѧ твоего̀ ди́вїимъ ме́домъ воспита́ти бл҃гоизво́лилъ є҆сѝ: та́кожде ны́нѣ призрѣ́нїѧ твоегѡ̀ бл҃говоле́нїемъ къ живопита́нїю на́шемꙋ. се́й пче́льникъ и҆ є҆гѡ̀ ᲂу҆́лїѧ бл҃гословѝ, ᲂу҆множа́ѧ преꙋмно́жи въ не́мъ пче́лы, и҆ бл҃года́тїю твое́ю ѧ҆̀ соблюда́ющи, тꙋ́чнагѡ на́съ ме́да и҆спо́лни: да ника́кѡ се́й пче́льникъ созда́нїй твои́хъ пче́льныхъ лише́нъ, но всегда̀ преиспо́лненъ сѡ́ты ме́да бꙋ́детъ: и҆ по премно́гой бл҃госты́ни и҆ непобѣди́мѣй крѣ́пости твое́й, да ꙗ҆ви́тсѧ неподви́жимь мно́гими лꙋка́вствы, и҆ непоколеби́мь зазо́рными ѡ҆баѧ́нїи, но твое́ю всеси́льною ѡ҆гражде́нъ держа́вою, и҆ ѡ҆стѣне́нъ ѡ҆полче́нїемъ, ѿ всѧ́кагѡ кова́рства волше́бнагѡ сохране́нъ, и҆ всегда̀ въ твое́й хрⷭ҇тѐ рꙋкоѧ́ти невреди́мь пребꙋ́детъ. Твое́ бо є҆́сть, є҆́же ми́ловати и҆ сп҃са́ти ны̀ хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со ѻ҆ц҃е́мъ и҆ ст҃ы́мъ дх҃омъ, во вѣ́ки, а҆ми́нь.
И҆ кропи́тъ і҆ере́й пче́лъ и҆ ᲂу҆́лїѧ водо́ю сщ҃е́нною:
Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.
Посе́мъ глаго́летъ ѻ҆бы́чный дневны́й ѿпꙋ́стъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.