Оу҆ка́зъ, ка́кѡ подоба́етъ глаго́лати ѿпꙋ́сты
Оу҆ка́зъ, ка́кѡ подоба́етъ глаго́лати ѿпꙋ́сты во влⷣчни пра́здники, и҆ бг҃ома́тере, и҆ во всѐ лѣ́то.
Вѣ́домо же да бꙋ́детъ тебѣ̀ ѡ҆ се́мъ, і҆ере́ю: є҆гда̀ ѿпꙋ́стъ глаго́леши дневны́й, и҆лѝ на пра́здникъ бцⷣы, да не и҆́маши глаго́лати въ не́мъ: хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, честна́гѡ и҆ сла́внагѡ є҆ѧ̀ ржⷭ҇тва̀, и҆лѝ ᲂу҆спе́нїѧ, и҆лѝ введе́нїѧ, и҆ и҆ны́хъ пра́здникѡвъ є҆ѧ̀: и҆лѝ ст҃а́гѡ і҆ѡа́нна предте́чи рождества̀, и҆лѝ ᲂу҆сѣкнове́нїѧ, и҆ про́чихъ ст҃ы́хъ па́мѧти и҆лѝ преставле́нїѧ и҆́хъ, и҆лѝ ѡ҆брѣ́тенїѧ, и҆ пренесе́нїѧ моще́й. Но си́це глаго́ли, а҆́ще пра́здникъ бцⷣы, ржⷭ҇тва̀ є҆ѧ̀ и҆лѝ ᲂу҆спе́нїѧ, и҆ про́чихъ:
Хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ человѣколю́бецъ.
А҆́ще же ст҃а́гѡ: Хрⷭ҇то́съ и҆́стинный бг҃ъ на́шъ, моли́твами пречи́стыѧ своеѧ̀ мт҃ре, и҆ ст҃а́гѡ а҆по́стола, [и҆лѝ ст҃и́телѧ, и҆лѝ мꙋ́ченика,] и҆́мⷬ҇къ, и҆ всѣ́хъ ст҃ы́хъ: и҆ про́чее до конца̀.
Поне́же не ржⷭ҇тво̀ бцⷣы, нижѐ введе́нїе, и҆лѝ ᲂу҆спе́нїе є҆ѧ̀, подвиза́емъ къ бг҃ꙋ на моли́твꙋ, но са́мꙋю прест҃ꙋ́ю бцⷣꙋ: та́кожде, ни па̑мѧти, и҆лѝ преставлє́нїѧ ст҃ы́хъ приво́димъ на мл҃твꙋ къ бг҃ꙋ, но самѣ́хъ и҆̀хъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.