Служба с акафистом Иисусу Сладчайшему
Слꙋ́жба со а҆ка́ѳїстомъ
сладча́йшемꙋ гдⷭ҇ꙋ на́шемꙋ і҆и҃сꙋ хрⷭ҇тꙋ̀.
На Гдⷭ҇и воззва́хъ, стїхи̑ры ᲂу҆мили́тельны, гла́съ ѕ҃.
Подо́бенъ: Всю̀ ѿложи́вше:
І҆и҃се сладча́йшїй, дꙋшѝ моеѧ̀ ᲂу҆тѣше́нїе, і҆и҃се мо́й, ѡ҆чище́нїе ᲂу҆ма̀ моегѡ̀, влⷣко многомлⷭ҇тиве, і҆и҃се сп҃си́ мѧ. і҆и҃се сп҃се мо́й, і҆и҃се мо́й всеси́льне, не ѡ҆ста́ви менѐ. сп҃се і҆и҃се поми́лꙋй мѧ̀, и҆ и҆зба́ви мꙋ́ки всѧ́кїѧ і҆и҃се, и҆ сподо́би мѧ̀ сп҃са́емыхъ ча́сти і҆и҃се мо́й, и҆ ли́кꙋ и҆збра́нныхъ твои́хъ сопричти́ мѧ, і҆и҃се чл҃вѣколю́бче.
І҆и҃се сладча́йшїй, а҆пⷭ҇лѡвъ сла́во, і҆и҃се мо́й, похвало̀ мч҃нкѡвъ, влⷣко всеси́льне. і҆и҃се сп҃си́ мѧ, і҆и҃се сп҃се мо́й, і҆и҃се мо́й краснѣ́йшїй, къ тебѣ̀ притека́ющаго. сп҃се і҆и҃се поми́лꙋй мѧ̀, мл҃твами ро́ждшїѧ тѧ̀, всѣ́хъ і҆и҃се ст҃ы́хъ твои́хъ, прⷪ҇рѡ́къ же всѣ́хъ, сп҃се мо́й і҆и҃се, и҆ сла́дости ра́йскїѧ сподо́би, і҆и҃се чл҃вѣколю́бче.
І҆и҃се сладча́йшїй, мона́шествꙋющихъ сла́во, і҆и҃се долготерпѣли́ве, по́стникѡвъ наслажде́нїе и҆ ᲂу҆краше́нїе, і҆и҃се сп҃си́ мѧ, і҆и҃се сп҃се мо́й, і҆и҃се мо́й пребл҃гі́й, рꙋкѝ и҆схити́ мѧ сп҃се і҆и҃се ѕмі́евы, и҆ сегѡ̀ сѣ́тей ны́нѣ сп҃се і҆и҃се свободѝ. ѿ ро́ва преиспо́днѣйшагѡ сп҃се мо́й і҆и҃се возведѝ, и҆ десны̑мъ мѧ̀ сопричтѝ і҆и҃се ѻ҆вца́мъ.
Сла́ва, и҆ ны́нѣ, гла́съ в҃:
І҆и҃са сла́дкаго ро́ждшаѧ бг҃ороди́тельнице, і҆и҃са всеще́драго бг҃а и҆ чл҃вѣколюби́ваго, і҆и҃са є҆ди́наго бл҃гоꙋтро́бнаго, того̀ ᲂу҆молѝ влⷣчце мі́ра, всенепоро́чнаѧ, ᲂу҆ще́дрити менѐ ѻ҆каѧ́ннаго, и҆ шꙋ́ихъ ча́сти и҆зба́вити мѧ̀, и҆ сподо́бити десна́гѡ предстоѧ́нїѧ, є҆гда̀ сѧ́детъ сꙋди́ти мі́рꙋ, ꙗ҆́коже є҆́сть пи́сано.
На стїхо́внѣ стїхи̑ры, гла́съ ѕ҃:
Сп҃се мо́й і҆и҃се, блꙋ́днаго сп҃сы́й, сп҃се мо́й і҆и҃се прїе́мый блꙋдни́цꙋ, и҆ менѐ ны́нѣ поми́лꙋй, і҆и҃се многомлⷭ҇тиве, сп҃сѝ и҆ ᲂу҆ще́дри ѽ і҆и҃се бл҃года́телю, ꙗ҆́кѡ манассі́ю милосе́рде і҆и҃се мо́й, ꙗ҆́кѡ є҆ди́нъ чл҃вѣколю́бецъ.
Ни є҆ди́нꙋ же на землѝ за́повѣдь твою̀ сотвори́хъ, ка́кѡ ꙗ҆влю́сѧ тебѣ̀ сѣдѧ́щемꙋ на прⷭ҇то́лѣ, и҆ сло́во возда́мъ, и҆ сꙋ́дъ сотворю̀ ѡ҆ всѣ́хъ, ꙗ҆̀же въ вѣ́дѣнїи и҆ невѣ́дѣнїи ко́еждо содѣ́ѧхъ, хрⷭ҇тѐ мо́й і҆и҃се; тѣ́мже зовꙋ́ ти: твои́хъ слꙋ́гъ мл҃твами і҆и҃се, сп҃си́ мѧ грѣ́шнаго.
Кто́ мѧ не пла́четсѧ престꙋпи́вшагѡ за́повѣдь твою̀ і҆и҃се; невоздержа́нїемъ во а҆́дъ всели́хсѧ і҆и҃се, вмѣ́стѡ раѧ̀, снѣ́дїю сла́дкихъ видѣ́нїемъ сме́рть и҆схода́таихъ, и҆ твоеѧ̀ і҆и҃се сп҃се мо́й сла́вы и҆ жи́зни чꙋ́ждь ꙗ҆ви́хсѧ: но прїимѝ менѐ ка́ющасѧ, ꙗ҆́кѡ млⷭ҇тивый чл҃вѣколю́бецъ і҆и҃се мо́й, вели́кїѧ ра́ди млⷭ҇ти твоеѧ̀.
Сла́ва, и҆ ны́нѣ, бг҃оро́диченъ:
Чи́стаѧ є҆ди́на і҆и҃са ро́ждшаѧ, дꙋше́вныхъ прегрѣше́нїй и҆зба́ви мѧ̀ дв҃о, и҆ сп҃си́ мѧ ᲂу҆мерщвле́ннаго, молю́сѧ: ты́ бо наде́жда є҆сѝ ненаде́жныхъ, и҆ мі́рꙋ помо́щница. и҆́маши є҆́же мощѝ ѻ҆трокови́це ꙗ҆́кѡ мт҃и гдⷭ҇нѧ, не пре́зри моле́нїе моѐ, нижѐ ѡ҆ста́ви всечⷭ҇таѧ влⷣчце: но ꙗ҆́кѡ чл҃вѣколюби́ваѧ сп҃си́ мѧ.
Та́же тропарѝ, гла́съ ѕ҃:
Поми́лꙋй на́съ гдⷭ҇и, поми́лꙋй на́съ, всѧ́кагѡ бо ѿвѣ́та недоꙋмѣ́юще, сїю̀ тѝ мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.
Сла́ва: Гдⷭ҇и, поми́лꙋй на́съ, на тѧ́ бо ᲂу҆пова́хомъ, не прогнѣ́вайсѧ на ны̀ ѕѣлѡ̀, нижѐ помѧнѝ беззако́нїй на́шихъ: но при́зри и҆ ны́нѣ ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ вра̑гъ на́шихъ: ты́ бо є҆сѝ бг҃ъ на́шъ, и҆ мы̀ лю́дїе твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.
И҆ ны́нѣ: Млⷭ҇рдїѧ двє́ри ѿве́рзи на́мъ бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нїе ро́да хрⷭ҇тїа́нскагѡ.
Канѡ́нъ ᲂу҆мили́тельный
ко гдⷭ҇ꙋ на́шемꙋ і҆и҃сꙋ хрⷭ҇тꙋ̀.
Гла́съ в҃. Пѣ́снь а҃.
І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
І҆и҃се сладча́йшїй хрⷭ҇тѐ, і҆и҃се долготерпѣли́ве, дꙋшѝ моеѧ̀ ꙗ҆́звы и҆сцѣлѝ і҆и҃се, и҆ ᲂу҆сладѝ се́рдце моѐ многомлⷭ҇тиве молю́сѧ, і҆и҃се сп҃се мо́й, да велича́ю тѧ̀ сп҃са́емый.
І҆и҃се сладча́йшїй хрⷭ҇тѐ, і҆и҃се ѿве́рзи покаѧ́нїѧ мѝ две́рь, чл҃вѣколю́бче і҆и҃се, и҆ прїими́ мѧ тебѣ̀ припа́дающа, и҆ те́плѣ просѧ́ща, і҆и҃се сп҃се мо́й, согрѣше́нїй проще́нїѧ.
І҆и҃се сладча́йшїй хрⷭ҇тѐ, і҆и҃се и҆схити́ мѧ и҆з̾ рꙋкѝ льсти́вагѡ велїа́ра, і҆и҃се, и҆ сотворѝ десна́го предстоѧ́телѧ сла́вы твоеѧ̀, і҆и҃се сп҃се мо́й, ча́сти шꙋ́їѧ мѧ̀ и҆збавлѧ́ѧй.
Бг҃оро́диченъ: І҆и҃са ро́ждшаѧ бг҃а, влⷣчце, молѝ ѡ҆ непотре́бныхъ рабѣ́хъ пречⷭ҇таѧ, ꙗ҆́кѡ да мꙋ́ки мл҃твами твои́ми и҆зба́вимсѧ нескве́рнаѧ, ѡ҆скверне́ннїи, сла́вы присносꙋ́щныѧ наслажда́ющесѧ.
Пѣ́снь г҃.
І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ ꙗ҆́коже бг҃ъ на́шъ, и҆ нѣ́сть првⷣнъ па́че тебѐ гдⷭ҇и.
Оу҆слы́ши чл҃вѣколю́бче і҆и҃се мо́й раба̀ твоего̀, вопїю́ща во ᲂу҆миле́нїи: и҆ и҆зба́ви мѧ̀ і҆и҃се ѡ҆сꙋжде́нїѧ и҆ мꙋ́ки, є҆ди́не долготерпѣли́ве, і҆и҃се сладча́йшїй многомлⷭ҇тиве.
Под̾имѝ раба̀ твоего̀ і҆и҃се мо́й, припа́дающа со слеза́ми, і҆и҃се мо́й, и҆ сп҃сѝ і҆и҃се мо́й ка́ющагосѧ мѧ̀, и҆ гее́нны влⷣко и҆зба́ви, і҆и҃се сладча́йшїй многомлⷭ҇тиве.
Вре́мѧ і҆и҃се мо́й, є҆́же да́лъ мѝ є҆сѝ во стра́сти и҆жди́хъ і҆и҃се мо́й. тѣ́мже і҆и҃се мо́й, не ѿве́ржи мѧ̀, но воззовѝ, молю́сѧ, влⷣко, і҆и҃се сладча́йшїй, и҆ сп҃сѝ.
Бг҃оро́диченъ: Дв҃о ро́ждшаѧ і҆и҃са моего̀, молѝ и҆зба́вити мѧ̀ гее́нны, є҆ди́но предста́тельство ѡ҆скорблѧ́емыхъ бг҃обл҃года́тнаѧ, и҆ сподо́би мѧ̀ жи́зни всенепоро́чнаѧ нестарѣ́ющїѧсѧ.
Сѣда́ленъ,гла́съ а҃. Подо́бенъ: ро́бъ тво́й:
Сп҃се мо́й і҆и҃се, блꙋ́днаго сп҃сы́й, сп҃се мо́й і҆и҃се, прїе́мый блꙋдни́цꙋ и҆ менѐ ны́нѣ поми́лꙋй, і҆и҃се многомлⷭ҇тиве: сп҃сѝ, ᲂу҆ще́дри, ѽ і҆и҃се бл҃годѣ́телю, ꙗ҆́коже бл҃гоꙋтро́бне манассі́ю і҆и҃се мо́й, ꙗ҆́кѡ є҆ди́нъ чл҃вѣколю́бецъ.
Пѣ́снь д҃.
І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й гдⷭ҇и.
И҆сцѣлѝ і҆и҃се мо́й дꙋшѝ моеѧ̀ ꙗ҆́звы, і҆и҃се мо́й молю́сѧ, и҆ рꙋки́ мѧ и҆схитѝ, і҆и҃се мо́й бл҃гоꙋтро́бне, дꙋшетлѣ́ннагѡ велїа́ра, и҆ сп҃сѝ.
Согрѣши́хъ, і҆и҃се мо́й сладча́йшїй бл҃гоꙋтро́бне: і҆и҃се мо́й, сп҃си́ мѧ прибѣга́ющаго къ покро́вꙋ твоемꙋ̀, і҆и҃се долготерпѣли́ве, и҆ црⷭ҇твїѧ твоегѡ́ мѧ сподо́би.
Никто́же согрѣшѝ і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный: но припа́даю молѧ́сѧ, і҆и҃се мо́й сп҃си́ мѧ, и҆ жи́зни і҆и҃се мо́й наслѣ́дїе мѝ да́рꙋй.
Бг҃оро́диченъ: Всепѣ́таѧ, і҆и҃са ро́ждшаѧ гдⷭ҇а, того̀ молѝ и҆зба́вити мꙋ́ки всѧ̑ пою́щыѧ тѧ̀ и҆ бцⷣꙋ вои́стиннꙋ и҆менꙋ́ющыѧ.
Пѣ́снь є҃.
І҆рмо́съ: Просвѣще́нїе во тьмѣ̀ лежа́щихъ, сп҃се́нїе ѿча́ѧнныхъ хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебѐ бг҃а не зна́ю.
Ты̀ просвѣще́нїе і҆и҃се мо́й ᲂу҆ма̀ моегѡ̀. ты̀ сп҃се́нїе ѿча́ѧнныѧ дꙋшѝ моеѧ̀ сп҃се. ты̀ і҆и҃се мо́й мꙋ́ки и҆зба́ви и҆ гее́нны мѧ̀ зовꙋ́ща: сп҃сѝ і҆и҃се мо́й хрⷭ҇тѐ мѧ̀ ѻ҆каѧ́ннаго.
Всеконе́чнѡ і҆и҃се мо́й, къ стра́сти безче́стїѧ низве́рженъ ны́нѣ зовꙋ̀: ты̀ і҆и҃се мо́й, по́мощи мѝ рꙋ́кꙋ низпосла́въ, и҆сто́ргни зовꙋ́ща: сп҃сѝ і҆и҃се мо́й хрⷭ҇те́ мѧ ѻ҆каѧ́ннаго.
Ѡ҆скверне́нъ ᲂу҆́мъ і҆и҃се мо́й ѡ҆бносѧ̀, взыва́ю тѝ: ѡ҆чи́сти мѧ̀ ѿ скве́рны прегрѣше́нїй, и҆ и҆зба́ви мѧ̀ во глꙋбины̑ ѕло́бы ѿ невѣ́дѣнїѧ низпопо́лзшагосѧ, сп҃се і҆и҃се мо́й, и҆ сп҃си́ мѧ, молю́сѧ.
Бг҃оро́диченъ: І҆и҃са ро́ждшаѧ ѻ҆трокови́це бг҃ороди́тельнице, того̀ ᲂу҆молѝ сп҃стѝ всѧ̑ правосла̑вныѧ, мона́хи и҆ мїрскі̑ѧ, и҆ гее́нны и҆зба́вити зовꙋ́щыѧ: ра́звѣ тебѐ предста́тельства тве́рдагѡ на зна́емъ.
Пѣ́снь ѕ҃.
І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.
І҆и҃се мо́й хрⷭ҇тѐ многомлⷭ҇тиве, и҆сповѣ́дающасѧ прїими́ мѧ влⷣко, ѽ і҆и҃се, и҆ сп҃си́ мѧ, и҆ ѿ тлѝ і҆и҃се, мѧ̀ и҆схитѝ.
І҆и҃се мо́й, никто́же бы́сть и҆́нъ блꙋдни́къ, ꙗ҆́коже а҆́зъ стра́стный, ѽ і҆и҃се чл҃вѣколю́бче: но ты̀ і҆и҃се мѧ̀ сп҃сѝ.
І҆и҃се мо́й, блꙋдни́цꙋ и҆ блꙋ́днаго, и҆ манассі́ю и҆ мытарѧ̀ преидо́хъ, ѽ і҆и҃се мо́й, страстьмѝ, и҆ разбо́йника і҆и҃се, и҆ нїнеѵі́тѧны.
Бг҃оро́диченъ: І҆и҃са хрⷭ҇та̀ моего̀ ро́ждшаѧ пречⷭ҇таѧ дв҃о, є҆ди́на нескве́рнаѧ, ѡ҆скверне́на сꙋ́ща мѧ̀, мл҃твъ твои́хъ ѵ҆ссѡ́помъ ны́нѣ ѡ҆чи́сти.
Конда́къа҃, гла́съ и҃:
Возбра́нный воево́до и҆ гдⷭ҇и, а҆́да побѣди́телю, ꙗ҆́кѡ и҆зба́вльсѧ ѿ вѣ́чныѧ сме́рти, похва̑льнаѧ, восписꙋ́ю тѝ, созда́нїе и҆ ра́бъ тво́й: но ꙗ҆́кѡ и҆мѣ́ѧй млⷭ҇рдїе неизрече́нное, ѿ всѧ́кихъ мѧ̀ бѣ́дъ свободѝ, зовꙋ́ща: і҆и҃се сн҃е бж҃їй, поми́лꙋй мѧ̀.
І҆́косъа҃: А҆́гг҃лѡвъ тво́рче, и҆ гдⷭ҇и си́лъ, ѿве́рзи мѝ недоꙋмѣ́нный ᲂу҆́мъ и҆ ѧ҆зы́къ, на похвалꙋ̀ пречⷭ҇тагѡ твоегѡ̀ и҆́мене, ꙗ҆́коже глꙋхо́мꙋ и҆ гꙋгни́вомꙋ дре́вле слꙋ́хъ и҆ ѧ҆зы́къ ѿве́рзлъ є҆сѝ, и҆ глаго́лаше зовы́й такова̑ѧ: І҆и҃се пречꙋ́дный, а҆́гг҃лѡвъ ᲂу҆дивле́нїе: і҆и҃се преси́льный, прароди́телей и҆збавле́нїе. І҆и҃се пресла́дкїй, патрїа́рхѡвъ велича́нїе: і҆и҃се пресла́вный, царе́й ᲂу҆крѣпле́нїе. І҆и҃се прелюби́мый, прⷪ҇ро́кѡвъ и҆сполне́нїе: і҆и҃се преди́вный, мч҃нкѡвъ крѣ́посте. І҆и҃се прети́хїй, мона́хѡвъ ра́досте: і҆и҃се премлⷭ҇тивый, пресвѵ́терѡвъ сла́досте. І҆и҃се премлⷭ҇рдый, по́стникѡвъ воздержа́нїе: і҆и҃се пресла́достный, прпⷣбныхъ ра́дованїе. І҆и҃се пречⷭ҇тны́й, дѣ́вственныхъ цѣломꙋ́дрїе: і҆и҃се предвѣ́чный, грѣ́шникѡвъ сп҃се́нїе. І҆и҃се сн҃е бж҃їй, поми́лꙋй мѧ̀.
Конда́къв҃: Ви́дѧ вдови́цꙋ ѕѣ́льнѣ пла́чꙋщꙋ гдⷭ҇и, ꙗ҆́коже бо тогда̀ ᲂу҆млⷭ҇рдивсѧ, сы́на є҆ѧ̀ на погребе́нїе несо́ма воскр҃си́лъ є҆сѝ: си́це и҆ ѡ҆ мнѣ̀ ᲂу҆млⷭ҇рдисѧ, чл҃вѣколю́бче, и҆ грѣхмѝ ᲂу҆мерщвле́ннꙋю мою̀ дꙋ́шꙋ воскр҃сѝ, зовꙋ́щꙋ: А҆ллилꙋ́їа.
І҆́косъв҃: Ра́зꙋмъ неꙋразꙋмѣ́нный разꙋмѣ́ти фїлі́ппъ и҆щѧ̀, гдⷭ҇и покажѝ на́мъ ѻ҆ц҃а̀, глаго́лаше. ты́ же къ немꙋ̀: толи́кое вре́мѧ сы́й со мно́ю, не позна́лъ ли є҆сѝ, ꙗ҆́кѡ ѻ҆ц҃ъ во мнѣ̀, и҆ а҆́зъ во ѻ҆ц҃ѣ̀ є҆́смь; тѣ́мже неизслѣ́дованне, со стра́хомъ зовꙋ́ ти: І҆и҃се, бж҃е предвѣ́чный: і҆и҃се, цр҃ю̀ преси́льный. І҆и҃се, влⷣко долготерпѣли́вый: і҆и҃се, сп҃се премлⷭ҇тивый. І҆и҃се, храни́телю мо́й пребл҃гі́й: і҆и҃се, ѡ҆чи́сти грѣхѝ моѧ̑. І҆и҃се, ѿимѝ беззакѡ́нїѧ моѧ̑: і҆и҃се, ѿпꙋстѝ непра̑вды моѧ̑. І҆и҃се, наде́ждо моѧ̀, не ѡ҆ста́ви менѐ: і҆и҃се помо́щниче мо́й, не ѿри́ни менѐ. І҆и҃се, созда́телю мо́й, не забꙋ́ди менѐ: і҆и҃се, па́стырю мо́й; не погꙋбѝ менѐ. І҆и҃се сн҃е бж҃їи, поми́лꙋй мѧ̀.
Конда́къг҃: Си́лою свы́ше а҆пⷭ҇лы ѡ҆блекі́й і҆и҃се, во і҆ерⷭ҇ли́мѣ сѣдѧ́щыѧ, ѡ҆блецы̀ и҆ менѐ ѡ҆бнаже́ннаго ѿ всѧ́кагѡ бл҃готворе́нїѧ, теплото́ю дх҃а ст҃а́гѡ твоегѡ̀, и҆ да́ждь мѝ съ любо́вїю пѣ́ти тебѣ̀: А҆ллилꙋ́їа.
І҆́косъг҃: И҆мѣ́ѧй бога́тство млⷭ҇рдїѧ, мытарѝ и҆ грѣ́шники, и҆ невѣ̑рныѧ призва́лъ є҆сѝ і҆и҃се: не пре́зри и҆ менѐ ны́нѣ, подо́бнаго и҆̀мъ, но ꙗ҆́кѡ многоцѣ́нное мѵ́ро, прїимѝ пѣ́снь сїю̀: І҆и҃се, си́ло непобѣди́маѧ: і҆и҃се, млⷭ҇те безконе́чнаѧ. І҆и҃се, красото̀ пресвѣ́тлаѧ: і҆и҃се, любы̀ неизрече́ннаѧ. І҆и҃се, сн҃е бг҃а жива́гѡ: і҆и҃се, поми́лꙋй мѧ̀ грѣ́шнаго. І҆и҃се, ᲂу҆слы́ши мѧ̀ въ беззако́нїихъ зача́таго: і҆и҃се, ѡ҆чи́сти мѧ̀ во грѣсѣ́хъ рожде́ннаго. І҆и҃се, наꙋчи́ мѧ непотре́бнаго: і҆и҃се, ѡ҆свѣти́ мѧ те́мнаго. І҆и҃се, ѡ҆чи́сти мѧ̀ скве́рнаго: і҆и҃се, возведи́ мѧ блꙋ́днаго. І҆и҃се сн҃е бж҃їй, поми́лꙋй мѧ̀.
Конда́къд҃: Бꙋ́рю внꙋ́трь и҆мѣ́ѧй помышле́нїй сꙋмни́тельныхъ, пе́тръ ᲂу҆топа́ше: ᲂу҆зрѣ́въ же во пло́ти тѧ̀ сꙋ́ща і҆и҃се, и҆ по вода́мъ ходѧ́ща, позна́ тѧ бг҃а и҆́стиннаго, и҆ рꙋ́кꙋ сп҃се́нїѧ полꙋчи́въ, речѐ: А҆ллилꙋ́їа.
І҆́косъд҃: Слы́ша слѣпы́й, гдⷭ҇и, мимоходѧ́ща тѧ̀ пꙋте́мъ, вопїѧ́ше: і҆и҃се сн҃е дв҃довъ, поми́лꙋй мѧ̀: и҆ призва́въ ѿве́рзлъ є҆сѝ ѻ҆́чи є҆гѡ̀. просвѣтѝ ᲂу҆́бѡ млⷭ҇тїю твое́ю ѻ҆́чи мы́слєнныѧ се́рдца, и҆ менѐ вопїю́ща тѝ, и҆ глаго́люща: І҆и҃се, вы́шнихъ созда́телю: і҆и҃се, ни́жнихъ и҆скꙋпи́телю. І҆и҃се, преиспо́днихъ потреби́телю: і҆и҃се, всеѧ̀ тва́ри ᲂу҆краси́телю. І҆и҃се, дꙋшѝ моеѧ̀ ᲂу҆тѣ́шителю: і҆и҃се, ᲂу҆ма̀ моегѡ̀ просвѣти́телю. І҆и҃се, се́рдца моегѡ̀ весе́лїе: і҆и҃се, тѣ́ла моегѡ̀ здра́вїе. І҆и҃се сп҃се мо́й, сп҃си́ мѧ: і҆и҃се, свѣ́те мо́й просвѣти́ мѧ. І҆и҃се, мꙋ́ки всѧ́кїѧ и҆зба́ви мѧ̀: і҆и҃се, сп҃си́ мѧ недосто́йнаго. І҆и҃се сн҃е бж҃їй, поми́лꙋй мѧ̀.
Конда́къє҃: Бг҃ото́чною кро́вїю, ꙗ҆́коже и҆скꙋпи́лъ є҆сѝ на́съ дре́вле ѿ зако́нныѧ клѧ́твы і҆и҃се, си́це и҆змѝ на́съ ѿ сѣ́ти, є҆́юже ѕмі́й запѧ́тъ ны̀ страстьмѝ плотски́ми, и҆ блꙋ́днымъ наважде́нїемъ, и҆ ѕлы́мъ ᲂу҆ны́нїемъ, вопїю́щыѧ тѝ: А҆ллилꙋ́їа.
І҆́косъє҃: Ви́дѣвше ѻ҆́троцы є҆вре́йстїи во ѡ҆́бразѣ человѣ́честѣмъ созда́вшаго рꙋко́ю человѣ́ка, и҆ влⷣкꙋ разꙋмѣ́вше є҆го̀, потща́шасѧ вѣ́твьми ᲂу҆годи́ти є҆мꙋ̀ ѡ҆са́нна вопїю́ще, мы́ же пѣ́снь прино́симъ тѝ глаго́люще: І҆и҃се, бж҃е и҆́стинный: і҆и҃се, сн҃е дв҃довъ. І҆и҃се, цр҃ю̀ пресла́вный: і҆и҃се, а҆́гнче непоро́чный. І҆и҃се, па́стырю преди́вный: і҆и҃се, храни́телю во мла́дости мое́й. І҆и҃се, корми́телю во ю҆́ности мое́й: і҆и҃се, похвало̀ въ ста́рости мое́й. І҆и҃се, наде́ждо въ сме́рти мое́й: і҆и҃се, животѐ по сме́рти мое́й. І҆и҃се, ᲂу҆тѣше́нїе моѐ на сꙋдѣ̀ твое́мъ: і҆и҃се, жела́нїе моѐ, не посрамѝ менѐ тогда̀. І҆и҃се сн҃е бж҃їй, поми́лꙋй мѧ̀.
Конда́къѕ҃: Проповѣ̑дникъ бг҃оно́сныхъ вѣща́нїе и҆ глаго́лы и҆сполнѧ́ѧ і҆и҃се, на землѝ ꙗ҆́вльсѧ, и҆ съ человѣ́ки невмѣсти́мый пожи́лъ є҆сѝ, и҆ болѣ̑зни на́шѧ под̾ѧ́лъ є҆сѝ. ѿню́дꙋже ра́нами твои́ми мы̀ и҆сцѣлѣ́вше, пѣ́ти навыко́хомъ: А҆ллилꙋ́їа.
І҆́косъѕ҃: Возсїѧ̀ вселе́ннѣй просвѣще́нїе и҆́стины твоеѧ̀, и҆ ѿгна́сѧ ле́сть бѣсо́вскаѧ: і҆́дѡли бо, сп҃се на́шъ, не терпѧ́ще твоеѧ̀ крѣ́пости, падо́ша. мы́ же сп҃се́нїе полꙋчи́вше, вопїе́мъ тѝ: І҆и҃се, и҆́стино, ле́сть ѿгонѧ́щаѧ: і҆и҃се, свѣ́те превы́шшїй всѣ́хъ свѣ́тлостей. І҆и҃се цр҃ю̀, премога́ѧй всѣ́хъ крѣ́пости: і҆и҃се бж҃е, пребыва́ѧй въ млⷭ҇ти. І҆и҃се, хлѣ́бе живо́тный, насы́ти мѧ̀ а҆́лчꙋщаго: і҆и҃се, и҆сто́чниче ра́зꙋма, напо́й мѧ̀ жа́ждꙋщаго. І҆и҃се, ѻ҆де́ждо весе́лїѧ, ѡ҆дѣ́й мѧ̀ тлѣ́ннаго: і҆и҃се, покро́ве ра́дости, покры́й мѧ̀ недосто́йнаго. І҆и҃се, пода́телю просѧ́щымъ, да́ждь мѝ пла́чь за грѣхѝ моѧ̑: і҆и҃се, ѡ҆брѣ́тенїе и҆́щꙋщихъ ѡ҆брѧ́щи дꙋ́шꙋ мою̀. І҆и҃се, ѿве́рзителю толкꙋ́щымъ, ѿве́рзи се́рдце моѐ ѻ҆каѧ́нное: і҆и҃се, и҆скꙋпи́телю грѣ́шныхъ, ѡ҆чи́сти беззакѡ́нїѧ моѧ̑. І҆и҃се сн҃е бж҃їй, поми́лꙋй мѧ̀.
Конда́къз҃: Хотѧ̀ сокрове́ннꙋю та́йнꙋ ѿ вѣ́ка ѿкры́ти, ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ і҆и҃се, и҆ ꙗ҆́кѡ а҆́гнецъ прѧ́мѡ стригꙋ́щаго є҆го̀ безгла́сенъ, и҆ ꙗ҆́кѡ бг҃ъ и҆з̾ ме́ртвыхъ воскрⷭ҇лъ є҆сѝ, и҆ со сла́вою на нб҃са̀ возне́слсѧ є҆сѝ, и҆ на́съ совоздви́глъ є҆сѝ, зовꙋ́щихъ: А҆ллилꙋ́їа.
І҆́косъз҃: Ди́внꙋю показа̀ тва́рь, ꙗ҆вле́йсѧ творе́цъ на́мъ, без̾ сѣ́мене ѿ дв҃ы воплоти́сѧ, и҆з̾ гро́ба печа̑ти не рꙋши́въ воскр҃се, и҆ ко а҆пⷭ҇лѡмъ две́ремъ затворє́ннымъ съ пло́тїю вни́де. тѣ́мже чꙋдѧ́щесѧ, воспои́мъ: І҆и҃се, сло́ве неѡбыме́нный: і҆и҃се, сло́ве несоглѧда́емый. І҆и҃се, си́ло непостижи́маѧ: і҆и҃се, мꙋ́дросте недомы́слимаѧ. І҆и҃се, бж҃ество̀ неѡпи́санное: і҆и҃се, гдⷭ҇ьство неисче́тное. І҆и҃се, ца́рство непобѣди́мое: і҆и҃се, влады́чество безконе́чное. І҆и҃се, крѣ́посте высоча́йшаѧ, і҆и҃се, вла́сте вѣ́чнаѧ. І҆и҃се, тво́рче мо́й, ᲂу҆ще́дри мѧ̀: і҆и҃се сп҃се мо́й, сп҃си́ мѧ. І҆и҃се сн҃е бж҃їй, поми́лꙋй мѧ̀.
Конда́къи҃: Стра́ннѡ бг҃а вочл҃вѣ́чшасѧ ви́дѧще, ᲂу҆страни́мсѧ сꙋ́етнагѡ мі́ра, и҆ ᲂу҆́мъ на бж҃е́ствєннаѧ возложи́мъ: сегѡ́ бо ра́ди бг҃ъ на зе́млю сни́де, да на́съ на нб҃са̀ возведе́тъ, вопїю́щихъ є҆мꙋ̀: А҆ллилꙋ́їа.
І҆́косъи҃: Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неисче́тный: є҆гда̀ во́лею на́съ ра́ди пострада̀, и҆ сме́ртїю свое́ю на́шꙋ сме́рть ᲂу҆мертвѝ, и҆ воскрⷭ҇нїемъ живо́тъ дарова̀, пою́щымъ: І҆и҃се, сла́досте серде́чнаѧ: і҆и҃се, крѣ́посте тѣле́снаѧ. І҆и҃се, свѣ́тлосте дꙋше́внаѧ: і҆и҃се, быстрото̀ ᲂу҆́мнаѧ. І҆и҃се, ра́досте со́вѣстнаѧ: і҆и҃се, наде́ждо и҆звѣ́стнаѧ. І҆и҃се, па́мѧте предвѣ́чнаѧ: і҆и҃се, похвало̀ высо́каѧ. І҆и҃се, сла́во моѧ̀ превознесе́ннаѧ: і҆и҃се, жела́нїе моѐ, не ѿри́ни менѐ. І҆и҃се, па́стырю мо́й, взыщѝ менѐ: і҆и҃се, сп҃се мо́й, сп҃сѝ менѐ. І҆и҃се сн҃е бж҃їй, поми́лꙋй мѧ̀.
Конда́къѳ҃: Всѐ є҆стество̀ а҆́гг҃льское, безпреста́ни сла́витъ прест҃о́е и҆́мѧ твоѐ і҆и҃се на нб҃сѝ, ст҃ъ, ст҃ъ, ст҃ъ, вопїю́ще: мы́ же грѣ́шнїи на землѝ бре́нными ᲂу҆стна́ми вопїе́мъ: А҆ллилꙋ́їа.
І҆́косъѳ҃: Вѣті̑ѧ многовѣща̑нныѧ, ꙗ҆́коже ры̑бы безгла̑сныѧ ви́димъ ѡ҆ тебѣ̀ і҆и҃се сп҃се на́шъ: недоꙋмѣ́ютъ бо глаго́лати, ка́кѡ бг҃ъ непрело́жный, и҆ человѣ́къ соверше́нный пребыва́еши; мы́ же та́инствꙋ дивѧ́щесѧ, вопїе́мъ вѣ́рнѡ: І҆и҃се, бж҃е предвѣ́чный: і҆и҃се, цр҃ю̀ ца́рствꙋющихъ. І҆и҃се, влⷣко владѣ́ющихъ: і҆и҃се, сꙋдїѐ живы́хъ и҆ ме́ртвыхъ. І҆и҃се, наде́ждо ненаде́жныхъ: і҆и҃се, ᲂу҆тѣше́нїе пла́чꙋщихъ. І҆и҃се, сла́во ни́щихъ: і҆и҃се, не ѡ҆сꙋди́ мѧ по дѣлѡ́мъ мои̑мъ. І҆и҃се, ѡ҆чи́сти мѧ̀ по млⷭ҇ти твое́й: і҆и҃се, ѿженѝ ѿ менѐ ᲂу҆ны́нїе. І҆и҃се, просвѣтѝ моѧ̑ мы̑сли сердє́чныѧ: і҆и҃се, да́ждь мѝ па́мѧть сме́ртнꙋю. І҆и҃се сн҃е бж҃їй, поми́лꙋй мѧ̀.
Конда́къі҃: Сп҃стѝ хотѧ̀ мі́ръ восто́че восто́кѡмъ, къ те́мномꙋ за́падꙋ є҆стествꙋ̀ на́шемꙋ прише́дъ, смири́лсѧ є҆сѝ до сме́рти. тѣ́мже превознесе́сѧ и҆́мѧ твоѐ, па́че всѧ́кагѡ и҆́мене, и҆ ѿ всѣ́хъ колѣ́нъ небе́сныхъ и҆ земны́хъ слы́шиши: А҆ллилꙋ́їа.
І҆́косъі҃: Цр҃ю̀ превѣ́чный, ᲂу҆тѣ́шителю хрⷭ҇тѐ и҆́стинный, ѡ҆чи́сти ны̀ ѿ всѧ́кїѧ скве́рны, ꙗ҆́коже ѡ҆чи́стилъ є҆сѝ де́сѧть прокаже́нныхъ, и҆ и҆сцѣлѝ ны̀, ꙗ҆́коже и҆сцѣли́лъ є҆сѝ сребролюби́вꙋю дꙋ́шꙋ закхе́а мытарѧ̀, да вопїе́мъ тѝ во ᲂу҆миле́нїи, зовꙋ́ще: І҆и҃се, сокро́вище нетлѣ́нное: і҆и҃се, бога́тство неистощи́мое. І҆и҃се, пи́ще крѣ́пкаѧ: і҆и҃се, питїѐ неисчерпа́емое. І҆и҃се, ни́щихъ ѡ҆дѣѧ́нїе: і҆и҃се, вдѡ́въ застꙋпле́нїе. І҆и҃се, си́рыхъ защи́тниче: і҆и҃се, трꙋжда́ющихсѧ по́моще. І҆и҃се, стра́нныхъ наста́вниче: і҆и҃се, пла́вающихъ ко́рмчїй. І҆и҃се, бꙋ́рныхъ ѡ҆ти́шїе: і҆и҃се бж҃е, воздви́гни мѧ̀ па́дшаго. І҆и҃се сн҃е бж҃їй, поми́лꙋй мѧ̀.
Конда́къа҃і: Пѣ́нїе всеꙋмиле́нное приношꙋ́ ти недосто́йный, вопїю́ ти ꙗ҆́кѡ ханане́а: і҆и҃се поми́лꙋй мѧ̀. не дще́рь бо, но пло́ть и҆́мамъ страстьмѝ лю́тѣ бѣсѧ́щꙋюсѧ, и҆ ꙗ҆́ростїю пали́мꙋю, и҆ и҆сцѣле́нїѧ да́ждь вопїю́щꙋ тѝ: А҆ллилꙋ́їа.
І҆́косъа҃і: Свѣтопода́тельна свѣти́льника сꙋ́щымъ во тьмѣ̀ неразꙋ́мїѧ, пре́жде гонѧ́й тѧ̀ па́ѵелъ, бг҃оразꙋ́мнагѡ гла́са си́лꙋ внꙋшѝ, и҆ дꙋше́внꙋю быстротꙋ̀ ᲂу҆ѧснѝ: си́це и҆ менѐ тє́мныѧ зѣ̑ницы дꙋшє́вныѧ просвѣтѝ, зовꙋ́ща: І҆и҃се, цр҃ю̀ мо́й прекрѣ́пкїй: і҆и҃се, бж҃е мо́й преси́льный. І҆и҃се, гдⷭ҇и мо́й пребезсме́ртный. і҆и҃се, созда́телю мо́й пресла́вный. І҆и҃се, наста́вниче мо́й предо́брый: і҆и҃се, па́стырю мо́й преще́дрый. І҆и҃се, влⷣко мо́й премлⷭ҇тивый: і҆и҃се, сп҃се мо́й премлⷭ҇рдый. І҆и҃се просвѣтѝ моѧ̑ чꙋ̑вствїѧ потемнє́ннаѧ страстьмѝ: і҆и҃се, и҆сцѣлѝ моѐ тѣ́ло ѡ҆стрꙋпле́нное грѣхмѝ. І҆и҃се, ѡ҆чи́сти мо́й ᲂу҆́мъ ѿ по́мыслѡвъ сꙋ́етныхъ: і҆и҃се, сохранѝ се́рдце моѐ ѿ по́хотей лꙋка́выхъ. І҆и҃се сн҃е бж҃їй, поми́лꙋй мѧ̀.
Конда́къв҃і: Бл҃года́ть пода́ждь мѝ всѣ́хъ долгѡ́въ рѣши́телю, і҆и҃се, и҆ прїими́ мѧ ка́ющасѧ, ꙗ҆́коже прїѧ́лъ є҆сѝ петра̀ ѿве́ргшагосѧ тебѐ, и҆ призови́ мѧ ᲂу҆ныва́ющаго, ꙗ҆́коже дре́вле па́ѵла гонѧ́ща тѧ̀, и҆ ᲂу҆слы́ши мѧ̀ вопїю́ща тѝ: А҆ллилꙋ́їа.
І҆́косъв҃і: Пою́ще твоѐ вочл҃вѣ́ченїе, восхвалѧ́емъ тѧ̀ всѝ, и҆ вѣ́рꙋемъ со ѳѡмо́ю, ꙗ҆́кѡ гдⷭ҇ь и҆ бг҃ъ є҆сѝ сѣдѧ́й со ѻ҆ц҃е́мъ, и҆ хотѧ́й сꙋди́ти живы̑мъ и҆ мє́ртвымъ. тогда̀ ᲂу҆́бѡ сподо́би мѧ̀ десна́гѡ стоѧ́нїѧ вопїю́щаго: І҆и҃се, цр҃ю̀ предвѣ́чный, поми́лꙋй мѧ̀: і҆и҃се, цвѣ́те бл҃гово́нный, ѡ҆бл҃гоꙋха́й мѧ̀. І҆и҃се, теплото̀ люби́маѧ, ѡ҆грѣ́й мѧ̀: і҆и҃се, хра́ме предвѣ́чный, покры́й мѧ̀. І҆и҃се, ѻ҆де́ждо свѣ́тлаѧ, ᲂу҆краси́ мѧ: і҆и҃се, би́сере чⷭ҇тны́й, ѡ҆сїѧ́й мѧ̀. І҆и҃се, ка́меню драгі́й, просвѣтѝ мѧ̀: і҆и҃се, сл҃нце пра́вды, ѡ҆свѣти́ мѧ. І҆и҃се, свѣ́те ст҃ы́й, ѡ҆блиста́й мѧ̀: і҆и҃се, болѣ́зни дꙋше́вныѧ и҆ тѣле́сныѧ и҆зба́ви мѧ̀. І҆и҃се, и҆з̾ рꙋкѝ сопроти́вныѧ и҆зми́ мѧ: і҆и҃се, ѻ҆гнѧ̀ неꙋгаси́магѡ, и҆ про́чихъ вѣ́чныхъ мꙋ́къ свободи́ мѧ. І҆и҃се сн҃е бж҃їй, поми́лꙋй мѧ̀.
Конда́къг҃і: ѽ пресла́дкїй и҆ всеще́дрый і҆и҃се! прїимѝ ны́нѣ ма́лое моле́нїе сїѐ на́ше, ꙗ҆́коже прїѧ́лъ є҆сѝ вдови́цы двѣ̀ лє́птѣ: и҆ сохранѝ достоѧ́нїе твоѐ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплемє́нникъ, ѿ недꙋ́га и҆ гла́да, ѿ всѧ́кїѧ ско́рби, и҆ смертоно́сныѧ ра́ны, и҆ грѧдꙋ́щїѧ и҆змѝ мꙋ́ки всѣ́хъ, вопїю́щихъ тѝ: А҆ллилꙋ́їа.
Се́й конда́къ глаго́ли три́жды.
И҆ па́ки чте́тсѧ а҃-й і҆́косъ: А҆́гг҃лѡвъ тво́рче:
И҆ па́ки конда́къ пе́рвый: Возбра́нный воево́до:
Пѣ́снь з҃.
І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Хрⷭ҇тѐ і҆и҃се, никто́же согрѣшѝ на землѝ ѿ вѣ́ка, ѽ і҆и҃се мо́й, ꙗ҆́коже согрѣши́хъ а҆́зъ ѻ҆каѧ́нный и҆ блꙋ́дный. тѣ́мже і҆и҃се мо́й, вопїю́ ти: пою́ща мѧ̀ ᲂу҆ще́дри, бл҃гослове́нъ є҆сѝ бж҃е ѻ҆тє́цъ на́шихъ.
Хрⷭ҇тѐ і҆и҃се, ко стра́хꙋ твоемꙋ̀ вопїю̀, пригвозди́ мѧ, ѽ і҆и҃се мо́й, и҆ ѡ҆кормѝ ны́нѣ ко приста́нищꙋ бл҃гоѡти́шномꙋ, ꙗ҆́кѡ да, і҆и҃се мо́й ще́дре, пою́ ти сп҃са́емый: бл҃гослове́нъ є҆сѝ бж҃е ѻ҆тє́цъ на́шихъ.
Хрⷭ҇тѐ і҆и҃се, тьма́ми ѡ҆бѣща́хъ тебѣ̀ стра́стный, ѽ і҆и҃се мо́й, покаѧ́нїе, но солга́хъ ѻ҆каѧ́нный. тѣ́мже і҆и҃се мо́й вопїю́ ти: нечꙋ́вственнѣ пребыва́ющꙋю дꙋ́шꙋ мою̀ просвѣтѝ хрⷭ҇тѐ, ѻ҆тцє́въ бж҃е бл҃гослове́нъ є҆сѝ.
Бг҃оро́диченъ: Хрⷭ҇та̀ і҆и҃са ро́ждшаѧ стра́ннѡ, и҆ па́че є҆стества̀, того̀ молѝ всенепоро́чнаѧ, ꙗ҆̀же чрез̾ є҆стество̀ моѧ̑ прегрѣшє́нїѧ всѧ̑ прости́ти мѝ ѻ҆трокови́це, да зовꙋ̀ сп҃са́емь: бл҃гослове́на є҆сѝ бг҃а пло́тїю ро́ждшаѧ.
Пѣ́снь и҃.
І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Тѧ̀ і҆и҃се мо́й молю̀, ꙗ҆́коже блꙋдни́цꙋ і҆и҃се мо́й и҆зба́вилъ є҆сѝ мно́гихъ согрѣше́нїй: та́кѡ и҆ менѐ і҆и҃се хрⷭ҇тѐ мо́й и҆зба́ви, и҆ ѡ҆чи́сти ѡ҆скверне́ннꙋю дꙋ́шꙋ мою̀, і҆и҃се мо́й.
Преклони́всѧ і҆и҃се, безслове́сными сластьмѝ, безслове́сенъ ꙗ҆ви́хсѧ, и҆ скотѡ́мъ вои́стиннꙋ, ѽ і҆и҃се мо́й, стра́стнѡ ѻ҆каѧ́нный ᲂу҆подо́бихсѧ сп҃се. тѣ́мже і҆и҃се безслове́сїѧ мѧ̀ и҆зба́ви.
Впа́дъ, ѽ і҆и҃се, въ дꙋшетлѣ̑нныѧ разбо́йники, ѡ҆бнажи́хсѧ ѻ҆де́жды, і҆и҃се мо́й, бг҃отка́нныѧ ны́нѣ, и҆ лежꙋ̀ ра́нами ᲂу҆ѧ́звленъ: є҆ле́й, хрⷭ҇тѐ мо́й, возле́й на мѧ̀ и҆ вїно̀.
Бг҃оро́диченъ: І҆и҃са моего̀ и҆ бг҃а носи́вшаѧ хрⷭ҇та̀ несказа́ннѡ, бцⷣе мр҃і́е, того̀ молѝ при́снѡ ѿ бѣ́дъ сп҃сти́сѧ рабѡ́мъ твои̑мъ, и҆ пѣвцє́мъ твои̑мъ, неискꙋсомꙋ́жнаѧ дв҃о.
Пѣ́снь ѳ҃.
І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Манассі́ю і҆и҃се мо́й, мытарѧ̀, блꙋдни́цꙋ, блꙋ́днаго ще́дре і҆и҃се, и҆ разбо́йника преидо́хъ і҆и҃се мо́й, въ дѣ́лѣхъ стꙋ́дныхъ и҆ безмѣ́стныхъ і҆и҃се: но ты̀ і҆и҃се мо́й, предвари́въ мѧ̀ сп҃сѝ.
Ѿ а҆да́ма і҆и҃се мо́й согрѣши́вшыѧ всѧ̑, пре́жде зако́на и҆ въ зако́нѣ і҆и҃се, и҆ по зако́нѣ ѻ҆каѧ́нный, и҆ бл҃года́ти, і҆и҃се мо́й, побѣди́хъ страстьмѝ ѻ҆каѧ́ннѡ: но ты̀ і҆и҃се мо́й, сꙋдьба́ми твои́ми сп҃си́ мѧ.
Да не ѿлꙋче́нъ бꙋ́дꙋ і҆и҃се мо́й неизрече́нныѧ твоеѧ̀ сла́вы, да не ᲂу҆лꙋчꙋ̀ ча́сти і҆и҃се шꙋ́їѧ, сладча́йшїй і҆и҃се: но ты́ мѧ дєсны́мъ ѻ҆вца́мъ твои̑мъ, хрⷭ҇тѐ і҆и҃се мо́й, сочета́въ ᲂу҆поко́й, ꙗ҆́кѡ бл҃гоꙋтро́бенъ.
Бг҃оро́диченъ: І҆и҃са бцⷣе, є҆го́же носи́ла є҆сѝ, є҆ди́на неискꙋсомꙋ́жнаѧ дв҃о мр҃і́е, того̀ чⷭ҇таѧ ᲂу҆ми́лостиви, ꙗ҆́кѡ сн҃а твоего̀ и҆ зижди́телѧ, и҆зба́вити притека́ющыѧ къ тебѣ̀ и҆скꙋше́нїй и҆ бѣ́дъ, и҆ ѻ҆гнѧ̀ бꙋ́дꙋщагѡ.
Свѣти́ленъ: І҆и҃се, премꙋ́дрости и҆ смы́сла пода́телю, ни́щымъ корми́телю, си̑рымъ застꙋ́пниче, болѧ́щымъ врачꙋ̀, и҆сцѣлѝ и҆ просвѣтѝ моѐ се́рдце і҆и҃се, стрꙋ́пы грѣхо́вными и҆ страсте́й тле́ю покрове́нное і҆и҃се, и҆ сп҃си́ мѧ.
Бг҃оро́диченъ: Сїѧ́нїемъ дв҃о и҆з̾ тебѐ возсїѧ́вшагѡ свѣ́та, ᲂу҆́мъ мо́й ѡ҆зарѝ, се́рдце просвѣтѝ, тьмꙋ̀ грѣхо́внꙋю ѿгонѧ́ющи, и҆ мглꙋ̀ лѣ́ности моеѧ̀ потреблѧ́ющи.
На хвали́техъ стїхи̑ры, гла́съ д҃:
Ди́вное и҆́мѧ твоѐ і҆и҃се сп҃се на́шъ, а҆́гг҃ли пою́тъ на нб҃сѝ, и҆ мы̀ грѣ́шнїи на землѝ бре́нными ᲂу҆стна́ми воспѣва́емъ, є҆гѡ́же ра́ди поми́лꙋй на́съ.
Превели́кое и҆́мѧ твоѐ, сп҃се, на нб҃сѝ ѡ҆деснꙋ́ю ѻ҆ц҃а̀ сѣдѧ́щꙋ тѝ, почита́етсѧ: на земли́ же неизрече́нное твоѐ воплоще́нїе сла́витсѧ: во а҆́дѣ же соше́ствїе бѣ́сы ᲂу҆страша́етъ: ѿ ни́хже и҆ на́съ и҆зба́ви хрⷭ҇тѐ бж҃е, и҆ сп҃сѝ на́съ.
А҆ввакꙋ́мъ, ꙗ҆́кѡ въ гада́нїи разꙋмѣ́въ чꙋ̑днаѧ дѣла̀ твоѧ̑, со стра́хомъ ᲂу҆диви́сѧ, и҆ прибли́жившымсѧ лѣ́тѡмъ позна́лсѧ є҆сѝ блꙋдни́цами и҆ разбо́йниками і҆и҃се: а҆́зъ же ѻ҆каѧ́нный въ небреже́нїи пребыва́ю. но да́ждь мѝ понѐ ѿны́нѣ ра́зꙋмъ, и҆ стра́хъ тво́й млⷭ҇рде, и҆ ве́лїю млⷭ҇ть.
Сла́ва, и҆ ны́нѣ: И҆зба́вительнице крѣ́пкаѧ на тѧ̀ надѣ́ющымсѧ, къ ти́хомꙋ приста́нищꙋ бж҃е́ственнагѡ хотѣ́нїѧ наста́ви мѧ̀ бцⷣе, мт҃рнимъ твои́мъ дерзнове́нїемъ, є҆́же и҆́маши къ сн҃ꙋ твоемꙋ̀ бг҃оневѣ́сто.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.