Седьмая седмица по Пасхе (с понедельника по пяток)
<<сѕ҃і ѡ҆б.: 432>>
Въ недѣ́лю ве́чера,
на Гдⷭ҇и воззва́хъ: поста́вимъ стїхѡ́въ ѕ҃, и҆ пое́мъ стїхи̑ры ст҃ы́хъ ѻ҆ц҃ъ, г҃, гла́съ ѕ҃.
Подо́бенъ: Ѿча́ѧннаѧ:
И҆з̾ чре́ва роди́лсѧ є҆сѝ пре́жде денни́цы, ѿ ѻ҆ц҃а̀ безмт҃ренъ пре́жде вѣ́къ: а҆́ще и҆ а҆́рїй тва́рь тѧ̀, а҆ не бг҃а сла́витъ, де́рзостїю смѣша́ѧ тѧ̀ зижди́телѧ тва́ремъ безꙋ́мнѡ, вещество̀ ѻ҆гнѧ̀ вѣ́чнагѡ себѣ̀ сокро́вищствꙋѧй. но собо́ръ, и҆́же въ нїке́и, сн҃а бж҃їѧ тѧ̀ проповѣ́да гдⷭ҇и, ѻ҆ц҃ꙋ̀ и҆ дх҃ꙋ сопресто́льна.
Кто̀ твою̀ сп҃се ри́зꙋ раздра̀; а҆́рїй, ты̀ ре́клъ є҆сѝ, и҆́же трⷪ҇цы пресѣчѐ є҆диноче́стное нача́ло въ раздѣлє́нїѧ: се́й ѿве́рже тѧ̀ бы́ти є҆ди́наго ѿ трⷪ҇цы, се́й и҆ несто́рїа ᲂу҆́читъ бцⷣꙋ не глаго́лати. но собо́ръ, и҆́же въ нїке́и сн҃а бж҃їѧ тѧ̀ проповѣ́да гдⷭ҇и, ѻ҆ц҃ꙋ̀ и҆ дх҃ꙋ сопресто́льна.
Въ бре́гъ па́даетъ грѣха̀, а҆́рїй возненави́дѣвый свѣ́та ви́дѣти, и҆ бж҃е́ственною растерза́етсѧ ᲂу҆́дицею внꙋ́треннихъ, всѐ и҆зда́ти сꙋщество̀ и҆ дꙋ́шꙋ нꙋ́жнѡ, дрꙋгі́й і҆ꙋ́да бы́въ нра́вомъ и҆ ѻ҆́бразомъ. но собо́ръ, и҆́же въ нїке́и, сн҃а бж҃їѧ тѧ̀ проповѣ́да гдⷭ҇и, ѻ҆ц҃ꙋ̀ и҆ дх҃ꙋ сопресто́льна.
И҆ мине́и ст҃а́гѡ, г҃. Сла́ва: гла́съ ѕ҃.
Та́инствєнныѧ дне́сь дх҃а трꙋбы̑, бг҃онѡ́сныѧ ѻ҆ц҃ы̀ восхва́лимъ пѣснопѣ́вшыѧ посредѣ̀ цр҃кве, пѣ́снь сли́чнꙋю бг҃осло́вїѧ, трⷪ҇цꙋ є҆ди́нꙋ непремѣ́ннꙋю, сꙋщество́ же и҆ бж҃ество̀: низложи́тели а҆́рїевы, и҆ правосла́вныхъ побо́рники, молѧ́щыѧсѧ всегда̀ гдⷭ҇ꙋ, поми́ловатисѧ дꙋша́мъ на́шымъ. <<сз҃і: 433>>
И҆ ны́нѣ, гла́съ то́йже:
На гора́хъ ст҃ы́хъ зрѧ́ще твоѐ вознесе́нїе хрⷭ҇тѐ, сїѧ́нїе сла́вы ѻ҆́ч҃и, пое́мъ тво́й свѣтоѻбра́зный лица̀ зра́къ, кла́нѧемсѧ страсте́мъ твои̑мъ, почита́емъ воскресе́нїе, сла́вное вознесе́нїе сла́вѧще, поми́лꙋй на́съ.
На стїхо́внѣ стїхи̑ры, гла́съ ѕ҃: Всѐ собра́вше дꙋше́вное хꙋдо́жество: со стїхѝ и҆́хъ. Пи́саны сегѡ̀ днѐ на хвали́техъ.
Сла́ва, гла́съ г҃:
А҆по́стольскихъ преда́нїй и҆звѣ́стнїи храни́телїе бы́сте ст҃і́и ѻ҆ц҃ы̀: ст҃ы́ѧ бо трⷪ҇цы є҆диносꙋ́щное правосла́внѡ наꙋчи́вше, а҆́рїево хꙋле́нїе собо́рнѣ низложи́сте, съ ни́мъ же и҆ македо́нїа дх҃обо́рца ѡ҆бличи́вше, ѡ҆сꙋди́сте несто́рїа, є҆ѵтѵ́хїа и҆ дїоско́ра, саве́ллїа же и҆ севи́ра безгла́внаго: и҆́хже пре́лести и҆спроси́те и҆зба́витисѧ на́мъ, и҆ нескве́рнꙋ на́шемꙋ житїю̀ въ вѣ́рѣ сохрани́тисѧ, мо́лимсѧ.
И҆ ны́нѣ: гла́съ ѕ҃:
Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ, є҆́же вознестѝ па́дшїй ѻ҆́бразъ а҆да́мовъ, и҆ посла́ти дх҃а ᲂу҆тѣ́шителѧ, є҆́же ѡ҆свѧти́ти дꙋ́шы на́шѧ.
Ѿпꙋсти́тельный тропа́рь, гла́съ и҃: Препросла́вленъ є҆сѝ хрⷭ҇тѐ бж҃е на́шъ: Сла́ва: ст҃а́гѡ, а҆́ще є҆́сть: а҆́ще ли нѝ, Сла́ва, и҆ ны́нѣ: пра́здника, гла́съ д҃: Возне́слсѧ є҆сѝ во сла́вѣ: И҆ ѿдае́тсѧ послѣ́дованїе ст҃ы́хъ ѻ҆ц҃ъ. <<сз҃і ѡ҆б.: 434>>
Въ понедѣ́льникъ седмы́ѧ недѣ́ли на ᲂу҆́трени,
По а҃-мъ стїхосло́вїи сѣда́ленъ, гла́съ а҃.
Подо́бенъ: Ка́мени запеча́танꙋ:
А҆́гг҃лѡмъ дивѧ́щымсѧ восхо́да стра́нномꙋ, и҆ ᲂу҆ченикѡ́мъ ᲂу҆жаса́ющымсѧ стра́шномꙋ взы́тїѧ, возше́лъ є҆сѝ со сла́вою ꙗ҆́кѡ бг҃ъ, и҆ врата̀ тебѣ̀ взѧ́шасѧ сп҃се. сегѡ̀ ра́ди си̑лы небє́сныѧ дивлѧ́хꙋсѧ, вопїю́ще: сла́ва снизхожде́нїю твоемꙋ̀ сп҃се, сла́ва ца́рствїю твоемꙋ̀, сла́ва вознесе́нїю твоемꙋ̀, є҆ди́не человѣколю́бче. [Два́жды.]
По в҃-мъ стїхосло́вїи, сѣда́ленъ. Подо́бенъ: то́йже:
А҆́дꙋ плѣни́вшꙋсѧ ѿ тебѐ животода́вче, и҆ мі́рꙋ просвѣти́вшꙋсѧ во твое́мъ воскресе́нїи, возше́лъ є҆сѝ со сла́вою сп҃се, всѧ̑ ѡ҆бдержа́й рꙋко́ю. сегѡ̀ ра́ди со а҆́гг҃лы славосло́вимъ тѧ̀ вседержи́телю гдⷭ҇и: сла́ва вознесе́нїю твоемꙋ̀ хрⷭ҇тѐ, сла́ва ца́рствїю твоемꙋ̀, сла́ва бл҃гоꙋтро́бїю твоемꙋ̀, є҆ди́не человѣколю́бче. [Два́жды.]
Ѱало́мъ н҃. Канѡ́нъ пра́здника, д҃-гѡ гла́са, со і҆рмосы̀ на и҃, и҆ мине́и на д҃. Конда́къ, и҆ є҆ѯапостїла́рїй пра́здника.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Сло́ва ᲂу҆ченикѡ́мъ вѣ́рнїи совозме́мсѧ добродѣ́тели на го́ры, ꙗ҆́кѡ да хрⷭ҇то́вꙋ сла́вꙋ ви́дѣти сподо́бимсѧ.
Сті́хъ: Всѝ ꙗ҆зы́цы восплещи́те рꙋка́ми:
Посрами́шасѧ ꙗ҆́вѣ манїхє́йскаѧ ᲂу҆мышлє́нїѧ, ᲂу҆мы̀ ѡ҆ ни́хже недоꙋмѣва́хꙋсѧ, хрⷭ҇то́во ꙗ҆́вѣ сказꙋ́юще съ пло́тїю вознесе́нїе. <<си҃і: 435>>
Сті́хъ: Взы́де бг҃ъ въ воскликнове́нїи:
Воскли́кни, ѽ дв҃де, ра́дꙋѧсѧ цѣвни́цею: вознесы́йсѧ бо хрⷭ҇то́съ, вещмѝ словеса̀ ᲂу҆твержда́етъ проро́чества твоегѡ̀.
Сла́ва, и҆ ны́нѣ, гла́съ в҃:
Возне́слсѧ є҆сѝ во сла́вѣ на горѣ̀ ма́сличнѣй хрⷭ҇тѐ бж҃е, пред̾ твои́ми ᲂу҆ченикѝ, и҆ сѣ́лъ є҆сѝ ѡ҆деснꙋ́ю ѻ҆ц҃а̀, всѧ́чєскаѧ и҆сполнѧ́ѧй бж҃ество́мъ: и҆ посла́лъ є҆сѝ и҆̀мъ дх҃а ст҃а́го, просвѣща́юща и҆ ᲂу҆твержда́юща, и҆ ѡ҆свѧща́юща дꙋ́шы на́шѧ.
На лїтꙋргі́и блажє́нна ѿ канѡ́на пѣ́снь є҃- ѧ, на ѕ҃.
Въ понедѣ́льникъ ве́чера,
На Гдⷭ҇и воззва́хъ: стїхи̑ры пра́здника, г҃. И҆ мине́и, г҃.
Вознесе́нїѧ, гла́съ д҃. Подо́бенъ: Да́лъ є҆сѝ зна́менїе:
Пострада́лъ є҆сѝ ꙗ҆́кѡ человѣ́къ безстра́стный бж҃ество́мъ, и҆ воскре́слъ є҆сѝ тридне́венъ плѣни́вый сме́рть, и҆ совоскреси́въ всѧ̑ и҆стлѣ́вшыѧ, и҆ возне́слсѧ є҆сѝ хрⷭ҇тѐ ко ѻ҆ц҃ꙋ̀, ѡ҆бѣща́въ посла́ти ᲂу҆тѣ́шителѧ сщ҃є́ннымъ а҆пⷭ҇лѡмъ твои̑мъ, і҆и҃се всеси́льне, сп҃се дꙋ́шъ на́шихъ.
Вы̀ что̀ стоитѐ зрѧ́ще на не́бо; ви́димїи а҆́гг҃ли, ꙗ҆́кѡ человѣ́цы глаго́лахꙋ, сло́ва таи́нникѡмъ: се́й, є҆го́же зритѐ ѻ҆́блакомъ свѣ́тлымъ возносѧ́щасѧ, то́йже прїи́детъ, и҆́мже ѻ҆́бразомъ ви́дѣсте є҆го̀, сꙋди́ти мі́рꙋ, ꙗ҆́коже речѐ: ше́дше ᲂу҆̀бо всѧ̑ речє́ннаѧ сотвори́те. <<си҃і ѡ҆б.: 436>>
По є҆́же ѿ гро́ба твоегѡ̀ па́че постиже́нїѧ воста́нїи, всеси́льне гдⷭ҇и, прїи́мъ и҆̀хже возлюби́лъ є҆сѝ, да́же до виѳа́нїи и҆зве́лъ є҆сѝ сло́ве, и҆ на горѣ̀ бы́въ є҆леѡ́нстѣй, си́хъ бл҃гослови́въ, и҆ та́кѡ возне́слсѧ є҆сѝ, повинꙋ́ющымсѧ а҆́гг҃лѡмъ тебѣ̀, і҆и҃се всеси́льне, сп҃се дꙋ́шъ на́шихъ.
Сла́ва, и҆ ны́нѣ: гла́съ д҃:
Є҆гда̀ прише́лъ є҆сѝ на го́рꙋ хрⷭ҇тѐ є҆леѡ́нскꙋю, ѻ҆́ч҃ее соверши́ти благоволе́нїе, ᲂу҆жасо́шасѧ небе́снїи а҆́гг҃ли, и҆ ᲂу҆страши́шасѧ преиспо́днїи, предста́ша же ᲂу҆ченицы̀ съ ра́достїю тре́петни, ꙗ҆́кѡ глаго́лалъ є҆сѝ и҆̀мъ: ꙗ҆́кѡ престо́лъ же готовлѧ́шесѧ проти́въ ѻ҆́блакъ ждꙋ́щїй: врата́ же нб҃о ѿве́рзшее добро́тꙋ ꙗ҆влѧ́ше, и҆ землѧ̀ сокро́вища ѿкрыва́етъ, а҆да́мовꙋ схожде́нїю ꙗ҆́кѡ позна́тисѧ, и҆ па́ки восхожде́нїю. но стопы̑ ᲂу҆́бѡ возвыша́хꙋсѧ, ꙗ҆́коже рꙋ́цѣ, ᲂу҆ста́ же вельмѝ благословлѧ́хꙋ, ꙗ҆́коже слы́шашесѧ. ѻ҆́блакъ под̾е́млѧше, и҆ нб҃о внꙋ́трь тебѐ прїѧ́тъ. дѣ́ло сїѐ гдⷭ҇и содѣ́лалъ є҆сѝ вели́кое и҆ пресла́вное, во спасе́нїе дꙋ́шъ на́шихъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
И҆спо́лнивый бл҃же ѻ҆ч҃еское бл҃говоле́нїе, соедини́вый же гѡ́рнѧѧ дѡ́льнимъ, возне́слсѧ є҆сѝ во сла́вѣ къ пе́рвѣйшымъ.
Сті́хъ: Всѝ ꙗ҆зы́цы восплещи́те рꙋка́ми:
Возне́слсѧ є҆сѝ къ твоемꙋ̀ роди́телю ще́дре, ѿѻнꙋ́дꙋ же не разлꙋчи́лсѧ є҆сѝ, и҆ возне́слъ є҆сѝ до́лꙋ лежа́щее є҆стество̀ влⷣко.
Сті́хъ: Взы́де бг҃ъ въ воскликнове́нїи:
Ѻ҆́блакъ тѧ̀ свѣ́та воспрїѧ́тъ на высотꙋ̀, и҆ а҆́гг҃ли со <<сѳ҃і: 437>> стра́хомъ и҆ тре́петомъ слꙋжа́хꙋ бж҃е́ственномꙋ твоемꙋ̀ вознесе́нїю.
Сла́ва, и҆ ны́нѣ: гла́съ д҃:
Низше́дшее є҆стество̀ а҆да́мово въ до́льнѣйшыѧ страны̀ землѝ, бж҃е новосотвори́вый собо́ю, превы́ше всѧ́кагѡ нача́ла и҆ вла́сти возве́лъ є҆сѝ дне́сь: ꙗ҆́кѡ бо возлюби́въ, спосади́лъ є҆сѝ: ꙗ҆́коже поми́ловавъ, соедини́лъ є҆сѝ себѣ̀: ꙗ҆́кѡ соедини́вый спострада́лъ є҆сѝ: ꙗ҆́кѡ безстра́стенъ пострада́въ, и҆ спросла́вилъ є҆сѝ. но безпло́тнїи, кто́ є҆сть се́й, глаго́лахꙋ, кра́сный мꙋ́жъ, но не чл҃вѣ́къ то́чїю, бг҃ъ же и҆ чл҃вѣ́къ, совокꙋпле́ннѡ и҆ ꙗ҆влѧ́емѡ; тѣ́мже ᲂу҆дивле́ни а҆́гг҃ли, во ѻ҆де́ждахъ лета́юще ѻ҆́крестъ ᲂу҆ченикѡ́въ, дрꙋзі́и же стоѧ́ще вопїѧ́хꙋ: мꙋ́жїе галїле́йстїи, и҆́же ѿ ва́съ ѿи́де, се́й є҆́сть і҆и҃съ чл҃вѣ́къ бг҃ъ, бг҃ъ чл҃вѣ́къ па́ки прїи́детъ, сꙋдїѧ̀ живы́хъ и҆ ме́ртвыхъ, вѣ̑рнымъ же да́рꙋѧй грѣхѡ́въ проще́нїе и҆ ве́лїю ми́лость.
Во вто́рникъ на ᲂу҆́трени,
По а҃-мъ стїхосло́вїи сѣда́ленъ, гла́съ в҃.
Подо́бенъ: Вы́шнихъ и҆щѧ̀:
Свы́ше на зе́млю хрⷭ҇тѐ соше́лъ є҆сѝ, и҆ па́ки ѿ землѝ на высотꙋ̀ восте́клъ є҆сѝ къ твоемꙋ̀ роди́телю, ᲂу҆ченикѡ́мъ зрѧ́щымъ твоѐ восхожде́нїе: съ ни́ми ᲂу҆́бѡ пра́зднꙋюще пое́мъ твоѐ, сп҃се, вознесе́нїе. [Два́жды].
По в҃-мъ стїхосло́вїи сѣда́ленъ, гла́съ г҃. Подо́бенъ: Красотѣ̀ двⷭ҇тва:
Превѣ́чное сло́во и҆ безнача́льное, є҆́же ᲂу҆́бѡ взѧ́тъ є҆стество̀ чл҃вѣ́ческое, ѡ҆бг҃отвори́въ та́йнѡ, дне́сь <<рѳ҃і ѡ҆б.: 238>> вознесѐ: а҆́гг҃ли предтекꙋ́ще а҆пⷭ҇лѡмъ пока́зовахꙋ сего̀, и҆дꙋ́ща на небеса̀ со сла́вою мно́гою. є҆мꙋ́же поклони́вшесѧ глаго́лахꙋ: сла́ва бг҃ꙋ возне́сшемꙋсѧ. [Два́жды.]
Ѱало́мъ н҃. Канѡ́нъ пра́здника со і҆рмосы̀ на и҃: и҆ мине́и на д҃. Конда́къ и҆ є҆ѯапостїла́рїй пра́здника.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Не ѡ҆ста́влю си́рыхъ, ꙗ҆̀же а҆́зъ собра́хъ, гдⷭ҇ь дрꙋгѡ́мъ глаго́лаше, но послю̀ ва́мъ дх҃а ст҃а́го.
Сті́хъ: Всѝ ꙗ҆зы́цы восплещи́те рꙋка́ми:
А҆́гг҃ли премꙋ̑дрымъ вопїѧ́хꙋ а҆пⷭ҇лѡмъ: ѽ мꙋ́жїе галїле́йстїи, и҆́мже ѻ҆́бразомъ зритѐ, то́й па́ки прїи́детъ.
Сті́хъ: Взы́де бг҃ъ въ воскликнове́нїи:
Снидо́ша съ ра́достїю ѿ є҆леѡ́нскїѧ горы̀ ᲂу҆ченицы̀ твоѝ сло́ве, сла́вѧще и҆ пою́ще бж҃е́ственное твоѐ вознесе́нїе.
Сла́ва, и҆ ны́нѣ: гла́съ д҃:
Є҆гда̀ возне́слсѧ є҆сѝ во сла́вѣ хрⷭ҇тѐ бж҃е, ᲂу҆ченикѡ́мъ зрѧ́щымъ, ѻ҆́блацы под̾има́хꙋ тѧ̀ съ пло́тїю, врата̀ взѧ́шасѧ небє́снаѧ, ли́къ а҆́гг҃льскїй ра́довашесѧ съ весе́лїемъ, го́рнѣйшыѧ си̑лы зовѧ́хꙋ глаго́люще: возми́те врата̀ кнѧ́зи ва́шѧ, и҆ вни́детъ цр҃ь сла́вы. ᲂу҆ченицы́ же дивѧ́щесѧ глаго́лахꙋ: не разлꙋчи́сѧ на́съ па́стырю до́брый, но послѝ на́мъ дх҃а твоего̀ прест҃а́го, наставлѧ́юща, и҆ ᲂу҆твержда́юща, и҆ просвѣща́юща и҆ ѡ҆свѧща́юща дꙋ́шы на́шѧ.
На лїтꙋргі́и блажє́нна ѿ канѡ́на пѣ́снь ѕ҃- ѧ, на ѕ҃. <<с҃к: 439>>
Во вто́рникъ ве́чера,
На Гдⷭ҇и воззва́хъ: стїхи̑ры подо́бны пра́здника, г҃: и҆ мине́и г҃.
Стїхи̑ры пра́здника, гла́съ д҃. Подо́бенъ: Ꙗ҆́кѡ до́блѧ:
Зрѧ́щымъ бж҃є́ственнымъ твои̑мъ ᲂу҆ченикѡ́мъ, возне́слсѧ є҆сѝ къ нбⷭ҇нымъ, и҆ сѣ́лъ є҆сѝ ѡ҆деснꙋ́ю роди́телѧ, тогѡ̀ неразлꙋче́нный пресꙋ́щественный сн҃е: и҆ ꙗ҆́коже ре́клъ є҆сѝ, посла́лъ є҆сѝ ᲂу҆тѣ́шителѧ, нбⷭ҇ныѧ земны̑ѧ сотворѧ́юща, мꙋ̑дрыѧ и҆ бг҃оглагѡ́ливыѧ, и҆ сщ҃є́нныѧ а҆пⷭ҇лы твоѧ̑.
Воплоти́лсѧ є҆сѝ за неизрече́ннꙋю і҆и҃се бл҃гость, и҆ крⷭ҇тъ и҆ сме́рть безсме́ртне во́лею претерпѣ́лъ є҆сѝ, и҆ па́ки тридне́венъ воскре́съ и҆з̾ ме́ртвыхъ, по дне́хъ четы́редесѧтихъ возне́слсѧ є҆сѝ, ѿѻнꙋ́дꙋже пе́рвѣе соше́лъ є҆сѝ, ᲂу҆мири́въ земна̑ѧ, и҆ всѣ́хъ приве́дъ роди́телю.
На ѻ҆́блацѣхъ ꙗ҆́кѡ ви́дѣша тѧ̀ взима́ема гдⷭ҇и, мꙋ́дрїи а҆пⷭ҇ли, рыда́юще и҆ сѣ́тованїѧ и҆спо́лнени, вопїѧ́хꙋ со слеза́ми: не ѡ҆ста́ви си́рыхъ, и҆̀хже за милосе́рдїе возлюби́лъ є҆сѝ, но послѝ на ны̀, ꙗ҆́коже ѡ҆бѣща́лъ є҆сѝ всеще́дре, прест҃а́го твоего̀ дх҃а, просвѣща́ющаго дꙋ́шы на́шѧ.
Сла́ва, и҆ ны́нѣ: гла́съ є҃:
Прїиди́те вѣ́рныхъ собра́нїе, ᲂу҆мꙋ̀ та́йнѡ наꙋчи́вшесѧ ᲂу҆ченикѡ́въ хрⷭ҇то́выхъ, непреста́ннꙋю пѣ́снь рце́мъ, и҆ ꙗ҆́кѡ а҆пⷭ҇ли, на є҆леѡ́нской горѣ̀ съ дв҃домъ возопїи́мъ: взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ, да и҆зба́витъ кѡлѣ́на чл҃вѣ́чєскаѧ ѿ собла̑знъ го́рдагѡ, и҆ просвѣти́тъ дꙋ́шы на́шѧ. <<с҃к ѡ҆б.: 440>>
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Чꙋ́до новолѣ́пное, человѣ́ческое бо є҆стество̀ на нб҃са̀ взы́де, соедини́вшеесѧ сло́вꙋ бг҃ꙋ вседержи́телю.
Сті́хъ: Всѝ ꙗ҆зы́цы восплещи́те рꙋка́ми:
Возсїѧ̀ ꙗ҆́сный и҆ всесвѣ́тлый де́нь, влⷣки бж҃е́ственнагѡ на нб҃са̀ восхожде́нїѧ, просвѣща́ющїй всѧ́чєскаѧ.
Сті́хъ: Взы́де бг҃ъ въ воскликнове́нїи:
Ꙗ҆́коже ᲂу҆ченикѡ́мъ посла́лъ є҆сѝ съ высоты̀ сра́сленнаго твоего̀ дх҃а, и҆ лю́демъ твои̑мъ послѝ хрⷭ҇тѐ сп҃се бл҃года́ть твою̀.
Сла́ва, и҆ ны́нѣ: гла́съ є҃:
Гдⷭ҇и, взе́млющꙋ ти сѧ ѿѻнꙋ́дꙋже не разлꙋчи́лсѧ є҆сѝ, вѡ́инства а҆́гг҃лѡвъ и҆ всѣ́хъ безпло́тныхъ, ра́достїю вопїѧ́хꙋ го́рншымъ си́ламъ: возми́те врата̀ кнѧ́зи ва́шѧ, и҆ вни́детъ цр҃ь сла́вы. престо́лъ бо херꙋві́мскїй взѧ́тъ тѧ̀ съ пло́тїю, гдⷭ҇и сла́ва тебѣ̀.
Въ сре́дꙋ на ᲂу҆́трени.
По а҃-мъ стїхосло́вїи, сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ:
Ко твоемꙋ̀ роди́телю па́ки восте́къ вседѣ́телю, рабѡ́въ твои́хъ не ѡ҆ста́ви си́рыхъ, ᲂу҆ченицы̀ ꙗ҆́кѡ ви́дѣша тѧ̀ возне́сшагосѧ, вопїѧ́хꙋ чл҃вѣколю́бче.
Сла́ва, и҆ ны́нѣ: то́йже.
По в҃-мъ стїхосло́вїи сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Сла̑внаѧ ᲂу҆добрє́нїѧ бж҃е́ственныхъ ᲂу҆мѡ́въ, сла́вы гдⷭ҇а <<ск҃а: 441>> возне́сшагосѧ ꙗ҆́вѣ съ пло́тїю ви́дѣвше, врата̀, вопїѧ́хꙋ дрꙋ́гъ дрꙋ́гꙋ, возми́те.
Сла́ва, и҆ ны́нѣ: то́йже.
Ѱало́мъ н҃. Канѡ́нъ пра́здника, со і҆рмосы̀ на и҃: и҆ мине́и на д҃. Конда́къ и҆ є҆ѯапостїла́рїй пра́здника.
На стїхо́внѣ стїхи̑ры, гла́съ ѕ҃.
Подо́бенъ: Тридне́венъ воскре́слъ є҆сѝ:
За кра́йнее благоꙋтро́бїе хрⷭ҇тѐ, роди́лсѧ є҆сѝ и҆з̾ дв҃ы пло́тїю, во́лею же претерпѣ́вый крⷭ҇тъ, тридне́венъ воскре́слъ є҆сѝ и҆з̾ гро́ба всеще́дре, совоскреси́вый и҆ ѡ҆живи́вый на́съ.
Сті́хъ: Всѝ ꙗ҆зы́цы восплещи́те рꙋка́ми:
Зрѧ́щымъ тѧ̀ хрⷭ҇тѐ бж҃е, бж҃е́ствєннымъ ᲂу҆ченикѡ́мъ, ꙗ҆́вѣ возне́слсѧ є҆сѝ ѿ землѝ на нб҃о, и҆ си̑мъ ѡ҆бѣща́лъ є҆сѝ посла́ти жизнода́вче ѿ ѻ҆ц҃а̀ дх҃а ст҃а́го.
Сті́хъ: Взы́де бг҃ъ въ воскликнове́нїи:
Диви́тсѧ а҆́гг҃лъ мно́жество, стра́нномꙋ восхожде́нїю твоемꙋ̀, и҆ стра́шномꙋ і҆и҃се всецр҃ю̀, и҆ врата̀ нбⷭ҇наѧ взѧ́ти, вопїѧ́хꙋ го́рншымъ ны́нѣ си́ламъ.
Сла́ва, и҆ ны́нѣ, гла́съ ѕ҃:
Нѣ́дръ ѻ҆те́ческихъ не разлꙋ́чсѧ, сладча́йшїй і҆и҃се, и҆ съ земны́ми ꙗ҆́кѡ человѣ́къ пожи́въ, дне́сь ѿ горы̀ є҆леѡ́нскїѧ возне́слсѧ є҆сѝ во сла́вѣ, и҆ па́дшее є҆стество̀ на́ше ми́лостивнѡ возне́съ, ѻ҆ц҃ꙋ̀ спосади́лъ є҆сѝ. тѣ́мже нбⷭ҇нїи безпло́тныхъ чи́нове, чꙋдесѝ ᲂу҆дивлѧ́ющесѧ, ᲂу҆жаса́хꙋсѧ ᲂу҆́жасомъ, и҆ тре́петомъ содержи́ми, твоѐ человѣколю́бїе велича́хꙋ. съ ни́миже и҆ мы̀ земні́и, є҆́же къ на́мъ твоѐ снизхожде́нїе, и҆ є҆́же ѿ на́съ вознесе́нїе славосло́вѧще, <<ск҃а ѡ҆б.: 442>> мо́лимсѧ глаго́люще: ᲂу҆ченикѝ, и҆ ро́ждшꙋю тѧ̀ бцⷣꙋ, ра́дости безчи́сленныѧ и҆спо́лнивый во твоѐ вознесе́нїе, и҆ на́съ сподо́би и҆збра́нныхъ твои́хъ ра́дости моли́твами и҆́хъ, вели́кїѧ ра́ди твоеѧ̀ ми́лости.
На лїтꙋргі́и блажє́нна ѿ канѡ́на пѣ́снь з҃- ѧ, на ѕ҃.
Въ сре́дꙋ ве́чера,
на Гдⷭ҇и воззва́хъ: стїхи̑ры подо́бны пра́здника г҃, и҆ мине́и г҃.
Пра́здника, гла́съ д҃. Подо́бенъ: Зва́нный свы́ше:
Є҆́же ѡ҆ всѣ́хъ соверши́въ спасе́нїе, на го́рꙋ прише́лъ є҆сѝ є҆леѡ́нскꙋю хрⷭ҇тѐ, ѿѻнꙋ́дꙋже и҆ взѧ́лсѧ є҆сѝ пред̾ ᲂу҆ченикѝ твои́ми, на нб҃са̀ со сла́вою носи́мь. тѣ́мже та́инствꙋ дивѧ́щесѧ, гѡ́рнимъ взыва́хꙋ до́льнїи чи́нове: возми́те врата̀, и҆ вни́детъ, ѿѻнꙋ́дꙋже и҆зы́де, всѣ́ми ца́рствꙋѧй бг҃ъ, ꙗ҆́коже бл҃говолѝ, пресла́внѡ мі́рови спасе́нїе содѣ́лавъ.
Оу҆чени́ческїй ли́къ, тебѐ ꙗ҆́коже зрѧ́ше взима́ема, глаго́лаше: влⷣко, ка́кѡ ны́нѣ ѡ҆ставлѧ́еши рабы̑ твоѧ̀; и҆ ка́мѡ и҆́деши и҆́же рꙋка́ма содержа́й концы̀; мы́ же ѡ҆ста́вивше всѧ̑, тебѣ̀ бг҃ꙋ послѣ́довахомъ ра́дꙋющесѧ, во вѣ́ки съ тобо́ю наде́ждꙋ и҆мꙋ́ще бы́ти: не ѡ҆ста́ви си́рыхъ на́съ, ꙗ҆́коже ѡ҆бѣща́лсѧ є҆сѝ сп҃се на́шъ милосе́рде, ᲂу҆тѣ́шителѧ послѝ и҆ сп҃са дꙋ́шъ на́шихъ.
Соверше́ннѣйшее подаѧ̀ бл҃гослове́нїе дрꙋгѡ́мъ твои̑мъ влⷣко, та́йнѡ наꙋчи́лъ є҆сѝ и҆̀хъ: зри́те дрꙋ́зи, и҆дꙋ̀ ко <<ск҃в: 443>> ѻ҆ц҃ꙋ̀, ва́мъ же послю̀ и҆но́го ᲂу҆тѣ́шителѧ, вы́ же сѣ́тованїе всѐ ѿри́ните: не ѡ҆ста́влю бо ѻ҆ве́цъ, ꙗ҆̀же собра́хъ: не забꙋ́дꙋ, и҆̀хже возлюби́хъ. бж҃е́ственною съ высоты̀ ѡ҆бо́лкшесѧ си́лою и҆ди́те, глаго́люще во всѧ̑ ꙗ҆зы́ки спасе́нїѧ благовѣща́нїе.
Сла́ва, и҆ ны́нѣ: гла́съ ѕ҃:
Взы́де бг҃ъ въ воскликнове́нїи, гдⷭ҇ь во гла́сѣ трꙋ́бнѣ, є҆́же вознестѝ па́дшїй ѻ҆́бразъ а҆да́мовъ, и҆ посла́ти дх҃а ᲂу҆тѣ́шителѧ, є҆́же ѡ҆свѧти́ти дꙋ́шы на́шѧ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Не ѡ҆ста́влю си́рыхъ, ꙗ҆̀же а҆́зъ собра́хъ, гдⷭ҇ь дрꙋгѡ́мъ глаго́лаше: но послю̀ ва́мъ дх҃а прест҃а́го.
Сті́хъ: Всѝ ꙗ҆зы́цы восплещи́те рꙋка́ми:
А҆́гг҃ли премꙋ̑дрымъ вопїѧ́хꙋ а҆пⷭ҇лѡмъ: ѽ мꙋ́жїе галїле́йстїи, и҆́мже ѻ҆́бразомъ зритѐ, то́й па́ки прїи́детъ.
Сті́хъ: Взы́де бг҃ъ въ воскликнове́нїи:
Снидо́ша съ ра́достїю ѿ горы̀ є҆леѡ́нскїѧ ᲂу҆ченицы̀ твоѝ сло́ве, сла́вѧще и҆ пою́ще бж҃е́ственное твоѐ вознесе́нїе.
Сла́ва, и҆ ны́нѣ: гла́съ а҃:
Возше́дъ на небеса̀, ѿѻнꙋ́дꙋже и҆ соше́лъ є҆сѝ, не ѡ҆ста́ви на́съ си́рыхъ гдⷭ҇и: да прїи́детъ тво́й дх҃ъ, носѧ̀ ми́ръ мі́рови, покажѝ сыновѡ́мъ человѣ́чєскимъ дѣла̀ си́лы твоеѧ̀, гдⷭ҇и человѣколю́бче.
Та́же, Ны́нѣ ѿпꙋща́еши: И҆ ѿпꙋ́стъ. <<ск҃в ѡ҆б.: 444>>
Въ четверто́къ на ᲂу҆́трени.
По а҃-мъ стїхосло́вїи сѣда́ленъ, гла́съ є҃.
Подо́бенъ: Собезнача́льное сло́во:
Соше́дый съ нб҃сѐ на земна̑ѧ, и҆ до́лꙋ лежа́щїй во а҆́довѣ стра́жи, совоскреси́вый ꙗ҆́кѡ бг҃ъ а҆да́мовъ зра́къ, и҆ вознесе́нїемъ твои́мъ хрⷭ҇тѐ на нб҃са̀ возве́дъ, и҆ престо́лꙋ ѻ҆те́ческомꙋ твоемꙋ̀ сосѣди́телѧ содѣ́лалъ є҆сѝ, ꙗ҆́кѡ ми́лостивъ и҆ человѣколю́бецъ. [Два́жды.]
По в҃-мъ стїхосло́вїи сѣда́ленъ, гла́съ и҃.
Подо́бенъ: Повелѣ́нное та́йнѡ:
На го́рꙋ возше́дъ є҆леѡ́нскꙋю ми́лостиве і҆и҃се, ѿтꙋ́дꙋ взѧ́лсѧ є҆сѝ: свѣ́тлый бо ѻ҆́блакъ ѿ земли́ тѧ под̾ѧ́тъ, зрѧ́щымъ ᲂу҆ченикѡ́мъ твои́мъ чꙋ́до стра́шное, вопїю́щымъ безплѡ́тнымъ на нб҃сѣ́хъ вы́шшымъ во́инствѡмъ: стра́хомъ врата̀ возми́тесѧ. съ ни́миже тѧ̀ цр҃ѧ̀ пое́тъ всѧ̀ тва́рь, всѣ́хъ бг҃а.
Сла́ва, и҆ ны́нѣ, то́йже.
И҆ ѱало́мъ н҃. Канѡ́нъ пра́здника, со і҆рмосы̀ на и҃: и҆ мине́и на д҃. Конда́къ и҆ є҆ѯапостїла́рїй пра́здника.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
И҆спо́лнивый бл҃же ѻ҆ч҃еское бл҃говоле́нїе, соедини́въ же гѡ́рнѧѧ съ до́льними, возне́слсѧ є҆сѝ во сла́вѣ къ пе́рвѣйшымъ.
Сті́хъ: Всѝ ꙗ҆зы́цы восплещи́те рꙋка́ми:
Ѻ҆́блакъ тѧ̀ свѣ́та воспрїѧ́тъ на высотꙋ̀, и҆ а҆́гг҃ли со стра́хомъ и҆ тре́петомъ слꙋжа́хꙋ, бж҃е́ственномꙋ твоемꙋ̀ вознесе́нїю. <<ск҃г: 445>>
Сті́хъ: Взы́де бг҃ъ въ воскликнове́нїи:
Хвалꙋ̀ бг҃окра́снꙋю, со а҆пⷭ҇лы бцⷣа воспѣва́етъ, гдⷭ҇а зрѧ́щи на ѻ҆́блацѣхъ носи́ма.
Сла́ва, и҆ ны́нѣ: гла́съ з҃:
На го́рꙋ є҆леѡ́нскꙋю прише́лъ є҆сѝ, ми́лꙋѧй ро́дъ человѣ́ческїй, и҆ ѻ҆́блакъ под̾ѧ́тъ тѧ̀ ѿ ѻ҆́чїю ᲂу҆чєни́къ твои́хъ, трепе́щꙋщымъ ᲂу҆́бѡ за видѣ́нїе, ра́дꙋющымъ же сѧ за ча́ѧнїе ст҃а́гѡ дх҃а, и҆́мже ᲂу҆тверди́въ сп҃се поми́лꙋй на́съ.
На лїтꙋргі́и бл҃жє́нна, ѿ канѡ́на пѣ́снь и҃- ѧ, на ѕ҃.
Въ четверто́къ ве́чера седмы́ѧ седми́цы,
на Гдⷭ҇и воззва́хъ: пое́мъ послѣ́дованїе всѐ пра́здника неизмѣ́ннѡ, ꙗ҆́коже и҆ въ гдⷭ҇ственный де́нь вознесе́нїѧ, кромѣ̀ чте́нїй, и҆ полѷеле́а: на вече́рни же, и҆ въ пѧто́къ на ᲂу҆́трени, и҆ на лїтꙋргі́и бл҃жє́нна пра́здника, пѣ́снь ѳ҃-ѧ ѻ҆бои́хъ канѡ́нѡвъ, на и҃. По вхо́дѣ тропа́рь. Сла́ва, и҆ ны́нѣ: конда́къ. Прокі́менъ, а҆ллилꙋ́їа, и҆ прича́стенъ пра́здника: а҆пⷭ҇лъ же и҆ є҆ѵⷢ҇лїе днѐ.
Слꙋ́жбꙋ же мине́и пое́мъ на повече́рїи.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.