Неделя четвертая по Пасхе, о расслабленном
<<ч҃в: 183>>
Недѣ́лѧ четве́ртаѧ по па́сцѣ, разсла́бленнагѡ.
Въ сꙋббѡ́тꙋ ве́чера, на ма́лѣй вече́рни.
На Гдⷭ҇и воззва́хъ: стїхи̑ры воскре́сны д҃, гла́съ г҃: Твои́мъ крⷭ҇то́мъ хрⷭ҇тѐ сп҃се: Просвѣти́шасѧ всѧ́чєскаѧ: Сла́влю ѻ҆ц҃а̀ и҆ сн҃а си́лꙋ: Крⷭ҇тꙋ̀ твоемꙋ̀ честно́мꙋ: Сла́ва: гла́съ є҃: Взы́де і҆и҃съ во і҆ерꙋсали́мъ: [Всѧ̀ сїѧ̀ стїхи̑ры и҆щѝ на вели́цѣй вече́рни.]
И҆ ны́нѣ: бг҃оро́диченъ, догма́тїкъ, гла́съ г҃:
Преве́лїе чꙋ́до: дв҃а ро́ждшаѧ, и҆ рожде́нное бг҃ъ, пре́жде вѣ́къ пред̾ѧвле́нное рожде́нїе, и҆ соверше́нное па́че є҆стества̀. ѽ та́инства стра́шнагѡ, є҆́же и҆ мы́слимое неизрече́ннѡ пребыва́етъ, и҆ зри́мое не пое́млетсѧ! бл҃же́нна ты̀ є҆сѝ пречи́стаѧ ѻ҆трокови́це, а҆да́ма земноро́днагѡ дщѝ, и҆ бг҃а вы́шнѧгѡ ꙗ҆́вльшаѧсѧ мт҃и: того̀ молѝ спасти́сѧ дꙋша́мъ на́шымъ.
На стїхо́внѣ стїхи́ра воскре́сна: Стрⷭ҇тїю твое́ю: [ли́стъ ч҃д].
Та́же стїхи̑ры бцⷣы, гла́съ г҃. Подо́бенъ: Ве́лїѧ крⷭ҇та̀:
Сті́хъ: Слы́ши дщѝ и҆ ви́ждь:
Вели́кое тобо́ю благодѣѧ́нїе пречⷭ҇таѧ полꙋчи́вше, со а҆́гг҃лы рожде́нїе твоѐ сла́вимъ, сподо́бльшеесѧ и҆з̾ ᲂу҆тро́бы <<ч҃в ѡ҆б.: 184>> твоеѧ̀ роди́тисѧ, кра́йнѧгѡ ра́ди благоꙋтро́бїѧ, и҆ возсозда́вшаго человѣ́ческїй ро́дъ.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Тѧ̀ всѝ прибѣ́жище и҆ бж҃е́ственный покро́въ чи́стаѧ, грѣ́шнїи въ житїѝ стѧжа́хомъ, дв҃о: мо́лимъ ᲂу҆́бѡ всѝ твоѐ бл҃гоꙋтро́бїе, не ѿстꙋпѝ ѿ на́съ, мо́лимсѧ, но поми́лꙋй и҆ спасѝ.
Сті́хъ: Лицꙋ̀ твоемꙋ̀ помо́лѧтсѧ:
Є҆́же ра́дꙋйсѧ бцⷣе мт҃и приснодв҃о, пе́рстнїи твоѝ рабѝ прино́симъ досто́йнѡ, съ гаврїи́ломъ бж҃е́ственнымъ чинонача́льникомъ: и҆́бо ра́дости хода́таица, и҆ ра́дованїе ты̀ была̀ є҆сѝ мі́рови.
Сла́ва, и҆ ны́нѣ: гла́съ и҃: Въ притво́рѣ соломѡ́новѣ: [и҆щѝ на вели́цѣй вече́рни, на стїхо́внѣ, Сла́ва:]
Тропа́рь гла́са. И҆ ѿпꙋ́стъ.
На вели́цѣй вече́рни.
На Гдⷭ҇и воззва́хъ: поста́вимъ стїхѡ́въ і҃. И҆ пое́мъ стїхи̑ры воскре́сны г҃, и҆ ꙾восто́чны꙾[[а҆нато́лїевы]] д҃: и҆ ѡ҆ разсла́бленномъ самогла́сны, в҃, повторѧ́юще пе́рвꙋю.
Стїхи̑ры воскре́сны, гла́съ г҃:
Твои́мъ крⷭ҇то́мъ хрⷭ҇тѐ сп҃се, сме́рти держа́ва разрꙋши́сѧ, и҆ дїа́волѧ пре́лесть ᲂу҆праздни́сѧ: ро́дъ же человѣ́ческїй вѣ́рою спаса́емый, пѣ́снь тебѣ̀ всегда̀ прино́ситъ.
Просвѣти́шасѧ всѧ́чєскаѧ, воскресе́нїемъ твои́мъ гдⷭ҇и, и҆ ра́й па́ки ѿве́рзесѧ: всѧ́ же тва́рь восхвалѧ́ющи тѧ̀, пѣ́снь тебѣ̀ всегда̀ прино́ситъ.
Сла́влю ѻ҆ц҃а̀ и҆ сн҃а си́лꙋ, и҆ ст҃а́гѡ дх҃а пою̀ вла́сть, <<ч҃г: 185>> нераздѣ́льное, несозда́нное бж҃ество̀, трⷪ҇цꙋ є҆диносꙋ́щнꙋю, ца́рствꙋющꙋю въ вѣ́къ вѣ́ка.
И҆́ны стїхи̑ры, а҆нато́лїевы:
Крⷭ҇тꙋ̀ твоемꙋ̀ честно́мꙋ покланѧ́емсѧ хрⷭ҇тѐ, и҆ воскрⷭ҇нїе твоѐ пое́мъ и҆ сла́вимъ: ра́ною бо твое́ю мы̀ всѝ и҆сцѣлѣ́хомъ.
Пое́мъ сп҃са ѿ дв҃ы вопло́щшагосѧ: на́съ бо ра́ди распѧ́тсѧ, и҆ въ тре́тїй де́нь воскр҃се, да́рꙋѧ на́мъ ве́лїю млⷭ҇ть.
Сꙋ́щымъ во а҆́дѣ соше́дъ хрⷭ҇то́съ благовѣстѝ: дерза́йте, глаго́лѧ, ны́нѣ побѣди́хъ, а҆́зъ є҆́смь воскрⷭ҇нїе, а҆́зъ вы̀ возведꙋ̀, разрꙋши́въ смє́ртнаѧ врата̀.
Недосто́йнѡ стоѧ́ще въ пречи́стомъ домꙋ̀ твое́мъ, вече́рнюю пѣ́снь возсыла́емъ, и҆з̾ глꙋбины̀ взыва́юще хрⷭ҇тѐ бж҃е: просвѣти́вый мі́ръ тридне́внымъ воскрⷭ҇нїемъ твои́мъ, и҆змѝ лю́ди твоѧ̀ ѿ рꙋкѝ врагѡ́въ твои́хъ чл҃вѣколю́бче.
И҆́ны стїхи̑ры самогла́сны, ѡ҆ разсла́бленномъ. Гла́съ а҃:
Дла́нїю пречи́стою созда́вый человѣ́ка, прише́лъ є҆сѝ благоꙋтро́бне недꙋ́гꙋющыѧ и҆сцѣли́ти хрⷭ҇тѐ, разсла́бленнаго во ѻ҆́вчей кꙋпѣ́ли, сло́вомъ твои́мъ возста́вилъ є҆сѝ: кровоточи́вой же болѣ́знь и҆сцѣли́лъ є҆сѝ: ханане́и ѻ҆трокови́цꙋ стꙋжа́емꙋю поми́ловалъ є҆сѝ, и҆ проше́нїѧ со́тника не презрѣ́лъ є҆сѝ. сегѡ̀ ра́ди зове́мъ: всеси́льне гдⷭ҇и, сла́ва тебѣ̀. [Два́жды.]
Непогребе́нъ мертве́цъ сы́й, разсла́бленный ви́дѣвъ тѧ̀, возопѝ: поми́лꙋй мѧ̀ гдⷭ҇и, ꙗ҆́кѡ ѻ҆́дръ мо́й гро́бъ мнѣ̀ бы́сть. что́ ми прїѡбрѣ́тенїе живота̀; не тре́бꙋю ѻ҆́вчїѧ <<ч҃г ѡ҆б.: 186>> кꙋпѣ́ли, не и҆́мамъ бо никогѡ́же влага́юща мѧ̀, возмꙋща́ющымсѧ вода́мъ: но къ тебѣ̀ и҆сто́чникꙋ прихождꙋ̀ и҆сцѣле́нїй, да и҆ а҆́зъ со всѣ́ми зовꙋ̀: всеси́льне гдⷭ҇и, сла́ва тебѣ̀.
Сла́ва: гла́съ є҃:
Взы́де і҆и҃съ во і҆ерꙋсали́мъ на ѻ҆́вчꙋю кꙋпѣ́ль, глаго́лемꙋю і҆ꙋде́йски виѳесда̀, пѧ́ть притво́рѡвъ и҆мꙋ́щꙋю: въ тѣ́хъ бо слежа́ше мно́жество немощствꙋ́ющихъ. а҆́гг҃лъ бо бж҃їй по всѧ̑ лѣ̑та сходѧ̀, возмꙋща́ше ю҆̀, и҆ здра́вїе подава́ше пристꙋпа́ющымъ вѣ́рою. и҆ ви́дѣвъ гдⷭ҇ь многовре́менна человѣ́ка, глаго́летъ къ немꙋ̀: хо́щеши ли здра́въ бы́ти; немощствꙋ́ѧй ѿвѣщава́ше: гдⷭ҇и, человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ кꙋпѣ́ль: врачє́мъ и҆зда́хъ всѐ и҆мѣ́нїе моѐ, и҆ ми́лости ᲂу҆лꙋчи́ти не сподо́бихсѧ. но вра́чь дꙋ́шъ и҆ тѣле́съ глаго́летъ къ немꙋ̀: возмѝ тво́й ѻ҆́дръ и҆ ходѝ, проповѣ́дꙋѧ мою̀ си́лꙋ, и҆ ве́лїю ми́лость въ концѣ́хъ.
И҆ ны́нѣ, бг҃оро́диченъ, гла́съ г҃:
Ка́кѡ не диви́мсѧ бг҃омꙋ́жномꙋ ржⷭ҇твꙋ̀ твоемꙋ̀, пречⷭ҇тна́ѧ; и҆скꙋше́нїѧ бо мꙋ́жескагѡ не прїе́мши всенепоро́чнаѧ, родила̀ є҆сѝ без̾ ѻ҆ц҃а̀ сн҃а пло́тїю пре́жде вѣ́къ ѿ ѻ҆ц҃а̀ рожде́ннаго без̾ мт҃ре, ника́коже претерпѣ́вшаго и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ, но ѻ҆бою̀ сꙋществꙋ̀ сво́йство цѣ́ло сохра́ншаго. тѣ́мже мт҃и дв҃о влⷣчце, того̀ молѝ сп҃сти́сѧ дꙋша́мъ, правосла́внѡ бцⷣꙋ и҆сповѣ́дающихъ тѧ̀.
Вхо́дъ: Свѣ́те ти́хїй: Прокі́менъ: Гдⷭ҇ь воцари́сѧ: со стїхѝ є҆гѡ̀. <<ч҃д: 187>>
На лїті́и стїхи́ра хра́ма.
Сла́ва, гла́съ є҃:
При ѻ҆́вчей кꙋпѣ́ли, человѣ́къ лежа́ше въ не́мощи, и҆ ви́дѣвъ тѧ̀ гдⷭ҇и, вопїѧ́ше: человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ ню̀. є҆гда́ же прихождꙋ̀, и҆́нъ предварѧ́етъ мѧ̀, и҆ прїе́млетъ и҆сцѣле́нїе: а҆́зъ же немощствꙋ́ѧй лежꙋ̀. и҆ а҆́бїе ᲂу҆милосе́рдивсѧ сп҃съ, глаго́летъ къ немꙋ̀: тебѐ ра́ди человѣ́къ бы́въ, тебѐ ра́ди въ пло́ть ѡ҆блеко́хсѧ, и҆ глаго́леши: человѣ́ка не и҆́мамъ: возмѝ ѻ҆́дръ тво́й и҆ ходѝ. всѧ̑ тебѣ̀ возмѡ́жна, всѧ̑ послꙋ́шаютъ, всѧ̑ повинꙋ́ютсѧ: всѣ́хъ на́съ помѧнѝ, и҆ поми́лꙋй ст҃ы́й, ꙗ҆́кѡ чл҃вѣколю́бецъ.
И҆ ны́нѣ: бг҃оро́диченъ, гла́съ то́йже:
Хра́мъ и҆ две́рь є҆сѝ, пала́та и҆ престо́лъ цр҃е́въ, дв҃о всечестна́ѧ: є҆́юже и҆зба́витель мо́й, хрⷭ҇то́съ гдⷭ҇ь, во тмѣ̀ спѧ́щымъ ꙗ҆ви́сѧ, сл҃нце сы́й пра́вды, просвѣти́ти хотѧ̀, ꙗ҆̀же созда̀ по ѻ҆́бразꙋ своемꙋ̀ рꙋко́ю свое́ю. тѣ́мже всепѣ́таѧ, ꙗ҆́кѡ ма́терне дерзнове́нїе къ немꙋ̀ стѧжа́вшаѧ, непреста́ннѡ молѝ спасти́сѧ дꙋша́мъ на́шымъ.
На стїхо́внѣ стїхи́ра воскре́сна, гла́съ г҃:
Стрⷭ҇тїю твое́ю хрⷭ҇тѐ, ѡ҆мрачи́вый со́лнце и҆ свѣ́томъ твоегѡ̀ воскрⷭ҇нїѧ, просвѣти́вый всѧ́чєскаѧ, прїимѝ на́шꙋ вече́рнюю пѣ́снь чл҃вѣколю́бче.
И҆ стїхи̑ры па́сцѣ, съ припѣ́вы и҆́хъ: и҆щѝ въ недѣ́лю па́схи на ᲂу҆́трени, ли́стъ з҃ на ѡ҆боро́тѣ.
Сла́ва: гла́съ и҃:
Въ притво́рѣ соломѡ́новѣ, та́мѡ слежа́ше мно́жество немощствꙋ́ющихъ, и҆ преполови́вшꙋсѧ пра́здникꙋ, ѡ҆брѣ́те <<ч҃д ѡ҆б.: 188>> хрⷭ҇то́съ три́десѧть ѻ҆́смь лѣ́тъ разсла́блена лежа́ща, влⷣчнимъ гла́сомъ глаго́летъ къ немꙋ̀: хо́щеши ли здра́въ бы́ти; немощствꙋ́ѧй ѿвѣщава́ше: гдⷭ҇и, человѣ́ка не и҆́мамъ, да є҆гда̀ возмꙋти́тсѧ вода̀, вве́ржетъ мѧ̀ въ кꙋпѣ́ль. ѻ҆́нъ же глаго́летъ къ немꙋ̀: возмѝ ѻ҆́дръ тво́й, и҆ ходѝ: сѐ здра́въ бы́лъ є҆сѝ, ктомꙋ̀ не согрѣша́й. бцⷣы моли́твами низпослѝ на́мъ ве́лїю ми́лость.
И҆ ны́нѣ: Воскресе́нїѧ де́нь: Хрⷭ҇то́съ воскре́се: є҆ди́ножды. И҆ про́чее, ꙗ҆́кѡ предписа́сѧ въ мимоше́дшꙋю недѣ́лю.
Ѿпꙋсти́тельный тропа́рь, гла́съ г҃:
Да веселѧ́тсѧ небє́снаѧ, да ра́дꙋютсѧ земна̑ѧ, ꙗ҆́кѡ сотворѝ держа́вꙋ мы́шцею свое́ю гдⷭ҇ь: попра̀ сме́ртїю сме́рть, пе́рвенецъ ме́ртвыхъ бы́сть, и҆з̾ чре́ва а҆́дова и҆зба́ви на́съ, и҆ подадѐ мі́рови ве́лїю ми́лость.
Сла́ва, и҆ ны́нѣ: бг҃оро́диченъ.
Тѧ̀ хода́тайствовавшꙋю спасе́нїе ро́да на́шегѡ воспѣва́емъ, бцⷣе дв҃о: пло́тїю бо ѿ тебѐ воспрїѧ́тою сн҃ъ тво́й, и҆ бг҃ъ на́шъ, кресто́мъ воспрїи́мъ стра́сть, и҆зба́ви на́съ ѿ тлѝ, ꙗ҆́кѡ чл҃вѣколю́бецъ.
А҆́ще же не бꙋ́детъ бдѣ́нїѧ, на полꙋ́нощницѣ пое́мъ канѡ́нъ трⷪ҇ченъ во ѻ҆ктѡ́ихѣ, гла́са г҃-гѡ. И҆ Досто́йно є҆́сть: и҆ про́чее ꙗ҆́кѡ ѻ҆бы́чно. И҆ ѿпꙋ́стъ. <<ч҃є: 189>>
Въ недѣ́лю четве́ртꙋю по па́сцѣ, на ᲂу҆́трени.
На Бг҃ъ гдⷭ҇ь: тропа́рь воскре́сенъ два́жды. Сла́ва и҆ ны́нѣ: бг҃оро́диченъ.
По а҃-мъ стїхосло́вїи сѣда́ленъ, гла́съ г҃:
Хрⷭ҇то́съ ѿ ме́ртвыхъ воста̀, нача́токъ ᲂу҆со́пшихъ, перворожде́нъ тва́ри, и҆ содѣ́тель всѣ́хъ бы́вшихъ, и҆стлѣ́вшее є҆стество̀ ро́да на́шегѡ въ себѣ̀ само́мъ ѡ҆бновѝ. не ктомꙋ̀ сме́рте, ѡ҆блада́еши: и҆́бо всѣ́хъ влⷣка держа́вꙋ твою̀ разрꙋшѝ.
Сті́хъ: Воскреснѝ гдⷭ҇и бж҃е мо́й:
Пло́тїю сме́рти вкꙋси́вый гдⷭ҇и, го́ресть сме́рти пресѣ́клъ є҆сѝ воста́нїемъ твои́мъ, и҆ человѣ́ка на ню̀ ᲂу҆крѣпи́вый, пе́рвыѧ клѧ́твы ѡ҆долѣ́нїе призыва́ѧ: защи́тниче жи́зни на́шеѧ, гдⷭ҇и сла́ва тебѣ̀.
Сла́ва, и҆ ны́нѣ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й, гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю, и҆ ᲂу҆жаса́юсѧ. тѣ́мже, ꙗ҆́коже повелѣ́нъ бы́хъ, вопїю̀ тѝ: ра́дꙋйсѧ бл҃года́тнаѧ.
По в҃ стїхосло́вїи сѣда́ленъ, гла́съ г҃.
Подо́бенъ: Красотѣ̀ дѣ́вства:
Всѧ̑ человѣ́чєскаѧ воспрїи́мъ, всѧ̑ на̑ша присво́ивъ, на крⷭ҇тѣ̀ пригвозди́тисѧ бл҃говоли́лъ є҆сѝ тво́рче мо́й, сме́рть прїи́мъ претерпѣ́ти ꙗ҆́кѡ человѣ́къ, да чл҃вѣ́ческое ѿ сме́рти и҆зба́виши ꙗ҆́кѡ бг҃ъ. тѣ́мже ꙗ҆́кѡ жизнода́вцꙋ вопїе́мъ тѝ: сла́ва хрⷭ҇тѐ бл҃гоꙋтро́бїю твоемꙋ̀. <<ч҃є ѡ҆б.: 190>>
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ:
Непостижи́мое распѧ́тїѧ, и҆ несказа́нное воста́нїѧ, бг҃осло́вствꙋемъ вѣ́рнїи та́инство неизрече́нное: дне́сь бо сме́рть и҆ а҆́дъ плѣни́сѧ, ро́дъ же человѣ́ческїй въ нетлѣ́нїе ѡ҆блече́сѧ. тѣ́мъ благодарѧ́ще вопїе́мъ тѝ: сла́ва хрⷭ҇тѐ воста́нїю твоемꙋ̀.
Сла́ва, и҆ ны́нѣ: бг҃оро́диченъ:
Нбⷭ҇наѧ любо́вїю веселѧ́хꙋсѧ, и҆ земна̑ѧ тре́петомъ ᲂу҆жаса́хꙋсѧ, є҆гда̀ пречи́стый гла́съ на́йде на тѧ̀ бцⷣе: є҆ди́но бо торжество̀ ѻ҆бои́мъ возсїѧ̀, є҆гда̀ первозда́ннаго ѿ сме́рти и҆зба́ви. тѣ́мъ со а҆́гг҃ломъ вопїе́мъ тѝ: ра́дꙋйсѧ чи́стаѧ дв҃о мт҃и.
По непоро́чнахъ, Бл҃гослове́нъ є҆сѝ гдⷭ҇и:
Та́же ѵ҆пакоѝ, гла́съ г҃:
Оу҆дивлѧ́ѧ видѣ́нїемъ, ѡ҆роша́ѧ глаго́ланїи, блиста́ѧйсѧ а҆́гг҃лъ мѷроно́сицамъ глаго́лаше: что̀ жива́гѡ и҆́щете во гро́бѣ; воста̀ и҆стощи́вый гро́бы: тлѝ премѣни́телѧ разꙋмѣ́йте непремѣ́ннаго. рцы́те бг҃ꙋ: ко́ль стра́шна дѣла̀ твоѧ̀, ꙗ҆́кѡ ро́дъ спа́слъ є҆сѝ человѣ́ческїй.
Степє́нна, гла́съ г҃. А҆нтїфѡ́нъ а҃:
Плѣ́нъ сїѡ́нь ты̀ и҆з̾ѧ́лъ є҆сѝ ѿ вавѷлѡ́на: и҆ менѐ ѿ страсте́й къ животꙋ̀ привлецы̀ сло́ве.
Въ ю҆́гъ сѣ́ющїи слеза́ми бж҃е́ственными, жнꙋ́тъ кла́сы ра́достїю присноживо́тїѧ.
Сла́ва:
Ст҃о́мꙋ дх҃ꙋ всѧ́кое бл҃года́рїе, ꙗ҆́коже ѻ҆ц҃ꙋ̀ и҆ сн҃ꙋ соѡблиста́етъ, въ не́мже всѧ̑ живꙋ́тъ и҆ дви́жꙋтсѧ.
И҆ ны́нѣ: то́йже. <<ч҃ѕ: 191>>
А҆нтїфѡ́нъ в҃:
А҆́ще не гдⷭ҇ь сози́ждетъ до́мъ добродѣ́телей, всꙋ́е трꙋжда́емсѧ: дꙋ́шꙋ же покрыва́ющꙋ, никто́же на́шъ разори́тъ гра́дъ.
Плода̀ чре́вна дх҃омъ, сынотворе́ное тебѣ̀ хрⷭ҇тꙋ̀, ꙗ҆́коже и҆ ѻ҆ц҃ꙋ̀, ст҃і́и всегда̀ сꙋ́ть.
Сла́ва:
Ст҃ы́мъ дх҃омъ прозри́тсѧ всѧ́каѧ свѧты́нѧ, премꙋ́дрость, ѡ҆сꙋществꙋ́етъ бо всѧ́кꙋю тва́рь: томꙋ̀ послꙋ́жимъ, бг҃ъ бо, ꙗ҆́кѡ ѻ҆ц҃ꙋ́ же и҆ сло́вꙋ.
И҆ ны́нѣ: то́йже.
А҆нтїфѡ́нъ г҃:
Боѧ́щїисѧ гдⷭ҇а бл҃же́ни, въ пꙋтѝ ходѧ́ще за́повѣдей, снѣ́дѧтъ бо живо́тное всепло́дїе.
Ѻ҆́крестъ трапе́зы твоеѧ̀ возвесели́сѧ, зрѧ̀ твоѧ̑ пастыренача́льниче и҆сча̑дїѧ носѧ́щѧ вѣ̑тви благодѣ́ланїѧ.
Сла́ва:
Ст҃ы́мъ дх҃омъ всѧ́кое бога́тство сла́вы, ѿ негѡ́же бл҃года́ть, и҆ живо́тъ всѧ́кой тва́ри: со ѻ҆ц҃е́мъ бо воспѣва́емь є҆́сть и҆ съ сло́вомъ.
И҆ ны́нѣ: то́йже.
Та́же прокі́менъ, гла́съ г҃: Рцы́те во ꙗ҆зы́цѣхъ, ꙗ҆́кѡ гдⷭ҇ь воцр҃и́сѧ: и҆́бо и҆спра́ви вселе́ннꙋю, ꙗ҆́же не подви́житсѧ. Сті́хъ: Воспо́йте гдⷭ҇ви пѣ́снь но́вꙋ, воспо́йте гдⷭ҇ви всѧ̀ землѧ̀. Всѧ́кое дыха́нїе: Є҆ѵⷢ҇лїе ѿ лꙋкѝ, д҃, воскре́сное зача́ло рв҃і. Та́же, Воскресе́нїе хрⷭ҇то́во: По н҃-мъ ѱалмѣ̀, по ѻ҆бы́чаю. <<ч҃ѕ ѡ҆б.: 192>>
Та́же канѡ́нъ па́схи, пи́санъ въ недѣ́лю па́схи, со і҆рмосы̀ и҆ съ бг҃оро́дичнами є҆гѡ̀, на и҃: пи́саны въ недѣ́лю ст҃ы́хъ мѷроно́сицъ. И҆ ѡ҆ разсла́бленномъ на ѕ҃.
Катава́сїа: Воскресе́нїѧ де́нь: ѻ҆́ба ли́ка вкꙋ́пѣ.
КАНѠ́НЪ, гла́съ г҃.
Пѣ́снь а҃.
І҆рмо́съ: Ди́внѡ, сла́внѡ творѧ́й чꙋдеса̀. ты̀ є҆сѝ бж҃е, бе́зднꙋ ѡ҆землени́вый, и҆ колесни̑цы потопи́вый, и҆ лю́ди спасы́й пою́щыѧ тебѣ̀, ꙗ҆́кѡ цр҃ю̀ на́шемꙋ и҆ бг҃ꙋ.
Дѣ́йствꙋѧй зна́мєнїѧ, творѧ́й чꙋдеса̀ є҆ди́не цр҃ю̀, распѧ́тїе во́лею претерпѣ́лъ є҆сѝ, ꙗ҆́кѡ ще́дръ, и҆ сме́рть сме́ртїю ᲂу҆мертви́въ, ѡ҆животвори́лъ є҆сѝ на́съ.
Во хрⷭ҇то́вѣ воста́нїи лю́дїе дне́сь ликꙋ́имъ вѣ́рнѡ, плѣне́нъ бы́сть а҆́дъ, ю҆́зники ꙗ҆̀же содержа́ше, ѿдадѐ со тща́нїемъ, пою́щыѧ вели̑чїѧ бж҃їѧ.
Си́лою бж҃е́ственною, и҆ногда̀ разсла́бленнаго сло́вомъ твои́мъ хрⷭ҇тѐ стѧгнꙋ́вый, и҆ повелѣ́вый є҆мꙋ̀ ѻ҆́дръ взѧ́ти, мно́гимъ вре́менемъ немощствꙋ́ющꙋю лю́тѣ дꙋ́шꙋ мою̀ и҆сцѣлѝ.
Въ кꙋпѣ́ль и҆ногда̀ ѻ҆́вчꙋю а҆́гг҃лъ схожда́ше, и҆ є҆ди́наго и҆сцѣлева́ше на всѧ́кое лѣ́то: креще́нїемъ же бж҃е́ственнымъ ны́нѣ ѡ҆чища́етъ безчи̑сленнаѧ мно́жества хрⷭ҇то́съ.
А҆рха́гг҃лꙋ мїхаи́лꙋ:
Нача́льниче а҆́гг҃лѡвъ, а҆рхїстрати́же вы́шнихъ слꙋжи́телей, собра́вшыѧсѧ въ честнѣ́мъ хра́мѣ твое́мъ, и҆ бг҃а воспѣва́ющыѧ, покрыва́й и҆ сохранѧ́й ѿ всѧ́кихъ и҆скꙋше́нїй.
Сла́ва: трⷪ҇ченъ:
Въ трїе́хъ ли́цѣхъ, є҆ди́номъ же є҆стествѣ̀ безнача́льнаго <<ч҃з: 193>> бг҃а пои́мъ непреста́ннѡ со безпло́тными, ѻ҆ц҃а̀, сло́ва и҆ дх҃а, црⷭ҇тво и҆ держа́вꙋ и҆мꙋ́ща нераздѣ́льнꙋю.
И҆ ны́нѣ, бг҃оро́диченъ:
Чтꙋ́щїй се́й чи́стаѧ гра́дъ тво́й всегда̀ вѣ́рнѡ, спаса́й ѿ бѣ́дъ, плѣне́нїѧ ва́рварскагѡ, междоꙋсо́бныѧ бра́ни, и҆ меча̀, и҆ всѧ́кагѡ и҆но́гѡ преще́нїѧ.
Пѣ́снь г҃.
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ благосла́вный, веселѧ́щисѧ возопі́й: ᲂу҆тверди́хсѧ тобо́ю бцⷣе, нѣ́сть ст҃ъ, нѣ́сть пра́веденъ, па́че тебѐ гдⷭ҇и.
Зрѧ̀ тебѐ и҆ногда̀ со́лнце, на дре́вѣ ви́сѧща сло́ве, свѣ́тъ скры̀, и҆ трѧса́шесѧ землѧ̀ всѧ̀, ме́ртвїи воста́ша, ме́ртвꙋ бы́вшꙋ тебѣ̀ всеси́льне.
Съ дꙋше́ю прише́дшꙋ тебѣ̀ во ᲂу҆тро́бꙋ землѝ, дꙋ́шы ꙗ҆́же стѧжа̀ а҆́дъ, и҆здава́ше со тща́нїемъ, вопїю́щыѧ держа́вѣ твое́й пѣ́снь благода́рнꙋю, є҆ди́не гдⷭ҇и.
Въ лѣ́тѣхъ мно́гихъ немощствꙋ́ющꙋю лю́тѣ дꙋ́шꙋ мою̀ преблагі́й и҆сцѣлѝ, ꙗ҆́коже разсла́бленнаго пре́жде, ꙗ҆́кѡ да послѣ́дꙋю твои́мъ стезѧ́мъ, ꙗ҆̀же показа́лъ є҆сѝ лю́бѧщымъ тѧ̀.
А҆рха́гг҃лꙋ мїхаи́лꙋ:
Съ вы́шними чи́нми бж҃їи а҆рха́гг҃ле, мольбꙋ̀ сотворѝ ѡ҆ вѣ́рою пою́щихъ тѧ̀, соблюда́ѧ и҆ хранѧ̀ на́съ, жите́йскими страстьмѝ напада́емыхъ.
Сла́ва, трⷪ҇ченъ:
Сла́ва ѻ҆ц҃ꙋ̀ возопїи́мъ, сн҃ꙋ, и҆ дх҃ꙋ, є҆ди́нъ бо є҆́сть є҆стество́мъ бг҃ъ, є҆го́же си̑лы всѧ̀ нбⷭ҇ныѧ со стра́хомъ сла́вѧтъ, ст҃ъ, ст҃ъ, ст҃ъ є҆сѝ зовꙋ́ще. <<ч҃з ѡ҆б.: 194>>
И҆ ны́нѣ: бг҃оро́диченъ:
Безсѣ́менное и҆мѣ́ла є҆сѝ зача́тїе, и҆ па́че ᲂу҆ма̀ ржⷭ҇тво̀, дв҃о мт҃и чⷭ҇таѧ: дѣ́ло стра́шное, чꙋ́до преве́лїе, а҆́гг҃лы почита́емое и҆ человѣ́ки сла́вимое, ѻ҆трокови́це влⷣчце.
Конда́къ па́сцѣ и҆ і҆́косъ.
И҆ сѣда́ленъ, гла́съ г҃:
Глаго́лъ разсла́бленнаго то́кмѡ стѧгнꙋ̀, ꙗ҆́кѡ всемі́рное сло́во є҆ди́но, на́съ ра́ди на землѝ ꙗ҆́вльшагѡсѧ за благоꙋтро́бїе. тѣ́мже и҆ ѻ҆́дръ носѧ̀ мимохожда́ше, а҆́ще и҆ кни́жницы зрѣ́ти содѣ́ѧнное не терпѧ́хꙋ, ѕло́бы содержи́ми за́вистїю, дꙋ́шы разслаблѧ́ющею.
Сла́ва, и҆ ны́нѣ: бг҃оро́диченъ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й, гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже, ꙗ҆́кѡ повелѣ́нъ бы́хъ, вопїю́ ти: ра́дꙋйсѧ бл҃года́тнаѧ.
Пѣ́снь д҃.
І҆рмо́съ: Прїѡсѣне́ннꙋю го́рꙋ, а҆ввакꙋ́мъ прозрѧ́ше пречⷭ҇тꙋю твою̀ ᲂу҆тро́бꙋ чⷭ҇таѧ. тѣ́мъ взыва́ше: ѿ ю҆́га прїи́детъ бг҃ъ, и҆ ст҃ы́й ѿ горы̀ прїѡсѣне́нныѧ ча́щи.
Є҆вре́йскїй собо́ръ за́вистїю растаѧва́емь, на дре́вѣ распѧ́тъ тѧ̀ гдⷭ҇и: и҆ разори́въ ѡ҆сꙋжде́нїе сме́рти, ꙗ҆́кѡ си́ленъ воста́лъ є҆сѝ, мі́ръ съ собо́ю совоздви́гнꙋвъ.
Съ мѵ́ры жєны̀, что̀ неистощи́мое мѵ́ро и҆́щете; воста́лъ є҆́сть, мѷроно́сицамъ речѐ, сѣдѧ́й въ бѣ́лыхъ ри́захъ, поднебе́снꙋю и҆спо́лнивъ мы́сленнагѡ благоꙋха́нїѧ.
Ра́бїй носѧ̀ ѻ҆́бразъ, за мно́гое бл҃гоꙋтро́бїе ходѧ́й <<ч҃и: 195>> прише́лъ є҆сѝ, и҆ здра́ва показа́лъ є҆сѝ, во мно́гихъ лѣ́тѣхъ лежа́щаго, сло́ве, повелѣ́въ и҆ ѻ҆́дръ взѧ́ти.
А҆́гг҃лъ ᲂу҆́бѡ гдⷭ҇нь, на всѧ́кое лѣ́то схожда́ѧ, во́дꙋ въ кꙋпѣ́ли возмꙋща́ше, соверша́ѧ здра́ва є҆ди́наго то́чїю: хрⷭ҇то́съ же мно́жество безчи́сленное бжⷭ҇твеннымъ креще́нїемъ спаса́етъ.
А҆рха́гг҃лꙋ мїхаи́лꙋ:
Нача́льниче а҆́гг҃лѡвъ и҆ наста́вниче заблꙋжда́ющихъ, гдⷭ҇нь нача́льный воево́до, въ ча́съ се́й посредѣ̀ на́съ прїидѝ, и҆ моли̑твы всѣ́хъ принесѝ є҆ди́номꙋ творцꙋ̀ и҆ влⷣцѣ.
Сла́ва, трⷪ҇ченъ:
Соединѧ́емаѧ є҆стество́мъ, и҆ раздѣлѧ́емаѧ ли́цы, є҆́сть ст҃а́ѧ трⷪ҇ца, ѻ҆ц҃ъ пресꙋ́щный, соприсносꙋ́щный же сн҃ъ, и҆ ст҃ы́й и҆ є҆ди́ный всеси́льный дх҃ъ.
И҆ ны́нѣ: бг҃оро́диченъ:
Чи́стаѧ, ка́кѡ дои́ши; ка́кѡ же родила̀ є҆сѝ млⷣнца, а҆да́ма дре́внѣйшаго; ка́кѡ на рꙋкꙋ̀ но́сиши сн҃а, сꙋ́щаго на ра́мꙋ херꙋві́мскꙋ, ꙗ҆́кѡ зна́етъ, ꙗ҆́коже вѣ́сть, всѧ̑ ѡ҆сꙋществова́вый.
Пѣ́снь є҃.
І҆рмо́съ: Свѣ́томъ твои́мъ невече́рнимъ хрⷭ҇тѐ, ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й, занѐ свѣ́тъ повелѣ̑нїѧ твоѧ̀.
Вознесы́йсѧ на дре́вѣ крⷭ҇тнѣмъ, и҆ совознесы́й мі́ръ ве́сь, и҆ бы́въ въ ме́ртвыхъ бж҃е, ѿ вѣ́ка мє́ртвыѧ воздвиза́еши.
Воскре́се ꙗ҆́коже речѐ хрⷭ҇то́съ, и҆стощи́вый всѧ̀ а҆́дова ца̑рствїѧ, и҆ ꙗ҆влѧ́етсѧ а҆по́столѡмъ, ра́дость подава́ѧ вѣ́чнꙋющꙋю. <<ч҃и ѡ҆б.: 196>>
Бѣлоѻбра́зенъ ви́дѣнъ бы́сть жена́мъ блиста́ѧйсѧ а҆́гг҃лъ: не ктомꙋ̀ пла́чите, жи́знь ва́ша воста̀, сꙋ́щыѧ во гробѣ́хъ мє́ртвыѧ ѡ҆живи́вшаѧ.
Разсла́бленнаго ꙗ҆́кѡ воздви́глъ є҆сѝ хрⷭ҇тѐ, разсла́бленнꙋю мою̀ дꙋ́шꙋ престꙋпле́ньми ѡ҆здра́ви, и҆ ше́ствовати мнѣ̀ твоѧ̑ пра̑выѧ стєзѝ споспѣшествꙋ́й.
А҆рха́гг҃лꙋ мїхаи́лꙋ:
А҆́гг҃лѡвъ наста́вниче мїхаи́ле, собира́ющыѧсѧ въ хра́мѣ твое́мъ лю́ди дне́сь, и҆ проповѣ́дающыѧ бж҃їѧ вели̑чїѧ спаса́й.
Сла́ва: трⷪ҇ченъ:
Равноче́стнаѧ тричи́сленнаѧ є҆ди́нице, раздѣлѧ́емаѧ ᲂу҆́бѡ вѣ́рнѡ ѵ҆поста́сьми, соединѧ́емаѧ же є҆стество́мъ є҆́сть, ѻ҆ц҃ъ, сн҃ъ и҆ бж҃е́ственный дх҃ъ.
И҆ ны́нѣ: бг҃оро́диченъ:
Безсѣ́менное ржⷭ҇тво̀ твоѐ чи́стаѧ, непостижи́мое пое́мъ рожде́нїе, блажа́ще тѧ̀ ꙗ҆́кѡ мт҃рь творца̀ всѣ́хъ и҆ влⷣки.
Пѣ́снь ѕ҃.
І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ̀ ты̀ спасѝ сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ проро́ка.
Вознесы́йсѧ во́лею на дре́во, положи́лсѧ є҆сѝ ꙗ҆́кѡ ме́ртвъ во гро́бѣ, и҆ сꙋ́щыѧ во а҆́дѣ мє́ртвыѧ всѧ̑ вкꙋ́пѣ ѡ҆живи́въ хрⷭ҇тѐ, воскреси́лъ є҆сѝ бж҃е́ственною си́лою.
А҆́дъ срѣ́тъ тѧ̀ ще́дре до́лѣ ѡ҆горчи́сѧ, свѧ̑занныѧ ѿдава́ѧ со тща́нїемъ, твоѐ стра́шное пою́щыѧ сп҃се воскресе́нїе, во гла́сѣхъ немо́лчныхъ. <<ч҃ѳ: 197>>
Бж҃е́ственнїи ᲂу҆ченицы̀, ви́дѣвше жи́знь всѣ́хъ и҆з̾ гро́ба воста́вша хрⷭ҇та̀, любо́вїю мно́гою, и҆ нра́вомъ пра́вымъ, и҆ весе́лїемъ дꙋше́внымъ покланѧ́хꙋсѧ.
Дре́вле на ѻ҆дрѣ̀ болѣ́зненномъ, въ лѣ́тѣхъ мно́зѣхъ слежа́й, твои̑мъ хрⷭ҇тѐ повелѣ́нїемъ и҆сцѣлѣ́въ, сла́витъ воспѣва́ѧ бл҃гоꙋтро́бїе твоѐ, жизнода́телю.
А҆рха́гг҃лꙋ мїхаи́лꙋ:
А҆́гг҃лѡвъ наста́вниче мїхаи́ле, предстоѧ́й престо́лꙋ влⷣчню, прїидѝ посредѣ̀ на́съ, наставлѧ́ѧ къ стезѧ́мъ жи́зни, тебѐ предста́телѧ те́пла стѧжа́вшихъ.
Сла́ва: трⷪ҇ченъ:
Трⷪ҇цꙋ ли́цы тѧ̀ чтꙋ̀, є҆ди́ницꙋ же сꙋщество́мъ проповѣ́даю, безнача́льне ѻ҆́ч҃е, сн҃е, дш҃е пра́вый: бж҃е всѣ́хъ, съ вы́шними стра́шными во́инствы.
И҆ ны́нѣ: бг҃оро́диченъ:
Всѧ̑ бж҃е́ственнымъ манове́нїемъ носѧ́й, держи́мь є҆́сть бцⷣе дв҃о во ѡ҆б̾ѧ́тїѧхъ твои́хъ, всѣ́хъ на́съ восхища́ѧ, ѿ рꙋкѝ рабо́ты лꙋка́вагѡ, ꙗ҆́кѡ ще́дръ.
Конда́къ, гла́съ г҃: Подо́бенъ:
Дꙋ́шꙋ мою̀ гдⷭ҇и, во грѣсѣ́хъ всѧ́ческихъ, и҆ безмѣ́стными дѣѧ́ньми лю́тѣ разсла́бленꙋ, воздви́гни бж҃е́ственнымъ твои́мъ предста́тельствомъ, ꙗ҆́коже и҆ разсла́бленнаго воздви́глъ є҆сѝ дре́вле, да зовꙋ́ ти спаса́емь: ще́дрый, сла́ва хрⷭ҇тѐ держа́вѣ твое́й.
І҆́косъ:
Рꙋкѝ твоеѧ̀ го́рстїю содержа́й концы̀ і҆и҃се бж҃е, ѻ҆ц҃ꙋ̀ собезнача́льный, и҆ дх҃ꙋ ст҃о́мꙋ совлады́чествꙋѧй всѣ́ми, пло́тїю ꙗ҆ви́лсѧ є҆сѝ, недꙋ́ги и҆сцѣлѧ́ѧ, и҆ стра̑сти ѿгна́лъ <<ч҃ѳ ѡ҆б.: 198>> є҆сѝ: слѣпцы̀ просвѣти́лъ є҆сѝ, и҆ разсла́бленнаго сло́вомъ бж҃е́ственнымъ ты̀ возста́вилъ є҆сѝ, семꙋ̀ напра́снѡ ходи́ти повелѣ́въ, и҆ сего̀ носи́вшїй ѻ҆́дръ на ра́мꙋ взѧ́ти. тѣ́мже всѝ съ ни́мъ воспѣва́емъ, и҆ возопїи́мъ: ще́дрый, сла́ва хрⷭ҇тѐ держа́вѣ твое́й.
Сѷнаѯа́рїй въ недѣ́лю четве́ртꙋю по па́сцѣ, ѡ҆ разсла́бленномъ.
Стїхѝ: Глаго́лъ хрⷭ҇то́въ, стѧгне́нїе разсла́бленномꙋ:
Си́це и҆сцѣле́нїе се́й глаго́лъ и҆ то́кмо.
Въ то́йже де́нь, въ недѣ́лю четве́ртꙋю по па́сцѣ, разсла́бленнагѡ па́мѧть твори́мъ, и҆ ꙗ҆́коже подоба́етъ сицево́е гдⷭ҇а бг҃а и҆ сп҃са на́шегѡ і҆и҃са хрⷭ҇та̀ пра́зднꙋемъ чꙋ́до. Положи́сѧ ᲂу҆́бѡ и҆ сїѐ здѣ̀, ꙗ҆́кѡ во вре́мѧ ᲂу҆ є҆врє́й пѧтдесѧ́тницы хрⷭ҇то́съ содѣ́ѧ сїѐ: вше́дъ бо во і҆ерⷭ҇ли́мъ на пра́здникъ, и҆ въ пѧтопритво́рнѣй кꙋпѣ́ли бы́въ, ю҆́же соломѡ́нъ созда̀, ꙗ҆́же и҆ ѻ҆́вчаѧ нарече́на бы́сть, ꙗ҆́кѡ во ст҃и́лищи на же́ртвꙋ закала́емыхъ ѻ҆ве́цъ, та́мѡ внꙋ́трєннѧѧ и҆змыва́хꙋ. И҆лѝ за є҆́же пе́рвѣе та́мѡ входѧ́щꙋ, внегда̀ ѿ а҆́гг҃ла є҆ди́ницею въ лѣ́то вода̀ возмꙋща́ема бѣ̀, здра́вꙋ ꙗ҆влѧ́тисѧ. Ѡ҆брѣта́етъ ᲂу҆́бѡ та́мѡ человѣ́ка, три́десѧть и҆ ѻ҆́смь лѣ́тъ и҆мꙋ́ща, и҆ въ недоꙋмѣ́нїи сꙋ́ща, кто̀ бы вве́рглъ въ во́дꙋ є҆го̀ лежа́щаго: ѿ негѡ́же и҆ наказꙋ́емсѧ, коли́ко благо́е жда́нїе и҆ терпѣ́нїе. и҆ ꙗ҆́кѡ поне́же креще́нїе да́тисѧ и҆мѧ́ше чисти́тельное грѣха̀ всѧ́кагѡ, ᲂу҆смотрѝ бг҃ъ въ ве́тхомъ водо́ю содѣва́тисѧ чꙋдесє́мъ, да є҆гда̀ ѻ҆́ное бꙋ́детъ, ᲂу҆до́бнѡ прїи́метсѧ. Над̾ сего̀ ᲂу҆́бѡ разсла́бленнаго, і҆а́ра си́це нѣ́какѡ и҆менꙋ́ема, прихо́дитъ і҆и҃съ, и҆ вопроша́етъ є҆го̀. Ѻ҆́нъ же неимѣ́нїе споспѣшествꙋ́ющагѡ є҆мꙋ̀ предлага́етъ. И҆ хрⷭ҇то́съ, є҆́же ѡ҆ толи́цѣ и҆ста́ѧтисѧ семꙋ̀ не́мощїю вѣ́дый, глаго́летъ: возмѝ ѻ҆́дръ тво́й, и҆ ходѝ. И҆ а҆́бїе здра́въ ꙗ҆влѧ́етсѧ: и҆ ѻ҆́дръ на ра́мо взе́мъ, да не привидѣ́нїе дѣ́ло мни́тсѧ, несѧ́ше въ до́мъ сво́й. Сꙋббѡ́тѣ же сꙋ́щей, возбранѧ́емь бѧ́ше ѿ і҆ꙋдє́й ходи́ти. Ѻ҆́нъ же и҆сцѣли́вшаго и҆ предлага́ше, ꙗ҆́кѡ ре́кша въ сꙋббѡ́тꙋ ходи́ти, не вѣ́дый како́въ є҆́сть: і҆и҃съ бо, глаго́летъ, наро́дꙋ та́мѡ <<р҃: 199>> собра́вшꙋсѧ, ᲂу҆клони́сѧ ᲂу҆кры́всѧ. По си́хъ же ѡ҆брѣ́те є҆го̀ і҆и҃съ во ст҃и́лищи, и҆ глаго́летъ є҆мꙋ̀: сѐ здра́въ бы́лъ є҆сѝ, ктомꙋ̀ не согрѣша́й, да не го́ршее что̀ тебѣ̀ бꙋ́детъ. Сїе́ же реко́ша нѣ́цыи рещѝ хрⷭ҇тꙋ̀ непра́вѡ глаго́люще: поне́же то́й и҆мѧ́ше да́ти і҆и҃сꙋ ᲂу҆даре́нїе по́слѣжде, є҆гда̀ а҆рхїере́ю каїа́фѣ предстоѧ́ше, и҆ го́ршее разслабле́нїѧ и҆скꙋше́нїе ѿтꙋ́дꙋ наслѣ́дити, вѣ́чнымъ ѻ҆гне́мъ, не три́десѧть и҆ ѻ҆́смь лѣ́тъ то́кмѡ, но при́снѡ мꙋ́читисѧ. Па́че же показа̀ хрⷭ҇то́съ, ѿ грѣ̑хъ є҆мꙋ̀ разслабле́нїѧ приключи́тисѧ не́мощи. Не ᲂу҆́бѡ же всѧ́каѧ болѣ́знь ѿ грѣ̑хъ, но и҆ ѿ є҆сте́ственна недꙋ́га, и҆ ѿ ѡ҆б̾ѧде́нїѧ, и҆ неполе́знства, и҆ и҆ны́хъ мно́гихъ нахо́дитъ. Разꙋмѣ́въ ᲂу҆́бѡ разсла́бленный, ꙗ҆́кѡ і҆и҃съ є҆́сть сотвори́вый є҆го̀ здра́ва, сего̀ і҆ꙋде́ємъ ᲂу҆строѧ́етъ вѣ́дома. Ѻ҆ни́ же на гнѣ́въ поѡстри́вшесѧ, и҆ска́хꙋ ᲂу҆би́ти хрⷭ҇та̀, ꙗ҆́кѡ ᲂу҆́бѡ сꙋббѡ́тꙋ разрꙋша́ше. Ѻ҆́нъ же тѣ̑мъ мнѡ́гаѧ глаго́лаше, составлѧ́ѧ, ꙗ҆́кѡ пра́веднѡ и҆ въ сꙋббѡ́тꙋ благодѣ́йствовати: и҆ ꙗ҆́кѡ то́й са́мъ є҆́сть, и҆́же сꙋббѡ́тꙋ рекі́й блюстѝ, ꙗ҆́кѡ ра́венъ є҆́сть ѻ҆ц҃ꙋ̀, и҆ ꙗ҆́коже ѻ҆́нъ є҆щѐ дѣ́лаетъ, та́кѡ и҆ се́й. Вѣ́домо же, ꙗ҆́кѡ и҆́нъ се́й разсла́бленный, ѻ҆́нагѡ и҆́же въ матѳе́и разсла́бленнагѡ: ѻ҆́но ᲂу҆́бѡ въ хра́минѣ содѣ́ѧсѧ, и҆ слꙋжа́щымъ ѻ҆́номꙋ человѣ́кѡмъ, и҆ ѡ҆ставлѧ́ютсѧ тебѣ̀ грѣсѝ, слы́шавшꙋ. Сїе́ же въ притво́рѣ содѣ́ѧсѧ, и҆ человѣ́ка не и҆мѣ́ѧше, ꙗ҆́коже глаго́летъ сщ҃е́нное є҆ѵⷢ҇лїе, и҆ ꙗ҆́кѡ ѻ҆́дръ взѧ́тъ ꙗ҆́коже и҆ ѻ҆́ный. Пра́зднꙋетсѧ же ны́нѣ, за є҆́же въ пѧтдесѧ́тницѣ и҆ семꙋ̀ содѣ́ѧтисѧ, ꙗ҆́коже и҆ є҆́же ѡ҆ самарѧны́нѣ и҆ ѡ҆ слѣпо́мъ. Ѳѡмꙋ́ бо и҆ мѷронѡ́сицы, во ᲂу҆вѣре́нїе є҆́же и҆з̾ ме́ртвыхъ воскресе́нїѧ хрⷭ҇то́ва пра́зднꙋемъ: прѡ́чаѧ же до вознесе́нїѧ: занѐ сїѧ̑ во вре́мѧ пѧтдесѧ́тницы и҆́же ѿ є҆врє́й разли́чнѡ дѣ́йствова, и҆ ꙗ҆́кѡ ѡ҆ си́хъ і҆ѡа́ннъ вкра́тцѣ та́кѡ помѧнꙋ̀. Неизрече́нною ми́лостїю твое́ю хрⷭ҇тѐ бж҃е на́шъ, поми́лꙋй на́съ. а҆ми́нь.
Пѣ́снь з҃.
І҆рмо́съ: Пла́мень ѡ҆роси́вый пе́щный, и҆ ѻ҆́троки неѡпали́мы спасы́й, благослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ. <<р҃ ѡ҆б.: 200>>
Просте́рта тѧ̀ на дре́вѣ ꙗ҆́кѡ зрѧ́ше, свѣ́тъ скры̀ со́лнце, не могꙋ́щее мі́рови свѣти́ти, тебѣ̀ во́лею заше́дшꙋ всецр҃ю̀, на просвѣще́нїе всѣ́хъ ꙗ҆зы́кѡвъ.
Воскре́слъ є҆сѝ и҆стощи́вый гро́бы, и҆ плѣни́вый а҆́дъ си́лою всеси́льною: тѣ́мже пое́мъ честно́е твоѐ хрⷭ҇тѐ, и҆ бж҃е́ственное воста́нїе.
Ꙗ҆́кѡ ме́ртва что̀ жива́го и҆́щете; воста̀, нѣ́сть во гро́бѣ, мѷроно́сицамъ вопїѧ́ше дре́вле, блиста́ѧйсѧ зра́комъ бж҃е́ственный а҆́гг҃лъ.
Слежа́ща въ лѣ́тѣхъ мно́зѣхъ разсла́бленнаго сло́вомъ и҆сцѣли́вый, вопїѧ́лъ є҆сѝ: возмѝ ѻ҆́дръ тво́й, и҆ ходѝ, поѧ̀ вели̑чїѧ бж҃їѧ.
А҆рха́гг҃лꙋ мїхаи́лꙋ:
Мїхаи́ле нача́льный воево́до гдⷭ҇нь, вѣ́рнѡ въ бж҃е́ственнѣмъ твое́мъ хра́мѣ собира́ющихсѧ, во хвале́нїе бж҃їе наставлѧ́й, покрыва́й ѡ҆ всѧ́ческихъ ѕѡ́лъ хода́тайствомъ твои́мъ.
Сла́ва:
Ѽ трⷪ҇це, вѣ́рою пою́щыѧ тѧ̀, ꙗ҆́кѡ бг҃а всѣ́хъ и҆ влⷣкꙋ, ѿ всѧ́кихъ бѣ́дъ спаса́й, и҆ твои́хъ бла́гъ прича́стники сотворѝ.
И҆ ны́нѣ, бг҃оро́диченъ:
Дѣ́вствꙋеши ро́ждши па́че сло́ва, пре́жде всѣ́хъ вѣ̑къ роди́вшагосѧ ѿ безнача́льна ѻ҆ц҃а̀ нетлѣ́ннѡ: сегѡ̀ ра́ди чи́стаѧ тебѐ ᲂу҆блажа́емъ.
Пѣ́снь и҃.
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀ и҆ го́ры, и҆ хо́лми, и҆ глꙋбина̀, и҆ ве́сь <<р҃а: 201>> ро́дъ человѣ́ческїй, пѣ́сньми того̀, ꙗ҆́кѡ созда́телѧ и҆ и҆зба́вителѧ благослови́те и҆ превозноси́те во всѧ̀ вѣ́ки.
Завѣ́са раздра́сѧ распе́ншꙋсѧ тебѣ̀ сп҃се на́шъ, и҆ ѿдава́ше мє́ртвыѧ, ꙗ҆̀же пожрѐ сме́рть: и҆ а҆́дъ ѡ҆бнажи́сѧ, тебѐ зрѧ̀ въ преиспо́днихъ землѝ бы́вша.
Гдѣ̀ твоѐ жа́ло є҆́сть сме́рте; гдѣ̀ твоѧ̀ а҆́де, ны́нѣ побѣ́да; воскре́сшꙋ цр҃ю̀, ᲂу҆мертви́лсѧ є҆сѝ и҆ поги́блъ, не ктомꙋ̀ ца́рствꙋеши: крѣ́пкїй бо взѧ́тъ ꙗ҆̀же и҆мѣ́лъ є҆сѝ свѧ̑занныѧ.
Тецы́те ско́рѡ, возвѣсти́те а҆пⷭ҇лѡмъ воскресе́нїе, мѷроно́сицамъ ꙗ҆вле́йсѧ ю҆́ноша вѣща́ше: воскре́се влⷣка, и҆ съ ни́мъ и҆̀же ѿ вѣ́ка ме́ртвїи пресла́внѡ.
Лѣ́ты мно́гими слежа́й разсла́бленный взыва́ше: поми́лꙋй мѧ̀ и҆зба́вителю, недоꙋмѣ́нїемъ содержи́ма. се́й же повелѣва́етъ є҆мꙋ̀ взѧ́ти тща́тельнѡ ѻ҆́дръ, и҆ пра́вѡ стꙋпа́ти.
А҆рха́гг҃лꙋ:
Ꙗ҆́кѡ невеще́ственныхъ предводи́тель а҆рхїстрати́же си́лъ, съ на́ми просѝ на́мъ прегрѣше́нїй и҆збавле́нїе, и҆справле́нїе же житїѧ̀, и҆ та́мошнихъ наслажде́нїе бла̑гъ вѣ́чныхъ.
Бл҃гослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.
Несозда́нное, непресѣко́мое сꙋщество̀, трїѷпоста́сное бж҃ество̀, ѻ҆ц҃а̀ безнача́льна бг҃а, и҆ сн҃а, и҆ дх҃а ст҃а́го воспои́мъ согла́снѡ, серафі́мскꙋю зовꙋ́ще стра́шнꙋю пѣ́снь.
И҆ ны́нѣ, бг҃оро́диченъ:
Сви́токъ тѧ̀ дре́вле зрѧ́ше и҆са́їа приснодв҃о, въ не́мже пе́рстомъ ѻ҆́ч҃имъ, сло́во безлѣ́тное написа́сѧ, ѿ всѧ́кагѡ безслове́сїѧ спаса́ющее на́съ, словесы́ тѧ сщ҃е́нными воспѣва́ющихъ.
Хва́лимъ, бл҃гослови́мъ: И҆ катава́сїа. Чⷭ҇тнѣ́йшꙋю не пое́мъ. <<р҃а ѡ҆б.: 202>>
Пѣ́снь ѳ҃.
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ, го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.
І҆и҃се на дре́вѣ возвыша́емь, совозне́слъ є҆сѝ на́съ, и҆ положи́всѧ во́лею во гро́бѣ, и҆з̾ гробѡ́въ мє́ртвыѧ воскреси́лъ є҆сѝ всѧ̀, пою́щыѧ держа́вꙋ твою̀ непостижи́мꙋю, и҆ си́лꙋ твою̀ непобѣди́мꙋю.
Краснѣ́йшїй ѿ гро́ба возсїѧ́лъ є҆сѝ, ꙗ҆́кѡ жени́хъ ѿ черто́га, краснѣ́йшїй сло́ве, и҆ разрꙋши́лъ є҆сѝ а҆́да мра́чное, и҆ ю҆́зники и҆зве́лъ є҆сѝ, согла́снѡ зовꙋ́щыѧ: сла́ва сла́вѣ твое́й, сла́ва і҆и҃се бж҃е воста́нїю твоемꙋ̀.
Воздыха̑нїѧ же и҆ сле́зы носѧ́щѧ, съ мѵ́ры во тща́нїи всест҃ы́й гро́бъ достиго́ша жєны̀, и҆ хрⷭ҇то́вꙋ ᲂу҆чи́ми бѧ́хꙋ вѣ́рою сла́вномꙋ воста́нїю, є҆́же пра́зднꙋемъ въ ра́дости дꙋше́вной веселѧ́щесѧ.
Послѣ́доваше здра́вїе тѣ́ла, повелѣ́нїю твоемꙋ̀ хрⷭ҇тѐ и҆ ви́димь бѧ́ше пре́жде разсла́бленный, текі́й со тща́нїемъ, и҆ ѻ҆́дръ носѧ́й, на не́мже возлежа́ше лѣ́ты мно́гими, пѣсносло́вѧ мно́гꙋю си́лꙋ твою̀.
А҆рха́гг҃лꙋ мїхаи́лꙋ:
Просвѣще́нїе на́мъ и҆спросѝ, вели́кїй а҆рхїстрати́же, при́снѡ свѣ́тꙋ вели́комꙋ предстоѧ́й, и҆ ᲂу҆мирѝ на́шꙋ жи́знь, напа́стьми всегда̀ ѕмїе́выми и҆ ѡ҆бстоѧ́ньми житїѧ̀ зы́блемꙋю при́снѡ, достохва́льне.
Сла́ва:
Свѣ́тъ и҆ свѣ́тове, жи́знь же и҆ жи̑зни, сла́влю тѧ̀ <<р҃в: 203>> всеблагоче́стнѡ, ѻ҆́ч҃е, сло́ве и҆ дш҃е ст҃ы́й, трїѷпоста́снаѧ є҆ди́нице, нераздѣли́маѧ держа́во, бж҃ество̀ несли́тное, ст҃ъ, ст҃ъ, ст҃ъ, вопїѧ̀ съ вы́шними си́лами.
И҆ ны́нѣ:
Ѿ свѣтоно́сныхъ про́йде ложе́снъ твои́хъ вели́кое сл҃нце хрⷭ҇то́съ, и҆ мі́ръ просвѣтѝ пречⷭ҇таѧ, ѡ҆сїѧ́ньми свѣ́тлыми, и҆ тмꙋ̀ ѿѧ́тъ престꙋпле́нїѧ: тѣ́мже пое́мъ тѧ̀ ꙗ҆́кѡ винꙋ̀ всѣ́хъ до́брыхъ, бг҃оневѣ́сто.
Та́же, Ст҃ъ гдⷭ҇ь бг҃ъ на́шъ. три́жды, на гла́съ г҃.
Є҆ѯапостїла́рїй, Пло́тїю ᲂу҆снꙋ́въ: є҆ди́ножды.
Сла́ва: Дрꙋгі́й. Подо́бенъ: Жєны̀ ᲂу҆слы́шите:
Предста̀ чл҃вѣколю́бецъ и҆ всеще́дрый гдⷭ҇ь ѻ҆́вчей кꙋпѣ́ли, є҆́же и҆сцѣли́ти недꙋ́ги: ѡ҆брѣ́те же человѣ́ка слежа́ща мно́гими лѣ́ты, и҆ къ немꙋ̀ возопѝ: возмѝ ѻ҆́дръ, и҆ и҆дѝ на пꙋтѝ пра̑выѧ.
И҆ ны́нѣ: то́йже.
На хвали́техъ поста́вимъ стїхѡ́въ, и҃. И҆ пое́мъ стїхи̑ры воскре́сны, гла́съ г҃:
Прїиди́те всѝ ꙗ҆зы́цы, ᲂу҆разꙋмѣ́йте стра́шныѧ та́йны си́лꙋ: хрⷭ҇то́съ бо сп҃съ на́шъ, є҆́же въ нача́лѣ сло́во, распѧ́тсѧ на́съ ра́ди, и҆ во́лею погребе́сѧ, и҆ воскр҃се и҆з̾ ме́ртвыхъ, є҆́же сп҃стѝ всѧ́чєскаѧ: томꙋ̀ поклони́мсѧ.
Повѣ́даша всѧ̑ чꙋдеса̀ стра́жїе твоѝ гдⷭ҇и: но собо́ръ сꙋеты̀ и҆спо́лни мздо́ю десни́цꙋ и҆́хъ, скры́ти мнѧ́ше воскрⷭ҇нїе твоѐ, є҆́же мі́ръ сла́витъ: поми́лꙋй на́съ.
Ра́дости всѧ̑ и҆спо́лнишасѧ воскрⷭ҇нїѧ и҆скꙋ́съ прїи́мша: марі́а бо магдали́на ко гро́бꙋ прїи́де, ѡ҆брѣ́те а҆́гг҃ла на ка́мени сѣдѧ́ща, ри́зами блиста́ющасѧ и҆ глаго́люща: <<р҃в ѡ҆б.: 204>> что̀ и҆́щете жива́гѡ съ ме́ртвыми: нѣ́сть здѣ̀, но воста̀, ꙗ҆́коже речѐ, предварѧ́ѧ вы̀ въ галїле́и.
Во свѣ́тѣ твое́мъ влⷣко, ᲂу҆́зримъ свѣ́тъ чл҃вѣколю́бче: воскрⷭ҇лъ бо є҆сѝ и҆з̾ ме́ртвыхъ, сп҃се́нїе ро́дꙋ человѣ́ческомꙋ да́рꙋѧ: да тѧ̀ всѧ̀ тва́рь славосло́витъ є҆ди́наго безгрѣ́шнаго, поми́лꙋй на́съ.
И҆ ꙾восто́чны꙾[[а҆нато́лїевы]], гла́съ то́йже:
Пѣ́снь ᲂу҆́треннюю мѷронѡ́сицы жены̀ со слеза́ми приноша́хꙋ тебѣ̀ гдⷭ҇и, бл҃гоꙋха́нїѧ бо а҆рѡма́ты и҆мꙋ́щѧ, гро́ба твоегѡ̀ достиго́ша, пречⷭ҇тое тѣ́ло твоѐ пома́зати тща́щѧсѧ. а҆́гг҃лъ сѣдѧ́й на ка́мени тѣ̑мъ бл҃говѣстѝ: что̀ и҆́щете жива́гѡ съ ме́ртвыми; сме́рть бо попра́въ воскр҃се ꙗ҆́кѡ бг҃ъ, подаѧ̀ всѣ̑мъ ве́лїю млⷭ҇ть.
Блиста́ѧсѧ а҆́гг҃лъ на гро́бѣ твое́мъ животво́рнѣмъ, мѷроно́сицамъ глаго́лаше: и҆стощи́въ гро́бы и҆зба́витель плѣнѝ а҆́да, и҆ воскр҃се тридне́венъ, ꙗ҆́кѡ є҆ди́нъ бг҃ъ и҆ всеси́ленъ.
Во гро́бѣ тѧ̀ и҆ска́ше, прише́дши во є҆ди́нꙋ ѿ сꙋббѡ́тъ, марі́а магдали́на, не ѡ҆брѣ́тши же рыда́ше съ пла́чемъ вопїю́щи: ᲂу҆вы̀ мнѣ̀ сп҃се мо́й, ᲂу҆кра́денъ бы́лъ є҆сѝ всѣ́хъ цр҃ю̀! сꙋпрꙋ́гъ же живоно́сныхъ а҆́гг҃лъ внꙋ́трь гро́ба вопїѧ́ше: что̀ пла́чеши, ѽ же́но; пла́чꙋ, глаго́летъ, ꙗ҆́кѡ взѧ́ша гдⷭ҇а моего̀ ѿ гро́ба, и҆ не вѣ́мъ гдѣ̀ положи́ша є҆го̀. Сїѧ́ же ѡ҆брати́вшисѧ вспѧ́ть, ꙗ҆́кѡ ви́дѣ тѧ̀, а҆́бїе возопѝ: гдⷭ҇ь мо́й и҆ бг҃ъ мо́й, сла́ва тебѣ̀.
Є҆вре́и затвори́ша во гро́бѣ живо́тъ, разбо́йникъ же ѿве́рзе ѧ҆зы́комъ наслажде́нїе, зовы́й и҆ глаго́лѧ: со мно́ю менѐ ра́ди распны́йсѧ, соѡбѣ́сисѧ мѝ на дре́вѣ, и҆ ꙗ҆ви́сѧ <<р҃г: 205>> мнѣ̀, на престо́лѣ со ѻ҆ц҃е́мъ сѣдѧ̀: то́й бо є҆́сть хрⷭ҇то́съ бг҃ъ на́шъ, и҆мѣ́ѧй ве́лїю ми́лость.
Сла́ва: гла́съ и҃:
Гдⷭ҇и, разсла́бленнаго не кꙋпѣ́ль и҆сцѣлѝ, но твоѐ сло́во ѡ҆бновѝ, и҆ нижѐ многолѣ́тный запѧ́тъ є҆мꙋ̀ недꙋ́гъ: ꙗ҆́кѡ гла́са твоегѡ̀ скорѣ́йшее дѣ́йство показа́сѧ, и҆ неꙋдобоноси́мꙋю тѧ́жесть ѿве́рже, и҆ бре́мѧ ѻ҆дра̀ понесѐ, во свидѣ́тельство мно́жества щедро́тъ твои́хъ, сла́ва тебѣ̀.
И҆ ны́нѣ: Пребл҃гослове́нна є҆сѝ:
Славосло́вїе вели́кое. Тропа́рь воскрⷭ҇нъ, є҆ктєнїѝ, и҆ ѿпꙋ́стъ, и҆ и҆схожде́нїе въ притво́ръ.
Сла́ва, и҆ ны́нѣ: Стїхи́ра є҆ѵⷢ҇льскаѧ, гла́съ г҃:
Магдали́нѣ марі́и, сп҃сово бл҃говѣствꙋ́ющей и҆з̾ ме́ртвыхъ воскресе́нїе и҆ ꙗ҆вле́нїе, не вѣ́рꙋюще же ᲂу҆ченицы̀, поноси́ми бы́ша ѡ҆ жестосе́рдїи: но зна́меньми воѡрꙋжи́вшесѧ и҆ чꙋдесы̀, ко проповѣ́данїю посыла́хꙋсѧ. и҆ ты̀ ᲂу҆́бѡ гдⷭ҇и, къ нача́льномꙋ свѣ́тꙋ возне́слсѧ є҆сѝ ѻ҆ц҃ꙋ̀: ѻ҆ни́ же проповѣ́даша всю́дꙋ сло́во, чꙋдесы̀ ᲂу҆вѣрѧ́юще. тѣ́мже просвѣти́вшесѧ тѣ́ми, сла́вимъ твоѐ є҆́же и҆з̾ ме́ртвыхъ воскресе́нїе, чл҃вѣколю́бче гдⷭ҇и.
И҆ поꙋче́нїе стꙋді́тово. И҆ коне́чный ѿпꙋ́стъ. Ча́съ а҃. На часѣ́хъ тропа́рь воскре́сенъ. По трист҃о́мъ конда́къ трїѡ́ди: Дꙋ́шꙋ мою̀ гдⷭ҇и:
На лїтꙋргі́и бл҃жє́нна гла́са, гла́съ г҃, на д҃:
Ѿве́ргшаго хрⷭ҇тѐ за́повѣдь твою̀, пра́ѻц҃а а҆да́ма и҆з̾ раѧ̀ и҆згна́лъ є҆сѝ: разбо́йника же ще́дре, и҆сповѣ́давша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се, во црⷭ҇твїи твое́мъ. <<р҃г ѡ҆б.: 206>>
Воскре́съ и҆з̾ ме́ртвыхъ, совоскреси́лъ є҆сѝ на́съ ѿ страсте́й воскресе́нїемъ твои̑мъ гдⷭ҇и: сме́ртнꙋю же всю̀ си́лꙋ погꙋби́лъ є҆сѝ сп҃се. сегѡ̀ ра́ди вѣ́рою тѝ зове́мъ: помѧнѝ и҆ на́съ во црⷭ҇твїи твое́мъ.
Тридне́внымъ твои́мъ погребе́нїемъ, ꙗ҆̀же во а҆́дѣ ᲂу҆мерщвлє́нныѧ, ꙗ҆́кѡ бг҃ъ ѡ҆животвори́вый совоздви́глъ є҆сѝ, и҆ нетлѣ́нїе всѣ̑мъ ꙗ҆́кѡ бла́гъ и҆сточи́лъ є҆сѝ на́мъ, вѣ́рою зовꙋ́щымъ всегда̀: помѧнѝ и҆ на́съ во црⷭ҇твїи твое́мъ.
Согрѣ́шшихъ на́съ сме́ртною ѡ҆сꙋди́лъ є҆сѝ клѧ́твою, жизнода́вче и҆ гдⷭ҇и: тѣ́ломъ же твои́мъ безгрѣ́шне влⷣко пострада́въ, смє́ртныѧ ѡ҆живи́лъ є҆сѝ, зовꙋ́щыѧ: помѧнѝ и҆ на́съ во црⷭ҇твїи твое́мъ.
И҆ ѿ канѡ́на пѣ́снь ѕ҃-ѧ, на д҃. По вхо́дѣ тропа́рь воскре́сенъ: Сла́ва, конда́къ трїѡ́ди. И҆ ны́нѣ: па́схи: А҆́ще и҆ во гро́бъ: Хра́ма же хрⷭ҇то́ва, и҆ бцⷣы, и҆ ст҃ы́хъ, тропарѧ̀ и҆ кондака̀ не глаго́лемъ. Прокі́менъ, гла́съ а҃: Бꙋ́ди гдⷭ҇и ми́лость твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ пра̑веднїи ѡ҆ гдⷭ҇ѣ: пра̑вымъ подоба́етъ похвала̀. А҆пⷭ҇лъ дѣѧ́нїй, зача́ло к҃г: Бы́сть петрꙋ̀ посѣща́ющꙋ всѣ́хъ: А҆ллилꙋ́їа, гла́съ є҃: Ми́лѡсти твоѧ̀ гдⷭ҇и во вѣ́къ воспою̀. Сті́хъ: Занѐ ре́клъ є҆сѝ: въ вѣ́къ ми́лость сози́ждетсѧ. Є҆ѵⷢ҇лїе і҆ѡа́нна, зача́ло д҃і: Взы́де і҆и҃съ во і҆ерꙋсали́мъ: Прича́стный: Тѣ́ло хрⷭ҇то́во: Дрꙋгі́й: Хвали́те гдⷭ҇а съ нб҃съ:
[зрѝ] Подоба́етъ вѣ́дати, ꙗ҆́кѡ вослѣ́дованїе разсла́бленнагѡ пое́тсѧ въ недѣ́лю, въ понедѣ́льникъ: во вто́рникъ же ѿдае́тсѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.