Глас 8-й. Понедельник.
Въ недѣ́лю ве́чера,
на Гдⷭ҇и воззва́хъ, стїхи̑ры покаѧ́нны, гла́съ и҃.
Подо́бенъ: Гдⷭ҇и, а҆́ще и҆ сꙋди́лище:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Гдⷭ҇и, прише́дый въ мі́ръ грѣ́шники призва́ти, и҆ разбо́йники, и҆ мытарѧ̀, и҆ блꙋдни́цꙋ, и҆ блꙋ́днаго прїе́мый: па́че всѣ́хъ менѐ согрѣши́вшаго тебѣ̀, хрⷭ҇тѐ мо́й, и҆ ника́коже ктомꙋ̀ ка́ющасѧ, чл҃вѣколю́бнѣ призовѝ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Гдⷭ҇и, и҆́же ѿ мытаре́й па́стыри цр҃кви твое́й поставле́й, и҆ и҆́же то́й пре́жде гони́телѧ, ны́нѣ застꙋ́пника содѣ́лавъ: и҆ менѐ тѣ́хъ мл҃твами твоѐ ѻ҆вча̀ покажѝ, сп҃се, и҆ да не въ снѣ́дь чꙋжде́мꙋ непотре́бный бꙋ́дꙋ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Пла́чи ѻ҆каѧ́ннаѧ дꙋшѐ, пре́жде конца̀, и҆ бг҃ꙋ прилѣпи́сѧ, зовꙋ́щи є҆мꙋ̀ ѿ се́рдца и҆ стена́ньми, ѽ всескве́рнаѧ, согрѣши́хъ тѝ хрⷭ҇тѐ, не гнꙋша́йсѧ менѐ, молю́сѧ, но ѡ҆брати́въ мѧ̀ ꙗ҆́кѡ млⷭ҇тивъ, и҆ проще́нїѧ сподо́би.
Та́же мине́и стїхи̑ры ст҃о́мꙋ, а҆́ще и҆́мать. А҆́ще нѣ́сть мине́и, и҆́ны стїхи̑ры, безплѡ́тнымъ ст҃ы̑мъ а҆́гг҃лѡмъ, подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Гдⷭ҇и, безпло́тныхъ собо́ри непреста́ннѡ сла́вѧтъ тѧ̀, твоеѧ̀ наслажда́ющесѧ красоты̀, и҆ неизрече́нною добро́тою, и҆ трисо́лнечными лꙋча́ми бога́тнѡ ѡ҆зарѧ́еми: и҆́хже мл҃твами и҆ предста́тельствомъ, сп҃се, сп҃сѝ дꙋ́шы на́шѧ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Гдⷭ҇и, всесли̑чныѧ ли́ки а҆́гг҃льскїѧ, ты̀ поста́вилъ є҆сѝ всеси́льнымъ твои́мъ сло́вомъ, и҆ прест҃ы́мъ твои́мъ дх҃омъ, неѿпа́дающими зарѧ́ми сїѧ́нїе дарова́въ. и҆́хже мольба́ми и҆ предста́тельствы, сп҃се, сп҃сѝ дꙋ́шы на́шѧ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Гдⷭ҇и, серафі́ми воспѣва́ютъ тѧ̀, и҆ вла̑сти, и҆ а҆́гг҃ли, нача̑ла, гдⷭ҇ьствїѧ, прⷭ҇то́ли и҆ си̑лы, и҆ а҆рха́гг҃ли, и҆ херꙋві́ми стра́шнїи хвале́нїе тебѣ̀ прино́сѧтъ: и҆́хже мольба́ми и҆ предста́тельствы, сп҃се, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Всегда̀ творца̀ а҆́зъ тва́рь ѡ҆скорблѧ́ю и҆ прогнѣвлѧ́ю, да́ждь мѝ и҆справле́нїе, ѻ҆трокови́це, пре́жде того̀ премѣни́вши, и҆ по́мощїю твое́ю къ дѣлѡ́мъ ᲂу҆гѡ́днымъ возста́ви, ꙗ҆́кѡ да ᲂу҆лꙋчꙋ̀ сп҃се́нїе и҆ ѡ҆ставле́нїе.
Та́же, Свѣ́те ти́хїй: Прокі́менъ днѐ: и҆ Сподо́би гдⷭ҇и, въ ве́черъ се́й:
На стїхо́внѣ стїхи̑ры покаѧ́нны, гла́съ и҃:
Тебѐ цр҃ѧ̀ и҆ влⷣкꙋ, а҆́гг҃ли непреста́ннѡ воспѣва́ютъ, а҆́зъ же тѝ припа́даю, ꙗ҆́кѡ мыта́рь зовы́й: бж҃е, ѡ҆чи́сти мѧ̀, и҆ поми́лꙋй мѧ̀.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Безсме́ртна сꙋ́щи дꙋшѐ моѧ̀, волна́ми жите́йскими не покрыва́йсѧ, но возни́кни вопїю́щи къ своемꙋ̀ бл҃года́телю: бж҃е, ѡ҆чи́сти мѧ̀, и҆ сп҃си́ мѧ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нцы гдⷭ҇ни, всѧ́ко мѣ́сто ѡ҆свѧща́ете, и҆ всѧ́къ недꙋ́гъ ᲂу҆врачꙋ́ете: и҆ ны́нѣ моли́тесѧ, и҆зба́витисѧ ѿ сѣ́тей вра́жїихъ дꙋша́мъ на́шымъ, мо́лимъ вы̀.
Сла́ва, и҆ ны́нѣ, бг҃оро́диченъ: А҆рха́гг҃ла гаврїи́ла гла́съ воспрїи́мше, рце́мъ: ра́дꙋйсѧ мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждши.
Та́же, Ны́нѣ ѿпꙋща́еши: И҆ Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Въ недѣ́лю на повече́рїи,
канѡ́нъ прест҃ѣ́й бцⷣѣ. Гла́съ и҃:
Пѣ́снь а҃
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Припѣ́въ: Прест҃а́ѧ бцⷣе, сп҃сѝ на́съ.
Пресла̑внаѧ ѡ҆ тебѣ̀ возглаго́лашасѧ, пречⷭ҇таѧ, вѣ́рныхъ сла́ва є҆ди́на бы́вша. тѣ́мже бꙋ́дꙋщїѧ сла́вы прича́стника мѧ̀ покажѝ твои́ми мл҃твами, сла́вѧщаго тѧ̀, прест҃а́ѧ дв҃о всепѣ́таѧ.
Бл҃гослове́нъ пло́дъ, пречⷭ҇таѧ, чре́ва твоегѡ̀, и҆́мже земні́и всѝ клѧ́твы и҆зба́вихомсѧ, бл҃гослове́ннаѧ всечⷭ҇таѧ. ѽ несказа́ннагѡ чꙋдесѐ, недоꙋмѣ́ннагѡ слы́шанїѧ, всѣ́хъ же вѣ́рныхъ сп҃се́нїѧ!
Сла́ва: А҆́гг҃лъ мо́литъ тѧ̀, гдⷭ҇и, мно́жество всегда̀: ᲂу҆ч҃нкъ собо́ръ, и҆ прⷪ҇рѡ́къ, сослѡ́вїѧ мч҃нкъ, и҆ прпⷣбныхъ твои́хъ: бцⷣы ра́ди грѣхѡ́въ проще́нїе да́рꙋй на́мъ, ꙗ҆́кѡ чл҃вѣколю́бецъ.
И҆ ны́нѣ: Тебѐ пречⷭ҇тꙋю, ю҆́же въ ложесна́хъ прїе́мшꙋю ѻ҆́гнь нестерпи́мый, молю̀ вѣ́рою: гее́нны ѻ҆гнѧ̀ и҆зба́вити мѧ̀ и҆ и҆схити́ти, и҆ вѣ́чнꙋющагѡ мꙋче́нїѧ свободи́ти твои́ми бл҃гопрїѧ́тными мл҃твами.
Пѣ́снь г҃
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Чи́стагѡ житїѧ̀ ѿпа́дъ пречⷭ҇таѧ, приложи́хсѧ скотѡ́мъ, и҆ ѡ҆сꙋжде́нъ ве́сь бы́хъ: ꙗ҆́же сꙋдїю̀ ро́ждшаѧ, всѧ́кагѡ ѡ҆сꙋжде́нїѧ и҆зба́ви, и҆ сп҃си́ мѧ.
Стена̑нїѧ чⷭ҇таѧ, и҆ дꙋше́внꙋю сле́зꙋ, и҆ при́сное мѝ ᲂу҆миле́нїе пода́ждь ѻ҆трокови́це: ꙗ҆́кѡ да пла́чꙋ ѡ҆держа́щїѧ мѧ̀ стра́сти ѿ невнѧ́тїѧ, бг҃обл҃года́тнаѧ.
Сла́ва: Нбⷭ҇нїи чи́нове, слꙋже́бнїи дꙋ́си, собо́ръ прⷪ҇рѡ́къ и҆ а҆пⷭ҇лъ, и҆ мч҃нкъ твои́хъ мо́лѧтъ тѧ̀ непреста́ннѡ ще́дре: лю́демъ твои̑мъ да́рꙋй прегрѣше́нїй ѡ҆ставле́нїе.
И҆ ны́нѣ: Млⷭ҇рдїѧ мѧ̀ бж҃е́ственнагѡ, ꙗ҆́кѡ млⷭ҇тива пречⷭ҇таѧ, ны́нѣ сподо́бити ᲂу҆молѝ млⷭ҇рдаго: нра́вы бо немлⷭ҇тивы немлⷭ҇рднѡ стѧжа́въ, вѣ́чномꙋ ѻ҆гню̀ досто́инъ бы́хъ.
Пѣ́снь д҃
І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Лꙋка́вое грѣхѡ́въ мои́хъ рꙋкописа́нїе раздерѝ пречⷭ҇таѧ, бж҃е́ственнымъ копїе́мъ, пробо́дшимъ бж҃е́ствєннаѧ ре́бра, вочл҃вѣ́читисѧ и҆з̾ тебѐ восхотѣ́вшагѡ: и҆ молѝ сего̀, въ кни́зѣ мѧ̀ сп҃се́нныхъ написа́ти, безꙋ́мнѡ ѿ негѡ̀ ᲂу҆дали́вшагосѧ.
Да гла́сы бл҃года́рственными сла́влю тѧ̀, да любо́вїю бж҃е́ственною велича́ю тѧ̀, пренепоро́чнаѧ: є҆́же вели́кимъ твои́мъ ржⷭ҇тво́мъ, всѧ̑ ᲂу҆дали́вшыѧсѧ возвели́чивши, вельмѝ ᲂу҆дали́вшагосѧ и҆ лю́тѣ па́дшаго мѧ̀, проще́нїѧ бж҃е́ственнагѡ сподо́би.
Сла́ва: Зако́ны въ тебѣ̀ и҆спраздни́шасѧ є҆стества̀, па́че бо є҆стества̀ бг҃а сло́ва родила̀ є҆сѝ. тѣ́мже тѧ̀ вѣ́рою молю̀, пренепоро́чнаѧ: па́че є҆стества̀ человѣ́ческагѡ мно́гѡ согрѣ́шша, и҆ бг҃а ᲂу҆да́льшасѧ, ѡ҆бра́щшагосѧ сп҃сѝ мл҃твами твои́ми.
И҆ ны́нѣ: Вра́гъ ᲂу҆́бѡ грѣхо́вными стрѣла́ми дꙋ́шꙋ мою̀ всю̀ ᲂу҆ѧзвѝ, и҆ ѡ҆сквернѝ сластьмѝ моѐ се́рдце, и҆ ѿ пꙋтѝ ѿведѐ пра́вагѡ. сегѡ̀ ра́ди дв҃о, вопїю́ ти: ѡ҆брати́вши и҆сцѣлѝ и҆ сп҃си́ мѧ.
Пѣ́снь є҃
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Ро́дове родѡ́въ тѧ̀, дв҃о, приснобл҃же́ннꙋю ны́нѣ бл҃жа́тъ, нбⷭ҇ныѧ си̑лы, ꙗ҆́кѡ дѡ́льнѧѧ съ вы́шними совокꙋ́пльшꙋю, восхвалѧ́ютъ є҆ди́нꙋ въ жена́хъ бл҃гослове́ннꙋю, па́дшагѡ а҆да́ма и҆справле́нїе.
Пребы́ти мѝ цѣ́лꙋ, и҆ непрело́жна стоѧ́нїѧ ᲂу҆лꙋ́чшꙋ, но бл҃гоше́ствꙋющꙋ же, и҆ бг҃ꙋ ᲂу҆гѡ́днаѧ дѣ́лающꙋ, бл҃га́ѧ молѝ, бл҃га́го ро́ждши сло́ва, на́съ безслове́сїѧ и҆зба́вльшаго.
Сла́ва: И҆́же кро́вь свою̀ сло́ве, на крⷭ҇тѣ̀ пролїѧ́вый, за премно́гꙋю млⷭ҇ти бе́зднꙋ, страсте́й мои́хъ бе́зднꙋ и҆зсꙋшѝ: и҆ во ᲂу҆миле́нїи тебѣ̀ бг҃ꙋ ᲂу҆годи́ти, бцⷣы ра́ди сподо́би.
И҆ ны́нѣ: Мт҃и дв҃о ѻ҆трокови́це, ꙗ҆́же неѡб̾име́ннаго пло́тїю ро́ждшаѧ, а҆́гг҃лѡвъ сла́вꙋ, и҆ бѣсѡ́въ ꙗ҆́звꙋ, бг҃оневѣ́сто, моѐ се́рдце ᲂу҆ѧзви́вшеесѧ грѣхо́мъ, цѣльбы̀ бж҃е́ственныѧ сподо́би.
Пѣ́снь ѕ҃
І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Поми́ловасѧ тобо́ю є҆стество̀ человѣ́ческое, млⷭ҇тиваѧ влⷣчце: млⷭ҇тиваго бо родила̀ є҆сѝ пречⷭ҇таѧ. тѣ́мже молю́ тѧ, мою̀ дꙋ́шꙋ поми́лꙋй.
Безпло́тныхъ чи́нове мо́лѧтъ тѧ̀ хрⷭ҇тѐ, мч҃нкъ, прⷪ҇рѡ́къ, и҆ а҆пⷭ҇лъ твои́хъ: ро́ждшїѧ тѧ̀ ра́ди, лю́ди твоѧ̑ сп҃сѝ ѿ всѧ́кагѡ ѡ҆бстоѧ́нїѧ.
Сла́ва: Ꙗ҆́же недѣ́ланнаѧ землѧ̀, дѣ́лателѧ ро́ждши, и҆ всѣ́хъ зижди́телѧ, ѡ҆лѧденѣ́вшꙋю дꙋ́шꙋ мою̀ страстьмѝ, плодоно́снꙋ покажѝ бж҃е́ственнымъ разꙋмѣ́нїемъ.
И҆ ны́нѣ: Престꙋпи́хъ за́пѡвѣди ꙗ҆̀же къ бг҃ꙋ ведꙋ́щыѧ мѧ̀, и҆ не хотѧ̀ порабо́тихсѧ лꙋка̑вымъ страсте́мъ: тѣ́мже молю́ тѧ приснодв҃о, и҆схити́ мѧ ѿ тѣ́хъ влады́чествїѧ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ и҃.
Нбⷭ҇ное бл҃гоче́стїе си́ламъ, и҆ похва́льнꙋю высотꙋ̀ дꙋша́мъ на́шымъ, мт҃редв҃ꙋ ѻ҆трокови́цꙋ восхва́лимъ вѣ́рнїи: ра́дꙋйсѧ, ꙗ҆́же а҆́гг҃лѡмъ творца̀ во ᲂу҆тро́бѣ заче́нши, ра́дꙋйсѧ, па́дающихъ ѡ҆чище́нїе, бг҃а сло́ва вопло́щши. ра́дꙋйсѧ, невѣ́сто неневѣ́стнаѧ.
Пѣ́снь з҃
І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Неизрече́ннымъ ржⷭ҇тво́мъ твои́мъ, стра́шныхъ и҆ неизглаго́ланныхъ веще́й на́съ сподо́била є҆сѝ бцⷣе: тѣ́мже мѧ̀ стра́шныѧ мꙋ́ки и҆зба́ви, и҆ неизрече́нныѧ мѧ̀ ра́дости и҆спо́лни, да пою́ тѧ при́снѡ многопѣ́тꙋю.
Въ лѣ́ности житїѐ моѐ и҆жди́въ, бы́хъ безпло́денъ, и҆ ᲂу҆жаса́юсѧ прѣ́нїѧ, и҆ гее́нны ѻ҆гнѧ̀ негаси́магѡ: ꙗ҆́же ѻ҆́гнь ро́ждшаѧ бцⷣе нестерпи́мый, приложѝ и҆зба́вити мѧ̀ моли́твами твои́ми.
Сла́ва: Чꙋде́съ превы́ше вели́кое чꙋ́до твоегѡ̀ ржⷭ҇тва̀, чⷭ҇таѧ дв҃о, сегѡ̀ ра́ди вопїю́ ти бг҃ороди́тельнице: твоѧ̑ млⷭ҇ти на мнѣ̀ ᲂу҆дивѝ, и҆ бꙋ́дꙋщагѡ гнѣ́ва и҆зба́ви, и҆ сп҃си́ мѧ.
И҆ ны́нѣ: Менѐ жи́вшаго въ лѣ́ности, и҆ презрѣ́вшаго ст҃ы̑ѧ зако́ны твоѧ̑, и҆ чⷭ҇тна̑ѧ твоѧ̑ хрⷭ҇тѐ повелѣ̑нїѧ, ᲂу҆ще́дри сп҃се, ро́ждшїѧ тѧ̀ ра́ди, ꙗ҆́кѡ бл҃года́тель бг҃ъ, и҆ многомлⷭ҇тивъ.
Пѣ́снь и҃
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Оу҆мерщвле́нꙋю ѡ҆живѝ, па́дшꙋю возста́ви, ᲂу҆ѧ́звенꙋю дꙋ́шꙋ мою̀ и҆сцѣлѝ, ᲂу҆́мъ мо́й ᲂу҆мирѝ, и҆скꙋше́нїй во́лны ᲂу҆кротѝ дв҃о, и҆ вопїю́ща мѧ̀ сп҃сѝ: ѻ҆́троцы бл҃гослови́те, сщ҃е́ннїи воспо́йте, лю́дїе превозноси́те є҆го̀ во вѣ́ки.
Ꙗ҆́кѡ разбо́йникъ взыва́ю тѝ, помѧни́ мѧ чл҃вѣколю́бче: пла́чꙋ ꙗ҆́кѡ блꙋдни́ца, и҆ вопїю̀: согрѣши́хъ ꙗ҆́коже дре́вле блꙋ́дный, ка́ющасѧ прїими́ мѧ ѿча́ѧннаго, бцⷣы ра́ди, да ᲂу҆се́рднѡ вопїю́ ти: сщ҃е́ннїи воспо́йте, лю́дїе превозноси́те є҆го̀ во вѣ́ки.
Сла́ва: Раболѣ́пнѡ вопїе́мъ тѝ бцⷣе всепѣ́таѧ: со безчи́сленными ᲂу҆́мными си́лами, прⷪ҇ро́ки и҆ прпⷣбными, и҆ а҆пⷭ҇лы же и҆ мч҃нки, сотворѝ мольбꙋ̀ за всѧ̑ человѣ́ки, бж҃е́ственнѣ пою́щыѧ: сщ҃е́ннїи воспо́йте, лю́дїе превозноси́те є҆го̀ во вѣ́ки.
И҆ ны́нѣ: Чⷭ҇тнѣ́йши є҆сѝ бцⷣе всенепоро́чнаѧ, премі́рныхъ а҆́гг҃льскихъ чинѡ́въ: си́хъ бо родила̀ є҆сѝ созда́телѧ и҆ гдⷭ҇а, ѿ дв҃и́ческїѧ неискꙋсобра́чныѧ ᲂу҆тро́бы, во двꙋ́хъ сꙋщества́хъ, несмѣ́снѡ и҆ непрело́жнѡ, є҆ди́нꙋ ѵ҆поста́сь, бцⷣе воплоща́емꙋ.
Пѣ́снь ѳ҃
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ человѣ́къ: тѣ́мже тѧ̀ пречⷭ҇тꙋю бцⷣꙋ вѣ́рнїи велича́емъ.
Ѽ бж҃е́ственный ѻ҆́дре соломѡ́новъ, є҆го́же ѡ҆крꙋжа́ютъ ны́нѣ си́льнїи шестьдесѧ́тъ, глаго́лы бж҃е́ственнагѡ писа́нїѧ, на не́мже бг҃ъ почѝ, тьма́ми мѧ̀ при́снѡ де́мѡны ѡ҆крꙋже́на, невре́дна сохранѝ си́лою твое́ю, чⷭ҇таѧ приснодв҃о.
И҆ска́пающаѧ бж҃е́ственнꙋю сла́дость, всѣ́хъ сла́дость ро́ждшаѧ, дꙋ́шꙋ мою̀ ᲂу҆сладѝ, ꙗ҆́домъ ѕмїи́нымъ ѡ҆горче́нꙋю, ѿчꙋжда́ющи мѧ̀ го́рькагѡ вре́да, всегда̀ хода́тайствомъ твои́мъ, предста́тельнице вѣ́рныхъ непосты́днаѧ.
Сла́ва: Сл҃нце сла́вы і҆и҃се, ѻ҆каѧ́ннꙋю мою̀ дꙋ́шꙋ просвѣтѝ, мольба́ми тебѐ ро́ждшїѧ чⷭ҇тыѧ бг҃оѻтрокови́цы: и҆ безпло́тныхъ слꙋ́гъ, чⷭ҇тны́хъ а҆пⷭ҇лъ твои́хъ, и҆ ст҃и́телей, и҆ прⷪ҇рѡ́къ, и҆ мч҃нкъ и҆збра́нныхъ, и҆ прпⷣбныхъ твои́хъ.
И҆ ны́нѣ: Страшꙋ́сѧ є҆ди́не цр҃ю̀, твоегѡ̀ втора́гѡ и҆ стра́шнагѡ прише́ствїѧ, ве́сь ѡ҆сꙋжде́нъ и҆ недоꙋмѣ́ненъ сы́й, гдⷭ҇и. тѣ́мже пре́жде конца̀ вопїю́ ти: ро́ждшїѧ тѧ̀ ра́ди пощади́ мѧ, и҆ сп҃сѝ млⷭ҇тиве, бл҃гі́й чл҃вѣколю́бче.
Та́же, Досто́йнѡ є҆́сть: И҆ покло́нъ. Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чное, и҆ ѿпꙋ́стъ.
Въ понедѣ́льникъ ᲂу҆́тра,
по а҃-мъ стїхосло́вїи сѣда́льны покаѧ́нны, гла́съ и҃:
Ѻ҆́комъ бл҃гоꙋтро́бнымъ, гдⷭ҇и, ви́ждь моѐ смире́нїе, ꙗ҆́кѡ вма́лѣ жи́знь моѧ̑ скончава́етсѧ, и҆ ѿ дѣ́лъ нѣ́сть мнѣ̀ сп҃се́нїѧ. сегѡ̀ ра́ди молю́сѧ: ѻ҆́комъ бл҃гоꙋтро́бнымъ, гдⷭ҇и, ви́ждь моѐ смире́нїе, и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Ꙗ҆́кѡ сꙋдїѝ сꙋ́щꙋ, попецы́сѧ ѽ дꙋшѐ, и҆ стра́шнагѡ днѐ ча́съ помышлѧ́й: сꙋ́дъ бо без̾ млⷭ҇ти є҆́сть не сотво́ршымъ млⷭ҇ти. тѣ́мже пре́жде конца̀ возопі́й: пощади́ мѧ сп҃се, є҆ди́нъ бо є҆сѝ безгрѣ́шенъ.
Сла́ва, и҆ ны́нѣ, бг҃оро́диченъ: Повелѣ́нное та́йнѡ прїи́мъ въ ра́зꙋмѣ, въ кро́вѣ і҆ѡ́сифовѣ, тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ прїе́мша ра́бїй зра́къ, ᲂу҆жаса́юсѧ зва́ти тебѣ̀: ра́дꙋйсѧ, невѣ́сто неневѣ́стнаѧ.
По в҃-мъ стїхосло́вїи сѣда́льны, гла́съ и҃:
Де́нь ѻ҆́нъ стра́шный помышлѧ́ющи дꙋшѐ моѧ̀, побдѝ, вжига́ющи свѣщꙋ̀ твою̀, є҆ле́емъ просвѣща́ющи, не вѣ́си бо, когда̀ прїи́детъ къ тебѣ̀ гла́съ глаго́лющїй: сѐ жени́хъ. блюдѝ ᲂу҆̀бо дꙋшѐ моѧ̀, да не воздре́млеши, и҆ пребꙋ́деши внѣ̀ толкꙋ́щи ꙗ҆́кѡ пѧ́ть дѣ́въ: но бо́дреннѡ пождѝ, да ᲂу҆срѧ́щеши хрⷭ҇та̀ є҆ле́емъ масти́тымъ, и҆ да́стъ тѝ черто́гъ бж҃е́ственный сла́вы своеѧ̀.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Ꙗ҆́кѡ блꙋдни́ца припа́даю тѝ, да прїимꙋ̀ ѡ҆ставле́нїе, и҆ вмѣ́стѡ мѵ́ра сле́зы ѿ се́рдца приношꙋ́ ти: да ꙗ҆́кѡ ѻ҆́нꙋю ᲂу҆ще́дриши мѧ̀ сп҃се, и҆ пода́си мѝ ѡ҆чище́нїе грѣхѡ́въ. ꙗ҆́кѡ ѻ҆́наѧ бо зовꙋ́ ти: и҆зба́ви мѧ̀ ѿ тимѣ́нїѧ дѣ́лъ мои́хъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Свѣ́томъ нбⷭ҇нымъ просвѣща́етсѧ дне́сь се́й хра́мъ: въ не́мъ бо вѡ́инства а҆́гг҃льскаѧ ра́дꙋютсѧ, съ ни́миже и҆ првⷣныхъ ли́цы веселѧ́тсѧ, въ па́мѧть стрⷭ҇тоте́рпєцъ. тѣ́хъ мл҃твами низпослѝ мі́рꙋ твоемꙋ̀ ми́ръ хрⷭ҇тѐ, и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ра́дꙋйсѧ врата̀ цр҃ѧ̀ сла́вы ꙗ҆̀же вы́шнїй є҆ди́нъ про́йде, и҆ є҆ди́нꙋ запеча́танꙋ сохранѝ, во сп҃се́нїе дꙋ́шъ на́шихъ.
По г҃-мъ стїхосло́вїи, сѣда́льны, гла́съ и҃:
Подо́бенъ: Повелѣ́нное:
Доко́лѣ, дꙋшѐ моѧ̀, живе́ши въ нерадѣ́нїи; доко́лѣ во ᲂу҆ны́нїи скончава́еши; ѿ сна̀ ᲂу҆ны́нїѧ воста́ни ѻ҆каѧ́ннаѧ, во ᲂу҆́мъ прїе́мши дѣѧ̑нїѧ твоѧ̑: возстенѝ, и҆ првⷣнагѡ сꙋдїѝ вострепещѝ и҆зрече́нїѧ, что̀ ѿвѣща́ти и҆́маши въ ча́съ ѻ҆́нъ; и҆лѝ ка́кѡ ѡ҆жида́ющагѡ тѧ̀ и҆зба́вишисѧ ѡ҆пале́нїѧ, неиспра́влена пребыва́ющи; возопі́й пре́жде конца̀ къ сꙋдїѝ: прегрѣше́нїй да́ждь мѝ, сп҃се, ѡ҆ставле́нїе, ты́ бо є҆ди́нъ є҆сѝ долготерпѣли́въ.
Мытаре́во стена́нїе, и҆ блꙋдни́цы рыда́нїе дꙋшѐ, пре́жде конца̀ воспрїимѝ, вѣ́дꙋщемꙋ та̑йнаѧ дѣла̀ твоѧ̑, не преста́й рыда́нїемъ и҆сповѣ́дающисѧ и҆ пла́чемъ, посто́мъ и҆ бдѣ́нїемъ, и҆ мл҃твою вопїю́щи: согрѣши́хъ, ѡ҆чи́сти мѧ̀ сп҃се, мл҃твами а҆́гг҃лъ твои́хъ, ꙗ҆́кѡ ще́дръ, и҆ сп҃си́ мѧ.
Сла́ва, и҆ ны́нѣ, бг҃оро́диченъ: Бг҃ора́дованнаѧ, чⷭ҇таѧ бл҃гослове́ннаѧ, за млⷭ҇рдїе щедро́тъ и҆з̾ тебѐ ро́ждшагѡсѧ, съ вы́шними си́лами и҆ а҆рха́гг҃лы, и҆ со всѣ́ми безпло́тными, ѡ҆ на́съ молѝ непреста́ннѡ, да́ти на́мъ пре́жде конца̀ проще́нїе и҆ ѡ҆чище́нїе грѣхѡ́въ, и҆ житїѧ̀ и҆справле́нїе: ꙗ҆́кѡ да ѡ҆брѧ́щемъ млⷭ҇ть.
Канѡ́нъ покаѧ́ненъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ. Творе́нїе і҆ѡ́сифово. Гла́съ и҃:
Пѣ́снь а҃
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
И҆зба́ви мѧ̀ гее́нны, ю҆́же себѣ̀ дѣ́лы безмѣ́стными и҆схода́таихъ, и҆зба́вителю: и҆ твоеѧ̀ любвѐ возжзи́ ми въ помышле́нїи ѻ҆́гнь бж҃е́ственный.
Подклони́хсѧ страсте́мъ и҆ ѡ҆мрачи́хсѧ, и҆ безслове́сенъ ꙗ҆ви́хсѧ, сло́вомъ почте́нъ бы́въ: гдⷭ҇и, возникнове́нїе да́ждь дꙋшѝ мое́й, и҆ и҆́миже вѣ́си сꙋдьба́ми, сп҃си́ мѧ.
Мч҃нченъ: Дрꙋчи́мо тѣ́ло бїе́ньми, ꙗ҆влѧ́ше нра́ва пра́вое же и҆ непрекло́нное, и҆ є҆́же къ зижди́телю любо́вь, вѣнцено́сцы всехва́льнїи мч҃нцы.
Мч҃нченъ: Крове́й поте́кшѧ рѣ́ки тѣле́съ ст҃ы́хъ, сла́вныхъ твои́хъ страда́лєцъ, і҆дѡлобѣ́сїѧ те́рнїе твое́ю си́лою ще́дре подави́ша.
Бг҃оро́диченъ: И҆сцѣлѝ чⷭ҇таѧ, недꙋ́гꙋюща мѧ̀ лю́тѣ смертоно́снымъ грѣхо́мъ, плотски́хъ и҆ дꙋше́вныхъ страсте́й, ꙗ҆́кѡ да вѣ́рою при́снѡ ᲂу҆бл҃жа́ю тѧ̀.
Дрꙋгі́й канѡ́нъ безплѡ́тнымъ ст҃ы̑мъ а҆́гг҃лѡмъ. Творе́нїе кѵ́ръ ѳеофа́на. Гла́съ и҃. І҆рмо́съ то́йже.
Ст҃ы́хъ а҆́гг҃лъ ꙗ҆́кѡ началово́дцы, и҆ бг҃овидѣ́нїѧ наслажда́ющесѧ свѣ́тлостнѡ, бл҃года́вца и҆ сп҃са ѡ҆ на́съ моли́те а҆рха́гг҃ли. [Два́жды.]
Нꙋ́ждными ѡ҆держи́ми напа́стьми, къ ва́мъ ꙗ҆́кѡ предста́телємъ ны́нѣ прибѣга́емъ вѣ́рнїи, а҆рха́гг҃ли бж҃е́ственнїи, влⷣкꙋ ны́нѣ ѡ҆ на́съ прилѣ́жнѡ ᲂу҆моли́те.
Бг҃оро́диченъ: Бꙋ́ди мѝ дв҃о, прибѣ́жище, приста́нище же и҆ стѣна̀ и҆ предста́тельница, ꙗ҆́же бг҃а пло́тїю ро́ждши бг҃ома́ти, и҆зба́вителѧ всеще́драго.
Пѣ́снь г҃
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Кото́рыми ᲂу҆зрю́ тѧ тогда̀, хрⷭ҇тѐ сп҃се, ѻ҆чи́ма, ниеди́нꙋ на землѝ за́повѣдь твою̀ сотвори́въ; ка́кѡ нестерпи́момꙋ твоемꙋ̀ предста́нꙋ прⷭ҇то́лꙋ, безмѣ́рныхъ мѝ ѕѡ́лъ творѧ́щꙋ ѿвѣ́тъ;
Просте́ръ рꙋ́цѣ твои́хъ щедро́тъ, прїими́ мѧ ꙗ҆́коже пре́жде блꙋ́днаго, подо́бными ѡ҆́бразы порабо́тившагосѧ безчє́стнымъ страсте́мъ, и҆ ѿ тебѐ ᲂу҆дали́вшасѧ, і҆и҃се чл҃вѣколю́бче пребл҃гі́й.
Мч҃нченъ: Оу҆тверди́вшесѧ на ка́мени бж҃їѧгѡ ра́зꙋма, мч҃нцы хрⷭ҇тѡ́вы стрⷭ҇тоте́рпцы, ѻ҆рꙋ́жїемъ вѣ́ры и҆скорени́сте неразꙋ́мїѧ те́рнїе, и҆ плоды̀ страда́нїѧ воздѣ́ласте.
Мч҃нченъ: Непоколеби́мїи столпѝ, и҆́стинныѧ вѣ́ры пресвѣ̑тлаѧ цр҃кѡ́внаѧ ᲂу҆добрє́нїѧ, сщ҃є́ннѣйшаѧ ѻ҆вча́та хрⷭ҇тѡ́ва, во́лею заколє́наѧ, мч҃нцы да похва́лѧтсѧ.
Бг҃оро́диченъ: Тебѐ храни́тельницꙋ прест҃а́ѧ, въ напа́стехъ стѧжа́хъ: тебѐ по бз҃ѣ мою̀ предста́тельницꙋ и҆́мамъ неꙋсы́пнꙋ: тебѐ да ѡ҆брѧ́щꙋ пречⷭ҇таѧ, и҆збавлѧ́ющꙋю мѧ̀ въ де́нь сꙋда̀ всѧ́кагѡ ѡ҆сꙋжде́нїѧ.
И҆́нъ І҆рмо́съ то́йже.
Дармѝ многоѡбра́зными а҆́гг҃льскагѡ чи́на, ꙗ҆́кѡ чинонача́льницы ꙗ҆влѧ́еми а҆рхїстрати́зи, ᲂу҆краша́еми. хрⷭ҇тѡ́вы цр҃кви тве́рдѡ сохранѧ́йте предста́тельствы ва́шими. [Два́жды.]
Ѻ҆рꙋ́жїемъ бл҃говоле́нїѧ, вѣ́рныхъ и҆сполнє́нїѧ, правосла́вїѧ добро́тами ны́нѣ вѣнчава́еми, ѿ напа́стей ꙗ҆́кѡ бл҃госла́внїи предста́телїе бж҃їи и҆зба́вите, бж҃е́ственнїи а҆рха́гг҃ли.
Бг҃оро́диченъ: Жи́зни нетлѣ́нныѧ бж҃е́ственнаѧ сѣ́нь была̀ є҆сѝ, є҆ди́на ѿ вѣ́къ ꙗ҆́вльшисѧ дв҃о мт҃и чⷭ҇таѧ. тѣ́мже всепѣ́таѧ, сꙋ́щаго мѧ̀ въ сѣ́ни сме́ртнѣй, къ животꙋ̀ наста́ви ны́нѣ мл҃твами твои́ми.
Пѣ́снь д҃
І҆рмо́съ: И҆з̾ горы̀ прїѡсѣне́нныѧ сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ. и҆ со стра́хомъ славосло́вѧше си́лꙋ твою̀.
Вели́къ по́двигъ дꙋшѝ разлꙋча́ющейсѧ, тре́петъ стра́шенъ, сꙋдїѝ сѣдѧ́щꙋ. и҆ сꙋди̑мымъ человѣ́кѡмъ согрѣши́вшымъ: ᲂу҆вы̀ мнѣ̀, что̀ сотворю̀ ѡ҆сꙋжде́ный;
И҆мѣ́ѧ се́рдце сквє́рнъ и҆спо́лнено, и҆ грѣхѡ́въ неꙋдо́бь носи̑маѧ бремена̀, и҆ къ щедро́тамъ твои̑мъ притека́ю влⷣко: не пре́зри менѐ, но ᲂу҆ще́дри мѧ̀, молю́сѧ.
Мч҃нченъ: Честна̀ ва́ша сме́рть показа́сѧ пред̾ бг҃омъ, до́блїи стрⷭ҇тоте́рпцы: не бо̀ ѿверго́стесѧ тогѡ̀, болѣ́зней тма́ми и҆ ра́нами ѡ҆крꙋжа́еми.
Мч҃нченъ: Оу҆ра́ненъ бы́сть вра́гъ ра́ною мч҃нкъ, падѐ є҆гѡ̀ бро́вь возвыша́емаѧ: и҆ велича́етсѧ тѣ́хъ вѣнцеда́тель, пѣ́сньми бж҃е́ственными прославлѧ́емь.
Бг҃оро́диченъ: Тебѐ чⷭ҇тое прїѧ́телище влⷣки бг҃ороди́тельнице, вѣ́рою молю̀: ѡ҆чи́сти мѧ̀ ѿ всѧ́кїѧ скве́рны, и҆ до́мъ покажѝ вседѣ́тельнагѡ и҆ бж҃е́ственнагѡ дх҃а.
И҆́нъ
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство: разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Дво́ице пе́рвенствꙋющаѧ а҆рха́гг҃льскомꙋ ны́нѣ собра́нїю, притека́ющыѧ къ покро́вꙋ ва́шемꙋ, ѿ всѧ́кїѧ бѣды̀ сп҃са́йте. [Два́жды.]
Зри́телїе свѣ́тлости бг҃онача́льнаѧ, и҆ бл҃годаѧ́нїѧ а҆рхїстрати́зи всесла́внїи, ны́нѣ ста́до ва́ше просвѣща́йте.
Бг҃оро́диченъ: Сщ҃е́ннѡ тѧ̀ сла́вѧтъ безпло́тныхъ бж҃е́ствєннаѧ вѡ́инства, бг҃ома́ти всенепоро́чнаѧ: зижди́телѧ бо и҆́хъ родила̀ є҆сѝ.
Пѣ́снь є҃
І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ чл҃вѣколю́бче.
Нра́вомъ лꙋка́вымъ преѡгорчи́хъ тѧ̀ гдⷭ҇и, дѣ́лаѧй безмѣ̑стнаѧ: но ᲂу҆ще́дри мѧ̀ ѡ҆браща́ющагосѧ, и҆ сп҃сѝ.
И҆мѣ́ѧй по́мыслъ ѿ ѕлы́хъ невозница́ющъ, не чꙋ́вствꙋю несмы́сленный, недоꙋмѣ́нїе моѐ і҆и҃се разрѣшѝ, и҆ сп҃си́ мѧ.
Мч҃нченъ: Положѝ ва́съ бж҃е́ственнїи мч҃нцы свѣтода́тель, ꙗ҆́коже ка́мєнїѧ сїѧ̑ющаѧ бг҃оразꙋ́мїемъ, и҆ пре́лести тьмꙋ̀ разорѧ̑ющаѧ.
Мч҃нченъ: Зако́нѡмъ лꙋка̑вымъ зако́ны бж҃е́ствєнныѧ сопротивоположи́сте, и҆ бг҃а проповѣ́дающе, ᲂу҆мертви́тисѧ є҆гѡ̀ ра́ди ᲂу҆се́дрнѡ под̾ѧ́сте.
Бг҃оро́диченъ: Оу҆мертвѝ чⷭ҇таѧ, пло́ти моеѧ̀ двиза̑нїѧ, ᲂу҆мертви́вшаѧ ржⷭ҇тво́мъ твои́мъ ѻ҆трокови́це, живꙋ́щїй грѣ́хъ пра́ѻтца.
И҆́нъ І҆рмо́съ то́йже.
Ѻ҆́крестъ бг҃а предстоѧ́ще а҆рхїстрати́зи, и҆ ѿтꙋ́дꙋ и҆стека́ющими зарѧ́ми просвѣща́еми, ста́до ва́ше сохрани́те. [Два́жды.]
И҆збавле́нїе на́мъ дарова́ти, моли́тесѧ влⷣцѣ и҆ бг҃ꙋ на́шемꙋ, ꙗ҆́кѡ предста́телїе всѣ́хъ и҆збавле́нїѧ.
Бг҃оро́диченъ: Мѵ́ро та́йное и҆менꙋ́емъ тѧ̀ всечⷭ҇таѧ сꙋ́щее, ро́ждшꙋю бг҃а пло́тїю, бл҃гоꙋха́нїѧ точа́щаго дарова̑нїѧ.
Пѣ́снь ѕ҃
І҆рмо́съ: І҆ѡ́нꙋ въ ки́тѣ гдⷭ҇и є҆ди́наго всели́лъ є҆сѝ, мене́ же свѧ́заннаго мре́жами вра́жїими, ꙗ҆́кѡ ѿ тлѝ ѻ҆́наго сп҃сѝ.
Со́лнечный свѣ́тъ покаѧ́нїѧ возсїѧ́й мѝ, хрⷭ҇тѐ свѣтода́телю, сꙋ́щемꙋ во тьмѣ̀ прегрѣше́нїй, да пою̀ твою̀ бл҃госты́ню.
Твоегѡ̀ стра́шнагѡ сꙋди́ща трепе́щꙋ всегда̀, ѕлы́хъ же не ѿстꙋпа́ю, рабо́таѧ ѕло́мꙋ ѻ҆бы́чаю: и҆спра́ви мѧ̀ хрⷭ҇тѐ, да пою̀ твою̀ бл҃госты́ню.
Мч҃нченъ: Ли́цы чⷭ҇тны́хъ мч҃нкъ пострада́ша, и҆ полкѝ побѣди́ша бѣсѡ́вскїѧ, и҆ ликѡ́мъ а҆́гг҃льскимъ совокꙋпи́шасѧ въ ра́дости: тѣ́хъ мл҃твами гдⷭ҇и, сп҃сѝ дꙋ́шы на́шѧ.
Мч҃нченъ: Крѣ́постїю твое́ю си́льны показа́лъ є҆сѝ мч҃нки твоѧ̑ гдⷭ҇и, и҆ всю̀ си́лꙋ низложи́ша ве́тхагѡ запина́телѧ: тѣ́хъ мл҃твами, гдⷭ҇и сп҃сѝ дꙋ́шы на́шѧ.
Бг҃оро́диченъ: Да гла́сы бл҃года́рственнѣ всегда̀ сла́влю тѧ̀ всенепоро́чнаѧ, дꙋшѝ моеѧ̀ ѿженѝ тьмꙋ̀, и҆ покаѧ́нїѧ свѣ́томъ разрѣшѝ мѝ мра̑чнаѧ согрѣшє́нїѧ.
И҆́нъ
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑: ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ: и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.
Ны́нѣ прⷭ҇то́лꙋ стра́шномꙋ предстоѧ́ти неꙋкло́ннѡ сподо́бившесѧ бг҃ови́дцы, и҆ ѡ҆заре́нїи ст҃ы́ѧ трⷪ҇цы насыща́етесѧ: къ ва́мъ прибѣга́ющымъ ѿ напа́стей и҆ страсте́й моли́те и҆зба́витисѧ, а҆рха́гг҃ли. [Два́жды.]
Стра́нствїѧ влⷣчнѧгѡ моли́тесѧ ва́съ пѣ́сненнѡ воспѣва́ющымъ полꙋчи́ти, и҆ ра́дости присносꙋ́щныѧ сподо́битисѧ, и҆ бж҃е́ственныѧ свѣ́тлости, а҆рха́гг҃ли бг҃ови́днїи, гаврїи́ле и҆ мїхаи́ле всесла́внїи.
Бг҃оро́диченъ: Ѡ҆дꙋшевле́нный влⷣчнїй черто́гъ, и҆́же свѣ́тлыми лꙋча́ми дв҃ства свѣтови́днѣ, ꙗ҆́коже крі́нъ сїѧ́ющїй посредѣ̀ терно́внагѡ мѧте́жа, пречⷭ҇таѧ и҆ бл҃голѣ́пнаѧ бцⷣа дв҃а да сла́витсѧ.
Пѣ́снь з҃
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е бл҃гослове́нъ є҆сѝ.
Воздыха́нїе мѝ да́ждь хрⷭ҇тѐ, ꙗ҆́коже и҆ногда̀ мытарю̀, и҆ ꙗ҆́коже блꙋдни́цѣ, слеза́ми ѿмы́въ гноє́нїѧ ѕѡ́лъ мои́хъ, и҆ вопїю́ща мѧ̀ ᲂу҆ще́дри: ѻ҆тє́цъ на́шихъ бж҃е бл҃гослове́нъ є҆сѝ.
Въ разбо́йники дꙋшегꙋби́тєльныѧ сп҃се впа́дшаго, и҆ ᲂу҆ѧ́звленнаго лю́тѣ, и҆сцѣлѝ є҆ле́емъ и҆́скреннѧгѡ покаѧ́нїѧ, и҆ ᲂу҆милѝ пѣ́ти тебѣ̀: ѻ҆тє́цъ на́шихъ бж҃е бл҃гослове́нъ є҆сѝ.
Мч҃нченъ: Оу҆мертви́стесѧ мі́рꙋ, и҆ ме́ртва бы́вша живоно́снагѡ хрⷭ҇та̀, ника́коже ѿверго́стесѧ до́блественнїи стрⷭ҇тоно́сцы, страда́льчествꙋюще и҆ пою́ще: ѻ҆тє́цъ на́шихъ бж҃е бл҃гослове́нъ є҆сѝ.
Мч҃нченъ: Є҆ди́но є҆стество̀ трⷪ҇цы, въ трїе́хъ ѵ҆поста́сѣхъ и҆сповѣ́дающе мꙋ́дрїи, многобо́жнꙋю пре́лесть і҆́дѡльскꙋю стрⷭ҇тоте́рпцы разрꙋши́сте, пою́ще: ѻ҆тє́цъ на́шихъ бж҃е бл҃гослове́нъ є҆сѝ.
Бг҃оро́диченъ: И҆́же бж҃їе бг҃ъ сло́во, во ᲂу҆тро́бꙋ твою̀ все́льсѧ, дв҃о мт҃и чⷭ҇таѧ, всѣ̑мъ застꙋ́пницꙋ ѡ҆би̑димымъ ꙗ҆влѧ́етъ тѧ̀, вопїю́щымъ: ѻ҆тє́цъ на́шихъ бж҃е бл҃гослове́нъ є҆сѝ.
И҆́нъ І҆рмо́съ то́йже.
Многоразли́чнꙋю бл҃года́ть а҆рхїстрати́зи бж҃е́ственнїи, ва́мъ дарова́лъ є҆́сть, и҆́же всѣ́хъ бл҃года́тель, є҆гѡ́же ны́нѣ цр҃ковь пою́щꙋю сп҃са́йте: ѻ҆тє́цъ на́шихъ бж҃е бл҃гослове́нъ є҆сѝ. [Два́жды.]
Си́лою всеви́дца ᲂу҆крѣплѧ́еми, всѧ̑ концы̀ землѝ ꙗ҆́снѡ назира́ете, и҆ всѣ́хъ сп҃са́ете вѣ́рою пою́щихъ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ: Сп҃си́тельное приста́нище бцⷣе дв҃о, тѧ̀ ны́нѣ и҆мꙋ́ще, жите́йскихъ бѣ́дъ и҆збѣга́емъ и҆ мѧте́жей, сн҃ꙋ твоемꙋ̀ зовꙋ́ще: ѻ҆тє́цъ на́шихъ бж҃е бл҃гослове́нъ є҆сѝ.
Пѣ́снь и҃
І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Ѿведе́наго мѧ̀ плотски́ми любосла́стїи, и҆ ѿ тебѐ сло́ве безꙋ́мнѡ ᲂу҆дали́вшагосѧ, и҆ ᲂу҆подо́бльшасѧ всѣ̑мъ скотѡ́мъ, не пре́зри сп҃се, но пре́жде конца̀ ѡ҆брати́въ сп҃си́ мѧ.
Ѿ грѣ̑хъ ника́коже ѡ҆стаю́сѧ, ѡ҆браще́нїѧ никогда́же творѧ̀, и҆ вопїю̀ ѻ҆каѧ́нный: согрѣши́хъ тѝ гдⷭ҇и, и҆ ѡ҆жестѣ́вшꙋю ᲂу҆милѝ дꙋ́шꙋ мою̀, ще́дре.
Мч҃нченъ: До́блїи гдⷭ҇ни стрⷭ҇тоте́рпцы, кро́вными стрꙋѧ́ми крⷭ҇ти́вшесѧ, вторы́ми скве́рнами не ѡ҆скверни́шасѧ, и҆ вѣнцено́сцы со а҆́гг҃лы ликовствꙋ́ютъ непреста́ннѡ.
Мч҃нченъ: Вжи́лившесѧ наде́ждею бꙋ́дꙋщихъ, бл҃гоче́стїѧ мч҃нцы, мꙋ́къ лю́тость до́блїи претерпѣ́ша: и҆ сконча́вшесѧ, прⷭ҇то́лꙋ влⷣчню предстоѧ́тъ непреста́ннѡ.
Бг҃оро́диченъ: Стоѧ́щихъ ᲂу҆твержде́нїе є҆сѝ, и҆ па́дшихъ и҆справле́нїе дв҃о. тѣ́мже па́дшаго мѧ̀ возста́ви, да тѧ̀ сла́влю бл҃гослове́ннꙋю и҆ ѡ҆бра́дованнꙋю.
И҆́нъ
І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Предстоѧ́тели и҆ пѣвцы̀ неизрече́нныѧ и҆ неизглаго́ланныѧ твоеѧ̀ сла́вы, прїимѝ тебѣ̀ ны́нѣ молѧ́щыѧсѧ хрⷭ҇тѐ во вѣ́ки. [Два́жды.]
Є҆ди́не бл҃же хрⷭ҇тѐ, ѡ҆ на́съ молѧ̑щаѧсѧ ны́нѣ вѡ́инства а҆́гг҃льскаѧ прїимѝ, тебѐ воспѣва́ющаѧ во вѣ́ки.
Бг҃оро́диченъ: Свѣтлѣ́йшими твои́ми блиста́ньми бг҃омт҃и, вѣ́рою пою́щыѧ тѧ̀ просвѣща́еши, тѧ̀ восхвалѧ́ющыѧ во всѧ̑ вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: Съ припѣ́вомъ: Чⷭ҇тнѣ́йшꙋю херꙋві̑мъ:
Пѣ́снь ѳ҃
І҆рмо́съ: Оу҆стра́шисѧ всѧ́къ слꙋ́хъ неизрече́нна бж҃їѧ снисхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ человѣ́къ. тѣ́мже пречⷭ҇тꙋю бцⷣꙋ вѣ́рнїи велича́емъ.
Ꙗ҆́коже дре́вле блꙋдни́цꙋ, съ пла́чемъ припа́дшꙋю къ тебѣ̀ сп҃се, ѡ҆чи́стилъ є҆сѝ: и҆ ꙗ҆́коже ѡ҆правда́лъ є҆сѝ мытарѧ̀ сло́ве, то́чїю воздохнꙋ́вша: и҆ ꙗ҆́коже прїѧ́лъ є҆сѝ манассі́ю, и҆ ꙗ҆́кѡ дв҃да поми́ловалъ є҆сѝ пока́ѧвшасѧ: та́кѡ и҆ менѐ прїимѝ, и҆ сп҃си́ мѧ̀ чл҃вѣколю́бче.
Воздохнѝ и҆ прослези́сѧ дꙋшѐ, пе́рвыхъ твои́хъ согрѣше́нїй ѿстꙋпѝ, и҆ къ вѣ́дꙋщемꙋ та̑йнаѧ твоѧ̑ ꙗ҆́вственнѡ припадѝ и҆ возопі́й те́плѣ: согрѣши́хъ тѝ гдⷭ҇и, тꙋ́не мѧ̀ ᲂу҆ще́дри, и҆мѣ́ѧй ᲂу҆трѡ́бы щедро́тъ многомлⷭ҇тиве.
Мч҃нченъ: Пострада́вше бг҃озра́чнїи стрⷭ҇тоте́рпцы на землѝ терпѣли́внѣ, и҆ непоколеби́мое ны́нѣ црⷭ҇твїѧ наслѣ́дїе прїѧ́ша, и҆ ра́йскїѧ сла́дости причаща́ютсѧ ра́дꙋющесѧ: тѣ́хъ мл҃твами хрⷭ҇тѐ бж҃е, твоеѧ̀ сла́вы прича́стники сотворѝ на́съ.
Мч҃нченъ: Свѣти̑ла восто́къ невече́рнїй просвѣти́вше ꙗ҆ви́стесѧ, и҆ но́щь безбо́жїѧ потреби́сте премꙋ́дрїи, и҆ лꙋча́ми сщ҃е́нными всѣ́хъ ѡ҆зарѧ́ете, свѣтоно́сный ва́шъ стрⷭ҇тоно́сцы пра́здникъ велича́ющихъ.
Бг҃оро́диченъ: Просвѣтѝ влⷣчце, две́ре свѣ́та, се́рдца моегѡ̀ ѻ҆́чи молю́сѧ, и҆̀хже ѡ҆мрачѝ грѣхо́внаѧ тьма̀ глꙋбо́каѧ, и҆ покаѧ́нїѧ мѝ зарю̀ низпослѝ, и҆ ѻ҆гнѧ̀ вѣ́чнагѡ хода́тайствомъ твои́мъ, чⷭ҇таѧ, свободѝ.
И҆́нъ
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
Ликѡ́мъ безпло́тныхъ ны́нѣ твою̀ цр҃ковь добродѣ́телїю подража́ющꙋ покажѝ, ѡ҆гражда́ѧ а҆́гг҃лы хрⷭ҇тѐ ста́до твоѐ.
Дꙋша́мъ сп҃се́нїю ѿ бг҃а дарова́тисѧ, а҆́гг҃ли застꙋ̑пницы моли́тесѧ, прибѣга́ющымъ под̾ кро́въ ва́шъ всесла́внїи.
Бг҃оро́диченъ: Ꙗ҆́кѡ ᲂу҆́тро сꙋ́щымъ во тьмѣ̀ и҆ заблꙋ́ждшымъ дв҃о, пра́ведное сл҃нце на рꙋкꙋ̀ держа́щи хрⷭ҇та̀, возсїѧ́ла є҆сѝ.
Та́же, Досто́йнѡ є҆́сть: и҆ покло́нъ. Посе́мъ є҆ктенїа̀ ма́лаѧ, и҆ свѣти́ленъ, и҆ ѱалмы̀ ѻ҆бы̑чныѧ, и҆ про́чее.
На стїхо́внѣ стїхи̑ры покаѧ́нны, гла́съ и҃:
Є҆гда̀ прїимꙋ̀ во ᲂу҆мѣ̀ мно́жество содѣ́ѧнныхъ мно́ю ѕѡ́лъ, и҆ въ помышле́нїе прїидꙋ̀ стра́шнагѡ ѻ҆́нагѡ и҆спыта́нїѧ, тре́петомъ содержи́мь къ тебѣ̀ прибѣга́ю чл҃вѣколю́бцꙋ бг҃ꙋ. тѣ́мже не пре́зри менѐ, молю̀ тѧ̀, є҆ди́не безгрѣ́шне: да́рꙋй ᲂу҆миле́нїе смире́ннѣй мое́й дꙋшѝ пре́жде конца̀, и҆ сп҃си́ мѧ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Сле́зы мѝ да́ждь бж҃е, ꙗ҆́коже и҆ногда̀ женѣ̀ грѣ́шницѣ: и҆ сподо́би мѧ̀ ѡ҆мочи́ти но́зѣ твоѝ, ꙗ҆̀же мѧ̀ ѿ пꙋтѝ пре́лести свободи́вшыѧ, и҆ мѵ́ро бл҃гоꙋха́нїѧ тебѣ̀ приноси́ти житїѐ чи́сто, покаѧ́нїемъ мѝ созда́нное, да ᲂу҆слы́шꙋ и҆ а҆́зъ жела́емый тво́й гла́съ: вѣ́ра твоѧ̀ сп҃се́ тѧ, и҆дѝ въ ми́рѣ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Что̀ ва́съ нарече́мъ ст҃і́и; херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ. серафі́мы ли; ꙗ҆́кѡ непреста́ннѡ просла́висте є҆го̀. а҆́гг҃лы ли; тѣ́ла бо ѿврати́стесѧ. си̑лы ли; дѣ́йствꙋете бо чꙋдесы̀: мнѡ́гаѧ ва̑ша и҆мена̀, и҆ бѡ́льшаѧ дарова̑нїѧ: моли́те сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ: и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ сп҃сти́сѧ дꙋша́мъ на́шымъ.
Та́же, Бл҃го є҆́сть: И҆ Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀. Та́же, ча́съ пе́рвый, ѱалмы̀ ѻ҆бы́чны: и҆ про́чее, и҆ ѿпꙋ́стъ.
Въ понедѣ́льникъ бл҃жє́нны, гла́съ и҃:
Помѧнѝ на́съ хрⷭ҇тѐ сп҃се мі́ра, ꙗ҆́коже разбо́йника помѧнꙋ́лъ є҆сѝ на дре́вѣ: и҆ сподо́би всѣ́хъ, є҆ди́не ще́дре, нбⷭ҇номꙋ црⷭ҇твїю твоемꙋ̀.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
И҆сцѣлѝ хрⷭ҇тѐ, стра̑сти дꙋ́ши моеѧ̀, є҆ди́не врачꙋ̀ дꙋ́шъ и҆ тѣле́съ: и҆ ᲂу҆миле́нїѧ стрꙋѧ́ми мѧ̀ ѡ҆мы́въ, всего̀ ѡ҆чи́сти ꙗ҆́кѡ бл҃гоꙋтро́бенъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Прⷭ҇то́лъ чⷭ҇тна́гѡ ѡ҆бстоѧ́ще бг҃онача́лїѧ, прⷭ҇то́ли, херꙋві́ми, нача̑ла и҆ вла̑сти, и҆ прѡ́чаѧ безпло́тныхъ чинонача̑лїѧ, сщ҃е́ннѡ воспѣва́ютъ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Разгорѣ́нїемъ распала́ющесѧ хрⷭ҇то́вы любвѐ, неѡпали́ми пребы́ша посредѣ̀ ѻ҆гнѧ̀ страда́льцы, попали́вше те́рнїе ѕлоче́стїѧ бж҃е́ственною бл҃года́тїю.
Сла́ва: Ѽ трⷪ҇це прест҃а́ѧ, є҆ди́нице нача́льнѣйшаѧ! и҆зба́ви рабы̑ твоѧ̑ ѻ҆гнѧ̀ негаси́магѡ, мольба́ми бж҃е́ственныхъ безпло́тныхъ твои́хъ си́лъ, и҆ црⷭ҇твїѧ твоегѡ̀ сподо́би.
И҆ ны́нѣ: Сви́токъ тѧ̀ и҆ногда̀ прови́дѣ и҆са́їа бг҃обл҃года́тнаѧ, въ не́мже ѻ҆́ч҃имъ пе́рстомъ написа́сѧ сло́во несказа́ннѡ, въ кни́гахъ живо́тныхъ написꙋ́ющее на́съ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.