Глас 7-й. Вторник.
Въ понедѣ́льникъ ве́чера,
на Гдⷭ҇и воззва́хъ, стїхи̑ры покаѧ́нны. Гла́съ з҃.
Подо́бенъ: Дне́сь бди́тъ і҆ꙋ́да:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Влⷣко и҆ бж҃е всеще́дрый, и҆́миже вѣ́си сꙋдьба́ми, да́ждь мѝ въ се́рдцѣ тво́й стра́хъ и҆мѣ́ти, да́ждь мѝ гнꙋша́тисѧ дѣѧ́нїй лꙋка́вагѡ, да́ждь мѝ люби́ти тѧ̀ ѿ всеѧ̀ дꙋшѝ моеѧ̀, и҆ твори́ти во́лю твою̀ сп҃си́тельнꙋю. ты́ бо є҆сѝ бг҃ъ на́шъ, рекі́й: проси́те, и҆ прїи́мете.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Бы́хъ ᲂу҆́бѡ бѣсѡ́мъ смѣ́хъ, человѣ́кѡмъ же ᲂу҆ничиже́нїе, пра́вєднымъ рыда́нїе, и҆ а҆́гг҃лѡмъ пла́чь, скве́рна воздꙋ́хꙋ, и҆ землѝ и҆ вода́мъ: тѣ́ло бо ѡ҆калѧ́хъ, дꙋ́шꙋ и҆ ᲂу҆́мъ ѡ҆скверни́хъ безчи́сленными дѣѧ́ньми, и҆ вра́гъ бж҃їй бы́хъ. ᲂу҆вы̀ мнѣ̀ гдⷭ҇и! согрѣши́хъ тѝ, согрѣши́хъ, прости́ мѧ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Молю́сѧ тѝ, ѡ҆ мнѣ̀ непло́днѣмъ долготерпѝ влⷣко: и҆ не посѣцы̀ менѐ ꙗ҆́кѡ непло́дное дре́во посѣче́нїемъ сме́ртнымъ, во ѻ҆́гнь ѿсыла́ѧ, но плодоно́сна мѧ̀ сотвори́ти ᲂу҆моле́нъ бꙋ́ди, вре́мѧ покаѧ́нїѧ мѝ даѧ̀ ꙗ҆́кѡ чл҃вѣколю́бецъ: ꙗ҆́кѡ да ѿмы́ю сп҃се мо́й хрⷭ҇тѐ, моѧ̑ мнѡ́ги грѣхѝ.
Та́же мине́и стїхи̑ры, ст҃о́мꙋ. Сла́ва, ст҃о́мꙋ. И҆ ны́нѣ, бг҃оро́диченъ гла́са. А҆́ще ли нѣ́сть мине́и: и҆́ны стїхи̑ры ст҃о́мꙋ и҆ вели́комꙋ прⷪ҇ро́кꙋ і҆ѡа́ннꙋ прⷣте́чи, гла́съ з҃:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Въ пꙋсты́ни живы́й непоро́чно житїѐ, грѣха́ми ѡ҆пꙋстѣ́вшїй ᲂу҆́мъ мо́й ѡ҆бновѝ, прⷣте́че.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Го́рлицꙋ тѧ̀ прⷪ҇ро́че, краснѣ́йшꙋю разꙋмѣ́вше сла́вимъ, провозвѣща́ющꙋ сꙋ́щымъ въ мі́рѣ бж҃е́ственнꙋю ве́снꙋ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Предста́телю живота̀ моегѡ̀, дꙋ́ши моеѧ̀ храни́телю, бж҃е́ственный прⷣте́че, ѿ человѣ́ческа ѧ҆зы́ка льсти́ва и҆зба́ви мѧ̀ раба̀ твоего̀.
Сла́ва, и҆ ны́нѣ, бг҃оро́диченъ: Въ мѧте́жи ѡ҆бꙋрева́ема мѧ̀ лѣ́ности, въ приста́нище бл҃гоꙋти́шное сп҃се́нїѧ напра́ви влⷣчце.
Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры покаѧ́нны, гла́съ з҃:
Ꙗ҆́кѡ блꙋ́дный сы́нъ прїидо́хъ а҆́зъ ще́дре, прїими́ мѧ припа́дающаго, ꙗ҆́кѡ є҆ди́наго ѿ нає́мникъ твои́хъ бж҃е, и҆ поми́лꙋй мѧ̀ чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Ꙗ҆́кѡ впады́й въ разбо́йники и҆ ᲂу҆ѧ́звленъ, та́кѡ и҆ а҆́зъ впадо́хъ ѿ мно́гихъ грѣхѡ́въ, и҆ ᲂу҆ѧ́звлена мѝ є҆́сть дꙋша̀: къ комꙋ̀ прибѣ́гнꙋ пови́нный а҆́зъ, то́кмѡ къ тебѣ̀ бл҃гоꙋтро́бномꙋ дꙋша́мъ врачꙋ̀; и҆зле́й на мѧ̀ бж҃е, вели́кꙋю твою̀ млⷭ҇ть.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Ст҃і́и мч҃нцы и҆̀же до́брѣ страда́вше и҆ вѣнча́вшесѧ, моли́тесѧ ко гдⷭ҇ꙋ, сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Ра́дꙋйсѧ сл҃нца ѻ҆́блаче мы́сленнагѡ и҆ неизрече́ннагѡ влⷣчце: ра́дꙋйсѧ всесвѣ́тлаѧ свѣщѐ: ра́дꙋйсѧ свѣ́щниче всезлаты́й: тобо́ю прест҃а́ѧ, є҆́ѵа и҆зба́висѧ ѿ клѧ́твы. но ꙗ҆́кѡ и҆мꙋ́щи дерзнове́нїе ко бл҃гопремѣ́нномꙋ сн҃ꙋ твоемꙋ̀ и҆ бг҃ꙋ, мт҃рнею твое́ю мл҃твою, не ѡ҆скꙋдѣ́й моли́тисѧ пречⷭ҇таѧ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Въ понедѣ́льникъ на повече́рїи,,
канѡ́нъ моле́бный прест҃ѣ́й бцⷣѣ. Гла́съ з҃.
Пѣ́снь а҃
І҆рмо́съ: Сокрꙋши́вшемꙋ бра̑ни мы́шцею свое́ю, и҆ вса́дники трїста́ты погрꙋзи́вшемꙋ, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.
Тѧ̀ вино́внꙋ на́шегѡ сп҃се́нїѧ, и҆ бж҃е́ственнагѡ и҆збавле́нїѧ мо́лимъ пречⷭ҇таѧ: моли́сѧ є҆́же сп҃сти́сѧ на́мъ.
Ве́сь є҆́смь въ лю́тыхъ напа́стехъ, въ бѣда́хъ и҆ прегрѣше́нїихъ, вопїю́ ти пречⷭ҇таѧ: сп҃си́ мѧ раба̀ твоего̀.
Сла́ва: Тѧ̀ дв҃ꙋ чⷭ҇тꙋю мо́лимъ, и҆ мт҃рь зижди́телѧ: ѿ всѧ́кагѡ ѡ҆ѕлобле́нїѧ бѣсѡ́въ и҆зба́ви на́съ.
И҆ ны́нѣ: Ꙗ҆́же сло́во пло́тїю ро́ждши па́че сло́ва, нача́льника жи́зни хрⷭ҇та̀ бг҃а на́шего, молѝ сп҃сти́сѧ на́мъ.
Пѣ́снь г҃
І҆рмо́съ: Оу҆ тверди́сѧ вѣ́рою хрⷭ҇то́ва цр҃ковь, и҆́бо непреста́ннѡ пѣ́сньми вопїе́тъ пою́щи: ст҃ъ є҆сѝ гдⷭ҇и, и҆ тѧ̀ пое́тъ дꙋ́хъ мо́й.
Всепа́гꙋбныѧ ѕло́бы ше́ствовавъ стезю̀, не ѡ҆брѣто́хъ пꙋтѝ сп҃се́нїѧ моегѡ̀: къ немꙋ́же мѧ̀ ты̀ наста́ви пренепоро́чнаѧ влⷣчце.
Крѣ́пость, и҆ ᲂу҆твержде́нїе, и҆ по́мощь, и҆ наде́ждꙋ тѧ̀ є҆ди́нꙋ написꙋ́ю всенепоро́чнаѧ: ты́ ми бꙋ́ди застꙋ́пница въ де́нь и҆схо́да.
Сла́ва: Всегда́ тѧ пренепоро́чнаѧ, молю̀: въ ча́съ сме́рти моеѧ̀ предста́ни, и҆ мꙋ́ки и҆зба́ви раба̀ твоего̀.
И҆ ны́нѣ: Роди́лсѧ є҆сѝ ѿ дв҃ы несказа́ннѡ, ꙗ҆ви́лсѧ є҆сѝ, ꙗ҆́коже и҆зво́лилъ є҆сѝ сп҃се на́шъ, и҆ мі́ръ ѡ҆бнови́лъ є҆сѝ гдⷭ҇и.
Пѣ́снь д҃
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑ и҆ ᲂу҆жасо́хсѧ гдⷭ҇и.
Повелѣ̑нїѧ моегѡ̀ влⷣки престꙋ́пль, врагѡ́мъ ꙗ҆ви́хсѧ ᲂу҆до́бь ѡ҆держи́мь: ты́ мѧ и҆зба́ви влⷣчце.
Въ ча́съ сме́рти и҆зба́ви пречⷭ҇таѧ, и҆ сп҃сѝ дꙋ́шꙋ мою̀ стра́стнꙋю ѿ бѣсѡ́въ.
Сла́ва: Разрѣшѝ пречⷭ҇таѧ влⷣчце, соꙋ́зы прегрѣше́нїй мои́хъ, и҆ къ животꙋ̀ вѣ́чномꙋ бꙋ́ди мѝ хода́таица мл҃твами твои́ми.
И҆ ны́нѣ: Воспѣва́емъ тѧ̀ по ржⷭ҇твѣ̀ па́ки дв҃ꙋ, и҆ прославлѧ́емъ тѧ̀ пречⷭ҇таѧ, ꙗ҆́кѡ мт҃рь бг҃а на́шегѡ.
Пѣ́снь є҃
І҆рмо́съ: Оу҆́тренююще сло́ве, въ сла́вꙋ твою̀ и҆ хвалꙋ̀, восхвалѧ́емъ непреста́ннѡ ѡ҆́бразъ крⷭ҇та̀ твоегѡ̀, є҆го́же да́лъ є҆сѝ на́мъ ѻ҆рꙋ́жїе въ по́мощь.
Приста́нище въ бꙋ́ри лю́тѣ смꙋща́ємымъ, сп҃се́нїѧ двє́ри вѣ́рою сп҃са́ємымъ, дв҃о бл҃га́ѧ, сп҃си́ мѧ раба̀ твоего̀.
Мнѡ́гїѧ щедрѡ́ты твоѧ̑ дв҃о бцⷣе, на мнѣ̀ рабѣ̀ твое́мъ ꙗ҆вѝ бога́тнѡ, и҆збавлѧ́ющи мѧ̀ стра́шнагѡ и҆ бꙋ́дꙋщагѡ сꙋда̀.
Сла́ва: Но́щь страсте́й непостоѧ́нна содержи́тъ дꙋ́шꙋ мою̀, и҆ къ па́гꙋбнѣй про́пасти ѿсыла́етъ: свѣ́томъ моли́твы твоеѧ̀ бцⷣе, сп҃си́ мѧ раба̀ твоего̀.
И҆ ны́нѣ: Прест҃а́ѧ дв҃о ѡ҆бра́дованнаѧ, ро́ждшаѧ сло́во въ лѣ́то па́че сло́ва, молѝ є҆гѡ̀ сп҃стѝ дꙋ́шы на́шѧ.
Пѣ́снь ѕ҃
І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се: поми́лꙋй на́съ.
Въ напа́стехъ застꙋ́пницꙋ тѧ̀ и҆́мамы тве́рдꙋ, въ ско́рбехъ крѣ́пкое сп҃се́нїе, поко́й въ печа́лѣхъ, въ бѣда́хъ по́мощь приснодв҃о.
Ты́ ми храни́тельница жи́зни все́й ꙗ҆ви́сѧ пречⷭ҇таѧ: ты́ мѧ и҆зба́ви ѿ бѣсѡ́въ въ ча́съ сме́рти, ты̀ и҆ по сме́рти ᲂу҆поко́й.
Сла́ва: Добро́та чⷭ҇тны́хъ ст҃ы́хъ а҆́гг҃лъ, ра́дованїе человѣ́кѡвъ всѣ́хъ, ты̀ є҆сѝ бцⷣе дв҃о: ты́ мѧ къ животꙋ̀ наста́ви.
И҆ ны́нѣ: И҆сцѣлѝ пренепоро́чнаѧ ѻ҆каѧ́ннꙋю дꙋ́шꙋ мою̀, неисцѣ́льнѡ болѧ́щꙋю жите́йскими пре́лестьми, и҆ мно́гихъ двере́й затворе́ньми.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ з҃:
За млⷭ҇рдїе млⷭ҇ти твоеѧ̀ хрⷭ҇тѐ бж҃е, ѿ дв҃ы ст҃ы́ѧ воплоти́тисѧ и҆зво́лилъ є҆сѝ: є҆ѧ́же ра́ди соблюдѝ жи́знь на́шꙋ, ꙗ҆́кѡ чл҃вѣколю́бецъ.
Пѣ́снь з҃
І҆рмо́съ: Пе́щь горѧ́щꙋю ѡ҆роси́лъ є҆сѝ сп҃се, ѻ҆́троки сп҃слъ є҆сѝ пою́щыѧ и҆ глаго́лющыѧ: бл҃гослове́нъ є҆сѝ во вѣ́ки гдⷭ҇и бж҃е ѻ҆тє́цъ на́шихъ.
Мно́жество прегрѣше́нїй мои́хъ прїе́млѧ во ᲂу҆́мъ, во ѿча́ѧнїи быва́ю, дв҃о пренепоро́чнаѧ. тѣ́мже тѝ зовꙋ̀: помози́ ми, да не до конца̀ поги́бнꙋ.
Жи́зни сꙋ́щꙋю мт҃рь тѧ̀ чⷭ҇таѧ, вѣ́дый, зовꙋ́ ти: сме́рти дꙋше́вныѧ и҆зба́ви мѧ̀, и҆ вѣ́чныѧ жи́зни сподо́би.
Сла́ва: И҆зба́ви пренепоро́чнаѧ ѿ бѣ́дъ, и҆ страсте́й, и҆ болѣ́зней, и҆ ѡ҆ѕлобле́нїѧ, и҆ житїѧ̀ согрѣше́нїй, и҆ ѿ вѣ́чнагѡ ѻ҆гнѧ̀ негаси́магѡ, вѣ́рнѡ чтꙋ́щыѧ тѧ̀ пѣ́сньми.
И҆ ны́нѣ: Всѧ́къ ѧ҆зы́къ сла́витъ тѧ̀ чⷭ҇таѧ, сла́вꙋ сꙋ́щꙋю и҆ похвалꙋ̀ ро́да на́шегѡ, и҆ наста́вницꙋ заблꙋ́ждшихъ, бцⷣе препѣ́таѧ.
Пѣ́снь и҃
І҆рмо́съ: Стра́шнаго херꙋві́мѡмъ, и҆ чꙋ́днаго серафі́мѡмъ, и҆ мі́рꙋ творца̀, сщ҃е́нницы и҆ рабѝ, и҆ дꙋ́си пра́ведныхъ по́йте, бл҃гослови́те и҆ превозноси́те є҆го̀ во вѣ́ки.
Всѐ житїѐ моѐ и҆жди́хъ въ лѣ́ности а҆́зъ преѻкаѧ́нный, и҆ ны́нѣ недоꙋмѣ́юсѧ, и҆ къ концꙋ̀ прибли́жихсѧ, помози́ ми, влⷣчце.
Грѣ́шникѡвъ прибѣ́жище, низве́рженныхъ и҆справле́нїе, ты̀ є҆сѝ влⷣчце: сегѡ̀ ра́ди притека́ю къ покро́вꙋ твоемꙋ̀, сп҃си́ мѧ.
Сла́ва: Неꙋсы́пнꙋ мл҃твꙋ ꙗ҆́кѡ и҆мꙋ́щи, всенепоро́чнаѧ влⷣчце мі́ра, сꙋда̀ и҆зба́ви бꙋ́дꙋщагѡ, вѣ́рою чтꙋ́щыѧ ѡ҆́бразъ тво́й.
И҆ ны́нѣ: Пое́тъ тѧ̀ всѧ́къ ѧ҆зы́къ сла́вѧй, бг҃а бо препѣ́таго родила̀ є҆сѝ дв҃о бг҃оневѣ́сто: є҆го́же молѝ непреста́ннѡ сп҃стѝ дꙋ́шы пою́щихъ тѧ̀.
Пѣ́снь ѳ҃
І҆рмо́съ: Па́че є҆стества̀ мт҃рь, и҆ є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми вѣ́рнїи бцⷣꙋ велича́емъ.
Под̾ твоѐ млⷭ҇рдїе прибѣга́ющїи вѣ́рою и҆збавлѧ́ютсѧ ско́рбныхъ бѣ́дъ житїѧ̀. тѣ́мже и҆ а҆́зъ къ твоемꙋ̀ покро́вꙋ прибѣго́хъ бцⷣе.
Крѣ́пкаѧ застꙋ́пнице, непобѣди́маѧ стѣно̀ печа́льныхъ чⷭ҇таѧ, сп҃си́ мѧ ѿ страсте́й грѣхѡ́въ, и҆ ѻ҆гнѧ̀ вѣ́чнꙋющагѡ.
Сла́ва: Свѣ́тлыми сїѧ́ньми возсїѧ́вшагѡ сло́ва ѿ тебѐ, дв҃о чⷭ҇таѧ, ѡ҆зари́ мѧ, и҆ сп҃сѝ ꙗ҆́кѡ бл҃га́ѧ, и҆ ѿ мꙋ́къ и҆схитѝ.
И҆ ны́нѣ: Но́сиши носѧ́щаго всѧ́чєскаѧ ст҃ы́ми рꙋка́ми твои́ми: є҆го́же молѝ чⷭ҇таѧ, чꙋжда́гѡ ѕлодѣ́йства неѡдержи́мыхъ на́съ сп҃стѝ.
Та́же, досто́йно є҆́сть: и҆ покло́нъ. Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
Во вто́рникъ ᲂу҆́тра,
по а҃-мъ стїхосло́вїи сѣда́льны покаѧ́нны, гла́съ з҃:
И҆мꙋ́щи, дꙋшѐ моѧ̀, врачевство̀ покаѧ́нїѧ, пристꙋпѝ припа́дающи и҆ воздыха́нїемъ вопїю́щи: врачꙋ̀ дꙋ́шъ же и҆ тѣле́съ, свободи́ мѧ чл҃вѣколю́бче, ѿ мно́гихъ мои́хъ согрѣше́нїй, сопричти́ мѧ блꙋдни́цѣ и҆ разбо́йникꙋ, и҆ мытарю̀: и҆ да́рꙋй мѝ бж҃е, беззако́нїй мои́хъ проще́нїе и҆ сп҃си́ мѧ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
И҆́же петро́во ѿверже́нїе слеза́ми ѡ҆чи́стивъ, и҆ мытаре́ва согрѣшє́нїѧ воздыха́нїемъ прости́въ, чл҃вѣколю́бче гдⷭ҇и поми́лꙋй мѧ̀.
. Сла́ва, и҆ ны́нѣ, бг҃оро́диченъ: Ра́дꙋйсѧ невмѣсти́маго въ нб҃сѣ́хъ, вмѣсти́вшаѧ во ᲂу҆тро́бѣ твое́й: ра́дꙋйсѧ дв҃о, прⷪ҇ро́кѡвъ проповѣ́данїе, є҆́юже возсїѧ̀ є҆мманꙋ́илъ: ра́дꙋйсѧ мт҃и хрⷭ҇та̀ бг҃а.
По в҃-мъ стїхосло́вїи, сѣда́льны, гла́съ з҃:
Мытаре́вꙋ покаѧ́нїю не поревнова́хъ, и҆ блꙋдни́цы сле́зъ не стѧжа́хъ: ѿчаѧва́юсѧ бо ѿ недоꙋмѣ́нїѧ такова́гѡ и҆справле́нїѧ. но твои́мъ бл҃гоꙋтро́бїемъ сп҃си́ мѧ бж҃е, ꙗ҆́кѡ чл҃вѣколю́бецъ.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
И҆́же блꙋдни́цы сле́зы, и҆ петра̀ прїе́мый, и҆ мытарѧ̀ ѡ҆правда́вый и҆з̾ глꙋбины̀ воздохнꙋ́вша: и҆ менѐ ѿча́ѧннаго ѿ дѣ́лъ ᲂу҆ще́дри сп҃се, и҆ сп҃си́ мѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Ст҃і́и твоѝ гдⷭ҇и, на землѝ подви́гшесѧ, врага̀ попра́ша, и҆ ле́сть і҆́дѡльскꙋю ᲂу҆праздни́ша: тѣ́мже и҆ вѣнцы̀ ѿ тебѐ прїѧ́ша чл҃вѣколю́бца влⷣки и҆ млⷭ҇тивагѡ бг҃а, подаю́щагѡ мі́рови ве́лїю млⷭ҇ть.
Сла́ва, и҆ ны́нѣ, бг҃оро́диченъ: Превозшла̀ є҆сѝ си̑лы нбⷭ҇ныѧ, занѐ хра́мъ показа́ласѧ є҆сѝ бж҃е́ственный, бл҃гослове́ннаѧ бцⷣе, ꙗ҆́кѡ ро́ждшаѧ хрⷭ҇та̀ сп҃са дꙋ́шъ на́шихъ.
По г҃-мъ стїхосло́вїи сѣда́ленъ, гла́съ з҃:
Подо́бенъ: Пло́дъ чре́ва твоегѡ̀:
Ꙗ҆́кѡ блꙋдни́ца припа́даю тѝ чл҃вѣколю́бче, а҆́ще и҆ слеза́ми ве́сь недоꙋмѣ́юсѧ ко ᲂу҆миле́нїю: мл҃твами прⷣте́чи ꙗ҆́кѡ ѻ҆́нꙋ ᲂу҆милѝ млⷭ҇тиве, и҆ сп҃си́ мѧ.
Гдⷭ҇и скве́рнꙋ дꙋ́ши моеѧ̀, млⷭ҇ти твоеѧ̀ ѵ҆ссѡ́помъ, ᲂу҆млⷭ҇тивльсѧ ꙗ҆́кѡ бл҃гъ ѡ҆мы́й сп҃се, и҆ ѡ҆чи́стивъ ѿ скве́рны тимѣ́нїѧ страсте́й, поми́лꙋй мѧ̀ влⷣко, сп҃сѝ созда́нїе твоѐ мольба́ми прⷣте́чи твоегѡ̀, є҆ди́не многомлⷭ҇тиве.
Сла́ва, и҆ ны́нѣ, бг҃оро́диченъ: Предста́тельнице те́плаѧ и҆ застꙋ́пнице хрⷭ҇тїа́нъ є҆сѝ, бцⷣе всепѣ́таѧ: тѣ́мже съ прⷣте́чею, сн҃а твоего̀ молѝ ѡ҆брѣстѝ на́мъ млⷭ҇ть.
Канѡ́нъ покаѧ́ненъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ. Творе́нїе і҆ѡ́сифово, гла́съ з҃:
Пѣ́снь а҃
І҆рмо́съ: Сокрꙋши́вшемꙋ бра̑ни мы́шцею свое́ю, и҆ вса́дники трїста́ты погрꙋзи́вшемꙋ, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.
Всегда̀ согрѣша́ю, и҆ не бою́сѧ тебѐ хрⷭ҇тѐ, долготерпѣ́нїемъ и҆́щꙋщагѡ моегѡ̀ покаѧ́нїѧ: да́ждь мѝ по́мыслъ ѡ҆браще́нїѧ ꙗ҆́кѡ бл҃гъ, и҆ не пре́зри менѐ.
Грѣхѝ ко грѣхѡ́мъ прилага́ѧй хрⷭ҇тѐ, при́снѡ ника́коже престаю̀ а҆́зъ ѻ҆каѧ́нный, є҆ди́не бл҃же безгрѣ́шне, ᲂу҆ще́дри и҆ сп҃си́ мѧ.
Мч҃нченъ: Де́рзостнѣ до́блїи приглаша́хꙋ страда́льцы: сїѐ три́знище и҆спо́лнено по́двигѡвъ: теце́мъ, предсѣди́тъ хрⷭ҇то́съ подвигополо́жникъ, вѣнчава́ѧ побѣди́тєли врага̀.
Мч҃нченъ: Совлеко́стесѧ тѣ́ла многоѡбра́зными ра́нами, и҆ нетлѣ́нїѧ ри́зою ѡ҆дѣ́ѧстесѧ мч҃нцы мꙋ́дрїи и҆ ѻ҆ц҃а̀ щедро́тъ сы́нове бы́сте.
Бг҃оро́диченъ: Мно́гими грѣхѝ ѡ҆ѕло́бленнꙋю дꙋ́шꙋ мою̀, бг҃ороди́тельнице дв҃о, и҆сцѣлѝ: ꙗ҆́кѡ да во гла́сѣхъ бл҃годаре́нїѧ, прилѣ́жнѡ всегда̀ сла́влю тѧ̀.
Дрꙋгі́й канѡ́нъ чⷭ҇тно́мꙋ и҆ вели́комꙋ прⷪ҇ро́кꙋ і҆ѡа́ннꙋ прⷣте́чи. Творе́нїе і҆ѡ́сифово. Гла́съ з҃:
І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀ гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю.
Красота̀ цр҃ко́внаѧ, ᲂу҆кра́шенъ ꙗ҆ви́лсѧ є҆сѝ бл҃же́нне прⷣте́че: ю҆́же всегда̀ мл҃твами твои́ми сп҃са́й ѿ всѧ́кїѧ бꙋ́ри є҆реті́чествꙋющихъ, крѣ́пкꙋ и҆ непоколеби́мꙋ.
Непоро́чнаѧ сщ҃е́ннаѧ же́ртва творцꙋ̀ прине́слсѧ є҆сѝ, закла́нъ бы́лъ є҆сѝ бж҃е́ственный прⷣте́че, ꙗ҆́кѡ а҆́гнецъ неѕло́бивъ. тѣ́мже вѣ́рою тѧ̀ молю̀: всѧ́кїѧ мѧ̀ ѕло́бы вра́жїѧ и҆зба́ви.
И҆сцѣлѝ тѣлє́сныѧ и҆ дꙋшє́вныѧ на́шѧ бѡлѣ́зни, присносла́вный прⷣте́че, молѧ̀ всегда̀ сло́ва, всѣ́хъ недꙋ́ги и҆ бѡлѣ́зни бл҃гоꙋтро́бнѣ взе́мшаго.
Бг҃оро́диченъ: Родила̀ є҆сѝ всест҃а́ѧ непостижи́мое сло́во, пло́тїю по ѵ҆поста́си на́мъ прїѡбщи́вшагосѧ: того̀ всегда̀ молѝ, сп҃стѝ вѣ́рою тебѐ при́снѡ бл҃жа́щыѧ.
Пѣ́снь г҃
І҆рмо́съ: Нб҃са̀ ᲂу҆тверди́вый сло́вомъ, и҆ земно́е ѡ҆снова́нїе ᲂу҆крѣпи́вый на вода́хъ мно́гихъ, ᲂу҆твердѝ мо́й ᲂу҆́мъ, въ во́лю твою̀ чл҃вѣколю́бче.
И҆́же презира́ѧй человѣ́кѡвъ грѣхѝ, мно́гагѡ ра́ди хрⷭ҇тѐ, чл҃вѣколю́бїѧ, пре́зри є҆ди́не сп҃се, мнѡ́гаѧ моѧ̑ ѕла̑ѧ: да тѧ̀ сла́влю пребл҃га́го.
Да плѡтска́ѧ хотѣ̑нїѧ сотворю̀, твоѧ̑ хотѣ̑нїѧ хрⷭ҇тѐ, презрѣ́въ безсо́вѣстный, и҆ бою́сѧ пла́меннагѡ томле́нїѧ сло́ве, ѿ негѡ́же мѧ̀ и҆зба́ви.
Мч҃нченъ: Тѣлє́снымъ болѣ́знемъ прїѡбща́ющесѧ страда́льцы, на неболѣ́зненнꙋю взира́хꙋ жи́знь и҆ ѡ҆сла́бꙋ: ю҆́же ᲂу҆лꙋчи́вше въ ра́дости, вѣ̑рнымъ бѡлѣ́зни при́снѡ ѡ҆блегча́ютъ.
Мч҃нченъ: Зарѧ́ми по́двигѡвъ стрⷭ҇тоно́сцы пре́лести лю́тꙋю но́щь разрꙋши́сте, и҆ къ невече́рнемꙋ свѣ́тꙋ преидо́сте, на́шихъ болѣ́зней тьмꙋ̀ при́снѡ ѿе́млюще.
Бг҃оро́диченъ: Две́рь бж҃їю прови́дѣ тѧ̀ прⷪ҇ро́къ, є҆́юже са́мъ про́йде є҆ди́нъ, ꙗ҆́коже вѣ́сть, дв҃о пречⷭ҇таѧ. тѣ́мже молю́сѧ тѝ, покаѧ́нїѧ двє́ри сама́ ми ѿве́рзи.
И҆́нъ
І҆рмо́съ: Въ нача́лѣ нб҃са̀, всеси́льнымъ сло́вомъ твои́мъ ᲂу҆твержде́й гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ, всю̀ си́лꙋ и҆́хъ, на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ.
Солнцелꙋ́чными мо́лнїѧми всю̀ просвѣща́еши тва́рь: со́лнца бо ᲂу҆́мнагѡ ѕвѣзда̀ свѣ́тлаѧ ꙗ҆ви́лсѧ є҆сѝ прⷣте́че. є҆го́же молѝ прилѣ́жнѡ страсте́й тьмꙋ̀ ѿгна́ти ѿ всеболѣ́зненныхъ серде́цъ на́шихъ.
Зако́на и҆ бл҃года́ти посредѣ̀ стоѧ̀ бж҃е́ственный прⷪ҇ро́че, ѡ҆б̾ѧвлѧ́еши всѣ̑мъ ꙗ҆́вѣ, ѻ҆́вомꙋ ᲂу҆́бѡ преста́тїе, ѻ҆́вѣй же просїѧ́нїе быва́ющее чи́сто: ѡ҆бновле́нїе соверше́нно ѡ҆бетша́вшымъ грѣхѝ.
Бѣсо́вскагѡ наше́ствїѧ, ѿ собла̑знъ жите́йскихъ, и҆ ѿ всѧ́кїѧ ско́рби на́съ и҆зба́ви, вопїе́мъ, хрⷭ҇то́въ крⷭ҇ти́телю, молѧ̀ пребл҃га́го, и҆ въ де́нь сꙋ́дный мꙋче́нїй свободѝ.
Бг҃оро́диченъ: Бл҃гослове́ннаѧ ꙗ҆́же бг҃а неска́заннѡ ро́ждши, съ бж҃е́ственнымъ є҆гѡ̀ крⷭ҇ти́телемъ, молѝ чⷭ҇таѧ непреста́ннѡ влⷣчце, ѡ҆ на́съ, въ напа̑сти впа́дающихъ житє́йскїѧ, и҆ содержи́мыхъ грѣхѝ.
Пѣ́снь д҃
І҆рмо́съ: Плотско́е прише́ствїе твоѐ хрⷭ҇тѐ, ᲂу҆вѣрѧ́ѧ прⷪ҇ро́къ а҆ввакꙋ́мъ взыва́ше: сла́ва си́лѣ твое́й гдⷭ҇и.
Оу҆страни́хсѧ ѿ пꙋтѝ, къ жи́зни ведꙋ́щагѡ мѧ̀, и҆ въ ро́въ ѕлы́хъ впадо́хъ: сп҃се, не пре́зри менѐ.
Слє́зныѧ мѝ то́ки низпослѝ влⷣко сло́ве бж҃їй: да ѿмы́ю мно́гихъ согрѣше́нїй мои́хъ тимѣ̑нїѧ.
Мч҃нченъ: Приводи́ми ꙗ҆́кѡ а҆́гнцы къ заколе́нїю мч҃нцы, бори́телѧ врага̀ закала́хꙋ, сла́вы сподоблѧ́еми.
Мч҃нченъ: И҆злива́ємыѧ крове́й то́ки прехва́льнїи, пото́ки сла́дѡстныѧ ᲂу҆гото́ваша всѣ̑мъ воспрїѧ́тїе, бж҃е́ственнїи мч҃нцы.
Бг҃оро́диченъ: Воплоти́сѧ ѿ крове́й твои́хъ чи́стыхъ гдⷭ҇ь, покаѧ́нїе человѣ́кѡмъ да́рꙋѧ всѣ̑мъ, ѻ҆трокови́це хода́тайствомъ твои́мъ.
И҆́нъ
І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче.
Низложи́въ по́лкъ вражде́бныхъ, и҆ до́блествовавъ на ни́хъ свѣ́тлостїю крⷭ҇ти́телю, во мнѣ̀ ца́рствꙋющїй грѣ́хъ низложѝ, молю́сѧ тѝ, мл҃твами твои́ми.
Свѣти́льникъ ꙗ҆́вльсѧ бл҃же́нне мы́сленный, показа́лъ є҆сѝ человѣ́кѡмъ і҆и҃са, пра́ведное вели́кое сл҃нце, и҆́мже ѡ҆зари́тисѧ сердца́мъ всѣ́хъ, моли́сѧ.
Въ беззако́нїихъ заче́нсѧ и҆ роди́всѧ, жи́вꙋ въ лѣ́ности, и҆ бою́сѧ та́мошнихъ мꙋче́нїй: ѿ ни́хже мѧ̀ и҆схитѝ крⷭ҇ти́телю, бг҃а ᲂу҆моли́въ.
Молє́нїѧ ѡ҆ на́съ тебѐ чтꙋ́щихъ крⷭ҇ти́телю, бг҃ꙋ принесѝ: ꙗ҆́кѡ да и҆зба́витъ на́съ всѧ́кагѡ лю́тагѡ ѡ҆бстоѧ́нїѧ, и҆ бѣсо́вскагѡ вре́да, мо́лимсѧ.
Бг҃оро́диченъ: Зако́на сѣ̑ни, тебѐ многови́днѡ проѧви́ша ро́ждшꙋю бг҃а: є҆го́же молѝ всенепоро́чнаѧ, всѧ́кагѡ мѧ̀ беззако́нїѧ и҆ страсте́й тѣле́сныхъ и҆зба́вити.
Пѣ́снь є҃
І҆рмо́съ: Разгна́вый но́щь стра́стнꙋю, возсїѧ́й мѝ свѣ́тъ ᲂу҆́мный, началоро́днꙋю тьмꙋ̀ ѿгна́въ бе́здны, и҆ первозда́нный свѣ́тъ возсїѧ́вый мі́рꙋ, содѣ́телю всѣ́хъ.
И҆зба́ви мѧ̀ сло́ве, првⷣнагѡ твоегѡ̀ гнѣ́ва, є҆гда̀ сꙋ́диши землѝ: и҆ ѿ мно́гихъ согрѣше́нїй покаѧ́нїемъ ѡ҆чи́щъ, хра́мъ мѧ̀ покажѝ твоеѧ̀ бл҃гости, є҆ди́не содѣ́телю всѣ́хъ.
Ѿ ѕѣ́льныѧ мглы̀ страсте́й ѡ҆слѣпи́хсѧ ᲂу҆мо́мъ, и҆ не вѣ́мъ, что̀ дѣ́лаю, ѡ҆нечꙋ́вствивсѧ се́рдцемъ: ѡ҆брати́ мѧ хрⷭ҇тѐ, и҆ покаѧ́нїе мѝ да́рꙋй чисти́тельное сквє́рнъ.
Мч҃нченъ: Три́знище и҆спо́лнено по́тѡвъ, страда́льцы те́кше ю҆́ношески, къ нбⷭ҇нѣй свѣ́тлости достиго́сте, побѣ̑дныѧ по́чєсти ѿ живонача́льныѧ рꙋкѝ прїе́мше: тѣ́мже ра́дꙋетесѧ ны́нѣ.
Мч҃нченъ: Крѣ́пкими жи́лами сщ҃е́нныхъ болѣ́зней ва́шихъ страда́льцы, ᲂу҆дави́сте вои́стиннꙋ началоѕло́бнаго ѕмі́ѧ, и҆ ра́йскїѧ сла́дости сподо́бистесѧ: тѣ́мже восхвалѧ́емъ ва́съ.
Бг҃оро́диченъ: Ꙗ҆́же сл҃нца ѻ҆́блаче свѣ́тлый, возсїѧ́й мѝ свѣ́тъ мы́сленный и҆́стиннагѡ покаѧ́нїѧ, и҆ ѿженѝ тьмꙋ̀ лꙋка́выхъ помышле́нїй: да вѣ́рою пою́ тѧ, ꙗ҆́кѡ сп҃се́нїе вѣ́рныхъ.
И҆́нъ
І҆рмо́съ: Гдⷭ҇и бж҃е мо́й, ѿ но́щи ᲂу҆́треневавъ тебѣ̀ молю́сѧ: пода́ждь мѝ ѡ҆ставле́нїе прегрѣше́нїй мои́хъ, и҆ къ свѣ́тꙋ твои́хъ повелѣ́нїй пꙋти̑ моѧ̑ напра́ви, молю́сѧ.
Прозѧ́блъ є҆сѝ гла́съ вопїю́щагѡ въ пꙋсты́хъ, премꙋ́дре, по́мыслѣхъ бж҃їѧ позна́нїѧ. тѣ́мже молю̀ тѧ̀: дꙋ́шꙋ мою̀ ѡ҆пꙋстѣ́вшꙋю всѧ́кими престꙋпле́ньми, ѡ҆бновѝ.
Честны́й влⷣки сосꙋ́дъ показа́лсѧ є҆сѝ бж҃е́ственный прⷪ҇ро́че, нечи́стыхъ дѣѧ́нїй и҆зба́ви мѧ̀ мл҃твами твои́ми: и҆ че́сти полꙋчи́ти вѣ́чныѧ бл҃годѣ́телѧ ᲂу҆молѝ.
Прибли́жишасѧ беззакѡ́нїѧ на мѧ̀ вхо́домъ лѣ́ности: ѡ҆́бразы покаѧ́нїѧ мѧ̀ бл҃же́нне прⷣте́че, лꙋ́чша сотворѝ, ꙗ҆́кѡ да ᲂу҆се́рднѡ пꙋти̑ гдⷭ҇ни ше́ствꙋю.
Бг҃оро́диченъ: Оу҆мертвѝ пло́ти моеѧ̀ земна̑ѧ мꙋдрова̑нїѧ, бцⷣе, жи́знь ро́ждшаѧ, сме́ртїю сме́рть до конца̀ бж҃е́ственною си́лою, прест҃а́ѧ чⷭ҇таѧ, потре́бльшꙋю.
Пѣ́снь ѕ҃
І҆рмо́съ: Во глꙋбинꙋ̀ грѣхо́внꙋю впа́дсѧ бл҃же, ꙗ҆́кѡ і҆ѡ́на ѿ ки́та вопїю́ ти: возведѝ ѿ тлѝ живо́тъ мо́й, и҆ сп҃си́ мѧ чл҃вѣколю́бче.
Но́въ блꙋдни́къ ꙗ҆ви́хсѧ, скве́рнѡ жи́въ на землѝ, и҆ сластны̑мъ стремле́нїємъ подклони́хсѧ: ѡ҆брати́ мѧ хрⷭ҇тѐ бж҃е мо́й, и҆ сп҃си́ мѧ ꙗ҆́кѡ чл҃вѣколю́бецъ.
Возстенѝ, ѽ дꙋшѐ моѧ̀, да и҆зба́вишисѧ стена́нїѧ: прослези́сѧ, ꙗ҆́кѡ да сле́зъ непреста́нныхъ не прїи́меши и҆скꙋ́са та́мѡ въ болѣ́зни, ни є҆ди́ныѧ же и҆мꙋ́щихъ по́льзы.
Мч҃нченъ: Ꙗ҆ви́стесѧ ꙗ҆́коже ка́менїе, въ вѣнцѣ̀ ꙗ҆́вѣ хрⷭ҇то́вы цр҃кве водрꙋже́ны: и҆ ᲂу҆краше́нїе тоѧ̀ лѣ́потное бы́сте, честні́и великомч҃нцы.
Мч҃нченъ: Кончи̑ны въ бз҃ѣ достѡ́йныѧ ᲂу҆лꙋчи́вше премꙋ́дрїи, безконє́чнаѧ наслѣ́дствꙋете мздовоздаѧ̑нїѧ. тѣ́мже кончи́намъ на́шымъ въ покаѧ́нїи бы́ти, мч҃нцы моли́тесѧ.
Бг҃оро́диченъ: И҆з̾ глꙋбины́ мѧ лѣ́ности безмѣ́рныхъ ѕѡ́лъ возведѝ бл҃га́ѧ, ꙗ҆́же бе́зднꙋ бл҃гоꙋтро́бїѧ ро́ждши, и҆сто́чникъ мѝ сле́зъ приснодв҃о да́рꙋй.
И҆́нъ
І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.
Лꙋча́ми добродѣ́телей ꙗ҆́вѣ ѡ҆блиста́ѧ, и҆ свѣтоза́рнымъ мꙋче́нїемъ сїѧ́ѧ, просвѣща́еши всю̀ тва́рь, ᲂу҆́мнагѡ восто́ка дрꙋ́же бли́жнїй.
Прозѧ́блъ є҆сѝ ѿ ста́рицы непло́дныѧ бл҃же́нне: тѣ́мже вопїю́ ти: грѣха́ми мно́гими мѧ̀ состарѣ́вшагосѧ, покаѧ́нїѧ добро́тами ѡ҆бновѝ, мл҃твами твои́ми.
Свѣти́льниче свѣ́та невече́рнѧгѡ бж҃е́ственный прⷪ҇ро́че, свѣти́льникъ се́рдца моегѡ̀ ᲂу҆га́сшїй возжзѝ мл҃твами твои́ми, и҆ свѣ́та прича́стника мѧ̀ бж҃е́ственнагѡ сотворѝ.
Бг҃оро́диченъ: Ꙗ҆́кѡ до́ждь во чре́во твоѐ сло́во сни́де: є҆го́же молѝ пречⷭ҇таѧ дв҃о, течє́нїѧ и҆зсꙋши́ти безмѣ́рныхъ мои́хъ ѕѡ́лъ, молю́сѧ тѝ.
Пѣ́снь з҃
І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃сѐ, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ є҆сѝ бж҃е ѻ҆тє́цъ на́шихъ.
Въ стра̑сти безче́стїѧ впадо́хъ, скотѡ́мъ, сп҃се, ᲂу҆подо́бихсѧ, и҆ ѡ҆мрачи́всѧ не ви́ждꙋ жда́нїѧ твоегѡ̀ сло́ве, долготерпѣли́внагѡ: ѡ҆браще́нїѧми вре́мѧ да́рꙋй. и҆ сп҃си́ мѧ.
Въ лѣ́ности житїѐ моѐ сконча́хъ, дѣ́ѧ ꙗ҆̀же не лѣ́ть є҆́сть твори́ти, и҆ сѐ ны́нѣ про́чее ко вратѡ́мъ приближа́юсѧ а҆́дѡвымъ, не прїе́млѧ чꙋ́вства: не пре́зри мѧ̀ хрⷭ҇тѐ, и҆́же є҆ди́нъ сы́й бл҃гъ.
Мч҃нченъ: Вожделѣ́вше жи́зни вѣ́чныѧ мі́рови ᲂу҆мертви́стесѧ премꙋ́дрїи: и҆ врага̀ ᲂу҆мертви́вше коне́чнѣ, къ нб҃сє́мъ возлетѣ́сте, ѡ҆ на́съ страда́льцы при́снѡ молѧ́щесѧ.
Мч҃нченъ: Разрѣши́вшесѧ ѿ нꙋ́ждъ тѣле́сныхъ, разрѣши́сте пре́лести ᲂу҆́зы, и҆ ко хрⷭ҇тꙋ̀ крѣ́пкою любо́вїю мꙋ́чєницы дꙋ́шы привѧза́сте, свѧза́вшемꙋсѧ пло́тїю, и҆ разрꙋши́вшемꙋ клѧ́твꙋ.
Бг҃оро́диченъ: Сви́токъ но́въ прⷪ҇ро́къ тебѐ предви́дѣвъ, въ не́мже написа́сѧ сло́во ѻ҆́ч҃ее. тѣ́мже чⷭ҇таѧ, молю́сѧ: въ кни́зѣ мнѣ̀ живы́хъ написа́тисѧ молѝ, мно́гихъ мои́хъ ѕѡ́лъ разорѧ́ющи написа́нїе.
И҆́нъ
І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще и҆ глаго́люще: превозноси́мый ѻ҆тцє́въ бг҃ъ и҆ препросла́вленъ.
Да́рꙋй мѝ тꙋ̑чи сле́зъ мл҃твами твои́ми: и҆́же бл҃гоꙋтро́бїѧ бе́зднꙋ рѣ́чными стрꙋѧ́ми и҆змы́вый прⷣте́че, и҆ всего́ мѧ ѡ҆чи́сти скве́рны, пло́ти же и҆ дꙋ́ха.
Мольбꙋ̀ принесѝ бл҃же́нне, над̾ всѣ́ми бг҃ꙋ на́шемꙋ, ꙗ҆́кѡ да и҆ менѐ поми́лꙋетъ ꙗ҆́кѡ бл҃гоꙋтро́бенъ, мно́гѡ согрѣша́ющаго, и҆ возникнове́нїѧ ны́нѣ не и҆мꙋ́щаго.
Непло́днаѧ дꙋшѐ, потщи́сѧ пока́ѧтисѧ, да не ꙗ҆́кѡ смоко́вницꙋ тѧ̀ непло́днꙋю бж҃е́ственный сꙋ́дъ посѣче́тъ и҆з̾ ко́рене, влⷣцѣ возопі́й: бж҃е, ѡ҆чи́стивъ сп҃си́ мѧ.
Оу҆мерщвле́нꙋ дꙋ́шꙋ мою̀ и҆мѣ́ѧй ѕлы́ми престꙋпле́ньми, тѧ̀ ᲂу҆мертви́вшꙋю а҆́дъ ржⷭ҇тво́мъ твои́мъ, молю̀ влⷣчце, покаѧ́нїѧ мѧ̀ ѡ҆́бразы ѡ҆живѝ.
Пѣ́снь и҃
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀ и҆ го́ры и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ и҆ и҆зба́вителѧ бл҃гослови́те.
Преиз̾ѻби́льнѡ наслади́всѧ вредѧ́щихъ сласте́й, ᲂу҆мовре́днѡ несмы́сленный а҆́зъ, преидо́хъ всѧ́кагѡ грѣ́шника: и҆мѣ́ѧй бл҃гоꙋтро́бїѧ премно́жество, пода́ждь мѝ ѡ҆чище́нїе прегрѣше́нїй.
Ны́нѣ при две́рехъ жени́хъ, свѣщꙋ̀ ᲂу҆красѝ дꙋшѐ, є҆ле́емъ напоѧ́ющи сїю̀ млⷭ҇рдїѧ, и҆ всѧ́кими до́брыми дѣ́лы: пре́жде да́же не затвори́тсѧ две́рь, потщи́сѧ со хрⷭ҇то́мъ вни́ти въ ра́дости неизрече́ннѣй.
Мч҃нченъ: Не боѧ́щесѧ мꙋ́къ, до́блїи вопїѧ́хꙋ страда́льцы: сѐ бл҃гопрїѧ́тно вре́мѧ, ста́немъ всѝ тве́рдымъ ᲂу҆мо́мъ: стѧ́жимъ ма́лыми болѣ́зньми жи́знь неболѣ́зненнꙋю, и҆ сла́дость нестарѣ́ющꙋюсѧ.
Мч҃нченъ: Вода́ми бж҃е́ственными стрⷭ҇тоте́рпцы сп҃сѡвы наводнѧ́еми при́снѡ, напоѧ́ете всю̀ зе́млю подража́нїемъ по́двигѡвъ ва́шихъ: и҆ плодоно́снꙋ сїю̀ добродѣ́тельми содѣ́ловаете ѡ҆ хрⷭ҇тѣ̀ во вѣ́ки.
Бг҃оро́диченъ: Бцⷣе, и҆звѣ́стное предста́тельство, и҆ наде́жда хрⷭ҇тїа́нъ, въ де́нь стра́шный предста́ни мѝ прегрѣши́вшемꙋ мно́гѡ: и҆ и҆зба́ви гее́нны стра́шныѧ, ѻ҆вца́мъ мѧ̀ десны̑мъ сочетава́ющи.
И҆́нъ
І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки.
Оу҆́зъ разрѣши́ти ми сѧ мно́гихъ мои́хъ прегрѣше́нїй, свѧ́зана бы́вша, и҆ свѧ̑заннымъ разрѣше́нїе пода́вшаго, молѧ̀ прⷪ҇ро́че є҆ди́наго и҆зба́вителѧ, да не престае́ши во вѣ́ки, при́снѡ тѧ̀ сла́вѧщаго.
Оу҆ѧзви́хсѧ прⷣте́че, сласте́й ѻ҆рꙋ́жїемъ, и҆ въ болѣ́зни се́рдца тебѣ̀ взыва́ю: ᲂу҆врачꙋ́й дꙋшѝ моеѧ̀ болѣ̑зни, хрⷭ҇та̀ молѧ̀, є҆ди́наго врача̀ дꙋ́шъ же и҆ тѣле́съ.
Рꙋко́ю твое́ю прⷣте́че, є҆го́же крⷭ҇ти́лъ є҆сѝ сло́ва, не ѡ҆скꙋдѣ́й моли́ти непреста́ннѡ, и҆зба́вити мѧ̀ ѿ рꙋкѝ грѣхо́вныѧ, согрѣши́вшаго мно́гѡ, и҆ смире́ннаго и҆ ѡ҆сꙋжде́ннаго.
Ꙗ҆́кѡ погребо́хъ въ землѝ безꙋ́мнѡ тала́нтъ, и҆́же мѝ ѿ бг҃а ввѣ́ренъ бы́сть, ѡ҆жида́ю го́рькагѡ томле́нїѧ: ѿ негѡ́же крⷭ҇ти́телю, и҆схити́ мѧ мл҃твами твои́ми, вѣ́рнѡ молю̀ тѧ̀.
Бг҃оро́диченъ: Пребыла̀ є҆сѝ неѡпали́ма, прїе́мши во ᲂу҆тро́бѣ ѻ҆́гнь нестерпи́мый дв҃о: тѣ́мже и҆схити́ мѧ ѿ ѻ҆гнѧ̀ негаси́магѡ, ѡ҆роша́ющи мѧ̀ ны́нѣ, при́снагѡ покаѧ́нїѧ предо́брыми ѡ҆́бразы.
Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а: покло́ны.
Пѣ́снь ѳ҃
І҆рмо́съ: Безсѣ́меннагѡ ржⷭ҇тва̀ зача́тїе кто̀ ска́жетъ ѿ человѣ̑къ; нетлѣ́ннагѡ ржⷭ҇тва̀ рожде́нїю кто̀ не почꙋди́тсѧ ѿ земноро́дныхъ; тѣ́мъ тѧ̀ племена̀ зємна́ѧ бцⷣе велича́емъ.
Да наслѣ́димъ бꙋ̑дꙋщаѧ бл҃га̑ѧ, воспла́чемъ, воздохне́мъ, ᲂу҆мо́лимъ хрⷭ҇та̀, до́ндеже вре́мѧ и҆́мамы вѣ́рнїи, покаѧ́нїѧ и҆ моле́нїѧ.
Ꙗ҆́кѡ ханане́а зовꙋ́ ти: поми́лꙋй мѧ̀ хрⷭ҇тѐ, ꙗ҆́коже дре́вле нича́щꙋю и҆спра́ви мѧ̀ і҆и҃се: и҆ сп҃си́ мѧ сп҃се, ꙗ҆́кѡ петра̀, грѣхѝ погрꙋжа́емаго.
Мч҃нченъ: Стѣснѧ́еми скорбьмѝ, темни́цами же и҆ мꙋче́ньми, стрⷭ҇тоно́сцы мч҃нцы, къ простра́нствꙋ ᲂу҆тѣше́нїѧ преидо́ша, ѿ тѣсноты̀ и҆ ѿ прегрѣше́нїй на́съ и҆збавлѧ́ютъ.
Мч҃нченъ: Землѧ̀ ᲂу҆́бѡ покры̀ ва̑ша тѣлеса̀ ны́нѣ, нб҃о же держи́тъ ст҃ы̑ѧ дꙋ́хи: при́снѡ прⷭ҇то́лꙋ предстоѧ́ще сла́вы, со а҆́гг҃лы ра́дꙋютсѧ.
Бг҃оро́диченъ: Ѡ҆бле́ксѧ въ мѧ̀ гдⷭ҇ь, и҆з̾ тебѐ про́йде пречⷭ҇таѧ: того̀ ᲂу҆́бѡ молѝ, ѻ҆де́ждею мѧ̀ просвѣти́ти свѣ́та дв҃о, совле́кшаго мѧ̀ ны́нѣ страсте́й вре́тища тѧжча́йшагѡ.
И҆́нъ
І҆рмо́съ: Нетлѣ́нїѧ и҆скꙋше́нїемъ ро́ждшаѧ, и҆ всехитрецꙋ̀ сло́вꙋ пло́ть взаимода́вшаѧ, мт҃и неискꙋсомꙋ́жнаѧ дв҃о бцⷣе: прїѧ́телище нестерпи́магѡ. село̀ невмѣсти́магѡ зижди́телѧ твоегѡ̀, тѧ̀ велича́емъ.
Ѿ сщ҃е́ннагѡ ко́рене прⷪ҇ро́че, прозѧ́блъ є҆сѝ, и҆ ѕло́бное коре́нїе всѐ и҆сто́рглъ є҆сѝ, и҆́миже сподавлѧ́ема и҆ непотре́бна быва́ема посѣти́ мѧ бл҃же́нне, и҆ бж҃е́ственнагѡ покаѧ́нїѧ прозѧба́ти плоды̀ ᲂу҆пра́ви мѧ̀.
Краснѣ́йшꙋю го́рлицꙋ, и҆ сла́вїѧ тѧ̀ цр҃ковь познава́етъ, вели́кїй прⷣте́че: покаѧ́нїѧ бо провозгласи́лъ є҆сѝ пѣ́снь дꙋша́мъ запꙋстѣ́вшымъ, и҆ ѕлы́ми ѡ҆лѧденѣ́вшымъ. тѣ́мже вѣ́рою тѧ̀ ᲂу҆бл҃жа́емъ.
Ты̀ пꙋти̑ ведꙋ́щыѧ ко сп҃си́тєльнымъ вхо́дѡмъ всѣ̑мъ показа́лъ є҆сѝ, сла́вный прⷣте́че: и҆́миже ходи́ти мѧ̀ ᲂу҆крѣпѝ, всѣ́ми житїѧ̀ безпꙋ́тїи блꙋдѧ́щаго, пре́лестїю же ѕло́бꙋ содѣ́лавшаго.
Стра́шный при две́рехъ де́нь прибли́жисѧ, и҆ ѡ҆сꙋжде́нїѧ дѣла̀ и҆мы́й, рыда́ю: гдⷭ҇и, гдⷭ҇и, є҆ди́не млⷭ҇тиве, мл҃твами твоегѡ̀ прⷣте́чи, и҆ всѣ́хъ ст҃ы́хъ, неѡсꙋжде́нна тогда̀ покажи́ мѧ.
Бг҃оро́диченъ: Свѣ́тъ ро́ждшаѧ бж҃е́ственный бг҃обл҃года́тнаѧ, ѡ҆мраче́ннꙋю престꙋпле́ньми дꙋ́шꙋ мою̀ просвѣтѝ, молю́сѧ, и҆ тьмы̀ вѣ́чныѧ свобо́дна мѧ̀ покажѝ: ꙗ҆́кѡ да велича́ю тѧ̀ и҆ сла́влю приснобл҃же́ннꙋю.
Та́же, Досто́йно є҆́сть: и҆ покло́нъ. Є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры покаѧ́нны, гла́съ з҃:
Ꙗ҆́кѡ непло́днꙋю смоко́вницꙋ не посѣцы̀ менѐ сп҃се, грѣ́шнагѡ: но на мнѡ́га лѣ̑та проще́нїе мѝ да́рꙋй, напаѧ́ѧ дꙋ́шꙋ мою̀ слеза́ми покаѧ́нїѧ, да пло́дъ принесꙋ́ ти млⷭ҇тыни.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ: за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Ꙗ҆́кѡ сл҃нце сы́й пра́ведное, просвѣтѝ сердца̀ пою́щихъ тѧ̀: гдⷭ҇и, сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Посредѣ̀ сꙋди́ща законопрестꙋ́пныхъ ра́дꙋющесѧ вопїѧ́хꙋ стрⷭ҇тоно́сцы твоѝ: гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ: Свѣ́тъ хрⷭ҇тѐ прозѧ́блъ є҆сѝ ѿ дв҃ы, и҆ просвѣти́лъ є҆сѝ ро́дъ человѣ́ческїй: гдⷭ҇и, сла́ва тебѣ̀.
Та́же, Бл҃го є҆́сть: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ча́съ а҃-й, и҆ ѿпꙋ́стъ.
Во вто́рникъ бл҃жє́нны, гла́съ з҃:
Красе́нъ бѣ̀ и҆ до́бръ въ снѣ́дь, и҆́же менѐ ᲂу҆мертви́вый пло́дъ: хрⷭ҇то́съ є҆́сть дре́во живо́тное, ѿ негѡ́же ꙗ҆ды́й не ᲂу҆мира́ю, но вопїю̀ съ разбо́йникомъ: помѧни́ мѧ гдⷭ҇и, во црⷭ҇твїи твое́мъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Стрꙋ́пы моегѡ̀ се́рдца неисцѣ̑льныѧ, гдⷭ҇и, ᲂу҆врачꙋ́й, ꙗ҆́кѡ є҆ди́нъ вра́чь дꙋ́шъ же и҆ тѣле́съ: и҆ стꙋпа́ти мѝ пра́вѡ всегда̀ поспѣ́й во сп҃си́тєльныѧ пꙋти̑.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Предтекі́й пра́ведномꙋ сл҃нцꙋ хрⷭ҇то́въ крⷭ҇ти́телю, свѣти́льникъ дꙋшѝ моеѧ̀ ᲂу҆гаше́ный мно́гою ѕло́бою, возжзѝ бж҃е́ственными мл҃твами твои́ми, ꙗ҆́кѡ да ᲂу҆бл҃жа́ю тѧ̀ всегда̀ сп҃са́емь.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Страда́вше и҆ вѣнча́ни бы́вше, врага̀ посрами́ли є҆стѐ, и҆ ны́нѣ жи́тельствꙋете на нб҃сѣ́хъ, свѣ́та непристꙋ́пнагѡ и҆сполнѧ́еми премꙋ́дрїи мч҃нцы, молѧ́щесѧ ѡ҆ дꙋша́хъ на́шихъ.
Сла́ва: Оу҆врачꙋ́й дꙋшѝ моеѧ̀ стра̑сти неисцѣ̑льныѧ, бж҃е́ственнаѧ трⷪ҇це: и҆ и҆схити́ мѧ гее́нны, и҆ и҆скꙋше́нїй, ꙗ҆́же во є҆ди́номъ бж҃ествѣ̀ сла́вимаѧ бл҃гоче́стнѡ: и҆ вѣ́чнꙋющее мѝ црⷭ҇тво да́рꙋй.
И҆ ны́нѣ: Вмѣсти́ла є҆сѝ нетѣсномѣ́стнѡ во чре́вѣ невмѣсти́маго: є҆го́же всегда̀ молѝ мт҃и чⷭ҇таѧ, тѣсноты̀ всѧ́кїѧ и҆ страсте́й наведе́нїѧ и҆зба́вити рабы̑ твоѧ̑, любо́вїю тѧ̀ сла́вѧщыѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.