Глас 6-й. Суббота.
Въ пѧто́къ ве́чера,
на Гдⷭ҇и воззва́хъ, стїхи̑ры ст҃ы̑мъ мч҃никѡмъ, и҆ ст҃и́телємъ, и҆ прпⷣбнымъ, гла́съ ѕ҃.
Подо́бенъ: Всю̀ ѿложи́вше:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Хрⷭ҇то́выхъ стрⷭ҇те́й по стопа́мъ ходѧ̀ всѐ мч҃нческое сосло́вїе, крѣ́пкѡ за́йде къ подвигѡ́мъ мнѡ́гимъ, и҆ того̀ пред̾ нечести́выми мꙋчи́тели, и҆ беззако́нными царѝ бг҃а проповѣ́даша, и҆ мнѡ́ги мꙋ̑ки претерпѣ́ша, по́чєсти ча́юще нбⷭ҇ныѧ воспрїѧ́ти. и҆̀хже ны́нѣ ви́дѧще ра́дꙋютсѧ, и҆ со всѣ́ми ли́ки безпло́тныхъ си́лъ гдⷭ҇еви предстоѧ́тъ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Ста́до бг҃оизбра́нное, хрⷭ҇та̀ пе́рвагѡ па́стырѧ подо́бницы бы́сте па́стырїе всесщ҃е́ннїи: сохрани́сте невре́днѡ до конца̀, бл҃гоче́стїѧ бж҃е́ствєннаѧ сокрѡ́вища, ѿгна́вше ди̑вїѧ во́лки: то́же во ѡ҆гра́дꙋ нбⷭ҇нꙋю до́брѣ возведо́сте. и҆дѣ́же ᲂу҆́бѡ ны́нѣ водворѧ́еми, помина́йте любо́вїю ва́съ восхвалѧ́ющихъ, и҆ хрⷭ҇тꙋ̀ со дерзнове́нїемъ моли́тесѧ ѡ҆ дꙋша́хъ на́шихъ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Преподо́бнѡ пожи́вше ѻ҆тцы̀ преподо́бнїи всѝ, бѣ́сы побѣди́сте, и҆ сѡ́вѣстнаѧ мꙋчє́нїѧ страсте́й ᲂу҆гаси́вше, разжжє́нїѧ до́блественнѣ претерпѣ́сте бл҃же́ннїи, и҆ ра́дꙋетесѧ ны́нѣ съ нбⷭ҇ными си́лами: ꙗ҆́кѡ ᲂу҆подо́бистесѧ житїю̀ въ пло́ти тѣ́хъ безпло́тныхъ. съ ни́миже моли́те хрⷭ҇та̀ пребл҃га́го бг҃а, и҆збавле́нїе ѡ҆брѣстѝ паде́нїй, ва́съ почита́ющымъ.
И҆́ны стїхи̑ры, гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а ми́лость, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Мч҃нченъ: Мч҃нцы твоѝ гдⷭ҇и, не ѿверго́шасѧ тебѐ, ни ѿстꙋпи́ша ѿ за́повѣдей твои́хъ. тѣ́хъ мл҃твами поми́лꙋй на́съ. Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
И҆ па́ки то́йже мч҃нченъ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Стрⷭ҇тоте́рпцы мч҃нцы, нбⷭ҇нїи гра́ждане, на землѝ пострада́вше, мнѡ́гїѧ мꙋ̑ки терпѣ́ша. мл҃твами и҆́хъ гдⷭ҇и, и҆ моле́нїемъ всѣ́хъ на́съ сохранѝ.
Сла́ва, и҆ ны́нѣ, бг҃оро́диченъ: Кто̀ тебѐ не ᲂу҆блажи́тъ прест҃а́ѧ дв҃о; кто́ ли не воспое́тъ твоегѡ̀ пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, то́йже ѿ тебѐ чⷭ҇тыѧ про́йде, неизрече́ннѡ вопло́щьсѧ: є҆стество́мъ бг҃ъ сы́й, и҆ є҆стество́мъ бы́въ человѣ́къ на́съ ра́ди, не во двою̀ лицꙋ̑ раздѣлѧ́емый, но во двою̀ є҆стєствꙋ̀ несли́тнѡ познава́емый. того̀ молѝ чⷭ҇таѧ всебл҃же́ннаѧ, поми́ловатисѧ дꙋша́мъ на́шымъ.
Та́же, Свѣ́те ти́хїй: и҆ прокі́менъ днѐ.
На стїхо́внѣ стїхи̑ры мч҃нчны, гла́съ ѕ҃:
Страда́вшїи тебѐ ра́ди хрⷭ҇тѐ, мнѡ́гїѧ мꙋ̑ки претерпѣ́ша, и҆ совершє́нныѧ вѣнцы̀ прїѧ́ша на нб҃сѣ́хъ, да мо́лѧтсѧ ѡ҆ дꙋша́хъ на́шихъ.
Крⷭ҇тъ тво́й гдⷭ҇и, мч҃нкѡмъ бы́сть ѻ҆рꙋ́жїе непобѣди́мое: ви́дѧхꙋ бо предлежа́щꙋю сме́рть, и҆ предзрѧ́ще бꙋ́дꙋщꙋю жи́знь, ᲂу҆пова́нїемъ є҆́же на тѧ̀ ᲂу҆крѣплѧ́хꙋсѧ: тѣ́хъ мл҃твами поми́лꙋй на́съ.
Ме́ртвенъ: Нача́токъ мѝ и҆ соста́въ зижди́тельное твоѐ бы́сть повелѣ́нїе: восхотѣ́въ бо ѿ неви́димагѡ и҆ ви́димагѡ є҆стества̀, жи́ва мѧ̀ соста́вити, ѿ землѝ ᲂу҆́бѡ тѣ́ло созда́въ, да́лъ же мѝ є҆сѝ, дꙋ́шꙋ, бж҃е́ственнымъ твои́мъ и҆ животворѧ́щимъ вдохнове́нїемъ. тѣ́мже сп҃се, рабы̑ твоѧ̑ во странѣ̀ живы́хъ, и҆ въ кро́вѣхъ првⷣныхъ ᲂу҆поко́й.
Сла́ва, и҆ ны́нѣ, бг҃оро́диченъ: Мл҃твами ро́ждшїѧ тѧ̀ хрⷭ҇тѐ, мч҃никъ твои́хъ, и҆ а҆пⷭ҇лъ, и҆ прⷪ҇рѡ́къ, и҆ ст҃и́телей, прпⷣбныхъ, и҆ првⷣныхъ, и҆ всѣ́хъ ст҃ы́хъ, ᲂу҆со́пшыѧ рабы̑ твоѧ̑ ᲂу҆поко́й.
Въ пѧто́къ на повече́рїи,
канѡ́нъ моле́бный прест҃ѣ́й бцⷣѣ. Гла́съ ѕ҃:
Пѣ́снь а҃
І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀, бг҃ъ ѻ҆ц҃а̀ моегѡ̀, и҆ вознесꙋ̀ є҆го̀: сла́внѡ бо просла́висѧ.
Припѣ́въ: Прест҃а́ѧ бцⷣе сп҃сѝ на́съ.
Не ѿри́ни бл҃га́ѧ, не ѡ҆мерзѝ менѐ, не пре́зри менѐ под̾ твоѐ милосе́рдїе чи́стаѧ, те́плѣ прите́кшаго: но да́ждь мѝ є҆́же въ тебѣ̀ напита́тисѧ бл҃года́тїю.
Бцⷣе бл҃га́ѧ, скорбѧ́щихъ застꙋ́пнице, прїимѝ моѐ ѿ дꙋшѝ стена́нїе: и҆ и҆зба́ви мѧ̀ ѿ всѣ́хъ безмѣ́рныхъ ѕѡ́лъ, ꙗ҆́же лю́тѣ содѣ́ѧхъ.
Сла́ва: Тебѣ̀ припа́даю бл҃га́ѧ, ско́рбныхъ предста́тельнице: и҆зба́ви мѧ̀ ѻ҆гнѧ̀ вѣ́чнꙋющагѡ, и҆ тьмы̀ и҆ про́пасти, во всѧ́комъ житїѝ ѕлѣ̀ пожи́вшаго.
И҆ ны́нѣ: Оу҆вы̀ мнѣ̀! ка́кѡ тѧ̀ и҆зба́вителю ᲂу҆молю̀ і҆и҃се мо́й, безмѣ́рнѡ къ тебѣ̀ согрѣши́въ; про́чее хода́таицꙋ тѝ приноша́ю ро́ждшꙋю тѧ̀ чⷭ҇тꙋю, поми́лꙋй и҆ сп҃си́ мѧ.
Пѣ́снь г҃
І҆рмо́съ: Оу҆твердѝ гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.
Припа́даю тѝ мт҃и сло́ва, прїими́ мѧ щедро́тами твои́ми: просѧ́щемꙋ же прегрѣше́нїй проще́нїе пода́ждь, те́плыми мл҃твами твои́ми.
Поми́лꙋй мѧ̀ влⷣчце, поми́лꙋй, и҆ и҆зба́ви ѿ всѧ́кагѡ лꙋка́вствїѧ, и҆ ѡ҆ѕлобле́нїѧ бѣсѡ́въ, и҆ вѣ́чнагѡ мꙋче́нїѧ.
Сла́ва: Оу҆кротѝ влⷣчце, сласте́й мои́хъ го́рькое пїѧ́нство, трезве́нїе бж҃е́ственное мѝ подаю́щи покаѧ́нїѧ, и҆ ѡ҆браще́нїе сп҃си́тельное.
И҆ ны́нѣ: Всѧ́ческихъ гдⷭ҇а и҆ содержи́телѧ, бг҃ороди́тельнице, неизглаго́ланнѡ ро́ждши, ᲂу҆молѝ сего̀, є҆́же сп҃стѝ ста́до твоѐ.
Пѣ́снь д҃
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: сла́ва си́лѣ твое́й гдⷭ҇и.
Ꙗ҆́звы дꙋшѝ моеѧ̀ не престаѧ̀ чешꙋ̀ любосла́стьми, и҆ приложи́шасѧ мнѣ̀ стрꙋ́пѡвъ болѣ́зни, и҆ пребыва́ю нечꙋ́вственъ и҆ неисцѣли́мь: поми́лꙋй бг҃ороди́тельнице, и҆ и҆сцѣлѝ, и҆ сп҃си́ мѧ мл҃твами твои́ми.
Тьма̀ грѣхо́внаѧ покры̀ дꙋ́шꙋ мою̀ бг҃ороди́тельнице, ꙗ҆́кѡ въ нощѝ си́це хождꙋ̀ во свѣ́тѣ, не вѣ́дый хрⷭ҇то́вы за́повѣди. свѣ́тъ ро́ждшаѧ бж҃е́ственный, поми́лꙋй мѧ̀ и҆ просвѣтѝ, молю́сѧ.
Сла́ва: Сло́во бг҃а жива́гѡ сни́де во ᲂу҆тро́бꙋ твою̀ мт҃и дв҃о, и҆ прїе́мъ ѿ твои́хъ крове́й пречи́стыхъ всѐ моѐ смѣше́нїе, прихо́дитъ сꙋгꙋ́бъ во є҆ди́ной ѵ҆поста́си, є҆го́же молѝ сп҃стѝ дꙋ́шы на́шѧ.
И҆ ны́нѣ: Тѣлє́снаѧ хотѣ̑нїѧ прилѣ́жнѡ преидо́хъ, и҆ сла̑сти всѧ̑, и҆ растлѣ́нъ бы́хъ ве́сь, и҆ скве́рненъ и҆ ме́рзокъ: пречⷭ҇таѧ бг҃ороди́тельнице, поми́лꙋй, и҆ сп҃си́ мѧ милосе́рдїемъ твои́мъ.
Пѣ́снь є҃
І҆рмо́съ: Ѿ но́щи ᲂу҆́тренююща, чл҃вѣколю́бче просвѣтѝ, молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ сп҃се, твори́ти во́лю твою̀.
Ѻ҆́гнь гее́нскїй себѣ̀ разжего́хъ, дѣ́ѧ неподѡ́бнаѧ, и҆ гнѣ́въ бж҃їй лю́тѣ привлеко́хъ: помози́ ми чⷭ҇таѧ, и҆ не ѡ҆ста́ви менѐ.
Прегрѣше́нїй ѡ҆ставле́нїѧ просѧ̀ при́снѡ, дѣ́ѧти не престаю̀ пребеззакѡ́ннаѧ, и҆ тебѐ пречⷭ҇таѧ, ѡ҆горчева́ю: ѡ҆чище́нїе вѣ́рныхъ, ᲂу҆ще́дри мѧ̀.
Сла́ва: Є҆го́же ѿ твои́хъ крове́й родила̀ є҆сѝ чⷭ҇таѧ, соверше́нна человѣ́ка, и҆ бг҃а и҆́стинна і҆и҃са, ᲂу҆молѝ того̀ и҆зба́витисѧ на́мъ ѻ҆гнѧ̀ вѣ́чнагѡ.
И҆ ны́нѣ: Две́ре непроходи́маѧ, молю́сѧ, ѿве́рзи мѝ двє́ри покаѧ́нїѧ и҆́стиннагѡ, и҆ покажи́ ми стєзѝ покаѧ́нїѧ чⷭ҇таѧ, ꙗ҆́же всѣ́хъ наста́вница.
Пѣ́снь ѕ҃
І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.
Во́лны неподо́бныхъ помышле́нїй погрꙋжа́ютъ мѧ̀ ны́нѣ: но ты̀ влⷣчце, къ ти́хомꙋ приста́нищꙋ наста́ви покаѧ́нїѧ и҆́стиннагѡ твои́мъ милосе́рдїемъ.
Наде́ждꙋ и҆ стѣ́нꙋ неѡбори́мꙋю, и҆ предста́тельницꙋ тве́рдꙋ стѧжа́вше тѧ̀ ѻ҆трокови́це, и҆збавлѧ́емсѧ прегрѣше́нїй и҆ страсте́й лю́тыхъ, и҆ всѧ́кагѡ вре́да.
Сла́ва: Припа́даю тѝ чⷭ҇таѧ дв҃о, и҆ вопїю̀ съ пла́чемъ, бцⷣе: и҆зба́ви дꙋ́шꙋ мою̀ ѻ҆каѧ́ннꙋю бꙋ́дꙋщагѡ сꙋда̀, и҆ ѻ҆гнѧ̀ вѣ́чнагѡ.
И҆ ны́нѣ: Крѣ́пость ты̀ є҆сѝ пречи́стаѧ, немощны́хъ дꙋше́ю, твои́ми мольба́ми: тѣ́мже мѧ̀ ꙗ҆́кѡ болѧ́ща дꙋше́ю не пре́зри, но и҆сцѣлѝ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ ѕ҃:
За млⷭ҇рдїе щедрѡ́тъ хрⷭ҇тѐ, соше́лъ є҆сѝ на зе́млю, и҆ ѿ дв҃ы вопло́щьсѧ, всѧ̑ ѡ҆свѧти́лъ є҆сѝ, ꙗ҆́же ѿ землѝ, и҆ къ нб҃сѝ всѣ́хъ призва́лъ є҆сѝ. тѣ́мже ᲂу҆пова́юще на тѧ̀, никогда́же погрѣши́мъ, но и҆збавлѧ́емсѧ тобо́ю настоѧ́нїй: ты́ бо є҆сѝ сп҃съ на́шъ, созда́телю бж҃е на́шъ.
Пѣ́снь з҃
І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю: нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.
Є҆гда̀ дꙋша̀ ѻ҆каѧ́ннаѧ моѧ̀ ѿ тѣлесѐ стерпѣ́ти хо́щетъ разлꙋче́нїе, и҆ не бꙋ́детъ и҆збавлѧ́ѧй ю҆̀, и҆лѝ ᲂу҆тѣша́ѧй ю҆̀: тогда̀ влⷣчце предста́ни, и҆ и҆зба́ви мѧ̀ бѣсѡ́въ ѡ҆ѕлобле́нїѧ.
Припа́даю тѝ, и҆ приношꙋ̀ сле́зъ тє́плыѧ ка̑пли: вѣ́мъ твоѐ чл҃вѣколю́бное, вѣ́мъ долготерпѣ́нїе и҆ неѕло́бїе. ты́ мѧ ны́нѣ поми́лꙋй чⷭ҇таѧ, простѝ и҆ сп҃си́ мѧ.
Сла́ва: Поми́лꙋй дв҃о, стра́стнꙋю и҆ ѻ҆каѧ́ннꙋю мою̀ дꙋ́шꙋ, ви́ждь страсте́й смꙋще́нїе, ви́ждь и҆ разгорѣ́нїе пло́ти непостоѧ́нное: и҆ по́мощь да́ждь мѝ сп҃си́тельнꙋю, и҆ и҆збавле́нїе.
И҆ ны́нѣ: Ѻ҆ц҃ꙋ̀ є҆диносꙋ́щный, собезнача́льный сн҃ъ и҆ сло́во, пло́ть ѿ тебѐ прїѧ́тъ ра́внꙋ, ᲂу҆́мнꙋ, и҆ ѡ҆дꙋшевле́ннꙋ непрело́жнѡ, ꙗ҆́кѡ вѣ́сть са́мъ: и҆ є҆стество̀ на́ше ѡ҆бновѝ въ не́й лꙋ́чше, дв҃о чⷭ҇таѧ.
Пѣ́снь и҃
І҆рмо́съ: Є҆гѡ́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те, и҆ превозноси́те во всѧ̑ вѣ́ки.
Недоꙋмѣ́ю помышлѧ́ѧ дѣѧ̑нїѧ моѧ̑, и҆ трепе́щꙋ сꙋдїѝ стра́шнагѡ сꙋди́ща: кі́й ѿвѣ́тъ ѻ҆каѧ́нный принесꙋ̀ тогда̀: влⷣчце мі́ра, бꙋ́ди мѝ застꙋ́пница.
Не ѿве́ржи ᲂу҆́бѡ менѐ сама̀ влⷣчце, ѿ лица̀ твоегѡ̀, є҆гда̀ къ твоемꙋ̀ воззрю̀ ѡ҆́бразꙋ: но млⷭ҇тива бꙋ́ди мѝ, и҆ настоѧ́щагѡ премѣни́ мѧ ѡ҆сꙋжде́нїѧ.
Сла́ва: Невѣ́сто бж҃їѧ, мр҃і́е безневѣ́стнаѧ, ѿ всѧ́кагѡ лꙋка́вагѡ вре́да и҆зба́ви мѧ̀, вопїю̀ тѝ, твоего̀ раба̀: и҆ въ бꙋ́дꙋщей прѝ предста́ни мѝ, є҆ди́на хрⷭ҇тїа́нъ предста́тельнице.
И҆ ны́нѣ: Да человѣ́ки сн҃ъ тво́й влⷣчце, ѡ҆божи́тъ, ꙗ҆ви́сѧ и҆з̾ тебѐ соверше́нъ человѣ́къ: сего̀ ᲂу҆̀бо молѝ, соверше́ннѡ ѡ҆чи́щшасѧ показа́ти прича́стника мѧ̀ бж҃е́ственномꙋ є҆гѡ̀ црⷭ҇твїю.
Пѣ́снь ѳ҃
І҆рмо́съ: Є҆́же ра́дꙋйсѧ ѿ а҆́гг҃ла прїи́мшаѧ, и҆ ро́ждшаѧ созда́телѧ твоегѡ̀, дв҃о, сп҃си́ тѧ велича́ющыѧ.
Ты̀ є҆ди́на предста́тельнице человѣ́кѡвъ є҆сѝ пречⷭ҇таѧ, ты̀ є҆сѝ стѣна̀ хрⷭ҇тїа́нъ чⷭ҇таѧ, тѧ̀ ны́нѣ предлага́ю ко хрⷭ҇тꙋ̀ хода́таицꙋ ѡ҆ мнѣ̀ смире́нномъ, да твои́ми мл҃твами поми́лꙋетъ мѧ̀ ѻ҆каѧ́ннаго.
Но́щи дѣла̀ содѣ́лахъ, и҆ но́щь мꙋче́нїѧ хо́щетъ мѧ̀ ны́нѣ покры́ти пра́веднѡ сꙋ́етнаго, и҆ всѧ́ко томле́нїе прїѧ́ти а҆́дово: но ро́ждшаѧ сꙋдїю̀, и҆ бг҃а чⷭ҇таѧ дв҃о, и҆зба́ви мѧ̀ всѧ́кагѡ мꙋче́нїѧ.
Сла́ва: Вре́мѧ живота̀ моегѡ̀ во ѕлы́хъ и҆зжи́хъ, и҆ къ две́ремъ а҆́да прибли́жихсѧ, и҆ ве́сь не гото́въ и҆дꙋ̀ та́мѡ: помози́ ми бл҃га́ѧ. бцⷣе, на тѧ́ бо наде́ждꙋ возложи́хъ.
И҆ ны́нѣ: Бл҃голюби́ваѧ влⷣчце, а҆́гг҃лѡвъ ᲂу҆краше́нїе, мꙋ́ченикѡвъ сла́во, съ си́ми помоли́сѧ ѡ҆брѣстѝ на́мъ ми́лость, и҆ разрѣше́нїе долгѡ́въ, и҆ возмощѝ всѣ̑мъ до́брѣ жи́зни на́шеѧ тече́нїе сконча́ти, бж҃е́ствєннаѧ дѣ́ющымъ.
Та́же, Досто́йно є҆́сть: и҆ покло́нъ, и҆ Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
Въ сꙋббѡ́тꙋ ᲂу҆́тра,
по а҃-мъ стїхосло́вїи сѣда́льны мч҃нчны, гла́съ ѕ҃:
Свѣ́тъ пра́вєднымъ всегда̀ ты̀ гдⷭ҇и: ст҃і́и бо ѡ҆ тебѣ̀ просвѣти́вшесѧ, сїѧ́ютъ при́снѡ ꙗ҆́кѡ свѣти̑ла, свѣти́льникъ нечести́выхъ ᲂу҆гаси́вше: и҆́хже мл҃твами сп҃се на́шъ, ты̀ просвѣтѝ свѣти́льникъ мо́й, и҆ сп҃си́ мѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Страда́льческїй по́двигъ претерпѣ́вше ст҃і́и, и҆ по́чєсти побѣ̑дныѧ ѿ тебѐ прїѧ́ша, ᲂу҆праздни́ша помышлє́нїѧ беззако́нныхъ, и҆ прїѧ́ша вѣнцы̀ нетлѣ̑нныѧ. тѣ́ми бж҃е ᲂу҆моле́нъ быва́ѧ, да́рꙋй на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: И҆́же бл҃гослове́ннꙋю нарекі́й твою̀ мт҃рь, прише́лъ є҆сѝ на стрⷭ҇ть во́льнымъ хотѣ́нїемъ, возсїѧ́въ на крⷭ҇тѣ̀, взыска́ти хотѧ̀ а҆да́ма, глаго́лѧ а҆́гг҃лѡмъ: сра́дꙋйтесѧ мнѣ̀, ꙗ҆́кѡ ѡ҆брѣ́тесѧ поги́бшаѧ дра́хма. всѧ̑ мꙋ́дрѣ ᲂу҆стро́ивый бж҃е на́шъ, сла́ва тебѣ̀.
По в҃-мъ стїхосло́вїи сѣда́льны мч҃нчны, гла́съ ѕ҃:
Страда́льческое стоѧ́нїе въ по́двизѣ, и҆ мꙋчи́тєльскїѧ ра̑ны на мꙋ́ченицѣхъ: и҆ стоѧ́хꙋ ли́цы безпло́тныхъ, по́чєсти держа́ще побѣ̑дныѧ: ᲂу҆диви́ша мꙋ́дрїи мꙋчи́телей, и҆ царе́й премꙋ́дрїи: низложи́ша ѿстꙋ́пника и҆сповѣ́данїемъ хрⷭ҇то́вымъ. ᲂу҆крѣпи́вый и҆́хъ гдⷭ҇и, сла́ва тебѣ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Гдⷭ҇и, ст҃ы́хъ твои́хъ па́мѧть дне́сь показа́сѧ, ꙗ҆́кѡ ра́й, и҆́же во є҆де́мѣ, въ не́й бо ра́дꙋетсѧ всѧ̀ тва́рь: и҆ подае́ши на́мъ тѣ́хъ мольба́ми ми́ръ и҆ ве́лїю млⷭ҇ть.
Сті́хъ: Мнѡ́ги скѡ́рби првⷣнымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.
Ме́ртвенъ: Вои́стиннꙋ сꙋета̀ всѧ́чєскаѧ, житїе́ же сѣ́нь и҆ со́нъ: и҆́бо всꙋ́е мѧте́тсѧ всѧ́къ земноро́дный, ꙗ҆́коже речѐ писа́нїе: є҆гда̀ мі́ръ прїѡбрѧ́щемъ, тогда̀ во гро́бъ всели́мсѧ, и҆дѣ́же вкꙋ́пѣ ца́рїе и҆ ᲂу҆бо́зїи. тѣ́мже хрⷭ҇тѐ бж҃е, преста́влєнныѧ ᲂу҆поко́й: ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Ѿ се́рдца воздыха̑нїѧ и҆ ѿ ᲂу҆тро́бы приношꙋ́ ти, твоѐ всенепоро́чнаѧ, молю̀ бл҃гопремѣни́тельное застꙋпле́нїе: поми́лꙋй всестра́стнꙋю мою̀ дꙋ́шꙋ, ᲂу҆молѝ многомлⷭ҇тиваго бг҃а и҆зба́вити мѧ̀ сꙋда̀, и҆ є҆́зера ѻ҆́гненнагѡ, є҆ди́на бл҃гослове́ннаѧ.
Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ, и҆ ᲂу҆со́пшымъ: творе́нїе і҆ѡ́сифово, гла́съ ѕ҃:
Пѣ́снь а҃
І҆рмо́съ: Чꙋ́вственный фараѡ́нъ потопле́нъ бы́сть со всево́инствомъ, і҆и҃ль же проше́дъ посредѣ̀ мо́рѧ, вопїѧ́ше: гдⷭ҇еви бг҃ꙋ на́шемꙋ пои́мъ, ꙗ҆́кѡ просла́висѧ.
Свѣ́тлымъ ᲂу҆мо́мъ тє́мныѧ ѡ҆свѣти́вше, ѕлочести̑выѧ же мꙋчи́тели мч҃нцы посрами́вше, побѣдоно́сцы бы́ша ꙗ҆́вѣ, и҆ къ невече́рнемꙋ свѣ́тꙋ преидо́ша.
Ст҃и́телїе хрⷭ҇тѡ́вы, и҆ прпⷣбныхъ ли́къ, и҆ прⷪ҇рѡ́къ, и҆ првⷣныхъ всѣ́хъ є҆ди́нственное торжество̀, добродѣ́тельными красота́ми блиста́ющесѧ, внидо́ша къ нбⷭ҇нымъ селе́нїємъ.
Же́нъ всѧ́ко мно́жество присво́ившесѧ хрⷭ҇то́ви, є҆́ѵꙋ лю́тымъ прельще́нїемъ ᲂу҆мори́вшаго попра́ша трꙋды̀ мꙋ́жескими, ᲂу҆бл҃жа́ютсѧ бж҃е́ственными пѣ́сньми.
Сла́ва, поко́инъ: И҆́же ѿ землѝ въ нача́лѣ созда́въ человѣ́ка хрⷭ҇тѐ, дꙋ́шы твои́хъ ра̑бъ ᲂу҆поко́й, мо́лимсѧ, во ѻ҆би́телехъ пра́ведныхъ и҆ въ мѣ́стѣхъ ѡ҆слабле́нїѧ, ꙗ҆́кѡ пребл҃гъ.
И҆ ны́нѣ, бг҃оро́диченъ: Сщ҃е́ннѣйши чⷭ҇таѧ херꙋві̑мъ, и҆ серафі̑мъ, ꙗ҆ви́ласѧ є҆сѝ ро́ждши творца̀ тва́ри. є҆го́же непреста́ннѡ молѝ, ᲂу҆ще́дрити рабы̑ твоѧ̑ тебѐ сла́вѧщыѧ.
Дрꙋгі́й канѡ́нъ ᲂу҆со́пшымъ, пое́мъ є҆го̀ на рѧдꙋ̀, и҆дѣ́же нѣ́сть мине́и: творе́нїе ѳеофа́ново.
І҆рмо́съ: Ꙗ҆́кѡ по сꙋ́хꙋ:
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Въ нбⷭ҇ныхъ черто́зѣхъ, всегда̀ до́блїи мч҃нцы мо́лѧтъ тѧ̀ хрⷭ҇тѐ: и҆̀хже ѿ землѝ преста́вилъ є҆сѝ вѣ̑рныѧ, вѣ́чныхъ бла̑гъ полꙋчи́ти сподо́би.
Сті́хъ: Поко́й гдⷭ҇и, дꙋ́шы ра̑бъ твои́хъ.
Оу҆краси́вый всѧ́чєскаѧ, живо́тное смѣше́нное мѧ̀ человѣ́ка, посредѣ̀ смире́нїѧ же вкꙋ́пѣ и҆ вели́чества созда́лъ є҆сѝ: тѣ́мже ра̑бъ твои́хъ дꙋ́шы сп҃се, ᲂу҆поко́й.
Сла́ва: Раѧ̀ жи́телѧ, и҆ дѣ́лателѧ въ нача́лѣ мѧ̀ ᲂу҆чини́лъ є҆сѝ: престꙋпи́вша же твою̀ за́повѣдь и҆зри́нꙋлъ є҆сѝ. тѣ́мже рабѡ́въ твои́хъ дꙋ́шы сп҃се, ᲂу҆поко́й.
И҆ ны́нѣ, бг҃оро́диченъ: И҆́же ѿ ребра̀ созда́вый є҆́ѵꙋ пе́рвѣе на́шꙋ прама́терь, и҆з̾ пречⷭ҇тагѡ твоегѡ̀ чре́ва въ пло́ть ѡ҆дѣва́етсѧ: є҆́юже сме́рти крѣ́пость чⷭ҇таѧ, разрꙋши́лъ є҆́сть.
Пѣ́снь г҃
І҆рмо́съ: На тве́рдѣмъ вѣ́ры твоеѧ̀ ка́мени помышле́нїе ᲂу҆тверди́въ дꙋшѝ моеѧ̀, ᲂу҆твердѝ гдⷭ҇и: тѧ́ бо и҆́мамъ бл҃же, прибѣ́жище и҆ ᲂу҆твержде́нїе.
Тѣлє́снымъ примѣси́вшесѧ болѣ́знемъ страда́льцы, на неболѣ́зненное взира́хꙋ воздаѧ́нїе ра́дꙋющесѧ: и҆ ны́нѣ ᲂу҆толѧ́етъ на́шѧ болѣ̑зни мнѡ́гїѧ бл҃года́тїю.
Ра́зꙋмомъ тве́рдымъ ѿгонѧ́юще ѕвѣ́ри лꙋка̑выѧ, бж҃е́ственнїи ст҃и́телїе, и҆зба́виша неврежде́нны ѿ ѕло́бъ тѣ́хъ, хрⷭ҇тѡ́ва бж҃е́ствєннаѧ воспита̑нїѧ.
Во́лею и҆́гꙋ гдⷭ҇ню подвозше́дый ли́къ прпⷣбныхъ, ᲂу҆мертви́въ мꙋдрова́нїе плотско́е, и҆ живо́тъ вѣ́чный воспрїѧ́тъ.
Сла́ва: И҆зба́ви хрⷭ҇тѐ ѻ҆гнѧ̀ вѣ́чнагѡ, бл҃гоче́стно ѿ житїѧ̀ преста́вльшыѧсѧ, и҆ ѡ҆ставле́нїе да́ждь долгѡ́въ и҆́хъ бл҃же, и҆ вѣ́чное наслажде́нїе.
И҆ ны́нѣ: Ꙗ҆̀же хрⷭ҇та̀ возлюби́вшыѧ жєны̀, тебѐ того̀ неизрече́ннѡ ро́ждшꙋю, всест҃а́ѧ влⷣчце, ра́достною мы́слїю ѡ҆бстоѧ́ще ликовствꙋ́ютъ.
И҆́нъ І҆рмо́съ: Нѣ́сть ст҃ъ ꙗ҆́коже ты̀:
Зако́ннѡ пострада́вше твоѝ мч҃нцы жизнода́вче, и҆ вѣнцы̀ побѣ́ды ᲂу҆краси́вшесѧ ѿ тебѐ, прилѣ́жнѡ преста́вльшымсѧ вѣ̑рнымъ вѣ́чное хода́тайствꙋютъ поче́стїе.
Наказа́въ пре́жде мно́гими чꙋдесы̀ и҆ зна́меньми менѐ заблꙋ́ждшаго, напослѣ́докъ самого̀ себѐ и҆стощи́лъ є҆сѝ, ꙗ҆́кѡ сострада́теленъ: и҆ поиска́въ ѡ҆брѣ́лъ, и҆ сп҃слъ є҆сѝ.
Сла́ва: Ѿ текꙋ́щагѡ непостоѧ́тельныѧ тлѝ, къ тебѣ̀ прише́дшыѧ, въ селе́нїихъ вѣ́чныхъ всели́тисѧ ра́достнѡ сподо́би бл҃же, ѡ҆правда́въ вѣ́рою же и҆ бл҃года́тїю.
И҆ ны́нѣ: Нѣ́сть непоро́чны, ꙗ҆́коже ты̀ пречⷭ҇таѧ бг҃ома́ти: є҆ди́на бо ѿ вѣ́ка и҆́стиннаго бг҃а зачала̀ є҆сѝ во чре́вѣ сме́рти разрꙋши́вшаго си́лꙋ.
Пѣ́снь д҃
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ: сла́ва си́лѣ твое́й гдⷭ҇и.
Стоѧ́ще зрѧ́хꙋ го́рдаго стрⷭ҇тоте́рпцы, пред̾ нога́ми и҆́хъ попира́ема: и҆ всѧ́ческихъ зижди́телѧ бл҃года́рственнѡ сла́влѧхꙋ.
Глагѡ́лъ свѣтлостьмѝ ст҃и́телїе воѡрꙋжи́вшесѧ, къ свѣ́тꙋ разꙋмѣ́нїѧ, человѣ́ки ѿ тьмы̀ є҆ресе́й сп҃со́ша.
Ꙗ҆́кѡ ᲂу҆́глїе ꙗ҆ви́шасѧ, къ бг҃ꙋ те́плымъ разꙋмѣ́нїемъ, и҆ стра̑сти попали́вше веще́ствєнныѧ преподо́бнїи, вельмѝ прославлѧ́ютсѧ.
Сла́ва: Живы́ми ты̀ гдⷭ҇и, и҆ ме́ртвыми ѡ҆блада́ѧ, и҆̀хже преста́вилъ є҆сѝ. ᲂу҆поко́й со всѣ́ми бл҃гоꙋгоди́вшими тебѣ̀ влⷣко.
И҆ ны́нѣ: Гдⷭ҇ь, пречⷭ҇таѧ, и҆з̾ тебѐ неизрече́ннѡ въ пло́ть ѡ҆блекі́йсѧ, же́нъ сосло́вїе мꙋ́жественнѣ подвиза́вшихсѧ прїѧ́тъ.
И҆́нъ І҆рмо́съ: Хрⷭ҇то́съ моѧ̀ си́ла:
Премꙋ́дрости бо́льшее ꙗ҆влѧ́ѧ позна́нїе, и҆ ѡ҆ дарѣ́хъ многосоверше́ннꙋю влⷣко, бл҃госты́ню, мч҃ничєскїѧ ли́ки а҆́гг҃лѡмъ сочета́лъ є҆сѝ.
Пречⷭ҇тꙋю сла́вꙋ твою̀ полꙋчи́ти сподо́би къ тебѣ̀ преста́влєннымъ, и҆дѣ́же хрⷭ҇тѐ, веселѧ́щихсѧ є҆́сть жили́ще, и҆ гла́съ чи́стагѡ ра́дованїѧ.
Сла́ва: Пою́щыѧ прїимѝ бж҃е́ственною держа́вою твое́ю, и҆̀хже ѿ землѝ прїѧ́тъ, ча̑да свѣ́тꙋ тѣ́хъ содѣ́лавъ, грѣхо́внꙋю мглꙋ̀ ѡ҆чища́ѧ многомлⷭ҇тиве.
И҆ ны́нѣ: Прїѧ́телище пречⷭ҇тое, цр҃ковь непоро́чнꙋю, ковче́гъ всесвѧ́тъ, дв҃ственное мѣ́сто сщ҃е́нїѧ, тебѐ добро́тꙋ і҆а́кѡвлю влⷣка и҆збра́лъ є҆́сть.
Пѣ́снь є҃
І҆рмо́съ: Свѣ́тъ возсїѧ́вый мі́рꙋ хрⷭ҇тѐ, просвѣтѝ се́рдце моѐ ѿ но́щи тебѣ̀ зовꙋ́ща, и҆ сп҃си́ мѧ.
И҆стка́нꙋю ѿ вы́шнїѧ бл҃года́ти, ѡ҆бле́кшесѧ во ѻ҆де́ждꙋ, страда́льцы, врага̀ ѡ҆бнажи́сте.
Со ст҃ы́ми прⷪ҇ро́ки почти́мъ первосщ҃е́нники бг҃омꙋ̑дрыѧ, и҆ преподѡ́бныѧ бг҃ꙋ бл҃гоꙋгоди́вшыѧ.
Во ѱалмѣ́хъ и҆ пѣ́снехъ восхва́лимъ же́нъ сосло́вїе: ꙗ҆́кѡ бг҃ꙋ до́брѣ ᲂу҆годи́вшыѧ.
Сла́ва: Въ селе́нїихъ пра́ведныхъ твои́хъ гдⷭ҇и, твоѧ̑ рабы̑ ᲂу҆чинѝ, презира́ѧ тѣ́хъ, ꙗ҆̀же въ житїѝ согрѣшє́нїѧ.
И҆ ны́нѣ: И҆збавлѧ́ющи на́съ всѧ́кагѡ вра́жїѧ вре́да, ꙗ҆ви́ласѧ є҆сѝ влⷣчце, молѧ́щи хрⷭ҇та̀ є҆ди́наго бл҃гоꙋтро́бнаго.
И҆́нъ І҆рмо́съ: Бж҃їимъ свѣ́томъ твои́мъ:
Ꙗ҆́кѡ всепло́дїе сщ҃е́нное, и҆ ꙗ҆́кѡ нача́токъ человѣ́ческагѡ є҆стества̀ мч҃нцы, просла́вленномꙋ прине́сшесѧ бг҃ꙋ, на́мъ сп҃се́нїе при́снѡ хода́тайствꙋютъ.
Нбⷭ҇нагѡ пребыва́нїѧ, и҆ раздаѧ́нїѧ дарова́нїй сподо́би гдⷭ҇и, пре́жде ᲂу҆со́пшыѧ вѣ̑рныѧ рабы̑ твоѧ̑, подаѧ̀ прегрѣше́нїй и҆збавле́нїе.
Сла́ва: И҆́же є҆ди́нъ є҆стество́мъ животво́рецъ, и҆́же бл҃гости вои́стиннꙋ неизслѣ́димаѧ пꙋчи́на, сконча́вшыѧсѧ црⷭ҇твїѧ твоегѡ̀ сподо́би ще́дре, є҆ди́не безсме́ртне.
И҆ ны́нѣ: Крѣ́пость и҆ пѣ́нїе, и҆́же и҆з̾ тебѐ влⷣчце мі́рꙋ рожде́йсѧ, и҆ сп҃се́нїе бы́сть поги́бшымъ, и҆́же ѿ а҆́довыхъ вра́тъ и҆збавлѧ́ѧ вѣ́рою тебѐ бл҃жа́щыѧ.
Пѣ́снь ѕ҃
І҆рмо́съ: Ки́томъ пожре́нъ грѣхо́внымъ, вопїю̀ тебѣ̀ хрⷭ҇тѐ: ꙗ҆́кѡ прⷪ҇ро́ка и҆з̾ и҆стлѣ́нїѧ мѧ̀ свободѝ.
Крове́й бж҃е́ственныхъ тече́нїемъ мы́слєнныѧ врагѝ погрꙋзи́сте: вѣ́рныхъ же сердца̀ стрⷭ҇тоте́рпцы напои́сте.
Распе́нше себѐ мі́рꙋ и҆ стрⷭ҇те́мъ, прпⷣбнїи, и҆ премꙋ́дрїи ст҃и́телїе, бж҃е́ственныѧ сла́вы сподо́бистесѧ.
Прⷪ҇ро́кѡвъ ли́къ, и҆ чⷭ҇тны́хъ же́нъ собо́ръ, до́брѣ подвиза́вшихсѧ по до́лгꙋ ᲂу҆бл҃жа́емъ.
Сла́ва: Поко́й бж҃е, преждеꙋсо́пшихъ дꙋ́шы со и҆збра́нными твои́ми, презира́ѧ тѣ́хъ прегрѣшє́нїѧ.
И҆ ны́нѣ: пло́тїю роди́вшаѧ хрⷭ҇та̀, пло́ти моеѧ̀ стра̑сти ᲂу҆мертвѝ, и҆ ѡ҆живѝ дв҃о, дꙋ́шꙋ мою̀ хода́тайствомъ твои́мъ.
И҆́нъ І҆рмо́съ: Жите́йское мо́ре:
На крⷭ҇тѣ̀ пригвожда́емь, мч҃нчєскїѧ ли́ки къ себѣ̀ собра́лъ є҆сѝ, подо́бѧщыѧсѧ стрⷭ҇ти твое́й бл҃же. тѣ́мже тѧ̀ мо́лимъ: къ тебѣ̀ преста́влєнныѧ ᲂу҆поко́й.
Неизрече́нною сла́вою твое́ю, є҆гда̀ прїи́деши стра́шнѡ сꙋди́ти мі́рꙋ всемꙋ̀ на ѻ҆́блацѣхъ, бл҃говолѝ и҆зба́вителю, свѣ́тлѡ срѣ́сти тебѐ, ꙗ҆̀же ѿ землѝ прїѧ́лъ є҆сѝ вѣ̑рныѧ рабы̑ твоѧ̑.
Сла́ва: И҆сто́чникъ жи́зни сы́й влⷣко, въ мꙋ́жествѣ бж҃е́ственнѣмъ, ѡ҆кова̑нныѧ и҆зводѧ̀ рабы̑ твоѧ̑ ꙗ҆̀же къ тебѣ̀ вѣ́рнѡ ѿше́дшыѧ, въ пи́щи ра́йстѣй вселѝ.
И҆ ны́нѣ: Въ зе́млю возврати́хомсѧ, престꙋпи́вше бж҃їю за́повѣдь: тебе́ же ра́ди дв҃о, на нб҃са̀ ѿ землѝ вознесо́хомсѧ, тлю̀ сме́ртнꙋю ѿтрѧ́сше.
Пѣ́снь з҃
І҆рмо́съ: Прпⷣбныхъ твои́хъ ѻ҆трокѡ́въ пѣ́снь ᲂу҆слы́шавый и҆ пе́щь горѧ́щꙋю ѡ҆роси́вый, бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Хрⷭ҇тѡ́вы стрⷭ҇тоте́рпцы, ᲂу҆гаси́вшыѧ пла́мень лю́тагѡ безбо́жїѧ тꙋ́чами крове́й, пѣ́сньми почти́мъ.
Бл҃госла́внїи і҆ера́рси, зи́мꙋ є҆ресе́й разрꙋши́вше, и҆ къ веснѣ̀ бж҃е́ственнѣй ра́дꙋющесѧ прїидо́ша.
Терпѣ́нїемъ бога́тꙋю дх҃а бл҃года́ть наслѣ́довасте пѡ́стницы, и҆ мно́жество бѣсѡ́въ погꙋби́сте.
Сла́ва: Раѧ̀ пи́щи твоеѧ̀ наслѣ́довати сподо́би ще́дре, вѣ́рою преста́влєнныѧ ѿ житїѧ̀, многомлⷭ҇тиве.
И҆ ны́нѣ: И҆́же тебѐ дв҃ꙋ показа́вый чⷭ҇таѧ и҆ по ржⷭ҇твѣ̀, ст҃ы́хъ же́нъ ли́ки тебѣ̀ наслѣ́довавшыѧ сп҃слъ є҆́сть.
И҆́нъ І҆рмо́съ: Росода́тельнꙋ ᲂу҆́бѡ пе́щь:
И҆зба́вльшїисѧ твое́ю кро́вїю мч҃нцы, пе́рвагѡ престꙋпле́нїѧ, ѡ҆кропи́вшесѧ же свое́ю кро́вїю, проѡбразꙋ́ютъ ꙗ҆́вѣ твоѐ заколе́нїе, бл҃гослове́нъ є҆сѝ бж҃е ѻ҆тє́цъ на́шихъ.
Свирѣ́пѣющꙋю сме́рть ᲂу҆мертви́лъ є҆сѝ, сло́ве живонача́льнѣйшїй, въ вѣ́рѣ же твое́й ᲂу҆со́пшыѧ прїимѝ тебѐ пою́щыѧ хрⷭ҇тѐ, и҆ глаго́лющыѧ: бл҃гослове́нъ бг҃ъ ѻ҆тє́цъ на́шихъ.
Сла́ва: Воѡдꙋши́въ мѧ̀ человѣ́ка вдохнове́нїемъ бж҃е́ственнымъ бг҃онача́льнѣйшїй влⷣко, преста́влєнныѧ црⷭ҇твїѧ твоегѡ̀ сподо́би, пѣ́ти тебѐ сп҃сѐ: бл҃гослове́нъ бг҃ъ ѻ҆тє́цъ на́шихъ.
И҆ ны́нѣ: Превы́шши всѣ́хъ тва́рей, пренепоро́чнаѧ была̀ є҆сѝ, заче́нши бг҃а сокрꙋши́вшаго смє́ртнаѧ врата̀, и҆ верєѝ сте́ршаго. тѣ́мже тѧ̀ чⷭ҇таѧ, пѣсносло́вимъ вѣ́рнїи, ꙗ҆́кѡ бг҃омт҃рь.
Пѣ́снь и҃
І҆рмо́съ: Прпⷣбнїи твоѝ ѻ҆́троцы въ пещѝ херꙋві́мы подража́хꙋ, трист҃ꙋ́ю пѣ́снь воспѣва́юще, бл҃гослови́те, по́йте, и҆ превозноси́те во всѧ̑ вѣ́ки.
До́блественнѣ мꙋче́нїй треволне́нїемъ ᲂу҆ранѧ́еми, бж҃е́ственнїи мч҃нцы, бл҃года́тїю проше́дше въ тишинꙋ̀ глꙋбо́кꙋю, вы́шнѧгѡ црⷭ҇твїѧ достиго́ша.
Прпⷣбнїи, всемꙋ́дрїи ст҃и́телїе, просїѧ́вше ꙗ҆́кѡ сл҃нце, просвѣща́ютъ вселе́ннꙋю ᲂу҆че́нїй лꙋча́ми, и҆ и҆сцѣле́нїй свѣтлостьмѝ.
Сла́внїи прⷪ҇ро́цы, и҆ первосщ҃е́нницы, прпⷣбнїи всѝ, и҆ пра́веднїи, мч҃нкъ мно́жєства, и҆ же́нъ, ста́до ва́ше всѐ сохрани́те ѿ бѣсѡ́въ непоколеби́мо.
Сла́ва: Воспое́мъ ꙗ҆̀же ѿ вѣ́ка првⷣныѧ, и҆ бг҃оглагѡ́ливыѧ прⷪ҇ро́ки, и҆ возопїе́мъ со ᲂу҆миле́нїемъ: тѣ́хъ сло́ве, мл҃твами въ вѣ́рѣ ᲂу҆со́пшыѧ ᲂу҆поко́й.
И҆ ны́нѣ: Всю́ тѧ бли́жнюю добро́тꙋ бг҃а дв҃о, ли́къ же́нскїй возлюбѝ, и҆ во слѣ́дъ тебѐ приведо́шасѧ влⷣцѣ всѣ́хъ, согла́снѡ бл҃жа́ще тѧ̀ пречⷭ҇таѧ.
И҆́нъ І҆рмо́съ: И҆з̾ пла́мене прпⷣбнымъ:
Крѣ́пкѡ по́двиги показꙋ́юще, побѣ́ды вѣнцы̀ прїѧ́сте, мч҃нцы стрⷭ҇тоте́рпцы, хрⷭ҇то́ви зовꙋ́ще: тѧ̀ превозно́симъ гдⷭ҇а во вѣ́ки.
Сщ҃е́ннѡ вѣ̑рныѧ житє́йскаѧ ѡ҆ста́вльшыѧ, и҆ къ тебѣ̀ влⷣцѣ ѿлꙋчи́вшыѧсѧ прїимѝ кро́ткѡ, и҆ ᲂу҆поко́й, ꙗ҆́кѡ млⷭ҇рдъ, тѧ̀ превозносѧ́щихъ гдⷭ҇а во вѣ́ки.
Сла́ва: Ны́нѣ въ землѝ кро́ткихъ, всѣ̑мъ водворѧ́тисѧ пре́жде ᲂу҆со́пшымъ сп҃се, бл҃говолѝ, вѣ́рою твое́ю ѡ҆правда́въ и҆ бл҃года́тїю, тѧ̀ превозносѧ́щихъ гдⷭ҇а во вѣ́ки.
И҆ ны́нѣ: Бл҃жи́мъ тѧ̀ всѝ пребл҃же́ннаѧ, ꙗ҆́кѡ сло́во вои́стиннꙋ сꙋ́щее бл҃же́нное ро́ждшꙋю, пло́ть бы́вшее на́съ ра́ди. є҆го́же превозно́симъ во всѧ̑ вѣ́ки.
Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ про́чыѧ стїхѝ съ припѣ́вы.
Пѣ́снь ѳ҃
І҆рмо́съ: Є҆́же ра́дꙋйсѧ, ѿ а҆́гг҃ла прїи́мшаѧ, и҆ ро́ждшаѧ созда́телѧ твоего̀, дв҃о, сп҃си́ тѧ велича́ющыѧ.
Ѻ҆вча́та чⷭ҇таѧ приведо́стесѧ ко влⷣцѣ стрⷭ҇тоте́рпцы мч҃нцы, того̀ моли́те сп҃стѝ дꙋ́шы на́шѧ.
Ꙗ҆́кѡ па́стырїе на ѕла́цѣ бл҃гоче́стїѧ ст҃и́телїе, вѣ̑рныѧ ᲂу҆пасо́сте, и҆ ны́нѣ во ѻ҆гра́дꙋ бж҃е́ственнꙋю всели́стесѧ.
Со ст҃ы́ми ст҃и́тели, и҆ прⷪ҇ро́ки, и҆ со жена́ми крѣ́пкѡ пострада́вшими, и҆ прпⷣбныхъ ли́ки да ᲂу҆бл҃жи́мъ.
Сла́ва: Є҆мꙋ́же причаща́ютсѧ весе́лїю присносꙋ́щномꙋ ст҃ы́хъ собо́ри, сподо́би преста́вленныхъ ᲂу҆лꙋчи́ти многомлⷭ҇тиве.
И҆ ны́нѣ: Свѣ́тъ ро́ждшаѧ дв҃о, просвѣтѝ дꙋ́шꙋ мою̀, тьмꙋ̀ ѿгонѧ́ющи грѣха̀ и҆ лѣ́ности моеѧ̀.
И҆́нъ І҆рмо́съ: Бг҃а человѣ́кѡмъ:
Наде́жда мч҃нкѡвъ ли́ки ᲂу҆крѣпѝ, и҆ къ твое́й любвѝ распале́нїемъ вперѝ, бꙋ́дꙋщїй си̑мъ предвоѡбрази́вше непоколеби́мый вои́стиннꙋ поко́й: є҆гѡ́же преста́влєнныѧ бл҃же, вѣ̑рныѧ сподо́би.
Свѣ́тлое твоѐ хрⷭ҇тѐ, и҆ бж҃е́ственное ᲂу҆лꙋчи́ти сїѧ́нїе вѣ́рою преста́влєннымъ бл҃говолѝ, и҆́же въ ло́нѣхъ а҆враа́мовѣхъ поко́й, ꙗ҆́кѡ є҆ди́нъ млⷭ҇тивъ тѣ̑мъ да́рꙋѧ, и҆ вѣ́чнагѡ сподоблѧ́ѧ бл҃же́нства.
Сла́ва: И҆́же сы́й є҆стество́мъ бл҃гъ и҆ млⷭ҇рдъ, и҆ хоти́тель млⷭ҇тей, и҆ бл҃гоꙋтро́бїѧ пꙋчи́на, и҆̀хже ѿ мѣ́ста сегѡ̀ ѡ҆ѕлобле́нїѧ, и҆ сѣ́ни сме́ртныѧ преста́вилъ є҆сѝ, и҆дѣ́же сїѧ́етъ тво́й свѣ́тъ, сп҃се тѣ́хъ ᲂу҆чинѝ.
И҆ ны́нѣ: Сѣ́нь ст҃ꙋ́ю чⷭ҇таѧ, вѣ́мы тѧ̀, и҆ ковче́гъ, и҆ скрижа̑ли, зако́на и҆ бл҃года́ти: тебе́ бо ра́ди ѡ҆ставле́нїе дарова́сѧ, ѡ҆правда̑нымъ кро́вїю воплоще́ннагѡ и҆з̾ твоегѡ̀ чре́ва, всенепоро́чнаѧ.
Та́же, Досто́йно є҆́сть: Є҆ктенїа̀, и҆ свѣти́ленъ, и҆ ѱалмы̀ ѻ҆бы̑чныѧ.
На хвали́техъ стїхи̑ры мч҃нчны, гла́съ ѕ҃:
Гдⷭ҇и, въ па́мѧть ст҃ы́хъ твои́хъ, всѧ̀ тва́рь пра́зднꙋетъ, нб҃са̀ ра́дꙋютсѧ со а҆́гг҃лы, и҆ землѧ̀ весели́тсѧ съ человѣ́ки. тѣ́хъ мл҃твами поми́лꙋй на́съ.
Гдⷭ҇и, а҆́ще не бы́хомъ ст҃ы̑ѧ твоѧ̑ и҆мѣ́ли мл҃твенники, и҆ бл҃госты́ню твою̀ ми́лꙋющꙋю на́съ: ка́кѡ смѣ́ли бы́хомъ сп҃се, пѣ́ти тѧ̀, є҆го́же славосло́вѧтъ непреста́ннѡ а҆́гг҃ли; сердцевѣ́дче, пощадѝ дꙋ́шы на́шѧ.
Па́мѧть мч҃нкъ, ра́дость боѧ́щымсѧ гдⷭ҇а: пострада́вше бо хрⷭ҇та̀ ра́ди, вѣнцы̀ ѿ негѡ̀ прїѧ́ша: и҆ ны́нѣ со дерзнове́нїемъ мо́лѧтсѧ ѡ҆ дꙋша́хъ на́шихъ.
И҆збра̑нныѧ ᲂу҆дивѝ свѧты̑ѧ бг҃ъ на́шъ, ра́дꙋйтесѧ и҆ весели́тесѧ всѝ рабѝ є҆гѡ̀, ва́мъ бо ᲂу҆гото́валъ є҆́сть вѣнцы̀ и҆ црⷭ҇твїе своѐ: но мо́лимъ вы̀, и҆ на́съ не забꙋ́дите.
Ме́ртвенъ: Болѣ́знь а҆да́мꙋ бы́сть, дре́ва вкꙋше́нїе дре́вле во є҆де́мѣ, є҆гда̀ ѕмі́й ꙗ҆́дъ ѿры́гнꙋ: тогѡ́ бо ра́ди вни́де сме́рть всеро́днаѧ снѣда́ющи человѣ́ка. но прише́дъ влⷣка, низложѝ ѕмі́ѧ, и҆ воскрⷭ҇нїе на́мъ дарова̀. къ немꙋ́же ᲂу҆́бѡ возопїи́мъ: пощадѝ сп҃се, и҆ и҆̀хже прїѧ́лъ є҆сѝ, со ст҃ы́ми ᲂу҆поко́й, ꙗ҆́кѡ чл҃вѣколю́бецъ.
Сла́ва, и҆ ны́нѣ, бг҃оро́диченъ: Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о: того̀ молѝ ѡ҆ сп҃се́нїи дꙋ́шъ на́шихъ.
На стїхо́внѣ стїхи̑ры поко́йны, гла́съ ѕ҃:
Подо́бенъ: Всю̀ ѿложи́вше:
И҆мѣ́ѧй непостижи́мое є҆́же ѡ҆ на́съ бл҃гоꙋтро́бїе, и҆ и҆сто́чникъ неистощи́мый бж҃е́ственныѧ бл҃гости, многомлⷭ҇тиве, и҆̀же къ тебѣ̀ влⷣко, преше́дшыѧ, на землѝ живы́хъ вселѝ, въ селє́нїѧ возлю́блєннаѧ и҆ жела́ємаѧ, ѡ҆держа́нїе да́рꙋѧ, всегда̀ пребыва́ющее. ты́ бо за всѣ́хъ пролїѧ́лъ є҆сѝ кро́вь твою̀ сп҃се, и҆ живоно́сною цѣно́ю мі́ръ и҆скꙋпи́лъ є҆сѝ.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Оу҆мерщвле́нїе претерпѣ́лъ є҆сѝ животворѧ́щее во́лею и҆ живо́тъ и҆сточи́лъ є҆сѝ, и҆ пи́щꙋ присносꙋ́щнꙋю вѣ̑рнымъ да́лъ є҆сѝ, въ не́йже ᲂу҆чинѝ ᲂу҆со́пшыѧ ѡ҆ ᲂу҆пова́нїи воскрⷭ҇нїѧ, тѣ́хъ согрѣшє́нїѧ всѧ̑ проща́ѧ бл҃года́тїю ꙗ҆́кѡ є҆ди́нъ безгрѣ́шенъ, и҆ є҆ди́нъ бл҃гъ и҆ чл҃вѣколю́бецъ: да всѣ́ми пое́тсѧ твоѐ и҆́мѧ хрⷭ҇тѐ, сп҃си́тельное сла́вимъ чл҃вѣколю́бїе твоѐ.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Живы́ми гдⷭ҇ьствꙋюща, бг҃онача́льною вла́стїю, и҆ ме́ртвыми влⷣчествꙋюща, тебѐ хрⷭ҇тѐ, зна́юще мо́лимсѧ, вѣ̑рныѧ рабы̑ твоѧ̑, къ тебѣ̀ є҆ди́номꙋ бл҃года́телю ѿше́дшыѧ, тѣ́хъ ᲂу҆поко́й со и҆збра́нными твои́ми чл҃вѣколю́бче, на мѣ́стѣ ᲂу҆тѣше́нїѧ, во ст҃ы́хъ свѣ́тлостехъ: воли́тель бо млⷭ҇ти є҆сѝ, и҆ сп҃са́еши ꙗ҆́кѡ бг҃ъ, и҆̀хже по ѡ҆́бразꙋ твоемꙋ̀ созда́лъ є҆сѝ, є҆ди́не многомлⷭ҇тиве.
Сла́ва, и҆ ны́нѣ, бг҃оро́диченъ: Ꙗ҆ви́ласѧ є҆сѝ пребыва́лище бг҃олѣ́пно пречⷭ҇таѧ: бг҃а бо вмѣсти́ла є҆сѝ, и҆ хрⷭ҇та̀ родила̀ є҆сѝ, неискꙋсобра́чнаѧ мт҃и дв҃о, во двою̀ сꙋщєствꙋ̀, во є҆ди́ной же ѵ҆поста́си. того̀ ᲂу҆молѝ чⷭ҇таѧ, є҆диноро́днаго пе́рвенца, тѧ̀ дв҃ꙋ непоро́чнꙋю, и҆ по ржⷭ҇твѣ̀ сохра́ншаго, дꙋ́шы ᲂу҆поко́ити вѣ́рою ᲂу҆со́пшихъ во свѣ́тѣ, и҆ въ нетлѣ́ннѣмъ бл҃же́нствѣ.
Та́же, Бл҃го є҆́сть: и҆ Трист҃о́е. По Ѻ҆́ч҃е на́шъ: тропа́рь, и҆ є҆ктенїа̀, и҆ ѿпꙋ́стъ, и҆ ча́съ пе́рвый, ѱалмы̀ ѻ҆бы̑чныѧ, и҆ коне́чный ѿпꙋ́стъ.
Въ сꙋббѡ́тꙋ бл҃жє́нны, гла́съ ѕ҃:
Помѧни́ мѧ бж҃е сп҃се мо́й, є҆гда̀ прїи́деши во црⷭ҇твїи твое́мъ: и҆ сп҃си́ мѧ, ꙗ҆́кѡ є҆ди́нъ чл҃вѣколю́бецъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Ѻ҆гнѧ̀ и҆ меча̀, и҆ ѕвѣре́й ди́вїихъ ᲂу҆стремле́нїѧ свирѣ́пагѡ, стрⷭ҇тоте́рпцы сла́внїи не ᲂу҆боѧ́вшесѧ, присносꙋ́щнагѡ живота̀ сподо́бистесѧ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
И҆́же прⷪ҇ро́ки и҆ ᲂу҆чи́тели, и҆ прпⷣбныѧ и҆ првⷣныѧ просла́вивый чл҃вѣколю́бче: тѣ́хъ мл҃твами сп҃сѝ дꙋ́шы на́шѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Со всѣ́ми ст҃ы́ми и҆ првⷣными ᲂу҆чинѝ сло́ве, и҆̀хже въ вѣ́рѣ преста́вилъ є҆сѝ ѿ вре́менныхъ, ꙗ҆́кѡ да сла́вимъ тѧ̀.
Сла́ва: Ѻ҆ц҃а̀ и҆ сн҃а славосло́вимъ, и҆ ст҃а́го дх҃а, глаго́люще: трⷪ҇це ст҃а́ѧ, сп҃сѝ дꙋ́шы на́шѧ.
И҆ ны́нѣ: Бл҃же́нна въ родѣ́хъ всѣ́хъ ꙗ҆ви́ласѧ є҆сѝ: бг҃а бо вои́стиннꙋ бл҃же́ннаго несказа́ннѡ родила̀ є҆сѝ пречⷭ҇таѧ.
Коне́цъ шесто́мꙋ гла́сꙋ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.