Глас 5-й. Четверг.
Въ сре́дꙋ ве́чера,
На Гдⷭ҇и воззва́хъ, стїхи̑ры ст҃ы̑мъ а҆пⷭ҇лѡмъ, гла́съ є҃:
Подо́бенъ: Ра́дꙋйсѧ по́стникѡмъ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Всю̀ проше́дше зе́млю, всѣ́ѧсте бж҃е́ствєннаѧ ᲂу҆чє́нїѧ, сло́во то́чїю ꙗ҆́кѡ свѣ́щникъ и҆ бога́тство всѐ, ᲂу҆ч҃нцы̀ гдⷭ҇ни носѧ́ще, и҆́мже цари́ же и҆ мꙋчи́тели посрами́сте, и҆ любомꙋдрецє́мъ и҆ виті́амъ лю́тость ꙗ҆́кѡ паꙋчи́ннаѧ раздра́сте плетє́нїѧ, всѣ́хъ къ ра́зꙋмꙋ призыва́юще зижди́телѧ, и҆ сꙋ́єтнаѧ слꙋжє́нїѧ бѣсѡ́вскаѧ ѿе́млюще. тѣ́мже молю̀, безслове́сныхъ и҆зба́вити мѧ̀ страсте́й мл҃твами ва́шими.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Мѧте́жа и҆скꙋше́нїй, и҆ лю́тыѧ лжѝ безче́стныхъ є҆ресе́й, бѣсо́вскагѡ ѕлосовѣ́тїѧ, и҆ человѣ̑къ го́рькагѡ соѡбще́нїѧ и҆ бꙋ́ри всебл҃же́ннїи, ѻ҆гнѧ̀ несвѣти́магѡ, и҆ вѣ́чнꙋющагѡ че́рвїѧ, скре́жета зꙋбна́гѡ, и҆ всѧ́кїѧ и҆ны́ѧ мꙋ́ки, къ бг҃ꙋ мольба́ми и҆зба́вите всѣ́хъ на́съ, и҆ сего̀ ᲂу҆моли́те, воздержа́нїѧ ра́ди и҆ трꙋдѡ́въ, добродѣ́телей воздаѧ́нїй полꙋчи́ти, наслѣ́дїѧ же нбⷭ҇нагѡ црⷭ҇твїѧ, и҆ ве́лїю млⷭ҇ть.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Всю̀ свѣ́тлость ꙗ҆́снѡ воспрїе́млюще, тро́ичный свѣ́тъ вторы́й неизрече́ннагѡ смотре́нїѧ, ꙗ҆́кѡ мо́щно вои́стиннꙋ чл҃вѣ́ческомꙋ є҆стествꙋ̀, всехва́льнаѧ десѧти́ца со дво́ицею, показа́сѧ соверше́ннѣ водѧ́щи є҆диноревни́тельный собо́ръ, седми́десѧтихъ и҆ двꙋ̀ и҆мꙋ́щи съ ни́ми, и҆ всѧ̑ просвѣща́юще мі́ра концы̀, ѡ҆мрача́ющыѧсѧ тьмо́ю ѕломꙋ́дренныхъ є҆ресе́й, хрⷭ҇та̀ молѧ́ще, подаю́щаго мі́рови ве́лїю млⷭ҇ть.
И҆́ны стїхи̑ры, и҆́же во ст҃ы́хъ ѻ҆тцꙋ̀ на́шемꙋ нїкола́ю чꙋдотво́рцꙋ, гла́съ є҃. Подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ра́дꙋйсѧ сщ҃е́ннаѧ главо̀, чи́стое добродѣ́телей ѻ҆би́телище, бж҃е́ственное непоро́чнагѡ свѧще́нства пра́вило, па́стырю вели́кїй ꙗ҆́вственный, свѣ́тлое побѣ́ды носѧ̀ и҆́мѧ, молѧ́щымсѧ млⷭ҇тивный приклони́телю, преклонѧ́ѧсѧ къ немощны́хъ мольба́мъ, и҆зба́витель гото́вый, прибѣ́жище сп҃си́тельное всѣ̑мъ, вѣ́рою чтꙋ́щымъ при́снѡ сла́внꙋю твою̀ па́мѧть, хрⷭ҇та̀ молѝ, низпосла́ти на́мъ ве́лїю млⷭ҇ть.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Ра́дꙋйсѧ сщ҃е́ннѣйшїй ᲂу҆́ме, трⷪ҇цы чⷭ҇тое жили́ще, сто́лпе цр҃ко́вный, вѣ́рныхъ ᲂу҆твержде́нїе, ѡ҆ѕло́блєннымъ помо́щниче, ѕвѣзда̀ и҆́же блиста́ньми бл҃гопрїѧ́тныхъ мл҃твъ, разорѧ́ѧ напа́сти же и҆ ско́рби тьмꙋ̀ всегда̀, ст҃и́телю нїко́лае: приста́нище ти́хое, въ не́же прибѣга́юще треволне́нїи житїѧ̀ напа́ствꙋемїи сп҃са́ютсѧ. хрⷭ҇та̀ молѝ, низпосла́ти дꙋша́мъ на́шымъ ве́лїю млⷭ҇ть.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ и҆ и҆́стина гдⷭ҇нѧ пребыва́етъ во вѣ́къ.
Ра́дꙋйсѧ во ст҃и́телехъ пра́вило, бж҃е́ственныхъ чꙋде́съ неисчерпа́емаѧ пꙋчи́но, красото̀ цр҃ко́внаѧ, свѣ́тлаѧ ѕвѣздо̀, сщ҃е́нными твои́ми бл҃же́нне блиста́ньми, на́съ ѡ҆зарѧ́ѧ коего́ждо ст҃ѣ́йшїй, пресвѣ́тлыми мо́лнїѧми просвѣща́емь: сто́лпе неѡбори́мый, степе́ню вѣ́ры, чⷭ҇тнꙋ́ю твою̀ па́мѧть любо́вїю соверша́ющымъ, хрⷭ҇та̀ молѝ, дꙋша́мъ на́шымъ дарова́ти ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ра́дꙋйсѧ прⷪ҇ро́ческаѧ печа́те, и҆ бг҃огла́сныхъ а҆пⷭ҇лъ проповѣ́данїе: бг҃а бо вои́стиннꙋ сꙋ́щаго воплоще́нна, па́че ᲂу҆ма̀ и҆ сло́ва родила̀ є҆сѝ, чⷭ҇таѧ: и҆́мже пе́рвое воспрїи́мше бл҃горо́дїе, и҆ ра́йскїѧ пи́щи наслажда́ющесѧ, тебѐ хода́таицꙋ таковы́ѧ свѣ́тлости, и҆ моли́твенницꙋ бл҃гопрїѧ́тнꙋ, пѣ́сньми почита́емъ. тобо́ю пречⷭ҇таѧ ѡ҆богати́вшесѧ, присносꙋ́щныѧ сподоблѧ́емсѧ жи́зни сн҃а твоегѡ̀, подаю́щагѡ бога́тнѡ ве́лїю млⷭ҇ть.
Та́же, Свѣ́те ти́хїй: Прокі́менъ днѐ. Та́же, Сподо́би гдⷭ҇и въ ве́черъ се́й:
На стїхо́внѣ стїхи̑ры а҆пⷭ҇лѡмъ, гла́съ є҃:
Оу҆ч҃нцы̀ сп҃сѡвы та̑инъ самови́дцы бы́вше, неви́димаго и҆ нача́ла не и҆мꙋ́щаго проповѣ́дасте, глаго́люще: въ нача́лѣ бѣ̀ сло́во. не со́здани бы́сте пре́жде а҆́гг҃лъ, ни наꙋчи́стесѧ ѿ человѣ̑къ, но ѿ вы́шнїѧ премꙋ́дрости. тѣ́мже дерзнове́нїе и҆мꙋ́ще, моли́тесѧ ѡ҆ дꙋша́хъ на́шихъ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
А҆пⷭ҇лы гдⷭ҇ни согла́снѡ пѣ́сньми похва́лимъ, ѡ҆бле́кшесѧ бо въ кре́стное ѻ҆рꙋ́жїе, і҆́дѡльскꙋю пре́лесть ᲂу҆праздни́ша, и҆ побѣдоно́снїи ꙗ҆ви́шасѧ вѣне́чницы: и҆́хже мл҃твами и҆ всѣ́хъ ст҃ы́хъ, бж҃е, поми́лꙋй на́съ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Несы́тною любо́вїю дꙋшѝ, хрⷭ҇та̀ не ѿверго́стесѧ ст҃і́и мч҃нцы, и҆̀же разли̑чныѧ ра̑ны страсте́й претерпѣ́вше, мꙋчи́телей де́рзость низложи́сте, непрекло́ннꙋ и҆ невреди́мꙋ вѣ́рꙋ сохра́ньше, на нб҃са̀ преста́вистесѧ. тѣ́мже и҆ дерзнове́нїе и҆мꙋ́ще къ немꙋ̀, проси́те дарова́ти на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Бл҃жи́мъ тѧ̀ бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ, и҆ прибѣ́жище дꙋ́шъ на́шихъ.
Та́же, Ны́нѣ ѿпꙋща́еши раба̀ твоего̀, влⷣко: Трист҃о́е. По Ѻ҆́ч҃е на́шъ: І҆ере́й: Ꙗ҆́кѡ твоѐ є҆́сть црⷭ҇тво: Посе́мъ тропа́рь, є҆ктенїа̀, и҆ ѿпꙋ́стъ.
Въ сре́дꙋ на повече́рїи,
канѡ́нъ прест҃ѣ́й бцⷣѣ, гла́съ є҃.
Пѣ́снь а҃
І҆рмо́съ: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Запѣ́въ: Прест҃а́ѧ бцⷣе, сп҃сѝ на́съ.
Свѣтоно́снаѧ ски́нїе цр҃ѧ̀ хрⷭ҇та̀, ѡ҆зарѝ мою̀ мы́сль ѡ҆мраче́ннꙋю ле́стїю борца̀, и҆ тьмо́ю ѡ҆слѣпле́ннꙋю прегрѣше́нїй мои́хъ.
Помышле́нїй лꙋка́выхъ смире́ннꙋю мою̀ дꙋ́шꙋ бг҃ороди́тельнице свободѝ, и҆ жили́ще бг҃ꙋ сїю̀ содѣ́лай, да по до́лгꙋ тѧ̀ сла́влю всегда̀.
Сла́ва: Є҆гда̀ повелѣ́нїемъ бж҃їимъ, ѿ вре́менныѧ жи́зни ѿитѝ хощꙋ̀ пречⷭ҇таѧ, бѣсо́вскїѧ рꙋкѝ покажи́ мѧ вы́шша, а҆́гг҃лы подаю́щи спꙋ́тники мнѣ̀.
И҆ ны́нѣ: Вскꙋ́ю, ѽ дꙋшѐ! во ᲂу҆ны́нїи мно́зѣ всѐ житїѐ и҆жди́ла є҆сѝ; потщи́сѧ ᲂу҆́бѡ про́чее, и҆ возопі́й гдⷭ҇ни мт҃ри: ѡ҆чи́сти и҆ сп҃си́ мѧ, бг҃ороди́тельнице.
Пѣ́снь г҃
І҆рмо́съ: Си́лою крⷭ҇та̀ твоегѡ̀ хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити тридне́вное твоѐ воскрⷭ҇нїе.
И҆з̾ ро́ва страсте́й и҆ мꙋче́нїй возведи́ мѧ, несꙋмнѣ́ннѡ пою́ща тѧ̀, бцⷣе всебл҃же́ннаѧ.
Вре́тище моѐ расто́ргни безмѣ́рныхъ прегрѣше́нїй мои́хъ, и҆ весе́лїемъ ѡ҆поѧ́ши добродѣ́телей, бг҃обл҃года́тнаѧ.
Сла́ва: Ка́плю мѝ чⷭ҇таѧ сле́зъ пода́ждь, ꙗ҆́кѡ да ѿженꙋ̀ се́рдца моегѡ̀ недоꙋмѣ́нїе, и҆ прилѣ́жнѡ воспою́ тѧ.
И҆ ны́нѣ: Низложѝ пренепоро́чнаѧ вра̑гъ безпло́тныхъ шата́нїе, и҆ тѣ́хъ томле́нїѧ вско́рѣ свободи́ мѧ.
Пѣ́снь д҃
І҆рмо́съ: Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й гдⷭ҇и.
Вскꙋ́ю ᲂу҆подо́биласѧ є҆сѝ дꙋшѐ, непло́днѣй смоко́вницѣ, ника́коже боѧ́щисѧ посѣче́нїѧ и҆ пла́мене вѣ́чнагѡ; ᲂу҆скорѝ ᲂу҆́бѡ пре́жде конца̀, и҆ возни́кни.
Кі́й ѧ҆зы́къ и҆зрече́тъ содѣ́ѧнныхъ мои́хъ ѕѡ́лъ безмѣ́рное мо́ре, и҆ глꙋбинꙋ̀ прегрѣше́нїй; сп҃си́ мѧ, дв҃о пренепоро́чнаѧ, ѿча́ѧннаго.
Сла́ва: Себѐ пла́чꙋ, є҆гда̀ во ᲂу҆́мъ прїидꙋ̀ мно́гихъ мои́хъ прегрѣше́нїй, и҆ ѻ҆гнѧ̀ негаси́магѡ: и҆ молю́ тѧ, да́ти мѝ вре́мѧ покаѧ́нїѧ, чⷭ҇таѧ.
И҆ ны́нѣ: Да не восхи́титъ ꙗ҆́кѡ ле́въ стропти́вый вра́гъ ѻ҆каѧ́ннꙋю мою̀ дꙋ́шꙋ: но твое́ю си́лою дꙋшетлѣ̑нныѧ сокрꙋшѝ зꙋ́бы є҆гѡ̀, бл҃га́ѧ.
Пѣ́снь є҃
І҆рмо́съ: Оу҆́тренююще вопїе́мъ тѝ гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не зна́емъ.
При́зри и҆ ᲂу҆слы́ши влⷣчце, гла́съ мо́й, и҆ и҆зба́ви мѧ̀, молю́сѧ, вѣ́чнагѡ ѡ҆сꙋжде́нїѧ.
Оу҆ѧзви́хсѧ грѣха̀ стрѣла́ми, и҆ вопїю́ ти: ᲂу҆врачꙋ́й, пречⷭ҇таѧ, се́рдца моегѡ̀ ꙗ҆́звы.
Сла́ва: Поми́лꙋй мѧ̀ є҆ди́не чл҃вѣколю́бче ще́дрый, моли́твами ро́ждшїѧ тѧ̀: ты́ бо мѝ є҆сѝ бг҃ъ и҆ гдⷭ҇ь.
И҆ ны́нѣ: Поми́лꙋй мѧ̀ є҆ди́на всепѣ́таѧ, молю̀ твою̀ бл҃гость, и҆ млⷭ҇ти сподо́би.
Пѣ́снь ѕ҃
І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ чл҃вѣколю́бцꙋ, и҆ сп҃се́ мѧ десни́ца твоѧ̀ гдⷭ҇и.
Ꙗ҆́кѡ ле́въ рыка́ѧ льсти́вый и҆́щетъ мѧ̀ расто́ргнꙋти, и҆ показа́ти снѣ́дь свое́й ѕло́бѣ, чⷭ҇таѧ: но сегѡ̀ вре́да свободи́ мѧ.
Ѡ҆чи́сти чл҃вѣколю́бче, мл҃твами чи́стѡ ро́ждшїѧ тѧ̀, и҆ и҆зба́ви мі́ръ тво́й ѿ всѧ́кїѧ ско́рби, и҆ вѣ́чныѧ сла́вы сподо́би.
Сла́ва: Ѡ҆бы́де мѧ̀ бе́здна прегрѣше́нїй, во глꙋбинꙋ̀ низве́дши ѿча́ѧнїѧ, молю́сѧ, чⷭ҇таѧ, возведѝ ѿ преиспо́днѧгѡ а҆́да, тебѐ сла́вѧщаго.
И҆ ны́нѣ: Житїѐ моѐ и҆спо́лнисѧ прегрѣше́нїй, и҆ всѧ́кїѧ лѣ́ности: тѣ́мже къ покаѧ́нїю пре́жде кончи́ны моеѧ̀ чⷭ҇таѧ, ѡ҆братѝ, и҆ сп҃си́ мѧ препѣ́таѧ.
Та́же, Гдⷭ҇и поми́лꙋй, три́жды. Сла́ва и҆ ны́нѣ:
Сѣда́ленъ,гла́съ є҃:
Подо́бенъ: Собезнача́льное сло́во:
Ра́дꙋйсѧ, стѣно̀, тве́рдаѧ бг҃опобѣ́днаѧ, ра́дꙋйсѧ, паде́нїе ва́рварѡвъ всевоева́нное, ра́дꙋйсѧ, возведе́нїе вѣ́рныхъ правосла́вныхъ люде́й, бцⷣе, вои́стиннꙋ ᲂу҆пова́ющихъ на тѧ̀, мл҃твами твои́ми и҆збавлѧ́ющи на́съ ѿ бѣ́дъ всѧ́ческихъ, и҆ ѿ безбо́жныхъ вра̑гъ.
Пѣ́снь з҃
І҆рмо́съ: Въ пещѝ ѻ҆́гненнѣй пѣсносло́вцы сп҃сы́й ѻ҆́троки, бл҃гослове́нъ бг҃ъ ѻ҆тє́цъ на́шихъ.
Нево́льныхъ ѕѡ́лъ и҆ во́льныхъ, проще́нїе твое́ю бл҃гостїю влⷣчце, пода́ждь мѝ.
И҆знемога́етъ мо́й ᲂу҆́мъ, прило́ги нече́стїѧ лꙋка́выхъ пѡ́мыслъ: помози́ ми, бл҃га́ѧ.
Сла́ва: Дꙋше́вныхъ мои́хъ страсте́й ра̑ны, бцⷣе, твои́хъ мл҃твъ лѣчьба́ми ны́нѣ и҆сцѣлѝ.
И҆ ны́нѣ: Сокрꙋше́ннꙋ дꙋ́шꙋ, и҆ по́мыслъ смире́нъ, пода́ждь мѝ бл҃га́ѧ: ꙗ҆́кѡ да сла́влю тѧ̀.
Пѣ́снь и҃
І҆рмо́съ: И҆з̾ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, сщ҃е́нницы по́йте, лю́дїе превозноси́те во всѧ̑ вѣ́ки.
Въ лѣ́ности житїѐ сконча́въ ѻ҆каѧ́нный, и҆ прибли́живсѧ къ концꙋ̀ живота̀ моегѡ̀, взыва́ю тѝ бцⷣе: сопроти́вныхъ и҆схитѝ сѣте́й смире́ннꙋю мою̀ дꙋ́шꙋ.
Тѣле́сныхъ болѣ́зней, ра́нъ лю́тыхъ дꙋше́вныхъ, и҆ страсте́й настоѧ́нїѧ и҆стѧзꙋ́емꙋ, твоегѡ̀ ца́рствїѧ си́лꙋ мѝ пода́ждь, ꙗ҆́кѡ є҆ди́на млⷭ҇тива.
Сла́ва: Въ пꙋчи́нѣ житїѧ̀ ѡ҆бꙋрева́ема, и҆ бѣсо́вскими волна́ми погрꙋжа́ема, сп҃сѝ чⷭ҇таѧ, и҆ бж҃е́ственномꙋ ᲂу҆стремле́нїю, къ бл҃гоꙋго́дномꙋ житїю̀ введи́ мѧ, ѻ҆трокови́це.
И҆ ны́нѣ: Ꙗ҆́кѡ въ невѣ́стный черто́гъ входѧ̀ дв҃о, гаврїи́лъ по́сланъ, ра́дꙋйсѧ возопѝ, глаго́лѧ: пресла́внаѧ пала́то всѣ́хъ цр҃ѧ̀ хрⷭ҇та̀, въ ню́же все́льсѧ, земны̑ѧ всѧ̑ ѡ҆божѝ.
Пѣ́снь ѳ҃
І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
Тѧ̀ ю҆́же бг҃а несказа́ннѡ ро́ждшꙋю, застꙋ́пницꙋ стѧжа́хомъ, и҆ стѣ́нꙋ недви́жимꙋ, и҆ дꙋша́мъ сп҃се́нїе, и҆ чꙋдесє́мъ и҆сто́чникъ.
Млⷭ҇тивъ бꙋ́ди мѝ, сло́ве и҆́стиннагѡ бг҃а, въ де́нь сꙋда̀, мольба́ми ро́ждшїѧ тѧ̀: и҆ сꙋ́щымъ ѡ҆деснꙋ́ю тебѐ сочета́й.
Сла́ва: И҆зба́ви мѧ̀ чⷭ҇таѧ, ѻ҆гнѧ̀ вѣ́чнꙋющагѡ, и҆ неꙋсыпа́ющагѡ че́рвїѧ, и҆ всѧ́кїѧ мꙋ́ки, на тѧ̀ наде́ждꙋ возло́жшаго.
И҆ ны́нѣ: Є҆гда̀ хо́щетъ дꙋша̀ моѧ̀ разлꙋчи́тисѧ ѿ ѻ҆каѧ́ннагѡ моегѡ̀ тѣлесѐ, неви́димыхъ вра̑гъ томи́тельства и҆зба́ви мѧ̀ бг҃оневѣ́стнаѧ.
Та́же, Досто́йно є҆́сть: И҆ покло́нъ. Посе́мъ, Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чное, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи, сѣда́льны а҆пⷭ҇лѡмъ, гла́съ є҃:
Ꙗ҆́кѡ самови́дцы и҆ слꙋги̑ сло́ва, премꙋ̑дрыѧ а҆пⷭ҇лы похва́лимъ, пѣ́сньми дх҃о́вными и҆ пѣ́ньми всѝ земні́и: ті́и бо хрⷭ҇та̀ прилѣ́жнѡ мо́лѧтъ ѡ҆ на́съ, пою́щихъ сщ҃е́ннꙋю и҆́хъ па́мѧть, и҆ кла́нѧющихсѧ моще́мъ и҆́хъ.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
А҆пⷭ҇лы согла́снѡ восхва́лимъ, ꙗ҆́кѡ самови́дцы сло́ва, и҆ бж҃е́ствєнныѧ проповѣ́дники, и҆ ꙗ҆зы́кѡвъ дх҃ѡ́вныѧ ᲂу҆лови́тели, ꙗ҆́кѡ ꙗ҆́вѣ приведо́ша на́съ къ позна́нїю хрⷭ҇та̀, и҆зба́вльше ѿ пре́лести ро́дъ человѣ́ческїй, и҆ црⷭ҇твїѧ сподо́биша.
Сла́ва, и҆ ны́нѣ, бг҃оро́диченъ: Ѡ҆сꙋжде́нъ є҆́смь сꙋдо́мъ со́вѣсти, и҆ пре́жде сꙋда̀ сꙋ́дъ помышлѧ́ѧ, трепе́щꙋ ѻ҆каѧ́нный, помина́ѧ ѕѡ́лъ мои́хъ мно́жество. но къ тебѣ̀ неѡбори́мѣй ᲂу҆миле́нїемъ вопїю̀, и҆ предста́тельницѣ, и҆ покро́вꙋ: ѻ҆́нагѡ стꙋда̀ и҆зба́ви мѧ̀, и҆ сп҃сѝ мл҃твами твои́ми.
По в҃-мъ стїхосло́вїи сѣда́льны, гла́съ є҃:
А҆пⷭ҇лы согла́снѡ похва́лимъ, ꙗ҆́кѡ проповѣ́даша всѣ̑мъ правосла́вное гдⷭ҇не ᲂу҆че́нїе, и҆ прогна́вшыѧ є҆реті́ческꙋю мглꙋ̀, и҆ просвѣще́нїе дꙋхо́вно возсїѧ́вшыѧ въ мі́рѣ, бл҃года́ти ᲂу҆че́нїемъ: и҆ мо́лѧтсѧ сп҃сти́сѧ на́мъ.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
И҆ па́ки глаго́ли то́йже сѣда́ленъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Ст҃ы́хъ мч҃нкъ и҆справле́нїємъ нбⷭ҇ныѧ си̑лы преꙋдиви́шасѧ: ка́кѡ въ тѣ́лѣ ме́ртвеннѣмъ до́брѣ подви́гшесѧ, безпло́тнаго врага̀ си́лою крⷭ҇тною неви́димѡ побѣди́ша: и҆ мо́лѧтсѧ гдⷭ҇еви, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Тѧ̀ приста́нище, и҆ стѣ́нꙋ, и҆ прибѣ́жище, и҆ наде́ждꙋ, и҆ покро́въ, и҆ застꙋпле́нїе те́плое ѡ҆брѣ́тше вѣ́рнїи, къ тебѣ̀ притека́емъ, и҆ вопїе́мъ прилѣ́жнѡ, и҆ зове́мъ вѣ́рнѡ: поми́лꙋй бцⷣе ᲂу҆пова́ющихъ на тѧ̀, и҆ ѿ прегрѣше́нїй и҆зба́ви.
По г҃-мъ стїхосло́вїи сѣда́льны, гла́съ є҃:
Подо́бенъ: Собезнача́льное сло́во:
Оу҆ч҃нцы̀ сп҃сѡвы, бж҃е́ственнїи а҆пⷭ҇ли, и҆̀же сло́во сп҃си́тельное всѣ́ѧвше въ концы̀ землѝ, и҆ ѡ҆зари́вше во тьмѣ̀ и҆ сѣ́ни сѣдѧ́щыѧ, мою̀ просвѣти́те дꙋ́шꙋ ѡ҆мраче́ннꙋю страсте́й че́рностїю, мольба́ми ва́шими всехва́льнїи.
Гдⷭ҇и, неизрече́нное та́инство твоегѡ̀ воплоще́нїѧ проповѣ́давше немꙋ́дрїи, фїлосо́фѡвъ посрами́ша, ри́торѡвъ ры́барїе заꙋсти́ша, и҆ бы́ша ꙗ҆зы́кѡвъ премꙋ́дрїи ᲂу҆чи́телїе, просвѣти́вше концы̀ свѣ́томъ бж҃е́ственнагѡ ра́зꙋма: тѣ́ми пода́ждь на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ: И҆̀же ᲂу҆пова́нїе на тѧ̀ дв҃о пречⷭ҇таѧ, непоткнове́нное и҆мꙋ́щымъ, покро́въ сꙋ́щи ѿ разли́чныхъ напа́стей и҆ ѡ҆бстоѧ́нїй, и҆ бѣ́дъ лю́тыхъ свободѝ на́съ, молѧ́щи сн҃а твоего̀, со а҆пⷭ҇лы є҆гѡ̀, и҆ сп҃сѝ всѣ́хъ воспѣва́ющихъ тѧ̀.
Канѡ́нъ ст҃ы̑мъ а҆пⷭ҇лѡмъ, творе́нїе ѳеофа́на, є҆пⷭ҇кпа нїкі́йскагѡ, гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Сїѧ́нїемъ первода́тнагѡ свѣтода́нїѧ, пло́тїю бесѣ́довати человѣ́кѡмъ сподо́бившагѡсѧ, ѡ҆богати́вшесѧ сла́внїи, дꙋшѝ моеѧ̀ разрꙋши́те всѧ́къ мра́къ, бж҃е́ственнїи а҆пⷭ҇ли. [Два́жды.]
Напрѧ́гъ бж҃е́ственный лꙋ́къ, ꙗ҆́коже стрѣ́лы ва́съ въ ве́сь мі́ръ посла̀ а҆пⷭ҇ли, стрѣ́лы сокрꙋша́ющыѧ ѕлоко́зненнагѡ всѧ̑, и҆ и҆сцѣлѧ́ющыѧ вѣ́рныхъ ꙗ҆́звы.
И҆мꙋ́ще премꙋ́дрость са́мꙋю ᲂу҆ч҃тлѧ, ᲂу҆мꙋдри́сте а҆пⷭ҇ли всѧ̑ концы̀. тѣ́мже мѧ̀ ᲂу҆мꙋдри́те, вра́жїе всѧ́ко ѕлодѣ́йство ѿгонѧ́ти.
Бг҃оро́диченъ: Є҆ди́на бл҃гослове́ннаѧ, бг҃ора́дованнаѧ, бл҃гослове́ньми человѣ́ческїй ро́дъ ѡ҆бра́довавши, хрⷭ҇та̀ молѝ съ бж҃е́ственными, пречⷭ҇таѧ, а҆пⷭ҇лы, поми́ловатисѧ на́мъ.
Дрꙋгі́й канѡ́нъ, и҆́же во ст҃ы́хъ ѻ҆тцꙋ̀ на́шемꙋ нїкола́ю чꙋдотво́рцꙋ. Творе́нїе і҆ѡ́сифово, [є҆гѡ́же краегране́сїе: Пѧ́тое принесꙋ̀ тебѣ̀ нїко́лае пѣ́нїе.] Гла́съ є҃:
І҆рмо́съто́йже.
Вѣ́рою и҆ любо́вїю, ѻ҆́тче, присво́ивсѧ бг҃ови, всест҃а́ѧ сегѡ̀ и҆спо́лнилъ є҆сѝ хотѣ̑нїѧ: и҆́мже по всемꙋ̀ ст҃ъ бы́лъ є҆сѝ, ст҃и́телю мꙋ́дре нїко́лае.
И҆мꙋ́ще тѧ̀ предста́телѧ къ ще́дромꙋ, и҆̀же напа́стьми и҆ печа́льми ѡ҆держи́мїи, къ тебѣ̀ прибѣга́емъ: да́рꙋй рꙋ́кꙋ сп҃са́ющꙋю на́съ ѿ всѧ́кїѧ тѣсноты̀.
Мѵ́рѧнѡмъ ст҃и́телѧ хрⷭ҇то́съ пома́за тѧ̀, бл҃гово́нїемъ чꙋде́съ на́съ ѡ҆бл҃гоꙋха́юща. тѣ́мже мо́лимъ тѧ̀ нїко́лае, ѕлово́нїѧ грѣхо́внагѡ и҆зба́вити на́съ.
Бг҃оро́диченъ: Дре́вле прⷪ҇ро́ческїй тѧ̀ ли́къ пронаречѐ го́рꙋ бж҃е́ственнꙋю дв҃о, и҆ две́рь непроходи́мꙋю. тѣ́мже мо́лимсѧ тѝ: покаѧ́нїѧ двє́ри бж҃е́ствєнныѧ, ѻ҆трокови́це, ѿве́рзи на́мъ.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
И҆́же пло́тїю ѡ҆бнища́вый, премно́гїй бл҃гостїю, є҆гѡ̀ ра́ди ѡ҆бнища́вшыѧ, ѡ҆богатѝ ва́съ сла́внїи а҆пⷭ҇ли, дарова́ньми всѧ́кими, ѡ҆богаща́ющѧ концы̀ бж҃е́ственными и҆ чⷭ҇тны́ми ра́зꙋмы. [Два́жды.]
Оу҆ѧзви́хсѧ ꙗ҆дови́тымъ ѕмі́ѧ ᲂу҆грызе́нїемъ, ᲂу҆ѧ́звено се́рдце стѧжа́хъ. тѣ́мже тѝ вопїю̀ хрⷭ҇тѐ, менѐ ра́ди ᲂу҆ѧзви́вшемꙋсѧ: а҆пⷭ҇лъ твои́хъ мольба́ми и҆сцѣлѝ, и҆ сп҃си́ мѧ, молю́сѧ.
Мре́жею мл҃твъ ва́шихъ всебл҃же́ннїи, ѿ глꙋбины̀ ѕло́бныѧ бори́телѧ, и҆ ѿ треволне́нїѧ помышле́нїй, и҆ ѿ страсте́й смертоно́сныхъ возве́дше мѧ̀, приведи́те бг҃ꙋ всѣ́хъ сп҃са́ема.
Бг҃оро́диченъ: Ꙗ҆́же до́ждь прїе́мшаѧ нбⷭ҇ный, со а҆пⷭ҇лы того̀ молѝ: ᲂу҆ста́вити пото́ки мои́хъ страсте́й, пꙋчи́нꙋ и҆зсꙋша́ющи грѣха̀ моегѡ̀, и҆ сп҃сти́ мѧ, чи́стѡ тебѐ сла́вѧщаго.
И҆́нъ І҆рмо́съ то́йже.
Стрѣ́лы лꙋка́вагѡ притꙋпи́лъ є҆сѝ прпⷣбне, противле́нїемъ бж҃е́ственныхъ твои́хъ трꙋдѡ́въ: но твои́ми мл҃твами премꙋ́дре, ѿ тогѡ̀ ѕлодѣ́йствїѧ и҆ наси́лїѧ соблюдѝ неврежде́нны, тебѐ воспѣва́ющыѧ, вели́кїй нїко́лае.
Житїѐ а҆́гг҃льское на землѝ показа́въ, ны́нѣ со а҆́гг҃лы при́снѡ предстои́ши прⷭ҇то́лꙋ трⷪ҇ческомꙋ, сщ҃е́нне, на́шихъ согрѣше́нїй и҆ напа́стей разрѣше́нїѧ просѧ̀, ѻ҆́тче первост҃и́телю нїко́лае.
Оу҆ма̀ моегѡ̀ ѡ҆мраче́нїе всѐ ѿженѝ нїко́лае, твои́ми свѣтоно́сными мл҃твами, ᲂу҆ти́ши бꙋ́рю страсте́й, ᲂу҆пра́ви мѧ̀ ѻ҆́тче, къ безстра́стїѧ приста́нищꙋ, молю́сѧ, ꙗ҆́кѡ да во хвале́нїи сла́влю тѧ̀.
Бг҃оро́диченъ: Предстоѧ́щи ѡ҆деснꙋ́ю хрⷭ҇та̀, ꙗ҆́кѡ цр҃и́ца, рѧ́сны златы́ми бг҃оѡбра́дованнаѧ ѡ҆дѣ́ѧна вои́стиннꙋ, на́мъ црⷭ҇твїе нбⷭ҇ное мл҃твами твои́ми ѻ҆трокови́це, и҆схода́тай всенепоро́чнаѧ.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ сп҃стѝ пома̑занныѧ твоѧ̑ прише́лъ є҆сѝ.
Две́рь сы́й і҆и҃съ бг҃ъ на́шъ и҆ гдⷭ҇ь, ѿве́рзлъ своѐ а҆пⷭ҇лѡмъ позна́нїе, всѣ̑мъ ꙗ҆зы́кѡмъ две́рь ѿве́рзе тѣ́хъ ᲂу҆че́ньми. [Два́жды.]
Сн҃е бж҃їй, сы́ны по прича́стїю нбⷭ҇нагѡ ѻ҆ц҃а̀ твоегѡ̀ а҆пⷭ҇лы ꙗ҆ви́лъ є҆сѝ: моле́нїемъ и҆́хъ сы́ны свѣ́та всѣ́хъ на́съ сотворѝ.
И҆̀же на прⷭ҇то́лѣхъ двоюна́десѧтихъ, съ сꙋдїе́ю и҆ цр҃е́мъ хотѧ́ще пресла́внѡ сѣ́сти, стра́шнагѡ и҆ ᲂу҆жа́снагѡ мѧ̀ а҆пⷭ҇ли, и҆зба́вите сꙋда̀.
Бг҃оро́диченъ: Бж҃е́ственнагѡ сщ҃е́нїѧ ковче́же, ѡ҆ст҃ѝ мою̀ дꙋ́шꙋ, помышле́нїе просвѣтѝ, всегда̀ молѧ́щи хрⷭ҇та̀ со а҆пⷭ҇лы, да сп҃се́тъ мѧ̀.
И҆́нъ І҆рмо́съ то́йже.
Мимотекꙋ́щими и҆змѣни́лъ є҆сѝ бꙋ̑дꙋщаѧ, и҆́хже прича́стники и҆ на́съ ст҃ы́ми твои́ми мл҃твами сотворѝ нїко́лае, и҆ и҆скꙋше́нїѧ всѧ́кагѡ и҆збавлѧ́ѧ жите́йскагѡ.
Мѵ́рѧнѡмъ первопрⷭ҇то́льникъ бы́въ нїко́лае, всѧ̑ чꙋ̑вствїѧ се́рдца моегѡ̀ мѵ́ромъ ѡ҆бл҃гоꙋха́й ст҃е, и҆ стра̑сти ѕлосмра̑дныѧ ѿ сегѡ̀, мл҃твами твои́ми ѿгонѧ́й всегда̀.
Сокрꙋшѝ вра̑жїѧ кѡ́зни ви̑димыѧ, и҆ неви̑димыѧ, нїко́лае, всегда̀ борю́щыѧ ны̀ на́шѧ врагѝ въ безконе́чнꙋю па́гꙋбꙋ послѝ.
Бг҃оро́диченъ: Ст҃а́ѧ бцⷣе, помози́ ми, сла́достьми вы́нꙋ потоплѧ́емꙋ тѣле́сными, и҆ на ѻ҆дрѣ̀ ᲂу҆ны́нїѧ при́снѡ слежа́щꙋ и҆ стенѧ́щꙋ.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Дх҃о́внїи виті́и, чⷭ҇тні́и а҆пⷭ҇ли, на го́рницѣ, во ѻ҆́гненнѣ ви́дѣ дх҃а ст҃а́го къ ни̑мъ прише́дша, стра́шнѡ прїѧ́ша. [Два́жды.]
Сокрꙋша́юще нечє́стїѧ, сокрꙋше́нꙋю прегрѣше́ньми мою̀ мы́сль, росо́ю и҆сцѣле́нїѧ а҆пⷭ҇ли и҆сцѣли́те.
Стрѣ́лы и҆збра̑нныѧ ва́съ хрⷭ҇то́съ посла̀ а҆пⷭ҇ли, сокрꙋша́ющыѧ стрѣ́лы лꙋка́вствїѧ: тѣ́мже мѧ̀ и҆сцѣли́те ᲂу҆ѧ́звеннаго вра́жїими стрѣла́ми.
Бг҃оро́диченъ: Не ѡ҆сꙋдѝ менѐ, ни ѿве́ржи менѐ ѿ лица̀ твоегѡ̀, многомлⷭ҇тиве: мо́литъ тѧ̀ чи́стѡ ро́ждшаѧ, и҆ а҆пⷭ҇льскїй собо́ръ.
И҆́нъ І҆рмо́съ то́йже.
Кꙋмі́ры сокрꙋши́лъ є҆сѝ і҆́дѡльскїѧ ст҃е, и҆ совѣ́ты бездѣ́льны є҆реті́чествꙋющихъ показа́лъ є҆сѝ нїко́лае, и҆ ведѡ́мыѧ на сме́рть и҆зба́вилъ є҆сѝ.
Оу҆́треневавъ ко гдⷭ҇ꙋ и҆змла́да прпⷣбне, и҆ та́мѡ сꙋ́щими свѣтоли́тїи ве́сь просвѣти́лсѧ є҆сѝ. тѣ́мже молю́сѧ: дꙋшѝ моеѧ̀ ѻ҆́блаки разженѝ.
Тебѐ мо́лимъ, ѻ҆́тче нїко́лае, въ ча́съ се́й посредѣ̀ бꙋ́ди всѣ́хъ призыва́ющихъ тѧ̀, и҆ ꙗ҆́же ко сп҃се́нїю да́рꙋй на́мъ прошє́нїѧ.
Бг҃оро́диченъ: Непости́жимый ᲂу҆мо́мъ, бг҃обл҃года́тнаѧ, ѡ҆бдержа́нїе тѧ̀, плотоно́сецъ бы́въ, прїѧ́тъ человѣ́ки, и҆збавлѧ́ѧ ѿ ѡ҆держа́щихъ скорбе́й.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Распространѧ́ющеесѧ ᲂу҆ста́вилъ є҆сѝ ѕло́бы согни́тїе, ꙗ҆зы́кѡвъ дꙋ́шы, чл҃вѣколю́бче, со́лїю ᲂу҆че́нїѧ сщ҃е́нныхъ ᲂу҆чєни́къ твои́хъ. [Два́жды.]
Глꙋбинꙋ̀ вѣ́си ѕѡ́лъ мои́хъ влⷣко хрⷭ҇тѐ, да́ждь мѝ рꙋ́кꙋ, и҆ сп҃си́ мѧ чл҃вѣколю́бче, мольба́ми сщ҃е́нныхъ а҆пⷭ҇лъ твои́хъ.
Сꙋдїѐ пра́веднѣйшїй, въ де́нь сꙋда̀ стра́шнагѡ, тре́петнагѡ мѧ̀ и҆зба́ви ѡ҆сꙋжде́нїѧ, бл҃госла́вныхъ а҆пⷭ҇лъ твои́хъ мольба́ми.
Бг҃оро́диченъ: Ѿча́ѧннаго мѧ̀ ѿ мно́жества беззако́нїй, сп҃се́нїѧ гдⷭ҇и сподо́би, ᲂу҆чєни́къ и҆ мт҃ре твоеѧ̀ мольба́ми.
И҆́нъ І҆рмо́съ то́йже.
Млⷭ҇тива содѣ́лай влⷣкꙋ, твои́ми мл҃твами, всѣ̑мъ чтꙋ́щымъ тѧ̀ нїко́лае, ꙗ҆́кѡ да на́шихъ прегрѣше́нїй разрѣше́нїе да́рꙋетъ.
Недꙋ̑гъ и҆зба́ви и҆ собла̑знъ жите́йскихъ, напа́стей же и҆ скорбе́й нїко́лае, тѧ̀ мл҃твенника ко гдⷭ҇ꙋ стѧжа́вшихъ.
Врача̀ тѧ̀ и҆зѧ́щна влⷣка показа̀ хрⷭ҇то́съ: тѣ́мже недꙋ́ги и҆сцѣлѝ, бл҃гоче́стнѡ къ тебѣ̀ пристꙋпа́ющихъ, нїко́лае.
Бг҃оро́диченъ: Роди́тельница безмꙋ́жнаѧ, бг҃омт҃и была̀ є҆сѝ, чⷭ҇таѧ. сегѡ̀ ра́ди вѣ́рою молю̀ тѧ̀: дꙋшѝ моеѧ̀ ᲂу҆ны̑нїѧ разженѝ.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е, бл҃гослове́нъ є҆сѝ.
Превозноси́мый ѻ҆тцє́въ гдⷭ҇ь, ва́съ превознесѐ, всю̀ низве́рже вра́жїю си́лꙋ, ᲂу҆ч҃нцы̀ хрⷭ҇тѡ́вы бг҃ови́дцы.
Скве́рнꙋ се́рдца моегѡ̀ стрꙋѧ́ми ᲂу҆миле́нїѧ, ва́шими мольба́ми, а҆пⷭ҇ли, ѡ҆мы́йте, ᲂу҆ча́ще взыва́ти: бж҃е, бл҃гослове́нъ є҆сѝ.
Ѻ҆гне́мъ бж҃е́ственнагѡ дх҃а ве́щь попали́сте всѧ́кагѡ сꙋ́етства: тѣ́мже палѧ́щїѧ мѧ̀ и҆зба́вите гее́нны, ᲂу҆ч҃нцы̀ бг҃а сло́ва.
Бг҃оро́диченъ: Ꙗ҆́же паде́нїѧ а҆да́мова и҆справле́нїе, воздви́гни па́дшаго мѧ̀ въ про́пасть ѕло́бнꙋю, мл҃твами твои́ми дв҃о, и҆ бж҃е́ственныхъ а҆пⷭ҇лъ.
И҆́нъ І҆рмо́съ то́йже.
Ве́сь возложи́всѧ бг҃ꙋ нїко́лае, всего́ мѧ сп҃сѝ, жите́йскими страстьмѝ ѻ҆каѧ́ннѡ всегда̀ впа́дающа, бг҃омꙋ́дре.
Свѣти́ло бг҃оза́рнѣйшее, ᲂу҆ма̀ моегѡ̀ ѡ҆зарѝ, страсте́й мра́комъ при́снѡ помрача́ема, и҆ дава́й бл҃гоѡбра́знѡ ходи́ти въ житїѝ.
Всѧ̑каѧ ѿверза́ємаѧ на мѧ̀ нїко́лае, ᲂу҆ста̀ лꙋка̑ваѧ, твои́ми мл҃твами заградѝ: и҆ и҆зба́ви мѧ̀ ви́димыхъ вра̑гъ и҆ неви́димыхъ.
Бг҃оро́диченъ: И҆з̾ тебѐ на́мъ возсїѧ̀ невече́рнее сл҃нце, ѻ҆́блаче всесвѣ́тлый, хрⷭ҇то́съ бг҃ъ на́шъ, просвѣща́ѧ и҆̀же во тьмѣ̀ невѣ́дѣнїѧ бцⷣе.
Пѣ́снь и҃
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше поѧ́хꙋ: дѣла̀ всѧ̑каѧ гдⷭ҇а по́йте. и҆ превозноси́те во всѧ̑ вѣ́ки.
Ты̀ мы́слєнныѧ ѻ҆́блаки, а҆пⷭ҇лы сло́ве распросте́рлъ є҆сѝ, кропѧ́щыѧ на ны̀ до́ждь премꙋ́дрыхъ и҆ бж҃е́ственныхъ ᲂу҆че́нїй, и҆ напоѧ́ющыѧ на́съ во всѧ̑ вѣ́ки.
Преꙋдо́бреннїи столпѝ цр҃ко́внїи, и҆̀же сїю̀ держа́щїи вѣ́ры ᲂу҆че́ньми, согни́вшꙋюсѧ дꙋшѝ моеѧ̀ хра́минꙋ, бж҃е́ственнымъ хитродѣ́йствїемъ ᲂу҆тверди́те, бг҃ови́дцы.
Стенѝ дꙋшѐ, и҆ сле́зъ пото́ки ѿ всегѡ̀ се́рдца принесѝ гдⷭ҇еви, зовꙋ́щи: є҆ди́не ще́дрый, сп҃сѝ и҆ ѡ҆чи́сти мѧ̀, всесла́вныхъ а҆пⷭ҇лъ мл҃твами бл҃гопрїѧ́тными.
Бг҃оро́диченъ: Сїѡ́не и҆збра́нный, црⷭ҇кїй гра́де, вы́шнѧгѡ мѧ̀ гра́да граждани́на сотворѝ, съ бж҃е́ственными ᲂу҆ч҃нкѝ молѧ́щи пречⷭ҇таѧ дв҃о, безлѣ́тнаго сн҃а твоего̀.
И҆́нъ І҆рмо́съ то́йже.
Въ мѵ́рѣхъ первост҃и́тель бы́въ вели́кїй, дꙋшѝ моеѧ̀ нїко́лае, чꙋ̑вствїѧ мѵ́ромъ ѡ҆бл҃гоꙋха́й: ꙗ҆́кѡ да и҆збѣ́гнꙋ страсте́й ѕлово́нїѧ, и҆ ᲂу҆тѣ́шителевꙋ прїимꙋ̀ бл҃года́ть.
Оу҆ста́вилъ є҆сѝ премꙋ́дре твоегѡ̀ ст҃а́гѡ ѧ҆зы́ка стрꙋѧ́ми, стрꙋи̑ а҆́рїєвы хꙋ̑льныѧ. тѣ́мже вопїю́ ти: то́ки страсте́й мои́хъ и҆зсꙋшѝ мл҃твами твои́ми, нїко́лае всебл҃же́нне.
И҆зба́ви на́съ согрѣше́нїй мл҃твами твои́ми, де́мѡнскагѡ ѡ҆ѕлобле́нїѧ, ꙗ҆зы́ческагѡ плѣне́нїѧ, и҆ всѣ́хъ человѣ̑къ лꙋка́внѣйшагѡ ѕла́гѡ вре́да, да тѧ̀ ꙗ҆́кѡ и҆зба́вителѧ на́шего восхвалѧ́емъ.
Трⷪ҇ченъ: И҆̀же трⷪ҇чески є҆динонача́лїе непреста́ннѡ вѣ́рою сла́вѧще, возопїи́мъ: ѻ҆́тче, и҆ сло́ве, и҆ всест҃ы́й дш҃е, пѣсносло́вимъ тѧ̀ во всѧ̑ вѣ́ки
Бг҃оро́диченъ: Въ пло́ть на́съ ра́ди и҆з̾ тебѐ бг҃ъ ѡ҆бле́ксѧ, чⷭ҇тꙋю тебѐ всенепоро́чнꙋю, всемꙋ̀ ро́дꙋ на́шемꙋ бж҃е́ственнꙋю показа̀ дв҃о предста́тельницꙋ. тѣ́мже тѧ̀ вѣ́рнїи велегла́снѡ воспѣва́емъ.
Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ покло́ны.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Нб҃са̀ ᲂу҆ѕвѣ́здены свѣтлостьмѝ бж҃е́ственныхъ добродѣ́телей ᲂу҆́мнѡ ꙗ҆ви́стесѧ, посредѣ̀, хрⷭ҇та̀, ꙗ҆́кѡ со́лнце и҆мꙋ́ще, и҆ зємны́ѧ концы̀ премꙋ́дрїи ѡ҆бнови́сте: сегѡ̀ ра́ди бл҃жи́ми є҆стѐ.
Хрⷭ҇тѡ́вы ꙗ҆́звы на бж҃е́ственнѣмъ тѣлесѝ ва́шемъ, ꙗ҆́кѡ ᲂу҆́тварь всебл҃голѣ́пнꙋ носѧ́ще премꙋ́дрїи, ᲂу҆ѧ́звленꙋю мою̀ дꙋ́шꙋ де́мѡнскими стрѣла́ми, ꙗ҆̀же ко гдⷭ҇ꙋ хода́тайствы и҆сцѣли́те.
Въ ро́вѣ преиспо́днѣмъ мѧ̀ грѣха̀ слежа́ща, хрⷭ҇тѐ, и҆ лѣ́ности лю́тыѧ сно́мъ дꙋ́шꙋ ѡ҆тѧгчи́вшаго, твои́ми сло́ве, ᲂу҆ч҃нкѝ, ꙗ҆́коже ла́зарѧ воздви́гнꙋвый, сп҃сѝ гдⷭ҇и.
Бг҃оро́диченъ: Дꙋшѝ моеѧ̀ напра́ви шє́ствїѧ сло́ве бж҃їй, къ стезѧ́мъ за́повѣдей твои́хъ незаблꙋ́дныхъ, и҆мѣ́ѧ молѧ́щꙋюсѧ ро́ждшꙋю тѧ̀ пречⷭ҇тꙋю дв҃ꙋ, и҆ премꙋ̑дрыѧ а҆пⷭ҇лы твоѧ̑ многомлⷭ҇тиве.
И҆́нъ І҆рмо́съ то́йже.
Ст҃и́тель бж҃е́ственъ бы́въ, всѧ̑ за́пѡвѣди сохрани́лъ є҆сѝ хрⷭ҇тѡ́вы: тѣ́мже вѣ̑рнымъ храни́тель бж҃е́ственный бы́лъ є҆сѝ, ѻ҆́тче нїко́лае, соблюда́й тѣ́хъ ѿ всѧ́кихъ напа́стей и҆ ѡ҆ѕлобле́нїѧ.
Ꙗ҆́коже и҆ногда̀ препита́лъ є҆сѝ гра́дъ тво́й и҆знемога́ющъ гла́домъ, ꙗ҆́кѡ до́бръ па́стырь, прпⷣбне: та́кожде и҆ ны́нѣ препита́й дꙋ́шꙋ мою̀ хлѣ́бомъ разꙋ́мнымъ, ѻ҆́тче нїко́лае, тѧ̀ застꙋ́пника бл҃га стѧжа́вшагѡ.
Тѧ̀ вели́кое со́лнце, на высотѣ̀ лежа́щее при́снѡ цр҃кве хрⷭ҇то́вы, прпⷣбне па́стырю, вѣ́рнѡ мо́лимъ тѧ̀: свѣтоно́сными блиста́ньми свѣ́та, глꙋбо́кꙋю тьмꙋ̀ ѿженѝ грѣха̀ дꙋ́шъ на́шихъ.
Прибли́жисѧ, ꙗ҆́коже пи́шетсѧ, де́нь стра́шный прише́ствїѧ хрⷭ҇то́ва. подви́гнисѧ дꙋшѐ, ѿри́ни лѣ́ность, и҆ ᲂу҆се́рднѡ хрⷭ҇тꙋ̀ возопі́й: сп҃си́ мѧ гдⷭ҇и, нїкола́а твоегѡ̀ моле́нїемъ.
Бг҃оро́диченъ: Свѣ́телъ тѧ̀ свѣ́щникъ прⷪ҇ро́къ прови́дѧше пречⷭ҇таѧ, свѣщꙋ̀ разꙋ́мнꙋю, носѧ́щꙋю хрⷭ҇та̀, и҆́мже просвѣти́хомсѧ, и҆̀же во тьмѣ̀ лежа́щїи и҆ страсте́хъ, тѧ̀ ᲂу҆бл҃жа́емъ бцⷣе приснодв҃о.
Та́же, Досто́йно є҆́сть: и҆ покло́нъ. Та́же, є҆ктенїа̀ ма́лаѧ, свѣти́ленъ, и҆ ѱалмы̀ ѻ҆бы̑чныѧ.
На стїхо́внѣ стїхи̑ры а҆пⷭ҇лѡмъ, гла́съ є҃:
Оу҆ч҃нцы̀ сп҃сѡвы, та́йнымъ самови́дцы бы́вше, неви́димаго и҆ нача́ла неимꙋ́щаго проповѣ́дасте, глаго́люще: въ нача́лѣ бѣ̀ сло́во, не со́здани бы́сте пре́жде а҆́гг҃лъ, нижѐ наꙋчи́стесѧ ѿ человѣ̑къ, но ѿ вы́шнїѧ премꙋ́дрости. тѣ́мже дерзнове́нїе и҆мꙋ́ще, моли́те ѡ҆ дꙋша́хъ на́шихъ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
А҆пⷭ҇лы гдⷭ҇ни согла́снѡ въ пѣ́снехъ похва́лимъ, ѡ҆бо́лкшесѧ бо въ крⷭ҇тное всеѻрꙋ́жїе, і҆́дѡльскꙋю ле́сть ᲂу҆праздни́ша, и҆ побѣдоно́снїи ꙗ҆ви́шасѧ вѣне́чницы: и҆́хже мл҃твами и҆ всѣ́хъ ст҃ы́хъ, бж҃е поми́лꙋй на́съ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Въ мꙋ́кахъ сꙋ́ще ст҃і́и, ра́дꙋющесѧ, вопїѧ́хꙋ: кꙋ́плѧ на́мъ сꙋ́ть сїѧ̑ ко влⷣцѣ: вмѣ́сто бо быва́ющихъ ра́нъ на тѣлесѣ́хъ, свѣ́тло ѡ҆дѣѧ́нїе въ воскрⷭ҇нїе процвѣте́тъ на́мъ: вмѣ́стѡ безче́стїѧ, вѣнцы̀: за ᲂу҆́зы темни̑чныѧ, ра́й: и҆ за є҆́же со ѕлодѣ́и ѡ҆сꙋжде́нїе со а҆́гг҃лы житїѐ. и҆́хже мл҃твами гдⷭ҇и, сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Бл҃жи́мъ тѧ̀ бцⷣе дв҃о, ꙗ҆́кѡ и҆з̾ тебѐ возсїѧ̀ сл҃нце првⷣное хрⷭ҇то́съ, и҆мѣ́ѧй ве́лїю млⷭ҇ть.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: тропа́рь ст҃о́мꙋ, а҆́ще и҆́мать. Та́же є҆ктенїа̀, и҆ ча́съ а҃-й: ѱалмы̀ ѻ҆бы̑чныѧ: и҆ прѡ́чаѧ порѧ́дꙋ, и҆ ѿпꙋ́стъ.
Въ четверто́къ бл҃жє́нны, гла́съ є҃:
Разбо́йникъ на крⷭ҇тѣ̀, бг҃а тѧ̀ бы́ти вѣ́ровавъ хрⷭ҇тѐ и҆сповѣ́да тѧ̀ чи́стѣ ѿ се́рдца: помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни миротво́рцы, ꙗ҆́кѡ ті́и сн҃ове бж҃їи нарекꙋ́тсѧ.
Ꙗ҆́коже ѻ҆́блацы свѣ́тлїи зе́млю проидо́сте бж҃е́ственнїи ᲂу҆ч҃нцы̀, во́дꙋ живо́тнꙋю ѡ҆кроплѧ́юще, и҆ сердца̀ и҆ста́ѧвшаѧ прегрѣше́нїи бога́тнѡ напоѧ́ете.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Ꙗ҆́коже лꙋчы̀ та̑йныѧ, сл҃нца возсїѧ́вшагѡ ѿ дв҃ы чⷭ҇тыѧ, просвѣти́ли є҆стѐ сꙋ́щыѧ во тьмѣ̀ невѣ́дѣнїѧ сѣдѧ́щыѧ, бж҃е́ственнїи ᲂу҆ч҃нцы̀ хрⷭ҇та̀ бг҃а на́шегѡ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Мч҃нченъ: Разжжє́нїѧ лю́тыхъ мꙋче́нїй, премꙋ́дрїи претерпѣ́вше ᲂу҆се́рдною дꙋше́ю, попали́сте і҆́дѡльскꙋю ле́сть, и҆ къ бж҃е́ственномꙋ ᲂу҆тѣше́нїю преидо́сте ст҃і́и.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Да дра́хмꙋ во глꙋбинѣ̀ прегрѣше́нїѧ погребе́нꙋю хрⷭ҇тѐ, взе́мъ ко ѻ҆ц҃ꙋ̀ принесе́ши, а҆пⷭ҇лы проповѣ́дники сотвори́лъ є҆сѝ бж҃е́ственнымъ дх҃омъ.
Сла́ва, трⷪ҇ченъ: Пребж҃е́ственнаѧ трⷪ҇це, ѻ҆́ч҃е пребезнача́льне, собезнача́льне сн҃е, и҆ дш҃е ст҃ы́й: є҆ди́но бж҃ество̀, всѣ́хъ проповѣ̑дникъ мл҃твами цр҃ковь твою̀ сохранѝ.
И҆ ны́нѣ, бг҃оро́диченъ: А҆пⷭ҇лѡвъ ᲂу҆добре́нїе бг҃оѡбра́дованнаѧ сꙋ́щи, ѡ҆мраче́на мѧ̀ сластьмѝ жите́йскими, покаѧ́нїѧ просвѣтѝ, зарѧ́ми, ꙗ҆́кѡ да велича́ю тѧ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.