Глас 5-й. Среда.
Во вто́рникъ ве́чера,
На Гдⷭ҇и воззва́хъ, стїхи̑ры крⷭ҇тны, гла́съ є҃.
Подо́бенъ: Ра́дꙋйсѧ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Воздви́жесѧ ꙗ҆́коже а҆́гнецъ на крⷭ҇тѣ̀, и҆ возношє́нїѧ льсти́вагѡ низве́рглъ є҆сѝ: закла́въ же сѧ, кро́вїю твое́ю всю̀ ѡ҆свѧти́лъ є҆сѝ зе́млю. и҆ прободе́нъ копїе́мъ, пла́менномꙋ мнѣ̀ хрⷭ҇тѐ, ѻ҆рꙋ́жїю плєщѝ да́ти а҆́бїе повелѣ́лъ є҆сѝ, и҆ раѧ̀ вмѣсти́ти вхо́дъ, и҆ дре́ва мѧ̀ наслажда́тисѧ живо́тнагѡ небоѧ́зненнѡ. тѣ́мже сп҃се́нъ бы́въ стрⷭ҇тїю твое́ю, зовꙋ̀ ра́дꙋѧсѧ: сла́ва бж҃е́ственномꙋ крⷭ҇тꙋ̀ твоемꙋ̀, и҆́мже клѧ́твы и҆зба́вихомсѧ дре́внїѧ, и҆ бл҃гослове́нїе ѿ дре́ва ѡ҆б̾е́млемъ, и҆ ве́лїю млⷭ҇ть.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Оу҆ста́вити болѣ̑зни хотѧ̀ человѣ́кѡмъ и҆ поношє́нїѧ, пребл҃гі́й гдⷭ҇и сп҃се мо́й, распѧ́тїе терпи́ши поно́сное, и҆ же́лчи вкꙋша́еши неѕло́биве, на́шꙋ го́ресть ѿе́млѧ ѕло́бнꙋю, ᲂу҆ѧзви́всѧ сло́ве, ребра̀ прободе́нїемъ, ꙗ҆́звы на́шѧ ꙗ҆́кѡ влⷣка и҆сцѣлѧ́еши. тѣ́мже и҆ воспѣва́емъ твоѐ сла́вное хотѣ́нїе, и҆ погланѧ́ющесѧ чти́мъ копїѐ, и҆ гꙋ́бꙋ, и҆ тро́сть, и҆́миже дарова́лъ є҆сѝ мі́рꙋ твоемꙋ̀ ми́ръ и҆ ве́лїю млⷭ҇ть.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Ка́кѡ тѧ̀ і҆и҃се, є҆вре́йское мно́жество беззако́нное на крⷭ҇тѣ̀ распѧ́ти ѡ҆сꙋдѝ, не ᲂу҆ще́дривъ тебѐ ще́драгѡ: дв҃а пла́чꙋщи вѣща́ше и҆ногда̀, є҆гда̀ ᲂу҆зрѣ̀ на крⷭ҇тѣ̀ воздви́жена, є҆го́же и҆з̾ ᲂу҆тро́бы нестра́стнѡ породѝ. что́ ти содѣ́ѧ беззако́нное собо́рище, ча́до моѐ вожделѣ́нное, сн҃е мо́й превозлю́бленнѣйшїй; потщи́сѧ и҆ сп҃сѝ, вѣ́рою твоѐ сла́вѧщихъ распѧ́тїе, и҆ менѐ, ꙗ҆́коже ѡ҆бѣща́лъ є҆сѝ велича́ющихъ, ꙗ҆́кѡ є҆ди́нъ всепребл҃гі́й.
И҆́ны стїхи̑ры бцⷣѣ, гла́съ то́йже:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Хотѧ̀ рꙋкоположе́нїе а҆да́ма первозда́ннагѡ ѿѧ́ти до конца̀ всеболѣ́зненное чл҃вѣколю́бче, ꙗ҆́кѡ созда́тель а҆да́мовъ, гвоздьмѝ пригвозди́сѧ, безгрѣ́шне хрⷭ҇тѐ, и҆ копїе́мъ бж҃е́ствєннаѧ твоѧ̑ ре́бра ᲂу҆ѧзви́въ на́съ ра́ди, возбранѧ́еши сло́ве ѻ҆рꙋ́жїю пла́менномꙋ, не брани́ти на́мъ вхо́да твои̑мъ рабѡ́мъ. тѣ́мъ же славосло́вѧще тѧ̀, пое́мъ держа́вꙋ твою̀, и҆ крⷭ҇тъ тво́й чти́мъ, и҆ воспѣва́емъ чл҃вѣколю́бче, и҆́мже всѧ́ко є҆стество̀ ѡ҆брѣ́те неболѣ́зненное достоѧ́нїе и҆ ве́лїю млⷭ҇ть.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
А҆́гнца своего̀ а҆́гница и҆ногда̀ зрѧ́щи къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ грѧде́ши, ча́до моѐ сладча́йшее хрⷭ҇тѐ; чесѡ̀ ра́ди тече́нїемъ си́мъ тече́ши долготерпѣли́ве без̾ лѣ́ности, і҆и҃се превозжелѣ́нне; безгрѣ́шный и҆ многомлⷭ҇тиве гдⷭ҇и, да́ждь мѝ сло́во рабѣ̀ твое́й, сн҃е мо́й вселюбе́зный. не пре́зри мѧ̀ ще́дре молча̀, стра́ннѡ ро́ждшꙋю тѧ̀, бж҃е живода́вче, да́рꙋѧй мі́рови ве́лїю млⷭ҇ть.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Прⷭ҇то́лъ херꙋві́мскїй вои́стиннꙋ, ꙗ҆́кѡ превы́шши тва́рей бы́сть: въ тѧ́ бо бж҃е́ственное сло́во, на́шъ зра́къ ѡ҆бнови́ти хотѧ̀, всели́сѧ чⷭ҇таѧ, и҆ и҆з̾ тебѐ проше́дъ плотоно́сецъ, ꙗ҆́кѡ бл҃гоꙋтро́бенъ, крⷭ҇тъ и҆ стрⷭ҇ть на́съ ра́ди прїѧ́тъ, и҆ воскрⷭ҇нїе ꙗ҆́кѡ бг҃ъ дарова̀. тѣ́мже ꙗ҆́кѡ примири́вшꙋю на́ше ѡ҆сꙋжде́нное є҆стество̀, зижди́телю бл҃годарѧ́ще, къ немꙋ̀ и҆ тебѣ̀ зове́мъ: пода́ждь на́мъ ѡ҆ставле́нїе прегрѣше́нїй, и҆ млⷭ҇ть твои́ми мл҃твами.
Сла́ва, и҆ ны́нѣ, крⷭ҇тобг҃оро́диченъ: И҆збавле́нїе на́съ ра́ди, и҆ цѣ́нꙋ вели́кꙋю, пречⷭ҇тꙋю кро́вь твою̀ и҆зво́лилъ є҆сѝ да́ти, безгрѣ́шне хрⷭ҇тѐ мо́й, всѣ̑мъ хотѧ̀ сп҃се́нїе полꙋчи́ти. тѣ́мже тѧ̀ зрѧ́щи пригвожде́на мт҃и твоѧ̀, рыда́ющи власы̀ терза́ше своѧ̑, глаго́лющи: ча́до, а҆́гнче всенепоро́чный, мі́ръ хотѧ̀ и҆зба́вити чⷭ҇тно́ю твое́ю кро́вїю, ѿ ѻ҆́чїю мое́ю ка́кѡ заше́лъ є҆сѝ сп҃се, незаходи́мое сл҃нце, и҆́же всѣ̑мъ подаѧ́й просвѣще́нїе, и҆ ми́ръ, и҆ ве́лїю млⷭ҇ть.
Та́же, Свѣ́те ти́хїй: Прокі́менъ днѐ: Сподо́би гдⷭ҇и въ ве́черъ се́й:
На стїхо́внѣ стїхи̑ры крⷭ҇тны, гла́съ є҃:
Гдⷭ҇и, при мѡѷсе́и и҆ногда̀ проро́цѣ, то́чїю ѡ҆́бразъ крⷭ҇та̀ твоегѡ̀ ꙗ҆влѧ́емь, побѣжда́ше врагѝ твоѧ̑. ны́нѣ же са́мый крⷭ҇тъ тво́й и҆мꙋ́ще, по́мощи про́симъ: ᲂу҆крѣпѝ цр҃ковь твою̀, мно́гїѧ ра́ди ми́лости, человѣколю́бче.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Крⷭ҇тъ тво́й хрⷭ҇тѐ, а҆́ще и҆ дре́во ви́димо є҆́сть сꙋщество́мъ, но бж҃е́ственною ѡ҆дѣ́ѧно є҆́сть си́лою, и҆ чꙋ́вственнѣ мі́рови ꙗ҆влѧ́емь, ᲂу҆́мнѡ на́ше чꙋдотвори́тъ сп҃се́нїе, є҆мꙋ́же кла́нѧющесѧ сла́вимъ тѧ̀ сп҃се, поми́лꙋй на́съ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Мч҃нченъ: Моли́те за ны̀ ст҃і́и мч҃нцы, да и҆зба́вимсѧ ѿ беззако́нїй на́шихъ: ва́мъ бо дана̀ є҆́сть бл҃года́ть моли́тисѧ за ны̀.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Прпⷣбне ѻ҆́тче:
Ве́сь воспрїи́мъ мо́й зра́къ, созда́тель и҆ бг҃ъ ѡ҆блече́сѧ, воѡбрази́ти и҆́же пре́жде па́дшїй зра́къ а҆да́мовъ восхотѣ́вый, на крⷭ҇тъ вознесе́сѧ во́лею ꙗ҆́кѡ пови́ненъ: и҆ рꙋ́цѣ распросте́ръ ны́нѣ, и҆сцѣлѧ́ѧ рꙋ́цѣ ꙗ҆̀же дре́вле ѡ҆сла́блєнныѧ къ дре́вꙋ снѣ́дномꙋ. є҆го́же всечⷭ҇таѧ ви́дѧщи восклица́ше: что̀ сїѐ твоѐ сн҃е мо́й неизрече́нное долготерпѣ́нїе; не терплю̀ на крⷭ҇тѣ̀ воздви́жена зрѧ́щи тѧ̀, го́рстїю содержа́ща всеѧ̀ землѝ концы̀.
Та́же, Ны́нѣ ѿпꙋща́еши.раба̀ твоего̀ влⷣко: Трист҃о́е. По Ѻ҆́ч҃е на́шъ: тропа́рь ст҃о́мꙋ. Сла́ва, и҆ ны́нѣ, бг҃оро́диченъ, во гла́съ тропарѧ̀. Та́же, є҆ктенїа̀, и҆ ѿпꙋ́стъ.
Во вто́рникъ на повече́рїи,
канѡ́нъ прест҃ѣ́й бцⷣѣ. Гла́съ є҃.
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Твои́хъ ра̑бъ и҆з̾ глꙋбины̀ се́рдца мл҃твы вѣ́рнѡ приноси̑мыѧ тѝ бцⷣе, прїе́мли: и҆ сїѧ̑ приносѧ́щи сн҃ꙋ твоемꙋ̀, пода́ждь прегрѣше́нїй ѡ҆ставле́нїе.
Ꙗ҆́кѡ вои́стиннꙋ бл҃года́тельница сꙋ́щи, богатѧ́щи земноро́дныхъ, и҆ сп҃се́нїѧ две́ре къ жи́зни вводѧ́щи, дв҃о бг҃ома́ти, предстоѧ́щи всегда̀ не преста́й, ѡ҆ молѧ́щихъ тѧ̀.
Сла́ва: Ны́нѣ прекло́ншисѧ пѣвє́цъ твои́хъ мольба́ми, ꙗ҆́кѡ держа́вна ко сп҃се́нїю сꙋ́щи по́мощь: ѿ бѣ́дъ моли́твами твои́ми и҆з̾е́мши влⷣчце, цѣ́лы сохранѝ почита́ющыѧ тѧ̀.
И҆ ны́нѣ: Предвари́вши вско́рѣ и҆ предстоѧ́щи те́плѣ прест҃а́ѧ дв҃о, ѕѣлѡ̀ ѡ҆держи́мыхъ на́съ лю́тыми ѡ҆бстоѧ́нїи ᲂу҆мили́вшисѧ и҆зба́ви, и҆ ѿ печа́ли свободѝ.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
Свѣ́та твоегѡ̀ бо́дренною бж҃е́ственною мольбо́ю те́мный ѻ҆́блакъ се́рдца моегѡ̀ мт҃и бж҃їѧ ѡ҆зари́вши, сы́на днѐ покажи́ мѧ добродѣ́тельми просвѣще́на, свѣтоводи́тельнице дꙋша́мъ на́шымъ.
Пѣ́ти тѧ̀ по достоѧ́нїю жела́юще при́снѡ, ѻ҆ба́че недоꙋмѣ́юще, хвалꙋ̀ ѿ ᲂу҆сте́нъ прино́симъ хꙋды́хъ, ю҆́же бл҃гопремѣ́ннѡ прїимѝ, и҆ мольба́мъ послꙋ́шница бꙋ́ди, вѣ́рнѡ молѧ́щымсѧ тѝ.
Сла́ва: Доброплѡ́дны неплѡ́дныѧ дꙋ́шы показꙋ́ющи, и҆ ѡ҆лѧденѣ́вшее ѡ҆чища́ющи твое́ю мл҃твою, и҆ мою̀ дꙋ́шꙋ пло́дъ даю́щꙋю вѣ́рꙋ и҆ житїѐ нескве́рно, ты̀ бг҃ороди́тельнице покажѝ.
И҆ ны́нѣ: И҆́же всеѧ̀ землѝ го́рстїю содержа́й концы̀, ка́кѡ мт҃рними нѣ́драми ѡ҆б̾е́млетсѧ; млеко́мъ же пита́етсѧ ѿ сосє́цъ, насыща́ѧ всѧ́ко живо́тно бл҃говоле́нїѧ: и҆ бога́тый и҆злїѧ́нїемъ ѡ҆бнищава́етъ воплоща́емь.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ сп҃стѝ пома̑занныѧ твоѧ̑ прише́лъ є҆сѝ.
Ꙗ҆́кѡ є҆ди́нꙋ тѧ̀ къ бг҃ꙋ хода́таицꙋ вѣ́дꙋще, согрѣше́нїй до́лги разрѣша́ющꙋю пови̑ннымъ пречⷭ҇таѧ, хвала́ми и҆ пѣ́сньми почита́емъ.
Цр҃ковь ѡ҆свѧще́ннꙋю тѧ̀ показа̀, все́льсѧ въ тѧ̀ бг҃ъ дв҃о пренепоро́чнаѧ: є҆го́же при́снѡ молѝ соблюстѝ невре́дны рабы̑ твоѧ̑.
Сла́ва: Мольбꙋ̀ ни́щихъ ᲂу҆слы́ши ᲂу҆пова́ющихъ на тѧ̀ бцⷣе, и҆ ᲂу҆скорѝ ѿ бѣ́дъ и҆зба́вити на́съ мт҃рними твои́ми дерзнове́нїи.
И҆ ны́нѣ: Въ ско́рбехъ сла́дкое ᲂу҆тѣше́нїе, и҆ въ напа́стехъ по́мощь, и҆ въ бѣда́хъ предста́тельницꙋ тѧ̀ мт҃и бж҃їѧ стѧжа́вше, ѡ҆ѕлобле́нїй всѧ́кихъ и҆збавлѧ́емсѧ.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ, ꙗ҆́кѡ ри́зою: къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
И҆́же первонача́льнаго въ лѣ́то поро́ждши, во ѡ҆пи́саннѣй пло́ти, вои́стиннꙋ є҆стество́мъ неѡпи́саннаго: того̀ молѝ непреста́ннѡ ѡ҆ рабѣ́хъ твои́хъ.
Ты̀ приближа́ешисѧ вско́рѣ сꙋ́щымъ въ нꙋ́ждахъ, при́снѡ помога́ющи, и҆ ᲂу҆правлѧ́ющи призыва́ющыѧ тѧ̀ во и҆скꙋше́нїихъ ко сп҃се́нїю пречⷭ҇таѧ.
Сла́ва: Млⷭ҇тива є҆стество́мъ, млⷭ҇рдаго бг҃а мл҃твами показа́вши, пода́ждь твои̑мъ рабѡ́мъ ми́рнꙋ жи́знь, и҆ прегрѣше́нїй и҆збавле́нїе пренепоро́чнаѧ.
И҆ ны́нѣ: Оу҆́гль ро́ждшаѧ, є҆го́же ᲂу҆зрѣ̀ и҆са́їа, попали́ ми вє́щи, всенепоро́чнаѧ, согрѣше́нїй, и҆ просвѣти́ мѧ, молю́сѧ.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Оу҆мерщвле́ныхъ на́съ страстьмѝ грѣха̀ влⷣчце, возста́вивши ѡ҆живѝ мл҃твами твои́ми, ꙗ҆́кѡ тлѝ потреби́телѧ ро́ждшаѧ.
Неле́стно ᲂу҆пова́нїе тѧ̀, и҆ неѡбори́мꙋ стѣ́нꙋ на врагѝ, и҆ тве́рдꙋ и҆мꙋ́ще по́мощь, на ны̀ навѣ́тѡвъ не ᲂу҆бои́мсѧ.
Сла́ва: Земнорѡ́днымъ предста́ни въ болѣ́знехъ при́снѡ чⷭ҇таѧ: и҆ лю́тыхъ ᲂу҆вѧда́ющихъ твоѧ̑ слꙋжи́тели не вре́дны сохранѝ.
И҆ ны́нѣ: Дꙋ́шꙋ мою̀ просвѣтѝ ѡ҆мрачи́вшꙋюсѧ, ѻ҆́блакомъ помышле́нїй находѧ́щихъ мѝ бг҃оневѣ́сто, навѣ́томъ человѣкоꙋбі́йцы бѣ́са.
Та́же: Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ є҃:
Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ. сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇и, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Прїимѝ влⷣчце вѣ́рныхъ твои́хъ прошє́нїѧ ра̑бъ, напа́стей и҆з̾има́ющи, и҆ ѿ скорбе́й сп҃са́ющи вѣ́рнѡ пою́щихъ: бж҃е, бл҃гослове́нъ є҆сѝ.
И҆́же бл҃ги́хъ дѣ́лателѧ бг҃а на́мъ ро́ждшаѧ, того̀ ᲂу҆молѝ мт҃рними мольба́ми чⷭ҇таѧ, ᲂу҆ще́дрити ѡ҆ тебѣ̀ хва́лѧщихсѧ.
Сла́ва: Предста́тельницꙋ непобѣди́мꙋю, и҆ ѡ҆снова́нїе непоколе́блемо тѧ̀ стѧжа́вше, и҆ твои́мъ ѡ҆дѣ́ѧвшесѧ застꙋпле́нїемъ влⷣчце, побѣжда́емъ стрѣльца̀ ꙗ҆̀же на ны̀ кова̑рствїѧ.
И҆ ны́нѣ: Ви́ждь смире́нїе твоегѡ̀ раба̀ влⷣчце, и҆ вѣ́чнагѡ ѻ҆гнѧ̀ свободи́ мѧ непреста́ннѡ пою́щаго: бж҃е бл҃гослове́нъ є҆сѝ.
Пѣ́снь и҃
І҆рмо́съ: Тебѣ̀ вседѣ́телю въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Глаго́лы вкꙋ́пѣ и҆ мы́сльми хвалꙋ̀ дв҃о, тебѣ̀ плетꙋ́ще, вѣ́рнїи взыва́емъ: гдⷭ҇а по́йте, и҆ превозноси́те є҆го̀ во вѣ́ки.
Всю̀ тебѐ добро́тꙋ соломѡ́нъ бли́жнюю бг҃ꙋ преднаписа̀, ꙗ҆́кѡ ближа́йшꙋ сꙋ́щꙋю семꙋ̀, мт҃рнимъ дв҃и́це дерзнове́нїемъ, сꙋ́щихъ въ мі́рѣ и҆збавлѧ́ющи.
Сла́ва: Тѧ̀ по бз҃ѣ ᲂу҆пова́нїе сп҃се́нїѧ въ напа́стехъ и҆мꙋ́ще вѣ́рнїи взыва́емъ: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки.
И҆ ны́нѣ: Прїимѝ пѣ́снь ѿ хꙋды́хъ ᲂу҆сте́нъ, дв҃о всепѣ́таѧ, вопїю́щихъ тѝ: ра́дꙋйсѧ болѧ́щымъ тѣлѡ́мъ врачевство̀, и҆ ѿча̑ѧннымъ дꙋша́мъ сп҃се́нїе.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Къ тебѣ̀ пролива́емъ, ю҆́же ѿ болѣ́зни мл҃твꙋ на́шꙋ: поми́лꙋй на́съ грѣ́шныхъ, да не посрами́мсѧ въ де́нь и҆скꙋше́нїѧ, тѧ̀ всемлⷭ҇рдꙋю бцⷣꙋ призыва́ющїи.
Пе́рстное сро́дство не пре́зри влⷣчце чⷭ҇таѧ, но бꙋ́ди помо́щница покрыва́ющи, въ печа́лехъ ᲂу҆крѣплѧ́ющи, и҆ и҆збавлѧ́ющи всѣ́хъ недꙋ́жныхъ: на тѧ́ бо ᲂу҆пова́емъ гото́вꙋю, во є҆́же сп҃стѝ на́съ.
Сла́ва: Бж҃е ᲂу҆слы́ши люде́й твои́хъ мл҃твꙋ ны́нѣ, и҆ и҆зба́ви на́съ вре́да вра́жїѧ: сѐ тебѣ̀ приво́димъ и҆́стинное ѡ҆чище́нїе, тебѐ ро́ждшꙋю, ю҆́же любо́вїю ᲂу҆бл҃жа́емъ.
И҆ ны́нѣ: Под̾ держа́вꙋ крѣ́пости твоеѧ̀, влⷣчце, притека́емъ то́щнѡ всѝ земноро́днїи, просѧ́ще млⷭ҇ти и҆ щедрѡ́ты твоѧ̑ млⷭ҇тивыѧ, ꙗ҆̀же пролїѧ́вши всѣ́хъ на́съ ѡ҆свѧтѝ.
Та́же, Досто́йно є҆́сть: И҆ покло́нъ. Та́же Трист҃о́е. По Ѻ҆́ч҃е на́шъ: тропа́рь, и҆ про́чее ѻ҆бы́чное, и҆ ѿпꙋ́стъ.
Въ сре́дꙋ ᲂу҆́тра,
по а҃-мъ стїхосло́вїи, сѣда́льны крⷭ҇тны. Гла́съ є҃:
Мѣ́сто ло́бное ра́й бы́сть, то́чїю бо водрꙋзи́сѧ дре́во крⷭ҇тное, а҆́бїе и҆зрастѝ гро́здъ живо́тный, въ на́ше весе́лїе, тебѐ сп҃се: сла́ва тебѣ̀.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Распе́ншагосѧ сп҃са и҆ и҆зба́вителѧ на́шего во́лею, ꙗ҆́коже вѣ́сть, и҆ ꙗ҆́коже бл҃гоизво́ли, воспои́мъ вѣ́рнїи, и҆ просла́вимъ: ꙗ҆́кѡ пригвоздѝ на крⷭ҇тѣ̀ грѣхѝ человѣ́кѡвъ: и҆збавлѧ́ѧ ѿ пре́лести ро́дъ человѣ́ческїй, и҆ црⷭ҇твїю сподо́билъ є҆́сть.
Сла́ва, и҆ ны́нѣ, крⷭ҇тобг҃оро́диченъ: Возвы́шена на дре́вѣ ꙗ҆́кѡ ᲂу҆зрѣ̀ роди́вшаѧ тѧ̀ болѣ́зней кромѣ̀, рыда́ше съ пла́чемъ и҆ взыва́ше: ᲂу҆вы̀ мнѣ̀ сладча́йшїй сн҃е, ᲂу҆ѧзвлѧ́юсѧ дꙋше́ю, на крⷭ҇тѣ̀ зрѧ́щи тѧ̀ пригвожде́на, посредѣ̀ двою̀ ѕлѡдѣ́ю, ꙗ҆́коже ѕлодѣ́ѧ пригвожде́на.
По в҃-мъ стїхосло́вїи сѣда́льны, гла́съ є҃.
Распѧ́тїе претерпѣ́вый свое́ю во́лею, и҆ ѿ и҆стлѣ́нїѧ человѣ́ки своводи́въ сп҃се, воспѣва́емъ вѣ́рнїи, и҆ покланѧ́емсѧ тѝ, ꙗ҆́кѡ просвѣти́лъ є҆сѝ на́съ си́лою крⷭ҇тною: и҆ стра́хомъ сла́вимъ тѧ̀ чл҃вѣколю́бче ще́дрый, ꙗ҆́кѡ жизнода́вца и҆ гдⷭ҇а.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
Дре́во крⷭ҇та̀ твоегѡ̀ сп҃се на́шъ, мі́рови ꙗ҆ви́сѧ сп҃се́нїе: на то́мъ бо пригвозди́лсѧ є҆сѝ во́лею, и҆ ѿ клѧ́твы и҆зба́вилъ є҆сѝ земнорѡ́дныѧ: всѣ́хъ ра́досте, гдⷭ҇и, сла́ва тебѣ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Гдⷭ҇и, ча́шѣ стрⷭ҇те́й твои́хъ стрⷭ҇тоте́рпцы твоѝ поревнова́вше, ѡ҆ста́виша житє́йскаѧ краснѣ̑йшаѧ, и҆ бы́ша а҆́гг҃лѡмъ соприча̑стницы: тѣ́хъ мольба́ми пода́ждь дꙋша́мъ на́шымъ ми́ръ хрⷭ҇тѐ, и҆ ве́лїю млⷭ҇ть.
Сла́ва, и҆ ны́нѣ, крⷭ҇тобг҃оро́диченъ: Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̑ ᲂу҆праздни́сѧ, и҆ де́мѡнскаѧ крѣ́пость попра́сѧ, сегѡ̀ ра́ди вѣ́рнїи, по до́лгꙋ тѧ̀ при́снѡ пое́мъ, и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.
По г҃-мъ стїхосло́вїи, сѣда́льны, гла́съ є҃.
Подо́бенъ: Собезнача́льное сло́во:
Прⷪ҇ро́чєскаѧ проречє́нїѧ ᲂу҆жѐ и҆спо́лнишасѧ, дре́внїй совѣ́тъ тво́й коне́цъ прїѧ́тъ: ты́ бо во́лею всѣ́хъ цр҃ю̀, пло́тїю ѡ҆ꙋбо́жалъ є҆сѝ хрⷭ҇тѐ, и҆ прїѧ́лъ є҆сѝ на́съ ра́ди взы́ти на крⷭ҇тъ, и҆ сме́рть претерпѣ́ти. тѣ́мже сла́вимъ сло́ве, є҆́же па́че ᲂу҆ма̀ твоѐ схожде́нїе.
На крⷭ҇тѣ́ тѧ пригвожде́на и҆ ᲂу҆снꙋ́вша а҆́гг҃льстїи чи́нове ви́дѣвше, ᲂу҆страши́шасѧ, і҆и҃се всецр҃ю̀: и҆ побѣго́ша а҆́бїе бѣсо́встїи полцы̀, и҆ сокрꙋши́шасѧ верєѝ а҆́дѡвы, и҆ сме́рти мꙋчи́тельство низложи́сѧ: и҆ и҆̀же во гробѣ́хъ ме́ртвїи воскр҃со́ша.
Сла́ва, и҆ ны́нѣ, крⷭ҇тобг҃оро́диченъ: На крⷭ҇тѣ̀ зрѧ́щи тѧ̀ хрⷭ҇тѐ мт҃и твоѧ̀, во́лею посредѣ̀ разбѡ́йникꙋ ви́сѧща, растерза́ющисѧ ᲂу҆тро́бою мт҃рски глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀, ꙗ҆́коже ѕлодѣ́й пригвожде́нъ є҆сѝ; и҆́же человѣ́ческїй ро́дъ хотѧ̀ ѡ҆живи́ти, ꙗ҆́кѡ бл҃гоꙋтро́бенъ.
Канѡ́нъ крⷭ҇тꙋ̀, є҆гѡ́же краегране́сїе си́це: [Мі́ръ возносѧ́й хрⷭ҇тѐ, возне́слсѧ є҆сѝ на дре́во.] Творе́нїе і҆ѡ́сифово, гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
И҆́же непостиже́нїемъ разꙋмѣва́емаго воплоще́нна, и҆ мі́рꙋ ꙗ҆́вльшасѧ пло́тїю, на дре́вѣ воздви́же дре́вле восхотѣ́вшаго, є҆вре́йскїй собо́ръ законопрестꙋ́пный.
Є҆гда̀ плодоно́сна вїногра́да тебѐ хрⷭ҇тѐ, на дре́во крⷭ҇тное є҆вре́и возбѣси́вшесѧ воздвиго́ша: тогда̀ вїно̀ и҆ска́палъ є҆сѝ весе́лїѧ сло́ве, всѧ́ко пїѧ́нство ѕлы́хъ ѿе́млющее.
Мч҃нченъ: Зако́нѡмъ не подпа́даетъ похва̑льнымъ мч҃нцы, ва́ше терпѣ́нїе: па́че бо є҆стества̀ всѧ́кагѡ чл҃вѣ́ческагѡ болѣ̑зни претерпѣ́сте, и҆ ко ᲂу҆покое́нїю неболѣ́зненномꙋ всели́стесѧ веселѧ́щесѧ.
Мч҃нченъ: Во́лны мꙋ́къ преплы́вше ѡ҆кормле́нїемъ сло́ва, всехва́льнїи хрⷭ҇тѡ́вы страда́льцы, во приста̑нища достиго́сте нбⷭ҇наѧ, бж҃е́ственныѧ тишины̀ ны́нѣ наслажда́ющесѧ.
Бг҃оро́диченъ: Є҆гда̀ и҆з̾ чре́ва твоегѡ̀ рожде́ннагѡ гдⷭ҇а, ᲂу҆смотри́вши на дре́во без̾ пра́вды возвыша́ема, дв҃о прослези́ласѧ є҆сѝ, и҆ тогѡ̀ воспѣ́ла є҆сѝ неизрече́нное вои́стиннꙋ снизхожде́нїе.
Дрꙋгі́й канѡ́нъ бцⷣѣ, є҆гѡ́же краегране́сїе: [Пѧ́тое быва́етъ пѣ́нїе ны́нѣ дв҃ѣ.] Гла́съ є҃:
І҆рмо́съто́йже.
Двє́ри бж҃е́ственныѧ сла́вы, ѿве́рзшаѧ ра̑йскїѧ двє́ри, покаѧ́нїѧ двє́ри и҆ мнѣ̀ ѿве́рзи молю́сѧ, и҆ ᲂу҆́мъ мо́й просвѣтѝ воспѣва́ти тѧ̀, бг҃ора́дованнаѧ.
Оу҆ста́вила є҆сѝ сме́ртное ᲂу҆стремле́нїе, ро́ждшаѧ живото́мъ и҆ сме́ртїю ѡ҆блада́ющаго, всенепоро́чнаѧ: того̀ ᲂу҆́бѡ молѝ, ᲂу҆мерщвлѧ́ющаѧ прегрѣшє́нїѧ, дꙋ́шꙋ мою̀ ᲂу҆ста́вити, и҆ сп҃сти́ мѧ.
Є҆ди́нꙋ ѿ родѡ́въ тѧ̀ добро́тꙋ і҆а́кѡвлю, и҆збра̀ сло́во ѻ҆ц҃ꙋ̀ собезнача́льное, и҆ ѿ твои́хъ воплоти́сѧ крове́й: влⷣчце, сп҃си́ мѧ хода́тайствы твои́ми.
Ꙗ҆́коже на рꙋно̀ до́ждь нбⷭ҇ный на тѧ̀ сше́дшїй, под̾ѧ́ла є҆сѝ всечⷭ҇таѧ: тѣ́мже ѡ҆дождє́нїѧ страсте́й мои́хъ и҆зсꙋшѝ, молю́ тѧ мт҃и дв҃о.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
Распина́ешисѧ, и҆ ра́й па́ки ѿверза́етсѧ, и҆ разбо́йникъ пре́жде всѣ́хъ ра́дꙋѧсѧ вхо́дитъ: и҆ ᲂу҆мира́еши і҆и҃се мо́й, и҆ вра́гъ льсте́цъ ᲂу҆мерщвлѧ́етсѧ, ᲂу҆мерщвле́нный же а҆да́мъ ѡ҆живлѧ́етсѧ: сла́ва мно́гомꙋ твоемꙋ̀ млⷭ҇рдїю.
Оу҆вѧда́еши грѣхо́вный пла́мень, распина́емь і҆и҃се на дре́вѣ за бл҃гость: рѣши́ши пре́лесть свѧзꙋ́емь, ѡ҆бнаже́нъ бы́въ ѡ҆дѣва́еши ѻ҆де́ждею сла́вы человѣ́ка: сла́ва мно́гомꙋ бл҃гоꙋтро́бїю твоемꙋ̀.
Мч҃нченъ: Ꙗ҆вле́й при́снѡ сїѧ́ющыѧ ѕвѣ́зды мч҃нки, нече́стїѧ тьмꙋ̀ прогонѧ́ющыѧ: тѣ́хъ мольба́ми хрⷭ҇тѐ, но́щь ѕѡ́лъ мои́хъ ѿженѝ, и҆ просвѣтѝ ѡ҆мраче́нное моѐ се́рдце.
Мч҃нченъ: Зако́ннѡ бл҃госла́внїи пострада́вше мч҃нцы, и҆ зако́нною вѣ́рою вѣнцы̀ вѣнча́ни бы́ша, и҆ беззако́ннꙋющихъ совѣ́ты ᲂу҆клони́ша мꙋ́дрѣ, и҆ пи́щꙋ бж҃е́ственнꙋю прїѧ́ша, и҆ ра́йское вселе́нїе.
Бг҃оро́диченъ: Пою́тъ а҆́гг҃льстїи ли́цы тѧ̀ всепѣ́таѧ, без̾ разсꙋжде́нїѧ си́хъ преимꙋ́щꙋю: бг҃а бо родила̀ є҆сѝ пло́тїю, ѿ дре́ва клѧ́твꙋ дре́вомъ погꙋ́бльшаго, и҆ бл҃гослове́нїе и҆сточи́вшаго.
И҆́нъ І҆рмо́съ то́йже.
Стрѣла́ми грѣхо́вными ᲂу҆ѧ́звленнаго мѧ̀, въ тебѣ̀ лѣчьбо́ю всего̀ и҆сцѣлѝ, чⷭ҇таѧ: и҆ ѿ содержа́щихъ мѧ̀ и҆змѣнѝ болѣ́зней, ꙗ҆̀же болѣ́зней премѣни́вшаѧ ро́дъ человѣ́ческїй ржⷭ҇тво́мъ твои́мъ.
Ꙗ҆̀же всꙋ́е смире́нное се́рдце моѐ ѡ҆скорблѧ́ющыѧ и҆ и҆́щꙋщыѧ ᲂу҆мертви́ти мѧ̀ неви̑димыѧ врагѝ, влⷣчце, твои́мъ низложѝ застꙋпле́нїемъ, да пребꙋ́дꙋтъ бездѣ́льни, стꙋда̀ и҆сполнѧ́еми.
Во́дъ животво́рныхъ мѧ̀ и҆спо́лни влⷣчце, ꙗ҆́же бж҃е́ственнꙋю во́дꙋ мі́рови и҆сточи́вшаѧ: беззако́нїй мои́хъ лю̑тыѧ и҆зсꙋшѝ пото́ки, и҆ се́рдца моегѡ̀ во́лны бж҃е́ственною твое́ю тишино́ю ᲂу҆кротѝ.
Пре́йде сѣ́нь, зако́нꙋ сконча́емꙋ: законода́вца бо хрⷭ҇та̀ родила̀ є҆сѝ, бл҃года́ть ѡ҆чище́нїѧ и҆ просвѣще́нїѧ на́мъ законополага́юща, и҆ клѧ́твы и҆з̾има́юща, пречⷭ҇таѧ дв҃о, всенепоро́чнаѧ.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Дꙋша́мъ всеконе́чное и҆збавле́нїе сотворѧ́ѧ хрⷭ҇тѐ, въ рꙋ́цѣ ѻ҆ц҃ꙋ̀ пре́далъ є҆сѝ прест҃ꙋ́ю дꙋ́шꙋ твою̀, на дре́вѣ во́лею ви́симь.
Непра́ведный сꙋдїѧ̀ ѡ҆сꙋди́ тѧ првⷣнаго сꙋдїю̀ і҆и҃се, ᲂу҆мре́ти на дре́вѣ ви́симꙋ: ꙗ҆́кѡ да ѡ҆правди́ши на́съ, непра́веднѡ врагꙋ̀ подкло́ншыѧсѧ.
Мч҃нченъ: Ви́дѣти сподо́бистесѧ мч҃нцы ꙗ҆̀же ѿ вѣ́ка бл҃га́ѧ, бѣда́мъ мнѡ́гимъ и҆ ско́рбемъ, и҆ неизчє́тнымъ мꙋ́камъ на землѝ ꙗ҆вле́ннѡ причасти́вшесѧ.
Мч҃нченъ: Зи́мꙋ и҆скꙋше́нїй преидо́сте, и҆ къ веснѣ̀ воздаѧ́нїѧ нбⷭ҇нагѡ достиго́сте, и҆ ликѡ́мъ а҆́гг҃льскимъ, честні́и сочета́стесѧ мч҃нцы.
Бг҃оро́диченъ: Ѻ҆рꙋ́жїе бж҃е́ственныхъ стрⷭ҇те́й про́йде твою̀ бл҃гослове́ннаѧ, дꙋ́шꙋ, внегда̀ ви́дѣла є҆сѝ распина́ема твоего̀ сн҃а, и҆ въ рꙋ́цѣ ѻ҆́ч҃и дꙋ́шꙋ преда́вша.
И҆́нъ І҆рмо́съ то́йже.
Ѿ дѣ́лъ сп҃се́нїѧ нѣ́сть мѝ: тѣ́мже под̾ кро́въ тво́й съ наде́ждею прибѣга́ю, дв҃о всенепоро́чнаѧ, ѿча́ѧннаго мѧ̀ сп҃сѝ мл҃твами твои́ми.
Свѣ́та чи́стое прїѧ́телище, сл҃нца носи́ло честно́е, ѡ҆мраче́ное се́рдце моѐ лю́тыхъ мра́комъ, ѡ҆зарѝ и҆ сп҃си́ мѧ, молю́сѧ, влⷣчце.
И҆стка́вшаѧ ѻ҆де́ждꙋ ѿ крове́й твои́хъ дв҃ственныхъ, нб҃о ѻ҆́блаки ѻ҆трокови́це ѡ҆дѣва́ющемꙋ, ѻ҆де́ждею нетлѣ́нїѧ ѡ҆блецы̀, пре́лестїю ѡ҆бнаже́ннаго мѧ̀.
Ѿ ᲂу҆до́лїй жите́йскихъ, ꙗ҆́кѡ крі́нъ воспрїѧ́тъ тѧ̀ зижди́тель: и҆з̾ тебѐ мі́рови вдохнꙋ̀ дх҃о́вное бл҃гоꙋха́нїе, дв҃о прест҃а́ѧ бг҃оневѣ́сто.
Пѣ́снь
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Стоѧ́лъ є҆сѝ сꙋди́мь првⷣный сꙋдїѐ, хрⷭ҇тѐ и҆ ѡ҆сꙋжда́ѧ пло́тїю враждꙋ̀, тро́стїю бїе́мь, и҆ свобожде́нїе соверше́нное подписꙋ́ѧ мнѣ̀.
Тебѐ ꙗ҆́кѡ ви́дѣ пло́тїю ви́сима хрⷭ҇тѐ на дре́вѣ, со́лнце свѣ́тъ во тьмꙋ̀ преложѝ, и҆ землѧ̀ поколеба́сѧ, и҆ ка́менїе распаде́сѧ.
Мч҃нченъ: Землѝ концы̀ ѡ҆свѧти́ли є҆стѐ, ꙗ҆́кѡ и҆спо́лнителїе бо зако́на бж҃е́ственнагѡ, всехва́льнїи мч҃нцы, стра́ждꙋще, ст҃ы́ню наслѣ́довасте.
Мч҃нченъ: Предо́брѣйшїи и҆ бг҃оза́рнѣйшїи, и҆̀же бж҃е́ственною сла́вою ѡ҆дѣ́ѧни, и҆ ѡ҆бнажи́вше вра́жїю ѕло́бꙋ, мч҃нцы да почита́ютсѧ.
Бг҃оро́диченъ: Тебѐ всенепоро́чнꙋю бж҃їю роди́тельницꙋ ᲂу҆бл҃жа́емъ: є҆ѧ́же ра́ди клѧ́тва непло́дна бы́сть, и҆ и҆збавле́нїе и҆ бл҃гослове́нїе даде́сѧ.
И҆́нъ І҆рмо́съ то́йже.
Да ѡ҆брѧ́щꙋ тѧ̀ по́мощь дв҃о, и҆з̾има́ющꙋю мѧ̀ въ ча́съ сꙋ́дный ѡ҆сꙋжде́нїѧ, є҆гда̀ сꙋди́щꙋ и҆з̾ тебѐ ро́ждшагѡсѧ предста́нꙋ.
Зако́номъ мѧ̀ побѣжда́ема грѣхо́внымъ чⷭ҇таѧ, и҆ пре́лестьми чꙋжда́гѡ ча́стѡ прельща́ема, и҆ въ бре́ги прегрѣше́нїй низрѣ́ема ѡ҆братѝ.
Оу҆́гль ро́ждшаѧ, є҆го́же ᲂу҆зрѣ̀ и҆са́їа, попалѝ ве́щь всенепоро́чнаѧ, мои́хъ согрѣше́нїй, и҆ просвѣти́ мѧ, молю́сѧ.
Пло́ть ѿ крове́й твои́хъ хрⷭ҇тꙋ̀ взаи́мъ да́вши, плѡтскі́ѧ моѧ̑, дв҃о, стра̑сти ѿню́дъ ѡ҆чи́сти, и҆ безстра́стїѧ стезю̀ покажи́ ми.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.
Воздви́жесѧ долготерпѣли́ве на дре́во, всѧ̑ вра̑жїѧ возвышє́нїѧ низложи́лъ є҆сѝ, и҆ сп҃слъ є҆сѝ па́дшаго, мно́гїѧ ра́ди твоеѧ̀ бл҃гости.
Дꙋ́шы првⷣныхъ, на дре́вѣ дре́вле дш҃ꙋ тѧ̀ предаю́ща влⷣко, ꙗ҆́кѡ ѡ҆щꙋти́ша, вѣ́чныхъ ᲂу҆́зъ сло́ве ѿпꙋща́еми быва́хꙋ.
Мч҃нченъ: Ꙗ҆́коже тве́рдїи а҆дама́нти, мꙋ́къ всѧ́ко разжже́нїе терпѣли́вымъ нра́вомъ претерпѣ́сте, и҆ врага̀ смири́вшесѧ низложи́сте.
Мч҃нченъ: Подѡ́бницы хрⷭ҇тѡ́вымъ стрⷭ҇те́мъ бы́вше, под̾ѧ́сте всѧ́ко мꙋче́нїе стрⷭ҇тоте́рпцы гдⷭ҇ни: сегѡ̀ ра́ди нбⷭ҇ныхъ красо́тъ сподо́бистесѧ.
Бг҃оро́диченъ: Ди́вно ржⷭ҇тво̀ твоѐ, є҆́же вє́лїѧ чꙋдеса̀ творѧ́щее, и҆ во ст҃ы́хъ прославлѧ́емо, бцⷣе є҆ди́на всечꙋ́днаѧ влⷣчце.
И҆́нъ І҆рмо́съ то́йже.
Да не пожре́тъ менѐ, влⷣчце, ᲂу҆ны́нїѧ глꙋбина̀, и҆ грѣхо́внаѧ волна̀ да не покры́етъ менѐ: но твое́ю мл҃твою да сп҃се́нъ бꙋ́дꙋ, є҆ди́на чⷭ҇таѧ.
Зако́на свѣ́щникъ проѡбража́ше тѧ̀ ро́ждшꙋю свѣ́тъ, просвѣти́вшаго, пречⷭ҇таѧ, всѧ́чєскаѧ. тѣ́мже вопїю́ ти: ѡ҆мраче́ннаго мѧ̀ просвѣтѝ.
Бл҃га́го ро́ждшаѧ бл҃годѣ́телѧ и҆ содѣ́телѧ, всечⷭ҇таѧ влⷣчце, и҆ бл҃голюби́ваѧ, дꙋ́шꙋ мою̀ ѡ҆ѕло́бленнꙋю ᲂу҆бл҃жѝ.
Винꙋ̀ сп҃се́нїѧ жизнода́вца родила̀ є҆сѝ на́мъ, вѣ́чное и҆збавле́нїе да́рꙋюща вои́стиннꙋ, тѧ̀ бцⷣꙋ проповѣ́дающымъ.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е, бл҃гослове́нъ є҆сѝ.
Вѣнча̀ те́рнїемъ тѧ̀, цр҃ю̀ безсме́ртне, собо́ръ законопрестꙋ́пный, и҆з̾ ко́рене и҆зсѣца́юща преле́стное те́рнїе: бж҃е, бл҃гослове́нъ є҆сѝ.
Да ѡ҆блече́ши мѧ̀ ѻ҆де́ждею сло́ве, нетлѣ́нїѧ, ѡ҆бнажи́лсѧ є҆сѝ во́лею: и҆ терпи́ши ѡ҆плева̑нїѧ, и҆ распѧ́тїе, и҆ стрⷭ҇ть, безстра́стенъ сы́й по сꙋществꙋ̀.
Мч҃нченъ: Соѡбра́зни бы́вше страсте́мъ, ст҃і́и, всѣ́ми влⷣчествꙋющемꙋ, вои́стиннꙋ є҆стѐ сы́нове и҆ наслѣ̑дницы црⷭ҇твїѧ непоколеби́магѡ.
Мч҃нченъ: Древесє́мъ безслове́снѣйшымъ не принесо́сте че́сти, на дре́вѣ просте́ршаго рꙋ́цѣ чтꙋ́ще, ꙗ҆́кѡ всѣ́хъ цр҃ѧ̀ и҆ влⷣкꙋ.
Бг҃оро́диченъ: Стра́нно є҆́сть ржⷭ҇тво̀ твоѐ всенепоро́чнаѧ: бг҃а бо родила̀ є҆сѝ, дре́вомъ ᲂу҆вѧди́вшаго пла́мень пре́лести, и҆ просвѣти́вшаго мі́ръ.
И҆́нъ І҆рмо́съ то́йже.
Пою́ тѧ всепѣ́таѧ, бг҃а бо препѣ́таго без̾ сѣ́мене родила̀ є҆сѝ дв҃о всест҃а́ѧ, ѡ҆божа́ющаго пою́щихъ: бж҃е, бл҃гослове́нъ є҆сѝ.
Оу҆мертвѝ стра̑сти моѧ̑, жи́знь ро́ждшаѧ, воздви́гни мѧ̀ лежа́ща ѿ гро́ба нечꙋ́вствїѧ: да любо́вїю сла́влю тѧ̀ бг҃оневѣ́сто.
При́зри на молє́нїѧ рабѡ́въ твои́хъ влⷣчце, ѿ бѣ́дъ и҆збавлѧ́ющи, и҆ ѿ скорбе́й сп҃са́ющи, вѣ́рою пою́щыѧ: бж҃е, бл҃гослове́нъ є҆сѝ.
Неисчетноси́льнаго, на́шꙋ не́мощь поне́сшаго, родила̀ є҆сѝ чⷭ҇таѧ: є҆го́же молѝ, и҆сцѣли́ти дꙋ́шꙋ мою̀, лю́тѣ и҆знемо́гшꙋю.
Пѣ́снь и҃
І҆рмо́съ: Тебѣ̀ вседѣ́телю въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Вы́шнїй бж҃е, на крⷭ҇тъ воздви́глсѧ є҆сѝ, же́лчи напоѧ́емь, сла́досте жи́зненнаѧ: копїе́мъ пробода́ешисѧ, закала́ѧ ѕмі́ѧ, въ раѝ а҆да́ма низложи́вшаго.
Разрѣша́еши мѧ̀ ѿ ᲂу҆́зъ грѣхо́вныхъ сло́ве, хотѣ́нїемъ свѧзꙋ́емь, и҆ вѣ́чными ᲂу҆́зами свѧзꙋ́ѧ сп҃се, врага̀ ѿстꙋ́пника: тѣ́мже твоѧ̑ сла́влю стрⷭ҇ти во вѣ́ки.
Мч҃нченъ: Ꙗ҆ви́стесѧ прича̑стницы свѣ́та невеще́ственнагѡ, свѣ́ти сꙋ́ще вторі́и ст҃і́и мч҃нцы, тьмꙋ̀ пре́лести ѿе́млюще, и҆ всѣ́хъ вѣ́рныхъ сердца̀ просвѣща́юще бж҃е́ственнѣ.
Мч҃нченъ: І҆ерⷭ҇ли́ма вы́шнѧгѡ свобо́днагѡ сн҃ове бы́сте мч҃нцы, просвѣща́юще перворо́дныхъ цр҃ковь, и҆ превозносѧ́ще хрⷭ҇та̀ во вѣ́ки.
Бг҃оро́диченъ: Стоѧ́ла є҆сѝ ᲂу҆ крⷭ҇та̀ смотрѧ́ющи ѻ҆трокови́це, пригвожде́на хрⷭ҇та̀, є҆го́же родила̀ є҆сѝ влⷣчце. тѣ́мже вопїѧ́ше: не безча́днꙋ мѧ̀ ꙗ҆вѝ безнача́льне, безнача́льнагѡ ѻ҆ц҃а̀ сн҃е и҆ сло́ве.
И҆́нъ І҆рмо́съ то́йже.
Ꙗ҆́же предо́браѧ и҆ бг҃озра́чнаѧ дв҃о, до́брыхъ мѧ̀ видѣ́нїемъ ᲂу҆добри́вши просвѣтѝ, ꙗ҆́кѡ да зовꙋ̀: гдⷭ҇а по́йте, и҆ превозноси́те є҆го̀ во вѣ́ки.
Врата̀ свѣ́та, покаѧ́нїѧ мѝ врата̀ свѣтоза̑рнаѧ ѿве́рзи, показꙋ́ющи всѧ́кїй пра́вый пꙋ́ть пра́вды, приводѧ́щїй къ бж҃е́ственнагѡ хотѣ́нїѧ вхо́дꙋ.
Ст҃о́е чⷭ҇таѧ сло́во, вѣ̑рныѧ ѡ҆свѧща́ющее, неизглаго́ланнѡ родила̀ є҆сѝ: того̀ молѝ прест҃а́ѧ, смире́ннꙋю дꙋ́шꙋ мою̀ ны́нѣ ѡ҆свѧти́ти, ѕло́бою ѡ҆скверне́нꙋю.
Стрꙋѧ̀ свѣ́тлаѧ и҆ и҆сто́чникъ безсме́ртїѧ ст҃а́ѧ влⷣчце, и҆з̾ тебѐ произы́де, и҆́же всѣ́хъ гдⷭ҇ь. тѣ́мже вопїю́ ти чⷭ҇таѧ: стрꙋи̑ ѕѡ́лъ мои́хъ и҆зсꙋшѝ тꙋ́чами твои́хъ мл҃твъ.
Та́же, пое́мъ пѣ́снь бцⷣѣ: Вели́читъ дш҃а̀ моѧ̀ гдⷭ҇а: покло́ны.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сы́на є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Ꙗ҆́кѡ а҆́гнецъ воздви́глсѧ є҆сѝ на дре́во влⷣко хрⷭ҇тѐ, чє́люсти сокрꙋша́ѧ во́лка мы́сленнагѡ, и҆ ѿ ᲂу҆́стъ є҆гѡ̀ и҆схища́ѧ твоѧ̑ словє́сныѧ ѻ҆́вцы, и҆ приводѧ̀ влⷣко роди́телю.
Вѣнце́мъ терно́вымъ ᲂу҆вѧ́злсѧ є҆сѝ, ꙗ҆́коже цр҃ь црⷭ҇твꙋющихъ хрⷭ҇тѐ, лꙋка́вагѡ потреблѧ́ѧ ца́рствїѧ, и҆ и҆з̾ ко́рене и҆зсѣца́ѧ пре́лести те́рнїе: тѣ́мже вѣ́рою тѧ̀ бл҃же сла́вимъ.
Мч҃нченъ: Ѡ҆блиста̀ ꙗ҆́коже со́лнце тве́рдое стоѧ́тельное сопротивле́нїе ва́ше, и҆ всю̀ разрꙋшѝ вра́жїю мглꙋ̀, мч҃нцы непобѣди́мїи, просвѣти́телїе всѣ́хъ вѣ́рныхъ, столпѝ непрекло́ннїи бл҃гоче́стїѧ, достосла́внїи.
Мч҃нченъ: По́лкъ бг҃осо́бранъ, во́инство нбⷭ҇ное, собо́ръ и҆збра́нный, ст҃а́ѧ сѣ́нь ꙗ҆ви́стесѧ, вы̀ всехва́льнїи мч҃нцы сп҃са, лꙋка́вагѡ гра́ды разрꙋша́юще бж҃е́ственною бл҃года́тїю.
Бг҃оро́диченъ: Садодѣ́телѧ родила̀ є҆сѝ, бл҃гоче́стїѧ сади́телѧ, всажда́юща на землѝ ра́зꙋмъ и҆́стинный, и҆ прозѧ́бшꙋю, ѿ сада̀ разорѧ́юща клѧ́твꙋ, є҆го́же велича́юще, тебѐ дв҃ꙋ ᲂу҆бл҃жа́емъ.
И҆́нъ І҆рмо́съ то́йже.
Ѡ҆снова́нїе непоколеби́мо, сп҃са родила̀ є҆сѝ чⷭ҇таѧ, на вода́хъ зе́млю бж҃е́ственнымъ повелѣ́нїемъ ѡ҆снова́вшаго: є҆го́же молѝ на́съ ᲂу҆тверди́ти, чи́стѡ тебѐ бл҃жа́щихъ.
Въ пꙋ́ть смире́нїѧ повелѣ́нїй бж҃е́ственныхъ, незаблꙋ́днѡ ше́ствовати, и҆ непреле́стнѡ сотвори́ мѧ чⷭ҇таѧ, бѣсо́вскїй мѧте́жъ, и҆ страсте́й нахождє́нїѧ ѿгонѧ́ющи, и҆ тишинꙋ̀ подаю́щи мѝ.
Дрема́нїемъ ѡ҆держи́ма нерадѣ́нїѧ, ви́дѧ вра́гъ нахо́дитъ неѡсла́бнѡ, сно́мъ сла́стнымъ надѣ́ѧсѧ ᲂу҆кра́сти мѧ̀: но сама́ мѧ сохранѝ чⷭ҇таѧ, неꙋсы́пною твое́ю мл҃твою мт҃и дв҃о.
Ꙗ҆́кѡ самоѡсꙋжде́нъ, помышлѧ́ю мои́хъ грѣхѡ́въ мно́жество, и҆ стра́шное сꙋди́ще сꙋдїѝ, на не́мже хощꙋ̀ сꙋди́тисѧ: но ꙗ҆́же сꙋдїю̀ ро́ждшаѧ бг҃а, тогда́ мѧ соблюдѝ бцⷣе, неѡсꙋжде́на.
Та́же, Досто́йно є҆́сть: И҆ покло́нъ. Та́же, є҆ктенїа̀ ма́лаѧ, свѣти́ленъ: и҆ ѱалмы̀ ѻ҆бы̑чныѧ.
На стїхо́внѣ стїхи̑ры крⷭ҇тны, гла́съ є҃:
То́чїю водрꙋзи́сѧ дре́во хрⷭ҇тѐ крⷭ҇та̀ твоегѡ̀, пре́лесть прогна́на бы́сть і҆́дѡльскаѧ, и҆ бл҃года́ть процвѣтѐ: не бо̀ ктомꙋ̀ ѡ҆сꙋжде́нїѧ є҆́сть мꙋчи́тельство, но побѣ́да ꙗ҆ви́сѧ на́съ сп҃се́нїѧ. крⷭ҇тъ бо на́мъ є҆́сть похвала̀, крⷭ҇тъ на́мъ ᲂу҆твержде́нїе, крⷭ҇тъ на́мъ ра́дованїе.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.
Веде́нъ бы́лъ є҆сѝ на́съ ра́ди на же́ртвꙋ хрⷭ҇тѐ, ꙗ҆́кѡ ѻ҆вча̀, и҆ ꙗ҆́кѡ а҆́гнецъ неѕло́бивъ є҆мманꙋ́илъ, на заколе́нїе во́льное, съ беззако́нники вмѣне́нъ бы́лъ є҆сѝ. прїиди́те, воспо́йте ѻ҆те́чєствїѧ ꙗ҆зы̑къ, и҆ поклони́тесѧ на крⷭ҇тѣ̀ повѣ́шеномꙋ животꙋ̀ безконе́чномꙋ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Ст҃і́и мч҃нцы на землѝ подви́гшесѧ, мра́зъ претерпѣ́ша, ѻ҆гню̀ преда́шасѧ, вода̀ и҆́хъ прїѧ́тъ, тѣ́хъ є҆́сть гла́съ: проидо́хомъ сквозѣ̀ ѻ҆́гнь и҆ во́дꙋ, и҆ и҆зведе́ ны въ поко́й. мл҃твами и҆́хъ хрⷭ҇тѐ бж҃е, поми́лꙋй на́съ.
Сла́ва, и҆ ны́нѣ, крⷭ҇тобг҃оро́диченъ: Зрѧ́щи дре́вле а҆́гнца и҆ сн҃а своего̀, дв҃а мт҃и и҆ всебл҃же́ннаѧ ѻ҆трокови́ца, на крⷭ҇тъ воздви́жена, вопїѧ́ше слезѧ́щи: ᲂу҆вы̀ мнѣ̀, сн҃е мо́й, ка́кѡ ᲂу҆мира́еши. бг҃ъ є҆стество́мъ сы́й безсме́ртенъ;
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: Тропа́рь, ст҃о́мꙋ. Є҆ктенїа̀. Та́же, ча́съ пе́рвый, ѱалмы̀ ѻ҆бы̑чныѧ, и҆ про́чаѧ порѧ́дꙋ: и҆ ѿпꙋ́стъ.
Въ сре́дꙋ бл҃жє́нны, гла́съ є҃:
Разбо́йникъ на крⷭ҇тѣ̀ бг҃а тѧ̀ бы́ти вѣ́ровавъ, хрⷭ҇тѐ, и҆сповѣ́да тѧ̀ чи́стѣ ѿ се́рдца, помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Прободе́нъ бы́въ въ ре́бра, пото́ки ѡ҆ставле́нїѧ и҆сточи́лъ є҆сѝ хрⷭ҇тѐ: пригвозди́въ же своѝ на крⷭ҇тѣ̀ рꙋ́цѣ, ве́сь разорѧ́ѧ стра́стный человѣ́кѡмъ ра́зꙋмъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Возше́дъ на крⷭ҇тъ, всѐ поколеба́лъ є҆сѝ бѣсо́вское мно́жество, и҆ низве́рглъ є҆сѝ па́гꙋбнꙋю держа́вꙋ мꙋчи́телѧ, влⷣко хрⷭ҇тѐ, и҆ сп҃слъ є҆сѝ человѣ́чество.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Подо́бницы хрⷭ҇тѡ́вымъ стрⷭ҇те́мъ бл҃же́ннїи бы́вше, под̾ѧ́сте всѧ́ко мꙋче́нїе, стрⷭ҇тоте́рпцы гдⷭ҇ни: сегѡ̀ ра́ди нбⷭ҇ныхъ красо́тъ сподо́бистесѧ.
Сла́ва: На крⷭ҇тѣ̀, и҆́же ѻ҆ц҃ꙋ̀ и҆ бж҃е́ственномꙋ дх҃ꙋ нераздѣ́льный, во́льнꙋю претерпѣ́лъ є҆сѝ стрⷭ҇ть хрⷭ҇тѐ, стра̑сти всѧ̑ тлетвѡ́рныѧ на́шѧ ѿе́млѧ.
И҆ ны́нѣ: Предстоѧ́щи ᲂу҆ крⷭ҇та̀ бг҃ора́дованнаѧ, и҆ сн҃а своего̀ ви́дѧщи ᲂу҆ѧ́звлена, дꙋше́ю ᲂу҆ѧзвлѧ́шесѧ, воспѣва́ше тогѡ̀ мно́гое вои́стиннꙋ смотре́нїе.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.