Глас 5-й. Неделя.
Гла́съ є҃.
Въ сꙋббѡ́тꙋ ве́чера, на ма́лѣй вече́рни,
на Гдⷭ҇и воззва́хъ, поста́вимъ стїхѡ́въ д҃: и҆ пое́мъ стїхи̑ры воскре́сны ѻ҆смогла́сника г҃, повторѧ́юще а҃-ю, гла́съ є҃:
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Чⷭ҇тны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ сп҃слъ є҆си́ ны ѿ вра́тъ сме́ртныхъ: сла́вимъ тѧ̀ є҆диноро́дне.
Воскрⷭ҇нїе даѧ́й ро́дꙋ человѣ́ческомꙋ: ꙗ҆́кѡ ѻ҆вча̀ на заколе́нїе веде́сѧ: ᲂу҆страши́шасѧ сегѡ̀ кнѧ́зи а҆́дстїи, и҆ взѧ́шасѧ врата̀ плачє́внаѧ. вни́де бо цр҃ь сла́вы хрⷭ҇то́съ, глаго́лѧ сꙋ́щымъ во ᲂу҆́захъ, и҆зыди́те: и҆ сꙋ́щымъ во тьмѣ̀, ѿкры́йтесѧ.
Ве́лїе чꙋ́до, неви́димыхъ содѣ́тель, за чл҃вѣколю́бїе пло́тїю пострада́въ, воскр҃се безсме́ртный. прїиди́те ѻ҆те́чєствїѧ ꙗ҆зы̑къ, томꙋ̀ поклони́мсѧ: бл҃гоꙋтро́бїемъ бо є҆гѡ̀ ѿ пре́лести и҆зба́вльшесѧ, въ трїе́хъ ѵ҆поста́сѣхъ є҆ди́наго бг҃а пѣ́ти навыко́хомъ.
Сла́ва, и҆ ны́нѣ, бг҃оро́диченъ: Бг҃олѣ́пнꙋю и҆ чⷭ҇тнꙋ́ю ѻ҆трокови́цꙋ почти́мъ, пречⷭ҇тнꙋ́ю херꙋві́мѡвъ: содѣ́тель бо всѣ́хъ вочл҃вѣ́читисѧ восхотѣ́вый, въ тꙋ́ю всели́сѧ неизрече́ннѡ. ѽ стра́нныхъ веще́й, и҆ пресла́вныхъ та́инствъ! кто̀ не ᲂу҆диви́тсѧ ѡ҆ се́мъ внꙋши́вый, ꙗ҆́кѡ бг҃ъ человѣ́къ быва́етъ, и҆ преложе́нїе въ не́мъ не бѣ̀; и҆ дв҃ства врата̀ про́йде, и҆ ᲂу҆мале́нїе въ не́мъ не ѡ҆ста́висѧ, ꙗ҆́коже прⷪ҇ро́къ глаго́летъ: человѣ́къ сїѧ̑ не про́йдетъ когда̀, то́кмѡ є҆ди́нъ гдⷭ҇ь бг҃ъ і҆и҃левъ, и҆мѣ́ѧй ве́лїю млⷭ҇ть.
Та́же, свѣ́те ти́хїй:
Посе́мъ прокі́менъ: Гдⷭ҇ь воцр҃и́сѧ: три́жды. Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ.
Та́же, Сподо́би гдⷭ҇и въ ве́черъ се́й:
І҆ере́й же є҆ктенїѝ не глаго́летъ, но пое́мъ на стїхо́внѣ стїхи́рꙋ воскрⷭ҇нꙋ, гла́съ є҃:
Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, и҆спрове́ргїй а҆́дѡва врата̀, тридне́внѡ воскре́слъ є҆сѝ, сп҃са́ѧ дꙋ́шы на́шѧ.
И҆́ны стїхи̑ры подо́бны прест҃ѣ́й бцⷣѣ, гла́съ є҃:
Подо́бенъ: Ра́дꙋйсѧ по́стникѡмъ:
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Рꙋ́цѣ простира́ю къ тебѣ̀, и҆ скве́рнѣи ᲂу҆стнѣ̀ ѿверза́ю къ моле́нїю, и҆ преклонѧ́ю серде́чное колѣ́но, и҆ ᲂу҆́мнѡ нога́мъ твои̑мъ пречи̑стымъ ны́нѣ прикаса́юсѧ, чⷭ҇таѧ: и҆ припа́даю къ тебѣ̀: бѡлѣ́зни моѧ̑ и҆сцѣлѝ, лѣ̑тныѧ моѧ̑ мнѡ́гїѧ и҆ неисцѣ̑льныѧ бл҃гостїю твое́ю и҆сцѣлѝ стрꙋ́пы. и҆зба́ви ѿ ви́димыхъ врагѡ́въ и҆ неви́димыхъ: ѡ҆блегчѝ ѻ҆трокови́це, тѧготꙋ̀ лѣ́ности моеѧ̀, ꙗ҆́кѡ да тѧ̀ пою̀ и҆ сла́влю, є҆́юже ѡ҆брѣ́те мі́ръ ве́лїю млⷭ҇ть.
Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.
Ра́дꙋйсѧ сн҃а бж҃їѧ несказа́ннѡ заче́ншаѧ всенепоро́чнаѧ, и҆ сего̀ ро́ждшаѧ, пло́ть по на́мъ вои́стиннꙋ ѿ крове́й твои́хъ прїи́мшаго, дꙋ́шꙋ ᲂу҆́мнꙋю же и҆ самовла́стнꙋю и҆мꙋ́щаго: неѡскꙋ́днѡ бо во а҆да́ма ѡ҆бле́кшагосѧ, ми́лости ра́ди и҆ бл҃гости неизрече́нныѧ. ѿѻнꙋ́дꙋже во двою̀ є҆стєствꙋ̀ на́мъ возвѣща́етсѧ, ѻ҆бои́хъ показꙋ́ѧй въ себѣ̀ дѣ́йство хрⷭ҇то́съ: є҆го́же молѝ.дꙋша́мъ на́шымъ да́ти ве́лїю млⷭ҇ть.
Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.
Ра́дꙋйсѧ добро́то і҆а́кѡвлѧ, ю҆́же и҆збра̀ бг҃ъ, ю҆́же возлюбѝ, две́ре сп҃са́емыхъ, пламеноно́снаѧ клещѐ, клѧ́твы разрѣше́нїе, всебл҃гослове́ннаѧ: чре́во бг҃овмѣсти́мое, па́дшихъ возведе́нїе: ст҃ѣ́йшаѧ херꙋві́мѡвъ, и҆ тва́рей преимꙋ́щаѧ: неꙋдобозри́мое видѣ́нїе, слы́шанїе новѣ́йшее, неизрече́нное глаго́ланїе, колесни́це сло́ва: ѻ҆́блаче, и҆з̾ негѡ́же возсїѧ̀ со́лнце, и҆ менѐ ѡ҆зарѧ́ѧ, и҆ сꙋ́щымъ во тьмѣ̀ подаѧ̀ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Ꙗ҆̀же ѡ҆ тебѣ̀ прⷪ҇ро́чєствїѧ, и҆спо́лнишасѧ дв҃о чⷭ҇таѧ: ѻ҆́въ ᲂу҆́бѡ ѿ прорѡ́къ две́рь тѧ̀ проречѐ, во є҆де́мѣ на восто́къ зрѧ́щꙋю, ю҆́же никто́же про́йде, то́чїю зижди́тель тво́й, и҆ всегѡ̀ мі́ра: ѻ҆́въ же кꙋпинꙋ̀ ѻ҆гне́мъ жего́мꙋ, ꙗ҆́кѡ въ тебѣ̀ ѡ҆бита̀ ѻ҆́гнь бж҃ества̀, и҆ неѡпали́ма пребы́сть. и҆́нъ го́рꙋ ст҃ꙋ́ю, ѿ неѧ́же ѿсѣче́сѧ ка́мень краеꙋго́льный, кромѣ̀ рꙋ́ки человѣ́ческїѧ, и҆ поразѝ ѡ҆́бразъ мы́сленнагѡ навꙋходоно́сора: вои́стиннꙋ ве́лїе и҆ пресла́вное, є҆́же въ тебѣ̀ та́инство є҆́сть бг҃ома́ти. тѣ́мже тѧ̀ сла́вимъ: тобо́ю бо бы́сть сп҃се́нїе дꙋша́мъ на́шымъ.
Та́же, Ны́нѣ ѿпꙋща́еши: Трист҃о́е. И҆ по Ѻ҆́ч҃е на́шъ: Тропа́рь: Собезнача́льное сло́во: Бг҃оро́диченъ: Ра́дꙋйсѧ две́ре гдⷭ҇нѧ непроходи́маѧ: Є҆ктенїа̀. И҆ ѿпꙋ́стъ.
Въ сꙋббѡ́тꙋ на вели́цѣй вече́рни,
на Гдⷭ҇и воззва́хъ, поста́вимъ стїхѡ́въ і҃ и҆ пое́мъ стїхи̑ры воскре́сны, гла́съ є҃:
Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.
Чⷭ҇тны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ сп҃слъ є҆сѝ ны̀ ѿ вра́тъ сме́ртныхъ: сла́вимъ тѧ̀ є҆диноро́дне.
Сті́хъ: Менѐ ждꙋ́тъ пра́вєдницы, до́ндеже возда́си мнѣ̀.
Воскрⷭ҇нїе даѧ́й ро́дꙋ человѣ́ческомꙋ, ꙗ҆́кѡ ѻ҆вча̀ на заколе́нїе веде́сѧ: ᲂу҆страши́шасѧ сегѡ̀ кнѧ́зи а҆́дстїи, и҆ взѧ́шасѧ врата̀ плачє́внаѧ. вни́де бо цр҃ь сла́вы хрⷭ҇то́съ, глаго́лѧ сꙋ́щымъ во ᲂу҆́захъ, и҆зыди́те: и҆ сꙋ́щымъ во тьмѣ̀, ѿкры́йтесѧ.
Сті́хъ: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ᲂу҆слы́ши гла́съ мо́й.
Ве́лїе чꙋ́до, неви́димыхъ содѣ́тель, за чл҃вѣколю́бїе пло́тїю пострада́въ, воскр҃се безсме́ртный, прїиди́те ѻ҆те́чєствїѧ ꙗ҆зы̑къ, томꙋ̀ поклони́мсѧ: бл҃гоꙋтро́бїемъ бо є҆гѡ̀ ѿ пре́лести и҆зба́вльшесѧ, въ трїе́хъ ѵ҆поста́сѣхъ є҆ди́наго бг҃а пѣ́ти навыко́хомъ.
И҆́ны стїхи̑ры а҆натѡ́лїевы, гла́съ то́йже.
Сті́хъ: Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀.
Вече́рнее поклоне́нїе прино́симъ тебѣ̀ невече́рнемꙋ свѣ́тꙋ, на коне́цъ вѣкѡ́въ, ꙗ҆́кѡ въ зерца́лѣ пло́тїю возсїѧ́вшемꙋ мі́рови, и҆ да́же до а҆́да низше́дшемꙋ, и҆ та́мѡ сꙋ́щꙋю тьмꙋ̀ разрꙋши́вшемꙋ, и҆ свѣ́тъ воскрⷭ҇нїѧ ꙗ҆зы́кѡмъ показа́вшемꙋ: свѣтода́вче гдⷭ҇и сла́ва тебѣ̀.
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Нача́льника сп҃се́нїѧ на́шегѡ, хрⷭ҇та̀ славосло́вимъ: томꙋ́ бо и҆з̾ ме́ртвыхъ воскрⷭ҇шꙋ, мі́ръ ѡ҆ пре́лести сп҃се́нъ бы́сть. ра́дꙋетсѧ ли́къ а҆́гг҃льскїй, бѣ́гаетъ де́монѡвъ пре́лесть, а҆да́мъ пады́й воста̀, дїа́волъ ᲂу҆праздни́сѧ.
Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
И҆̀же ѿ кꙋстѡді́и наꙋче́ни быва́хꙋ ѿ беззакѡ́нникъ, покры́йте хрⷭ҇то́во воста́нїе, и҆ прїими́те сре́бреники, и҆ рцы́те ꙗ҆́кѡ на́мъ спѧ́щымъ, и҆з̾ гро́ба ᲂу҆кра́денъ бы́сть ме́ртвый. кто̀ ви́дѣ, кто̀ слы́ша, мертвеца̀ ᲂу҆кра́дена когда̀, па́че же пома́зана и҆ на́га, ѡ҆ста́вльша и҆ во гро́бѣ погреба̑льнаѧ своѧ̑; не прельща́йтесѧ і҆ꙋде́є, навы́кните рече́нїємъ прⷪ҇ро́чєскимъ, и҆ ᲂу҆разꙋмѣ́йте, ꙗ҆́кѡ то́й є҆́сть вои́стиннꙋ и҆зба́витель мі́ра, и҆ всеси́льный.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Гдⷭ҇и, а҆́дъ плѣни́вый, и҆ сме́рть попра́вый сп҃се на́шъ, просвѣти́вый мі́ръ крⷭ҇то́мъ чⷭ҇тны́мъ, поми́лꙋй на́съ.
И҆́ны стїхи̑ры, бцⷣѣ, па́ѵла а҆морре́йскагѡ, гла́съ є҃:
Подо́бенъ: Ра́дꙋйсѧ:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Прⷭ҇то́лъ херꙋві́мскїй вои́стиннꙋ, ꙗ҆́кѡ превы́шши тва́рей бы́вши: въ тебе́ бо бж҃їе сло́во, на́шъ зра́къ назда́сти хотѧ̀, всели́сѧ, и҆ проше́дъ съ пло́тїю и҆з̾ тебѐ всечⷭ҇таѧ: крⷭ҇тнꙋю же стрⷭ҇ть на́съ ра́ди воспрїѧ́тъ, и҆ воскрⷭ҇нїе ꙗ҆́кѡ бг҃ъ дарова̀, и҆змѣ́ншемꙋсѧ на́шемꙋ ѡ҆сꙋжде́нномꙋ є҆стествꙋ̀. тѣ́мъ ꙗ҆́кѡ содѣ́телю, сн҃ꙋ твоемꙋ̀ мо́лимсѧ бг҃ома́ти, ᲂу҆лꙋчи́ти проще́нїе и҆ млⷭ҇ть въ ча́съ сꙋ́дный.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Что̀ твою̀ бг҃ороди́тельнице чⷭ҇таѧ, нарекꙋ̀ цр҃ковь бг҃осла́внꙋю; вертогра́дъ є҆де́мскїй и҆менꙋ́ю, и҆ нѡ́евъ, чⷭ҇таѧ, ковче́гъ прорекꙋ̀, сп҃сшїй бг҃ꙋ црⷭ҇кое сщ҃е́нїе, ве́сь ст҃ъ ꙗ҆зы́къ, хрⷭ҇та̀ бг҃а на́шегѡ собо́ръ: мѡѷсе́овꙋ же кївѡ́тꙋ ᲂу҆подоблѧ́ю тѧ̀, въ не́мже ѡ҆чисти́лище и҆ же́злъ прозѧ́бшїй, въ не́мже свѣ́щникъ и҆ рꙋ́чка, кади́льница всезлата́ѧ, во́ньже прибѣга́етъ всѧ́къ вѣ́рный, и҆ и҆спроша́етъ ве́лїю млⷭ҇ть.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Є҆ди́на безнадє́жнымъ наде́ждо, безпомѡ́щнымъ гото́ваѧ по́моще, млⷭ҇ти ро́ждшаѧ воли́телѧ і҆и҃са, мою̀ поми́лꙋй ны́нѣ не́мощь, чⷭ҇таѧ, и҆ пода́ждь мѝ помыслѡ́мъ ᲂу҆миле́нїе. стрꙋѧ́ми сле́зъ са́мыхъ согрѣше́нїй мои́хъ, непобѣди́мꙋю потопѝ пꙋчи́нꙋ: ѿженѝ безмѣ́рныхъ мои́хъ страсте́й бꙋ́рю: и҆ и҆спо́лни тишины̀ бж҃е́ственныѧ смꙋще́нное се́рдце моѐ, хрⷭ҇та̀ молѧ́щи, пода́ти мѝ согрѣше́нїй соверше́нное ѡ҆ставле́нїе.
Сла́ва, и҆ ны́нѣ, бг҃оро́диченъ: Въ чермнѣ́мъ мо́ри, неискꙋсобра́чныѧ невѣ́сты ѡ҆́бразъ написа́сѧ и҆ногда̀: та́мѡ мѡѷсе́й, раздѣли́тель воды̀: здѣ́ же гаврїи́лъ, слꙋжи́тель чꙋдесѐ. тогда̀ глꙋбинꙋ̀ ше́ствова немо́креннѡ і҆и҃ль: ны́нѣ же хрⷭ҇та̀ родѝ безсѣ́меннѡ дв҃а. мо́ре по проше́ствїи і҆и҃левѣ, пребы́сть непрохо́дно: непоро́чнаѧ по ржⷭ҇твѣ̀ є҆мманꙋ́илевѣ, пребы́сть нетлѣ́нна. сы́й, и҆ пре́жде сы́й, ꙗ҆вле́йсѧ ꙗ҆́кѡ чл҃вѣ́къ, бж҃е поми́лꙋй на́съ.
Та́же, Свѣ́те ти́хїй: Прокі́менъ: Гдⷭ҇ь воцр҃и́сѧ: И҆ про́чее по ѻ҆бы́чаю.
На стїхо́внѣ стїхи̑ры воскрⷭ҇ны, гла́съ є҃:
Тебѐ воплоще́ннаго сп҃са хрⷭ҇та̀, и҆ нб҃съ не разлꙋчи́вшасѧ, во гла́сѣхъ пѣ́нїй велича́емъ: ꙗ҆́кѡ крⷭ҇тъ и҆ сме́рть прїѧ́лъ є҆сѝ за ро́дъ на́шъ, ꙗ҆́кѡ чл҃вѣколю́бецъ гдⷭ҇ь, и҆спрове́ргїй а҆́дѡва врата̀, тридне́внѡ воскре́слъ є҆сѝ, сп҃са́ѧ дꙋ́шы на́шѧ.
И҆́ны стїхи̑ры по а҆лфави́тꙋ.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Прободє́нымъ твои̑мъ ре́брѡмъ жизнода́вче, то́ки ѡ҆ставле́нїѧ всѣ̑мъ и҆сточи́лъ є҆сѝ, жи́зни и҆ сп҃се́нїѧ: пло́тїю же сме́рть воспрїѧ́лъ є҆сѝ, безсме́ртїе на́мъ да́рꙋѧ: всели́въ же сѧ во гро́бъ на́съ свободи́лъ є҆сѝ, совоскр҃си́въ съ собо́ю сла́внѡ ꙗ҆́кѡ бг҃ъ. сегѡ̀ ра́ди вопїе́мъ: чл҃вѣколю́бче гдⷭ҇и, сла́ва тебѣ̀.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Стра́нно твоѐ распѧ́тїе, и҆ є҆́же во а҆́дъ соше́ствїе чл҃вѣколю́бче є҆́сть: плѣни́въ бо є҆го̀, и҆ дрє́внїѧ ю҆́зники совоскр҃си́въ съ собо́ю сла́внѡ ꙗ҆́кѡ бг҃ъ, ра́й ѿве́рзъ, воспрїѧ́ти сего̀ сподо́билъ є҆сѝ. тѣ́мже и҆ на́мъ сла́вѧщымъ твоѐ тридне́вное воста́нїе, да́рꙋй ѡ҆чище́нїе грѣхѡ́въ: раѧ̀ жи́тели сподоблѧ́ѧ, ꙗ҆́кѡ є҆ди́нъ бл҃гоꙋтро́бенъ.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
На́съ ра́ди пло́тїю стрⷭ҇ть прїи́мый, и҆ тридне́венъ и҆з̾ ме́ртвыхъ воскр҃сы́й, плотскі̑ѧ на́шѧ стра̑сти и҆сцѣлѝ, и҆ возста́ви ѿ прегрѣше́нїй лю́тыхъ чл҃вѣколю́бче, и҆ сп҃сѝ на́съ.
Сла́ва, и҆ ны́нѣ, бг҃оро́диченъ: Хра́мъ и҆ две́рь є҆сѝ, пала́та и҆ прⷭ҇то́лъ цр҃е́въ, дв҃о всечⷭ҇тна́ѧ, є҆́юже и҆зба́витель мо́й, хрⷭ҇то́съ гдⷭ҇ь, во тьмѣ̀ спѧ́щымъ ꙗ҆ви́сѧ, сл҃нце сы́й пра́вды, просвѣти́ти хотѧ̀, ꙗ҆̀же созда̀ по ѡ҆́бразꙋ своемꙋ̀ рꙋко́ю свое́ю. тѣ́мже всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вшаѧ, непреста́ннѡ молѝ сп҃сти́сѧ дꙋша́мъ на́шымъ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ:
Тропа́рь,гла́съ є҃:
Собезнача́льное сло́во ѻ҆ц҃ꙋ̀ и҆ дх҃ови, ѿ дв҃ы ро́ждшеесѧ на сп҃се́нїе на́ше, воспои́мъ вѣ́рнїи и҆ поклони́мсѧ: ꙗ҆́кѡ бл҃говолѝ пло́тїю взы́ти на крⷭ҇тъ, и҆ сме́рть претерпѣ́ти, и҆ воскр҃си́ти ᲂу҆ме́ршыѧ сла́внымъ воскрⷭ҇нїемъ свои́мъ.
Бг҃оро́диченъ: Ра́дꙋйсѧ две́ре гдⷭ҇нѧ непроходи́маѧ: ра́дꙋйсѧ стѣно̀ и҆ покро́ве притека́ющихъ къ тебѣ̀. ра́дꙋйсѧ, неѡбꙋрева́емое приста́нище, и҆ неискꙋсобра́чнаѧ, ро́ждшаѧ пло́тїю творца̀ твоего̀ и҆ бг҃а: молѧ́щи не ѡ҆скꙋдѣва́й ѡ҆ воспѣва́ющихъ, и҆ кла́нѧющихсѧ ржⷭ҇твꙋ̀ твоемꙋ̀.
Въ сꙋббѡ́тꙋ на повече́рїи,
глаго́летъ і҆ере́й: Бл҃гослове́нъ бг҃ъ: И҆ мы̀: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. и҆ по Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те поклони́мсѧ: три́жды. ѱало́мъ н҃, и҆ про́чее ѻ҆бы́чно.
Посе́мъ канѡ́нъ прест҃ѣ́й бцⷣѣ, гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Припѣ́въ: Прест҃а́ѧ бцⷣе сп҃сѝ на́съ.
Пѣ́снь тѝ по достоѧ́нїю приноси́ти, влⷣчце, недоꙋмѣ́емъ всѝ: сла́ва бо па́че всѣ́хъ твоѧ̀. но ѻ҆ба́че бг҃оневѣ́сто, не ѡ҆мерзѝ моле́нїе приноси́мое со стра́хомъ и҆ любо́вїю тебѣ̀.
Всѝ къ водѣ̀ твоегѡ̀ неѡскꙋ́днагѡ и҆сто́чника, бцⷣе дв҃о, притека́емъ зовꙋ́ще: є҆ди́на ра́досте ро́дꙋ на́шемꙋ, пречⷭ҇таѧ, и҆спросѝ ми́ръ цр҃квамъ твои̑мъ.
Сла́ва: Положи́ тѧ приста́нище сꙋ́щымъ въ бѣда́хъ, чⷭ҇таѧ, бг҃ъ, и҆́же ѿ тебѐ бл҃говоли́вый воспрїѧ́ти пло́ть. тѣ́мже тѝ припа́дающе взыва́емъ: да́рꙋй твои̑мъ рабѡ́мъ твою̀ по́мощь.
И҆ ны́нѣ: Ѡ҆блегче́нїе твоѧ̀ мл҃тва, дв҃о пречⷭ҇таѧ, твои̑мъ рабѡ́мъ да бꙋ́детъ, страсте́й ѿгна́нїе, грѣхѡ́въ разрꙋше́нїе, и҆ всѧ́ческихъ болѣ́зней, бг҃ороди́тельнице, ѡ҆чище́нїе.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
Ты̀ є҆сѝ земноро́дныхъ ᲂу҆пова́нїе, и҆ по́мощь и҆ ра́дость, покро́въ и҆ прибѣ́жище, влⷣчце мт҃и живота̀. тѣ́мже тѧ̀ мо́лимъ: твою̀ по́мощь низпослѝ всѣ̑мъ пою́щымъ тѧ̀, пречⷭ҇таѧ.
Недꙋ́гꙋющїи, и҆ напа́стьми лю́тыми ѡ҆держи́мїи, вседѣ́телю ще́дрый, и҆́же всѧ́ческихъ бж҃е, пречⷭ҇тꙋю сѣ́нь твою̀ мт҃рь сп҃се, на мольбꙋ̀ тѝ приво́димъ: разрѣшѝ плєни́цы прегрѣше́нїй на́шихъ.
Сла́ва: Всѣ́хъ содержи́телѧ и҆ зижди́телѧ и҆ гдⷭ҇а ро́ждшаѧ є҆ди́на, и҆ дв҃ствꙋющи, и҆̀же вои́стиннꙋ тѧ̀ бж҃їю мт҃рь сла́вѧтъ, сп҃се́нїе бг҃оневѣ́сто, пода́ждь свы́ше рабѡ́мъ твои̑мъ.
И҆ ны́нѣ: Во́дъ животво́рныхъ мѧ̀ и҆спо́лни влⷣчце, бж҃е́ственнꙋю во́дꙋ мі́рови и҆сточи́вшаѧ: и҆ беззако́нїй мои́хъ лю̑тыѧ пото́ки и҆ се́рдца моегѡ̀ во́лны бж҃е́ственною твое́ю тишино́ю ᲂу҆кротѝ.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ сп҃стѝ пома̑занныѧ твоѧ̑ прише́лъ є҆сѝ.
Ꙗ҆́кѡ всѣ́хъ вы́шшꙋ сꙋ́щꙋю тва́рей, тѧ̀ бг҃ъ сꙋ́щымъ на землѝ дарова̀, є҆́же къ немꙋ̀ хода́тайствы вино́внꙋ, бцⷣе препѣ́таѧ.
Цр҃ковь тѧ̀ бж҃їю вѣ́дꙋще дв҃о мт҃и, прилѣ́жнѡ мо́лимсѧ тебѐ чтꙋ́щїи: не затворѝ рабѡ́мъ твои̑мъ бцⷣе, твоеѧ̀ млⷭ҇ти двере́й.
Сла́ва: Тѧ̀ всѝ бж҃їю вѣ́дꙋще преꙋкра́шенꙋ вои́стиннꙋ ѻ҆де́ждꙋ, мт҃и браконеискꙋ́снаѧ: и҆̀же тѧ̀ чтꙋ́щїи про́симъ, во ѡ҆ставле́нїѧ ѻ҆де́ждꙋ ѡ҆блецы̀ на́съ.
И҆ ны́нѣ: Мі́ръ въ ржⷭ҇твѣ̀ твое́мъ пречⷭ҇таѧ, ве́сь и҆спо́лнисѧ ра́дости: ѿне́лѣже, є҆́же ра́дꙋйсѧ, вели́кїй тебѣ̀ дв҃о мт҃и мр҃і́е, свы́ше гаврїи́лъ возгласѝ.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
Вои́стиннꙋ наказꙋ́емсѧ, не по ра́венствꙋ же до́лга согрѣше́нїй на́шихъ: но, ѽ дв҃о мт҃и пречⷭ҇таѧ, ѿвратѝ ве́сь гнѣ́въ сн҃а твоегѡ̀ ѿ на́съ.
Є҆ди́наго и҆зве́дшаго свѣ́тъ ѿ тьмы̀ чⷭ҇таѧ, бг҃а ро́ждши неискꙋсобра́чнѡ, прилѣ́жнѡ молѝ є҆го̀, низпосла́ти бж҃е́ственный свѣ́тъ рабѡ́мъ твои̑мъ.
Сла́ва: Ѿ каже́нїѧ мл҃твы твоеѧ̀ чⷭ҇таѧ, и҆ бж҃е́ственнаѧ невѣ́сто ѿ лїва́на, ю҆́же соломѡ́нъ проречѐ, рабы̑ твоѧ̑ мт҃и зижди́телѧ, бл҃гоꙋха́й.
И҆ ны́нѣ: Ты̀ пра́вдꙋ же и҆ и҆збавле́нїе на́мъ ро́ждши, хрⷭ҇та̀ без̾ сѣ́мене, свобо́дно содѣ́ѧла є҆сѝ бцⷣе, ѿ клѧ́твы є҆стество̀ пра́дѣднее.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ и҆ ѿ тлѝ возведѝ мѧ̀, ꙗ҆́кѡ бл҃гоꙋтро́бенъ.
Бцⷣе влⷣчце, ро́ждшаѧ содѣ́телѧ, твои̑мъ рабѡ́мъ и҆спросѝ ѡ҆ставле́нїе: и҆ держа́вны на́съ воздви́гни, во є҆́же пѣ́ти тѧ̀.
Бꙋ́ди на́мъ по́мощь твои̑мъ рабѡ́мъ, влⷣчце чⷭ҇таѧ вѣ́рнѡ молѧ́щымъ тѧ̀, ꙗ҆́кѡ млⷭ҇тива: и҆ держа́вны на́съ воздви́гни, во є҆́же пѣ́ти тѧ̀.
Сла́ва: По достоѧ́нїю и҆мꙋ́щи, є҆́же мощѝ влⷣчце чⷭ҇таѧ, твои́мъ млⷭ҇тивнымъ ѻ҆́комъ при́зри, и҆ ѿ тлѝ на́съ твоѧ̑ рабы̑ возведѝ.
И҆ ны́нѣ: Непреста́ннѡ точа́щи щедро́тъ стрꙋи̑ бл҃га́ѧ просѧ́щымъ, ѡ҆дождѝ и҆ мнѣ̀ свѣ́тъ за́повѣдей твоегѡ̀ сн҃а, пренепоро́чнаѧ.
Та́же, Гдⷭ҇и поми́лꙋй, три́жды.
Сла́ва, и҆ ны́нѣ, сѣда́ленъ, гла́съ є҃:
Всест҃а́ѧ дв҃о, поми́лꙋй на́съ прибѣга́ющихъ вѣ́рою къ тебѣ̀ млⷭ҇рдой, и҆ просѧ́щихъ те́плагѡ твоегѡ̀ застꙋпле́нїѧ: мо́жеши бо всѣ́хъ сп҃стѝ, ꙗ҆́кѡ бл҃га́ѧ сꙋ́щи мт҃и бг҃а вы́шнѧгѡ, мт҃рними твои́ми мл҃твами при́снѡ ѡ҆б̾е́мши дв҃о бг҃ора́дованнаѧ.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е бл҃гослове́нъ є҆сѝ.
Неизслѣ́днаѧ бж҃їѧ мꙋ́дросте хрⷭ҇тѐ, рабы̑ твоѧ̑ ᲂу҆ще́дри, ро́ждшїѧ тѧ̀ ра́ди, непреста́ннѡ пою́щыѧ: бж҃е, бл҃гослове́нъ є҆сѝ.
Твою̀ бл҃гость мо́лимъ гдⷭ҇и, ꙗ҆́звꙋ и҆сцѣлѝ ро́ждшїѧ тѧ̀ ра́ди со стра́хомъ пою́щихъ: бж҃е бл҃гослове́нъ є҆сѝ.
Сла́ва: Ѻ҆́комъ млⷭ҇тивнымъ твои́мъ бг҃ома́ти при́зри и҆ и҆зба́ви рабы̑ твоѧ̑ всѧ́кагѡ ѡ҆бстоѧ́нїѧ, вѣ́рою пою́щыѧ: бж҃е, бл҃гослове́нъ є҆сѝ.
И҆ ны́нѣ: Ѕло̀ дѣ́лающе, влⷣчце, ѿ тебѐ ѿпадо́хомъ: но ѡ҆брѣто́хомъ пречⷭ҇таѧ, а҆́бїе по́мощь твою̀, внегда̀ зва́ти: бж҃е, бл҃гослове́нъ є҆сѝ.
Пѣ́снь и҃
І҆рмо́съ: И҆з̾ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, сщ҃е́нницы по́йте, лю́дїе превозноси́те во всѧ̑ вѣ́ки.
Влⷣчце на́ша, бл҃ги́хъ пода́тельнице, рабѡ́мъ твои̑мъ да́рꙋй страсте́й и҆сцѣле́нїе: ꙗ҆́кѡ да непреста́ннѡ пое́мъ тѧ̀ дв҃о, и҆ превозно́симъ во вѣ́ки.
Неизглаго́ланнѡ чⷭ҇таѧ, и҆зба́вителѧ ро́ждши, несказа́ннѡ дои́ла є҆сѝ дв҃а пребы́вши. є҆го́же ᲂу҆́бѡ молѝ ѡ҆ пою́щихъ тѧ̀, и҆ славосло́вѧщихъ во всѧ̑ вѣ́ки.
Сла́ва: Тебѣ̀ свѣ́тломꙋ и҆зба́вителѧ свѣ́щникꙋ, прекра́сный спле́тше ли́къ пое́мъ: всѧ̑ дѣла̀ гдⷭ҇нѧ по́йте непреста́ннѡ дв҃ꙋ мр҃і́ю, и҆ превозноси́те ю҆̀ во вѣ́ки.
И҆ ны́нѣ: Чⷭ҇таѧ а҆́гнице, дв҃о мт҃и ѻ҆трокови́це, чи́ста мѧ̀ сотворѝ ѿ страсте́й тѣле́сныхъ: ꙗ҆́кѡ да льсти́вагѡ и҆зба́влюсѧ сѣ́тей, пѣсносло́вѧ тѧ̀ бг҃ора́дованнаѧ.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Соверша́етсѧ пѣ́нїе ᲂу҆́бѡ, наде́жда же влⷣко хрⷭ҇тѐ непрехо́дна, ꙗ҆́же къ тебѣ̀ содѣ́телю, ꙗ҆́коже и҆ бл҃года́ть твоѧ̀: но ѿѻбою́дꙋ си́лꙋ крѣ́пкꙋ дава́й рабѡ́мъ твои̑мъ, мл҃твами ро́ждшїѧ тѧ̀.
Недꙋ́гꙋющымъ си́ла, и҆ болѧ́щымъ бли́зъ ты̀ чⷭ҇таѧ є҆сѝ, ꙗ҆́кѡ и҆́стиннаѧ мт҃и жи́зни: тѣ́мже къ тебѣ̀ прибѣга́юще, премѣне́нїе всѣ́хъ ско́рбныхъ ѡ҆брѣто́хомъ, влⷣчце, и҆ кро́вомъ твои́мъ сп҃со́хомсѧ.
Сла́ва: Тво́й бж҃е́ственный ви́дѧще ѡ҆бра́знѡ влⷣчце зра́къ, зри́мъ тѧ̀ въ не́мъ ꙗ҆́коже ꙗ҆́вѣ, всѧ́кѡ ненави́дѧще є҆реті̑къ безꙋ́мїе на землѝ. є҆мꙋ́же припа́дающе и҆сцѣле́нїе прїе́млемъ.
И҆ ны́нѣ: И҆сцѣле́нїємъ бе́зднꙋ, и҆ бл҃года́тємъ пꙋчи́нꙋ, чⷭ҇таѧ позна́хомъ тѧ̀ мы̀ грѣ́шнїи. тѣ́мже тѝ мо́лимсѧ: ѿ нꙋ́ждныхъ всѣ́хъ и҆змѝ є҆ди́на пречⷭ҇таѧ, притека́ющихъ къ покро́вꙋ твоемꙋ̀.
Та́же, Досто́йно є҆́сть: Трист҃о́е. По Ѻ҆́ч҃е на́шъ: Конда́къ, и҆ про́чее ѻ҆бы́чно: и҆ ѿпꙋ́стъ.
Въ недѣ́лю ᲂу҆́тра, на полꙋ́нощницѣ,
канѡ́нъ ст҃ѣ́й и҆ живонача́льнѣй трⷪ҇цѣ, [є҆гѡ́же краестро́чїе: Пра́вило пѧ́тое свѣ́тꙋ трисо́лнечномꙋ.] Творе́нїе митрофа́ново, гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Припѣ́въ: Прест҃а́ѧ трⷪ҇це бж҃е на́шъ, сла́ва тебѣ̀.
Держа́вꙋ є҆ди́нственнагѡ и҆ трисл҃нечнагѡ зра́ка воспѣва́юще вопїе́мъ: ᲂу҆́мъ на́шъ ѡ҆зарѝ бж҃е всеси́льне, и҆ къ твое́й влⷣко, возвы́си сла́вѣ неизрече́ннѣй.
Горѣ́ тѧ а҆́гг҃льскаѧ ᲂу҆добрє́нїѧ ᲂу҆́мнаѧ немо́лчнѡ пою́тъ трист҃ы́ми пѣ́сньми, є҆ди́ницꙋ тричи́сленнꙋю, и҆ трⷪ҇цꙋ соѡбра́знꙋ, пресꙋ́щественнꙋ, всеси́льнꙋ.
Сла́ва: Бж҃е́ственное питїѐ твоеѧ̀ любвѐ, сладча́йшее, свѣтодѣ́йственное, дꙋшѝ мое́й пода́ждь, трⷪ҇це є҆ди́нице свѣтонача́льнаѧ, и҆ бж҃е́ственное ᲂу҆миле́нїе чисти́тельное, влⷣко многомлⷭ҇тиве, всеѧ̀ тва́ри.
И҆ ны́нѣ, бг҃оро́диченъ: Ꙗ҆́коже на рꙋно̀ сни́де без̾ шꙋ́ма съ нб҃сѐ дв҃о, до́ждь въ ложесна̀ твоѧ̑ бж҃е́ственный: и҆ сп҃сѐ всѐ и҆зсо́хшее человѣ́ческое є҆стество̀ пречⷭ҇таѧ.
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
Оу҆мы́сливъ ᲂу҆́мнаѧ сꙋщєства̀, соста́вилъ є҆сѝ пѣвцы̀ непреста̑нныѧ твоегѡ̀ бж҃ества̀, трисвѣ́тлый бж҃е и҆ вседѣ́телю: но и҆ бре́нныхъ и҆ земноро́дныхъ прїимѝ моле́нїе и҆ мольбꙋ̀, ꙗ҆́кѡ бл҃гоꙋтро́бенъ.
И҆́же всѧ́кагѡ по є҆стествꙋ̀ премѣне́нїѧ непрїѧ́тенъ, и҆змѣнѧ́ємымъ на́мъ и҆ пою́щымъ, неизслѣ́димый и҆сто́чникъ твоеѧ̀ бл҃гости, согрѣше́нїй да́ждь проще́нїе, и҆ сп҃се́нїе, ꙗ҆́кѡ бл҃гоꙋтро́бенъ.
Сла́ва: Ѻ҆ц҃а̀ и҆ сн҃а, и҆ дх҃а сла́вимъ, въ непремѣ́ннѣмъ зра́цѣ бж҃ества̀ тебѐ є҆ди́нственнаго и҆ трисїѧ́ннаго гдⷭ҇а всѣ́хъ, ꙗ҆́коже прⷪ҇ро́цы, и҆ а҆пⷭ҇ли ѿ тебѐ ꙗ҆́вѣ наꙋчи́шасѧ.
Бг҃оро́диченъ: Ꙗ҆ви́лсѧ є҆сѝ мѡѷсе́ю въ кꙋпинѣ̀, ꙗ҆́кѡ а҆́гг҃лъ совѣ́та вели́кагѡ вседержи́телева, твоѐ є҆́же ѿ дв҃ы проѧвлѧ́ѧ воплоще́нїе, бж҃їй сло́ве: и҆́мже на́съ претвори́лъ є҆сѝ, и҆ на нб҃са̀ возве́лъ є҆сѝ.
Гдⷭ҇и поми́лꙋй, три́жды.
Сѣда́ленъ,гла́съ є҃. Подо́бенъ: Собезнача́льное сло́во:
Млⷭ҇тива є҆сѝ трⷪ҇це нераздѣ́льнаѧ: ми́лꙋеши бо всѣ́хъ, ꙗ҆́кѡ всеси́льнаѧ и҆ всеще́дра, сострада́тельна и҆ многомлⷭ҇тива. тѣ́мже прибѣга́емъ къ тебѣ̀, и҆̀же грѣхмѝ мно́гими ѡ҆тѧгча́еми взыва́юще: ѡ҆чи́сти твоѧ̑ рабы̑, и҆ и҆зба́ви всѣ́хъ всѧ́кїѧ мꙋ́ки.
Сла́ва, и҆ ны́нѣ, бг҃оро́диченъ: Всест҃а́ѧ дв҃о, поми́лꙋй на́съ прибѣга́ющихъ вѣ́рою къ тебѣ̀ бл҃гоꙋтро́бнѣй, и҆ просѧ́щихъ те́плагѡ твоегѡ̀ ны́нѣ застꙋпле́нїѧ: мо́жеши бо ꙗ҆́кѡ бл҃га́ѧ всѣ́хъ сп҃стѝ, ꙗ҆́кѡ сꙋ́щи мт҃и бг҃а вы́шнѧгѡ, мт҃рнїѧ твоѧ̑ мл҃твы при́снѡ ᲂу҆потреблѧ́ющи, бг҃обл҃года́тнаѧ.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ, сп҃стѝ пома̑занныѧ твоѧ̑ прише́лъ є҆сѝ.
Та́йнѡ наꙋча́етсѧ є҆ди́нагѡ гдⷭ҇ьства трисвѣ́тломꙋ данїи́лъ, хрⷭ҇та̀ сꙋдїю̀ ᲂу҆зрѣ́въ ко ѻ҆ц҃ꙋ̀ и҆дꙋ́ща, и҆ дх҃а проѧвлѧ́юща видѣ́нїе.
Бре́нными пою́щихъ тѧ̀ ᲂу҆сты̀, пресꙋ́щественнаго бг҃а, трⷪ҇чна ѵ҆поста́сьми, є҆ди́нственна же є҆стество́мъ, сла́вы а҆́гг҃льскїѧ сподо́би.
Сла́ва: Є҆ди́нꙋ вла́сть, и҆ є҆ди́но гдⷭ҇ьство, въ трїе́хъ сво́йствахъ неразлꙋ́чнѡ сла́вимъ: ѻ҆́ч҃е, и҆ сн҃е, и҆ дш҃е, просвѣтѝ ны̀ рабы̑ твоѧ̑.
Бг҃оро́диченъ: Гора̀ ча́стаѧ и҆ присѣ́ннаѧ, ю҆́же ви́дѣвъ пре́жде а҆ввакꙋ́мъ, и҆з̾ неѧ́же про́йде ст҃ы́й: неꙋдо́бь зри́мое ржⷭ҇тво̀ ꙗ҆влѧ́ше твоегѡ̀ дв҃о, зача́тїѧ.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́треннюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
И҆́же за бл҃гость созда́вый человѣ́ка, и҆ по ѡ҆́бразꙋ твоемꙋ̀ сотво́рь, во мнѣ̀ ѡ҆бита́й трисвѣ́тне бж҃е мо́й, ꙗ҆́кѡ бл҃гъ и҆ бл҃гоꙋтро́бенъ.
Ты́ мѧ наста́ви є҆ди́нице трисл҃нечнаѧ, къ стезѧ́мъ бж҃е́ствєннымъ сп҃се́нїѧ, и҆ твоегѡ̀ сїѧ́нїѧ и҆спо́лни, ꙗ҆́кѡ є҆стество́мъ бг҃ъ неисчетноси́ленъ.
Сла́ва: Свѣ́тъ нераздѣ́льный є҆ди́нагѡ є҆стества̀, раздѣле́нный начерта́ньми, трисїѧ́нный, невече́рнїй, моѐ се́рдце лꙋча́ми твои́ми ѡ҆зарѝ.
Бг҃оро́диченъ: Ꙗ҆́кѡ ви́дѣ тѧ̀ дре́вле чⷭ҇таѧ пренепоро́чнаѧ, прⷪ҇ро́къ, зрѧ̑щаѧ врата̀ къ свѣ́тꙋ незаходи́момꙋ, а҆́бїе тѧ̀ позна̀ бж҃їе жили́ще.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведѝ мѧ̀, ꙗ҆́кѡ бл҃гоꙋтро́бенъ.
Трисвѣ́тлое сꙋ́ще бг҃онача́лїе ѵ҆поста́снѣ, є҆ди́нственна є҆сѝ, ꙗ҆́кѡ соѡбра́зна и҆ равнодѣ́тельна, и҆ по сꙋществꙋ̀ и҆ хотѣ́нїю.
Дово́льнѡ и҆з̾ѧвѝ прⷪ҇ро́къ, поѧ̀ ѻ҆ц҃ꙋ̀ твоемꙋ̀ свѣ́тꙋ: ᲂу҆́зримъ дх҃омъ, свѣ́тъ сн҃а, є҆ди́наго бг҃а трисо́лнечнаго.
Сла́ва: Несоста́вно сꙋщество̀ въ трїе́хъ сво́йствѣхъ, є҆ди́нꙋ вла́сть и҆ держа́вꙋ и҆мы́й: тѣ́мъ бо состои́тсѧ тва́рь всѧ́ческаѧ, и҆ ѡ҆бновлѧ́етсѧ.
Бг҃оро́диченъ: Прегрѣше́нїй и҆збавле́нїе и҆ бѣ́дъ, влⷣко бж҃е, є҆ди́нственне и҆ трисвѣ́тне, низпослѝ твои̑мъ пѣвцє́мъ, мл҃твами бг҃омт҃ре.
Гдⷭ҇и поми́лꙋй, три́жды.
Сѣда́ленъ,гла́съ є҃. Подо́бенъ: Собезнача́льное сло́во:
Трисо́лнечный свѣ́тъ славосло́вимъ, и҆ про́стѣй трⷪ҇цѣ ны́нѣ поклони́мсѧ, ꙗ҆́кѡ просвѣтѝ на́съ и҆ поми́лова, и҆ и҆зба́ви ѿ тлѝ ве́сь ро́дъ человѣ́ческїй, и҆збавлѧ́ющи ѿ пре́лести і҆́дѡльскїѧ ве́сь мі́ръ, и҆ ца́рство на́мъ подадѐ.
Сла́ва, и҆ ны́нѣ, бг҃оро́диченъ: Недоꙋмѣ́всѧ ѿ всѣ́хъ, къ тебѣ̀ прибѣго́хъ къ наде́жди всѣ́хъ, и҆ прибѣ́жищꙋ грѣ́шныхъ и҆ смире́нныхъ, зовы́й: согрѣши́хъ, и҆ пребыва́ю въ ѕлы́хъ, нечꙋ́вствꙋѧ ѻ҆каѧ́нный. поми́лꙋй мѧ̀, пре́жде конца̀ ѡ҆брати́ мѧ, и҆ и҆зба́ви всѧ́кїѧ мꙋ́ки, недосто́йнаго.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е бл҃гослове́нъ є҆сѝ.
Ꙗ҆́кѡ и҆мы́й бе́зднꙋ млⷭ҇ти, гдⷭ҇и, и҆ пꙋчи́нꙋ неизче́тнꙋ щедро́тъ, поми́лꙋй є҆ди́наго тѧ̀ пою́щихъ, трисвѣ́тлаго бг҃а всѣ́хъ.
Неѡбмы́слимаго, є҆ди́нственна и҆ трисвѣ́тла, бг҃а тѧ̀ и҆ гдⷭ҇а пою́ще вопїе́мъ тѝ: пода́ждь твои̑мъ рабѡ́мъ ѡ҆чище́нїе грѣхѡ́въ.
Сла́ва: Ра́внѡ ѵ҆поста̑си во є҆ди́ной держа́вѣ чтꙋ́ще раздѣлѧ́емъ нераздѣли́мо сꙋщество̀, бг҃а ѻ҆ц҃а̀, и҆ сн҃а, и҆ прест҃а́го дх҃а.
Бг҃оро́диченъ: Ѻ҆́трасль прозѧбла̀ є҆сѝ, ѻ҆ц҃ꙋ̀ собезнача́льнꙋю, цвѣ́тъ бж҃ества̀: ѻ҆́трасль соприсносꙋ́щнꙋю, дв҃о, даю́щꙋю жи́знь всѣ̑мъ человѣ́кѡмъ.
Пѣ́снь и҃
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Да є҆ди́наго ѿкры́еши дре́вле ꙗ҆́вѣ гдⷭ҇ьства трⷪ҇чнꙋю ѵ҆поста́сь, ꙗ҆ви́лсѧ є҆сѝ бж҃е мо́й, во ѡ҆́бразѣ человѣ́кѡвъ а҆враа́мꙋ, пою́щꙋ твою̀ держа́вꙋ є҆ди́нственнꙋю.
Ты́ мѧ къ твои̑мъ бл҃годѣ́тєльнымъ лꙋча́мъ взира́ти сподо́би свѣ́те непристꙋ́пный, ѻ҆́ч҃е ще́дрый, и҆ сло́ве, и҆ дш҃е, є҆́же бл҃гоꙋгожда́ти тебѣ̀ при́снѡ, гдⷭ҇и всѣ́хъ.
Сла́ва: Ст҃ъ ѻ҆ц҃ъ бг҃ъ превѣ́чный: ст҃ъ же сн҃ъ и҆з̾ ѻ҆ц҃а̀ рожде́нъ: ст҃ъ же и҆ животворѧ́щїй дх҃ъ, и҆сходѧ̀ и҆з̾ ѻ҆ц҃а̀, сн҃омъ же ꙗ҆влѧ́емь.
Бг҃оро́диченъ: Ѡ҆блиста́ла є҆сѝ на́мъ ѿ трисл҃нечныѧ сла́вы, є҆ди́наго всепѣ́таѧ хрⷭ҇та̀ гдⷭ҇а, всѣ́хъ тайнонаꙋча́юща є҆ди́номꙋ бг҃онача́лїю въ трїе́хъ ли́цѣхъ, пѣ́ти во вѣ́ки.
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Глагѡ́ланїѧ человѣ́чєскаѧ по достоѧ́нїю, безнача́льнаѧ є҆ди́нице, не мо́гꙋтъ пѣ́ти тѧ̀: ѻ҆ба́че ꙗ҆́коже мо́щно дерза́юще ѿ вѣ́ры, бг҃онача́льнаѧ, сопресто́льнаѧ трⷪ҇це, сла́вꙋ прино́симъ твое́й держа́вѣ, и҆ хвалꙋ̀.
Равноста́тною сла́вою, тѧ̀ є҆динонача́льнаго трисвѣ́тлагѡ бг҃а сла́вѧтъ херꙋві́ми и҆ серафі́ми пречⷭ҇тыми ᲂу҆сты̀: съ ни́миже и҆ на́съ грѣ́шныхъ прїимѝ гдⷭ҇и, твою̀ держа́вꙋ велича́ющихъ.
Сла́ва, И҆са́їа тѧ̀ ви́дѣ на прⷭ҇то́лѣ херꙋві́мстѣ, и҆ серафі́мы стоѧ́щыѧ ѻ҆́крестъ тебѐ, кри́лы ли́ца закрыва́ющыѧ, и҆ вопїю́щыѧ: ст҃ъ, ст҃ъ, ст҃ъ, трист҃ы́й бж҃е, сла́вимый въ трїе́хъ сво́йствѣхъ.
Бг҃оро́диченъ: Ꙗ҆́кѡ чⷭ҇таѧ и҆ непоро́чнаѧ и҆ дв҃а, родила̀ є҆сѝ сн҃а, и҆збавлѧ́ющаго на́съ ѿ и҆скꙋше́нїй, бг҃а неизмѣ́нна: но и҆ ны́нѣ ѡ҆ставле́нїе на́мъ прегрѣше́нїй да́ти сего̀ молѝ.
Посе́мъ припѣ́вы григо́рїа сїнаи́та: Досто́йно є҆́сть: И҆ про́чее полꙋ́нощницы, пи́сано въ концѣ̀ кни́ги сеѧ̀.
На ᲂу҆́трени, по шестоѱа́лмїи:
Бг҃ъ гдⷭ҇ь, и҆ ꙗ҆ви́сѧ на́мъ: на гла́съ є҃: и҆ глаго́лемъ тропа́рь воскрⷭ҇ный: Собезнача́льное сло́во ѻ҆ц҃ꙋ̀: два́жды. Сла́ва, и҆ ны́нѣ, бг҃оро́диченъ: Ра́дꙋйсѧ две́ре гдⷭ҇нѧ непроходи́маѧ: Та́же, ѻ҆бы́чнаѧ стїхоло́гїа ѱалти́ра.
По а҃-мъ стїхосло́вїи сѣда́льны воскрⷭ҇ны, гла́съ є҃:
Крⷭ҇тъ гдⷭ҇ень похва́лимъ, погребе́нїе ст҃о́е пѣ́сньми почти́мъ, и҆ воскрⷭ҇нїе є҆гѡ̀ препросла́вимъ: ꙗ҆́кѡ совозста́ви мє́ртвыѧ ѿ грѡ́бъ ꙗ҆́кѡ бг҃ъ, плѣни́въ сме́рти держа́вꙋ, и҆ крѣ́пость дїа́волю, и҆ сꙋ́щымъ во а҆́дѣ свѣ́тъ возсїѧ̀.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Гдⷭ҇и ме́ртвъ наре́клсѧ є҆сѝ, ᲂу҆мертви́вый сме́рть, во гро́бѣ положи́лсѧ є҆сѝ, и҆стощи́вый гро́бы: горѣ̀ во́ини гро́ба стрежа́хꙋ, до́лѣ ѿ вѣ́ка мє́ртвыѧ воскр҃си́лъ є҆сѝ. всеси́льне и҆ непостижи́ме гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ: Ра́дꙋйсѧ ст҃а́ѧ горо̀ и҆ бг҃опрохо́днаѧ, ра́дꙋйсѧ ѡ҆дꙋшевле́ннаѧ кꙋпино̀ и҆ неѡпали́маѧ. ра́дꙋйсѧ є҆ди́на къ бг҃ꙋ мі́рови мо́сте, преводѧ́й мє́ртвыѧ къ вѣ́чномꙋ животꙋ̀. ра́дꙋйсѧ нетлѣ́ннаѧ ѻ҆трокови́це, неискꙋсомꙋ́жнѡ ро́ждшаѧ сп҃се́нїе дꙋ́шъ на́шихъ.
По в҃-мъ стїхосло́вїи сѣда́льны воскрⷭ҇ны, гла́съ є҃:
Гдⷭ҇и, по тридне́внѣмъ твое́мъ воскрⷭ҇нїи, и҆ а҆пⷭ҇лѡвъ поклоне́нїи, пе́тръ вопїѧ́ше тѝ: жєны̀ дерзнове́нїе прїѧ́ша, а҆́зъ же ᲂу҆боѧ́хсѧ. разбо́йникъ бг҃осло́вѧше, а҆́зъ же ѿверго́хсѧ. ᲂу҆̀бо призове́ши ли мѧ̀ про́чее ᲂу҆ч҃нка̀ бы́ти; и҆лѝ па́ки пока́жеши мѧ̀ ловца̀ глꙋби́ннаго; но ка́ющасѧ прїими́ мѧ бж҃е, и҆ сп҃си́ мѧ.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Гдⷭ҇и, посредѣ̀ ѡ҆сꙋжде́нныхъ пригвозди́ша тѧ̀ беззако́ннїи, и҆ копїе́мъ ребро̀ твоѐ прободо́ша, ѽ млⷭ҇тиве! погребе́нїе же прїѧ́лъ є҆сѝ, разрꙋши́вый а҆́дѡва врата̀, и҆ воскрⷭ҇лъ є҆сѝ тридне́внѡ. притеко́ша жєны̀ ви́дѣти тѧ̀, и҆ возвѣсти́ша а҆пⷭ҇лѡмъ воста́нїе: превозноси́мый сп҃се, є҆го́же пою́тъ а҆́гг҃ли, бл҃гослове́нный гдⷭ҇и, сла́ва тебѣ̀.
Сла́ва, и҆ ны́нѣ, бг҃оро́диченъ: Неискꙋсобра́чнаѧ невѣ́сто бг҃ороди́тельнице, ꙗ҆́же є҆́ѵинꙋ печа́ль радостотвори́вшаѧ, воспѣва́емъ вѣ́рнїи и҆ покланѧ́емсѧ тебѣ̀, ꙗ҆́кѡ возвела̀ є҆сѝ на́съ ѿ дре́внїѧ клѧ́твы: и҆ ны́нѣ молѝ непреста́ннѡ, всепѣ́таѧ, прест҃а́ѧ, во є҆́же сп҃сти́сѧ на́мъ.
Ѵ҆пакоѝ, гла́съ є҃:
А҆́гг҃льскимъ зра́комъ ᲂу҆́мъ смꙋща́ющѧ, и҆ бж҃е́ственнымъ воста́нїемъ дꙋше́ю просвѣща́емы, мѷронѡ́сицы а҆пⷭ҇лѡмъ бл҃говѣствова́хꙋ: возвѣсти́те во ꙗ҆зы́цѣхъ воскрⷭ҇нїе, гдⷭ҇ꙋ содѣ́йствꙋющꙋ чꙋдесы̀, подаю́щемꙋ на́мъ ве́лїю млⷭ҇ть.
Степє́нна, гла́съ є҃. А҆нтїфѡ́нъ а҃.
И҆́хже стїхѝ повторѧ́юще пое́мъ:
Внегда̀ скорбѣ́ти мнѣ̀, даві́дски пою̀ тебѣ̀ сп҃се мо́й: и҆зба́ви дꙋ́шꙋ мою̀ ѿ ѧ҆зы́ка льсти́вагѡ.
Пꙋсты̑ннымъ живо́тъ бл҃же́нъ є҆́сть, бж҃е́ственнымъ раче́нїемъ воскрилѧ́ющымсѧ.
Сла́ва: Ст҃ы́мъ дх҃омъ ѡ҆держа́тсѧ всѧ̑, ви̑димаѧ же съ неви́димыми: самодержа́венъ бо сы́й, трⷪ҇цы є҆ди́нъ є҆́сть нело́жнѡ.
И҆ ны́нѣ, то́йже. А҆нтїфѡ́нъ в҃:
На го́ры дꙋшѐ, воздви́гнемсѧ, грѧдѝ та́мѡ, ѿню́дꙋже по́мощь и҆́детъ.
Десна́ѧ твоѧ̀ рꙋка̀, и҆ менѐ хрⷭ҇тѐ каса́ющисѧ, ѿ ле́сти всѧ́кїѧ да сохрани́тъ.
Сла́ва: Ст҃о́мꙋ дх҃ꙋ бг҃осло́вѧще рце́мъ: ты̀ є҆сѝ бг҃ъ, живо́тъ, раче́нїе, свѣ́тъ, ᲂу҆́мъ: ты̀ бл҃госты́нѧ, ты̀ црⷭ҇твꙋеши во вѣ́ки.
И҆ ны́нѣ, то́йже. А҆нтїфѡ́нъ г҃:
Ѡ҆ ре́кшихъ мнѣ̀: во дворы̀ вни́демъ гдⷭ҇нѧ: ра́дости мно́гїѧ и҆спо́лненъ бы́въ, мл҃твы возсыла́ю.
Въ домꙋ̀ дв҃довѣ стра̑шнаѧ соверша́ютсѧ: ѻ҆́гнь бо та́мѡ палѧ̀ всѧ́къ сра́мный ᲂу҆́мъ.
Сла́ва: Ст҃о́мꙋ дх҃ꙋ живонача́льное досто́инство, ѿ негѡ́же всѧ́кое живо́тно ѡ҆дꙋшевлѧ́етсѧ, ꙗ҆́кѡ во ѻ҆ц҃ѣ̀, кꙋ́пнѡ же и҆ сло́вѣ.
И҆ ны́нѣ, то́йже.
Прокі́менъ,гла́съ є҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, ꙗ҆́кѡ ты̀ црⷭ҇твꙋеши во вѣ́ки. Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀:
Є҆ѵⷢ҇лїеᲂу҆́треннее рѧдово́е.
Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ, є҆ди́номꙋ безгрѣ́шномꙋ: крⷭ҇тꙋ̀ твоемꙋ̀ покланѧ́емсѧ хрⷭ҇тѐ, и҆ ст҃о́е воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебѐ и҆но́гѡ не зна́емъ, и҆́мѧ твоѐ и҆менꙋ́емъ. Прїиди́те всѝ вѣ́рнїи, поклони́мсѧ ст҃о́мꙋ хрⷭ҇то́вꙋ воскрⷭ҇нїю: се́ бо прїи́де крⷭ҇то́мъ ра́дость всемꙋ̀ мі́рꙋ. всегда̀ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: распѧ́тїе бо претерпѣ́въ, сме́ртїю сме́рть разрꙋшѝ.
Ѱало́мъ н҃: Поми́лꙋй мѧ̀ бж҃е:
Сла́ва: Мл҃твами а҆пⷭ҇лѡвъ, млⷭ҇тиве, ѡ҆чи́сти мно́жєства согрѣше́нїй на́шихъ.
И҆ ны́нѣ: Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ.
Та́же, гла́съ ѕ҃: Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ, ѡ҆чи́сти беззако́нїе моѐ.
Посе́мъ стїхи́ра:
Воскр҃съ і҆и҃съ ѿ гро́ба, ꙗ҆́коже проречѐ, дадѐ на́мъ живо́тъ вѣ́чный, и҆ ве́лїю млⷭ҇ть.
Сп҃сѝ бж҃е лю́ди твоѧ̑:
И҆ возгла́съ: Млⷭ҇тїю и҆ щедро́тами и҆ чл҃вѣколю́бїемъ:
Канѡ́ны: Воскрⷭ҇ный на д҃: Крⷭ҇товоскрⷭ҇ный на г҃: Бг҃оро́диченъ на г҃: Мине́и на д҃. А҆́ще же пра́зднꙋетсѧ ст҃ы́й, на ѕ҃. Крⷭ҇товоскрⷭ҇ный на в҃: и҆ бцⷣы на в҃.
Канѡ́нъ воскрⷭ҇нъ, гла́съ є҃:
Пѣ́снь а҃
І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Тебѐ терноно́сный є҆вре́йскїй со́нмъ, любвѐ бл҃годѣ́телю къ тебѣ̀ не сохра́нь мт҃рнїѧ, хрⷭ҇тѐ вѣнча̀, родонача́льника разрѣша́юща терно́вное запреще́нїе.
Воздви́глъ є҆си́ мѧ па́дшаго въ ро́въ, прекло́ньсѧ жизнода́вче, безгрѣ́шне: и҆ моеѧ̀ ѕлосмра́дныѧ тлѝ хрⷭ҇тѐ, претерпѣ́въ неискꙋше́нно, бж҃е́ственнагѡ сꙋщества̀ мѵ́ромъ мѧ̀ ѡ҆бл҃гоꙋха́лъ є҆сѝ.
Бг҃оро́диченъ: Разрѣши́сѧ клѧ́тва, печа́ль преста̀: бл҃гослове́ннаѧ бо и҆ бл҃года́тнаѧ, вѣ̑рнымъ ра́дость возсїѧ̀, бл҃гослове́нїе всѣ̑мъ концє́мъ цвѣтоносѧ́щи хрⷭ҇та̀.
Дрꙋгі́й канѡ́нъ крⷭ҇товоскрⷭ҇нъ.
Пѣ́снь а҃, гла́съ то́йже.
І҆рмо́съ: Сп҃си́телю бг҃ꙋ:
И҆́же во́лею на крⷭ҇тѣ̀ пригвожде́нномꙋ пло́тїю, и҆ ꙾дре́внѧгѡ ѿ и҆зрече́нїѧ дре́вомъ꙾[[꙾дре́внѧгѡ ѡ҆сꙋжде́нїѧ и҆́же дре́вомъ꙾]] па́дшаго свобо́ждшемꙋ, томꙋ̀ є҆ди́номꙋ воспои́мъ: ꙗ҆́кѡ просла́висѧ.
И҆́же и҆з̾ гро́ба мертвецꙋ̀ воскрⷭ҇шꙋ хрⷭ҇тꙋ̀, и҆ па́дшаго совозста́вившꙋ, и҆ сосѣдѣ́нїемъ ѻ҆ч҃ескимъ ᲂу҆краси́вшемꙋ, томꙋ̀ є҆ди́номꙋ воспои́мъ: ꙗ҆́кѡ просла́висѧ.
Бг҃оро́диченъ: Пречⷭ҇таѧ мт҃и бж҃їѧ, и҆з̾ тебѐ вопло́щшемꙋсѧ, и҆ ѿ нѣ́дръ роди́телѧ не разлꙋ́чшемꙋсѧ бг҃ꙋ, непреста́ннѡ моли́сѧ, ѿ всѧ́кагѡ ѡ҆бстоѧ́нїѧ сп҃стѝ, и҆̀хже созда̀.
И҆́нъ канѡ́нъ прест҃ѣ́й бцⷣѣ [є҆го́же краестро́чїе: Свѣ́тъ ро́ждшаѧ, просвѣти́ мѧ дв҃о.].
Пѣ́снь а҃, гла́съ то́йже.
І҆рмо́съ: Конѧ̀ и҆ вса́дника въ мо́ре чермно́е:
Свѣ́та все́льшагосѧ въ тѧ̀ пречⷭ҇таѧ, и҆ просвѣ́щшаго мі́ръ лꙋча́ми бж҃ества̀, хрⷭ҇та̀ молѝ, просвѣти́ти всѧ̑ пою́щыѧ тѧ̀, мт҃и дв҃о.
Ꙗ҆́кѡ ᲂу҆краша́ема добро́тою добродѣ́телей бл҃года́тнаѧ, добротво́рное бл҃голѣ́пїе лꙋче́ю дх҃а, под̾ѧ́ла є҆сѝ всечⷭ҇таѧ, всѧ́чєскаѧ ᲂу҆добри́вшаго.
Тебѐ дре́вле проѡбразꙋ́ющи кꙋпина̀ въ сїна́и, не ѡ҆пали́сѧ дв҃о, ѻ҆гню̀ присовокꙋ́пльшисѧ: дв҃а бо родила̀ є҆сѝ, и҆ дв҃а пребыла̀ є҆сѝ, па́че смы́сла мт҃и дв҃о.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃
І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче.
Же́лчь ᲂу҆́бѡ и҆̀же и҆з̾ ка́мене ме́дъ сса́вшїи, въ пꙋсты́ни чꙋдодѣ́йствовавшемꙋ тебѣ̀ принесо́ша хрⷭ҇тѐ: ѻ҆́цетъ же за ма́ннꙋ воз̾ бл҃годѣѧ́нїе тѝ возда́ша ѻ҆́троцы і҆и҃лєвы небл҃года́рнїи.
И҆̀же дре́вле свѣтови́днымъ ѻ҆́блакомъ покрыва́еми, живо́тъ во гро́бѣ хрⷭ҇та̀ положи́ша: но самовла́стнѡ воскр҃съ, всѣ̑мъ вѣ̑рнымъ подадѐ та́йнѡ ѡ҆сѣнѧ́ющее свы́ше дх҃а сїѧ́нїе.
Бг҃оро́диченъ: Ты̀ мт҃и бж҃їѧ несочета́ннѡ родила̀ є҆сѝ, и҆́же ѡ҆ нетлѣ́нна ѻ҆ц҃а̀ возсїѧ́вшаго, кромѣ̀ болѣ́зней ма́тернихъ: тѣ́мже тѧ̀ бцⷣꙋ, воплоще́нна бо родила̀ є҆сѝ сло́ва, правосла́внѡ проповѣ́дꙋемъ.
И҆́нъ І҆рмо́съ: Си́лою крⷭ҇та̀ твоегѡ̀ хрⷭ҇тѐ:
Воскрⷭ҇лъ є҆сѝ ѿ гро́ба хрⷭ҇тѐ, тлѝ сме́ртныѧ и҆зба́вль воспѣва́ющихъ жизнода́вче, во́льное твоѐ распѧ́тїе.
Пома́зати мѵ́ромъ тѣ́ло твоѐ мѷронѡ́сицы хрⷭ҇тѐ тща́хꙋсѧ, и҆ не ѡ҆брѣ́тшѧ возврати́шасѧ, воспѣва́ющѧ твоѐ воста́нїе.
Бг҃оро́диченъ: Молѝ непреста́ннѡ чⷭ҇таѧ, воплоще́ннаго и҆з̾ бокꙋ̀ твое́ю, и҆зба́вити ѿ ле́сти дїа́воли, воспѣва́ющыѧ тѧ̀ дв҃ꙋ чⷭ҇тꙋю.
И҆́нъ І҆рмо́съ: Водрꙋзи́вый на ничесо́мже:
Лѣ́ствица, є҆́юже къ на́мъ сни́де вы́шнїй, и҆стлѣ́вшее є҆стество̀ и҆спра́вити, ты̀ ꙗ҆́вственнѡ чⷭ҇таѧ, всѣ̑мъ ны́нѣ ви́дѣна была̀ є҆сѝ, тобо́ю бо пребл҃гі́й мі́рови ꙾бесѣ́довати꙾[[꙾причасти́тисѧ꙾]] бл҃говолѝ.
Є҆́же дре́вле предꙋста́вленное дв҃о та́инство, и҆ пре́жде вѣ̑къ прови́димое всѧ̑ вѣ́дꙋщемꙋ бг҃ꙋ, лѣ́тѡмъ ны́нѣ напослѣ́докъ въ ложесна́хъ твои́хъ всенепоро́чнаѧ, коне́цъ прїе́мъ ꙗ҆ви́сѧ.
Разрѣши́сѧ клѧ́твы дре́внїѧ ѡ҆сꙋжде́нїе твои́мъ хода́тайствомъ дв҃о пречⷭ҇таѧ: и҆з̾ тебе́ бо гдⷭ҇ь ꙗ҆́вльсѧ, всѣ̑мъ бл҃гослове́нїе ꙗ҆́кѡ пребл҃гі́й и҆сточѝ, є҆ди́на человѣ́кѡмъ ᲂу҆добре́нїе.
Пѣ́снь д҃
І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ сп҃стѝ пома̑занныѧ твоѧ̑ прише́лъ є҆сѝ.
Ꙗ҆̀же ѿ ме́рры горча́йшыѧ во́ды, ꙗ҆́кѡ во ѡ҆́бразѣ проначерта́ѧ пречⷭ҇тый крⷭ҇тъ тво́й бл҃же, грѣхо́вное ᲂу҆мерщвлѧ́ющъ вкꙋше́нїе, дре́вомъ ᲂу҆слади́лъ є҆сѝ.
Крⷭ҇тъ за дре́во разꙋ́мное, за сла́дкꙋю же пи́щꙋ же́лчь, сп҃се мо́й, прїѧ́лъ є҆сѝ, за тлѣ́нїе же сме́рти кро́вь твою̀ бж҃е́ственнꙋю и҆злїѧ́лъ є҆сѝ.
Бг҃оро́диченъ: Кромѣ̀ ᲂу҆́бѡ сочета́нїѧ зачала̀ є҆сѝ нетлѣ́ннѡ во чре́вѣ, и҆ без̾ болѣ́зни родила̀ є҆сѝ, и҆ по ржⷭ҇твѣ̀ дв҃а, бг҃а пло́тїю ро́ждши, сохрани́ласѧ є҆сѝ.
И҆́нъ І҆рмо́съ: Оу҆слы́шахъ слꙋ́хъ си́лы крⷭ҇та̀:
Ꙗ҆́кѡ водрꙋзи́сѧ на землѝ на ло́бнѣмъ крⷭ҇тъ, сокрꙋши́шасѧ верєѝ и҆ вра̑тницы вѣ́чнїи, и҆ возопи́ша: сла́ва си́лѣ твое́й гдⷭ҇и.
Ꙗ҆́кѡ сни́де сп҃съ къ свѧ̑заннымъ ꙗ҆́кѡ ме́ртвъ, совоскресо́ша съ ни́мъ и҆̀же ѿ вѣ́ка ᲂу҆ме́ршїи, и҆ возопи́ша: сла́ва си́лѣ твое́й гдⷭ҇и.
Бг҃оро́диченъ: Дв҃а родѝ, и҆ ма́терскихъ не позна̀: но мт҃и ᲂу҆́бѡ є҆́сть, дв҃а же пребы́сть: ю҆́же воспѣва́юще, ра́дꙋйсѧ бцⷣе, взыва́емъ.
И҆́нъ І҆рмо́съ: Бж҃е́ственное твоѐ:
Се́рдцемъ и҆ ᲂу҆мо́мъ, дꙋше́ю же и҆ ᲂу҆сты̀ и҆сповѣ́дꙋю всебл҃гоче́стнѡ тѧ̀ бцⷣꙋ вои́стиннꙋ, чⷭ҇таѧ, сп҃се́нїѧ пло́дъ ѡ҆б̾е́млѧ, и҆ сп҃са́юсѧ дв҃о, мл҃твами твои́ми.
Созда́вый ѿ не сꙋ́щихъ всѧ́чєскаѧ, ѿ тебѐ чⷭ҇тыѧ созда́тисѧ ꙗ҆́кѡ бл҃годѣ́тель бл҃говолѝ, на сп҃се́нїе вѣ́рою и҆ любо́вїю тѧ̀ пою́щихъ, всенепоро́чнаѧ.
Пою́тъ твоѐ ржⷭ҇тво̀ всенепоро́чнаѧ премі́рнїи ли́цы, сп҃се́нїю ра́дꙋющесѧ, и҆́стиннꙋю бцⷣꙋ мꙋ́дрствꙋющихъ тѧ̀, дв҃о нескве́рнаѧ.
Тѧ̀ же́злъ и҆са́їа и҆менова̀, ѿ негѡ́же прозѧбѐ на́мъ кра́сный цвѣ́тъ, хрⷭ҇то́съ бг҃ъ, на сп҃се́нїе вѣ́рою и҆ любо́вїю притека́ющихъ къ покро́вꙋ твоемꙋ̀.
Пѣ́снь є҃
І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ.
И҆́же сла́вы гдⷭ҇ь въ несла́внѣ зра́цѣ, на дре́вѣ ѡ҆безче́щенъ во́лею ви́ситъ, ѡ҆ бж҃е́ственнѣй мнѣ̀ сла́вѣ несказа́ннѡ промышлѧ́ѧ.
Ты́ мѧ преѡбле́клъ є҆сѝ въ нетлѣ́нїе, хрⷭ҇тѐ, тлѝ сме́ртныѧ неистлѣ́ннѡ пло́тїю вкꙋ́шъ, и҆ возсїѧ́въ и҆з̾ гро́ба тридне́венъ.
Бг҃оро́диченъ: Ты̀ пра́вдꙋ же и҆ и҆збавле́нїе на́мъ ро́ждши хрⷭ҇та̀ без̾ сѣ́мене, свобо́дно содѣ́ѧла є҆сѝ ѿ клѧ́твы бцⷣе, є҆стество̀ пра́ѻтца.
И҆́нъ І҆рмо́съ: Оу҆́тренююще вопїе́мъ тѝ:
Просте́рлъ є҆сѝ дла̑ни сп҃се на́шъ на дре́вѣ, всѧ̑ призыва́ѧ къ себѣ̀, ꙗ҆́кѡ чл҃вѣколю́бецъ.
Плѣни́лъ є҆сѝ а҆́дъ сп҃се мо́й твои́мъ погребе́нїемъ, и҆ твои́мъ воскрⷭ҇нїемъ ра́дости всѧ̑ и҆спо́лнилъ є҆сѝ.
Воскр҃съ ѿ гро́ба тридне́внѡ жизнода́вче, и҆ всѣ̑мъ и҆сточи́лъ є҆сѝ безсме́ртїе неги́блющее.
Бг҃оро́диченъ: Дв҃ꙋ по ржⷭ҇твѣ̀ воспѣва́емъ тѧ̀ бцⷣе: ты́ бо бг҃а сло́ва пло́тїю мі́рови родила̀ є҆сѝ.
И҆́нъ І҆рмо́съ: Ѡ҆дѣѧ́йсѧ свѣ́томъ:
Всѝ прⷪ҇ро́цы тѧ̀ ꙗ҆́вѣ предвозвѣсти́ша хотѧ́щꙋю бы́ти бж҃їю мт҃рь, бцⷣе чⷭ҇таѧ: є҆ди́на бо ѡ҆брѣла́сѧ є҆сѝ чⷭ҇таѧ, соверше́нна непоро́чнаѧ.
Свѣ́телъ ѻ҆́блакъ тѧ̀ живо́тныѧ воды̀, на́мъ тꙋ́чꙋ нетлѣ́нїѧ хрⷭ҇та̀ ѡ҆дожди́вшїй ѿча̑ѧннымъ, чⷭ҇таѧ, познава́емъ.
Ꙗ҆́кѡ бли́зъ всю́ тѧ до́брꙋ и҆ непоро́чнꙋ, запечатлѣ́ннꙋ дв҃ствомъ чи́стѣ возлюбѝ, въ тѧ̀ всели́выйсѧ бг҃ъ, ꙗ҆́кѡ є҆ди́нъ бл҃гоꙋтро́бенъ.
Пѣ́снь ѕ҃
І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ ꙗ҆́кѡ бл҃гоꙋтро́бенъ.
Въ тлѣ́нїе попо́лзсѧ родонача́льникъ, влⷣко хрⷭ҇тѐ, преслꙋ́шаннаго бра́шна вкꙋ́шъ, и҆ къ животꙋ̀ возведе́нъ бы́сть стрⷭ҇тїю твое́ю.
Живо́тъ низше́лъ є҆сѝ ко а҆́дꙋ, влⷣко хрⷭ҇тѐ, и҆ тлѣ́нїе растлѣ́вшемꙋ бы́въ, тлѣ́нїемъ и҆сточи́лъ є҆сѝ воскрⷭ҇нїе.
Бг҃оро́диченъ: Дв҃а родѝ, и҆ ро́ждши пребы́сть чⷭ҇та̀, на рꙋкꙋ̀ носѧ́щаго всѧ́чєскаѧ, ꙗ҆́кѡ вои́стиннꙋ дв҃а мт҃и поне́сшаѧ.
И҆́нъ І҆рмо́съ: Ѡ҆бы́де мѧ̀ бе́здна:
Просте́рлъ є҆сѝ дла̑ни твоѝ, собира́ѧ дале́че расточє́ннаѧ ꙗ҆зы̑къ твои́хъ собра̑нїѧ, хрⷭ҇тѐ бж҃е на́шъ, живоно́снымъ крⷭ҇то́мъ твои́мъ, ꙗ҆́кѡ чл҃вѣколю́бецъ.
Плѣни́лъ є҆сѝ сме́рть, и҆ врата̀ а҆́дѡва сокрꙋши́лъ є҆сѝ, а҆да́мъ же свѧ́занный разрѣше́нъ бы́въ, вопїѧ́ше тебѣ̀: сп҃се́ мѧ десни́ца твоѧ̀ гдⷭ҇и.
Бг҃оро́диченъ: Кꙋпинꙋ́ тѧ неѡпали́мꙋ, и҆ го́рꙋ и҆ лѣ́ствицꙋ ѡ҆дꙋшевле́нꙋ, и҆ врата̀ нбⷭ҇наѧ досто́йнѡ сла́вимъ, мр҃і́е сла́внаѧ, правосла́вныхъ похвало̀.
И҆́нъ І҆рмо́съ: Неи́стовствꙋющеесѧ бꙋ́рею:
И҆́же всемꙋ̀ вино́вный, и҆ є҆́же бы́ти всѣ̑мъ пода́вый, ꙗ҆́кѡ вино́внꙋ и҆мѧ́ше воплоща́емь, є҆́же по на́мъ, тѧ̀ бг҃ома́ти всенепоро́чнаѧ.
И҆сцѣле́нїй влⷣчце, дꙋшепита́тельный точа́щїй и҆сто́чникъ вѣ́рнѡ притека́ющымъ къ покро́вꙋ твоемꙋ̀ бл҃госла́вномꙋ, вѣ́мы тѧ̀ всенепоро́чнаѧ.
Сп҃се́нїю вино́вна жизнода́вца родила̀ є҆сѝ на́мъ, вѣ́чное и҆збавле́нїе да́рꙋющаго, и҆́стиннꙋю бцⷣꙋ тѧ̀ проповѣ́дающымъ.
Конда́къ,гла́съ є҃. Подо́бенъ: Собезнача́льное сло́во:
Ко а҆́дꙋ сп҃се мо́й соше́лъ є҆сѝ, и҆ врата̀ сокрꙋши́вый ꙗ҆́кѡ всеси́ленъ, ᲂу҆ме́ршихъ ꙗ҆́кѡ созда́тель совоскр҃си́лъ є҆сѝ, и҆ сме́рти жа́ло сокрꙋши́лъ є҆сѝ, и҆ а҆да́мъ ѿ клѧ́твы и҆зба́вленъ бы́сть, чл҃вѣколю́бче. тѣ́мже всѝ зове́мъ: сп҃сѝ на́съ гдⷭ҇и.
І҆́косъ: Оу҆слы́шавшѧ жєны̀ а҆́гг҃лѡвы глаго́лы, ѿложи́ша рыда́нїе, ра́достны бы́вшѧ и҆ тре́петны, ᲂу҆́жасъ бо ви́дѣша, и҆ сѐ хрⷭ҇то́съ прибли́жисѧ къ ни̑мъ, глаго́лѧ: є҆́же, ра́дꙋйтесѧ, дерза́йте, а҆́зъ мі́ра побѣди́хъ, и҆ ᲂу҆́зники свободи́хъ, потщи́тесѧ ᲂу҆́бѡ ко ᲂу҆ч҃нкѡ́мъ, возвѣща́ющѧ и҆̀мъ: ꙗ҆́кѡ варѧ́ю вы̀ во гра́дѣ галїле́йстѣмъ, є҆́же проповѣ́дати. тѣ́мже всѝ тебѣ̀ зове́мъ: сп҃сѝ на́съ гдⷭ҇и.
Пѣ́снь з҃
І҆рмо́съ: Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.
Пло́тїю ѡ҆бло́жьсѧ ꙗ҆́коже на ᲂу҆́дицѣ льще́нїѧ, бж҃е́ственною твое́ю си́лою ѕмі́ѧ низвле́клъ є҆сѝ возводѧ̀ вопїю́щыѧ: бж҃е, бл҃гослове́нъ є҆сѝ.
Землѝ непрохо́дное ѡ҆сꙋществова́вый составле́нїе, во гро́бѣ покрыва́етсѧ пло́тїю невмѣсти́мый. є҆мꙋ́же всѝ пое́мъ: бж҃е, бл҃гослове́нъ є҆сѝ.
Бг҃оро́диченъ: Є҆ди́нꙋ ᲂу҆́бѡ ѵ҆поста́сь во двою̀ є҆стєствꙋ̀, всенепоро́чнаѧ родила̀ є҆сѝ воплоще́ннаго бг҃а. є҆мꙋ́же всѝ пое́мъ: бж҃е, бл҃гослове́нъ є҆сѝ.
И҆́нъ І҆рмо́съ: Въ пещѝ ѻ҆́гненнѣй пѣсносло́вцы:
И҆́же дре́вомъ крⷭ҇тнымъ і҆́дѡльскꙋю пре́лесть разрѣши́вый, бл҃гослове́нъ бг҃ъ ѻ҆тє́цъ на́шихъ.
Воскр҃сы́й и҆з̾ ме́ртвыхъ, и҆ сꙋ́щыѧ во а҆́дѣ совоздви́гнꙋвый, бл҃гослове́нъ бг҃ъ ѻ҆тє́цъ на́шихъ.
Твое́ю сме́ртїю хрⷭ҇тѐ, сме́ртнꙋю разо́рь держа́вꙋ, бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: И҆́же ѿ дв҃ы ро́ждьсѧ, и҆ бцⷣꙋ сїю̀ показа́вый, бл҃гослове́нъ бг҃ъ ѻ҆тє́цъ на́шихъ.
И҆́нъ І҆рмо́съ: Превозноси́мый ѻ҆тцє́въ:
Неѡпредѣле́нный пребы́въ непрело́женъ, пло́ти по ѵ҆поста́си соедини́сѧ, ꙗ҆́кѡ бл҃гоꙋтро́бенъ, въ тебѣ̀ прест҃ѣ́й: и҆́же є҆ди́нъ бл҃гослове́нъ бг҃ъ ѻ҆тє́цъ на́шихъ.
Невѣ́стꙋ тѧ̀ всенепоро́чнꙋю бцⷣе влⷣчце, согла́снѡ сла́вимъ и҆ прⷭ҇то́лъ зижди́телѧ твоегѡ̀. є҆мꙋ́же всѝ пое́мъ: бж҃е, бл҃гослове́нъ є҆сѝ.
Мт҃и всѣ́хъ цр҃ѧ̀, ѡ҆чи́щшисѧ дх҃омъ дв҃о, была̀ є҆сѝ, тебѐ созда́вшагѡ. є҆мꙋ́же всѝ пое́мъ: бж҃е, бл҃гослове́нъ є҆сѝ.
Сп҃се́ мѧ гдⷭ҇ь, бг҃ома́ти пречⷭ҇таѧ, ѻ҆де́ждею пло́ти и҆з̾ тебѐ ѡ҆дѣ́ѧвсѧ. є҆мꙋ́же всѝ пое́мъ: бж҃е, бл҃гослове́нъ є҆сѝ.
Пѣ́снь и҃
І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.
Ты̀ ѡ҆ во́льнѣй сп҃си́тельныѧ стрⷭ҇ти помоли́лсѧ є҆сѝ ча́ши, ꙗ҆́коже нево́льнѣй: два̀ хотѣ̑нїѧ, двѣма́ бо по коемꙋ́ждо но́сиши сꙋщество́ма хрⷭ҇тѐ, во вѣ́ки.
Твои́мъ вседѣ́тельнымъ схожде́нїемъ, а҆́дъ хрⷭ҇тѐ, порꙋ́ганный и҆зблева̀ всѧ̑, ꙗ҆̀же дре́вле ле́стїю ᲂу҆мерщвлє́нныѧ, тебѐ превозносѧ́щыѧ во всѧ̑ вѣ́ки.
Бг҃оро́диченъ: Тѧ̀ ꙗ҆́же па́че ᲂу҆ма̀ бг҃омꙋ́жнѣ сло́вомъ ро́ждшꙋю гдⷭ҇а, и҆ дв҃ствꙋющꙋю, всѧ̑ дѣла̀ дв҃о бл҃гослови́мъ, и҆ превозно́симъ во всѧ̑ вѣ́ки.
И҆́нъ І҆рмо́съ: И҆з̾ ѻ҆ц҃а̀ пре́жде вѣ̑къ:
И҆́же на крⷭ҇тѣ̀ во́лею дла̑ни просте́ршаго, и҆ ᲂу҆́зы смє́ртныѧ разрꙋши́вшагѡ хрⷭ҇та̀ бг҃а, сщ҃е́нницы по́йте, лю́дїе превозноси́те во всѧ̑ вѣ́ки.
И҆́же ꙗ҆́кѡ жениха̀ и҆з̾ гро́ба возсїѧ́вшаго хрⷭ҇та̀ бг҃а, и҆ мѷроно́сицамъ ꙗ҆́вльшагосѧ, и҆ ра́дость тѣ̑мъ провѣща́вша, сщ҃е́нницы по́йте, лю́дїе превозноси́те во всѧ̑ вѣ́ки.
Бг҃оро́диченъ: Херꙋві̑мъ превы́шши ꙗ҆ви́ласѧ є҆сѝ бцⷣе чⷭ҇таѧ, во чре́вѣ твое́мъ, и҆́же на тѣ́хъ носи́маго поне́сши: є҆го́же со безпло́тными человѣ́цы славосло́вимъ во всѧ̑ вѣ́ки.
И҆́нъ І҆рмо́съ: Тебѣ̀ вседѣ́телю въ пещѝ:
Преста̀ ны́нѣ ꙗ҆́же пра́ѻтчаѧ печа́ль, ра́дость прїе́мши тѝ бг҃ома́терни. тѣ́мже непреста́ннѡ пое́мъ тѧ̀ дв҃о, и҆ превозно́симъ во всѧ̑ вѣ́ки.
Пое́тъ съ на́ми безпло́тныхъ собо́ръ, дв҃о ржⷭ҇тво̀ твоѐ непостижи́мое, є҆ди́нъ ли́къ соста́вльше любо́вїю, и҆ превозносѧ́ще є҆го̀ во вѣ́ки.
Стрꙋѧ̀ прозра́чнаѧ безсме́ртїѧ ѻ҆трокови́це и҆з̾ тебѐ и҆зы́де, и҆́же всѣ́хъ гдⷭ҇ь, скве́рнꙋ ѡ҆мыва́ѧ вѣ́рою тѧ̀ пою́щихъ, и҆ превозносѧ́щихъ во всѧ̑ вѣ́ки.
Бж҃е́ственный вои́стиннꙋ, и҆ свѣтоно́сный прⷭ҇то́лъ, и҆ скрижа̑ли бл҃года́ти и҆сповѣ́дꙋемъ тѧ̀, сло́во дв҃о ѻ҆́ч҃ее ꙗ҆́кѡ прїе́мшꙋю: є҆го́же превозно́симъ во всѧ̑ вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: Съ припѣ́вомъ: Чⷭ҇тнѣ́йшꙋю херꙋві̑мъ:
Пѣ́снь ѳ҃
І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.
Па́дшаго человѣ́ка воспрїѧ́лъ є҆сѝ влⷣко хрⷭ҇тѐ, и҆з̾ ложе́снъ дѣви́ческихъ всемꙋ̀ совокꙋ́пльсѧ, грѣхꙋ́ же ни є҆ди́номꙋ прича́щьсѧ: всего̀ ѿ и҆стлѣ́нїѧ ты̀ свободи́лъ є҆сѝ пречⷭ҇тыми твои́ми стрⷭ҇тьмѝ.
Бг҃ото́чною кро́вїю и҆стоще́нною влⷣко хрⷭ҇тѐ, ѿ твои́хъ пречⷭ҇тыхъ ре́бръ и҆ животворѧ́щихъ, же́ртва ᲂу҆́бѡ преста̀ і҆́дѡльскаѧ, всѧ́ же землѧ̀ тебѣ̀ хвале́нїѧ же́ртвꙋ прино́ситъ.
Бг҃оро́диченъ: Не бг҃а безпло́тна, нижѐ па́ки человѣ́ка про́ста произведѐ чⷭ҇таѧ ѻ҆трокови́ца, и҆ нескве́рнаѧ: но человѣ́ка соверше́нна, и҆ нело́жнѡ соверше́нна бг҃а. є҆го́же велича́емъ со ѻ҆ц҃е́мъ же и҆ дх҃омъ.
И҆́нъ І҆рмо́съ: Тѧ̀ па́че ᲂу҆ма̀:
Тебѐ и҆́же на крⷭ҇тѣ̀ стрⷭ҇ть под̾е́мшаго, и҆ а҆́довꙋ си́лꙋ сме́ртїю сокрꙋши́вшаго, вѣ́рнїи правосла́внѡ велича́емъ.
Тебѐ и҆з̾ гро́ба тридне́внѡ воскр҃сша, и҆ а҆́дъ плѣни́вшаго, и҆ мі́ръ просвѣти́вшаго, вѣ́рнїи є҆диномꙋ́дреннѡ велича́емъ.
Бг҃оро́диченъ: Ра́дꙋйсѧ бцⷣе, мт҃и хрⷭ҇та̀ бг҃а, є҆го́же родила̀ є҆сѝ, молѝ прегрѣше́нїй ѡ҆ставле́нїе дарова́ти, вѣ́рою пою́щымъ тѧ̀.
И҆́нъ І҆рмо́съ: И҆са́їе ликꙋ́й:
Ѿ чⷭ҇тыхъ крове́й твои́хъ ᲂу҆сыри́сѧ пло́ть преесте́ственнѡ всѣ́хъ содѣ́телю, є҆диноро́дномꙋ сн҃ꙋ роди́телевꙋ, не ѿ мꙋ́жа, без̾ сѣ́мене же ᲂу҆́мна и҆ ѡ҆дꙋшевле́нна, бцⷣе приснодв҃о.
Ѡ҆бходи́мое ᲂу҆ста́вила є҆сѝ сме́рти неꙋдержи́мое стремле́нїе, ро́ждши пло́тїю вои́стиннꙋ па́че ᲂу҆ма̀ жи́знь вѣ́чнꙋю: є҆́йже прило́жьсѧ ᲂу҆сты̀ го́рькими а҆́дъ ᲂу҆праздни́сѧ, прест҃а́ѧ мт҃и дв҃о.
На прⷭ҇то́лѣ сѣдѧ̀ сн҃ъ тво́й влⷣчнѣ, рѧ́сны тѧ̀ златы́ми бж҃е́ственныхъ добродѣ́телей свѣ́тъ сїѧ́ющꙋ, ѡ҆деснꙋ́ю поста́ви себѐ чⷭ҇таѧ, даѧ̀ че́сть ꙗ҆́кѡ мт҃ри тебѣ̀, всенепоро́чнаѧ.
Па́че ᲂу҆ма̀ ржⷭ҇тво̀ твоѐ бг҃ома́ти: без̾ мꙋ́жа бо зача́тїе въ тебѣ̀, и҆ дѣви́чески рожде́нїе бы́сть: и҆́бо бг҃ъ є҆́сть рожде́йсѧ, є҆го́же велича́юще, тѧ̀ дв҃о ᲂу҆бл҃жа́емъ.
По катава́сїи є҆ктенїа̀ ма́лаѧ. Та́же, Ст҃ъ гдⷭ҇ь бг҃ъ на́шъ. Є҆ѯапостїла́рїй ᲂу҆́треннїй.
На хвали́техъ стїхи̑ры воскрⷭ҇ны, гла́съ є҃:
Сті́хъ: Сотвори́ти въ ни́хъ сꙋ́дъ напи́санъ, сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Гдⷭ҇и, запеча́танꙋ гро́бꙋ ѿ беззако́нникѡвъ, проше́лъ є҆сѝ и҆з̾ гро́ба, ꙗ҆́коже роди́лсѧ є҆сѝ ѿ бцⷣы: не ᲂу҆разꙋмѣ́ша, ка́кѡ воплоти́лсѧ є҆сѝ, безпло́тнїи твоѝ а҆́гг҃ли: не чꙋ́вствоваша, когда̀ воскр҃слъ є҆сѝ, стрегꙋ́щїи тѧ̀ во́ини. ѻ҆боѧ́ бо запечатлѣ́стасѧ и҆спытꙋ́ющымъ, ꙗ҆ви́шасѧ же чꙋдеса̀ кла́нѧющымсѧ вѣ́рою та́инствꙋ: є҆́же воспѣва́ющымъ, возда́ждь на́мъ ра́дость и҆ ве́лїю млⷭ҇ть.
Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆тверже́нїи си́лы є҆гѡ̀.
Гдⷭ҇и, верєѝ вѣ̑чныѧ сокрꙋши́въ, и҆ ᲂу҆́зы растерза́въ, ѿ гро́ба воскр҃слъ є҆сѝ, ѡ҆ста́вль твоѧ̑ погреба̑льнаѧ, во свидѣ́тельство и҆́стиннагѡ тридне́внагѡ твоегѡ̀ погребе́нїѧ: и҆ предвари́лъ є҆сѝ въ галїле́и, въ пеще́рѣ стрего́мый. ве́лїѧ твоѧ̀ млⷭ҇ть, непостижи́ме сп҃се, поми́лꙋй и҆ сп҃сѝ на́съ.
Сті́хъ: Хвали́те є҆го̀ на си́лахъ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀.
Гдⷭ҇и, жєны̀ теко́ша на гро́бъ, ви́дѣти тѧ̀ хрⷭ҇та̀ на́съ ра́ди пострада́вшаго, и҆ прише́дшѧ, ѡ҆брѣто́ша а҆́гг҃ла на ка́мени сѣдѧ́ща, стра́хомъ ѿва́льшемсѧ, и҆ къ ни̑мъ возопѝ глаго́лѧ: воскр҃се гдⷭ҇ь, рцы́те ᲂу҆ч҃нкѡ́мъ, ꙗ҆́кѡ воскр҃се ѿ ме́ртвыхъ, сп҃са́ѧй дꙋ́шы на́шѧ.
Сті́хъ: Хвали́те є҆го̀ во гла́сѣ трꙋ́бнѣмъ, хвали́те є҆го̀ во ѱалти́ри и҆ гꙋ́слехъ.
Гдⷭ҇и, ꙗ҆́коже и҆зше́лъ є҆сѝ ѿ запеча́таннагѡ гро́ба, та́кѡ вше́лъ є҆сѝ и҆ две́ремъ заключє́нымъ ко ᲂу҆ч҃нкѡ́мъ твои̑мъ, показꙋ́ѧ и҆̀мъ тѣлє́снаѧ страда̑нїѧ, ꙗ҆̀же под̾ѧ́лъ є҆сѝ сп҃се долготерпѣли́вый: ꙗ҆́кѡ ѿ сѣ́мене дв҃дова ꙗ҆́звы претерпѣ́лъ є҆сѝ: ꙗ҆́кѡ сн҃ъ же бж҃їй, мі́ръ свободи́лъ є҆сѝ. ве́лїѧ твоѧ̀ млⷭ҇ть, непостижи́ме сп҃се, поми́лꙋй и҆ сп҃сѝ на́съ.
И҆́ны стїхи̑ры а҆натѡ́лїевы.
Сті́хъ: Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ.
Гдⷭ҇и цр҃ю̀ вѣкѡ́въ, и҆ тво́рче всѣ́хъ, на́съ ра́ди распѧ́тїе и҆ погребе́нїе пло́тїю прїи́мый, да на́съ ѿ а҆́да свободи́ши всѣ́хъ: ты̀ є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Сті́хъ: Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ: всѧ́кое дыха́нїе да хва́литъ гдⷭ҇а.
Гдⷭ҇и, пресїѧ̑ющаѧ твоѧ̑ чꙋдеса̀ кто̀ и҆сповѣ́сть; и҆лѝ кто̀ возвѣсти́тъ стра̑шнаѧ твоѧ̑ та̑инства; вочл҃вѣ́чивыйсѧ бо на́съ ра́ди, ꙗ҆́кѡ са́мъ восхотѣ́лъ є҆сѝ, держа́вꙋ ꙗ҆ви́лъ є҆сѝ си́лы твоеѧ̀: крⷭ҇то́мъ бо твои́мъ разбо́йникꙋ ра́й ѿве́рзлъ є҆сѝ, и҆ погребе́нїемъ твои́мъ верєѝ а҆́дѡвы сокрꙋши́лъ є҆сѝ, воскрⷭ҇нїемъ же твои́мъ всѧ́чєскаѧ ѡ҆богати́лъ є҆сѝ: бл҃гоꙋтро́бне, гдⷭ҇и, сла́ва тебѣ̀.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
Мѷронѡ́сицы жєны̀ гро́ба твоегѡ̀ дости́гшѧ, ѕѣлѡ̀ ра́нѡ и҆ска́хꙋ тебѐ мѵ́ры пома́зати, безсме́ртнаго сло́ва и҆ бг҃а: и҆ а҆́гг҃ла глаго́лы ѡ҆гласи́вшѧсѧ, возвраща́хꙋсѧ ра́достїю, а҆пⷭ҇лѡмъ возвѣсти́ти ꙗ҆́вѣ, ꙗ҆́кѡ воскр҃слъ є҆сѝ, животѐ всѣ́хъ, и҆ по́далъ є҆сѝ мі́рови ѡ҆чище́нїе и҆ ве́лїю млⷭ҇ть.
Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Бг҃опрїѧ́тнагѡ гро́ба ко і҆ꙋде́ѡмъ стра́жїе глаго́лахꙋ: ѽ ва́шегѡ сꙋемꙋ́дреннагѡ совѣ́та! стрещѝ неѡпи́саннаго покꙋси́вшесѧ, всꙋ́е трꙋди́стесѧ, сокры́ти воскрⷭ҇нїе распѧ́тагѡ хотѧ́ще, ꙗ҆́снѡ показа́сте. ѽ ва́шегѡ сꙋемꙋ́дреннагѡ собо́рища! что̀ па́ки сокры́ти совѣ́тꙋете, є҆́же некры́етсѧ; па́че же ѿ на́съ ᲂу҆слы́шите, и҆ вѣ́ровати восхощи́те бы́вшихъ и҆́стинѣ: а҆́гг҃лъ молнїено́сецъ съ нб҃сѐ соше́дъ ка́мень ѿвалѝ, є҆гѡ́же стра́хомъ ме́ртвостїю содержи́ми бы́хомъ, и҆ возгласи́въ крѣпкоꙋ́мнымъ мѷроно́сицамъ, глаго́лаше жена́мъ: не зрите́ ли страже́й ᲂу҆мерщвле́нїѧ, и҆ печа́тей разрѣше́нїѧ, а҆́дова же и҆стоща́нїѧ; почто̀ побѣ́дꙋ а҆́довꙋ ᲂу҆праздни́вшаго, и҆ сме́ртное жа́ло сокрꙋши́вшаго, ꙗ҆́кѡ ме́ртва взыскꙋ́ете; бл҃говѣсти́те же ско́рѡ ше́дшѧ а҆пⷭ҇лѡмъ воскрⷭ҇нїе, без̾ стра́ха зовꙋ́щѧ: вои́стиннꙋ воскр҃се гдⷭ҇ь, и҆мѣ́ѧ ве́лїю млⷭ҇ть.
Сла́ва, стїхи́ра ᲂу҆́треннѧѧ є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое.
Та́же, тропа́рь воскр҃сенъ:
Дне́сь сп҃се́нїе мі́рꙋ бы́сть, пое́мъ воскрⷭ҇шемꙋ и҆з̾ гро́ба, и҆ нача́льникꙋ жи́зни на́шеѧ: разрꙋши́въ бо сме́ртїю сме́рть, побѣ́дꙋ дадѐ на́мъ, и҆ ве́лїю млⷭ҇ть.
Та́же, є҆ктенїѝ. И҆ ѿпꙋ́стъ.
На лїтꙋргі́и бл҃жє́нна, гла́съ є҃:
Разбо́йникъ на крⷭ҇тѣ̀ бг҃а тѧ̀ бы́ти вѣ́ровавъ, хрⷭ҇тѐ, и҆сповѣ́да тѧ̀ чи́стѣ ѿ се́рдца, помѧни́ мѧ гдⷭ҇и, вопїѧ̀, во црⷭ҇твїи твое́мъ.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
И҆́же на дре́вѣ крⷭ҇тнѣмъ жи́знь процвѣ́тшаго ро́дꙋ на́шемꙋ, и҆ и҆зсꙋши́вша ю҆́же ѿ дре́ва клѧ́твꙋ, ꙗ҆́кѡ сп҃са и҆ содѣ́телѧ согла́снѡ воспои́мъ.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
Сме́ртїю твое́ю хрⷭ҇тѐ, сме́ртнꙋю разрꙋши́лъ є҆сѝ си́лꙋ, и҆ совоздви́глъ є҆сѝ и҆́же ѿ вѣ́ка ᲂу҆ме́ршыѧ, тѧ̀ пою́щыѧ и҆́стиннаго бг҃а и҆ сп҃са на́шего.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
На гро́бъ тво́й хрⷭ҇тѐ, прише́дшѧ жєны̀ чєстны́ѧ, и҆ска́хꙋ тѧ̀ жизнода́вче мѷропома́зати, и҆ ꙗ҆ви́сѧ и҆̀мъ а҆́гг҃лъ вопїѧ̀: воскр҃се гдⷭ҇ь.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Распе́ншꙋ ти сѧ хрⷭ҇тѐ, посредѣ̀ двою̀ ѡ҆сꙋждє́нною разбѡ́йникꙋ, є҆ди́нъ ᲂу҆́бѡ хꙋ́лѧ тѧ̀, ѡ҆сꙋжде́нъ бы́сть пра́веднѣ: дрꙋгі́й же и҆сповѣ́даѧ тѧ̀, въ ра́й всели́сѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Ко а҆пⷭ҇лѡвъ ли́кꙋ прише́дшѧ жєны̀ чєстны́ѧ, возопи́ша: хрⷭ҇то́съ воскр҃се, ꙗ҆́кѡ влⷣцѣ и҆ содѣ́телю томꙋ̀ поклони́мсѧ.
Сла́ва, трⷪ҇ченъ: Трⷪ҇це нераздѣ́льнаѧ, є҆ди́нице вседѣ́тельнаѧ и҆ всеси́льнаѧ, ѻ҆́ч҃е, сн҃е и҆ ст҃ы́й дш҃е, тебѐ пое́мъ и҆́стиннаго бг҃а и҆ сп҃са на́шего.
И҆ ны́нѣ, бг҃оро́диченъ: Ра́дꙋйсѧ ѡ҆дꙋшевле́нный хра́ме бж҃їй и҆ врата̀ непроходи̑маѧ: ра́дꙋйсѧ неѡпали́мый и҆ ѻ҆гнеѡбра́зный прⷭ҇то́ле: ра́дꙋйсѧ мт҃и є҆мманꙋ́ила, хрⷭ҇та̀ бг҃а на́шегѡ.
Прокі́менъ,гла́съ є҃: Ты̀ гдⷭ҇и сохрани́ши ны̀, и҆ соблюде́ши ны̀ ѿ ро́да сегѡ̀ и҆ во вѣ́къ. Сті́хъ: Сп҃си́ мѧ гдⷭ҇и, ꙗ҆́кѡ ѡ҆скꙋдѣ̀ прпⷣбный. А҆ллилꙋ́їа. Млⷭ҇ти твоѧ̑ гдⷭ҇и во вѣ́къ воспою̀, въ ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̀ мои́ми.
Сті́хъ: Занѐ ре́клъ є҆сѝ: въ вѣ́къ млⷭ҇ть сози́ждетсѧ, на нб҃сѣ́хъ ᲂу҆гото́витсѧ и҆́стина твоѧ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.