Глас 4-й. Четверг.
Въ сре́дꙋ ве́чера,
на Гдⷭ҇и воззва́хъ, стїхи̑ры подо́бны, а҆пⷭ҇лѡмъ. Гла́съ д҃
Подо́бенъ: Ꙗ҆́кѡ до́блѧ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Крѣпча́йшимъ мꙋдрова́нїемъ во́инствовавше сла́внїи, на лꙋка́ваго врага̀ ѡ҆полчи́стесѧ, всеѻрꙋ́жїемъ ѡ҆гра́ждшесѧ дꙋхо́внымъ до́блественнѣ: и҆ всю̀ крѣ́пость бѣсо́вскꙋю погꙋби́вше, восхи́тивше дꙋ́шы человѣ́чєскїѧ ꙗ҆́коже коры̑сти: сегѡ̀ ра́ди во вѣ́ки ва́съ почита́емъ, а҆пⷭ҇ли.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Крⷭ҇тоѡбра́знѡ распросте́рши мре́жꙋ вѣ́ры, двоенадесѧ́тица бж҃е́ственныхъ а҆пⷭ҇лъ твои́хъ, всѧ̑ ꙗ҆зы́ки ᲂу҆лови́ла є҆́сть къ твоемꙋ̀ позна́нїю хрⷭ҇тѐ: и҆ мо́ре сла́ное страсте́й и҆зсꙋшѝ. сегѡ̀ ра́ди тѧ̀ молю̀, и҆з̾ глꙋбины̀ прегрѣше́нїй воззови́ мѧ, тѣ́хъ всебл҃гопрїѧ́тными мольба́ми.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.
Двоенадесѧ́тица бг҃оизбра́ннаѧ, а҆пⷭ҇льскаѧ и҆ всечⷭ҇тна́ѧ, да восхва́литсѧ дне́сь бж҃е́ственными пѣ́сньми: пе́тръ, и҆ па́ѵелъ, і҆а́кѡвъ: лꙋка̀, і҆ѡа́ннъ же и҆ матѳе́й, и҆ ѳѡма̀: ма́ркъ, сі́мѡнъ, и҆ фїлі́ппъ: и҆ пресла́вный ны́нѣ а҆ндре́й съ матѳі́емъ, и҆ бж҃е́ственнымъ и҆ премꙋ́дрымъ варѳоломе́емъ, и҆ съ про́чими седми́десѧтьми.
И҆́ны стїхи̑ры ст҃о́мꙋ и҆ вели́комꙋ чꙋдотво́рцꙋ нїкола́ю:
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Мѵ́ромъ бж҃е́ственнымъ тѧ̀ пома́за бж҃е́ственнаѧ бл҃года́ть дх҃о́внаѧ, мѵ́рѧнѡмъ первопресто́льна, и҆ мѵ́ромъ ѡ҆бл҃гоꙋха́вша, добродѣ́тельми сщ҃е́ннѣйшими мі́ра концы̀, сладкоды́шꙋщими твои́ми мл҃твами, ѕлосмра̑дныѧ прогонѧ́юща стра̑сти всегда̀. сегѡ̀ ра́ди тѧ̀ вѣ́рнѡ сла́вимъ, и҆ па́мѧть твою̀ всест҃ꙋ́ю соверша́емъ нїко́лае.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Ꙗ҆́кѡ ѡ҆сїѧ́телѧ тѧ̀ незаходи́маго, и҆ ꙗ҆́кѡ свѣти́льника всемі́рна, на тве́рди возсїѧ́вша цр҃ко́внѣй нїко́лае, и҆ мі́ръ просвѣти́вша, и҆ бѣ́дъ лю́тыхъ мглꙋ̀ ѿгонѧ́юща, и҆ ѿе́млюща печа́лей зи́мꙋ, и҆ тишинꙋ̀ содѣ́лавшаго глꙋбо́кꙋю, по до́лгꙋ ᲂу҆бл҃жа́емъ.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
И҆ сы́й и҆ ꙗ҆влѧ́ѧйсѧ въ со́нїихъ нїко́лае, и҆̀же непра́веднѡ и҆мꙋ́щыѧ ᲂу҆мре́ти сп҃слъ є҆сѝ, ꙗ҆́кѡ сострада́тель, ꙗ҆́кѡ бл҃голюби́вый, ꙗ҆́кѡ и҆зба́витель теплѣ́йшїй, ꙗ҆́кѡ предста́тель и҆́стинный вѣ́рныхъ, и҆ просѧ́щихъ твоегѡ̀ застꙋпле́нїѧ, сщ҃е́ннѣйшїй ѻ҆́тче, а҆́гг҃лѡмъ сограждани́не, прпⷣбнымъ и҆ прⷪ҇ро́кѡмъ равностоѧ́телю.
Сла́ва, и҆ ны́нѣ, бг҃оро́диченъ: Ꙗ҆́же бг҃а невмѣсти́маго, во чре́вѣ твое́мъ вмѣсти́вшаѧ, чл҃вѣколю́бна чл҃вѣ́ка бы́вша: и҆ на́ше смѣше́нїе и҆з̾ тебѐ прїи́мша и҆ ѡ҆божи́вша ꙗ҆́вѣ, не пре́зри менѐ всечⷭ҇таѧ, ны́нѣ скорбѧ́ща: но ᲂу҆ще́дри ско́рѡ, и҆ разли́чныѧ вражды́ же и҆ вре́да лꙋка́вагѡ свободѝ.
Та́же, Свѣ́те ти́хїй: Прокі́менъ днѐ, и҆ про́чее.
На стїхо́внѣ стїхи̑ры, гла́съ д҃:
А҆пⷭ҇льскїй ли́къ дх҃омъ ст҃ы́мъ просвѣти́лъ є҆сѝ хрⷭ҇тѐ, и҆ на́шꙋ скве́рнꙋ грѣхо́внꙋю тѣ́ми ѡ҆мы́й бж҃е, и҆ поми́лꙋй на́съ.
Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Некни̑жныѧ ᲂу҆ч҃нкѝ дх҃ъ тво́й ст҃ы́й каза́тели ꙗ҆вѝ хрⷭ҇тѐ бж҃е, и҆ многовѣща́ннымъ сли́чїемъ ꙗ҆зы́кѡвъ пре́лесть ᲂу҆празднѝ, ꙗ҆́кѡ всеси́ленъ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.
Жє́ртвы ѡ҆дꙋшевлє́нныѧ, всесожжє́нїѧ словє́снаѧ, мч҃нцы гдⷭ҇ни, заколє́нїѧ совершє́ннаѧ бж҃їѧ, бг҃а зна̑ющаѧ, и҆ бг҃омъ зна́ємаѧ ѻ҆вча́та, и҆́хже ѡ҆гра́да волкѡ́мъ невхо́дна: моли́тесѧ и҆ на́мъ ᲂу҆пасє́нымъ бы́ти съ ва́ми, на водѣ̀ ᲂу҆покое́нїѧ.
Сла́ва, и҆ ны́нѣ, бг҃оро́диченъ: И҆зба́ви ны̀ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ є҆ди́но предста́тельство дꙋ́шъ на́шихъ.
Та́же: Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Въ сре́дꙋ на повече́рїи,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Вои́стиннꙋ и҆ врѣснотꙋ̀ родила̀ є҆сѝ бг҃а и҆ гдⷭ҇а, и҆ бцⷣа є҆ди́на вои́стиннꙋ и҆ врѣснотꙋ̀ нарекла́сѧ є҆сѝ чⷭ҇таѧ. тѣ́мже тѧ̀ вѣ́рнѡ воспѣва́емъ, и҆ по до́лгꙋ сла́вимъ.
Ѕвѣзда̀ ꙗ҆́же ѿ і҆а́кѡва, возсїѧ̀ и҆з̾ тебѐ пречⷭ҇таѧ, и҆зчита́ѧй мно́жество ѕвѣ́здъ, ꙗ҆́кѡ бг҃ъ. тѣ́мже тогѡ̀ сїѧ́ньми ѿимѝ мои́хъ грѣхѡ́въ тьмꙋ̀.
Сла́ва: Невѣ́стникъ слове́сенъ вѣ́мъ тѧ̀ ꙗ҆́вѣ бж҃їѧ воплоще́нїѧ, чⷭ҇таѧ и҆ всенепоро́чнаѧ: молю́ тѧ и҆зба́вити мѧ̀ страсте́й плотски́хъ и҆ скорбе́й, и҆ и҆скꙋше́нїй, и҆ ѡ҆бстоѧ́нїй.
И҆ ны́нѣ: Ꙗ҆́кѡ лѣ́ствица, ꙗ҆́же къ на́мъ прише́ствїѧ вседержи́телева, є҆́юже бг҃ъ сни́де на зе́млю, ѿ землены́хъ страсте́й плотски́хъ къ нб҃сѝ вознесѝ мѧ̀, и҆ къ бг҃ꙋ приведѝ.
Пѣ́снь г҃
І҆рмо́съ: Не мꙋ́дростїю и҆ си́лою и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ, па́че тебѐ чл҃вѣколю́бче.
Текꙋ́щїй и҆сто́чникъ, скорбѧ́щихъ ᲂу҆тѣше́нїе є҆сѝ: тѣ́мже влⷣчце, и҆ мнѣ̀ мл҃твенныхъ твои́хъ во́дъ и҆сто́чникъ и҆сточѝ, и҆ ᲂу҆гасѝ страсте́й пе́щь.
Оу҆ѧ́звена мѧ̀ по́мыслы безмѣ́стными и҆сцѣлѝ чⷭ҇таѧ, ꙗ҆́же є҆стества̀ на́шегѡ и҆сцѣли́вшаѧ ꙗ҆́звꙋ лю́тꙋю, ро́ждши зижди́телѧ и҆ гдⷭ҇а.
Сла́ва: Въ пꙋчи́нѣ мно́гихъ мои́хъ прегрѣше́нїй, и҆ страсте́й и҆ и҆скꙋше́нїй ѡ҆бꙋрева́ема, къ ти́хомꙋ ѕѣлѡ̀ приста́нищꙋ всенепоро́чнаѧ, ᲂу҆стремѝ твои́мъ застꙋпле́нїемъ.
И҆ ны́нѣ: И҆́же ꙗ҆́кѡ на рꙋно̀ дожде́мъ бж҃е́ственнымъ, во ᲂу҆тро́бꙋ твою̀ соше́дшимъ, ѡ҆пламене́нное ѻ҆гне́мъ страсте́й моѐ се́рдце ѡ҆росѝ твои́ми мольба́ми.
Пѣ́снь д҃
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Ѿ мѵ́ръ сн҃а твоегѡ̀ текꙋ́щихъ, бл҃гоꙋха́нїемъ жи́зни всѣ́хъ, мѵ́ро безстра́стїѧ и҆сточѝ дꙋшѝ мое́й чⷭ҇таѧ, и҆ ве́сь ка́лъ стра́сти є҆ѧ̀ потребѝ.
Ѡ҆скверне́ннаго мѧ̀ ка́ломъ грѣха̀, мл҃твъ твои́хъ ѡ҆кропѝ ѵ҆ссѡ́помъ, и҆ ѡ҆мы́й, и҆ скве́рнꙋ страсте́й мои́хъ ѡ҆чи́сти влⷣчце, и҆ ꙗ҆вѝ хрⷭ҇тꙋ̀ жили́ще.
Сла́ва: Напи́санꙋ тѧ̀ кни́гꙋ пе́рстомъ бж҃е́ственнымъ, запеча́танꙋ, пречⷭ҇таѧ молю̀, пе́рсты твои́хъ мл҃твъ напишѝ мнѣ̀ прегрѣше́нїй ѡ҆ставле́нїе, и҆ напа́стей и҆зба́ви.
И҆ ны́нѣ: И҆́же ѿ конє́цъ го́ръ ст҃ы́хъ всѣ́хъ, хра́мъ бг҃ꙋ бы́вши ꙗ҆́коже пре́жде прⷪ҇ро́къ речѐ: хрⷭ҇тꙋ̀ чи́стъ покажи́ мѧ хра́мъ влⷣчце, твои́ми застꙋпле́ньми.
Пѣ́снь є҃
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Тѧ̀ ро́сꙋ а҆ермѡ́нскꙋ, на сїѡ́нъ соше́дшꙋю, вѣ́дый бг҃ороди́тельнице, молю̀ ᲂу҆гаси́ти пло́ти моеѧ̀ запале́нїе.
Ра́й жи́зни сꙋ́щи бцⷣе, сме́рти грѣхо́вныѧ и҆ страсте́й многоѡбра́зныхъ и҆зба́ви мѧ̀ вско́рѣ.
Сла́ва: А҆лава́стръ мы́сленный, чⷭ҇таѧ, ты̀ є҆сѝ, мѵ́ра и҆злїѧ́вшагѡсѧ на зе́млю съ нб҃сѐ: менѐ ны́нѣ бл҃гоꙋха́нїѧ и҆спо́лни.
И҆ ны́нѣ: Прекло́ншагосѧ ко тлѣ́нїю ѡ҆бнови́ла є҆сѝ человѣ́ка: и҆зведѝ ᲂу҆́бѡ и҆ менѐ ны́нѣ бг҃оневѣ́сто, и҆з̾ глꙋбины̀ прегрѣше́нїй и҆ страсте́й.
Пѣ́снь ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Пала́та прекра́сна, сла́внаѧ влⷣчце, цр҃ѧ̀ сла́вы бы́вши, просла́вила є҆сѝ человѣ́ки: тѣ́мже сла́вы нетлѣ́нныѧ и҆ менѐ сподо́би.
Оу҆ти́шила є҆сѝ тлю̀ поро́чнꙋю є҆стества̀ чⷭ҇тымъ нетлѣ́нїемъ, но и҆зсꙋшѝ пречⷭ҇таѧ, страсте́й мои́хъ пото́ки, и҆ плотскі́ѧ мꙋ́дрости рѣ́ки.
Сла́ва: Оу҆спѝ страстна̑ѧ движє́нїѧ тѣлесѐ, и҆ взыгра̑нїѧ моѧ̑ плотска̑ѧ ᲂу҆мꙋ̀ повинѝ ꙗ҆́кѡ жребѧ̀, ᲂу҆спи́вши, чⷭ҇таѧ, сно́мъ твои́хъ мл҃твъ.
И҆ ны́нѣ: Пою́ тѧ бг҃а препѣ́таго ро́ждшꙋю, и҆ молю́ тѧ ѻ҆трокови́це: стра́шныѧ мѧ̀ прѝ, и҆ вѣ́чнагѡ бцⷣе, ѡ҆сꙋжде́нїѧ и҆зба́ви и҆ сп҃си́ мѧ.
Та́же: гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ,гла́съ д҃:
Предста́тельнице нера́тнаѧ, бг҃ороди́тельнице, и҆ мл҃твеннице гото́ваѧ притека́ющымъ къ тебѣ̀, ѿ бѣ́дъ мѧ̀ и҆зба́ви: да не пре́зриши менѐ, всѣ́хъ застꙋ́пнице.
Пѣ́снь з҃
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Ꙗ҆́кѡ ѻ҆гнено́сна и҆ бг҃опрїе́мна сꙋ́щи кꙋпина̀ чⷭ҇таѧ, попалѝ помышле́нїй те́рнїе лꙋка́выхъ, дꙋшѝ моеѧ̀ ѡ҆зарѝ мы́сль, и҆ страсте́й бе́зднꙋ и҆зсꙋшѝ.
Вели́чествїе ѿ вѣ́ка, и҆ бж҃е́ственнꙋю сла́вꙋ, ты̀ є҆ди́на ꙗ҆́вѣ ѡ҆брѣла̀ є҆сѝ на землѝ, нб҃о ꙗ҆́вльшисѧ второ́е: ты̀ ᲂу҆́бѡ ᲂу҆празднѝ велерѣ̑чивыѧ врагѝ моѧ̑ бѣ́сы.
Сла́ва: Бж҃е́ственный ѻ҆крі́не млⷭ҇рдїѧ и҆ бл҃гости, и҆сточи́ ми ѻ҆би́льнѡ бога́тство твои́хъ щедро́тъ, и҆ скве́рнꙋ прегрѣше́нїй мои́хъ ѡ҆мыва́ющи, плотско́е ᲂу҆гасѝ разжже́нїе.
И҆ ны́нѣ: Да́нное мѝ ѿ бг҃а бога́тство дх҃о́вное пре́жде, жи́въ блꙋ́днѡ всегда̀, сластьмѝ и҆зжди́хъ тѣле́сными: но ꙗ҆́кѡ блꙋ́днаго, твои́ми мл҃твами дв҃о, ѡ҆правдѝ.
Пѣ́снь и҃
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Расто́ргни прегрѣше́нїй мои́хъ плени́цꙋ, и҆ тѣлє́снаѧ стремлє́нїѧ ᲂу҆тишѝ, лꙋка̑вствїѧ же ᲂу҆мышле́нїй посѣцы̀, и҆ ѡ҆чи́сти ѿ та́йныхъ помышле́нїй ско́рѡ раба̀ твоего̀ бцⷣе, всѣ́хъ предста́тельнице вѣ́рныхъ и҆ застꙋпле́нїе.
Гора̀ бж҃їѧ ꙗ҆вле́на, и҆ несѣко́ма, и҆ тꙋ́чна пречⷭ҇таѧ, часта̀ и҆ ѡ҆сѣне́ннаѧ, покры́й мѧ̀ сѣ́нїю твои́хъ мл҃твъ, и҆ ѿ сѣ́ти ловє́цъ и҆зба́ви, и҆ сохранѝ ѿ стрѣ́лъ бѣсо́вскихъ, и҆ скве́рныхъ помышле́нїй.
Сла́ва: Стра́хъ бж҃е́ственный прїѧ́ти мѝ влⷣчце, и҆ дꙋ́хъ ᲂу҆миле́нїѧ во ᲂу҆тро́бѣ мое́й, и҆ роди́ти житїѐ добродѣ́тельно, и҆ стра́шна лꙋка̑вымъ бѣсѡ́мъ пречⷭ҇таѧ, сотворѝ, и҆ бж҃е́ственныѧ сла́вы а҆́гг҃льскихъ ли̑къ собесѣ́дника.
И҆ ны́нѣ: Ѿве́рзи мѝ двє́ри жи́знєнныѧ вско́рѣ, врата̀ ᲂу҆пова́нїѧ моегѡ̀, и҆ наста́ви пречⷭ҇таѧ, къ жи́зни неконча́емѣй, и҆ црⷭ҇твїѧ нбⷭ҇нагѡ покажи́ мѧ раба̀ твоего̀ наслѣ́дника, и҆ бж҃е́ственныѧ сла́вы ст҃ы́хъ соприча́стника.
Пѣ́снь ѳ҃
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Воззрѝ мл҃твами твои́ми, чⷭ҇таѧ, на раба̀ твоего̀, и҆ вско́рѣ предварѝ, и҆ ѡ҆скорблѧ́ющихъ и҆ ѡ҆ѕлоблѧ́ющихъ вра̑гъ неви́димыхъ и҆зба́ви мѧ̀: сп҃сѝ ѿ бѣ́дъ и҆ скорбе́й, и҆ многоѡбра́зныхъ ѡ҆бстоѧ́нїй.
Всего́ мѧ ꙗ҆́звами грѣхо́вными сꙋ́ща ᲂу҆ѧ́звлена и҆ ѡ҆сꙋжде́на, и҆сцѣлѝ дв҃о, и҆ и҆зба́ви лꙋка́выхъ помышле́нїй, ꙗ҆́же сло́во всеси́льное ро́ждшаѧ, бл҃га́го же и҆ чл҃вѣколю́бца.
Сла́ва: Па́дшагѡ ра́ди пре́жде а҆да́ма въ сме́рть, сме́рти причасти́сѧ, и҆́же живото́мъ и҆ сме́ртїю ѡ҆блада́ѧй тво́й сн҃ъ, пребл҃га́ѧ: тѣ́мже мѧ̀ страсте́й и҆ паде́нїѧ твои́ми мольба́ми воздви́гни.
И҆ ны́нѣ: Сп҃сѝ бцⷣе, къ тебѣ̀ прибѣга́ющихъ, ѿ бѣ́дъ и҆ паде́жа, грѣха̀ и҆ бꙋ́ри, и҆ тѣле́сныхъ страсте́й, и҆ волне́нїѧ, и҆ житїѧ̀ нꙋ́ждныхъ печа́лей, и҆ ѕло́бы лꙋка́вствїѧ.
Та́же, Досто́йно є҆́сть: И҆ покло́нъ до землѝ. Трист҃о́е По Ѻ҆́ч҃е на́шъ: тропарѝ, и҆ про́чее ѻ҆бы́чное, и҆ ѿпꙋ́стъ.
Въ четверто́къ ᲂу҆́тра,
по а҃-мъ стїхосло́вїи сѣда́льны а҆пⷭ҇льскїѧ, гла́съ д҃:
А҆пⷭ҇лѡвъ первопресто́льницы, и҆ вселе́нныѧ ᲂу҆чи́телїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю млⷭ҇ть.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Свѣти̑ла въ концѣ́хъ ᲂу҆ч҃нкѝ твоѧ̑ хрⷭ҇тѐ, ꙗ҆ви́лъ є҆сѝ, сїѧ́ющыѧ дꙋша́мъ сꙋ́щымъ во тьмѣ̀, ра́зꙋмъ тво́й влⷣко: и҆ ле́сть і҆́дѡльскꙋю тѣ́хъ ра́ди ѡ҆мрачи́въ, ᲂу҆че́ньми бл҃гоче́стїѧ просвѣти́лъ є҆сѝ мі́ръ. тѣ́хъ мольба́ми сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Ско́рѡ прїимѝ влⷣчце, моли́твы на́шѧ, и҆ сїѧ̑ принесѝ сн҃ꙋ твоемꙋ̀ и҆ бг҃ꙋ, гпⷭ҇жѐ всепречⷭ҇таѧ: разрꙋшѝ ѡ҆бстоѧ̑нїѧ, къ тебѣ̀ притека́ющихъ: разсы́пли присѣда̑нїѧ и҆ де́рзѡсти дв҃о, ны́нѣ воѡрꙋжа́ющихсѧ на рабы̑ твоѧ̑.
По в҃-мъ стїхосло́вїи сѣда́льны а҆пⷭ҇льскїѧ, гла́съ д҃:
Подо́бенъ: Ско́рѡ предварѝ:
Во всю̀ зе́млю протечѐ вѣща́нїе ва́ше, и҆ преле́стнꙋю ѡ҆б̾юродѝ мꙋ́дрость немꙋ́дрꙋю, а҆пⷭ҇ли сла́внїи, привлечѐ человѣ́ки и҆з̾ глꙋбины̀ пре́лести, показа́ же всѣ̑мъ сп҃се́нїѧ стезю̀, тѣ́мже ны́нѣ досто́йнѡ ва́съ ᲂу҆бл҃жа́емъ.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Вѣ́ры проповѣ́дники ᲂу҆ч҃нкѝ твоѧ̑ сп҃се, мі́рови показа́лъ є҆сѝ, наставлѧ́ѧ тѣ́ми ꙗ҆зы́ки къ ра́зꙋмꙋ твоемꙋ̀: зарѧ́ми бо сло́ва просвѣти́ша всѧ̑, тьмꙋ̀ неразꙋ́мїѧ прогна́вше вѣ́рою. тѣ́хъ мл҃твами сп҃сѝ дꙋ́шы на́шѧ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Мч҃нцы твоѝ гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебѐ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ мл҃твами сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Оу҆слы́ши влⷣчце, ѿ болѣ́зненныѧ дꙋшѝ вопїю́щаго раба̀ твоего̀, и҆ мно́гихъ мои́хъ ѕѡ́лъ пода́ждь мѝ ѡ҆ставле́нїе, тебе́ бо и҆́мамъ предста́тельницꙋ въ де́нь и҆ но́щь: и҆зба́ви бцⷣе, ѿ ѻ҆гнѧ̀ гее́нскагѡ, и҆ поста́ви мѧ̀ ѡ҆деснꙋ́ю сн҃а твоегѡ̀ и҆ бг҃а.
По г҃-мъ стїхосло́вїи сѣда́льны, гла́съ д҃:
Подо́бенъ: Ско́рѡ предварѝ:
Лꙋчы̀ ꙗ҆́кѡ сл҃нце пра́вды, ва́съ хрⷭ҇то́съ и҆спꙋстѝ, просвѣти́ти всю̀ зе́млю а҆пⷭ҇ли сла́внїи: бж҃е́ственными ва́шими мл҃твами, ѡ҆зарѧ́ете бж҃е́ственнымъ свѣ́томъ невече́рнимъ всѣ́хъ, и҆ просвѣща́ете вѣ́рою соверша́ющихъ ст҃ꙋ́ю ва́шꙋ па́мѧть.
Ско́рѡ предварѝ ѻ҆́тче нїко́лае, и҆ сп҃сѝ рабы̑ твоѧ̑ ѡ҆ находѧ́щихъ на́мъ бѣ́дъ и҆ скорбе́й, и҆́маши бо къ созда́телю и҆ бг҃ꙋ дерзнове́нїе. прїидѝ ᲂу҆́бѡ вско́рѣ ко вѣ́рою тѧ̀ призыва́ющымъ, твоѐ ны́нѣ предста́тельство и҆ покро́въ да́рꙋѧ.
Сла́ва, и҆ ны́нѣ, бг҃оро́диченъ: Ꙗ҆́кѡ всѣ́хъ є҆сѝ творе́нїй вы́шшаѧ, воспѣва́ти тѧ̀ досто́йнѡ недоꙋмѣва́юще бцⷣе, тꙋ́не, мо́лимъ тѧ̀, поми́лꙋй на́съ.
Канѡ́нъ ст҃ы̑мъ сла̑внымъ и҆ всехва̑льнымъ а҆пⷭ҇лѡмъ. Творе́нїе кѵ́ръ ѳеофа́на. Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Бж҃е́ственнїи ᲂу҆тѣ́шителѧ ѻ҆рга́ни, возглаша́ющїи сегѡ̀ бж҃е́ственными всегда̀ дохнове́ньми, воспѣ́ша пѣ́снь на́мъ, ꙗ҆́кѡ вои́стиннꙋ сп҃си́тельнꙋю, бл҃госла́внїи хрⷭ҇тѡ́вы а҆пⷭ҇ли. [Два́жды.]
На ѻ҆дрѣ̀ лѣ́ности слежѧ̀, и҆ въ сме́рти грѣхо́внѣй недꙋ́гомъ дꙋше́внымъ лю́тѣ и҆ста́емь, посѣще́нїѧ мѧ̀ сла́внїи хрⷭ҇тѡ́вы самови́дцы сподо́бите.
И҆̀же сло́вомъ безслове́сїе разрѣши́вше ꙗ҆зы́кѡвъ а҆пⷭ҇ли, ѿ безслове́сныхъ дѣѧ́нїй лю́тѣ ѡ҆мраче́ное се́рдце моѐ, ᲂу҆тѣ́шителѧ бл҃года́тїю, просвѣти́те а҆пⷭ҇ли.
Бг҃оро́диченъ: Дв҃а по ржⷭ҇твѣ̀ нетлѣ́нна пребыла̀ є҆сѝ, на́съ ра́ди ꙗ҆́вльшагѡсѧ на землѝ, па́че сло́ва ро́ждшаѧ: є҆гѡ́же прилѣ́жнѡ молѝ просвѣти́ти дꙋ́шы на́шѧ.
Дрꙋгі́й канѡ́нъ ст҃о́мꙋ нїкола́ю, [є҆гѡ́же краестро́чїе: Четве́ртое сїѐ на нїкола́а плеска́нїе. Творе́нїе і҆ѡ́сифово.] Гла́съ то́йже.
Пѣ́снь а҃
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ: да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ, побѣ́дное воспою̀ пѣ́нїе.
Безпеча́льнꙋю жи́знь наслѣ́довавъ бл҃же́нне, и҆ ра́дости дх҃о́вныѧ и҆сполнѧ́емь при́снѡ, всѧ́кꙋ печа́ль ѿженѝ, молю́сѧ, ѿ дꙋшѝ моеѧ̀: ꙗ҆́кѡ да ра́дꙋѧсѧ сла́влю тѧ̀, сщ҃е́ннѣйшїй ѻ҆́тче нїко́лае.
Поста́вленъ бы́лъ є҆сѝ добродѣ́телей высо́кихъ на свѣ́щницѣ, ꙗ҆́коже свѣти́льникъ просвѣща́еши сердца̀ вѣ́рныхъ, ст҃и́телю нїко́лае. тѣ́мже вѣ́рою молю̀ тѧ̀: свѣтоно́сными мл҃твами твои́ми, дꙋшѝ моеѧ̀ тьмꙋ̀ ѿженѝ.
Житїѧ̀ тлѣ́ннагѡ ны́нѣ пꙋчи́ною ѻ҆́тче, и҆скꙋше́нїй разли́чныхъ наполнѧ́емь премꙋ́дре, къ тебѣ̀ прибѣга́ѧ вопїю̀: да ѡ҆брѧ́щꙋ тѧ̀ ко́рмчїѧ, въ тишинꙋ̀ прелага́юща бꙋ́рю, бж҃е́ственными мл҃твами твои́ми.
Бг҃оро́диченъ: Неꙋсыпа́ющꙋю чⷭ҇таѧ, и҆мꙋ́щи мл҃твꙋ, ᲂу҆спѝ на́шѧ стра̑сти дꙋшє́вныѧ, сщ҃е́нными хода́тайствы твои́ми, бж҃е́ственнꙋю и҆ сп҃си́тельнꙋю даю́щи бо́дрость, къ бж҃їихъ хотѣ́нїй и҆сполне́нїю.
Пѣ́снь г҃
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Гра́дъ тво́й бж҃е, слове́сныхъ рѣ́къ твои́хъ течє́нїѧ ᲂу҆ч҃нкъ влⷣко, сщ҃е́ннѡ возвеселѧ́ютъ. [Два́жды.]
Гра́ждане нбⷭ҇нїи, сослꙋжє́бницы мы́слєннымъ чинѡ́мъ, всесла́внїи а҆пⷭ҇ли, всѧ́кїѧ на́съ ско́рби и҆зба́вите.
Оу҆тверди́вый хрⷭ҇тѐ словє́снаѧ твоѧ̑ нб҃са̀: ᲂу҆тверди́ мѧ тѣ́хъ мл҃твами, на ка́мени твои́хъ хотѣ́нїй, ꙗ҆́кѡ бл҃гоꙋтро́бенъ.
Бг҃оро́диченъ: Ꙗ҆́кѡ мт҃и тѧ̀ мо́литъ съ ли́комъ ᲂу҆ч҃нкъ гдⷭ҇и, ꙗ҆́же тебѐ чи́стѡ роди́вшаѧ: да́рꙋй на́мъ млⷭ҇ти твоѧ̑.
И҆́нъ
І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ, па́че тебѐ чл҃вѣколю́бче.
Ѻ҆рꙋ́жїе ꙗ҆ви́лсѧ є҆сѝ, бори́тєльныѧ врагѝ закала́ѧ, и҆́хже и҆скꙋше́нїѧ соблюдѝ на́съ невре́дныхъ нїко́лае, содѣва́ющихъ бж҃е́ственное хотѣ́нїе.
Сокрꙋше́нїе моеѧ̀ дꙋшѝ, ст҃и́телю, ᲂу҆врачꙋ́й, сокрꙋши́вый вра̑жїѧ кѡ́зни и҆ ловлє́нїѧ: да ꙗ҆́кѡ предста́телѧ моего̀ вѣ́рою почита́ю тѧ̀.
Разори́вый а҆ртемі́ды бездꙋ̑шнаѧ ка̑пища, ᲂу҆ма̀ моегѡ̀ страстна̑ѧ мечта̑нїѧ потребѝ бж҃е́ственными хода́тайствы твои́ми ѻ҆́тче нїко́лае.
Бг҃оро́диченъ: Тѧ̀ предста́тельницꙋ пречⷭ҇таѧ дв҃о, стѧжа́хомъ, претворѝ на́шꙋ печа́ль на ра́дость, и҆ ско́рби и҆зба́ви ражда́ющїѧ сме́рть.
Пѣ́снь д҃
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Наве́лъ є҆сѝ на мо́ре ко́ни твоѧ̑ и҆збра̑нныѧ, чл҃вѣколю́бче, ѕловѣ́рїѧ во́ды возмꙋща́ющыѧ, и҆ всѣ̑мъ ра́зꙋмъ тво́й и҆́стинный возвѣща́ющыѧ. [Два́жды.]
Ѕвѣ́зды просвѣти́вше бл҃гоче́стїемъ мы́сленнꙋю тве́рдь цр҃ко́внꙋю, сла́внїи а҆пⷭ҇ли, ѿ но́щи невѣ́дѣнїѧ, и҆ прегрѣше́нїй и҆зба́вите мѧ̀.
Ꙗ҆́вльшесѧ ꙗ҆́коже стрѣ́лы и҆з̾ѡщре́ни а҆пⷭ҇ли, вра̑жїѧ разжжє́ныѧ стрѣ́лы ѕло́бы моеѧ̀ ны́нѣ ᲂу҆гаси́те, и҆ помышле́нїе моѐ ᲂу҆тверди́те.
Бг҃оро́диченъ: Дꙋ́шꙋ мою̀ ѡ҆горче́нꙋю ꙗ҆́домъ, сопроти́внагѡ ᲂу҆грызе́нїемъ, дѣ́йственнымъ врачева́нїемъ и҆сцѣлѝ, мл҃твами хрⷭ҇тѐ, ро́ждшїѧ тѧ̀ и҆ сщ҃е́нныхъ а҆пⷭ҇лъ твои́хъ.
И҆́нъ
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃се зовꙋ́щыѧ: сла́ва хрⷭ҇тѐ, си́лѣ твое́й.
Пресла́вное житїѐ твоѐ вездѣ̀ тѧ̀ пресла́вна показа̀, чꙋдесы̀ бж҃е́ственными, и҆ просвѣща́емаго, ст҃и́телємъ ᲂу҆краше́нїе, всѣ̑мъ похвалꙋ̀, чтꙋ́щымъ тѧ̀ нїко́лае, ра́достными пѣ́сньми.
На высо́цѣ прⷭ҇то́лѣ бл҃же́нне, бг҃а похвали́лъ є҆сѝ, смиреномꙋ́дрїѧ бж҃е́ственными ѡ҆блиста́ѧ свѣтлостьмѝ, и҆́хже бо прича́стїи бы́ти на́съ сотворѝ, бл҃гопрїѧ́тными твои́ми мольба́ми, ѻ҆́тче мꙋ́дре.
Непра́веднѡ ведѡ́мыѧ на сме́рть и҆зба́вилъ є҆сѝ, ре́вностїю бж҃е́ственною ѻ҆́тче, сщ҃еннолѣ́пнѣ распала́емь. тѣ́мже вопїе́мъ тѝ: та́кожде и҆змѝ на́съ ѿ напа́стей, ᲂу҆мерщвлѧ́ющихъ лю́тѣ се́рдце моѐ.
Нб҃са̀ ѡ҆бходѧ̀ нїко́лае ра́достнѡ, неви́димѡ ѻ҆́тче, всѣ̑мъ призыва́ющымъ тѧ̀ предста́ни, ѡ҆блегчава́ѧй недꙋ́ги дꙋ́шъ на́шихъ, и҆ ᲂу҆тѣше́нїе бг҃олѣ́пнѡ подаѧ̀.
Бг҃оро́диченъ: Вѡ́инства а҆́гг҃льскаѧ ᲂу҆жаса́ютсѧ, пречⷭ҇таѧ, воспѣва́юще вели́чество бж҃е́ственнагѡ ржⷭ҇тва̀ твоегѡ̀: съ ни́миже молѝ дв҃о, всѣ̑мъ сп҃сти́сѧ, вѣ́рою чи́стою тебѐ бл҃жа́щымъ.
Пѣ́снь є҃
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Лѡ́зы живѡ́тныѧ процвѣта́юще гро́здїе, напои́ша всѣ́хъ вїна̀ мы́сленнагѡ весе́лїѧ, сла́внїи а҆пⷭ҇ли. [Два́жды.]
Къ свѣ́тꙋ за́повѣдей бж҃їихъ наста́вите а҆пⷭ҇ли, и҆̀же во тьмѣ̀ дꙋше́внагѡ ᲂу҆ны́нїѧ безꙋ́мнѡ пребыва́ющыѧ.
И҆зба́вите на́съ дꙋше́вныхъ прегрѣше́нїй, и҆ сꙋда̀ бꙋ́дꙋщагѡ, и҆ тлѝ и҆ бѣ́дъ, а҆пⷭ҇ли бл҃же́ннїи.
Бг҃оро́диченъ: Сп҃си́ мѧ бж҃е, ꙗ҆́кѡ чл҃вѣколю́бецъ, сп҃си́ мѧ мольба́ми неизрече́ннѡ тебѐ роди́вшїѧ, и҆ всѣ́хъ бж҃е́ственныхъ а҆пⷭ҇лъ твои́хъ.
И҆́нъ
І҆рмо́съ: Нечести́вїи не ᲂу҆́зрѧтъ сла́вы твоеѧ̀ хрⷭ҇тѐ, но мы̀ тѧ̀ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
Заше́лъ є҆сѝ ꙗ҆́коже со́лнце, ᲂу҆ме́рый ѻ҆́тче мꙋ́дре, и҆ возсїѧ́лъ є҆сѝ ᲂу҆ хрⷭ҇та̀, свѣтоно́сными сїѧ́ньми чꙋде́съ твои́хъ, ѡ҆зарѧ́ѧ всю̀ подсо́лнечнꙋю, нїко́лае.
Сщ҃е́нне нїко́лае, ᲂу҆слы́ши на́съ во днѝ наведе́нїѧ и҆скꙋше́нїй и҆ скорбе́й, всѧ́кꙋю тѣснотꙋ̀ ѿгонѧ́ѧ бл҃года́тїю въ тебѣ̀ живꙋ́щагѡ дх҃а.
Сокрꙋше́ннꙋю страстьмѝ жите́йскими дꙋ́шꙋ мою̀ и҆мы́й, на по́мощь тѧ̀ призыва́ю сщ҃е́нне нїко́лае, потщи́сѧ, и҆ да́ждь мѝ соверше́нное и҆сцѣле́нїе, ᲂу҆молѧ́ѧ пребл҃га́го.
Бг҃оро́диченъ: Оу҆́мныма ѻ҆чи́ма, дв҃о, зрѧ́ тѧ и҆са́їа, вопїе́тъ: сѐ хо́щетъ роди́тисѧ ѿ дв҃ы бг҃оѻтрокови́цы і҆и҃съ гдⷭ҇ь, въ человѣ́кѡвъ па́ки возрожде́нїе.
Пѣ́снь ѕ҃
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Па́стырѧ до́брагѡ бг҃оизбра̑ннаѧ ѻ҆вча́та, разсѣ̑ѧннаѧ по мі́рꙋ, волкѡ́въ всѧ́ко ѕвѣ́рство во ѻ҆́вчꙋю кро́тость, вѣ́рою преложи́ша. [Два́жды.]
Бж҃е́ственнагѡ раѧ̀ древеса̀ доброплѡ́днаѧ, преѻкаѧ́нныѧ дꙋшѝ моеѧ̀ всѐ непло́дство во бл҃гопло́дїе добродѣ́тельнагѡ нра́ва преведи́те а҆пⷭ҇ли.
Оу҆ѧ́звенъ бы́хъ сласте́й ѻ҆рꙋ́жїемъ и҆ ᲂу҆мро́хъ: и҆̀же ѿ хрⷭ҇та̀ прїе́мше сла́внїи бл҃года́ть воскреша́ти мє́ртвыѧ, ᲂу҆мерщвле́ннꙋю ѻ҆каѧ́ннꙋю мою̀ дꙋ́шꙋ ѡ҆живи́те.
Бг҃оро́диченъ: Оу҆ста́ви дꙋшѝ моеѧ̀ свирѣ́пꙋю бꙋ́рю, бж҃е всѣ́хъ ще́дрый, мольба́ми ро́ждшїѧ тѧ̀ бцⷣы, а҆пⷭ҇лъ же и҆ мч҃нкъ твои́хъ.
И҆́нъ
І҆рмо́съ: Прїидо́хъ во глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве.
Оу҆крѣпи́лсѧ є҆сѝ крѣ́постїю сп҃совою, возмогі́й бг҃омꙋ́дре, неви́димаго врага̀ погꙋби́ти: є҆гѡ́же лю́тагѡ вре́да на́съ и҆зба́ви мольба́ми твои́ми, ѻ҆́тче нїко́лае.
Мꙋче́нїѧ же въ гее́ннѣ, ѿ лꙋка́выхъ человѣ̑къ стꙋже́нїѧ вре́днѣйшагѡ, и҆зба́ви на́съ сщ҃е́нными мл҃твами твои́ми, пресла́вне нїко́лае.
И҆̀же дре́вле ᲂу҆мре́ти непра́веднѡ и҆мꙋ́щїи воевѡ́ды, и҆зба́вишасѧ твои́ми предста́тельствы: ꙗ҆́коже тѣ́хъ, и҆ на́съ и҆схитѝ всѧ́кагѡ вре́да, досточꙋ́дне.
Бг҃оро́диченъ: Лю́дїе твоѝ и҆ гра́дъ мо́литъ тѧ̀, мт҃и бж҃їѧ: и҆змѝ на́съ всѧ́кїѧ нꙋ́жды, и҆ та́мошнагѡ, всест҃а́ѧ влⷣчце, вѣ́чнагѡ ѡ҆сꙋжде́нїѧ.
Пѣ́снь з҃
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Крѣ́постїю всест҃ы́ѧ про́повѣди, неле́стнїи а҆пⷭ҇ли хрⷭ҇тѡ́вы, пре́лести зи́мꙋ разрꙋши́сте, и҆ просвѣти́сте бг҃оразꙋ́мїемъ вѣ́рныхъ мꙋдрова́нїе. [Два́жды.]
Мѵ́ро бл҃гоꙋха́нное и҆сточа́юще всегда̀ бж҃е́ственнїи ᲂу҆ч҃нцы̀, мѵ́ра ᲂу҆́мнагѡ бл҃гово́нїѧ притека́ющихъ къ ва́мъ и҆спо́лните, и҆ ѕлосмра̑дныѧ стра̑сти ѿжени́те.
Растлѣ́вшаго мѧ̀ плотски́ми безмѣ́стїи, сло́ва нетлѣ́ннагѡ сла́внїи ᲂу҆ч҃нцы̀, сп҃си́те мѧ̀ пою́ща: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Бг҃оро́диченъ:Ли́къ а҆́гг҃льскїй, ли́къ мч҃нкъ и҆ а҆пⷭ҇лъ твои́хъ сло́ве, мо́лѧтъ всегда̀, мно́гое бл҃гоꙋтро́бїѧ твоегѡ̀ чл҃вѣколю́бче: всѣ́хъ ᲂу҆ще́дри бцⷣею, ꙗ҆́кѡ бл҃гоꙋтро́бенъ.
И҆́нъ
І҆рмо́съ: Ю҆́нѡши трѝ въ вавѷлѡ́нѣ велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Свѧ́те нїко́лае, во ст҃ы́хъ є҆ди́наго всѣ́хъ творца̀ почива́ющаго, молѝ ѡ҆ст҃и́ти на́съ, и҆ низпосла́ти бога̑тыѧ на ны̀ млⷭ҇ти своѧ̑.
Преподо́бенъ, пра́въ и҆ кро́токъ, ти́хъ и҆ смире́нъ бы́въ сла́вне, къ высотѣ̀ пресла́внѣй сщ҃е́нства взѧ́лсѧ є҆сѝ, чꙋдеса̀ соверша́ѧ и҆ зна́мєнїѧ.
Зако́ны бж҃е́ствєнныѧ соблю́дъ прпⷣбне, ꙗ҆ви́лсѧ є҆сѝ бж҃їй хра́мъ чⷭ҇тѣ́йшїй. тѣ́мже тѝ вопїе́мъ, всебл҃же́нне: ѿ всѧ́кагѡ пребеззако́нїѧ и҆зба́ви рабы̑ твоѧ̑.
Бг҃оро́диченъ: Оу҆спѝ воста̑нїѧ страсте́й моеѧ̀ дꙋшѝ, бо́дренною мл҃твою твое́ю да́ждь мѝ бо́дрость, ѻ҆трокови́це, ᲂу҆ны́нїѧ дрема́нїе дале́че ѿгонѧ́ющи.
Пѣ́снь и҃
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Оу҆ста̀ ѻ҆гнедохновє́ннаѧ хрⷭ҇тѡ́ва, и҆̀же бездвє́рнаѧ ᲂу҆ста̀ загради́вше, и҆ сп҃си́тельное проповѣ́данїе повсю́дꙋ разсѣ́ѧвше, ѿ ᲂу҆́стъ во́лка мы́сленнагѡ и҆зба́висте вопїю́щыѧ: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки. [Два́жды.]
Вострꙋби́те ѻ҆́крестъ моеѧ̀ ᲂу҆мерщвле́нныѧ дꙋшѝ бл҃гогла́снїи трꙋбы̑ хрⷭ҇тѡ́вы, а҆пⷭ҇ли сла́внїи, и҆ ѿ гро́ба ѿча́ѧнїѧ и҆ ᲂу҆ны́нїѧ лю́тагѡ сїю̀ воздви́гните, во є҆́же пѣ́ти: всѧ̑ дѣла̀ гдⷭ҇а по́йте, и҆ превозноси́те є҆го̀ во всѧ̑ вѣ́ки.
Менѐ зако́ны твоѧ̑ хрⷭ҇тѐ, попра́вшагѡ ᲂу҆ма̀ развраще́нїемъ, менѐ влⷣко, блꙋ́днагѡ, во глꙋбины̑ попо́лзшасѧ, и҆ ѻ҆бы́чаю лꙋка́вомꙋ при́снѡ рабо́тающа не пре́зри, ᲂу҆ч҃нкѡ́въ твои́хъ мольба́ми.
Бг҃оро́диченъ: Мр҃і́е гпⷭ҇жѐ всѧ́ческихъ, ѡ҆блада́ема мѧ̀ ѿ ѕмі́ѧ, и҆ согрѣша́юща всегда̀ свободѝ мл҃твами твои́ми, и҆ порабо́ти хрⷭ҇тꙋ̀ въ житїѝ чи́стѣ воспѣва́ти: всѧ̑ дѣла̀ гдⷭ҇а по́йте, и҆ превозноси́те во всѧ̑ вѣ́ки.
И҆́нъ
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Вѣті́йствꙋѧ бж҃е́ствєннаѧ нїко́лае, беззако́ннꙋющихъ незатворє́наѧ ᲂу҆ста̀ ꙗ҆́вственнѡ загради́лъ є҆сѝ, и҆ ѿ а҆́рїева гꙋби́тельства мнѡ́гїѧ и҆зба́вилъ є҆сѝ, правосла́внѡ пою́щыѧ: гдⷭ҇а по́йте, и҆ превозноси́те є҆го̀ во всѧ̑ вѣ́ки.
И҆́же побѣ́ды тезоимени́тъ свѧ́те, побѣди́телей на́съ покажѝ, мл҃твами твои́ми, страсте́мъ ражда́ющымъ сме́рть, и҆ пребеззако́нныхъ человѣ̑къ ѧ҆зы́ка льсти́ва, вѣ́рнѡ при́снѡ молѧ́щихсѧ тѝ.
По́мощь твою̀ сп҃си́тельнꙋю низпосла́ти на́мъ, ᲂу҆моле́нъ бꙋ́ди чꙋдотво́рче нїко́лае, въ де́нь нꙋ́жды, внегда̀ тѧ̀ вѣ́рою просѧ́ще мо́лимъ.
Трⷪ҇ченъ: Правосла́внѡ вѣ́рнїи поклони́мсѧ ст҃ѣ́й трⷪ҇цѣ, сла́вѧще ѻ҆ц҃а̀, и҆ сн҃а, и҆ всест҃а́го дх҃а, вопїю́ще: бл҃гослови́те, по́йте гдⷭ҇а, и҆ превозноси́те є҆го̀ во всѧ̑ вѣ́ки.
Бг҃оро́диченъ: Ми́лости твоеѧ́ мѧ сподо́би, млⷭ҇тивѣйшаго сло́ва ро́ждши, бл҃гослове́ннаѧ всечⷭ҇таѧ: въ ча́съ сꙋ́дный предста́ни, и҆ и҆зба́ви та́мошнѧгѡ мѧ̀ чⷭ҇таѧ ѡ҆сꙋжде́нїѧ.
Пѣ́снь ѳ҃
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Ка́менїе и҆збра́нное, положе́ннагѡ во главꙋ̀ ᲂу҆́гла ка́мене, созда́сте всѣ́хъ вѣ́рныхъ сердца̀, ка́менемъ вѣ́ры вра̑жїѧ созда̑нїѧ, а҆пⷭ҇ли, разве́ргше. [Два́жды.]
Рѣши́ти и҆ вѧза́ти ѿ хрⷭ҇та̀ прїе́мше вла́сть, разрѣши́те ѕѡ́лъ мои́хъ соꙋ́зъ, и҆ къ любвѝ бж҃їей привѧжи́те, и҆ црⷭ҇твїѧ прича́стника бж҃е́ственнагѡ содѣ́лайте а҆пⷭ҇ли.
Бж҃е́ственнїи влⷣки ѻ҆́блацы, и҆зсо́хшее моѐ се́рдце всѧ́кимъ лꙋка́вымъ дѣѧ́нїемъ бж҃е́ственными тꙋ́чами ны́нѣ напо́йте, и҆ плодоно́сно покажи́те, а҆пⷭ҇ли бг҃обл҃же́ннїи.
Бг҃оро́диченъ: Со ст҃ы́ми а҆́гг҃лы, съ бж҃е́ственными а҆пⷭ҇лы, со сла́вными мч҃нки, твоего̀ молѝ сн҃а и҆ бг҃а, бг҃ороди́тельнице пречⷭ҇таѧ, ѿ бѣ́дъ и҆зба́вити дꙋ́шы на́шѧ.
И҆́нъ
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.
И҆сцѣлє́нїѧ при́снѡ соверша́ѧ гро́бъ тво́й, бл҃гоꙋха̑нїѧ мѵ́ра прпⷣбне, и҆сточа́етъ вѣ́рою и҆ любо́вїю пристꙋпа́ющымъ нїко́лае, погреба́ѧй недꙋ́гѡвъ нахо́ды. тѣ́мже тѧ̀ всѝ ᲂу҆бл҃жа́емъ.
Ꙗ҆́кѡ со́лнце всю̀ ѡ҆зарѧ́еши нїко́лае бг҃обл҃же́нне, подсо́лнечнꙋю, бж҃е́ственныхъ чꙋде́съ сїѧ́ньми тьмꙋ̀ лю́тыхъ ѡ҆бстоѧ́нїй ѿгонѧ́ѧ, сщ҃е́нными хода́тайствы твои́ми, а҆рхїере́євъ ᲂу҆добре́нїе.
Ѻ҆бы́чнѡ ᲂу҆ще́дри ны̀ нїко́лае, жите́йскими ѡ҆бстоѧ́ньми, и҆ бѣсо́вскими пре́лестьми, лꙋка́выхъ же человѣ̑къ и҆скꙋше́ньми, лю́тѣ ѡ҆бꙋрева́ємыѧ всегда̀: ꙗ҆́кѡ да тѧ̀ всѝ ᲂу҆бл҃жа́емъ.
Де́нь и҆ ча́съ стра́шный помина́й ѽ дꙋшѐ моѧ̀! є҆гда́ тѧ хо́щетъ привестѝ на сꙋ́дъ влⷣка, и҆ сꙋди́ти твоѧ̑ дѣла̀ та̑йнаѧ, и҆ возопі́й є҆мꙋ̀: сп҃се сп҃си́ мѧ нїкола́а мольба́ми.
Бг҃оро́диченъ: Гла́съ тебѐ бж҃е́ственнагѡ гаврїи́ла прино́симъ ра́достнѡ, и҆ взыва́емъ: ра́дꙋйсѧ раю̀, ꙗ҆́же дре́во живо́тное посредѣ̀ и҆мꙋ́щаѧ всегда̀, пресла́внаѧ сло́ва пала́то, ра́дꙋйсѧ дв҃о всенепоро́чнаѧ.
На стїхо́внѣ стїхи̑ры а҆пⷭ҇лѡмъ, гла́съ д҃:
А҆пⷭ҇льскїй ли́къ дх҃омъ ст҃ы́мъ просвѣти́лъ є҆сѝ хрⷭ҇тѐ: и҆ на́шꙋ скве́рнꙋ грѣхо́внꙋю, тѣ́хъ ра́ди ѡ҆мы́й бж҃е, и҆ поми́лꙋй на́съ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ: во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑ и҆ на дѣла̀ твоѧ̑, и҆ наста́ви сы́ны и҆́хъ.
Некни̑жныѧ ᲂу҆ч҃нкѝ, дх҃ъ тво́й ст҃ы́й каза́тели ꙗ҆вѝ хрⷭ҇тѐ бж҃е: и҆ многовѣща́ннымъ сли́чїемъ ꙗ҆зы́кѡвъ пре́лесть ᲂу҆празднѝ, ꙗ҆́кѡ всеси́ленъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: Честна̀ сме́рть ст҃ы́хъ твои́хъ гдⷭ҇и: меча́ми бо и҆ ѻ҆гне́мъ, и҆ стꙋ́денїю сокрꙋша́еми, и҆злїѧ́ша кро́вь свою̀, наде́ждꙋ и҆мꙋ́ще на тѧ̀, воспрїѧ́ти трꙋдѡ́въ мздꙋ̀: претерпѣ́ша, и҆ прїѧ́ша ѿ тебѐ сп҃се ве́лїю млⷭ҇ть.
Сла́ва, и҆ ны́нѣ, бг҃оро́диченъ: Тѧ̀ стѣ́нꙋ стѧжа́хомъ бцⷣе пречⷭ҇таѧ, и҆ бл҃гоꙋти́шное приста́нище, и҆ ᲂу҆твержде́нїе. тѣ́мже молю́сѧ, и҆́же въ житїѝ ѡ҆бꙋрева́емь, ѡ҆кормѝ, и҆ сп҃си́ мѧ.
Въ четверто́къ бл҃жє́нны, гла́съ д҃:
Дре́вомъ а҆да́мъ раѧ̀ бы́сть и҆зселе́нъ, дре́вомъ же крⷭ҇тнымъ разбо́йникъ въ ра́й всели́сѧ: ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во црⷭ҇твїи твое́мъ.
Сті́хъ: Бл҃же́ни и҆́згнани пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Па́стырѧ и҆ а҆́гнца словє́снаѧ сꙋ́ще воспита̑нїѧ, посредѣ̀ волкѡ́въ ѿ негѡ̀ ꙗ҆́кѡ а҆́гнцы мꙋ́дрїи по́слани бы́сте, бж҃е́ственнымъ проповѣ́данїемъ. тѣ́хъ претворѧ́юще свирѣ́пство на кро́тость, вѣ́рою зовꙋ́ще неꙋкло́ннымъ по́мысломъ: помѧнѝ на́съ сп҃се, во црⷭ҇твїи твое́мъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Проше́дше земна̑ѧ и҆сполнє́нїѧ а҆пⷭ҇ли гдⷭ҇ни, ꙗ҆́кѡ ѕвѣ́зды свѣ̑тлыѧ, помрачє́нныѧ пре́лєсти разори́сте, и҆ свѣ́тъ сп҃си́тельный прельщє́нымъ ѡ҆блиста́сте. тѣ́мже бл҃жи́мъ ва́съ хрⷭ҇тѡ́вы проповѣ̑дницы, просѧ́ще: моли́тесѧ ѡ҆ на́съ всегда̀ ко гдⷭ҇ꙋ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Мч҃нченъ: Оу҆мерщвлѧ́еми мꙋ́дрїи, и҆ ѻ҆гне́мъ веще́ственнымъ ѡ҆палѧ́еми, попали́сте го́рькагѡ многобо́жїѧ вещество̀ бл҃же́ннїи, и҆ ны́нѣ и҆сточа́ете и҆сцѣле́нїй стрꙋи̑ приходѧ́щымъ къ ва́мъ съ вѣ́рою, те́плѣ взыва́ющымъ, и҆ вопїю́щымъ хрⷭ҇тꙋ̀: помѧнѝ на́съ во црⷭ҇твїи твое́мъ.
Сла́ва: трⷪ҇ченъ: Непреткнове́ннымъ по́мысломъ, мы́слїю трезвѧ́щесѧ рце́мъ, въ вы́шнихъ со ѻ҆ц҃е́мъ сѣдѧ́щемꙋ вкꙋ́пѣ и҆ дх҃омъ: трⷪ҇це нераздѣ́льнаѧ, ꙗ҆́же всѧ̑ сло́вомъ пре́жде соста́вльшаѧ, и҆ всѣ́хъ просвѣща́ющаѧ, вѣ́рою тебѣ̀ зовꙋ́щихъ, помѧнѝ на́съ во црⷭ҇твїи твое́мъ.
И҆ ны́нѣ, бг҃оро́диченъ: А҆пⷭ҇лѡвъ ра́досте, и҆ стрⷭ҇тоте́рпєцъ вѣне́цъ неꙋвѧда́емый вои́стиннꙋ є҆сѝ бг҃ороди́тельнице, всенепоро́чнаѧ ѻ҆трокови́це, съ ни́миже и҆спросѝ на́мъ влⷣчце, прегрѣше́нїй и҆збавле́нїе, и҆ житїѧ̀ и҆справле́нїе, вѣ́рою просѧ́щымъ тѧ̀, и҆ вопїю́щымъ тѝ: ра́дꙋйсѧ, всеи́стиннѣ бл҃ги́хъ сокро́вище.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.