Глас 4-й. Вторник.
Въ понедѣ́льникъ ве́чера,
на Гдⷭ҇и воззва́хъ, стїхи̑ры покаѧ́нны. Гла́съ д҃.
Подо́бенъ: Зва́нный свы́ше:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Ханане́и поревнова́вши, дꙋшѐ, прикосни́сѧ хрⷭ҇тꙋ̀ созадѝ, и҆ взыва́й ча́стѣ: поми́лꙋй мѧ̀, ѽ влⷣко! дѣ́тище и҆́мамъ, бѣснꙋ́ющꙋюсѧ пло́ть безчи́ннꙋю, ѿженѝ разжже́нїе ѿ неѧ̀, молю́сѧ, и҆ ᲂу҆толи́въ безчи̑ннаѧ взыгра̑нїѧ, ме́ртвꙋ стра́хомъ твои́мъ совершѝ, мл҃твами пречи́стѡ заче́ншїѧ и҆ ро́ждшїѧ тѧ̀ хрⷭ҇тѐ, и҆ всѣ́хъ ст҃ы́хъ, бл҃года́телю многомлⷭ҇тиве.
Сті́хъ: И҆́мене ра́ди твоегѡ̀, потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
Нїнеѵі́тѧнѡмъ и҆ногда̀ согрѣши́вшымъ і҆ѡ́нꙋ посла́лъ є҆сѝ хрⷭ҇тѐ проповѣ́дати си̑мъ, и҆̀же пока́ѧвшесѧ, ꙗ҆́рость въ бл҃госе́рдїе преложи́ша, и҆збавлѧ́еми ѿ гꙋби́тельнагѡ гнѣ́ва. послѝ ᲂу҆̀бо, чл҃вѣколю́бче, и҆ мнѣ̀ недосто́йномꙋ держа́внꙋю твою̀ по́мощь, да ѡ҆бращꙋ́сѧ ѿ безчи́сленныхъ мои́хъ согрѣше́нїй, и҆ на стезю̀ покаѧ́нїѧ наста́вленъ бꙋ́дꙋ, и҆ пла́чꙋ стенѧ̀ го́рцѣ, мно́гихъ мои́хъ прегрѣше́нїй и҆зба́витисѧ млⷭ҇тїю твое́ю.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Въ мі́ръ прише́дый, во є҆́же сп҃стѝ человѣ́ки согрѣша́ющыѧ, и҆ къ покаѧ́нїю си́хъ призва́ти, ꙗ҆́кѡ бл҃гоꙋтро́бенъ, и҆ менѐ, ще́дре, па́че всѣ́хъ тебѐ прогнѣ́вавшаго ᲂу҆ще́дривъ, сп҃си́ мѧ ра́ди бл҃гости, и҆ на пꙋ́ть покаѧ́нїѧ наста́ви мѧ̀, и҆ по́мыслъ да́ждь мѝ ᲂу҆миле́нїѧ, ᲂу҆тверди́въ се́рдце смире́нно, и҆ про́сто, и҆ кро́тко, некова́рно, сп҃се мо́й, бл҃гостїю твое́ю, ꙗ҆́кѡ бл҃гоꙋтро́бенъ.
И҆́ны стїхи̑ры ст҃о́мꙋ и҆ вели́комꙋ і҆ѡа́ннꙋ прⷣте́чи. Гла́съ д҃.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
И҆мѣ́ѧй ко гдⷭ҇ꙋ дерзнове́нїе, рожде́нныхъ жена́ми всѣ́хъ прⷣте́че превосходѧ́й, того̀ молѝ непреста́ннѡ ѡ҆ вѣ́рою молѧ́щихсѧ тѝ, ѡ҆браще́нїе на́мъ да́ти, и҆ винꙋ̀ покаѧ́нїѧ: ꙗ҆́кѡ да тѧ̀ воспѣва́емъ сп҃са́еми всегда̀.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Нарече́нъ бы́лъ є҆сѝ прⷪ҇ро́къ ѿ ложе́снъ, и҆ ѿ ᲂу҆тро́бы проповѣ́дникъ, прⷣте́че и҆ а҆пⷭ҇ле прише́ствїѧ гдⷭ҇нѧ: бѣсѡ́мъ ᲂу҆́бѡ пре́дана мѧ̀ сꙋ́ща, и҆ грѣхꙋ̀ раба̀ многодѣ́йственна, ѿ ѻ҆бои́хъ мѧ̀ и҆спра́ви, ꙗ҆́кѡ крѣ́пкїй во́инъ, да твоѐ ско́рое проповѣ́дꙋю застꙋпле́нїе.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Лопа́та сы́й дх҃а бж҃е́ственнагѡ, плевови̑дныѧ нра́вы развѣ́й ѿ се́рдца моегѡ̀, дѣѧ̑нїѧ бж҃е́ствєннаѧ ѿ менѐ собира́ѧ, ꙗ҆́кѡ пшени́цꙋ въ жи́тницꙋ бж҃їю, ꙗ҆́кѡ да пи́ща влⷣцѣ бл҃гопотре́бна бꙋ́дꙋ, тобо́ю хода́таемъ ѡ҆богаща́емь, хрⷭ҇то́въ крⷭ҇ти́телю бл҃же́нне.
Сла́ва, и҆ ны́нѣ, бг҃оро́диченъ: Сле́зы мѝ да́ждь ѿ се́рдца, и҆ воздыха́нїе и҆з̾ глꙋбины̀ ѻ҆трокови́це, и҆ дꙋшѝ сокрꙋше́нїе, и҆ и҆сповѣ́данїе, ꙗ҆̀же въ житїѝ содѣ̑ѧннаѧ мно́ю прегрѣшє́нїѧ: да твое́ю по́мощїю всечⷭ҇таѧ, въ покаѧ́нїи прейдꙋ̀ жи́знь мою̀, и҆ ᲂу҆лꙋчꙋ̀ ѡ҆слабле́нїе.
Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и въ ве́черъ се́й:
На стїхо́внѣ стїхи̑ры покаѧ́нны, гла́съ д҃:
Хотѣ́хъ слеза́ми ѡ҆мы́ти мои́хъ прегрѣше́нїй, гдⷭ҇и, рꙋкописа́нїе, и҆ про́чее живота̀ моегѡ̀, покаѧ́нїемъ бл҃гоꙋгоди́ти тебѣ̀: но вра́гъ льсти́тъ мѧ̀, и҆ бо́ретъ дꙋ́шꙋ мою̀. гдⷭ҇и, пре́жде да́же до конца̀ не поги́бнꙋ, сп҃си́ мѧ.
Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀, та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
Кто̀ ѡ҆бꙋрева́емь, и҆ притека́ѧ ко приста́нищꙋ семꙋ̀ не сп҃се́тсѧ; и҆лѝ кто̀ недꙋ́гꙋѧ, и҆ припа́даѧ ко врачевствꙋ̀ семꙋ̀, не ᲂу҆врачꙋ́етсѧ, содѣ́телю всѧ́ческихъ, и҆ врачꙋ̀ недꙋ́жныхъ; гдⷭ҇и, пре́жде да́же до конца̀ не поги́бнꙋ, сп҃си́ мѧ.
Сті́хъ: Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.
И҆́же ст҃ы́хъ мч҃нкъ прїе́мый терпѣ́нїе, и҆ ѿ на́съ прїимѝ пѣ́нїе чл҃вѣколю́бче: и҆ да́рꙋй на́мъ тѣ́хъ мл҃твами ве́лїю млⷭ҇ть.
Сла́ва, и҆ ны́нѣ, бг҃оро́диченъ: И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ вопїе́мъ тѝ: ра́дꙋйсѧ є҆ди́но предста́тельство дꙋ́шъ на́шихъ.
Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ.
Въ понедѣ́льникъ на повече́рїи,,
канѡ́нъ прест҃ѣ́й бцⷣѣ. Гла́съ д҃.
Пѣ́снь а҃
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Ꙗ҆́же є҆ди́на въ напа́стехъ и҆ ско́рбехъ защища́ющаѧ, под̾ кро́въ тво́й пречⷭ҇таѧ прибѣга́ющихъ те́плѣ, прїимѝ ꙗ҆́кѡ пребл҃га́ѧ, ꙗ҆́же ѿ се́рдца на́шегѡ молє́нїѧ.
Приста́нище невла́емое ѡ҆брѣто́хъ тѧ̀ ѻ҆каѧ́нный, напа̑стныѧ же и҆ нꙋ̑ждныѧ прило́ги ѿрѣва́ѧ, бл҃года́рное пою́ ти воспѣва́нїе, бг҃омꙋ́жнаѧ бг҃ороди́тельнице.
Сла́ва: Ми́лостивнымъ и҆ кро́ткимъ твои́мъ ѻ҆́комъ бг҃ороди́тельнице, зрѧ́щи мѧ̀ во ѡ҆бстоѧ́нїи и҆ ско́рби ѡ҆держи́ма, вско́рѣ свободѝ: тѧ́ бо призыва́ю на по́мощь.
И҆ ны́нѣ: Є҆́ѵа ѡ҆сꙋжде́нїѧ и҆зба́висѧ и҆ а҆да́мъ тобо́ю чⷭ҇таѧ, съ ни́миже и҆ а҆́зъ припа́даю тѝ: печа̑льныѧ мѝ сле́зы ны́нѣ на ра́дость преложѝ, и҆ ѿ напа́стей свободѝ.
Пѣ́снь г҃
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Ѻ҆рꙋ́жїе крѣ́пко, и҆ стѣ́нꙋ тѧ̀ стѧжа́въ а҆́зъ, побѣжда́ю сопроти́вныхъ полкѝ: и҆ пою̀ вели̑чїѧ твоѧ̑, бцⷣе неискꙋсобра́чнаѧ.
Пе́щь разорѧ́еши печа́лей, и҆ погаша́еши ѿча́ѧнїѧ зно́й: кто́ бо та́кѡ, ꙗ҆́коже ты̀ дв҃о бцⷣе, ᲂу҆пова́нїе на́ше;
Сла́ва: Внꙋшѝ во́пль раба̀ твоегѡ̀, твоеѧ̀ тре́бꙋющагѡ по́мощи бг҃ома́ти: ᲂу҆пова́нїе моѐ, ᲂу҆слы́ши мѧ̀, и҆ потщи́сѧ сп҃сти́ мѧ.
И҆ ны́нѣ: При́зри чⷭ҇таѧ, сп҃сти́ мѧ: нб҃о бж҃е́ственнымъ ма́нїемъ всѧ̑ содержа́щаго воплоти́ла є҆сѝ, бж҃їе сло́во, па́че сло́ва и҆ смы́сла.
Пѣ́снь д҃
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Побѣ́ждши враждꙋ́ющихъ мнѣ̀ всꙋ́е, ꙗ҆́кѡ дꙋ́шꙋ мою̀ тща́щихсѧ лю́тѣ прїѧ́ти, сохрани́ мѧ влⷣчце ненавѣ́тна, да ра́дꙋѧсѧ сла́влю тѧ̀.
И҆збавлѧ́ющи мѧ̀ ѿ ѧ҆зы́ка льстивоглаго́ливагѡ, ꙗ҆́кѡ бл҃га́ѧ предста́тельница, безпа́костна покажѝ ѿ жите́йскихъ дѣѧ́нїй: мно́гѡ бо мо́жеши, ꙗ҆́кѡ мт҃и зижди́телѧ сꙋ́щи.
Сла́ва: Безболѣ́зненꙋ вѣ́дый тѧ̀ цѣле́бницꙋ немощны́й, дх҃омъ и҆ ᲂу҆сты̀ зовꙋ̀: и҆сцѣли́ мѧ влⷣчце, поми́лꙋй и҆ сп҃си́ мѧ, къ тебѣ́ бо прибѣга́ю ра́бъ тво́й.
И҆ ны́нѣ: Ꙗ҆́кѡ похвалꙋ̀ а҆́гг҃лѡвъ и҆ человѣ́кѡвъ тѧ̀ воспѣва́емъ всѝ дв҃о мр҃і́е, и҆ вѣ́рнѡ мо́лимсѧ: моли́сѧ влⷣчце, ѿ всѧ́кїѧ ско́рби и҆зба́витисѧ на́мъ.
Пѣ́снь є҃
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
И҆спра́ви чⷭ҇таѧ, мл҃твꙋ раба̀ твоегѡ̀ ко гдⷭ҇ꙋ сн҃ꙋ твоемꙋ̀: да ѡ҆брѧ́щꙋ разрѣше́нїе мно́гихъ прегрѣше́нїй.
И҆зба́ви мѧ̀ страсте́й и҆ бѣ́дъ бг҃оневѣ́сто: тѧ́ бо положѝ бг҃ъ къ немꙋ̀ хода́таицꙋ ѡ҆ мое́мъ смире́нїи.
Сла́ва: Покрови́тельница мнѣ̀ ты̀ є҆сѝ и҆ непреста́нное хвале́нїе, ѽ влⷣчце бцⷣе, не пре́зриши бо ника́коже ѡ҆держи́магѡ въ печа́лехъ.
И҆ ны́нѣ: Ны́нѣ и҆спросѝ на́мъ прегрѣше́нїй ѡ҆ставле́нїе, и҆ и҆зба́ви ѿ напа́стей, и҆ страсте́й нечи́стыхъ, мл҃твами твои́ми препѣ́таѧ.
Пѣ́снь ѕ҃
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Крѣ́пость моѧ̀ сама̀ є҆сѝ пречⷭ҇таѧ влⷣчце, во ѡ҆брѣ́тшихъ мѧ̀ ѕѣлѡ̀ ненача́ѧнныхъ ско́рбехъ, и҆ вопїю́ ти: ꙗ҆́кѡ ве́лїѧ є҆сѝ помо́щница рабꙋ̀ твоемꙋ̀.
И҆сцѣлѝ дꙋшє́вныѧ моѧ̑ ꙗ҆́звы влⷣчце, застꙋпи́ мѧ дв҃о, и҆ и҆зба́ви раба̀ твоего̀ ѿ ѡ҆клевета́нїѧ, навѣ́та же и҆ развраще́нїѧ непра́ведна.
Сла́ва: Сокрꙋшѝ навѣ́тники непра́вєдныѧ, и҆̀же на мѧ̀, при́снѡ прибѣга́ющаго къ тебѣ̀ чⷭ҇таѧ, и҆ не ѡ҆ста́ви менѐ поги́бнꙋти, ꙗ҆́кѡ всѧ̑ тебѣ̀ возмѡ́жна, бг҃оѻтрокови́це.
И҆ ны́нѣ: Оу҆спѝ дꙋшѝ моеѧ̀ свирѣ́пꙋю во́лнꙋ, ꙗ҆́кѡ мно́жество прегрѣше́нїй, и҆скꙋшє́нїѧ и҆ печа̑ли воста́ша на мѧ̀: но сама́ мѧ влⷣчце сп҃сѝ.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ д҃:
Въ кро́въ тво́й дв҃о, всѝ прибѣга́юще вопїе́мъ тѝ: мольбꙋ̀ прїимѝ ѿ на́съ, и҆ не преста́й молѧ́щисѧ чл҃вѣколю́бцꙋ, сп҃сти́сѧ рабѡ́мъ твои̑мъ.
Пѣ́снь з҃
І҆рмо́съ: Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
Є҆́же ѿ а҆га́рѧнъ наси́лованїе ско́рѡ потре́бльши мече́мъ мл҃твъ твои́хъ мр҃і́е, лю́ди и҆ ста́до твоѐ сохранѝ, сн҃ꙋ твоемꙋ̀ зовꙋ́щее: бж҃е ѻ҆тє́цъ на́шихъ бл҃гослове́нъ є҆сѝ.
Равнолѣ́пнаѧ ски́нїе, прїими́ мѧ къ тебѣ̀ прибѣга́ющаго, да не прїи́метъ мѧ̀ вра́гъ погꙋби́ти и҆згонѧ́ѧ, пою́ща сн҃ꙋ твоемꙋ̀ бг҃ома́ти: ѻ҆тє́цъ на́шихъ бж҃е бл҃гослове́нъ є҆сѝ.
Сла́ва: Бг҃ороди́тельнице мр҃і́е, предварѝ раба̀ твоего̀ вско́рѣ, въ треволне́нїихъ напа́стей потоплѧ́емаго, и҆ не и҆мꙋ́ща по́мощи. къ тебѣ́ бо зовꙋ̀: ᲂу҆пова́нїе моѐ бцⷣе, поми́лꙋй мѧ̀.
И҆ ны́нѣ: Человѣ́чєскїѧ напа̑сти, ꙗ҆́кѡ грѣхѡ́мъ вино́вны, ны́нѣ бцⷣе бл҃га́ѧ, разорѝ бж҃е́ственными мл҃твами твои́ми, и҆ рабы̑ твоѧ̑ и҆зба́ви болѣ́зненныхъ прегрѣше́нїй и҆ всѧ́кїѧ напа́сти.
Пѣ́снь и҃
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Воста̀ на ны̀ ꙗ҆зы́къ беззако́ненъ, хвалѧ́сѧ погꙋби́ти слꙋжи́тели твоѧ̑, є҆го́же потре́бльши пречⷭ҇таѧ, зовꙋ́щыѧ покры́й: всѧ̑ дѣла̀ бл҃гослови́те гдⷭ҇нѧ гдⷭ҇а.
Мнѡ́гїѧ твоѧ̑ щедрѡ́ты є҆ди́на бг҃омт҃и, на́съ ми́лостивнѡ сп҃са́ютъ ѿ грѣхо́внагѡ сꙋда̀ и҆ разли́чныхъ напа́стей: ты́ бо ро́ждши бг҃а, и҆ ми́лꙋеши мі́ръ є҆гѡ̀.
Сла́ва: На моле́нїе моѐ ны́нѣ ᲂу҆милосе́рдисѧ, и҆ ра́дость мѝ въ печа́ли мѣ́сто да́рꙋй, да пою́ тѧ влⷣчце, и҆ вопїю̀ сн҃ꙋ твоемꙋ̀: всѧ̑ дѣла̀ бл҃гослови́те гдⷭ҇нѧ гдⷭ҇а.
И҆ ны́нѣ: Ꙗ҆́кѡ ты̀ мнѣ̀ є҆сѝ крѣ́пость и҆ помо́щница, не ᲂу҆бою́сѧ врагѡ́въ негодова́нїѧ, но воспѣва́ю тѧ̀ влⷣчце, и҆ вопїю̀ сн҃ꙋ твоемꙋ̀: всѧ̑ дѣла̀ бл҃гослови́те гдⷭ҇нѧ гдⷭ҇а.
Пѣ́снь ѳ҃
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Ѻ҆рꙋ́жїе ᲂу҆́бѡ на ны̀ ѡ҆бостри́въ, совѣщава́етъ льсти́вый а҆ра́влѧнинъ беззако́нный: ты́ же дв҃о бцⷣе, си́лою крⷭ҇та̀ сн҃а твоегѡ̀, и҆ мл҃твъ твои́хъ, воѡрꙋжа́еши на него̀ рабы̑ твоѧ̑: тѣ́мже проповѣ́даемъ сла́вꙋ твою̀.
Крѣ́пость ᲂу҆́бѡ ты̀ мнѣ̀ на врагѝ даде́сѧ, и҆ и҆збавле́нїе въ напа́стехъ: что́ же тѝ а҆́зъ принесꙋ̀ чⷭ҇таѧ; не довѣ́мъ. ѻ҆ба́че, є҆́же и҆́мамъ, бл҃годаре́нїе приношꙋ́ ти влⷣчце: прїимѝ сїѐ ѿ раба̀ твоегѡ̀, и҆ сп҃си́ мѧ.
Сла́ва: Ѽ мт҃и всѧ́ческихъ творца̀! ѽ всечⷭ҇таѧ, скорбѧ́щихъ ᲂу҆тѣ́хо, потоплѧ́емыхъ предста́тельнице, и҆ побѣждае́мыхъ застꙋ́пнице, до живота̀ моегѡ̀ ты́ мѧ сохранѝ.
И҆ ны́нѣ: Оу҆тѣснѧ́емь грѣхѝ мно́гими препѣ́таѧ, и҆ напа́стьми лю́тыми, ны́нѣ тебѣ̀ хвале́нїѧ же́ртвꙋ приношꙋ̀, и҆ прилѣ́жнѡ взыва́ю тѝ: ст҃а́ѧ бцⷣе, помози́ ми, тебе́ бо сла́вѧ, пѣ́снь скончава́ю.
Та́же, Досто́йно є҆́сть: Трист҃о́е. По Ѻ҆́ч҃е на́шъ: тропарѝ, и҆ про́чее ѻ҆бы́чно, и҆ ѿпꙋ́стъ.
Во вто́рникъ ᲂу҆́тра,
по а҃-мъ стїхосло́вїи сѣда́льны покаѧ́нны. Гла́съ д҃:
Смире́ннꙋю мою̀ дꙋ́шꙋ посѣтѝ гдⷭ҇и, во грѣсѣ́хъ житїѐ всѐ и҆жди́вшꙋю: ꙗ҆́коже блꙋдни́цꙋ прїимѝ и҆ менѐ, и҆ сп҃си́ мѧ.
Сті́хъ: Гдⷭ҇и да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Препла́ваѧ пꙋчи́нꙋ настоѧ́щагѡ житїѧ̀, помышлѧ́ю бе́зднꙋ мно́гихъ мои́хъ ѕѡ́лъ, и҆ не и҆мѣ́ѧ ко́рмчїѧ помышле́нїй, петро́въ провѣщава́ю тѝ гла́съ: сп҃си́ мѧ хрⷭ҇тѐ бж҃е, сп҃си́ мѧ, ꙗ҆́кѡ чл҃вѣколю́бецъ.
Сла́ва, и҆ ны́нѣ: бг҃оро́диченъ: Ꙗ҆́коже сꙋ́щаѧ вои́стиннꙋ бцⷣа, молѧ́щисѧ ꙗ҆́кѡ мт҃и со дерзнове́нїемъ сн҃ꙋ твоемꙋ̀ и҆ бг҃ꙋ на́шемꙋ, сохранѧ́й гра́дъ и҆зрѧ́днѡ къ покро́вꙋ твоемꙋ̀ притека́ющїй, ѡ҆ тебѣ̀ держа́вꙋ и҆мꙋ́щїй, и҆ къ тебѣ̀ прибѣга́ющїй, приста́нищꙋ и҆ стѣнѣ̀, є҆ди́нѣй предста́тельницѣ ро́да человѣ́ческагѡ.
По в҃-мъ стїхосло́вїи, сѣда́ленъ, гла́съ д҃:
Мгло́ю страсте́й и҆ жите́йскими сластьмѝ, помрача́емь ᲂу҆́мъ ѻ҆каѧ́нныѧ моеѧ̀ дꙋшѝ, къ по́мыслꙋ ᲂу҆миле́нїѧ не прихо́дитъ: но ᲂу҆ще́дри сп҃се и҆ менѐ ѻ҆каѧ́ннаго, и҆ да́ждь мѝ по́мыслъ ᲂу҆миле́нїѧ, да и҆ а҆́зъ пре́жде конца̀ вопїю̀ бл҃гоꙋтро́бїю твоемꙋ̀ гдⷭ҇и: хрⷭ҇тѐ сп҃се мо́й, ѿча́ѧннаго сп҃си́ мѧ и҆ недосто́йнаго.
Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Ско́рѡ совни́демъ въ невѣ́стникъ хрⷭ҇то́въ, да всѝ ᲂу҆слы́шимъ бл҃же́нный гла́съ хрⷭ҇та̀ бг҃а на́шегѡ: прїиди́те лю́бѧщїи нбⷭ҇нꙋю сла́вꙋ, соприча̑стницы бы́вше мꙋ̑дрымъ дѣ́вамъ, просвѣти́вше свѣщы̀ на́шѧ вѣ́рою.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Крⷭ҇то́мъ воѡрꙋже́ни стрⷭ҇тоно́сцы твоѝ хрⷭ҇тѐ бж҃е на́шъ, побѣди́ша кознѡва́нїѧ началоѕло́бнагѡ врага̀, и҆ возсїѧ́ша ꙗ҆́кѡ свѣти̑ла земны́хъ наставлѧ́юще, и҆ подаю́тъ и҆сцѣлє́нїѧ вѣ́рою просѧ́щымъ: тѣ́хъ мл҃твами сп҃сѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Сло́во ѻ҆́ч҃ее хрⷭ҇та̀ бг҃а на́шего, и҆з̾ тебѐ воплоти́вшагосѧ, позна́хомъ бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ: тѣ́мъ непреста́ннѡ тѧ̀ воспѣва́юще велича́емъ.
По г҃-мъ стїхосло́вїи, сѣда́ленъ гла́съ д҃.
Дꙋшѐ, пока́йсѧ пре́жде и҆схо́да твоегѡ̀, сꙋ́дъ неꙋмы́тный согрѣша́ющымъ є҆́сть и҆ непостоѧ́ненъ, возопі́й ко гдⷭ҇ꙋ ᲂу҆миле́нїемъ се́рдца: согрѣши́хъ въ ра́зꙋмѣ и҆ невѣ́дѣнїи ще́дре, мл҃твами крⷭ҇ти́телѧ твоегѡ̀, ᲂу҆ще́дри и҆ сп҃си́ мѧ.
Го́рлица пꙋстыннолю́бнаѧ, сщ҃е́нный крⷭ҇ти́тель, проповѣ́давый покаѧ́нїе, и҆ показа́вый хрⷭ҇та̀ бы́вша чл҃вѣ́ка, всѣ̑мъ согрѣша́ющымъ бы́сть предста́тель, и҆ всѣ̑мъ ѡ҆бꙋрева́ємымъ помо́щникъ быва́ѧ при́сный: тогѡ̀ мл҃твами хрⷭ҇тѐ, сп҃сѝ мі́ръ тво́й.
Сла́ва, и҆ ны́нѣ, бг҃оро́диченъ: Ѡ҆бнови́ла є҆сѝ чⷭ҇таѧ, бж҃е́ственнымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ: тѣ́мже тѧ̀ по до́лгꙋ бл҃жи́мъ всѝ дв҃о препросла́вленнаѧ, ꙗ҆́коже прорекла̀ є҆сѝ.
Канѡ́нъ покаѧ́ненъ, ко гдⷭ҇ꙋ на́шемꙋ і҆и҃сꙋ хрⷭ҇тꙋ̀ и҆ ст҃ы̑мъ є҆гѡ̀ мч҃нкѡмъ, [є҆гѡ́же краегране́сїе сицево̀: Чисто́тными мѧ̀ слеза́ми ѡ҆мы́й сло́ве.] Творе́нїе і҆ѡ́сифово. Гла́съ д҃.
Пѣ́снь а҃
І҆рмо́съ: Порази́вый є҆гѵ́пта, и҆ фараѡ́на мꙋчи́телѧ погрꙋзи́вый въ мо́ри, лю́ди сп҃слъ є҆сѝ и҆з̾ рабо́ты, мѡѷсе́йски пою́щыѧ пѣ́снь побѣ́днꙋю: ꙗ҆́кѡ просла́висѧ.
Сокрове́ннѡ дѣ́ющагѡ дѣла̀ тьмы̀, гдⷭ҇и да не ꙗ҆́вѣ ѡ҆бличи́ши, ни посрами́ши пред̾ всѣ́ми: но свѣ́томъ просвѣтѝ и҆́скреннѧгѡ покаѧ́нїѧ сп҃се, и҆ сп҃си́ мѧ.
Грѣхѝ всегда̀ на грѣхѝ влⷣко, совокꙋплѧ́ю блꙋ́дный, и҆ не чꙋ́вствꙋю стра́ха твоегѡ̀ никогда́же гдⷭ҇и: тѣ́мже пре́жде конца̀ сп҃сѝ и҆ ᲂу҆ще́дри мѧ̀.
Мч҃нченъ: Щито́мъ бл҃гоче́стїѧ покрыва́еми ст҃і́и, держа́ще ꙗ҆́кѡ ме́чь крⷭ҇тное ѻ҆рꙋ́жїе, къ боре́нїю врага̀ сла́внїи и҆зыдо́сте, и҆ того̀ низложи́сте.
Мч҃нченъ: Кровопі́ицъ львѡ́въ, и҆ меча̀ сѣкꙋ́щагѡ, и҆ варе́нїѧ коно́бнагѡ, строга́нїѧ ногте́й, терза́нїѧ же и҆ болѣ́зненнагѡ мꙋче́нїѧ, мч҃нцы бж҃е́ственнїи не ᲂу҆боѧ́шасѧ.
Бг҃оро́диченъ: Ковче́гъ бж҃е́ственнымъ дх҃омъ позлаще́нный, пречⷭ҇таѧ, показа́сѧ: не скрижа̑ли носѧ́щъ зако́на, но хрⷭ҇та̀ гдⷭ҇а, є҆го́же зако́нъ и҆ прⷪ҇ро́цы дре́вле предвозвѣсти́ша.
Дрꙋгі́й канѡ́нъ ст҃о́мꙋ и҆ чⷭ҇тно́мꙋ і҆ѡа́ннꙋ прⷣте́чи, [є҆гѡ́же краегране́сїе сицево̀: Пѣ́снь мл҃твеннꙋю плетꙋ̀ тебѣ̀, бл҃же́нне, любо́вїю.] Творе́нїе і҆ѡ́сифово. Гла́съ д҃.
Пѣ́снь а҃
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ: да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ, побѣ́дное воспою̀ пѣ́нїе.
Ꙗ҆́кѡ вели́каѧ ѕвѣзда̀ сл҃нцꙋ предтекі́й, просвѣти́лъ є҆сѝ зе́млю свѣ́тлостьми твои́ми крⷭ҇ти́телю. тѣ́мже зовꙋ́ ти: просвѣтѝ моѐ се́рдце, ѡ҆слѣпле́нное ѿ безчи́сленныхъ прегрѣше́нїй лю́тыми ѡ҆мраче́нїи.
Разрѣши́вый и҆ногда̀ бл҃же́нне, въ рожде́нїи непло́дствїѧ ᲂу҆́зы, тѣ́мже тѧ̀ молю̀, безпло́дствїемъ запꙋстѣ́вшꙋю дꙋ́шꙋ мою̀ страсте́й, покажѝ мл҃твами твои́ми плоди́тельнꙋ, добродѣ́телей бл҃гоча́дїе приносѧ́щꙋю.
Оу҆гото́валъ є҆сѝ пꙋти̑ и҆зба́вителю, предходѧ́й въ си́лѣ и҆лїинѣ̀, присносла́вне крⷭ҇ти́телю: къ немꙋ́же моеѧ̀ дꙋшѝ движе́нїе и҆спра́ви, собла́зны всѧ̑кїѧ, и҆ пла́мень страсте́й и҆з̾има́ѧ мл҃твами твои́ми.
Бг҃оро́диченъ: Ѻ҆́блаче свѣ́тлый, дꙋшѝ моеѧ̀ ѻ҆́блаки тє́мныѧ и҆ лю̑тыѧ твои́ми свѣ́тлыми хода́тайствы разорѝ: ꙗ҆́кѡ да ви́жꙋ зарю̀ и҆з̾ тебѐ возсїѧ́вшагѡ, и҆ свѣ́томъ свѣ́тъ прїимꙋ̀ незаходи́мый.
Пѣ́снь г҃
І҆рмо́съ: Оу҆твержда́ѧй гро́мъ, и҆ созида́ѧй дꙋ́хъ, ᲂу҆твердѝ менѐ гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть ст҃ъ, ꙗ҆́кѡ ты̀ бж҃е на́шъ.
И҆́же слѣпцє́въ ѻ҆́чи просвѣти́вый, хрⷭ҇тѐ, ѻ҆́чи моѝ просвѣтѝ ѡ҆мраче́ннїи сластьмѝ, и҆ жите́йскими печа́льми, и҆ ника́коже къ сꙋдьба́мъ твои̑мъ взира́ющїи.
Сѐ вре́мѧ, возни́кни дꙋшѐ моѧ̀, ѿ ѕѡ́лъ, ꙗ҆̀же содѣ́ѧла є҆сѝ, и҆ влⷣцѣ и҆зба́вителю возопі́й со стра́хомъ: покаѧ́нїѧ хрⷭ҇тѐ, двє́ри ѿве́рзи мѝ.
Мч҃нченъ: Ѿгна́нъ ꙗ҆ви́сѧ велїа́ръ бж҃е́ственными по́двиги стрⷭ҇тоте́рпєцъ, и҆ ѿ ни́хъ попира́емь зри́тсѧ ме́ртвъ и҆ недѣ́йственъ, и҆́же дре́вле хвалѧ́йсѧ.
Мч҃нченъ: Мꙋ́ченически тече́нїе соверши́вше ст҃ы́хъ сосло́вїе, и҆ тьмы̑ мы́сленныхъ мꙋ́рїнѡвъ, бж҃е́ственною си́лою ꙗ҆́кѡ вои́стиннꙋ посѣчѐ, и҆ сла́вꙋ полꙋчѝ.
Бг҃оро́диченъ: Пра́ѻтцємъ разрѣ́шила є҆сѝ печа́ль, ра́дость на́мъ ро́ждши жизнода́вца, и҆ и҆зба́вителѧ прест҃а́ѧ бцⷣе: є҆го́же прилѣ́жнѡ молѝ, сп҃стѝ дꙋ́шы на́шѧ.
И҆́нъ
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Всѧ́кꙋ добродѣ́тель и҆спо́лнилъ є҆сѝ, всѧ́кꙋ же ѕло́бꙋ ѿ се́рдца возненави́дѣлъ є҆сѝ, и҆ стезю̀ покаѧ́нїѧ человѣ́кѡмъ бл҃же́нне, показа́лъ є҆сѝ.
Сло́ва вопло́щшагѡсѧ прⷣте́ча вели́кїй показа́лсѧ є҆сѝ. сегѡ̀ ра́ди молю́сѧ тѝ: безслове́сныхъ мѧ̀ страсте́й и҆зба́ви, наставлѧ́ѧ мѧ̀ къ безстра́стїю.
Є҆щѐ жи́тельствꙋѧ въ тѣлесѝ, житїѐ безпло́тныхъ показа́лъ є҆сѝ прⷣте́че: є҆мꙋ́же ᲂу҆подо́битисѧ мл҃твами твои́ми бг҃оно́се, и҆ на́съ ᲂу҆крѣпѝ, мо́лимсѧ.
Бг҃оро́диченъ: Мі́ръ тобо́ю поми́ловасѧ, и҆́же престꙋпле́нїемъ непотре́бенъ бы́сть, мт҃и дв҃о: сегѡ̀ ра́ди въ пѣ́нїихъ пѣ́сненныхъ по до́лгꙋ тѧ̀ ᲂу҆бл҃жа́етъ.
Пѣ́снь д҃
І҆рмо́съ: Оу҆слы́шахъ бж҃е слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.
Ѡ҆бнаже́нъ бы́хъ добродѣ́телей, и҆ ѕло́бою ѡ҆блеко́хсѧ, и҆ сѐ стꙋда̀ и҆спо́лнихсѧ, і҆и҃се чл҃вѣколю́бче: ѻ҆де́ждами мѧ̀ бж҃е́ственными просвѣтѝ.
Препла́ваѧ мїрска́гѡ мо́рѧ сло́ве, во́дꙋ, лѣ́ностїю въ бѣдꙋ̀ и҆стопле́нїѧ впадо́хсѧ сласте́й тѣле́сныхъ: къ покаѧ́нїѧ приста́нищꙋ напра́ви мѧ̀.
Мч҃нченъ: Ѡ҆чи́стивше вои́стиннꙋ гно́й ве́сь грѣха̀ терпѣ́нїѧ бж҃е́ственною си́лою до́блїи мч҃нцы, сп҃се́нїе всѣ̑мъ пода́ша.
Мч҃нченъ: Валѧ́еми по землѝ ꙗ҆́коже ка́менїе стрⷭ҇тоте́рпцы, пре́лєсти твє́рдыѧ до конца̀ низверго́ша, и҆ къ вы́шнемꙋ гра́дꙋ доспѣ́ша: тѣ́хъ мл҃твами гдⷭ҇и сп҃сѝ на́съ.
Бг҃оро́диченъ: Сп҃се́нїе тѧ̀ на всѧ́кое вре́мѧ и҆ мѣ́сто призыва́ю: не пре́зри менѐ всенепоро́чнаѧ, ꙗ҆́же бг҃а ро́ждшаѧ, и҆зба́вителѧ вкꙋ́пѣ и҆ сп҃са моего̀.
И҆́нъ
І҆рмо́съ: Любвѐ ра́ди ще́дре, твоегѡ̀ ѡ҆́браза, на крⷭ҇тѣ̀ твое́мъ ста́лъ є҆сѝ и҆ раста́ѧшасѧ ꙗ҆зы́цы: ты́ бо є҆сѝ чл҃вѣколю́бче, крѣ́пость моѧ̀ и҆ хвале́нїе.
Ꙗ҆́кѡ го́рлицꙋ тѧ̀, ве́снꙋ и҆́стиннꙋю, всеи́стинными словесы̀ предвозвѣща́ющꙋю мі́рови, разꙋмѣ́вше, ᲂу҆бл҃жа́емъ при́снѡ, сла́вне прⷣте́че.
Сокрꙋше́нна мѧ̀ льсти́вагѡ сокрꙋше́ньми, ве́тхомꙋ и҆ но́вомꙋ ꙗ҆́кѡ сы́й хода́тай, всего̀ ѡ҆бновѝ мл҃твами твои́ми прⷣте́че.
И҆́же въ пꙋсты́ню всели́выйсѧ непоро́чнымъ житїе́мъ, ѡ҆пꙋстѣ́вшїй всѧ́кими престꙋпле́ньми ᲂу҆́мъ мо́й, бж҃е́ственными мл҃твами твои́ми ѡ҆бновѝ прⷣте́че.
Бг҃оро́диченъ: Ѡ҆чище́нїе на́мъ и҆ и҆збавле́нїе позна́сѧ тво́й сн҃ъ дв҃о: є҆го́же молѝ сп҃стѝ дꙋ́шы во ᲂу҆миле́нїи тѧ̀ бл҃жа́щихъ.
Пѣ́снь є҃
І҆рмо́съ: Возсїѧ́й мѝ гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ, и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю цр҃ю̀ ми́ра.
Оу҆ны́нїемъ преходѧ́щаго житїѐ тлѣ́ющее, и҆ пре́лестьми мѧ̀ ѡ҆мрача́ема ѿ преле́стника по всѧ̑ дни̑, і҆и҃се ᲂу҆ще́дри, и҆ къ свѣ́тꙋ покаѧ́нїѧ наста́ви и҆ жи́зни.
Вознесе́сѧ се́рдце моѐ прило́гми ѕмі́а, и҆ низпаде́сѧ паде́нїемъ ве́лїимъ: и҆́же низве́ржєннымъ і҆и҃се, и҆справле́нїе, возста́ви и҆ сп҃си́ мѧ, мно́гихъ твои́хъ ра́ди щедро́тъ.
Мч҃нченъ: Ка́плѧми крове́й ᲂу҆гаси́сте многобо́жїѧ пре́лести пе́щь, бг҃облаже́ннїи, и҆ тꙋ́чами и҆сцѣле́нїй пла́мень ᲂу҆тиши́сте страсте́й всегда̀, сп҃сѡвы страда́льцы.
Мч҃нченъ: Стоѧ́ще пред̾ сꙋди́щемъ, и҆ ногтьмѝ стрꙋ́жеми, и҆ во главы̑ ᲂу҆сѣка́еми мч҃нцы, и҆ мно́жествꙋ примѣша́ющесѧ лю́тыхъ мꙋ́къ, непрекло́нни пребы́сте манове́нїемъ бж҃е́ственнымъ.
Бг҃оро́диченъ: Возсїѧ́й мѝ влⷣчце, зарю̀ млⷭ҇ти твоеѧ̀, и҆́же во мра́цѣ прегрѣше́нїй мои́хъ сꙋ́щꙋ дв҃о: и҆ къ свѣ́тꙋ покаѧ́нїѧ наста́ви мѧ̀ пречⷭ҇таѧ, да вѣ́рою тѧ̀ пою̀.
И҆́нъ
І҆рмо́съ: Просвѣще́нїе твоѐ гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣшѝ ны̀ бл҃же, тво́й ми́ръ да́рꙋѧй.
Пꙋсты́нными мѧ̀ ᲂу҆́гльми, страсте́й нахожде́ньми распала́ема, пꙋсты́нное воспита́нїе, росо́ю твои́хъ мл҃твъ, си́хъ вре́да соблюдѝ неврежде́нна.
Ѿ твоеѧ̀ всебл҃же́нне, ст҃ы́ѧ десни́цы креща́етсѧ ѻ҆ц҃а̀ бж҃е́ственнаѧ десни́ца, сп҃са́ющаѧ на́съ ѿ рꙋкѝ льсти́вагѡ, сщ҃е́нными хода́тайствы твои́ми.
Прибѣ́жище тѧ̀ прⷣте́че, и҆ покро́въ держа́венъ, и҆ вели́кꙋю стѣ́нꙋ ве́сь мі́ръ и҆́мать: и҆зба́ви на́съ твои́ми мл҃твами ѿ всѧ́кїѧ тѣсноты̀.
Бг҃оро́диченъ: Добро́тꙋ тѧ̀ і҆а́кѡвлю возлюбѝ бг҃ъ, дв҃о ѻ҆трокови́це, ᲂу҆краша́ющъ всѧ̑ тобо́ю, ѡ҆мрачи́вшыѧсѧ престꙋпле́нїемъ пе́рвѣе.
Пѣ́снь ѕ҃
І҆рмо́съ: Пꙋчи́ною жите́йскою дѣѧ́ньми мои́ми снидо́хъ во а҆́дъ, но ꙗ҆́кѡ ѿ ки́та і҆ѡ́на, та́кѡ вопїю̀: и҆з̾ глꙋбины̀ ѕѡ́лъ возведѝ, молю́сѧ, сн҃е бж҃їй и҆ сло́ве.
Дрема́нїемъ небреже́нїѧ ѡ҆тѧготи́хъ, ѻ҆каѧ́нный, дꙋ́шꙋ, и҆ грѣха̀ сно́мъ низложи́хсѧ: къ свѣ́тꙋ покаѧ́нїѧ воздви́гни мѧ̀ гдⷭ҇и, и҆ твои́мъ млⷭ҇рдїемъ сп҃си́ мѧ.
Ка́кѡ падо́хъ ѻ҆каѧ́нный; ка́кѡ ᲂу҆дали́хсѧ бг҃а пребл҃га́гѡ; ка́кѡ не внемлю̀ въ чꙋ́вствїи стра́шное сꙋди́ще ѻ҆́но, на не́мже и҆́мамъ сꙋди́тисѧ; тво́рче мо́й, ᲂу҆ще́дри мѧ̀.
Мч҃нченъ: Цѣвни́ца ꙗ҆ви́стесѧ, вои́стиннꙋ возглаша́ющаѧ пѣ́нїе сп҃си́тельное при́снѡ, и҆ наслажда́ющаѧ вѣ́рныхъ сердца̀, и҆ пїѧ́нство пре́лести до конца̀ ѡ҆гонѧ́ющаѧ, страда́льцы пресвѣ́тлїи.
Мч҃нченъ: Превозше́дше предѣ́лы человѣ́чєскїѧ мч҃нцы хрⷭ҇тѡ́вы къ зижди́телю возникнове́нїемъ бж҃е́ственнымъ, мꙋче́нїѧ болѣ́зни претерпѣ́сте ра́дꙋющесѧ, ꙗ҆́кѡ въ тѣлесѣ́хъ чꙋжди́хъ.
Бг҃оро́диченъ: Всест҃а́ѧ дв҃о, предста́тельнице и҆ покро́ве всѣ́хъ вѣ́рныхъ, предста́ни и҆ и҆зба́ви мѧ̀ преще́нїѧ бꙋ́дꙋщагѡ, и҆ стра́шнагѡ сꙋди́ща въ ча́съ сꙋ́дный, да вѣ́рою при́снѡ пою̀ тѧ̀.
И҆́нъ
І҆рмо́съ: Прїидо́хъ во глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й многомлⷭ҇тиве.
Стоѧ́ше креща́ѧ въ быстрина́хъ влⷣкꙋ, грѣхѝ всѣ́хъ человѣ́кѡвъ взе́млющаго: є҆го́же моли́ти не преста́й прⷣте́че, ᲂу҆ще́дрити дꙋ́шы на́шѧ.
Проповѣ́дникъ показа́лсѧ є҆сѝ покаѧ́нїѧ, въ не́мже соблюдѝ прⷣте́че моѐ се́рдце, ѡ҆скверне́нное вре́дными грѣхѝ, и҆ возникнове́нїѧ не и҆мꙋ́щее.
Возгласи́лъ є҆сѝ бл҃же́нне, дꙋша́мъ въ пꙋсты́нѧхъ непроходи́мыхъ, сло́ва прише́ствїе хотѧ́щее бы́ти: тѣ́мже гла́сы немо́лчными всѧ́каѧ цр҃ковь бл҃жи́тъ тѧ̀.
Бг҃оро́диченъ: Зако́на и҆з̾ѧсни́шасѧ ѡ҆́бразы, твои́мъ стра́шнымъ ржⷭ҇тво́мъ бг҃оневѣ́сто: и҆́хже сбытїѐ мы̀ ны́нѣ зрѧ́ще влⷣчце, по достоѧ́нїю тѧ̀ чти́мъ.
Пѣ́снь з҃
І҆рмо́съ: Ѡ҆́бразꙋ злато́мꙋ не поклони́вшесѧ ѻ҆́троцы а҆враа́мстїи, и҆скꙋша́хꙋсѧ ꙗ҆́кѡ зла́то въ горни́лѣ въ пещѝ ѻ҆́гненнѣй, ꙗ҆́кѡ въ черто́зѣ свѣ́тлѣмъ ликова́хꙋ, пою́ще: бл҃гослове́нъ є҆сѝ бж҃е ѻ҆тє́цъ на́шихъ.
Ю҆́но ѻ҆троча̀ ꙗ҆ви́лсѧ є҆сѝ хрⷭ҇тѐ, ве́тхагѡ ѡ҆сꙋжде́нїѧ и҆зба́вити хотѧ̀ мі́ръ, ꙗ҆́кѡ бл҃гоꙋтро́бенъ. тѣ́мже вопїю́ ти, ѡ҆бетша́вшаго мѧ̀ грѣхѝ мно́гими ны́нѣ ѡ҆бновѝ ще́дре, и҆ сп҃си́ мѧ пою́ща: бл҃гослове́нъ бг҃ъ ѻ҆тє́цъ на́шихъ.
И҆́же и҆ногда̀ манассі́ю пока́ѧвшасѧ сп҃сы́й, и҆ ᲂу҆ще́дривый блꙋдни́цꙋ прослези́вшꙋюсѧ, и҆ разбо́йника сло́вомъ ѡ҆правда́вый, мнѡ́гаѧ и҆ лю̑таѧ согрѣши́вшаго тѝ, и҆ менѐ сп҃се прїимѝ вопїю́ща: бл҃гослове́нъ бг҃ъ ѻ҆тє́цъ на́шихъ.
Мч҃нченъ: Бꙋ́ри лю́тѣй многобо́жїѧ ѡ҆бдержа́щей вселе́ннꙋю, кора́бль сотво́рше бл҃гоче́стїѧ стрⷭ҇тоте́рпцы: ѡ҆кормле́нїемъ же хрⷭ҇то́вымъ, ко приста́нищꙋ жи́зни доплы́вше вопїе́те: бл҃гослове́нъ бг҃ъ ѻ҆тє́цъ на́шихъ.
Мч҃нченъ: Просвѣще́ни бы́вше ꙗ҆́вѣ, ꙗ҆́коже зла́то въ горни́лѣ, мꙋ́ками и҆скꙋша́еми страда́льцы, и҆ показа́вшесѧ запеча̑танїѧ честна̑ѧ стрⷭ҇те́й хрⷭ҇то́выхъ, въ сокро́вищахъ нбⷭ҇ныхъ, во ᲂу҆твержде́нїи мно́зѣ сокрове́ни бы́ша ны́нѣ.
Бг҃оро́диченъ: Сп҃са и҆ бг҃а, и҆ и҆зба́вителѧ и҆ влⷣкꙋ, пло́тїю ро́ждши пречⷭ҇таѧ влⷣчце, томꙋ̀ при́снѡ пречⷭ҇таѧ, моли́сѧ, ꙗ҆́кѡ да разрѣше́нїе лю́тыхъ и҆ мно́гихъ грѣхѡ́въ ѡ҆ставле́нїе прїи́мше, славосло́вимъ тогѡ̀ ꙗ҆̀же па́че ᲂу҆ма̀ щедрѡ́ты.
И҆́нъ
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы, пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е бл҃гослове́нъ є҆сѝ.
Бо́льшїй всѣ́хъ рожде́нныхъ ꙗ҆ви́лсѧ є҆сѝ прⷪ҇ро́че, бг҃ꙋ вельмѝ согрѣша́юща мѧ̀, велича́йшею мл҃твою твое́ю, пла́мене вели́кагѡ и҆зба́ви, и҆ вѣ́чныѧ тьмы̀, ꙗ҆́кѡ да ᲂу҆бл҃жа́ю тѧ̀.
Непло́днаѧ ꙗ҆ви́хсѧ смоко́вница, и҆ посѣче́нїѧ бою́сѧ: ᲂу҆тверди́ мѧ хода́тайствомъ твои́мъ, прⷣте́че сп҃совъ, и҆ плодови́та сотворѝ, ꙗ҆́кѡ да ᲂу҆бл҃жа́ю тѧ̀.
Оу҆спѝ всѧ́кꙋ вра́жїю подви́жимꙋю бꙋ́рю, на и҆́же вѣ́рою притека́ющаго къ тебѣ̀, бо́дренными твои́ми мл҃твами, ко и҆зба́вителю всѣ́хъ прⷣте́че і҆ѡа́нне.
Бг҃оро́диченъ: Нахожде́нїѧ лꙋка́вагѡ и҆ ча́сти, дв҃о, и҆ рабо́ты бѣсо́вскїѧ сохранѝ рабы̑ твоѧ̑, и҆̀же дꙋше́ю тѧ̀ и҆ ѧ҆зы́комъ при́снѡ сла́вѧщыѧ.
Пѣ́снь и҃
І҆рмо́съ: Во ѻ҆гнѝ пла́меннѣмъ предстоѧ́тъ тебѣ̀ херꙋві́ми, серафі́ми, гдⷭ҇и, и҆ всѧ̀ тва́рь пѣ́снь тебѣ̀ пое́тъ кра́снꙋю: по́йте, бл҃гослови́те, лю́дїе превозноси́те хрⷭ҇та̀, є҆ди́наго содѣ́телѧ, во всѧ̑ вѣ́ки.
Не пребы́хъ во стра́сѣ твое́мъ, не послꙋ́шахъ за́повѣдей твои́хъ, и҆ во́лю твою̀ никогда́же сотвори́хъ: что̀ бꙋ́дꙋ ѻ҆каѧ́нный; чл҃вѣколюби́въ сы́й, ᲂу҆ще́дри мѧ̀ тꙋ́не, сп҃се, и҆ не ѿве́ржи менѐ.
Дѣ́лателю до́брыхъ, вопїю́ ти: стра́ха твоегѡ̀ серпо́мъ, пожнѝ и҆з̾ ко́рене всѧ̑ тернѡ́внаѧ помышлє́нїѧ дꙋшѝ моеѧ̀ ѻ҆каѧ́нныѧ: и҆ сѣ́менемъ покаѧ́нїѧ прозѧба́ти мѝ сподо́би хрⷭ҇тѐ, сп҃си́тельный кла́съ.
Мч҃нченъ: Распространи́шасѧ бл҃года́тїю, ᲂу҆тѣснѧ́еми въ мꙋ́кахъ мно́гихъ стрⷭ҇тоно́сцы, и҆ стѣсни́ша врагꙋ̀ пꙋти̑ про́пастей и҆спо́лнены, и҆ ны́нѣ наставлѧ́ютъ на́съ къ пꙋтє́мъ бж҃їимъ въ вѣ́рѣ и҆ любвѝ.
Мч҃нченъ: Бѣдꙋ̀ прїѧ́тъ льсти́вый, впа́дъ во глꙋбинꙋ̀, мч҃нцы, терпѣ́нїѧ и҆ страда́нїѧ ва́шегѡ, и҆ лежи́тъ ѿ всѣ́хъ насмѣва́емь безꙋ́мный: вы́ же побѣ́дными вѣнцы̀ ᲂу҆краша́етесѧ.
Бг҃оро́диченъ: Чре́во твоѐ всенепоро́чнаѧ, сто́гъ чⷭ҇тна́гѡ гꙋмна̀ ꙗ҆ви́сѧ, мі́рꙋ носѧ̀ пшени́цꙋ живота̀, пита́ющꙋ всѧ́чєскаѧ. тѣ́мже тѧ̀ ꙗ҆́кѡ вино́внꙋ всѣ́хъ до́брыхъ, вѣ́рнїи по достоѧ́нїю ᲂу҆бл҃жа́емъ.
И҆́нъ
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
Оу҆ны́нїѧ мѧ̀ сно́мъ ѡ҆держи́ма, и҆ мгло́ю ѕло́бы помрача́ема, свѣ́тлою мл҃твою твое́ю и҆спра́ви прⷣте́че, и҆ да́ждь ꙗ҆́кѡ во днѝ добродѣ́телей бл҃гоѡбра́знѡ ходи́ти.
И҆скꙋше́нїй мѧ̀ бꙋ́рѧ ѡ҆бдержи́тъ, и҆ страсте́й волна̀ смꙋща́етъ мѧ̀: рꙋ́кꙋ мѝ пода́ждь прⷣте́че, возводѧ̀ ко приста́нищꙋ покаѧ́нїѧ, дꙋшѝ моеѧ̀ кора́бль мл҃твами твои́ми.
И҆́же взе́млющаго мі́рꙋ прегрѣшє́нїѧ, въ рѣчны́хъ вода́хъ крести́лъ є҆сѝ, ѕѡ́лъ мои́хъ бе́зднꙋ и҆зсꙋшѝ стрꙋѧ́ми мл҃твъ твои́хъ, бл҃же́нне і҆ѡа́нне прⷣте́че.
Ви́дѣвъ дх҃а ст҃а́го, слы́шалъ є҆сѝ гла́съ роди́телевъ, свидѣ́тельствꙋющь прⷣте́че, тобо́ю неизрече́ннѡ креща́емомꙋ і҆и҃сꙋ: є҆го́же молѝ сп҃стѝ на́съ.
Бг҃оро́диченъ: Ꙗ҆́кѡ и҆сто́чникъ на́шегѡ ѡ҆бновле́нїѧ, сокрꙋше́ннаго мѧ̀ прираже́ньми ѕмі́евыми, всего̀ ѡ҆бновѝ: ꙗ҆́кѡ да вѣ́рою и҆ любо́вїю тѧ̀ ᲂу҆бл҃жа́ю, бцⷣе дв҃о всенепоро́чнаѧ.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:
Пѣ́снь ѳ҃
І҆рмо́съ: Сотворѝ держа́вꙋ мы́шцею свое́ю, низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Сѐ ѿве́рзесѧ черто́гъ та́йный, и҆ мꙋ́дрїи ᲂу҆краси́вше свѣщы̀ своѧ̑ є҆ле́емъ добродѣ́телей, вхо́дѧтъ свѣ́тли. ѿложѝ со́нъ ᲂу҆ны́нїѧ, ѽ дꙋшѐ, ꙗ҆́кѡ да вни́деши со хрⷭ҇то́мъ свѣщꙋ̀ носѧ́щи.
Ꙗ҆́коже блꙋдни́ца держꙋ̀ но́зѣ твоѝ мы́сленнѡ, и҆ слеза́ми ѡ҆мыва́ю си́хъ сло́ве. ѡ҆мы́й мѧ̀ сп҃се, ѿ тимѣ́нїѧ страсте́й: вѣ́ра твоѧ̀ сп҃се́ тѧ, ны́нѣ и҆ мнѣ̀ пригласи́въ, ꙗ҆́кѡ да твоѐ безчи́сленное пою̀ млⷭ҇рдїе.
Мч҃нченъ: Весе́лымъ се́рдцемъ и҆ ра́достною дꙋше́ю мч҃нцы въ вы́шнихъ живꙋ́тъ, ꙗ҆́звы хрⷭ҇тѡ́вы ꙗ҆́коже красотꙋ̀ бл҃голѣ́пїѧ при́снѡ и҆мꙋ́ще: и҆ на́мъ ми́ра и҆спроша́ютъ, и҆ лю́тыхъ и҆збавле́нїе, и҆ прегрѣше́нїй разрѣше́нїе.
Мч҃нченъ: Ѡ҆свѧти́сѧ всѧ́ко мѣ́сто, и҆мꙋ́щее бж҃е́ственнїи страда́льцы мо́щи ва́шѧ, ꙗ҆́коже дрꙋгі́й ковче́гъ, и҆́же во і҆и҃ли и҆збавлѧ́ющъ лю́тыхъ: ра́дꙋютсѧ нбⷭ҇наѧ, съ честны́ми а҆́гг҃лы, дꙋ́шы ва́шѧ бл҃же́ннїи стѧжа́вша.
Бг҃оро́диченъ: Бл҃голюби́ваѧ ѻ҆трокови́це, бл҃голюби́ваго бг҃а ро́ждшаѧ, вопїю́ ти: ᲂу҆бл҃жѝ ѻ҆каѧ́ннꙋю мою̀ дꙋ́шꙋ, ѡ҆ѕло́бленнꙋю лю́тѣ страстьмѝ и҆ прило́гми лꙋка́выхъ бѣсѡ́въ, да вѣ́рою тѧ̀ пою̀ наде́ждꙋ всѣ́хъ.
И҆́нъ
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.
Крѣ́пость моѧ̀ и҆ пѣ́нїе хрⷭ҇то́съ гдⷭ҇ь: є҆го́же молѝ бл҃же́нне прⷣте́че, на стра̑сти мѧ̀ ᲂу҆крѣпи́ти, и҆ на всѧ̑кїѧ прило́ги бѣсѡ́вскїѧ: и҆ да́ждь бж҃е́ственнꙋю дѣ́лати во́лю, ꙗ҆́кѡ да тѧ̀ любо́вїю ᲂу҆бл҃жа́ю при́снѡ.
Кра́снаѧ го́рлица, и҆ ла́стовица сладкоглаго́ливаѧ ꙗ҆ви́лсѧ є҆сѝ бж҃е́ственный прⷣте́че, ве́снꙋ возвѣща́ющаѧ бж҃е́ственнꙋю хрⷭ҇та̀: є҆го́же молѝ, и҆зба́вити мѧ̀ зимы̀ дꙋшетлѣ́нныѧ и҆ бꙋ́ри грѣхо́вныѧ, молю́сѧ тѝ.
Взыгра́всѧ въ ложесна́хъ ма́тернихъ, возвѣсти́лъ є҆сѝ ѿ дв҃ы возсїѧ́вшаго: того̀ молѝ, плотска̑ѧ моѧ̑ двиза̑нїѧ ᲂу҆мертви́ти, ᲂу҆мерщвлѧ́ющаѧ мѧ̀, и҆ и҆спо́лнити ра́дости се́рдце моѐ, ꙗ҆́кѡ да пою́ тѧ бж҃е́ственный прⷣте́че.
Сꙋ́дъ неми́лостивъ дꙋшѐ, ми́лости не творѧ́щымъ, зрѝ и҆ внима́й: є҆ле́й прїимѝ, свѣщꙋ̀ твою̀ просвѣща́ющїй, и҆ соблюдѝ неꙋгаше́ннꙋ. приближа́етсѧ жени́хъ, бо́дрствꙋй, да неꙋгаша́емо и҆́маши произволе́нїе.
Бг҃оро́диченъ: Бл҃голюби́ваго ро́ждши бг҃а, бл҃голюби́ваѧ бцⷣе, того̀ молѝ, всѧ́кїѧ мѧ̀ и҆зба́вити ѕло́бы, и҆ къ томꙋ̀ да сотвори́тъ се́рдце рачи́тельно, плотско́е сладостра́стїе возненави́дѣти: да въ пѣ́снехъ велича́ю тѧ̀.
Та́же, Досто́йно є҆́сть: И҆ є҆ктенїа̀, и҆ свѣти́ленъ, и҆ ѱалмы̀ ѻ҆бы́чны.
На стїхо́внѣ стїхи̑ры покаѧ́нны, гла́съ д҃:
Ѡ҆мы́й мѧ̀ слеза́ми мои́ми сп҃се, ꙗ҆́кѡ ѡ҆скверни́хсѧ мно́гими грѣхѝ. тѣ́мже и҆ припа́даю тѝ: согрѣши́хъ, бж҃е, и҆ поми́лꙋй мѧ̀.
Сті́хъ: И҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ, во всѧ̑ дни̑ на́шѧ возвесели́хомсѧ, за дни̑, въ нѧ́же смири́лъ ны̀ є҆сѝ, лѣ̑та, въ нѧ́же ви́дѣхомъ ѕла̑ѧ, и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ.
Ѻ҆вча̀ є҆́смь слове́снагѡ твоегѡ̀ ста́да, и҆ къ тебѣ̀ прибѣга́ю па́стырю до́бромꙋ, взыщѝ менѐ заблꙋ́ждшаго, бж҃е, и҆ поми́лꙋй мѧ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Мч҃нченъ: А҆́гг҃лѡмъ соприча̑стницы бы́сте ст҃і́и мч҃нцы, на сꙋди́щи хрⷭ҇та̀ мꙋ́жески проповѣ́давше: всѧ̑ бо ꙗ҆̀же въ мі́рѣ ѡ҆ста́висте кра̑снаѧ, ꙗ҆́кѡ не сꙋ̑ща, вѣ́рꙋ же ꙗ҆́кѡ наде́ждꙋ тве́рдꙋ ᲂу҆держа́сте. тѣ́мже и҆ ле́сть ѿгна́вше, и҆сточа́ете вѣ̑рнымъ и҆сцѣле́нїй дарова̑нїѧ, непреста́ннѡ молѧ́щесѧ, сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Ѿ всѣ́хъ бѣ́дъ рабы̑ твоѧ̑ сохранѧ́й, бл҃гослове́ннаѧ бцⷣе: да тѧ̀ сла́вимъ, наде́ждꙋ дꙋ́шъ на́шихъ.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е, и҆ по Ѻ҆́ч҃е на́шъ: тропа́рь, и҆ є҆ктенїа̀. Посе́мъ ча́съ а҃-й, ѱалмы̀ ѻ҆бы̑чныѧ, и҆ про́чее, и҆ ѿпꙋ́стъ.
Во вто́рникъ бл҃жє́нны, гла́съ д҃:
Дре́вомъ а҆да́мъ раѧ̀ бы́сть и҆зселе́нъ: дре́вомъ же крⷭ҇тнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ: ѻ҆́въ же сраспина́емь, бг҃а и҆сповѣ́да таѧ́щагосѧ, помѧни́ мѧ, вопїѧ̀, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
И҆́же петро́въ пла́чь, и҆ блꙋдни́цы сле́зы прїе́мый сло́ве, и҆ мытарѧ̀ то́чїю воздохнꙋ́вша, ᲂу҆ще́дрилъ є҆сѝ хрⷭ҇тѐ, ꙗ҆́кѡ бл҃гоꙋтро́бенъ: и҆ менѐ припа́дающа и҆ просѧ́ща прегрѣше́нїй проще́нїѧ, поми́лꙋй гдⷭ҇и пребл҃гі́й, и҆ и҆зба́ви вѣ́чныѧ мꙋ́ки.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
И҆́же непло́дствїѧ ᲂу҆́зы разрѣши́вый вели́кїй прⷣте́че, непло́дїе моегѡ̀ смире́ннагѡ се́рдца разрѣшѝ: и҆ приноси́ти сотворѝ добродѣ́тєльнаѧ дѣѧ̑нїѧ хода́тайствомъ твои́мъ, и҆́миже воспрїимꙋ̀ пи́щꙋ неиждива́емꙋю, взыва́ѧ хрⷭ҇тꙋ̀: помѧни́ мѧ сп҃се, є҆гда̀ прїи́деши во црⷭ҇твїи твое́мъ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Сокрꙋша́еми мꙋ́ками, и҆ ѕвѣрє́мъ въ снѣ́дь вдава́еми мꙋ́дрїи, и҆ ссѣца́еми, и҆ во глꙋбинꙋ̀ морскꙋ́ю вмета́еми, всесла́внїи мч҃нцы, ѻ҆гне́мъ сожига́еми, и҆ ѻ҆́стрыми ѻ҆рꙋ́жїи стрꙋ́жеми, бг҃а не ѿверго́стесѧ: ᲂу҆ негѡ́же и҆спроси́те на́мъ ст҃і́и ми́ра, и҆ просвѣще́нїѧ, и҆ ве́лїѧ млⷭ҇ти.
Сла́ва: Ѻ҆ц҃а̀, и҆ сн҃а, и҆ дх҃а ст҃а́го, всѝ вѣ́рнїи є҆диномꙋ́дреннѡ мо́лимъ, славосло́вити досто́йнѡ є҆ди́нство бж҃ества̀, въ трїе́хъ сꙋ́ще ѵ҆поста́сехъ, несмѣ́снѡ пребыва́ющее, про́сто, нераздѣ́льно и҆ непристꙋ́пно: и҆́мже и҆збавлѧ́емсѧ ѻ҆́гненнагѡ мꙋче́нїѧ.
И҆ ны́нѣ: Собезнача́льнаго ѻ҆ц҃ꙋ̀, и҆ ст҃о́мꙋ дх҃ꙋ сопресто́льна, прїѧ́тъ во ᲂу҆тро́бѣ, и҆ па́че ᲂу҆ма̀ и҆ сло́ва родила̀ є҆сѝ, бы́вша чл҃вѣ́ка, за бл҃годѣѧ́нїе человѣ́чествꙋ, мр҃і́е бг҃оневѣ́стнаѧ, вмѣсти́лище простра́нное бг҃а на́шегѡ: є҆го́же молѝ прилѣ́жнѡ, сп҃сти́сѧ рабѡ́мъ твои̑мъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.