Глас 3-й. Суббота.
Въ пѧто́къ ве́чера,
на Гдⷭ҇и воззва́хъ, стїхи̑ры ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ. Гла́съ г҃.
Подо́бенъ: Ве́лїѧ мч҃нкъ:
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть.
Стра́ждꙋще до́блїи мч҃нцы крѣ́пкѡ, и҆ ра̑ны, и҆ вѧза̑нїѧ, и҆ разли̑чныѧ мꙋ̑ки претерпѣ́вше, къ неболѣ́зненномꙋ вои́стиннꙋ и҆ бл҃же́нномꙋ наслѣ́дїю приведо́шасѧ, по достоѧ́нїю болѣ́зней.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а.
И҆́же сло́во бл҃гочести́во и҆ бж҃е́ственно ѿры́гнꙋвше, гдⷭ҇ни ст҃и́телїе, и҆ всѧ̑ є҆реті́чєскаѧ сопротивослѡ́вїѧ разрꙋши́сте, и҆ вѣ̑рнымъ всѣ̑мъ перводѣ́тєльницы ꙗ҆ви́стесѧ: сегѡ̀ ра́ди почита́еми є҆стѐ.
Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а.
Невеще́ственныхъ и҆ безпло́тныхъ чи́нꙋ ᲂу҆подо́бистесѧ ѻ҆ц҃ы̀ бг҃оно́снїи, въ тѣлесѝ веще́ственнѣ, тѣ́хъ пресла́внѡ житїѐ показꙋ́юще: тѣ́мже во ѻ҆би́телехъ тѣ́хъ живетѐ.
И҆́ны стїхи̑ры мч҃нкѡмъ, гла́съ и҆ подо́бенъ то́йже.
Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ве́лїѧ крⷭ҇та̀ твоегѡ̀ гдⷭ҇и си́ла: водрꙋзи́сѧ бо на мѣ́стѣ, и҆ дѣ́йствꙋетъ въ мі́рѣ, и҆ показа̀ ѿ ры́барей а҆пⷭ҇лы, и҆ ѿ ꙗ҆зы̑къ мч҃нки, да мо́лѧтсѧ ѡ҆ дꙋша́хъ на́шихъ.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Ве́лїѧ мч҃нкъ твои́хъ хрⷭ҇тѐ си́ла: во гробѣ́хъ бо лежа́ще дꙋ́хи прого́нѧтъ: и҆ ᲂу҆праздни́ша вра́жїю вла́сть, вѣ́рою трⷪ҇ческою подви́гшесѧ по бл҃гоче́стїи.
Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Прⷪ҇ро́цы, и҆ а҆пⷭ҇ли хрⷭ҇тѡ́вы, и҆ мч҃нцы, наꙋчи́ша ны̀ пѣ́ти трⷪ҇цꙋ є҆диносꙋ́щнꙋю, и҆ просвѣти́ша ꙗ҆зы́ки прельщє́ныѧ, и҆ прича́стники, а҆́гг҃лѡмъ сотвори́ша сы́ны чл҃вѣ́чєскїѧ.
Сла́ва, и҆ ны́нѣ, бг҃оро́диченъ: Ка́кѡ не диви́мсѧ бг҃омꙋ́жномꙋ ржⷭ҇твꙋ̀ твоемꙋ̀, пречⷭ҇тна́ѧ; и҆скꙋше́нїѧ бо мꙋ́жескагѡ не прїи́мши всенепоро́чнаѧ, родила̀ є҆сѝ без̾ ѻ҆ц҃а̀ сн҃а пло́тїю, пре́жде вѣ̑къ ѿ ѻ҆ц҃а̀ рожде́ннаго без̾ мт҃ре, ника́коже претерпѣ́вшаго и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ: но ѻ҆бою̀ сꙋщєствꙋ̀ сво́йство цѣ́ло сохра́ншаго. тѣ́мже мт҃и дв҃о влⷣчце, того̀ молѝ сп҃сти́сѧ дꙋша́мъ, правосла́внѡ бцⷣꙋ и҆сповѣ́дающихъ тѧ̀.
Та́же, Свѣ́те ти́хїй: Прокі́менъ днѐ.
На стїхо́внѣ стїхи̑ры мч҃нчны, гла́съ г҃:
Мч҃нцы твоѝ гдⷭ҇и вѣ́рою ᲂу҆тверди́вшесѧ, и҆ наде́ждею ᲂу҆крѣ́пльшесѧ, любо́вїю крⷭ҇та̀ твоегѡ̀ дꙋше́внѣ соедини́вшесѧ, вра́жїе мꙋчи́тельство разрꙋши́ша, и҆ ᲂу҆лꙋчи́ша вѣнцы̀: со безпло́тными мо́лѧтсѧ ѡ҆ дꙋша́хъ на́шихъ.
Ме́ртвенъ: Всѐ сꙋ́етїе человѣ́ческое, є҆ли́кѡ не пребꙋ́детъ по сме́рти: не пребꙋ́детъ бога́тство, ни сни́детъ сла́ва: наше́дши бо сме́рть, всѧ̑ сїѧ̑ погꙋби́тъ. тѣ́мже хрⷭ҇тꙋ̀ безсме́ртномꙋ цр҃ю̀ возопїи́мъ: преста́влєнныѧ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще ᲂу҆ тебѐ.
Ме́ртвенъ: Человѣ́цы, что̀ всꙋ́е мѧте́мсѧ; пꙋ́ть кра́токъ є҆́сть, и҆́мже тече́мъ, ды́мъ є҆́сть житїѐ, па́ра и҆ пе́рсть и҆ пе́пелъ: вма́лѣ ꙗ҆влѧ́етсѧ, и҆ вско́рѣ погиба́етъ. тѣ́мже хрⷭ҇тꙋ̀ безсме́ртномꙋ цр҃ю̀ возопїи́мъ: преста́влєнныѧ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще ᲂу҆ тебѐ.
Сла́ва, и҆ ны́нѣ, бг҃оро́диченъ: Въ жена́хъ ст҃а́ѧ бцⷣе мт҃и безневѣ́стнаѧ, молѝ є҆го́же родила̀ є҆сѝ, цр҃ѧ̀ и҆ бг҃а на́шего, да сп҃се́тъ ны̀, ꙗ҆́кѡ чл҃вѣколю́бецъ.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь, и҆ ѿпꙋ́стъ.
Въ пѧто́къ на повече́рїи,
Канѡ́нъ прест҃ѣ́й бцⷣѣ. Гла́съ г҃.
Пѣ́снь а҃
І҆рмо́съ: Во́ды дре́вле, ма́нїемъ бж҃е́ственнымъ, во є҆ди́но со́нмище совокꙋпи́вый, и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть: томꙋ̀ є҆ди́номꙋ пои́мъ, ꙗ҆́кѡ просла́висѧ.
Сп҃се́нїю нача́льника и҆ жизнода́вца ро́ждшаѧ па́че смы́сла всегѡ̀, соꙋ́зъ разрѣши́ла є҆сѝ ѡ҆сꙋжде́нїѧ є҆́ѵы прама́тере. тѣ́мже тва́рь всѧ̀ блажи́тъ тѧ̀, бг҃ороди́тельнице чⷭ҇таѧ.
Ѡ҆ѕло́бленнаго лю́тыми болѣ́зньми, дꙋше́ю и҆ тѣ́ломъ, прест҃а́ѧ дв҃о, и҆схитѝ ѿ глꙋбины̀ неча́ѧнїѧ, Всѣ́хъ нꙋ́ждныхъ и҆збавлѧ́ющи мѧ̀: ты́ бо є҆сѝ пречⷭ҇таѧ, млⷭ҇рдїѧ и҆сто́чникъ.
Сла́ва: Совлеко́хсѧ ѻ҆де́жды весе́лїѧ, въ ско́рбь впа́дъ и҆ болѣ́знь, и҆ лю́тѣ ᲂу҆ѧзви́хсѧ ѿвсю́дꙋ: предварѝ и҆ и҆зба́ви мѧ̀ ѿ ѡ҆держа́щїѧ пре́лести: ты́ бо мѝ є҆сѝ влⷣчце, прибѣ́жище и҆ наде́жда.
И҆ ны́нѣ: Предста́тельницꙋ тѧ̀ тве́рдꙋ стѧжа́въ бг҃оневѣ́сто, ко твоемꙋ̀ покро́вꙋ притека́ю, молѧ́сѧ: не пре́зри мѧ̀ твоегѡ̀ раба̀, мно́гими страстьмѝ и҆ болѣ́зньми и҆ скорбьмѝ ѡ҆тѧгче́на, но мл҃твами твои́ми и҆сцѣлѝ мт҃и бж҃їѧ.
Пѣ́снь г҃
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
Въ недоꙋмѣ́нїи и҆ ско́рби болѣ́зненнѣ є҆́смь ѻ҆каѧ́нный, во слѣ́дъ себѐ сме́рть зрѧ̀: тѣ́мже пречⷭ҇таѧ, твое́ю мл҃твою сп҃си́ мѧ.
Всѐ житїѐ растлѣ́нно ѕлы́ми и҆ блꙋ́дными дѣѧ́нїи клеве́щетъ на мѧ̀, и҆ ѿча́ѧнїемъ мѧ̀ погрꙋжа́етъ: чⷭ҇таѧ, сп҃си́ мѧ.
Сла́ва: Щедро́тъ твои́хъ бе́здна, всю́дꙋ пролива́ема влⷣчце, є҆ди́ныѧ ра́ди бл҃гости, во є҆ле́и масти́тѣ ᲂу҆маща́етъ всѣ́хъ при́снѡ тѧ̀ пою́щихъ.
И҆ ны́нѣ: Ꙗ҆́кѡ ѿ нача́ла тѧ̀ є҆стества̀ на́шегѡ прїе́мъ бг҃оневѣ́сто, сн҃ъ тво́й и҆ гдⷭ҇ь, совокꙋплѧ́етъ мл҃твами твои́ми тебѐ пою́щыѧ.
Пѣ́снь д҃
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́ва си́лѣ твое́й гдⷭ҇и.
Всю̀ на тѧ̀ наде́ждꙋ положи́хъ влⷣчце, молю́сѧ и҆ припа́даю ѿ дꙋшѝ: смертоно́сныѧ и҆зба́ви болѣ́зни, возводѧ́щи мѧ̀ къ жи́зни сп҃се́нїѧ, ꙗ҆́же жи́знь ро́ждшаѧ.
И҆сцѣли́ мѧ чⷭ҇таѧ, мл҃твами твои́ми ѿча́ѧннаго раба̀ твоего̀, подо́бїемъ лю́тыхъ и҆ растлѣ́нныхъ ра́нъ: врача́ бо родила̀ є҆сѝ, въ млⷭ҇ти бога́таго бг҃а на́шего.
Сла́ва: Въ стра̑сти лю̑тыѧ впа́дшаго мѧ̀ и҆зба́ви, и҆ весе́лїѧ ѻ҆де́ждꙋ посѣще́нїемъ твои́мъ бж҃е́ственнымъ пода́ждь мѝ, ꙗ҆́же преимꙋ́щꙋю всѧ́къ ᲂу҆́мъ ра́дость дв҃о, прорасти́вшаѧ.
И҆ ны́нѣ: Дрꙋго́е нб҃о бцⷣе ꙗ҆ви́ласѧ є҆сѝ, со́лнце пра́вды несказа́ннѡ на землѝ чⷭ҇таѧ, возсїѧ́вшаѧ: и҆́мже на́мъ возсїѧ̀ бг҃оразꙋ́мїѧ свѣ́тъ присносꙋ́щный.
Пѣ́снь є҃
І҆рмо́съ: Къ тебѣ̀ ᲂу҆́тренюю всѣ́хъ творцꙋ̀, преимꙋ́щемꙋ всѧ́къ ᲂу҆́мъ ми́рови: занѐ свѣ́тъ повелѣ̑нїѧ твоѧ̑, въ ни́хже наста́ви мѧ̀.
Ме́ртвость творѧ́щїй и҆ стра́сти прибли́жихсѧ, ѿ мои́хъ безмѣ́рныхъ грѣхѡ́въ: мт҃и бж҃їѧ, тѧ̀ и҆збавле́нїе мно́гихъ ѕлы́хъ мои́хъ бы́ти, молю̀ прилѣ́жнѡ.
Дꙋше́внїи моѝ рꙋ́цѣ простира́ю къ тебѣ̀ чⷭ҇таѧ, плотски́ми бо разслабѣ́хъ ѻ҆каѧ́нный: но ты̀ ѿ мно́гихъ ра́нъ и҆зба́ви мѧ̀, подаю́щи и҆сцѣле́нїе.
Сла́ва: Совлеко́хсѧ здра́выѧ ѻ҆де́жды, и҆ плаче́внꙋю ри́зꙋ въ болѣ́знехъ ѡ҆бле́къ: тебѣ̀ молю́сѧ влⷣчце, ѡ҆блецы́ мѧ во здра́вїе.
И҆ ны́нѣ: Ꙗ҆́кѡ мч҃нкѡвъ и҆ а҆пⷭ҇лѡвъ сщ҃е́нное сꙋ́щи бл҃голѣ́пїе бцⷣе, и҆ вѣ́рныхъ застꙋпле́нїе, всѝ досто́йнѡ тѧ̀ сла́вимъ.
Пѣ́снь ѕ҃
І҆рмо́съ: Возведѝ ѿ тли́ мѧ гдⷭ҇и бж҃е мо́й, і҆ѡ́на вопїѧ́ше. и҆ а҆́зъ вопїю́ ти: и҆з̾ глꙋбины̀ и҆зба́ви мѧ̀ сп҃се, мно́гихъ мои́хъ ѕѡ́лъ, и҆ къ свѣ́тꙋ твоемꙋ̀, молю́сѧ, наста́ви.
Напрѧжѐ на мѧ̀ мно́жество болѣ́зней, ѿ мои́хъ безмѣ́рныхъ согрѣше́нїй тлетво́рный, и҆ ᲂу҆мерщвле́нїемъ мѧ̀ ѡ҆бложи́ша: но ты̀ сама̀ бцⷣе, ѿ си́хъ мѧ̀ и҆зба́ви, и҆ всѧ́кїѧ нꙋ́жды и҆схитѝ.
Вве́рженъ бы́хъ во глꙋбинꙋ̀ прегрѣше́нїй, и҆ болѣ́зней и҆ скорбе́й безмѣ́рныхъ, и҆ въ си́хъ ны́нѣ ѿню́дъ подавлѧ́юсѧ: но ты̀ бг҃ороди́тельнице, просте́рши рꙋ́кꙋ ко сп҃се́нїю возведи́ мѧ.
Сла́ва: Тѧ̀ ѡ҆снова́нїе тве́рдое вѣ́мъ бцⷣе, и҆ держа́внꙋю по́мощь сꙋ́щымъ въ ско́рби: тѣ́мже къ твоемꙋ̀ покро́вꙋ прибѣ́гъ, молю́ тѧ, ѿ лю́тыхъ бѣ́дъ и҆зба́ви мѧ̀ и҆ ѿ тѧ́жкихъ болѣ́зней.
И҆ ны́нѣ: Браздꙋ̀ ю҆́же бж҃е́ственный кла́съ прора́стшꙋю, и҆́мже вѣ́рныхъ сердца̀ пита́ютсѧ вѣ́рою, и҆ мы́сленный гла́дъ преста̀, бж҃їй ковче́гъ воспои́мъ, ꙗ҆́кѡ дв҃ꙋ бг҃омт҃рь.
Та́же, Гдⷭ҇и поми́лꙋй, три́жды. Сла́ва, и҆ ны́нѣ:
Сѣда́ленъ, гла́съ г҃:
Бж҃е́ственнагѡ є҆стества̀ не ѿлꙋчи́сѧ, пло́ть бы́въ во чре́вѣ твое́мъ: но бг҃ъ вочл҃вѣ́чисѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю млⷭ҇ть.
Пѣ́снь з҃
І҆рмо́съ: Ꙗ҆́коже дре́вле бл҃гочести̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ взыва́ющыѧ, бж҃е ѻ҆тє́цъ на́шихъ.
Оу҆млⷭ҇рдисѧ на мѧ̀ дв҃о бг҃оневѣ́сто, во ѿча́ѧнїѧ глꙋбинꙋ̀ попо́лзшасѧ: тебѐ тишинꙋ̀ бы́ти мѝ, молю̀ пречⷭ҇таѧ, сп҃се́нїй бо є҆сѝ приста́нище сꙋ́щымъ въ нꙋ́ждахъ при́снѡ.
Неизглаго́ланнѡ па́че ᲂу҆ма̀ мꙋ́дрость и҆ си́лꙋ бж҃їю родила̀ є҆сѝ хрⷭ҇та̀: тѣ́мже си́льна въ ми́лости, и҆ ще́дра сꙋ́щи, да́ждь мѝ сп҃си́тєльныѧ цѣльбы̑ твоѧ̑ бцⷣе, наде́жде вѣ́рныхъ.
Сла́ва: Ѡ҆богати́вши бж҃е́ственнымъ ржⷭ҇тво́мъ концы̀, нетлѣ́нїѧ сла́достїю, ѿ тлетво́рныѧ мѧ̀ болѣ́зни, и҆ го́рькихъ страсте́й свободѝ, и҆ сп҃се́нїе пода́ждь, бж҃їѧ мт҃и пресла́внаѧ.
И҆ ны́нѣ: И҆́же две́рь тѧ̀ та́йнꙋю себѣ̀ предложи́въ, и҆ застꙋ́пницꙋ ди́внꙋю сꙋ́щымъ на землѝ, тобо́ю чⷭ҇таѧ две́рь подадѐ человѣ́кѡмъ въ вѣ́чнꙋю жи́знь всѣ́хъ вводѧ́щꙋ, ꙗ҆́кѡ ще́дръ, и҆ всѣ́хъ бг҃ъ.
Пѣ́снь и҃
І҆рмо́съ: Вавѷлѡ́нскаѧ пе́щь ѻ҆́троки не ѡ҆палѝ, нижѐ бж҃ества̀ ѻ҆́гнь дв҃ꙋ растлѝ. тѣ́мъ со ѻ҆́троки вѣ́рнїи возопїе́мъ: бл҃гослови́те дѣла̀ гдⷭ҇нѧ гдⷭ҇а.
Прегрѣше́нїй неизче́тнꙋю пꙋчи́нꙋ стѧжа́въ, ны́нѣ соꙋдавлѧ́юсѧ, чⷭ҇таѧ, въ болѣ́знехъ погрꙋжа́емь. тѣ́мже мѝ рꙋ́кꙋ по́мощи просте́рши, и҆з̾ глꙋбины̀ болѣ́зней возведѝ, молю́сѧ.
Прⷭ҇то́лъ бг҃ꙋ земле́ный, две́рь же нбⷭ҇наѧ ꙗ҆ви́ласѧ є҆сѝ приснодв҃о чⷭ҇таѧ, бцⷣе всепѣ́таѧ. тѣ́мже мѝ сп҃се́нїѧ две́рь ѿве́рзи бг҃омт҃и, и҆ тьмы̀ страсте́й свободѝ.
Сла́ва: Ꙗ҆́кѡ вїногра́дъ возрасти́ла є҆сѝ, гро́здъ невоздѣ́ланъ чⷭ҇таѧ, вїно̀ и҆сточа́ющъ дꙋша́мъ, веселѧ́щее вѣ́рнѡ пою́щихъ є҆го̀, всенепоро́чнаѧ.
И҆ ны́нѣ: Ꙗ҆́же по ржⷭ҇твѣ̀ нетлѣ́нна пребы́вши всенепоро́чнаѧ, мо́лимсѧ, чⷭ҇таѧ, и҆зба́ви ѿ тлѝ рабы̑ твоѧ̑, вѣ́рнѡ пою́щыѧ є҆диномышле́нїемъ дꙋшѝ: бл҃гослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.
Ѽ дв҃о бл҃га́ѧ! ѽ мі́ра ра́досте и҆ прибѣ́жище! ѽ храни́лище вѣ́рныхъ, и҆ и҆збавле́нїе скорбе́й! ты̀ предста́ни мѝ въ ча́съ сме́рти, и҆ и҆зба́ви ѿ бѣсѡ́въ, и҆́щꙋщихъ растли́ти мѧ̀.
Ꙗ҆́кѡ зижди́телѧ и҆ бг҃а заче́нши во ᲂу҆тро́бѣ, дв҃о мт҃и чⷭ҇таѧ, си́лою ꙗ҆́же въ тебѣ̀ низложѝ бѣсѡ́въ шата̑нїѧ, и҆ вознесѝ ро́гъ пою́щихъ держа́вꙋ твою̀ бж҃е́ственнꙋю, и҆ вѣ́рнѡ покланѧ́ющихсѧ ѡ҆́бразꙋ твоемꙋ̀.
Сла́ва: Новосодѣ́лавъ на́ше є҆стество̀, и҆́же ѿ тебѐ воплоще́йсѧ, дв҃о чⷭ҇таѧ, но́во дѣ́лаетъ и҆ ѡ҆бновлѧ́етъ, мт҃рнею твое́ю мл҃твою, свѣ́тлꙋю и҆ бо́дрꙋю застꙋ́пницꙋ, и҆ сꙋ́щꙋю бцⷣꙋ въ пѣ́снехъ непреста́ннѡ тѧ̀ велича́ющихъ.
И҆ ны́нѣ: Ты̀ а҆́гг҃лѡвъ ра́дость, ты̀ првⷣникѡвъ добро́та, ты̀ вѣ́рныхъ наде́жда, ты̀ соблюде́нїе на́ше: ты̀ мо́стъ, и҆́же къ жи́зни несостарѣ́ющейсѧ преводѧ́щїй, вѣ́рою и҆ любо́вїю тѧ̀ велича́ющыѧ.
Та́же: Досто́йно є҆́сть: Трист҃о́е. По Ѻ҆́ч҃е на́шъ: Тропарѝ, и҆ про́чее ѻ҆бы́чно, и҆ ѿпꙋ́стъ.
Въ сꙋббѡ́тꙋ ᲂу҆́тра,
по а҃-мъ стїхосло́вїи, сѣда́льны мч҃нчны, гла́съ г҃:
Бл҃годꙋ́шное терпѣ́нїѧ ва́шегѡ побѣдѝ кѡ́зни ѕлонача́льнагѡ врага̀ стрⷭ҇тоте́рпцы всехва́льнїи: сегѡ̀ ра́ди вѣ́чнагѡ сподо́бистесѧ бл҃же́нства. но моли́тесѧ гдⷭ҇еви, хрⷭ҇толюби́выхъ люде́й сп҃стѝ ста́до, мч҃нцы сꙋ́ще и҆́стиннїи.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сїѧ́ете вѣ́рою пресвѣ̑тлаѧ свѣти̑ла ст҃і́и, недꙋ́гꙋющихъ вра́чеве, стрⷭ҇тоте́рпцы прехва́льнїи, мꙋчи́телей ᲂу҆́бѡ ра́нъ не ᲂу҆боѧ́стесѧ, і҆́дѡльское ѕлоче́стїе низложи́сте, побѣ́дꙋ и҆мꙋ́ще непобѣди́мꙋю, крⷭ҇тъ и҆́стинный.
Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю сп҃се́нїе ро́да на́шегѡ, воспѣва́емъ бцⷣе дв҃о: пло́тїю бо ѿ тебѐ воспрїѧ́тою сн҃ъ тво́й и҆ бг҃ъ на́шъ, крⷭ҇то́мъ воспрїи́мъ стрⷭ҇ть, и҆зба́ви на́съ ѿ тлѝ, ꙗ҆́кѡ чл҃вѣколю́бецъ.
По в҃-мъ стїхосло́вїи, сѣда́льны, гла́съ г҃:
Воѡрꙋжи́вшесѧ всеѻрꙋ́жествомъ хрⷭ҇то́вымъ, и҆ ѡ҆бо́лкшесѧ во ѻ҆рꙋ́жїе вѣ́ры, полкѝ вра̑жїѧ страда́льчески низложи́сте, ᲂу҆се́рднѡ бо ᲂу҆пова́нїемъ жи́зни, претерпѣ́сте всѧ̑ мꙋчи́телей прещє́нїѧ же и҆ ра̑ны. тѣ́мже и҆ вѣнцы̀ прїѧ́сте, мч҃нцы хрⷭ҇тѡ́вы терпѣливодꙋ́шнїи.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Стрⷭ҇тоте́рпцы ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.
Є҆гда̀ сло́вомъ твои́мъ предста́немъ безме́здномꙋ твоемꙋ̀ сꙋди́щꙋ гдⷭ҇и, не посрамѝ въ тѧ̀ вѣ́ровавшихъ сп҃се на́шъ: вси́ бо согрѣши́хомъ, но тебѐ не ѿстꙋпи́хомъ. тѣ́мже мо́лимъ тѧ̀, въ селе́нїихъ пра́ведныхъ твои́хъ, хрⷭ҇тѐ, и҆̀хже прїѧ́лъ є҆сѝ, ᲂу҆поко́й: є҆ди́нъ бо є҆сѝ безгрѣ́шенъ.
Сла́ва, и҆ ны́нѣ, бг҃оро́диченъ: Прⷪ҇ро́цы проповѣ́даша, а҆пⷭ҇ли наꙋчи́ша, мч҃нцы и҆сповѣ́даша, и҆ мы̀ вѣ́ровахомъ, бцⷣꙋ тѧ̀ вои́стиннꙋ сꙋ́щꙋю: тѣ́мже и҆ велича́емъ ржⷭ҇тво̀ твоѐ, пречⷭ҇таѧ.
Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ, и҆ ᲂу҆со́пшымъ. Творе́нїе і҆ѡ́сифово. Гла́съ г҃.
Пѣ́снь а҃
І҆рмо́съ: Ди́внѡ, сла́внѡ творѧ́й чꙋдеса̀ ты̀ є҆сѝ бж҃е, бе́зднꙋ ѡ҆землени́вый, и҆ колєсни́цы потопи́вый, и҆ лю́ди сп҃сы́й пою́щыѧ тебѣ̀, ꙗ҆́кѡ цр҃ю̀ на́шемꙋ и҆ бг҃ꙋ.
Мꙋче́нїѧ сла́вꙋ, премꙋ́дрїи, ѡ҆брѣто́сте всѝ страда́льцы, мꙋчє́нїѧ многоѡбра̑знаѧ до́блественнѣ претерпѣ́сте, стрⷭ҇тоте́рпцы: тѣ́мже сла́вими є҆стѐ при́снѡ.
Превы́шшїй и҆мꙋ́ще живо́тъ ꙗ҆ви́стесѧ бж҃е́ственнїи слꙋжи́телїе, премꙋ́дрїи сщ҃еннотаи̑нницы вопло́щшагѡсѧ сло́ва, ᲂу҆па́сше до́брѣ гдⷭ҇не ста́до си́лою бж҃е́ственною.
Распе́ншесѧ мі́рови прпⷣбнїи, плотски́хъ всѣ́хъ сласте́й ѿверго́стесѧ, и҆ сосꙋ́ди дх҃а ꙗ҆́вльшесѧ, дꙋ́хи прелє́стныѧ бж҃е́ственною си́лою погꙋби́сте вкꙋ́пѣ.
Сла́ва: И҆̀же ѿ землѝ повелѣ́нїемъ твои́мъ гдⷭ҇и, вѣ́рою бл҃гоче́стною ще́дре преста́вльшыѧсѧ, жи́зни безконе́чныѧ и҆ свѣ́та невече́рнѧгѡ сподо́бивъ, ᲂу҆поко́й ꙗ҆́кѡ бл҃гъ.
Бг҃оро́диченъ: Ꙗ҆́кѡ бг҃а ро́ждшꙋю пло́тїю пречⷭ҇таѧ, нра́вомъ бл҃гоче́стнымъ чти́мъ тѧ̀ непреста́ннѡ, съ чⷭ҇тны́ми жена́ми, посто́мъ просїѧ́вшими, и҆ страда́ньми врага̀ низложи́вшими.
Дрꙋгі́й канѡ́нъ ᲂу҆со́пшымъ пое́мъ нарѧдꙋ̀, и҆дѣ́же нѣ́сть мине́и. Творе́нїе ѳеофа́ново.
Пѣ́снь а҃
І҆рмо́съ: Пресѣка́емое мо́ре жезло́мъ дре́вле і҆и҃ль про́йде ꙗ҆́кѡ по пꙋсты́ни, и҆ крⷭ҇тоѡбра́знѡ ꙗ҆́вѣ пред̾ꙋготовлѧ́етъ стєзѝ: сегѡ̀ ра́ди пои́мъ во хвале́нїи чꙋ́дномꙋ бг҃ꙋ на́шемꙋ, ꙗ҆́кѡ просла́висѧ.
Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Погребе́нїемъ твои́мъ сме́рть ᲂу҆мертви́въ, и҆ низложи́въ а҆́дово мꙋчи́тельство, на нб҃са̀ предте́ча на́мъ возше́дый, стрⷭ҇тоте́рпческїй ли́къ совозне́слъ є҆сѝ. ны́нѣ же дꙋ́шы ᲂу҆поко́й преста́влєнныѧ къ тебѣ̀ хрⷭ҇тѐ.
Припѣ́въ: Поко́й гдⷭ҇и, дꙋ́шы ᲂу҆со́пшихъ ра̑бъ твои́хъ.
И҆́же бж҃є́ственныѧ мч҃нки ᲂу҆крѣплѧ́ѧй, и҆ тѣ́ми пре́лесть потреби́вый, мольба́ми и҆́хъ, ꙗ҆́кѡ бг҃ъ, сконча́вшымсѧ ꙗ҆̀же ѡ҆ тебѣ̀ сп҃се, безсме́ртїе и҆ бл҃же́нное наслѣ́дїе ᲂу҆лꙋчи́ти бл҃говолѝ.
Сла́ва: За рабы̑ влⷣко, твою̀ кро́вь закла́всѧ и҆злїѧ́лъ є҆сѝ ꙗ҆́кѡ ще́дръ, до́лгъ же за ни́хъ воздаѧ̀: сегѡ̀ ра́ди млⷭ҇рде, тебѐ мо́лимъ, преста́влєнныѧ рабы̑ твоѧ̑ къ тебѣ̀ ᲂу҆поко́й.
И҆ ны́нѣ: Чⷭ҇тꙋю воспои́мъ бцⷣꙋ, бг҃а ро́ждшꙋю, сме́ртїю свое́ю сме́рть на́шꙋ и҆спрове́ргшаго, и҆ жи́знь и҆сточи́вшаго нестарѣ́ющꙋюсѧ, и҆ во вѣ́ки пребыва́ющее бл҃же́нство.
Пѣ́снь г҃
І҆рмо́съ: Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю бж҃е, нѣ́сть ст҃ъ, нѣ́сть првⷣнъ, па́че тебѐ гдⷭ҇и.
Си́лою бж҃їею ᲂу҆крѣплѧ́еми мч҃ницы сла́внїи, пагꙋборо́днꙋю си́лꙋ, и҆́же въ ѕло́бѣ си́льнагѡ врага̀, до конца̀ погꙋби́сте, и҆ побѣ̑дныѧ прїѧ́сте бж҃е́ствєнныѧ вѣнцы̀.
И҆́же прпⷣбныѧ влⷣко, ꙗ҆ви́лъ є҆сѝ врага̀ побѣди́тели, и҆ ст҃и́тели пома́занїемъ прест҃ы́мъ ѡ҆ст҃и́вый хрⷭ҇тѐ, тѣ́хъ мольба́ми ѡ҆ст҃ѝ и҆ просвѣтѝ пою́щыѧ тѧ̀.
Со прⷪ҇ро́ки всѣ́ми восхва́лимъ же́нъ бж҃е́ственныхъ ли́къ, ꙗ҆̀же въ постѣ̀ просїѧ́вшыѧ, и҆ вѣ́рою пострада́вшыѧ, и҆ многоко́зненнаго ѕмі́ѧ попра́вшыѧ.
Сла́ва: И҆̀хже ѿ на́съ преста́вилъ є҆сѝ бж҃е́ственною во́лею хрⷭ҇тѐ, со ст҃ы́ми ᲂу҆чинѝ, ꙗ҆̀же въ житїѝ презрѣ́въ ще́дре, тѣ́хъ прегрѣшє́нїѧ, мо́лимсѧ, мл҃твами ст҃ы́хъ твои́хъ.
Бг҃оро́диченъ: И҆̀же сп҃се́ни пречⷭ҇таѧ, твои́мъ ст҃ы́мъ ржⷭ҇тво́мъ, гла́съ гаврїи́ловъ вопїе́мъ тѝ вѣ́рнѡ, є҆́же ра́дꙋйсѧ, и҆ мо́лимсѧ: твои́ми мл҃твами, прегрѣше́нїй проще́нїе всѣ̑мъ на́мъ и҆спросѝ.
И҆́нъ
І҆рмо́съ: И҆́же ѿ не сꙋ́щихъ всѧ̑ приведы́й, сло́вомъ созида́ємаѧ, соверша́ємаѧ дх҃омъ, вседержи́телю вы́шнїй, въ любвѝ твое́й ᲂу҆твердѝ менѐ.
Созда́вый мѧ̀ ѿ землѝ, и҆ къ землѝ возвраще́на ѻ҆каѧ́ннаго ѡ҆бнови́вый свѣтлѣ́е, дꙋ́шы ᲂу҆со́пшихъ ᲂу҆поко́й мл҃твами мч҃никъ.
Стрⷭ҇тоте́рпєцъ мч҃нкъ, бїе́ньми же и҆ вѧза́ньми, ра́нами и҆ ꙗ҆́звами, ᲂу҆моле́нъ быва́ѧ, дꙋ́шы ра̑бъ твои́хъ во ст҃ы́хъ селе́нїихъ ᲂу҆чинѝ ще́дре.
Сла́ва: И҆зба́ви чл҃вѣколю́бче рабы̑ твоѧ̑ гее́нны, ѻ҆гнѧ́ же и҆ мра́чныхъ селе́нїй а҆́да, и҆̀же вѣ́рою влⷣко, ᲂу҆со́пшыѧ твое́ю наде́ждею.
И҆ ны́нѣ: Сщ҃е́ннѣйшаѧ, ꙗ҆́кѡ мт҃и зижди́телѧ тва́ри сꙋ́щи, сме́рти разо́ршагѡ си́лꙋ, бцⷣе пречⷭ҇таѧ, и҆ нетлѣ́нїе на́мъ дарова́вшагѡ.
Пѣ́снь д҃
І҆рмо́съ: Прїѡсѣне́ннꙋю го́рꙋ а҆ввакꙋ́мъ прозрѧ́ше пречⷭ҇тꙋю твою̀ ᲂу҆тро́бꙋ чⷭ҇таѧ. тѣ́мъ взыва́ше: ѿ ю҆́га прїи́детъ бг҃ъ, и҆ ст҃ы́й ѿ горы̀ прїѡсѣне́нныѧ ча́щи.
Ꙗ҆́коже ѻ҆вча́та приведо́стесѧ всѝ во́лею закла́вшесѧ ꙗ҆́коже а҆́гнцы, мꙋ́дрїи страда́льцы, а҆́гнцꙋ на дре́вѣ кре́стнѣмъ бл҃гоизво́лившемꙋ бж҃їю сло́вꙋ закла́тисѧ за ро́дъ человѣ́ческїй.
Со прпⷣбными почти́мъ бл҃госла̑вныѧ первосщ҃е́нники, свѣти́льники бы́вшыѧ вѣ̑рнымъ: є҆́рєси же разрꙋши́вшыѧ, и҆ страсте́й тьмꙋ̀ глꙋбо́кꙋю, и҆ къ незаходи́момꙋ свѣ́тꙋ вѣ́рою прело́жшыѧсѧ.
Красото́ю слове́съ, бг҃огла́снїи прⷪ҇ро́цы просвѣща́ютъ вѣ́рныхъ дꙋ́шы, по́двигѡвъ же свѣтлостьмѝ, и҆ чꙋде́съ восто́ками ѡ҆зарѧ́ютъ сердца̀ бг҃онѡ́сныѧ жєны̀.
Сла́ва: И҆̀же житїѐ ѡ҆ста́вльшыѧ, премі́рнѣй сла́вѣ прича́стники покажѝ, сло́ве бж҃їй, прегрѣше́нїй и҆збавле́нїе си̑мъ да́рꙋѧй бл҃же, ꙗ҆̀же содѣ́ѧша на землѝ въ ра́зꙋмѣ и҆ не въ ра́зꙋмѣ.
Бг҃оро́диченъ: Мч҃нкѡвъ сла́вꙋ, ст҃и́телей и҆ прпⷣбныхъ бж҃е́ственное ᲂу҆добре́нїе, и҆ вѣ́рныхъ ᲂу҆твержде́нїе, прⷪ҇ро́кѡвъ ѡ҆глаше́нїе, всепѣ́тꙋю воспои́мъ гдⷭ҇ню мт҃рь.
И҆́нъ
І҆рмо́съ: Положи́лъ є҆сѝ къ на́мъ тве́рдꙋю любо́вь гдⷭ҇и: є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ бл҃годарѧ́ще: сла́вѣ си́лѣ твое́й гдⷭ҇и.
Во гро́бъ за ны̀ млⷭ҇тивнѡ всели́всѧ влⷣко, гро́бы и҆стощи́лъ є҆сѝ ꙗ҆́кѡ бг҃ъ, и҆ побѣдоно́сцы ꙗ҆́вль мч҃нки, въ мѣ́стѣ ѡ҆слабле́нїѧ ᲂу҆со́пшыѧ рабы̑ твоѧ̑ ᲂу҆чинѝ.
И҆̀же страда́лєцъ крѣ̑пкїѧ по́двиги, и҆ ра̑ны, и҆ ᲂу҆дѡ́въ ѿсѣчє́нїѧ, ꙗ҆̀же за тѧ̀ претерпѣ́ша влⷣко, ра́дꙋѧсѧ прїе́мый, и҆ ꙗ҆̀же прїѧ́лъ є҆сѝ, и҆зба́ви ѿ мꙋче́нїѧ.
Сла́ва: И҆́же манове́нїемъ свои́мъ живота̀ и҆мѣ́ѧ ᲂу҆мѣ́ренїе, безконе́чныѧ твоеѧ̀ жи́зни и҆ нетлѣ́нныѧ сла́вы сподо́би, ꙗ҆̀же къ тебѣ̀ преста́вилъ є҆сѝ, грѣхо́вное разо́рь средогра́дїе.
И҆ ны́нѣ: Мт҃и вои́стиннꙋ и҆ дв҃а ꙗ҆ви́ласѧ є҆сѝ всенепоро́чнаѧ, зача́тїе и҆ ржⷭ҇тво̀ и҆́стинно, къ дв҃ствꙋ є҆ди́на сочета́вши: бг҃а бо родила̀ є҆сѝ, сме́рти разо́ршаго си́лꙋ.
Пѣ́снь є҃
І҆рмо́съ: Свѣ́томъ твои́мъ невече́рнимъ хрⷭ҇тѐ ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й, занѐ свѣ́тъ повелѣ̑нїѧ твоѧ̑.
Ра̑ны ва́шѧ и҆ ꙗ҆́звы, врагꙋ̀ ᲂу҆́бѡ ꙗ҆ви́шасѧ ꙗ҆́звы неисцѣ̑льныѧ: ꙗ҆́звы же ны́нѣ и҆сцѣлѧ́ютъ всѣ́хъ вѣ́рныхъ страда́льцы гдⷭ҇ни.
Воспои́мъ прпⷣбныхъ мно́жество, и҆ ᲂу҆бл҃жи́мъ ст҃и́тели хрⷭ҇тѡ́вы, и҆ почти́мъ прⷪ҇ро́ки є҆гѡ̀, ны́нѣ ѡ҆ на́съ при́снѡ молѧ́щыѧсѧ.
Бг҃а вопло́щшасѧ на́съ ра́ди, лю́бѧщѧ всесла̑вныѧ жєны̀, нра́вомъ пра́вымъ пострада́вшѧ, и҆ пости́вшѧсѧ, на нб҃сѣ́хъ ны́нѣ пребыва́ютъ.
Сла́ва: Въ ра́йстѣй гдⷭ҇и пи́щи, во странѣ̀ живы́хъ хрⷭ҇тѐ, и҆дѣ́же сїѧ́етъ тво́й свѣ́тъ, вселѝ ꙗ҆̀же преста́вилъ є҆сѝ ѿ землѝ, вѣ̑рныѧ твоѧ̑ рабы̑.
Бг҃оро́диченъ: И҆з̾ тебѐ пречⷭ҇таѧ, бг҃ъ воплоти́сѧ, и҆ вы́шшꙋю тѧ̀ а҆́гг҃лъ показа̀ ны́нѣ, тва́рей же всѣ́хъ преимꙋ́щꙋю влⷣчце: тѣ́мже тѧ̀ воспѣва́емъ.
И҆́нъ
І҆рмо́съ: Къ тебѣ̀ ᲂу҆́тренюю всѣ́хъ творцꙋ̀, преимꙋ́щемꙋ всѧ́къ ᲂу҆́мъ ми́рови, занѐ свѣ́тъ повелѣ̑нїѧ твоѧ̑, въ ни́хже наста́ви мѧ̀.
Въ цр҃кви пе́рвенєцъ бл҃же, преше́дшыѧ ѿ на́съ мч҃никъ ра́ди, и҆ честны́хъ страда́лєцъ мольба́ми: съ пра́ведными причтѝ.
За и҆збавле́нїе мно́гихъ прегрѣше́нїй, прест҃ꙋ́ю кро́вь твою̀ хрⷭ҇тѐ, и҆злїѧ́лъ є҆сѝ: и҆ ны́нѣ мч҃никъ твои́хъ сп҃се, мольба́ми, бл҃гоче́стнѡ ᲂу҆со́пшыѧ ᲂу҆поко́й.
Сла́ва: Оу҆пра́ви сло́ве, ѿше́дшихъ дꙋ́шы въ вѣ́чное мѣ́сто сла́дости твоеѧ̀, ꙗ҆́же па́че ᲂу҆ма̀, и҆ ст҃ы́хъ бж҃е́ственныѧ свѣ́тлости сподо́би.
И҆ ны́нѣ: Тебѐ дв҃ꙋ, ю҆́же па́че сло́ва во чре́вѣ неѡб̾име́нное сло́во заче́ншꙋю, мє́ртвымъ жи́знь даю́щаго, досто́йнѡ бл҃жи́мъ.
Пѣ́снь ѕ҃
І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ̀ ты̀ сп҃сѝ сп҃се, и҆ и҆зба́ви ѿ тлѝ, ꙗ҆́кѡ сп҃слъ є҆сѝ ѿ ѕвѣ́рѧ прⷪ҇ро́ка.
Свѣти́льники честны́ѧ цр҃кве, а҆́гнца и҆ па́стырѧ сщ҃е́ннѣйшїи всесла́внїи хрⷭ҇тѡ́вы страда́льцы да почтꙋ́тсѧ сщ҃е́нными пѣ́сньми.
Вознесе́сѧ прпⷣбныхъ собо́ръ вознесы́й бг҃а во смире́нїи: и҆ просла́висѧ мно́жество ст҃и́телей въ дѣ́лѣхъ до́брыхъ, просла́вившихъ ст҃ꙋ́ю трⷪ҇цꙋ.
Чꙋде́съ показа́нїи бж҃е́ственныхъ, и҆ болѣ́зней терпѣ́нїемъ соверше́ннымъ, беззако́ннꙋющихъ вра̑гъ, сщ҃е́нныхъ же́нъ ли́къ ᲂу҆ѧзвѝ, мꙋ́жески до́блествовавше.
Сла́ва: Въ вѣ́рѣ и҆̀хже ѿ землѝ прїѧ́лъ є҆сѝ, ст҃ы́хъ сопричтѝ собо́рѡмъ, и҆ въ нѣ́дрѣхъ вѣ́рнагѡ а҆враа́ма ᲂу҆чинѝ хрⷭ҇тѐ, при́снѡ сла́вити твоѐ мно́гое бл҃гоꙋтро́бїе.
Бг҃оро́диченъ: Мч҃нкѡвъ, прⷪ҇ро́кѡвъ и҆ прпⷣбныхъ, и҆ всѣ́хъ ѿ вѣ́ка првⷣныхъ похвала̀, ты̀ є҆сѝ пречⷭ҇таѧ: тѣ́мже гла́сы ꙗ҆́вѣ ра́достными чти́мъ тѧ̀ съ ни́ми, бцⷣе.
И҆́нъ
І҆рмо́съ: Возведѝ ѿ тли́ мѧ гдⷭ҇и бж҃е мо́й, і҆ѡ́на вопїѧ́ше, и҆ а҆́зъ вопїю́ ти: и҆з̾ глꙋбины̀ и҆зба́ви мѧ̀ сп҃се, мно́гихъ мои́хъ ѕѡ́лъ, и҆ къ свѣ́тꙋ твоемꙋ̀, молю́сѧ, наста́ви.
Преложѝ на ра́дость въ вѣ́рѣ ᲂу҆со́пшихъ рыда́нїе, мл҃твами стрⷭ҇тоте́рпєцъ, препоѧсꙋ́ѧ и҆̀хъ бл҃голѣ́пнѣ хрⷭ҇тѐ, весе́лїемъ, и҆ къ свѣ́тꙋ твоемꙋ̀ направлѧ́ѧ и҆ наставлѧ́ѧ.
Оу҆поко́й бж҃е, мно́жествомъ щедро́тъ твои́хъ ᲂу҆ патрїа́рхѡвъ въ нѣ́дрѣ преста́влєныѧ, и҆дѣ́же свѣ́тъ сїѧ́етъ свѣ́тлый твоегѡ̀ лица̀, хрⷭ҇тѐ, презира́ѧ и҆́хъ всѧ̑ прегрѣшє́нїѧ.
Сла́ва: Оу҆дивѝ на ѿше́дшихъ ѿсю́дꙋ, и҆ лю́тыхъ житїѧ̀ и҆зба́вленыхъ, чꙋ́днꙋю млⷭ҇ть, хрⷭ҇тѐ, чл҃вѣколю́бїѧ твоегѡ̀, и҆ ра́дости твоеѧ̀ насы́ти, и҆ кро́тости.
И҆ ны́нѣ: Ме́ртвости и҆ тлѝ, и҆ сме́рти и҆зба́вихомсѧ, пресла́внымъ ржⷭ҇тво́мъ твои́мъ, бг҃омт҃и: ты́ бо на́мъ родила̀ є҆сѝ чⷭ҇таѧ, нетлѣ́нїѧ и҆сто́чникъ, и҆ твои́мъ свѣ́томъ мі́ръ ве́сь просвѣти́ла є҆сѝ.
Пѣ́снь з҃
І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Стоѧ́ще посредѣ̀ ѻ҆гнѧ̀, пресла́внїи стрⷭ҇тоте́рпцы гдⷭ҇ни, бж҃е́ственнꙋю ро́сꙋ прїима́сте съ нб҃сѐ, и҆ ᲂу҆мертви́вшесѧ мꙋ́ками, многоко́зненнаго врага̀ ме́ртва содѣ́ласте.
Бж҃е́ственнїи ст҃и́телїе, ꙗ҆́кѡ кора́бль и҆спра́вивше цр҃ковь хрⷭ҇то́вꙋ, непотоплѧ́емꙋ тꙋ̀ соблюдо́ша, пре́лести и҆збѣ́гше вои́стиннꙋ ѕлы́хъ во́лнъ.
Оу҆мертви́вше пло́ть сщ҃е́нными по́двиги по́стницы и҆́стиннїи, безстра́стїѧ наслѣ́довасте живо́тъ несостарѣ́ющїйсѧ, пою́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.
Сла́ва: Не покажѝ пови́нны на сꙋдѣ̀ рабы̑ твоѧ̑, ꙗ҆̀же преста́вилъ є҆сѝ вѣ̑рныѧ, но ᲂу҆поко́й сло́ве, во свѣ́тлости ст҃ы́хъ твои́хъ, пѣ́ти бл҃гоꙋтро́бїе твоѐ.
Бг҃оро́диченъ: Мч҃нкѡвъ и҆ прпⷣбныхъ, и҆ прⷪ҇ро́кѡвъ всенепоро́чнаѧ, и҆ ст҃ы́хъ же́нъ, и҆ всѣ́хъ первосщ҃е́нникѡвъ сщ҃еннопожи́вшихъ, ты̀ є҆сѝ сла́ва вои́стиннꙋ, съ ни́миже чти́мъ тѧ̀.
И҆́нъ
І҆рмо́съ: Ꙗ҆́коже дре́вле бл҃гочести̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ, свѣ́тлымъ бж҃ества̀ ѻ҆гне́мъ и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.
И҆́же всѣ̑мъ живонача́льнаѧ, вина́ же и҆ си́ла твори́тельнаѧ, сло́ве бж҃їй, ѡ҆бѣща́нныѧ мч҃нкѡмъ пи́щи сподо́би дꙋ́шы преста́вленныхъ ра̑бъ твои́хъ. бл҃гослове́нъ є҆сѝ бж҃е ѻ҆тє́цъ на́шихъ.
Ѡ҆ тѣлесѣ́хъ ᲂу҆́бѡ ꙗ҆́кѡ тлѣ́нныхъ, до́блественнѣ неради́ша сла́внїи мч҃нцы хрⷭ҇тѐ: ны́нѣ же со дерзнове́нїемъ мо́лѧтсѧ къ тебѣ̀: дꙋ́шы поко́й преста́вленныхъ ра̑бъ твои́хъ. ѻ҆тє́цъ на́шихъ бж҃е, бл҃гослове́нъ є҆сѝ.
Сла́ва: Тро́стїю крⷭ҇тною подписа́лъ є҆сѝ ѡ҆ставле́нїе грѣхѡ́въ всѣ̑мъ вѣ̑рнымъ, є҆мꙋ́же ны́нѣ дꙋ́шы, ꙗ҆̀же преста́вилъ є҆сѝ къ тебѣ̀, причасти́тисѧ сподо́би, и҆ весе́лїемъ пѣ́ти тѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
И҆ ны́нѣ: Сло́во ѻ҆́ч҃ее, и҆́же всѧ̑ во́лею содѣва́ѧй, є҆стество̀ человѣ́ческое погребе́ное страстьмѝ.ꙗ҆́кѡ бг҃ъ ѡ҆бновѝ: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀, и҆ го́ры, и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ и҆ и҆зба́вителѧ бл҃гослови́те, и҆ превозноси́те во всѧ̑ вѣ́ки.
Нанесе́нїемъ ра̑нъ, и҆ болѣ́зней приложе́ньми ѡ҆бдержи́ми ѕѣлѡ̀, не ѿверго́стесѧ и҆́стиннагѡ живота̀, гдⷭ҇ни стрⷭ҇тоте́рпцы, ни и҆стꙋка̑ннымъ пода́сте по́чєсти, пре́лести лꙋка́вѣй.
Свѣти̑ла, ꙗ҆́коже на свѣ́щницѣхъ положе́ни, честны́хъ добродѣ́телей, всѣ́хъ ѡ҆зари́сте дꙋ́шы, всѧ́кꙋ тьмꙋ̀ ѿгна́вше стрⷭ҇тоте́рпцы сщ҃еннодѣ́йственнїи, нбⷭ҇нымъ ᲂу҆мовѡ́мъ сожи́телїе.
Достохва́льнїи прⷪ҇ро́цы, и҆ прпⷣбныхъ сосло́вїе, и҆ же́нъ всѣ́хъ бл҃гоговѣ́йныхъ мно́жество достосла́вное, да воспое́тсѧ досто́йнѡ, ѡ҆ на́съ молѧ́щесѧ сп҃сꙋ̀ и҆ бг҃ꙋ.
Сла́ва: Ты̀ и҆́же живы́ми ѡ҆блада́ѧй, ꙗ҆̀же ѿ землѝ преста́вилъ є҆сѝ вѣ̑рныѧ, со ст҃ы́ми во свѣ́тѣ лица̀ твоегѡ̀ ᲂу҆чинѝ, проще́нїе прегрѣше́нїй, мно́гагѡ ра́ди, сп҃се, млⷭ҇рдїѧ подаѧ̀ си̑мъ.
Бг҃оро́диченъ: Многопѣ́таѧ дв҃а, прⷪ҇ро́кѡвъ ѡ҆глаше́нїе, ст҃и́телей и҆ страда́льцєвъ, и҆ прпⷣбныхъ ᲂу҆добре́нїе, и҆ же́нъ ст҃ы́хъ ра́дость, да пое́тсѧ по до́лгꙋ во вѣ́ки.
И҆́нъ
І҆рмо́съ: Слꙋжи́ти живо́мꙋ бг҃ꙋ, въ вавѷлѡ́нѣ ѻ҆́троки претерпѣ́вше, ѡ҆ мꙋсїкі́йскихъ ѻ҆рга́нѣхъ неради́ша, и҆ посредѣ̀ пла́мене стоѧ́ще, бг҃олѣ́пнꙋю пѣ́снь воспѣва́хꙋ глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а.
Сы́й сокро́вище безсме́ртїѧ, ты̀ живонача́льниче, мє́ртвымъ нетлѣ́нїе провозвѣсти́лъ є҆сѝ, є҆́же твои̑мъ мч҃нкѡмъ, хрⷭ҇тѐ, бл҃гоче́стнѡ вѣ́рою тебѣ̀ пою́щымъ дарова́лъ є҆сѝ: бл҃гослови́те всѧ̑ дѣла̀ гдⷭ҇нѧ гдⷭ҇а.
Мꙋ́дростїю дꙋхо́вною, и҆ терпѣ́нїемъ дѣ́лъ крѣ́пцыи страда́льцы ѡ҆ мꙋ́кахъ неради́ша, дꙋша́мъ преста́влєннымъ ѿ хрⷭ҇та̀ ѡ҆ставле́нїѧ про́сѧтъ, зовꙋ́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
Сла́ва: Ѡ҆чи́сти бл҃же, копїе́мъ ре́бръ твои́хъ растерза́въ рꙋкописа́нїе къ тебѣ̀ преста́вленныхъ, и҆ средогра́дїе ѿе́мъ прегрѣше́нїй, пѣсносло́вити тѧ̀ прїе́мъ и҆́хъ сп҃се, бл҃говолѝ: бл҃гослови́те всѧ̑ дѣла̀ гдⷭ҇нѧ гдⷭ҇а..
И҆ ны́нѣ: Ѻ҆́блакъ тѧ̀ мы́сленный претрꙋ́ждшымсѧ жа́ждею ᲂу҆мерщвле́нїѧ, дв҃о чⷭ҇таѧ, вѣ́мы, во́дꙋ жи́вꙋ ѡ҆ставле́нїѧ и҆сточа́ющꙋ, и҆ мє́ртвымъ безсме́ртїе всѣ̑мъ подаю́щꙋю, вѣ́рою при́снѡ зовꙋ́щымъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а.
Пѣ́снь ѳ҃
І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше ѿ ко́рене дв҃дова.
Ꙗ҆́коже ѻ҆вча́та приведо́стесѧ закла́вшемꙋсѧ на́съ ра́ди, и҆ бж҃е́ственныѧ ли́ки а҆́гг҃лъ и҆спо́лнисте ра́дости, стрⷭ҇тоте́рпцы хрⷭ҇тѡ́вы. тѣ́мже мл҃твами ва́шими всѣ́хъ ᲂу҆тверди́те, и҆ ѿ врага̀ вре́дныѧ пре́лести всѣ́хъ и҆зба́вите.
Ꙗ҆́кѡ свѣти́льницы живо́тное сло́во и҆мꙋ́ще, просвѣти́сте дꙋ́шы, первосщ҃е́нницы хрⷭ҇тѡ́вы сщ҃е́ннѣйшїи, бж҃е́ственныѧ сла́вы прича́стницы: ꙗ҆́кѡ ѻ҆́гнь прїи́мше дх҃а прпⷣбнїи, стра̑сти попали́сте, и҆ і҆́дѡльское разжиза́нїе погꙋби́сте.
Со прⷪ҇ро́ки ст҃ы́ми почти́мъ прпⷣбныхъ мно́жество, пре́жде зако́на, и҆ въ зако́нѣ возсїѧ́вшихъ житїе́мъ чи́стымъ, же́нъ же ст҃ы́хъ ли́ки восхва́лимъ, и҆ возопїи́мъ: гдⷭ҇и, мл҃твами и҆́хъ сп҃сѝ всѣ́хъ на́съ.
Сла́ва: Погребе́нїе твоѐ хрⷭ҇тѐ, и҆ воскрⷭ҇нїе, всѣ̑мъ бы́сть живо́тъ. сегѡ̀ ра́ди дерза́юще вопїе́мъ тѝ: со всѣ́ми и҆збра́нными вѣ̑рныѧ, ꙗ҆̀же прїѧ́лъ є҆сѝ рабы̑ твоѧ̑ ᲂу҆поко́й си́хъ согрѣшє́нїѧ всѧ̑ проща́ѧ, ꙗ҆́кѡ бг҃ъ пребл҃гі́й.
Бг҃оро́диченъ: Стра́шно мѣ́сто сїѐ, возопѝ, є҆гда̀ і҆а́кѡвъ твоѐ воѡбраже́нїе въ лѣ́ствицѣ ви́дѣ, бцⷣе, нело́жнѣ: мч҃нкѡвъ сла́во, и҆ прпⷣбныхъ похвало̀, а҆́гг҃лѡвъ ᲂу҆краше́нїе, и҆ всѣ́хъ прⷪ҇ро́кѡвъ, и҆ вѣ́рныхъ сп҃се́нїе.
И҆́нъ
І҆рмо́съ: Кꙋпино́ю и҆ ѻ҆гне́мъ пропи́саннꙋю въ сїна́и законополо́жникꙋ мѡѷсе́ю, и҆ бж҃їй во чре́вѣ неѡпа́льнѡ заче́ншꙋю ѻ҆́гнь, всесвѣ́тлꙋю и҆ негаси́мꙋю свѣщꙋ̀, сꙋ́щꙋю бцⷣꙋ пѣ́сньми чтꙋ́ще велича́емъ.
Ны́нѣ ꙗ҆́кѡ є҆ди́нъ бл҃гъ, и҆ чл҃вѣколю́бецъ бг҃ъ, преста́влєнныѧ къ тебѣ̀, мч҃нкъ мольба́ми, въ странѣ̀ кро́ткихъ землѝ вселѝ, разрѣше́нїе прегрѣше́нїй подаѧ̀ млⷭ҇тиве си̑мъ, да непреста́ннѡ пѣ́сньми тѧ̀ велича́емъ.
Во ст҃ы́хъ селе́нїихъ, въ нѣ́дрѣхъ а҆враа́ма, ꙗ҆̀же прїѧ́лъ є҆сѝ хрⷭ҇тѐ, причтѝ съ првⷣными твои́ми: и҆дѣ́же сїѧ́етъ свѣ́тъ лица̀ твоегѡ̀ неизрече́нный и҆ бж҃е́ственный, и҆ пребыва́ющее во вѣ́ки вои́стиннꙋ присносꙋ́щное ра́дованїе.
Бл҃же́нныѧ твоеѧ̀ жи́зни, и҆ вѣ́чныхъ бла̑гъ непреста́нныѧ пи́щи, весе́лїѧ и҆́стиннагѡ сподо́би рабы̑ твоѧ̑, ꙗ҆̀же преста́вилъ є҆сѝ во́лею жизнода́вче, въ мѣ́стѣ ѕла́чнѣ, на вода́хъ поко́йныхъ.
И҆ ны́нѣ: Ꙗ҆́кѡ ст҃ы́й ковче́гъ, и҆ свидѣ́нїѧ ски́нїѧ законода́вца бг҃а, прїѧ́ла є҆сѝ во ᲂу҆тро́бѣ всенепоро́чнаѧ зижди́телѧ твоего̀, и҆зрече́нїе дре́внїѧ клѧ́твы, и҆ зако́нъ сме́рти свое́ю сме́ртїю и҆спрове́ргшаго.
Та́же, Досто́йно є҆́сть: Є҆ктенїа̀, и҆ свѣти́ленъ, и҆ ѱалмы̀ ѻ҆бы́чны.
На хвали́техъ стїхи̑ры мꙋ́ченичны, гла́съ г҃:
Ст҃ы́хъ мч҃никъ па́мѧть, прїиди́те лю́дїе, всѝ почти́мъ, ꙗ҆́кѡ позо́ръ бы́ша а҆́гг҃лѡмъ и҆ человѣ́кѡмъ и҆ побѣ́ды вѣнцы̀ ѿ хрⷭ҇та̀ прїѧ́ша, и҆ мо́лѧтсѧ ѡ҆ дꙋша́хъ на́шихъ.
Царе́й и҆ мꙋчи́телей стра́хъ ѿри́нꙋша хрⷭ҇тѡ́вы во́ини, и҆ бл҃годерзнове́ннѡ и҆ мꙋ́жески того̀ и҆сповѣ́даша, всѧ́ческихъ гдⷭ҇а бг҃а и҆ цр҃ѧ̀ на́шего, и҆ мо́лѧтсѧ ѡ҆ дꙋша́хъ на́шихъ.
Си̑лы ст҃ы́хъ а҆́гг҃лъ ᲂу҆диви́шасѧ мч҃нчєскимъ страда́нїємъ, ꙗ҆́кѡ пло́тїю сме́ртною ѡ҆бложе́ни, ѡ҆ мꙋ́кахъ неради́ша, подѡ́бницы бы́вше стрⷭ҇те́мъ сп҃са хрⷭ҇та̀, и҆ мо́лѧтсѧ ѡ҆ дꙋша́хъ на́шихъ.
Ꙗ҆́кѡ свѣти̑ла въ мі́рѣ сїѧ́ете, и҆ по сме́рти ст҃і́и мч҃нцы, по́двигомъ до́брымъ подви́гшесѧ: и҆ и҆мꙋ́ще дерзнове́нїе, хрⷭ҇та̀ ᲂу҆моли́те, поми́ловатисѧ дꙋша́мъ на́шымъ.
Ме́ртвенъ: Человѣ́цы, что̀ всꙋ́е мѧте́мсѧ; пꙋ́ть кра́токъ є҆́сть, теце́мъ: ды́мъ є҆́сть житїѐ, па́ра, пе́рсть и҆ пе́пелъ: вма́лѣ ꙗ҆влѧ́етсѧ, и҆ вско́рѣ погиба́етъ. тѣ́мже хрⷭ҇тꙋ̀ безсме́ртномꙋ цр҃ю̀ возопїи́мъ: преста́влєнныѧ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще ᲂу҆ тебѐ.
Сла́ва, и҆ ны́нѣ, бг҃оро́диченъ: Без̾ сѣ́мене зачала̀ є҆сѝ ѿ дх҃а ст҃а́гѡ, и҆ славосло́вѧще воспѣва́емъ тѧ̀: ра́дꙋйсѧ прест҃а́ѧ дв҃о.
На стїхо́внѣ стїхи̑ры ме́ртвены. Творе́нїе ѳеофа́ново, гла́съ г҃.
Подо́бенъ: Ве́лїѧ крⷭ҇та̀ твоегѡ̀:
Сла́влю крⷭ҇тъ тво́й чⷭ҇тны́й, и҆́мже живо́тъ дарова́сѧ, и҆ пи́щи наслажде́нїе, вѣ́рою и҆ любо́вїю тѧ̀ пою́щымъ, є҆ди́не многомлⷭ҇тиве. тѣ́мже вопїе́мъ тѝ хрⷭ҇тѐ бж҃е: преста́вльшыѧсѧ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще ᲂу҆ тебѐ.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Є҆ди́не млⷭ҇тиве и҆ бл҃гоꙋтро́бне, и҆мѣ́ѧй непостижи́мꙋю бл҃гости пꙋчи́нꙋ, свѣ́дый є҆стество̀ человѣ́ческое, є҆́же содѣ́лалъ є҆сѝ: тѧ̀ мо́лимъ хрⷭ҇тѐ бж҃е, преста́влєнныѧ ѿ на́съ ᲂу҆поко́й, и҆дѣ́же є҆́сть всѣ́хъ веселѧ́щихсѧ жили́ще ᲂу҆ тебѐ.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Оу҆снꙋ́въ во гро́бѣ ꙗ҆́кѡ человѣ́къ, си́лою же непобѣди́мою ꙗ҆́кѡ бг҃ъ воскр҃си́лъ є҆сѝ, ꙗ҆̀же во гробѣ́хъ спѧ́щыѧ, немѡ́лчныѧ пѣ̑сни тебѣ̀ приносѧ́щыѧ. тѣ́мже мо́лимъ тѧ̀ хрⷭ҇тѐ бж҃е: преста́влєнныѧ ѿ на́съ ᲂу҆поко́й, и҆дѣ́же є҆́сть всѣ́хъ веселѧ́щихсѧ жили́ще ᲂу҆ тебѐ.
Сла́ва, и҆ ны́нѣ, бг҃оро́диченъ: Свѣщꙋ̀ разꙋ́мнꙋю тѧ̀, носѧ́щꙋю свѣ́тъ бж҃ества̀, совокꙋ́пльшасѧ дебельствꙋ̀ человѣ́ческагѡ сꙋщества̀, бцⷣе, всѝ вѣ́мы: твоего̀ молѝ сн҃а и҆ бг҃а, преста́влєнныѧ ѿ на́съ ᲂу҆поко́ити, и҆дѣ́же є҆́сть всѣ́хъ веселѧ́щихсѧ ра́дованїе.
Та́же, Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ: тропа́рь, є҆ктенїа̀, и҆ ѿпꙋ́стъ. Та́же ча́съ пе́рвый, и҆ ѿпꙋ́стъ.
Въ сꙋббѡ́тꙋ бл҃жє́нны, гла́съ г҃:
Ѿве́ргша хрⷭ҇тѐ, за́повѣдь твою̀ пра́ѻтца а҆да́ма, и҆з̾ раѧ̀ и҆згна́лъ є҆сѝ: разбо́йника же ще́дре, и҆сповѣ́давша тѧ̀ на крⷭ҇тѣ̀, во́нь всели́лъ є҆сѝ, зовꙋ́ща: помѧни́ мѧ сп҃се, во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Ѻ҆́гнєннымъ ра́намъ примѣша́ющесѧ стрⷭ҇тоте́рпцы хрⷭ҇тѡ́вы, ро́сꙋ нбⷭ҇нꙋю ѡ҆брѣто́сте, прохлажда́ющꙋю же и҆ ᲂу҆крѣплѧ́ющꙋю ва́съ терпѣ́ти плѡтскі́ѧ гѡ́рькїѧ болѣ̑зни: тѣ́мже ѡ҆блегчева́ете всѧ́кꙋ болѣ́знь при́снѡ ѿ дꙋ́шъ на́шихъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Ст҃и́телїе сщ҃е́ннїи, прⷪ҇ро́цы сла́внїи, прпⷣбныхъ мно́жество, и҆ же́нъ бж҃е́ственныхъ собо́ръ, пострада́вшихъ вѣ́рою, и҆ низложи́вшихъ пре́лесть вра́жїю, нбⷭ҇нꙋю сла́вꙋ полꙋчи́ша: и҆́хже мл҃твами сп҃се, ᲂу҆ще́дри рабы̑ твоѧ̑.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
И҆дѣ́же сїѧ́етъ тво́й свѣ́тъ, во хра́мѣхъ и҆збра́нныхъ твои́хъ бж҃е, и҆дѣ́же пи́ща присносꙋ́щнаѧ, ꙗ҆̀же ѿ на́съ вѣ́рою преста́влєнныѧ ᲂу҆чинѝ і҆и҃се, презрѧ̀ и҆́хъ сп҃се, согрѣшє́нїѧ: да тѧ̀ влⷣко, прилѣ́жнѡ сла́вимъ.
Сла́ва: Ѻ҆ц҃ꙋ̀, и҆ сн҃ꙋ, и҆ дх҃ꙋ бж҃е́ственномꙋ, покланѧ́емсѧ вѣ́рнїи трⷪ҇цѣ несозда́ннѣй, въ трїе́хъ ли́цѣхъ, и҆ во є҆ди́номъ бж҃ествѣ̀, при́снѡ ѿ безпло́тныхъ си́лъ, въ трїе́хъ свѧще́нїихъ славосло́вимѣй вѣ́рнѡ.
И҆ ны́нѣ: Просвѣще́нїе и҆ ѡ҆чище́нїе, и҆з̾ тебѐ ꙗ҆ви́сѧ всѣ́хъ и҆зба́витель, бг҃ора́дованнаѧ влⷣчце, є҆го́же прилѣ́жнѡ молѝ въ бꙋ́дꙋщїй сꙋ́дъ стра́шный, ѡ҆сꙋжде́нїѧ всѧ́кагѡ на́съ и҆зба́вити пречⷭ҇таѧ, вѣ́рнѡ всегда̀ пою́щихъ тѧ̀.
Коне́цъ тре́тїемꙋ гла́сꙋ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.