Тропари воскресные по непорочных
Тропарѝ воскрⷭ҇ны,
пое́мїи по непоро́чнахъ въ недѣ́лѧхъ всегѡ̀ лѣ́та, гла́съ є҃:
На є҆ди́номъ ко́емждо тропарѣ̀ глаго́лемъ:
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.
А҆́гг҃льскїй собо́ръ ᲂу҆диви́сѧ, зрѧ̀ тебѐ въ ме́ртвыхъ вмѣни́вшасѧ, сме́ртнꙋю же сп҃се, крѣ́пость разори́вша, и҆ съ собо́ю а҆да́ма воздви́гша, и҆ ѿ а҆́да всѧ̑ свобо́ждша.
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.
Почто̀ мѵ́ра съ млⷭ҇тивными слеза́ми, ѽ ᲂу҆ч҃нцы растворѧ́ете; блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: ви́дите вы̀ гро́бъ, и҆ ᲂу҆разꙋмѣ́йте, сп҃съ бо воскр҃се ѿ гро́ба.
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.
Ѕѣлѡ̀ ра́нѡ мѷронѡ́сицы теча́хꙋ ко гро́бꙋ твоемꙋ̀ рыда́ющыѧ, но предста̀ къ ни̑мъ а҆́гг҃лъ, и҆ речѐ: рыда́нїѧ вре́мѧ преста̀, не пла́чите, воскр҃се́нїе же а҆пⷭ҇лѡмъ рцы́те.
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.
Мѷронѡ́сицы жєны̀ съ мѵ́ры прише́дшѧ ко гро́бꙋ твоемꙋ̀ сп҃се, рыда́хꙋ, а҆́гг҃лъ же къ ни̑мъ речѐ, глаго́лѧ: что̀ съ ме́ртвыми жива́го помышлѧ́ете; ꙗ҆́кѡ бг҃ъ бо воскр҃се ѿ гро́ба.
Сла́ва, трⷪ҇ченъ: Поклони́мсѧ ѻ҆ц҃ꙋ̀, и҆ є҆гѡ̀ сн҃ови, и҆ ст҃о́мꙋ дх҃ꙋ, ст҃ѣ́й трⷪ҇цѣ во є҆ди́номъ сꙋществѣ̀, съ серафі́мы зовꙋ́ще: ст҃ъ, ст҃ъ, ст҃ъ є҆сѝ гдⷭ҇и.
И҆ ны́нѣ, бг҃оро́диченъ: Жизнода́вца ро́ждши, грѣха̀ дв҃о а҆да́ма и҆зба́вила є҆сѝ, ра́дость же є҆́ѵѣ въ печа́ли мѣ́сто подала̀ є҆сѝ: па́дшыѧ же ѿ жи́зни, къ се́й напра́ви, и҆з̾ тебѐ воплоти́выйсѧ бг҃ъ и҆ чл҃вѣ́къ.
А҆ллилꙋ́їа,три́жды.
По всѧ̑ недѣ̑ли на Сла́ва стїхи́ра є҆ѵⷢ҇льскаѧ. И҆ ны́нѣ, бг҃оро́диченъ, гла́съ в҃:
Пребл҃гослове́нна є҆сѝ бцⷣе дв҃о, вопло́щшимъ бо сѧ и҆з̾ тебѐ а҆́дъ плѣни́сѧ, а҆да́мъ воззва́сѧ, клѧ́тва потреби́сѧ, є҆́ѵа свободи́сѧ, сме́рть ᲂу҆мертви́сѧ, и҆ мы̀ ѡ҆жи́хомъ. тѣ́мъ воспѣва́юще вопїе́мъ: бл҃гослове́нъ хрⷭ҇то́съ бг҃ъ, бл҃говоли́вый та́кѡ, сла́ва тебѣ̀.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.