А҆пⷭлы, и҆ є҆ѵⷢлїа ѻ҆́бщїи коемꙋ́ждо ст҃о́мꙋ

А҆пⷭлы, и҆ є҆ѵⷢлїа ѻ҆́бщїи коемꙋ́ждо ст҃о́мꙋ

<<см҃з: 493>>

[глⷡ҇а м҃а] А҆ПО́СТОЛИ И҆ Є҆Ѵⷢ҇ЛЇѦ Ѻ҆́БЩЫѦ

коемꙋ́ждо ст҃о́мꙋ.

Прⷪ҇ро́кꙋ и҆лїѝ:

А҆пⷭ҇лъ, ѿ собо́рнагѡ посла́нїѧ і҆а́кѡвлѧ чте́нїе, зача́ло н҃з.

Бра́тїе, ѡ҆́бразъ прїими́те ѕлострада́нїѧ и҆ долготерпѣ́нїѧ прⷪ҇ро́ки, и҆̀же глаго́лаша и҆́менемъ гдⷭ҇нимъ. Сѐ бл҃жи́мъ терпѧ́щыѧ: терпѣ́нїе і҆́ѡвле слы́шасте, и҆ кончи́нꙋ гдⷭ҇ню ви́дѣсте, ꙗ҆́кѡ многомлⷭ҇тивъ є҆́сть гдⷭ҇ь, и҆ ще́дръ. Пре́жде же всѣ́хъ, бра́тїе моѧ̀, не клени́тесѧ, ни нб҃омъ, ни земле́ю: ни и҆но́ю ко́ею клѧ́твою: бꙋ́ди же ва́мъ, є҆́же є҆́й, є҆́й: и҆ є҆́же нѝ, нѝ: да не въ лицемѣ́рїе впаде́те. Ѕлостра́ждетъ ли кто̀ въ ва́съ; да мл҃твꙋ дѣ́етъ. бл҃годꙋ́шствꙋетъ ли кто̀; да пое́тъ. Боли́тъ ли кто̀ въ ва́съ; да призове́тъ пресвѵ́теры цр҃кѡ́вныѧ, и҆ да мл҃твꙋ сотворѧ́тъ над̾ ни́мъ, пома́завше є҆го̀ є҆ле́емъ во и҆́мѧ гдⷭ҇не. И҆ мл҃тва вѣ́ры сп҃се́тъ болѧ́щаго. и҆ воздви́гнетъ є҆го̀ гдⷭ҇ь: и҆ а҆́ще грѣхѝ бꙋ́детъ сотвори́лъ, ѿпꙋ́стѧтсѧ є҆мꙋ̀. И҆сповѣ́дайте ᲂу҆́бѡ дрꙋ́гъ дрꙋ́гꙋ согрѣшє́нїѧ, и҆ моли́тесѧ дрꙋ́гъ за дрꙋ́га, ꙗ҆́кѡ да и҆сцѣлѣ́ете: мно́гѡ бо мо́жетъ мл҃тва првⷣнагѡ, поспѣ́шествꙋема. И҆лїа̀ человѣ́къ бѣ̀ подобостра́стенъ на́мъ, и҆ мл҃твою помоли́сѧ, да не бꙋ́детъ до́ждь: и҆ не ѡ҆дождѝ по землѝ лѣ́та трѝ и҆ мѣ́сѧцъ ше́сть. И҆ па́ки помоли́сѧ, и҆ не́бо до́ждь дадѐ, и҆ землѧ̀ прозѧбѐ пло́дъ сво́й. Бра́тїе, а҆́ще кто̀ въ ва́съ заблꙋ́дитъ ѿ пꙋтѝ и҆́стины, и҆ ѡ҆брати́тъ кто̀ є҆го̀: Да вѣ́сть, ꙗ҆́кѡ ѡ҆брати́вый грѣ́шника ѿ заблꙋжде́нїѧ пꙋтѝ є҆гѡ̀, сп҃се́тъ дꙋ́шꙋ ѿ сме́рти, и҆ покры́етъ мно́жество грѣхѡ́въ.

<<см҃з ѡ҆б.: 494>>

Є҆ѵⷢ҇лїе ѿ лꙋкѝ, зача́ло д҃і.

Во вре́мѧ ѻ҆́но, дивлѧ́хꙋсѧ наро́ди ѡ҆ словесѣ́хъ бл҃года́ти, и҆сходѧ́щихъ и҆з̾ ᲂу҆́стъ і҆и҃совыхъ, и҆ глаго́лахꙋ: не се́й ли є҆́сть сн҃ъ і҆ѡ́сифовъ; И҆ речѐ къ ни̑мъ: всѧ́кѡ рече́те мѝ при́тчꙋ сїю̀: врачꙋ̀, и҆сцѣли́сѧ са́мъ: є҆ли̑ка слы́шахомъ бы̑вшаѧ въ капернаꙋ́мѣ, сотворѝ и҆ здѣ̀ во ѻ҆те́чествїи свое́мъ. Рече́ же: а҆ми́нь глаго́лю ва́мъ, ꙗ҆́кѡ ни кото́рый прⷪ҇ро́къ прїѧ́тенъ є҆́сть во ѻ҆те́чествїи свое́мъ. Пои́стиннѣ же глаго́лю ва́мъ: мнѡ́ги вдови̑цы бѣ́ша во дни̑ и҆лїины̑ во і҆и҃ли, є҆гда̀ заключи́сѧ не́бо трѝ лѣ́та и҆ мѣ́сѧцъ ше́сть, ꙗ҆́кѡ бы́сть гла́дъ вели́къ по все́й землѝ. И҆ ни ко є҆ди́ной и҆́хъ по́сланъ бы́сть и҆лїа̀, то́кмѡ въ саре́птꙋ сїдѡ́нскꙋю, къ женѣ̀ вдови́цѣ. И҆ мно́зи прокаже́ни бѣ́хꙋ при є҆лїссе́и прⷪ҇ро́цѣ во і҆и҃ли: и҆ ни є҆ди́нъ же ѿ ни́хъ ѡ҆чи́стисѧ, то́кмѡ неема́нъ сѷрїани́нъ. И҆ и҆спо́лнишасѧ всѝ ꙗ҆́рости въ со́нмищи, слы́шавшїи сїѧ̑. И҆ воста́вше, и҆згна́ша є҆го̀ во́нъ и҆з̾ гра́да: и҆ ведо́ша є҆го̀ до верхꙋ̀ горы̀, на не́йже гра́дъ и҆́хъ со́зданъ бѧ́ше, да бы́ша є҆го̀ низри́нꙋли. Ѻ҆́нъ же проше́дъ посредѣ̀ и҆́хъ, и҆дѧ́ше.

Прⷪ҇ро́кѡмъ:

А҆пⷭ҇лъ, къ корі́нѳѧнѡмъ, зача́ло рн҃ѕ.

Бра́тїе, не дѣ́ти быва́йте ᲂу҆мы̀, но ѕло́бою младе́нствꙋйте, ᲂу҆мы́ же соверше́ни быва́йте. Въ зако́нѣ пи́шетъ: ꙗ҆́кѡ и҆ны́ми ѧ҆зы́ки, и҆ ᲂу҆стны̀ и҆ны́ми возглаго́лю лю́демъ си̑мъ: и҆ ни та́кѡ послꙋ́шаютъ менѐ, глаго́летъ гдⷭ҇ь. Тѣ́мже ѧ҆зы́цы въ зна́менїе сꙋ́ть не вѣ́рꙋющымъ, но невѣ̑рнымъ, а҆ проро́чество, не невѣ̑рнымъ, но вѣ́рꙋющымъ. А҆́ще ᲂу҆̀бо сни́детсѧ цр҃ковь всѧ̀ вкꙋ́пѣ, и҆ всѝ ѧ҆зы́ки глаго́лютъ: вни́дꙋтъ же и҆ неразꙋ́мивїи и҆лѝ невѣ́рнїи, не рекꙋ́тъ ли, ꙗ҆́кѡ бѣснꙋ́етесѧ; А҆́ще же всѝ проро́чествꙋютъ, вни́детъ же нѣ́кїй невѣ́ренъ, и҆лѝ невѣ́жда, ѡ҆блича́етсѧ всѣ́ми, и҆ и҆стѧзꙋ́етсѧ ѿ всѣ́хъ. И҆ <<см҃и: 495>> си́це та̑йнаѧ се́рдца є҆гѡ̀ ꙗ҆влє́на быва́ютъ: и҆ та́кѡ па́дъ ни́цъ, покло́нитсѧ бг҃ови, возвѣща́ѧ, ꙗ҆́кѡ вои́стиннꙋ бг҃ъ съ ва́ми є҆́сть.

Є҆ѵⷢ҇лїе ѿ матѳе́а, зача́ло ч҃ѕ.

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: го́ре ва́мъ кни̑жницы и҆ фарїсе́є лицемѣ́ри, ꙗ҆́кѡ зи́ждете гро́бы прⷪ҇ро́чєскїѧ, и҆ кра́сите ра̑ки првⷣныхъ. И҆ глаго́лете: а҆́ще бы́хомъ бы́ли во дни̑ ѻ҆тє́цъ на́шихъ, не бы́хомъ ᲂу҆́бѡ ѻ҆́бщницы и҆̀мъ бы́ли въ кро́ви прⷪ҇рѡ́къ. Тѣ́мже са́ми свидѣ́тельствꙋете себѣ̀, ꙗ҆́кѡ сы́нове є҆стѐ и҆зби́вшихъ прⷪ҇ро́ки. И҆ вы̀ и҆спо́лните мѣ́рꙋ ѻ҆тє́цъ ва́шихъ. Ѕмїѧ̑, порождє́нїѧ є҆хі́днѡва, ка́кѡ ᲂу҆бѣжитѐ ѿ сꙋда̀ ѻ҆гнѧ̀ гее́нскагѡ; Сегѡ̀ ра́ди сѐ а҆́зъ послю̀ къ ва́мъ прⷪ҇ро́ки, и҆ премꙋ́дры, и҆ кни́жники: и҆ ѿ ни́хъ ᲂу҆бїе́те и҆ ра́спнете, и҆ ѿ ни́хъ бїе́те на со́нмищахъ ва́шихъ, и҆ и҆зжене́те ѿ гра́да во гра́дъ. Ꙗ҆́кѡ да прїи́детъ на вы̀ всѧ́ка кро́вь пра́ведна, пролива́емаѧ на землѝ, ѿ кро́ве а҆́велѧ пра́веднагѡ, до кро́ве заха́рїи сы́на варахі́ина, є҆го́же ᲂу҆би́сте междꙋ̀ цр҃ковїю и҆ ѻ҆лтаре́мъ. А҆ми́нь глаго́лю ва́мъ, ꙗ҆́кѡ прїи́дꙋтъ всѧ̑ сїѧ̑ на ро́дъ се́й. І҆ерⷭ҇ли́ме, і҆ерⷭ҇ли́ме, и҆зби́вый прⷪ҇ро́ки, и҆ ка́менїемъ побива́ѧй пѡ́сланныѧ къ немꙋ̀, колькра́ты восхотѣ́хъ собра́ти ча̑да твоѧ̑, ꙗ҆́коже собира́етъ ко́кошь птенцы̀ своѧ̑ под̾ крилѣ̀, и҆ не восхотѣ́сте! Сѐ ѡ҆ставлѧ́етсѧ ва́мъ до́мъ ва́шъ пꙋ́стъ. Глаго́лю бо ва́мъ, ꙗ҆́кѡ не и҆́мате менѐ ви́дѣти ѿсе́лѣ, до́ндеже рече́те: бл҃гослове́нъ грѧды́й во и҆́мѧ гдⷭ҇не.

А҆пⷭ҇лꙋ є҆ди́номꙋ и҆ мнѡ́гимъ:

А҆пⷭ҇лъ, къ корі́нѳѧнѡмъ, зача́ло рл҃а.

Бра́тїе, бг҃ъ ны̀ посла́нники послѣ̑днїѧ ꙗ҆вѝ ꙗ҆́кѡ насме́ртники: занѐ позо́ръ бы́хомъ мі́рꙋ, и҆ а҆́гг҃лѡмъ и҆ человѣ́кѡмъ. Мы̀ ᲂу҆́бѡ бꙋ́и хрⷭ҇та̀ ра́ди, вы́ же мꙋ́дри ѡ҆ хрⷭ҇тѣ̀: <<см҃и ѡ҆б.: 496>> мы̀ не́мощни, вы́ же крѣ́пцы: вы̀ сла́вни, мы́ же безче́стни. До ны́нѣшнѧгѡ часа̀ и҆ а҆́лчемъ, и҆ жа́ждемъ, и҆ наготꙋ́емъ, и҆ стра́ждемъ и҆ скита́емсѧ, И҆ трꙋжда́емсѧ, дѣ́лающе свои́ми рꙋка́ми: ᲂу҆корѧ́еми, бл҃гословлѧ́емъ: гони́ми, терпи́мъ: хꙋ́лими, ᲂу҆тѣша́емсѧ: ꙗ҆́коже ѻ҆тре́би мі́рꙋ бы́хомъ, всѣ̑мъ попра́нїе досе́лѣ. Не срамлѧ́ѧ ва́съ сїѧ̑ пишꙋ̀, но ꙗ҆́коже ча̑да моѧ̑ возлю́блєннаѧ наказꙋ́ю. А҆́ще бо и҆ мнѡ́ги пѣ́стꙋны и҆́мате ѡ҆ хрⷭ҇тѣ̀, но не мнѡ́ги ѻ҆тцы̀: ѡ҆ хрⷭ҇тѣ́ бо і҆и҃сѣ бл҃говѣствова́нїемъ а҆́зъ вы̀ роди́хъ. Молю́ же ва́съ: подо́бни мнѣ̀ быва́йте, ꙗ҆́коже а҆́зъ хрⷭ҇тꙋ̀.

А҆пⷭ҇лꙋ и҆ безме́здникѡмъ:

Є҆ѵⷢ҇лїе, ѿ матѳе́а, зача́ло л҃д:

Во вре́мѧ ѻ҆́но, ви́дѣвъ і҆и҃съ наро́ды, млⷭ҇рдова ѡ҆ ни́хъ, ꙗ҆́кѡ бѧ́хꙋ смѧте́ни, и҆ ѿве́ржени, ꙗ҆́кѡ ѻ҆́вцы не и҆мꙋ́щыѧ па́стырѧ. Тогда̀ глаго́ла ᲂу҆ч҃нкѡ́мъ свои̑мъ: жа́тва ᲂу҆́бѡ мно́га, дѣ́лателей же ма́лѡ. Моли́тесѧ ᲂу҆̀бо гдⷭ҇и́нꙋ жа́твы, ꙗ҆́кѡ да и҆зведе́тъ дѣ́латєли на жа́твꙋ свою̀. И҆ призва̀ ѻ҆бана́десѧть ᲂу҆ч҃нкѝ своѧ̑, дадѐ и҆̀мъ вла́сть на дꙋсѣ́хъ нечи́стыхъ, ꙗ҆́кѡ да и҆зго́нѧтъ и҆̀хъ, и҆ цѣли́ти всѧ́къ недꙋ́гъ, и҆ всѧ́кꙋ болѣ́знь. Сїѧ̑ ѻ҆бана́десѧть посла̀ і҆и҃съ, заповѣ́да и҆̀мъ, глаго́лѧ: на пꙋ́ть ꙗ҆зы̑къ не и҆ди́те, и҆ во гра́дъ самарѧ́нскїй не вни́дите. И҆ди́те же па́че ко ѻ҆вца́мъ поги́бшымъ до́мꙋ і҆и҃лева. Ходѧ́ще же проповѣ́дꙋйте, глаго́люще: ꙗ҆́кѡ прибли́жисѧ црⷭ҇твїе нбⷭ҇ное. Болѧ́щыѧ и҆сцѣлѧ́йте, прокажє́нныѧ ѡ҆чища́йте, мє́ртвыѧ воскр҃ша́йте, бѣ́сы и҆згонѧ́йте: тꙋ́не прїѧ́сте, тꙋ́не дади́те.

А҆пⷭ҇лѡмъ:

Є҆ѵⷢ҇лїе ѿ лꙋкѝ, зача́ло н҃.

Во вре́мѧ ѻ҆́но, ꙗ҆́вль гдⷭ҇ь и҆ и҆нѣ́хъ се́дмьдесѧтъ ᲂу҆ч҃нкъ свои́хъ, и҆ посла̀ и҆̀хъ по двѣма̀ пред̾ лице́мъ свои́мъ, во всѧ́къ гра́дъ и҆ мѣ́сто, а҆́може хотѧ́ше са́мъ и҆тѝ. Глаго́лаше <<см҃ѳ: 497>> же къ ни̑мъ: жа́тва ᲂу҆́бѡ мно́га, дѣ́лателей же ма́лѡ: моли́тесѧ ᲂу҆̀бо гдⷭ҇и́нꙋ жа́твѣ, да и҆зведе́тъ дѣ́латєли на жа́твꙋ свою̀. И҆ди́те: сѐ а҆́зъ посыла́ю вы̀, ꙗ҆́кѡ а҆́гнцы посредѣ̀ волкѡ́въ. Не носи́те влага́лища: ни пи́ры, ни сапогѝ: и҆ никого́же на пꙋтѝ цѣлꙋ́йте. Во́ньже а҆́ще до́мъ вни́дете, пе́рвѣе глаго́лите: ми́ръ до́мꙋ семꙋ̀. И҆ а҆́ще ᲂу҆́бѡ бꙋ́детъ тꙋ̀ сы́нъ ми́ра, почі́етъ на не́мъ ми́ръ ва́шъ: а҆́ще ли же нѝ, къ ва́мъ возврати́тсѧ. Въ то́мъ же домꙋ̀ пребыва́йте, ꙗ҆дꙋ́ще, и҆ пїю́ще, ꙗ҆̀же сꙋ́ть ᲂу҆ ни́хъ: досто́инъ бо є҆́сть дѣ́латель мзды̀ своеѧ̀. не преходи́те и҆з̾ до́мꙋ въ до́мъ. И҆ во́ньже а҆́ще гра́дъ вхо́дите, и҆ прїе́млютъ вы̀, ꙗ҆ди́те предлага́ємаѧ ва́мъ. И҆ и҆сцѣли́те недꙋ̑жныѧ, и҆̀же сꙋ́ть въ не́мъ, и҆ глаго́лите и҆̀мъ: прибли́жисѧ на вы̀ црⷭ҇твїе бж҃їе. Во́ньже а҆́ще гра́дъ вхо́дите, и҆ не прїе́млютъ ва́съ, и҆зше́дше на распꙋ̑тїѧ є҆гѡ̀, рцы́те: И҆ пра́хъ прилѣ́пшїй на́съ ѿ гра́да ва́шегѡ, ѿтрѧса́емъ ва́мъ: ѻ҆ба́че сїѐ вѣ́дите, ꙗ҆́кѡ прибли́жисѧ на вы̀ црⷭ҇твїе бж҃їе. Глаго́лю ва́мъ, ꙗ҆́кѡ содо́млѧнѡмъ въ де́нь то́й ѿра́днѣе бꙋ́детъ, не́же гра́дꙋ томꙋ̀. Го́ре тебѣ̀ хѡразі́не, го́ре тебѣ̀ виѳсаі́до, ꙗ҆́кѡ а҆́ще въ тѵ́рѣ и҆ сїдѡ́нѣ бы́ша си̑лы бы́ли бы́вшыѧ въ ва́ю, дре́вле ᲂу҆́бѡ во вре́тищи и҆ пе́пелѣ сѣдѧ́ще пока́ѧлисѧ бы́ша. Ѻ҆ба́че тѵ́рꙋ и҆ сїдѡ́нꙋ ѿра́днѣе бꙋ́детъ на сꙋдѣ̀, не́же ва́ма. И҆ ты̀ капернаꙋ́ме, и҆́же до нб҃съ вознесы́йсѧ, до а҆́да низведе́шисѧ.

Ст҃и́телю є҆ди́номꙋ и҆ мнѡ́гимъ:

А҆пⷭ҇лъ ко є҆вре́ємъ, зача́ло ти҃і.

Бра́тїе, тако́въ на́мъ подоба́ше а҆рхїере́й, прпⷣбенъ, неѕло́бивъ, безскве́рненъ, ѿлꙋче́нъ ѿ грѣ̑шникъ, и҆ вы́шше нб҃съ бы́въ: И҆́же не и҆́мать по всѧ̑ дни̑ нꙋ́жды, ꙗ҆́коже первосщ҃е́нницы, пре́жде ѡ҆ свои́хъ грѣсѣ́хъ жє́ртвы приноси́ти, пото́мъ же ѡ҆ людски́хъ: сїе́ бо сотворѝ є҆ди́ною, себѐ прине́съ. Зако́нъ бо человѣ́ки поставлѧ́етъ первосщ҃е́нники, и҆мꙋ́щыѧ не́мощь: <<см҃ѳ ѡ҆б.: 498>> сло́во же клѧ́твенное, є҆́же по зако́нѣ, сы́на во вѣ́ки соверше́нна. Глава́ же ѡ҆ глаго́лемыхъ, такова̀ и҆́мамы первосщ҃е́нника, и҆́же сѣ́де ѡ҆деснꙋ́ю прⷭ҇то́ла вели́чествїѧ на нб҃сѣ́хъ: Ст҃ы̑мъ слꙋжи́тель и҆ ски́нїи и҆́стиннѣй, ю҆́же водрꙋзѝ гдⷭ҇ь, а҆ не человѣ́къ.

Ст҃и́телю:

Є҆ѵⷢ҇лїе ѿ і҆ѡа́нна, зача́ло л҃ѕ.

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆́зъ є҆́смь две́рь, мно́ю а҆́ще кто̀ вни́детъ, сп҃се́тсѧ, и҆ вни́детъ, и҆ и҆зы́детъ, и҆ па́жить ѡ҆брѧ́щетъ. Та́ть не прихо́дитъ, ра́звѣ да ᲂу҆кра́детъ, и҆ ᲂу҆бїе́тъ, и҆ погꙋби́тъ: а҆́зъ прїидо́хъ да живо́тъ и҆́мꙋтъ, и҆ ли́шше и҆́мꙋтъ. А҆́зъ є҆́смь па́стырь до́брый: па́стырь до́брый дꙋ́шꙋ свою̀ полага́етъ за ѻ҆́вцы. А҆ нае́мникъ, и҆́же нѣ́сть па́стырь, є҆мꙋ́же не сꙋ́ть ѻ҆́вцы своѧ̑, ви́дитъ во́лка грѧдꙋ́ща, и҆ ѡ҆ставлѧ́етъ ѻ҆́вцы, и҆ бѣ́гаетъ, и҆ во́лкъ расхи́титъ и҆̀хъ, и҆ распꙋ́дитъ ѻ҆́вцы. А҆ нае́мникъ бѣжи́тъ, ꙗ҆́кѡ нае́мникъ є҆́сть, и҆ не ради́тъ ѡ҆ ѻ҆вца́хъ. А҆́зъ є҆́смь па́стырь до́брый, и҆ зна́ю моѧ̑, и҆ зна́ютъ мѧ̀ моѧ̑. Ꙗ҆́коже зна́етъ мѧ̀ ѻ҆ц҃ъ, и҆ а҆́зъ зна́ю ѻ҆ц҃а̀: и҆ дꙋ́шꙋ мою̀ полага́ю за ѻ҆́вцы. И҆ и҆́ны ѻ҆́вцы и҆́мамъ, ꙗ҆̀же не сꙋ́ть ѿ двора̀ сегѡ̀, и҆ ты̑ѧ мѝ подоба́етъ привестѝ: и҆ гла́съ мо́й ᲂу҆слы́шатъ, и҆ бꙋ́детъ є҆ди́но ста́до, и҆ є҆ди́нъ па́стырь.

Ст҃и́телємъ:

Є҆ѵⷢ҇лїе ѿ матѳе́а, зача́ло а҃і.

Речѐ гдⷭ҇ь свои̑мъ ᲂу҆ч҃нкѡ́мъ: вы̀ є҆стѐ свѣ́тъ мі́ра: не мо́жетъ гра́дъ ᲂу҆кры́тисѧ верхꙋ̀ горы̀ стоѧ̀. Нижѐ вжига́ютъ свѣти́льника, и҆ поставлѧ́ютъ є҆го̀ под̾ спꙋ́домъ, но на свѣ́щницѣ, и҆ свѣ́титъ всѣ̑мъ, и҆̀же въ хра́минѣ [сꙋ́ть]. Та́кѡ да просвѣти́тсѧ свѣ́тъ ва́шъ пред̾ человѣ́ки, ꙗ҆́кѡ да ви́дѧтъ ва̑ша дѡ́браѧ дѣла̀: и҆ просла́вѧтъ ѻ҆ц҃а̀ ва́шего, и҆́же на нб҃сѣ́хъ. [Да] не мни́те, ꙗ҆́кѡ прїидо́хъ разори́ти зако́нъ, <<с҃н: 499>> и҆лѝ прⷪ҇ро́ки: не прїидо́хъ разори́ти, но и҆спо́лнити. А҆ми́нь бо глаго́лю ва́мъ: до́ндеже пре́йдетъ нб҃о и҆ землѧ̀, і҆ѡ́та є҆ди́на, и҆лѝ є҆ди́на черта̀ не пре́йдетъ ѿ зако́на, до́ндеже всѧ̑ бꙋ́дꙋтъ. И҆́же а҆́ще разори́тъ є҆ди́нꙋ за́повѣдей си́хъ ма́лыхъ, и҆ наꙋчи́тъ та́кѡ человѣ́ки, мні́й нарече́тсѧ въ црⷭ҇твїи нбⷭ҇нѣмъ: а҆ и҆́же сотвори́тъ и҆ наꙋчи́тъ, се́й ве́лїй нарече́тсѧ въ црⷭ҇твїи нбⷭ҇нѣмъ.

Прпⷣбномꙋ є҆ди́номꙋ и҆ прпⷣбнымъ, и҆ хрⷭ҇та̀ ра́ди ю҆рѡ́дивымъ:

А҆пⷭ҇лъ къ гала́тѡмъ, зача́ло сг҃і.

Бра́тїе, пло́дъ дꙋхо́вный є҆́сть: любы̀, ра́дость, ми́ръ, долготерпѣ́нїе, бл҃гость, млⷭ҇рдїе, вѣ́ра, Кро́тость, воздержа́нїе, на таковы́хъ нѣ́сть зако́на. А҆ и҆̀же хрⷭ҇то́вы сꙋ́ть, пло́ть распѧ́ша со страстьмѝ и҆ похотьмѝ. А҆́ще живе́мъ дꙋ́хомъ, дꙋ́хомъ и҆ да хо́димъ. Не быва́имъ тщесла́вни, дрꙋ́гъ дрꙋ́га раздража́юще, дрꙋ́гъ дрꙋ́гꙋ зави́дѧще. Бра́тїе, а҆́ще и҆ впаде́тъ человѣ́къ въ нѣ́кое прегрѣше́нїе, вы̀ дꙋхо́внїи и҆справлѧ́йте такова́го дꙋ́хомъ кро́тости: блюды́й себѐ, да не и҆ ты̀ и҆скꙋше́нъ бꙋ́деши. Дрꙋ́гъ дрꙋ́га тѧготы̑ носи́те, и҆ та́кѡ и҆спо́лните зако́нъ хрⷭ҇то́въ.

Є҆ѵⷢ҇лїе ѿ матѳе́а, зача́ло м҃г.

Речѐ гдⷭ҇ь свои̑мъ ᲂу҆ч҃нкѡ́мъ: всѧ̑ мнѣ̀ предана̑ сꙋ́ть ѻ҆ц҃е́мъ мои́мъ: и҆ никто́же зна́етъ сн҃а, то́кмѡ ѻ҆ц҃ъ: ни ѻ҆ц҃а̀ кто̀ зна́етъ, то́кмѡ сн҃ъ: и҆ є҆мꙋ́же а҆́ще во́литъ сн҃ъ ѿкры́ти. Прїиди́те ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ᲂу҆поко́ю вы̀. Возми́те и҆́го моѐ на себѐ, и҆ наꙋчи́тесѧ ѿ менѐ, ꙗ҆́кѡ кро́токъ є҆́смь и҆ смире́нъ се́рдцемъ: и҆ ѡ҆брѧ́щете поко́й дꙋша́мъ ва́шымъ. И҆́го бо моѐ бл҃го, и҆ бре́мѧ моѐ легко̀ є҆́сть.

<<с҃н ѡ҆б.: 500>>

Мч҃нкꙋ є҆ди́номꙋ:

А҆пⷭ҇лъ къ тїмоѳе́ю, зача́ло сч҃в.

Ча́до тїмоѳе́е, возмога́й ѡ҆ бл҃года́ти, ꙗ҆́же ѡ҆ хрⷭ҇тѣ̀ і҆и҃сѣ: И҆ ꙗ҆̀же слы́шалъ є҆сѝ ѿ менѐ мно́гими свидѣ́тєли, сїѧ̑ преда́ждь вѣ̑рнымъ человѣ́кѡмъ, и҆̀же дово́льни бꙋ́дꙋтъ и҆ и҆ны́хъ наꙋчи́ти. Ты̀ ᲂу҆́бѡ ѕлопостраждѝ, ꙗ҆́кѡ до́бръ во́инъ і҆и҃съ хрⷭ҇то́въ. Никто́же бо во́инъ быва́ѧ ѡ҆бѧзꙋ́етсѧ кꙋ́плѧми жите́йскими, да воево́дѣ ᲂу҆го́денъ бꙋ́детъ. А҆́ще же и҆ постра́ждетъ кто̀, не вѣнча́етсѧ, а҆́ще незако́ннѡ мꙋ́ченъ бꙋ́детъ. Трꙋжда́ющемꙋсѧ дѣ́лателю пре́жде подоба́етъ ѿ плода̀ вкꙋси́ти. Разꙋмѣ́й ꙗ҆̀же глаго́лю: да да́стъ ᲂу҆́бѡ тебѣ̀ гдⷭ҇ь ра́зꙋмъ ѡ҆ все́мъ. Помина́й гдⷭ҇а і҆и҃са хрⷭ҇та̀ воста́вшаго ѿ ме́ртвыхъ, ѿ сѣ́мене дв҃дова, по бл҃говѣствова́нїю моемꙋ̀. Въ не́мже ѕлостраждꙋ̀ да́же до ᲂу҆́зъ ꙗ҆́кѡ ѕлодѣ́й: но сло́во бж҃їе не вѧ́жетсѧ. Сегѡ̀ ра́ди всѧ̑ терплю̀ и҆збра́нныхъ ра́ди, да и҆ ті́и сп҃се́нїе ᲂу҆лꙋча́тъ, є҆́же ѡ҆ хрⷭ҇тѣ̀ і҆и҃сѣ, со сла́вою вѣ́чною.

Є҆ѵⷢ҇лїе ѿ лꙋкѝ, зача́ло ѯ҃г.

Речѐ гдⷭ҇ь: ничто́же покрове́но є҆́сть, є҆́же не ѿкры́етсѧ: и҆ та́йно, є҆́же не разꙋмѣ́етсѧ. Занѐ є҆ли̑ка во тьмѣ̀ рѣ́сте, во свѣ́тѣ ᲂу҆слы́шитсѧ: и҆ є҆́же ко ᲂу҆́хꙋ глаго́ласте во хра́мѣхъ, проповѣ́стсѧ на кро́вѣхъ. Глаго́лю же ва́мъ дрꙋгѡ́мъ свои̑мъ: не ᲂу҆бо́йтесѧ ѿ ᲂу҆бива́ющихъ тѣ́ло, и҆ пото́мъ не могꙋ́щихъ ли́шше что̀ сотвори́ти: Сказꙋ́ю же ва́мъ, когѡ̀ ᲂу҆бо́йтесѧ: ᲂу҆бо́йтесѧ и҆мꙋ́щагѡ вла́сть по ᲂу҆бїе́нїи воврещѝ въ де́брь ѻ҆́гненнꙋю: є҆́й глаго́лю ва́мъ, тогѡ̀ ᲂу҆бо́йтесѧ. Не пѧ́ть ли пти́цъ цѣ́нитсѧ пѣ́нѧзема двѣма̀; и҆ ни є҆ди́на ѿ ни́хъ нѣ́сть забве́на пред̾ бг҃омъ. Но и҆ власѝ главы̀ ва́шеѧ всѝ и҆зочте́ни сꙋ́ть. не ᲂу҆бо́йтесѧ ᲂу҆́бѡ: мно́зѣхъ пти́цъ ᲂу҆́нши є҆стѐ вы̀. Глаго́лю же ва́мъ: всѧ́къ и҆́же а҆́ще и҆сповѣ́сть мѧ̀ пред̾ человѣ́ки, и҆ сн҃ъ чл҃вѣ́ческїй и҆сповѣ́сть є҆го̀ пред̾ <<сн҃а: 501>> а҆́гг҃лы бж҃їими: ѿвергі́йсѧ менѐ пред̾ человѣ́ки, ѿве́рженъ бꙋ́детъ пред̾ а҆́гг҃лы бж҃їими. И҆ всѧ́къ и҆́же рече́тъ сло́во на сн҃а чл҃вѣ́ческаго, ѡ҆ста́витсѧ є҆мꙋ̀: а҆ на ст҃а́го дх҃а хꙋ́лившемꙋ, не ѡ҆ста́витсѧ. Є҆гда́ же приведꙋ́тъ вы̀ на собѡ́рища, и҆ вла̑сти, и҆ влады́чєства, не пецы́тесѧ ка́кѡ и҆лѝ что̀ ѿвѣща́ете, и҆лѝ что̀ рече́те: ст҃ы́й во дх҃ъ наꙋчи́тъ вы̀ въ то́й ча́съ, ꙗ҆̀же подоба́етъ рещѝ.

Мч҃нкѡмъ и҆ прпⷣбномч҃нкѡмъ:

А҆пⷭ҇лъ къ ри́млѧнѡмъ, зача́ло ч҃ѳ.

Бра́тїе, вѣ́мы, ꙗ҆́кѡ лю́бѧщымъ бг҃а всѧ̑ поспѣшествꙋ́ютъ во бл҃го́е, сꙋ́щымъ по пред̾ꙋвѣ́дѣнїю зва̑ннымъ. И҆̀хже бо пред̾ꙋвѣ́дѣ, тѣ́хъ и҆ пред̾ꙋста́ви соѡбра̑знымъ бы́ти ѡ҆́бразꙋ сн҃а своегѡ̀, ꙗ҆́кѡ бы́ти є҆мꙋ̀ перворо́днꙋ во мно́гихъ бра́тїѧхъ. А҆ и҆̀хже пред̾ꙋста́ви, тѣ́хъ и҆ призва̀: а҆ и҆̀хже призва̀, си́хъ и҆ ѡ҆правда̀, а҆ и҆̀хже ѡ҆правда̀, си́хъ и҆ просла́ви. Что̀ ᲂу҆́бѡ рече́мъ къ си̑мъ; а҆́ще бг҃ъ по на́съ, кто̀ на ны̀; И҆́же ᲂу҆́бѡ своегѡ̀ сн҃а не пощадѣ̀, но за ны̀ всѧ̑ пре́далъ є҆́сть є҆го̀: ка́кѡ ᲂу҆̀бо не и҆ съ ни́мъ всѧ̑ на́мъ да́рствꙋетъ; Кто̀ пое́млетъ на и҆збра̑нныѧ бж҃їѧ; бг҃ъ ѡ҆правда́ѧй. Кто̀ ѡ҆сꙋжда́ѧй; хрⷭ҇то́съ і҆и҃съ ᲂу҆ме́рый, па́че же и҆ воскр҃сы́й, и҆́же и҆ є҆́сть ѡ҆деснꙋ́ю бг҃а, и҆́же и҆ хода́тайствꙋетъ ѡ҆ на́съ. Кто́ ны разлꙋчи́тъ ѿ любвѐ бж҃їѧ; ско́рбь ли, и҆лѝ тѣснота̀, и҆лѝ гоне́нїе, и҆лѝ гла́дъ, и҆лѝ нагота̀, и҆лѝ бѣда̀, и҆лѝ ме́чь; ꙗ҆́коже є҆́сть пи́сано ꙗ҆́кѡ тебѐ ра́ди ᲂу҆мерщвлѧ́еми є҆смы̀ ве́сь де́нь, вмѣни́хомсѧ ꙗ҆́коже ѻ҆́вцы заколе́нїѧ. Но ѡ҆ си́хъ всѣ́хъ препобѣжда́емъ за возлю́бльшаго ны̀. И҆звѣсти́хсѧ бо, ꙗ҆́кѡ ни сме́рть, ни живо́тъ, ни а҆́гг҃ли, ни нача̑ла, нижѐ си̑лы, ни настоѧ̑щаѧ, ни грѧдꙋ̑щаѧ, Ни высота̀, ни глꙋбина̀, ни и҆́на тва́рь ка́ѧ, возмо́жетъ на́съ разлꙋчи́ти ѿ любвѐ бж҃їѧ, ꙗ҆́же ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.

<<сн҃а ѡ҆б.: 502>>

Є҆ѵⷢ҇лїе ѿ матѳе́а, зача́ло л҃ѕ.

Речѐ гдⷭ҇ь свои̑мъ ᲂу҆ч҃нкѡ́мъ: сѐ а҆́зъ посыла́ю ва́съ, ꙗ҆́кѡ ѻ҆́вцы посредѣ̀ волкѡ́въ: бꙋ́дите ᲂу҆́бѡ мꙋ́дри ꙗ҆́кѡ ѕмїѧ̑, и҆ цѣ́ли ꙗ҆́кѡ го́лꙋбїе. Внемли́те же ѿ человѣ̑къ: предадѧ́тъ бо вы̀ на со́нмы, и҆ на собо́рищахъ и҆́хъ бїю́тъ ва́съ. И҆ пред̾ влады́ки же и҆ цари̑ веде́ни бꙋ́дете менѐ ра́ди, во свидѣ́тельство и҆̀мъ и҆ ꙗ҆зы́кѡмъ. Є҆гда́ же предаю́тъ вы̀, не пецы́тесѧ, ка́кѡ и҆лѝ что̀ возглаго́лете: да́стсѧ бо ва́мъ въ то́й ча́съ, что̀ возглаго́лете. Не вы́ бо бꙋ́дете глаго́лющїи, но дх҃ъ ѻ҆ц҃а̀ ва́шегѡ глаго́лѧй въ ва́съ. Преда́стъ же бра́тъ бра́та на сме́рть, и҆ ѻ҆те́цъ ча́до: и҆ воста́нꙋтъ ча̑да на роди́тєли, и҆ ᲂу҆бїю́тъ и҆̀хъ. И҆ бꙋ́дете ненави́дими всѣ́ми, и҆́мене моегѡ̀ ра́ди: претерпѣ́вый же до конца̀, то́й сп҃се́нъ бꙋ́детъ.

Сщ҃енномч҃нкꙋ є҆ди́номꙋ и҆ мнѡ́гимъ, и҆ на собо́ры ст҃ы́хъ ѻ҆тє́цъ:

А҆пⷭ҇лъ ко є҆вре́ємъ, зача́ло тл҃д.

Бра́тїе, помина́йте наста́вники ва́шѧ, и҆̀же глаго́лаша ва́мъ. сло́во бж҃їе: и҆́хже взира́юще на сконча́нїе жи́тельства, подража́йте вѣ́рѣ и҆́хъ. І҆и҃съ хрⷭ҇то́съ, вчера̀ и҆ дне́сь, то́йже и҆ во вѣ́ки. Въ наꙋчє́нїѧ стра̑нна и҆ разли̑чна не прилага́йтесѧ: добро́ бо бл҃года́тїю ᲂу҆твержда́ти сердца̀, а҆ не бра́шны, ѿ ни́хже не прїѧ́ша по́льзы ходи́вшїи въ ни́хъ. И҆́мамы же ѻ҆лта́рь, ѿ негѡ́же не и҆́мꙋтъ вла́сти ꙗ҆́сти слꙋжа́щїи сѣ́ни. И҆́хже бо кро́вь живо́тныхъ вно́ситсѧ во ст҃а̑ѧ за грѣхѝ первосщ҃е́нникомъ, си́хъ тѣлеса̀ сжига́ютсѧ внѣ̀ ста́на. Тѣ́мже і҆и҃съ да ѡ҆ст҃и́тъ лю́ди свое́ю кро́вїю, внѣ̀ вра́тъ пострада́ти и҆зво́лилъ. Тѣ́мже ᲂу҆̀бо да и҆схо́димъ къ немꙋ̀ внѣ̀ ста́на поноше́нїе є҆гѡ̀ носѧ́ще. Не и҆́мамы бо здѣ̀ пребыва́ющагѡ гра́да, но грѧдꙋ́щагѡ взыскꙋ́емъ. Тѣ́мъ ᲂу҆̀бо прино́симъ же́ртвꙋ хвале́нїѧ вы́нꙋ бг҃ꙋ, си́рѣчь пло́дъ ᲂу҆сте́нъ и҆сповѣ́дающихсѧ <<сн҃в: 503>> и҆́мени є҆гѡ̀, Бл҃готворе́нїѧ же и҆ ѻ҆бще́нїѧ не забыва́йте: таковы́ми бо же́ртвами бл҃гоꙋгожда́етсѧ бг҃ъ.

Сщ҃енномч҃нкꙋ є҆ди́номꙋ и҆ мнѡ́гимъ:

Є҆ѵⷢ҇лїе ѿ лꙋкѝ, зача́ло ѯ҃з.

Речѐ гдⷭ҇ь: не бо́йсѧ ма́лое ста́до, ꙗ҆́кѡ бл҃гоизво́ли ѻ҆ц҃ъ ва́шъ да́ти ва́мъ црⷭ҇тво. Продади́те и҆мѣ̑нїѧ ва̑ша, и҆ дади́те ми́лѡстынѧ: сотвори́те себѣ̀ влага̑лища неветша́ющѧ, сокро́вище неѡскꙋдѣ́емо на нб҃сѣ́хъ, и҆дѣ́же та́ть не приближа́етсѧ, ни мо́ль растлѣва́етъ. И҆дѣ́же бо є҆́сть сокро́вище ва́ше, тꙋ̀ и҆ се́рдце ва́ше бꙋ́детъ. Да бꙋ́дꙋтъ чресла̀ ва̑ша препоѧ̑сана, и҆ свѣти́льницы горѧ́щїи: И҆ вы̀ подо́бни человѣ́кѡмъ ча́ющымъ гдⷭ҇а своегѡ̀, когда̀ возврати́тсѧ ѿ бра̑къ, да прише́дшꙋ и҆ толкнꙋ́вшꙋ, а҆́бїе ѿве́рзꙋтъ є҆мꙋ̀. Бл҃же́ни рабѝ ті́и, и҆̀хже прише́дъ гдⷭ҇ь ѡ҆брѧ́щетъ бдѧ́щѧ. а҆ми́нь глаго́лю ва́мъ, ꙗ҆́кѡ препоѧ́шетсѧ, и҆ посади́тъ и҆̀хъ: и҆ минꙋ́въ послꙋ́житъ и҆̀мъ. И҆ а҆́ще прїи́детъ во вторꙋ́ю стра́жꙋ, лю́бо въ тре́тїю стра́жꙋ прїи́детъ, и҆ ѡ҆брѧ́щетъ и҆̀хъ та́кѡ: бл҃же́ни сꙋ́ть рабѝ ті́и. Се́ же вѣ́дите, ꙗ҆́кѡ а҆́ще бы вѣ́далъ господи́нъ хра́мины, въ кі́й ча́съ та́ть прїи́детъ, бдѣ́лъ ᲂу҆́бѡ бы̀, и҆ не бы да́лъ подкопа́ти до́мꙋ своегѡ̀. И҆ вы̀ ᲂу҆́бѡ бꙋ́дите гото́ви: ꙗ҆́кѡ во́ньже ча́съ не мнитѐ, сн҃ъ чл҃вѣ́ческїй прїи́детъ.

На собо́ры ст҃ы́хъ ѻ҆тє́цъ:

Є҆ѵⷢ҇лїе ѿ і҆ѡа́нна, зача́ло н҃ѕ.

Во вре́мѧ ѻ҆́но, возведѐ і҆и҃съ ѻ҆́чи своѝ на нб҃о, и҆ речѐ: ѻ҆́ч҃е, прїи́де ча́съ: просла́ви сн҃а твоего̀, да и҆ сн҃ъ тво́й просла́витъ тѧ̀. ꙗ҆́коже да́лъ є҆сѝ є҆мꙋ̀ вла́сть всѧ́кїѧ пло́ти, да всѧ́ко є҆́же да́лъ є҆сѝ є҆мꙋ̀, да́стъ и҆̀мъ живо́тъ вѣ́чный. Се́ же є҆́сть живо́тъ вѣ́чный, да зна́ютъ тебѐ є҆ди́наго и҆́стиннаго бг҃а, и҆ є҆го́же посла́лъ є҆сѝ і҆и҃съ хрⷭ҇та̀. Въ просла́вихъ тѧ̀ на землѝ: дѣ́ло соверши́хъ, є҆́же да́лъ є҆сѝ мнѣ̀, да сотворю̀. И҆ ны́нѣ просла́ви мѧ̀, ты̀ ѻ҆́ч҃е, ᲂу҆ тебѐ самагѡ̀ сла́вою, ю҆́же <<сн҃в ѡ҆б.: 504>> и҆мѣ́хъ ᲂу҆ тебѐ, пре́жде мі́ръ не бы́сть. Ꙗ҆ви́хъ и҆́мѧ твоѐ человѣ́кѡмъ, и҆̀хже да́лъ є҆сѝ мнѣ̀ ѿ мі́ра, твоѝ бѣ́ша, и҆ да́лъ є҆сѝ, и҆ сло́во твоѐ сохрани́ша. Ны́нѣ разꙋмѣ́ша, ꙗ҆́кѡ всѧ̑, є҆ли̑ка да́лъ є҆сѝ мнѣ̀, ѿ тебѐ сꙋ́ть. ꙗ҆́кѡ глаго́лы, и҆̀хже да́лъ є҆сѝ мнѣ̀, да́хъ и҆̀мъ: и҆ ті́и прїѧ́ша, и҆ разꙋмѣ́ша вои́стиннꙋ, ꙗ҆́кѡ ѿ тебѐ и҆зыдо́хъ, и҆ вѣ́роваша, ꙗ҆́кѡ ты́ мѧ посла̀. А҆́зъ ѡ҆ си́хъ молю̀: не ѡ҆ все́мъ мі́рѣ молю̀, но ѡ҆ тѣ́хъ, и҆̀хже да́лъ є҆сѝ мнѣ̀, ꙗ҆́кѡ твоѝ сꙋ́ть. И҆ моѧ̑ всѧ̑, твоѧ̑ сꙋ́ть: и҆ твоѧ̑, моѧ̑: и҆ просла́вихсѧ въ ни́хъ. И҆ ктомꙋ̀ нѣ́смь въ мі́рѣ, и҆ сі́и въ мі́рѣ сꙋ́ть, и҆ а҆́зъ къ тебѣ̀ грѧдꙋ̀. ѻ҆́ч҃е ст҃ы́й, соблюдѝ и҆̀хъ во и҆́мѧ твоѐ, и҆̀хже да́лъ є҆сѝ мнѣ̀, да бꙋ́дꙋтъ є҆ди́но ꙗ҆́коже и҆ мы̀. Є҆гда̀ бѣ́хъ съ ни́ми въ мі́рѣ, а҆́зъ соблюда́хъ и҆̀хъ во и҆́мѧ твоѐ: и҆̀хже да́лъ є҆сѝ мнѣ̀, сохрани́хъ, и҆ никто́же ѿ ни́хъ поги́бе, то́кмѡ сы́нъ поги́бельный, да сбꙋ́детсѧ писа́нїе. Ны́нѣ же къ тебѣ̀ грѧдꙋ̀, и҆ сїѧ̑ глаго́лю въ мі́рѣ, да и҆́мꙋтъ ра́дость мою̀ и҆спо́лненꙋ въ себѣ̀.

Прпⷣбномч҃нкꙋ є҆ди́номꙋ:

А҆пⷭ҇лъ къ тїмоѳе́ю, зача́ло сч҃а.

Ча́до тїмоѳе́е, не постыди́сѧ стрⷭ҇тїю гдⷭ҇а на́шегѡ і҆и҃са хрⷭ҇та̀, ни мно́ю ю҆́зникомъ є҆гѡ̀: но спостраждѝ бл҃говѣствова́нїю хрⷭ҇то́вꙋ, по си́лѣ бг҃а, Сп҃сшагѡ на́съ, и҆ призва́вшагѡ зва́нїемъ ст҃ы́мъ, не по дѣлѡ́мъ на́шымъ, но по своемꙋ̀ бл҃говоле́нїю и҆ бл҃года́ти, да́ннѣй на́мъ ѡ҆ хрⷭ҇тѣ̀ і҆и҃сѣ, пре́жде лѣ́тъ вѣ́чныхъ: Ꙗ҆́вльшисѧ же ны́нѣ просвѣще́нїемъ сп҃си́телѧ на́шегѡ і҆и҃са хрⷭ҇та̀, разрꙋши́вшагѡ ᲂу҆́бѡ сме́рть, и҆ возсїѧ́вшагѡ жи́знь и҆ нетлѣ́нїе бл҃говѣствова́нїемъ: Въ не́же поста́вленъ бы́хъ а҆́зъ проповѣ́дникъ и҆ а҆по́столъ, и҆ ᲂу҆чи́тель ꙗ҆зы́кѡвъ. Є҆ѧ́же ра́ди вины̀ и҆ сїѧ̑ страждꙋ̀, но не стыждꙋ́сѧ: вѣ́мъ бо, є҆мꙋ́же вѣ́ровахъ, и҆ и҆звѣсти́хсѧ, ꙗ҆́кѡ си́ленъ є҆́сть преда́нїе моѐ сохрани́ти въ де́нь ѻ҆́нъ. Ѡ҆́бразъ и҆мѣ́й здра́выхъ слове́съ, <<сн҃г: 505>> и҆̀хже ѿ менѐ слы́шалъ є҆сѝ въ вѣ́рѣ и҆ любвѝ, ꙗ҆̀же ѡ҆ хрⷭ҇тѣ̀ і҆и҃сѣ. До́брое завѣща́нїе соблюдѝ, дх҃омъ ст҃ы́мъ живꙋ́щимъ въ на́съ. Вѣ́си ли сїѐ, ꙗ҆́кѡ ѿврати́шасѧ ѿ менѐ всѝ, и҆̀же ѿ а҆сі́и, ѿ ни́хже є҆́сть фѷге́ллъ и҆ є҆рмоге́нъ; Да да́стъ же млⷭ҇ть гдⷭ҇ь ѻ҆нисі́форовꙋ до́мꙋ, ꙗ҆́кѡ мно́гажды мѧ̀ ᲂу҆поко́и, и҆ вери́гъ мои́хъ не постыдѣ́сѧ. Но прише́дъ въ ри́мъ, то́щнѣе взыска̀ мѧ̀ и҆ ѡ҆брѣ́те. Да да́стъ є҆мꙋ̀ гдⷭ҇ь ѡ҆брѣстѝ млⷭ҇ть ѿ гдⷭ҇а въ де́нь ѻ҆́нъ: и҆ є҆ли́ка во є҆фе́сѣ послꙋжи́ ми, до́брѣе ты̀ вѣ́си.

Є҆ѵⷢ҇лїе ѿ ма́рка, зача́ло л҃з.

Речѐ гдⷭ҇ь: и҆́же хо́щетъ по мнѣ̀ и҆тѝ, да ѿве́ржетсѧ себѐ, и҆ во́зметъ кре́стъ сво́й, и҆ по мнѣ̀ грѧде́тъ. И҆́же бо а҆́ще хо́щетъ дꙋ́шꙋ свою̀ сп҃стѝ, погꙋби́тъ ю҆̀: а҆ и҆́же погꙋби́тъ дꙋ́шꙋ свою̀ менѐ ра́ди и҆ є҆ѵⷢ҇лїа, то́й сп҃се́тъ ю҆̀. Ка́ѧ бо по́льза человѣ́кꙋ, а҆́ще прїѡбрѧ́щетъ мі́ръ ве́сь, и҆ ѿтщети́тъ дꙋ́шꙋ свою̀; И҆лѝ что̀ да́стъ человѣ́къ и҆змѣ́нꙋ на дꙋшѝ свое́й; И҆́же бо а҆́ще постыди́тсѧ менѐ, и҆ мои́хъ слове́съ, въ ро́дѣ се́мъ прелюбодѣ́йнѣмъ и҆ грѣ́шнѣмъ, и҆ сн҃ъ чл҃вѣ́ческїй постыди́тсѧ є҆гѡ̀, є҆гда̀ прїи́детъ во сла́вѣ ѻ҆ц҃а̀ своегѡ̀ со а҆́гг҃лы ст҃ы́ми. И҆ глаго́лаше и҆̀мъ: а҆ми́нь глаго́лю ва́мъ, ꙗ҆́кѡ сꙋ́ть нѣ́цыи ѿ здѣ̀ стоѧ́щихъ, и҆̀же не и҆́мꙋтъ вкꙋси́ти сме́рти, до́ндеже ви́дѧтъ црⷭ҇твїе бж҃їе прише́дшее въ си́лѣ.

Мч҃нцѣ є҆ди́ной, и҆ мнѡ́гимъ:

А҆пⷭ҇лъ къ корі́нѳѧнѡмъ, зача́ло рп҃а.

Бра́тїе, поспѣ́шствꙋюще мо́лимъ, не вотщѐ бл҃года́ть бж҃їю прїѧ́ти ва́мъ. Глаго́летъ бо: во вре́мѧ прїѧ́тно послꙋ́шахъ тебѐ, и҆ въ де́нь сп҃се́нїѧ помого́хъ тѝ: сѐ ны́нѣ вре́мѧ бл҃гопрїѧ́тно, сѐ ны́нѣ, де́нь сп҃се́нїѧ: Ни є҆ди́но ни въ че́мже даю́ще претыка́нїе, да слꙋже́нїе безпоро́чно бꙋ́детъ. Но во все́мъ представлѧ́юще себѐ ꙗ҆́коже бж҃їѧ слꙋги̑ въ терпѣ́нїи <<сн҃г ѡ҆б.: 506>> мно́зѣ, въ ско́рбехъ, въ бѣда́хъ, въ тѣснота́хъ, Въ ра́нахъ, въ темни́цахъ, въ нестрое́нїихъ, въ трꙋдѣ́хъ, во бдѣ́нїихъ, въ поще́нїихъ, во ѡ҆чище́нїи, въ ра́зꙋмѣ, въ долготерпѣ́нїи, въ бл҃гости, въ дс҃ѣ ст҃ѣ, въ любвѝ нелицемѣ́рнѣ, Въ словесѝ и҆́стины, въ си́лѣ бж҃їей: ѻ҆рꙋ́жїи пра́вды, десны́ми и҆ шꙋ́ими, Сла́вою и҆ безче́стїемъ: гажде́нїемъ, и҆ бл҃гохвале́нїемъ: ꙗ҆́кѡ лестцы̀ и҆ и҆́стинни: ꙗ҆́кѡ незна́еми, и҆ познава́еми: ꙗ҆́кѡ ᲂу҆мира́юще, и҆ сѐ жи́ви є҆смы̀: ꙗ҆́кѡ наказꙋ́еми, а҆ не ᲂу҆мерщвлѧ́еми: ꙗ҆́кѡ скорбѧ́ще, при́снѡ же ра́дꙋющесѧ: ꙗ҆́кѡ ни́щи, а҆ мно́гихъ богатѧ́ще: ꙗ҆́кѡ ничто́же и҆мꙋ́ще, а҆ всѧ̑ содержа́ще.

Є҆ѵⷢ҇лїе ѿ ма́рка, зача́ло к҃а.

Во вре́мѧ ѻ҆́но, по і҆и҃сѣ и҆дѧ́хꙋ наро́ди мно́зи, и҆ ᲂу҆гнѣта́хꙋ є҆го̀. И҆ жена̀ нѣ́каѧ сꙋ́щи въ точе́нїи кро́ве лѣ́тъ двана́десѧте, И҆ мно́гѡ пострада́вши ѿ мнѡ́гъ врачє́въ, и҆ и҆зда́вши своѧ̑ всѧ̑, и҆ ни є҆ди́ныѧ по́льзы ѡ҆брѣ́тши, но па́че въ го́ршее прише́дши: слы́шавши ѡ҆ і҆и҃сѣ, прише́дши въ наро́дѣ созадѝ, прикоснꙋ́сѧ ри́зѣ є҆гѡ̀. Глаго́лаше бо: ꙗ҆́кѡ, а҆́ще прикоснꙋ́сѧ ри́замъ є҆гѡ̀, сп҃се́на бꙋ́дꙋ. И҆ а҆́бїе и҆зсѧ́кнꙋ и҆сто́чникъ кро́ве є҆ѧ̀: и҆ разꙋмѣ̀ тѣ́ломъ, ꙗ҆́кѡ и҆сцѣлѣ̀ ѿ ра́ны. И҆ а҆́бїе і҆и҃съ разꙋмѣ̀ въ себѣ̀ си́лꙋ и҆зше́дшꙋю ѿ негѡ̀, и҆ ѡ҆бра́щьсѧ въ наро́дѣ, глаго́лаше: кто̀ прикоснꙋ́сѧ ри́замъ мои̑мъ, И҆ глаго́лахꙋ є҆мꙋ̀ ᲂу҆ч҃нцы є҆гѡ̀: ви́диши наро́дъ ᲂу҆гнѣта́ющъ тѧ̀, и҆ глаго́леши: кто̀ сѧ̀ прикоснꙋ̀ мнѣ̀; И҆ ѡ҆бглѧ́даше ви́дѣти сотво́ршꙋю сїѐ. Жена́ же ᲂу҆боѧ́вшисѧ и҆ трепе́щꙋщи, вѣ́дѧщи є҆́же бы́сть є҆́й, прїи́де и҆ припадѐ къ немꙋ̀, и҆ речѐ є҆мꙋ̀ всю̀ и҆́стинꙋ. Ѻ҆́нъ же речѐ є҆́й: дщѝ, вѣ́ра твоѧ̀ сп҃се́ тѧ, и҆дѝ въ ми́рѣ, и҆ бꙋ́ди цѣла̀ ѿ ра́ны твоеѧ̀.

Прпⷣбнѣй женѣ̀ є҆ди́ной, и҆ мнѡ́гимъ:

А҆пⷭ҇лъ къ гала́тѡмъ, зача́ло с҃и.

Бра́тїе, пре́жде прише́ствїѧ вѣ́ры, под̾ зако́номъ стрего́ми бѣ́хомъ, затворе́ни въ хотѧ́щꙋю вѣ́рꙋ ѿкры́тисѧ. <<сн҃д: 507>> Тѣ́мже зако́нъ пѣ́стꙋнъ на́мъ бы́сть во хрⷭ҇тѣ̀ да ѿ вѣ́ры ѡ҆правди́мсѧ. Прише́дши же вѣ́рѣ, ᲂу҆жѐ не под̾ пѣ́стꙋномъ є҆смы̀. Є҆си́ бо вы̀ сн҃ове бж҃їи є҆стѐ, вѣ́рою ѡ҆ хрⷭ҇тѣ̀ і҆и҃сѣ. Є҆ли́цы бо во хрⷭ҇та̀ крⷭ҇ти́стесѧ, во хрⷭ҇та̀ ѡ҆блеко́стесѧ. Нѣ́сть і҆ꙋде́й, ни є҆́ллинъ: нѣ́сть ра́бъ, ни свобо́дь: нѣ́сть мꙋ́жескїй по́лъ, ни же́нскїй: вси́ бо вы̀ є҆ди́но є҆стѐ ѡ҆ хрⷭ҇тѣ̀ і҆и҃сѣ. А҆́ще ли вы̀ хрⷭ҇тѡ́вы, ᲂу҆̀бо а҆враа́мле сѣ́мѧ є҆стѐ, и҆ по ѡ҆бѣтова́нїю наслѣ̑дницы.

Є҆ѵⷢ҇лїе ѿ матѳе́а, зача́ло р҃д.

Речѐ гдⷭ҇ь при́тчꙋ сїю̀: ᲂу҆подо́бисѧ црⷭ҇твїе нбⷭ҇ное десѧти́мъ дѣ́вамъ, ꙗ҆̀же прїѧ́ша свѣти́льники своѧ̑, и҆ и҆зыдо́ша въ срѣ́тенїе женихꙋ̀. Пѧ́ть же бѣ̀ ѿ ни́хъ мꙋ̑дры, и҆ пѧ́ть ю҆рѡ́дивы. Ю҆рѡ́дивыѧ же прїе́мше свѣти́льники своѧ̑, не взѧ́ша съ собо́ю є҆ле́а. Мꙋ̑дрыѧ же прїѧ́ша є҆ле́й въ сосꙋ́дѣхъ со свѣти́льники свои́ми. Коснѧ́щꙋ же женихꙋ̀, воздрема́шасѧ всѧ̑, и҆ спа́хꙋ. Полꙋ́нощи же во́пль бы́сть: сѐ жени́хъ грѧде́тъ, и҆сходи́те въ срѣ́тенїе є҆гѡ̀. Тогда̀ воста́вше всѧ̑ дѣ̑вы ты̑ѧ, и҆ ᲂу҆краси́ша свѣти́льники своѧ̑, ю҆рѡ́дивыѧ же мꙋ̑дрымъ рѣ́ша: дади́те на́мъ ѿ є҆ле́а ва́шегѡ, ꙗ҆́кѡ свѣти́льницы на́ши ᲂу҆гаса́ютъ. Ѿвѣща́ша же мꙋ̑дрыѧ, глаго́люще: є҆да̀ ка́кѡ не доста́нетъ на́мъ и҆ ва́мъ; и҆ди́те же па́че къ продаю́щымъ, и҆ кꙋпи́те себѣ̀. И҆дꙋ́щымъ же и҆̀мъ кꙋпи́ти, прїи́де жени́хъ: и҆ готѡ́выѧ внидо́ша съ ни́мъ на бра́ки, и҆ затворе́ны бы́ша двє́ри. Послѣди́ же прїидо́ша и҆ про́чыѧ дѣ̑вы, глаго́люще: гдⷭ҇и, гдⷭ҇и, ѿве́рзи на́мъ. Ѻ҆́нъ же ѿвѣща́въ речѐ и҆̀мъ: а҆ми́нь глаго́лю ва́мъ, не вѣ́мъ ва́съ. Бди́те ᲂу҆́бѡ, ꙗ҆́кѡ не вѣ́сте днѐ, ни часа̀, во́ньже сн҃ъ чл҃вѣ́ческїй прїи́детъ.

И҆сповѣ́дникꙋ:

А҆пⷭ҇лъ къ є҆фесе́ємъ, зача́ло сл҃г.

Бра́тїе, возмога́йте ѡ҆ гдⷭ҇ѣ, и҆ въ держа́вѣ крѣ́пости є҆гѡ̀. Ѡ҆блецы́тесѧ во всѧ̑ ѻ҆рꙋ̑жїѧ бж҃їѧ, ꙗ҆́кѡ возмощѝ ва́мъ <<сн҃д ѡ҆б.: 508>> ста́ти проти́вꙋ ко́знемъ дїа́вольскимъ: ꙗ҆́кѡ нѣ́сть на́ша бра́нь къ кро́ви и҆ пло́ти, но къ нача́лѡмъ и҆ ко власте́мъ и҆ къ мїродержи́телємъ тьмы̀ вѣ́ка сегѡ̀, къ дꙋховѡ́мъ ѕло́бы поднебє́снымъ. Сегѡ̀ ра́ди прїими́те всѧ̑ ѻ҆рꙋ̑жїѧ бж҃їѧ, да возмо́жете проти́витисѧ въ де́нь лю́тъ, и҆ всѧ̑ содѣ́ѧвше ста́ти. Ста́ните ᲂу҆́бѡ препоѧ́сани чресла̀ ва̑ша и҆́стиною, и҆ ѡ҆бо́лкшесѧ въ бронѧ̀ пра́вды: И҆ ѡ҆бꙋ́вши но́зѣ во ᲂу҆гото́ванїе бл҃говѣствова́нїѧ ми́ра. Над̾ всѣ́ми же воспрїи́мше щи́тъ вѣ́ры, въ не́мже возмо́жете всѧ̑ стрѣ́лы лꙋка́вагѡ разжжє́нныѧ ᲂу҆гаси́ти: И҆ шле́мъ сп҃се́нїѧ воспрїими́те, и҆ ме́чь дх҃о́вный, и҆́же є҆́сть глаго́лъ бж҃їй.

Є҆ѵⷢ҇лїе ѿ лꙋкѝ, зача́ло ѯ҃д.

Речѐ гдⷭ҇ь: всѧ́къ и҆́же а҆́ще и҆сповѣ́сть мѧ̀ пред̾ человѣ́ки, и҆ сн҃ъ чл҃вѣ́ческїй и҆сповѣ́сть є҆го̀ пред̾ а҆́гг҃лы бж҃їими. А҆ ѿвергі́йсѧ менѐ пред̾ человѣ́ки, ѿве́рженъ бꙋ́детъ пред̾ а҆́гг҃лы бж҃їими. И҆ всѧ́къ и҆́же рече́тъ сло́во на сн҃а чл҃вѣ́ческаго, ѡ҆ста́витсѧ є҆мꙋ̀: а҆ на ст҃а́го дх҃а хꙋ́лившемꙋ, не ѡ҆ста́витсѧ. Є҆гда́ же приведꙋ́тъ вы̀ на собѡ́рища, и҆ вла̑сти, и҆ влады́чєства, не пецы́тесѧ, ка́кѡ и҆лѝ что̀ ѿвѣща́ете, и҆лѝ что̀ рече́те: ст҃ы́й бо дх҃ъ наꙋчи́тъ вы̀ въ то́й ча́съ, ꙗ҆̀же подоба́етъ рещѝ.

Безме́здникѡмъ:

А҆пⷭ҇лъ къ корі́нѳѧнѡмъ, зача́ло рн҃г.

Бра́тїе, вы̀ є҆стѐ тѣ́ло хрⷭ҇то́во, и҆ ᲂу҆́ди ѿ ча́сти. И҆ ѻ҆́вы ᲂу҆́бѡ положѝ бг҃ъ въ цр҃кви, пе́рвѣе а҆пⷭ҇лы, второ́е прⷪ҇ро́ки, тре́тїе ᲂу҆ч҃тли, пото́мъ же си̑лы: та́же дарова̑нїѧ и҆сцѣле́нїй, застꙋплє́нїѧ, правлє́нїѧ, ро́ди ѧ҆зы́кѡвъ. Є҆да̀ всѝ а҆пⷭ҇ли; є҆да̀ всѝ прⷪ҇ро́цы; є҆да̀ всѝ ᲂу҆чи́тели, є҆да̀ всѝ си̑лы; є҆да̀ всѝ дарова̑нїѧ и҆́мꙋтъ и҆сцѣле́нїй; є҆да̀ всѝ ѧ҆зы́ки глаго́лютъ; є҆да̀ всѝ сказꙋ́ютъ; ревнꙋ́йте же дарова́нїй бо́льшихъ, и҆ є҆щѐ по превосхожде́нїю пꙋ́ть ва́мъ показꙋ́ю. А҆́ще ѧ҆зы́ки человѣ́ческими <<сн҃є: 509>> глаго́лю и҆ а҆́гг҃льскими, любве́ же не и҆́мамъ, бы́хъ [ꙗ҆́кѡ] мѣ́дь звенѧ́щи, и҆лѝ кѷмва́лъ звѧца́ѧй. И҆ а҆́ще и҆́мамъ прⷪ҇ро́чество, и҆ вѣ́мъ та̑йны всѧ̑, и҆ ве́сь ра́зꙋмъ: и҆ а҆́ще и҆́мамъ всю̀ вѣ́рꙋ, ꙗ҆́кѡ и҆ го́ры преставлѧ́ти, любве́ же не и҆́мамъ, ничто́же є҆́смь. И҆ а҆́ще разда́мъ всѧ̑ и҆мѣ̑нїѧ моѧ̑, и҆ а҆́ще преда́мъ тѣ́ло моѐ во є҆́же сжещѝ є҆̀, любве́ же не и҆́мамъ, ника́ѧ по́льза мѝ є҆́сть. Любы̀ долготерпи́тъ, милосе́рдствꙋетъ: любы̀ не зави́дитъ, любы̀ не превозно́ситсѧ, не горди́тсѧ: Ни безчи́нствꙋетъ, не и҆́щетъ своѧ̑ си, не раздража́етсѧ, не мы́слитъ ѕла̀: Не ра́дꙋетсѧ ѡ҆ непра́вдѣ, ра́дꙋетсѧ же ѡ҆ и҆́стинѣ. Всѧ̑ лю́битъ, всемꙋ̀ вѣ́рꙋ є҆́млетъ, всѧ̑ ᲂу҆пова́етъ, всѧ̑ терпи́тъ: Любы̀ николи́же ѿпа́даетъ.

Є҆ѵⷢ҇лїе ѿ матѳе́а, а҆пⷭ҇лꙋ є҆ди́номꙋ: Ли́стъ см҃и ѡ҆б.

Безплѡ́тнымъ:

А҆пⷭ҇лъ къ є҆вре́ємъ, зача́ло т҃є.

Бра́тїе, а҆́ще глаго́ланное а҆́гг҃лы сло́во бы́сть и҆звѣ́стно, и҆ всѧ́ко престꙋпле́нїе и҆ ѡ҆слꙋша́нїе пра́ведное прїѧ́тъ мздовоздаѧ́нїе: Ка́кѡ мы̀ ᲂу҆бѣжи́мъ ѡ҆ толи́цѣмъ неради́вше сп҃се́нїи є҆́же зача́ло прїе́мше глаго́латисѧ ѡ҆ гдⷭ҇а, слы́шавшими въ на́съ и҆звѣсти́сѧ, Сосвидѣ́тельствꙋющꙋ бг҃ꙋ, зна́меньми же и҆ чꙋдесы̀, и҆ разли́чными си́лами, и҆ дх҃а ст҃а́гѡ раздѣле́ньми, по свое́й є҆мꙋ̀ во́ли. Не а҆́гг҃лѡмъ бо покорѝ бг҃ъ вселе́ннꙋю грѧдꙋ́щꙋю, ѡ҆ не́йже глаго́лемъ. Засвидѣ́тельствова же нѣ́гдѣ нѣ́кто, глаго́лѧ: что̀ є҆́сть человѣ́къ, ꙗ҆́кѡ по́мниши є҆го̀, и҆лѝ сн҃ъ чл҃вѣ́ческїй, ꙗ҆́кѡ посѣща́еши и҆̀; Оу҆ма́лилъ є҆сѝ є҆го̀ ма́лымъ нѣ́чимъ ѿ а҆́гг҃лъ: сла́вою и҆ че́стїю вѣнча́лъ є҆сѝ є҆го̀, и҆ поста́вилъ є҆сѝ є҆го̀ над̾ дѣ́лы рꙋкꙋ̀ твое́ю: Всѧ̑ покори́лъ є҆сѝ под̾ но́зѣ є҆гѡ̀. внегда́ же покори́ти є҆мꙋ̀ всѧ́чєскаѧ, ничто́же ѡ҆ста́ви є҆мꙋ̀ непокоре́но: ны́нѣ же не ᲂу҆̀ ви́димъ є҆мꙋ̀ всѧ́чєскаѧ покорє́на. А҆ ᲂу҆ма́ленаго ма́лымъ чи́мъ ѿ а҆́гг҃лъ ви́димъ і҆и҃са, за прїѧ́тїе сме́рти, сла́вою и҆ че́стїю вѣ́нчанна, <<сн҃є ѡ҆б.: 510>> ꙗ҆́кѡ да бл҃года́тїю бж҃їею за всѣ́хъ вкꙋ́ситъ сме́рти. Подоба́ше бо є҆мꙋ̀, є҆гѡ́же ра́ди всѧ́чєскаѧ, и҆ и҆́мже всѧ́чєскаѧ, приве́дшꙋ мно́ги сы́ны въ сла́вꙋ, нача́льника сп҃се́нїѧ и҆́хъ страда́ньми соверши́ти.

Є҆ѵⷢ҇лїе ѿ лꙋкѝ, зача́ло н҃а.

Речѐ гдⷭ҇ь свои̑мъ ᲂу҆ч҃нкѡ́мъ: слꙋ́шаѧй ва́съ, менѐ слꙋ́шаетъ: и҆ ѿмета́ѧйсѧ ва́съ, менѐ ѿмета́етсѧ. ѿмета́ѧйсѧ же менѐ, ѿмета́етсѧ посла́вшагѡ мѧ̀. Возврати́шасѧ же се́дмьдесѧтъ съ ра́достїю, глаго́люще: гдⷭ҇и, и҆ бѣ́си повинꙋ́ютсѧ на́мъ ѡ҆ и҆́мени твое́мъ. Рече́ же и҆̀мъ: ви́дѣхъ сатанꙋ̀ ꙗ҆́кѡ мо́лнїю съ нб҃сѐ спа́дша. Сѐ даю̀ ва́мъ вла́сть настꙋпа́ти на ѕмїю̀ и҆ на скорпі́ю, и҆ на всю̀ си́лꙋ вра́жїю: и҆ ничесѡ́же ва́съ вреди́тъ. Ѻ҆ба́че ѡ҆ се́мъ не ра́дꙋйтесѧ, ꙗ҆́кѡ дꙋ́си ва́мъ повинꙋ́ютсѧ: ра́дꙋйтесѧ же, ꙗ҆́кѡ и҆мена̀ ва̑ша напи̑сана сꙋ́ть на нб҃сѣ́хъ. Въ то́й ча́съ возра́довасѧ дх҃омъ і҆и҃съ, и҆ речѐ: и҆сповѣ́даю ти сѧ ѻ҆́ч҃е, гдⷭ҇и нб҃сѐ и҆ землѝ, ꙗ҆́кѡ ᲂу҆таи́лъ є҆сѝ сїѧ̑ ѿ премꙋ́дрыхъ и҆ разꙋ́мныхъ, и҆ ѿкры́лъ є҆сѝ та̑ младе́нцємъ: є҆́й ѻ҆́ч҃е, ꙗ҆́кѡ та́кѡ бы́сть бл҃говоле́нїе пред̾ тобо́ю.

Прⷣте́чи і҆ѡа́ннꙋ:

А҆пⷭ҇лъ дѣѧ́нїй, зача́ло л҃г.

Во дни̑ ѻ҆́ны, ꙗ҆́коже скончава́ше і҆ѡа́ннъ тече́нїе, глаго́лаше: кого́ мѧ непщꙋ́ете бы́ти, нѣ́смь а҆́зъ: но сѐ грѧде́тъ по мнѣ̀, є҆мꙋ́же нѣ́смь досто́инъ разрѣши́ти реме́нь сапогꙋ̀ є҆гѡ̀. Мꙋ́жїе бра́тїе, сы́нове ро́да а҆враа́млѧ, и҆ и҆̀же въ ва́съ боѧ́щїисѧ бг҃а, ва́мъ сло́во сп҃се́нїѧ сегѡ̀ посла́сѧ. Живꙋ́щїи бо во і҆ерꙋсали́мѣ, и҆ кнѧ́зи и҆́хъ сегѡ̀ неразꙋмѣ́вше, и҆ гла́сы прⷪ҇ро́чєскїѧ, по всѧ̑ сꙋббѡ́ты чтѡ́мыѧ, ѡ҆сꙋди́вше є҆го̀, и҆спо́лниша: И҆ ни є҆ди́ныѧ вины̀ сме́ртныѧ ѡ҆брѣ́тше, проси́ша ᲂу҆ пїла́та ᲂу҆би́ти є҆го̀. Ꙗ҆́коже сконча́ша всѧ̑, ꙗ҆̀же ѡ҆ не́мъ пи̑сана, сне́мше съ дре́ва, положи́ша во гро́бѣ. Бг҃ъ же воскр҃сѝ є҆го̀ <<сн҃ѕ: 511>> ѿ ме́ртвыхъ: И҆́же ꙗ҆ви́сѧ на дни̑ мнѡ́ги, совозше́дшымъ съ ни́мъ ѿ галїле́и во і҆ерꙋсали́мъ, и҆̀же ны́нѣ сꙋ́ть свидѣ́телїе є҆гѡ̀ къ лю́демъ. И҆ мы̀ ва́мъ бл҃говѣствꙋ́емъ ѡ҆бѣтова́нїе бы́вшее ко ѻ҆ц҃є́мъ, ꙗ҆́кѡ сїѐ бг҃ъ и҆спо́лнилъ є҆́сть на́мъ ча́дѡмъ и҆́хъ, воздви́гъ і҆и҃са.

Є҆ѵⷢ҇лїе ѿ матѳе́а, зача́ло м҃.

Во вре́мѧ ѻ҆́но, слы́шавъ і҆ѡа́ннъ во ᲂу҆зи́лищи дѣла̀ хрⷭ҇тѡ́ва, посла̀ два̀ ѿ ᲂу҆чени̑къ свои́хъ, речѐ є҆мꙋ̀: ты́ ли є҆сѝ грѧды́й, и҆лѝ и҆но́гѡ ча́емъ, И҆ ѿвѣща́въ і҆и҃съ речѐ и҆̀мъ: ше́дша возвѣсти́та і҆ѡа́ннови, ꙗ҆̀же слы́шита и҆ ви́дита. Слѣпі́и прозира́ютъ, и҆ хро́мїи хо́дѧтъ: прокаже́ннїи ѡ҆чища́ютсѧ, и҆ глꙋсі́и слы́шатъ: ме́ртвїи востаю́тъ, и҆ ни́щїи бл҃говѣствꙋ́ютъ. И҆ бл҃же́нъ є҆́сть, и҆́же а҆́ще не соблазни́тсѧ ѡ҆ мнѣ̀. Тѣ́ма же и҆сходѧ́щема, нача́тъ і҆и҃съ наро́дѡмъ глаго́лати ѡ҆ і҆ѡа́ннѣ: чесѡ̀ и҆зыдо́сте въ пꙋсты́ню ви́дѣти; тро́сть ли вѣ́тромъ коле́блемꙋ; Но чесѡ̀ и҆зыдо́сте ви́дѣти; человѣ́ка ли къ мѧ́кки ри̑зы ѡ҆блече́нна; сѐ и҆̀же мѧ̑ккаѧ носѧ́щїи, въ домѣ́хъ ца́скихъ сꙋ́ть. Но чесѡ̀ и҆зыдо́сте ви́дѣти; прⷪ҇ро́ка ли; є҆́й, глаго́лю ва́мъ, и҆ ли́шше прⷪ҇ро́ка. Се́й бо є҆́сть, ѡ҆ не́мже є҆́сть пи́сано: сѐ а҆́зъ посыла́ю а҆́гг҃ла моего̀ пред̾ лице́мъ твои́мъ, и҆́же ᲂу҆гото́витъ пꙋ́ть тво́й пред̾ тобо́ю. А҆ми́нь глаго́лю ва́мъ: не воста̀ въ рожде́нныхъ жена́ми бо́лїй і҆ѡа́нна крⷭ҇ти́телѧ: мні́й же во црⷭ҇твїи нбⷭ҇нѣмъ бо́лїй є҆гѡ̀ є҆́сть. Ѿ дне́й же і҆ѡа́нна крⷭ҇ти́телѧ досе́лѣ црⷭ҇твїе нбⷭ҇ное нꙋ́дитсѧ, и҆ нꙋ́ждницы восхища́ютъ є҆̀: Вси́ бо прⷪ҇ро́цы и҆ зако́нъ до і҆ѡа́нна прореко́ша. И҆ а҆́ще хо́щете прїѧ́ти, то́й є҆́сть и҆лїа̀ хотѧ́й прїитѝ. И҆мѣ́ѧй ᲂу҆́ши слы́шати, да слы́шитъ.

Чтⷭ҇но́мꙋ и҆ животворѧ́щемꙋ крⷭ҇тꙋ̀:

А҆пⷭ҇лъ къ корі́нѳѧнѡмъ, зача́ло рк҃є.

Бра́тїе, сло́во кре́стное погиба́ющымъ ᲂу҆́бѡ ю҆ро́дство є҆́сть, а҆ спаса́ємымъ на́мъ си́ла бж҃їѧ є҆́сть. Пи́сано бо <<сн҃ѕ ѡ҆б.: 512>> є҆́сть: погꙋблю̀ премꙋ́дрость премꙋ́дрыхъ, и҆ ра́зꙋмъ разꙋ́мныхъ ѿве́ргꙋ. Гдѣ̀ премꙋ́дръ; гдѣ̀ кни́жникъ; гдѣ̀ совопро́сникъ вѣ́ка сегѡ̀; не ѡ҆бꙋи́ ли бг҃ъ премꙋ́дрость мі́ра сегѡ̀: Поне́же бо въ премꙋ́дрости бж҃їей, не разꙋмѣ̀ мі́ръ премꙋ́дростїю бг҃а, бл҃гоизво́лилъ бг҃ъ бꙋ́йствомъ про́повѣди сп҃стѝ вѣ́рꙋющихъ. Поне́же, и҆ і҆ꙋде́є зна́менїѧ про́сѧтъ, и҆ є҆́ллини премꙋ́дрости и҆́щꙋтъ: Мы́ же проповѣ́дꙋемъ хрⷭ҇та̀ ра́спѧта, і҆ꙋде́ємъ ᲂу҆́бѡ собла́знъ, є҆́ллинѡмъ же безꙋ́мїе: Самѣ́мъ же зва̑ннымъ, і҆ꙋде́ємъ же и҆ є҆́ллинѡмъ, хрⷭ҇та̀, бж҃їю си́лꙋ, и҆ бж҃їю премꙋ́дрость.

Є҆ѵⷢ҇лїе ѿ і҆ѡа́нна, зача́ло м҃в ѿ полꙋ̀.

Речѐ гдⷭ҇ь: ѻ҆́ч҃е, просла́ви и҆́мѧ твоѐ. прїи́де же гла́съ съ нб҃сѐ: и҆ просла́вихъ, и҆ па́ки просла́влю. Наро́дъ же стоѧ́й слы́шавъ, глаго́лахꙋ: гро́мъ бы́сть. и҆ні́и глаго́лахꙋ: а҆́гг҃лъ глаго́ла є҆мꙋ̀. Ѿвѣща̀ і҆и҃съ, и҆ речѐ: не менѐ ра́ди гла́съ се́й бы́сть, но наро́да ра́ди. Ны́нѣ сꙋ́дъ є҆́сть мі́рꙋ семꙋ̀: ны́нѣ кнѧ́зь мі́ра сегѡ̀ и҆згна́нъ бꙋ́детъ во́нъ. И҆ а҆́ще а҆́зъ вознесе́нъ бꙋ́дꙋ ѿ землѝ, всѧ̑ привлекꙋ̀ къ себѣ̀. Сїе́ же глаго́лаше, назна́менꙋѧ, ко́ею сме́ртїю хотѧ́ше ᲂу҆мре́ти. Ѿвѣща̀ є҆мꙋ̀ наро́дъ: мы̀ слы́шахомъ ѿ зако́на, ꙗ҆́кѡ хрⷭ҇то́съ пребыва́етъ во вѣ́ки: ка́кѡ ты̀ глаго́леши: вознести́сѧ подоба́етъ сн҃ꙋ чл҃вѣ́ческомꙋ; кто̀ є҆́сть се́й сн҃ъ чл҃вѣ́ческїй; Рече́ же и҆̀мъ і҆и҃съ: є҆щѐ ма́ло вре́мѧ свѣ́тъ въ ва́съ є҆́сть. ходи́те, до́ндеже свѣ́тъ и҆́мате, да тьма̀ ва́съ не и҆́метъ. и҆ ходѧ́й во тьмѣ̀, не вѣ́сть, ка́мѡ и҆́детъ. До́ндеже свѣ́тъ и҆́мате, вѣ́рꙋйте во свѣ́тъ, да сы́нове свѣ́та бꙋ́дете.

Влⷣчнымъ пра́здникѡмъ:

А҆пⷭ҇лъ къ колосса́ємъ, зача́ло с҃и.

Бра́тїе, бл҃годарѧ́ще бг҃а и҆ ѻ҆ц҃а̀, призва́вшаго ва́съ въ прича́стїе наслѣ́дїѧ ст҃ы́хъ во свѣ́тѣ: И҆́же и҆зба́ви на́съ ѿ вла́сти те́мныѧ, и҆ преста́ви въ црⷭ҇тво сн҃а любвѐ своеѧ̀: <<сн҃з: 513>> Ѡ҆ не́мже и҆́мамы и҆збавле́нїе кро́вїю є҆гѡ̀, и҆ ѡ҆ставле́нїе грѣхѡ́въ: И҆́же є҆́сть ѡ҆́бразъ бг҃а неви́димагѡ, перворожде́нъ всеѧ̀ тва́ри. ꙗ҆́кѡ ѡ҆ не́мъ создана̑ бы́ша всѧ́чєскаѧ, ꙗ҆̀же на нб҃сѝ, и҆ ꙗ҆̀же на землѝ, ви̑димаѧ и҆ неви̑димаѧ: а҆́ще престо́ли, а҆́ще гдⷭ҇ьствїѧ, а҆́ще нача̑ла, а҆́ще вла̑сти, всѧ́чєскаѧ тѣ́мъ и҆ ѡ҆ не́мъ созда́шасѧ. И҆ то́й є҆́сть пре́жде всѣ́хъ, и҆ всѧ́чєскаѧ ѡ҆ не́мъ состоѧ́тсѧ. И҆ то́й є҆́сть глава̀ тѣ́лꙋ цр҃кве, и҆́же є҆́сть нача́токъ, перворожде́нъ и҆з̾ ме́ртвыхъ, ꙗ҆́кѡ да бꙋ́детъ во всѣ́хъ то́й пе́рвенствꙋѧ.

Є҆ѵⷢ҇лїе ѿ лꙋкѝ, зача́ло м҃и ѿ полꙋ̀.

Во вре́мѧ ѻ҆́но, бы́сть є҆гда̀ скончава́хꙋсѧ дні́е восхожде́нїю і҆и҃совꙋ, и҆ то́й ᲂу҆твердѝ лицѐ своѐ и҆тѝ во і҆ерⷭ҇ли́мъ. И҆ посла̀ вѣ́стники пред̾ лице́мъ свои́мъ: и҆ и҆зше́дше внидо́ша въ ве́сь самарѧ́нскꙋ, ꙗ҆́кѡ да ᲂу҆гото́вѧтъ є҆мꙋ̀. И҆ не прїѧ́ша є҆гѡ̀, ꙗ҆́кѡ лицѐ є҆гѡ̀ бѣ̀ грѧды́й во і҆ерⷭ҇ли́мъ. Ви́дѣвша же ᲂу҆ч҃нка̑ є҆гѡ̀, і҆а́кѡвъ и҆ і҆ѡа́ннъ, рѣ́ста: гдⷭ҇и, хо́щеши ли, рече́ма, да ѻ҆́гнь сни́детъ съ нб҃сѐ, и҆ потреби́тъ и҆̀хъ, ꙗ҆́коже и҆ и҆лїа̀ сотворѝ; Ѡ҆бра́щьсѧ же запретѝ и҆́ма, и҆ речѐ: не вѣ́ста, ко́егѡ дꙋ́ха є҆ста̀ вы̀. Сн҃ъ бо чл҃вѣ́ческїй не прїи́де дꙋ́шъ человѣ́ческихъ погꙋби́ти, но сп҃стѝ: и҆ и҆до́ша во и҆́нꙋ ве́сь. И҆ ѡ҆бра́щьсѧ ко ᲂу҆ч҃нкѡ́мъ, речѐ: всѧ̑ мнѣ̀ предана̀ бы́ша ѿ ѻ҆ц҃а̀ моегѡ̀: и҆ никто́же вѣ́сть, кто́ є҆сть сн҃ъ, то́кмѡ ѻ҆ц҃ъ, и҆ кто́ є҆сть ѻ҆ц҃ъ, то́кмѡ сн҃ъ, и҆ є҆мꙋ́же а҆́ще хо́щетъ сн҃ъ ѿкры́ти. И҆ ѡ҆бра́щьсѧ ко ᲂу҆ч҃нкѡ́мъ, є҆ди́нъ речѐ: бл҃же́ни ѻ҆́чи ви́дѧщїи, ꙗ҆̀же ви́дите. Глаго́лю бо ва́мъ: ꙗ҆́кѡ мно́зи прⷪ҇ро́цы и҆ ца́рїе восхотѣ́ша ви́дѣти, ꙗ҆̀же вы̀ ви́дите, и҆ не ви́дѣша: и҆ слы́шати, ꙗ҆̀же слы́шите, и҆ не слы́шаша.

Бг҃орѡ́дичнымъ пра́здникѡмъ:

А҆пⷭ҇лъ къ фїлїпписі́ємъ, зача́ло с҃м.

Бра́тїе, сїѐ да мꙋ́дрствꙋетсѧ въ ва́съ, є҆́же и҆ во хрⷭ҇тѣ̀ і҆и҃сѣ, И҆́же во ѡ҆́бразѣ бж҃їи сы́й, не восхище́нїемъ непщева̀ <<сн҃з ѡ҆б.: 514>> бы́ти ра́венъ бг҃ꙋ. Но себѐ ᲂу҆ма́лилъ, зра́къ раба̀ прїи́мъ, въ подо́бїи человѣ́честѣмъ бы́въ, и҆ ѡ҆́бразомъ ѡ҆брѣ́тесѧ ꙗ҆́коже человѣ́къ. Смири́лъ себѐ, послꙋшли́въ бы́въ да́же до сме́рти, сме́рти же крⷭ҇тныѧ. Тѣ́мже и҆ бг҃ъ є҆го̀ превознесѐ, и҆ дарова̀ є҆мꙋ̀ и҆́мѧ, є҆́же па́че всѧ́кагѡ и҆́мене: Да ѡ҆ и҆́мени і҆и҃совѣ всѧ́ко колѣ́но поклони́тсѧ, нбⷭ҇ныхъ, и҆ земны́хъ, и҆ преиспо́днихъ: И҆ всѧ́къ ꙗ҆зы́къ и҆сповѣ́сть, ꙗ҆́кѡ гдⷭ҇ь і҆и҃съ хрⷭ҇то́съ, въ сла́вꙋ бг҃а ѻ҆ц҃а̀.

Є҆ѵⷢ҇лїе ѿ лꙋкѝ, зача́ло н҃д.

Во вре́мѧ ѻ҆́но, вни́де і҆и҃съ въ ве́сь нѣ́кꙋю: жена́ же нѣ́каѧ и҆́менемъ ма́рѳа прїѧ́тъ є҆го̀ въ до́мъ сво́й. И҆ сестра̀ є҆́й бѣ̀, нарица́емаѧ марі́а, ꙗ҆́же и҆ сѣ́дши при ногꙋ̀ і҆и҃совꙋ, слы́шаше сло́во є҆гѡ̀. Ма́рѳа же мо́лвѧше ѡ҆ мно́зѣ слꙋ́жбѣ, ста́вши же речѐ: гдⷭ҇и, не бреже́ши ли, ꙗ҆́кѡ сестра̀ моѧ̀ є҆ди́нꙋ мѧ̀ ѡ҆ста́ви слꙋжи́ти, рцы̀ ᲂу҆́бѡ є҆́й, да мѝ помо́жетъ. Ѿвѣща́въ же і҆и҃съ, речѐ є҆́й: ма́рѳо, ма́рѳо, пече́шисѧ, и҆ мо́лвиши ѡ҆ мно́зѣ: Є҆ди́но же є҆́сть на потре́бꙋ: марі́а же благꙋ́ю ча́сть и҆збра̀, є҆́же не ѿи́метсѧ ѿ неѧ̀. Бы́сть же є҆гда̀ глаго́лаше сїѧ̑, воздви́гши нѣ́каѧ жена̀ гла́съ ѿ наро́да, речѐ є҆мꙋ̀ бл҃же́но чре́во носи́вшее тѧ̀, и҆ сосца̀ ꙗ҆̀же є҆сѝ сса́лъ. Ѻ҆́нъ же речѐ: тѣ́мже ᲂу҆̀бо бл҃же́ни слы́шащїи сло́во бж҃їе, и҆ хранѧ́щїи є҆̀.

Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.