Ѿпꙋсти́тельнїи, и҆ конда́ки трїѡ́ди, и҆ н҃-цы, начина́ємыѧ ѿ недѣ́ли мытарѧ̀ и҆ фарїсе́а, до всѣ́хъ ст҃ы́хъ: въ ни́хже и҆ канѡ́нъ на ст҃ꙋ́ю па́схꙋ
<<рп҃в: 363>>
[глⷡ҇а л҃а] ѾПꙊСТИ́ТЕЛЬНІИ, И҆ КОНДАКЍ ТРІѠ́ДИ, И҆ Н҃-ЦЫ,
начина́емїи ѿ недѣ́ли мытарѧ̀ и҆ фарїсе́а, до всѣ́хъ ст҃ы́хъ.
Недѣ́лѧ ѡ҆ мытарѝ и҆ фарїсе́и.
Тропа́рь воскрⷭ҇нъ гла́са.
Конда́къ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Фарїсе́ева ᲂу҆бѣжи́мъ высокоглаго́ланїѧ, и҆ мытаре́вѣ наꙋчи́мсѧ высотѣ̀ глагѡ́лъ смире́нныхъ, покаѧ́нїемъ взыва́юще: сп҃се мі́ра, ѡ҆чи́сти рабы̑ твоѧ̑.
Недѣ́лѧ блꙋ́днагѡ.
Тропа́рь гла́са.
Конда́къ, гла́съ г҃.
Подо́бенъ: Дв҃а дне́сь:
Ѻ҆те́ческїѧ сла́вы твоеѧ̀ ᲂу҆дали́хсѧ безꙋ́мнѡ, въ ѕлы́хъ расточи́въ є҆́же мѝ пре́далъ є҆сѝ бога́тство. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю ѻ҆́ч҃е ще́дрый, прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.
Въ сꙋббѡ́тꙋ мѧсопꙋ́стнꙋю.
Тропа́рь, гла́съ и҃:
Глꙋбино́ю мꙋ́дрости чл҃вѣколю́бнѡ всѧ̑ стро́ѧй, и҆ поле́зное всѣ̑мъ подава́ѧй є҆ди́не содѣ́телю, ᲂу҆поко́й гдⷭ҇и, дꙋ́шы ра́бъ твои́хъ: на тѧ́ бо ᲂу҆пова́нїе возложи́ша, творца̀ и҆ зижди́телѧ и҆ бг҃а на́шего.
<<рп҃в ѡ҆б.: 364>>
Конда́къ, гла́съ и҃:
Со ст҃ы́ми ᲂу҆поко́й хрⷭ҇тѐ, дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.
Недѣ́лѧ мѧсопꙋ́стнаѧ.
Тропа́рь воскрⷭ҇нъ гла́са.
Конда́къ, гла́съ а҃:
Є҆гда̀ прїи́деши бж҃е на зе́млю со сла́вою, и҆ трепе́щꙋтъ всѧ́чєскаѧ, рѣка́ же ѻ҆́гненнаѧ пред̾ сꙋди́щемъ влече́тъ, кни̑ги разгиба́ютсѧ, и҆ та̑йнаѧ ꙗ҆влѧ́ютсѧ: тогда̀ и҆зба́ви мѧ̀ ѿ ѻ҆гнѧ̀ неꙋгаси́магѡ, и҆ сподо́би мѧ̀ ѡ҆деснꙋ́ю тебѐ ста́ти, сꙋдїѐ првⷣнѣйшїй.
Въ сꙋббѡ́тꙋ сыропꙋ́стнꙋю
па́мѧть соверша́емъ всѣ́хъ въ постѣ̀ просїѧ́вшихъ, прпⷣбныхъ и҆ бг҃оно́сныхъ ѻ҆тє́цъ на́шихъ.
Тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ: но мл҃твами и҆́хъ въ ми́рѣ ᲂу҆пра́ви живо́тъ на́шъ.
Конда́къ, гла́съ и҃.
Подо́бенъ: Ꙗ҆́кѡ нача́тки є҆стества̀:
Ꙗ҆́кѡ бл҃гоче́стїѧ проповѣ́дники, и҆ нече́стїѧ ѡ҆бꙋзда́тєли, бг҃оно́сныхъ собо́ръ ᲂу҆ѧсни́лъ є҆сѝ, подсо́лнечнꙋю ѡ҆сїѧва́ющыѧ: въ ми́рѣ соверше́нномъ тѣ́хъ мл҃твами, тебѐ сла́вѧщыѧ и҆ велича́ющыѧ сохранѝ, пою́щыѧ тѝ гдⷭ҇и: а҆ллилꙋ́їа.
Подоба́етъ вѣ́дати, ꙗ҆́кѡ въ сре́дꙋ и҆ пѧто́къ сыроѧ́стный, по ѳ҃-мъ часѣ̀ ꙗ҆ди́мъ сы́ръ и҆ ꙗ҆́ица, ра́ди і҆акѡві́тѡвъ и҆ тетраді́тѡвъ, по канѡ́нꙋ во ст҃ы́хъ ѻ҆тца̀ на́шегѡ нїки́фора, патрїа́рха кѡнстантїнопо́льскагѡ.
<<рп҃г: 365>>
Недѣ́лѧ сыропꙋ́стнаѧ.
Тропа́рь воскрⷭ҇нъ гла́са.
Конда́къ самогла́сенъ, гла́съ ѕ҃:
Премꙋ́дрости наста́вниче, смы́сла пода́телю, немꙋ́дрыхъ наказа́телю, и҆ ни́щихъ защи́тителю, ᲂу҆твердѝ, вразꙋмѝ се́рдце моѐ влⷣко, ты̀ да́ждь мѝ сло́во, ѻ҆́ч҃ее сло́во. се́ бо ᲂу҆стнѣ̀ моѝ не возбраню̀, во є҆́же зва́ти тебѣ̀: млⷭ҇тиве, поми́лꙋй мѧ̀ па́дшаго.
Тогѡ́же ве́чера,
пое́мъ настоѧ́щїй прокі́менъ, во гла́съ и҃:
Не ѿвратѝ лица̀ твоегѡ̀ ѿ ѡ҆́трока твоегѡ̀, ꙗ҆́кѡ скорблю̀: ско́рѡ ᲂу҆слы́ши мѧ̀, вонмѝ дꙋшѝ мое́й, и҆ и҆зба́ви ю҆̀.
Сті́хъ: Сп҃се́нїе твоѐ бж҃е, да прїи́метъ мѧ̀.
Сті́хъ: Да ᲂу҆́зрѧтъ ни́щїи, и҆ возвеселѧ́тсѧ.
Сті́хъ: Взыщи́те бг҃а, и҆ жива̀ бꙋ́детъ дꙋша̀ ва́ша.
Вѣ́домо бꙋ́ди, ꙗ҆́кѡ по недѣ́ли сыропꙋ́стной, съ понедѣ́льника непремѣ́ннѡ начина́етсѧ по́стъ ст҃ы́ѧ и҆ вели́кїѧ четыредесѧ́тницы, и҆ быва́етъ до днѐ ст҃ы́ѧ па́схи.
Въ сꙋббѡ́тꙋ пе́рвꙋю постѡ́въ,
па́мѧть соверша́емъ бы́вшагѡ чꙋдесѐ ко́лѷвы, ѿ ст҃а́гѡ великомч҃нка ѳео́дѡра тѵ́рѡна.
Тропа́рь, гла́съ в҃:
Ве́лїѧ вѣ́ры и҆справлє́нїѧ, во и҆сто́чницѣ пла́мене, ꙗ҆́кѡ на водѣ̀ ᲂу҆покое́нїѧ ст҃ы́й мч҃нкъ ѳео́дѡръ ра́довашесѧ: ѻ҆гне́мъ бо всесожже́гсѧ, ꙗ҆́кѡ хлѣ́бъ сла́дкїй трⷪ҇цѣ принесе́сѧ. тогѡ̀ мл҃твами, хрⷭ҇тѐ бж҃е, сп҃сѝ дꙋ́шы на́шѧ.
Конда́къ, гла́съ и҃:
Вѣ́рꙋ хрⷭ҇то́вꙋ ꙗ҆́кѡ щи́тъ внꙋ́трь прїи́мъ въ се́рдцѣ твое́мъ, проти̑вныѧ си̑лы попра́лъ є҆сѝ многострада́льче: и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ ѳео́дѡре, ꙗ҆́кѡ непобѣди́мый.
<<рп҃г ѡ҆б.: 366>>
Въ недѣ́лю пе́рвꙋю постѡ́въ,
си́рѣчь правосла́вїѧ, па́мѧть соверша́емъ ст҃ы́хъ прⷪ҇ро́кѡвъ, мѡѷсе́а и҆ а҆арѡ́на, и҆ про́чихъ, и҆ ст҃ы́хъ и҆ честны́хъ і҆кѡ́нъ возставле́нїе.
Тропа́рь воскрⷭ҇ный гла́са.
Сла́ва, гла́съ в҃:
Пречⷭ҇томꙋ твоемꙋ̀ ѡ҆́бразꙋ покланѧ́емсѧ бл҃гі́й, просѧ́ще проще́нїѧ прегрѣше́нїй на́шихъ хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же созда́лъ є҆сѝ, ѿ рабо́ты вра́жїѧ. тѣ́мъ бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑ сп҃се на́шъ, прише́дый сп҃стѝ мі́ръ.
И҆ ны́нѣ, бг҃оро́диченъ:
Всѧ̑ па́че смы́сла, всѧ̑ пресла̑внаѧ твоѧ̑ бцⷣе та̑инства, чистотѣ̀ запеча́танной и҆ дѣ́вствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго: того̀ молѝ сп҃сти́сѧ дꙋша́мъ на́шымъ.
Конда́къ самогла́сенъ Гла́съ и҃:
Неѡпи́санное сло́во ѻ҆́ч҃ее, и҆з̾ тебѐ бцⷣе, ѡ҆писа́сѧ воплоща́емь, и҆ ѡ҆скве́рншїйсѧ ѡ҆́бразъ дре́внее воѡбрази́въ, бж҃е́ственною добро́тою смѣсѝ: но и҆сповѣ́дающе сп҃се́нїе, дѣ́ломъ и҆ сло́вомъ сїѐ воѡбража́емъ.
Въ ве́черъ пе́рвыѧ недѣ́ли
настоѧ́щїй прокі́менъ, во гла́съ и҃:
Да́лъ є҆сѝ достоѧ́нїе боѧ́щымсѧ тебѐ гдⷭ҇и.
Сті́хъ: Ѿ конє́цъ землѝ къ тебѣ̀ воззва́хъ.
Сті́хъ: Покры́юсѧ кро́вомъ кри́лъ твои́хъ.
Сті́хъ: Та́кѡ воспою̀ и҆́мени твоемꙋ̀ во вѣ́ки.
Пою́тсѧ же прокі́мени є҆ди́нъ по є҆ди́номꙋ въ кꙋ́юждо недѣ́лю, до́ндеже сконча́ютсѧ недѣ̑ли постѡ́въ.
<<рп҃д: 367>>
Въ недѣ́лю вторꙋ́ю постѡ́въ
пое́мъ послѣ́дованїе, и҆́же во ст҃ы́хъ ѻ҆тца̀ на́шегѡ григо́рїа, а҆рхїепⷭ҇кпа селꙋ́нскагѡ.
Тропа́рь, гла́съ и҃:
Правосла́вїѧ наста́вниче, цр҃кве ᲂу҆твержде́нїе и҆ ᲂу҆чи́телю, мона́хѡвъ добро́то, бг҃осло́вѡвъ побо́рниче непребори́мый, григо́рїе чꙋдотво́рче, ѳессалоні́тскаѧ похвало̀, проповѣ́дниче бл҃года́ти, моли́сѧ вы́нꙋ сп҃сти́сѧ дꙋша́мъ на́шымъ.
По г҃-й пѣ́сни конда́къ, гла́съ д҃:
Ны́нѣ вре́мѧ дѣ́лательное ꙗ҆ви́сѧ, при две́рехъ сꙋ́дъ, воста́немъ ᲂу҆́бѡ постѧ́щесѧ, принесе́мъ сле́зы ᲂу҆миле́нїѧ ми́лостынѧми, зовꙋ́ще: согрѣши́хомъ па́че песка̀ морска́гѡ. но ѡ҆сла́би, содѣ́телю всѣ́хъ, ꙗ҆́кѡ да прїи́мемъ нетлѣ́нныѧ вѣнцы̀.
По ѕ҃ пѣ́сни конда́къ григо́рїа, гла́съ и҃.
Подо́бенъ: Взбра́нной:
Премꙋ́дрости свѧще́нный и҆ бж҃е́ственный ѻ҆рга́нъ, бг҃осло́вїѧ свѣ́тлꙋю согла́снѡ трꙋбꙋ̀, воспѣва́емъ тѧ̀ григо́рїе бг҃оглаго́льниче, но ꙗ҆́кѡ ᲂу҆́мъ ᲂу҆мꙋ̀ пе́рвомꙋ предстоѧ́й, къ немꙋ̀ ᲂу҆́мъ на́шъ ѻ҆́тче наста́ви, да зове́мъ: ра́дꙋйсѧ проповѣ́дниче бл҃года́ти.
Недѣ́лѧ тре́тїѧ постѡ́въ,
пра́зднꙋемъ поклоне́нїе чтⷭ҇на́гѡ и҆ животворѧ́щагѡ крⷭ҇та̀.
Тропа́рь воскрⷭ҇нъ.
Сла́ва, гла́съ а҃:
Сп҃сѝ гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ, побѣ̑ды на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.
И҆ ны́нѣ, бг҃оро́диченъ.
Конда́къ, гла́съ з҃:
Не ктомꙋ̀ пла́менное ѻ҆рꙋ́жїе храни́тъ вра́тъ є҆де́мскихъ, на ты̑ѧ бо на́йде пресла́вный сою́зъ, дре́во крⷭ҇тное: сме́ртное <<рп҃д ѡ҆б.: 368>> жа́ло и҆ а҆́дова побѣ́да прогна́сѧ. предста́лъ бо є҆сѝ сп҃се мо́й, вопїѧ̀ сꙋ́щымъ во а҆́дѣ: вни́дите па́ки въ ра́й.
Недѣ́лѧ четве́ртаѧ постѡ́въ,
пое́мъ послѣ́дованїе прпⷣбнагѡ ѻ҆тца̀ на́шегѡ і҆ѡа́нна, списа́телѧ лѣ́ствицы.
Тропа́рь, гла́съ а҃:
Пꙋсты́нный жи́тель, и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ бг҃оно́се ѻ҆́тче на́шъ і҆ѡа́нне, посто́мъ, бдѣ́нїемъ, мл҃твою нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ къ тебѣ̀. сла́ва да́вшемꙋ тебѣ̀ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.
Конда́къ, гла́съ д҃:
Подо́бенъ: Ꙗ҆ви́лсѧ є҆сѝ:
На высотѣ̀ гдⷭ҇ь воздержа́нїѧ и҆́стинна тѧ̀ положѝ, ꙗ҆́коже ѕвѣздꙋ̀ неле́стнꙋю, свѣтоводѧ́щꙋю концы̀, наста́вниче і҆ѡа́нне ѻ҆́тче на́шъ.
Въ четверто́къ пѧ́тыѧ седми́цы
пое́мъ послѣ́дованїе вели́кагѡ канѡ́на.
Конда́къ, гла́съ ѕ҃:
Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ, воспрѧнѝ ᲂу҆̀бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й, и҆ всѧ̑ и҆сполнѧ́ѧй.
Въ сꙋббѡ́тꙋ пѧ́тыѧ седми́цы
пое́мъ ко прест҃ѣ́й бцⷣѣ несѣда́льное пѣ́нїе.
Тропа́рь, гла́съ и҃:
Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ, тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀, є҆го́же и҆ ви́дѧ въ ложесна́хъ твои́хъ, прїе́мша ра́бїй зра́къ, ᲂу҆жаса́юсѧ зва́ти тебѣ̀. ра́дꙋйсѧ, невѣ́сто неневѣ́стнаѧ.
<<рп҃є: 369>>
Конда́къ, гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ бл҃года́рствєннаѧ восписꙋ́емъ тѝ рабѝ твоѝ бцⷣе. но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.
Въ пѧ́тꙋю недѣ́лю постѡ́въ
пое́мъ послѣ́дованїе прпⷣбныѧ ма́тере на́шеѧ марі́и є҆гѵ́птѧныни.
Тропа́рь, гла́съ и҃:
Въ тебѣ̀, мт҃и, и҆звѣ́стнѡ сп҃се́сѧ, є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ марі́е, дꙋ́хъ тво́й.
Конда́къ, гла́съ г҃.
Подо́бенъ: Дв҃а дне́сь:
Блꙋда́ми пе́рвѣе преиспо́лнена всѧ́ческими, хрⷭ҇то́ва невѣ́ста дне́сь покаѧ́нїемъ ꙗ҆ви́сѧ, а҆́гг҃льское жи́тельство подража́ющи, де́мѡны крⷭ҇та̀ ѻ҆рꙋ́жїемъ погꙋблѧ́етъ: сегѡ̀ ра́ди црⷭ҇твїѧ невѣ́ста ꙗ҆ви́сѧ марі́а пресла́внаѧ.
Въ сꙋббѡ́тꙋ ст҃а́гѡ и҆ првⷣнагѡ ла́зарѧ.
Тропа́рь, гла́съ а҃:
Ѻ҆́бщее воскрⷭ҇нїе пре́жде твоеѧ̀ стрⷭ҇ти ᲂу҆вѣрѧ́ѧ, и҆з̾ ме́ртвыхъ воздви́глъ є҆сѝ ла́зарѧ хрⷭ҇тѐ бж҃е. тѣ́мже и҆ мы̀ ꙗ҆́кѡ ѻ҆́троцы побѣ́ды зна́мєнїѧ носѧ́ще, тебѣ̀ побѣди́телю сме́рти вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.
Конда́къ, гла́съ в҃.
Подо́бенъ: Вы́шнихъ и҆щѧ̀:
Всѣ́хъ ра́дость хрⷭ҇то́съ, и҆́стина, свѣ́тъ, живо́тъ и҆ мі́ра воскрⷭ҇нїе, сꙋ́щымъ на землѝ ꙗ҆ви́сѧ, свое́ю бл҃гостїю, и҆ бы́сть ѡ҆́бразъ воскрⷭ҇нїѧ, всѣ̑мъ подаѧ̀ бж҃е́ственное ѡ҆ставле́нїе.
<<рп҃є ѡ҆б.: 370>>
Въ недѣ́лю ва́їй.
Тропа́рь: Ѻ҆́бщее воскрⷭ҇нїе: два́жды,
и҆ се́й є҆ди́ною, гла́съ д҃:
Спогре́бшесѧ тебѣ̀ кр҃ще́нїемъ хрⷭ҇тѐ бж҃е на́шъ, безсме́ртныѧ жи́зни сподо́бихомсѧ воскрⷭ҇нїемъ твои́мъ, и҆ воспѣва́юще зове́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.
По г҃-й пѣ́сни ѵ҆пакоѝ, гла́съ ѕ҃:
Съ вѣ́твьми воспѣ́вше пре́жде, съ древесы̀ послѣдѝ ꙗ҆́ша хрⷭ҇та̀ бг҃а, неблагода́рнїи і҆ꙋде́є. мы́ же вѣ́рою непрело́жною при́снѡ почита́юще ꙗ҆́кѡ бл҃годѣ́телѧ, вы́нꙋ вопїе́мъ є҆мꙋ̀: бл҃гослове́нъ є҆сѝ грѧды́й а҆да́ма воззва́ти.
Конда́къ, гла́съ ѕ҃:
На прⷭ҇то́лѣ на нб҃сѝ, на жребѧ́ти на землѝ носи́мый хрⷭ҇тѐ бж҃е, а҆́гг҃лѡвъ хвале́нїе, и҆ дѣте́й воспѣва́нїе прїѧ́лъ є҆сѝ, зовꙋ́щихъ тѝ: бл҃гослове́нъ є҆сѝ грѧды́й а҆да́ма воззва́ти.
Во ст҃ы́й и҆ вели́кїй понедѣ́льникъ,
на ᲂу҆́трени во А҆ллилꙋ́їа: Тропа́рь, гла́съ и҃:
Сѐ жени́хъ грѧде́тъ въ полꙋ́нощи, и҆ бл҃же́нъ ра́бъ, є҆го́же ѡ҆брѧ́щетъ бдѧ́ща: недосто́инъ же па́ки, є҆го́же ѡ҆брѧ́щетъ ᲂу҆ныва́юща. блюдѝ ᲂу҆̀бо дꙋшѐ моѧ̀, не сно́мъ ѡ҆тѧготи́сѧ, да не сме́рти предана̀ бꙋ́деши, и҆ црⷭ҇твїѧ внѣ̀ затвори́шисѧ. но воспрѧнѝ зовꙋ́щи: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.
Конда́къ, гла́съ и҃.
Подо́бенъ: Ꙗ҆́кѡ нача́тки:
І҆а́кѡвъ рыда́ше і҆ѡ́сифова лише́нїѧ, и҆ до́блїй сѣдѧ́ше на колесни́цѣ, ꙗ҆́кѡ ца́рь почита́емь: є҆гѵ́птѧныни бо тогда̀ сласте́мъ не порабо́тавъ, возпрославлѧ́шесѧ ѿ вѣ́дꙋщагѡ человѣ́чєскаѧ сердца̀, и҆ посыла́ющагѡ вѣне́цъ нетлѣ́нный.
Во ст҃ы́й и҆ вели́кїй вто́рникъ.
Тропа́рь: Сѐ жени́хъ грѧде́тъ:
<<рп҃ѕ: 371>>
Конда́къ, гла́съ в҃:
Подо́бенъ: Вы́шнихъ и҆щѧ̀:
Ча́съ, дꙋшѐ, конца̀ помы́слиши, и҆ посѣче́нїѧ смоко́вницы ᲂу҆боѧ́вшисѧ, да́нный тебѣ̀ тала́нтъ трꙋдолю́бнѡ дѣ́лай ѻ҆каѧ́ннаѧ, бо́дрствꙋющи и҆ зовꙋ́щи: да не пребꙋ́демъ внѣ̀ черто́га хрⷭ҇то́ва.
Во ст҃ꙋ́ю и҆ вели́кꙋю сре́дꙋ.
Тропа́рь: Сѐ жени́хъ грѧде́тъ:
Конда́къ, гла́съ д҃.
Подо́бенъ: Вознесы́йсѧ на крⷭ҇тъ:
Па́че блꙋдни́цы, бл҃же, беззако́нновавъ, сле́зъ тꙋ̑чи ника́коже тебѣ̀ принесо́хъ: но молча́нїемъ молѧ́сѧ припа́даю тѝ, любо́вїю ѡ҆блобыза́ѧ пречⷭ҇тѣи твоѝ но́зѣ, ꙗ҆́кѡ да ѡ҆ставле́нїе мнѣ̀ ꙗ҆́кѡ влⷣка пода́си долгѡ́въ, зовꙋ́щꙋ тѝ сп҃се: ѿ скве́рныхъ дѣ́лъ и҆зба́ви мѧ̀.
Во ст҃ы́й и҆ вели́кїй четверто́къ
во А҆ллилꙋ́їа, тропа́рь, гла́съ и҃:
Є҆гда̀ сла́внїи ᲂу҆ч҃нцы̀, на ᲂу҆мове́нїи ве́чери просвѣща́хꙋсѧ, тогда̀ і҆ꙋ́да ѕлочести́вый сребролю́бїемъ недꙋ́говавъ ѡ҆мрача́шесѧ, и҆ беззакѡ́ннымъ сꙋдїѧ́мъ тебѐ првⷣнаго сꙋдїю̀ предае́тъ. ви́ждь и҆мѣ́нїй рачи́телю, си́хъ ра́ди ᲂу҆давле́нїе ᲂу҆потреби́вша: бѣжѝ несы́тыѧ дꙋшѝ, ᲂу҆чи́телю такова̑ѧ дерзнꙋ́вшїѧ, и҆́же ѡ҆ всѣ́хъ бл҃гі́й, гдⷭ҇и, сла́ва тебѣ̀.
Конда́къ, гла́съ в҃.
Подо́бенъ: Вы́шнихъ и҆щѧ̀:
Хлѣ́бъ прїе́мъ въ рꙋ́цѣ преда́тель, сокрове́ннѡ ты̑ѧ простира́етъ, и҆ прїе́млетъ цѣ́нꙋ созда́вшагѡ свои́ма рꙋка́ма человѣ́ка: и҆ не и҆спра́вленъ пребы́сть і҆ꙋ́да ра́бъ и҆ льсте́цъ.
Во ст҃ы́й и҆ вели́кїй пѧто́къ.
Тропа́рь: Є҆гда̀ сла́внїи ᲂу҆ч҃нцы̀:
<<рп҃ѕ ѡ҆б.: 372>>
Конда́къ, гла́съ и҃:
На́съ ра́ди распѧ́таго прїиди́те всѝ воспои́мъ: того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
Тропа́рь во ѿпꙋ́стъ, гла́съ д҃:
И҆скꙋпи́лъ ны̀ є҆сѝ ѿ клѧ́твы зако́нныѧ, чтⷭ҇но́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дсѧ, безсме́ртїе и҆сточи́лъ є҆сѝ человѣ́кѡмъ, сп҃се на́шъ, сла́ва тебѣ̀.
Тропа́рь а҃-гѡ часа̀, гла́съ а҃:
Распе́ншꙋсѧ тебѣ̀ хрⷭ҇тѐ, поги́бе мꙋчи́тельство, попра́на бы́сть си́ла вра́жїѧ: ниже́ бо а҆́гг҃лъ, нижѐ человѣ́къ, но са́мъ гдⷭ҇и, спа́слъ є҆сѝ на́съ, сла́ва тебѣ̀.
Сла́ва, и҆ ны́нѣ: Что́ тѧ нарече́мъ:
Тропа́рь г҃-гѡ часа̀, гла́съ ѕ҃:
Гдⷭ҇и, ѡ҆сꙋди́ша тѧ̀ і҆ꙋде́є на сме́рть, жи́знь всѣ́хъ: и҆̀же чермно́е мо́ре жезло́мъ проше́дшїи, на крⷭ҇тѣ́ тѧ пригвозди́ша: и҆ и҆̀же ѿ ка́мене ме́дъ сса́вшїи, же́лчь тебѣ̀ принесо́ша: но во́лею претерпѣ́лъ є҆сѝ, да на́съ свободи́ши ѿ рабо́ты вра́жїѧ, хрⷭ҇тѐ бж҃е сла́ва тебѣ̀.
Сла́ва, и҆ ны́нѣ: Бцⷣе, ты̀ є҆сѝ лоза̀:
Тропа́рь ѕ҃-гѡ часа̀, гла́съ в҃:
Сп҃се́нїе содѣ́лалъ є҆сѝ посредѣ̀ землѝ хрⷭ҇тѐ бж҃е, на крⷭ҇тѣ̀ пречⷭ҇тѣи рꙋ́цѣ твоѝ просте́рлъ є҆сѝ, собира́ѧ всѧ̑ ꙗ҆зы́ки, зовꙋ́щыѧ: гдⷭ҇и, сла́ва тебѣ̀.
Сла́ва, и҆ ны́нѣ: Ꙗ҆́кѡ не и҆́мамы:
Тропа́рь ѳ҃-гѡ часа̀, гла́съ и҃:
Ви́дѧ разбо́йникъ нача́льника жи́зни на крⷭ҇тѣ̀ ви́сѧща, глаго́лаше: а҆́ще не бы̀ бг҃ъ бы́лъ вопло́щьсѧ, и҆́же съ на́ми распны́йсѧ, не бы̀ со́лнце лꙋчѝ своѧ̑ потаи́ло, нижѐ бы землѧ̀ трепе́щꙋщи трѧсла́сѧ: но всѧ̑ терпѧ́й, помѧни́ мѧ гдⷭ҇и, во црⷭ҇твїи твое́мъ.
<<рп҃з: 373>>
Сла́ва, и҆ ны́нѣ: И҆́же на́съ ра́ди рожде́йсѧ ѿ дв҃ы:
Конда́къ, гла́съ и҃:
На́съ ра́ди распѧ́таго прїиди́те всѝ воспои́мъ: того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
Во ст҃ꙋ́ю и҆ вели́кꙋю сꙋббѡ́тꙋ.
Тропа́рь, гла́съ в҃:
Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ, и҆ вонѧ́ми во гро́бѣ но́вѣ покры́въ положѝ.
Сла́ва: Є҆гда̀ снизше́лъ є҆сѝ къ сме́рти животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бжⷭ҇тва̀. є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.
И҆ ны́нѣ: Мѷроно́сицамъ жена́мъ, при гро́бѣ предста́въ а҆́гг҃лъ вопїѧ́ше: мѵ̑ра мє́ртвымъ сꙋ́ть прили̑чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь.
Конда́къ, гла́съ ѕ҃:
Подо́бенъ: Рꙋкопи́саннагѡ:
Бе́зднꙋ заключи́вый ме́ртвъ зри́тсѧ и҆ смѵ́рною и҆ плащани́цею ѡ҆бви́всѧ, во гро́бѣ полага́етсѧ, ꙗ҆́кѡ сме́ртный, безсме́ртный: жены́ же прїидо́ша пома́зати є҆го̀ мѵ́ромъ, пла́чꙋщыѧ го́рькѡ и҆ вопїю́щыѧ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ, воскрⷭ҇нетъ тридне́венъ.
<<рп҃з ѡ҆б.: 374>>
ВО СТ҃Ꙋ́Ю И҆ ВЕЛИ́КꙊЮ СꙊББѠ́ТꙊ
ве́чера, ѡ҆ часѣ̀ і҃-мъ днѐ кле́плетъ въ вели́кое.
И҆ собра́вшесѧ въ цр҃ковь, ѡ҆блачи́тсѧ і҆ере́й, и҆ дїа́конъ. И҆ бл҃гослови́вшꙋ і҆ере́ю, начина́емъ вече́рню, глаго́лемъ: Цр҃ю̀ нбⷭ҇ный: Трист҃о́е, по Ѻ҆́ч҃е на́шъ: Гдⷭ҇и поми́лꙋй, в҃і. Сла́ва и҆ ны́нѣ: Прїиди́те поклони́мсѧ, три́жды. Ѱало́мъ: Бл҃гословѝ дꙋшѐ моѧ̀ гдⷭ҇а: Посе́мъ є҆ктенїа̀ вели́каѧ. И҆ возгла́съ. Гдⷭ҇и воззва́хъ, пое́мъ во гла́съ а҃: І҆ере́й же и҆ дїа́конъ ѿше́дше творѧ́тъ проскомі́дїю: И҆ ста́вимъ стїхѡ́въ и҆̀, и҆ пое́мъ стїхи̑ры воскрⷭ҇ны д҃. И҆ трїѡ́ди самогла́сны г҃, на д҃. Въ то́же вре́мѧ кади́тъ дїа́конъ.
Стїхи̑ры воскрⷭ҇ны, гла́съ а҃:
Вечє́рнїѧ на́шѧ мл҃твы прїимѝ ст҃ы́й гдⷭ҇и, и҆ пода́ждь на́мъ ѡ҆ставле́нїе грѣхѡ́въ, ꙗ҆́кѡ є҆ди́нъ є҆сѝ ꙗ҆вле́й въ мі́рѣ воскрⷭ҇нїе.
Ѡ҆быди́те лю́дїе сїѡ́нъ, и҆ ѡ҆б̾ими́те є҆го̀, и҆ дади́те сла́вꙋ въ не́мъ воскрⷭ҇шемꙋ и҆з̾ ме́ртвыхъ: ꙗ҆́кѡ то́й є҆́сть бг҃ъ на́шъ, и҆збавле́й на́съ ѿ беззако́нїй на́шихъ.
Прїиди́те лю́дїе, воспои́мъ, и҆ поклони́мсѧ хрⷭ҇тꙋ̀, сла́вѧще є҆гѡ̀ и҆з̾ ме́ртвыхъ воскрⷭ҇нїе: ꙗ҆́кѡ то́й є҆́сть бг҃ъ на́шъ, ѿ ле́сти вра́жїѧ мі́ръ и҆збавле́й.
Стрⷭ҇тїю твое́ю хрⷭ҇тѐ, ѿ страсте́й свободи́хомсѧ, и҆ воскрⷭ҇нїемъ твои́мъ и҆з̾ и҆стлѣ́нїѧ и҆зба́вихомсѧ: гдⷭ҇и, сла́ва тебѣ̀.
И҆́ны стїхи̑ры самогла́сны, вели́кїѧ сꙋббѡ́ты, трѝ, повторѧ́юще є҆ди́нꙋ, гла́съ и҃.
Дне́сь а҆́дъ стенѧ̀ вопїе́тъ: ᲂу҆́не мнѣ̀ бѧ́ше, а҆́ще бы́хъ ѿ мр҃і́и ро́ждшагосѧ не прїѧ́лъ: прише́дъ бо на мѧ̀ держа́вꙋ мою̀ разрꙋшѝ, врата̀ мѣ̑днаѧ сокрꙋшѝ: дꙋ́шы, ꙗ҆̀же содержа́хъ пре́жде, бг҃ъ сы́й воскр҃сѝ. сла́ва гдⷭ҇и, крⷭ҇тꙋ̀ твоемꙋ̀ и҆ воскрⷭ҇нїю твоемꙋ̀.
<<рп҃и: 375>>
Дне́сь а҆́дъ стенѧ̀ вопїе́тъ: разрꙋши́сѧ моѧ̀ вла́сть, прїѧ́хъ ме́ртваго ꙗ҆́кѡ є҆ди́наго ѿ ᲂу҆ме́ршихъ: сего́ бо держа́ти ѿню́дъ не могꙋ̀, но погꙋблѧ́ю съ ни́мъ, и҆́миже ца́рствовахъ. а҆́зъ и҆мѣ́хъ мертвецы̀ ѿ вѣ́ка: но се́й сѐ всѣ́хъ воздвиза́етъ. сла́ва, гдⷭ҇и, крⷭ҇тꙋ̀ твоемꙋ̀, и҆ воскрⷭ҇нїю твоемꙋ̀.
Дне́сь а҆́дъ стенѧ̀ вопїе́тъ: поже́рта моѧ̀ бы́сть держа́ва. па́стырь распѧ́тсѧ и҆ а҆да́ма воскр҃сѝ, и҆́миже ца́рствовахъ, лиши́хсѧ: и҆ ꙗ҆̀же пожро́хъ возмогі́й, всѣ́хъ и҆зблева́хъ. и҆стощѝ гро́бы распны́йсѧ: и҆знемога́етъ сме́ртнаѧ держа́ва. сла́ва гдⷭ҇и крⷭ҇тꙋ̀ твоемꙋ̀, и҆ воскрⷭ҇нїю твоемꙋ̀.
Сла́ва, гла́съ ѕ҃:
Дне́шнїй де́нь та́йнѡ вели́кїй мѡѷсе́й проѡбразова́ше, глаго́лѧ: и҆ бл҃гословѝ бг҃ъ де́нь седмы́й. сїѧ́ бо є҆́сть бл҃гослове́ннаѧ сꙋббѡ́та, се́й є҆́сть ᲂу҆покое́нїѧ де́нь, во́ньже почѝ ѿ всѣ́хъ дѣ́лъ свои́хъ є҆диноро́дный сн҃ъ бж҃їй, смотре́нїемъ є҆́же на сме́рть, пло́тїю сꙋббѡ́тствовавъ: и҆ во є҆́же бѣ̀, па́ки возвра́щьсѧ воскрⷭ҇нїемъ, дарова̀ на́мъ живо́тъ вѣ́чный, ꙗ҆́кѡ є҆ди́нъ бл҃гъ и҆ чл҃вѣколю́бецъ.
И҆ ны́нѣ, бг҃оро́диченъ, гла́съ а҃.
Всемі́рнꙋю сла́вꙋ ѿ человѣ̑къ прозѧ́бшꙋю, и҆ влⷣкꙋ ро́ждшꙋю, нбⷭ҇нꙋю две́рь воспои́мъ мр҃і́ю дв҃ꙋ, безпло́тныхъ пѣ́снь, и҆ вѣ́рныхъ ᲂу҆добре́нїе. сїѧ́ бо ꙗ҆ви́сѧ нб҃о, и҆ хра́мъ бжⷭ҇тва̀: сїѧ̀ прегражде́нїе вражды̀ разрꙋши́вши, ми́ръ введѐ, и҆ црⷭ҇твїе ѿве́рзе. сїю̀ ᲂу҆́бѡ и҆мꙋ́ще вѣ́ры ᲂу҆твержде́нїе, побо́рника и҆́мамы и҆з̾ неѧ̀ ро́ждшагосѧ гдⷭ҇а. дерза́йте ᲂу҆̀бо, дерза́йте лю́дїе бж҃їи: и҆́бо то́й побѣди́тъ врагѝ, ꙗ҆́кѡ всеси́ленъ.
[зрѝ] Подоба́етъ вѣ́дати: а҆́ще ли нѣ́кїѧ нꙋ́жды ра́ди вели́кїѧ нѣ́сть лїтꙋргі́и, пое́мъ на Гдⷭ҇и воззва́хъ, стїхи̑ры на и҃: Воскрⷭ҇ны, г҃, и҆ а҆нато́лїевъ а҃: И҆ трїѡ́ди г҃, на д҃. Сла́ва, гла́съ ѕ҃: Дне́шнїй де́нь та́йнѡ: И҆ ны́нѣ, бг҃оро́диченъ а҃-й: Всемі́рнꙋю сла́вꙋ: Вхо́дъ съ кади́ломъ. Свѣ́те ти́хїй: Прокі́менъ: Гдⷭ҇ь воцр҃и́сѧ: И҆ чтє́нїѧ днѐ трїѡ́ди по чи́нꙋ своемꙋ̀. По сконча́нїи же чте́нїй є҆ктенїа̀: Рце́мъ всѝ: Та́же, Сподо́би гдⷭ҇и въ ве́черъ се́й: Посе́мъ, И҆спо́лнимъ вече́рнюю мл҃твꙋ:
<<рп҃и ѡ҆б.: 376>>
На стїхо́внѣ стїхи̑ры воскрⷭ҇ны, гла́съ а҃:
Стрⷭ҇тїю твое́ю хрⷭ҇тѐ, ѿ страсте́й свободи́хомсѧ, и҆ воскрⷭ҇нїемъ твои́мъ и҆з̾ и҆стлѣ́нїѧ и҆зба́вихомсѧ, гдⷭ҇и, сла́ва тебѣ̀.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Да ра́дꙋетсѧ тва́рь, нб҃са̀ да веселѧ́тсѧ, рꙋка́ми да воспле́щꙋтъ ꙗ҆зы́цы съ весе́лїемъ: хрⷭ҇то́съ бо сп҃съ на́шъ на крⷭ҇тѣ̀ пригвоздѝ грѣхѝ на́шѧ: и҆ сме́рть ᲂу҆мертви́въ, живо́тъ на́мъ дарова̀, па́дшаго а҆да́ма всеро́днаго воскр҃си́вый, ꙗ҆́кѡ чл҃вѣколю́бецъ.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Цр҃ь сы́й нб҃сѐ и҆ землѝ непостижи́ме, во́лею распѧ́лсѧ є҆сѝ за человѣколю́бїе: є҆го́же а҆́дъ срѣ́тъ до́лѣ, ѡ҆горчи́сѧ, и҆ пра́ведныхъ дꙋ́шы прїе́мше возра́довашасѧ. а҆да́мъ же ви́дѣвъ тѧ̀ зижди́телѧ въ преиспо́днихъ воскр҃се. ѽ чꙋдесѐ! ка́кѡ сме́рти вкꙋсѝ всѣ́хъ жи́знь; но ꙗ҆́коже восхотѣ̀ мі́ръ просвѣти́ти зовꙋ́щїй, и҆ глаго́лющїй: воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.
Сті́хъ: До́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дне́й.
Жєны̀ мѷронѡ́сицы, мѵ́ра носѧ́ще, со тща́нїемъ и҆ рыда́нїемъ гро́ба твоегѡ̀ достиго́ша: и҆ не ѡ҆брѣ́тше пречⷭ҇тагѡ тѣ́ла твоегѡ̀, ѿ а҆́гг҃ла же ᲂу҆вѣ́дѣвше но́вое и҆ пресла́вное чꙋ́до, а҆пⷭ҇лѡмъ глаго́лахꙋ: воскр҃се гдⷭ҇ь, подаѧ̀ мі́рови ве́лїю млⷭ҇ть.
Сла́ва, и҆ ны́нѣ, бг҃оро́диченъ:
Сѐ и҆спо́лнисѧ и҆са́їино прорече́нїе: дв҃а бо родила̀ є҆сѝ, и҆ по рождествѣ̀ ꙗ҆́кѡ пре́жде ржⷭ҇тва̀ пребыла̀ є҆сѝ, бг҃ъ бо бѣ̀ рожде́йсѧ: тѣ́мже и҆ є҆стества̀ новопресѣчѐ. но ѽ бг҃омт҃и, молє́нїѧ твои́хъ рабѡ́въ, въ твое́мъ хра́мѣ приноси̑маѧ тебѣ̀, не пре́зри: но ꙗ҆́кѡ бл҃гоꙋтро́бнаго твои́ма рꙋка́ма носѧ́щи, на твоѧ̑ рабы̑ ᲂу҆млⷭ҇рдисѧ, и҆ молѝ сп҃сти́сѧ дꙋша́мъ на́шымъ.
И҆ про́чаѧ слꙋ́жба вече́рни.
По Ѻ҆́ч҃е на́шъ: Тропарѝ: Бл҃гоѡбра́зный і҆ѡ́сифъ:
Сла́ва, Є҆гда̀ снизше́лъ є҆сѝ къ сме́рти: И҆ ны́нѣ: Мѷроно́сицамъ жена́мъ.
И҆ ѿпꙋ́стъ.
<<рп҃ѳ: 377>>
ВО СТ҃Ꙋ́Ю И҆ ВЕЛИ́КꙊЮ НЕДѢ́ЛЮ ПА́СХИ
ѡ҆ часѣ̀ ᲂу҆́треннѣмъ, параекклисїа́рхъ, взе́мъ бл҃гослове́нїе ᲂу҆ настоѧ́телѧ, и҆схо́дитъ и҆ ᲂу҆дарѧ́етъ въ вели́кое, и҆ кле́плетъ дово́льнѡ. И҆ вше́дъ во хра́мъ, вжига́етъ свѣщы̀ всѧ̑, и҆ канди̑ла: ᲂу҆строѧ́етъ же сосꙋ́ды два̀ со ᲂу҆́глїемъ горѧ́щимъ, и҆ влага́етъ въ ни́хъ ѳѷмїа́ма мно́гѡ бл҃гово́ннагѡ, и҆ поставлѧ́етъ є҆ди́нъ сосꙋ́дъ средѝ цр҃кве, дрꙋгі́й же во ст҃о́мъ ѻ҆лтарѣ̀, ꙗ҆́кѡ да и҆спо́лнитсѧ цр҃ковь всѧ̀ бл҃гово́нїѧ. Та́же настоѧ́тель вше́дъ во ст҃ы́й ѻ҆лта́рь, со і҆ерє́и и҆ дїа́коны, ѡ҆блача́тсѧ въ ве́сь свѣтлѣ́йшїй са́нъ. И҆ раздае́тъ свѣщы̀ бра́тїи, и҆ взе́млетъ чⷭ҇тны́й крⷭ҇тъ, кади́ло же взе́млетъ дїа́конъ, і҆ере́й же ст҃о́е є҆ѵⷢ҇лїе, и҆́нъ і҆ере́й ѡ҆́бразъ воскрⷭ҇нїѧ хрⷭ҇то́ва, и҆ ста́вѧтсѧ лице́мъ на за́падъ. И҆ затворѧ́тъ врата̀ цр҃кѡ́внаѧ, ꙗ҆̀же къ за́падꙋ. И҆схо́дитъ настоѧ́тель со і҆ерє́и въ притво́ръ, сѣ́верными две́рьми, пред̾идꙋ́щымъ пред̾ ни́мъ дїа́конѡмъ со двѣма̀ свѣща́ми, и҆ ѻ҆́ба ли̑ка, пою́ще стїхи́рꙋ, гла́съ ѕ҃:
Воскрⷭ҇нїе твоѐ, хрⷭ҇тѐ сп҃се, а҆́гг҃ли пою́тъ на нб҃сѣ́хъ, и҆ на́съ на землѝ сподо́би чи́стымъ се́рдцемъ тебѐ сла́вити.
Та́же ᲂу҆дарѧ́ютъ во всѧ̑ кампа́ны и҆ тѧ̑жкаѧ, и҆ кле́плютъ дово́льнѡ. И҆ вше́дше въ притво́ръ, ста́нꙋтъ со є҆ѵⷢ҇лїемъ, и҆ со ѡ҆́бразомъ, лице́мъ на за́падъ, ꙗ҆́коже ᲂу҆каза́сѧ пре́жде. Та́же настоѧ́тель взе́млетъ ᲂу҆ дїа́кона кади́ло въ пра́вꙋю рꙋ́кꙋ, крⷭ҇тъ же въ лѣ́вꙋю, и҆ кади́тъ ѡ҆́бразы, и҆ кли́росы, и҆ бра́тїю по ѻ҆бы́чаю, дїа́конꙋ же предносѧ́щꙋ пред̾ ни́мъ свѣщꙋ̀ горѧ́щꙋ. Бра́тїѧ же всѝ стоѧ́тъ держа́ще свѣщы̀ своѧ̑, со внима́нїемъ молѧ́щесѧ въ себѣ̀, и҆ бл҃годарѧ́ще на́съ ра́ди пострада́вшаго <<рп҃ѳ ѡ҆б.: 378>> и҆ воскрⷭ҇шаго хрⷭ҇та̀ бг҃а на́шего. По сконча́нїи же кажде́нїѧ прихо́дитъ настоѧ́тель пред̾ вели̑кїѧ врата̀ цр҃кве, и҆ покади́тъ дїа́кона предстоѧ́щаго є҆мꙋ̀ со свѣще́ю. Тогда̀ взе́мь кади́ло дїа́конъ ѿ рꙋкꙋ̀ настоѧ́телѧ, и҆ покади́тъ самого̀ настоѧ́телѧ. И҆ па́ки воспрїи́мъ настоѧ́тель кади́ло, ста́въ пред̾ цр҃ко́вными две́рьми, зрѧ̀ на восто́къ, и҆ назна́менаетъ вели̑кїѧ врата̀ цр҃кве, [затворє́наѧ сꙋ́ща] кади́ломъ крⷭ҇тоѡбра́знѡ, три́жды, держа̀ въ лѣ́вой рꙋцѣ̀ чⷭ҇тны́й крⷭ҇тъ, и҆ свѣти́льникѡмъ стоѧ́щымъ со ѻ҆бою̀ странꙋ̑.
И҆ велегла́снѡ возгласи́тъ:
Сла́ва ст҃ѣ́й, и҆ є҆диносꙋ́щнѣй, и҆ животворѧ́щей, и҆ нераздѣ́льнѣй трⷪ҇цѣ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
И҆ на́мъ ѿвѣща́ющымъ: А҆ми́нь.
Начина́етъ настоѧ́тель съ про́чими слꙋжи́тєли велегла́снѡ настоѧ́щїй тропа́рь, во гла́съ є҃:
Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.
И҆ мы̀ то́йжде пое́мъ подо́бнѣ со сладкопѣ́нїемъ: пое́тсѧ же се́й тропа́рь три́жды ѿ настоѧ́телѧ, и҆ три́жды ѿ на́съ. Та́же настоѧ́тель глаго́летъ стїхѝ.
Пе́рвый сті́хъ: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀.
И҆ на кі́йждо сті́хъ мы̀ пое́мъ тропа́рь: Хрⷭ҇то́съ воскр҃се: ве́сь по є҆ди́ножды.
Вторы́й сті́хъ: Ꙗ҆́кѡ и҆счеза́етъ ды́мъ да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀. Хрⷭ҇то́съ воскр҃се: [є҆ди́ножды].
Сті́хъ г҃: Та́кѡ да поги́бнꙋтъ грѣ̑шницы ѿ лица̀ бж҃їѧ, а҆ првⷣницы да возвеселѧ́тсѧ. Хрⷭ҇то́съ воскр҃се: [є҆ди́ножды].
Сті́хъ д҃: Се́й де́нь, є҆го́же сотворѝ гдⷭ҇ь, возра́дꙋемсѧ, и҆ возвесели́мсѧ во́нь. Хрⷭ҇то́съ воскр҃се: [є҆ди́ножды].
Сла́ва: Хрⷭ҇то́съ воскр҃се: є҆ди́ножды И҆ ны́нѣ: Хрⷭ҇то́съ воскр҃се: є҆ди́ножды.
Та́же настоѧ́тель пое́тъ вы́шшимъ гла́сомъ:
Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ.
<<р҃ч: 379>>
И҆ ѿверза́етъ врата̀.
Вхо́дитъ настоѧ́тель съ чтⷭ҇ны́мъ крⷭ҇то́мъ, пред̾идꙋ́щымъ є҆мꙋ̀ со двѣма̀ лампа́дами. И҆ бра́тїѧмъ пою́щымъ:
И҆ сꙋ́щымъ во гробѣ́хъ живо́тъ дарова́въ.
Та́же ᲂу҆дарѧ́ютъ во всѧ̑ кампа́ны, и҆ кле́плютъ дово́льнѡ трѝ зво́ны.
Вше́дъ же настоѧ́тель со і҆ерє́и во ст҃ы́й ѻ҆лта́рь. И҆ дїа́конъ глаго́летъ є҆ктенїю̀ вели́кꙋю.
Ми́ромъ гдⷭ҇ꙋ помо́лимсѧ:
Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва:
И҆ начина́етъ предстоѧ́тель канѡ́нъ, творе́нїе господи́на і҆ѡа́нна дамаски́на. Гла́съ а҃. і҆рмо́съ: Воскрⷭ҇нїѧ де́нь: І҆рмосы̀ на д҃: и҆ тропарѝ на в҃і, съ припѣ́вы: Хрⷭ҇то́съ воскр҃се: И҆ па́ки послѣдѝ кі́йждо ли́къ і҆рмо́съ. Послѣди́ же на схо́дѣ катава́сїа, і҆рмо́съ То́йже: Воскрⷭ҇нїѧ де́нь: и҆ пое́мъ, Хрⷭ҇то́съ воскр҃се: ве́сь, три́жды.
Твори́тъ же нача́ло канѡ́на на кꙋ́юждо пѣ́снь всегда̀ предстоѧ́тель, десно́й и҆лѝ лѣ́вой странѣ̀ слꙋчи́вшейсѧ нача́ти. И҆ кади́тъ въ нача́лѣ канѡ́на ст҃ы̑ѧ і҆кѡ́ны, и҆ ѻ҆́ба ли̑ка, и҆ бра́тїю по чи́нꙋ.
И҆ по ко́ейждо пѣ́сни быва́етъ є҆ктенїа̀ ма́лаѧ внѣ̀ ѻ҆лтарѧ̀, ꙗ҆́коже рѣ́хомъ, во ст҃ы́й се́й де́нь. Возгла́съ внꙋ́трь ѻ҆лтарѧ̀ ѿ і҆ере́а: Ꙗ҆́кѡ твоѧ̀ держа́ва: По а҃-й пѣ́сни пое́тъ десна́ѧ страна̀. По г҃-й же пое́тъ лѣ́ваѧ. Си́це пое́мъ и҆ по про́чихъ пѣ́снехъ.
Канѡ́нъ. Гла́съ а҃.
Пѣ́снь а҃.
І҆рмо́съ: Воскрⷭ҇нїѧ де́нь, просвѣти́мсѧ лю́дїе: па́сха, гдⷭ҇нѧ па́сха! ѿ сме́рти бо къ жи́зни, и҆ ѿ землѝ къ нб҃сѝ, хрⷭ҇то́съ бг҃ъ на́съ преведѐ, побѣ́днꙋю пою́щыѧ.
Припѣ́въ: Хрⷭ҇то́съ воскр҃се и҆з̾ ме́ртвыхъ.
Ѡ҆чи́стимъ чꙋ̑вствїѧ, и҆ ᲂу҆́зримъ непристꙋ́пнымъ свѣ́томъ воскрⷭ҇нїѧ хрⷭ҇та̀ блиста́ющасѧ, и҆ ра́дꙋйтесѧ, рекꙋ́ща, ꙗ҆́снѡ да ᲂу҆слы́шимъ, побѣ́днꙋю пою́ще.
Нб҃са̀ ᲂу҆́бѡ досто́йнѡ да веселѧ́тсѧ, землѧ́ же да ра́дꙋетсѧ, да пра́зднꙋетъ же мі́ръ, ви́димый же ве́сь, и҆ неви́димый: хрⷭ҇то́съ бо воста̀, весе́лїе вѣ́чное.
<<р҃ч ѡ҆б.: 380>>
И҆́ный канѡ́нъ бг҃оро́диченъ, подо́бенъ. Творе́нїе господи́на ѳеофа́на, и҆ господи́на і҆ѡ́сифа, є҆гѡ́же краестро́чїе на пе́рвыхъ тропарѣ́хъ, ѳеофа́нꙋсъ. Гла́съ то́йже. [Сі́и же глаго́лютсѧ кромѣ̀ пе́рвагѡ днѐ.]
[ѳеофа́нъ] Оу҆мерщвле́нїѧ предѣ́лъ сломи́ла є҆сѝ, вѣ́чнꙋю жи́знь ро́ждшаѧ хрⷭ҇та̀, и҆з̾ гро́ба возсїѧ́вшаго дне́сь, дв҃о всенепоро́чнаѧ, и҆ мі́ръ просвѣти́вшаго.
[і҆ѡ́сифъ] Воскрⷭ҇шаго ви́дѣвши сн҃а твоего̀ и҆ бг҃а, ра́дꙋйсѧ со а҆пⷭ҇лы бг҃обл҃года́тнаѧ чтⷭ҇аѧ, и҆ є҆́же ра́дꙋйсѧ пе́рвѣе, ꙗ҆́кѡ всѣ́хъ ра́дости вина̀, воспрїѧ́ла є҆сѝ, бг҃омт҃и всенепоро́чнаѧ.
Та́же, є҆ктенїа̀ И҆ возгла́съ:
Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Пѣ́снь г҃.
І҆рмо́съ: Прїиди́те пи́во пїе́мъ но́вое, не ѿ ка́мене непло́дна чꙋдодѣ́емое: но нетлѣ́нїѧ и҆сто́чникъ, и҆з̾ гро́ба ѡ҆дожди́вша хрⷭ҇та̀, въ не́мже ᲂу҆твержда́емсѧ.
Ны́нѣ всѧ̑ и҆спо́лнишасѧ свѣ́та, нб҃о же и҆ землѧ̀ и҆ преиспѡ́днѧѧ: да пра́зднꙋетъ ᲂу҆́бѡ всѧ̀ тва́рь воста́нїе хрⷭ҇то́во, въ не́мже ᲂу҆твержда́етсѧ.
Вчера̀ спогребо́хсѧ тебѣ̀, хрⷭ҇тѐ, совостаю̀ дне́сь воскрⷭ҇шꙋ тебѣ̀, сраспина́хсѧ тебѣ̀ вчера̀, са́мъ мѧ̀ спросла́ви, сп҃се, во црⷭ҇твїи твое́мъ.
[ѳеофа́нъ] На нетлѣ́ннꙋю жи́знь прихождꙋ̀ дне́сь, бл҃гостїю ро́ждшагѡсѧ и҆з̾ тебѐ, чⷭ҇таѧ, и҆ всѣ̑мъ концє́мъ свѣ́тъ ѡ҆блиста́вшагѡ.
Бг҃а є҆го́же родила̀ є҆сѝ пло́тїю, и҆з̾ ме́ртвыхъ, ꙗ҆́коже речѐ, воста́вша ви́дѣвши, чтⷭ҇аѧ, ликꙋ́й, и҆ сего̀ ꙗ҆́кѡ бг҃а, пречⷭ҇таѧ, возвелича́й.
Є҆ктенїа̀ И҆ возгла́съ:
Ꙗ҆́кѡ ты̀ є҆сѝ бг҃ъ на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ѵ҆пакоѝ, гла́съ д҃:
Предвари́вшыѧ ᲂу҆́трѡ ꙗ҆̀же ѡ҆ марі́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ <<рч҃а: 381>> сꙋ́щаго, съ ме́ртвыми что̀ и҆́щете ꙗ҆́кѡ человѣ́ка; ви́дите грѡ́бныѧ пелєны̀, тецы́те и҆ мі́рꙋ проповѣ́дите, ꙗ҆́кѡ воста̀ гдⷭ҇ь, ᲂу҆мертви́вый сме́рть: ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй.
И҆ чте́нїе въ григо́рїи бг҃осло́вѣ, є҆гѡ́же нача́ло: На стра́жи мое́й ста́нꙋ: По чте́нїи же па́ки вжига́ютъ свѣщы̀ бра́тїѧ.
Пѣ́снь д҃.
І҆рмо́съ: На бж҃е́ственнѣй стра́жи бг҃оглаго́ливый а҆ввакꙋ́мъ, да ста́нетъ съ на́ми и҆ пока́жетъ свѣтоно́сна а҆́гг҃ла, ꙗ҆́снѡ глаго́люща: дне́сь сп҃се́нїе мі́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.
Мꙋ́жескїй ᲂу҆́бѡ по́лъ, ꙗ҆́кѡ разве́рзый двⷭ҇твеннꙋю ᲂу҆тро́бꙋ, ꙗ҆ви́сѧ хрⷭ҇то́съ: ꙗ҆́кѡ человѣ́къ же, а҆́гнецъ нарече́сѧ, непоро́ченъ же, ꙗ҆́кѡ невкꙋ́сенъ скве́рны, на́ша па́сха, и҆ ꙗ҆́кѡ бг҃ъ и҆́стиненъ, соверше́нъ рече́сѧ.
Ꙗ҆́кѡ є҆динолѣ́тный а҆́гнецъ бл҃гослове́нный на́мъ вѣне́цъ хрⷭ҇то́съ, во́лею за всѣ́хъ закла́нъ бы́сть, па́сха чисти́тельнаѧ, и҆ па́ки и҆з̾ гро́ба кра́сное пра́вды на́мъ возсїѧ̀ со́лнце.
Бг҃оѻте́цъ ᲂу҆́бѡ дв҃дъ, пред̾ сѣ́ннымъ ковче́гомъ скака́ше и҆гра́ѧ: лю́дїе же бж҃їи ст҃і́и, ѡ҆бразѡ́въ сбытїѐ зрѧ́ще, весели́мсѧ бж҃е́ственнѣ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.
[ѳеофа́нъ] Созда́вый а҆да́ма, твоего̀ пра́ѻтца, чⷭ҇таѧ, зи́ждетсѧ ѿ тебѐ, и҆ сме́ртное жили́ще разорѝ свое́ю сме́ртїю дне́сь, и҆ ѡ҆зарѝ всѧ̑ бж҃е́ственными блиста́ньми воскрⷭ҇нїѧ.
Є҆го́же родила̀ є҆сѝ хрⷭ҇та̀, прекра́снѡ и҆з̾ ме́ртвыхъ возсїѧ́вша чⷭ҇таѧ зрѧ́щи, до́браѧ и҆ непоро́чнаѧ въ жена́хъ и҆ кра́снаѧ, дне́сь во сп҃се́нїе всѣ́хъ со а҆пⷭ҇лы ра́дꙋющисѧ, того̀ прославлѧ́й.
Є҆ктенїа̀ И҆ возгла́съ.
Ꙗ҆́кѡ бл҃гъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Пѣ́снь є҃.
І҆рмо́съ: Оу҆́тренюемъ ᲂу҆́треннюю глꙋбокꙋ̀, и҆ вмѣ́стѡ мѵ́ра пѣ́снь принесе́мъ влⷣцѣ: и҆ хрⷭ҇та̀ ᲂу҆́зримъ пра́вды сл҃нце, всѣ̑мъ жи́знь возсїѧ́юща.
<<рч҃а ѡ҆б.: 382>>
Безмѣ́рное твоѐ бл҃гоꙋтро́бїе а҆́довыми ᲂу҆́зами содержи́мїи зрѧ́ще, къ свѣ́тꙋ и҆дѧ́хꙋ, хрⷭ҇тѐ, весе́лыми нога́ми, па́схꙋ хва́лѧще вѣ́чнꙋю.
Пристꙋпи́мъ свѣщено́снїи, и҆сходѧ́щꙋ хрⷭ҇тꙋ̀ и҆з̾ гро́ба ꙗ҆́кѡ женихꙋ̀, и҆ спра́зднꙋимъ любопра́зднственными чи́нми, па́схꙋ бж҃їю сп҃си́тельнꙋю.
[ѳеофа́нъ] Просвѣща́етсѧ бж҃е́ственными лꙋча́ми и҆ живоно́сными воскрⷭ҇нїѧ сн҃а твоегѡ̀, бг҃омт҃и пречⷭ҇таѧ, и҆ ра́дости и҆сполнѧ́етсѧ бл҃гочести́выхъ собра́нїе.
Не разве́рзлъ є҆сѝ врата̀ двⷭ҇тва въ воплоще́нїи, гро́ба не разрꙋши́лъ є҆сѝ печа́тей цр҃ю̀ созда́нїѧ: ѿѻнꙋ́дꙋже воскрⷭ҇шаго тѧ̀ зрѧ́щи мт҃и ра́довашесѧ.
Є҆ктенїа̀ И҆ возгла́съ:
Ꙗ҆́кѡ ст҃и́сѧ и҆ просла́висѧ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Пѣ́снь ѕ҃.
І҆рмо́съ: Снизше́лъ є҆сѝ въ преиспѡ́днѧѧ землѝ, и҆ сокрꙋши́лъ є҆сѝ верєѝ вѣ̑чныѧ, содержа́щыѧ свѧ́занныѧ, хрⷭ҇тѐ, и҆ тридне́венъ, ꙗ҆́кѡ ѿ ки́та і҆ѡ́на, воскр҃лъ є҆сѝ ѿ гро́ба.
Сохрани́въ цѣ̑ла зна́мєнїѧ, хрⷭ҇тѐ, воскрⷭ҇лъ є҆сѝ ѿ гро́ба, ключѝ дв҃ы не вреди́вый въ ржⷭ҇твѣ̀ твое́мъ, и҆ ѿве́рзлъ є҆сѝ на́мъ ра̑йскїѧ двє́ри.
Сп҃се мо́й, живо́е же и҆ неже́ртвенное заколе́нїе, ꙗ҆́кѡ бг҃ъ са́мъ себѐ во́лею приве́дъ ѻ҆ц҃ꙋ̀, совоскр҃си́лъ є҆сѝ всеро́днаго а҆да́ма, воскр҃съ ѿ гро́ба.
[ѳеофа́нъ] Возведе́сѧ дре́вле держи́мое сме́ртїю и҆ тлѣ́нїемъ, воплоти́вшимсѧ ѿ твоегѡ̀ пречⷭ҇тагѡ чре́ва, къ нетлѣ́ннѣй и҆ присносꙋ́щнѣй жи́зни, бцⷣе дв҃о.
Вни́де въ преиспѡ́днѧѧ землѝ, въ ложесна̀ твоѧ̑, чⷭ҇таѧ, сше́дый, и҆ всели́выйсѧ и҆ воплоти́выйсѧ па́че ᲂу҆ма̀, и҆ воздви́же съ собо́ю а҆да́ма, воскр҃съ ѿ гро́ба.
<<рч҃в: 383>>
Є҆ктенїа̀ И҆ возгла́съ:
Ты́ бо є҆сѝ цр҃ь ми́ра, и҆ сп҃съ дꙋ́шъ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Та́же конда́къ, гла́съ и҃:
А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель, хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ, и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.
І҆́косъ: Є҆́же пре́жде со́лнца сл҃нце заше́дшее и҆ногда̀ во гро́бъ, предвари́ша ко ᲂу҆́трꙋ, и҆́щꙋщыѧ ꙗ҆́кѡ днѐ мѷронѡ́сицы дѣ̑вы, и҆ дрꙋга̀ ко дрꙋзѣ́й вопїѧ́хꙋ: ѽ дрꙋги̑ни! прїиди́те, вонѧ́ми пома́жемъ тѣ́ло живоно́сное, и҆ погребе́нное, пло́ть воскреси́вшаго па́дшагѡ а҆да́ма, лежа́щꙋю во гро́бѣ: и҆́демъ, потщи́мсѧ ꙗ҆́коже волсвѝ, и҆ поклони́мсѧ, и҆ принесе́мъ мѵ̑ра ꙗ҆́кѡ да́ры, не въ пелена́хъ, но въ плащани́цѣ ѡ҆бви́томꙋ, и҆ пла́чимъ, и҆ возопїи́мъ: ѽ влⷣко! воста́ни, па́дшымъ подаѧ́й воскрⷭ҇нїе.
И҆ полага́етсѧ чте́нїе.
Та́же глаго́лемъ: Воскрⷭ҇нїе хрⷭ҇то́во ви́дѣвше: три́жды. и҆ Воскр҃съ і҆и҃съ ѿ гро́ба, ꙗ҆́коже проречѐ, дадѐ на́мъ живо́тъ вѣ́чный, и҆ ве́лїю млⷭ҇ть. [три́жды.]
Пѣ́снь з҃.
І҆рмо́съ: Ѻ҆́троки ѿ пе́щи и҆зба́вивый, бы́въ чл҃вѣ́къ, стра́ждетъ ꙗ҆́кѡ сме́ртенъ, и҆ стрⷭ҇тїю сме́ртное въ нетлѣ́нїѧ ѡ҆блачи́тъ бл҃голѣ́пїе, є҆ди́нъ бл҃гослове́нъ ѻ҆тцє́въ бг҃ъ, и҆ препросла́вленъ.
Жєны̀ съ мѵ́ры бг҃омꙋ̑дрыѧ въ слѣ́дъ тебѐ теча́хꙋ: є҆гѡ́же ꙗ҆́кѡ ме́ртва со слеза́ми и҆ска́хꙋ, поклони́шасѧ ра́дꙋющыѧсѧ живо́мꙋ бг҃ꙋ, и҆ па́схꙋ та́йнꙋю твои̑мъ, хрⷭ҇тѐ, ᲂу҆ч҃нкѡмъ бл҃говѣсти́ша.
Сме́рти пра́зднꙋемъ ᲂу҆мерщвле́нїе, а҆́дово разрꙋше́нїе, и҆но́гѡ житїѧ̀ вѣ́чнагѡ нача́ло, и҆ и҆гра́юще пое́мъ вино́внаго, є҆ди́наго бл҃гослове́ннаго ѻ҆тцє́въ бг҃а, и҆ препросла́вленнаго.
Ꙗ҆́кѡ вои́стиннꙋ сщ҃е́ннаѧ, и҆ всепра́зднственнаѧ сїѧ̀ сп҃си́тельнаѧ <<рч҃в ѡ҆б.: 384>> но́щь, и҆ свѣтоза́рнаѧ, свѣтоно́снагѡ днѐ, воста́нїѧ сꙋ́щи провозвѣ́стница, въ не́йже безлѣ́тный свѣ́тъ и҆з̾ гро́ба пло́тски всѣ̑мъ возсїѧ̀.
[ѳеофа́нъ] Оу҆мертви́въ сн҃ъ тво́й сме́рть, всенепоро́чнаѧ дне́сь, всѣ̑мъ смє́ртнымъ пребыва́ющїй живо́тъ во вѣ́ки вѣкѡ́въ дарова̀, є҆ди́нъ бл҃гослове́нный ѻ҆тцє́въ бг҃ъ, и҆ препросла́вленный.
[і҆ѡ́сифъ] Всѣ́мъ ца́рствꙋѧй созда́нїемъ, бы́въ человѣ́къ, всели́сѧ во твою̀ бг҃обл҃года́тнаѧ ᲂу҆тро́бꙋ: и҆ распѧ́тїе претерпѣ́въ и҆ сме́рть воскр҃се бг҃олѣ́пнѡ, совозста́вивъ на́съ, ꙗ҆́кѡ всеси́ленъ.
Є҆ктенїа̀ И҆ возгла́съ:
Бꙋ́ди держа́ва црⷭ҇твїѧ твоегѡ̀ бл҃гослове́нна и҆ препросла́венна, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ, и҆ при́снѡ, и҆ во вѣ́ки вѣкѡ́въ.
Пѣ́снь и҃.
І҆рмо́съ: Се́й нарече́нный и҆ ст҃ы́й де́нь, є҆ди́нъ сꙋббѡ́тъ цр҃ь и҆ гдⷭ҇ь, пра́здникѡвъ пра́здникъ, и҆ торжество̀ є҆́сть торже́ствъ, во́ньже бл҃гослови́мъ хрⷭ҇та̀ во вѣ́ки.
Прїиди́те но́вагѡ вїногра́да рождє́нїѧ, бж҃е́ственнагѡ весе́лїѧ, въ наро́читомъ днѝ воскрⷭ҇нїѧ, црⷭ҇твїѧ хрⷭ҇то́ва прїѡбщи́мсѧ, пою́ще є҆го̀ ꙗ҆́кѡ бг҃а во вѣ́ки.
Возведѝ ѻ҆́крестъ ѻ҆́чи твоѝ, сїѡ́не, и҆ ви́ждь, се́ бо прїидо́ша къ тебѣ̀, ꙗ҆́кѡ бг҃освѣ̑тлаѧ свѣти̑ла, ѿ за́пада, и҆ сѣ́вера, и҆ мо́рѧ, и҆ восто́ка ча̑да твоѧ̑, въ тебѣ̀ бл҃гословѧ́щыѧ хрⷭ҇та̀ во вѣ́ки.
Трⷪ҇ченъ: Ѻ҆́ч҃е вседержи́телю, и҆ сло́ве, и҆ дш҃е, тремѝ соединѧ́емое во ѵ҆поста́сѣхъ є҆стество̀, пресꙋ́щественне и҆ пребж҃е́ственне, въ тѧ̀ крⷭ҇ти́хомсѧ, и҆ тѧ̀ бл҃гослови́мъ во всѧ̑ вѣ́ки.
[ѳеофа́нъ] Прїи́де тобо́ю въ мі́ръ гдⷭ҇ь, дв҃о бцⷣе, и҆ чре́во а҆́дово расто́ргъ, смє́ртнымъ на́мъ воскрⷭ҇нїе дарова̀: тѣ́мже бл҃гослови́мъ є҆го̀ во вѣ́ки.
[і҆ѡ́сифъ] Всю̀ низложи́въ сме́рти держа́вꙋ сн҃ъ тво́й дв҃о, свои́мъ воскрⷭ҇нїемъ, ꙗ҆́кѡ бг҃ъ крѣ́пкїй совознесѐ на́съ и҆ ѡ҆божѝ: тѣ́мже воспѣва́емъ є҆го̀ во вѣ́ки.
<<рч҃г: 385>>
Та́же, є҆ктенїа̀ и҆ возгла́съ:
Ꙗ҆́кѡ бл҃гослови́сѧ и҆́мѧ твоѐ, и҆ просла́висѧ црⷭ҇тво твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Припѣ́вы на ѳ҃-й пѣ́сни: Вели́читъ дꙋша̀ моѧ̀, воскрⷭ҇шаго тридне́внѡ ѿ гро́ба хрⷭ҇та̀ жизнода́вца.
И҆ і҆рмо́съ: Свѣти́сѧ:
И҆ вторы́й ли́къ пое́тъ то́йже припѣ́въ, и҆ і҆рмо́съ.
Та́же пе́рвый ли́къ пое́тъ вторы́й припѣ́въ:
Вели́читъ дꙋша̀ моѧ̀, во́лею страда́вша, и҆ погребе́на, и҆ воскрⷭ҇шаго тридне́внѡ ѿ гро́ба.
И҆ і҆рмо́съ: Свѣти́сѧ:
И҆ вторы́й ли́къ пое́тъ то́йже припѣ́въ, и҆ і҆рмо́съ.
Та́же пе́рвый ли́къ пое́тъ тре́тїй припѣ́въ:
Хрⷭ҇то́съ но́ваѧ па́сха, же́ртва жива́ѧ, а҆́гнецъ бж҃їй, взе́млѧй грѣхѝ мі́ра.
И҆ сті́хъ. И҆ вторы́й ли́къ пое́тъ то́йже припѣ́въ, и҆ сті́хъ.
Та́же пе́рвый ли́къ пое́тъ четве́ртый припѣ́въ.
А҆́гг҃лъ вопїѧ́ше бл҃года́тнѣй: чтⷭ҇аѧ дв҃о, ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскр҃се, тридне́венъ ѿ гро́ба, и҆ мє́ртвыѧ воздви́гнꙋвый, лю́дїе весели́тесѧ.
И҆ сті́хъ. И҆ вторы́й ли́къ пое́тъ то́йже припѣ́въ, и҆ сті́хъ.
И҆ про́чихъ ѻ҆́смь припѣ́вѡвъ припѣва́ютъ по є҆ди́ножды ко стїхѡ́мъ:
Возбꙋди́лъ є҆сѝ ᲂу҆снꙋ́въ мє́ртвыѧ ѿ вѣ́ка, ца́рски рыка́вый ꙗ҆́кѡ ѿ і҆ꙋ́ды ле́въ.
Магдали́на марі́а притечѐ ко гро́бꙋ, и҆ хрⷭ҇та̀ ви́дѣвши, ꙗ҆́кѡ вертогра́дарѧ вопроша́ше.
А҆́гг҃лъ ѡ҆блиста́ѧй жена́мъ вопїѧ́ше: преста́ните ѿ сле́зъ, ꙗ҆́кѡ хрⷭ҇то́съ воскр҃се.
Хрⷭ҇то́съ воскр҃се, сме́рть попра́вый, и҆ мє́ртвыѧ воздви́гнꙋвый, лю́дїе весели́тесѧ.
Дне́сь всѧ́ка тва́рь весели́тсѧ и҆ ра́дꙋетсѧ: ꙗ҆́кѡ хрⷭ҇то́съ воскр҃се, и҆ а҆́дъ плѣни́сѧ.
<<рч҃г ѡ҆б.: 386>>
Дне́сь влⷣка плѣнѝ а҆́да, воздви́гнꙋвый ю҆́зники ꙗ҆̀же ѿ вѣ́ка и҆мѧ́ше лю́тѣ ѡ҆держи̑мыѧ.
Вели́читъ дꙋша̀ моѧ̀ трїѷпоста́снагѡ и҆ нераздѣ́льнагѡ бж҃ества̀ держа́вꙋ.
Ра́дꙋйсѧ, дв҃о, ра́дꙋйсѧ, ра́дꙋйсѧ бл҃гослове́ннаѧ, ра́дꙋйсѧ препросла́вленнаѧ: тво́й бо сн҃ъ воскр҃се тридне́венъ ѿ гро́ба.
Послѣди́ же пе́рвый ли́къ пое́тъ па́ки пе́рвый припѣ́въ и҆ і҆рмо́съ.
Посе́мъ вторы́й ли́къ пое́тъ вторы́й припѣ́въ и҆ і҆рмо́съ.
Та́же ѻ҆́ба ли̑ка соше́дшесѧ вкꙋ́пѣ, пою́тъ і҆рмо́съ и҆ тропа́рь: Хрⷭ҇то́съ воскр҃се: [три́жды.]
Пѣ́снь ѳ҃.
І҆рмо́съ: Свѣти́сѧ, свѣти́сѧ но́вый і҆ерⷭ҇ли́ме, сла́ва бо гдⷭ҇нѧ на тебѣ̀ возсїѧ̀. ликꙋ́й ны́нѣ, и҆ весели́сѧ сїѡ́не: ты́ же чⷭ҇таѧ красꙋ́йсѧ бцⷣе ѡ҆ воста́нїи ржⷭ҇тва̀ твоегѡ̀.
Ѽ бж҃е́ственнагѡ! ѽ любе́знагѡ! ѽ сладча́йшагѡ твоегѡ̀ гла́са! съ на́ми ко нело́жнѡ ѡ҆бѣща́лсѧ є҆сѝ бы́ти, до сконча́нїѧ вѣ́ка хрⷭ҇тѐ: є҆го́же вѣ́рнїи ᲂу҆твержде́нїе наде́жди и҆мꙋ́ще ра́дꙋемсѧ.
Ѽ па́сха ве́лїѧ и҆ сщ҃е́ннѣйшаѧ хрⷭ҇тѐ! ѽ мꙋ́дросте, и҆ сло́ве бж҃їй, и҆ си́ло! подава́й на́мъ и҆́стѣе тебѐ причаща́тисѧ, въ невече́рнемъ днѝ црⷭ҇твїѧ твоегѡ̀.
[ѳеофа́нъ] Согла́снѡ дв҃о, тебѐ бл҃жи́мъ вѣ́рнїи: ра́дꙋйсѧ, две́ре гдⷭ҇нѧ, ра́дꙋйсѧ, гра́де ѡ҆дꙋшевле́нный, ра́дꙋйсѧ, є҆ѧ́же ра́ди на́мъ ны́нѣ возсїѧ̀ свѣ́тъ, и҆з̾ тебѐ рожде́ннагѡ и҆з̾ ме́ртвыхъ воскрⷭ҇нїѧ.
[і҆ѡ́сифъ] Весели́сѧ и҆ ра́дꙋйсѧ бж҃е́ственнаѧ две́ре свѣ́та: заше́дый бо і҆и҃съ во гро́бъ, возсїѧ̀, просїѧ́въ со́лнца свѣтлѣ́е, и҆ вѣ̑рныѧ всѧ̑ ѡ҆зари́въ, бг҃ора́дованнаѧ влⷣчце.
Є҆ктенїа̀ И҆ возгла́съ:
Ꙗ҆́кѡ тѧ̀ хва́лѧтъ всѧ̑ си̑лы нбⷭ҇ныѧ, ѻ҆ц҃а̀ и҆ сн҃а, и҆ ст҃а́го дх҃а, и҆ тебѣ̀ сла́вꙋ возсыла́ютъ, ны́нѣ и҆ при́снѡ и҆ во вѣ́ки вѣкѡ́въ.
<<рч҃д: 387>>
Є҆ѯапостїла́рїй самогла́сенъ:
Пло́тїю ᲂу҆снꙋ́въ ꙗ҆́кѡ ме́ртвъ, цр҃ю̀ и҆ гдⷭ҇и, тридне́венъ воскр҃лъ є҆сѝ, а҆да́ма воздви́гъ ѿ тлѝ, и҆ ᲂу҆праздни́въ сме́рть: па́сха нетлѣ́нїѧ, мі́ра сп҃се́нїе. [три́жды.]
На хвали́техъ: Всѧ́кое дыха́нїе: на гла́съ а҃.
Поста́вимъ стїхѝ д҃. И҆ пое́мъ стїхи̑ры воскрⷭ҇ны. Гла́съ а҃.
Сті́хъ: Хвали́те є҆го̀ на си́лахъ є҆гѡ̀, хвали́те є҆го̀ по мно́жествꙋ вели́чествїѧ є҆гѡ̀.
Пое́мъ твою̀, хрⷭ҇тѐ, сп҃си́тельнꙋю стра́сть, и҆ сла́вимъ твоѐ воскрⷭ҇нїе.
Сті́хъ: Хвали́те є҆го̀ во гла́сѣ трꙋ́бнѣмъ, хвали́те є҆го̀ въ ѱалти́ри и҆ гꙋ́слехъ.
Крⷭ҇тъ претерпѣ́вый, и҆ сме́рть ᲂу҆праздни́вый, и҆ воскр҃сы́й и҆з̾ ме́ртвыхъ, ᲂу҆мирѝ на́шꙋ жи́знь гдⷭ҇и, ꙗ҆́кѡ є҆ди́нъ всеси́ленъ.
Сті́хъ: Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ.
А҆́да плѣни́вый, и҆ человѣ́ка воскр҃си́вый воскрⷭ҇нїемъ твои́мъ хрⷭ҇тѐ, сподо́би ны̀ чи́стымъ се́рдцемъ тебѐ пѣ́ти и҆ сла́вити.
Сті́хъ: Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ.
Всѧ́кое дыха́нїе да хва́литъ гдⷭ҇а.
Бг҃олѣ́пное твоѐ снизхожде́нїе сла́вѧще, пое́мъ тѧ̀ хрⷭ҇тѐ: роди́лсѧ є҆сѝ ѿ дв҃ы, и҆ неразлꙋче́нъ бы́лъ є҆сѝ ѿ ѻ҆ц҃а̀, пострада́лъ є҆сѝ ꙗ҆́кѡ человѣ́къ, и҆ во́лею претерпѣ́лъ є҆сѝ крⷭ҇тъ: воскр҃лъ є҆сѝ ѿ гро́ба, ꙗ҆́кѡ ѿ черто́га произше́дъ, да сп҃се́ши мі́ръ, гдⷭ҇и, сла́ва тебѣ̀.
Та́же, совокꙋ́пльшесѧ ѻ҆́ба ли̑ка, пою́тъ стїхи̑ры па́схи, гла́съ є҃.
Сті́хъ: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀.
Па́сха сщ҃е́ннаѧ на́мъ дне́сь показа́сѧ. па́сха но́ва ст҃а́ѧ, па́сха та́инственнаѧ, па́сха всечⷭ҇тна́ѧ, па́сха хрⷭ҇то́съ и҆зба́витель: па́сха непоро́чнаѧ, па́сха вели́каѧ, па́сха вѣ́рныхъ, па́сха двє́ри ра́йскїѧ на́мъ ѿверза́ющаѧ, па́сха всѣ́хъ ѡ҆сщ҃а́ющаѧ вѣ́рныхъ.
<<рч҃д ѡ҆б.: 388>>
Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ.
Прїиди́те ѿ видѣ́нїѧ жєны̀ бл҃говѣ́стницы, и҆ сїѡ́нꙋ рцы́те: прїимѝ ѿ на́съ ра́дости бл҃говѣ́щенїѧ, воскрⷭ҇нїѧ хрⷭ҇то́ва: красꙋ́йсѧ, ликꙋ́й и҆ ра́дꙋйсѧ і҆ерⷭ҇ли́ме, цр҃ѧ̀ хрⷭ҇та̀ ᲂу҆зрѣ́въ и҆з̾ гро́ба, ꙗ҆́кѡ жениха̀ происходѧ́ща.
Сті́хъ: Та́кѡ поги́бнꙋтъ грѣ̑шницы ѿ лица̀ бж҃їѧ, а҆ првⷣницы да возвеселѧ́тсѧ.
Мѷронѡ́сицы жєны̀, ᲂу҆́трꙋ глꙋбокꙋ̀ предста́вшѧ гро́бꙋ живода́вца, ѡ҆брѣто́ша а҆́гг҃ла на ка́мени сѣдѧ́ща, и҆ то́й провѣща́въ и҆̀мъ, си́це глаго́лаше: что̀ и҆́щете жива́гѡ съ ме́ртвыми; что̀ пла́чете нетлѣ́ннаго во тлѝ; ше́дше проповѣ́дите ᲂу҆ч҃нкѡ́мъ є҆гѡ̀.
Сті́хъ: Се́й де́нь, є҆го́же сотворѝ гдⷭ҇ь, возра́дꙋемсѧ и҆ возвесели́мсѧ во́нь.
Па́сха кра́снаѧ, па́сха, гдⷭ҇нѧ па́сха, па́сха всечⷭ҇тна́ѧ на́мъ возсїѧ̀: па́сха, ра́достїю дрꙋ́гъ дрꙋ́га ѡ҆б̾и́мемъ. ѽ па́сха, и҆збавле́нїе ско́рби! и҆́бо и҆з̾ гро́ба дне́сь ꙗ҆́кѡ ѿ черто́га возсїѧ́въ хрⷭ҇то́съ, жєны̀ ра́дости и҆спо́лни, глаго́лѧ: проповѣ́дите а҆пⷭ҇лѡмъ.
Сла́ва, и҆ ны́нѣ, гла́съ є҃:
Воскрⷭ҇нїѧ де́нь, просвѣти́мсѧ торжество́мъ, и҆ дрꙋ́гъ дрꙋ́га ѡ҆б̾и́мемъ. рце́мъ, бра́тїе, и҆ ненави́дѧщымъ на́съ, прости́мъ всѧ̑ воскрⷭ҇нїемъ, и҆ та́кѡ возопїи́мъ:
Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.
<<рч҃є: 389>>
Та́же, Хрⷭ҇то́съ воскр҃се, три́жды. И҆ пое́мъ сїѐ мно́гажды, до́ндеже цѣлꙋ́ютъ бра́тїѧ дрꙋ́гъ дрꙋ́га. Цѣлова́нїе же настоѧ́телѧ съ про́чими і҆ерє́и и҆ дїа́коны во ст҃о́мъ ѻ҆лтарѣ̀ быва́етъ си́це. Глаго́летъ приходѧ́й: Хрⷭ҇то́съ воскр҃се. ѻ҆́номꙋ же ѿвѣща́вшꙋ: Вои́стиннꙋ воскр҃се. Посе́мъ взе́мъ настоѧ́тель чⷭ҇тны́й крⷭ҇тъ, и҆ ста́нетъ внѣ̀ пред̾ ст҃ы́ми црⷭ҇кими две́рьми. Та́кожде и҆ всѝ сщ҃е́нницы, є҆ли́кѡ и҆́хъ є҆́сть, и҆ дїа́кони, взе́мше кі́йждо и҆́хъ ст҃о́е є҆ѵⷢ҇лїе, и҆ чⷭ҇тны̑ѧ і҆кѡ́ны, по чи́нꙋ своемꙋ̀: и҆ ста́нꙋтъ всѝ рѧ́домъ ѿ десны́ѧ страны̀ настоѧ́телѧ. И҆ прихо́дѧтъ пре́жде честнѣ́йшїи цр҃ко́вницы, и҆ ста́рцы, є҆ди́нъ по є҆ди́номꙋ, и҆ ма́лѡ преклонѧ́ютсѧ пред̾ настоѧ́телемъ: и҆ цѣлꙋ́ютъ кі́йждо и҆́хъ чⷭ҇тны́й крⷭ҇тъ и҆ ст҃о́е є҆ѵⷢ҇лїе, є҆го́же держи́тъ і҆ере́й, и҆ прѡ́чїѧ ѡ҆́бразы. Та́же и҆ самого̀ настоѧ́телѧ во ᲂу҆ста̀ цѣлꙋ́ютъ, глаго́люще: Хрⷭ҇то́съ воскр҃се. ѻ҆́номꙋ же ѿвѣща́вшꙋ: Вои́стиннꙋ воскр҃се. По томꙋ́же ѡ҆́бразꙋ і҆ере́євъ цѣлꙋ́ютъ, и҆ са́ми междꙋ̀ собо́ю, по чи́нꙋ своемꙋ̀: и҆ ста́вѧтсѧ ѿ і҆ере́євъ по десно́й странѣ̀ рѧ́домъ. Та́же по ни́хъ и҆ мїрѧ́не та́кожде цѣлова́нїе творѧ́тъ. Рабо́тницы же монасты́рстїи въ то́мже чи́нꙋ да ста́нꙋтъ, и҆ дрꙋ́гъ дрꙋ́га цѣлꙋ́юще. Быва́етъ же посредѝ во всѣ́хъ ве́лїе молча́нїе. По цѣлова́нїи же чте́тсѧ ѡ҆гласи́тельное сло́во златоꙋ́стагѡ ѿ настоѧ́телѧ, и҆лѝ є҆кклисїа́рха: не сѣди́мъ же на сицево́мъ чте́нїи, но стоѧ́ще слꙋ́шаемъ всѝ.
И҆́же во ст҃ы́хъ ѻ҆тца̀ на́шегѡ і҆ѡа́нна а҆рхїепⷭ҇кпа кѡнстантїнопо́льскагѡ златоꙋ́стагѡ, сло́во ѡ҆гласи́тельное во ст҃ы́й и҆ свѣтоно́сный де́нь, пресла́внагѡ и҆ сп҃си́тельнагѡ хрⷭ҇та̀ бг҃а на́шего воскрⷭ҇нїѧ.
А҆́ще кто̀ бл҃гочести́въ и҆ бг҃олюби́въ, да наслади́тсѧ сегѡ̀ до́брагѡ и҆ свѣ́тлагѡ торжества̀. а҆́ще кто̀ ра́бъ бл҃горазꙋ́мный, да вни́детъ ра́дꙋѧсѧ въ ра́дость гдⷭ҇а своегѡ̀. а҆́ще кто̀ потрꙋди́сѧ постѧ́сѧ, да воспрїи́метъ ны́нѣ дина́рїй. а҆́ще кто̀ ѿ пе́рвагѡ часа̀ дѣ́лалъ є҆́сть да прїи́метъ дне́сь пра́ведный до́лгъ. а҆́ще кто̀ по тре́тїемъ часѣ̀ прїи́де, бл҃годарѧ̀ да пра́зднꙋетъ. а҆́ще кто̀ по шесто́мъ часѣ̀ дости́же, ничто́же да сꙋмни́тсѧ: и҆́бо ничи́мже ѿтщетѣва́етсѧ. а҆́ще кто̀ лиши́сѧ и҆ девѧ́тагѡ часа̀, да пристꙋ́питъ ничто́же сꙋмнѧ́сѧ, ничто́же боѧ́сѧ. а҆́ще кто̀ то́чїю дости́же и҆ во є҆динонадесѧ́тый ча́съ, да не ᲂу҆страши́тсѧ замедле́нїѧ. Любочести́въ бо сы́й влⷣка, прїе́млетъ послѣ́днѧго, ꙗ҆́коже и҆ пе́рваго: ᲂу҆покоева́етъ въ є҆динонадесѧ́тый ча́съ прише́дшаго, ꙗ҆́коже дѣ́лавшаго ѿ пе́рвагѡ часа̀. и҆ послѣ́днѧго ми́лꙋетъ, и҆ пе́рвомꙋ ᲂу҆гожда́етъ. и҆ ѻ҆́номꙋ дае́тъ, и҆ семꙋ̀ да́рствꙋетъ. и҆ дѣ́ла прїе́млетъ, и҆ намѣ́ренїе цѣлꙋ́етъ: и҆ дѣѧ́нїе почита́етъ, и҆ предложе́нїе хва́литъ. Тѣ́мже ᲂу҆̀бо вни́дите всѝ въ ра́дость гдⷭ҇а своегѡ̀: и҆ пе́рвїи и҆ вторі́и мздꙋ̀ прїими́те. бога́тїи и҆ <<рч҃є ѡ҆б.: 390>> ᲂу҆бо́зїи дрꙋ́гъ со дрꙋ́гомъ ликꙋ́йте. возде́ржницы и҆ лѣни́вїи де́нь почти́те. пости́вшїисѧ и҆ не пости́вшїисѧ возвесели́тесѧ дне́сь. Трапе́за и҆спо́лнена, наслади́тесѧ всѝ: теле́цъ ᲂу҆пита́нный, никто́же да и҆зы́детъ а҆́лчай: всѝ наслади́тесѧ пи́ра вѣ́ры, всѝ воспрїими́те бога́тство бл҃гости. Никто́же да рыда́етъ ᲂу҆бо́жества. ꙗ҆ви́ сѧ бо ѻ҆́бщее црⷭ҇тво: никто́же да пла́четъ прегрѣше́нїй, проще́нїе бо ѿ гро́ба возсїѧ̀. Никто́же да ᲂу҆бои́тсѧ сме́рти, свободи́ бо на́съ сп҃сова сме́рть: ᲂу҆гасѝ ю҆̀, и҆́же ѿ неѧ̀ держи́мый: плѣнѝ а҆́да, соше́дый во а҆́дъ: ѡ҆горчѝ є҆го̀, вкꙋси́вша пло́ти є҆гѡ̀. И҆ сїѐ предпрїе́мый и҆са́їа возопѝ: а҆́дъ, глаго́летъ, ѡ҆горчи́сѧ, срѣ́тъ тѧ̀ до́лѣ. ѡ҆горчи́сѧ, и҆́бо ᲂу҆праздни́сѧ: ѡ҆горчи́сѧ, и҆́бо порꙋ́ганъ бы́сть: ѡ҆горчи́сѧ, и҆́бо ᲂу҆мертви́сѧ: ѡ҆горчи́сѧ, и҆́бо низложи́сѧ: ѡ҆горчи́сѧ, и҆́бо свѧза́сѧ. прїѧ́тъ тѣ́ло, и҆ бг҃ꙋ прирази́сѧ: прїѧ́тъ зе́млю, и҆ срѣ́те нб҃о: прїѧ́тъ є҆́же ви́дѧше, и҆ впадѐ во є҆́же не ви́дѧше. Гдѣ̀ твоѐ сме́рте жа́ло; гдѣ̀ твоѧ̀ а҆́де побѣ́да; воскр҃се хрⷭ҇то́съ, и҆ ты̀ низве́рглсѧ є҆сѝ. воскр҃се хрⷭ҇то́съ, и҆ падо́ша де́мѡни. воскр҃се хрⷭ҇то́съ, и҆ ра́дꙋютсѧ а҆́гг҃ли. воскр҃се хрⷭ҇то́съ, и҆ жи́знь жи́тельствꙋетъ. воскр҃се хрⷭ҇то́съ, и҆ ме́ртвый ни є҆ди́нъ во гро́бѣ. хрⷭ҇то́съ бо воста́въ ѿ ме́ртвыхъ, нача́токъ ᲂу҆со́пшихъ бы́сть: томꙋ̀ сла́ва и҆ держа́ва, во вѣ́ки вѣкѡ́въ, а҆ми́нь.
Та́же глаго́летсѧ тропа́рь ст҃а́гѡ, гла́съ и҃:
Оу҆́стъ твои́хъ ꙗ҆́коже свѣ́тлость ѻ҆гнѧ̀ возсїѧ́вши бл҃года́ть, вселе́ннꙋю просвѣтѝ, не сребролю́бїѧ мі́рови сокрѡ́вища сниска̀, высотꙋ̀ на́мъ смиреномꙋ́дрїѧ показа̀. но твои́ми словесы̀ наказꙋ́ѧ, ѻ҆́тче і҆ѡа́нне златоꙋ́сте, молѝ сло́ва хрⷭ҇та̀ бг҃а, сп҃сти́сѧ дꙋша́мъ на́шымъ.
Посе́мъ же є҆ктенїа̀: Поми́лꙋй на́съ бж҃е: И҆ возгла́съ Та́же: И҆спо́лнимъ ᲂу҆́треннюю мл҃твꙋ на́шꙋ гдⷭ҇и: И҆ по возгла́сѣ дїа́конъ: Премꙋ́дрость. Мы́ же: Бл҃гословѝ. І҆ере́й: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ. И҆ мы̀: А҆ми́нь. Оу҆твердѝ бж҃е:
Посе́мъ настоѧ́тель держѧ̀ крⷭ҇тъ, вмѣ́стѡ, Сла́ва тебѣ̀ <<рч҃ѕ: 391>> хрⷭ҇тѐ бж҃е: пое́тъ: Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ.
И҆ мы̀ пое́мъ: И҆ сꙋ́щымъ во гробѣ́хъ живо́тъ дарова́въ.
И҆ а҆́бїе настоѧ́тель глаго́летъ ѿпꙋ́стъ:
Хрⷭ҇то́съ воскр҃сы́й и҆з̾ ме́ртвыхъ, сме́ртїю сме́рть попра́вый, и҆ сꙋ́щымъ во гробѣ́хъ живо́тъ дарова́вый, и҆́стинный бг҃ъ на́шъ, мл҃твами пречтⷭ҇ыѧ своеѧ̀ мт҃ре, и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.
Та́же крⷭ҇тъ возвыша́ѧ, глаго́летъ: Хрⷭ҇то́съ воскр҃се [Три́жды.]
Мы́ же ѿвѣща́емъ: Вои́стиннꙋ воскр҃се. [Три́жды.]
Та́же пое́мъ коне́чное: Хрⷭ҇то́съ воскр҃се: три́жды, ве́сь тропа́рь.
И҆ по не́мъ пѣ́нїемъ кончи́мъ: И҆ на́мъ дарова̀ живо́тъ вѣ́чный, покланѧ́емсѧ є҆гѡ̀ тридне́вномꙋ воскрⷭ҇нїю.
Посе́мъ многолѣ̑тны, и҆ цѣлꙋ́емъ чⷭ҇тны́й крⷭ҇тъ, держи́мый въ рꙋкꙋ̀ настоѧ́телѧ.
И҆ ча́съ а҃-й глаго́лемъ: Хрⷭ҇то́съ воскр҃се и҆з̾ ме́ртвыхъ: три́жды, ве́сь тропа́рь.
Та́же глаго́лемъ три́жды:
Воскрⷭ҇нїе хрⷭ҇то́во ви́дѣвше, поклони́мсѧ ст҃о́мꙋ гдⷭ҇ꙋ і҆и҃сꙋ, є҆ди́номꙋ безгрѣ́шномꙋ. крⷭ҇тꙋ̀ твоемꙋ̀ покланѧ́емсѧ хрⷭ҇тѐ, и҆ ст҃о́е воскрⷭ҇нїе твоѐ пое́мъ и҆ сла́вимъ: ты́ бо є҆сѝ бг҃ъ на́шъ, ра́звѣ тебѐ и҆но́гѡ не зна́емъ, и҆́мѧ твоѐ и҆менꙋ́емъ. прїиди́те всѝ вѣ́рнїи, поклони́мсѧ ст҃о́мꙋ хрⷭ҇то́вꙋ воскрⷭ҇нїю: се́ бо прїи́де крⷭ҇то́мъ ра́дость всемꙋ̀ мі́рꙋ. всегда̀ бл҃гословѧ́ще гдⷭ҇а, пое́мъ воскрⷭ҇нїе є҆гѡ̀: распѧ́тїе бо претерпѣ́въ сме́ртїю сме́рть разрꙋшѝ.
Та́же ѵ҆пакоѝ, є҆ди́ножды:
Предвари́вшыѧ ᲂу҆́трѡ ꙗ҆́же ѡ҆ марі́и, и҆ ѡ҆брѣ́тшыѧ ка́мень ѿвале́нъ ѿ гро́ба, слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, съ ме́ртвыми что̀ и҆́щете ꙗ҆́кѡ чл҃вѣ́ка; ви́дите грѡ́бныѧ пелєны̀, тецы́те и҆ мі́рꙋ проповѣ́дите: ꙗ҆́кѡ воста̀ гдⷭ҇ь, ᲂу҆мертви́вый сме́рть, ꙗ҆́кѡ є҆́сть сн҃ъ бг҃а, сп҃са́ющагѡ ро́дъ человѣ́ческїй.
<<рч҃ѕ ѡ҆б.: 392>>
Та́же конда́къ, є҆ди́ножды:
А҆́ще и҆ во гро́бъ снизше́лъ є҆сѝ безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ, и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.
Та́же и҆ се́й тропа́рь, є҆ди́ножды:
Во гро́бѣ пло́тски, во а҆́дѣ же съ дꙋше́ю ꙗ҆́кѡ бг҃ъ, въ раи́ же съ разбо́йникомъ, и҆ на прⷭ҇то́лѣ бы́лъ є҆сѝ хрⷭ҇тѐ, со ѻ҆ц҃е́мъ и҆ дх҃омъ, всѧ̑ и҆сполнѧ́ѧй неѡпи́санный.
Сла́ва: Ꙗ҆́кѡ живоно́сецъ, ꙗ҆́кѡ раѧ̀ краснѣ́йшїй, вои́стиннꙋ и҆ черто́га всѧ́кагѡ црⷭ҇кагѡ, показа́сѧ свѣтлѣ́йшїй, хрⷭ҇тѐ, гро́бъ тво́й, и҆сто́чникъ на́шегѡ воскрⷭ҇нїѧ.
И҆ ны́нѣ, бг҃оро́диченъ: Вы́шнѧгѡ ѡ҆сщ҃е́нное бж҃е́ственное селе́нїе, ра́дꙋйсѧ: тобо́ю бо даде́сѧ ра́дость, бцⷣе зовꙋ́щымъ: бл҃гослове́нна ты̀ въ жена́хъ є҆сѝ всенепоро́чнаѧ влⷣчце.
Та́же: Гдⷭ҇и поми́лꙋй м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче. І҆ере́й, сті́хъ: Мл҃твами ст҃ы́хъ ѻ҆тє́цъ на́шихъ: Мы́ же рече́мъ: А҆ми́нь. И҆ па́ки глаго́лемъ подо́бнѣ: Хрⷭ҇то́съ воскр҃се: три́жды Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. И҆ ѿпꙋ́стъ пе́рвагѡ часа̀.
Си́мъ же ѡ҆́бразомъ пое́тсѧ за г҃, за ѕ҃, и҆ за ѳ҃ ча́съ, и҆ за повече́рїе є҆ди́ножды, та́кожде и҆ за полꙋ́нощницꙋ, да́же и҆ до ѳѡмины̀ недѣ́ли.
Ча́съ же г҃, ѕ҃ и҆ ѳ҃ пое́мъ вкꙋ́пѣ въ притво́рѣ, и҆ по є҆́же рещѝ по Чтⷭ҇нѣ́йшꙋю: Мл҃твами ст҃ы́хъ ѻ҆тє́цъ: И҆ А҆ми́нь. Въ концѣ̀ часа̀ глаго́лемъ: Хрⷭ҇то́съ воскр҃се: три́жды. и҆ про́чее часа̀ за ѕ҃ ча́съ, та́же и҆ тре́тїе за ѳ҃ ча́съ. А҆́ще ли не бꙋ́детъ когда̀ по нꙋ́ждѣ лїтꙋргі́и, то́ждеже. За Бл҃гословѝ дꙋшѐ моѧ̀ гдⷭ҇а: Хрⷭ҇то́съ воскр҃се: три́жды Воскрⷭ҇нїе хрⷭ҇то́во ви́дѣвше: є҆ди́ножды. Посе́мъ: Предвари́вшыѧ ᲂу҆́трѡ: Сла́ва, конда́къ: А҆́ще и҆ во гро́бъ: И҆ ны́нѣ: Є҆диноро́дный сн҃е: Посе́мъ бл҃жє́нна, ѿ канѡ́на пѣ́снь г҃ и҆ ѕ҃-ѧ. І҆ере́й: Премꙋ́дрость.
<<рч҃з: 393>>
Чте́цъ, [Надписа́нїе а҆пⷭ҇ла]. Дѣѧ́нїе, зача́ло а҃:
Пе́рвое ᲂу҆́бѡ сло́во сотвори́хъ ѡ҆ всѣ́хъ, ѽ ѳео́фїле, ꙗ҆̀же нача́тъ і҆и҃съ твори́ти же и҆ ᲂу҆чи́ти, да́же до днѐ, во́ньже заповѣ́давъ а҆пⷭ҇лѡмъ дх҃омъ ст҃ы́мъ, и҆̀хже и҆збра̀, вознесе́сѧ. Пред̾ ни́миже и҆ поста́ви себѐ жи́ва по страда́нїи свое́мъ, во мно́зѣхъ [и҆́стинныхъ] зна́менїихъ, де́ньми четы́редесѧтьми ꙗ҆влѧ́ѧсѧ и҆̀мъ, и҆ глаго́лѧ ꙗ҆̀же ѡ҆ црⷭ҇твїи бж҃їи. Въ ни́миже и҆ ꙗ҆ды́й, повелѣ̀ и҆̀мъ ѿ і҆ерⷭ҇ли́ма не ѿлꙋча́тисѧ, но жда́ти ѡ҆бѣтова́нїѧ ѻ҆́ч҃а, є҆́же слы́шасте ѿ менѐ: ꙗ҆́кѡ і҆ѡа́ннъ ᲂу҆́бѡ крⷭ҇ти́лъ є҆́сть водо́ю, вы́ же и҆́мате крⷭ҇ти́тисѧ дх҃омъ ст҃ы́мъ, не по мно́зѣхъ си́хъ дне́хъ. Ѻ҆ни́ же ᲂу҆́бѡ соше́дшесѧ, вопроша́хꙋ є҆го̀, глаго́люще: гдⷭ҇и, а҆́ще въ лѣ́то сїѐ ᲂу҆строѧ́еши црⷭ҇твїе і҆и҃лево; Рече́ же къ ни̑мъ: нѣ́сть ва́ше разꙋмѣ́ти времена̀ и҆ лѣ̑та, ꙗ҆̀же ѻ҆ц҃ъ положѝ во свое́й вла́сти. Но прїи́мите си́лꙋ наше́дшꙋ ст҃о́мꙋ дх҃ꙋ на вы̀: и҆ бꙋ́дете мѝ свидѣ́тєли во і҆ерⷭ҇ли́мѣ же и҆ во все́й і҆ꙋде́и и҆ самарі́и, и҆ да́же до послѣ́днихъ землѝ.
Є҆ѵⷢ҇лїе на лїтꙋргі́и, ѿ і҆ѡа́нна, зача́ло а҃.
Въ нача́лѣ бѣ̀ сло́во, и҆ сло́во бѣ̀ къ бг҃ꙋ, и҆ бг҃ъ бѣ̀ сло́во. Се́й бѣ̀ и҆сконѝ къ бг҃ꙋ. Всѧ̑ тѣ́мъ бы́ша, и҆ без̾ негѡ̀ ничто́же бы́сть, є҆́же бы́сть. Въ то́мъ живо́тъ бѣ̀, и҆ живо́тъ бѣ̀ свѣ́тъ человѣ́кѡмъ: И҆ свѣ́тъ во тьмѣ̀ свѣ́титсѧ, и҆ тьма̀ є҆го̀ не ѡ҆б̾ѧ́тъ. Бы́сть человѣ́къ по́сланъ ѿ бг҃а, и҆́мѧ є҆мꙋ̀ і҆ѡа́ннъ. Се́й прїи́де во свидѣ́тельство, да свидѣ́тельствꙋетъ ѡ҆ свѣ́тѣ, да всѝ вѣ́рꙋ и҆́мꙋтъ є҆мꙋ̀. Не бѣ̀ то́й свѣ́тъ, но да свидѣ́тельствꙋетъ ѡ҆ свѣ́тѣ. Бѣ̀ свѣ́тъ и҆́стинный, и҆́же просвѣща́етъ всѧ́каго человѣ́ка грѧдꙋ́щаго въ мі́ръ. Въ мі́рѣ бѣ̀, и҆ мі́ръ тѣ́мъ бы́сть, и҆ мі́ръ є҆го̀ не позна̀. Во своѧ̑ прїи́де, и҆ своѝ є҆го̀ не прїѧ́ша. Є҆ли́цы же прїѧ́ша є҆го̀, дадѐ и҆̀мъ ѻ҆́бласть ча́дѡмъ бж҃їимъ бы́ти, вѣ́рꙋющымъ во и҆́мѧ є҆гѡ̀. И҆̀же не ѿ кро́ве, ни ѿ по́хоти плотскі́ѧ, ни ѿ по́хоти мꙋ́жескїѧ, но ѿ бг҃а роди́шасѧ. И҆ сло́во пло́ть бы́сть и҆ всели́сѧ въ ны̀, и҆ ви́дѣхомъ <<рч҃з ѡ҆б.: 394>> сла́вꙋ є҆гѡ̀, сла́вꙋ ꙗ҆́кѡ є҆диноро́днагѡ ѿ ѻ҆ц҃а̀, и҆спо́лнь бл҃года́ти и҆ и҆́стины. І҆ѡа́ннъ свидѣ́тельствꙋетъ ѡ҆ не́мъ, и҆ воззва̀ глаго́лѧ: се́й бѣ̀, є҆го́же рѣ́хъ, и҆́же по мнѣ̀ грѧды́й, предо мно́ю бы́сть, ꙗ҆́кѡ пе́рвѣе менѐ бѣ̀. И҆ ѿ и҆сполне́нїѧ є҆гѡ̀ мы̀ всѝ прїѧ́хомъ, и҆ бл҃года́ть воз̾ бл҃года́ть. Ꙗ҆́кѡ зако́нъ мѡѷсе́омъ да́нъ бы́сть: бл҃года́ть же и҆ и҆́стина і҆и҃съ хрⷭ҇то́мъ бы́сть.
Та́же, Помѧнѝ на́съ гдⷭ҇и: Та́же, Ли́къ нбⷭ҇ный: И҆ посе́мъ: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: И҆ по Ѻ҆́ч҃е на́шъ: Конда́къ, А҆́ще и҆ во гро́бъ: Сла́ва, и҆ ны́нѣ, бг҃оро́диченъ: Вы́шнѧгѡ ѡ҆сщ҃е́нное: Гдⷭ҇и поми́лꙋй, м҃. Та́же, Є҆ди́нъ ст҃ъ, є҆ди́нъ гдⷭ҇ь і҆и҃съ хрⷭ҇то́съ, въ сла́вꙋ бг҃а ѻ҆ц҃а̀, а҆ми́нь. И҆ посе́мъ вмѣ́стѡ: Бꙋ́ди и҆́мѧ гдⷭ҇не: Хрⷭ҇то́съ воскр҃се: три́жды. Та́же ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: Коне́цъ: Не лиша́тсѧ всѧ́кагѡ бл҃га.
И҆ посе́мъ ѿпꙋ́стъ.
Въ недѣ́лю ст҃а́гѡ а҆пⷭ҇ла ѳѡмы̀, тропа́рь, гла́съ з҃:
Запеча́танꙋ гро́бꙋ, живо́тъ ѿ гро́ба возсїѧ́лъ є҆сѝ хрⷭ҇тѐ бж҃е, и҆ две́ремъ заключє́ннымъ ᲂу҆ч҃нкѡ́мъ предста́лъ є҆сѝ, всѣ́хъ воскрⷭ҇нїе, дх҃ъ пра́вый тѣ́ми ѡ҆бновлѧ́ѧ на́мъ, по вели́цѣй твое́й млⷭ҇ти.
Конда́къ, гла́съ и҃:
Любопы́тною десни́цею, жизнопода́тєльнаѧ твоѧ̑ ре́бра ѳѡма̀ и҆спыта̀, хрⷭ҇тѐ бж҃е: созаключе́ннымъ во две́ремъ ꙗ҆́кѡ вше́лъ є҆сѝ, съ про́чими а҆пⷭ҇лы вопїѧ́ше тебѣ̀: гдⷭ҇и є҆сѝ и҆ бг҃ъ мо́й.
<<рч҃и: 395>>
Въ недѣ́лю мѷроно́сицъ,
тропа́рь, гла́съ в҃:
Є҆гда̀ снизше́лъ є҆сѝ къ сме́рти, животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бжⷭ҇тва̀. є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.
Сла́ва, Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ, и҆ бл҃гоꙋха́ньми во гро́бѣ но́вѣ закры́въ, положѝ: но тридне́венъ воскр҃лъ є҆сѝ гдⷭ҇и, подаѧ́й мі́рови ве́лїю млⷭ҇ть.
И҆ ны́нѣ: Мѷроно́сицамъ жена́мъ при гро́бѣ предста́въ а҆́гг҃лъ вопїѧ́ше: мѵ̑ра мє́ртвымъ сꙋ́ть прили̑чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь. но возопі́йте: воскр҃се гдⷭ҇ь, подаѧ́й мі́рови ве́лїю млⷭ҇ть.
Конда́къ, гла́съ в҃: Ра́доватисѧ мѷроно́сицамъ повелѣ́лъ є҆сѝ, пла́чь прама́тере є҆́ѵы ᲂу҆толи́лъ є҆сѝ, воскрⷭ҇нїемъ твои́мъ, хрⷭ҇тѐ бж҃е: а҆пⷭ҇лѡмъ же твои̑мъ проповѣ́дати повелѣ́лъ є҆сѝ: сп҃съ воскр҃се ѿ гро́ба.
Въ недѣ́лю разсла́бленнагѡ,
тропа́рь воскрⷭ҇ный, гла́съ г҃: Да веселѧ́тсѧ нбⷭ҇наѧ:
Конда́къ, гла́съ г҃. Подо́бенъ: Дв҃а дне́сь:
Дꙋ́шꙋ мою̀ гдⷭ҇и, во грѣсѣ́хъ всѧ́ческихъ, и҆ безмѣ́стными дѣѧ́ньми лю́тѣ разсла́бленꙋ, воздви́гни бж҃е́ственнымъ твои́мъ предста́тельствомъ, ꙗ҆́коже и҆ разсла́бленнаго воздви́глъ є҆сѝ дре́вле, да зовꙋ́ ти сп҃са́емь: ще́дрый, сла́ва хрⷭ҇тѐ, держа́вѣ твое́й.
Въ сре́дꙋ преполове́нїѧ пѧтдесѧ́тницы,
тропа́рь, гла́съ и҃:
Преполови́вшꙋсѧ пра́здникꙋ, жа́ждꙋщꙋю дꙋ́шꙋ мою̀ бл҃гоче́стїѧ напо́й вода́ми, ꙗ҆́кѡ всѣ̑мъ сп҃се возопи́лъ є҆сѝ: жа́ждай <<рч҃и ѡ҆б.: 396>> да грѧде́тъ ко мнѣ̀, и҆ да пїе́тъ. и҆сто́чниче жи́зни на́шеѧ, хрⷭ҇тѐ бж҃е, сла́ва тебѣ̀.
Конда́къ, гла́съ д҃.
Подо́бенъ: Вознесы́йсѧ на крⷭ҇тъ:
Пра́здникꙋ зако́нномꙋ преполовлѧ́ющꙋсѧ, всѣ́хъ тво́рче и҆ влⷣко, къ предстоѧ́щымъ глаго́лалъ є҆сѝ хрⷭ҇тѐ бж҃е: прїиди́те и҆ почерпи́те во́дꙋ безсме́ртїѧ. тѣ́мже тебѣ̀ припа́даемъ, и҆ вѣ́рнѡ вопїе́мъ: щедрѡ́ты твоѧ̑ да́рꙋй на́мъ, ты́ бо є҆сѝ и҆сто́чникъ жи́зни на́шеѧ.
Глаго́лемъ се́й тропа́рь и҆ конда́къ ѻ҆́смь дне́й.
Въ недѣ́лю самарѧны́ни,
тропа́рь воскрⷭ҇нъ, гла́съ д҃: Свѣ́тлꙋю воскрⷭ҇нїѧ:
Конда́къ, гла́съ и҃.
Подо́бенъ: Вѣ́рꙋ хрⷭ҇то́вꙋ:
Вѣ́рою прише́дши на и҆сто́чникъ самарѧны́нѧ, ви́дѣ премꙋ́дрости во́дꙋ тѧ̀: є҆ѧ́же напи́вшисѧ ѡ҆би́льнѡ, црⷭ҇твїе вы́шнее наслѣ́дова вѣ́чнѡ присносла́внаѧ.
Въ недѣ́лю слѣпа́гѡ,
тропа́рь воскрⷭ҇нъ, гла́съ є҃: Собезнача́льное сло́во:
Конда́къ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Дꙋше́вныма ѻ҆чи́ма ѡ҆слѣпле́нъ, къ тебѣ̀ хрⷭ҇тѐ прихождꙋ̀, ꙗ҆́коже слѣпы́й ѿ рожде́нїѧ, покаѧ́нїемъ зовꙋ́ ти: ты̀ сꙋ́щихъ во тьмѣ̀ свѣ́тъ пресвѣ́тлый.
Въ четверто́къ вознесе́нїѧ гдⷭ҇а на́шегѡ і҆и҃са хрⷭ҇та̀,
тропа́рь, гла́съ д҃:
Возне́слсѧ є҆сѝ во сла́вѣ хрⷭ҇тѐ бж҃е на́шъ, ра́дость сотвори́вый ᲂу҆ч҃нкѡ́мъ ѡ҆бѣтова́нїемъ ст҃а́гѡ дх҃а, и҆звѣщє́ннымъ и҆̀мъ бы́вшымъ бл҃гослове́нїемъ, ꙗ҆́кѡ ты̀ є҆сѝ сн҃ъ бж҃їй и҆зба́витель мі́ра.
<<рч҃ѳ: 397>>
Конда́къ, гла́съ ѕ҃:
Є҆́же ѡ҆ на́съ и҆спо́лнивъ смотре́нїе, и҆ ꙗ҆̀же на землѝ соедини́въ нбⷭ҇нымъ, возне́слсѧ є҆сѝ во сла́вѣ хрⷭ҇тѐ бж҃е, ника́коже ѿлꙋча́ѧсѧ, но пребыва́ѧ неѿстꙋ́пный, и҆ вопїѧ̀ лю́бѧщимъ тѧ̀: а҆́зъ є҆́смь съ ва́ми, и҆ никто́же на вы̀.
Въ недѣ́лю ст҃ы́хъ ти҃і бг҃оно́сныхъ ѻ҆тє́цъ въ нїке́и,
тропа́рь, гла́съ и҃:
Препросла́вленъ є҆сѝ хрⷭ҇тѐ бж҃е на́шъ, свѣти̑ла на землѝ ѻ҆тцы̀ на́ши ѡ҆снова́вый, и҆ тѣ́ми ко и҆́стиннѣй вѣ́рѣ всѧ̑ ны̀ наста́вивый, многобл҃гоꙋтро́бне, сла́ва тебѣ̀.
Конда́къ, гла́съ и҃:
А҆пⷭ҇лъ проповѣ́данїе, и҆ ѻ҆тє́цъ догма́ты, цр҃кви є҆ди́нꙋ вѣ́рꙋ запечатлѣ́ша: ꙗ҆́же и҆ ри́зꙋ носѧ́щи и҆́стины, и҆стка́нꙋ ѿ є҆́же свы́ше бг҃осло́вїѧ, и҆справлѧ́етъ и҆ сла́витъ бл҃гоче́стїѧ вели́кое та́инство.
Въ сꙋббѡ́тꙋ пред̾ пѧтдесѧ́тницею,
[па́мѧть соверша́емъ ѿ вѣ́ка ᲂу҆со́пшихъ ѻ҆тцє́въ, и҆ бра́тїй на́шихъ,]
тропа́рь, гла́съ и҃:
Глꙋбино́ю мꙋ́дрости чл҃вѣколю́бнѡ всѧ̑ стро́ѧй, и҆ поле́зное всѣ̑мъ подава́ѧй, є҆ди́не содѣ́телю, ᲂу҆поко́й гдⷭ҇и дꙋ́шы ра̑бъ твои́хъ: на тѧ́ бо ᲂу҆пова́нїе возложи́ша, творца̀ и҆ зижди́телѧ и҆ бг҃а на́шегѡ.
Конда́къ, гла́съ и҃:
Со ст҃ы́ми ᲂу҆поко́й хрⷭ҇тѐ, дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.
Въ недѣ́лю ст҃ы́ѧ пѧтдесѧ́тницы,
тропа́рь, гла́съ и҃:
Бл҃гослове́нъ є҆сѝ хрⷭ҇тѐ бж҃е на́шъ, и҆́же премꙋ́дры ловцы̀ ꙗ҆вле́й, низпосла́въ и҆̀мъ дх҃а ст҃а́го, и҆ тѣ́ми ᲂу҆ловле́й вселе́ннꙋю, чл҃вѣколю́бче сла́ва тебѣ̀.
<<рч҃ѳ ѡ҆б.: 398>>
Конда́къ, гла́съ и҃:
Є҆гда̀ снизше́дъ ѧ҆зы́ки слїѧ̀, раздѣлѧ́ше ꙗ҆зы́ки вы́шнїй: є҆гда́ же ѻ҆́гненныѧ ѧ҆зы́ки раздаѧ́ше, въ соедине́нїе всѧ̑ призва̀: и҆ согла́снѡ сла́вимъ всест҃а́го дх҃а.
Въ недѣ́лю всѣ́хъ ст҃ы́хъ,
тропа́рь воскрⷭ҇нъ.
И҆ ст҃ы́хъ, гла́съ д҃:
И҆́же во все́мъ мі́рѣ мч҃нкъ твои́хъ, ꙗ҆́кѡ багрѧни́цею и҆ вѵ́ссомъ, кровьмѝ цр҃ковь твоѧ̀ ᲂу҆краси́вшисѧ, тѣ́ми вопїе́тъ тѝ, хрⷭ҇тѐ бж҃е: лю́демъ твои̑мъ щедрѡ́ты твоѧ̑ низпослѝ, ми́ръ жи́тельствꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.
Конда́къ, гла́съ и҃:
Ꙗ҆́кѡ нача́тки є҆стества̀, насади́телю тва́ри, вселе́ннаѧ прино́ситъ тѝ гдⷭ҇и, бг҃онѡ́сныѧ мч҃нки: тѣ́хъ мл҃твами въ ми́рѣ глꙋбо́цѣ цр҃ковь твою̀, жи́тельство твоѐ бцⷣею соблюдѝ, многомлⷭ҇тиве.
Вѣ́домо же бꙋ́ди, ꙗ҆́кѡ по недѣ́ли всѣ́хъ ст҃ы́хъ съ понедѣ́льника непремѣ́ннѡ начина́етсѧ по́стъ ст҃ы́хъ а҆пⷭ҇лъ, и҆ быва́етъ і҆ꙋ́нїа до к҃ѳ днѐ, до па́мѧти ст҃ы́хъ а҆пⷭ҇лъ петра̀ и҆ па́ѵла.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.