Слꙋ́жба прпⷣбнымъ жена́мъ
<<рк҃ѳ: 257>>
[глⷡ҇а к҃г] СЛꙊ́ЖБА Ѻ҆́БЩА
прпⷣбнымъ жена́мъ двѣма̀ и҆ мнѡ́гимъ.
Ве́чера,
на Гдⷭ҇и воззва́хъ, стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Ꙗ҆́кѡ бг҃озра̑чныѧ лꙋчѝ свы́ше сїѧ́юще, ꙳ мы́сленными лꙋча́ми просвѣща́ете мі́ръ, ꙳ тьмꙋ̀ прогонѧ́ете, ꙳ бѣсѡ́вскїѧ лꙋка́выѧ полкѝ: ꙳ тѣ́мъ свѣтоно́сное и҆ бж҃е́ственное ꙳ ва́ше пра́зднество пра́зднꙋемъ.
Ра́йскїѧ добрѡ́ты ᲂу҆зрѣ́вше, ꙳ и҆ бога́тнѡ напита́вшесѧ всечестны́ѧ, ꙳ нетлѣ̑нныѧ цвѣ́ты прозѧбо́сте мі́рови, ꙳ ра́зꙋма бжⷭ҇твеннагѡ. ꙳ є҆гѡ́же причаща́ющесѧ дне́сь дꙋхо́вною любо́вїю, ꙳ дꙋше́вное всѧ́ко бл҃гопло́дїе содѣва́емъ.
Мона́шескимъ житїе́мъ ᲂу҆краси́сте ꙳ по́стничєскаѧ мно́жєства, ꙳ возсїѧ́вше ꙗ҆́кѡ сл҃нце всѣ̑мъ. ꙳ тѣ́мже съ ни́ми прославлѧ́етесѧ пречⷭ҇тны̑ѧ, ꙳ наслажда́ющесѧ сла́вы бж҃е́ственныѧ, ꙳ и҆ молѧ́щесѧ сп҃сти́сѧ на́мъ.
Сла́ва, и҆ ны́нѣ, бг҃оро́диченъ:
Прегрѣше́нїй пꙋчи́ною ѡ҆бꙋрева́емь, къ ти́хомꙋ приста́нищꙋ пречⷭ҇тыѧ твоеѧ̀ мл҃твы прибѣ́гъ, бг҃ороди́тельнице, взыва́ю тѝ: сп҃си́ мѧ, держа́внꙋю твою̀ просте́рши десни́цꙋ рабꙋ̀ твоемꙋ̀ всенепоро́чнаѧ.
Крⷭ҇тобг҃оро́диченъ: Сѐ ᲂу҆́бѡ ви́дѣхъ копїе́мъ пробо́дшее срⷣце моѐ ча́до: ꙗ҆́коже прореко́ша мѝ дре́вле, є҆гда́ тѧ ᲂу҆зрѣ́хъ всѣ́хъ сынѡ́въ земны́хъ краснѣ́йша: на крⷭ҇тѣ́ бо во́лею съ разбо́йники, ꙗ҆́кѡ ѕлодѣ́й, ѡ҆бѣ́шенъ бы́лъ є҆сѝ хрⷭ҇тѐ.
<<рк҃ѳ ѡ҆б.: 258>>
А҆́ще и҆́мать самогла́сенъ, Сла́ва, гла́съ и҃:
Вы̀ сле́зными и҆злїѧ̑нїи плотски́хъ сласте́й разжжє́нїѧ ᲂу҆гаси́сте, и҆ бж҃е́ственнагѡ раче́нїѧ возгнѣ́щше жела́нїе, возлюби́сте цр҃ѧ̀ хрⷭ҇та̀, безстра́стнѡ томꙋ̀ сочта́стесѧ: тѣ́мъ ны́нѣ разꙋ́мнѡ въ черто́гъ внидо́сте, рачи́телю за чтꙋ́щихъ ва́съ помоли́тесѧ.
И҆ ны́нѣ, бг҃оро́диченъ:
Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Цр҃ь нбⷭ҇ный за чл҃вѣколю́бїе:
Вхо́дъ. Прокі́менъ днѐ.
Чтє́нїѧ трѝ, мч҃нчєскаѧ, [пи̑саны въ концѣ̀ кни́ги сеѧ̀].
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Тѣ́снымъ ше́ствовавше пꙋте́мъ, ꙳ нево́лненнымъ дх҃омъ, ꙳ къ животꙋ̀ ведꙋ́щимъ препла́вающе, ꙳ по́стницъ бо вы̀ бы́сте ꙳ похвала̀ прпⷣбнїи, ꙳ крѣ́пкѡ низложи́сте бѣсѡ́вскаѧ ловлє́нїѧ. ꙳ тѣ́мъ полꙋчи́вше ꙳ нбⷭ҇нагѡ црⷭ҇твїѧ наслѣ́дницы бы́ти, ꙳ и҆ непрестаю́щїѧ наслажда́етесѧ красоты̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Пресвѣ́тлое житїѐ ва́ше ꙳ а҆́гг҃лы ᲂу҆дивѝ, ꙳ и҆ бѣсѡ́вскаѧ шата̑нїѧ ꙗ҆́вѣ ᲂу҆страшѝ: ꙳ вѣ́рныхъ же собра̑нїѧ свѣ́тлѡ ᲂу҆красѝ, ꙳ къ нбⷭ҇номꙋ хрⷭ҇то́вꙋ жили́щꙋ повелѣва́ѧ ше́ствовати всегда̀. ꙳ є҆го́же моли́те, ѿ тлѝ и҆ бѣ́дъ и҆зба́витисѧ вѣ́рою творѧ́щымъ всечⷭ҇тнꙋ́ю па́мѧть ва́шꙋ.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Пѣ́нїе и҆ похвалꙋ̀ хрⷭ҇тꙋ̀ приносѧ́ще ꙳ на всѧ́къ де́нь прпⷣбнїи, ꙳ въ пꙋсты́ни жи́тельствꙋюще, ꙳ є҆ди́номꙋ бг҃ꙋ возложи́вше дꙋ́шы и҆ помышлє́нїѧ, ꙳ ꙗ҆́кѡ вели́кїй мѡѷсе́й, ꙳ въ незаходи̑маѧ внидо́сте: ꙳ тѣ́мъ побѣди́сте неви́димаго врага̀, ꙳ и҆ бы́сте чи́стое прїѧ́телище ꙳ бж҃е́ственнагѡ дх҃а.
<<р҃л: 259>>
Сла́ва, гла́съ д҃:
Ѻ҆трокови̑цы возлюби́ша невѣ́стника гдⷭ҇а, и҆ тогѡ̀ ᲂу҆че́нїю покарѧ́ющесѧ, и҆ плотскꙋ́ю сла́бость презрѣ́вше ѡ҆ дꙋ́сѣ, ᲂу҆се́рдїемъ бл҃гоче́стнымъ стра̑сти ᲂу҆держа́ша, и҆ введо́шасѧ съ ва́ми прпⷣбнїи въ черто́гъ нбⷭ҇ный, веселѧ́щесѧ.
И҆ ны́нѣ, бг҃оро́диченъ:
Свѣщѐ неꙋгаси́маѧ, прⷭ҇то́ле првⷣный, пречⷭ҇таѧ влⷣчце, молѝ сп҃сти́сѧ дꙋша́мъ на́шымъ.
Крⷭ҇тобг҃оро́диченъ: Не рыда́й менѐ мт҃и, зрѧ́щи на дре́вѣ ви́сѧща твоего̀ сн҃а и҆ бг҃а, над̾ вода́ми повѣ́сившаго зе́млю неде́ржнѡ, и҆ всю̀ тва́рь созда́вшаго: воста́нꙋ бо и҆ просла́влюсѧ, и҆ а҆́дѡва ца̑рства сокрꙋшꙋ̀ крѣ́постїю и҆ погꙋблю̀ тогѡ̀ си́лꙋ, и҆ ᲂу҆́зники и҆зба́влю ѿ тогѡ̀ ѕлодѣ́йства, ꙗ҆́кѡ бл҃гоꙋтро́бенъ, и҆ ѻ҆ц҃ꙋ̀ моемꙋ̀ приведꙋ̀ ꙗ҆́кѡ чл҃вѣколю́бецъ.
Тропа́рь прпⷣбнымъ жена́мъ. Гла́съ в҃:
И҆́стинномꙋ жела́нїю ᲂу҆невѣ́стившесѧ хрⷭ҇тосла́внїи, и҆ вре́меннагѡ ѡ҆брꙋ́чника ѿве́ргшесѧ совокꙋпле́нїѧ, и҆ добродѣ́тельными по́двиги возра́стше, на высотꙋ̀ востеко́сте нетлѣ́нїѧ, краснодꙋ́шнїи и҆ многобога́тнїи, столпѝ мона́шествꙋющихъ же́нъ и҆ пра́вило: тѣ́мже ѡ҆ на́съ моли́те непреста́ннѡ, любо́вїю ва́шꙋ па́мѧть пра́зднꙋющихъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ г҃.
Подо́бенъ: Красотѣ̀ дѣ́вства:
Мїрскꙋ́ю красотꙋ̀ прпⷣбнїи ѡ҆ста́висте, премѣни́вше бога́тствомъ тлѣ́ющимъ непреходи́мое ꙗ҆́вѣ и҆ пребыва́ющее ст҃і́и: тѣ́мже со всѣ́ми ст҃ы́ми сла́вимъ, и҆ торжествꙋ́емъ сщ҃е́ннꙋю <<р҃л ѡ҆б.: 260>> па́мѧть ва́шꙋ, просѧ́ще ѡ҆брѣстѝ мл҃твами ва́шими бл҃же́ннїи, ве́лїю млⷭ҇ть. [Два́жды.]
Сла́ва, и҆ ны́нѣ, бг҃оро́диченъ:
Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство: и҆́бо неѡбыме́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀ чтⷭ҇аѧ, ꙗ҆́кѡ сн҃а твоего̀, молѝ сп҃сти́сѧ дꙋша́мъ на́шымъ.
По в҃-й каѳі́смѣ сѣда́ленъ, гла́съ є҃.
Подо́бенъ: Собезнача́льное:
Воздержа́нїемъ житїѐ своѐ ᲂу҆краси́вше, и҆ ᲂу҆́ды ᲂу҆мертви́вше, побѣди́сте вра̑жїѧ прило́ги прпⷣбнїи, и҆ пꙋсты́ни насе́льницы, свѣти́льницы же мі́рꙋ разꙋ́мнїи ꙗ҆ви́стесѧ бл҃же́ннїи: тѣ́мъ моли́тесѧ гдⷭ҇ви поми́ловати дꙋ́шы на́шѧ. [Два́жды.]
Сла́ва, и҆ ны́нѣ, бг҃оро́диченъ:
Тѧ̀ приста́нище и҆ стѣ́нꙋ, и҆ прибѣ́жище и҆ наде́ждꙋ, и҆ покро́въ, и҆ предста́тельницꙋ те́плꙋ, ѡ҆брѣ́тше вѣ́рнїи, къ тебѣ̀ прибѣга́емъ, и҆ вопїе́мъ прилѣ́жнѡ, и҆ взыва́емъ вѣ́рнѡ: поми́лꙋй бцⷣе, на тѧ̀ ᲂу҆пова́ющыѧ, и҆ ѿ прегрѣше́нїй и҆зба́ви.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ ва́съ прпⷣбнїи ма́тєри, и҆ чте́мъ ст҃ꙋ́ю па́мѧть ва́шꙋ: вы́ бо мо́лите за на́съ хрⷭ҇та̀ бг҃а на́шего.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
По полѷеле́и сѣда́ленъ, гла́съ и҃.
Подо́бенъ: Повелѣ́нное:
Въ мл҃твахъ та́йныхъ бдѧ́ще, и҆ насла́ждшесѧ писа́нїи бг҃одохнове́нными бл҃же́ннїи, на ра́мꙋ взѧ́ша гдⷭ҇нь крⷭ҇тъ, и҆ семꙋ̀ послѣ́дꙋюще воздержа́тельнѡ, всю̀ ле́сть ѕмі́евꙋ низложи́ша, зовꙋ́ще хрⷭ҇тꙋ̀: женишѐ нбⷭ҇ный, ты̀ бꙋ́ди на́мъ ᲂу҆твержде́нїе. [Два́жды.]
Сла́ва, и҆ ны́нѣ, бг҃оро́диченъ:
И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ бл҃гі́й, и҆спрове́ргїй сме́ртїю сме́рть, и҆ воскрⷭ҇нїе ꙗ҆вле́й <<рл҃а: 261>> бг҃ъ, не пре́зри ꙗ҆̀же созда́лъ є҆сѝ рꙋко́ю твое́ю: ꙗ҆вѝ чл҃вѣколю́бїе твоѐ млⷭ҇тиве: прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀, и҆ сп҃сѝ сп҃се на́шъ лю́ди ѿча̑ѧнныѧ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Всѧ́кое дыха́нїе:
Є҆ѵⷢ҇лїе, [пи́сано въ концѣ̀ кни́ги сеѧ̀].
По н҃-мъ ѱалмѣ̀ стїхи́ра, гла́съ и҃:
Вы̀ сле́зными и҆злїѧ̑нїи: пи́сана Сла́ва, на Гдⷭ҇и воззва́хъ.
Канѡ́нъ, гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Плотско́ю не́мощїю си́льнаго врага̀ низложи́сте и҆ присво́истесѧ къ бг҃ꙋ прпⷣбныѧ жєны̀, молѧ́щесѧ, си́лꙋ всѣ̑мъ на́мъ пода́ти сп҃си́тельнꙋю.
Оу҆ѧзви́стесѧ добро́тою женихо́вою, и҆ во слѣ́дъ є҆гѡ̀ прилѣпи́стесѧ ѱало́мски, послѣ́дꙋюще живонѡ́снымъ стопа́мъ є҆гѡ̀: и҆ сегѡ̀ ра́ди низложи́сте врага̀ ѕмі́ѧ.
Оу҆вѧди́вше трꙋды̀ по́стническими тѣлє́сныѧ добрѡ́ты, ᲂу҆краси́сте ва́шѧ дꙋ́шы: и҆ со хрⷭ҇то́мъ женихо́мъ въ черто́ги свѣ̑тлыѧ внидо́сте прпⷣбныѧ.
Бг҃оро́диченъ: Невѣ́стникъ показа́сѧ свѣтови́денъ ᲂу҆тро́ба твоѧ̀ дв҃о, млⷭ҇ти ра́ди тѣле́снѡ и҆з̾ тебѐ воплоти́вшагѡсѧ гдⷭ҇а, и҆ всѧ́чєскаѧ бг҃оразꙋ́мїѧ лꙋча́ми просвѣ́щшагѡ.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Презрѣ́сте добрѡ́ты тѣлє́сныѧ пречⷭ҇тны̑ѧ, и҆ мимогрѧдꙋ́щꙋю сла́вꙋ ꙗ҆́кѡ со́нъ вмѣни́сте: во смире́нїи же и҆ поще́нїи бг҃а взыска́сте, бг҃обл҃жє́нныѧ.
<<рл҃а ѡ҆б.: 262>>
Сїѧ́ютъ прпⷣбныхъ же́нъ сщ҃є́нныѧ мо́щи, подаю́ще и҆сцѣле́нїе вѣ́рою къ си̑мъ притека́ющымъ, бл҃года́ть поче́рпше ѿ и҆стѡ́чникъ сп҃си́тельныхъ, сегѡ̀ вѡ́льнымъ стрⷭ҇те́мъ поревнова́вше.
Ѿверго́стесѧ мі́ра, и҆ пло́ти мꙋдрова́нїѧ, воздержа́нїемъ же и҆ трꙋды̀ стѧжа́вше хрⷭ҇та̀ жениха̀ пречⷭ҇таго, черто́гъ нбⷭ҇ный подаю́щаго ва́мъ бж҃е́ственнагѡ наслажде́нїѧ.
Бг҃оро́диченъ: Сщ҃е́нныхъ прⷪ҇рѡ́къ сщ҃є́нныѧ трꙋбы̑ дре́вле тѧ̀ провозвѣсти́ша, две́рь свѣ́та ро́ждшꙋю, и҆ сви́токъ ѡ҆дꙋшевле́нный, на не́мже не рꙋка́ми сло́во написа́сѧ, па́че сло́ва пречⷭ҇таѧ дв҃о.
Сѣда́ленъ, гла́съ д҃:
На ра́мо взе́мше крⷭ҇тъ хрⷭ҇то́въ, послѣ́довасте є҆мꙋ̀ дѣ́лы по́стническими бл҃говѣ́рнѡ, всесвѣ́тлыѧ и҆ прпⷣбныѧ, и҆ всѣ̑мъ жена́мъ по́стничествꙋющымъ че́стно ꙗ҆ви́стесѧ пра́вило всечⷭ҇тны̑ѧ: но бжⷭ҇твенными трꙋды̀ вы́шнее црⷭ҇твїе наслѣ́довасте. непреста́ннѡ моли́те, сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
Сло́во ѻ҆́ч҃ее хрⷭ҇та̀ бг҃а на́шего ѿ тебѐ воплоти́вшагосѧ позна́хомъ бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ. тѣ́мъ непреста́ннѡ тѧ̀ воспѣва́юще велича́емъ.
Крⷭ҇тобг҃оро́диченъ: И҆з̾ безнача́льнагѡ ѻ҆ц҃а̀ рожде́ннаго, въ послѣ̑днѧѧ времена̀ пло́тїю ро́ждшаѧ, на крⷭ҇тѣ́ тѧ ви́сѧща зрѧ́щи хрⷭ҇тѐ, ᲂу҆вы̀ мнѣ̀ любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е хотѧ̀ распина́ешисѧ! пою́ тѧ долготерпѣли́ве.
Пѣ́снь д҃.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Добро́тꙋ пречⷭ҇тꙋю люби́магѡ жениха̀ своегѡ̀ ви́дѧтъ прпⷣбныѧ жєны̀, ᲂу҆вѧди́вше плотскꙋ́ю добро́тꙋ воздержа́нїемъ.
Дрема́нїе ѿри́нꙋвше ѿ дꙋше́вныхъ вѣ́ждей сщ҃є́нныѧ жєны̀, ᲂу҆спи́сте двиза̑нїѧ тѣлє́снаѧ воздержа́нїемъ.
<<рл҃в: 263>>
Свѣ́тлое ва́ше пра́зднество, свѣ́томъ бж҃їѧ дх҃а сїѧ́ющее, ѡ҆зарѧ́етъ дꙋ́шы на́шѧ, вѣ́рою чтꙋ́щихъ ва́съ прпⷣбныѧ.
Бг҃оро́диченъ: Воплоти́вшагосѧ тебѐ гдⷭ҇и, ѿ пречⷭ҇тыѧ дв҃ы, прпⷣбныѧ возлюби́вше, въ воню̀ мѵ́ра твоегѡ̀ потеко́ша, твое́ю ᲂу҆ѧзви́вшесѧ бж҃е́ственною любо́вїю.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Недꙋ́ги рѣша́ще всѧ̑ си́лою ст҃а́гѡ дх҃а, ѿго́ните болѣ́зненный мра́къ зарѧ́ми пресла́вными чꙋде́съ ва́шихъ, и҆ къ вели́комꙋ свѣ́тꙋ нбⷭ҇нагѡ црⷭ҇твїѧ вѣ́рныхъ наставлѧ́ете, всечⷭ҇тны̑ѧ.
Оу҆мертви́вшесѧ мі́рови, наслѣ́довасте жи́знь безсме́ртнꙋю: и҆ черто́га бж҃е́ственнагѡ сподо́бистесѧ бг҃обл҃жє́нныѧ, свѣщы̀ ва́шѧ по́стническимъ є҆ле́емъ неꙋгаси́мы соблю́дше, всечⷭ҇тны̑ѧ.
Ѡ҆ маловре́меннѣй и҆ тлѣ́ющей небре́гше жи́зни, сꙋ́щымъ на землѝ ѡ҆ста́вльше сїю̀, свѧза́стесѧ любо́вїю дꙋхо́вною бл҃жє́нныѧ. тѣ́мже ны́нѣ водворѧ́етесѧ, и҆дѣ́же првⷣныхъ селє́нїѧ.
Бг҃оро́диченъ: Бж҃їе бг҃ъ сло́во во ᲂу҆тро́бꙋ неискꙋсобра́чнꙋю во́лею всели́сѧ, и҆ чл҃вѣ́къ ᲂу҆зрѣ́нъ бы́сть, и҆́же дв҃ою соблюды́й тѧ̀ пречⷭ҇таѧ: є҆го́же жела́юще ѻ҆трокови̑цы, по́стнически семꙋ̀ послѣ́доваша житїе́мъ свѣ́тлымъ.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.
Воздержа́нїе и҆ смире́нное се́рдце, бдѣ́нїе съ ми́лостынею, ра́зꙋмъ и҆ вѣ́рꙋ, и҆ соверше́ннꙋ любо́вь стѧжа́вше сщ҃є́нныѧ жєны̀, бы́сте хра́мъ бж҃їй, и҆ чꙋде́съ и҆сто́чникъ неѡскꙋ́дный.
Оу҆страни́вше себѐ жите́йскихъ сласте́й, терпѣ́нїемъ болѣ́зней по́стническихъ, на зе́млю соше́дшаго на́съ ра́ди, и҆ во́лею стра́нствовавша вы̀ честны̑ѧ, сегѡ̀ ра́ди стѧжа́сте на нб҃сѣ́хъ, страннопрїи́мствовавша ва́съ досточꙋ̑дныѧ.
<<рл҃в ѡ҆б.: 264>>
Оу҆спи́сте стра̑сти дꙋшетлѣ̑нныѧ мно́гими бдѣ̑нїи, всечⷭ҇тны̑ѧ: и҆ првⷣныхъ досто́йнѡ ᲂу҆снꙋ́сте сно́мъ, за мі́ръ молѧ́щесѧ.
Бг҃оро́диченъ: Предста́тельницꙋ тѧ̀ живота̀ вѣ́мъ, и҆ храни́тельницꙋ тве́рдꙋ дв҃о, и҆ напа́стей рѣша́щꙋ молвы̀, и҆ нало́ги бѣсѡ́въ ѿгонѧ́ющꙋ: и҆ молю́сѧ всегда̀, ѿ тлѝ страсте́й мои́хъ и҆зба́вити мѧ̀.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Тѣлеса̀ своѧ̑ посто́мъ и҆знꙋри́вше, и҆ неꙋсы́пными мл҃твами молѧ́ще зижди́телѧ ѡ҆ грѣсѣ́хъ свои́хъ, ꙗ҆́кѡ да прїи́мете соверше́нное проще́нїе, и҆ прїѧ́сте бж҃е́ственное ѡ҆ставле́нїе, и҆ црⷭ҇твїе нбⷭ҇ное: моли́те хрⷭ҇та̀ бг҃а ѡ҆ всѣ́хъ на́съ.
І҆́косъ: Затворѧ́ѧй бе́зднꙋ и҆ ѿверза́ѧй ю҆̀, возносѧ́й во́дꙋ во ѻ҆́блацѣхъ и҆ дава́ѧй до́ждь на лицѐ землѝ, ты̀ бж҃е, да́рꙋй и҆ непло́днѣй мое́й дꙋшѝ, во ѿверзе́нїе ᲂу҆́стъ сло́во бл҃госочета́нное, и҆ гꙋгни́вомꙋ ѧ҆зы́кꙋ ꙗ҆́сное глаго́ланїе, да возмогꙋ̀ досто́йнѡ воспѣ́ти твоѧ̑ прпⷣбныѧ, и҆̀хже ты̀ са́мъ просла́вилъ є҆сѝ. ті́и бо тебѐ ра́ди кра̑снаѧ мі́ра сегѡ̀ презрѣ́ша, и҆ плѡ́ти своѧ̑ и҆знꙋри́ша, и҆ твое́ю крѣ́постїю дїа́вола побѣди́ша, и҆ ѿ тебѐ прїѧ́ша терпѣ́нїѧ вѣнцы̀. и҆ ны́нѣ предстоѧ́ще на нб҃сѣ́хъ со всѣ́ми ст҃ы́ми, мо́лѧтсѧ непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е бл҃гослове́нъ є҆сѝ.
Сла́вꙋ тлѣ́ющꙋю на нетлѣ́ннꙋю премѣни́ша любо́вїю преподѡ́бныѧ, є҆ѧ́же наслажда́ющесѧ при́снѡ ра́дꙋющесѧ и҆ веселѧ́щесѧ пою́тъ: бл҃гослове́нъ бг҃ъ ѻ҆тє́цъ на́шихъ.
Ѕвѣ́зды многосвѣ̑тлыѧ ꙗ҆́вльшесѧ, свѣ́томъ трꙋдѡ́въ ва́шихъ просвѣща́юще дꙋ́шы вѣ́рныхъ, наꙋча́ете пѣ́ти: бл҃гослове́нъ бг҃ъ ѻ҆тє́цъ на́шихъ.
Рѣка̀ ꙗ҆ви́стесѧ и҆сцѣле́нїѧ, страстна́гѡ мо́рѧ потоплѧ́юще, сп҃си́те пою́щихъ: бл҃гослове́нъ бг҃ъ ѻ҆тє́цъ на́шихъ.
<<рл҃г: 265>>
Бг҃оро́диченъ: И҆зба́ви ѿ ᲂу҆́зъ грѣхо́вныхъ ѻ҆каѧ́ннꙋю мою̀ дꙋ́шꙋ бг҃ороди́тельнице, и҆ любвѝ бж҃їей соверше́ннѣй припрѧзѝ: ꙗ҆́кѡ да вѣ́рою сла́влю тѧ̀, и҆ пою̀ во вѣ́ки.
Пѣ́снь и҃.
І҆рмо́съ: Побѣди́тєли мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
Помыслѡ́мъ повинꙋ́сте дѣ̑вы, стра̑сти безсловє́сныѧ, и҆ къ женихꙋ̀ сло́вꙋ мы́сленнѡ причта́стесѧ, пою́ще: бл҃гослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Распе́ншесѧ мі́рꙋ, и҆ бж҃їею любо́вїю ᲂу҆ѧзви́вшесѧ сщ҃є́нныѧ дѣ̑вы, вкꙋше́нїемъ сла́дкимъ є҆́ѵꙋ ᲂу҆ѧзви́вшаго, воздержа́нїѧ стрѣла́ми ᲂу҆ѧзви́сте, воспѣва́юще хрⷭ҇та̀ во вѣ́ки.
Мы́слїю прпⷣбныѧ, по́хѡти несмы́слєнныѧ покори́сте, и҆ женихꙋ̀ сло́вꙋ ᲂу҆невѣ́стистесѧ без̾ поро́ка чтⷭ҇ны̑ѧ, пою́ще: бл҃гослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Бг҃оро́диченъ: І҆и҃са ро́ждшаѧ ѿ чтⷭ҇ыхъ крове́й твои́хъ воплоще́нна, дѣ̑вы всѧ̑ собрала̀ є҆сѝ, пречⷭ҇таѧ дв҃о мт҃и, и҆ съ ни́ми вопїю́щи: бл҃гослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще.
Кра̑сныѧ влⷣцѣ, и҆ бг҃оглагѡ́ливыѧ гѡ́рлицы, и҆ ла́стѡвицы свѣ́тлыѧ и҆ чистолюби́выѧ, въ добрѡ́ты нбⷭ҇ныѧ приведе́ни бы́сте.
Сочта́стесѧ съ вы́шними ликостоѧ̑нїи, и҆ во и҆збра́нныхъ собо́рѣхъ всели́стесѧ, ѡ҆ на́съ молѧ́щесѧ, любо́вїю ще́дромꙋ бг҃ꙋ.
Па́мѧть прпⷣбныхъ же́нъ, ꙗ҆́кѡ сл҃нце мі́рꙋ возсїѧ̀, вѣ́рныхъ мы̑сли просвѣща́ющи, хрⷭ҇та̀ велича́ющихъ при́снѡ.
Бг҃оро́диченъ: Свѣ́та сꙋ́щи прїѧ́телище, просвѣтѝ дв҃о, ѡ҆мраче́ннꙋю страстьмѝ дꙋ́шꙋ мою̀, и҆ кромѣ́шнїѧ тьмы̀ и҆зба́ви мѧ̀ мольба́ми твои́ми.
<<рл҃г ѡ҆б.: 266>>
Свѣти́ленъ.
Соверша́ющихъ любо́вїю моле́бнꙋю ва́шꙋ па́мѧть, прпⷣбнїи и҆ всечестні́и, къ бг҃ꙋ и҆зба́вителю мл҃твами ва́шими, ѿ всѧ́кихъ бѣ́дъ сп҃си́те: и҆ мнѣ̀ дꙋше́внꙋю скве́рнꙋ, ма́лѡ ва́съ воспѣ́вшаго ѡ҆мы́йте.
Бг҃оро́диченъ: Ѡ҆ на́съ молѧ́щи сн҃а твоего̀ чл҃вѣколю́бца бг҃а, не преста́й дв҃о: на тѧ́ бо наде́ждꙋ стѧжа́хомъ, и҆ твои́мъ предста́тельствомъ и҆збавлѧ́емсѧ бѣ́дъ, и҆ страсте́й, и҆ прегрѣше́нїй, и҆ болѣ́зней, и҆̀же вѣ́рою тѧ̀ сла́вѧщїи.
На хвали́техъ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Нетлѣ́нное соблю́дше дѣ́вство своѐ прпⷣбныѧ, ꙳ нескве́рнѡ и҆ чи́стѡ пожи́вше, ꙳ и҆ бога́тство прїи́мше, ꙳ хрⷭ҇то́во и҆спо́лнисте законоположе́нїе: ꙳ є҆мꙋ́же послѣ́довасте, ꙳ зе́млю ѡ҆ста́вльше, и҆ ꙗ҆̀же на не́й. ꙳ тѣ́мже ва́мъ нбⷭ҇наѧ, и҆ нб҃о дарова̀ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ. [Два́жды.]
Любомꙋ́дреннѡ дꙋше́вное, ꙳ самодви́жимое и҆ безсме́ртное показа́сте: ꙳ тѣ́мже и҆ потща́стесѧ нетрꙋ́днѡ, ꙳ скве́рны грѣхо́вныѧ и҆ всѧ́кагѡ ка́ла, ꙳ чи̑сти премѣни́тисѧ сою̑зъ тѣле́сныхъ, ꙳ ни є҆ди́ныѧ скве́рны, ꙳ ни вра́ски и҆мꙋ́ще, ꙳ жєны̀ бг҃опрїѧ̑тныѧ: ꙳ но чи́сты и҆ нескве́рны женихꙋ̀ своемꙋ̀ предста́сте.
Заре́ю просвѣти́шасѧ ꙳ свѣтови̑днаѧ ва́ша ли́ца, ꙳ и҆ ᲂу҆ме́рше прехва́льнїи, ꙳ хрⷭ҇тꙋ̀ ва́съ просла́вльшꙋ, ꙳ ꙗ҆́кѡ своѧ̑ прпⷣбныѧ бг҃ови́дны ꙳ , ꙗ҆́кѡ млⷭ҇тивны, ꙳ ꙗ҆́кѡ бг҃олюби́вы же и҆ бл҃гоглаго́ливы. ꙳ жи́знь бо равноа́гг҃льнꙋ на землѝ пожи́сте, ꙳ и҆ бг҃ꙋ ᲂу҆годи́сте житїѧ̀ свѣ́тлостїю.
Сла́ва, гла́съ а҃:
Всю̀ тѣле́снꙋю тѧ́гость ѿложи́вше прпⷣбныѧ жєны̀, воздержа́нїемъ и҆ болѣ́зньми, къ нбⷭ҇нымъ ѻ҆би́телемъ востеко́сте: въ ни́хже люби́мыѧ ва́ми наслажда́етесѧ добро́ты неизрече́нныѧ.
<<рл҃д: 267>>
И҆ ны́нѣ, бг҃оро́диченъ:
Ра́дꙋйсѧ ѿ на́съ, ст҃а́ѧ бцⷣе дв҃о, чи́стый сосꙋ́де всеѧ̀ вселе́нныѧ, свѣщѐ неꙋгаси́маѧ, вмѣсти́лище невмѣсти́магѡ, хра́ме неѡбори́мый: ра́дꙋйсѧ, и҆з̾ неѧ́же роди́сѧ а҆́гнецъ бж҃їй, взе́млѧй грѣхѝ всегѡ̀ мі́ра.
Крⷭ҇тобг҃оро́диченъ: Воздви́жена тѧ̀ ꙗ҆́кѡ ви́дѣ на крⷭ҇тѣ̀ а҆́гница непоро́чнаѧ дв҃а, пла́чꙋщи вопїѧ́ше: сла́дкое моѐ ча́до, что̀ но́вое и҆ пресла́вное видѣ́нїе; ка́кѡ содержа́й го́рстїю всѧ́чєскаѧ, на дре́вѣ пригвожда́ешисѧ пло́тїю;
А҆́ще и҆́мать на стїхо́внѣ Сла́вꙋ, глаго́ли вече́рнїй:
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.