Слꙋ́жба прпⷣбнѣй женѣ̀
<<рк҃г ѡ҆б.: 246>>
[глⷡ҇а к҃в] СЛꙊ́ЖБА Ѻ҆́БЩА
прпⷣбнѣй женѣ̀ є҆ди́нѣй.
Ве́чера,
на Гдⷭ҇и воззва́хъ, стїхи̑ры, гла́съ и҃.
Подо́бенъ: Мч҃ницы твоѝ гдⷭ҇и:
Въ болѣ́знехъ по́стническихъ терпѧ́щи, прїѧ́ла є҆сѝ бл҃года́ть, дꙋшє́вныѧ и҆ тѣлє́сныѧ болѣ̑зни ѡ҆чища́ти, ма́ти честна́ѧ, и҆́мⷬ҇къ, и҆ нечи̑стыѧ дꙋ́хи прогонѧ́ти дх҃омъ, и҆ всѣ̑мъ скорбѧ́щымъ предста́тельствовати, тѣ́мже твои́ми мл҃твами, просѝ и҆сцѣле́нїѧ всѣ̑мъ, и҆ ве́лїѧ млⷭ҇ти.
Ра́ка моще́й твои́хъ слѣпы̑мъ прозрѣ́нїе и҆сточа́етъ, и҆ всѣ̑мъ болѧ́щымъ и҆сцѣле́нїе, приходѧ́щымъ вѣ́рою, и҆ просѧ́щымъ посѣще́нїѧ твоегѡ̀ ма́ти прпⷣбнаѧ и҆ досточꙋ́днаѧ, и҆́мⷬ҇къ: тѣ́мже твои́ми мл҃твами и҆спросѝ на́мъ ве́лїю млⷭ҇ть.
Ми́лованїе стѧжа́ла є҆сѝ ко и҆́скреннемꙋ, вѣ́рꙋ же правосла́внꙋю, и҆ любо́вь ꙗ҆́же къ бг҃ꙋ, бг҃обл҃же́ннаѧ чтⷭ҇на́ѧ, и҆́мⷬ҇къ: сегѡ̀ ра́ди бж҃їѧ бл҃года́ть дꙋхо́внаѧ, въ тебѣ̀ ма́ти прпⷣбнаѧ, препочи́ла є҆́сть. тѣ́мже твои́ми мл҃твами сохранѝ вѣ́рою бл҃жа́щыѧ тѧ̀.
Сла́ва, и҆ ны́нѣ, бг҃оро́диченъ:
Тѧ̀ мо́лимъ пречⷭ҇таѧ, предста́тельницꙋ на́шꙋ, ѡ҆держи́мїи въ печа́лехъ, не пре́зри до конца̀ поги́бнꙋти рабѡ́мъ твои̑мъ: но ᲂу҆скорѝ и҆з̾ѧ́ти на́съ ѿ настоѧ́щагѡ гнѣ́ва и҆ ско́рби, ѽ бг҃овмѣсти́маѧ прест҃а́ѧ чⷭ҇таѧ! ты́ бо є҆сѝ на́мъ стѣна̀ и҆ по́мощь непобори́ма.
Крⷭ҇тобг҃оро́диченъ: Тѧ̀ ви́дѧщи пригвожда́ема на крⷭ҇тѣ̀, і҆и҃се, и҆ стрⷭ҇ти прїе́млюща во́лею, дв҃а и҆ мт҃и твоѧ̀ влⷣко, ᲂу҆вы̀ <<рк҃д: 247>> мнѣ̀, вопїѧ́ше, ча́до сла́дкое: ꙗ҆́звы непра́веднѡ ка́кѡ терпи́ши врачꙋ̀ и҆сцѣли́вый человѣ́ческое неможе́нїе, и҆ ѿ тлѝ всѧ̑ и҆зба́вивый бл҃гоꙋтро́бїемъ твои́мъ.
А҆́ще и҆́мать самогла́сенъ. Сла́ва, гла́съ в҃.
Дꙋшє́внаѧ ловлє́нїѧ, и҆ стра̑сти плѡтскі́ѧ, мече́мъ воздержа́нїѧ посѣ́кла є҆сѝ, и҆ мы́слєннаѧ согрѣшє́нїѧ молча́нїемъ поста̀ ᲂу҆дави́ла є҆сѝ, и҆ стрꙋѧ́ми сле́зъ твои́хъ пꙋсты́ню всю̀ напои́ла є҆сѝ, и҆ прозѧбла̀ є҆сѝ на́мъ покаѧ́нїѧ плоды̀: тѣ́мже твою̀ па́мѧть прпⷣбнаѧ, пра́зднꙋемъ.
И҆ ны́нѣ, бг҃оро́диченъ:
Сп҃сѝ ѿ бѣ́дъ рабы̑ твоѧ̑ бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.
Крⷭ҇тобг҃оро́диченъ.
Подо́бенъ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ человѣ́ка во́лею влеко́ма, рыда́ющи глаго́лаше: безча́дствовати мѧ̀ ны́нѣ тщи́шисѧ хрⷭ҇тѐ, тебѐ ро́ждшꙋю, что̀ сїѐ сотвори́лъ є҆сѝ, и҆зба́вителю всѧ́ческихъ, ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва бл҃гость, чл҃вѣколю́бче.
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Пре́йде сѣ́нь:
Вхо́дъ. Прокі́менъ днѐ.
Чтє́нїѧ г҃ прпⷣбничєскаѧ, [пи̑саны въ концѣ̀ кни́ги сеѧ̀.]
На стїхо́внѣ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Сла́вы ѻ҆тцє́въ вои́стиннꙋ возжела́вши, ꙳ сла́вꙋ нетлѣ́ннꙋю возлюби́ла є҆сѝ, ꙳ тѣ́мже ѿстꙋ́пльши сла́дкихъ, ꙳ тѣ́ло твоѐ болѣ́знемъ всѣ̑мъ ѿдала̀ є҆сѝ, и҆́мⷬ҇къ, и҆ ны́нѣ болѣ́зней прїе́млеши возме́здїе, со хрⷭ҇то́мъ црⷭ҇твꙋющи.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Жениха̀ кра́снꙋю добро́тꙋ ꙳ возжела́вши, и҆́мⷬ҇къ, ꙳ хрⷭ҇тꙋ̀ ᲂу҆невѣ́ститисѧ ты̀ восхотѣ́вши ꙳ всѣ́ми ви́ды бл҃ги́хъ, ꙳ <<рк҃д ѡ҆б.: 248>> болѣ́зньми и҆ воздержа́нїи тебѐ ᲂу҆краси́ла є҆сѝ: ꙳ тѣ́мже ны́нѣ со хрⷭ҇то́мъ црⷭ҇твꙋеши въ черто́зѣ є҆гѡ̀.
Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Въ приста́нище бж҃е́ственное ᲂу҆стреми́вшисѧ, ꙳ ти́хѡ прешла̀ є҆сѝ во́лны мїрски́хъ мѧте́жей: ꙳ и҆ дꙋшѝ своеѧ̀ кора́бль всечⷭ҇тна́ѧ, ꙳ непогрꙋзи́мь везꙋ́щи, ꙳ ѿ сласте́й го́рести, ꙳ та́йныхъ и҆мѣ́нїй и҆спо́лнь сꙋ́щїй.
Сла́ва, гла́съ ѕ҃:
Возсїѧ̀ дне́сь сщ҃е́нное твоѐ торжество̀, со́лнца свѣтлѣ́йши, сꙋ́щыѧ во тмѣ̀ дꙋ́шы ѡ҆зарѧ́ющее, мра́къ бѣсо́вскїй всегда̀ ѿгонѧ́ющее, досточꙋ́днаѧ.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:
Крⷭ҇тобг҃оро́диченъ: Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ вопїѧ́ше: что̀ стра́нное є҆́же ви́жꙋ та́инство, сн҃е мо́й, ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ и҃:
Въ тебѣ̀ ма́ти, и҆звѣ́стнѡ сп҃се́сѧ є҆́же по ѡ҆́бразꙋ, прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ ве́щи безсме́ртнѣй, тѣ́мже и҆ со а҆́гг҃лы сра́дꙋетсѧ прпⷣбнаѧ, и҆́мⷬ҇къ, дꙋ́хъ тво́й.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ є҃.
Подо́бенъ: Собезнача́льное:
Мꙋ́жески по́двиги воздержа́нїемъ претерпѣ́вши, низложи́ла є҆сѝ многоко́зненнаго, и҆ въ терпѣ́нїи жи́знь пожи́вши бл҃гоче́стнѡ <<рк҃є: 249>> прпⷣбнаѧ, и҆́мⷬ҇къ, ны́нѣ прешла̀ є҆сѝ къ бг҃ꙋ молѧ́щисѧ ѡ҆ всѣ́хъ, сщ҃е́ннѡ ст҃о́е твоѐ соверша́ющихъ пра́зднество. [Два́жды.]
Сла́ва, и҆ ны́нѣ, бг҃оро́диченъ:
Всенепоро́чнаѧ мт҃и, возсїѧ́й мѝ покаѧ́нїѧ лꙋчꙋ̀, и҆ разорѝ мра́къ безмѣ́рныхъ мои́хъ ѕѡ́лъ, лꙋка̑выѧ ѿженѝ, дв҃о, по́мыслы се́рдца моегѡ̀.
По в҃-й каѳі́смѣ, сѣда́ленъ, гла́съ д҃.
Подо́бенъ: Ско́рѡ предварѝ:
Пло́ть распѧ́ла є҆сѝ со страстьмѝ, и҆ всѐ любле́нїе ко хрⷭ҇тꙋ̀ и҆мѣ́ла є҆сѝ, и҆́мⷬ҇къ, женихꙋ̀ твоемꙋ̀ нетлѣ́нномꙋ. сегѡ̀ ра́ди прїѧ́ла є҆сѝ вѣне́цъ, и҆ а҆́гг҃льскимъ ликѡ́мъ сочи́слиласѧ є҆сѝ прпⷣбнаѧ, молѧ́щисѧ томꙋ̀ прилѣ́жнѡ ѡ҆ чтꙋ́щихъ тѧ̀. [Два́жды.]
Сла́ва, и҆ ны́нѣ, бг҃оро́диченъ:
Трꙋжда́етъ мѧ̀ бꙋ́рѧ грѣхо́внаѧ, и҆ возмꙋще́нїе безмѣ́стныхъ помышле́нїй: ᲂу҆млⷭ҇рдисѧ всенепоро́чнаѧ, и҆ рꙋ́кꙋ мѝ по́мощи, ꙗ҆́кѡ млⷭ҇тива прострѝ, да сп҃ссѧ велича́ю тѧ̀.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ тѧ̀ прпⷣбнаѧ ма́ти, и҆́мⷬ҇къ, и҆ чте́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
По полѷеле́и сѣда́ленъ, гла́съ и҃.
Подо́бенъ: Повелѣ́нное та́йнѡ:
Пред̾избра́ннаѧ ѿ бг҃а прпⷣбнаѧ ма́ти, ко приста́нищꙋ жи́зни наставлѧ́ема, без̾ волне́нїѧ житїѧ̀ бꙋ́рю претекла̀ є҆сѝ, со а҆́гг҃лы пѣсносло́вѧщи и҆зба́вителѧ, и҆ молѧ́щисѧ непреста́ннѡ ѡ҆ на́съ, ꙗ҆́кѡ да бл҃года́ть и҆ млⷭ҇ть хрⷭ҇то́съ да́рꙋетъ на́мъ, сохранѧ́ющи па́ствꙋ, ю҆́же болѣ́знїю соста́вила є҆сѝ. [Два́жды.]
Сла́ва, и҆ ны́нѣ, бг҃оро́диченъ:
Ра́дꙋйсѧ, а҆́гг҃ломъ ра́дость мі́ра прїе́мшаѧ. ра́дꙋйсѧ, ро́ждшаѧ творца̀ твоего̀ и҆ гдⷭ҇а. ра́дꙋйсѧ, сподо́бльшаѧсѧ бы́ти мт҃и бж҃їѧ.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
<<рк҃є ѡ҆б.: 250>>
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Всѧ́кое дыха́нїе:
Є҆ѵⷢ҇лїе прпⷣбнѣй, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ в҃:
Дꙋшє́внаѧ ловлє́нїѧ: [Пи́сана Сла́ва, на Гдⷭ҇и воззва́хъ:]
Канѡ́нъ, гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Страстны́ми мѧ̀ бꙋ́рѧми всю́дꙋ погрꙋжа́ема, и҆ помышле́нїй молво́ю дꙋ́шꙋ мою̀ коле́блемꙋ, ко приста́нищꙋ ти́хомꙋ хрⷭ҇то́вы во́ли, мл҃твами твои́ми прпⷣбнаѧ и҆́мⷬ҇къ, напра́ви, ꙗ҆́кѡ да досто́йнѡ тѧ̀ воспою̀.
Дѣ́вственными добро́тами просвѣще́на, бг҃обл҃же́ннаѧ, и҆́мⷬ҇къ, чтⷭ҇омꙋ сло́вꙋ ᲂу҆невѣ́стиласѧ є҆сѝ, пожи́вши поще́нїемъ бж҃е́ственнѣ: и҆ тогѡ̀ живоно́снымъ стопа́мъ послѣ́довала є҆сѝ, ᲂу҆мерщвле́нїе страсте́й претерпѣ́вши.
Бж҃е́ственныхъ ѻ҆тє́цъ наказа́нїю послѣ́довала є҆сѝ сла́внаѧ, и҆́мⷬ҇къ, и҆ си́хъ нра́вꙋ чи́стѣ поревнова́ла є҆сѝ, воздержа́нїемъ ꙗ҆́кѡ безпло́тна, и҆ чистото́ю и҆ дѣ́вствомъ пожи́вши прпⷣбнаѧ, и҆ и҆́стиннымъ смире́нїемъ.
Бг҃оро́диченъ: Бж҃е́ственнꙋю рꙋ́чкꙋ и҆ трапе́зꙋ, хлѣ́бъ живо́тный поне́сшꙋю, недѣ́ланнꙋю ни́вꙋ, го́рꙋ ст҃ꙋ́ю, бг҃ꙋ дв҃ꙋ пѣ́сньми сла́вимъ.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Въ нбⷭ҇ныѧ черто́ги свѣтоза́рныѧ всели́ласѧ є҆сѝ, невѣ́ста и҆збра́нна бы́вши вседержи́телю, и҆сцѣле́нїѧ рѣ́ки и҆сточа́еши, и҆́мⷬ҇къ, страстна̑ѧ на́мъ течє́нїѧ и҆зсꙋша́ющи.
<<рк҃ѕ: 251>>
Оу҆краси́ласѧ є҆сѝ жела́нїемъ кра́йнимъ жела́ющи хрⷭ҇та̀, премно́жествомъ бл҃госе́рдїѧ, пло́тїю ѡ҆бнища́вшагѡ, и҆ послѣ́довала є҆сѝ живо́тнымъ є҆гѡ̀ словесє́мъ, жите́йскаѧ всѧ̀ кра̑снаѧ возненави́дѣвши.
Позлаще́ннѣ крилѣ̀ добродѣ́тели стѧжа́вши, на высотꙋ̀ нбⷭ҇нꙋю возлетѣ́ла є҆сѝ бл҃же́ннаѧ, и҆́мⷬ҇къ, ꙗ҆́кѡ голꙋби́ца нетлѣ́ннаѧ.
Бг҃оро́диченъ: Ро́дъ сп҃се́сѧ, дв҃о, человѣ́ческїй бл҃года́тїю ѡ҆бнища́вшагѡ пло́тїю, и҆з̾ чре́ва твоегѡ̀ неизрече́ннѡ: тѣ́мже чти́мъ тѧ̀, и҆ бл҃гоче́стнѡ ᲂу҆бл҃жа́емъ, пречⷭ҇таѧ дв҃о бг҃ора́дованнаѧ.
Сѣда́ленъ, гла́съ д҃.
Подо́бенъ: Вознесы́йсѧ на крⷭ҇тъ:
Красота́ми ꙗ҆ви́ласѧ є҆сѝ дѣ́вственнѡ преꙋкраша́ема, по́стническихъ сщ҃е́нныхъ пѡ́двигъ, ꙗ҆́кѡ невѣ́ста непоро́чнаѧ дв҃а хрⷭ҇то́ва: и҆ съ ни́мъ въ нетлѣ́нный вошла̀ є҆сѝ черто́гъ и҆ красо́тъ є҆гѡ̀ наслажда́ешисѧ, но молѝ сп҃сти́сѧ на́мъ ѿ всѧ́кїѧ бѣды̀, любо́вїю пою́щымъ тѧ̀.
Сла́ва, и҆ ны́нѣ, бг҃оро́диченъ:
Чтⷭ҇аѧ всенепоро́чнаѧ, и҆ неискꙋсобра́чнаѧ, є҆ди́на безлѣ́тнаго сн҃а и҆ сло́во бж҃їе въ лѣ́тѣ ро́ждшаѧ: того̀ со ст҃ы́ми и҆ честны́ми а҆пⷭ҇лы, мч҃нки и҆ прⷪ҇ро́ки, и҆ прпⷣбными молѝ, дарова́ти на́мъ ѻ҆чище́нїе, и҆ ве́лїю млⷭ҇ть.
Крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же бл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃.
І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Свѣ́тлое твоѐ торжество̀, свѣ́томъ сїѧ́ющее бж҃їѧ дх҃а, ѡ҆зарѧ́етъ дꙋ́шы на́шѧ вѣ́рою пою́щихъ тѧ̀, и҆́мⷬ҇къ, прпⷣбнаѧ.
<<рк҃ѕ ѡ҆б.: 252>>
Чꙋдесы̀ бж҃е́ственными ᲂу҆вѣ́рила є҆сѝ невѣ́дꙋщихъ влⷣкꙋ, и҆ къ позна́нїю є҆гѡ̀ возврати́ла є҆сѝ, пре́лести тьмꙋ̀ ѡ҆ста́вльшихъ.
Да́ры хрⷭ҇тꙋ̀ принесла̀ є҆сѝ, чи́стое ᲂу҆мерщвле́нїе ᲂу҆дѡ́въ, и҆ трꙋды̀ воздержа́нїѧ: и҆ проти́вꙋ прїѧ́ла є҆сѝ нбⷭ҇ное црⷭ҇тво, и҆́мⷬ҇къ, и҆ вѣ́чнꙋющее наслажде́нїе.
Бг҃оро́диченъ: Смири́вши спаси́ мѧ, высокомꙋ́дрїемъ живꙋ́щаго, ро́ждшаѧ возне́сшаго смири́вшеесѧ є҆стество̀ на́ше пречⷭ҇таѧ.
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ бо тебѐ и҆но́гѡ не вѣ́мы.
Рꙋ́цѣ твоѝ прпⷣбнѡ воздвиза́еми къ зижди́телю, ма́ти, и҆́мⷬ҇къ, низложи́ша вра̑жїѧ шата̑нїѧ.
Оу҆держа́въ рꙋ́кꙋ твою̀ деснꙋ́ю вы́шнїй, наста́вилъ тѧ̀ є҆́сть ма́ти, къ нбⷭ҇номꙋ своемꙋ̀ наслажде́нїю.
Стезю̀ тѣ́снꙋю проше́дши въ поще́нїи, къ широтѣ̀ приспѣ́ла є҆сѝ ра́йстѣй, и҆́мⷬ҇къ, всечⷭ҇тна́ѧ.
Бг҃оро́диченъ: И҆̀же бцⷣꙋ тѧ̀ невѣ́дꙋщїи бг҃омт҃и, свѣ́та не и҆́мꙋтъ ви́дѣти, ро́ждшагосѧ и҆з̾ тебѐ пречⷭ҇таѧ.
Пѣ́снь ѕ҃.
І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Оу҆мертви́вши двиза̑нїѧ плѡтска́ѧ, над̾ страстьмѝ вельмѝ воцари́ласѧ є҆сѝ, и҆ ны́нѣ всечⷭ҇тна́ѧ, и҆́мⷬ҇къ, въ безстра́стныхъ живе́ши свѣ́тлостехъ.
Ѡ҆́бразꙋ сп҃совꙋ навы́кла є҆сѝ покланѧ́тисѧ сла́внаѧ, дѣ́лы и҆ словесы̀ твои́ми сп҃си́тєльнаѧ є҆гѡ̀ соблюда́ющи ᲂу҆чє́нїѧ.
Ѻ҆́блакъ тѧ̀ хрⷭ҇то́съ показа̀ ма́ти, и҆́мⷬ҇къ, до́ждь и҆сточа́ющїй живо́тный, вѣ́рою просѧ́щымъ ᲂу҆ тебѐ пресла́внаѧ.
Красе́нъ па́че всѣ́хъ человѣ́къ, сн҃ъ тво́й пречⷭ҇таѧ, добро́тою бж҃ества̀, а҆́ще и҆ пло́ть бы́сть на́съ ра́ди.
<<рк҃з: 253>>
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Подо́бенъ: Бл҃года́ть прїе́мше:
За любо́вь гдⷭ҇ню прпⷣбнаѧ, поко́ѧ жела́нїе возненави́дѣла є҆сѝ, поще́нїемъ дꙋ́хъ тво́й просвѣти́вши, крѣ́пкѡ бо ѕвѣ́ри побѣди́ла є҆сѝ: но мл҃твами твои́ми проти́вныхъ шата́нїе разорѝ.
І҆́косъ: Стрꙋи̑ мнѣ̀ сло́ва да́ждь бж҃е мо́й, и҆ и҆сто́чникъ бл҃гочи́нїѧ сотворѝ мо́й ᲂу҆́мъ, и҆ бл҃гословѝ ѧ҆зы́къ мо́й, да воспою̀ твою̀ а҆́гницꙋ, ю҆́же вѣнча́лъ є҆сѝ ты̀ бл҃гостїю твое́ю: а҆́ще бо са́мъ не да́си мѝ сло́ва досто́йнагѡ, ка́кѡ принесꙋ̀ да́ръ ни́щїй, бога́тнѣй въ словесѣ́хъ и҆ дѣѧ́нїихъ; тѣ́мъ пода́ждь мѝ си́лꙋ, и҆сповѣ́дати є҆ѧ̀ натрижнє́нїѧ, крѣ́пкѡ бо ѕвѣ́ри побѣди́ла є҆́сть: по мл҃твами є҆ѧ̀ проти́вныхъ шата́нїе разорѝ.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е, во вѣ́ки.
Ѡ҆ добро́тѣ тлѣ́ющей, и҆́мⷬ҇къ, прпⷣбнаѧ небрегла̀ є҆сѝ, смотрѧ́ющи та́мѡ сꙋ̑щаѧ воздаѧ̑нїѧ и҆ свѣ́тъ, и҆ сла́вꙋ бж҃їю нестарѣ́ющꙋюсѧ и҆ красотꙋ̀, и҆ бж҃е́ственное селе́нїе.
Мі́ръ премѣни́ла є҆сѝ тлѣ́ющїй премі́рнымъ живото́мъ нестарѣ́ющимъ, и҆ вре́меннꙋю пи́щꙋ пребыва́ющимъ сꙋщество́мъ, и҆ плотски́мъ ѡ҆брꙋ́чникомъ, нбⷭ҇наго жениха̀.
Ра́зꙋмъ бг҃олюби́въ стѧжа́ла є҆сѝ, и҆́мⷬ҇къ, съ пло́тїю а҆́гг҃лѡмъ ᲂу҆подо́биласѧ є҆сѝ, бдѧ́щи те́плѣ любо́вїю, и҆ пою́щи: бл҃гослове́нъ є҆сѝ гдⷭ҇и бж҃е во вѣ́ки.
Бг҃оро́диченъ: Ви́ждь ско́рбь мою̀ дв҃о, ю҆́же мѝ наведѐ мно́жество ѕѡ́лъ мои́хъ, и҆ родства̀ ѻ҆́гненнагѡ и҆схити́ мѧ, вопїю́щаго: бл҃гослове́нъ є҆сѝ гдⷭ҇и бж҃е во вѣ́ки.
Пѣ́снь и҃.
І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те дѣ́ла гдⷭ҇нѧ гдⷭ҇а.
<<рк҃з ѡ҆б.: 254>>
Оу҆кра́шена сїѧ́нїемъ чистоты̀, и҆ чи́стымъ житїе́мъ просвѣще́на ма́ти, предстои́ши женихꙋ̀ твоемꙋ̀ хрⷭ҇тꙋ̀ бг҃ꙋ на́шемꙋ.
Болѣ̑зни разли̑чныѧ ᲂу҆врачꙋ́етъ человѣ́кѡвъ, и҆ прого́нитъ бѣсѡ́вскїѧ па́кѡсти, тѣ́ло твоѐ ст҃о́е прпⷣбнаѧ, во гро́бѣ пресла́внѡ сокрыва́емое.
Сщ҃е́нна же́ртва принесла́сѧ є҆сѝ, и҆ приноше́нїе свѣ́тлое прпⷣбнаѧ ма́ти, на́съ ꙗ҆́кѡ кади́ло бл҃гоꙋха́нное, всѣ́хъ влⷣцѣ хрⷭ҇тꙋ̀ бг҃ꙋ на́шемꙋ.
Бг҃оро́диченъ: Без̾ нетлѣ́нїѧ сло́ва па́че словесѐ родила̀ є҆сѝ, тлѣ́нїѧ всѧ́кагѡ на́съ и҆збавлѧ́ющаго: сегѡ̀ ра́ди тѧ̀ дв҃о, вѣ́рою велича́емъ.
Пѣ́снь ѳ҃.
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ.
Возжелѣ́ла є҆сѝ добро́тꙋ мы́сленнꙋю жениха̀, и҆ чи́стѡ возлюби́ла є҆сѝ є҆го̀, гдѣ̀ почива́еши; гдѣ́ ли пасе́ши; те́плѣ вопїѧ́ла є҆сѝ: да почі́ю ᲂу҆ тебѐ, и҆ въ твои́хъ свѣ́тлостехъ наслаждꙋ́сѧ, велича́ющи твою̀ бл҃гость.
Ра́зꙋмъ и҆мѣ́ла є҆сѝ въ твое́й дꙋшѝ, и҆ смире́нїе, и҆ бж҃е́ственнꙋю кро́тость, вѣ́рꙋ несꙋмнѣ́ннꙋ, и҆ наде́ждꙋ и҆ любо́вь, ю҆́же къ бг҃ꙋ: всено́щными мл҃твами приближа́ющисѧ є҆мꙋ̀, и҆ та́мѡ сꙋ́щими свѣтлостьмѝ бл҃же́ннаѧ, и҆́мⷬ҇къ, ѡ҆зарѧ́ема и҆ просвѣща́ема.
Собра́шасѧ дне́сь лю́дїе, хвала́ми возвели́чити гдⷭ҇а, возвели́чившаго твоѐ ст҃о́е торжество̀ сїѐ: въ не́мже помина́й на́съ помина́ющихъ тѧ̀, предстоѧ́щи хрⷭ҇тꙋ̀ женихꙋ̀ твоемꙋ̀, прпⷣбнаѧ, и҆́мⷬ҇къ, и҆ всечⷭ҇тна́ѧ.
Бг҃оро́диченъ: Пощади́ мѧ бж҃е, рожде́йсѧ ѿ дв҃ы, и҆ сохрани́въ ро́ждшꙋю тѧ̀ нетлѣ́ннꙋ по ржⷭ҇твѣ̀, є҆гда̀ сѧ́деши сꙋди́ти дѣла̀ моѧ̑, беззакѡ́нїѧ и҆ грѣхѝ моѧ̑ пре́зри, ꙗ҆́кѡ безгрѣ́шенъ и҆ млⷭ҇тивъ бг҃ъ, и҆ чл҃вѣколю́бецъ.
<<рк҃и: 255>>
Свѣти́ленъ:
Кнѧ́зѧ ᲂу҆таи́вшисѧ стꙋда̀, и҆ сего̀ въ премꙋ́дростнѣмъ ѡ҆́бразѣ показа̀ безꙋ́мна, дв҃а сꙋ́щи дꙋше́ю и҆ тѣ́ломъ, была̀ є҆сѝ мꙋ́жъ ра́зꙋмомъ и҆ вѣ́рою, и҆́мⷬ҇къ, прпⷣбнаѧ, дѣ́вственникѡвъ добро́та, чернори́зицъ ᲂу҆краше́нїе.
Бг҃оро́диченъ: Де́нь мнѣ̀ возсїѧ́й разꙋ́мнагѡ весе́лїѧ, ты́ бо є҆сѝ чтⷭ҇аѧ свѣ́тъ, и҆ живо́тъ сꙋ́щихъ во тьмѣ̀: хотѣ́нїю бо мощна̀ є҆сѝ, и҆ є҆́же твори́ти и҆́маши ꙗ҆́кѡ сꙋ́щи всѣ́хъ влⷣчца, и҆зба́ви всѣ́хъ ѿ бѣ́дъ, и҆ всѣ́хъ скорбѧ́щихъ ѿ собла̑знъ лꙋка́вагѡ.
На хвали́техъ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Пло́ти и҆гра̑нїѧ ꙳ по́стными по́двиги, ꙳ дꙋшѝ любоче́стнѣ покори́ла є҆сѝ, ꙳ и҆ хрⷭ҇тꙋ̀ послѣ́довала є҆сѝ, ꙳ и҆ посредѣ̀ по́стницъ всели́ласѧ є҆сѝ всеговѣ́йнѡ, и҆́мⷬ҇къ, ꙳ ᲂу҆гаша́ющи распалє́нїѧ сластна̑ѧ ꙳ бж҃е́ственными тꙋ́чами сле́зъ, ꙳ ѕѣ́льнѣйшее жела́нїе ꙳ къ зижди́телю возжига́ющи. [Два́жды.]
Сщ҃е́нное жили́ще ꙳ во мно́гихъ по́льзꙋ бг҃ꙋ воздви́гла є҆сѝ, ꙳ бы́вши хра́мъ ст҃а́гѡ дх҃а всемꙋ́драѧ, ꙳ чистото́ю дꙋше́вною, ꙳ и҆ пꙋтево́дствила є҆сѝ дꙋ́шы къ поле́знымъ подвигѡ́мъ пѡ́стнымъ, ꙳ и҆ принесла̀ є҆сѝ сїѧ̑ ꙗ҆́коже вѣ́но сп҃се́ны, ѽ и҆́мⷬ҇къ, влⷣцѣ. ꙳ съ ни́миже вѣ́рою тѧ̀ почита́емъ.
Ѻ҆трокѡви́цы возлюби́ша ꙳ невѣ́стника и҆ гдⷭ҇а, ꙳ ᲂу҆че́нїю твоемꙋ̀ покарѧ́ющыѧсѧ: ꙳ и҆ плотскꙋ́ю презрѣ́вше сла́бость въ дꙋ́сѣ, ꙳ ᲂу҆се́рдїемъ стра̑сти ꙳ бл҃гоче́стнѡ ᲂу҆держа́ша: ꙳ и҆ введо́шасѧ съ тобо́ю, ѽ и҆́мⷬ҇къ, ꙳ въ черто́гъ нбⷭ҇ный и҆ бж҃е́ственный, ꙳ всегда̀ веселѧ́щесѧ.
Сла́ва, гла́съ и҃.
Ѽ пресла́внагѡ чꙋдесѐ! ꙗ҆́кѡ ᲂу҆се́рднѡ себѐ бг҃ꙋ возложи́ла є҆сѝ по́стными болѣ́зньми, и҆ по́стническими слеза́ми, бж҃е́ственнꙋю любо́вь и҆спо́лнила є҆сѝ, и҆ плѡтскі́ѧ стра̑сти побѣди́ла є҆сѝ, и҆ попра́ла є҆сѝ воздержа́нїемъ де́моны, и҆ была̀ є҆сѝ невѣ́ста вседержи́телю.
<<рк҃и ѡ҆б.: 256>>
И҆ ны́нѣ, бг҃оро́диченъ:
А҆рха́гг҃ла гаврїи́ла гла́съ воспрїи́мше, рце́мъ: ра́дꙋйсѧ, мт҃и бж҃їѧ, ꙗ҆́же жизнода́вца хрⷭ҇та̀ мі́рꙋ ро́ждши.
Крⷭ҇тобг҃оро́диченъ: Пречⷭ҇таѧ ꙗ҆́кѡ ви́дѣ тѧ̀ пло́тїю ви́сѧща на дре́вѣ, се́рдцемъ разсѣда́шесѧ, и҆ вопїѧ́ше слезѧ́щи: сло́ве, ка́кѡ заше́лъ є҆сѝ прелюби́мый і҆и҃се сн҃е мо́й и҆ гдⷭ҇и; не ѡ҆ста́ви менѐ є҆ди́нꙋ хрⷭ҇тѐ, тебѐ ро́ждшꙋю.
А҆́ще и҆́мать Сла́вꙋ на стїхо́внѣ, глаго́ли вече́рнїй:
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.