Слꙋ́жба мч҃нцамъ
<<ри҃і: 235>>
[глⷡ҇а к҃а] СЛꙊ́ЖБА Ѻ҆́БЩА
мч҃нцамъ, двѣма̀ и҆ мнѡ́гимъ.
Ве́чера,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Дѣ̑вы ѻ҆трокѡви́цы, ꙳ є҆сте́ственнымъ зако́номъ свѧзꙋ́емы, ꙳ и҆ и҆звѣ́стнѡ ᲂу҆крѣплѧ́емы любо́вїю зижди́телевою ꙳ сою̑зъ тѣле́сныхъ разрѣши́шасѧ вѣ́рою, ꙳ и҆ немощна́го врага̀, ꙳ мꙋ́жески нога́ма свои́ма сокрꙋши́ша, ꙳ и҆ побѣ́дною по́честїю свѣтоза́рнѡ ᲂу҆краси́шасѧ, и҆ въ невѣ́стницѣ все́льшесѧ мы́сленнѣмъ ра́дꙋютсѧ.
Ѻ҆́гнь претерпѣ́ша, ꙳ и҆ многоѡбра́зныѧ мꙋ̑ки и҆ смє́рти, всечⷭ҇тні́и, ꙳ женихо́вꙋ добро́тꙋ прекра́снꙋю ꙳ вѣ́рою и҆мꙋ́ще, ꙳ и҆ разли́чными ра́нами ᲂу҆краси́вшесѧ, ꙳ семꙋ̀ причто́шасѧ ꙳ тѣ́мже вѣнча̀ и҆̀хъ мно́гими дарова́ньми, ꙳ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ.
Дѣ́вство нетлѣ́нное, ꙳ дѣ́вство преди́вное, ꙳ хрⷭ҇тꙋ̀ принесо́сте дѡ́брыѧ дѣ̑вы, ꙳ низложи́вше шата̑нїѧ ꙳ пре́лести безбо́жїѧ ꙳ си́лою крⷭ҇тною, мꙋ́жескимъ ᲂу҆мо́мъ, ꙳ сегѡ̀ ра́ди всѧ̑ хрⷭ҇тѡ́вы цр҃кви пра́зднꙋютъ ꙳ ст҃ꙋ́ю ва́шꙋ па́мѧть, ꙳ свѣтоно́снꙋю и҆ пресла́внꙋю.
Сла́ва, и҆ ны́нѣ, бг҃оро́диченъ:
Ꙗ҆́кѡ мл҃твꙋ неꙋсыпа́ющꙋю, и҆ мольбꙋ̀ пребыва́ющꙋю и҆мꙋ́щи пречⷭ҇таѧ ко гдⷭ҇ꙋ, напа̑сти ᲂу҆спѝ, и҆ по́лны ᲂу҆кротѝ ѻ҆каѧ́нныѧ моеѧ̀ дꙋшѝ, и҆ въ ско́рби сꙋ́щее се́рдце моѐ ᲂу҆тѣ́ши ѻ҆трокови́це, молю́ тѧ: и҆ ᲂу҆́мъ мо́й ѡ҆бл҃годатѝ, ꙗ҆́кѡ да досто́йнѡ просла́влю тѧ̀.
<<ри҃і ѡ҆б.: 236>>
Крⷭ҇тобг҃оро́диченъ: А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ а҆́гница ро́ждшаѧ рыда́ше, и҆ мт҃рски тебѣ̀ вѣща́ше: сн҃е вожделѣ́ннѣйше, ка́кѡ на дре́вѣ крⷭ҇тнѣмъ повѣ́шенъ є҆сѝ долготерпѣли́ве; ка́кѡ рꙋ́цѣ твоѝ и҆ но́зѣ твоѝ, сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ, влⷣко;
А҆́ще и҆́мать самогла́сенъ. Сла́ва, гла́съ и҃:
Всѧ́къ ѧ҆зы́къ да подви́жетсѧ ко бл҃гохвале́нїю прехва́льныхъ мч҃нцъ, всѧ́къ ро́дъ и҆ во́зрастъ, всѝ ю҆́ношы и҆ дѣ̑вы, хрⷭ҇тѡ́вы великомч҃нцы хвала́ми вѣнча́имъ: зако́ннѡ бо хра́брствовавше, и҆ сла́бость же́нскꙋю ѿве́ргше, мꙋчи́телѧ врага̀ низложи́ша, стрⷭ҇тоте́рпческихъ ра́ди трꙋдѡ́въ, нбⷭ҇ными бжⷭ҇твенными вѣнцы̀ ᲂу҆краси́вшесѧ, про́сѧтъ ᲂу҆ жениха̀ своегѡ̀ и҆ бг҃а дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ:
Влⷣчце, прїимѝ мл҃твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Крⷭ҇тобг҃оро́диченъ: Пречⷭ҇таѧ ꙗ҆́кѡ ᲂу҆зрѣ̀ тѧ̀ ꙳ пло́тїю ви́сѧща на дре́вѣ, ꙳ се́рдцемъ растерза́шесѧ, ꙳ и҆ вопїѧ́ше слезѧ́щи: ꙳ сло́ве, ка́мѡ заше́лъ є҆сѝ, ꙳ прелюбе́зный і҆и҃се сн҃е мо́й гдⷭ҇и; ꙳ не ѡ҆ста́ви менѐ є҆ди́нꙋ ꙳ хрⷭ҇тѐ, ро́ждшꙋю тѧ̀.
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ г҃ мч҃нчєскаѧ, [пи̑сана въ концѣ̀ кни́ги сеѧ̀].
На стїхо́внѣ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Серде́чнагѡ раче́нїѧ, ꙳ любвѝ бжⷭ҇твеннѣй, ꙳ и҆ страда́нїѧ соедине́нїю ва́шемꙋ бл҃же́ннїи, ꙳ ли́цы а҆́гг҃льстїи и҆звѣ́стнѡ ᲂу҆диви́шасѧ: ꙳ ка́кѡ мꙋ́жескими сплетє́нїи ꙳ врага̀ неви́димаго низложи́вше, ꙳ побѣ́дныѧ вѣнцы̀, ꙳ досто́йнѡ ѿ дла́ни живоно́сныѧ, ꙗ҆́вственнѡ прїѧ́сте.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
По хрⷭ҇тѣ̀ скончава́еми, разжже́ннымъ мꙋдрова́нїемъ, ꙳ <<рѳ҃і: 237>> пла́мень погаси́сте сꙋ́етный, ꙳ и҆ свѣщꙋ̀ дꙋше́внꙋю ꙳ негаси́мꙋ соблю́дше, ꙳ совнидо́сте ко хрⷭ҇тꙋ̀ въ черто́гъ нбⷭ҇ный: ꙳ тѣ́мъ всѝ бл҃гоче́стнѡ воспѣва́емъ стрⷭ҇тотє́рпицы, ꙳ ст҃ꙋ́ю ва́шꙋ па́мѧть, ѡ҆сщ҃а́еми бл҃года́тїю.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Стрⷭ҇ти претерпѣ́ша, ꙳ мно́гихъ мꙋ́къ всехва́льнїи, ꙳ крѣ́пкѡ пристꙋ́пльше: ꙳ ѿсю́дꙋ къ неболѣ́зненномꙋ преста́вистесѧ воспрїѧ́тїю ꙳ незаходи́магѡ сїѧ́нїѧ, и҆ свѣ́тлѣй ра́дости, ꙳ и҆ вѣ́чномꙋ бжⷭ҇твенномꙋ наслажде́нїю, ꙳ тѣ́мъ ва́съ ᲂу҆бл҃жа́емъ, ꙳ и҆ ст҃о́е ва́ше дне́сь соверша́емъ торжество̀, ꙳ стрⷭ҇тотє́рпицы бг҃опости́жнїи.
Сла́ва, гла́съ д҃:
Житїѧ̀ до́лꙋ влекꙋ́щагѡ, и҆ пи́щи наслажде́нїе, и҆ цвѣтꙋ́щꙋю сла́вꙋ, прехва́льнїи ѡ҆ста́вльше ꙗ҆́кѡ вре́меннꙋ, хрⷭ҇тꙋ́ же прилѣпи́стесѧ мꙋче́нїемъ, добро́тою є҆гѡ̀ кра́сною распала́еми, и҆ пристꙋпи́сте ꙗ҆́кѡ бл҃гоꙋха́ннїи ши́пцы, и҆ вѣнце́мъ нетлѣ́ннагѡ црⷭ҇тва вѣнча́стесѧ, бг҃оимени́тїи.
И҆ ны́нѣ, бг҃оро́диченъ:
Свѣщѐ неꙋгаси́маѧ, прⷭ҇то́ле првⷣный, пречⷭ҇таѧ влⷣчце, молѝ сп҃сти́сѧ дꙋша́мъ на́шымъ.
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, пречⷭ҇таѧ ꙳ хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀ вселюбе́знѣйше; ꙳ дивлю́сѧ бл҃гоꙋтро́бне, твоемꙋ̀ во́льномꙋ распѧ́тїю.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ а҃:
А҆́гницы словє́сныѧ а҆́гнцꙋ и҆ па́стырю приведо́стесѧ мꙋче́нїемъ ко хрⷭ҇тꙋ̀ тече́нїе сконча́вше, и҆ вѣ́рꙋ соблю́дше: тѣ́мже дне́сь ра́достною дꙋше́ю соверша́емъ досточꙋ́днїи ст҃ꙋ́ю ва́шꙋ па́мѧть, хрⷭ҇та̀ велича́юще.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<рѳ҃і ѡ҆б.: 238>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ г҃.
Подо́бенъ: Гро́бъ тво́й:
Ѻ҆гне́мъ распала́еми бжⷭ҇твеннагѡ жела́нїѧ, ѻ҆гнѧ̀ чꙋ́вственнагѡ прикоснове́нїемъ ѿню́дъ не ѡ҆пали́стесѧ бл҃же́ннїи: пре́лесть же пожго́сте, и҆ влеко́ми неми́лостивнѡ стрⷭ҇тотє́рпицы приснопа́мѧтнїи, прїѧ́сте коне́цъ, и҆ сла́вꙋ полꙋчи́сте. [Два́жды.]
Сла́ва, и҆ ны́нѣ, бг҃оро́диченъ:
Наста́ви ны̀ на пꙋ́ть покаѧ́нїѧ ᲂу҆клонѧ́ющыѧсѧ при́снѡ къ ѕлы̑мъ безпꙋ́тїемъ, и҆ пребл҃га́го прогнѣ́вающыѧ гдⷭ҇а, неискꙋсобра́чнаѧ, бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе ѡ҆бита́лище.
По в҃-мъ стїхосло́вїи сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Оу҆диви́шасѧ ва́шемꙋ терпѣ́нїю мно́гомꙋ, нбⷭ҇нїи ли́цы безпло́тныхъ си́лъ: ꙗ҆́коже бо и҆но́мꙋ стра́ждꙋщꙋ пребыва́сте, го́лєни и҆ соста́вы сокрꙋша́емы, сме́рть го́рькꙋю терпѧ́ще, и҆ же́нскимъ тѣ́ломъ ѕмі́ѧ ѿстꙋ́пника сокрꙋша́юще, дѣ̑вы невѣ̑сты жизнода́вца, вѣ́ры побо́рницы. [Два́жды.]
Сла́ва, и҆ ны́нѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе: кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
По Хвали́те и҆́мѧ гдⷭ҇не:
Припѣ́въ:
Велича́емъ ва́съ стрⷭ҇тотє́рпицы ст҃ы̑ѧ, и҆ чте́мъ чтⷭ҇на̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ.
Ѱало́мъ и҆збра́нный: Бг҃ъ на́мъ прибѣ́жище и҆ си́ла:
<<р҃к: 239>>
По полѷеле́и, сѣда́ленъ, гла́съ и҃:
Подо́бенъ: Премꙋ́дрости:
Оу҆невѣ́стившесѧ гдⷭ҇ви бг҃олѣ́пнѡ ꙗ҆́коже да́ръ кро́вь и҆ заколе́нїе томꙋ̀ принесо́сте, стрⷭ҇тонѡ́сицы ѻ҆трокови̑цы, и҆ черто́гъ бжⷭ҇твенный досто́йнѡ ᲂу҆лꙋчи́сте, просвѣще́нїѧ неизрече́ннагѡ непреста́ннѡ и҆сполнѧ́еми. тѣ́мже ст҃ꙋ́ю и҆ чтⷭ҇нꙋ́ю ва́шꙋ па́мѧть творѧ́ще дх҃о́внѡ, сп҃са прославлѧ́емъ, и҆ вѣ́рнѡ взыва́емъ: моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Безпло́тныхъ твои́хъ, хрⷭ҇тѐ, и҆ прⷣте́чи твоегѡ̀, а҆пⷭ҇лъ, и҆ прⷪ҇рѡ́къ, и҆ мч҃нкъ, и҆ всѣ́хъ ст҃ы́хъ, и҆ бцⷣы мл҃твами неискꙋсомꙋ́жныѧ и҆ бл҃гі́ѧ мт҃ре твоеѧ̀, ᲂу҆моле́нъ бы́въ, да́ждь на́мъ во свѣ́тѣ твое́мъ ходи́ти, и҆ сподо́би на́съ ᲂу҆лꙋчи́ти црⷭ҇твїе твоѐ, за млⷭ҇рдїе млⷭ҇ти твоеѧ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Сті́хъ: Въ цр҃квахъ бл҃гослови́те бг҃а, гдⷭ҇а ѿ и҆стѡ́чникъ і҆и҃левыхъ.
Всѧ́кое дыха́нїе:
Є҆ѵⷢ҇лїе мч҃нцамъ, [пи́сано въ концѣ̀ кни́ги сеѧ̀].
По н҃-мъ ѱалмѣ̀ стїхи́ра, гла́съ д҃:
Житїѧ̀ до́лꙋ влекꙋ́щагѡ: [Пи́сана на стїхо́внѣ. Сла́ва.]
Канѡ́нъ, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Крѣ́пкѡ на проти́внаго подвиза́стесѧ мч҃нцы, поще́нїемъ пе́рвѣе, та́же второ́е кро́вными страда̑нїи: сегѡ̀ ра́ди ва́шꙋ па́мѧть вѣ́рою почита́емъ.
Оу҆ѧзви́вшесѧ жела́нїемъ претерпѣ́вшагѡ на́съ ра́ди крⷭ҇тъ и҆ сме́рть, сегѡ̀ стопа́мъ послѣ́доваша прпⷣбныѧ мч҃нцы, плотскꙋ́ю не́мощь забы́вше.
<<р҃к ѡ҆б.: 240>>
Є҆́ллинскаѧ жє́ртвища, и҆ бѣсѡ́вскаѧ ѡ҆полчє́нїѧ, ѻ҆рꙋ́жїемъ страда́нїѧ низверго́сте, и҆ принесо́стесѧ въ цр҃ковь нбⷭ҇нꙋю, всесожжє́нїѧ ѡ҆дꙋшевлє́ннаѧ, мч҃нцы пречⷭ҇тны̑ѧ.
Бг҃оро́диченъ: Оу҆крѣпи́вшесѧ бл҃года́тїю возсїѧ́вшагѡ пренепоро́чнаѧ, и҆з̾ ложе́снъ твои́хъ, дѣ̑вы ѻ҆трокови̑цы прирази́шасѧ къ болѣ́знемъ мꙋче́нїѧ, и҆ приведо́шасѧ во слѣ́дъ тебѐ ра́дꙋющесѧ.
Пѣ́снь г҃.
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Си́лою крѣ́пкою ѿ бг҃а ᲂу҆крѣплѧ́еми, проти́внагѡ борца̀ попра́ша си́лꙋ: и҆ сегѡ̀ ра́ди ꙗ҆́кѡ побѣдонѡ́сицы непобѣди́мїи просла́вишасѧ.
Ꙗ҆ви́шасѧ ѕвѣри̑на зїѧ̑нїѧ бездѣ̑льна, бж҃е́ственною си́лою хрⷭ҇то́вою: и҆ и҆зба́влены бы́сте бг҃омꙋ́дрїи неврежде́ны, бг҃а прославлѧ́юще.
Мꙋ́дростїю и҆ бл҃года́тїю просвѣ́щьсѧ ᲂу҆́мъ ва́шъ, мꙋчи́телей преще́нїѧ не ᲂу҆страши́стесѧ стрⷭ҇тотє́рпицы сп҃совы, бж҃їею си́лою ᲂу҆крѣплѧ́еми.
Бг҃оро́диченъ: Разꙋмѣ́вше бл҃говѣ́рнѡ, проповѣ́даемъ тебѐ и҆́стиннꙋю бж҃їю мт҃рь всенепоро́чнꙋю: тобо́ю бо съ на́ми зижди́тель совокꙋпи́тисѧ и҆зво́ли.
Сѣда́ленъ, гла́съ а҃.
Чꙋде́съ ва́съ и҆сто́чники стѧжа́вше, почерпа́емъ здра́вїе ѻ҆би́льнѡ, мч҃нцы прехва́льнїи, пою́ще болѣ̑зни ва́шѧ, и҆ ре́вность бжⷭ҇твеннꙋю, и҆ ꙗ҆́звы до́блествєнныѧ и҆ по́двиги: и҆ соверша́емъ ва́шꙋ досточꙋ́днꙋю па́мѧть въ сла́вꙋ бг҃а на́шегѡ.
Сла́ва, и҆ ны́нѣ, бг҃оро́диченъ:
Мл҃твы твои́хъ ра̑бъ прїимѝ, бцⷣе, и҆ и҆зба́ви на́съ ѿ всѧ́кїѧ бѣды̀: ꙗ҆́кѡ родила̀ є҆сѝ хрⷭ҇та̀ сп҃са, и҆зба́вителѧ дꙋ́шъ на́шихъ.
Крⷭ҇тобг҃оро́диченъ: Твоѐ предста́тельство и҆мꙋ́ще, пречⷭ҇таѧ, и҆ твои́ми мл҃твами лю́тыхъ и҆збавлѧ́еми, крⷭ҇то́мъ сн҃а твоегѡ̀ вездѣ̀ соблюда́еми, по до́лгꙋ тѧ̀ всѝ бл҃гоче́стнѡ велича́емъ.
<<рк҃а: 241>>
Пѣ́снь д҃.
І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Претерпѣ́вше мꙋчє́нїѧ, и҆ ра̑ны тѣлє́сныѧ, разли́чными ѡ҆́бразы, сокрꙋше́нїе же ᲂу҆дѡ́въ, и҆ ѡ҆палє́нїѧ, нбⷭ҇наѧ селє́нїѧ наслѣ́довасте, насла́ждшесѧ дре́ва живо́тнагѡ досточꙋ́днїи.
Мч҃нцъ бл҃же́нныхъ по́двигꙋ ᲂу҆диви́шасѧ нбⷭ҇ныѧ си̑лы, ка́кѡ врага̀ побѣди́ша въ же́нстѣмъ є҆стествѣ̀, ᲂу҆крѣплѧ́еми си́лою ѿ дв҃ы возсїѧ́вшагѡ.
Ѿве́ргше мїрскꙋ́ю всю̀ сꙋетꙋ̀, бг҃ꙋ є҆ди́номꙋ все́ю дꙋше́ю прилѣпи́стесѧ. тѣ́мже по́стничєскїѧ трꙋды̀, и҆ мꙋчє́нїѧ претерпѣ́сте, невѣ̑сты хрⷭ҇то́вы терпѣли̑выѧ.
Бг҃оро́диченъ: Вни́де во чре́во твоѐ, пренепоро́чнаѧ, гдⷭ҇ь, ꙗ҆́кѡ до́ждь на рꙋно̀, ꙗ҆́коже речѐ прⷪ҇ро́къ дре́вле: є҆го́же во двою̀ сꙋщєствꙋ̀ родила̀ є҆сѝ. є҆мꙋ́же зове́мъ: сла́ва, хрⷭ҇тѐ, си́лѣ твое́й.
Пѣ́снь є҃.
І҆рмо́съ: Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ, но мы̀ тѧ̀ є҆диноро́дне, ѻ҆ч҃ескїѧ сла́вы сїѧ́нїе бж҃ества̀, ѿ но́щи ᲂу҆́тренююще, воспѣва́емъ тѧ̀ чл҃вѣколю́бче.
Ꙗ҆́кѡ а҆́гницы непорѡ́чныѧ, и҆ ꙗ҆́кѡ жє́ртвы прїѧ̑тныѧ, хрⷭ҇тꙋ̀ и҆́стинномꙋ па́стырю принесо́стесѧ, приношє́нїѧ совершє́на, и҆ прїѧ̑тна всесожжє́нїѧ.
Оу҆мертви́вшесѧ тѣ́ломъ, ѡ҆жи́сте дꙋше́ю, ᲂу҆мертви́вшемꙋ крѣ́пость сме́ртнꙋю мч҃нцы подо́бѧщесѧ, крⷭ҇тъ, и҆ сме́рть, и҆ стрⷭ҇ть во́льнꙋю претерпѣ́вшемꙋ.
Є҆ди́нъ и҆мꙋ́ще ра́зꙋмъ въ тѣлесѣ́хъ мно́зѣхъ, разли́чными ра́нами стрꙋ́жеми, и҆ ѻ҆гне́мъ сожига́еми, є҆ди́наго всѣ́хъ гдⷭ҇а і҆и҃са и҆сповѣ́дахꙋ бг҃омꙋ́дрїи.
Бг҃оро́диченъ: Воздви́гни мѧ̀ па́дшаго въ ро́вѣ страсте́й, и҆ ᲂу҆пра́ви мѧ̀ ꙗ҆́же бг҃а и҆ прави́телѧ ро́ждшаѧ, є҆ди́на всенепоро́чнаѧ, совокꙋпи́вшаго бл҃года́тїю разстоѧ́щыѧсѧ пе́рвѣе.
<<рк҃а ѡ҆б.: 242>>
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Раздраже́на и҆ нога́ми же́нскими ѕмі́ѧ попира́ема, зрѧ́щи прама́ти бж҃е́ственнѡ ра́дꙋетсѧ, тꙋ́ю ле́стїю и҆з̾ раѧ̀ и҆згна́вшаго пе́рвѣе.
Поще́нїе къ страда́нїю зако́нномꙋ сочта́вше, женихꙋ̀ дꙋше́вномꙋ ны́нѣ нетлѣ́ннѡ приложи́стесѧ: и҆ въ черто́зѣ нбⷭ҇нѣмъ весе́лою дш҃е́ю водворѧ́етесѧ.
Возвыша́емыѧ мꙋчи́тєльныѧ во́лны мч҃нчєскїѧ кораблѝ погрꙋзи́ти не возмого́ша: крѣ́пкою бо рꙋко́ю къ бж҃е́ственномꙋ приста́нищꙋ достиго́ша.
Бг҃оро́диченъ: Глагѡ́лъ твои́хъ сбытїѧ̑ зрѧ́ще, велича́емъ тѧ̀ вѧ́щше бг҃омт҃и, и҆ тебѐ возвели́чившаго: ро́дове бо всѝ тебѐ вои́стиннꙋ ны́нѣ ᲂу҆блажа́ютъ.
Конда́къ во ᲂу҆ста́вѣ.
А҆́ще нѣ́сть ᲂу҆ста́ва, глаго́ли се́й конда́къ, гла́съ д҃:
Подо́бенъ: Ꙗ҆ви́лсѧ є҆сѝ:
Стрⷭ҇тоте́рпицъ хрⷭ҇то́выхъ па́мѧть пра́зднꙋимъ, и҆ вѣ́рою просѧ́ще по́мощи, и҆зба́витисѧ всѣ̑мъ ѿ всѧ́кїѧ ско́рби, зовꙋ́ще: бг҃ъ на́шъ съ на́ми, и҆́же си́хъ просла́вивый, ꙗ҆́коже и҆зво́ли.
І҆́косъ: Чꙋде́съ ва́съ и҆сто́чники стѧжа́вше, почерпа́емъ здра́вїе ѻ҆би́льнѡ мч҃нцы хрⷭ҇то́вы, почита́юще бѡлѣ́зни ва́шѧ, и҆ ре́вность бжⷭ҇твеннꙋю, и҆ ꙗ҆́звы до́блествєнныѧ и҆ по́двиги, и҆ соверша́емъ ва́шꙋ досточꙋ́днꙋю па́мѧть, зовꙋ́ще: бг҃ъ на́шъ съ на́ми, и҆́же си́хъ просла́вивый, ꙗ҆́коже и҆зво́ли.
Пѣ́снь з҃.
І҆рмо́съ: Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.
И҆мꙋ́ще ѻ҆́чи сердє́чныѧ, ко сп҃са́ющемꙋ бг҃ꙋ же и҆ цр҃ю̀, а҆́гницы хрⷭ҇то́вы внидо́ша ко всѧ́ческимъ ѕлоко́зненнымъ <<рк҃в: 243>> полкѡ́мъ, и҆ побѣди́ша мꙋ́жески, вопїю́ще: бл҃гослове́нъ бг҃ъ ѻ҆тє́цъ на́шихъ.
Всѐ жела́нїе стѧжа́вше мч҃нцы, ко є҆ди́номꙋ влⷣцѣ, житє́йскїѧ красѡты̀ ꙗ҆́кѡ со́нъ вмѣни́сте, вопїю́ще: бл҃гослове́нъ бг҃ъ ѻ҆тє́цъ на́шихъ.
Да не ᲂу҆ны́емъ, сѐ ѿве́рзесѧ черто́гъ, но па́че ста́немъ мꙋ́жески: хрⷭ҇то́съ бо вѣнцы̀ простира́етъ, и҆ тѣле́съ свои́хъ не пощади́мъ, вопїѧ́хꙋ до́блїѧ мч҃нцы на сꙋди́щи.
Бг҃оро́диченъ: Бл҃гослове́нъ пло́дъ бл҃гослове́ннагѡ чре́ва твоегѡ̀ чⷭ҇таѧ: є҆го́же бл҃гословѧ́тъ нбⷭ҇ныѧ си̑лы и҆ чл҃вѣ́честїи собо́ри, и҆зба́вльшаго на́съ ѿ пе́рвыѧ клѧ́твы, бл҃гослове́ннаѧ.
Пѣ́снь и҃.
І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Во свѣ̑тлыѧ ѻ҆дє́жды себѐ кро́вїю мꙋче́нїѧ ѡ҆дѣ́ѧсте, совле́кшесѧ вои́стиннꙋ и҆стлѣ́вшагѡ грѣхѝ человѣ́ка, воспѣва́юще: гдⷭ҇а по́йте дѣла̀, и҆ превозноси́те є҆го̀ во вѣ́ки.
Бога́тагѡ свѣ́та свѣтоли̑тїи, со́лнца мы́сленнагѡ бжⷭ҇твенными свѣтлостьмѝ, мч҃нцы прехва́льнїи, но́щь преидо́сте безбо́жїѧ, пою́ще во є҆ди́нствѣ дꙋшѝ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Ꙗ҆́кѡ а҆́гницы, и҆ ꙗ҆́кѡ несквє́рныѧ ю҆́ницы, ꙗ҆́кѡ бж҃їѧ голꙋби̑цы, ꙗ҆́кѡ самово́льныѧ жє́ртвы, принесо́стесѧ мч҃нцы зижди́телю, ꙗ҆́кѡ же́ртва непоро́чнаѧ, согла́снѡ пою́ще: гдⷭ҇а по́йте дѣла̀, и҆ превозноси́те є҆го̀ во вѣ́ки.
Бг҃оро́диченъ: Во слѣ́дъ тебѐ теко́ша жєны̀ стрⷭ҇тотє́рпицы, мѵ́ра бл҃гоꙋха́ннагѡ жела́юще, пречⷭ҇таѧ бг҃оневѣ́сто, є҆ди́на неискꙋсобра́чнаѧ, возсїѧ́вшагѡ и҆з̾ чре́ва твоегѡ̀, є҆диноча́дагѡ твоегѡ̀ сн҃а, и҆ съ тобо́ю ца́рствꙋютъ вои́стиннꙋ пѣсносло́вѧще хрⷭ҇та̀ во вѣ́ки.
<<рк҃в ѡ҆б.: 244>>
Пѣ́снь ѳ҃.
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Подава́ютъ и҆сцѣле́нїѧ ка̑пли тре́бꙋющымъ, ꙗ҆́кѡ ѿ и҆сто́чника пресла̑вныѧ мч҃нцы, ᲂу҆толѧ́ютъ стра́сти болѣ́знєнныѧ, и҆ бѣсѡ́въ прогонѧ́ютъ полкѝ: сердца́ же бг҃олюби́выхъ напоѧ́ютъ на бл҃гопло́дїе бж҃їихъ дѣ́лъ.
Вознесо́стесѧ, крѣ́пость на врагѝ прїи́мше, и҆ а҆́гг҃лѡмъ ᲂу҆подо́бистесѧ, дре́ва живо́тнагѡ наслажда́етесѧ невозбра́ннѡ въ раѝ, бг҃оневѣ́стныѧ, и҆сто́чника до́брыхъ прїѧ́сте, ѡ҆ мі́рѣ молѧ́щесѧ.
Па́мѧть ва́шꙋ стрⷭ҇тотє́рпицы, бж҃е́ственными сїѧ́ющи свѣтови́дными бл҃года́тьми, помышле́нїе просвѣща́етъ похвалѧ́ющихъ ва́съ.
Бг҃оро́диченъ: Премꙋ́дрости селе́нїе, па́че ᲂу҆ма̀ лꙋ́чши показа́ласѧ є҆сѝ, дв҃о непоро́чнаѧ, ѡ҆дꙋшевле́нъ же прⷭ҇то́лъ и҆ две́рь: тѣ́мже ꙗ҆́кѡ цр҃и́цꙋ тѧ̀ жєны̀ возлюби́ша, дв҃ы во слѣ́дъ тебѐ приведо́шасѧ.
Свѣти́ленъ.
Ви́дѣти жела́юще добро́тꙋ жениха̀ всѣ́мъ ѡ҆́бразомъ, ма́нїемъ къ немꙋ̀ бг҃оно́снїи, безсме́ртїю поꙋчи́стесѧ въ ме́ртвеннѣмъ тѣлесѝ: тѣ́мъ досто́йнѡ ᲂу҆бл҃жа́етесѧ.
Бг҃оро́диченъ: Пощади́ мѧ, хрⷭ҇тѐ, є҆гда̀ хо́щеши мі́рꙋ сꙋди́ти со сла́вою, разорѝ мглꙋ̀ страсте́й мои́хъ, мл҃твами ро́ждшїѧ тѧ̀, и҆ честны́хъ мч҃нцъ твои́хъ, ꙗ҆́кѡ бл҃гъ и҆ многомлⷭ҇тивъ.
На хвали́техъ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Ѡ҆багрє́нїи кро́вными себѐ ᲂу҆краси́вше, ꙳ кра́сномꙋ добро́тою дѣ̑вы ѻ҆трокови̑цы ꙳ нетлѣ́ннѡ совокꙋпи́стесѧ, ꙳ хрⷭ҇тꙋ̀ бг҃ꙋ на́шемꙋ, ꙳ соблюда́ющемꙋ ва́ше дѣ́вство ꙳ нескве́рненно въ безсме́ртномъ нетлѣ́нїѧ невѣ́стницѣ, ꙳ во ѻ҆би́телѣхъ нбⷭ҇ныхъ, въ черто́зѣ нерꙋкотворе́ннѣмъ, мч҃нцы прехва́льнїи. [Два́жды.]
<<рк҃г: 245>>
Несоверше́нными ᲂу҆́бѡ тѣлесы̀, ꙳ и҆ соверше́ннымъ ᲂу҆мо́мъ, ꙳ ве́тхаго ѕмі́ѧ ѕлонача́льнаго побѣди́сте сла́внїи ꙳ си́лою дх҃а, ꙳ и҆ не́мощнꙋ тогѡ̀ крѣ́пость показа́сте, ꙳ тѣ́мъ воспрїѧ́сте вѣнцы̀ побѣ́ды, ꙳ мч҃нцы прехва́льнїи, ꙳ трⷪ҇цы побѡ́рницы.
И҆ на ᲂу҆́ды раздроблѧ́еми, ꙳ и҆ ѻ҆гне́мъ снѣда́еми, ꙳ и҆ желѣ́зными ногты̀ терза́еми, ꙳ и҆ на дре́вѣ повѣ́шаеми, ꙳ и҆ мече́мъ ссѣка́еми, не ѿверго́стесѧ хрⷭ҇та̀ стрⷭ҇тотє́рпицы прехва́льнїи. ꙳ тѣ́мже прїѧ́сте вѣне́цъ побѣ́ды, ꙳ вели́цыи мч҃нцы пребога́тїи, ꙳ трⷪ҇цы побѡ́рницы.
Сла́ва, гла́съ в҃:
Житїѐ нескве́рное пожи́вше, сꙋди́ще безбо́жное низложи́вше, ста́сте побѣ́дꙋ носѧ́ще честні́и, цвѣ́тъ носѧ́ще бж҃їю свѣ́тлость, и҆ въ бж҃їю си́лꙋ ѡ҆блече́ни, повелѣ́нїю мꙋчи́телевꙋ порꙋга́стесѧ, и҆ виті̑йскїѧ бꙋеслѡ́вныѧ глаго́лы ѡ҆плева́сте, мч҃нцы бг҃омꙋ́дрїи.
И҆ ны́нѣ, бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Крⷭ҇тобг҃оро́диченъ: Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ человѣ́ка во́лею влеко́ма, рыда́ющи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, тебѐ ро́ждшꙋю, что̀ сїѐ сотвори́лъ є҆сѝ и҆зба́вителю всѧ́ческихъ ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва кра́йнюю бл҃гость чл҃вѣколю́бче.
А҆́ще и҆́мать на стїхо́внѣ Сла́вꙋ, глаго́ли вече́рнїй.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.