Слꙋ́жба прпⷣбномч҃нкѡмъ
<<р҃з: 213>>
[глⷡ҇а ѳ҃і] СЛꙊ́ЖБА Ѻ҆́БЩА
прпⷣбномч҃нкѡмъ двѣма̀ и҆ мнѡ́гимъ.
Ве́черъ,
на Гдⷭ҇и воззва́хъ, стїхи̑ры, гла́съ и҃.
Подо́бенъ: Что̀ вы̀ нарече́мъ:
Вельмѝ подвиза́вшесѧ прпⷣбнїи, ꙳ мꙋчи́тєльскїѧ прило́ги претерпѣ́сте до́блественнѣ: ꙳ дш҃ы преда́сте мечє́мъ любо́вїю, ꙳ въ мч҃нчєскїѧ ѡ҆дѣ́ѧстесѧ вѣнцы̀: ꙳ а҆́гг҃лѡмъ сликꙋ́ете досто́йнѡ. ꙳ мнѡ́га ва̑ша терпѣ̑нїѧ, и҆ бѡ́льша дарѡва́нїѧ, ꙳ моли́тесѧ ѡ҆ дꙋша́хъ на́шихъ.
До́брѣ пожи́сте ст҃і́и, ꙳ мч҃нчєскимъ ᲂу҆подо́бльшесѧ по́двигѡмъ до́блїи: ꙳ вы́ бо ѡ҆ мꙋ́кахъ небрего́сте мꙋ́жески, ꙳ посто́мъ ѡ҆ст҃и́сте тѣлеса̀, ꙳ и҆ любо́вїю пролїѧ́сте крѡ́ви, ꙳ ꙗ҆́кѡ да вкꙋ́пѣ ѡ҆блече́тесѧ ꙳ въ вѣнцы̀ страда́нїй ва́шихъ, ꙳ моли́тесѧ сп҃сти́сѧ дꙋша́мъ на́шымъ.
Прпⷣбнїи мч҃нцы хрⷭ҇то́вы, ꙳ до́брѣ подвиза́стесѧ, ѡ҆ вре́меннѣмъ житїѝ небре́гше, ꙳ во́лею попра́вше плотскꙋ́ю мꙋ́дрость мꙋ́жески: ꙳ и҆ та́кѡ ѡ҆ хрⷭ҇тѣ̀ сконча́вшесѧ, ꙳ со а҆́гг҃лы водворѧ́етесѧ досто́йнѡ, ꙳ сегѡ̀ ра́ди ва́шꙋ па́мѧть чтꙋ́ще мо́лимъ: ꙳ моли́тесѧ гдⷭ҇ви, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
Комꙋ̀ ᲂу҆подо́биласѧ є҆сѝ ѻ҆каѧ́ннаѧ дꙋшѐ, къ покаѧ́нїю ника́коже возни́чꙋщи, и҆ ѻ҆гнѧ̀ не ᲂу҆жаса́ющисѧ ѕлы́хъ ѡ҆жида́ющагѡ; воста́ни, и҆ є҆ди́нꙋ къ застꙋпле́нїю ско́рꙋю призовѝ, и҆ возопі́й: дв҃о мт҃и, молѝ твоего̀ сн҃а и҆ бг҃а на́шего, и҆зба́вити мѧ̀ ѿ сѣ́ти льсти́вагѡ.
<<р҃з ѡ҆б.: 214>>
Крⷭ҇тобг҃оро́диченъ: А҆́гница а҆́гнца ꙗ҆́кѡ ви́дѣ на дре́вѣ просте́рта во́лею крⷭ҇тнѣмъ, вопїѧ́ше мт҃рски болѣ́знꙋющи съ пла́чемъ: сн҃е мо́й, что̀ стра́нное сїѐ видѣ́нїе; всѣ̑мъ жи́знь даѧ́й ꙗ҆́кѡ гдⷭ҇ь, ка́кѡ ᲂу҆мерщвлѧ́ешисѧ долготерпѣли́ве, земны̑мъ подаѧ̀ воскрⷭ҇нїе; сла́влю твоѐ мно́гое бж҃е мо́й, снизхожде́нїе.
А҆́ще и҆́мꙋтъ самогла́сенъ. Сла́ва, гла́съ и҃:
Равноа́гг҃льное житїѐ пожи́вше, болѣ́зньми по́стническими ѻ҆тцы̀ прпⷣбнїи, воздержа́нїемъ тѣлеса̀ порабо́тивше, покори́сте дꙋховѡ́мъ, дѣ́латєли бы́вше за́повѣдей гдⷭ҇нихъ: и҆спе́рва подо́бнꙋю добро́тꙋ ѡ҆́браза сохрани́сте, и҆ страда́нїѧ по́двиги ѿ по́стныхъ по́тѡвъ и҆ мꙋче́нїѧ соверши́сте, сꙋгꙋ́быми вѣнцы̀ ᲂу҆краси́стесѧ: прилѣ́жнѡ сп҃са моли́те сп҃сти́сѧ на́мъ.
И҆ ны́нѣ, бг҃оро́диченъ:
Кро́въ тво́й бцⷣе дв҃о, врачевство̀ є҆́сть дх҃о́вное: въ ѻ҆́нь бо прибѣга́юще, ѿ дꙋше́вныхъ недꙋ̑гъ и҆збавлѧ́емсѧ.
Крⷭ҇тобг҃оро́диченъ: Предстоѧ́щи крⷭ҇тꙋ̀ твоемꙋ̀ гдⷭ҇и, без̾ сѣ́мене ро́ждшаѧ тѧ̀, мт҃рски рыда́ющи глаго́лаше: ᲂу҆вы̀ мнѣ̀, ча́до моѐ, ка́кѡ заше́лъ є҆сѝ ѿ ѻ҆́чїю мое́ю, мы́сленное сл҃нце, ѻ҆́чїю лꙋчѐ; воста́ни всеси́льне, просїѧ́й свѣ́тъ тво́й всѣ̑мъ, и҆сповѣ́дающымъ тебѐ и҆́стиннаго бг҃а и҆ чл҃вѣ́ка.
[зрѝ] А҆́ще пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Цр҃ь нбⷭ҇ный:
Вхо́дъ. Прокі́менъ днѐ.
Чтє́нїѧ прпⷣбничєскаѧ, [пи̑сана въ концѣ̀ кни́ги сеѧ̀.]
На стїхо́внѣ стїхи̑ры, гла́съ и҃:
Подо́бенъ: Мч҃нцы тво́й гдⷭ҇и:
Прпⷣбнїи твоѝ мч҃нцы гдⷭ҇и, подо́бѧщесѧ безплѡ́тнымъ, мл҃твами и҆ воздержа́нїемъ стра̑сти ѿгна́ша плѡтскі́ѧ, и҆ чꙋдодѣ́йствы просїѧ́ша, всѣ́хъ сердца̀ просвѣти́ша: тѣ́хъ моле́нїемъ, да́рꙋй лю́демъ твои̑мъ ве́лїю млⷭ҇ть.
Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Прпⷣбнїи мч҃нцы, ре́вность добродѣ́тельнꙋю воспрїе́мше, а҆́рїевꙋ є҆́ресь и҆ несто́рїевꙋ разори́ша ꙗ҆́вѣ, и҆ правосла̑внымъ <<р҃и: 215>> побѡ́рницы бы́вше, сла́вꙋ ѿ всѣ́хъ прїѧ́ша: тѣ́хъ хрⷭ҇тѐ, мл҃твами, да́рꙋй лю́демъ твои̑мъ ве́лїю млⷭ҇ть.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ѕвѣ́зды тве́рди воздержа́нїѧ ꙗ҆́вльшесѧ, просвѣти́сте дꙋ́шы мона́шествꙋющихъ, и҆ тьмꙋ̀ бѣсѡ́въ ѿгна́сте прпⷣбнїи мч҃нцы: тѣ́мже по кончи́нѣ ᲂу҆бл҃жа́етесѧ, молѧ́щесѧ сп҃сти́сѧ всѣ̑мъ творѧ́щымъ ст҃ꙋ́ю па́мѧть ва́шꙋ.
Сла́ва, гла́съ ѕ҃:
Бл҃же́ни є҆стѐ прпⷣбнїи мч҃нцы хрⷭ҇та̀ бг҃а на́шегѡ: прпⷣбнїи ᲂу҆́бѡ, ꙗ҆́кѡ пра́вдꙋ возлюби́сте, и҆ бл҃года́ть прїѧ́сте: мч҃нцы же, ꙗ҆́кѡ ме́чь ва́съ не ѿлꙋчѝ ѿ любвѐ хрⷭ҇то́вы: и҆ сегѡ̀ ра́ди ра́дꙋетесѧ, ꙗ҆́кѡ мзда̀ ва́ша мно́га на нб҃сѣ́хъ.
И҆ ны́нѣ, бг҃оро́диченъ:
Никто́же притека́ѧй къ тебѣ̀, посра́мленъ ѿ тебѐ и҆схо́дитъ пречⷭ҇таѧ бцⷣе дв҃о: но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
Крⷭ҇тобг҃оро́диченъ: Ви́дѧщи тѧ̀ распина́ема хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ д҃:
Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви млⷭ҇ть твою̀ ѿ на́съ, но мл҃твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ д҃.
Подо́бенъ: вознесы́йсѧ:
Землены́хъ и҆ тлѣ́ющихъ наслажде́нїѧ небрего́сте, и҆ въ пꙋсты́ни житїѐ возлюби́сте, мі́ра красоты̀ и҆ пи̑щи вре́мєнныѧ <<р҃и ѡ҆б.: 216>> возненави́дѣвше, и҆ ѿсю́дꙋ сподо́бистесѧ мч҃нческомꙋ и҆ по́стническомꙋ сочта́тисѧ ли́кꙋ: съ ни́миже моли́те сп҃стѝ рабы̑ ва́шѧ. [Два́жды.]
Сла́ва, и҆ ны́нѣ, бг҃оро́диченъ:
На прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧйсѧ, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ: вопло́щьсѧ ко бг҃ъ, вои́стиннꙋ воцари́сѧ над̾ всѣ́ми ꙗ҆зы́ки, и҆ разꙋ́мнѡ ны́нѣ пое́мъ є҆мꙋ̀: є҆го́же ᲂу҆молѝ сп҃сти́сѧ рабѡ́мъ твои̑мъ.
По в҃-й каѳі́смѣ, сѣда́ленъ, гла́съ и҃.
Подо́бенъ: Премꙋ́дрости:
І҆ѡа́нна нра́вы крⷭ҇ти́телѧ, и҆ и҆лїю̀ ѳесві́тѧнина добродѣ́тели посто́мъ подража́юще, безпло́тнѡ пожи́сте, со а҆́гг҃лы сла́вѧще ст҃ꙋ́ю трⷪ҇цꙋ бжⷭ҇твеннꙋю, и҆ бѣсѡ́вскаѧ нахождє́нїѧ побѣди́сте мꙋ́жествомъ: тѣ́мъ и҆ страда́нїи крѣ́пкѡ подвиза́стесѧ, хрⷭ҇то́вꙋ бжⷭ҇твенномꙋ воплоще́нїю кла́нѧющесѧ съ бжⷭ҇тво́мъ. и҆́мⷬ҇къ, бл҃же́ннїи. моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тебѣ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а, тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ просто́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти, досто́йнѡ пою́щымъ сла́вꙋ твою̀.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ ва́съ прпⷣбнїи мч҃нцы, и҆ чте́мъ ст҃ꙋ́ю па́мѧть ва́шꙋ, наста̑вницы мона́хѡвъ, и҆ собесѣ̑дницы а҆́гг҃лѡвъ.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
<<р҃ѳ: 217>>
По полѷеле́и сѣда́ленъ, гла́съ и҃.
Подо́бенъ: Премꙋ́дрости:
Свѣ́томъ трⷪ҇ческимъ свѣ́тлѡ ѡ҆сїѧ́вшесѧ, ѻ҆тцы̀ свѣтови́днїи, тьмꙋ̀ ѡ҆ста́висте сласте́й глꙋбо́кꙋю, и҆ свѣти́льницы дѣ́лы бжⷭ҇твенными просвѣща́юще вѣ́рныхъ сердца̀, бл҃же́ни, ꙗ҆ви́стесѧ поще́нїемъ и҆ страда̑нїи, тѣ́мже свѣтоно́снꙋю и҆ честнꙋ́ю ва́шꙋ па́мѧть почита́емъ дне́сь, и҆ согла́снѡ взыва́емъ: бг҃огла́снїи пребога́тїи, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть ва́шꙋ. [Два́жды.]
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ всепѣ́таѧ, беззако́нїю мѧ̀ сꙋ́ща скве́рно жили́ще, и҆ де́монѡвъ и҆гра́лище въ ра́зꙋмѣ бы́вша, потщи́сѧ ѿ си́хъ ѕлодѣ́йствїѧ мѧ̀ и҆зба́вити, свѣ́тло жили́ще добродѣ́тельми содѣ́лавши, свѣтода́тельнаѧ и҆ нетлѣ́ннаѧ, разженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ мл҃твами твои́ми.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́лъ гдⷭ҇ви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Є҆ѵⷢ҇лїе пи́сано въ концѣ̀ кни́ги сеѧ̀.
По н҃-мъ ѱалмѣ̀ стїхи́ра, гла́съ д҃.
Пресвѣ́тлыми сїѧ́ньми прпⷣбнїи, ѡ҆зари́вше своѧ̑ дꙋ́шы свѣтоно́снѡ, добродѣ́тельми ᲂу҆краси́сте зе́млю, и҆мꙋ́ще въ сердца́хъ свои́хъ хрⷭ҇та̀, просвѣща́юще ꙗ҆́кѡ со́лнце незаходи́мое ꙗ҆зы́чєскїѧ собо́ры, мч҃нческими добро́тами на́съ ᲂу҆добрѧ́юще, прпⷣбнїи мч҃нцы.
<<р҃ѳ ѡ҆б.: 218>>
Канѡ́нъ, гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Поще́нїемъ свѣтоза́рнїи бы́вше пребл҃же́ннїи, бг҃озра̑чнаѧ показа́стесѧ свѣти̑ла и҆злїѧ́нїемъ крове́й ва́шихъ: тѣ́мъ ра́дꙋетесѧ съ по́стники хрⷭ҇то́выми и҆ мч҃нки.
Въ мо́ри сле́зъ ва́шихъ мꙋ́дрїи, пе́рвѣе потопи́вше фараѡ́на мы́сленнаго, послѣди́ же въ кро́вныхъ пото́цѣхъ побѣди́сте є҆го̀, и҆ поги́бели преда́сте.
Прпⷣбныѧ ѻ҆тцы̀ закла́ни бы́вшѧ за хрⷭ҇та̀, по́стнически пожи́вшыѧ мч҃нки восхва́лимъ, пою́ще и҆зба́вителю бг҃ꙋ на́шемꙋ: ꙗ҆́кѡ просла́висѧ.
Бг҃оро́диченъ: Сы́й є҆стество́мъ гдⷭ҇ь, всѣ̑мъ невмѣсти́мый въ тебѐ вмѣсти́сѧ бцⷣе дв҃о, зе́менъ бы́въ за млⷭ҇рдїе, да земны̑ѧ сп҃се́тъ за неизрече́ннꙋю млⷭ҇ть свою̀.
Пѣ́снь г҃.
І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ, па́че тебѐ чл҃вѣколю́бче.
Сокрꙋше́нною со́вѣстїю бг҃ꙋ ᲂу҆годи́вше, сокрꙋши́сте вра̑жїѧ велича̑нїѧ бл҃же́ннїи, мечѝ сокрꙋша́еми и҆ ᲂу҆мерщвлѧ́еми.
Смотрѧ́юще бꙋ́дꙋщихъ мꙋ́дрїи присносꙋ́щєства, непостоѧ́нныхъ и҆ тлѣ́нныхъ до́лꙋ влекꙋ́щихъ ѿрази́сте: сегѡ̀ ра́ди ᲂу҆бл҃жа́еми є҆стѐ прпⷣбнїи мч҃нцы.
Хва́лѧщесѧ держа́вою твое́ю бг҃оно́снїи, крѣ́пцѣ гꙋби́телѧ ѡ҆полчє́нїѧ побѣди́ша, и҆ ᲂу҆бїе́ни за тѧ̀ сп҃се, сꙋгꙋ́бы по́двиги показа́вше, тѣ́ми вѣнча́шасѧ.
Бг҃оро́диченъ: Пречⷭ҇таѧ, ꙗ҆́же бж҃їе просто́е сло́во ро́ждшаѧ, ѡ҆ст҃ѝ на́шѧ дꙋ́шы и҆ тѣлеса̀, бл҃жа́щихъ тѧ̀ пренепоро́чнꙋю.
Сѣда́ленъ, гла́съ д҃:
Подо́бенъ: Ско́рѡ предварѝ:
Ꙗ҆́кѡ прише́льцы ꙗ҆́вльшесѧ, и҆ пресє́льницы на землѝ, кꙋ̑щи потко́ша въ пꙋсты́нѧхъ, крѣ́пкѡ подвиза́стесѧ прпⷣбнїи <<р҃і: 219>> нагото́ю ᲂу҆краси́вшесѧ въ добродѣ́тели ѻ҆де́ждахъ, соѡбра́зни бы́вше хрⷭ҇тѡ́вымъ стрⷭ҇те́мъ: сегѡ̀ ра́ди претерпѣ́сте мꙋчи́тельское заколе́нїе.
Сла́ва, и҆ ны́нѣ, бг҃оро́диченъ:
Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи, и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце, помозѝ, на ны̀ млⷭ҇рдовавши: потщи́сѧ, погиба́емъ ѿ мно́жества прегрѣше́нїй: не ѿвратѝ твоѧ̑ рабы̑ тщы̀, тѧ́ бо и҆ є҆ди́нꙋ наде́ждꙋ и҆́мамы.
Крⷭ҇тобг҃оро́диченъ: Дв҃а и҆ а҆́гница ви́дѣвши на крⷭ҇тѣ̀, без̾ сѣ́мене и҆з̾ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое сїѐ та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскрⷭ҇нѝ, па́дшаго воздвиза́ѧ пра́ѻтца.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Страсте́мъ плѡтски́мъ не повинꙋ́вшесѧ пребл҃же́ннїи, врага̀ повинꙋ́сте, и҆ ᲂу҆бїе́ни бы́вше мече́мъ, къ животꙋ̀ безсме́ртномꙋ ра́дꙋющесѧ вкꙋ́пѣ преложе́ни бы́сте.
Оу҆мори́вше себѐ пре́жде сме́рти воздержа́нїемъ, свое́ю во́лею прпⷣбнїи, ѿ беззако́нныхъ нево́лею мече́мъ лю́тѣ побїе́ни бы́сте, жи́ти и҆ по сме́рти вѣ́рꙋюще.
А҆́ще и҆ мечѝ ѿ беззако́нныхъ ᲂу҆бива́еми ѻ҆тцы̀, ѿ житїѧ̀ сегѡ̀ ѿстꙋпи́сте: но пре́жде и҆схо́да напа̑сти гѡ́рькїѧ претерпѣ́сте, ме́ртви бы́вше мі́рови.
Бг҃оро́диченъ: Ѡ҆бновлѧ́етъ человѣ́чество но́во ѻ҆троча̀ превѣ́чный бг҃ъ, ꙗ҆́вльсѧ ѿ дв҃ы, и҆ чл҃вѣ́къ бы́въ. томꙋ̀ воспои́мъ: сла́ва си́лѣ твое́й гдⷭ҇и.
Пѣ́снь є҃.
І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
<<р҃і ѡ҆б.: 220>>
Ра́й кра́сный, дре́во живо́тное гдⷭ҇а ꙗ҆ви́стесѧ посредѣ̀ и҆мꙋ́ще, крѡ́ви ва́шѧ, ꙗ҆̀же ꙗ҆́кѡ же́ртвꙋ чи́стꙋ прїи́мшаго.
Крѡ́вныѧ ка̑пли со сле́зными смѣси́вше стрꙋѧ́ми, бг҃оно́сцы, многоѡбра́знаго ѕмі́ѧ въ си́хъ погрꙋзи́сте.
Красотꙋ̀ бж҃їю зрѣ́ти сподо́бистесѧ, и҆ вѣ́чное весе́лїе, вмѣ́стѡ трꙋдѡ́въ и҆ болѣ́зней бл҃же́ннїи прїѧ́сте.
Бг҃оро́диченъ: Родила̀ є҆сѝ бг҃а, па́че сло́ва и҆ ра́зꙋма: и҆ пребыла̀ є҆сѝ по ржⷭ҇твѣ̀, ꙗ҆́кѡ и҆ пре́жде ржⷭ҇тва̀ дв҃а, чⷭ҇таѧ бг҃оневѣ́стнаѧ.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Ѿве́ргше пристра́стїѧ сою́зъ поще́нїемъ, и҆ нꙋ́жною сме́ртїю сою́зѡвъ тѣле́сныхъ разрѣши́стесѧ, и҆ при́звани бы́сте къ нерꙋши́мѣй добро́тѣ влⷣчнѣй.
Ꙗ҆́кѡ го́ры высо́кимъ житїе́мъ показа́вшесѧ, и҆́же погꙋби́ти го́ры, и҆ всю̀ тва́рь претѧ́щаго, си́лою хрⷭ҇то́вою под̾ нѡ́зѣ своѝ повинꙋ́сте.
Воздержа́нїемъ и҆ трꙋды̀ тѣ́ло и҆стончи́сте ѻ҆тцы̀ ст҃і́и, и҆ кровьмѝ хрⷭ҇то́ви пожро́стесѧ до́блїи, и҆ зако́ннѡ вѣнча́стесѧ.
Бг҃оро́диченъ: Оу҆спѝ страсте́й мои́хъ непостоѧ́ннꙋю бꙋ́рю, неꙋсы́пною твое́ю мл҃твою дв҃о, молю́ тѧ: и҆ не да́ждь мѝ сно́мъ грѣхо́внымъ ᲂу҆снꙋ́ти, и҆ тѧ́жкимъ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Подо́бенъ: Вы́шнихъ и҆щѧ̀:
Волне́нїй мно́жество невла́жнѡ преходѧ́ще, безплѡ́тныѧ врагѝ стрꙋѧ́ми сле́зъ ва́шихъ крѣ́пкѡ погрꙋзи́ли є҆стѐ бг҃омꙋ́дрїи, прпⷣбнїи мч҃нцы, и҆ чꙋде́съ да́ръ прїи́мше, моли́те непреста́ннѡ ѡ҆ всѣ́хъ на́съ.
І҆́косъ: И҆̀же на землѝ пло́ть ᲂу҆мертви́вше, живоно́сною ме́ртвостїю, хрⷭ҇та̀ бг҃а стрⷭ҇ть воѡбрази́вше, пе́рвѣе въ до́брѣмъ поще́нїи, и҆ второ́е па́ки во страда́нїихъ: тѣ́мже хрⷭ҇то́съ сꙋгꙋ̑бы <<ра҃і: 221>> вѣнцы̀ низпосла̀ ва́мъ, прпⷣбнїи мч҃нцы, и҆ ᲂу҆гото́ва ва́мъ жили́ще нбⷭ҇ное и҆ мѣ́сто вѣ́чное, и҆дѣ́же ра́достнѡ всели́стесѧ, мч҃нкѡмъ и҆ прпⷣбнымъ є҆динокрѡ́вницы. тѣ́мже моли́те непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Оу҆кра́шени добродѣ́тельными зарѧ́ми, и҆ стрⷭ҇тьмѝ сщ҃е́нными просвѣща́еми, преидо́сте къ свѣ́тꙋ незаходи́момꙋ, и҆ сы́нове днѐ показа́стесѧ.
Хотѣ́нїемъ ѿ мїрски́хъ сласте́й ѿлꙋча́ющесѧ, стра́ннѡ человѣ́кѡмъ ꙗ҆́вльшемꙋсѧ пло́тїю присво́истесѧ, бꙋ̑дꙋщаѧ и҆ нетлѣ̑ннаѧ бл҃га̑ѧ стѧжа́вше ст҃і́и.
Бл҃гослове́нъ є҆сѝ бж҃е, соверши́вый тече́нїе страда́лєцъ бг҃оно́сныхъ ѻ҆тє́цъ дне́сь, и҆ ꙗ҆́вль и҆́хъ ѻ҆́бщники нбⷭ҇нагѡ твоегѡ̀ црⷭ҇твїѧ.
Бг҃оро́диченъ: Тебѐ носѧ́щꙋю во чре́вѣ твое́мъ живо́тнꙋю ма́ннꙋ, дре́вле маннопрїѧ́тнаѧ ста́мна, ꙗ҆́кѡ вои́стиннꙋ проѡбража́ше ꙗ҆́вственнѡ: бл҃гослове́на ты̀ въ жена́хъ пренепоро́чнаѧ влⷣчце.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Вели́кїй ли́къ прпⷣбныхъ мч҃нкъ, по́стническими хра́брствы ᲂу҆краша́емь дне́сь, всѧ̑ ликостоѧ́тєли бж҃е́ствєнны показꙋ́етъ хва́лѧщихъ, и҆ съ ни́ми хрⷭ҇та̀ пою́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Ста́сте ꙗ҆́кѡ а҆́гнцы, мꙋчи́тельскими посѣка́еми мечѝ, и҆ принесе́ни бы́сте поже́ршемꙋсѧ сло́вꙋ соверше́ннаѧ же́ртва, и҆ въ селе́нїихъ пе́рвенєцъ ꙗ҆ви́стесѧ пою́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
<<ра҃і ѡ҆б.: 222>>
Тѣ́ло и҆ дꙋ́шꙋ ѡ҆ст҃и́сте гдⷭ҇ви прпⷣбнїи, воздержа́нїемъ по́тѡвъ подви́гшесѧ, и҆ кро́вными стрꙋѧ́ми и҆зсꙋши́вше мꙋчи́тельское ѕло́е мо́ре, пою́ще: бл҃гослови́те всѧ̑ дѣла̀ гдⷭ҇нѧ гдⷭ҇а.
Бг҃оро́диченъ: Ѿверза́етсѧ тобо́ю па́ки пе́рвый ра́й бг҃ора́дованнаѧ чтⷭ҇аѧ, и҆ вво́дитсѧ и҆́же пе́рвѣе ѡ҆сꙋжде́нный человѣ́къ, и҆ ѡ҆божа́етсѧ вои́стиннꙋ, человѣ́кѡвъ на ѡ҆бновле́нїе, вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а.
Пѣ́снь ѳ҃.
І҆рмо́съ: Ка́мень нерꙋкосѣ́чный, ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
Сщ҃енносло́вїемъ прїиди́те, сщ҃є́нныѧ ѻ҆тцы̀ прпⷣбныѧ, въ пꙋсты́нѧхъ и҆ въ пеще́рахъ пожи́вшыѧ въ прпⷣбїи и҆ бл҃гоче́стнѡ пострада́вшыѧ, велегла́снѡ восхва́лимъ.
Ꙗ҆́кѡ прехва́льнїи ва́ши трꙋды̀, и҆̀же въ по́стничествѣ страстоте́рпцы: ꙗ҆́кѡ и҆зрѧ́днїи по́двизи и҆́миже лестца̀ низверго́сте: ꙗ҆́кѡ ди̑вна страда̑нїѧ, и҆́миже зако́ннѡ страда́сте, и҆ вѣнча́ни бы́сте.
Бг҃озра́чнаѧ ва́ша па́мѧть восто́ками ѡ҆зарѧ́ема трꙋдѡ́въ ва́шихъ, ꙗ҆̀же за хрⷭ҇та̀ под̾ѧ́сте: и҆ сѡ́вѣсти всѣ́хъ просвѣща́етъ, бл҃года́тїю вседѣ́тельнагѡ ст҃а́гѡ дх҃а.
Бг҃оро́диченъ: Оу҆страша́ютсѧ херꙋві́ми зрѧ́щѧ є҆́же на ни́хъ, неизрече́ннымъ сло́вомъ сѣдѧ́щаго сло́ва, мт҃рними твои́ми рꙋка́ми млⷣнца носи́ма пречⷭ҇таѧ влⷣчце, превы́шша всеѧ̀ тва́ри.
Свѣти́ленъ.
Подо́бенъ: Дх҃омъ во ст҃и́лищи:
Болѣ́зньми воздержа́нїѧ ѕлонача́льнаго ѕмі́ѧ до конца̀ ᲂу҆би́сте. при кончи́нѣ же вѣне́цъ мꙋче́нїѧ прїѧ́сте, ѻ҆тцє́въ похвала̀ и҆ мч҃нкѡвъ сла́ва, прпⷣбномч҃никъ мно́жество чꙋ́дныхъ ѻ҆тє́цъ.
Бг҃оро́диченъ: Є҆́же па́че ᲂу҆ма̀ твоегѡ̀ ржⷭ҇тва̀, пресла́вное чꙋ́до ᲂу҆дивлѧ́етъ всѧ́къ ᲂу҆́мъ, и҆ а҆́гг҃лѡвъ и҆ человѣ́кѡвъ: дв҃ою сꙋ́щи родила̀ є҆сѝ, дв҃ою пребыла̀ є҆сѝ, ꙗ҆́кѡ и҆ пре́жде ржⷭ҇тва̀ дв҃о. Ѽ стра́ннагѡ та́инства! Ѽ ржⷭ҇тва̀ чꙋ́днагѡ и҆ пре́славнагѡ!
<<рв҃і: 223>>
На хвали́техъ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Мꙋ̑дрыѧ мч҃нки, ꙳ и҆ прпⷣбныѧ ѻ҆тцы̀ воспое́мъ свѣ́тлѡ, ꙳ хрⷭ҇тѡ́вымъ бо повелѣ́нїємъ повинꙋ́ющесѧ, ꙳ и҆ слꙋже́нїе всѧ́кою скве́рное ᲂу҆праздни́вше, ꙳ ст҃і́и че́стнѡ и҆ бл҃гонаде́жнѡ послꙋжи́ша, ꙳ є҆ди́наго бг҃а и҆ гдⷭ҇а, пред̾ лице́мъ мꙋчи́телей, ꙳ бл҃годерзнове́ннѡ и҆сповѣ́дающе, и҆ вѣнча́еми свы́ше. [Два́жды.]
Житїѧ̀ до́лꙋ влекꙋ̑щаѧ, ꙳ и҆ пи́щи наслаждє́нїѧ, ꙳ и҆ цвѣтꙋ́щꙋю сла́вꙋ прехва́льнїи, ꙳ ѡ҆ста́вльше ꙗ҆́кѡ вре́меннꙋ, ꙳ хрⷭ҇тꙋ̀ прилѣпи́стесѧ, ꙳ тогѡ̀ добро́тою кра́сною распала́еми, ꙳ и҆ пристꙋпи́сте ꙗ҆́кѡ бл҃гоꙋха́ннїи шипцы̀, ꙳ и҆ вѣнце́мъ нетлѣ́ннагѡ црⷭ҇тва, ꙳ бг҃олѣ́пнѡ вѣнча́стесѧ.
И҆́же мі́ръ возненави́дѣвше, ꙳ премі́рни ꙗ҆ви́стесѧ, ꙳ въ цр҃кви перворо́дныхъ совокꙋпи́стесѧ, ꙳ и҆ со а҆́гг҃лы поетѐ пѣ́снь непреста́ннꙋю, ꙳ пред̾ бг҃омъ предстоѧ́ще вкꙋ́пѣ: ꙳ и҆̀же скве́рнꙋю і҆́дѡльскꙋю ле́сть ꙳ ѿри́нꙋвше мч҃нчески, ꙳ мꙋчи́телей безꙋ́мїе посрами́сте.
Сла́ва, гла́съ ѕ҃:
И҆спещре́ни ѻ҆де́ждою чистоты̀, и҆ просвѣще́ни бж҃е́ственною мл҃твою, живꙋ́ща же и҆мꙋ́ще хрⷭ҇та̀ въ себѣ̀, ѿ дв҃ы ро́ждшагосѧ, любо́вїю мі́ра сегѡ̀ не восхити́стесѧ, ни сла́сти плотскі́ѧ прїѧ́сте: но взыдо́сте ᲂу҆се́рднѡ на тождерабо́тный ѻ҆́гнь, бжⷭ҇твеннымъ ѻ҆гне́мъ вре́менный и҆ стра́стный ѻ҆́гнь попали́сте. тѣ́мже моли́тесѧ прпⷣбнїи мч҃нцы бл҃же́ннїи, и҆ на́мъ всепа́гꙋбнагѡ и҆ вѣ́чнагѡ ѻ҆гнѧ̀ и҆зба́витисѧ.
И҆ ны́нѣ, бг҃оро́диченъ:
Бг҃а и҆з̾ тебѐ воплоти́вшагосѧ разꙋмѣ́хомъ, бцⷣе дв҃о, того̀ молѝ ѡ҆ сп҃се́нїи дꙋ́шъ на́шихъ.
Крⷭ҇тобг҃оро́диченъ: Лю́ди беззако́ннѣйшыѧ, без̾ пра́вды пригвожда́ющыѧ тѧ̀ на дре́вѣ, дв҃а и҆ чтⷭ҇аѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою сп҃се ᲂу҆ѧзвлѧ́шесѧ.
А҆́ще и҆́мать на стїхо́внѣ Сла́вꙋ, глаго́ли вече́рнїй.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.