Слꙋ́жба прпⷣбномꙋ
<<ѯ҃и ѡ҆б.: 136>>
[глⷡ҇а в҃і] СЛꙊ́ЖБА Ѻ҆́БЩА
прпⷣбномꙋ є҆ди́номꙋ.
Ве́черъ,
на Гдⷭ҇и воззва́хъ, стїхи̑ры, гла́съ и҃.
Подо́бенъ: Мч҃нцы гдⷭ҇ни:
Прпⷣбенъ и҆ че́стенъ свѣти́льникъ бжⷭ҇твенный и҆ свѣтоно́сный, под̾ спꙋ́домъ жите́йскїѧ толстоты̀ никогда́же скрыва́етсѧ: но на версѣ̀ полага́етъ є҆го̀ высо́кихъ чꙋде́съ чл҃вѣколю́бецъ. тогѡ̀ мл҃твами, хрⷭ҇тѐ, да́рꙋй лю́демъ твои̑мъ ве́лїю млⷭ҇ть.
На ра́ло возложи́лъ є҆сѝ, всече́стне, дѣ́ланїе рꙋ́къ твои́хъ, дѣ́лаѧ всегда̀ бж҃е́ствєннаѧ, и҆ не возврати́лсѧ є҆сѝ зрѧ̀ вспѧ́ть: но бы́лъ є҆сѝ ᲂу҆пра́вленъ во црⷭ҇твїе хрⷭ҇та̀ вопло́щшагѡсѧ бг҃а, во сп҃се́нїе дꙋ́шъ на́шихъ.
Въ лодїѝ тѣле́снѣй вози́мь, кро́ткими дыха̑нїи кро́ткагѡ дх҃а, легкѡ̀ преше́лъ є҆сѝ жите́йскꙋю пꙋчи́нꙋ, мꙋ́дре: и҆ на би́серѣ многоцѣ́ннѣмъ твоѧ̑ и҆мѣ̑нїѧ прода́въ, и҆ ѡ҆брѣ́тъ є҆го̀ въ себѣ̀ ᲂу҆держа́лъ є҆сѝ, бл҃же́нъ бы́въ бж҃е́ственными добро́тами є҆гѡ̀.
Сла́ва, и҆ ны́нѣ, бг҃оро́диченъ:
Помышлє́нїѧ нечи̑ста и҆ ᲂу҆стна̀ льсти̑ва, дѣла́ же моѧ̑ всѧ̑ ѡ҆сквернє́на: и҆ что̀ сотворю̀; ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ бл҃гоꙋтро́бенъ.
Крⷭ҇тобг҃оро́диченъ: Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до: что́ ти со́нмъ воздадѐ неблагода́рный є҆вре́йскїй, хотѧ́ мѧ ѡ҆безча́дствовати ѿ тебѐ, вселюбе́зне;
<<ѯ҃ѳ: 137>>
А҆́ще и҆́мать самогла́сенъ. Сла́ва, гла́съ ѕ҃:
Є҆́же по ѡ҆́бразꙋ соблю́дъ невреди́мо, ᲂу҆́мъ влⷣкꙋ на стра̑сти па̑гꙋбныѧ по́стнически поста́вивъ, во є҆́же по подо́бїю ꙗ҆́кѡ мо́щно возше́лъ є҆сѝ: мꙋ́жески во є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющихъ ꙗ҆ви́лсѧ є҆сѝ наста́вникъ, жи́тель пꙋсты́нный, бл҃готекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее: и҆ ны́нѣ на нб҃сѣ́хъ зерца́лѡмъ разрѣ́шшымсѧ ѻ҆́тче на́шъ, и҆́мⷬ҇къ, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственне ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ бг҃оро́диченъ:
Бцⷣе, ты̀ є҆сѝ лоза̀ и҆́стиннаѧ:
Крⷭ҇тобг҃оро́диченъ: Ви́дѧщи тѧ̀ распина́ема хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ жи́зни пода́телю,
А҆́ще пра́зднꙋеши съ полѷеле́емъ, глаго́ли бг҃оро́диченъ: воскрⷭ҇ный: Кто̀ тебѐ не ᲂу҆бл҃жи́тъ:
Вхо́дъ. Прокі́менъ днѐ.
Чтє́нїѧ прпⷣбничєскаѧ, [пи̑саны въ концѣ̀ кни́ги сеѧ̀].
На стїхо́внѣ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ:
Наста̀ бг҃оно́се, ꙳ со́лнца свѣтлѣ́йшїй тво́й пра́здникъ, ꙳ ѡ҆зарѧ́етъ приходѧ́щыѧ къ тебѣ̀ вѣ́рою, ꙳ и҆ безсме́ртїемъ ѡ҆бл҃гоꙋха́етъ, ꙳ и҆ дꙋша́мъ и҆сточа́етъ и҆сцѣлє́нїѧ, ꙳ и҆́мⷬ҇къ, прпⷣбне, мл҃твенниче ѡ҆ дꙋша́хъ на́шихъ.
Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.
Чꙋ́вствєнныѧ стра̑сти тѣлє́сныѧ, ꙳ побѣди́въ воздержа́нїѧ брозда́ми, ꙳ чꙋдодѣ́йственниче, и҆́мⷬ҇къ, ꙳ и҆ ре́вности безпло́тныхъ на землѝ показа́въ, ꙳ всѧ̑ плотска̑ѧ жела̑нїѧ дꙋ́хꙋ повинꙋ́лъ є҆сѝ: ꙳ тѣ́мъ ны́нѣ въ нбⷭ҇ныхъ селе́нїихъ водворѧ́ѧсѧ, ꙳ молѝ ѡ҆ дꙋша́хъ на́шихъ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
<<ѯ҃ѳ ѡ҆б.: 138>>
Бл҃же́нне, и҆́мⷬ҇къ, ꙳ ѡ҆снова́нїе положи́въ добродѣ́тели, ꙳ дре́внѧгѡ человѣ́ка совле́клсѧ є҆сѝ съ похотьмѝ, ꙳ и҆ во хрⷭ҇та̀ ѡ҆бле́клсѧ вои́стиннꙋ: ꙳ тѣ́мъ и҆ ѡ҆бличи́лъ є҆сѝ прпⷣбне, мнѡ́гаѧ вра̑жїѧ ѡ҆полчє́нїѧ, ꙳ наста́вникъ мона́хѡвъ бы́въ, ꙳ молѝ сп҃сти́сѧ дꙋша́мъ на́шымъ.
Сла́ва, гла́съ и҃:
Мона́хѡвъ мно́жєства, наста́вника тѧ̀ почита́емъ ѻ҆́тче на́шъ, и҆́мⷬ҇къ: твое́ю бо стезе́ю вои́стиннꙋ пра́вѡ ходи́ти позна́хомъ: бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ првⷣныхъ, съ ни́миже моли́сѧ гдⷭ҇ви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: воскрⷭ҇ный:
Безневѣ́стнаѧ дв҃о: [пи́санъ въ концѣ̀ кни́ги сеѧ̀].
А҆́ще ли не пра́зднꙋеши, глаго́ли се́й бг҃оро́диченъ:
Чⷭ҇таѧ дв҃о, сло́ва врата̀, бг҃а на́шегѡ мт҃и, молѝ сп҃сти́сѧ на́мъ.
Крⷭ҇тобг҃оро́диченъ: Не терплю̀ ча́до, ви́дѧщи тѧ̀ на дре́вѣ ᲂу҆снꙋ́вша, бо́дрость всѣ̑мъ подаю́щаго: ꙗ҆́кѡ да дре́вле престꙋпле́нїѧ плодо́мъ, сно́мъ поги́бельнымъ ᲂу҆снꙋ́вшымъ, бж҃е́ственнꙋю и҆ сп҃си́тельнꙋю бо́дрость пода́си, дв҃а глаго́лаше пла́чꙋщи, ю҆́же велича́емъ.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ и҃:
Въ тебѣ̀ ѻ҆́тче и҆звѣ́стнѡ сп҃се́сѧ є҆́же по ѡ҆́бразꙋ: прїи́мъ бо крⷭ҇тъ послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ прпⷣбне и҆́мⷬ҇къ, дх҃ъ тво́й.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
<<ѻ҃: 139>>
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-мъ стїхосло́вїи сѣда́ленъ, гла́съ д҃:
Подо́бенъ: Ско́рѡ предварѝ:
Зва́нїю гдⷭ҇а твоегѡ̀ послѣ́довалъ є҆сѝ, мі́ръ ѿве́ргъ и҆ всѧ̑ ꙗ҆̀же въ мі́рѣ кра̑снаѧ, всебл҃же́нне, и҆́мⷬ҇къ, претерпѣ́лъ є҆сѝ пꙋсты́нное ѡ҆ѕлобле́нїе ᲂу҆се́рднѡ, полки́ же ѿрази́лъ є҆сѝ де́мѡнѡвъ мꙋ́жественнѣ. тѣ́мже твою̀ и҆ па́мѧть при́снѡ пѣ́сньми восхвалѧ́емъ вѣ́рнѡ. [Два́жды.]
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ чтⷭ҇аѧ, бж҃е́ственнымъ ржⷭ҇тво́мъ твои́мъ и҆стлѣ́вшее страстьмѝ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ жи́зни нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ дв҃о препросла́вленнаѧ, ꙗ҆́коже прорекла̀ є҆сѝ.
По в҃-мъ стїхосло́вїи сѣда́ленъ, гла́съ є҃:
Подо́бенъ: Собезнача́льное:
По́стника гдⷭ҇нѧ пѣ́сньми почти́мъ, ꙗ҆́кѡ ᲂу҆мертви́вша всѧ̑ прило́ги страсте́й, воздержа́нїемъ и҆ тве́рдымъ терпѣ́нїемъ вои́стиннꙋ, и҆ посрами́вша ѕѣлѡ̀ противоборца̀ врага̀, и҆ всю̀ сегѡ̀ горды́ню, и҆ ны́нѣ молѧ́щасѧ гдⷭ҇ви, поми́ловатисѧ дꙋша́мъ на́шымъ. [Два́жды.]
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ, и҆ несказа́ненъ ѡ҆́бразъ ржⷭ҇тва̀ въ тебѣ̀ позна́сѧ приснодв҃о чⷭ҇таѧ, ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ помышле́нїе, сла́ва твоѧ̀ бцⷣе во всѣ́хъ простре́сѧ, ко сп҃се́нїю дꙋ́шъ на́шихъ.
По Хвали́те и҆́мѧ гдⷭ҇не:
Припѣ́въ:
Оу҆бл҃жа́емъ тѧ̀ прпⷣбне ѻ҆́тче, и҆́мⷬ҇къ, и҆ чте́мъ ст҃ꙋ́ю па́мѧть твою̀, наста́вниче мона́хѡвъ, и҆ собесѣ́дниче а҆́гг҃лѡвъ.
Ѱало́мъ и҆збра́нный: Терпѧ̀ потерпѣ́хъ гдⷭ҇а:
<<ѻ҃ ѡ҆б.: 140>>
По полѷеле́и сѣда́ленъ, гла́съ а҃.
Подо́бенъ: Гро́бъ тво́й сп҃се:
Погре́блъ є҆сѝ страсте́й всѐ воста́нїе ᲂу҆мерщвле́нїемъ пло́ти сщ҃е́нный ѻ҆́тче, жи́знь безконе́чнꙋю по сме́рти прїѧ́лъ є҆сѝ: тѣ́мже дне́сь хрⷭ҇то́ва цр҃ковь пра́зднꙋетъ твою̀ досточꙋ́днꙋю па́мѧть, прпⷣбныхъ ᲂу҆краше́нїе. [Два́жды.]
Сла́ва, и҆ ны́нѣ, бг҃оро́диченъ:
Наста́ви ны̀ на пꙋ́ть покаѧ́нїѧ, ᲂу҆клонѧ́ющыѧсѧ при́снѡ къ ѕлы́мъ безпꙋ́тїємъ, и҆ пребл҃га́го прогнѣ́вающыѧ гдⷭ҇а, неискꙋсобра́чнаѧ бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе ѡ҆бита́лище.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми;
Всѧ́кое дыха́нїе:
Є҆ѵⷢ҇лїе прпⷣбническое: [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́тче, во всю̀ зе́млю и҆зы́де вѣща́нїе и҆справле́нїй твои́хъ: тѣ́мже на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскаѧ разори́лъ є҆сѝ пѡ́лчища, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ, гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Бл҃ги́ми нра̑вы ᲂу҆краси́всѧ, хрⷭ҇тꙋ̀ прилѣпи́лсѧ є҆сѝ ѿ ю҆́ности, плѡтскі́ѧ стра̑сти ᲂу҆мертви́въ воздержа́нїемъ, и҆ къ животꙋ̀ прпⷣбне преста́вилсѧ є҆сѝ.
Глаго́лѡвъ и҆ зако́нѡвъ бж҃їихъ и҆спо́лнитель бы́въ, и҆спо́лнилсѧ є҆сѝ, ѻ҆́тче премꙋ́дре, бжⷭ҇твенныхъ дарѡ́въ и҆ чꙋде́съ, и҆ всѣ̑мъ лꙋчы̀ бога́тнѡ и҆спꙋсти́лъ є҆сѝ.
<<ѻ҃а: 141>>
Крѣ́постїю хрⷭ҇та̀ возмо́гъ, держа́вꙋ низложи́лъ є҆сѝ, и҆ си́лꙋ вра́жїю, и҆ похвалꙋ̀ побѣ́днꙋю по́чести прїѧ́лъ є҆сѝ прпⷣбне, чꙋде́сными сїѧ̑нїи.
Со́вѣсть и҆мѣ́лъ є҆сѝ бл҃гꙋ, и҆ ѻ҆́ко серде́чное взира́ющее къ бг҃ꙋ: тѣ́мже внѧ́тъ моли́твѣ твое́й премꙋ́дре, съ прпⷣбными сочта̀ тѧ̀.
Бг҃оро́диченъ: Стра̑сти пло́ти моеѧ̀, и҆ ᲂу҆ма̀ моегѡ̀ двиза̑нїѧ неподѡ́бнаѧ ᲂу҆толѝ, молю́ тѧ пречⷭ҇таѧ дв҃о, и҆ и҆спра́ви мѧ̀ заблꙋ́ждшаго ᲂу҆мо́мъ.
Пѣ́снь г҃.
І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ве́сь прилѣжа̀ вседержи́телю, прпⷣбне ѻ҆́тче премꙋ́дре, всеѧ̀ бѣсо́вскїѧ ѕло́бы и҆збѣ́глъ є҆сѝ.
Высото́ю смире́нїѧ ᲂу҆краша́емь, све́рглъ є҆сѝ на зе́млю велехва́льнаго, и҆зрѧ́дными дѣ́лы твои́ми.
Пло́тїю ѡ҆бложе́нъ ѻ҆́тче премꙋ́дре, смири́лъ є҆сѝ превзѧ́тꙋю вы́ю нечести́вагѡ, смире́нїемъ слове́съ твои́хъ.
И҆мѣ́ѧ поспѣшествꙋ́ющꙋю тебѣ̀ бж҃їю си́лꙋ премꙋ́дре, ꙗ҆́кѡ чꙋ́денъ, чꙋдеса̀ и҆сточа́еши, и҆ ѿго́ниши недꙋ̑ги.
Бг҃оро́диченъ: Въ ложесна̀ твоѧ̑ воплоща́емь всенепоро́чнаѧ, всели́сѧ зижди́тель, на бл҃годѣѧ́нїе вѣ́рнѡ пою́щымъ тѧ̀.
Сѣда́ленъ, гла́съ д҃.
Подо́бенъ: Ско́рѡ предварѝ:
Страстно́е покори́лъ є҆сѝ плотско́е мꙋдрова́нїе, и҆ гѡ́ршаѧ порабо́тивъ лꙋ́чшемꙋ, ѻ҆́тче и҆́мⷬ҇къ, пресла́вне сокрꙋши́лъ є҆сѝ бѣсѡ́вскїѧ кѡ́зни посто́мъ, и҆ возсїѧ́лъ є҆сѝ въ мі́рѣ ꙗ҆́кѡ лꙋча̀ со́лнечнаѧ, сїѧ̑нїи твои́хъ добродѣ́телей: сегѡ̀ ра́ди тѧ̀ воспѣва́емъ.
Сла́ва, и҆ ны́нѣ, бг҃оро́диченъ:
Стѣна̀ непобѣди́маѧ на́мъ хрⷭ҇тїа́нѡмъ є҆сѝ бцⷣе дв҃о, къ тебѣ́ бо прибѣга́юще невреди́ми пребыва́емъ: и҆ па́ки согрѣша́юще и҆́мамы тѧ̀ мл҃твенницꙋ. тѣ́мъ бл҃годарѧ́ще вопїе́мъ тѝ: ра́дꙋйсѧ бл҃года́тнаѧ, гдⷭ҇ь съ тобо́ю.
<<ѻ҃а ѡ҆б.: 142>>
Крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею, сн҃а и҆ бг҃а твоего̀: є҆го́же, пребл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Содѣ́ѧвъ пресла́вне дꙋ́шꙋ твою̀ хра́мъ ст҃о́мꙋ дх҃ꙋ, бы́лъ є҆сѝ наслѣ́дникъ го́рнѧгѡ црⷭ҇твїѧ, съ вы́шними си́лами.
Многоболѣ́зненныѧ стра̑сти всегда̀ врачꙋ́еши пристꙋпа́ющихъ къ тебѣ̀: бл҃года́ть бо прпⷣбне прїи́мъ ѿ гдⷭ҇а, содѣва́ти зна́мєнїѧ и҆ чꙋдеса̀.
Краснѣ́йшимъ прозѧбе́нїемъ ѻ҆́тче, въ домꙋ̀ бж҃їи прозѧ́блъ є҆сѝ. добродѣ́тельми ᲂу҆кра́шенъ, и҆ плоды̀ чꙋде́сными ѡ҆бл҃гоꙋха́емь.
Бг҃оро́диченъ: Ни́ва дꙋхо́внаѧ, ꙗ҆́коже и҆з̾ бразды̀ кла́съ и҆знесла̀ є҆сѝ, всю̀ тва́рь пита́ющаго, всѧ́ческихъ бг҃а, прⷭ҇нодв҃о.
Пѣ́снь є҃.
І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.
Оу҆мо́мъ ѡ҆чище́ннымъ, пресла́вне, зри́ши добро́тꙋ неизрече́ннꙋю хрⷭ҇та̀, всѧ́ческихъ бг҃а на́шегѡ.
Ꙗ҆́коже и҆лїа̀ на колесни́цѣ ѻ҆́тче, добродѣ́тельми твои́ми возше́лъ є҆сѝ на нб҃о, дх҃омъ ѡ҆блегчева́емь.
Стѧгнꙋ́въ тѣ́ло твоѐ воздержа́нїемъ и҆ чистото́ю, въ вы́шнѧѧ селє́нїѧ, къ широтѣ̀ ѻ҆́тче дости́глъ є҆сѝ.
Бг҃оро́диченъ: И҆сцѣлѝ недꙋ́гꙋющагѡ ᲂу҆ма̀ моегѡ̀ ѡ҆мраче́нїе, врача̀ ро́ждшаѧ хрⷭ҇та̀ всенепоро́чнаѧ влⷣчце.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.
Лꙋка́вый ᲂу҆мертви́сѧ ѕмі́й сщ҃е́нными твои́ми мл҃твами бг҃обл҃же́нне, и҆ ѿ тогѡ̀ разрѣша́ютсѧ ѕло́бы, и҆́же зна́менїѧ <<ѻ҃в: 143>> ѿ тебѐ и҆спроси́вшїи. є҆си́ бо ᲂу҆го́дникъ бж҃їй всесвѣ́телъ, позна́нъ бы́лъ є҆сѝ вѣ́ренъ.
Ѡ҆бнови́въ прилѣ́жнымъ ра́ломъ дꙋ́шꙋ твою̀, сщ҃е́нный ѻ҆́тче, добродѣ́тєльнаѧ въ ню̀ вве́рглъ є҆сѝ премꙋ́дреннѡ многоплѡ́днаѧ сѣ́мена: и҆ пожа́лъ є҆сѝ многоразли́чныхъ и҆сцѣле́нїй бога̑тыѧ кла́сы.
Крѣ́постїю дх҃а ѻ҆́тче возмо́гъ, держа́вꙋ вра́жїю и҆ си́лꙋ низложи́лъ є҆сѝ: и҆ похвалꙋ̀ побѣ́днꙋю по́чести прїѧ́лъ є҆сѝ прпⷣбне, чꙋде́сными сїѧ̑нїи.
Бг҃оро́диченъ: Гдⷭ҇ь съ тобо́ю пречⷭ҇таѧ, ꙗ҆́коже и҆зво́лилъ є҆́сть, бы́въ ѻ҆трокови́це, всѣ́хъ на́съ ѿ ѻ҆́бласти льсти́вагѡ хода́тайствомъ твои́мъ и҆зба́вилъ є҆́сть: тѣ́мже тѧ̀ ны́нѣ по до́лгꙋ ро́дове родѡ́въ ᲂу҆бл҃жа́емъ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ в҃:
Подо́бенъ: Вы́шнихъ и҆щѧ̀:
Чистото́ю дꙋше́вною бжⷭ҇твеннѡ воѡрꙋжи́всѧ, и҆ непреста̑нныѧ мл҃твы, ꙗ҆́кѡ копїѐ врꙋчи́въ крѣ́пкѡ, пробо́лъ є҆сѝ бѣсѡ́вскаѧ ѡ҆полчє́нїѧ, и҆́мⷬ҇къ, ѻ҆́тче на́шъ, молѝ непреста́ннѡ ѡ҆ всѣ́хъ на́съ.
І҆́косъ: Возлюби́въ прпⷣбне хрⷭ҇то́вы бжⷭ҇твєнныѧ за́пѡвѣди, и҆ возненави́дѣвъ мі́ра сегѡ̀ наслажде́нїе, прише́лъ є҆сѝ ᲂу҆се́рднѡ къ томꙋ̀, и҆ бы́лъ є҆сѝ свѣти́льникъ просвѣща́ѧ концы̀ блиста́нїемъ дꙋхо́внымъ: тѣ́мъ припа́даѧ молю́ тѧ: просвѣтѝ моѝ ѻ҆́чи дꙋше́внїи, воспѣ́ти твоѧ̑ по́двиги, поще́нїе, и҆ бдѣ́нїе, и҆ сле́зы, болѣ́зни и҆ и҆зможде́нїе тѣ́ла, бл҃же́нныѧ ра́ди бꙋ́дꙋщїѧ жи́зни, є҆ѧ́же ны́нѣ наслажда́ешисѧ. молѝ непреста́ннѡ ѡ҆ всѣ́хъ на́съ.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е бл҃гослове́нъ є҆сѝ.
<<ѻ҃в ѡ҆б.: 144>>
Проше́дъ по́двиги пѡ́стныѧ ѻ҆́тче, ᲂу҆мо́мъ крѣ́пкимъ ᲂу҆́мъ прего́рдый бж҃е́ственнымъ смире́нїемъ смири́лъ є҆сѝ, поѧ̀: бл҃гослове́нъ бг҃ъ ѻ҆тє́цъ на́шихъ.
Краснѣ́йшее прозѧбе́нїе ѻ҆́тче, въ домꙋ̀ бж҃їи прозѧ́блъ є҆сѝ, добродѣ́тельми ᲂу҆кра́шенъ, и҆ плоды̀ чꙋде́сными ѡ҆бл҃гоꙋха́лъ є҆сѝ.
Просвѣти́въ твоѐ се́рдце, нача́льникъ бы́лъ є҆сѝ свѧще́ннагѡ собо́ра ѻ҆́тча, наказꙋ́ѧ и҆ ᲂу҆чѧ̀, и҆ всѧ̑ приводѧ̀ къ бж҃їей во́ли, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ: Но́во ѻ҆троча̀ ро́ждши пребезнача́льнаго сло́ва, ѡ҆бетша́вшыѧ ны̀ грѣхо́мъ, ѡ҆бнови́ла є҆сѝ дв҃о, и҆ пѣ́ти ᲂу҆крѣпи́ла є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃.
І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще поѧ́хꙋ: бл҃гослови́те дѣла̀ гдⷭ҇нѧ гдⷭ҇а.
Наслѣ́дниче бж҃е́ственныхъ селе́нїй, а҆́гг҃льски ѻ҆́тче, пожи́лъ є҆сѝ: тѣ́мъ со а҆́гг҃лы ликꙋ́етъ дꙋ́хъ тво́й.
Невозвра́тнѡ ше́ствовавъ ѻ҆́тче премꙋ́дре и҆ досточꙋ́дне, ведꙋ́щими къ нб҃сѝ бж҃е́ственными стезѧ́ми, ѿ ѕлѣ̀ ведꙋ́щихъ до конца̀ ᲂу҆клони́лсѧ є҆сѝ.
Все́льшеюсѧ бл҃года́тїю въ дꙋ́шꙋ твою̀ ѻ҆́тче, лꙋка́внѡ живꙋ́щїи въ человѣ́цѣхъ нечи́стїи дꙋ́си ѿгони́ми быва́ютъ.
Бг҃оро́диченъ: Вода̀ є҆сѝ неизчерпа́емаѧ дв҃о, ѿ неѧ́же всѝ пїю́ще бл҃года́ти и҆сполнѧ́емсѧ, дꙋше́ю и҆ тѣ́ломъ ѡ҆сщ҃а́еми.
Пѣ́снь ѳ҃.
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ человѣ́къ: тѣ́мже пречтⷭ҇ꙋю бцⷣꙋ вѣ́рнїи велича́емъ.
И҆сцѣле́нїе и҆сточа́етъ бога́тнѡ честна́ѧ твоѧ̀ ра́ка бж҃їимъ дх҃омъ, и҆ стра̑сти многовре́менныѧ и҆сцѣлѧ́етъ ѻ҆́тче, приходѧ́щихъ къ тебѣ̀, и҆ прого́нитъ лꙋка̑выѧ дꙋ́хи лю̑тыѧ, и҆ воздвиза́етъ вѣ̑рныѧ, восхвали́ти твоѧ̑ свѣ̑тлыѧ по́двиги.
Ꙗ҆́кѡ вели́кое со́лнце на́мъ, вели́чїемъ пѡ́двигъ твои́хъ возсїѧ́лъ є҆сѝ и҆ ѡ҆зари́лъ є҆сѝ бг҃омꙋ́дре, всѧ̑ зємны́ѧ концы̀. <<ѻ҃г: 145>> ᲂу҆́меръ преше́лъ є҆сѝ ѿ свѣ́та къ свѣ́тꙋ возсїѧ́вшемꙋ. тѣ́мъ вопїе́мъ тѝ: просвѣтѝ на̑ша помышлє́нїѧ ѻ҆́тче прпⷣбне, и҆́мⷬ҇къ.
Тѣ́ло твоѐ бл҃же́нне, терпѣли́вое свѧза́вшеесѧ вери́гами стра̑сти неисцѣ̑льныѧ прикоснове́нїемъ и҆сцѣлѧ́етъ, бг҃ꙋ и҆ сп҃сꙋ тѧ̀ вельмѝ просла́вльшꙋ, ѻ҆́тче премꙋ́дре и҆ досточꙋ́дне, и҆́мⷬ҇къ, ꙗ҆́кѡ дѣ́лы твои́ми до́брыми просла́вльшꙋсѧ, прпⷣбне.
Процвѣ́лъ є҆сѝ въ по́стническихъ ᲂу҆до́лїѧхъ прехва́льне ѻ҆́тче на́шъ, ꙗ҆́кѡ ши́покъ бл҃гоꙋха́ненъ, и҆ ꙗ҆́коже крі́нъ ѡ҆б̾юха́лъ є҆сѝ сѡ́вѣсти вѣ́рныхъ добродѣ́тельми и҆ чꙋдесы̀. тѣ́мже прпⷣбне, ѿженѝ ѿ на́съ стра̑сти смердѧ́щыѧ.
Бг҃оро́диченъ: Просвѣтѝ чтⷭ҇аѧ дв҃о, сѣ́тꙋющее се́рдце моѐ при́снѡ престꙋпле́ньми, и҆ жите́йскими мно́гими молва́ми, не ѡ҆ста́ви менѐ врагѡ́мъ бы́ти въ ра́дость, ꙗ҆́кѡ да сла́влю тѧ̀, и҆ любо́вїю пою̀ препѣ́таѧ.
Свѣти́ленъ.
Подо́бенъ: Жєны̀ ᲂу҆слы́шите:
Процвѣ́лъ є҆сѝ ꙗ҆́кѡ фі́нїѯъ дв҃дски ѻ҆́тче, и҆ ѻ҆би́тель ꙗ҆ви́лсѧ є҆сѝ дх҃а прест҃а́гѡ, и҆ сла́вна тѧ̀ вселе́ннѣй показа̀. ѡ҆ на́съ непреста́ннѡ молѝ, почита́ющихъ вѣ́рою пречтⷭ҇нꙋ́ю па́мѧть твою̀, прпⷣбне, и҆́мⷬ҇къ.
Бг҃оро́диченъ: Тѧ̀ пѣ́сньми немо́лчными ᲂу҆бл҃жа́емъ дв҃о, ꙗ҆́кѡ ѿ трⷪ҇цы є҆ди́наго родила̀ є҆сѝ бцⷣе, и҆ но́сиши на бж҃е́ственнꙋю рꙋкꙋ̀ пребога́тое сло́во, непремѣ́ннѡ и҆ неизмѣ́ннѡ.
На хвали́техъ стїхи̑ры, самогла́сны, гла́съ ѕ҃.
Бг҃оно́се пребл҃же́нне, и҆́мⷬ҇къ, всѐ плотско́е мꙋдрова́нїе дх҃ꙋ повинꙋ́лъ є҆сѝ, поще́нїѧ страда́ньми ᲂу҆тверди́всѧ, ꙗ҆́кѡ зла́то въ горни́лѣ и҆скꙋше́но сїѧ́ѧ ꙗ҆ви́всѧ, прїѧ́телище бы́лъ є҆сѝ дх҃а прест҃а́гѡ. собра́въ мона́шествꙋющихъ мно́жєства, и҆ ᲂу҆чє́нїи твои́ми, ꙗ҆́кѡ нѣ́коею лѣ́ствицею восхо́дною на нб҃о, на высотꙋ̀ добродѣ́телей возве́лъ є҆сѝ. помина́й на́съ чтꙋ́щихъ па́мѧть твою̀ при́снѡ сщ҃е́ннꙋю, и҆ молѝ сп҃сти́сѧ дꙋша́мъ на́шымъ. [Два́жды.]
<<ѻ҃г ѡ҆б.: 146>>
Возсїѧ̀ дне́сь пресвѣ́тлаѧ и҆ всепра́зднственнаѧ па́мѧть твоѧ̀, пресла́вне, и҆́мⷬ҇къ, созыва́ющи многочи́сленное пѡ́стникъ сосло́вїе, и҆ прпⷣбныхъ ликостоѧ̑нїѧ: а҆́гг҃лы же съ человѣ́ки ꙗ҆́кѡ вои́стиннꙋ къ похвале́нїю въ трⷪ҇цѣ покланѧ́ема хрⷭ҇та̀ бг҃а на́шегѡ. тѣ́мже притека́юще ко сщ҃е́ннѣй ра́цѣ моще́й твои́хъ, и҆сцѣле́нїѧ да́ры ѻ҆би́льнѡ прїе́млемъ, и҆ тебѐ вѣнча́вшаго хрⷭ҇та̀ прославлѧ́емъ, сп҃са дꙋ́шъ на́шихъ.
Бг҃оно́се пребл҃же́нне, ѻ҆́тче, и҆́мⷬ҇къ, ты̀ прⷪ҇ро́чески слеза́ми зе́млю ѡ҆мака́лъ є҆сѝ, и҆ не да́лъ є҆сѝ сна̀ твои́ма ѻ҆чи́ма, ни вѣ́ждома твои́ма дрема́нїѧ: серде́чное жела́нїе ко хрⷭ҇тꙋ̀ ꙗ҆влѧ́ѧ, є҆го́же возлюби́лъ є҆сѝ. тѣ́мъ мона́хѡвъ ѡ҆́бразъ бы́лъ є҆сѝ, и҆ всѧ́кїѧ добродѣ́тели ви́дъ и҆спра́вилъ є҆сѝ: тѣ́мже тѧ̀ ᲂу҆бл҃жа́емъ велича́юще тебѐ просла́вльшаго.
Сла́ва, гла́съ в҃:
Прпⷣбне ѻ҆́тче, и҆з̾ младе́нства добродѣ́тели прилѣ́жнѡ ѡ҆бꙋчи́всѧ, ѻ҆рга́нъ бы́лъ є҆сѝ ст҃а́гѡ дх҃а, и҆ ѿ негѡ̀ прїи́мъ чꙋде́съ дѣ́йство, ᲂу҆вѣща́лъ є҆сѝ человѣ́ки преѡби́дѣти сла̑дкаѧ: ны́нѣ же бж҃е́ственнымъ свѣ́томъ чистѣ́йше ѡ҆сїѧва́емь, просвѣтѝ и҆ на́шѧ мы̑сли, и҆́мⷬ҇къ, ѻ҆́тче на́шъ.
И҆ ны́нѣ бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохранѝ мѧ̀ под̾ кро́вомъ твои́мъ.
Крⷭ҇тобг҃оро́диченъ.
Подо́бенъ: Є҆гда̀ ѿ дре́ва:
Поношє́нїѧ претерпѣ́ла є҆сѝ мнѡ́гаѧ, на крⷭ҇тѣ̀ возноси́ма всѧ́ческихъ творца̀ ви́дѧщи пречⷭ҇таѧ, стенѧ́щи глаго́лала є҆сѝ: прест҃ы́й гдⷭ҇и, сн҃е мо́й, и҆ бж҃е мо́й, ка́кѡ почти́ти хотѧ̀ твоѐ созда́нїе влⷣко, терпи́ши пло́тїю безчє́стїѧ, сла́ва мно́гомꙋ твоемꙋ̀ млⷭ҇рдїю и҆ соше́ствїю чл҃вѣколю́бче.
А҆́ще и҆́мать на стїхо́внѣ Сла́вꙋ, глаго́ли вече́рнїй:
И҆ ны́нѣ, бг҃оро́диченъ: и҆лѝ крⷭ҇тобг҃оро́диченъ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.