Слꙋ́жба а҆пⷭлѡмъ
<<н҃в: 103>>
[глⷡ҇а ѳ҃] СЛꙊ́ЖБА Ѻ҆́БЩА
а҆пⷭ҇лѡмъ двѣма̀ и҆ мнѡ́гимъ.
Ве́чера,
на Гдⷭ҇и воззва́хъ, стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Ꙗ҆́кѡ самови́дцы и҆ свидѣ́телїе ꙳ сло́ва воплоще́нїѧ ꙳ ᲂу҆чн҃цы̀ пребога́тїи ᲂу҆бл҃жа́етесѧ: ꙳ ꙗ҆́кѡ мо́лнїѧ бо сїѧ́ющїи ꙳ мі́рꙋ ꙗ҆ви́стесѧ, ꙳ и҆ ꙗ҆́кѡ го́ры мы̑сленныѧ сла́дѡсти и҆ска́паете, ꙳ ꙗ҆́кѡ приснотекꙋ́щыѧ рѣ́ки ра̑йскїѧ раздѣли́вшесѧ, ꙳ ꙗ҆зы́чєскїѧ цр҃кви ꙳ бж҃е́ственными напоѧ́ете вода́ми.
Ꙗ҆́кѡ лꙋчы̀ блиста́ющїи зарѧ́ми дꙋхо́вными, ꙳ въ мі́ръ ве́сь по́слани бы́сте, ꙳ чꙋде́съ дѣ́йство незави́стнѡ подаю́ще, ꙳ слꙋжи́телїе хрⷭ҇то́выхъ та̑инъ бы́вше ꙳ и҆ бг҃опи̑санныѧ скрижа̑ли ꙳ бж҃їѧ бл҃года́ти, ꙳ напи̑санныѧ бг҃онаꙋче́ннагѡ зако́на, ꙳ сщ҃еннотаи́нницы пребога́тїи.
Ры́барскаѧ тро́сть ꙳ любомꙋ́дрыхъ шата̑нїѧ, ꙳ и҆ виті̑йскїѧ стрꙋи̑ пречерта̀, ꙳ бг҃омꙋ̑драѧ ᲂу҆чє́нїѧ ꙳ и҆з̾ѡбраже́нїй догма́ты; ꙳ и҆ та̑инъ бл҃ги́хъ ꙗ҆́снѡ и҆зложи́вше є҆ѵⷢ҇лїе, ꙳ и҆ пи́щи присносꙋ́щныѧ прича́стїе, ꙳ и҆ а҆́гг҃льское наслажде́нїе, и҆ пребыва́ющꙋю сла́вꙋ.
Сла́ва, и҆ ны́нѣ, бг҃оро́диченъ:
Ра́дꙋйсѧ, сл҃нце свѣтоза́рное, сл҃нца незаходи́магѡ носи́ло, ꙗ҆́же сл҃нце возсїѧ́вшаѧ недомы́сленное. ра́дꙋйсѧ, ᲂу҆́ме, ѡ҆блиста́ѧ бж҃е́ственными сїѧ̑нїи: лꙋча̀ ѡ҆блиста́нїѧ, ѡ҆зарѧ́ющаѧ землѝ концы̀, ꙗ҆́же вои́стиннꙋ златоза́рнаѧ, всѧ̀ до́браѧ и҆ пренепоро́чнаѧ, ꙗ҆́же свѣ́тъ невече́рнїй вѣ̑рнымъ ѡ҆блиста́вшаѧ.
Крⷭ҇тобг҃оро́диченъ: Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречⷭ҇таѧ, хрⷭ҇та̀ чл҃вѣколю́бца, ꙳ пла́каше <<н҃в ѡ҆б.: 104>> вопїю́щи: ꙳ что̀ сїѐ, сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ; ꙳ и҆ тщи́шисѧ безча́дствовати мѧ̀, вселюбе́знѣйше. ꙳ дивлю́сѧ, бл҃гоꙋтро́бне, твоемꙋ̀ во́льномꙋ распѧ́тїю.
А҆́ще и҆́мꙋтъ, самогла́сенъ. Сла́ва, гла́съ и҃:
Ю҆́же проидо́сте тва́рь просвѣ́щше, сп҃совы ᲂу҆чн҃цы̀, ле́сть і҆́дѡльскꙋю ꙗ҆́кѡ хвра́стїе попали́вше ᲂу҆чє́нїи ва́шими, ꙗ҆зы́ки ѿ неразꙋ́мїѧ глꙋбины̀, къ бж҃е́ственномꙋ ра́зꙋмꙋ ᲂу҆лови́вше сп҃со́сте: и҆ ны́нѣ моли́тесѧ хрⷭ҇тꙋ̀, ꙗ҆́кѡ да млⷭ҇тивъ на́мъ бꙋ́детъ въ де́нь сꙋ́дный.
И҆ ны́нѣ, бг҃оро́диченъ:
Прїимѝ гла́съ молє́бникъ твои́хъ, пречⷭ҇таѧ дв҃о бцⷣе, и҆ молѝ гдⷭ҇а непреста́ннѡ, прегрѣше́нїй ѡ҆ставле́нїе дарова́ти на́мъ.
Крⷭ҇тобг҃оро́диченъ: Гдⷭ҇и, є҆гда́ тѧ сл҃нца првⷣнаго, ви́дѣ со́лнце на дре́вѣ повѣ́шена, лꙋчы̀ скры̀, и҆ лꙋна̀ свѣ́тъ во тмꙋ̀ преложѝ: всенепоро́чнаѧ же твоѧ̀ мт҃и ᲂу҆тро́бою ᲂу҆ѧзвлѧ́шесѧ.
А҆́ще пра́зднꙋеши съ полѷеле́емъ. глаго́ли бг҃оро́диченъ: воскрⷭ҇ный: Цр҃ь нбⷭ҇ный: [Пи́санъ въ концѣ̀ кни́ги сеѧ̀.]
Вхо́дъ. Прокі́менъ днѐ.
Чтє́нїѧ а҆пⷭ҇льскаѧ. [Пи̑саны въ концѣ̀ кни́ги сеѧ̀.]
На стїхо́внѣ стїхи̑ры, гла́съ ѕ҃:
Подо́бенъ: Тридне́венъ:
Вели́кихъ та̑инъ бж҃їихъ ꙳ слꙋжи́телїе бы́сте бг҃осло́вцы, ꙳ и҆ бг҃ови́дцы ᲂу҆чн҃цы̀, ꙳ и҆ бл҃года́ть и҆сцѣле́нїй прїи́мше, ꙳ всѣ́хъ человѣ̑къ болѣ̑зни и҆сцѣлѧ́ете.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Вели́кое прибѣ́жище, ꙳ и҆ покро́въ дꙋ́шъ на́шихъ, ꙳ дꙋхѡ́въ лю́тыхъ прогна́нїе, ꙳ вы̀ є҆стѐ бг҃ови́дцы а҆пⷭ҇ли гдⷭ҇ни: ꙳ тѣ́мже ва́съ при́снѡ почита́емъ.
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Ѿ всѧ́кагѡ ѡ҆бстоѧ́нїѧ, ꙳ и҆ врежде́нїѧ бѣсо́вскагѡ, ꙳ и҆ <<н҃г: 105>> прегрѣше́нїѧ, и҆ ѕла́гѡ плѣне́нїѧ и҆зба́вите, ꙳ вѣ́рою ва́съ восхвалѧ́ющихъ, ꙳ бж҃е́ственнїи а҆пⷭ҇ли бл҃же́ннїи.
Сла́ва, гла́съ д҃:
Ѻ҆рга́ны до́брѣ соста́влени, бжⷭ҇твеннымъ ѡ҆кормле́нїемъ а҆пⷭ҇ли, ꙗ҆зы́кѡвъ зва́нїю вы̀ ᲂу҆вѣ́ристесѧ, къ позна́нїю хрⷭ҇то́вꙋ наставлѧ́юще, словесы̀ и҆ дѣѧ̑нїи: и҆ всѧ̑ просвѣти́ли є҆стѐ и҆сповѣ́дати и҆́стинное і҆и҃са бж҃ество̀, сп҃са дꙋ́шъ на́шихъ.
А҆́ще пра́зднꙋеши, глаго́ли бг҃оро́диченъ: воскрⷭ҇ный: При́зри на молє́нїѧ твои́хъ ра̑бъ:
А҆́ще ли не пра́зднꙋеши, глаго́ли се́й бг҃оро́диченъ:
И҆мꙋ́ще тѧ̀, бцⷣе, ᲂу҆пова́нїе и҆ предста́тельство, вра́жїихъ навѣ̑тъ не ᲂу҆бои́мсѧ, ꙗ҆́кѡ сп҃са́еши дꙋ́шы на́шѧ.
Крⷭ҇тобг҃оро́диченъ: Ѡ҆рꙋ́жїе, [ꙗ҆́коже речѐ сѷмеѡ́нъ,] се́рдце твоѐ про́йде, всест҃а́ѧ влⷣчце, є҆гда̀ ᲂу҆зрѣ́ла є҆сѝ и҆з̾ тебє̀ возсїѧ́вшаго неизрече́ннаго сло́ва, ѿ беззако́нныхъ ꙗ҆́кѡ ѡ҆сꙋжде́на, на крⷭ҇тѣ̀ возноси́ма, ѻ҆́цта и҆ же́лчи вкꙋша́юща, ре́бра же и҆скопова́ема, рꙋка́ми же и҆ нога́ми пригвожда́ема: рыдаю́щи восклица́ше, вопїю́щи мт҃рски: что̀ сїѐ, ча́до сла́дкое, но́вое та́инство;
Тропа́рь, гла́съ г҃:
А҆пⷭ҇ли ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, бг҃оро́диченъ: по гла́сꙋ тропарѧ̀.
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ сѣда́ленъ, гла́съ а҃.
Подо́бенъ: Гро́бъ тво́й, сп҃се:
Ли́къ дꙋхо́вный а҆пⷭ҇льскїй, мі́рꙋ посла́сѧ та́йнѡ, ѿ бг҃а вы́шнѧгѡ, и҆ нево́лею стра́ждꙋщихъ вра́чеве ꙗ҆ви́шасѧ, трїѷпоста́снаго є҆ди́нственнѣ призыва́юще, бжⷭ҇твенное воплоще́нїе є҆мманꙋ́ила гдⷭ҇а, мꙋ́дрѣ написа́ша. [Два́жды.]
<<н҃г ѡ҆б.: 106>>
Сла́ва, и҆ ны́нѣ, бг҃оро́диченъ:
Кꙋпинꙋ̀ ю҆́же мѡѷсе́й неѡпали́мꙋ ви́дѣ, го́рꙋ бж҃їю, ст҃ы́й ѡ҆́блакъ, сѣ́нь нескве́рнꙋю, бг҃опрїѧ́тнꙋю трапе́зꙋ, пала́тꙋ высо́кагѡ цр҃ѧ̀, всесвѣ́тлꙋю и҆ непроходи́мꙋю две́рь, дв҃о, пое́мъ тѧ̀.
По в҃-й каѳі́смѣ сѣда́ленъ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
Свѣтолꙋ́чными сїѧ̑нїи, ꙗ҆́коже ѕвѣ́зды зємны́ѧ концы̀ просвѣща́ете, ᲂу҆чє́нїи ст҃ы́ѧ про́повѣди, нбⷭ҇нїи таи́нницы гдⷭ҇ни а҆пⷭ҇ли. [Два́жды.]
Сла́ва, и҆ ны́нѣ, бг҃оро́диченъ:
Те́плое застꙋпле́нїе сꙋ́щихъ въ нꙋ́ждахъ, на́шꙋ по́мощь, и҆ къ бг҃ꙋ премѣне́нїе, є҆ѧ́же ра́ди тлѝ и҆зба́вихомсѧ, бг҃ꙋ вѣ́рнїи ᲂу҆бл҃жа́емъ.
По Хвали́те и҆́мѧ гдⷭ҇не:
Припѣ́въ: Велича́емъ ва́съ, ст҃і́и а҆пⷭ҇ли, ве́сь мі́ръ ᲂу҆че́ньми свои́ми просвѣти́вшыѧ, и҆ всѧ̑ концы̀ ко хрⷭ҇тꙋ̀ приве́дшыѧ.
Ѱало́мъ и҆збра́нный: Нб҃са̀ повѣ́даютъ сла́вꙋ бж҃їю:
По полѷеле́и сѣда́ленъ, гла́съ г҃.
Подо́бенъ: Бж҃е́ственныѧ:
Бж҃е́ственнїи трꙋбы̑ ᲂу҆тѣ́шителѧ, возглаша́юще дыха́нїе слове́съ сп҃се́нїѧ, мі́рꙋ возгласи́те, и҆ и҆̀же во мра́цѣ пре́лести спѧ́щыѧ, къ свѣ́тꙋ бг҃оразꙋ́мїѧ возста́вивше приведи́те, бж҃е́ственнагѡ свѣ́та а҆пⷭ҇ли, молѧ́ще хрⷭ҇та̀ бг҃а, сп҃сти́сѧ дꙋша́мъ на́шымъ.[Два́жды.]
Сла́ва, и҆ ны́нѣ, бг҃оро́диченъ:
Бж҃е́ственнагѡ є҆стества̀ не ѿлꙋ́чьсѧ, пло́ть бы́въ во чре́вѣ твое́мъ: но бг҃ъ вочл҃вѣ́чьсѧ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ приле́жнѡ молѝ, дарова́ти на́мъ ве́лїю млⷭ҇ть.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Во всю̀ зе́млю и҆зы́де вѣща́нїе и҆́хъ:
Сті́хъ: Нб҃са̀ повѣ́даютъ сла́вꙋ бж҃їю:
Всѧ́кое дыха́нїе:
<<н҃д: 107>>
Та́же є҆ѵⷢ҇лїе а҆пⷭ҇лꙋ є҆ди́номꙋ. [Пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃:
Всечⷭ҇тны́й а҆пⷭ҇лѡвъ пра́здникъ приспѣ̀ цр҃кви хрⷭ҇то́вѣ, хода́тайствꙋющїй сп҃се́нїе всѣ̑мъ на́мъ. та́йнѡ ᲂу҆́бѡ восплеска́вше къ си̑мъ рце́мъ: ра́дꙋйтесѧ, свѣти́льницы сꙋ́щымъ во тмѣ̀, мы́сленнагѡ сл҃нца зарѝ ѡ҆блиста́ющїи. ра́дꙋйтесѧ, а҆пⷭ҇ли, ᲂу҆че́нїй бж҃е́ственныхъ ѡ҆снова̑нїѧ незы́блєма, дрꙋ́зи хрⷭ҇то́вы, сосꙋ́ди честні́и: прїиди́те посредѣ̀ на́съ неви́димѡ, сподоблѧ́юще дарѡ́въ невеще́ственныхъ, ва́шъ пра́здникъ восхвалѧ́ющихъ пѣ́сньми.
Канѡ́нъ, гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Ли́къ а҆пⷭ҇льскїй пѣ́ти мѝ жела́ющꙋ, хрⷭ҇тѐ, мл҃твами и҆́хъ, ꙗ҆́кѡ бг҃ъ зарю̀ прест҃а́гѡ дх҃а да́рꙋй мнѣ̀, и҆ свѣ́тъ премꙋ́дрости твоеѧ̀.
Оу҆крѣ́пльшесѧ си́лою твое́ю и҆ бл҃года́тїю, хрⷭ҇тѐ, си́лꙋ проти́вныхъ вра̑гъ разрꙋши́ша чтⷭ҇ні́и твоѝ а҆пⷭ҇ли, бг҃ови́дцы бы́вше, неѡскꙋ́днымъ къ тебѣ̀ манове́нїемъ.
И҆сцѣлє́нїѧ творѧ́ще, влⷣко, твои́мъ и҆́менемъ, ꙗ҆зы́чєскаѧ совокꙋплє́нїѧ твои́мъ позна́нїемъ ᲂу҆лови́ша сла́внїи а҆пⷭ҇ли, и҆ свѣ́томъ твои́мъ просвѣти́ша.
Премꙋ́дрости нбⷭ҇ныѧ наꙋчи́вшесѧ, пресла́внїи хрⷭ҇то́вы а҆пⷭ҇ли, ꙗ҆́вственнѡ премꙋ́дрїи ѡ҆бꙋи́сте многослѡ́вїѧ нечести́выхъ, поспѣше́нїемъ проповѣ́данїѧ.
Бг҃оро́диченъ: Ѿ трⷪ҇цы пребж҃е́ственныѧ є҆ди́наго, пречⷭ҇таѧ, родила̀ є҆сѝ, и҆з̾ тебє̀ пло́тїю ꙗ҆́вльшагосѧ по на́мъ, бл҃говоле́нїемъ ро́ждшагѡ и҆̀, и҆ дѣ́йствомъ дх҃а прест҃а́гѡ, дв҃о мт҃и.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
<<н҃д ѡ҆б.: 108>>
Нбⷭ҇наѧ и҆ чтⷭ҇на̑ѧ бг҃овѣща́юще на землѝ ᲂу҆чє́нїѧ, ѧ҆зы́ки ѻ҆́гненными и҆звѣствꙋ́юще. проповѣ́дницы хрⷭ҇то́вы пре́дали є҆стѐ.
Показа́лъ є҆сѝ нб҃са̀ словє́снаѧ, ᲂу҆ч҃нкѝ твоѧ̑, влⷣко, сла́вꙋ твою̀ повѣ́дающыѧ всѣ̑мъ концє́мъ.
Напи́сани бы́вше на нб҃сѣ́хъ, и҆ ꙗ҆́вльшесѧ хрⷭ҇тꙋ̀ ссє́льницы, чтꙋ́щихъ ва́съ любо́вїю ны́нѣ, премꙋ́дрїи, сохрани́те.
Бг҃оро́диченъ: Всели́выйсѧ въ на́съ, и҆́же въ вы́шнихъ живы́й, пречⷭ҇таѧ, пло́ть бо прїи́мъ ѿ тебє̀ без̾ сѣ́мене, ꙗ҆ви́сѧ.
Сѣда́ленъ, гла́съ и҃.
Подо́бенъ: Премꙋ́дрости:
Мре́жею слове́съ бжⷭ҇твенныхъ, ры̑бы ᲂу҆лови́вше словє́сныѧ, сїѧ̑ принеслѝ є҆стѐ нача́токъ бг҃ꙋ на́шемꙋ, и҆ въ хрⷭ҇то́вы ꙗ҆́звы жела́юще ѡ҆блещи́сѧ, подѡ́бницы стрⷭ҇те́й є҆гѡ̀ ꙗ҆ви́лисѧ є҆стѐ. тѣ́мъ соше́дшесѧ по до́лгꙋ чти́мъ, а҆пⷭ҇ли сла́внїи, всепра́зднственнꙋю па́мѧть ва́шꙋ, и҆ согла́снѡ вопїе́мъ ва́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ тѧ̀ без̾ сѣ́мене ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за млⷭ҇рдїе млⷭ҇ти: долготерпѣли́ве гдⷭ҇и, млⷭ҇ти бе́здно и҆ и҆сто́чниче неисчерпа́емый, ᲂу҆млⷭ҇рдисѧ и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
<<н҃є: 109>>
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Глаго́лѡвъ бжⷭ҇твенныхъ а҆пⷭ҇лъ вѣща́нїе ѻ҆гнеѡбра́знѡ про́йде вселе́ннꙋю всю̀: ле́сти ᲂу҆́бѡ ве́щь попалѧ́ющее, и҆ просвѣща́ющее бл҃года́тїю бл҃гочести́выхъ совокꙋплє́нїѧ.
Почернѣ́вшїй мра́комъ безбо́жїѧ мі́ръ, бг҃озра́чнаѧ свѣти̑ла просвѣти́ша зарѧ́ми бл҃года́ти, ᲂу҆ченицы̀ гдⷭ҇ни ꙗ҆́вльшесѧ сїѧ́нїемъ проповѣ́данїѧ.
Сщ҃е́нными зарѧ́ми просвѣще́ни мы́сленнагѡ со́лнца, ꙗ҆́кѡ со́лнце въ мі́рѣ сїѧ́ете прехва́льнїи, свѣ́томъ бжⷭ҇твеннымъ пре́лести мглꙋ̀ ѿгонѧ́юще.
Же́злъ си́лы и҆мꙋ́ще крⷭ҇тъ тво́й, сла́ное житїѧ̀ самови́дцы твоѝ, сло́ве, мо́ре пресѣко́ша, ꙗ҆́кѡ ко́ни смꙋща́юще многобо́жїѧ во́ды.
Бг҃оро́диченъ: Оу҆кра́шено разли́чнымъ свѣтоли́тїемъ нб҃о ѡ҆дꙋшевле́нное, тебѐ цр҃ѧ̀ ца́рствꙋющихъ, хрⷭ҇тѐ, дв҃и́ца пречтⷭ҇аѧ ны́нѣ ꙗ҆́кѡ бцⷣа сла́вима є҆́сть.
Пѣ́снь є҃.
І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Бжⷭ҇твєнныѧ твоѧ̑ и҆ премꙋ́дрыѧ слꙋжи́тєли свѣ́тъ показа́лъ є҆сѝ въ мі́рѣ, тебѐ незаходи́маго свѣ́та всѣ̑мъ возвѣща́ющыѧ.
И҆̀же всѧ́кꙋ добродѣ́тель ꙗ҆́вственнѡ проше́дше, а҆пⷭ҇ли, разли̑чныѧ бѣсо́вскїѧ ѕло́бы сплетє́нїѧ разрꙋши́сте.
Ꙗ҆ви́ша на́мъ трⷪ҇ческое сїѧ́нїе, во є҆ди́нствѣ бж҃ества̀, ѻ҆́гненными ѧ҆зы́ки вѣща́юще, а҆пⷭ҇ли.
Бг҃оро́диченъ: Тѧ̀ ѡ҆рꙋ́жїе непобѣди́мое на врагѝ предлага́емъ, тѧ̀ ᲂу҆твержде́нїе, и҆ наде́ждꙋ на́шегѡ сп҃се́нїѧ, бг҃оневѣ́сто, стѧжа́хомъ.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
<<к҃є ѡ҆б.: 50>>
Оу҆тверди́въ ᲂу҆чн҃кѝ твоѧ̑, сп҃се, премꙋ́дростїю и҆ чꙋдесы̀, си́льнѣйшыѧ содѣ́лалъ є҆сѝ є҆́ллинскагѡ бꙋесло́вїѧ, и҆ си́хъ прелє́стнаѧ разрꙋши́ша велѣ̑нїѧ.
Бж҃е́ственныѧ рѣ́ки премꙋ́дрости, напо́лниша сп҃си́тельныхъ во́дъ ᲂу҆дѡ́лїѧ всѧ̑ цр҃кѡ́внаѧ, ѿ и҆стѡ́чникъ сп҃си́тельныхъ стрꙋѧ́ми ѡ҆бога́щше.
Ꙗ҆́вльшесѧ живѡ́тныѧ ѕвѣ́зды, прехва́льнїи, разори́сте всю̀ мра́чнꙋю пре́лесть свѣтоза́рными сїѧ̑нїи, и҆ бг҃оразꙋ́мїѧ свѣ́тъ возсїѧ́вше.
Бг҃оро́диченъ: Всю̀ тѧ̀ голꙋби́цꙋ соверше́ннꙋ и҆ предо́брꙋ, свѣ́тлый ѡ҆брѣ́тъ крі́нъ, и҆ ᲂу҆до́льный цвѣ́тъ, ѽ бг҃омт҃и, жени́хъ мы́сленный въ тѧ̀ всели́сѧ.
Конда́къ во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ д҃:
Ло́зїе ꙗ҆ви́стесѧ хрⷭ҇то́ва вїногра́да, мꙋ́дрїи, гро́здїе приносѧ́ще въ добродѣ́телехъ, вїно̀ на́мъ сп҃се́нїѧ и҆сточа́юще: є҆го́же прїе́млемъ: весе́лїѧ и҆сполнѧ́ющесѧ. пра́зднꙋемъ честнꙋ́ю ва́шꙋ па́мѧть, въ ню́же моли́те дарова́тисѧ на́мъ вели́цѣй ми́лости и҆ ѿпꙋще́нїю грѣхѡ́въ, гдⷭ҇ни а҆пⷭ҇ли.
І҆́косъ: Ꙗ҆́кѡ ᲂу҆ченицы̀ всѣ́хъ влⷣки, мре́жею бг҃ови́дцы ва́шихъ мл҃твъ и҆з̾ глꙋбины̀ прегрѣше́нїй и҆звлецы́те смире́ннꙋю дꙋ́шꙋ мою̀, ᲂу҆ловле́ннꙋю сѣтьмѝ бѣсо́вскихъ ко́зней: да до́брѣ преше́дъ про́чее вре́мѧ живота̀ моегѡ̀, пою̀ ва́съ любо́вїю, и҆ просла́влю житїѐ ва́ше непоро́чное, є҆́же на землѝ соверши́сте, лю́тѣ помрачє́нныѧ просвѣти́вше, трⷪ҇цꙋ бж҃е́ственнѣ честѝ наꙋча́юще, гдⷭ҇и а҆пⷭ҇ли.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Сы́ны сотвори́въ ᲂу҆чн҃кѝ твоѧ̑, и҆́же пре́жде є҆стество́мъ бг҃ъ, любо́вїю наслѣ́дники показа́лъ є҆сѝ ѻ҆ч҃ескагѡ наслѣ́дїѧ, пребл҃гі́й, и҆ ходи́ти съ тобо́ю ꙗ҆́кѡ съ бг҃омъ и҆ влⷣкою и҆зво́лилъ є҆сѝ.
<<н҃ѕ: 111>>
Премꙋ́дрости и҆зли́тїе, серде́чнꙋю широтꙋ̀, ѧ҆зы́къ доброглаго́ливъ, сло́ве, пода́въ бж҃е́ствєннымъ ᲂу҆ч҃нкѡ́мъ твои̑мъ, посла́лъ є҆сѝ проповѣ́дати є҆ѵⷢ҇лїе црⷭ҇твїѧ всѣ̑мъ концє́мъ.
Ꙗ҆́вльшесѧ ꙗ҆́кѡ ѡ҆́блацы бж҃їѧ свѣ́та, а҆пⷭ҇ли, всѣ̑мъ ѡ҆дождева́ютъ во́дꙋ животворѧ́щꙋю, зовꙋ́ще: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ: Преꙋкраше́нна бж҃їею сла́вою ꙗ҆ви́ласѧ є҆сѝ, пречⷭ҇таѧ, є҆ди́на ѿ вѣ́ка сло́во бж҃їе заче́ншаѧ, мт҃и дв҃о, бл҃гослове́нна ты̀ въ жена́хъ, всенепоро́чнаѧ влⷣчце.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бж҃е́ственный премꙋ́дрый ли́къ а҆пⷭ҇лъ хрⷭ҇то́выхъ, ѻ҆гне́мъ дх҃а, ꙗ҆́коже пле́велы попали́ша многоразли̑чнаѧ бѣсѡ́вскаѧ чти̑лища, и҆ вѣ́рныхъ сердца̀ просвѣти́ша, вопїю́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Согла́снѡ бжⷭ҇твєнныѧ ᲂу҆ч҃нкѝ хрⷭ҇то́вы а҆пⷭ҇лы, ꙗ҆̀же возгремѣ́вшыѧ на́мъ бжⷭ҇твєннаѧ велѣ̑нїѧ, приста̑нища вѣ́рныхъ, бл҃года́тели ѻ҆́бщыѧ человѣ́чествꙋ, сп҃сꙋ слꙋжи́тєли почти́мъ.
Всечестны̑ѧ и҆ вмѣсти́тєльныѧ сосꙋ́ды добродѣ́телей. человѣ́ческїѧ нача́тки, проповѣ́данїѧ трꙋбы̑, пото́ки нетлѣ́нныѧ жи́зни, бг҃онѡ́сныѧ мѡ́лнїи, и҆сцѣле́нїй и҆сто́чники, кра́сныѧ но́ги є҆ѵⷢ҇лїа почти́мъ.
Бг҃оро́диченъ: По́лный сы́й смирѧ́етсѧ на́съ ра́ди, да и҆сполне́нїѧ є҆гѡ̀ причасти́мсѧ: въ пречⷭ҇тое бо чре́во твоѐ вше́дъ неѡбыме́нный, ѿ ѻ҆ч҃ескихъ нѣ́дръ не ѿстꙋ́пль воплоти́сѧ. тѣ́мъ тѧ̀ всѝ бл҃гослови́мъ, мр҃і́е бг҃оневѣ́стнаѧ.
Пѣ́снь ѳ҃.
І҆рмо́съ: Ка́мень нерꙋкосѣ́чный, ѿ несѣко́мыѧ горы̀ тебє̀, дв҃о краеꙋго́льный ѿсѣче́сѧ, хрⷭ҇то́съ совокꙋпи́вый растоѧ́щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.
<<н҃ѕ ѡ҆б.: 112>>
Рѣши́ти плєни́цы прегрѣше́нїй вла́сть прїе́мше ѿ влⷣки бг҃ови́дцы, воспѣва́ющихъ ва́съ млⷭ҇тивнѡ грѣхѝ ѡ҆чи́стите, и҆ сп҃се́нїѧ сподо́бите.
Вседꙋхо́внꙋю зарю̀, сꙋще́ственнѡ ва́мъ ꙗ҆́вльшꙋюсѧ, всѝ воспрїѧ́сте, а҆пⷭ҇ли сла́внїи, въ го́рницѣ наꙋчи́вшесѧ высѡ́кимъ проповѣ́данїємъ и҆ ᲂу҆че́нїємъ, и҆ ны́нѣ досто́йнѡ бл҃жи́ми є҆стѐ.
Ва́мъ хрⷭ҇то́съ ны́нѣ дрꙋгѡ́мъ свои̑мъ почи́вшымъ вѣнцы̀ подае́тъ неꙋвѧда́ємыѧ, и҆ видѣ́нїѧ бж҃е́ственнагѡ и҆сполнѧ́етъ: є҆мꙋ́же ны́нѣ моли́тесѧ, цр҃кви всѧ̑ сп҃стѝ.
Бг҃оро́диченъ: Пло́тїю прїитѝ восхотѣ́въ, ᲂу҆краси́вый сло́вомъ всѧ́чєскаѧ въ тѧ̀ всели́сѧ, є҆ди́нꙋ ст҃ѣ́йшꙋю всѣ́хъ ѡ҆брѣ́те, и҆ бг҃ꙋ показа̀ и҆́стиннꙋю мт҃и дв҃о.
Свѣти́ленъ.
А҆пⷭ҇лы хрⷭ҇то́вы прїиди́те, лю́дїе, воспое́мъ бж҃е́ственными пѣ́сньми, проповѣ́дники вѣ́ры, ꙗ҆́кѡ молѧ́щыѧсѧ хрⷭ҇тꙋ̀ ѡ҆ дꙋша́хъ на́шихъ.
Бг҃оро́диченъ: Прест҃а́ѧ влⷣчце чⷭ҇таѧ, є҆ди́на неискꙋсобра́чнаѧ, спасе́нїе и҆ ᲂу҆пова́нїе, ты̀ молѝ и҆з̾ тебє̀ ро́ждшагосѧ бг҃а на́шего, сп҃стѝ мі́ръ ѿ ле́сти, и҆ бѣ́дъ и҆ скорбе́й.
На хвали́техъ стїхи̑ры, гла́съ и҃.
Подо́бенъ: Гдⷭ҇и, а҆́ще и҆ на сꙋди́щи:
Гдⷭ҇и, ты̀ ᲂу҆тѣ́шителѧ зарѧ́ми а҆пⷭ҇лы твоѧ̑ просвѣти́лъ є҆сѝ, и҆ свѣти̑ла положи́въ тѣ́хъ, вѣ́ры ᲂу҆твержде́нїе, мы́сленнымъ просвѣще́нїемъ ра́зꙋма твоегѡ̀, влⷣко: сегѡ̀ ра́ди покланѧ́емсѧ неизрече́нномꙋ чл҃вѣколю́бїю твоемꙋ̀. [Два́жды.]
Гдⷭ҇и, а҆пⷭ҇лъ мл҃твами ѡ҆гради́лъ є҆сѝ ста́до твоѐ сїѐ, ѿ врагѡ́въ и҆скꙋше́нїѧ невре́днѡ сохранѧ́ѧй: занѐ чтⷭ҇но́ю то̀ и҆скꙋпи́лъ є҆сѝ кро́вїю ѿ рабо́ты чꙋжда́гѡ, ꙗ҆́кѡ ще́дръ и҆ чл҃вѣколю́бецъ.
Ꙗ҆ви́стесѧ кꙋ́пнѡ во ѡ҆снова́нїи цр҃ко́внѣмъ, ꙗ҆́кѡ чтⷭ҇но́е ка́менїе, заре́ю свѣ́тлою вселе́ннѣй блиста́юще бг҃оразꙋ́мїе и҆звѣ́стнѡ, <<н҃з: 113>> а҆пⷭ҇ли бж҃е́ственнїи, трⷪ҇цѣ предстоѧ́тєли, и҆ мл҃твенницы ѡ҆ дꙋша́хъ на́шихъ.
Сла́ва, гла́съ д҃:
Ꙗ҆́кѡ крила́тїи ѻ҆рлѝ, всю̀ зе́млю претеко́сте, честна̑ѧ ᲂу҆чє́нїѧ разсѣва́юще, и҆ пле́велы ле́сти и҆стерза́юще бл҃года́тїю, и҆ многокла́сенъ пло́дъ дѣ́лающе всехва́льнїи, є҆го́же держа́тъ мы́слєнныѧ жи̑тницы во вѣ́ки, дѣ́лателю безсме́ртномꙋ бога́тнѡ соблюда́емь.
И҆ ны́нѣ, бг҃оро́диченъ:
И҆мꙋ́ще тѧ̀ бцⷣе, ᲂу҆пова́нїе и҆ предста́тельство, вра́жїихъ навѣ̑тъ не ᲂу҆бои́мсѧ, ꙗ҆́кѡ сп҃са́еши дꙋ́шы на́шѧ.
Крⷭ҇тобг҃оро́диченъ.
Подо́бенъ: Ꙗ҆́кѡ до́блѧ:
Распина́ема ви́дѧщи, ꙳ и҆ въ ре́бра пробода́ема копїе́мъ, ꙳ пречтⷭ҇аѧ, ꙳ хрⷭ҇та̀ чл҃вѣколю́бца, ꙳ пла́чꙋщи вопїѧ́ше: ꙳ что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, ꙳ вмѣ́стѡ ꙗ҆́же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀ вселюбе́знѣйшїй; ꙳ дивлю́сѧ бл҃гоꙋтро́бне ꙳ твоемꙋ̀ во́льномꙋ распѧ́тїю.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.