Слꙋ́жба а҆пⷭлꙋ
<<м҃ѕ ѡ҆б.: 92>>
[глⷡ҇а и҃] СЛꙊ́ЖБА Ѻ҆́БЩА
а҆пⷭ҇лꙋ є҆ди́номꙋ.
Ве́чера,
на Гдⷭ҇и воззва́хъ, стїхи̑ры, гла́съ и҃.
Подо́бенъ: Что̀ вы̀ нарече́мъ:
Что́ тѧ и҆менꙋ́емъ, а҆пⷭ҇ле; ꙳ нб҃о ли; ꙗ҆́кѡ сла́вꙋ и҆сповѣ́далъ є҆сѝ бж҃їю. ꙳ рѣкꙋ́ ли; ꙗ҆́кѡ тва́рь напаѧ́еши та́йнѡ. ꙳ ѕвѣздꙋ̀; ѡ҆зарѧ́ющꙋю цр҃ковь. ꙳ ча́шꙋ; пи́во ст҃о́е и҆злива́ющꙋю. ꙳ дрꙋ́га хрⷭ҇то́ва бли́жнѣйшаго; ꙳ безпло́тныхъ равносе́льника; ꙳ молѝ ѡ҆ сп҃се́нїи дꙋ́шъ на́шихъ.
Сла́вне бг҃ови́дче а҆пⷭ҇ле, ꙳ ᲂу҆краси́стѣсѧ но́зѣ твоѝ, ꙳ пꙋте́мъ про́повѣди ше́ствꙋющїи до́брѣ, ꙳ и҆ пꙋти̑ всѧ̑ вра̑жїѧ стѣснѧ́ющїи ꙳ широто́ю бжⷭ҇твеннагѡ ра́зꙋма, ꙳ сло́ва ꙗ҆́вльшагѡсѧ дебельство́мъ пло́ти, ꙳ и҆ ᲂу҆ч҃нка̀ тѧ̀ пресла́вна ꙳ и҆збра́вшаго, бл҃же́нне. ꙳ є҆го́же молѝ сп҃сти́сѧ дꙋша́мъ на́шымъ.
Вои́стиннꙋ, бг҃оглаго́ливе а҆пⷭ҇ле, ꙳ по́сланъ бы́лъ є҆сѝ ѿ хрⷭ҇та̀, ꙳ ꙗ҆́кѡ стрѣла̀ свѣтови́днаѧ, ᲂу҆ѧзвлѧ́юща врагѝ, ꙳ ᲂу҆ѧ́звлєннымъ же дꙋша́мъ ꙳ ꙗ҆́вственнѡ подаю́ща и҆сцѣле́нїе. ꙳ тѣ́мже тѧ̀ по до́лгꙋ ᲂу҆бл҃жа́емъ, ꙳ и҆ ст҃о́е твоѐ дне́сь соверша́емъ торжество̀: ꙳ молѝ сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
Тьма́ми, пречтⷭ҇аѧ, ѡ҆бѣща́хсѧ покаѧ́нїе сотвори́ти ѡ҆ мои́хъ согрѣше́нїихъ, но не ѡ҆ставлѧ́етъ мѧ̀ люби́мый ѕѡ́лъ мои́хъ ѡ҆бы́чай. сегѡ̀ ра́ди тебѣ̀ вопїю̀, и҆ припа́даю молѧ́сѧ: ты̀ мѧ̀, влⷣчце, и҆змѝ такова́гѡ мꙋчи́тельства, наставлѧ́ющи мѧ̀ къ лꙋ́чшымъ, и҆ сп҃се́нїѧ бли́з̾ сꙋ́щымъ.
Крⷭ҇тобг҃оро́диченъ: А҆́гнца и҆ па́стырѧ тѧ̀, на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ше: ꙳ <<м҃з: 93>> сн҃е вожделѣ́ннѣйше, ка́кѡ на дре́вѣ крⷭ҇тнѣмъ ꙳ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ твоѝ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;
А҆́ще и҆́мать, самогла́сенъ:
Сла́ва, гла́съ ѕ҃:
И҆злїѧ́сѧ бл҃года́ть во ᲂу҆стна́хъ твои́хъ, сла́вне а҆пⷭ҇ле и҆́мⷬ҇къ, и҆ бы́лъ є҆сѝ свѣти́льникъ цр҃кве хрⷭ҇то́вы, ᲂу҆чѧ̀ словє́сныѧ ѻ҆вцы̀, вѣ́ровати въ трⷪ҇цꙋ є҆диносꙋ́щнꙋю, во є҆ди́но бжⷭ҇тво̀.
И҆ ны́нѣ, бг҃оро́диченъ.
Никто́же притека́ѧй къ тебѣ̀, посра́мленъ ѿ тебє̀ и҆схо́дитъ, пречтⷭ҇аѧ бцⷣе дв҃о, но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.
Крⷭ҇тобг҃оро́диченъ: Всечтⷭ҇аѧ, ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стрⷭ҇ть поно́снꙋю;
[зрѝ] А҆́ще ли пра́зднꙋеши съ полѷеле́емъ, глаго́ли бг҃оро́диченъ воскрⷭ҇ный: Кто̀ тебѐ не ᲂу҆бл҃жи́тъ: [Пи́санъ въ концѣ̀ кни́ги сеѧ̀.]
Вхо́дъ. Прокі́менъ днѐ.
Та́же паремїи̑ г҃, а҆пⷭ҇льскїѧ, [пи̑саны въ концѣ̀ кни́ги сеѧ̀.]
На стїхо́внѣ стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Прїѧ́лъ є҆сѝ, а҆пⷭ҇ле, над̾ де́мѡны ꙳ непобѣди́мꙋю вла́сть и҆ си́лꙋ, ꙳ ѡ҆ и҆́мени хрⷭ҇то́вѣ, ꙳ нача̑ла тьмы̑ си́хъ ѿгони́ти, ꙳ и҆ проше́лъ є҆сѝ зе́млю, ꙳ просвѣща́ѧ ꙗ҆́коже со́лнце, ꙳ и҆ всѧ̑ страны̑ наꙋчѝ, ꙳ пе́рвое, сла́вне, хрⷭ҇то́во проповѣ́далъ є҆сѝ сп҃си́тельное прише́ствїе.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Пе́рвѣй бл҃гости, ꙳ и҆ є҆сте́ственномꙋ и҆ пребж҃е́ственномꙋ ꙳ житїю̀ подо́бѧсѧ, ꙳ мꙋ́жъ бы́лъ є҆сѝ бл҃гъ, и҆́мⷬ҇къ, по сꙋществꙋ̀, ꙳ и҆ бл҃года́ти бжⷭ҇твенныѧ сн҃ъ и҆менꙋ́емь, ꙳ нра́вѡвъ твои́хъ бл҃гостїю, ꙳ и҆ ᲂу҆ма̀ чистото́ю, ꙳ хрⷭ҇то́въ показа́лсѧ є҆сѝ ꙳ ᲂу҆ч҃нкъ и҆́скреннїй.
<<м҃з ѡ҆б.: 94>>
Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Ѻ҆рга́нъ до́брѣ соста́вленъ, ꙳ бж҃е́ственнымъ ѡ҆кормле́нїемъ, а҆пⷭ҇ле и҆́мⷬ҇къ, ꙳ ꙗ҆зы́кѡвъ зва́нїю ты̀ ᲂу҆вѣ́рилсѧ є҆сѝ, ꙳ къ позна́нїю хрⷭ҇то́вꙋ наставлѧ́ѧ, ꙳ словесы̀ и҆ дѣѧ̑нїи, ꙳ и҆ всѧ̑ просвѣти́лъ є҆сѝ ꙳ и҆сповѣ́дати и҆́стинное і҆и҃са бжⷭ҇тво̀, ꙳ сп҃са дꙋ́шъ на́шихъ.
Сла́ва, гла́съ в҃:
Ѡ҆ста́вивъ земна̑ѧ, послѣ́довалъ є҆сѝ хрⷭ҇тꙋ̀, и҆ зна́менавсѧ дохнове́нїемъ ст҃а́гѡ дх҃а, по́сланъ бы́въ ѿ негѡ̀ въ ꙗ҆зы́ки поги́бшыѧ, ѡ҆браща́ти человѣ́ки въ свѣ́тъ бг҃озна́нїѧ, а҆пⷭ҇ле и҆́мⷬ҇къ, и҆ сконча́въ по́двиги бж҃е́ственныѧ твоеѧ̀ стра́сти, и҆ мꙋ́къ разли́чныхъ, дꙋ́шꙋ твою̀ хрⷭ҇тꙋ̀ пре́далъ є҆сѝ. того̀ молѝ, всебл҃же́нне, дарова́ти на́мъ ве́лїю млⷭ҇ть.
А҆́ще ли пра́зднꙋеши, глаго́ли бг҃оро́диченъ воскрⷭ҇ный:
Ѽ чꙋдесѐ, но́вагѡ, всѣ́хъ дре́внихъ чꙋде́съ!
А҆́ще ли не пра́зднꙋеши, глаго́ли бг҃оро́диченъ се́й:
Ꙗ҆́кѡ плодови́та ма́слина дв҃а, и҆зрастѝ тебѐ плода̀ живо́тнаго плодоноси́ти мі́рови ве́лїю и҆ бога́тꙋю млⷭ҇ть.
Крⷭ҇тобг҃оро́диченъ: Дре́вꙋ крⷭ҇тномꙋ тѧ̀, і҆и҃се, пригвожде́на, ꙳ зрѧ́щи неискꙋсобра́чнаѧ, ꙳ пла́чꙋщи глаго́лаше: ꙳ ча́до сладча́йшее, ꙳ почто̀ ѡ҆ста́вилъ є҆сѝ менѐ ро́ждшꙋю тѧ̀ є҆ди́нꙋ, ꙳ свѣ́те непристꙋ́пный пребезнача́льнагѡ ѻ҆ц҃а̀; ꙳ потщи́сѧ и҆ просла́висѧ, ꙳ ꙗ҆́кѡ да сла́вꙋ полꙋ́чатъ бжⷭ҇твеннꙋю, ꙳ бжⷭ҇твєнныѧ стра̑сти твоѧ̑ сла́вѧщїи.
Тропа́рь во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й тропа́рь, гла́съ г҃:
А҆пⷭ҇ле ст҃ы́й и҆́мⷬ҇къ, молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, бг҃оро́диченъ, по гла́съ тропарѧ̀.
<<м҃и: 95>>
На ᲂу҆́трени
на Бг҃ъ гдⷭ҇ь: тропа́рь то́йже.
По а҃-й каѳі́смѣ, сѣда́ленъ, гла́съ в҃:
Оу҆лови́въ ꙗ҆зы́ки а҆пⷭ҇лъ сла́вный, и҆ наꙋчи́въ концы̀ зємны́ѧ, тебѣ̀ кла́нѧтисѧ со ѻ҆ц҃е́мъ и҆ дх҃омъ, хрⷭ҇тѐ бж҃е: тогѡ̀ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, є҆ди́не млⷭ҇тиве и҆ чл҃вѣколю́бче. [Два́жды.]
Сла́ва, и҆ ны́нѣ, бг҃оро́диченъ:
Бж҃е́ственнагѡ є҆стества̀ ѻ҆́бщницы бы́хомъ тобо́ю, бцⷣе приснодв҃о: бг҃а бо на́мъ воплоти́вшагосѧ родила̀ є҆сѝ. тѣ́мже по до́лгꙋ тѧ̀ всѝ бл҃гоче́стнѡ велича́емъ.
По в҃-й каѳі́смѣ сѣда́ленъ, гла́съ д҃:
Лꙋчꙋ̀ ꙗ҆́кѡ сл҃нце пра́вды и҆спꙋсти́ тѧ хрⷭ҇то́съ, просвѣти́ти всю̀ зе́млю, а҆пⷭ҇ле сла́вный и҆́мⷬ҇къ, бж҃е́ственными твои́ми мл҃твами ѡ҆зарѧ́еши, и҆ бжⷭ҇твеннымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Наде́жда непосты́днаѧ надѣ́ющихсѧ на тѧ̀, є҆ди́на ро́ждшаѧ па́че є҆стества̀ пло́тїю хрⷭ҇та̀ бг҃а на́шего, того̀ со ст҃ы́ми а҆пⷭ҇лы молѝ, пода́ти вселе́ннѣй ѡ҆чище́нїе прегрѣше́нїй, и҆ всѣ̑мъ на́мъ пре́жде конца̀ житїѧ̀ и҆справле́нїе.
Припѣ́въ:
Велича́емъ тѧ̀, а҆пⷭ҇ле ст҃ы́й и҆́мⷬ҇къ, и҆ чте́мъ болѣ́зни и҆ трꙋды̀ твоѧ̑, и҆́миже трꙋди́лсѧ є҆сѝ во бл҃говѣ́стїи хрⷭ҇то́вѣ.
Ѱало́мъ и҆збра́нный: Нб҃са̀ повѣ́даютъ сла́вꙋ бж҃їю:
По полѷеле́и сѣда́ленъ, гла́съ и҃.
Подо́бенъ: Премꙋ́дрости:
Мре́жею слове́съ бжⷭ҇твенныхъ, ры̑бы ᲂу҆лови́въ словє́сныѧ, сїѧ̑ прине́слъ є҆сѝ нача́токъ бг҃ꙋ на́шемꙋ и҆ въ хрⷭ҇то́вы ꙗ҆́звы жела́ѧ ѡ҆блещи́сѧ, подо́бникъ стрⷭ҇ти є҆гѡ̀ ꙗ҆ви́лсѧ є҆сѝ. тѣ́мъ <<м҃и ѡ҆б.: 96>> соше́дшесѧ по до́лгꙋ чти́мъ, а҆пⷭ҇ле сла́вне, всепра́зднственнꙋю па́мѧть твою̀, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю ст҃ꙋ́ю па́мѧть твою̀. [Два́жды.]
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѡ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище: ꙗ҆́кѡ сп҃се́нїе въ не́й содѣ́ласѧ мі́ра, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ: Во всю̀ зе́млю и҆зы́де вѣща́нїе и҆́хъ:
Сті́хъ: Нб҃са̀ повѣ́даютъ сла́вꙋ бж҃їю:
Всѧ́кое дыха́нїе:
Та́же є҆ѵⷢ҇лїе, [пи́сано въ концѣ̀ кни́ги сеѧ̀.]
По н҃-мъ ѱалмѣ̀ стїхи́ра, гла́съ ѕ҃:
И҆́же бж҃е́ственнагѡ дх҃а ꙗ҆́снѡ бл҃года́ть прїе́мъ, сщ҃е́ннагѡ ли́ка а҆пⷭ҇льскагѡ соприча́стникъ бы́въ, и҆́мⷬ҇къ: тѣ́мъ носи́мое съ нб҃сѐ и҆ногда̀ дыха́нїе ѻ҆́гненное ѻ҆́гненнымъ ѧ҆зы́комъ вдохнꙋ́въ, и҆ ꙗ҆зы́ческое терно́вное попали́лъ є҆сѝ безбо́жїе, хрⷭ҇та̀ бг҃а проповѣ́дниче, молѝ сп҃сти́сѧ дꙋша́мъ на́шымъ.
Канѡ́нъ, гла́съ и҃.
Пѣ́снь а҃.
І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.
Въ вы́шнихъ влⷣцѣ предстоѧ̀ и҆́мⷬ҇къ, а҆пⷭ҇ле чꙋ́дне, тѧ̀ просла́вльшемꙋ, и҆ ᲂу҆ч҃нка̀ себѣ̀ свѣ́тлѡ показа́вшемꙋ, просвѣтѝ дꙋ́шꙋ мою̀, да воспою̀ бж҃е́ственнꙋю твою̀ па́мѧть.
Всѧ́ко и҆з̾ѡби́лїе бл҃ги́хъ тебѣ̀ хрⷭ҇то́съ дарова́въ, ве́рхъ бж҃е́ственныхъ дарова́нїй, а҆пⷭ҇ле, показа́ тѧ, сꙋдо́мъ првⷣнымъ, бг҃оѧвле́нне, првⷣный є҆ди́нъ.
<<м҃ѳ: 97>>
Вседꙋхо́внꙋю зарю̀ прїи́мъ, а҆пⷭ҇ле, соше́дшꙋю на тѧ̀ съ нб҃сѐ, ѻ҆гнедꙋхнове́нъ бы́лъ є҆сѝ, всю̀ попалѧ́ѧ пре́лесть многобо́жїѧ.
Бг҃оро́диченъ: Ты̀ моѐ ме́ртвенное и҆ тлѣ́нное, безсме́ртное и҆ нетлѣ́нное, сп҃се, показа́въ, во ᲂу҆тро́бꙋ всели́лсѧ є҆сѝ ст҃ы́ѧ дв҃ы пречтⷭ҇ыѧ неискꙋсобра́чнѡ, воѡбрази́всѧ же въ чл҃вѣ́ческое є҆стество̀.
Пѣ́снь г҃.
І҆рмо́съ: Нѣ́сть ст҃ъ ꙗ҆́кѡ гдⷭ҇ь, и҆ нѣ́сть првⷣнъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть првⷣнъ па́че тебє̀, гдⷭ҇и.
Бж҃е́ственное та́инство воплоще́нїѧ позна́лъ є҆сѝ вои́стиннꙋ, а҆пⷭ҇ле и҆́мⷬ҇къ бг҃опрїѧ́тне, ѿ сама́гѡ сп҃са зарю̀ прїи́мъ премі́рнꙋю.
Сло́во безнача́льное и҆ присносꙋ́щное, своего̀ слꙋжи́телѧ тѧ̀, а҆пⷭ҇ле чꙋ́дне, блиста́нїи свѣ́тлыми бога́тнѡ просвѣтѝ бж҃е́ственныѧ бл҃года́ти.
Заре́ю разжже́нъ и҆ дѣ́телїю дꙋхо́вною, ꙗ҆́кѡ стрѣла̀ бг҃ови́днаѧ по́сланъ бы́лъ є҆сѝ ѿ хрⷭ҇та̀, а҆пⷭ҇ле пресла́вне, и҆ мі́ръ просвѣти́лъ є҆сѝ, бл҃же́нне, ᲂу҆че́нїемъ твои́мъ.
Бг҃оро́диченъ: Свѣ́щникъ всезлаты́й тѧ̀ прⷪ҇ро́къ прописа̀, бцⷣе, носѧ́щꙋ свѣ́тъ невече́рнїй, просвѣща́ющаго мі́ръ лꙋча́ми бжⷭ҇тва̀, хрⷭ҇та̀ бг҃а на́шегѡ.
Сѣда́ленъ, гла́съ г҃.
Подо́бенъ: Бж҃е́ственныѧ:
Бж҃е́ственнагѡ дх҃а свѣтозаре́нїемъ, тмꙋ̀ разрꙋши́лъ є҆сѝ многобо́жїѧ, и҆ вѣ́рныхъ сердца̀ просвѣти́лъ є҆сѝ, воспѣ́въ сп҃си́тєльныѧ повелѣ̑нїѧ а҆пⷭ҇ле и҆́мⷬ҇къ, премꙋ́дре, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.
Сла́ва и҆ ны́нѣ, бг҃оро́диченъ:
Кі́йждо и҆дѣ́же сп҃са́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀, бцⷣе, покрыва́ющее дꙋ́шы на́шѧ;
Крⷭ҇тобг҃оро́диченъ: Же́злъ си́лы стѧжа́вшїи крⷭ҇тъ сн҃а твоегѡ̀, бцⷣе, тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.
<<м҃ѳ ѡ҆б.: 98>>
Пѣ́снь д҃.
І҆рмо́съ: И҆з̾ горы̀ прїѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Ве́сь сокро́вище сы́й дарова́нїй є҆ѵⷢ҇льскихъ, бл҃года́ти и҆спо́лненъ, свѣ́тъ мі́ра, и҆ со́ль вселе́нныѧ, и҆́мⷬ҇къ всебл҃же́нне, бы́лъ є҆сѝ.
Веще́й стꙋ́днагѡ ꙗ҆вле́нїѧ ѿврати́лсѧ є҆сѝ, невеще́ственъ же свѣ́тъ ви́дѣти сподо́билсѧ є҆сѝ бж҃ества̀, ви́дъ прїи́мшаго ве́щь человѣ́чества, досточꙋ́дне.
Ты̀, ꙗ҆́кѡ ᲂу҆ч҃нкъ жи́зни нетлѣ́нныѧ, ᲂу҆мертвѝ на́шъ живꙋ́щїй грѣ́хъ, живоно́сною си́лою животода́вца, є҆ѧ́же прїѧ́лъ є҆сѝ дѣ́йствїе.
Бг҃оро́диченъ: Ра́венъ бы́въ ѻ҆ц҃ꙋ̀ твоемꙋ̀ по сꙋществꙋ̀, ра́венъ человѣ́кѡмъ бы́лъ є҆сѝ по є҆стествꙋ̀, ѿ пречтⷭ҇ыѧ дв҃ы на́шꙋ, влⷣко, пло́ть прїе́мый.
Пѣ́снь є҃.
І҆рмо́съ: Ѿ нощѝ невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Со ѻ҆гне́мъ дх҃о́внымъ, бг҃ови́дче, тво́й смѣси́сѧ ѧ҆зы́къ, є҆го́же воспрїѧ́лъ є҆сѝ любо́вїю, на го́рницѣ сѣдѧ̀.
Ꙗ҆́кѡ высо́къ сы́й въ превы́шнихъ се́лѣхъ живы́й, и҆́мⷬ҇къ, высѡ́каѧ и҆ вели̑каѧ ᲂу҆чє́нїѧ на́мъ прине́слъ є҆сѝ.
Оу҆́мъ чи́стъ и҆мѣ́ѧй къ бг҃ꙋ во свѣ́тлости, се́рдце чи́сто стѧжа́лъ є҆сѝ, и҆ воплоще́ннаго бг҃а ви́дѣлъ є҆сѝ, непостижи́маго ра́зꙋмомъ.
Бг҃оро́диченъ: Зако́нъ пе́рвый, дв҃о, ржⷭ҇тво́мъ твои́мъ преста̀, процвѣте́ же бл҃года́ть, и҆ пра́вда возсїѧ̀.
Пѣ́снь ѕ҃.
І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Ꙗ҆́кѡ ᲂу҆ч҃нкъ и҆ дрꙋ́гъ хрⷭ҇то́въ, а҆пⷭ҇ле сла́вне, ре́вностїю поревнова́лъ є҆сѝ, по гдⷭ҇ѣ бз҃ѣ вседержи́тели.
<<н҃: 99>>
Тебѐ бж҃е́ственныхъ чꙋде́съ самодѣ́лателѧ сп҃съ показа̀, да́въ вла́сть тебѣ̀ дѣ́йствомъ своеѧ̀ бл҃гости.
Преꙋкра́шенъ бж҃е́ственною бл҃года́тїю ᲂу҆че́нїѧ, бл҃говѣствꙋ́еши мі́рꙋ ѻ҆́бщее сп҃се́нїе, сꙋ́щаго над̾ всѣ́ми бг҃а, а҆пⷭ҇ле хрⷭ҇то́въ, и҆́мⷬ҇къ прехва́льне.
Бг҃оро́диченъ: Да заградѧ́тсѧ ᲂу҆ста̀ ѕлочести́выхъ, бцⷣꙋ тѧ̀ немꙋ́дрствꙋющихъ, всенепоро́чнаѧ, и҆ ли́ца и҆́хъ въ стꙋ́дъ да ѡ҆блекꙋ́тсѧ.
Конда́къ, во ᲂу҆ста́вѣ.
А҆́ще ли нѣ́сть ᲂу҆ста́ва, глаго́ли се́й конда́къ, гла́съ д҃.
Подо́бенъ: Ꙗ҆ви́лсѧ є҆сѝ:
Ꙗ҆́кѡ ѕвѣздꙋ̀ пресвѣ́тлꙋю цр҃ковь всегда̀ стѧжа́ тѧ, а҆пⷭ҇ле и҆́мⷬ҇къ, чꙋде́съ твои́хъ многоподава́нїемъ просвѣща́ема. тѣ́мже зове́мъ хрⷭ҇тꙋ̀: сп҃сѝ чтꙋ́щихъ вѣ́рою па́мѧть твоегѡ̀ а҆пⷭ҇ла, многомлⷭ҇тиве.
І҆́косъ: Стрꙋю̀ сло́ва пода́ждь мѝ, гдⷭ҇и, водно́е є҆стество̀ содѣ́ѧвый, и҆ се́рдце моѐ ᲂу҆крѣпѝ, бл҃гоꙋтро́бне, и҆́же зе́млю ᲂу҆тверди́вый сло́вомъ твои́мъ: и҆ просвѣтѝ моѐ помышле́нїе, свѣ́томъ ꙗ҆́кѡ ри́зою ѡ҆дѣва́ѧйсѧ, да глаго́лѧ и҆ пою̀ подѡ́бнаѧ, досто́йнѡ почестѝ твоего̀ а҆пⷭ҇ла, многомлⷭ҇тиве.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Стра́ннꙋ ре́вность и҆мы́й, ны́нѣ прⷭ҇то́лꙋ предстои́ши влⷣчнемꙋ и҆́мⷬ҇къ, ꙗ҆́кѡ слꙋга̀ хрⷭ҇то́въ вѣнча́нъ бы́лъ є҆сѝ, бг҃опроповѣ́дниче, вопїѧ̀: бл҃гослове́нъ є҆сѝ, гдⷭ҇и бж҃е, во вѣ́ки.
Вкꙋ́пѣ сло́вꙋ сликовствꙋ́ѧ и҆ собесѣ́дникъ томꙋ̀ бы́въ, црⷭ҇твїѧ та́мѡ сопричасти́лсѧ є҆сѝ вы́шнѧгѡ, зовы́й: бл҃гослове́нъ є҆сѝ, гдⷭ҇и бж҃е, во вѣ́ки.
Мꙋ́дростїю ѡ҆бложе́нъ, бл҃года́тїю ѡ҆заре́нъ, ми́рною красото́ю ᲂу҆краше́нъ, бг҃оглаго́ливе а҆пⷭ҇ле ст҃е, вопїе́ши: бл҃гослове́нъ є҆сѝ, гдⷭ҇и бж҃е, во вѣ́ки.
<<н҃ ѡ҆б.: 100>>
Бг҃оро́диченъ: Ле́стїю дре́вле бл҃гожре́бїѧ пра́ѻтцы и҆згна̀ ѕмі́й: ты́ же си́хъ, мт҃и бж҃їѧ, воззвала̀ є҆сѝ глаго́лющихъ: бл҃гослове́нъ, пречтⷭ҇аѧ, пло́дъ твоегѡ̀ чре́ва.
Пѣ́снь и҃.
І҆рмо́съ: Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѡ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ, и҆ славосло́влѧхꙋ во всѧ̑ вѣ́ки.
Ꙗ҆́кѡ кра́снѣ но́зѣ твоѝ ꙗ҆ви́стѣсѧ, бл҃голѣ́пенъ є҆́сть и҆ ѧ҆зы̑къ глаго́лющь сла́вꙋ хрⷭ҇то́вꙋ, и҆ наꙋчѝ зва́ти: гдⷭ҇а по́йте и҆ превозноси́те во всѧ̑ вѣ́ки.
Добро́тами ᲂу҆кра́шенъ свѣтолꙋ́чными, и҆ чꙋде́съ пꙋща́ѧ сїѧ̑нїѧ, позна́лсѧ є҆сѝ лю́демъ сѣ́мѧ бл҃гослове́нное, ᲂу҆вѣрѧ́ѧ взыва́ти: гдⷭ҇а по́йте и҆ превозноси́те во всѧ̑ вѣ́ки.
Ст҃ъ ᲂу҆ч҃нкъ, нбⷭ҇нымъ ᲂу҆че́нъ та́йнамъ вои́стиннꙋ, проше́лъ є҆сѝ вселе́ннꙋю, ᲂу҆чѧ̀ велегла́снѡ сло́во вѣ́ры хрⷭ҇то́вы ты̀, а҆пⷭ҇ле, и҆ неизрече́ннꙋю и҆сповѣ́даѧ бл҃года́ть вопїѧ̀: гдⷭ҇а по́йте и҆ превозноси́те во всѧ̑ вѣ́ки.
Бг҃оро́диченъ: Оу҆́мъ не мо́жетъ ржⷭ҇тва̀ твоегѡ̀, бг҃ороди́тельнице, сказа́ти, и҆ и҆зрещѝ сло́во и҆знемога́етъ: бг҃а бо заче́нши родила̀ є҆сѝ, дв҃о: є҆го́же превозно́симъ во всѧ̑ вѣ́ки.
Пѣ́снь ѳ҃.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чтⷭ҇аѧ, съ безпло́тными ли́ки тѧ̀ велича́юще.
Ꙗ҆́вленъ бы́лъ є҆сѝ концє́мъ, а҆пⷭ҇ле, бж҃е́ственнымъ свѣ́томъ сїѧ́ѧ, и҆ ѻ҆́гнь дх҃о́вный прїи́мъ, свѣтоза́ренъ показа́лсѧ є҆сѝ, и҆́мⷬ҇къ, тѣ́мже тѧ̀ велича́емъ.
Ве́сь бг҃ꙋ возложе́нъ, томꙋ̀ сраствори́лсѧ є҆сѝ: є҆го́же ны́нѣ молѝ, бг҃оѧвле́нне, ѡ҆ на́съ, вѣ́рою и҆ любо́вїю восхвалѧ́ющихъ тѧ̀.
Твою̀, пребл҃же́нне, па́мѧть пра́зднꙋюще, мо́лимсѧ всегда̀, треволне́нїѧ и҆збы́ти хода́тайствомъ дерзнове́нїѧ твоегѡ̀: є҆го́же ꙗ҆́кѡ хрⷭ҇то́въ а҆пⷭ҇лъ и҆́маши, бг҃ови́дче всечтⷭ҇не.
<<н҃а: 101>>
Бг҃оро́диченъ: Сп҃се́нїѧ всѣ́хъ хода́таицꙋ ꙗ҆́вльшꙋюсѧ человѣ́кѡмъ, и҆ мі́ръ просвѣ́щшꙋю сїѧ̑нїи бг҃ови́дныѧ чистоты̀, въ пѣ́снехъ велича́емъ.
Свѣти́ленъ.
Подо́бенъ: Дх҃омъ предзрѧ̀:
Тече́нїе кра́сныхъ твои́хъ но́гъ, и҆́мⷬ҇къ а҆пⷭ҇ле, возврати́въ къ ше́ствїю нбⷭ҇номꙋ возше́лъ є҆сѝ ра́дꙋѧсѧ, и҆ трⷪ҇цѣ предста́въ, во ѻ҆ц҃ѣ̀ ви́диши сн҃а и҆ дх҃а бж҃е́ственнаго. сегѡ̀ ра́ди вѣ́рою пресщ҃е́ннꙋю твою̀ и҆ бжⷭ҇твеннꙋю пра́зднꙋемъ па́мѧть.
Бг҃оро́диченъ: Стра́шнагѡ и҆спыта́нїѧ воспомина́ю ча́съ, мно́жество ѕѡ́лъ дѣ́лъ мои́хъ ᲂу҆жаса́етъ и҆ ᲂу҆страша́етъ мѧ̀, но ᲂу҆ще́дри пречтⷭ҇аѧ, те́плою твое́ю мл҃твою, и҆ да́ждь мѝ сп҃се́нїе: є҆ли̑ка бо хо́щеши, мо́жеши.
На хвали́техъ стїхи̑ры, гла́съ д҃.
Подо́бенъ: Ꙗ҆́кѡ до́блѧ:
Тро́стїю бл҃года́ти, ꙳ ѿ глꙋбины̀ сꙋ́етства человѣ́ки и҆звле́клъ є҆сѝ, досточꙋ́дне, ꙳ ᲂу҆чт҃лѧ ма́нїемъ повинꙋ́всѧ, и҆́мⷬ҇къ, ꙳ просвѣ́щшагѡ по всемꙋ̀ твоѐ разꙋмѣ́нїе, и҆ а҆пⷭ҇ла, и҆ че́стна бг҃оглаго́льника, ꙳ тѧ̀, всебл҃же́нне, показа́вша, ꙳ тогѡ̀ непости́жнагѡ бж҃ества̀. [Два́жды.]
Дх҃а сїѧ́нїе на тѧ̀ сни́де ꙳ во ѻ҆́гненнѣ ви́дѣ, и҆ тѧ̀, бл҃же́нне, бж҃е́ственное прїѧ́телище содѣ́ла, ꙳ ско́рѡ ѿгонѧ́ща безбо́жїѧ мглꙋ̀, ꙳ и҆ мі́ръ просвѣща́юща ꙳ сїѧ́нїемъ всемꙋ́дрыхъ твои́хъ слове́съ, ꙳ тайноглаго́льниче, ꙳ а҆пⷭ҇лѡвъ ᲂу҆краше́нїе, ꙳ хрⷭ҇то́въ самови́дче бл҃же́нне.
Мо́лнїѧми проповѣ́данїѧ, ꙳ во тьмѣ̀ сѣдѧ́щыѧ невѣ́дѣнїѧ, ꙳ сла́вне, просвѣти́въ, ꙳ показа́лъ є҆сѝ сы́ны ꙳ влⷣки и҆ бг҃а вѣ́ры ра́ди. ꙳ є҆гѡ́же стрⷭ҇те́мъ ревнова́лъ є҆сѝ и҆ сме́рти, ꙳ и҆ сла́вы бы́лъ є҆сѝ наслѣ́дникъ, ꙳ ꙗ҆́кѡ мꙋ́дръ и҆ бг҃оглаго́ливъ, ꙳ ꙗ҆́кѡ ᲂу҆ч҃нкъ и҆́стины.
Сла́ва, гла́съ в҃: Ѡ҆ста́вивъ земна̑ѧ, послѣ́довалъ є҆сѝ хрⷭ҇тꙋ̀ и҆ зна́менавсѧ дохнове́нїемъ ст҃а́гѡ дх҃а, по́сланъ бы́въ ѿ негѡ̀ въ ꙗ҆зы̑ки поги́бшыѧ, ѡ҆браща́ти человѣ́ки во свѣ́тъ бг҃озна́нїѧ, <<н҃а ѡ҆б.: 102>> а҆пⷭ҇ле и҆́мⷬ҇къ: и҆ сконча́въ по́двиги бжⷭ҇твенныѧ твоеѧ̀ стрⷭ҇ти, и҆ мꙋ́къ разли́чныхъ, дꙋ́шꙋ твою̀ хрⷭ҇тꙋ̀ пре́далъ є҆сѝ: того̀ молѝ, всебл҃же́нне, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Крⷭ҇тобг҃оро́диченъ: Є҆гда̀ нескве́рнаѧ а҆́гница, ꙳ ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, ꙳ рыда́ющи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, тебѐ ро́ждшꙋю. ꙳ что̀ сїѐ сотвори́лъ є҆сѝ, и҆зба́вителю всѧ́ческихъ: ꙳ ѻ҆ба́че воспѣва́ю и҆ сла́влю твою̀, ꙳ ю҆́же па́че ᲂу҆ма̀ и҆ сло́ва, ꙳ кра́йнюю бл҃гость, чл҃вѣколю́бче.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.