Слꙋ́жба і҆ѡа́ннꙋ прⷣте́чи
<<к҃ѳ ѡ҆б.: 58>>
[глⷡ҇а є҃] СЛꙊ́ЖБА Ѻ҆́БЩА
і҆ѡа́нна прⷣте́чи, прⷪ҇ро́ка и҆ крⷭ҇ти́телѧ гдⷭ҇нѧ.
На Гдⷭ҇и воззва́хъ, стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Бл҃же́нне і҆ѡа́нне прⷣте́че, ꙳ и҆́скреннїй дрꙋ́же влⷣчень, ꙳ и҆́же дла́нїю коснꙋ́выйсѧ верхꙋ̀ є҆гѡ̀ пречтⷭ҇омꙋ, ꙳ въ вода́хъ і҆ѻрда́нскихъ, ꙳ смире́ннꙋю мою̀ дꙋ́шꙋ ко гдⷭ҇ꙋ любо́вїю возраща́й всегда̀, ꙳ сщ҃е́нными хода́тайствы твои́ми, ꙳ сласте́й мои́хъ ѻ҆́гнь ᲂу҆гасѝ, ꙳ приводѧ́ мѧ ко и҆сполне́нїю бж҃е́ственныхъ повелѣ́нїй, ꙳ и҆ се́рдца моегѡ̀ ѡ҆чища́ѧ вои́стиннꙋ чꙋ̑вствїѧ, да сла́влю тѧ̀.
Непло́дныѧ прозѧбе́нїе, ꙳ и҆ чистоты̀ са́дъ влⷣчнїй, ꙳ человѣ́кѡвъ ᲂу҆добре́нїе, крⷭ҇ти́телю гдⷭ҇ень, ꙳ прⷣте́че і҆ѡа́нне всехва́льне, ꙳ храни́телю бж҃е́ственный, ꙳ смире́нныѧ моеѧ̀ дꙋшѝ, ꙳ твои́ми мл҃твами бл҃гоꙋвѣ́тїе мѝ да́ждь, и҆збавлѧ́ѧ ѿ ѕмі́ѧ, ꙳ кова́рныхъ и҆ лꙋка́выхъ тогѡ̀ ла́ѧнїй и҆ прилѡ́гъ.
Ве́сь є҆сѝ сладча́йшїй, ꙳ и҆ сла́дости бж҃е́ственныѧ и҆спо́лненъ, ꙳ прⷪ҇ро́че присносла́вне: ꙳ и҆ весели́ши всѧ̑ вѣ́рнѡ приходѧ́щыѧ къ тебѣ̀, ꙳ ᲂу҆слажда́ѧ и҆́хъ чꙋ̑вства ꙳ дꙋшє́внаѧ же ꙳ и҆ тѣлє́снаѧ: ꙳ недꙋ̑гъ и҆ скорбе́й и҆ нахожде́нїй ѕлы́хъ, ꙳ и҆ сласте́й дꙋшетлѣ́нныхъ всѣ́хъ, ꙳ го́ресть разрѣша́ѧ на́мъ.
Сла́ва, гла́съ д҃:
Ꙗ҆ви́сѧ дне́сь вели́кїй прⷣте́ча, ѿ непло́дныхъ ложе́снъ є҆лїсаве́ти произше́дъ, бо́лїй всѣ́хъ прⷪ҇ро́кѡвъ прⷪ҇ро́къ, и҆ и҆́нъ нѣ́сть, нижѐ воста̀, ꙗ҆́кѡ прⷣте́чи свѣти́льникꙋ свѣ́тъ послѣ́дова пресвѣ́тлый и҆ гла́сꙋ сло́во, и҆ невѣстово́дцꙋ жени́хъ, гото́вѧщемꙋ гдⷭ҇еви лю́ди и҆зрѧ̑дныѧ, и҆ пред̾очища́ющꙋ при дс҃ѣ водо́ю, заха́рїино прозѧбе́нїе, и҆ пꙋсты́ни до́брое воспита́нїе, покаѧ́нїѧ <<л҃: 59>> проповѣ́дникъ, ѡ҆чище́нїе согрѣше́нїй, сꙋ́щымъ во а҆́дѣ бл҃говѣствꙋ́ѧй и҆з̾ ме́ртвыхъ воста́нїе, и҆ молѧ̀ ѡ҆ дꙋша́хъ на́шихъ.
И҆ ны́нѣ, бг҃оро́диченъ воскрⷭ҇ный:
И҆́же тебѐ ра́ди бг҃оѻте́цъ:
Вхо́дъ. Прокі́менъ днѐ.
Прⷪ҇ро́чества и҆са́їина чте́нїе [главы̑ м҃, м҃а, м҃є, м҃и, н҃д.]
Та́кѡ глаго́летъ гдⷭ҇ь: ᲂу҆тѣша́йте, ᲂу҆тѣша́йте лю́ди моѧ̑, глаго́летъ бг҃ъ: Сщ҃е́нницы, глаго́лите въ се́рдцы і҆ерⷭ҇ли́мꙋ, ᲂу҆моли́те є҆го̀, ꙗ҆́кѡ ᲂу҆мно́жисѧ смире́нїе є҆гѡ̀: разрѣши́сѧ бо грѣ́хъ є҆гѡ̀, ꙗ҆́кѡ прїѧ́тъ и҆з̾ рꙋкѝ гдⷭ҇ни сꙋгꙋ̑ба согрѣшє́нїѧ своѧ̑. Гла́съ вопїю́щагѡ въ пꙋсты́ни: ᲂу҆гото́вайте пꙋ́ть гдⷭ҇ень, пра̑вы твори́те стєзѝ бг҃ꙋ на́шемꙋ. На го́рꙋ высо́кꙋ взы́ди, бл҃говѣствꙋ́ѧй сїѡ́нꙋ, возвыша́й крѣ́постїю гла́съ тво́й, бл҃говѣствꙋ́ѧй і҆ерⷭ҇ли́мꙋ. Вознеси́те, не бо́йтесѧ: а҆́зъ гдⷭ҇ь бг҃ъ, а҆́зъ ᲂу҆слы́шꙋ ᲂу҆бо́гихъ і҆и҃лєвъ, и҆ не ѡ҆ста́влю тѣ́хъ. Но ѿве́рзꙋ ѿ го́ръ рѣ́ки, и҆ посредѣ̀ по́лѧ и҆сто́чники, сотворю̀ пꙋсты́ню въ лꙋ́гъ и҆ жа́ждꙋщꙋю зе́млю во и҆сто́чники вѡдны́ѧ. Да возвесели́тсѧ нб҃о свы́ше, и҆ ѡ҆́блацы да кропѧ́тъ пра́вдꙋ да возсїѧ́етъ землѧ̀, и҆ да прозѧ́бнетъ млⷭ҇ть, и҆ пра́вда да возсїѧ́етъ вкꙋ́пѣ. Гла́съ весе́лїѧ возвѣсти́те, и҆ ᲂу҆слы́шано да бꙋ́детъ, возвѣсти́те да́же до конє́цъ землѝ, глаго́лите, ꙗ҆́кѡ и҆зба́ви гдⷭ҇ь раба̀ своего̀ і҆а́кѡва: и҆ а҆́ще вжа́ждꙋтъ въ пꙋсты́ни, и҆сточи́тъ и҆̀мъ во́дꙋ и҆з̾ ка́мене. Возвесели́сѧ непло́ды не ражда́ющаѧ, расто́ргни и҆ возопі́й не болѣ́вшаѧ: ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа.
Прⷪ҇ро́чества малахі́ина чте́нїе [глава̀ г҃].
Та́кѡ глаго́летъ гдⷭ҇ь вседержи́тель: сѐ а҆́зъ посыла́ю а҆́гг҃ла моего̀ пред̾ лице́мъ твои́мъ, и҆́же ᲂу҆гото́витъ пꙋ́ть тво́й пред̾ тобо́ю, и҆ прїи́детъ въ хра́мъ сво́й гдⷭ҇ь, є҆гѡ́же вы̀ и҆́щете. И҆ кто̀ стерпи́тъ де́нь вхо́да є҆гѡ̀; зане́же томꙋ̀ прїитѝ ꙗ҆́кѡ ѻ҆́гнь въ горни́лѣ, и҆ ꙗ҆́коже бы́лїе перꙋ́щихъ, и҆ ѡ҆чи́ститъ поѧда́ѧ и҆ ѡ҆чища́ѧ, ꙗ҆́кѡ сребро̀ и҆ зла́то. И҆ прїи́детъ къ ва́мъ сꙋдо́мъ, и҆ бꙋ́детъ свидѣ́тель ско́ръ на лꙋка̑выѧ, и҆ <<л҃ ѡ҆б.: 60>> на прелюбодѣ́йцы и҆ на кленꙋ́щыѧсѧ и҆́менемъ мои́мъ во лжꙋ̀, и҆ на лиша́ющыѧ мзды̀ нае́мника, и҆ на наси́льствꙋющыѧ вдови̑цы, и҆ пха́ющыѧ си̑рыѧ, и҆ на ᲂу҆клонѧ́ющыѧ сꙋ́дъ прише́льца, и҆ на небоѧ́щыѧсѧ є҆гѡ̀, глаго́летъ гдⷭ҇ь вседержи́тель. Занѐ а҆́зъ гдⷭ҇ь бг҃ъ ва́шъ, и҆ не и҆змѣню̀ себѐ: и҆ вы̀ сы́нове і҆а́кѡвли ᲂу҆клони́стесѧ ѿ зако́на, и҆ не сохрани́сте. Сегѡ̀ ра́ди ѡ҆брати́тесѧ ко мнѣ̀, и҆ ѡ҆бращꙋ́сѧ къ ва́мъ, глаго́летъ гдⷭ҇ь вседержи́тель: и҆ ᲂу҆бл҃жа́тъ ва́съ всѝ ꙗ҆зы́цы. И҆ разꙋмѣ́йте, ꙗ҆́кѡ а҆́зъ гдⷭ҇ь, смотрѧ́ѧй посредѣ̀ пра́веднагѡ, и҆ посредѣ̀ беззако́нника, въ де́нь ѻ҆́нъ, во́нь-же сотворю̀ снабдѣ́нїе лю́бѧщымъ мѧ̀. Позна́йте ᲂу҆́бѡ, и҆ помѧни́те зако́нъ мѡѷсе́овъ раба̀ моегѡ̀, ꙗ҆́коже заповѣ́да ва́мъ въ хори́вѣ, ко всемꙋ̀ і҆и҃лю, повелѣ́нїе и҆ ѡ҆правда́нїе. И҆ сѐ а҆́зъ послю̀ ва́мъ и҆лїю̀ ѳесві́тѧнина, пре́жде да́же не прїитѝ дню̀ гдⷭ҇ню вели́комꙋ просвѣще́нномꙋ, и҆́же напра́витъ се́рдце ѻ҆тца̀ къ сы́нꙋ, и҆ се́рдце человѣ́ка ко и҆́скреннемꙋ своемꙋ̀, да не прише́дъ поражꙋ̀ зе́млю вско́рѣ, глаго́летъ гдⷭ҇ь вседержи́тель, бг҃ъ ст҃ы́й і҆и҃левъ.
Премꙋ́дрости соломѡ́ни чте́нїе [главы̑ д҃ и҆ є҃].
Првⷣникъ, а҆́ще пости́гнетъ сконча́тисѧ, въ поко́и бꙋ́детъ: ѡ҆сꙋ́дитъ же првⷣникъ ᲂу҆мира́ѧй живꙋ́щыѧ нечести̑выѧ: ᲂу҆́зрѧтъ бо кончи́нꙋ првⷣнагѡ, и҆ не разꙋмѣ́ютъ, что̀ совѣща́ша ѡ҆ не́мъ. Ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ, и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ: Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆̀хъ сопроти́въ беззако́нїѧ и҆́хъ. Тогда̀ ста́нетъ въ дерзнове́нїи мно́зѣ првⷣникъ пред̾ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀ смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ сп҃се́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ, и҆ въ при́тчꙋ поноше́нїѧ безꙋ́мнїи, житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сынѣ́хъ бж҃їихъ, <<л҃а: 61>> и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ сте́зь и҆ поги́бели, и҆ ходи́хомъ стєзѝ непрохѡ́дны, пꙋти́ же гдⷭ҇нѧ не разꙋмѣ́хомъ.
На стїхо́внѣ стїхи̑ры, гла́съ в҃:
Проповѣ́дниче хрⷭ҇то́въ, и҆ крⷭ҇ти́телю, а҆́гг҃ле, а҆пⷭ҇ле, мч҃нче, прⷪ҇ро́че, прⷣте́че, свѣти́льниче, дрꙋ́же бли́жнїй, прⷪ҇ро́кѡвъ печа́ть, въ рожде́нныхъ пречтⷭ҇нѣ́йшїй, хода́таѧ ве́тхой и҆ но́вѣй бл҃года́ти, свѣ́тлый сло́ва гла́се, твои́ми сщ҃е́нными хода́тайствы, мл҃твєннаѧ творє́нїѧ къ бг҃ꙋ бл҃гоꙋтро́бномꙋ и҆спра́ви.
Сті́хъ: Бл҃гослове́нъ гдⷭ҇ь бг҃ъ і҆и҃левъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои̑мъ.
Сѐ а҆́гнецъ бж҃їй, и҆́же грѣхѝ мі́ра взе́млѧй, возопи́лъ є҆сѝ, прⷣте́че бл҃же́нне, внегда̀ ви́дѣлъ є҆сѝ хрⷭ҇та̀ на землѝ ходѧ́ща: того̀ ᲂу҆̀бо молѝ, грѣхѡ́въ ѡ҆ставле́нїе дарова́ти тебѐ почита́ющымъ: и҆́маши бо къ немꙋ̀ ве́лїе вои́стиннꙋ дерзнове́нїе, крⷭ҇ти́телю, ꙗ҆́кѡ хода́тай зако́нꙋ и҆ бл҃года́ти.
Сті́хъ: И҆ ты̀, ѻ҆троча̀, прⷪ҇ро́къ вы́шнѧгѡ нарече́шисѧ.
Потщи́сѧ и҆ и҆зми́ мѧ ѿ и҆скꙋше́нїй, сла́вный гдⷭ҇ень прⷪ҇ро́че, молю́сѧ тебѣ̀: всꙋ́е бо подвиго́шасѧ на мѧ̀ борю́щїи мѧ̀ го́рцыи де́мѡни, и҆́щꙋще восхи́тити дꙋ́шꙋ раба̀ твоегѡ̀, ꙗ҆́коже пти́цꙋ бѣ́днꙋю: не ѡ҆ста́ви мѧ̀ до конца̀: да разꙋмѣ́ютъ же па́че, всебл҃же́нне, ꙗ҆́кѡ ты̀ моѐ є҆сѝ прибѣ́жище.
Сла́ва, гла́съ а҃:
Бг҃ознамени́тый гла́съ, свѣ́та свѣти́льникъ, гдⷭ҇нь прⷣте́ча, хрⷭ҇то́мъ свидѣ́тельствованный, пе́рвый во прⷪ҇ро́цѣхъ, и҆́же ѡ҆ мі́рѣ мл҃твы творѧ̀, и҆зрѧ́днѡ ста́до твоѐ помина́й, є҆́же сп҃стѝ невреди́мо.
И҆ ны́нѣ, бг҃оро́диченъ воскрⷭ҇ный:
Сѐ и҆спо́лнисѧ и҆са́їино прорече́нїе:
Тропа́рь, гла́съ в҃:
Па́мѧть првⷣнагѡ съ похвала́ми, тебѣ́ же довлѣ́етъ свидѣ́тельство гдⷭ҇не, прⷣте́че: показа́лъ бо сѧ є҆сѝ вои́стиннꙋ и҆ <<л҃а ѡ҆б.: 62>> прⷪ҇ро́кѡвъ чтⷭ҇нѣ́йшїй, ꙗ҆́кѡ и҆ въ стрꙋѧ́хъ крⷭ҇ти́ти сподо́билсѧ є҆сѝ проповѣ́даннаго. тѣ́мже за и҆́стинꙋ пострада́въ ра́дꙋѧсѧ, бл҃говѣсти́лъ є҆сѝ и҆ сꙋ́щымъ во а҆́дѣ бг҃а ꙗ҆́вльшагосѧ пло́тїю, взе́млющаго грѣ́хъ мі́ра, и҆ подаю́щаго на́мъ ве́лїю млⷭ҇ть.
Сла́ва, и҆ ны́нѣ, бг҃оро́диченъ:
На ᲂу҆́трени,
на Бг҃ъ гдⷭ҇ь, тропа́рь то́йже.
По а҃-й каѳі́смѣ, сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
Ны́нѣ прозѧбѐ на́мъ заха́рїинъ пло́дъ, и҆ весели́тъ разꙋ́мнѡ мы́сли вѣ́рныхъ, пꙋсты́нное ᲂу҆краше́нїе, и҆ прⷪ҇ро́кѡвъ степе́нь: тѣ́мже хрⷭ҇то́въ ꙗ҆ви́сѧ прⷣте́ча, и҆ свидѣ́тель нело́женъ прише́ствїѧ є҆гѡ̀. дꙋхо́вными ᲂу҆̀бо пѣ́сньми согла́снѡ крⷭ҇ти́телю возопїи́мъ: прⷪ҇ро́че и҆ проповѣ́дниче и҆́стины, молѝ сп҃сти́сѧ на́мъ. [Два́жды.]
Сла́ва, и҆ ны́нѣ, бг҃оро́диченъ:
Пое́мъ тѧ̀, бг҃оневѣ́сто, мт҃и хрⷭ҇та̀ бг҃а, сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли, и҆ всѧ́кїѧ бѣды̀, влⷣчце бцⷣе, и҆ вѣ́рнѡ вопїе́мъ тѝ: поми́лꙋй ста́до твоѐ, є҆ди́на всепѣ́таѧ.
По в҃-й каѳі́смѣ, сѣда́ленъ, гла́съ в҃.
Подо́бенъ: Млⷭ҇рдїѧ сꙋ́щи:
Млⷭ҇рдїѧ ра́ди млⷭ҇ти, бл҃же, сп҃стѝ твоѐ созда́нїе прише́лъ є҆сѝ, преклони́въ нб҃са̀ схожде́нїемъ твои́мъ, тѣ́мже стра́шное смотре́нїе твоѐ пою́ще, вопїе́мъ тѝ, хрⷭ҇тѐ: мольба́ми прⷣте́чи твоегѡ̀ ѡ҆чище́нїе грѣхѡ́въ пода́ждь на́мъ, ꙗ҆́кѡ є҆ди́нъ бл҃гоꙋтро́бенъ. [Два́жды.]
Сла́ва, и҆ ны́нѣ, бг҃оро́диченъ:
Предста́тельнице те́плаѧ хрⷭ҇тїа́нъ, сн҃ꙋ твоемꙋ̀ моли́сѧ при́снѡ, бцⷣе, всѧ́кагѡ ѕлодѣ́йства и҆ ѡ҆горче́нїѧ и҆зба́вити на́съ борца̀, <<л҃в: 63>> и҆ да́ти на́мъ проще́нїе прегрѣше́нїй, за млⷭ҇рдїе щедро́тъ, твои́ми мл҃твами, мт҃и дв҃о.
По Хвали́те и҆́мѧ гдⷭ҇не, припѣ́въ на ржⷭ҇тво̀ прⷣте́чево:
Велича́емъ тѧ̀, прⷣте́че сп҃совъ і҆ѡа́нне, и҆ чте́мъ є҆́же ѿ непло́дове пресла́вное рождество̀ твоѐ.
Ѱало́мъ и҆збра́нный: Бл҃гослове́нъ гдⷭ҇ь бг҃ъ і҆и҃левъ: На зача́тїе, то́йже.
На ᲂу҆сѣкнове́нїе же, и҆ на ѡ҆брѣ́тенїе, ѱало́мъ: Бл҃же́нъ мꙋ́жъ боѧ́йсѧ гдⷭ҇а:
Коне́цъ ᲂу҆ велича́нїѧ: На ᲂу҆сѣкнове́нїе: И҆ почита́емъ всѝ чтⷭ҇ны́ѧ твоеѧ̀ главы̀ ᲂу҆сѣкнове́нїе.
На ѡ҆брѣ́тенїе: И҆ почита́емъ всѝ чтⷭ҇ны́ѧ твоеѧ̀ главы̀ ѡ҆брѣ́тенїе.
На собо́ръ: И҆ почита́емъ всѝ всечтⷭ҇ны́й собо́ръ тво́й.
По полѷеле́и, сѣда́ленъ, гла́съ є҃:
Подо́бенъ: Собезнача́льное сло́во:
Ѿ ложе́снъ прⷪ҇ро́ка ꙗ҆́вльшасѧ бж҃їѧ, и҆ ѿ непло́дове свѣти́льника вселе́нныѧ проше́дша, въ пѣ́снехъ восхва́лимъ хрⷭ҇то́ва крⷭ҇ти́телѧ, и҆ побѣдоно́сна страда́льца прⷣте́чꙋ і҆ѡа́нна: мо́литсѧ бо гдⷭ҇еви, поми́ловатисѧ дꙋша́мъ на́шымъ. [Два́жды.]
Сла́ва, и҆ ны́нѣ, бг҃оро́диченъ:
Неискꙋсобра́чнаѧ невѣ́сто бг҃ороди́тельнице пречтⷭ҇аѧ, ꙗ҆́же є҆́ѵинꙋ печа́ль на ра́дость претвори́вшаѧ, воспѣва́емъ тѧ̀ при́снѡ и҆ сла́вимъ, ꙗ҆́кѡ возвела̀ є҆сѝ на́съ ѿ пе́рвыѧ клѧ́твы: и҆ ны́нѣ молѝ непреста́ннѡ, бцⷣе препѣ́таѧ, сн҃а и҆ бг҃а твоего̀, сп҃стѝ на́съ.
Степє́нна, а҃-й а҆нтїфѡ́нъ, д҃-гѡ гла́са.
Прокі́менъ: И҆ ты̀, ѻ҆троча̀ прⷪ҇ро́къ вы́шнѧгѡ нарече́шисѧ.
Сті́хъ: Бл҃гослове́нъ гдⷭ҇ь бг҃ъ і҆и҃левъ:
Всѧ́кое дыха́нїе: Є҆ѵⷢ҇лїе, пи́сано въ концѣ̀ кни́ги сеѧ̀.
По н҃-мъ ѱалмѣ̀, стїхи́ра, гла́съ а҃:
Проповѣ́дникъ бы́лъ є҆сѝ а҆́гнца бж҃їѧ сло́ва, і҆ѡа́нне прⷪ҇ро́че и҆ прⷣте́че, прорица́еши бо бꙋ̑дꙋщаѧ, и҆ предглаго́леши концє́мъ: сѐ а҆́гнецъ бж҃їй, взе́млѧй мі́ра грѣхѝ, и҆ подаѧ́й всѣ̑мъ ми́ръ и҆ ве́лїю млⷭ҇ть.
<<л҃в ѡ҆б.: 64>>
Канѡ́нъ бцⷣы на ѕ҃: И҆ прⷣте́чи на и҃. Гла́съ д҃.
Пѣ́снь а҃.
І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинꙋ̀ дꙋшѝ трича́стное потопѝ, молю́сѧ: да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Ꙗ҆́кѡ вели́ка ѕвѣзда̀ сл҃нца прⷣте́че, просвѣти́лъ є҆сѝ зе́млю свѣтлостьмѝ твои́ми крⷭ҇ти́телю. тѣ́мже зовꙋ́ ти: просвѣтѝ и҆ моѐ се́рдце, ѡ҆слѣпле́нное ѿ безчи́сленныхъ прегрѣше́нїй, лю́тыми ѡ҆мрачє́нїи.
Разрѣши́вый и҆ногда̀ бл҃же́нне, въ рожде́нїи непло́дствїѧ соꙋ́зы, тѣ́мже тѧ̀ молю̀ безпло́дствїемъ запꙋстѣ́вшꙋю дꙋ́шꙋ мою̀ страсте́й покажѝ мл҃твами твои́ми плодоно́снꙋ, добродѣ́телей бл҃гоча̑дїѧ приносѧ́щꙋю.
Оу҆гото́валъ є҆сѝ пꙋти̑ и҆зба́вителѧ, предходѧ̀ въ си́лѣ и҆лїинѣ̀, присносла́вне крⷭ҇ти́телю: къ немꙋ́же моеѧ̀ дꙋшѝ движє́нїѧ и҆спра́ви, собла́знъ всѧ́кїй, и҆ пла́мень страсте́й и҆з̾има́ѧ мл҃твами твои́ми.
Бг҃оро́диченъ: Ѡ҆́блаче свѣ́тлый, дꙋшѝ моеѧ̀ ѡ҆́блаки мнѡ́гїѧ и҆ тє́мныѧ твои́ми свѣ́тлыми хода́тайствы разорѝ, ꙗ҆́кѡ да ви́ждꙋ зарю̀ и҆з̾ тебє̀ возсїѧ́вшагѡ, и҆ свѣ́томъ свѣ́тъ прїимꙋ̀ незаходи́мый.
Пѣ́снь г҃.
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Всѧ́кꙋ добродѣ́тель и҆спꙋсти́лъ є҆сѝ, всѧ́кꙋ же ѕло́бꙋ ѿ се́рдца возненави́дѣлъ є҆сѝ, и҆ стезю̀ покаѧ́нїѧ человѣ́кѡмъ, бл҃же́нне, показа́лъ є҆сѝ.
Сло́ва вопло́щшагѡсѧ прⷣте́ча вели́къ показа́лсѧ є҆сѝ, сегѡ̀ ра́ди молю́сѧ тѝ: безслове́сныхъ мѧ̀ страсте́й и҆зба́ви, наставлѧ́ѧ мѧ̀ къ безстра́стїю.
Є҆щѐ жи́тельствꙋѧ въ тѣлесѝ, житїѐ безпло́тныхъ показа́лъ є҆сѝ, прⷣте́че: є҆мꙋ́же ᲂу҆подоблѧ́тисѧ, мл҃твами твои́ми бг҃оно́се, на́съ ᲂу҆крѣпи́лъ є҆сѝ.
<<л҃г: 65>>
Бг҃оро́диченъ: Мі́ръ тобо́ю поми́ловасѧ, и҆́же престꙋпле́нїемъ непотре́бенъ бы́сть, мт҃и дв҃о: сегѡ̀ ра́ди въ пѣ́нїихъ пѣ́сненныхъ по до́лгꙋ тѧ̀ ᲂу҆бл҃жа́етъ.
Сѣда́ленъ, гла́съ а҃.
Въ пꙋсты́ню всели́лсѧ є҆сѝ, прⷣте́че хрⷭ҇то́въ, ꙗ҆́коже и҆лїа̀: тѣ́мже се́рдце моѐ ᲂу҆твердѝ, всебл҃же́нне. [Два́жды.]
Сла́ва, и҆ ны́нѣ, бг҃оро́диченъ:
Цр҃и́цꙋ дв҃ꙋ тѧ̀ проповѣ́дꙋетъ дв҃дъ, пречтⷭ҇аѧ, чи́стꙋ: тѣ́мже молю́сѧ тѝ, нбⷭ҇нагѡ мѧ̀ црⷭ҇твїѧ сотворѝ наслѣ́дника, да ᲂу҆бл҃жа́ю тѧ̀.
Пѣ́снь д҃.
І҆рмо́съ: Любвѐ ра́ди, ще́дре, твоегѡ̀ ѡ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, человѣколю́бче, крѣ́пость моѧ̀ и҆ хвале́нїе.
Ꙗ҆́кѡ го́рлицꙋ тѧ̀, веснꙋ̀ и҆́стиннꙋю всеи́стинными словесы̀ предвозвѣща́ющꙋю мі́рꙋ, разꙋмѣ́вше, ᲂу҆бл҃жа́емъ, присносла́вне прⷣте́че.
Сокрꙋше́на мѧ̀ льсти́вагѡ и҆скꙋше́ньми, ве́тхомꙋ и҆ но́вомꙋ ꙗ҆́кѡ сы́й хода́тай, всего̀ ѡ҆бновѝ пою́щаго тѧ̀, прⷣте́че.
И҆́же въ пꙋсты́ню всели́выйсѧ непоро́чнымъ житїе́мъ, ѡ҆пꙋстѣ́вшїй всѧ́кими престꙋпле́ньми ᲂу҆́мъ мо́й, бж҃е́ственными мл҃твами твои́ми призовѝ, прⷣте́че.
Бг҃оро́диченъ: Ѡ҆чище́нїе на́мъ и҆ и҆збавле́нїе позна́сѧ тво́й сн҃ъ, дв҃о, є҆го́же молѝ сп҃стѝ дꙋ́шы во ᲂу҆миле́нїи тѧ̀ бл҃жа́щихъ.
Пѣ́снь є҃.
І҆рмо́съ: Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣшѝ ны̀, бл҃же, тво́й ми́ръ да́рꙋѧй.
Пꙋсты́нными мѧ̀ ᲂу҆́гльми, и҆ страстны́ми нахо́ды распала́ема, пꙋсты́нное ѻ҆вча̀, ѡ҆росѝ твои́ми мл҃твами, и҆ ѿ си́хъ вре́да соблюдѝ неврежде́нна.
Под̾ твое́ю, всебл҃же́нне, ст҃о́ю десни́цею, кр҃ща́етсѧ ѻ҆ц҃а̀ бж҃е́ственнаѧ десни́ца, сп҃са́ющаѧ на́съ ѿ рꙋкѝ льсти́вагѡ, сщ҃е́нными хода́тайствы твои́ми.
<<л҃г ѡ҆б.: 66>>
Прибѣ́жище тѧ̀, прⷣте́че, и҆ покро́въ держа́венъ, и҆ вели́кꙋю стѣ́нꙋ, ве́сь мі́ръ и҆́мать, и҆зба́ви на́съ твои́ми мл҃твами ѿ всѧ́кїѧ тѣсноты̀.
Бг҃оро́диченъ: Добро́тꙋ тѧ̀ і҆а́кѡвлю возлюбѝ бг҃ъ, дв҃о ѻ҆трокови́це, ᲂу҆краша́ѧ всѣ́хъ тобо́ю, ѡ҆мрачи́вшихсѧ престꙋпле́нїемъ пе́рвѣе.
Пѣ́снь ѕ҃.
І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й многомлⷭ҇тиве.
Стоѧ́лъ є҆сѝ кр҃ща́ѧ въ быстрина́хъ влⷣкꙋ, грѣхѝ всѣ́хъ человѣ́кѡвъ взе́млющаго: є҆го́же моли́ти не преста́й, прⷣте́че, ᲂу҆ще́дрити дꙋ́шы на́шѧ.
Проповѣ́дникъ показа́лсѧ є҆сѝ покаѧ́нїѧ, въ не́мже соблюдѝ, прⷣте́че, моѐ се́рдце, ѡ҆скверне́нное вре́дными грѣхѝ, и҆ возникнове́нїѧ не и҆мꙋ́щее.
Возгласи́лъ є҆сѝ, бл҃же́нне, дꙋша́мъ въ пꙋсты́нѧхъ непроходи́мыхъ, сло́во нахожде́нїемъ прише́дшее: тѣ́мже гла́сы немо́лчными всѧ́каѧ цр҃ковь бл҃жи́тъ тѧ̀.
Бг҃оро́диченъ: Зако́на и҆з̾ѧсни́шасѧ ѡ҆́бразы, твои́мъ стра́шнымъ ржⷭ҇тво́мъ, бг҃оневѣ́сто, и҆́хже сбытїѐ ны́нѣ зрѧ́ще, влⷣчце, по достоѧ́нїю тѧ̀ чти́мъ.
Конда́къ во ᲂу҆ста́вѣ:
А҆́ще ли нѣ́сть ᲂу҆ста́ва, глаго́ли се́й конда́къ. Гла́съ и҃:
И҆́же вои́стиннꙋ ѿ всѣ́хъ ст҃ы́хъ бо́льшемꙋ, па́че всѣ́хъ согрѣша́ѧ беззако́нновавшихъ, недосто́йный а҆́зъ: но ѻ҆ба́че приноша́ю тѝ пѣ́нїе, і҆ѡа́нне прⷣте́че: ꙗ҆́кѡ ᲂу҆́бѡ и҆мы́й дерзнове́нїе ко гдⷭ҇ꙋ, ѿ всѧ́кихъ мѧ̀ бѣ́дъ свободѝ, да зовꙋ́ ти: ра́дꙋйсѧ, проповѣ́дниче бл҃года́ти.
І҆́косъ: Начина́ю тѝ пѣ́снь, бг҃опѣ́тый бл҃же́нне і҆ѡа́нне, ра́достїю содержи́мь, и҆ стра́хомъ воспомина́нїѧ твоегѡ̀ ᲂу҆жаса́ѧсѧ, и҆ недовѣ́дый же сло́ва страшꙋ́сѧ, прⷣте́че: са́мъ же ᲂу҆крѣплѧ́ѧ мѧ̀ пода́ждь досто́йнѡ глаго́лати: ра́дꙋйсѧ, є҆гѡ́же <<л҃д: 67>> ра́ди ꙗ҆ви́сѧ ра́дость, ра́дꙋйсѧ, є҆гѡ́же ра́ди клѧ́тва поги́бе. ра́дꙋйсѧ, концє́въ земны́хъ ᲂу҆чи́телю, ра́дꙋйсѧ, чꙋде́съ хрⷭ҇то́выхъ проповѣ́дателю, ра́дꙋйсѧ, высото̀ со́вѣсти досѧ́жꙋщаѧ до нб҃съ. ра́дꙋйсѧ, широто̀ чистоты̀ ѡ҆чища́ющаѧ зе́млю всю̀. ра́дꙋйсѧ, ꙗ҆́кѡ ст҃ꙋ́ю трⷪ҇цꙋ ви́дѣлъ є҆сѝ. ра́дꙋйсѧ, ꙗ҆́кѡ дво́ицꙋ веще́ственнꙋю презрѣ́лъ є҆сѝ. ра́дꙋйсѧ, ѕвѣздо̀, показꙋ́ющаѧ сл҃нце. ра́дꙋйсѧ, свѣти́ло, просвѣща́ющее подсо́лнечнꙋю. ра́дꙋйсѧ, и҆́мже хрⷭ҇то́съ возвѣсти́сѧ, ра́дꙋйсѧ, и҆́мже сатана̀ возненави́дѣсѧ, ра́дꙋйсѧ, проповѣ́дниче бл҃года́ти.
Пѣ́снь з҃.
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Бо́льши всѣ́хъ рожде́нныхъ ꙗ҆ви́лсѧ є҆сѝ, прⷪ҇ро́че, бг҃ꙋ вельмѝ согрѣша́юща мѧ̀, вели́кою мл҃твою твое́ю, пла́мене вели́кагѡ и҆зба́ви мѧ̀, и҆ вѣ́чныѧ тмы̀.
Непло́днаѧ ꙗ҆ви́хсѧ смоко́вница, и҆ посѣче́нїѧ бою́сѧ: ᲂу҆тверди́ мѧ хода́тайствомъ твои́мъ, прⷣте́че сп҃совъ, и҆ плодови́та сотворѝ, ꙗ҆́кѡ да ᲂу҆бл҃жа́ю тѧ̀.
Оу҆спѝ всѧ́кꙋю дви́жимꙋю бꙋ́рю вра́жїю на притека́ющихъ вѣ́рою къ тебѣ̀ бо́дренными твои́ми мл҃твами ко и҆зба́вителю всѣ́хъ, прⷣте́че і҆ѡа́нне.
Бг҃оро́диченъ: Нахожде́нїѧ лꙋка́вагѡ и҆ нече́стїѧ, и҆ рабо́ты де́мѡнскїѧ и҆зба́ви рабы̑ твоѧ̑, дв҃о, дꙋше́ю и҆ ѧ҆зы́комъ тѧ̀ при́снѡ сла́вѧщихъ.
Пѣ́снь и҃.
І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ блгⷭ҇ви́те, по́йте гдⷭ҇а.
Оу҆ны́нїѧ мѧ̀ сно́мъ ѡ҆держи́ма, и҆ мгло́ю ѕло́бы помрача́ема, свѣ́тлою мл҃твою твое́ю и҆спра́ви, прⷣте́че, и҆ да́ждь ꙗ҆́кѡ во днѝ добродѣ́телей бл҃гоѡбра́знѡ ходи́ти.
И҆скꙋше́нїй мѧ̀ зима̀ содержи́тъ, и҆ страсте́й бꙋ́рѧ смꙋща́етъ мѧ̀, рꙋ́кꙋ мѝ пода́ждь, прⷣте́че, возводѧ́щꙋю дꙋшѝ моеѧ̀ кора́бль ко приста́нищꙋ покаѧ́нїѧ, мл҃твами твои́ми.
<<л҃д ѡ҆б.: 68>>
И҆́же взе́млющаго мі́рꙋ прегрѣшє́нїѧ, въ рѣ́чныхъ вода́хъ крⷭ҇ти́лъ є҆сѝ, ѕѡ́лъ мои́хъ бе́зднꙋ и҆зсꙋшѝ стрꙋѧ́ми мл҃твъ твои́хъ, бл҃же́нне і҆ѡа́нне прⷣте́че.
Ви́дѣвъ дх҃ъ ст҃ы́й, слы́шалъ є҆сѝ гла́съ роди́телевъ свидѣ́тельствꙋющь, прⷣте́че, тобо́ю неизрече́ннѡ кр҃ща́емомꙋ і҆и҃сꙋ: є҆го́же молѝ сп҃стѝ на́съ.
Бг҃оро́диченъ: Ꙗ҆́кѡ и҆сто́чникъ на́шегѡ ѡ҆бновле́нїѧ, сокрꙋше́ннаго мѧ̀ приложе́ньми ѕмїе́выми всего̀ ѡ҆бновѝ: ꙗ҆́кѡ да вѣ́рою и҆ любо́вїю тѧ̀ ᲂу҆бл҃жа́ю, бцⷣе дв҃о всенепоро́чнаѧ.
Пѣ́снь ѳ҃.
І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ, тѣ́мъ тѧ̀ всѝ велича́емъ.
Крѣ́пость моѧ̀ и҆ пѣ́нїе хрⷭ҇то́съ гдⷭ҇ь, є҆го́же молѝ, бл҃же́нне прⷣте́че, на стра̑сти мѧ̀ ᲂу҆крѣпи́ти, и҆ на всѧ́кїѧ прило́ги бѣсѡ́вскїѧ, и҆ да́ждь бж҃е́ственнꙋю дѣ́лати во́лю: ꙗ҆́кѡ да тѧ̀ любо́вїю ᲂу҆бл҃жа́ю при́снѡ.
Кра́снаѧ го́рлица, ла́стовица сладкоглаго́ливаѧ, ꙗ҆ви́лсѧ є҆сѝ, бж҃е́ственный прⷣте́че, веснꙋ̀ возвѣща́ѧ бжⷭ҇твеннꙋю хрⷭ҇та̀: є҆го́же молѝ, и҆зба́вити мѧ̀ зимы̀ дꙋшетлѣ́нныѧ и҆ бꙋ́ри грѣхо́вныѧ, молю́сѧ тебѣ̀.
Взыгра́всѧ въ ложесна́хъ ма́тернихъ, возвѣсти́лъ є҆сѝ ѿ дв҃ы возсїѧ́вшаго: того̀ молѝ плѡтска́ѧ моѧ̑ двиза̑нїѧ ᲂу҆мертви́ти, ᲂу҆мерщвлѧ̑ющаѧ мѧ̀, и҆ и҆спо́лнити ра́дости се́рдце моѐ, ꙗ҆́кѡ да пою́ тѧ, бж҃е́ственный прⷣте́че.
Бг҃оро́диченъ: Бл҃голюби́ваго ро́ждши бг҃а, бл҃голюби́ваѧ бцⷣе, того̀ молѝ всѧ́кїѧ мѧ̀ и҆зба́вити ѕло́бы, и҆ къ немꙋ̀ сотвори́ти се́рдце рачи́тельно, плотско́е сладостра́стїе возненави́дѣвша, да въ пѣ́снехъ велича́ю тѧ̀.
Свѣти́ленъ.
Ꙗ҆́коже ᲂу҆́тро возсїѧ́лъ є҆сѝ бг҃олѣ́пнѡ пред̾ сл҃нцемъ сла́вы, бл҃же́нне прⷣте́че, ѿ престарѣ́вшихсѧ непло́дове и҆ ста́рца і҆ере́а: проповѣ́далъ є҆сѝ ѿ дв҃ы гдⷭ҇не рожде́нїе, на и҆збавле́нїе ро́да <<л҃є: 69>> земна́гѡ, тѣ́мъ любо́вїю воспѣва́емъ, и҆ поклонѧ́емсѧ, крⷭ҇ти́телю, всечтⷭ҇но́мꙋ [и҆́мⷬ҇къ] твоемꙋ̀.
Бг҃оро́диченъ: Прⷪ҇ро́цы проповѣ́даша, а҆пⷭ҇ли наꙋчи́ша, мч҃нцы бг҃омꙋ́дреннѡ твоего̀ сн҃а, бцⷣе пречтⷭ҇аѧ, ꙗ҆́снѡ и҆сповѣ́даша бг҃а всѣ́хъ: съ ни́миже тѧ̀ велича́емъ, тобо́ю на́съ и҆зба́вльшаго дре́внѧгѡ ѡ҆сꙋжде́нїѧ.
На хвали́техъ стїхи̑ры, гла́съ д҃:
И҆мѣ́ѧ къ бг҃ꙋ дерзнове́нїе, рожде́нныхъ всѣ́хъ бо́льши, прⷣте́че, того̀ молѝ всегда̀, ѡ҆ вѣ́рою призыва́ющихъ тѧ̀, ѡ҆браще́нїе на́мъ да́ти, и҆ винꙋ̀ покаѧ́нїѧ, ꙗ҆́кѡ да тѧ̀ воспѣва́емъ при́снѡ сп҃са́еми. [Два́жды.]
Нарече́нъ бы́лъ є҆сѝ прⷪ҇ро́къ ѿ ложе́снъ, ѿ ᲂу҆тро́бы проповѣ́дникъ, прⷣте́ча и҆ а҆пⷭ҇лъ: де́монѡмъ ᲂу҆́бѡ пре́дана мѧ̀ сꙋ́ща, и҆ грѣхꙋ̀ раба̀ многодѣ́йственна, ѿ ѻ҆бои́хъ мѧ̀ и҆зба́ви, ꙗ҆́кѡ крѣ́пкїй во́инъ, да твоѐ ско́рое проповѣ́даю застꙋпле́нїе.
Лопа́та сы́й бж҃е́ственнагѡ дх҃а, плевелови̑дныѧ нра́вы развѣ́й ѿ се́рдца моегѡ̀: дѣѧ̑нїѧ же бж҃е́ствєннаѧ, ꙗ҆́кѡ пшени́цꙋ ѿ менє̀ соберѝ въ жи́тницꙋ бж҃їю, ꙗ҆́кѡ да пи́ща влⷣцѣ бл҃гопотре́бна бꙋ́дꙋ, бл҃же́нне, тобо́ю хода́таемъ ѡ҆богаща́ѧсѧ, хрⷭ҇то́въ крⷭ҇ти́телю.
Сла́ва, гла́съ и҃:
Подоба́етъ і҆ѡа́ннꙋ бл҃гово́нїе, подоба́етъ крⷭ҇ти́телю пѣ́сней красота̀: се́й бо проповѣ́да нача́токъ на́шегѡ сп҃се́нїѧ, взыгра́выйсѧ во чре́вѣ, и҆ вопїѧ̀ въ пꙋсты́ни: пока́йтесѧ! цр҃е́въ во́инъ прⷣте́ча бл҃года́ти, а҆́гнца провозвѣща́ѧ, и҆ сп҃са молѧ̀ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Славосло́вїе вели́кое. И҆ ѿпꙋ́стъ.
На лїтꙋргі́и бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.