← претходни дан | Минеј — Децембар | следећи дан →
20 декабря: Святого праведного Иоанна Кронштадского чудотворца.
Мѣ́сѧца тогѡ́же въ к҃-й де́нь.
Слꙋ́жба ст҃о́мꙋ пра́ведномꙋ пресвѵ́терꙋ і҆ѡа́ннꙋ, кроншта́дтскомꙋ чꙋдотво́рцꙋ.
Краегране́сїе: Свѣти́льниче землѝ рꙋ́сскїѧ, пра́ведне ѻ҆́тче і҆ѡа́нне, моли́сѧ бг҃ꙋ ѡ҆ приносѧ́щихъ тѝ похвалꙋ̀ сїю̀.
На ма́лѣй вече́рни.
На Гдⷭ҇и воззва́хъ, стїхи̑ры, гла́съ в҃:
Свѣти́льника вѣ́ры и҆ бл҃гоче́стїѧ, моли́твенника къ бг҃ꙋ те́плаго, восхва́лимъ, вѣ́рнїи, въ пѣ́нїихъ и҆ пѣ́снехъ дꙋхо́вныхъ, і҆ѡа́нна, првⷣнаго па́стырѧ кроншта́дтскаго, є҆го́же хрⷭ҇то́съ чꙋдесы̀ мно́гими просла́ви и҆ ди́вна цр҃кви рѡссі́йстѣй показа̀.
Всѣ́хъ ра́дость хрⷭ҇то́съ возвеселѝ се́рдце твоѐ, і҆ѡа́нне, є҆гда̀ ѻ҆́трокꙋ є҆щѐ тѝ сꙋ́щꙋ, подви́гшꙋсѧ на моли́твꙋ ко и҆сто́чникꙋ премꙋ́дрости, даде́сѧ тѝ ра́зꙋмъ и҆ смы́слъ ко ᲂу҆че́нїю, є҆́же ᲂу҆тѣша́ти и҆ наставлѧ́ти всѣ́хъ ко сп҃се́нїю.
Є҆ли́цы хрⷭ҇тѡ́ви сꙋ́ть, пло́ть распѧ́ша со страстьмѝ и҆ похотьмѝ, ꙗ҆́коже а҆пⷭ҇толъ па́ѵелъ речѐ. сегѡ̀ ра́ди и҆ ты̀, ст҃е і҆ѡа́нне, и҆з̾ мла́да потща́лсѧ є҆сѝ пра́виломъ си́мъ жи́тельствовати, ѻ҆́бразъ показꙋ́ѧ всѣ̑мъ ко сп҃се́нїю.
Тѣлє́сныѧ нє́мощи препобѣжда́ѧ, дх҃о́внѣ восходи́лъ є҆сѝ ѿ си́лы въ си́лꙋ, преꙋспѣва́ѧ во́зрастомъ и҆ премꙋ́дростїю, созида́ѧ себѐ въ жили́ще бж҃їе дх҃омъ, сподо́билсѧ є҆сѝ, ѻ҆́тче і҆ѡа́нне, видѣ́нїѧ хра́ма бж҃їѧ, въ не́мже во сщ҃е́нствѣ до кончи́ны бг҃ꙋ послꙋжи́лъ є҆сѝ.
Сла́ва, гла́съ и҃:
І҆ѡа́нне првⷣне и҆ ми́лостиве, добродѣ́тель любвѐ стѧжа́вый, ꙗ҆̀же, по а҆пⷭ҇толꙋ, николи́же ѿпада́етъ, ꙗ҆вѝ и҆ на́мъ бл҃года́тнꙋю по́мощь твою̀, да ѡ҆брѧ́щемъ бога́тство бл҃готворе́нїѧ моли́твами твои́ми.
И҆ ны́нѣ, бг҃оро́диченъ, гла́съ то́йже:
Любо́вїю твое́ю, мт҃и дв҃о влⷣчце, покрыва́еши всѣ́хъ притека́ющихъ къ сн҃ꙋ твоемꙋ̀ и҆ бг҃ꙋ на́шемꙋ, мы́ же, грѣ́шнїи, ка́ющесѧ, всѐ ᲂу҆пова́нїе на тѧ̀ возлага́емъ и҆ мо́лимсѧ: сохранѝ на́съ под̾ кро́вомъ твои́мъ.
На стїхо́внѣ стїхи̑ры, гла́съ а҃.
Подо́бенъ: Нбⷭ҇ныхъ чинѡ́въ ра́дованїе:
Никто́же притека́ѧй къ тебѣ̀, ст҃ы́й па́стырю на́шъ, то́щь и҆ неꙋтѣ́шенъ ѿи́де, но всѣ̑мъ въ ра́дость бы́сть видѣ́нїе ли́ка твоегѡ̀ и҆ наставле́нїе ко сп҃се́нїю.
Сті́хъ: Свѣ́тъ возсїѧ̀ првⷣникꙋ и҆ пра̑вымъ се́рдцємъ весе́лїе.
И҆мѣ́ѧ се́рдце твоѐ при́снѡ ѡ҆браще́нное ко гдⷭ҇ꙋ, и҆спо́лнилсѧ є҆сѝ ми́лости и҆ сострада́нїѧ къ ᲂу҆ничижє́ннымъ и҆ ѿвє́рженнымъ лю́демъ бж҃їимъ, и҆́мже и҆ ны́нѣ не престае́ши бл҃годѣ́йствовати, подаѧ̀ моли́твами твои́ми, ѻ҆́тче і҆ѡа́нне, потрє́бнаѧ ко сп҃се́нїю.
Сті́хъ: Гото́во се́рдце є҆гѡ̀ ᲂу҆пова́ти на гдⷭ҇а.
Чистотꙋ̀ дꙋше́внꙋю храни́ти поꙋча́лъ є҆сѝ па́ствꙋ твою̀, ст҃е і҆ѡа́нне, чистотꙋ̀ мы́сли и҆ сло́ва, ꙗ҆́кѡ ѻ҆́бразъ чистоты̀ и҆ непоро́чности, въ себѣ̀ ꙗ҆влѧ́ѧ. сподо́би и҆ на́съ чистотꙋ̀ серде́чнꙋю моли́твами твои́ми стѧжа́ти.
Сла́ва, гла́съ ѕ҃:
Є҆́же ѡ҆ на́съ и҆спо́лнивъ смотрѣ́нїе, любо́вїю зємна́ѧ съ нбⷭ҇ными соедини́лъ є҆сѝ, гдⷭ҇и, си́це глаго́лѧ: и҆дѣ́же є҆́смь а҆́зъ, та́мѡ и҆ слꙋга̀ мо́й бꙋ́детъ. вѣ́рꙋемъ, ꙗ҆́кѡ и҆ слꙋжи́тель тво́й і҆ѡа́ннъ во ѻ҆би́телехъ ст҃ы́хъ мо́литсѧ, ѡ҆ є҆́же пребыва́ти на́мъ съ тобо́ю, гдⷭ҇и.
И҆ ны́нѣ, бг҃оро́диченъ, гла́съ то́йже:
Землѧ̀ неѡра́ннаѧ ꙗ҆ви́ласѧ є҆сѝ, мт҃и бл҃гослове́ннаѧ, возрасти́вшаѧ на́мъ кла́съ живота̀, ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ, бг҃ороди́тельнице, всѣ́хъ пита́тель.
На вели́цѣй вече́рни.
На Гдⷭ҇и воззва́хъ: стїхи̑ры, гла́съ ѕ҃. Подо́бенъ: Всѐ ѿло́жше:
Є҆диноро́днаго сн҃а бж҃їѧ возлюби́лъ є҆сѝ, и҆ томꙋ̀ є҆ди́номꙋ слꙋжи́ти возжелѣ́лъ є҆сѝ, ст҃е і҆ѡа́нне, є҆мꙋ́же ввѣ́рилсѧ є҆сѝ, глаго́лѧ: жи́знь моѧ̀ во хрⷭ҇тѣ̀ є҆́сть. сегѡ̀ ра́ди потща́лсѧ є҆сѝ всѧ̑ ко бл҃гоꙋгожде́нїю гдⷭ҇еви и҆ мꙋ́дрствовати, и҆ дѣ́ѧти.
Моли́твенника те́плаго и҆ бл҃года́тнаго па́стырѧ ви́димъ тѧ̀, ѻ҆́тче і҆ѡа́нне, мнѡ́зѣмъ бо лю́демъ, къ тебѣ̀ притека́ющымъ, ꙗ҆влѧ́еши въ ско́рбехъ ᲂу҆тѣше́нїе, въ недꙋ́зѣхъ многоразли́чныхъ и҆сцѣле́нїе, въ нꙋ́ждахъ сꙋ́щымъ и҆ стра́ждꙋщымъ при́сное вспоможе́нїе и҆ до ны́нѣ въ чꙋдодѣ́йствїихъ не ѡ҆скꙋдѣва́еши.
Лѣ́ствицею добродѣ́телей ше́ствꙋѧ, дѣ́латель нелѣ́ностный вертогра́да гдⷭ҇нѧ ꙗ҆ви́лсѧ є҆сѝ, ѻ҆́тче і҆ѡа́нне, ѿ ᲂу҆́тра жи́зни да́же до послѣ́днѧгѡ часа̀ до́брѣ потрꙋди́лсѧ є҆сѝ. та́кѡ и҆ на́съ моли́твеннѡ ᲂу҆крѣпѝ гдⷭ҇еви рабо́тати.
І҆ѡа́нне првⷣне, врачꙋ̀ бл҃года́тный, си́лою моли́твъ твои́хъ и҆сцѣлѧ́лъ є҆сѝ бли́жнихъ и҆ да́льнихъ, любо́вїю во хрⷭ҇тѣ̀ ѡ҆б̾е́млѧ, тѣ́хъ наставлѧ́лъ є҆сѝ ѡ҆браща́тисѧ къ бг҃ꙋ, всѣ̑мъ по вѣ́рѣ по́мощь подаю́щемꙋ.
Разли́ченъ ми́лованїѧ ѻ҆́бразъ и҆ широка̀ за́повѣдь сїѧ̀, речѐ златослове́сный і҆ѡа́ннъ. ты́ же, па́стырю ми́лостивый, въ си́хъ добродѣ́телехъ многоразли́чнѡ подвиза́выйсѧ, до́мъ трꙋдолю́бїѧ созда́вый, на́съ бы́ти чꙋ́ждыхъ пра́здности наꙋчѝ.
Оу҆едине́нномꙋ пꙋстынножи́телю, прпⷣбномꙋ і҆ѡа́ннꙋ ры́льскомꙋ подража́ѧ, є҆гѡ́же и҆́менемъ во ст҃ѣ́мъ кр҃ще́нїи нарече́нъ бы́лъ є҆сѝ, і҆ѡа́нне првⷣне, ᲂу҆дали́лсѧ є҆сѝ ѿ всѧ́кагѡ мїрска́гѡ пристра́стїѧ, во хрⷭ҇тѣ̀ є҆ди́нѣмъ житїѐ своѐ ᲂу҆тверди́въ, наꙋчѝ и҆ на́съ бл҃гоче́стномꙋ жи́тельствꙋ.
Сла́ва, гла́съ то́йже:
Селє́нїѧ ст҃ы́хъ наслѣ́довалъ є҆сѝ, ѻ҆́тче і҆ѡа́нне првⷣне, во свѣ́тѣ лица̀ бж҃їѧ зри́ши нꙋ̑жды съ вѣ́рою притека́ющихъ къ тебѣ̀, коемꙋ́ждо потрє́бнаѧ ꙗ҆̀же ко сп҃се́нїю подава́ѧ. сегѡ̀ ра́ди и҆ мы̀, на по́мощь твою̀ ᲂу҆пова́юще, мо́лимсѧ: молѝ хрⷭ҇та̀ бг҃а сп҃сти́сѧ дꙋша́мъ на́шымъ.
И҆ ны́нѣ, предпра́зднства, гла́съ то́йже: Верте́пе, бл҃гоꙋкраси́сѧ:
Вхо́дъ. Прокі́менъ днѐ.
И҆ чтє́нїѧ трѝ прпⷣбничєскаѧ, пи̑сана на ѡ҆боро́тѣ листа̀ к҃д.
На лїті́и стїхи̑ры, гла́съ ѕ҃:
Сло́ва бж҃їѧ слꙋжи́телю, словесы̀ є҆ѵⷢ҇льскими назида́лъ є҆сѝ се́рдце твоѐ, въ моли́твѣ и҆ бг҃омы́слїи при́снѡ пребыва́ѧ, ра́зꙋмъ бг҃опросвѣще́нъ стѧжа́лъ є҆сѝ, ѻ҆́тче і҆ѡа́нне, пꙋ́ть къ бг҃ꙋ писа́ньми твои́ми на́мъ ᲂу҆казꙋ́ѧ, моли́сѧ, да пра́во къ немꙋ̀ ше́ствꙋемъ.
Ко хрⷭ҇тꙋ̀, сл҃нцꙋ пра́вды, моли́твеннѡ ѡ҆браща́ѧсѧ, поꙋчє́нїѧ дꙋшеспаси́тєльнаѧ ѡ҆ не́мъ въ кни́зѣ твое́й и҆зложи́лъ є҆сѝ, ѻ҆́тче првⷣне, да всѝ вѣ́рнїи, та́йнамъ бж҃їѧ домострои́тельства сп҃се́нїѧ на́шегѡ поꙋча́ющесѧ, жи́знь вѣ́чнꙋю наслѣ́дꙋютъ.
И҆́стинныѧ вѣ́ры проповѣ́дниче, сло́вомъ и҆ писа́ньми догма́ты правосла́вїѧ и҆з̾ѧснѧ́лъ є҆сѝ, лжеꙋчи́телємъ противобо́рствꙋѧ, на недви́жимѣмъ ка́мени вѣ́ры ᲂу҆твержда́ѧсѧ, во сла́вꙋ цр҃кве хрⷭ҇то́вы потрꙋди́лсѧ є҆сѝ. ᲂу҆крѣпѝ и҆ на́съ моли́твами твои́ми, ѻ҆́тче і҆ѡа́нне, въ вѣ́рности правосла́внѣй цр҃кви пребыва́ти и҆ въ не́й сп҃са́тисѧ.
Сла́ва, гла́съ з҃:
Ꙗ҆ви́лсѧ є҆сѝ лю́демъ бж҃їимъ наста́вникъ сп҃се́нїѧ, ѻ҆́бразъ сострада́нїѧ и҆ дꙋхо́внагѡ ᲂу҆тѣше́нїѧ: не то́чїю бо па́ствѣ кроншта́дтстѣй, но и҆ все́й рꙋсѝ, ѻ҆́тче і҆ѡа́нне бг҃омꙋ́дре, благодѣѧ̑нїѧ и҆сточа́еши. сегѡ̀ ра́ди, пра́зднꙋюще па́мѧть твою̀, сла́вимъ гдⷭ҇а, ди́внаго во ст҃ы́хъ свои́хъ.
И҆ ны́нѣ, гла́съ то́йже:
Притека́юще под̾ кро́въ тво́й, дв҃о бг҃оро́дице, вѣ́мы тѧ̀ хрⷭ҇тїа́нъ предста́тельницꙋ, къ сн҃ꙋ бо твоемꙋ̀ и҆ бг҃ꙋ на́шемꙋ при́снѡ моле́бнѣ рꙋ́цѣ твоѝ ѡ҆ на́съ простира́еши, всенепоро́чнаѧ, и҆ сп҃са́еши ѿ бѣ́дъ вѣ́рою и҆ любо́вїю бг҃оро́дицꙋ тѧ̀ почита́ющихъ.
На стїхо́внѣ стїхи̑ры, гла́съ є҃.
Ре́вностїю ѡ҆ сла́вѣ бж҃їей распалѧ́емь, поꙋча́лъ є҆сѝ па́ствꙋ твою̀ всѧ́чески храни́ти се́рдце своѐ ѿ страсте́й, дꙋ́шꙋ растлѣва́ющихъ и҆ ѿ бг҃а разлꙋча́ющихъ. молѝ ѡ҆ на́съ, ѻ҆́тче ст҃ы́й і҆ѡа́нне, да ᲂу҆пра́вимъ житїѐ на́ше къ сла́вѣ и҆́мене бж҃їѧ и҆ сп҃се́нїю.
Сті́хъ: Свѣ́тъ возсїѧ̀ првⷣникꙋ и҆ пра́вымъ се́рдцємъ весе́лїе.
А҆пⷭ҇тѡльскимъ подвигѡ́мъ подража́ѧ, ѻ҆́тче і҆ѡа́нне преди́вне, дꙋ́шꙋ ѡ҆ сп҃се́нїи бли́жнихъ полага́лъ є҆сѝ, взыскꙋ́ѧ не свои́хъ си, но и҆́хже любы̀ бж҃їѧ ѡ҆б̾е́млетъ. ны́нѣ же, предстоѧ̀ прⷭ҇то́лꙋ ст҃ы́ѧ трⷪ҇цы, непреста́ннѡ моли́сѧ ѡ҆ почита́ющихъ па́мѧть твою̀.
Сті́хъ: Гото́во се́рдце є҆гѡ̀ ᲂу҆пова́ти на гдⷭ҇а.
Всѐ бога́тство вѣ́ры ѿкры́лъ мѝ є҆сѝ, гдⷭ҇и, благода́рнѣ взыва́лъ є҆сѝ, і҆ѡа́нне првⷣне, ко и҆сто́чникꙋ любвѐ и҆ премꙋ́дрости бг҃ꙋ, ѿ негѡ́же позна́лъ є҆сѝ словеса̀ сп҃си́тєльнаѧ. и҆́миже согрѣ́й хла̑днаѧ сердца̀ на́ша и҆ ко сп҃се́нїю напра́ви.
Сла́ва, гла́съ и҃:
Є҆ди́номꙋ бг҃ꙋ любо́вїю прилѣплѧ́ѧсѧ, ст҃е і҆ѡа́нне, при́снѡ попече́нїе ѡ҆ стра́ждꙋщихъ и҆ ѿве́рженныхъ и҆мѣ́ѧ, ско́рый помо́щникъ тѣ́мъ ꙗ҆ви́лсѧ є҆сѝ, сегѡ̀ ра́ди си́ла бл҃года́ти бж҃їѧ содѣва́етъ тобо́ю вє́лїѧ чꙋдеса̀, ѡ҆браща́ѧ невѣ́рныхъ къ вѣ́рѣ во хрⷭ҇та̀ и҆ къ жи́зни во сла́вꙋ бж҃їю.
И҆ ны́нѣ, предпра́зднства, и҆лѝ бг҃оро́диченъ, гла́съ то́йже:
Дѣ́вственнїи ли́цы ст҃ы́хъ на нб҃сѝ и҆ подви̑жницы бл҃гоче́стїѧ на землѝ дѣ́вствꙋ и҆ чистотѣ̀ ѿ тебє̀, дв҃о безневѣ́стнаѧ, наꙋчи́вшїисѧ, воплоти́вшемꙋсѧ ѿ тебє̀ сн҃ꙋ и҆ бг҃ꙋ покланѧ́ющесѧ, сла́вѧтъ ржⷭ҇тво̀ твоѐ, бл҃года́тнаѧ.
Тропа́рь, гла́съ а҃:
Правосла́вныѧ вѣ́ры побо́рниче, землѝ рѡссі́йскїѧ печа́льниче, па́стырємъ пра́вило и҆ ѻ҆́бразе вѣ̑рнымъ, покаѧ́нїѧ и҆ жи́зни во хрⷭ҇тѣ̀ проповѣ́дниче, бж҃е́ственныхъ та́инъ бл҃гоговѣ́йный слꙋжи́телю и҆ дерзнове́нный ѡ҆ лю́дехъ моли́твенниче, ѻ҆́тче првⷣный і҆ѡа́нне, цѣли́телю и҆ преди́вный чꙋдотво́рче, гра́дꙋ кроншта́дтꙋ похвало̀ и҆ цр҃кве на́шеѧ ᲂу҆краше́нїе, молѝ всеблага́го бг҃а ᲂу҆мири́ти мі́ръ и҆ сп҃стѝ дꙋ́шы на́шѧ.
И҆́нъ тропа́рь, гла́съ д҃.
Рѡссі́йскїѧ землѝ па́стырь до́брый показа́лсѧ є҆сѝ, въ слꙋже́нїи пресвѵ́терстѣмъ жи́знь во хрⷭ҇тѣ̀ стѧжа́въ, бг҃омꙋ́дре ѻ҆́тче і҆ѡа́нне. бл҃года́ть и҆з̾ѻби́льнꙋю ѿ влⷣки хрⷭ҇та̀ прїѧ́лъ є҆сѝ: недꙋ́ги ѿгонѧ́ти, малодꙋ̑шныѧ ᲂу҆тѣша́ти, въ та́йнѣ пречⷭ҇тагѡ тѣ́ла и҆ кро́ве вѣ̑рныѧ со хрⷭ҇то́мъ соединѧ́ти. сегѡ̀ ра́ди восхвалѧ́емъ тѧ̀, ꙗ҆́кѡ моли́твенника ѡ҆ дꙋша́хъ на́шихъ.
На ᲂу҆́трени.
По а҃-й каѳі́смѣ сѣда́ленъ, гла́съ д҃:
Неизрече́ннѡ ми́лостивъ и҆ долготерпѣли́въ гдⷭ҇ь ко мнѣ̀, ре́клъ є҆сѝ, ст҃е і҆ѡа́нне, та́кѡ и҆ мнѣ̀ подоба́етъ ми́лостивꙋ бы́ти. сегѡ̀ ра́ди ни́щыѧ и҆ ᲂу҆бѡ́гїѧ возлюби́лъ є҆сѝ, ꙗ҆́кѡ ме́ньшꙋю хрⷭ҇то́вꙋ бра́тїю, и҆́мже всеꙋсе́рднѡ послꙋжи́въ, црⷭ҇твїѧ нбⷭ҇нагѡ наслѣ́дникъ ꙗ҆ви́лсѧ є҆сѝ.
Сла́ва, и҆ ны́нѣ, бг҃оро́диченъ, и҆лѝ предпра́зднства.
По в҃-й каѳі́смѣ сѣда́ленъ, гла́съ є҃:
Є҆жеде́нное соверше́нїе бжⷭ҇твенныхъ та́инъ бл҃года́тною си́лою въ моли́твеннѣмъ по́двизѣ ᲂу҆крѣплѧ́ше тѧ̀, ст҃е і҆ѡа́нне. сегѡ̀ ра́ди поꙋча́лъ є҆сѝ, ꙗ҆́кѡ безкро́внаѧ же́ртва торжество̀ любвѐ бж҃їѧ къ ро́дꙋ человѣ́ческомꙋ є҆́сть и҆ всеси́льное хода́тайство ѡ҆ сп҃се́нїи на́шемъ. ны́нѣ же, ст҃е і҆ѡа́нне, при́снѡ бг҃ꙋ предстоѧ̀, моли́сѧ и҆ на́мъ сеѧ̀ бл҃года́ти достѡ́йнымъ прича́стникѡмъ бы́ти.
Сла́ва, и҆ ны́нѣ, бг҃оро́диченъ, и҆лѝ предпра́зднства.
По полѷеле́и сѣда́ленъ, гла́съ и҃:
Ѻ҆те́ческою любо́вїю всѣ́хъ ѡ҆б̾е́млѧ, са́мыхъ па́дшихъ во глꙋбинꙋ̀ грѣха̀ не ѿвраща́лсѧ є҆сѝ, ненави́дѧ грѣ́хъ, ко грѣ̑шнымъ милосе́рдꙋѧ, къ покаѧ́нїю и҆̀хъ приводи́лъ є҆сѝ, а҆́гг҃лѡмъ нбⷭ҇нымъ подо́бѧсѧ, ѡ҆браще́нїю заблꙋ́ждшихъ и҆ покаѧ́нїю и҆́хъ ра́дꙋѧсѧ, і҆ѡа́нне првⷣне.
Сла́ва, и҆ ны́нѣ, бг҃оро́диченъ, и҆лѝ предпра́зднства.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. Всѧ́кое дыха́нїе: Є҆ѵⷢ҇лїе ѿ матѳе́а, зача́ло ѕ҃і.
По н҃-мъ ѱалмѣ̀ стїхи́ра, гла́съ ѕ҃:
Тѧ̀ земна́го а҆́гг҃ла, нбⷭ҇наго человѣ́ка, любвѐ хрⷭ҇то́вы носи́телѧ, землѝ рѡссі́йскїѧ печа́льника и҆ ѡ҆ все́мъ мі́рѣ моли́твенника, застꙋ́пника ѻ҆би́димыхъ, ѻ҆́бразъ трꙋдолю́бїѧ, чꙋдотво́рца преди́внаго почита́емъ. і҆ѡа́нне првⷣне, бл҃годарѧ́ще бг҃а, прославлѧ́ющаго ст҃ы̑ѧ своѧ̑.
Канѡ́нъ, гла́съ а҃.
Пѣ́снь а҃.
І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
Чистотꙋ̀ помышле́нїй да́ждь мѝ, сп҃се мо́й. є҆́же воспѣ́ти чистото́ю а҆́гг҃лѡмъ подо́бнаго, првⷣнаго і҆ѡа́нна пресвѵ́тера, ꙗ҆́кѡ а҆́гг҃ла гдⷭ҇а вседержи́телѧ.
Є҆́же люби́ти хрⷭ҇та̀ и҆ є҆мꙋ̀ слꙋжи́ти, і҆ѡа́нне ст҃е, дѣ́ломъ и҆ сло́вомъ и҆спо́лнилъ є҆сѝ, во сщ҃е́нствѣ вѣ̑рнымъ ѻ҆́бразъ бы́въ сло́вомъ и҆ житїе́мъ.
І҆ѡа́ннꙋ крⷭ҇ти́телю подража́ѧ, покаѧ́нїѧ проповѣ́дниче, ѻ҆́тче і҆ѡа́нне првⷣне, ѻ҆́бразъ воздержа́нїѧ, цѣломꙋ́дрїѧ и҆ дѣ́вственника чистотꙋ̀ ꙗ҆ви́лъ є҆сѝ.
Бг҃оро́диченъ:
Ѡ҆бл҃годатѝ на́съ, мт҃и бж҃їѧ, є҆́же къ бг҃оꙋгожде́нїю житїѐ на́ше ᲂу҆пра́вити, да твое́ю по́мощїю и҆ моли́твами првⷣнагѡ і҆ѡа́нна живо́тъ вѣ́чный наслѣ́дꙋемъ.
Пѣ́снь г҃.
І҆рмо́съ: Ка́мень, є҆гѡ́же небрего́ша зи́ждꙋщїи, се́й бы́сть въ главꙋ̀ ᲂу҆́гла: то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы́къ и҆скꙋпѝ.
А҆пⷭ҇тольски трꙋди́лсѧ є҆сѝ ѿ ᲂу҆́тра па́стырскагѡ житїѧ̀ твоегѡ̀ да́же до ве́чера, ѻ҆́тче і҆ѡа́нне, николи́же въ любвѝ къ бг҃ꙋ и҆ бли́жнемꙋ ѡ҆скꙋдѣва́ѧ.
Нбⷭ҇нагѡ црⷭ҇твїѧ взыскꙋ́ѧ, ᲂу҆се́рдный дѣ́латель бл҃ги́хъ на землѝ ꙗ҆ви́лсѧ є҆сѝ, моли́твою вѣ́ры недꙋ́ги и҆сцѣлѧ́ѧ и҆ заблꙋ́ждшыѧ къ покаѧ́нїю призыва́ѧ, ст҃е.
Никогѡ́же ѿвраща́лсѧ є҆сѝ, то́чїю ѿверга́ющихсѧ гдⷭ҇а і҆и҃са хрⷭ҇та̀ и҆ цр҃кве є҆гѡ̀ ст҃ы́ѧ, є҆́йже сыны̀ вѣ́ка сегѡ̀ противлѧ́ютсѧ. но и҆ ѡ҆ си́хъ заблꙋ́ждшихъ въ ско́рби мно́зѣй моле́нїе твоѐ къ бг҃ꙋ возноси́ти не престава́лъ є҆сѝ.
Бг҃оро́диченъ:
Є҆дине́нїе вѣ́рныхъ въ цр҃кви сн҃а твоегѡ̀ и҆ бг҃а на́шегѡ сохранѝ, пречⷭ҇таѧ дв҃о мт҃и, да при́снѡ въ любвѝ хрⷭ҇то́вѣ дрꙋ́гъ ко дрꙋ́гꙋ ᲂу҆тверди́мсѧ.
Сѣда́ленъ, гла́съ в҃:
Мы̀, немощні́и, къ тебѣ̀, првⷣне і҆ѡа́нне, ꙗ҆́кѡ си́льномꙋ моли́твенникꙋ пред̾ бг҃омъ, притека́емъ, просѧ́ще недꙋ́гѡмъ дꙋшє́внымъ и҆ тѣлє́снымъ и҆сцѣле́нїѧ, въ ско́рбехъ ѡ҆ грѣсѣ́хъ на́шихъ покаѧ́нїемъ и҆збавле́нїѧ, странѣ̀ на́шей и҆ лю́демъ є҆ѧ̀ ми́рное жи́тельство и҆ всѧ̀ потрє́бнаѧ ко сп҃се́нїю.
Сла́ва, и҆ ны́нѣ, предпра́зднства, и҆лѝ бг҃оро́диченъ:
Ѻ҆трокови́це бл҃года́тнаѧ, мт҃и безневѣ́стнаѧ, наде́ждо на́шегѡ сп҃се́нїѧ, да́ждь на́мъ въ вѣ́рѣ ᲂу҆твержде́нїе и҆ во бл҃гочести́вѣмъ житїѝ преꙋспѣ́ѧнїе, въ ско́рбехъ и҆ печа́лехъ ᲂу҆тѣше́нїе. тѧ́ бо, ꙗ҆́кѡ ро́ждшꙋю сп҃са хрⷭ҇та̀, при́снѡ велича́емъ.
Пѣ́снь д҃.
І҆рмо́съ: Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ, сла́ва си́лѣ твое́й гдⷭ҇и.
Лѡ́жнаѧ мꙋдрова̑нїѧ сынѡ́въ вѣ́ка сегѡ̀, возстаю́щихъ проти́вꙋ и҆́стины ст҃ы́ѧ цр҃кве хрⷭ҇то́вы, ѿве́рглъ є҆сѝ, ст҃е і҆ѡа́нне, сло́вомъ и҆ житїе́мъ правосла́вїе ᲂу҆твержда́лъ є҆сѝ, поѧ̀: сла́ва си́лѣ твое́й, гдⷭ҇и.
И҆́мѧ хрⷭ҇то́во при́снѡ въ се́рдцѣ носѧ̀, ст҃о́мꙋ бг҃оно́сцꙋ і҆гна́тїю подража́ѧ, въ себѣ̀ само́мъ всѧ́кое прираже́нїе грѣха̀ и҆стреби́лъ є҆сѝ, поѧ̀: сла́ва си́лѣ твое́й, гдⷭ҇и.
Си́ла бж҃їѧ, въ не́мощи соверша́ющаѧсѧ, ꙗ҆ви́ тѧ ди́внаго чꙋдотво́рца. цѣли́телѧ недꙋ́жныхъ и҆ немощны́хъ, ᲂу҆чи́телѧ покаѧ́нїѧ, моли́твы дѣ́лателѧ, пою́ща: сла́ва си́лѣ твое́й, гдⷭ҇и.
Бг҃оро́диченъ:
Ꙗ҆ви́ласѧ є҆сѝ. влⷣчце бг҃оро́дице, бл҃года́тнаѧ помо́щница првⷣномꙋ пресвѵ́терꙋ і҆ѡа́ннꙋ, при́снѡ молѧ́щемꙋсѧ тѝ и҆ сн҃ꙋ твоемꙋ̀ и҆ бл҃года́рнѡ пою́щемꙋ: сла́ва си́лѣ твое́й, гдⷭ҇и.
Пѣ́снь є҃.
І҆рмо́съ: Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Бла́го мнѣ̀, ꙗ҆́кѡ смири́лъ мѧ̀ є҆сѝ, гдⷭ҇и, си́це моли́лсѧ є҆сѝ, терпѧ̀ поношє́нїѧ хꙋли́телей твои́хъ, ст҃е і҆ѡа́нне, хранѧ̀ ми́ръ се́рдца твоегѡ̀ непреста́нною моли́твою и҆ неѕло́бїемъ.
Ѡ҆бле́ксѧ во хрⷭ҇та̀ вѣ́рою и҆ прича́стїемъ ст҃ы́хъ та̑инъ бы́лъ є҆сѝ тве́рдъ, ꙗ҆́кѡ скала̀, глаго́лѧ: мнѣ̀ хрⷭ҇то́съ полнота̀ всѣ́хъ бла̑гъ, живо́тъ и҆ ми́ръ, превосходѧ́й всѧ́къ ᲂу҆́мъ.
Гдⷭ҇ни трапе́зы при́снѡ причаща́ѧсѧ, стѧжа́лъ є҆сѝ свѣ́тъ хрⷭ҇то́въ, просвѣща́ющїй всѧ́каго человѣ́ка, грѧдꙋ́щаго въ мі́ръ. си́мъ же и҆ на́съ просвѣтѝ, і҆ѡа́нне свѣ́тоносче, тѧ̀ почита́ющихъ.
Бг҃оро́диченъ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й, пречⷭ҇таѧ дв҃о, ѻ҆́бщники сла́вы твоеѧ̀ содѣ́лай и҆ на́съ, тѧ̀ при́снѡ ᲂу҆бл҃жа́ющихъ.
Пѣ́снь ѕ҃.
І҆рмо́съ: Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀.
Ѡ҆живлѧ́ѧ дꙋ́шꙋ непреста́нною ко гдⷭ҇ꙋ моли́твою, си́це взыва́лъ є҆сѝ, і҆ѡа́нне бг҃омꙋ́дре: гдⷭ҇и, да́ждь мѝ люби́ти всѧ́каго человѣ́ка, ꙗ҆́кѡ сама́го себѐ. сїю̀ добродѣ́тель помозѝ и҆ на́мъ стѧжа́ти.
Призыва́ѧ и҆́мѧ бж҃їе во сп҃се́нїе твоѐ, сп҃се́нїю мно́гихъ послꙋжи́лъ є҆сѝ. да пребꙋ́демъ и҆ мы̀ въ є҆дине́нїи съ бг҃омъ и҆ любвѝ междꙋ̀ собо́ю, мо́лимтисѧ, ѻ҆́тче і҆ѡа́нне.
Ра́зꙋмъ бг҃опросвѣще́нный стѧжа́лъ є҆сѝ, і҆ѡа́нне премꙋ́дре, ѡ҆ ст҃ѣ́й трⷪ҇цѣ бг҃осло́вствꙋѧ, ре́клъ є҆сѝ: высота̀ и҆́стины сеѧ̀ животво́рна дꙋшѣ̀, въ простотѣ̀ се́рдца вѣ́рꙋющей.
Бг҃оро́диченъ:
И҆зба́вителѧ на́шего неизрече́ннѡ ро́ждшаѧ, ѽ прест҃а́ѧ дв҃о, бꙋ́ди на́мъ грѣ̑шнымъ прибѣ́жище сп҃се́нїѧ и҆ вѣ́чныѧ жи́зни хода́таица.
Конда́къ, гла́съ г҃:
Дне́сь па́стырь кроншта́дтскїй предстои́тъ прⷭ҇то́лꙋ бж҃їю и҆ ᲂу҆се́рднѡ мо́литъ ѡ҆ вѣ́рныхъ хрⷭ҇та̀ пастыренача́льника, ѡ҆бѣтова́нїе да́вшаго: сози́ждꙋ цр҃ковь мою̀ и҆ врата̀ а҆́дѡва не ѡ҆долѣ́ютъ є҆́й.
І҆́косъ:
Восхва́лимъ, вѣ́рнїи, ди́внаго па́стырѧ кроншта́дтскаго, бл҃года́ти тезоимени́таго, свѣти́льника присногорѧ́щаго ᲂу҆ прⷭ҇то́ла ст҃ы́ѧ трⷪ҇цы, съ бг҃оро́дицею и҆ со всѣ́ми ст҃ы́ми землѝ рѡссі́йскїѧ молѧ́щагосѧ ѡ҆ сп҃се́нїи всѣ́хъ, и҆́мѧ гдⷭ҇не призыва́ющихъ, да ᲂу҆крѣпи́тсѧ въ странѣ̀ на́шей правосла́вїе си́лою хрⷭ҇та̀ пастыренача́льника, ѡ҆бѣтова́нїе да́вшаго: сози́ждꙋ цр҃ковь мою̀ и҆ врата̀ а҆́дѡва не ѡ҆долѣ́ютъ є҆́й.
Пѣ́снь з҃.
І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Наста́ви на́съ, па́стырю до́брый, жи́зни во хрⷭ҇тѣ̀, по сло́вꙋ бо твоемꙋ̀, вели́ко дѣ́ланїе є҆́сть, є҆́же побѣжда́ти грѣ́хъ, въ на́съ живꙋ́щїй. да не ѡ҆пали́тсѧ дꙋша̀ на́ша пла́менемъ є҆гѡ̀, помоли́сѧ.
Ѡ҆чище́нїе на́ше и҆ и҆збавле́нїе є҆́сть хрⷭ҇то́съ сп҃си́тель, є҆мꙋ́же ты̀, па́стырю пречꙋ́дный, ѡ҆ на́шемъ дꙋхо́внѣмъ возрожде́нїи, чрез̾ покаѧ́нїе и҆ и҆справле́нїе, помоли́сѧ.
Си́лою дх҃а ст҃а́гѡ въ непреста́ннѣй моли́твѣ безстра́стїе стѧжа́вый, до́брый па́стырю і҆ѡа́нне, страсте́й любогрѣхо́вныхъ на́мъ и҆зба́витисѧ помоли́сѧ.
Бг҃оро́диченъ:
Ꙗ҆вѝ на́мъ ми́лость твою̀, бг҃оро́дице дв҃о, мт҃и живота̀, къ тебѣ̀ съ вѣ́рою притека́ющымъ и҆ сн҃ꙋ твоемꙋ̀ и҆ бг҃ꙋ покаѧ́нїе приносѧ́щымъ.
Пѣ́снь и҃.
І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки.
Ще́дрою рꙋко́ю твое́ю ми́лостыню просѧ́щымъ подава́лъ є҆сѝ, і҆ѡа́нне ми́лостиве. не вѣ́дѣ бо шꙋ́йца, є҆́же творѝ десни́ца твоѧ̀, тщетꙋ́ бо земна́гѡ стѧжа́нїѧ на нбⷭ҇наѧ премѣни́лъ є҆сѝ.
И҆мꙋ́щемꙋ дано̀ бꙋ́детъ и҆ преизбꙋ́детъ, речѐ гдⷭ҇ь, та́кѡ и҆ ты̀, ѻ҆́тче і҆ѡа́нне, тща́нїемъ ве́лїимъ бл҃года́ть дх҃а ст҃а́гѡ стѧжа́лъ є҆сѝ, є҆́юже и҆ на́съ моли́твами твои́ми ны́нѣ ᲂу҆ще́дри.
Хране́нїе ᲂу҆стѡ́мъ полага́ѧ, николи́же сꙋ́єтнаѧ возглаго́лалъ є҆сѝ, і҆ѡа́нне, зако́на гдⷭ҇нѧ взыскꙋ́ѧ, и҆ на́съ въ не́мъ ходи́ти при́снѡ наꙋча́еши.
Бг҃оро́диченъ:
Тѧ̀, бг҃оро́дицꙋ, вы́шшꙋю нб҃съ и҆ чи́стшꙋю свѣ́тлостей со́лнечныхъ, въ пѣ́снехъ немо́лчныхъ воспѣва́ютъ херꙋві́ми и҆ серафі́ми. съ ни́миже и҆ мы̀, недосто́йнїи, тѧ̀ ᲂу҆бл҃жа́емъ.
Пѣ́снь ѳ҃.
І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ.
І҆и҃са хрⷭ҇та̀ пастыренача́льника ѻ҆́бразъ въ себѣ̀ носѧ̀, і҆ѡа́нне, ᲂу҆гото́валъ є҆сѝ по всѧ̑ дни̑ дꙋ́шꙋ твою̀ за па́ствꙋ полага́ти и҆ во грѣсѣ́хъ погиба́ющихъ къ бг҃ꙋ ѡ҆браща́ти.
Приносѧ́щихъ тѝ похвалꙋ̀ сїю̀, ѻ҆́тче і҆ѡа́нне, не ѿри́ни, но ми́лость хрⷭ҇та̀ бг҃а и҆спросѝ къ проще́нїю мно́гихъ прегрѣше́нїй.
Ѻ҆чи́ма твои́ма при́снѡ взира́ѧ ко гдⷭ҇ꙋ, ѻ҆́тче і҆ѡа́нне, врата̀ се́рдца твоегѡ̀ ѿвє́рста є҆мꙋ̀ и҆мѣ́лъ є҆сѝ, да ѿве́рзетсѧ и҆ на́мъ две́рь покаѧ́нїѧ моли́твами твои́ми.
Бг҃оро́диченъ:
Хрⷭ҇та̀ бг҃а на́шего, пре́жде вѣ̑къ ѿ ѻ҆ц҃а̀ рожде́ннаго без̾ мт҃ре, ро́ждшагосѧ же ѿ тебє̀ без̾ ѻ҆тца̀ на́съ ра́ди, молѝ, чⷭ҇таѧ бг҃оневѣ́сто, да сп҃се́нїе ᲂу҆лꙋчи́мъ, тѧ̀ велича́юще.
Свѣти́ленъ:
Ве́сь и҆спо́лнилсѧ свѣ́та хрⷭ҇то́ва, ѡ҆ст҃и́въ себѐ бг҃ови, просвѣтѝ и҆ на́съ свѣ́томъ бл҃года́ти дх҃а ст҃а́гѡ моли́твами твои́ми, і҆ѡа́нне свѣтоно́сне.
Сла́ва, и҆ ны́нѣ, бг҃оро́диченъ:
А҆́гг҃ли на нб҃сѝ и҆ человѣ́цы на землѝ тѧ̀, бг҃оро́дице, ꙗ҆́кѡ мт҃рь свѣ́та, непреста́ннѡ велича́емъ.
На хвали́техъ стїхи̑ры, гла́съ и҃:
Ликꙋ́й свѣ́тлѡ, гра́де ст҃а́гѡ петра̀, и҆мѣ́ѧ въ себѣ̀ дне́сь просла́влєнныѧ ст҃ы̑ѧ ᲂу҆го́дники бж҃їѧ: ѯе́нїю бл҃же́ннꙋю, ди́внꙋю моли́твенницꙋ, и҆ првⷣнаго і҆ѡа́нна, па́стырѧ кроншта́дтскаго, свѣти́льника вѣ́ры и҆ чꙋдотво́рца и҆зрѧ́дна. взыгра́йте, лю́дїе бж҃їи, въ пѣ́снехъ и҆ пѣ́нїихъ ра́дꙋющесѧ, хрⷭ҇та̀ сла́вѧще и҆ ᲂу҆гѡ́дники є҆гѡ̀, при́снѡ молѧ́щыѧсѧ ѡ҆ дꙋша́хъ на́шихъ.
Оу҆стнѣ̀ твоѝ ра́зꙋма и҆спо́лнистасѧ, и҆ зако́нꙋ гдⷭ҇ню ѿ ᲂу҆́стъ твои́хъ поꙋча́хꙋсѧ лю́дїе, і҆ѡа́нне преди́вне, і҆ере́ю бж҃їй, ны́нѣ же со а҆́гг҃лы предстоѧ̀ ст҃ѣ́й трⷪ҇цѣ, моли́сѧ ѡ҆ почита́ющихъ па́мѧть твою̀.
Словесы̀ твои́ми и҆ писа́ньми вдохнове́нными пꙋ́ть къ бг҃ꙋ ᲂу҆казꙋ́еши и҆ жи́зни во хрⷭ҇тѣ̀ поꙋча́еши, сл҃нце пра́вды, хрⷭ҇та̀, проповѣ́дꙋѧ, и҆́стинный кла́съ живота̀, трапе́зꙋ безсме́ртїѧ въ та́йнѣ пречⷭ҇тыхъ тѣ́ла и҆ кро́ве на́мъ ᲂу҆готовлѧ́ющаго.
Сла́ва, гла́съ ѕ҃:
И҆́стиннаго па́стырѧ тѧ̀ почита́емъ, ѻ҆́тче і҆ѡа́нне првⷣне, ꙗ҆ви́лъ бо є҆сѝ въ себѣ̀ ѻ҆́бразъ пастыренача́льника хрⷭ҇та̀, ны́нѣ же зрѣ́нїемъ неизрече́нныѧ сла́вы є҆гѡ̀ наслажда́ешисѧ и҆ прошє́нїѧ на̑ша слы́шиши, моли́сѧ дарова́ти на́мъ полє́знаѧ ко сп҃се́нїю.
И҆ ны́нѣ, гла́съ то́йже:
Ю҆́жика твоѧ̑, прест҃а́ѧ дв҃о, є҆лїсаве́тъ, мт҃и прⷣте́чева, пе́рвее всѣ́хъ земноро́дныхъ бг҃оро́дицꙋ тѧ̀ наречѐ, глаго́люще: ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; мы́ же тѧ̀, бл҃гослове́ннꙋю въ жена́хъ, всѝ ро́ди хрⷭ҇тїа́нстїи, без̾ и҆стлѣ́нїѧ бг҃а сло́ва ро́ждшꙋю, при́снѡ велича́емъ.
И҆лѝ предпра́зднства, гла́съ то́йже: Приближа́етсѧ хрⷭ҇то́съ:
На лїтꙋргі́и. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ, зача́ло та҃і. А҆ллилꙋ́їа, гла́съ д҃: Пра́ведникъ, ꙗ҆́кѡ фі́нїѯъ, процвѣте́тъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни во дво́рѣхъ бг҃а на́шегѡ процвѣтꙋ́тъ. Є҆ѵⷢ҇лїе ѿ матѳе́а, зача́ло а҃і. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.