← претходни дан | Минеј — Децембар | следећи дан →
13 декабря: Святых мучеников Евстратия, Авксентия, Евгения, Мардария и Ореста. Святой мученицы Лукии девы.
Мѣ́сѧца тогѡ́же въ г҃і-й де́нь.
Ст҃ы́хъ мч҃никъ, є҆ѵстра́тїа, а҆ѵѯе́нтїа, є҆ѵге́нїа, марда́рїа и҆ ѻ҆ре́ста:
И҆ ст҃ы́ѧ мꙋ́ченицы лꙋкі́и дѣ́вы.
[Зрѝ] Вѣ́домо да є҆́сть, ꙗ҆́кѡ а҆́ще слꙋчи́тсѧ па́мѧть ст҃ы́хъ си́хъ въ недѣ́лю пра̑ѻц҃ъ, вкꙋ́пѣ возслѣ́дованїе и҆ мꙋ́ченикѡвъ пое́тсѧ.
Ве́черъ, Блаже́нъ мꙋ́жъ: На Гдⷭ҇и, воззва́хъ, стїхи̑ры на ѕ҃, гла́съ д҃: Подо́бенъ: Да́лъ є҆сѝ зна́менїе:
Сїѧ́етъ па́мѧть ꙳ страстоте́рпца твоегѡ̀, гдⷭ҇и, є҆ѵстра́тїа, ꙳ ꙗ҆́кѡ со́лнце свѣ́тлостїю, ꙳ скры́вшагѡ непобѣди́мыми словесы̀ многобо́жїе, ꙳ ꙗ҆́коже несвѣ́тлꙋ сѣ́нь ᲂу҆пражнѧ́емꙋ ѿ вѣ́ры, ꙳ и҆ четы́ри сострада́льцы, ꙳ и҆ соѻ́бщники сотво́ршагѡ. ꙳ и҆́хже ра́ди на́мъ да́рꙋй ѡ҆чище́нїе, ꙳ ꙗ҆́кѡ чл҃вѣколю́бецъ.
Ка́менїе позна́ти ꙳ твоѐ влады́чество, ꙳ є҆ѵстра́тїй слове́сное ᲂу҆стро́и, ꙳ ѡ҆щꙋти́ти си́лꙋ въ пло́ти свое́й твою̀ понꙋ́дивша, ꙳ ꙗ҆́же ѿ мꙋ́къ стра́шныхъ ѿложи́ти внеза́пнѡ ра̑ны, ꙳ и҆ лжꙋ̀ погꙋблѧ́юща, ꙳ бг҃осло́вити тѧ̀ ᲂу҆сты̀, ꙳ і҆и҃се всеси́льне, ꙳ сп҃се дꙋ́шъ на́шихъ.
Словесы̀ и҆ страда̑нїи, ꙳ и҆ многоѻбра́зными лише́ньми жи́зни, ꙳ показа́ша любо́вь ст҃і́и ꙳ къ тебѣ̀ соверше́нꙋ непоколеби́мꙋ, ꙳ со є҆ѵстра́тїемъ мꙋ́дрымъ, и҆ а҆ѵѯе́нтїемъ подвиза́вшїисѧ, ꙳ ѻ҆ре́стъ и҆ марда́рїй ꙳ со є҆ѵге́нїемъ сла́внїи: ꙳ тѣ́хъ моли́твами, гдⷭ҇и, спасѝ дꙋ́ши на́шѧ.
И҆́ны стїхи̑ры, гла́съ то́йже. Подо́бенъ: Ꙗ҆́кѡ до́блѧ:
Ꙗ҆́кѡ до́брѣ во́инствовавъ, цр҃ю̀ си́лъ, ꙳ тебѐ сама́го, є҆ѵстра́тїе ꙳ пре́далъ є҆сѝ во́льнѡ на мꙋче́нїе ꙳ и҆ нꙋ́жднꙋю сме́рть, ꙳ приводѧ̀ съ собо́ю ли́къ мꙋ́ченикѡвъ, блаже́нне. ꙳ съ ни́миже пострада́лъ є҆сѝ, ꙳ и҆ побѣ́ды прїѧ́лъ є҆сѝ вѣнцы̀: съ тѣ́ми моли́сѧ ꙳ ѡ҆ на́съ, всесла́вне.
Бг҃омꙋ́дрый є҆ѵстра́тїй, ꙳ до́блїй а҆ѵѯе́нтїй, ꙳ сла́вный є҆ѵге́нїй и҆ марда́рїй, ꙳ со ѻ҆ре́стомъ до́бльствоваша, врагѝ побѣди́вше, ꙳ и҆ возсїѧ́вше ꙗ҆́вѣ, ꙗ҆́кѡ ѕвѣ́зды многосвѣ̑тлы, ꙳ ᲂу҆ѧсни́ша вѣ́рныхъ сердца̀, ꙳ и҆ пре́лести ѿгна́ша тмꙋ̀, ꙳ свѣтозаре́нїемъ дх҃а.
Неѡсла́бнѡ бїе́мь, и҆ ѻ҆гне́мъ и҆знꙋрѧ́емь, и҆ въ сапогѝ желѣ́зны, всемꙋ́дре, пригвожда́емь, и҆ въ пꙋте́хъ гони́мь, ꙳ въ темни́цѣ заключа́емь, и҆ ꙗ҆́кѡ же́ртва чиста̀ въ пещѝ пеко́мь, прине́слсѧ є҆сѝ, тебє̀ ра́ди поже́ршемꙋсѧ, ꙳ ꙗ҆́кѡ благово́нно сожже́нїе на вы́шнюю трапе́зꙋ, ꙳ мч҃ниче є҆ѵстра́тїе.
Сла́ва, гла́съ ѕ҃:
Прїиди́те, мч҃николю́бцы, хрⷭ҇то́выхъ страда́льцєвъ въ пѣ́снехъ почти́мъ, є҆ѵстра́тїа непобѣди́маго мꙋ́ченика, а҆ѵѯе́нтїа, и҆ є҆ѵге́нїа, и҆ марда́рїа, и҆ ѻ҆ре́ста, пѧтоза́рный мꙋ́ченикѡвъ ли́къ, и҆̀же до́брѣ подвиза́вшесѧ на неви́димаго врага̀, и҆ вѣнцы̑ побѣ́дными ᲂу҆вѧзе́ни, мо́лѧтсѧ хрⷭ҇тꙋ̀ ѡ҆ и҆̀же вѣ́рою и҆ любо́вїю соверша́ющихъ па́мѧть и҆́хъ.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Прокі́менъ днѐ, и҆ чтє́нїѧ г҃. Прⷪ҇ро́чества и҆са́їина чте́нїе.
[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ: кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑ и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ, да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бо́гъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ. И҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй: сотворю̀, и҆ кто̀ ѿврати́тъ то̀; Си́це гл҃го́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѡ҆ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ: сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды, вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ. И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:
Сто́лпъ свѣтлоѧвле́нъ, страда́льче, и҆́же мꙋ́дрости и҆спꙋща́ѧ свѣ́тлость, воздви́глсѧ є҆сѝ на высотꙋ̀ терпѣ́нїѧ, мꙋ́дре, и҆ къ свѣ́тꙋ напра́вилсѧ є҆сѝ ра́зꙋма, на́съ бжⷭ҇твенными твои́ми свѣ́тлыми, є҆ѵстра́тїе, мꙋ́дрыми словесы̀ ѡ҆зарѧ́ѧ, сла́вне, твое́ю любо́вїю ѡ҆крилѧ́емыхъ, блаже́нне. тѣ́мже и҆ похвала́ми твою̀ па́мѧть чтꙋ́ще, мꙋ́чениче, ѿ любвѐ, бжⷭ҇твеннагѡ чл҃вѣколю́бїѧ про́симъ ᲂу҆лꙋчи́ти твои́ми моли́твами, и҆ мі́рꙋ дарова́ти ве́лїю ми́лость.
Сті́хъ: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ.
Добро́тою и҆ сла́достїю и҆́стинною напо́лнена ча́ша мꙋ́дрости твоеѧ̀, вїно̀ благоче́стїѧ въ сладча́йшихъ, мꙋ́дре, и҆ ѻ҆би́льныхъ словесѣ́хъ и҆злїѧ́лъ є҆сѝ: и҆́миже наслажда́еми, и҆́стиннѡ въ немꙋ́тное и҆ сла́дкое та́инственнѡ возво́димсѧ зна́нїе бжⷭ҇твенное влⷣки, є҆ѵстра́тїе. тѣ́мже и҆ похвала́ми твоѧ̑ страда̑нїѧ чтꙋ́ще вѣ́рою и҆ любо́вїю, бжⷭ҇твеннагѡ чл҃вѣколю́бїѧ про́симъ ᲂу҆лꙋчи́ти твои́ми моли́твами, и҆ мі́рꙋ дарова́ти ве́лїю ми́лость.
Сті́хъ: Мнѡ́ги скѡ́рби пра́вєднымъ, и҆ ѡ҆ всѣ́хъ и҆́хъ и҆зба́витъ ѧ҆̀ гдⷭ҇ь.
По́лкъ мꙋ́ченическїй свѣтоза́рный, побѣдоно́сный, свѣ́тлый, и҆ пѧточи́сленный, да почти́тсѧ похвала́ми, притѧжа́въ свѣ́тлаго верхо́вника и҆́стиннѡ є҆ѵстра́тїа, те́плѣ и҆з̾ѡбличи́вша є҆́ллинскїѧ жє́ртвы, хрⷭ҇тїа́нѡмъ же бг҃овѣща̑ннаѧ ᲂу҆чє́нїѧ ᲂу҆тверди́вша слове́сными велѣ́ньми. сего̀ ᲂу҆̀бо восхва́лимъ налїѧ́вшаго мꙋ́дрости ча́шꙋ, и҆ дꙋхо́внѡ на́съ веселѧ́ща, хрⷭ҇та̀ молѧ́ща, подаю́щаго мі́рꙋ ве́лїю ми́лость.
Сла́ва, гла́съ то́йже:
Мꙋ́чащихъ свирѣ́пства не ᲂу҆боѧ́вшесѧ, па́че хрⷭ҇то́вꙋ вѣ́рꙋ ꙗ҆́снѣ проповѣ́давше, строга̑нїѧ мнѡ́гаѧ и҆ мꙋ̑ки претерпѣ́сте, є҆ѵстра́тїе и҆ а҆ѵѯе́нтїе, є҆ѵге́нїе и҆ ѻ҆ре́сте, и҆ сла́вный марда́рїе. тѣ́мже моли́тесѧ цр҃ю̀ и҆ бг҃ꙋ ѡ҆ на́съ, вѣ́рою соверша́ющихъ па́мѧть ва́шꙋ.
И҆ ны́нѣ, бг҃оро́диченъ:
Блажи́мъ тѧ̀, бцⷣе дв҃о, и҆ сла́вимъ тѧ̀, вѣ́рнїи, по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ.
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти: тѣ́хъ моли́твами спасѝ дꙋ́шы на́шѧ.
Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:
На ᲂу҆́трени, по а҃-й стїхоло́гїи, сѣда́ленъ, гла́съ д҃.
Подо́бенъ: Ско́рѡ предварѝ:
Мꙋ́жествомъ вѣ́ры въ брѡнѧ̀ ѡ҆бле́ксѧ, мꙋ́дростїю бжⷭ҇твенною воѡрꙋжи́всѧ благоче́стнѡ, є҆ѵстра́тїе сла́вне, всѧ̑ дїа́вѡли побѣди́лъ є҆сѝ полкѝ, и҆ ѡ҆бличи́лъ є҆сѝ безбо́жныхъ немощнꙋ́ю де́рзость, ꙗ҆́кѡ и҆мѣ́ѧ дерзнове́нїе къ бг҃ꙋ, молѝ спасти́сѧ на́мъ.
Два́жды.
Сла́ва, и҆ ны́нѣ, бг҃оро́диченъ:
Мно́гими согрѣше́ньми а҆́зъ блꙋ́дный ᲂу҆́мъ ѡ҆мрачи́въ, вопїю̀ тве́рдомꙋ твоемꙋ̀ застꙋпле́нїю: просвѣтѝ, бцⷣе, дꙋшѝ моеѧ̀ ѕѣ̑ницы, возсїѧ́й мѝ покаѧ́нїѧ свѣ́тлꙋю зарю̀, и҆ ѡ҆блецы́ мѧ во ѻ҆рꙋ́жїе свѣ́та, бг҃ороди́тельнице чⷭ҇таѧ.
По в҃-й стїхоло́гїи сѣда́ленъ, гла́съ д҃:
Ѻ҆рꙋ́жїемъ слове́съ твои́хъ мꙋчи́телѧ ᲂу҆ѧзви́лъ є҆сѝ, воево́да бы́въ хрⷭ҇тоно́сныхъ люде́й, є҆ѵстра́тїе бг҃омꙋ́дре: ѡ҆блиста́лъ є҆сѝ зарѧ́ми чꙋде́съ мі́рꙋ, вѣне́цъ же и҆сплете́сѧ твое́й главѣ̀ свы́ше. тѣ́мже и҆ въ па́мѧти твое́й хрⷭ҇та̀ прославлѧ́емъ.
Два́жды.
Сла́ва, и҆ ны́нѣ, бг҃оро́диченъ:
Пое́мъ тѧ̀, бг҃оневѣ́сто, мт҃и хрⷭ҇та̀ бг҃а, сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли, и҆ всѧ́кихъ бѣ́дъ, бцⷣе влⷣчце, и҆ вѣ́рнѡ вопїе́мъ: поми́лꙋй ста́до твоѐ, є҆ди́на всепѣ́таѧ.
По полѷеле́и, сѣда́ленъ, гла́съ и҃. Подо́бенъ: Премꙋ́дрости:
Трⷪ҇ческою вѣ́рою ᲂу҆тве́рждсѧ, и҆́стины пра́щею воѡрꙋ́жсѧ, ле́сти низложи́лъ є҆сѝ и҆ноплеме́ннꙋю де́рзость, и҆ вра́жїй восхи́тилъ є҆сѝ слове́съ ме́чь, тѣ́мъ ссѣ́клъ є҆сѝ лжи́вое противле́нїе. сегѡ̀ ра́ди побѣ́дами ѡ҆бличи́въ ле́сть, тѣ́ломъ ᲂу҆́мерлъ є҆сѝ, и҆ дꙋ́хомъ ѡ҆жи́лъ є҆сѝ, страстоте́рпче є҆ѵстра́тїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ, и҆ ѡ҆ всѣ́хъ и҆́хъ и҆зба́витъ ѧ҆̀ гдⷭ҇ь. Всѧ́кое дыха́нїе: Є҆ѵⷢ҇лїе матѳе́а, зача́ло л҃ѕ.
По н҃-мъ ѱалмѣ̀ стїхи́ра, гла́съ а҃. Самогла́сна:
Пѧточи́сленный ли́къ ст҃ы́хъ восхва́лимъ, лю́дїе, сп҃са воспѣва́юще хрⷭ҇та̀, є҆ѵстра́тїа терпѣливодꙋ́шнаго и҆ тве́рдаго страстоте́рпца, съ ни́мъ а҆ѵѯе́нтїа, є҆ѵге́нїа, марда́рїа и҆ ѻ҆ре́ста: сі́и бо по вѣ́рѣ пострада́вше, треволнє́нїѧ попра́ша вра̑жїѧ, и҆ сп҃сꙋ мо́лѧтсѧ, ѡ҆чище́нїе и҆ ѡ҆ставле́нїе грѣхѡ́въ дарова́ти вѣ́рою соверша́ющымъ па́мѧть и҆́хъ.
Канѡ́нъ бцⷣы со і҆рмосо́мъ на ѕ҃: и҆ ст҃ы́хъ два̀, на и҃.
Канѡ́нъ пе́рвый і҆ѡа́нна мона́ха.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Раздава́ѧй на нб҃сѣ́хъ да́ры, сꙋ́щымъ на землѝ страда́льцємъ, подвигополо́жникъ сѣди́тъ хрⷭ҇то́съ десни́цею вседержи́тельною, є҆ѵстра́тїа сꙋ́щымъ ѻ҆бою́дꙋ, бжⷭ҇твєнныѧ вѣнцы̀ простира́ѧ.
Ли́къ мч҃ническїй пѧточи́сленъ, прїиди́те ви́димъ, пресвѣ́тлымъ блиста́ющїйсѧ свѣ́томъ, и҆мѣ́ѧй чинонача́льника возжелѣ́ннаго є҆ѵстра́тїа, бл҃года́тїю бж҃е́ственною вѣнча́ема.
По́ѧсъ земна́гѡ во́инства ѿрѣши́вый, и҆́стинномꙋ привно́сиши цр҃ю̀, страда́нїѧ зна́менїе ѿ хрⷭ҇та̀, є҆ѵстра́тїе, чрезъ а҆ѵѯе́нтїа прїе́мъ.
Бг҃оро́диченъ:
Село̀ вмѣсти́тельно была̀ є҆сѝ бжⷭ҇твеннагѡ є҆стества̀, бг҃ороди́тельнице чⷭ҇таѧ. тѣ́мъ тѧ̀ лꙋкі́а возжела́вши, дѣ́вственнѡ въ слѣ́дъ тебє̀ твоемꙋ̀ сн҃ꙋ приведе́сѧ.
Дрꙋгі́й канѡ́нъ.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Нбⷭ҇ныхъ крꙋгѡ́въ цр҃ь дарода́тель предсѣди́тъ, страда́вшымъ на землѝ со є҆ѵстра́тїемъ, хрⷭ҇то́съ простира́ѧ тѣ̑мъ побѣ́ды вѣнцы̀.
Пѣснослове́сный ли́къ бг҃овѣнча́нный страда́льцєвъ пѧточи́сленныхъ восхва́лимъ, вѣ́рнїи, мꙋ́драго є҆ѵстра́тїа, вѣ́рна и҆мꙋ́ща ѡ҆ хрⷭ҇тѣ̀ бжⷭ҇твеннаго чинонача́льника.
Во́инства вы́шнѧгѡ жела́ѧ, по́честь, є҆ѵстра́тїе, ѿда́въ ѻ҆бра́знѡ: бг҃ꙋ приве́дъ, мꙋ́дре, твою̀ жи́знь, свѧще́ннѡ ѡ҆чище́нъ.
Бг҃оро́диченъ:
Добропобѣ́дныхъ мꙋ́чєникъ ли́къ ра́дꙋѧсѧ пое́тъ тѧ̀, чⷭ҇таѧ, и҆́же побѣ́ды вѣне́цъ прїѧ́тъ: тобо́ю бо не́бо человѣ́кѡмъ бы́сть вхо́дно, ꙗ҆́кѡ родила̀ є҆сѝ па́че ᲂу҆ма̀ творца̀ нб҃сѐ.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Наде́ждею мꙋче́нїй, ꙗ҆́коже невеще́ственнагѡ сокро́вища, преесте́ственнѡ бы́лъ є҆сѝ и҆спо́лненъ всѧ́кїѧ ра́дости, всеблаже́нне є҆ѵстра́тїе.
Мꙋ́дростїю дх҃о́вною, терпѣ́нїемъ же напа́стей, ѡ҆бличи́лъ є҆сѝ, мч҃ниче хрⷭ҇то́въ а҆ѵѯе́нтїе, мꙋчи́тельское безбо́жїе.
Ꙗ҆́коже красота̀ пресвѣ́тлаѧ, цр҃кве вѣ́рныхъ мч҃ницы, хрⷭ҇то́выми ꙗ҆́звами, ꙗ҆́кѡ цвѣ̑ты, ѡ҆бложе́ни бы́сте.
Бг҃оро́диченъ:
Госпо́дственнѡ и҆ и҆́стиннѡ тѧ̀ бцⷣꙋ вѣ́рнїи чти́мъ: ты́ бо бг҃а родила̀ є҆сѝ, пло́ть бы́вша, всенепоро́чнаѧ.
И҆́нъ. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Тве́рдостїю ᲂу҆ма̀ ᲂу҆пова́нїе твоѐ всѐ возложи́въ, бл҃же́нне, къ вы́шнемꙋ бг҃ꙋ, наде́ждею ра́нъ ᲂу҆тѣше́нїѧ и҆спо́лненъ ве́сь бы́лъ є҆сѝ.
Процвѣ́лъ є҆сѝ любо́вїю хрⷭ҇то́вою, бжⷭ҇твенною мꙋ́дростїю: терпѣ́нїемъ же мꙋ́къ, а҆ѵѯе́нтїе, безꙋ́мїе ѡ҆блича́еши гони́телей, на́глость и҆ сꙋ́етїе.
Неꙋкроти́мый, мꙋ́дре, лисі́евъ гнѣ́въ вмѣни́сѧ тебѣ̀ со́нъ, и҆ ѻ҆́гнь мꙋ́къ си́льныхъ: ᲂу҆тве́рждсѧ бо ѡ҆ хрⷭ҇тѣ̀ преѡби́дѣлъ є҆сѝ, ꙗ҆́коже и҆но́мꙋ стра́ждꙋщꙋ.
Бг҃оро́диченъ:
Свѧщеннослове́сными тѧ̀ гла̑сы, бг҃ома́ти дв҃о, всѣ́хъ вино́внꙋю вино́вника по на́мъ бы́ти, бг҃олѣ́пнѡ воспѣва́юще вѣ́рнїи ᲂу҆блажа́емъ.
Катава́сїа: Пре́жде вѣ̑къ.
Конда́къ, гла́съ в҃. Подо́бенъ: Въ моли́твахъ:
Свѣти́льникъ ꙗ҆ви́лсѧ є҆сѝ свѣтлѣ́йшїй во тмѣ̀ невѣ́дѣнїѧ сѣдѧ́щымъ, страстоте́рпче: вѣ́рою бо, ꙗ҆́кѡ копїе́мъ, ѡ҆бложи́всѧ, врагѡ́въ шата́нїѧ не ᲂу҆боѧ́лсѧ є҆сѝ, є҆ѵстра́тїе, ри́торѡвъ сы́й благоѧзы́чнѣйшїй.
Сѣда́ленъ, гла́съ и҃. Подо́бенъ: Премꙋ́дрости:
Ни ме́чь, ни ѕвѣ́рїе, ни ѻ҆́гнь, нижѐ и҆́но что̀ страша́щихъ чꙋ́вственныхъ, ѿню́дъ ᲂу҆страши́ти твою̀ тве́рдость возмого́ша: вра́жїю бо попра́въ тече́нїемъ си́лꙋ, ꙗ҆́кѡ безстра́стенъ преминꙋ́лъ є҆сѝ житїѐ и҆ безпло́тенъ. тѣ́мже вѣ̑рнымъ и҆сцѣлє́нїѧ подава́еши, любо́вїю притека́ющымъ въ па́мѧть твою̀, свѧ́те страстоте́рпче є҆ѵстра́тїе. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Є҆гда̀ прїи́детъ сꙋди́ти все́й землѝ всѣ́хъ влⷣка и҆ творе́цъ, ѻ҆вца́мъ мѧ̀ причтѝ десны́мъ ѡ҆сꙋжде́ннаго, и҆ кромѣ́шнїѧ тмы̀, и҆ всѧ́кагѡ мꙋче́нїѧ, твоего̀ непотре́бнаго. раба̀ и҆схитѝ, молю́сѧ: да благода́рнѡ велича́ю бога́тство твоеѧ̀ бл҃гости, бцⷣе всенепоро́чнаѧ, и҆ вопїю́ ти ра́дꙋѧсѧ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, тѧ́ бо и҆́мамъ наде́ждꙋ ра́бъ тво́й.
Пѣ́снь д҃. І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ. чл҃вѣколю́бче, крѣ́пость моѧ̀ и҆ хвале́нїе.
Ѿложи́лъ є҆сѝ съ ꙗ҆́звами пло́ти твоеѧ̀ дꙋше́вныѧ сквє́рны: стрѣ́лы сокрꙋши́лъ є҆сѝ лꙋка́вагѡ ѕмі́ѧ вѣ́рою, є҆ѵстра́тїе.
Просла́висѧ твои́ми ра́нами, страстоте́рпче, цр҃ь сла́вы и҆ неизрече́нныѧ тѧ̀ сла́вы си́лою и҆спо́лни чꙋде́съ, є҆ѵстра́тїе.
Ры́барскомꙋ поревнова́въ дерзнове́нїю, мꙋ́ченическою мре́жею влⷣцѣ приво́диши мꙋ́драго є҆ѵге́нїа, ᲂу҆лови́въ, є҆ѵстра́тїе.
Бг҃оро́диченъ:
Всенепоро́чнаѧ, и҆ є҆ди́на ст҃ѣ́йшаѧ херꙋві́мѡвъ ꙗ҆́вльшисѧ, дꙋ́шы на́шѧ спасѝ ѿ всѧ́кагѡ ѡ҆бстоѧ́нїѧ, вѣ́рою пою́щихъ тѧ̀.
И҆́нъ. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Всеси́льный бжⷭ҇твенное жела́нїе въ дꙋшѝ твое́й вже́гъ, чꙋдодѣ́йственна показа̀ и҆зрѧ́днѡ, всецѣ́лы плѡтскі́ѧ ра̑ны твоѧ̑ творѧ̀.
Мре́жею дꙋхо́вною ры́барей, мꙋ́дре, ᲂу҆лови́въ, приво́диши цр҃ю̀ мꙋ́драго є҆ѵге́нїа, є҆го́же ᲂу҆лови́въ, хрⷭ҇тꙋ̀ приве́лъ є҆сѝ, є҆ѵстра́тїе.
Гвоздьмѝ, всемꙋ́дре, но́зѣ разжига́емь, мꙋче́нїемъ сапѡ́гъ желѣ́зныхъ, ве́сь себѐ ѡ҆багри́лъ є҆сѝ, цр҃ѧ̀ і҆и҃са подо́бѧсѧ стрⷭ҇ти.
Бг҃оро́диченъ:
Неѡб̾е́млемый и҆ неизмѣ́нный, бг҃а ѻ҆ц҃а̀ сло́во, и҆змѣни́всѧ видѣ́нїемъ, пренепоро́чнаѧ, и҆зъ тебє̀ воплоща́емь, ѡ҆божа́етъ чл҃вѣколю́бнѡ мѧ̀ человѣ́ка.
Катава́сїа: Же́злъ и҆зъ ко́рене:
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Ты̀, ꙗ҆́коже ѕвѣзда̀ свѣтоно́снаѧ, возсїѧ́лъ є҆сѝ въ полцѣ̀ мꙋ́чєникъ далечесїѧ́тельнѡ, непобѣди́мый є҆ѵстра́тїе.
Ѽ жре́бїѧ блага́гѡ! ѽ ча́сти бг҃ода́нныѧ! ѽ жены̀ добрѣ́йшїѧ! совѣ́томъ побѣди́вшїѧ ле́сть прама́тернюю.
Ты̀ всѧ̑ кра̑снаѧ вмѣни́лъ є҆сѝ, ꙗ҆́кѡ ᲂу҆ме́ты, марда́рїе, побѣди́въ є҆стества̀ зако́ны любо́вїю страда́нїѧ.
Бг҃оро́диченъ:
Оу҆́мъ зе́мленъ твоегѡ̀ па́че ᲂу҆ма̀ зача́тїѧ не мо́жетъ разꙋмѣ́ти, дв҃о мт҃и, ѻ҆трокови́це: бг҃а бо родила̀ є҆сѝ.
И҆́нъ. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Чꙋ́денъ, ꙗ҆́коже ѕвѣзда̀, бы́въ цр҃кви, и҆здале́ча посредѣ̀ мꙋ́чєникъ возсїѧ́лъ є҆сѝ, мꙋ́ченическими ѡ҆сїѧ́ѧ зарѧ́ми, є҆ѵстра́тїе, мі́ръ, па́че со́лнца.
Зарелꙋ́чными сїѧ̑нїи зарю̀ и҆спꙋща́юща тѧ̀ ви́дѣвъ бг҃оглаго́ливый марда́рїй, тебѣ̀, ꙗ҆́коже а҆́гнецъ па́стырю неѕло́бивъ, простото́ю се́рдца послѣ́дова.
Превознесе́сѧ сро́днагѡ є҆стества̀, мꙋжелю́бнаѧ жена̀ и҆ разꙋ́мнаѧ и҆ хрⷭ҇толюби́ваѧ, и҆зрѧ́днѡ предпобѣжда́етъ и҆ соверше́ннѣ, пома́завши мꙋ́жа къ мꙋче́нїю.
Бг҃оро́диченъ:
И҆̀же бцⷣꙋ ѿ дꙋшѝ, и҆ влⷣчцꙋ мі́ра, бл҃га́ѧ, и҆сповѣ́дающыѧ тѧ̀ спаса́й: тѧ́ бо предста́тельницꙋ непобѣди́мꙋ стѧжа́хомъ, сꙋ́щꙋю бг҃ороди́тельницꙋ.
Катава́сїа: Бг҃ъ сы́й ми́ра:
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Хрⷭ҇то́съ мнѣ̀ вмѣ́стѡ всѣ́хъ є҆́сть, марда́рїй велегла́снѡ вопїѧ́ше, и҆ ѻ҆те́чество и҆ че́сть и҆ и҆́мѧ: ѿ тебє́ бо семꙋ̀ наꙋчи́хсѧ, є҆ѵстра́тїе.
Ѧ҆зы́къ ѿрѣ́занъ пѣ́сней непрестае́тъ, ѿсѣ́чєнныѧ же твоѧ̑ рꙋ́ки къ бг҃ꙋ, є҆ѵге́нїе, возвыша́хꙋсѧ, спасе́нїѧ просѧ́ще пою́щымъ па́мѧть твою̀.
Нога́мъ провертѣ̑ннымъ повѣ́шенъ бы́сть стремгла́въ, разжже́нными же рожны̀ пали́мь по плеще́мъ, дꙋ́хъ влⷣцѣ пре́далъ є҆сѝ, марда́рїе.
Бг҃оро́диченъ:
Крѣ́пость тѧ̀ ѡ҆брѣ́тши, дв҃о, и҆ тве́рдь страстоте́рпица, ра̑ны до́блественнѣ терпи́тъ, и҆ ра́дꙋющисѧ въ слѣ́дъ тебє̀ всѣ́хъ влⷣчцѣ приво́дитсѧ.
И҆́нъ. І҆рмо́съ:
Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Са́мъ вмѣ́стѡ всѣ́хъ мнѣ̀ хрⷭ҇то́съ є҆́сть ѻ҆те́ческихъ, возопи́въ, ѽ марда́рїе! пѧтѣ̀ сокрꙋше́ннѣй рожны̀ разжже́нными ѻ҆гне́мъ, стрѣла́ми же ра́мена, ра́дꙋѧсѧ сконча́лсѧ є҆сѝ.
Ѿрѣ́занъ бы́въ, є҆ѵге́нїе, тво́й ѧ҆зы́къ, хрⷭ҇та̀ пѣсносло́вити не престае́тъ: рꙋ́ки же ѿсѣ́чены къ бг҃ꙋ, бл҃же́нне, возвыша́ютсѧ, пою́щымъ тѧ̀ и҆збавле́нїѧ просѧ́ще.
Ꙗ҆́кѡ досточꙋ́дна мꙋ́жественнаѧ твоѧ̀ дꙋша̀, всебл҃горо́дне є҆ѵге́нїе, сокрꙋшє́ннымъ бо нꙋ́ждею твои̑мъ го́ленемъ, дꙋ́хъ пре́далъ є҆сѝ въ рꙋ́цѣ влⷣки всѣ́хъ ра́дꙋѧсѧ.
Бг҃оро́диченъ:
Пречⷭ҇таѧ влⷣчце, ро́ждшаѧ земны́хъ ко́рмчїю и҆ гдⷭ҇а, страсте́й мои́хъ непостоѧ́нное и҆ лю́тое ᲂу҆тишѝ смꙋще́нїе, и҆ тишинꙋ̀ пода́ждь се́рдцꙋ моемꙋ̀.
Катава́сїа: И҆зъ ᲂу҆тро́бы і҆ѡ́нꙋ:
Конда́къ, гла́съ г҃. Подо́бенъ: Дв҃а дне́сь:
Виті́йствꙋѧ предъ беззако́ннꙋющими бжⷭ҇твєннаѧ, бїє́нїѧ претерпѣ́лъ є҆сѝ мꙋ́жественнѣйшимъ се́рдцемъ, ѡ҆блиста́лъ є҆сѝ бг҃озна́меньми, пречꙋ́дне, ᲂу҆гаси́лъ є҆сѝ возвы́шенный пре́лести пла́мень: сегѡ̀ ра́ди тѧ̀ чествꙋ́емъ, всеблаже́нне мꙋ́чениче хрⷭ҇то́въ є҆ѵстра́тїе.
І҆́косъ:
Свѧще́нный соверша́етъ цр҃ковь дне́сь пра́здникъ та́инственнѡ, свѣ́тлѡ проповѣ́дающи твоѧ̑ до́блєсти, болѣ̑зни и҆ трꙋды̀, ꙗ҆̀же па́че є҆стества̀ бжⷭ҇твєннаѧ борє́нїѧ, ꙗ҆̀же всю́дꙋ ра̑ны: и҆́миже низложѝ многоко́зненнаго, сла́ва страда́льцєвъ ве́лїѧ и҆ хвала̀, мꙋ́жества сто́лпъ, свѣти́льникъ всѣ́хъ тѧ̀ чтꙋ́щихъ благоче́стнѡ, врачева́нїй сокро́вище, богати́телю ни́щихъ, первопобѣ́дниче честны́хъ мꙋ́ченикѡвъ, всебл҃же́нне мꙋ́чениче хрⷭ҇то́въ є҆ѵстра́тїе.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Непрело́жно и҆сповѣ́данїѧ мꙋдрова́нїе и҆мѣ́ѧ, въ трⷪ҇цѣ чествова́ти є҆ди́наго бг҃а, мꙋ̑ки преѡби́дѣлъ є҆сѝ, зовѧ́й: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ꙗ҆́кѡ бл҃же́нъ въ непоро́чномъ пꙋтѝ ходи́лъ є҆сѝ, колѣ̑ни бл҃горазꙋ́мнѡ преклони́лъ є҆сѝ и҆зба́вителю, дꙋ́шꙋ же преда́въ влⷣцѣ въ рꙋ́ки, ꙗ҆́кѡ бл҃гово́ннѣйшꙋ же́ртвꙋ, а҆ѵѯе́нтїе.
И҆́же вра́номъ и҆лїѝ пи́щꙋ подава́ѧй бг҃ъ, то́й и҆ ѡ҆ честнѣ́й твое́й главѣ̀ чꙋдотворѧ̀, жела́ющымъ ѿкры̀, ꙗ҆́кѡ многожела́нное чрежде́нїе мі́рꙋ, а҆ѵѯе́нтїе.
Бг҃оро́диченъ:
Дв҃о мт҃и, ꙗ҆́кѡ чи́стꙋ тѧ̀ и҆ нетлѣ́ннꙋ сло́во чи́стое возлюбѝ, и҆ и҆зъ тебє̀ вопло́щсѧ возсозда̀ всего̀ человѣ́ка, и҆́же лꙋкі́ю просла́вивый чꙋдесы̀.
И҆́нъ. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Побѣдоно́сецъ къ нбⷭ҇номꙋ црⷭ҇твꙋ, а҆ѵѯе́нтїе, восте́клъ є҆сѝ: по и҆скꙋше́нїи бо мꙋ́къ многови́дныхъ, хрⷭ҇та̀ бг҃а и҆сповѣ́даѧ сконча́лсѧ є҆сѝ за него̀, во главꙋ̀ ᲂу҆сѣ́ченъ.
Пречꙋ́дно є҆́сть благоразꙋ́мное, ѻ҆ре́сте, мꙋ́жество твоѐ, на сꙋди́щи бо показꙋ́еши ра́зꙋмъ: дꙋ́шꙋ же лисі́евꙋ кресто́мъ ᲂу҆нза́еши, поѧ̀: бл҃гослове́нъ бг҃ъ ѻ҆тє́цъ на́шихъ.
Мꙋче́нїѧ пꙋте́мъ спꙋ́тника тебѣ̀, и҆ съ тобо́ю текꙋ́ща сою́зника ѻ҆ре́ста, и҆ сострада́льца и҆мѣ́ѧ, ѡ҆богати́лъ є҆сѝ, поѧ̀ съ ни́мъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Ю҆́ношы трѝ пе́щь не ѡ҆палѝ, ржⷭ҇тво̀ проѡбразꙋ́ющи твоѐ, бжⷭ҇твенный бо ѻ҆́гнь тѧ̀ не ѡ҆палѝ всели́всѧ въ тѧ̀, и҆ всѧ̑ просвѣтѝ вопи́ти: бл҃гослове́нъ бг҃ъ ѻ҆тє́цъ на́шихъ.
Катава́сїа: Ѻ҆́троцы благоче́стїю:
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Оу҆стна̀ разве́рзъ чи́стѡ, бжⷭ҇твенный привле́клъ є҆сѝ дх҃ъ, є҆ѵстра́тїе: и҆ дꙋшетлѣ́нныхъ ᲂу҆́бѡ ѡ҆бличи́лъ є҆сѝ слꙋже́нїй не́мощь, въ трⷪ҇цѣ же бг҃а чествова́ти взыва́лъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.
Мꙋ́дрыми наказа̑нїи твои́ми ᲂу҆крѣпи́въ смы́слъ, мꙋ́чениче є҆ѵстра́тїе, на ѻ҆дрѣ̀ желѣ́знѣмъ просте́ртъ бы́въ непобѣди́мый ѻ҆ре́стъ, вопїѧ́ше разори́телємъ пла́мене, дѣ́тємъ подо́бѧсѧ: благослови́те, всѧ̑ дѣла̀ гдⷭ҇нѧ, гдⷭ҇а.
Просте́ръ тѣ́ло терпѣли́внѡ, ѻ҆ре́сте сла́вне, ты̀ на ѻ҆дрѣ̀ разжже́ннѣмъ сопричта́лсѧ є҆сѝ ᲂу҆́бѡ мꙋ́ченикѡвъ въ гдⷭ҇ѣ ра́дꙋѧсѧ, воспочи́лъ же є҆сѝ въ ски́нїѧхъ нбⷭ҇ныхъ, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ꙗ҆ви́ласѧ є҆сѝ превы́шши нб҃съ, бг҃а нбⷭ҇наго поро́ждши, ѡ҆небеси́вшаго, всечⷭ҇таѧ, земноро́дныхъ всѐ смѣше́нїе, и҆ лꙋкі́и честны́ѧ па́мѧть ᲂу҆ѧсни́вшаго, є҆мꙋ́же вопїе́мъ всегда̀: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Є҆ди́нагѡ є҆стества̀ трⷪ҇цы безмѣ́рнꙋю си́лꙋ, со дерзнове́нїемъ проповѣ́даѧ, бг҃осло́вилъ є҆сѝ: и҆ і҆́дѡльское слꙋже́нїе сꙋ́етное ѡ҆бличи́лъ є҆сѝ, всемꙋ́дре є҆ѵстра́тїе, бг҃омꙋ́дре.
Не вѣ́дый гони́тель терпѣ́нїѧ твоегѡ̀, пла́меннымъ ви́домъ ᲂу҆страши́ти тѧ̀ покꙋша́шесѧ: ты́ же тогѡ̀ сꙋровство̀ ѡ҆плева́въ, ра́дꙋѧсѧ влⷣкꙋ, є҆ѵстра́тїе, воспѣва́лъ є҆сѝ.
Вѣща̑нїи твои́ми бжⷭ҇твенными наказꙋ́емь бг҃омꙋ́дрый ѻ҆ре́стъ, на ѻ҆́дръ вскочѝ и҆гра́ѧ, ꙗ҆́кѡ а҆́гнецъ непоро́ченъ всесожига́емь, бг҃ꙋ вѣнцеда́вцꙋ вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Пречⷭ҇таѧ дв҃о, ты́ мѧ спасѝ, мое́й не́мощи бꙋ́ди по́мощь: скорбе́й мно́гихъ и҆ лю́тыхъ мѧ̀ и҆зба́ви, да тѧ̀ сла́влю є҆ди́нꙋ бцⷣꙋ.
Катава́сїа: Чꙋ́да преесте́ственнагѡ:
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Бжⷭ҇твенныхъ причасти́тисѧ та̑инъ возжелѣ́въ, страстоте́рпче, и҆ бг҃оѧвле́нїѧ свѣтоза́рнагѡ сподо́битисѧ, блаже́нне є҆ѵстра́тїе, къ зовꙋ́щемꙋ тѧ̀ на нб҃са̀, жела́емомꙋ прибли́жилсѧ є҆сѝ хрⷭ҇тꙋ̀.
Ѕѣлѡ̀ веселѧ́сѧ страстоте́рпче, ра́достномꙋ ѡ҆сꙋжде́нїю мꙋчи́тельскагѡ пребезꙋ́мїѧ, подвигополо́жника твоего̀ велича́лъ є҆сѝ, пѣсносло́вѧ, є҆ѵстра́тїе, сме́рти разори́телѧ хрⷭ҇та̀.
Прїиди́те мꙋчениколю́бцы всѝ, пре́лести потреби́телѧ свѧще́нными є҆ѵге́нїа пѣ́сньми, мꙋ́драго ѻ҆ре́ста же и҆ марда́рїа, и҆ въ си́ми а҆ѵѯе́нтїа со є҆ѵстра́тїемъ возвели́чимъ.
Бг҃оро́диченъ:
Свѣ́тъ на́мъ возсїѧ̀ и҆зъ ложе́снъ неискꙋсомꙋ́жныхъ твои́хъ, дв҃о, є҆гѡ́же свѣтосїѧ̑нїи бжⷭ҇твеннѡ ѡ҆зари́вшисѧ, свѣ́тъ же бы́сть чꙋ́днаѧ лꙋкі́а, бг҃ороди́тельнице дв҃о мт҃и.
И҆́нъ. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и, тѧ̀ ᲂу҆бл҃жа́емъ.
Поѧ̀ є҆ѵстра́тїе, жела́емаго, и҆ ѻ҆́бщникъ бжⷭ҇твенныхъ та̑инъ бы́въ, бг҃оѧвле́нїѧ є҆гѡ̀ въ темни́цѣ сподо́билсѧ є҆сѝ, бл҃же́нне, зовꙋ́ща тѧ̀ къ нбⷭ҇нѣй жи́зни црⷭ҇твїѧ є҆гѡ̀.
Оу҆крѣпи́всѧ си́лою хрⷭ҇то́вою, є҆ѵстра́тїе, гони́телей ласка́нїю посмѣѧ́лсѧ є҆сѝ, велича́ѧ, сла́вне, хрⷭ҇та̀ пѣ́сньми: ꙗ҆́кѡже бо ю҆́ношы дре́вле въ пе́щь, ра́дꙋѧсѧ, ꙗ҆́кѡ въ кра́сный ра́й, бл҃же́нне, внꙋ́трь вше́лъ є҆сѝ.
Пѣ́сньми и҆ пѣ́ньми восхва́лимъ всѝ вѣ́рнїи бжⷭ҇твєнныѧ во́ины, а҆ѵѯе́нтїа, є҆ѵге́нїа, вкꙋ́пѣ и҆ марда́рїа, сла́внаго ѻ҆ре́ста, и҆ чинонача́льника и҆ сострада́льца и҆ наста́вника мꙋ́драго є҆ѵстра́тїа.
Бг҃оро́диченъ:
Хра́мъ, дв҃о, црⷭ҇твꙋющагѡ со ѻ҆ц҃е́мъ и҆ дх҃омъ хрⷭ҇та̀ была̀ є҆сѝ: тебє̀ ра́ди, чⷭ҇таѧ, хра́мы и҆ мы̀ бл҃года́тїю бы́вше, сподо́бихомсѧ сынотворе́нїѧ є҆гѡ̀ креще́нїемъ.
Катава́сїа: Та́инство стра́нное:
Свѣти́ленъ. Подо́бенъ: Дх҃омъ во ст҃и́лищи:
Соверши́лъ є҆сѝ чꙋ́дное страда́нїѧ тече́нїе, є҆ѵстра́тїе блаже́нне, и҆ приве́дъ кꙋ́пнѡ є҆ѵге́нїа честна́го, и҆ мꙋ́драго а҆ѵѯе́нтїа, марда́рїа же со ѻ҆ре́стомъ, и҆́хже вѣ́рѣ и҆ де́рзости ᲂу҆диви́шасѧ чл҃вѣ́честїи и҆ а҆́гг҃льстїи собо́ри.
Два́жды.
Сла́ва, и҆ ны́нѣ, бг҃оро́диченъ:
Несказа́ннагѡ ржⷭ҇тва̀ твоегѡ̀ была̀ є҆сѝ, пренепоро́чнаѧ невѣ́ста, ꙗ҆́кѡ сꙋ́щи честнѣ́йшїй хра́мъ, бцⷣе, ты́ бо превѣ́чное въ тѧ̀ все́льшеесѧ родила̀ є҆сѝ бг҃а сло́во. тѣ́мъ пою́ще ржⷭ҇тво̀ твоѐ велича́емъ, ѽ всенепоро́чнаѧ ѻ҆трокови́це.
На хвали́техъ стїхи̑ры на д҃, гла́съ г҃. Ге́рманово.
Ри́торскими словесы̀ хрⷭ҇то́въ во́инъ беззакѡ́нныѧ ᲂу҆жасѝ, страда́льческими ра́нами вра̑жїѧ си̑лы мꙋ́жески побѣдѝ є҆ѵстра́тїй сла́вный, и҆ тве́рдый страда́лецъ, и҆́же тѣ́сный и҆ приско́рбный ше́ствовавъ пꙋ́ть, и҆ въ зе́млю дости́гъ вѣ́чныѧ жи́зни: въ не́йже и҆ мо́литъ хрⷭ҇та̀, дарова́ти на́мъ ве́лїю ми́лость.
И҆́же въ бжⷭ҇твеннѣй мꙋ́дрости ꙗ҆́вльшасѧ фїлосо́фа, и҆ въ добро́тѣ слове́съ показа́вшасѧ ри́тора, въ свидѣ́телехъ вели́каго є҆ѵстра́тїа страда́льческими похвала́ми ᲂу҆вѣнча́имъ: сво́йство бо се́й хрⷭ҇то́въ во́инъ благочести́вое собра́въ, во вре́мѧ бра́ней къ подвигѡ́мъ страда́нїѧ вчинѧ́ѧ, вра́жїй восхи́тивъ ме́чь, си́мъ того̀ ᲂу҆ѧзвѝ. къ немꙋ́же возопїи́мъ: мꙋ́ченикѡвъ и҆зрѧ́днѣйше, съ постравда́вшими съ тобо́ю молѝ хрⷭ҇та̀ бг҃а, ѡ҆ вѣ́рою соверша́ющихъ всечестнꙋ́ю па́мѧть твою̀.
Гла́съ д҃. І҆ѡа́нна мона́ха:
Да вѣнча́ютсѧ ѿ на́съ похвала́ми добропобѣ́днїи и҆́стины свидѣ́тели: є҆ѵстра́тїй, є҆́ллинскагѡ басносмышле́нїѧ ѡ҆бличи́тель, и҆ хрⷭ҇тїа́нскагѡ бг҃омꙋ́дрїѧ проповѣ́дникъ: а҆ѵѯе́нтїй, и҆́же мꙋ́дростїю слове́съ, и҆ терпѣ́нїемъ дѣ́лъ, мꙋчи́тельское ѡ҆бличи́вый безбо́жїе: къ си̑мъ є҆ѵге́нїй, бг҃ꙋ благопотре́бный, и҆ мꙋчи́телємъ непотре́бный спаси́тельнагѡ ра́ди и҆сповѣ́данїѧ, и҆ ѻ҆ре́стъ и҆́стинный и҆ чꙋ́дный цр҃ѧ̀ всѣ́хъ во́инъ: съ ни́миже и҆ марда́рїй, го́лꙋбь неѕло́бивый,мꙋ́дрое посрами́вый ѕмі́ѧ бл҃года́тїю хрⷭ҇та̀ бг҃а, и҆ сп҃са дꙋ́шъ на́шихъ.
Кассі́и мона́хини:
Па́че є҆́ллинскихъ наказа́нїй, а҆пⷭ҇льскꙋю мꙋ́дрость предпочто́ша ст҃і́и мꙋ́чєницы, кни̑ги виті̑йскїѧ ѡ҆ста́вльше, и҆ ры́барскꙋю навы́кше. та́мѡ бо ᲂу҆́бѡ бл҃гоѧзы́чїе глаго́ламъ, въ некни́жныхъ же бг҃огла́сїихъ трⷪ҇ческомꙋ наꙋча́хꙋсѧ бг҃оразꙋ́мїю. въ не́мже моли́тесѧ, въ ми́рѣ сохрани́тсѧ дꙋша́мъ на́шымъ.
Сла́ва, гла́съ д҃, тоѧ́же кассі́и.
Пѧтострꙋ́ннꙋю цѣвни́цꙋ, и҆ пѧтосвѣ́тлый свѣ́щникъ бж҃їѧ цр҃кве, бг҃онѡ́сныѧ мꙋ́ченики тезоиме́ннѣ воспои́мъ, и҆ благоче́стнѣ похва́лимъ: ра́дꙋйсѧ, и҆́же до́брѣ бг҃омъ вво́инствованный въ нбⷭ҇нѣмъ во́инствѣ, и҆ вво́инившемꙋ тѧ̀ ᲂу҆годи́въ, и҆́же въ виті́ѧхъ виті́й, є҆ѵстра́тїе бг҃омꙋ́дре: ра́дꙋйсѧ и҆́же тала́нтъ ѿ бг҃а, тебѣ̀ ввѣ́ренный, возрасти́въ во мно́жество, а҆ѵѯе́нтїе бл҃же́нне: ра́дꙋйсѧ, краснѣ́йшаѧ вѣ́твь бжⷭ҇твеннагѡ благоро́дїѧ, є҆ѵге́нїе бг҃омꙋ́дре: ра́дꙋйсѧ, кра́сный ѻ҆́бразомъ, нра́вомъ же предо́брый, и҆ ѻ҆боюдоизрѧ́дный, и҆́же въ бжⷭ҇твенныхъ гора́хъ пребыва́ѧ ве́сь, всебл҃же́нне ѻ҆ре́сте: ра́дꙋйсѧ, сїѧ́ѧй прозра́чный би́сере, и҆́же мꙋ̑ки гѡ́рькїѧ ра́достнѣ претерпѣ́вый, марда́рїе непобѣди́ме: ра́дꙋйсѧ равночи́сленный ли́че мꙋ́дрыхъ дѣ́въ: ꙗ҆̀же мо́лимъ всѧ́кагѡ гнѣ́ва и҆ ско́рби и҆зба́вити, и҆ неизрече́нныѧ ва́шеѧ сла́вы соприча́стники сотвори́ти, лѣ́тнюю ва́шꙋ па́мѧть чтꙋ́щыѧ.
И҆ ны́нѣ, бг҃оро́диченъ: И҆мꙋ́ще тѧ̀, бцⷣе:
Славосло́вїе вели́кое. И҆ ѿпꙋ́стъ.
На лїтꙋргі́и бл҃жє́нна, а҃-гѡ канѡ́на пѣ́снь г҃-ѧ, на д҃ и҆ в҃-гѡ, пѣ́снь ѕ҃, на д҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ: А҆пⷭ҇лъ ко є҆фесе́ємъ, зача́ло сл҃г. А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.