← претходни дан | Минеј — Децембар | следећи дан →
9 декабря: Иконы Божией Матери, нарицаемой Нечаянная Радость.
Мѣ́сѧца тогѡ́же въ ѳ҃- де́нь.
Пра́зднованїе прест҃ѣ́й бг҃оро́дицѣ въ че́сть чꙋдотво́рныѧ є҆ѧ̀ і҆кѡ́ны, и҆менꙋ́емыѧ неча́ѧннаѧ ра́дость.
На ма́лѣй вече́рни.
На Гдⷭ҇и воззва́хъ, стїхи̑ры на д҃, гла́съ д҃.
Всѣ̑мъ предста́тельствꙋеши, влⷣчце:
Є҆гда̀ нѣ́кїй человѣ́къ:
Хотѧ́й сп҃съ и҆злїѧ́ти: (зрѝ на вели́цѣй вече́рни).
Сла́ва, и҆ ны́нѣ, гла́съ ѕ҃.
Прїиди́те, вѣ́рнїи: (зрѝ на лїті́и).
Стїхи̑ры на стїхо́внѣ, гла́съ є҃:
Нб҃о и҆ землѧ̀ да ликовствꙋ́ютъ: се́ бо мт҃рь пред̾ сн҃омъ предстои́тъ, проще́нїѧ грѣхѡ́въ грѣ́шникꙋ вели́комꙋ ᲂу҆се́рднѡ просѧ́щи. ѡ҆ се́мъ а҆́гг҃ли ра́дꙋютсѧ, съ ни́миже и҆ мы̀ дꙋхо́внѡ да ликовствꙋ́емъ, бг҃оро́дицꙋ пѣ́сньми велича́юще.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Съ чи́нми сщ҃е́нныхъ всѝ ро́ди вѣ́рныхъ, дне́сь возвесели́мсѧ, пра́зднꙋюще торжество̀ бж҃їѧ мт҃ре, ꙗ҆ви́вшїѧ на́мъ въ чꙋдотво́рнѣмъ ѻ҆́бразѣ є҆ѧ̀ и҆сто́чникъ приснотекꙋ́щїй, незави́стныѧ да́ры бл҃гости всѣ̑мъ подаю́щїй.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Тѧ̀, ро́ждшꙋю всѣ́хъ бг҃а, бл҃жа́тъ нбⷭ҇нїи а҆́гг҃ли и҆ земні́и человѣ́цы, ꙗ҆́кѡ за вѣ̑рныѧ лю́ди мо́лишисѧ, покрыва́ющи и҆́хъ ми́лостїю твое́ю, тво́й соверша́ющихъ пра́здникъ.
Сла́ва, и҆ ны́нѣ, бг҃оро́диченъ, гла́съ и҃:
Влⷣчце, прїимѝ мѡли́твы ра̑бъ твои́хъ и҆ и҆зба́ви на́съ ѿ всѧ̑кїѧ нꙋ́жды и҆ печа́ли.
Тропа́рь пи́санъ на вели́цѣй вече́рни.
На вели́цѣй вече́рни.
На Гдⷭ҇и воззва́хъ, стїхи̑ры на и҃, гла́съ в҃:
Прїиди́те, воспои́мъ гдⷭ҇еви, ве́лїю ра́дость на́мъ дарова́вшемꙋ, чꙋдотво́рныѧ ра́ди і҆кѡ́ны мт҃ре своеѧ̀, къ не́йже взира́юще, пѣ́снь всѝ та́кѡ рце́мъ: ѽ пречꙋ́днаѧ влⷣчце бг҃оро́дице, сп҃са́й гра́дъ и҆ лю́ди, вѣ́рою и҆ любо́вїю покланѧ́ющыѧсѧ пречⷭ҇тнѣ́й і҆кѡ́нѣ твое́й.
Кто̀ возглаго́летъ си̑лы твоѧ̑, слы̑шаны сотвори́тъ всѧ̑ хвалы̀ твоѧ̑, гдⷭ҇и, дарова́лъ бо є҆сѝ дерзнове́ннꙋю хода́таицꙋ ро́дꙋ хрⷭ҇тїа́нскомꙋ, пречⷭ҇тꙋю мт҃рь твою̀, грѣ́шныхъ къ тебѣ̀ приводѧ́щꙋю, и҆ си̑мъ неча́ѧннꙋю ра́дость и҆̀мъ даю́щꙋю, и҆ просѧ́щꙋю на́мъ ми́ра и҆ ве́лїѧ ми́лости.
Хотѧ́й сп҃съ и҆злїѧ́ти преѕѣ́льное бога́тство бл҃года́ти на вѣ̑рныѧ своѧ̑, разсѣ́ѧлъ є҆́сть, ꙗ҆́кѡ ѕвѣ̑зды, сїѧ́ющыѧ во страна́хъ правосла́вныхъ, і҆кѡ́ны мт҃ре своеѧ̀, бл҃года́ть чꙋде́съ и҆сточа́ющыѧ, и҆сцѣлє́нїѧ подаю́щыѧ, и҆ ми́ръ, и҆ ве́лїю ми́лость.
Є҆гда̀ нѣ́кїй человѣ́къ беззако́ненъ припадѐ къ пречꙋ́дномꙋ ѻ҆́бразꙋ твоемꙋ̀, а҆рха́гг҃льское привѣ́тствїе приносѧ̀ тебѣ̀, є҆ди́нѣй пречⷭ҇тѣй и҆ пребл҃гослове́ннѣй, тогда̀ ѿ пꙋтѝ поги́бельнагѡ ѿврати́ла є҆сѝ є҆го̀ и҆ неча́ѧннꙋю ра́дость сп҃се́нїѧ дарова́ла є҆сѝ є҆мꙋ̀, и҆ ми́ръ, и҆ ве́лїю ми́лость.
Всѣ̑мъ предста́тельствꙋеши, влⷣчце, прибѣга́ющымъ съ вѣ́рою въ держа́вный тво́й покро́въ, и҆но́го бо, грѣ́шнїи, не и҆́мамы при́снѡ въ бѣда́хъ и҆ ско́рбехъ и҆збавле́нїѧ, ѡ҆бремене́ннїи грѣхѝ мно́гими, мт҃и бг҃а вы́шнѧгѡ ты̀ є҆сѝ, пречⷭ҇таѧ, потщи́сѧ помощѝ рабѡ́мъ твои̑мъ.
Всѣ́хъ скорбѧ́щихъ и҆ ѡ҆би́димыхъ застꙋ́пнице, а҆́лчꙋщихъ пита́тельнице, стра́нныхъ ᲂу҆тѣше́нїе, ѡ҆бꙋрева́емыхъ приста́нище, больны́хъ посѣще́нїе, немощны́хъ покро́въ, же́злъ ста́рости, мт҃и бг҃а вы́шнѧгѡ ты̀ є҆сѝ, пречⷭ҇таѧ, потщи́сѧ помощѝ рабѡ́мъ твои̑мъ.
Сла́ва, и҆ ны́нѣ, гла́съ ѕ҃:
Сра́дꙋютсѧ съ на́ми ᲂу҆́мнаѧ всѧ̑ чинѡнача́лїѧ, ви́дѧще цр҃цꙋ и҆ влⷣчцꙋ всѣ́хъ, многоиме́ннѣ вѣ́рными сла́вимꙋ, ра́дꙋютсѧ же и҆ дꙋ́си пра́ведныхъ, зрѧ́щїи бг҃омт҃рь, за грѣ̑шныѧ лю́ди всечестні́и своѝ рꙋцѣ̀ къ сн҃ꙋ простира́ющꙋю и҆ просѧ́щꙋю и҆̀мъ ѡ҆ставле́нїѧ грѣхѡ́въ, и҆ ми́ра, и҆ ве́лїѧ ми́лости.
Та́же вхо́дъ, прокі́менъ днѐ, и҆ чтє́нїѧ бг҃орѡ́дичны г҃.
Бытїѧ̀ чте́нїе.
[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. И҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀ И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
Прⷪ҇ро́чества і҆езекі́илева чте́нїе.
[Главы̑ м҃г и҆ м҃д] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ́ вы, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
При́тчей чте́нїе.
[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь: закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ прїи́метъ себѣ̀ безче́стїе, ѡ҆блича́ѧй же нечести́ваго ѡ҆поро́читъ себѐ: ѡ҆бличе́нїе бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ: разꙋмѣ́ти бо зако́нъ по́мысла є҆́сть бл҃га́гѡ. Си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.
Стїхи̑ры на лїті́и, гла́съ д҃:
Дне́сь да возра́дꙋетсѧ и҆ да возвесели́тсѧ вѣ́рныхъ собра́нїе: се́ бо мт҃рь свѣ́та и҆ чⷭ҇тоты̀, грѣ́шникꙋ ꙗ҆ви́вши застꙋпле́нїе, си́мъ и҆ всѣ̑мъ вѣ̑рнымъ показꙋ́етъ, ꙗ҆́кѡ бл҃гонаде́ждна є҆́сть на́мъ застꙋ́пница, ѡ҆бременє́ннымъ грѣхѝ и҆ скорбьмѝ мно́гими, съ вѣ́рою притека́ющымъ въ пречꙋ́дный є҆ѧ̀ покро́въ.
Гла́съ в҃:
Смы́слъ ѡ҆чи́стивше и҆ ᲂу҆́мъ, со а҆́гг҃лы и҆ мы̀ торжествꙋ́емъ, свѣ́тлѡ начина́юще даві́дскꙋю пѣ́снь ѻ҆трокови́цѣ невѣ́стѣ, мт҃ри всѣ́хъ цр҃ѧ̀, хрⷭ҇та̀ бг҃а на́шегѡ, воскреснѝ, гдⷭ҇и, глаго́люще, въ поко́й тво́й, ты̀ и҆ кївѡ́тъ ст҃ы́ни твоеѧ̀, ꙗ҆́кѡ бо пала́тꙋ кра́снꙋ, сїю̀ ᲂу҆краси́лъ є҆сѝ, влⷣко, покрыва́ти и҆ сп҃са́ти вѣ̑рныѧ держа́вною си́лою твое́ю.
Сла́ва, и҆ ны́нѣ, гла́съ ѕ҃:
Прїиди́те, вѣ́рнїи, воспои́мъ застꙋ́пницꙋ ро́да хрⷭ҇тїа́нскагѡ, подви́гшꙋюсѧ на ᲂу҆моле́нїе сн҃а своегѡ̀ и҆ бг҃а за человѣ́ка беззако́нна, грѣхо́внымъ житїе́мъ свои́мъ сн҃а бж҃їѧ прогнѣви́вша и҆ си́мъ второ́е є҆го̀ распе́нша, и҆ и҆з̾ глꙋбины̀ дꙋшѝ къ не́й возопїи́мъ: ѽ премлⷭ҇тиваѧ хода́таице, не ѡ҆ста́ви и҆ на́съ бл҃гопрїѧ́тными къ сн҃ꙋ твоемꙋ̀ ѡ҆ на́съ моли́твами.
На стїхо́внѣ стїхи̑ры, гла́съ д҃:
Ꙗ҆́кѡ сл҃нце пресвѣ́тлое, возсїѧ̀ на́мъ чꙋдотво́рнаѧ і҆кѡ́на твоѧ̀, влⷣчце, и҆злива́ющи ѻ҆би́льнѡ лꙋ́чы бла́гости твоеѧ̀: болѧ́щымъ здра́вїе, скорбѧ́щымъ ᲂу҆тѣше́нїе, ѿ бѣ́дъ и҆збавле́нїе и҆ дꙋша́мъ на́шымъ ми́ръ и҆ ве́лїю ми́лость.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Воспои́мъ, лю́дїе, свѣ́тло даві́дскꙋю пѣ́снь ѻ҆трокови́цѣ, невѣ́стѣ бж҃їей, мт҃ри всѣ́хъ цр҃ѧ̀ хрⷭ҇та̀: предста̀ цр҃и́ца ѡ҆деснꙋ́ю тебѐ, влⷣко, рѧ̑сны златы́ми ѡ҆дѣ́ѧна и҆ преꙋкраше́на бж҃е́ственными лѣ́потами. сїю́ бо, и҆збра́ннꙋю въ жена́хъ, па́че всегѡ̀ мі́ра ᲂу҆добри́въ, бл҃гоизво́ли роди́тисѧ ѿ неѧ̀ вели́кїѧ ра́ди ми́лости и҆ сїю̀ помо́щницꙋ лю́демъ свои̑мъ дарова̀ покрыва́ти рабы̑ своѧ̑, є҆ди́нꙋ бл҃гослове́ннꙋю.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Приклони́вши ᲂу҆́хо твоѐ ко а҆рха́гг҃льскомꙋ бл҃говѣ́стїю, воспрїѧ́ла є҆сѝ во чре́вѣ твое́мъ, чⷭ҇таѧ, прекло́ньшаго нб҃са̀ и҆ на́шегѡ ра́ди сп҃се́нїѧ на зе́млю сше́дшаго, и҆́же ны́нѣ приклонѧ́етъ ᲂу҆́хо своѐ къ бл҃гопрїѧ̑тнымъ твои̑мъ моли́твамъ ѡ҆ всѣ́хъ, вѣ́рою и҆ любо́вїю чтꙋ́щихъ тѧ̀.
Сла́ва, и҆ ны́нѣ, гла́съ з҃:
Под̾ кро́въ тво́й, влⷣчце, всѝ земноро́днїи прибѣга́юще, вопїе́мъ тѝ: бг҃оро́дице, ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй и҆ сп҃сѝ дꙋ́шы на́шѧ.
На бл҃гослове́нїи хлѣ́бѡвъ тропа́рь, гла́съ д҃:
Дне́сь, вѣ́рнїи лю́дїе, дꙋхо́внѡ торжествꙋ́емъ, прославлѧ́юще застꙋ́пницꙋ ᲂу҆се́рднꙋю ро́да хрⷭ҇тїа́нскагѡ, и҆, притека́юще къ пречⷭ҇томꙋ є҆ѧ̀ ѻ҆́бразꙋ, взыва́емъ си́це: ѽ преми́лостиваѧ влⷣчце бг҃оро́дице, пода́ждь на́мъ неча́ѧннꙋю ра́дость, ѡ҆бременє́ннымъ грѣхѝ и҆ скорбьмѝ мно́гими, и҆ и҆зба́ви на́съ ѿ всѧ́кагѡ ѕла̀, молѧ́щи сн҃а твоего̀ хрⷭ҇та̀ бг҃а на́шего, сп҃стѝ дꙋ́шы на́шѧ.
И҆ Бг҃оро́дице дв҃о, ра́дꙋйсѧ:
На ᲂу҆́трени. По а҃-мъ стїхосло́вїи сѣда́ленъ, гла́съ г҃:
Бж҃е́ственными сїѧ̑нїи а҆́гг҃льскихъ во́инствъ ѡ҆бстꙋпа́ема и҆ съ чи́нми прⷪ҇рѡ́къ и҆ а҆пⷭ҇тѡлъ че́стнѡ слꙋ́жбꙋ прїе́млющи, ꙗ҆́кѡ мт҃и бж҃їѧ, посѣтѝ на́съ, твои́хъ ра̑бъ, молѧ́щи хрⷭ҇та̀ бг҃а на́шего дарова́ти на́мъ ве́лїю ми́лость.
Сла́ва, и҆ ны́нѣ, то́йже. По в҃-мъ стїхосло́вїи сѣда́ленъ, гла́съ ѕ҃:
Безпѡ́мощнымъ крѣ́пость ты̀ вои́стиннꙋ, бг҃ома́ти, всѣ́мъ покро́въ и҆ къ бг҃ꙋ хода́таица.
Сла́ва, и҆ ны́нѣ, то́йже.
По полѷеле́и сѣда́ленъ, гла́съ в҃:
Гора̀ є҆сѝ вели́ка и҆ пресла́вна, па́че горы̀ сїна́йскїѧ: ѻ҆на́ бо, не терпѧ́щи сни́тїѧ сла́вы бж҃їѧ во ѻ҆́бразѣхъ и҆ сѣ́нехъ, ѻ҆гне́мъ возгора́шесѧ, и҆ гро́ми и҆ мо́лнїѧ та́мѡ бы́ша, ты́ же, въ себѣ̀ бж҃е́ственнаго ѻ҆гнѧ̀ прїе́мши, бж҃їе сло́во неѡпа́льнѡ носи́ла є҆сѝ, ма́нїемъ носѧ́щаго всѧ̑, и҆, мт҃рнее дерзнове́нїе къ немꙋ̀ и҆мꙋ́щи, помозѝ, влⷣчце, вѣ́рою тѧ̀ почита́ющымъ, прїѧ́ла бо є҆сѝ ѿ бг҃а да́ръ стро́ити и҆ покрыва́ти хрⷭ҇тоимени́тое твоѐ ста́до, рабы̑ твоѧ̑.
Сла́ва, и҆ ны́нѣ, то́йже.
По н҃-мъ ѱалмѣ̀ стїхи́ра, гла́съ ѕ҃: Сра́дꙋютсѧ съ на́ми ᲂу҆́мнаѧ всѧ̑ чинѡнача́лїѧ: Сла́вникъ на Гдⷭ҇и воззва́хъ, пи́санъ на вели́цѣй вече́рни.
Канѡ́нъ, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.
Ѿве́рзшаѧ двє́ри милосе́рдїѧ бж҃їѧ а҆рха́гг҃льское привѣ́тствїе тебѣ̀ приноси́вшемꙋ, не затворѝ и҆ ѿ на́съ ᲂу҆тро́бы человѣколю́бїѧ твоегѡ̀, тѧ̀ воспѣва́ющихъ.
Чꙋ́дно бы́сть житїѐ твоѐ на землѝ, пресла́внаѧ мт҃и дв҃о, но нбⷭ҇ное твоѐ жи́тельство чꙋднѣ́йше є҆́сть: непреста́ннѡ бо ꙗ҆влѧ́еши чꙋдеса̀ мт҃рнѧгѡ твоегѡ̀ милосе́рдїѧ тѧ̀ воспѣва́ющымъ.
Сн҃а, ѿ ѻ҆ц҃а̀ безлѣ́тнѡ ражда́ющагосѧ въ послѣ̑днѧѧ лѣ̑та, зачала̀ є҆сѝ ѡ҆сѣне́нїемъ дх҃а ст҃а́гѡ, вѣ́чнꙋю ра́дость мі́рꙋ роди́вши.
Ра́дꙋйсѧ, мо́ре, потопи́вшее фараѡ́на мы́сленнаго, дїа́вола. ра́дꙋйсѧ, ка́меню, напои́вшїй жа́ждꙋщихъ жи́зни дх҃о́вныѧ, дарова́ла бо є҆сѝ ро́дꙋ человѣ́ческомꙋ и҆зба́вителѧ плѣне́нныхъ и҆ наста́вника заблꙋ́ждшихъ.
И҆́нъ канѡ́нъ, гла́съ в҃.
І҆рмо́съ: Мѡѷсе́йскꙋю пѣ́снь воспрїи́мши, возопі́й, дꙋшѐ: помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀.
Рабо́ты вра́жїѧ и҆зба́вила є҆сѝ ве́сь ро́дъ человѣ́чь, сп҃са всемꙋ̀ мі́рꙋ роди́вши, є҆го́же молѝ ѿ навѣ́тѡвъ лꙋка́вагѡ и҆ на́съ сп҃стѝ.
Бꙋ́ди въ напа́стехъ на́шихъ хода́таица и҆ предста́тельница ѡ҆ на́съ къ сн҃ꙋ твоемꙋ̀, прест҃а́ѧ дв҃о, да тѣ́хъ и҆збы́вше, прославлѧ́емъ є҆го̀ со ѻ҆ц҃е́мъ и҆ ст҃ы́мъ дх҃омъ.
А҆́гг҃лъ и҆ а҆рха̑гг҃лъ превы́сшаѧ и҆ всеѧ̀ тва́ри чⷭ҇тнѣ́йшаѧ, ты̀ є҆сѝ вели́каѧ предста́тельница ро́да хрⷭ҇тїа́нскагѡ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃.
І҆рмо́съ: Твоѧ̑ пѣсносло́вцы, бг҃оро́дице, живы́й и҆ незави́стный и҆сто́чниче, ли́къ себѐ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
Тѧ̀ ᲂу҆се́рднѡ пѣсносло́вѧщихъ ᲂу҆твердѝ въ житїѝ добродѣ́тельнѣмъ и҆ ро́ждшагосѧ ѿ тебє̀ ᲂу҆се́рднѡ молѝ, да не лише́ни бꙋ́демъ вѣнцє́въ сла́вы грѣ̑хъ ра́ди на́шихъ.
Па́че всѧ́кагѡ беззако́нна человѣ́ка въ житїѝ свое́мъ сн҃а твоего̀ грѣхѝ прогнѣвлѧ́емъ, но, ѽ мт҃и милосе́рдаѧ, бꙋ́ди ѡ҆ на́съ хода́таица.
Да сподо́битъ на́съ вѣнцє́въ сла́вы въ бж҃е́ственнѣй свое́й сла́вѣ сѣдѧ́й со ѻ҆ц҃е́мъ и҆ ст҃ы́мъ дх҃омъ і҆и҃съ чл҃вѣколю́бецъ, рожде́йсѧ ѿ тебє̀ и҆ вла́сть и҆мѣ́ѧй человѣ́кѡмъ ѡ҆ставлѧ́ти грѣхѝ.
Ра́дꙋйсѧ, дв҃о, невмѣсти́маго бг҃а во чре́вѣ вмѣсти́вшаѧ, и҆ того̀ ꙗ҆́кѡ младе́нца носи́вшаѧ, и҆ сосцы̀ твои́ми пита́вшаѧ.
И҆́нъ.
І҆рмо́съ: Оу҆тверди́ мѧ, гдⷭ҇и бж҃е мо́й, да не похва́литсѧ вра́гъ мо́й ѡ҆ мнѣ̀: ты́ бо є҆сѝ, гдⷭ҇и, ᲂу҆твержде́нїе моѐ, и҆ прибѣ́жище, и҆ си́ла.
Молє́нїѧ на̑ша ᲂу҆слы́ши, мт҃и дв҃о, и҆ вонмѝ воздыха́нїѧмъ на́шымъ, и҆ ѡ҆ на́съ моли́твꙋ къ сн҃ꙋ твоемꙋ̀ сотворѝ.
Ꙗ҆́кѡ милосе́рдаѧ, вонмѝ моли́твамъ на́шымъ и҆ да́рꙋй на́мъ ѿ ѕлы́хъ и҆ лю́тыхъ ѡ҆бстоѧ́нїй и҆ печа́лей и҆збавле́нїе.
Бꙋ́рю жите́йскихъ треволне́нїй на́шихъ ᲂу҆толѝ и҆ ѕлы̑ѧ стра̑сти на́шѧ проженѝ, пречⷭ҇таѧ, да въ тишинѣ̀ и҆ безстра́стїи тѧ̀ прославлѧ́емъ.
Лю́дїе бж҃їи, прїиди́те, ны́нѣ восхва́лимъ нбⷭ҇нꙋю цр҃цꙋ, съ нб҃сѐ ст҃а́гѡ своегѡ̀ на ны̀ призира́ющꙋю и҆ на́съ къ нбⷭ҇нымъ возводѧ́щꙋю.
Катава́сїа: Твоѧ̑ пѣсносло́вцы:
Сѣда́ленъ, гла́съ є҃:
Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀, и҆ покро́ве, и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы ᲂу҆мире́нїе да́ти мі́рꙋ, и҆ сп҃се́нїе, и҆ ве́лїю ми́лость.
Сла́ва, и҆ ны́нѣ то́йже.
Пѣ́снь д҃.
І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀ во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Сп҃са всемꙋ̀ мі́рꙋ ро́ждшаѧ, и҆ сама̀ сп҃са́еши, мт҃и, ѿ бѣ́дъ и҆ печа́лей жите́йскихъ бг҃оро́дицꙋ тѧ̀ и҆сповѣ́дающихъ.
И҆сцѣлѝ всѧ̑ лю̑тыѧ и҆ неꙋдо́бь и҆сцѣ̑льныѧ болѣ̑зни на́шѧ, мт҃и сн҃а и҆ и҆зба́вителѧ, на крⷭ҇тъ грѣхѝ на́шѧ возне́сшагѡ.
Ѵ҆поста́снаѧ премꙋ́дрость, бг҃ъ сло́во и҆збра́ тѧ въ жили́ще своѐ, сего̀ ᲂу҆се́рднѡ молѝ, да сп҃се́тъ на́съ и҆́миже вѣ́сть сꙋдьба́ми.
Ра́дꙋйсѧ, невѣ́сто прекра́снаѧ, до́браѧ. ра́дꙋйсѧ, голꙋби́це чⷭ҇таѧ. ра́дꙋйсѧ, мт҃и є҆мманꙋ́илева, бг҃оро́дице приснодв҃о.
И҆́нъ.
І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀, заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многомлⷭ҇тиве.
А҆́ще и҆ недоꙋмѣ́етъ ѧ҆зы́къ на́шъ восхвали́ти тѧ̀ по досто́инствꙋ, ѻ҆ба́че, любо́вїю къ тебѣ̀ дви́жими, ѿ всегѡ̀ се́рдца и҆ ѿ всегѡ̀ помышле́нїѧ на́шегѡ сла́вимъ и҆ хва́лимъ тѧ̀, всѣ́хъ бл҃ги́хъ хода́таицꙋ.
Глꙋбины̑ мѡрскі́ѧ кто̀ и҆зслѣ́дитъ; кто́ же возмо́жетъ и҆счи́слити и҆ твоѧ̑ вєли́кїѧ на́мъ ми́лѡсти и҆ щедрѡ́ты;
Ѻ҆́тче, гдⷭ҇и нб҃сѐ и҆ землѝ! коли́кое бл҃годаре́нїе принесе́мъ тебѣ̀, занѐ бл҃гꙋ́ю и҆ си́льнꙋю хода́таицꙋ ро́дꙋ хрⷭ҇тїа́нскомꙋ дарова́лъ є҆сѝ.
Дла̑ни твоѧ̑ просте́рши къ ро́ждшемꙋсѧ и҆з̾ тебє̀, премилосе́рдаѧ мт҃и, не преста́й ѡ҆ на́съ молѧ́сѧ, да моли́твами твои́ми нбⷭ҇ныхъ и҆ земны́хъ дарова́нїй сподо́бимсѧ.
Катава́сїа: Сѣдѧ́й въ сла́вѣ:
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Нб҃о и҆ землѧ̀ ᲂу҆дивлѧ́ютсѧ, зрѧ́ще милосе́рдїе твоѐ къ ро́дꙋ хрⷭ҇тїа́нскомꙋ, пресла́внаѧ мт҃и дв҃о, и҆ къ са́мымъ до́лꙋ повє́рженнымъ грѣ́шникѡмъ нисхо́диши, всебл҃га́ѧ.
Сп҃сѝ ѿ ѕѡ́лъ и҆ скорбе́й рабы̑ твоѧ̑, бг҃оро́дице, и҆ ми́ръ бж҃їй, превы́сшїй всѧ́кагѡ мі́ра земна́гѡ, пода́ждь рабѡ́мъ, тѧ̀ воспѣва́ющымъ.
Родила̀ є҆сѝ ᲂу҆миротвори́вшаго гѡ́рнѧѧ и҆ дѡ́льнѧѧ и҆ сегѡ̀ ра́ди на зе́млю соше́дшаго, ѿ ѻ҆ц҃а́ же и҆ дх҃а ст҃а́гѡ не разлꙋчи́вшагосѧ.
Ра́дꙋйсѧ, цр҃це нб҃сѐ и҆ землѝ. ра́дꙋйсѧ, превы́сшаѧ а҆́гг҃лъ и҆ а҆рха̑гг҃лъ. ра́дꙋйсѧ, ꙗ҆́кѡ тобо́ю і҆а́кѡвомъ предвозвѣще́нный къ на́мъ примири́тель соше́лъ є҆́сть.
И҆́нъ.
І҆рмо́съ: Просвѣще́нїе во тмѣ̀ лежа́щихъ, сп҃се́нїе ѿча́ѧнныхъ, хрⷭ҇тѐ, сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо, ра́звѣ тебє̀, бг҃а не зна́ю.
А҆рха́гг҃лъ гаврїи́лъ, съ нбⷭ҇ныхъ слетѣ́въ крꙋгѡ́въ, принесѐ тебѣ̀ ра́дость бл҃говѣ́щенїѧ, семꙋ̀ неизрече́нномꙋ бж҃їю совѣ́тꙋ послꙋжи́вши, ди́внаѧ въ жена́хъ, и҆ сама̀ прино́сиши ра́дость всѣ̑мъ, вѣ́рно тѧ̀ пѣсносло́вѧщымъ.
Ра́дость вои́стиннꙋ неча́ѧннꙋю всемꙋ̀ до́льнемꙋ и҆ го́рнемꙋ ми́рꙋ дарова́ла є҆сѝ, занѐ ѿ тебє̀ происше́дый ᲂу҆миротворѝ и҆ соединѝ гѡ́рнѧѧ съ до́льними, є҆го́же ны́нѣ молѝ вражды̀ и҆ нестрое́нїй на́мъ и҆зба́витисѧ.
Ꙗ҆́дъ грѣхо́вный ѿ дре́внѧгѡ пра́ѻтца во ве́сь ро́дъ человѣ́чь привни́де, но ѿ тебє̀ рожде́йсѧ всѧ̀ ѡ҆чи́сти, ѡ҆ст҃ѝ и҆ спасѐ, є҆го́же ны́нѣ молѝ грѣхо́вныхъ страсте́й и҆ безмѣ́стныхъ дѣ́лъ на́мъ и҆зба́витисѧ.
Щедрѡ́ты твоѧ̑ къ на́мъ неисчє́тны, и҆ бл҃гости сло́ва и҆ сн҃а твоегѡ̀ подо́бѧтсѧ, и҆ сїѐ вѣ́мы и҆ до́брѣ вѣ́мы, но что̀ воздади́мъ тебѣ̀ ѡ҆ ни́хъ, премилосе́рдаѧ мт҃и дв҃о,
Катава́сїа: Оу҆жасо́шасѧ всѧ́чєскаѧ:
Пѣ́снь ѕ҃.
І҆рмо́съ: Бж҃е́ственное сїѐ и҆ всечⷭ҇тно́е соверша́ющи пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Сщ҃е́нное торжество̀ ны́нѣ дꙋхо́внѡ соверша́юще, прїиди́те, празднолю́бцы, воспои́мъ пѣ́сньми бг҃ома́терь, прославлѧ́юще сн҃а, дарова́вшаго толи́кꙋю бл҃года́ть мт҃ри свое́й.
При́зри на пѣ́нїе рабѡ́въ, бг҃ороди́тельнице, врагѡ́въ ви́димыхъ и҆ неви́димыхъ смирѧ́ѧ вознесе́ннꙋю горды́ню и҆ на смирє́нныѧ и҆злива́ѧ высѡ́кїѧ ми́лѡсти твоѧ̑.
Ты̀ є҆сѝ ко́рень, ѿ негѡ́же произы́де же́злъ і҆ессе́евъ, хрⷭ҇то́съ. чл҃вѣ́къ ѿ до́мꙋ даві́дова и҆ бг҃ъ, ѻ҆ц҃ꙋ̀ и҆ дх҃ꙋ соприсносꙋ́щный.
Ра́дꙋйсѧ, мт҃и ѡ҆бра́дованнаѧ. ра́дꙋйсѧ, прекра́снѣйшаѧ всѣ́хъ дще́рей человѣ́ческихъ. ра́дꙋйсѧ, бл҃горо́днаѧ ѿрасль бг҃оизбра́ннагѡ ро́да даві́дова.
И҆́нъ.
І҆рмо́съ: Во глꙋбинѣ̀ грѣхо́внѣй содержи́мь є҆́смь, сп҃се, и҆ въ пꙋчи́нѣ жите́йстѣй ѡ҆бꙋрева́емь, но, ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ и҆ сп҃си́ мѧ.
А҆́да, и҆ сме́рти, и҆ тлѣ́нїѧ рожⷭ҇тво́мъ твои́мъ спасла̀ є҆сѝ ро́дъ человѣ́чь, тѣ́мъ тѧ̀ всѧ́ко колѣ́но нбⷭ҇ныхъ и҆ земны́хъ по до́лгꙋ ᲂу҆бл҃жа́етъ, ꙗ҆́кѡ мт҃рь разрꙋши́телѧ а҆́да и҆ сме́рти свободи́телѧ.
Грѣ̑хъ ра́ди на́шихъ не ѿврати́сѧ ѿ на́съ, дв҃о прест҃а́ѧ, но моли́твами твои́ми свобожде́нїе ѿ а҆́да и҆ вѣ́чныѧ сме́рти на́мъ и҆схода́тайствꙋй.
Ѽ, въ коли́цѣй лѣ́ности, коли́комъ нерадѣ́нїи ѡ҆ сп҃се́нїи на́шемъ всѐ житїѐ на́ше и҆ждива́емъ! ка́ѧ мꙋ́ка, кі́й пла́мень предлежи́тъ на́мъ! но, ѽ мт҃и, да́нною тебѣ̀ бл҃года́тїю и҆ на́съ сп҃сѝ.
Ѻ҆́гнь бж҃е́ственный, хрⷭ҇та̀, неѡпа́льнѡ на рꙋкꙋ̑ своє́ю носи́ла є҆сѝ, сегѡ̀ ра́ди, ны́нѣ предстоѧ́щи пред̾ прⷭ҇то́ломъ ѻ҆гнезра́чнымъ сла́вы є҆гѡ̀, молѝ, да воспламени́тъ на́съ къ благи́хъ дѣ́ланїю.
Катава́сїа: Бж҃е́ственное сїѐ и҆ всечестно́е:
Конда́къ, гла́съ ѕ҃:
Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебє̀, влⷣчце. ты̀ на́мъ помозѝ, на тебѐ надѣ́емсѧ и҆ тобо́ю хва́лимсѧ, твои́ бо є҆смы̀ рабѝ, да не постыди́мсѧ.
І҆́косъ, гла́съ ѕ҃:
Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́монскагѡ стрѣлѧ́нїѧ, покро́ва не и҆́мамъ. нижѐ гдѣ̀ прибѣ́гнꙋ, ѡ҆каѧ́нный, всегда̀ побѣжда́емь, и҆ ᲂу҆тѣше́нїѧ не и҆́мамъ, ра́звѣ тебє̀, влⷣчце мі́ра, ᲂу҆пова́нїе и҆ предста́тельство вѣ́рныхъ не пре́зри моле́нїе моѐ. полѣ́зно сотворѝ.
Пѣ́снь з҃.
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.
Презрѣ́ла є҆сѝ всѧ̑ кра̑снаѧ мі́ра, чⷭ҇таѧ є҆ди́номꙋ бг҃ꙋ возжела́вши послꙋжи́ти, є҆мꙋ́же воспѣва́ла є҆сѝ: ѻ҆тцє́въ бж҃е, бл҃гослове́нъ є҆сѝ.
На́съ, всесоверше́ннѡ бл҃гочєсти́вымъ ѻ҆трокѡ́мъ не послѣ́дꙋющихъ, но прилѣплѧ́ющихъ тва́ри па́че, не́же творцꙋ̀, наста́ви, влⷣчце, є҆ди́номꙋ бг҃ꙋ слꙋжи́ти и҆ воспѣва́ти: ѻ҆тцє́въ бж҃е, бл҃гослове́нъ є҆сѝ.
Данїи́лъ ᲂу҆́мныма ѻ҆чи́ма пред̾ꙋзрѣ́ тѧ, хрⷭ҇тѐ, въ ка́мени нерꙋкосѣ́чнѣмъ. разрꙋши́вшемъ сꙋ́єтнаѧ црⷭ҇тва человѣ̑ческаѧ, во сп҃се́нїе пою́щихъ тебѣ̀ со ѻ҆ц҃е́мъ и҆ дх҃омъ: ѻ҆тцє́въ бж҃е, бл҃гослове́нъ є҆сѝ.
Ра́дꙋйсѧ, горо̀, бл҃года́тїю бж҃їею прїѡсѣне́ннаѧ, ѿ неѧ́же ѿсѣче́сѧ ка́мень, бг҃омъ ѻ҆ц҃е́мъ положе́нный во главꙋ̀ ᲂу҆́гла цр҃кве своеѧ̀, хрⷭ҇то́съ, є҆мꙋ́же пое́мъ: ѻ҆тцє́въ бж҃е, бл҃гослове́нъ є҆сѝ.
И҆́нъ.
І҆рмо́съ: Кꙋпина̀ въ горѣ̀ ѻ҆гненеѡпа́льнаѧ и҆ росоно́снаѧ пе́щь халде́йскаѧ ꙗ҆́вѣ предписа́ тѧ, бг҃оневѣ́сто: бж҃е́ственный бо невеще́ственный въ веще́ственнѣмъ чре́вѣ ѻ҆́гнь неѡпа́льнѡ прїѧ́ла є҆сѝ. тѣ́мже и҆з̾ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.
Творе́цъ и҆ зижди́тель всѣ́хъ, бг҃ъ сло́во въ послѣ̑днѧѧ лѣ̑та во ᲂу҆тро́бꙋ твою̀ всели́сѧ, пресла́внаѧ бг҃оѻтрокови́це, и҆ всѧ̑ наꙋчѝ воспѣва́ти: бл҃гослове́нъ є҆сѝ, бж҃е ѻ҆тє́цъ на́шихъ.
Скѡ́рби, бѣды̑, болѣ̑зни ѿ мно́гагѡ мно́жества грѣхѡ́въ на́шихъ, ꙗ҆́кѡ во́ды мѡрскі́ѧ, внидо́ша до глꙋбины̀ дꙋ́шъ на́шихъ, но на твою̀ надѣ́ющесѧ, бг҃ома́ти, по́мощь, не ѿчаѧва́емсѧ, сн҃ꙋ твоемꙋ̀ взыва́емъ: бл҃гослове́нъ є҆сѝ, бж҃е ѻ҆тє́цъ на́шихъ.
Кто̀ возглаго́летъ си́лꙋ твою̀ на нб҃сѝ, ю҆́же дарова́ ти ѿ тебє̀ происше́дый; кто̀ и҆ на землѝ слы́шаны сотвори́тъ всѧ̑ хвалы̑ твоемꙋ̀ вели́комꙋ покро́вꙋ и҆ застꙋпле́нїю земноро́дныхъ, воспѣва́ющихъ: бл҃гослове́нъ є҆сѝ, бж҃е ѻ҆тє́цъ на́шихъ.
Ѻ҆трокови́це чⷭ҇таѧ, неискꙋсобра́чнаѧ, ѡ҆чи́сти на́шъ ᲂу҆́мъ ѿ по́мыслѡвъ сꙋ́етныхъ и҆ се́рдце на́ше ѿ по́хотей лꙋка́выхъ, да чи́стыми дꙋша́ми и҆ нескве́рными ᲂу҆стна́ми сн҃ꙋ твоемꙋ̀ воспѣва́емъ: бл҃гослове́нъ є҆сѝ, бж҃е ѻ҆тє́цъ на́шихъ.
Катава́сїа: Не послꙋжи́ша тва́ри:
Пѣ́снь и҃.
І҆рмо́съ: Ѻ҆́троки бл҃гочєсти́выѧ въ пещѝ рожⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Слы́ши, ѻ҆трокови́це дв҃о чⷭ҇таѧ, глаго́лъ, гаврїи́ломъ тебѣ̀ вѣща́нный: роди́ши сн҃а, спаса́ющаго воспѣва́ющихъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Пло́тїю ѿ тебє̀ происше́дый спа́слъ є҆́сть ѿ ѻ҆гнѧ̀ ѻ҆трокѡ́въ, вѣ́рою зрѣ́вшихъ є҆го̀. того̀ молѝ и҆ на́съ сп҃стѝ, пла́менемъ страсте́й жего́мыхъ, сн҃ꙋ же твоемꙋ̀ воспѣва́ющихъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Въ пещѝ вавѷлѡ́нстѣй ви́дѣнъ бы́лъ є҆сѝ, хрⷭ҇тѐ, ꙗ҆́кѡ а҆́гг҃лъ свѣтоно́сный, зра́комъ же сн҃ꙋ бж҃їю подо́бный. тебѣ̀ со ѻ҆ц҃е́мъ и҆ дх҃омъ пое́мъ: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Ра́дꙋйсѧ, кꙋпино̀, мѡѷсе́емъ ви́дѣннаѧ, въ послѣ̑днѧѧ же лѣ̑та ѿ ко́рене даві́дова происше́дшаѧ и҆ сп҃са всѣ́хъ неизрече́ннѡ ро́ждшаѧ, є҆мꙋ́же пое́мъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
И҆́нъ.
І҆рмо́съ: Велѣ́нїю мꙋчи́телевꙋ прпⷣбнїи трїѐ ѻ҆́троцы не повинꙋ́вшесѧ, въ пе́щь вве́ржени, бг҃а и҆сповѣ́дахꙋ, пою́ще: бл҃гослови́те, дѣла̀ гдⷭ҇нѧ, гдⷭ҇а.
Рꙋно̀ ѡ҆роше́нное, гедеѡ́номъ ви́дѣнное, та́йнѡ проѻбрази́ тѧ, дв҃ꙋ мт҃рь, ѡ҆сѣне́нїемъ дх҃а ст҃а́гѡ бг҃а сло́ва неискꙋсомꙋ́жнѡ роди́вшꙋю, є҆мꙋ́же пое́мъ: бл҃гослови́те, дѣла̀ гдⷭ҇нѧ, гдⷭ҇а.
Безꙋ́мнаѧ ꙗ҆́рость мꙋчи́телѧ вве́рже бл҃гочєсти́выѧ ѻ҆́троки въ пе́щь, ѻ҆гне́мъ разжже́ннꙋю, но сн҃ъ тво́й росо́ю та́инственною си́лꙋ ѻ҆гнѧ̀ ᲂу҆гасѝ. сего̀ ᲂу҆молѝ, прест҃а́ѧ, и҆ на́съ ѻ҆гнѧ̀ вѣ́чнагѡ и҆зба́вити и҆ росоно́снагѡ црⷭ҇тва сла́вы не лише́ны сотвори́ти, да та́мѡ пое́мъ: бл҃гослови́те, дѣла̀ гдⷭ҇нѧ, гдⷭ҇а.
Є҆гѡ́же неизрече́ннѣй та́йнѣ воплоще́нїѧ послꙋжи́ла є҆сѝ, є҆го́же все́ю мт҃рнею любо́вїю возлюби́ла є҆сѝ, сего̀ молѝ и҆ са́мыхъ ѿве́рженныхъ грѣ́шникѡвъ не ѿри́нꙋти, да и҆ ті́и пою́тъ: бл҃гослови́те дѣла̀ гдⷭ҇нѧ, гдⷭ҇а.
Сла́вимъ и҆ воспѣва́емъ тѧ̀ по до́лгꙋ, премилосе́рдаѧ мт҃и, ты́ бо вели́каѧ застꙋ́пница ро́да хрⷭ҇тїа́нскагѡ и҆ на́ша пребл҃га́ѧ и҆ ско́раѧ помо́щница.
Катава́сїа: Ѻ҆́троки бл҃гочєсти́выѧ въ пещѝ:
Пѣ́снь ѳ҃.
І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бг҃оро́дице, чⷭ҇таѧ приснодв҃о.
Бг҃ъ, ѿ тебє̀ воплоти́выйсѧ и҆ къ на́мъ прише́дый, содѣ́ла чре́во твоѐ нб҃съ простра́ннѣйше. ди́вное чꙋ́до: невмѣсти́мый во ᲂу҆тро́бꙋ дв҃ы вмѣща́етсѧ, да сїю̀ пое́мъ во всѧ̑ вѣ́ки.
Неизрече́ннѡ въ послѣ̑днѧѧ лѣ̑та ѿ тебє̀ заче́ншагосѧ молѝ, бг҃оро́дице дв҃о, всѧ̑ на́шѧ печа̑ли на ра́дость преложи́ти и҆ свѣ́та невече́рнѧгѡ на́съ сподо́бити, да сїю̀ пое́мъ во всѧ̑ вѣ́ки.
Ты̀ є҆сѝ прⷭ҇то́лъ сла́вы бж҃їѧ, і҆езекі́илемъ та́йнѡ ᲂу҆зрѣ́нный, ꙗ҆́кѡ сн҃а бж҃їѧ, ѻ҆ц҃ꙋ̀ и҆ дх҃ꙋ сопрⷭ҇то́льна. во твою̀ пречⷭ҇тꙋю ᲂу҆тро́бꙋ воспрїѧ́ла є҆сѝ и҆ твои́ма мт҃рнима рꙋка́ма носи́ла є҆сѝ.
Ра́дꙋйсѧ, хра́ме ѡ҆дꙋшевле́нный. въ не́мже бг҃а пло́тїю ѡ҆бита̀. ра́дꙋйсѧ, кївѡ́те, сла́вою сн҃а бж҃їѧ прїѡсѣне́нный. ра́дꙋйсѧ, всебл҃же́ннаѧ, бг҃оро́дице чⷭ҇таѧ, приснодв҃о.
И҆́нъ.
І҆рмо́съ: Невмѣсти́маго бг҃а во чре́вѣ вмѣсти́вшаѧ и҆ ра́дость всемꙋ̀ мі́рꙋ роди́вшаѧ, тѧ̀ пое́мъ, бг҃оро́дице дв҃о.
Па́стырѧ до́браго, взыска́вшаго ѻ҆́вцꙋ заблꙋ́ждшꙋю, мі́рꙋ дарова́ла є҆сѝ, съ ни́мже ны́нѣ соца́рствꙋющи, приведѝ къ немꙋ̀ и҆ всѧ̑ заблꙋ̑ждшаѧ ѻ҆вча́та.
А҆́гнца, взе́млющаго грѣхѝ всегѡ̀ мі́ра, ꙗ҆вѝ тобо́ю ѻ҆ц҃ъ, превосходѧ́й всѧ́къ ᲂу҆́мъ любо́вїю къ па́дшымъ во а҆да́мѣ, пред̾ ни́мъ не преста́й молѧ́сѧ кро́вїю сн҃а є҆гѡ̀ на́мъ ѡ҆свѧти́тисѧ и҆ ѡ҆чи́ститисѧ.
Со ѻ҆ц҃е́мъ спрославлѧ́емый, съ дх҃омъ сосла́вимый, сн҃е бж҃їй, моли́твами ро́ждшїѧ тѧ̀ не ѡ҆ста́ви на́съ, погиба́ющихъ.
И҆́же ѿ тебє̀ воплоти́выйсѧ и҆ вочеловѣ́чивыйсѧ поста́ви тѧ̀ превы́шѣ всѧ́кагѡ а҆́гг҃льскагѡ чинонача́лїѧ, и҆дѣ́же предстоѧ̀, возведѝ и҆ на́съ къ нбⷭ҇нымъ высо́тамъ, грѣха̀ всѧ́кагѡ и҆з̾има́ющи.
Катава́сїа: Всѧ́къ земноро́дный:
Свѣти́ленъ: Подо́бенъ: Пло́тїю ᲂу҆снꙋ́въ:
Посѣти́лъ ны̀ є҆́сть восто́къ съ высоты̀ и҆ дарова̀ на́мъ, ꙗ҆́кѡ пресвѣ́тлꙋю зарю̀, тебѐ, бг҃оро́дице, въ ско́рбныхъ ѡ҆бстоѧ́нїихъ неча́ѧннꙋю ра́дость на́мъ подаю́щꙋю, грѣ́шныхъ хода́таицꙋ.
Сла́ва, и҆ ны́нѣ, то́йже.
На хвали́техъ стїхи̑ры, на д҃, гла́съ д҃:
Нб҃о и҆ землѧ̀ да ликовствꙋ́ютъ: се́ бо мт҃рь пред̾ сн҃омъ предстои́тъ, проще́нїѧ грѣхѡ́въ человѣ́кꙋ нѣ́коемꙋ беззако́ннꙋ ᲂу҆се́рднѡ просѧ́щи. ѡ҆ се́мъ а҆́гг҃ли ра́дꙋютсѧ, съ ни́миже и҆ мы̀ дꙋхо́внѣ да возвесели́мсѧ, бг҃оро́дицꙋ пѣ́сньми велича́юще.
Воспои́мъ, лю́дїе, свѣ́тлѡ даві́дскꙋю пѣ́снь ѻ҆трокови́цѣ, невѣ́стѣ бж҃їей, мт҃ри всѣ́хъ цр҃ѧ̀ хрⷭ҇та̀: предста̀ цр҃ца ѡ҆деснꙋ́ю тебє̀, влⷣко, рѧ̑сны златы́ми ѡ҆дѣ́ѧна и҆ преꙋкра́шена бжⷭ҇твенными лѣ́потами. сїю́ бо, и҆збра́ннꙋю въ жена́хъ, па́че всегѡ̀ мі́ра ᲂу҆добри́въ, бл҃гоизво́ли роди́тисѧ ѿ неѧ̀ вели́кїѧ ра́ди ми́лости и҆ сїю̀ помо́щницꙋ лю́демъ свои̑мъ дарова̀ покрыва́ти рабы̀ своѧ̑, є҆ди́нꙋ бл҃гослове́ннꙋю.
Сла́ва, и҆ ны́нѣ, гла́съ ѕ҃.
Сра́дꙋютсѧ съ на́ми ᲂу҆́мнаѧ всѧ̑ чинѡнача́лїѧ, ви́дѧще цр҃цꙋ и҆ влⷣчцꙋ всѣ́хъ, многоиме́ннѣ вѣ́рными сла́вимꙋ: ра́дꙋютсѧ же и҆ дꙋ́си пра́ведныхъ, зрѧ́щїи бг҃ома́терь, за грѣ̑шныѧ лю́ди всечестні́и своѝ рꙋцѣ̀ къ сн҃ꙋ простира́ющꙋю и҆ просѧ́щꙋю и҆̀мъ ѡ҆ставле́нїѧ грѣхѡ́въ, и҆ ми́ра, и҆ ве́лїѧ ми́лости.
Славосло́вїе вели́кое, є҆ктєнїѝ и҆ ѿпꙋ́стъ.
Моли́тва.
Ѽ прест҃а́ѧ дв҃о, всебл҃га́гѡ сн҃а мт҃и всебл҃га́ѧ, гра́да москвы̀ покрови́тельнице, всѣ́хъ сꙋ́щихъ во грѣсѣ́хъ, ско́рбехъ, бѣда́хъ и҆ болѣ́знехъ вѣ́рнаѧ предста́тельнице и҆ застꙋ́пнице! прїимѝ моле́бное пѣ́нїе сїѐ ѿ на́съ, недосто́йныхъ ра̑бъ твои́хъ, тебѣ̀ возноси́мое, и҆ ꙗ҆́коже дре́вле грѣ́шника, на всѧ́къ де́нь мно́гажды пред̾ чⷭ҇тно́ю і҆кѡ́ною твое́ю моли́вшагосѧ, не презрѣ́ла є҆сѝ. но дарова́ла є҆сѝ є҆мꙋ̀ неча́ѧннꙋю ра́дость покаѧ́нїѧ и҆ преклони́ла є҆сѝ сн҃а твоего̀ мно́гимъ и҆ ᲂу҆се́рднымъ къ немꙋ̀ хода́тайствомъ ко проще́нїю сегѡ̀ грѣ́шнагѡ и҆ заблꙋ́ждшагѡсѧ, та́кѡ и҆ ны́нѣ не пре́зри моле́нїѧ на́съ, недосто́йныхъ рабѡ́въ твои́хъ, и҆ ᲂу҆молѝ сн҃а твоего̀ и҆ бг҃а на́шего, да и҆ всѣ̑мъ на́мъ, съ вѣ́рою и҆ ᲂу҆миле́нїемъ покланѧ́ющымсѧ пред̾ цѣльбоно́снымъ ѻ҆́бразомъ твои́мъ, да́рꙋетъ неча́ѧннꙋю по коего́ждо потре́бѣ ра́дость: грѣ́шникѡмъ, погрѧ́зшымъ во глꙋбинѣ̀ ѕѡ́лъ и҆ страсте́й, вседѣ́йственное вразꙋмле́нїе, покаѧ́нїе и҆ сп҃се́нїе: сꙋ́щымъ въ ско́рбехъ и҆ печа́лехъ ᲂу҆тѣше́нїе: ѡ҆брѣта́ющымсѧ въ бѣда́хъ и҆ ѡ҆ѕлобле́нїихъ соверше́нное си́хъ и҆збытїѐ: малодꙋ̑шнымъ и҆ ненадѣ̑жднымъ наде́ждꙋ и҆ терпѣ́нїе: въ ра́дости и҆ и҆з̾ѻби́лїи живꙋ́щымъ непреста́нное благодѣ́телю благодаре́нїе: бѣ́дствꙋющымъ милосе́рдїе: сꙋ́щымъ въ болѣ́зни и҆ долгонедꙋ́жїи и҆ ѡ҆ста́влєннымъ врача́ми неча́емое и҆сцѣле́нїе и҆ ᲂу҆крѣпле́нїе: и҆жди́вшымъ ѿ недꙋ́га ᲂу҆́мъ ᲂу҆ма̀ возвраще́нїе и҆ ѡ҆бновле́нїе: ѿходѧ́щымъ въ вѣ́чнꙋю и҆ несконча́емꙋю жи́знь па́мѧть сме́ртнꙋю, ᲂу҆миле́нїе и҆ сокрꙋше́нїе ѡ҆ грѣсѣ́хъ, дꙋ́хъ бо́дръ и҆ тве́рдꙋю на милосе́рдїе сꙋдїѝ наде́ждꙋ. ѽ гпⷭ҇жѐ прест҃а́ѧ! ᲂу҆милосе́рдисѧ ко всѣ̑мъ, чтꙋ́щымъ всечестно́е и҆́мѧ твоѐ, и҆ всѣ̑мъ ꙗ҆вѝ всемо́щный покро́въ тво́й и҆ застꙋпле́нїе: во благоче́стїи, чистотѣ̀ и҆ честнѣ́мъ жи́тельствѣ пребыва́ющыѧ до послѣ́днѧгѡ и҆́хъ сконча́нїѧ во бла́гости соблюдѝ: ѕлы̑ѧ бла́ги сотворѝ: заблꙋ́ждшыѧ на пꙋ́ть пра́вый наста́ви: всѧ́комꙋ дѣ́лꙋ благо́мꙋ и҆ сн҃ꙋ твоемꙋ̀ ᲂу҆го́дномꙋ споспѣ́шествꙋй: всѧ́кое дѣ́ло ѕло́е и҆ бг҃опроти́вное разрꙋшѝ: въ недоꙋмѣ́нїи и҆ трꙋ́дныхъ и҆ ѻ҆па́сныхъ ѡ҆бстоѧ́нїихъ ѡ҆брѣта́ющымсѧ незри́мꙋю по́мощь и҆ вразꙋмле́нїе съ нб҃сѐ низпослѝ: ѿ и҆скꙋше́нїй, собла́знѡвъ и҆ поги́бели сп҃сѝ: ѿ всѣ́хъ ѕлы́хъ человѣ́къ и҆ ѿ врагѡ́въ ви́димыхъ и҆ неви́димыхъ защитѝ и҆ сохранѝ: пла́вающымъ спла́вай: пꙋтеше́ствꙋющымъ спꙋтеше́ствꙋй: сꙋ́щымъ въ нꙋ́ждѣ и҆ гла́дѣ бꙋ́ди пита́тельница: неимꙋ́щымъ кро́ва и҆ приста́нища бꙋ́ди покро́въ и҆ прибѣ́жище: наги̑мъ пода́ждь ѡ҆дѣѧ́нїе: ѡ҆би̑димымъ и҆ непра́вѣднѡ гони̑мымъ застꙋпле́нїе: клеветꙋ̀, поноше́нїе и҆ хꙋле́нїе терпѧ́щыѧ незри́мѡ ѡ҆правда́й: клеветникѝ и҆ хꙋли́тели пред̾ всѣ́ми ѡ҆бличѝ: ѡ҆жесточе́ннѡ враждꙋ́ющымъ неча́емое пода́ждь примире́нїе, и҆ всѣ̑мъ на́мъ дрꙋ́гъ ко дрꙋ́гꙋ любо́вь, ми́ръ и҆ бл҃гоче́стїе и҆ здра́вїе съ долгоде́нствїемъ. сꙋпрꙋ̑жества въ любвѝ и҆ є҆диномы́слїи сохранѝ: сꙋпрꙋ́ги, во враждѣ̀ и҆ раздѣле́нїи сꙋ́щыѧ, ᲂу҆мирѝ, соединѝ ѧ҆̀ дрꙋ́гъ ко дрꙋ́гꙋ и҆ положѝ и҆́мъ сою́зъ любвѐ неразрꙋши́мый: ма́теремъ, дѣ́ти родѧ́щымъ, ско́рое пода́ждь разрѣше́нїе: младе́нцы воспита́й: ю҆́ныѧ ᲂу҆цѣломꙋ́дри, ѿве́рзи и҆̀мъ ᲂу҆́мъ къ воспрїѧ́тїю всѧ́кагѡ поле́знагѡ ᲂу҆че́нїѧ, стра́хꙋ бж҃їю, воздержа́нїю и҆ трꙋдолю́бїю наста́ви: ѿ дома́шнїѧ бра́ни и҆ вражды̀ є҆динокро́вныхъ ми́ромъ и҆ любо́вїю ѡ҆градѝ. безма́тернихъ сиро́тъ бꙋ́ди мт҃рь, ѿ всѧ́кагѡ поро́ка и҆ скве́рны ѿвратѝ ѧ҆̀ и҆ всемꙋ̀ благо́мꙋ и҆ бг҃оꙋго́дномꙋ наꙋчѝ, прельщє́нныѧ же и҆ во грѣ́хъ и҆ нечистотꙋ̀ па́дшыѧ, скве́рнꙋ грѣха̀ ѿѧ́вши, и҆з̾ бе́здны поги́бели и҆зведѝ. вдѡ́въ бꙋ́ди ᲂу҆тѣ́шительница и҆ помо́щница, ста́рости бꙋ́ди же́злъ, ѿ внеза́пныѧ сме́рти без̾ покаѧ́нїѧ всѣ́хъ на́съ и҆зба́ви, и҆ всѣ̑мъ на́мъ хрⷭ҇тїа́нскꙋю кончи́нꙋ живота̀ на́шегѡ, безболѣ́зненнꙋ, непосты́днꙋ, ми́рнꙋ и҆ до́брый ѿвѣ́тъ на стра́шнѣмъ сꙋди́щи хрⷭ҇то́вѣ да́рꙋй. Преста́вльшыѧсѧ въ вѣ́рѣ и҆ покаѧ́нїи ѿ житїѧ̀ сегѡ̀ со а҆́гг҃лы и҆ всѣ́ми ст҃ы́ми жи́ти сотворѝ, сконча́вшымсѧ внеза́пною сме́ртїю ми́лостива бы́ти сп҃а твоегѡ̀ ᲂу҆молѝ, и҆ ѡ҆ всѣ́хъ ᲂу҆со́пшихъ, и҆̀же не и҆́мꙋтъ сро́дникѡвъ, ѡ҆ ᲂу҆покое́нїи и҆́хъ сн҃а твоего̀ ᲂу҆молѧ́ющихъ, сама̀ бꙋ́ди непреста́ннаѧ и҆ те́плаѧ мл҃твенница и҆ хода́таица, да всѝ на нб҃сѝ и҆ на землѝ вѣ́дѧтъ тѧ̀, ꙗ҆́кѡ тве́рдꙋю и҆ непосты́днꙋю предста́тельницꙋ ро́да хрⷭ҇тїа́нскагѡ, и҆, вѣ́дꙋще, сла́вѧтъ тѧ̀ и҆ тобо́ю сн҃а твоего̀, со безнача́льнымъ є҆гѡ̀ ѻ҆ц҃е́мъ и҆ є҆диносꙋ́щнымъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.