← претходни дан | Минеј — Децембар | следећи дан →
8 декабря: Преподобного Патапия.
Мѣ́сѧца тогѡ́же въ и҃-й де́нь.
Прпⷣбнагѡ ѻ҆ц҃а̀ на́шегѡ пата́пїа.
А҆́ще и҆зво́литъ настоѧ́тель, а҆ллилꙋ́їа, и҆лѝ тропа́рь, да пое́тъ по ᲂу҆ста́вꙋ.
На Гдⷭ҇и, воззва́хъ, стїхи̑ры, гла́съ а҃: Поⷣ: Всехва́льнїи мч҃ницы:
Ѻ҆́ч҃е пата́пїе, ꙳ пло́ти стремлє́нїѧ ꙳ воздержа́нїемъ ᲂу҆вѧди́въ разжже́нїе, ꙳ въ пꙋсты́ню всели́лсѧ є҆сѝ, ꙳ ꙗ҆́кѡ и҆лїа̀ дре́вле, ꙳ ᲂу҆́мъ ѡ҆чища́ѧ непреста́нными къ бг҃ꙋ моли́твами. ꙳ и҆ ны́нѣ молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Ѻ҆́ч҃е пата́пїе, ꙳ ликѡ́мъ по́стничєскимъ причи́слилсѧ є҆сѝ, ꙳ безстра́стїемъ ᲂу҆краша́ѧсѧ, ꙳ и҆ всели́лсѧ є҆сѝ во ѻ҆би́телехъ прпⷣбныхъ, ꙳ и҆дѣ́же свѣ́тъ незаходи́мый, ꙳ и҆дѣ́же є҆́сть дре́во жи́зни. и҆ ны́нѣ молѝ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Ѻ҆́ч҃е пата́пїе, ꙳ свѣти́льникъ и҆зъ є҆гѵ́пта возсїѧ́лъ є҆сѝ, ꙳ просвѣща́ѧ подсо́лнечнꙋю ꙳ чꙋде́съ свѣ́тлостьми, ꙳ дꙋшетлѣ́нныхъ недꙋ̑гъ ѿгонѧ́ѧ мра́къ, ꙳ де́мѡнѡвъ ѡ҆хꙋжда́ѧ тмꙋ̀. и҆ ны́нѣ молѝ хрⷭ҇та̀, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
И҆́ны стїхи̑ры прест҃ѣ́й бцⷣѣ, гла́съ и҆ подо́бенъ то́йже.
Нетлѣ́ннѡ родила̀ є҆сѝ бг҃а, ꙳ тлю̀ потре́бльшаго, ꙳ и҆ нетлѣ́нїе и҆сточи́вшаго, ꙳ нетлѣ́ннаѧ непоро́чнаѧ. тѣ́мже молю̀ тѧ̀: ꙳ лю́тыми и҆стлѣ́вшаго мѧ̀ ꙳ моли́твами твои́ми, чⷭ҇таѧ, ѡ҆бновѝ, да сла́влю тѧ̀, ꙳ да любо́вїю велича́ю тѧ̀, ꙳ ро́дъ на́шъ возвели́чившꙋю.
Всепѣ́таѧ влⷣчце, ꙳ наде́жде вѣ́рныхъ и҆ ᲂу҆твержде́нїе, прибѣ́жище и҆ по́мощь, ꙳ тѧ̀ мо́лимъ: ѿ всѧ́кихъ бѣ́дъ рабы̑ твоѧ̑ сохранѝ, ꙳ вѣ́рою покланѧ́ющыѧсѧ ржⷭ҇твꙋ̀ твоемꙋ̀. ꙳ хрⷭ҇тꙋ̀ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Оу҆вы̀ мнѣ̀, что̀ бꙋ́дꙋ, ꙳ ᲂу҆́мъ и҆ дꙋ́шꙋ и҆ тѣ́ло ѡ҆скверни́въ прегрѣше́ньми; ꙳ что̀ сотворю̀; ка́кѡ же и҆збѣ́гнꙋ ꙳ пла́мене неꙋгаси́магѡ, ꙳ и҆ нерѣши́мыхъ ᲂу҆́зъ вѣ́чныхъ; ꙳ но, ѽ всенепоро́чнаѧ, ꙳ пре́жде конца̀ ᲂу҆молѝ сн҃а твоего̀, ꙳ пода́ти мѝ ѡ҆ставле́нїе.
Сла́ва, и҆ ны́нѣ, бг҃оро́диченъ. Подо́бенъ: то́йже:
Ѻ҆́гнь бжⷭ҇тва̀, ꙳ хрⷭ҇та̀ во ᲂу҆тро́бѣ носи́ла є҆сѝ, ꙳ є҆го́же ны́нѣ молѝ, ꙳ всечⷭ҇таѧ, ꙳ ᲂу҆добопали́мꙋю ве́щь ꙳ страсте́й мои́хъ ᲂу҆гаси́ти всю̀, ꙳ и҆ и҆зба́вити мѧ̀ ѻ҆гнѧ̀ вѣ́чнꙋющагѡ, ꙳ и҆ свѣ́тлости пра́ведныхъ сподо́бити мѧ̀, ꙳ є҆гда̀ прїи́детъ сꙋди́ти всѧ́чєскаѧ.
Крⷭ҇тобг҃оро́диченъ:
Своего̀ а҆́гнца ꙳ а҆́гница и҆ непоро́чнаѧ влⷣчца ꙳ на крⷭ҇тѣ̀ ꙗ҆́кѡ ви́дѣ, ꙳ зра́ка не и҆мꙋ́ща, нижѐ добро́ты, ꙳ ᲂу҆вы̀ мнѣ̀, рыда́ющи, глаго́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ бл҃голѣ́пїе; ꙳ гдѣ̀ бл҃года́ть блиста́ющаѧ ѻ҆́браза твоегѡ̀, ꙳ сн҃е мо́й вселюбе́знѣйшїй;
На стїхо́внѣ ѻ҆ктѡ́иха. Тропа́рь, гла́съ и҃:
Въ тебѣ̀, ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбне пата́пїе, дх҃ъ тво́й.
Сла́ва, и҆ ны́нѣ, бг҃оро́диченъ.
На ᲂу҆́трени ѻ҆́ба канѡ́на ѻ҆ктѡ́иха: и҆ прпⷣбнагѡ, на д҃.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.
Свѣ́тлагѡ твоегѡ̀ житїѧ̀, свѣ̑тлаѧ хотѧ́щꙋ и҆справлє́нїѧ похвали́ти, молю́сѧ тебѣ̀, прпⷣбне, лꙋчꙋ̀ богатода́тнꙋ съ нб҃се́ ми дарова́ти, гдⷭ҇ꙋ, помоли́сѧ, ѻ҆́блакъ ѿгонѧ́щꙋ невѣ́дѣнїѧ моегѡ̀, пата́пїе.
Є҆гѵ́птѧны пе́рвѣе глꙋбино́ю покры́вый бжⷭ҇твеннымъ манове́нїемъ, ꙗ҆́кѡ и҆зъ глꙋбины̀ мїрска́гѡ смѣше́нїѧ тѧ̀ воспрїи́мъ, просвѣтѝ бжⷭ҇твенными ѡ҆сїѧ̑нїи, и҆ всесвѣ́тлꙋ тѧ̀ показа̀ ѕвѣздꙋ̀, ѻ҆́ч҃е прпⷣбне.
Разже́гсѧ, ꙗ҆́кѡ ᲂу҆́гль мы́сленный, теплото́ю дх҃а, мра́зъ де́мѡнскїй ты̀ растопи́лъ є҆сѝ: разжжє́нныѧ же стрѣ́лы грѣхѡ́вныѧ ᲂу҆гаси́лъ є҆сѝ, прпⷣбне, и҆ къ безстра́стїѧ высотѣ̀ возве́лсѧ є҆сѝ чистѣ́йшъ.
Бг҃оро́диченъ:
Дре́внїѧ и҆збавле́нїе клѧ́твы мі́рꙋ подава́ѧ и҆зба́витель, и҆зъ тебє̀, дв҃о, ражда́етсѧ, чл҃вѣ́къ бы́въ, и҆́же прпⷣбнаго пата́пїа показа̀ и҆сто́чникъ и҆сцѣле́нїй всѣ̑мъ, вѣ́рою къ немꙋ̀ прири́щꙋщымъ.
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь прише́ствїемъ твои́мъ, въ не́йже ᲂу҆тверди́сѧ моѐ се́рдце.
Сле́зъ тече́ньми напои́въ и҆зрѧ́днѡ дꙋше́внꙋю твою̀ браздꙋ̀, пшени́цꙋ бжⷭ҇твеннꙋю прине́слъ є҆сѝ дѣѧ́нїй, въ жи́тницахъ вы́шнихъ соблюда́емꙋ.
Любо́вїю воѡрꙋжа́емь, ꙗ҆́коже мече́мъ, прпⷣбне, и҆ щито́мъ покрыва́емь, бжⷭ҇твеннымъ твои́мъ смире́нїемъ де́мѡнѡвъ полкѝ потреби́лъ є҆сѝ.
Воздержа́нїѧ цвѣ́томъ, ꙗ҆́коже крі́нъ, процвѣ́лъ є҆сѝ, благово́нствꙋѧ, прпⷣбне, сердца̀ воспѣва́ющихъ тѧ̀, и҆ соверша́ющихъ вѣ́рою па́мѧть твою̀.
Бг҃оро́диченъ:
На ѡ҆б̾ѧ́тїихъ носи́мь ро́ждшїѧ тѧ̀, гдⷭ҇и, є҆гѵ́петскїѧ і҆́дѡлы си́лою твое́ю сокрꙋши́лъ є҆сѝ, и҆зъ негѡ́же мно́жество прпⷣбныхъ прозѧбѐ.
Сѣда́ленъ, гла́съ и҃. Подо́бенъ: Премꙋ́дрости:
Воздержа́нїѧ пѡ́ты по́стническими ᲂу҆гаси́лъ є҆сѝ пла́мень страсте́й, всѣ̑мъ и҆сточи́въ чꙋде́съ пꙋчи́нꙋ, и҆ въ не́й, ꙗ҆́коже вторы́й мѡѷсе́й, потопи́лъ є҆сѝ лє́стнаѧ стремлє́нїѧ де́мѡнѡвъ полкѝ. тѣ́мже, соше́дшесѧ, по до́лгꙋ почита́емъ всечестнꙋ́ю па́мѧть твою̀ моле́бнꙋю, прпⷣбне бг҃оно́се пата́пїе: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ми́лостиваго сло́ва и҆ милосе́рдаго ꙗ҆́кѡ ро́ждшаѧ, влⷣчце всѣ́хъ, поми́лꙋй всѧ̑, къ тебѣ̀ прибѣга́ющыѧ, и҆ напа́стей и҆ болѣ́зней, и҆ всѧ́кагѡ ѡ҆ѕлобле́нїѧ, и҆ вѣ́чнꙋющагѡ пла́мене свободѝ: ꙗ҆́кѡ да благода́рственнѡ мно́гихъ щедро́тъ твои́хъ бога́тство просла́вимъ, и҆ безмѣ́рнꙋю ми́лость, и҆ вопїе́мъ тѝ всегда̀: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти покланѧ́ющымсѧ вѣ́рою ржⷭ҇твꙋ̀ твоемꙋ̀.
Крⷭ҇тобг҃оро́диченъ:
Дв҃а и҆ мт҃и и҆зба́вителѧ крⷭ҇тꙋ̀ предстоѧ́щи, болѣ́зненнѡ со слеза́ми рыда́ющи, мт҃рски вопїѧ́ше: что̀ стра́нное сїѐ и҆ пресла́вное, сн҃е, и҆сточа́ѧй всѣ̑мъ человѣ́кѡмъ безстра́стїе посредѣ̀ ѡ҆сꙋждє́ною на крⷭ҇тѣ̀ распѧ́тсѧ, въ рє́бра пробода́емь и҆ же́лчїю напоѧ́емь ѿ рꙋ́къ, ꙗ҆̀же созда̀; но воста́ни, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєннаѧ твоѧ̑ страда̑нїѧ.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Бе́здна те́плыхъ твои́хъ сле́зъ потопѝ де́мѡнскаѧ вѡ́инства и҆ грѣхѡ́вныѧ вѡ́лны: пꙋчи́на же чꙋде́съ сꙋ́щымъ во глꙋбинѣ̀ страсте́й показа́сѧ.
Смире́нїе, бдѣ́нїе, и҆ спротѧже́ннꙋю моли́твꙋ, и҆ любо́вь нелицемѣ́рнꙋ, и҆ вѣ́рꙋ и҆ наде́ждꙋ стѧжа́въ, бы́лъ є҆сѝ собесѣ́дникъ нбⷭ҇нымъ а҆́гг҃лѡмъ, ѻ҆́ч҃е прпⷣбне.
Оу҆спи́лъ є҆сѝ страсте́й многоѻбра́зныхъ волнє́нїѧ бж҃е́ственными восхождє́нїи и҆ непреста́нными ѡ҆чищє́нїи. тѣ́мже къ невече́рнемꙋ сїѧ́нїю по ᲂу҆спе́нїи ѿше́лъ є҆сѝ.
Бг҃оро́диченъ:
Возсїѧ́лъ є҆сѝ и҆зъ дв҃ы, ꙗ҆́кѡ и҆зъ ѻ҆́блака со́лнце, ѕвѣ́зды ѡ҆зарѧ́ющыѧ показа́въ прпⷣбныѧ твоѧ̑, мі́рꙋ и҆ страсте́мъ распе́ншихсѧ, ще́дре, си́лою твое́ю.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо, ра́звѣ тебє̀, бо́га не зна́ю.
Просвѣще́нїе во тмѣ̀ лежа́щихъ, возсїѧ́й мѝ зарю̀ бжⷭ҇твенными прпⷣбнагѡ твоегѡ̀ моли́твами, разорѝ ѻ҆́блаки ѻ҆каѧ́нныѧ дꙋшѝ моеѧ̀, ѡ҆дожди́ ми стрꙋю̀ ѡ҆ставле́нїѧ: и҆но́гѡ бо, ра́звѣ тебє̀ бо́га не вѣ́мъ.
Сквє́рны страсте́й ѡ҆чи́стивъ ѻ҆́ко мы́сленное, ѻ҆́ч҃е бг҃оно́се, воздержа́нїемъ: бжⷭ҇твенною же моли́твою ты̀ ѿве́рзлъ є҆сѝ зѣ̑ницы ѡ҆слѣплє́нныѧ, и҆ разори́лъ є҆сѝ сїѧ́нїемъ и҆сцѣле́нїй лю́тыхъ ѡ҆мраче́нїе.
Здра́вїе дꙋше́вное, здра́вїе тѣле́сное, всѝ незави́стнꙋю бл҃года́ть прїиди́те, почерпе́мъ: ꙗ҆́кѡ ѿ и҆сто́чника бжⷭ҇твенныѧ ра́ки мꙋ́драгѡ пата́пїа: чꙋдеса́ бо и҆сточа́етъ, ꙗ҆́кѡ во́ды, вѣ́рою несомнѣ́нною къ немꙋ̀ притека́ющымъ.
Бг҃оро́диченъ:
Да́телѧ жи́зни всѧ́ческихъ содержа́щаго родила̀ є҆сѝ неизрече́ннымъ ржⷭ҇тво́мъ, во ст҃ы́хъ сла́вимаго, ѻ҆трокови́це, и҆ на прпⷣбныхъ почива́ющаго, є҆го́же ѡ҆ на́съ молѝ, бг҃оневѣ́сто.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Свѣтлѣ́йшими ᲂу҆́мъ просвѣща́ѧй, ѻ҆́ч҃е, восхождє́нїи, ꙗ҆́коже безпло́тенъ съ пло́тїю по́жилъ є҆сѝ не ᲂу҆мокри́всѧ грѣхмѝ, пата́пїе.
И҆лїю̀ ѳесві́тѧнина подража́ѧ, и҆ послѣ́дꙋѧ і҆ѡа́ннꙋ прⷣте́чи, въ пꙋсты́ню пе́рвѣе всели́лсѧ є҆сѝ, безмо́лвїемъ ᲂу҆́мъ ѡ҆чи́стивъ.
И҆зъ є҆гѵ́пта свѣти́льникъ бг҃оза́рнѣйшїй, въ кѡнстанті́новѣ гра́дѣ сїѧ́нїемъ и҆сцѣле́нїй просвѣща́емь ѡ҆блиста́лъ є҆сѝ, свѣтлѣ́йшїй ѻ҆́ч҃е пата́пїе.
Бг҃оро́диченъ:
На ѻ҆́блацѣ ле́гцѣ сѣдѧ́й, дре́вле во є҆гѵ́петъ хрⷭ҇то́съ прїи́де, и҆ низложи́въ і҆́дѡлы, и҆ прпⷣбныхъ ли́ки собра̀.
Конда́къ гла́съ г҃. Подо́бенъ: Дв҃а дне́сь:
Хра́мъ тво́й, ст҃е, дꙋхо́вное врачевство̀ лю́дїе ѡ҆брѣ́тше, со тща́нїемъ къ немꙋ̀ приходѧ́ще, цѣльбꙋ̀ недꙋ́гѡвъ про́сѧтъ прїѧ́ти, рѣше́нїе же въ житїѝ прегрѣше́нныхъ: ты́ бо всѣ́хъ сꙋ́щихъ въ нꙋ́ждахъ предста́тель ꙗ҆ви́лсѧ є҆сѝ, пата́пїе преподо́бне.
Пѣ́снь з҃. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Ѻ҆гне́мъ мы́сленнымъ разже́глъ є҆сѝ дꙋшє́внаѧ чꙋ̑вствїѧ, ѻ҆́гнь грѣхо́вный и҆спепели́лъ є҆сѝ содѣ́йствомъ дх҃а, и҆ свѣтови́дѣнъ ꙗ҆ви́лсѧ є҆сѝ, воспѣва́ѧ, пата́пїе: бл҃гослове́нъ є҆сѝ, бж҃е ѻ҆тє́цъ на́шихъ.
Слѣпы̑ѧ воѡчи́вый содѣ́йствомъ бжⷭ҇твеннымъ, бг҃облаже́нне, стра̑сти разли̑чныѧ и҆сцѣли́лъ є҆сѝ, и҆ бжⷭ҇твенными призыва̑нїи полкѝ лꙋка̑выѧ де́мѡнѡвъ ѿгна́лъ є҆сѝ, воспѣва́ѧ: бл҃гослове́нъ є҆сѝ, бж҃е ѻ҆тє́цъ на́шихъ.
Чꙋде́съ глꙋбина̀, врачева́нїй рѣка̀, и҆сто́чникъ непреста́ненъ, стрꙋѧ̀, ника́коже ѡ҆скꙋдѣ́ема, тво́й гро́бъ показа́сѧ, ѻ҆́ч҃е, вѣ́рнѡ пристꙋпа́ющымъ и҆ те́плѣ взыва́ющымъ: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Ѡ҆божа́етъ мѧ̀ и҆зъ тебє̀, дв҃о, пребжⷭ҇твенный бг҃ъ, ра́бїй зра́къ прїе́мъ, ѡ҆бновлѧ́етъ же стєзѝ зна́нїѧ, ꙗ҆́коже предѣ́лы є҆стества̀, мно́жество мона́хѡвъ и҆ преподо́бныхъ приве́дъ пою́щихъ: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ѡ҆чи́стивъ тѧ̀ сама́го ѿ ти́ны страсте́й попече́нїемъ, свѣтлѣ́йше ꙗ҆ви́лсѧ є҆сѝ, ѻ҆́ч҃е, прїѧ́телище бж҃їе, взыва́ѧ: по́йте гдⷭ҇а, и҆ превозноси́те во всѧ̑ вѣ́ки.
Оу҆стро́ивъ твою̀ жи́знь бг҃олѣ́пнѡ, прпⷣбне ѻ҆́ч҃е, строи́тель показа́лсѧ є҆сѝ, слꙋжи́въ до́брѣ потре́бамъ ст҃ы́хъ, прпⷣбне, съ ни́миже сподо́билсѧ є҆сѝ вы́шнѧгѡ наслѣ́дїѧ.
Ко гдⷭ҇ꙋ моли́твами ѡ҆чи́сти ны̀ ѿ всѧ́кїѧ скве́рны, те́плою твое́ю моли́твою ѿ треволне́нїѧ страсте́й и҆ болѣ́зней и҆ скорбе́й и҆зба́ви, тѧ̀ досто́йнѡ, пата́пїе, чтꙋ́щыѧ.
Бг҃оро́диченъ:
Ꙗ҆́же ѡ҆небеси́вшаѧ на́ше земно́е и҆ тлѣ́нное, чⷭ҇таѧ, сꙋщество̀, а҆́гг҃лѡвъ сла́ва и҆ прпⷣбныхъ ра́дость, є҆ди́на тва́рей влⷣчца, ꙗ҆́кѡ бг҃а ро́ждшаѧ, да пое́тсѧ во вѣ́ки.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Де́нь спаси́тельный па́мѧть твоѧ̀ возсїѧ̀, сꙋ̑щаѧ во тмѣ̀ сердца̀ просвѣща́ющїй, и҆ страсте́й мглꙋ̀ рѣша́щїй, сы́ны свѣ́та показꙋ́ѧй, ѻ҆́ч҃е, ны́нѣ чтꙋ́щыѧ тѧ̀ гдⷭ҇нѧ ᲂу҆го́дника.
Ѳиве́анѡвъ прозѧбе́нїе, пꙋсты́ни хвале́нїе, мона́шествꙋющихъ сла́вꙋ и҆ благолѣ́пїе, вѷзанті́йскаго свѣти́льника, на землѝ а҆́гг҃ла ꙗ҆́вльшасѧ, пата́пїа всѝ досто́йнѡ ᲂу҆блажи́мъ.
А҆́гг҃лѡвъ собесѣ́дникъ, прпⷣбныхъ равностоѧ́тель, прⷪ҇ро́кѡвъ и҆ а҆пⷭ҇лѡвъ, мꙋ́ченикѡвъ, і҆ера́рхѡвъ, прпⷣбне, соприча́стникъ бы́въ, и҆ чⷭ҇тнѣ́й трⷪ҇цѣ слꙋжѧ̀ ᲂу҆ма̀ чистото́ю, ѡ҆ всѣ́хъ на́съ моли́сѧ.
Бг҃оро́диченъ:
Вели́кое та́инство, є҆́же па́че ᲂу҆ма̀ ржⷭ҇тва̀ твоегѡ̀, ᲂу҆жаса́етъ а҆́гг҃лы, бг҃ора́дованнаѧ, ᲂу҆слажда́етъ прпⷣбныхъ собо́ры, чи́стаѧ свѧщє́нныѧ весели́тъ ѻ҆тцы̀, бжⷭ҇твеннѡ пою́щыѧ тѧ̀, бцⷣе неискꙋсобра́чнаѧ.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.