← претходни дан | Минеј — Новембар | следећи дан →
22 ноября: Святого апостола Филимона с иными. Святого благоверного великого князя Михаила Ярославича Тверского
Мѣ́сѧца тогѡ́же въ к҃в-й де́нь.
Ст҃а́гѡ а҆пⷭ҇ла фїлимѡ́на, и҆ и҆̀же съ ни́мъ:
И҆ ст҃а́гѡ благовѣ́рнагѡ вели́кагѡ кнѧ́зѧ мїхаи́ла ꙗ҆росла́вича тферска́гѡ.
Слꙋ́жба є҆гѡ̀ пи́сана по се́й слꙋ́жбѣ.
Стїхи̑ры пра́здника, гла́съ и҃. Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ, ꙳ предписꙋ́етсѧ ны́нѣ ꙳ бꙋ́дꙋщее неизрече́нное, ꙳ во ѻ҆́бразѣхъ дне́сь ви́димыхъ разꙋмѣва́емаѧ: ꙳ свѣ́тъ бо мі́рꙋ бжⷭ҇твенный возсїѧ́вши, ꙳ невѣстоприво́дитсѧ ко ст҃о́мꙋ хра́мꙋ. ꙳ ю҆́же восхва́лимъ, ꙗ҆́кѡ хра́мъ бж҃їй пресвѣ́тлый, ꙳ ст҃ы́й и҆ свѣтоза́рный, ꙳ свѣтода́телѧ хрⷭ҇та̀.
Вои́стиннꙋ нача́токъ благопрїѧ́тенъ ꙳ і҆ѡакі́мъ мꙋ́дрый ꙳ со а҆́нною принесо́ша ꙳ и҆зво́лившемꙋ бжⷭ҇твенный пло́дъ да́ти и҆̀мъ ꙳ бг҃оѻтрокови́цꙋ дв҃ꙋ марі́ю ꙗ҆́вѣ, ꙳ є҆́юже печа́ли ѿгна́сѧ до́лгъ. ꙳ ю҆́же воспои́мъ благоче́стнѡ веселѧ́щесѧ, ꙳ ра́дости бо хода́таица ꙳ бы́сть всемꙋ̀ мі́рꙋ сїѧ̀.
Грѧди́те, та́инственнѡ стеце́мсѧ, ꙳ и҆ предначне́мъ ны́нѣ, ꙳ свѣща́ми вѣ́ры ᲂу҆краша́еми, ꙳ дв҃ы предше́ствїе: ꙳ во хра́мъ бо сла́внѡ вхо́дитъ бж҃їй, ꙳ ѡ҆брꙋчена̀ хрⷭ҇тꙋ̀ всѣ́хъ цр҃ю̀. ꙳ є҆ѧ́же пра́зднꙋемъ кра́сное торжество̀, ꙳ бг҃олѣ́пнѡ всѝ ᲂу҆чрежда́ющесѧ ꙳ вхожде́нїемъ тоѧ̀.
Ст҃ы̑мъ стїхи̑ры, гла́съ в҃. Подо́бенъ: Є҆гда̀ ѿ дре́ва:
Розга̀ лозы̀ жи́зненныѧ, сла́вный фїлимѡ́не, сы́й, вїно̀ и҆ска́палъ є҆сѝ бжⷭ҇твеннагѡ позна́нїѧ сꙋ́щымъ въ болѣ́зни дꙋшѝ: и҆ сердца̀ возвесели́лъ є҆сѝ, сѣ̑тꙋющаѧ ле́сти ѡ҆мраче́нїемъ, и҆ ѡ҆держи̑маѧ тмо́ю і҆дѡлонеи́стовства, тѣ́мже веселѧ́щесѧ па́мѧть твою̀ бг҃оза́рнꙋю торжествꙋ́емъ.
Гра́дъ тѧ̀ га́зскїй почита́етъ, свѣ́тъ позна́нїѧ, бл҃же́нне, тобо́ю ᲂу҆зрѣ́въ: колосса́є же бжⷭ҇твенное твоѐ тѣ́ло, ꙗ҆́коже бога́тство и҆мꙋ́ще, ѡ҆б̾е́млютъ врачєва́нїѧ, и҆ и҆сточа́ющꙋ бл҃года́ть всегда̀. тѣ́мже соверша́ющїи па́мѧть твою̀ сохранѧ́емсѧ ѿ бѣ́дъ, фїлимо́не сла́вне, моли́твами твои́ми.
Вѣ́рою, со а҆пфі́ею честно́ю, а҆рхі́ппа, мꙋ́драго і҆ера́рха восхва́лимъ, пою́ще фїлимѡ́на и҆ ѻ҆ни́сїма, свѧщє́нны бг҃опроповѣ́дники, честны̑ѧ ᲂу҆чи́тели, ле́сть многобо́жнꙋ и҆скорени́вшыѧ сло́вомъ, и҆ насади́вшыѧ всѣ̑мъ зна́нїе и҆́стины, чтꙋ́щымъ тѣ́хъ благоче́стнѡ па́мѧть всегда̀.
Сла́ва, и҆ ны́нѣ, гла́съ а҃:
Да ра́дꙋетсѧ дне́сь нб҃о свы́ше, и҆ ѻ҆́блацы весе́лїе да кропѧ́тъ ѡ҆ ѕѣлѡ̀ пресла́вныхъ вели́чїихъ бг҃а на́шегѡ: се́ бо две́рь, на восто́ки зрѧ́щаѧ, ро́ждшисѧ ѿ непло́дове безпло́дныѧ по ѡ҆бѣтова́нїю, и҆ бг҃ꙋ ѡ҆свѧще́нна бы́вши въ жили́ще, дне́сь въ хра́мъ, ꙗ҆́кѡ непоро́чное приноше́нїе, приво́дитсѧ. да ра́дꙋетсѧ дв҃дъ, брѧца́ѧ въ гꙋ́сли: приведꙋ́тсѧ, речѐ, цр҃ю̀ дѣ̑вы въ слѣ́дъ є҆ѧ̀, бли̑жнѧѧ є҆ѧ̀ приведꙋ́тсѧ, внꙋ́трь ски́нїи бж҃їѧ, внꙋ́трь ѡ҆чисти́лища є҆гѡ̀, воспита́тисѧ въ жили́ще пре́жде вѣ̑къ ѿ ѻ҆ц҃а̀ нетлѣ́ннѡ ро́ждшагѡсѧ, во спасе́нїе дꙋ́шъ на́шихъ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Дне́сь ѱало́мски ꙳ собо́ръ дѣ́вственныхъ, ꙳ свѣщы̀ вже́гше, ꙳ свѣ́тлѡ предхо́дѧтъ ꙳ є҆ди́нѣй всенепоро́чнѣй.
Сті́хъ: Приведꙋ́тсѧ цр҃ю̀ дѣ̑вы во слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀.
Го́рꙋ разꙋ́мнꙋю, ꙳ и҆ трапе́зꙋ бжⷭ҇твеннꙋю, ꙳ мо́стъ ста́мнꙋ, ꙳ прⷪ҇ро́че, прїимѝ, ꙳ є҆ди́нꙋ всенепоро́чнꙋю.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Двє́ри ст҃и́лища ѿве́рзъ, ꙳ заха́рїе прⷪ҇ро́че, ꙳ прїимѝ и҆́стиннѡ ꙳ бж҃їю мт҃рь, ꙳ и҆ є҆ди́нꙋ приснодв҃ꙋ.
Сла́ва, и҆ ны́нѣ, гла́съ то́йже: Самогла́сенъ:
Дне́сь въ хра́мъ приво́дитсѧ всенепоро́чнаѧ дв҃а, во ѻ҆би́телище всецр҃ѧ̀ бг҃а, и҆ всеѧ̀ жи́зни на́шеѧ пита́телѧ. дне́сь чистѣ́йшаѧ ст҃ы́нѧ, ꙗ҆́кѡ трилѣ́тствꙋющаѧ ю҆́ница, во ст҃а̑ѧ ст҃ы́хъ вво́дитсѧ. то́й возопїи́мъ, ꙗ҆́кѡ а҆́гг҃лъ: ра́дꙋйсѧ, є҆ди́на въ жена́хъ бл҃гослове́ннаѧ.
Тропа́рь а҆пⷭ҇лѡвъ, гла́съ г҃:
А҆пⷭ҇ли ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, пра́здника.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды.
Сла́ва, а҆пⷭ҇лѡвъ: И҆ ны́нѣ, пра́здника.
По а҃-й стїхосло́вїи, сѣда́ленъ, гла́съ а҃. Поⷣ: Ка́мени запеча́танꙋ:
Восхвали́те дѣ̑вы, ма́тєри пра́зднꙋйте, лю́дїе славосло́вите, свѧще́нницы благослови́те пречⷭ҇тꙋю мт҃рь бж҃їю: пло́тїю бо младе́нствꙋющи пре́жде, во хра́мъ принесе́сѧ, ꙗ҆́кѡ хра́мъ бж҃їй ст҃ѣ́йшїй. тѣ́мже, пра́здникъ дꙋхо́вный соверша́юще, воспои́мъ ю҆̀, ꙗ҆́кѡ предста́тельницꙋ ро́да человѣ́ческагѡ.
Сла́ва, и҆ ны́нѣ, то́йже.
По в҃-й стїхосло́вїи, сѣда́ленъ, гла́съ д҃. Поⷣ: Ско́рѡ предварѝ:
Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопі́й: вни́ди, гпⷭ҇жѐ, въ хра́мъ цр҃е́въ, вни́ди, є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ хрⷭ҇то́съ.
Сла́ва, и҆ ны́нѣ, то́йже.
Канѡ́на пра́здника, со і҆рмосо́мъ на и҃: и҆ ст҃ы́хъ на д҃.
Канѡ́нъ пра́здника.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ вхожде́нїе.
Премꙋ́дрости, пречⷭ҇таѧ, тѧ̀ сокро́вище вѣ́мы, и҆ благода́ти точа́щꙋю и҆сто́чникъ приснотекꙋ́щїй ра́зꙋма, про́симъ: твоѧ̑ ка̑пли ѡ҆дождѝ, влⷣчце, є҆́же воспѣва́ти тѧ̀ при́снѡ.
Превы́шши, пречⷭ҇таѧ, нб҃съ бы́вши, хра́мъ и҆ пала́та, въ хра́мъ бж҃їй возложи́ласѧ є҆сѝ, томꙋ̀ ᲂу҆гото́ватисѧ въ бжⷭ҇твенное жили́ще прише́ствїѧ є҆гѡ̀.
Свѣ́тъ возсїѧ́вши бцⷣа благода́ти, всѧ̑ просвѣтѝ, и҆ совокꙋпѝ пресвѣ́тлое є҆ѧ̀ ᲂу҆краси́ти торжество̀ пѣ́сньми: прїиди́те, къ не́й стеце́мсѧ.
Две́рь сла́внаѧ, пѡ́мыслы непроходи́маѧ, двє́ри ѿве́рзши хра́ма бж҃їѧ, ны́нѣ повелѣва́етъ на́мъ совше́дшымъ, бжⷭ҇твенныхъ є҆ѧ̀ чꙋде́съ наслади́тисѧ.
Канѡ́нъ ст҃ы́хъ, є҆гѡ́же краегране́сїе:
Хрⷭ҇та̀ лю́бѧща просла́влю тѧ̀, фїлимѡ́не. Творе́нїе і҆ѡ́сифово.
Гла́съ в҃. Пѣ́снь а҃. І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.
Ликоходѧ̀ ра́достнѡ нбⷭ҇наѧ, свѧщеннодѣ́телю, селє́нїѧ, благода́ть пода́ждь мѝ, свѧтꙋ́ю твою̀ па́мѧть бжⷭ҇твеннѡ воспѣва́ющемꙋ: ты́ бо просла́вилсѧ є҆сѝ.
Стрꙋѧ́ми твои́хъ слове́съ сердца̀ напои́въ, дѣ́лати нбⷭ҇наѧ, блаже́нне, разꙋмѣ̑нїѧ пригото́валъ є҆сѝ вѣ́рою, а҆пⷭ҇ле фїлимѡ́не досточꙋ́дне.
Сщ҃еннодѣ́йствꙋѧ свѧще́нное є҆ѵⷢ҇лїе, сїѧ̑нїи дх҃а дꙋ́шы просвѣти́лъ є҆сѝ, и҆зба́вивъ ѿ тмы̀ і҆дѡлонеи́стовства, мꙋ́дре а҆пⷭ҇ле.
Бг҃оро́диченъ:
Тѧ̀ прⷪ҇ро́кѡвъ дре́вле бжⷭ҇твенное собра́нїе, многови́дными, чⷭ҇таѧ, ѻ҆́бразы, и҆здале́ча проначерта̀ и҆́стиннѡ є҆ди́нꙋ, влⷣкꙋ поро́ждшꙋю.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ честнѣ́мъ вхожде́нїи твое́мъ вѣнцє́въ сла́вы сподо́би.
Невѣстокраси́тель дне́сь ꙗ҆ви́сѧ, кра́сный дв҃ы хра́мъ и҆ черто́гъ, прїе́мь ѡ҆дꙋшевле́нный черто́гъ бж҃їй, чⷭ҇тꙋю и҆ непоро́чнꙋю, и҆ свѣтлѣ́йшꙋю всеѧ̀ тва́ри.
Дв҃дъ предначина́ѧ ликова́нїе, и҆гра́етъ и҆ ликовствꙋ́етъ съ на́ми, и҆ цр҃и́цꙋ зове́тъ тѧ̀ ᲂу҆кра́шенꙋ, пречⷭ҇таѧ, предстоѧ́щꙋ, всечⷭ҇таѧ, въ хра́мѣ цр҃ю̀ и҆ бг҃ꙋ.
И҆зъ неѧ́же престꙋпле́нїе произы́де дре́вле ро́дꙋ человѣ́ческомꙋ, и҆зъ тоѧ̀ и҆справле́нїе и҆ нетлѣ́нїе процвѣтѐ, бцⷣа дне́сь приводи́ма въ до́мъ бж҃їй.
И҆гра́ютъ а҆́гг҃льскаѧ вѡ́инства, и҆ всѣ́хъ человѣ̑къ мно́жество: и҆ предъ лице́мъ, пречⷭ҇таѧ, предтекꙋ́тъ твои́мъ дне́сь свѣщенѡ́сицы зовꙋ́ще, вели́чєствїѧ твоѧ̑ въ домꙋ̀ бж҃їи.
И҆́нъ. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ твоѝ всадѝ въ сердца̀ на́съ пою́щихъ тѧ̀.
Стра̑сти хрⷭ҇тѡ́вы и҆ воста́нїе проповѣ́дꙋѧ, воздви́гнꙋлъ є҆сѝ ꙗ҆́кѡ ѿ гро́ба невѣ́рїѧ и҆ ме́ртвости человѣ́ки, фїлимѡ́не достосла́вне.
Ѻ҆ни́сїма бжⷭ҇твеннаго и҆ фїлимѡ́на, а҆пфі́ю и҆ а҆рхі́ппа, ѕвѣ́зды, просвѣща́ющыѧ концы̀, свѧще́нными пѣснопѣ́ньми восхва́лимъ.
Оу҆ма̀ зри́тельное ѡ҆чи́стивше, бжⷭ҇твеннагѡ полꙋчи́сте бг҃овидѣ́нїѧ, и҆ сердца̀ возврати́сте заблꙋ́ждшыѧ къ зна́нїю, свѧще́ннѣйшїи.
Бг҃оро́диченъ:
Ꙗ҆́вльшисѧ, чⷭ҇таѧ и҆ всенетлѣ́ннаѧ, прїѧ́ла є҆сѝ во ᲂу҆тро́бѣ бг҃а сло́ва, ѡ҆чи́стившаго є҆стество̀ на́ше, ѡ҆скве́рншеесѧ, дв҃о, грѣхопаде́нїемъ.
Конда́къ а҆пⷭ҇толѡвъ, гла́съ в҃. Подо́бенъ: Вы́шнихъ и҆щѧ̀:
Ꙗ҆́кѡ ѕвѣ́зды всесвѣ̑тлыѧ просвѣща́ющыѧ концы̀, а҆пⷭ҇лы хрⷭ҇то́вы восхва́лимъ, фїлимѡ́на сла́внаго, и҆ а҆рхі́ппа свѧще́ннаго, и҆ ѻ҆ни́сїма, и҆ ма́рка и҆ а҆поллѡ́са, съ ни́миже и҆ а҆пфі́ю всемꙋ́дрꙋю, вопїю́ще: моли́те непреста́ннѡ ѡ҆ всѣ́хъ на́съ.
Та́же сѣда́ленъ, гла́съ и҃. Подо́бенъ: Премꙋ́дрости:
Ра́ломъ сло́ва добродѣ́лаѧ ѡ҆лѧденѣ̑вшаѧ сердца̀, свѧщеннодѣ́телю, бжⷭ҇твенное позна́нїе дѣ́лати пригото́валъ є҆сѝ, и҆ низложи́въ і҆́дѡльскїѧ хра́мы, созда́лъ є҆сѝ цр҃кви, бл҃же́нне, въ сла́вꙋ созда́телѧ твоегѡ̀. тѣ́мже соше́дшесѧ свѧтꙋ́ю твою̀ па́мѧть, фїлимѡ́не, сла́вимъ свѧщеннопросвѣща́еми, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, пра́здника, гла́съ то́йже.
Подо́бенъ: Повелѣ́нное та́йнѡ.
Да ра́дꙋетсѧ дв҃дъ пѣснопи́сецъ, и҆ да ликовствꙋ́етъ і҆ѡакі́мъ со а҆́нною, ꙗ҆́кѡ пло́дъ ст҃ы́й и҆зъ ни́хъ произы́де, марі́а свѣтоно́снаѧ, бжⷭ҇твеннаѧ свѣща̀, и҆ ра́дꙋетсѧ, входѧ́щи въ хра́мъ: ю҆́же и҆ зрѧ̀ благословѝ варахі́инъ сы́нъ, и҆ ра́дꙋѧсѧ взыва́ше: ра́дꙋйсѧ, чꙋ́до всемі́рное.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Две́рь непрохо́днꙋю, бж҃їй до́мъ прїе́млѧ дне́сь, преста́ти сотворѝ всѧ́кой слꙋ́жбѣ зако́нной, ꙗ҆́кѡ и҆́стиннѡ ꙗ҆ви́сѧ, зовы́й, сꙋ́щымъ на землѝ и҆́стина.
Гора̀ присѣ́ннаѧ, ю҆́же прови́дѣ дре́вле а҆ввакꙋ́мъ, предпроповѣ́да внꙋ́трь вмѣсти́вшꙋюсѧ въ нехо́дныхъ хра́ма, добродѣ́тєли процвѣ́тши, и҆ покрыва́етъ концы̀.
Ви́дѣвши пресла̑внаѧ всѧ̀ землѧ̀, стра́нныѧ же и҆ ди̑вныѧ вє́щи, ка́кѡ дв҃а, ѿ а҆́гг҃ла пи́щꙋ прїе́млющи, ѻ҆́бразы строе́нїѧ но́ситъ.
Хра́мъ и҆ пала́та, и҆ нб҃о ѡ҆дꙋшевле́нное ꙗ҆́вльшисѧ, бг҃оневѣ́сто цр҃е́ва, въ хра́мъ зако́нный приводи́ма дне́сь, томꙋ̀ соблюда́ема, пречⷭ҇таѧ.
И҆́нъ. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Вѣ́триломъ крⷭ҇та̀ вперѧ́емь, преплы́лъ є҆сѝ небꙋ́рнѡ лю́тꙋю пꙋчи́нꙋ, и҆скꙋше́нїй житїѧ̀, блаже́нне, мнѡ́гїѧ ᲂу҆пра́вивъ пла́вающыѧ къ спасе́нїѧ приста́нищꙋ бжⷭ҇твенною благода́тїю.
Свѣти̑ла свѣтоза̑рнаѧ предлага́етъ бжⷭ҇твенный гра́дъ колосса́йскїй: свѧще́ннаго а҆рхі́ппа, фїлимѡ́на же и҆ а҆пфі́ю ꙗ҆́вѣ, и҆ ѻ҆ни́сїма сла́внаго, просвѣща́ющыѧ мі́ра концы̀.
Бжⷭ҇твеннаѧ рѣка̀ воскипѣ̀ въ се́рдцѣ твое́мъ, бг҃оглаго́ливе, и҆ рѣ́ки ᲂу҆ста́ви, и҆ течє́нїѧ безбо́жїѧ, дꙋ́шы же и҆ста́ѧвшыѧ зно́емъ невѣ́дѣнїѧ, напоѝ благода́тїю, сла́вне.
Бг҃оро́диченъ:
Пою́ тѧ, и҆́стиннѡ всепѣ́таѧ, препѣ́таго бг҃а сло́ва преесте́ственнѡ роди́вшꙋю, и҆ молю́сѧ, смире́нныѧ моеѧ̀ дꙋшѝ и҆сцѣли́ти недꙋ́ги, ꙗ҆́кѡ блага̀ сꙋ́щи, бг҃оневѣ́стнаѧ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ въ чⷭ҇тнѣ́мъ вхожде́нїи твое́мъ: ты́ бо, неискꙋсобра́чнаѧ дв҃о, внꙋ́трь вошла̀ є҆сѝ въ хра́мъ бж҃їй, ꙗ҆́коже чⷭ҇тѣ́йшїй хра́мъ, всѣ́мъ воспѣва́ющымъ тѧ̀ ми́ръ подава́ющаѧ.
Свѧще́нїе сла́вное и҆ свѧще́нное возложе́нїе дне́сь пречⷭ҇таѧ дв҃а, возложи́вшисѧ въ хра́мъ бж҃їй, всецр҃ю̀ на́шемꙋ, бг҃ꙋ є҆ди́номꙋ въ жили́ще соблюда́етсѧ, ꙗ҆́кѡ вѣ́сть са́мъ.
Добро́тꙋ, пречⷭ҇таѧ, дꙋшѝ твоеѧ̀ зрѧ̀ нѣ́когда вѣ́рою заха́рїа возопѝ: ты̀ є҆сѝ и҆збавле́нїе, ты̀ є҆сѝ всѣ́хъ ра́дость: ты̀ є҆сѝ воззва́нїе на́ше, є҆́юже невмѣ́стный вмѣще́нъ мнѣ̀ ꙗ҆ви́тсѧ.
Ѽ па́че ᲂу҆ма̀ чꙋде́съ твои́хъ, всечⷭ҇таѧ. стра́нное твоѐ ржⷭ҇тво̀ є҆́сть, стра́ненъ ѻ҆́бразъ возраще́нїѧ твоегѡ̀, стра̑нна и҆ пресла̑вна твоѧ̑, бг҃оневѣ́сто, всѧ̑, и҆ человѣ̑ки несказа̑нна.
Свѣ́щникъ многосвѣ́тлый сꙋ́щи, бг҃оневѣ́сто, дне́сь возсїѧ́ла є҆сѝ въ домꙋ̀ гдⷭ҇ни, и҆ ѡ҆зарѧ́еши ны̀ честны́ми дарова̑нїи, чⷭ҇таѧ, чꙋде́съ твои́хъ, бцⷣе всепѣ́таѧ.
И҆́нъ. І҆рмо́съ:
Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.
Недꙋ́гꙋющыѧ ви́дѧ ѡ҆стрꙋпле́нїемъ ѕлы́хъ, сла́вне, и҆ дѣ́тельнымъ твои́мъ сло́вомъ и҆сцѣли́лъ є҆сѝ, фїлимѡ́не, и҆ногда̀, і҆дѡлонеи́стовствомъ лю́тѣ бѣ́дствꙋющыѧ.
Спаси́тєльныѧ пꙋти̑, заблꙋ́ждшымъ лю́тѣ, показа́лъ є҆сѝ, ꙗ҆́кѡ неле́стный пꙋтево́ждь, фїлимѡ́не, є҆ди́нъ пꙋ́ть хрⷭ҇та̀ возлюби́ти, ди́внѡ пꙋтево́дствилъ є҆сѝ.
Пое́тъ свѣ́тлый пра́здникъ колосса́йскаѧ честна́ѧ дне́сь ра́достнѡ хрⷭ҇то́ва цр҃ковь, бжⷭ҇твеннаго а҆рхі́ппа, и҆ бг҃оглаго́ливаго чтꙋ́щи фїлимѡ́на.
Бг҃оро́диченъ:
Влⷣчце, спаси́ ны ѡ҆бꙋрева́ємыѧ лю́тымъ волне́нїемъ и҆скꙋше́нїй, и҆ некро́ткихъ ва́рварскихъ нахожде́нїй, и҆ де́мѡнскихъ лю́тыхъ навѣ́тѡвъ.
Пѣ́снь ѕ҃. І҆рмо́съ:
Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Всѧ́чєскаѧ носѧ́й глаго́ломъ, моли́твꙋ пра́ведныхъ ᲂу҆слы́ша: тѣ́мже непло́дныѧ разрѣши́лъ є҆сѝ недꙋ́гъ, ꙗ҆́кѡ бл҃гоꙋтро́бенъ, ра́дости вино́внꙋю си̑мъ дарова̀.
Сказа́ти хотѧ̀ гдⷭ҇ь ꙗ҆зы́кѡмъ своѐ спасе́нїе, неискꙋсобра́чнꙋю ны́нѣ ѿ человѣ̑къ прїѧ́тъ, примире́нїѧ зна́менїе и҆ ѡ҆бновле́нїѧ.
Ꙗ҆́кѡ до́мъ сꙋ́щи благода́ти, въ не́мже сокрѡ́вища лежа́тъ неизрече́ннагѡ бж҃їѧ строе́нїѧ, всечⷭ҇таѧ, въ хра́мѣ причасти́ласѧ є҆сѝ нетлѣ́нныѧ сла́дости.
Дїади́мꙋ тѧ̀ ца́рскꙋю прїе́мъ хра́мъ, бг҃оневѣ́сто, просвѣща́шесѧ, и҆ подстꙋпа́ше лꙋ́чшымъ, предрече́нныхъ зрѧ̀ на тебѣ̀ сбытїѐ.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Нб҃о ꙗ҆ви́лсѧ є҆сѝ, всѣ̑мъ вѣща́ѧ сла́вꙋ спаси́тельнꙋю, тебє̀ просла́вльшагѡ, и҆ ᲂу҆ч҃никѡ́мъ сочета́вшагѡ седмодесѧ́тнымъ, мч҃ниче всебога́те.
Оу҆страни́всѧ ѻ҆те́чества, стра́ннымъ твои́мъ сло́вомъ ᲂу҆страни́вшыѧсѧ бг҃а ᲂу҆лови́лъ є҆сѝ, и҆ сїѡ́на жи́тели, і҆ера́рше фїлимѡ́не, показа́лъ є҆сѝ.
Добродѣ́тельми свѧще́нными сїѧ́ющи, и҆ свѣ́тлѡ бг҃ꙋ ᲂу҆гожда́ющи, къ нб҃сє́мъ востекла̀ є҆сѝ, со а҆́гг҃лы а҆пфі́а ликꙋ́ющи.
Бг҃оро́диченъ:
Воплоща́етсѧ сло́во во чре́вѣ твое́мъ, и҆ за бл҃гоꙋтро́бїе познава́етсѧ чл҃вѣ́къ, да бо́га человѣ́ка содѣ́лаетъ, ѻ҆трокови́це всенепоро́чнаѧ.
Конда́къ, гла́съ д҃. Подо́бенъ: Вознесы́йсѧ:
Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆́же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.
І҆́косъ:
Неизрече́нныхъ бж҃їихъ, и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋю, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ, чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆дивлѧ́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Сѐ дне́сь возсїѧ̀ концє́мъ весна̀ ра́достнаѧ, просвѣща́ющи на́шѧ дꙋ́шы, и҆ помышлє́нїѧ, и҆ ᲂу҆́мъ благода́тїю, торжество́мъ бцⷣы дне́сь та́инственнѡ да ᲂу҆чреди́мсѧ.
Да дароно́сѧтъ дне́сь всѧ́чєскаѧ цр҃и́цѣ и҆ мт҃ри бж҃їи, нб҃о и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ мно́жество, и҆ да вопїю́тъ: во хра́мъ вво́дитсѧ ра́дость и҆ и҆збавле́нїе.
Писа́нїе мимотечѐ, и҆ ѡ҆скꙋдѣ̀ зако́нъ, ꙗ҆́коже сѣ́нь, и҆ благода́ти лꙋчѝ возсїѧ́ша, въ хра́мъ бж҃їй вше́дшей тебѣ̀, дв҃о мт҃и чⷭ҇таѧ, въ не́мъ бл҃гослове́ннаѧ.
Повине́сѧ ржⷭ҇твꙋ̀ твоемꙋ̀, всечⷭ҇таѧ, ꙗ҆́кѡ творцꙋ̀ и҆ бг҃ꙋ, нб҃о и҆ землѧ̀ и҆ преиспо́днѧѧ, и҆ всѧ́къ ѧ҆зы́къ земны́хъ и҆сповѣ́даетъ, ꙗ҆́кѡ гдⷭ҇ь ꙗ҆ви́сѧ сп҃съ дꙋ́шъ на́шихъ.
И҆́нъ. І҆рмо́съ:
Ѡ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Кра̑сны твоѧ̑, фїлимѡ́не, бы́вше честны̑ѧ но́зѣ, стєзѝ кро́ткѡ ше́ствꙋющыѧ є҆ѵⷢ҇лїа, и҆ всѣ̑мъ ра̑тнымъ ми́ръ свѧще́нный возвѣща́ющыѧ, и҆ де́мѡнскаѧ стремлє́нїѧ запина́ющыѧ.
Твои́хъ слове́съ свѣ́томъ га́зѧнъ глꙋбо́каѧ тма̀ прогна́сѧ, свѧщеннодѣ́латель ꙗ҆́кѡ свѧще́ннѣйшїй, въ си́хъ бы́лъ є҆сѝ и҆зѧ́щнѣйшїй, всѧ̑ ᲂу҆па́съ, и҆ наꙋчи́въ пѣ́ти, а҆пⷭ҇ле: бл҃гослове́нъ бг҃ъ ѻ҆тє́цъ на́шихъ.
Въ пе́рвыхъ твои́хъ приѡбщи́сѧ до́брыхъ га́зскїй гра́дъ: тогѡ́ бо ꙗ҆ви́лсѧ є҆сѝ первопресто́льникъ, и҆ і҆ера́рхъ спаси́тельный, ꙗ҆́кѡ свѧщенновѣща́тель, фїлимѡ́не, вопи́ти повелѣва́ѧ: бл҃гослове́нъ бг҃ъ ѻ҆тє́цъ на́шихъ.
Возлюби́въ хрⷭ҇та̀ возлюби́вшаго земны̑ѧ за бл҃гоꙋтро́бїе, любо́вїю врага̀ ненави̑димыѧ сꙋ́щѧ, люби́мичи содѣ́ѧлъ є҆сѝ, фїлимѡ́не, бг҃а воспѣва́ющыѧ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Крѣ́пость смире́нныхъ, и҆ свѣ́щникъ свѣ́тлый, бжⷭ҇твеннаѧ трапе́за, гора̀ и҆ две́рь непрохо́днаѧ, прⷭ҇то́лъ бж҃їй и҆ пала́та, же́злъ же а҆арѡ́новъ, и҆ ста́мна златоза́рна сꙋ́щи, хрⷭ҇та̀ ма́ннꙋ жи́зни, дв҃о, носѧ́щи.
Пѣ́снь и҃. І҆рмо́съ:
Слы́ши, ѻ҆трокови́це дв҃о чⷭ҇таѧ, да рече́тъ ᲂу҆́бѡ гаврїи́лъ, совѣ́тъ вы́шнѧгѡ дре́внїй и҆́стинный, бꙋ́ди къ прїѧ́тїю гото́ва бж҃їю: тобо́ю бо невмѣсти́мый съ человѣ́ки поживѐ. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Пречⷭ҇тый хра́мъ въ до́мъ бж҃їй приводѧ́щи а҆́нна и҆ногда̀, вопїю́щи, съ вѣ́рою речѐ свѧще́нникꙋ: ча́до, ѿ бг҃а да́нное мнѣ̀, прїи́мъ ны́нѣ, введѝ во хра́мъ зижди́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Речѐ, ви́дѣвъ, а҆́ннѣ и҆ногда̀ дх҃омъ заха́рїа: жи́зни мт҃рь вво́диши и҆́стиннꙋю, ю҆́же свѣ́тлѡ прⷪ҇ро́цы бж҃їи бцⷣꙋ проповѣ́даша, и҆ ка́кѡ хра́мъ вмѣсти́тъ ю҆̀: тѣ́мъ чꙋдѧ́сѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Раба̀ бж҃їѧ бы́хъ а҆́зъ, ѿвѣща̀ а҆́нна є҆мꙋ̀, призыва́юще сего̀ вѣ́рою и҆ моли́твою, прїѧ́ти моеѧ̀ болѣ́зни пло́дъ, по прїѧ́тїи же рожде́ннꙋю привестѝ да́вшемꙋ ю҆̀. тѣ́мъ зовѧ̀ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Зако́нное вои́стиннꙋ дѣ́ло є҆́сть, свѧще́нникъ речѐ є҆́й, стра́ннꙋ же весьма̀ ве́щь поразꙋмѣва́ю, зрѧ̀ приводи́мꙋю въ до́мъ бж҃їй, пресла́внѡ превосходѧ́щꙋю ст҃а̑ѧ благода́тїю. тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Возмога́ю, речѐ а҆́нна є҆мꙋ̀, зна́ющи, ꙗ҆̀же глаго́леши, разꙋмѣ́еши бо сїѧ̑ дх҃омъ бж҃їимъ, ꙗ҆́снѡ ꙗ҆̀же дв҃ы проповѣ́далъ є҆сѝ. прїимѝ ᲂу҆́бѡ пречⷭ҇тꙋю въ хра́мъ созда́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а.
Свѣтоно́сна на́мъ возжже́сѧ свѣща̀, возопѝ свѧще́нникъ, ра́дость велича́йшꙋю свѣтѧ́щи во хра́мѣ: дꙋ́шы прⷪ҇ро́чєскїѧ да сра́дꙋютсѧ мнѣ̀, ꙗ҆́кѡ пресла̑внаѧ зрѧ́ще, соверша́ємаѧ въ домꙋ̀ бж҃їи, и҆ да вопїю́тъ при́снѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Сло́во, ꙗ҆́кѡ свѣти́льникъ свѣ́тлый, возже́нъ въ твое́мъ се́рдцы носѧ̀, пре́жде ᲂу҆гашє́нныѧ, и҆ во тмѣ̀ мно́зѣй лежа́щыѧ невѣ́дѣнїѧ, сла́вне, къ бг҃озна́нїѧ воздви́глъ є҆сѝ дню̀.
Свѧще́нное твоѐ къ бг҃ꙋ и҆зше́ствїе, свѧще́нными возвели́чисѧ провожде́ньми а҆пⷭ҇лѡвъ, и҆ безпло́тныхъ ᲂу҆мѡ́въ, и҆́хже и҆мѣ́лъ є҆сѝ на землѝ житїѐ, ꙗ҆́кѡ свѧщеннотаи́нникъ, фїлимѡ́не бг҃оглаго́ливе.
Мѵ́ро сладково́нное ꙗ҆́вѣ и҆ска́павъ свѧще́нныхъ чꙋде́съ, блаже́нне, ѡ҆благово́нилъ є҆сѝ смы́слы и҆ помышлє́нїѧ бл҃гочести̑вымъ, и҆ стра̑сти ѕлосмра̑дныѧ ѿгна́лъ є҆сѝ превозносѧ́щихъ хрⷭ҇та̀, мꙋ́дре фїлимѡ́не.
Ꙗ҆́коже ѕвѣ̑зды свѣ̑тлыѧ тве́рди, цр҃кве при́снѡ сїѧ́юще, кꙋ́пнѡ а҆рхі́ппъ чꙋ́дный, а҆пфі́а, фїлимѡ́нъ и҆ ѻ҆ни́сїмъ, помышлє́нїѧ на̑ша просвѣща́ютъ.
Бг҃оро́диченъ:
Но́въ ра́й на́мъ чре́во твоѐ и҆́стиннѡ, чⷭ҇таѧ, ꙗ҆ви́сѧ, жи́зни дре́во возраща́ѧ, и҆ ᲂу҆ме́ршыѧ плодо́мъ дре́ва, па́ки въ ра́й ѡ҆животвори́вши введѐ, бцⷣе.
Пѣ́снь ѳ҃. І҆рмо́съ:
Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ, ᲂу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла, воспѣва́юще, съ ра́достїю да вопїю́тъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Ꙗ҆́кѡ пресвѣ́тлꙋю, бцⷣе чⷭ҇таѧ, дꙋше́вныѧ чистоты̀ и҆мꙋ́щи добро́тꙋ, бл҃года́тїю же бж҃їею и҆сполнѧ́ема съ нб҃сѐ, свѣ́томъ присносꙋ́щнымъ просвѣща́еши всегда̀ съ весе́лїемъ вопїю́щыѧ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Прелета́етъ, бцⷣе чⷭ҇таѧ, чꙋ́до твоѐ си́лꙋ слове́съ: тѣ́ло бо въ тебѣ̀ поразꙋмѣва́ю, па́че сло́ва, тече́нїѧ грѣхо́внагѡ непрїѧ́тно. тѣ́мже благода́рственнѡ вопїю́ ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Пресла́внѡ проѡбразова́ше, чⷭ҇таѧ, зако́нъ тѧ̀ ски́нїю, и҆ бжⷭ҇твеннꙋю ста́мнꙋ, стра́ненъ кївѡ́тъ, и҆ катапета́смꙋ, и҆ же́злъ, хра́мъ неразрꙋши́мый, и҆ две́рь бж҃їю. тѣ́мже наꙋча́ютъ тебѣ̀ зва́ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Пѣснопоѧ̀ тебѣ̀ провозглаша́ше дв҃дъ, глаго́лѧ тѧ̀ дще́рь цр҃е́вꙋ, красото́ю добродѣ́телей ѡ҆деснꙋ́ю предстоѧ́щꙋю бг҃а, ви́дѣвъ тѧ̀ ᲂу҆пещре́ннꙋ. тѣ́мже, прⷪ҇ро́чествꙋѧ, вопїѧ́ше: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Бг҃опрїѧ́тнꙋ предзрѧ̀ соломѡ́нъ, проповѣ́да тѧ̀ ѻ҆́дръ цр҃е́въ, живы́й и҆сто́чникъ запеча́тствованъ, и҆зъ негѡ́же немꙋ́тнаѧ на́мъ произы́де вода̀, вѣ́рою вопїю́щымъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
Подае́ши дарова́нїй твою̀ тишинꙋ̀, бцⷣе, дꙋшѝ мое́й, точа́щи жи́знь тебѐ чтꙋ́щымъ по до́лгꙋ, сама̀ защища́ющи, и҆ покрыва́ющи, и҆ соблюда́ющи, вопи́ти тебѣ̀: и҆́стиннѡ вы́шши всѣ́хъ є҆сѝ, дв҃о чⷭ҇таѧ.
И҆́нъ. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Со свѧще́ннѣйшимъ ли́комъ свѧще́нныхъ а҆пⷭ҇лъ, подо́бнѡ жи́тельствꙋеши на нб҃сѣ́хъ, бжⷭ҇твеннымъ прича́стїемъ ѡ҆божа́емь, и҆ свѣ́томъ сїѧ́ѧ неизрече́ннымъ, и҆ ра́достїю дꙋхо́вною, фїлимѡ́не, при́снѡ и҆сполнѧ́емь.
Ꙗ҆́кѡ чꙋ́дный тво́й нра́въ, ꙗ҆́кѡ добро̀ и҆ красно̀ житїѐ твоѐ, ꙗ҆́кѡ пресла́вно и҆ ᲂу҆спе́нїе твоѐ, блаже́нне а҆пⷭ҇ле: ꙗ҆́кѡ свѣ́тлый де́нь, въ не́мже ѡ҆ста́вивъ ꙗ҆̀же на землѝ, на нбⷭ҇ныѧ крꙋ́ги возше́лъ є҆сѝ веселѧ́сѧ.
Дне́сь весели́тсѧ всѧ̀ хрⷭ҇то́ва цр҃ковь, пра́зднственнꙋю ра́дость дꙋхо́внѡ соста́вльши въ па́мѧти твое́й, ю҆́же непоколе́бленꙋ спасѝ твои́ми къ сп҃сꙋ и҆ бг҃ꙋ благопрїѧ́тными моли́твами, фїлимѡ́не свѧще́ннѣйше.
Ра́ка моще́й твои́хъ врачева́нїй ка̑пли и҆сточа́етъ приходѧ́щымъ свѧще́ннѡ, бл҃же́нне фїлимѡ́не а҆пⷭ҇ле, недꙋ́ги ᲂу҆ставлѧ́етъ, и҆ всѣ́хъ дꙋ́шы ѡ҆свѧща́етъ, бжⷭ҇твеннꙋю твою̀ па́мѧть пра́зднꙋющихъ всегда̀.
Бг҃оро́диченъ:
Но́сиши носѧ́щаго всѧ̑, и҆ пита́еши пита́ющаго, ѻ҆́бразъ ржⷭ҇тва̀ ника́коже вѣ́дѧщи, всенепоро́чнаѧ, па́че ᲂу҆ма̀ твоѐ чꙋ́до, а҆́гг҃лы ᲂу҆жаса́ющее и҆ человѣ́ки, вѣ́дꙋщыѧ тѧ̀ є҆ди́нꙋ дв҃ꙋ бг҃ома́терь.
Свѣти́ленъ. Подо́бенъ: Жєны̀ ᲂу҆слы́шите:
Ю҆́же дре́вле предвозвѣстѝ прⷪ҇ро́ческое сосло́вїе ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ, воспита́тисѧ гдⷭ҇еви.
Сла́ва, и҆ ны́нѣ, то́йже.
На стїхо́внѣ стїхи̑ры, гла́съ ѕ҃ Подо́бенъ: Тридне́венъ:
Дѣ̑вы, сликовствꙋ́йте, ꙳ ѻ҆трокови̑цы, взыгра́йте, ꙳ свѣщы̀ носѧ́ще, ꙳ воспо́йте свѣ́тлѡ ꙳ є҆ди́нꙋ бцⷣꙋ чⷭ҇тꙋю прест҃ꙋ́ю, ꙳ и҆ нбⷭ҇наѧ воспо́йте.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀: и҆́скрєннїѧ є҆ѧ̀ приведꙋ́тсѧ тебѣ̀.
А҆́гг҃ловою тѧ̀ рꙋко́ю, дв҃о, ꙳ пи́щею всѣ́хъ творе́цъ ꙳ сн҃ъ тво́й пита́етъ, влⷣчце чⷭ҇таѧ, ꙳ ст҃ы́хъ во ст҃а̑ѧ, ꙳ ꙗ҆влѧ́ѧ твоѐ мі́рꙋ ꙳ вели́чествїе пребо́льшее.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Ст҃ы́хъ прест҃а́ѧ, дв҃о бг҃оневѣ́сто, ꙳ ро́ждшаѧ влⷣкꙋ всѣ́хъ, ꙳ є҆ди́наго ѿ трⷪ҇цы, ꙳ того̀ молѝ, всѣ́хъ воспѣва́ющихъ тѧ̀ ꙳ и҆зба́вити ѿ бѣ́дъ.
Сла́ва, и҆ ны́нѣ, гла́съ д҃:
Дне́сь бг҃овмѣсти́мый хра́мъ бцⷣа въ хра́мъ гдⷭ҇ень приво́дитсѧ, и҆ заха́рїа сїю̀ прїе́млетъ: дне́сь ст҃а̑ѧ ст҃ы́хъ ра́дꙋютсѧ, и҆ ли́къ а҆́гг҃льскїй та́инственнѡ торжествꙋ́етъ. съ ни́миже и҆ мы̀, пра́зднꙋюще дне́сь, съ гаврїи́ломъ возопїи́мъ: ра́дꙋйсѧ, бл҃года́тнаѧ, гдⷭ҇ь съ тобо́ю, и҆мѣ́ѧй ве́лїю ми́лость.
На лїтꙋргі́и: Бл҃жє́нна пра́здника, пѣ́снь а҃-ѧ, на ѕ҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ къ фїлимѡ́нꙋ, по́слѣ т҃в-гѡ зача́ла: Па́ѵелъ, ю҆́зникъ і҆и҃съ хрⷭ҇то́въ: А҆ллилꙋ́їа, гла́сꙋ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе лꙋкѝ, зача́ло н҃. Прича́стенъ: Во всю̀ зе́млю и҆зы́де вѣща́нїе и҆́хъ:
Слꙋ́жба ст҃а́гѡ благовѣ́рнагѡ вели́кагѡ кнѧ́зѧ мїхаи́ла ꙗ҆росла́вича тферска́гѡ.
На вели́цѣй вече́рни. Блаже́нъ мꙋ́жъ. На Гдⷭ҇и, воззва́хъ, стїхи̑ры, гла́съ в҃. Подо́бенъ: Кі́ими похва́льными вѣнцы̀:
Кі́ими похва́льными вѣнцы̑ ᲂу҆вѧзе́мъ честнꙋ́ю главꙋ̀ твою̀, и҆ всечⷭ҇тно́е тѣ́ло твоѐ и҆ бг҃оизбра́нное, прїи́мша заколе́нїе непра́ведное, въ чистотѣ̀ воспита́нное житїѐ, и҆ цѣломꙋ́дрое и҆зво́лилъ є҆сѝ, нетлѣ́ннагѡ житїѧ̀ мꙋжеꙋ́мнымъ смы́сломъ вра́жїю держа́вꙋ разрꙋши́лъ є҆сѝ, и҆ бж҃їимъ посо́бїемъ, подаѧ̀ на́мъ ве́лїю ми́лость.
Кі́ими пѣ́сненными похвала́ми соста́вимъ пра́здникъ чⷭ҇тенъ бг҃омꙋ́драгѡ мїхаи́ла, и҆́же хрⷭ҇та̀ ра́ди ѡ҆ста́ви тлѣ́ннꙋю сла́вꙋ земнꙋ́ю, и҆ сосꙋ́дъ че́стенъ ꙗ҆ви́сѧ ст҃а́гѡ дх҃а; ѕвѣзда̀ свѣтоно́снаѧ возсїѧ̀ въ рѡссі́и, ѡ҆зарѧ́ющаѧ всѧ̑ концы̀, и҆ ꙗ҆́кѡ же́ртва непоро́чна, принесе́сѧ хрⷭ҇тꙋ̀, є҆мꙋ́же прилѣ́жнѡ мо́литсѧ, дарова́ти на́мъ ми́ръ и҆ ве́лїю ми́лость.
Кі́ими пѣ́нїѧ пѣ́сньми тебѐ, мїхаи́ле, возвели́чимъ; є҆го́же хрⷭ҇то́съ па́че є҆стества̀ возвели́чивъ, и҆ непобѣди́ма во бранѣ́хъ показа̀, свѣтоза́рное твоѐ лицѐ просвѣща́емо па́че со́лнца и҆ въ бж҃їю си́лꙋ ѡ҆болче́нъ, є҆гѡ́же ᲂу҆че́нїю послѣ́довалъ є҆сѝ, беззакѡ́ннымъ пло́ть твою̀ пре́далъ є҆сѝ, и҆ претерпѣ́лъ є҆сѝ лє́стныѧ гнѣ́вы, за любо́вь созда́вшагѡ тѧ̀.
А҆́ще нѣ́сть лїті́и. И҆́ны стїхи̑ры, гла́съ и҃. Поⷣ: Ѽ пресла́внагѡ чꙋдесѐ!
Ꙗ҆́кѡ вои́стиннꙋ бжⷭ҇твеннаѧ и҆ честна́ѧ возсїѧ́вши па́мѧть твоѧ̀ рѡссі́йскимъ страна́мъ дне́сь, сла́вный мїхаи́ле, ца́рскагѡ ко́рене ст҃а́ѧ ѻ҆́трасль, хрⷭ҇та̀ возлюби́въ, є҆гѡ́же ра́ди непра́ведное заколе́нїе претерпѣ́лъ є҆сѝ. тѣ́мъ молѝ, бл҃же́нне, дарова́ти дꙋша́мъ на́шымъ ѡ҆чище́нїе согрѣше́нїй, ми́ръ и҆ ве́лїю ми́лость.
Ра́дꙋютсѧ человѣ́цы ра́достїю дне́сь, и҆ да пое́тъ ликꙋ́ющи бжⷭ҇твенными пѣ́сньми цр҃ковь хрⷭ҇то́ва, хва́лѧщи блаже́ннаго кнѧ́зѧ же и҆ мч҃ника: хрⷭ҇та́ бо ра́ди, ꙗ҆́кѡ преходѧ́щее ца́рство земно́е возненави́дѣвша, гдⷭ҇а сп҃са ѿ дꙋшѝ возлюби́вша, и҆ непра́веднѡ ᲂу҆бі́йство претерпѣ́вша, ника́коже проти́вѧщасѧ закала́ющемꙋ, и҆ мо́литсѧ спасти́сѧ дꙋша́мъ на́шымъ.
Въ нбⷭ҇ныѧ ѻ҆би́тєли ꙗ҆́кѡ на колесни́цѣ возше́лъ є҆сѝ, твое́ю кро́вїю ѡ҆червлени́въ ѡ҆дѣѧ́нїе, ꙗ҆́кѡ а҆́гнецъ непра́веднѡ заколе́нїе прїѧ́лъ є҆сѝ ѿ врага̀ кавгады́ѧ, ѕлѣ̀ живо́тъ сво́й и҆спрове́ргшагѡ, соблюдѝ гра́дъ се́й и҆ цр҃ковь твою̀ ѿ вра́жїѧ нападе́нїѧ, благочестна́ѧ лѣ́торасле, блаже́нный мїхаи́ле, мꙋ́чениче пресловꙋ́щїй, те́плый застꙋ́пниче рѡссі́йскїѧ землѝ, и҆ всѣ̑мъ страна́мъ ᲂу҆твержде́нїе: но мо́лимъ тѧ̀, моли́сѧ, свѧ́те, безъ вре́да сохрани́ти ѻ҆те́чество твоѐ, и҆ спасти́сѧ дꙋша́мъ на́шымъ.
Сла́ва, гла́съ ѕ҃:
Возсїѧ̀ дне́сь, ꙗ҆́кѡ со́лнце, страстоте́рпца па́мѧть, вѣ̑рныѧ созыва́ющи на весе́лїе та́йнѡ. хвала́ми, ꙗ҆́кѡ цвѣ̑ты кра́сными, вѣнцы̀ спле́тше златоза́рны, къ честнѣ́й є҆гѡ̀ главѣ̀ принесе́мъ, глаго́люще: ра́дꙋйсѧ, свѣ́тлаѧ ѕвѣздо̀ мы́сленныѧ тве́рди, и҆ те́плый застꙋ́пниче гра́дꙋ на́шемꙋ: ра́дꙋйсѧ, поспѣ́шниче сꙋ́щымъ въ бѣда́хъ, и҆ тве́рдое ѡ҆гражде́нїе къ тебѣ̀ притека́ющымъ: ра́дꙋйсѧ, побѣ́ды соверши́въ по́двигъ и҆ вѣне́цъ прїи́мъ ѿ хрⷭ҇та̀ бг҃а. є҆го́же молѝ прилѣ́жнѡ, пребл҃же́нне мїхаи́ле, наро́дꙋ на́шемꙋ ми́ръ и҆ здра́вїе пода́ти, и҆ на проти̑вныѧ побѣ́дꙋ, и҆ гра́дъ тво́й невреди́мь сохрани́ти моли́твами твои́ми, и҆ спасти́сѧ дꙋша́мъ на́шымъ.
И҆ ны́нѣ, пра́здника, гла́съ ѕ҃: Дне́сь собо́ры вѣ́рныхъ соше́дшесѧ:
Вхо́дъ. Прокі́менъ днѐ. И҆ чтє́нїѧ.
Прⷪ҇ро́чества и҆са́їина чте́нїе.
[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ: кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑ и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ, да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бо́гъ и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ: и҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй. сотворю̀, и҆ кто̀ ѿврати́тъ то̀; Си́це гл҃го́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.
Премꙋ́дрости соломѡ́ни чте́нїе.
[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
Премꙋ́дрости соломѡ́ни чте́нїе.
[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.
А҆́ще настоѧ́тель и҆зво́литъ пѣ́ти лїті́ю: стїхи̑ры, пи́саны на Гдⷭ҇и, воззва́хъ дрꙋгі̑ѧ.
Сла́ва, гла́съ и҃. Ꙗ҆́кѡ вои́стиннꙋ бжⷭ҇твеннаѧ и҆ честна́ѧ:
И҆ ны́нѣ, пра́здника.
На стїхо́внѣ стїхи̑ры пра́здника. Сла́ва, ст҃а́гѡ, гла́съ и҃:
Прїиди́те, восхва́лимъ чꙋдотво́рца и҆ мч҃ника, зако́ннѡ пострада́вшаго, побѣ́ждшаго сопроти́внаго врага̀, ны́нѣ бо свѣ́тлѡ ᲂу҆кра́шенъ предстои́тъ хрⷭ҇тꙋ̀ ра́дꙋѧсѧ. тѣ́мъ и҆ мы̀ пѣ́сньми па́мѧть є҆гѡ̀ ве́селѡ любо́вїю похва́лимъ, вопїю́ще: ра́дꙋйсѧ, вселе́нныѧ застꙋ́пниче, и҆ побори́телю на врагѝ: ра́дꙋйсѧ, врачꙋ̀ болѧ́щихъ, и҆ де́мѡнѡвъ прогони́телю: ра́дꙋйсѧ, чꙋ́дный мїхаи́ле, люби́мый хрⷭ҇тꙋ̀: за ны̀ молѝ ст҃ꙋ́ю трⷪ҇цꙋ, ᲂу҆мири́ти мі́ръ и҆ спастѝ дꙋ́шы на́шѧ.
И҆ ны́нѣ, пра́здника, гла́съ и҃: По ржⷭ҇твѣ̀ твое́мъ:
Тропа́рь, гла́съ и҃:
Возвы́сивъ ᲂу҆́мъ тво́й къ бг҃ꙋ, и҆ житїѧ̀ со а҆́гг҃лы возжелѣ́лъ є҆сѝ, тлѣ́ннꙋю сла́вꙋ земнꙋ́ю ѡ҆ста́вилъ є҆сѝ, бл҃же́нне, и҆ положи́лъ є҆сѝ дꙋ́шꙋ твою̀ за лю́ди твоѧ̑, воспрїѧ́лъ є҆сѝ вѣне́цъ проти́вꙋ трꙋдѡ́въ твои́хъ, бг҃омꙋ́дре мїхаи́ле. молѝ хрⷭ҇та̀ бг҃а, ѡ҆ чтꙋ́щихъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, пра́здника.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника. По пе́рвой и҆ по второ́й каѳі́смѣ, сѣда́льны пра́здника.
По полѷеле́и сѣда́ленъ ст҃а́гѡ, гла́съ д҃ Поⷣ: Ꙗ҆ви́лсѧ є҆сѝ дне́сь:
Ꙗ҆ви́сѧ дне́сь застꙋпле́нїе гра́дꙋ твоемꙋ̀ и҆ лю́демъ, прест҃о́е тѣ́ло твоѐ честно́е: є҆́же прїи́мши цр҃ковь бж҃їѧ, весели́тъ сердца̀ пою́щихъ тѧ̀, мїхаи́ле.
Два́жды.
Сла́ва, и҆ ны́нѣ, бг҃оро́диченъ:
Пречⷭ҇тыѧ рꙋ́ки твоѧ̑ дв҃омт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь хрⷭ҇тѐ, ми́лѡсти твоѧ̑.
Та́же чте́мъ ѡ҆ ᲂу҆бїе́нїи є҆гѡ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе лꙋкѝ, зача́ло р҃ѕ. ѱало́мъ н҃.
Стїхи́ра самогла́сна, гла́съ ѕ҃:
Дне́сь вѣ́рныхъ собо́ри ли́къ дꙋхо́вный соста́вльше, въ па́мѧти ст҃а́гѡ мꙋ́ченика свѧтолѣ́пнѡ ликовствꙋ́емъ, дне́сь весе́лїемъ просла́вимъ гдⷭ҇а, просла́вльшаго бл҃же́ннаго мїхаи́ла, семꙋ̀ а҆́бїе ᲂу҆чꙋ́вствившесѧ, дне́сь кла́нѧющесѧ чꙋдото́чномꙋ є҆гѡ̀ гро́бꙋ, возопїи́мъ: ра́дꙋйсѧ, дрꙋ́же гдⷭ҇ень, попра́вый ѕмі́евꙋ главꙋ̀: ра́дꙋйсѧ, по ѻ҆бы́чаю невре́днѡ ѻ҆́бразъ сохрани́вый: ра́дꙋйсѧ, за хрⷭ҇то́вы за́пѡвѣди ᲂу҆бїе́нїе прїе́мый, є҆гѡ́же тѣ́ло по ᲂу҆бїе́нїи на мѣ́стѣ пꙋ́стѣ пове́ржено: мно́зи же вѣ́рнїи ви́дѣша ѿ негѡ̀ сто́лпъ ѻ҆́гненъ ѿ землѝ до нб҃сѐ: ра́дꙋйсѧ, цвѣ́те благово́нный, неꙋвѧда́емый рѡссі́йскїй. не преста́й молѧ́сѧ хрⷭ҇тꙋ̀ поми́ловати и҆ спастѝ свѣтоно́снꙋю па́мѧть твою̀ пра́зднꙋющихъ.
Канѡ́нъ пра́здника со і҆рмосо́мъ на ѕ҃: И҆ ст҃а́гѡ два̀ канѡ́на на и҃.
Канѡ́нъ ст҃а́гѡ.
Гла́съ и҃. Пѣ́снь а҃. І҆рмо́съ:
Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.
Въ по́мощь тебѐ, хрⷭ҇тѐ, призыва́ю, и҆ дерза́ю воспѣ́ти страстоте́рпца твоегѡ̀ па́мѧть, ᲂу҆стна́ми недосто́йными: влⷣко хрⷭ҇тѐ, ᲂу҆твердѝ помышле́нїе, на хвалосло́вїе твоегѡ̀ ᲂу҆го́дника.
Рѡссі́йское ᲂу҆добре́нїе, и҆ правовѣ́рномꙋ наро́дꙋ на́шемꙋ похвалꙋ̀ и҆ крѣ́пость, тво́й показа́въ доброꙋ́мный смы́слъ, бг҃омꙋ́дре мїхаи́ле, досточꙋ́дне.
Съ де́рзостїю просїѧ́лъ є҆сѝ хрⷭ҇то́во ᲂу҆че́нїе въ се́рдцы, є҆́же положи́ти дꙋ́шꙋ твою̀ за дрꙋ́ги твоѧ̑: ꙗ҆́коже хрⷭ҇то́съ за ны̀ кро́вь свою̀ пролїѧ̀.
Бг҃оро́диченъ:
Застꙋ́пнице скорбѧ́щихъ, спасе́нїѧ наде́жда ненадѣ́ющихсѧ, бцⷣе всепѣ́таѧ, молѝ прилѣ́жнѡ и҆зба́витисѧ на́мъ ѿ бѣ́дъ.
Дрꙋгі́й канѡ́нъ ст҃а́гѡ:
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Ꙗ҆́кѡ по зако́нꙋ ходи́въ, смире́ннꙋю мꙋ́дрость воспрїѧ́лъ є҆сѝ, вели́кїй страда́льче, со ст҃ы́ми трⷪ҇цѣ предстоѧ̀, моли́сѧ ѡ҆чище́нїе на́мъ дарова́ти, тебѐ похвалѧ́ющымъ.
Бжⷭ҇твенное бога́тство и҆сцѣле́нїй, и҆ мѵ́ро благово́нное и҆сточа́етъ хра́мъ тво́й, свѧ́те, въ не́мже пое́мъ хрⷭ҇та̀ бг҃а, просла́вльшаго тѧ̀.
Незаходи́мое сл҃нце въ себѣ̀ стѧжа́въ хрⷭ҇та̀ бг҃а на́шего, пресла́вный мїхаи́ле, ѡ҆свѧти́ ны, честнꙋ́ю па́мѧть твою̀ почита́ющыѧ.
Бг҃оро́диченъ:
Краснꙋ̀ и҆ и҆збра́ннꙋ всечⷭ҇тꙋю разꙋмѣ́въ тѧ̀ сн҃ъ бж҃їй, всенепоро́чнаѧ, сн҃ъ тво́й бы́сть, сы́ны сотворѝ бл҃года́тїю бцⷣꙋ тѧ̀ чтꙋ́щыѧ.
Катава́сїа: Спасѐ лю́ди чꙋдодѣ́йствꙋѧй влⷣка:
Пѣ́снь г҃. І҆рмо́съ:
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.
Ѻ҆би́телище бы́сть ст҃а́гѡ дх҃а твоѐ ст҃о́е се́рдце, и҆́мже не ᲂу҆боѧ́лсѧ є҆сѝ непра́веднагѡ царѧ̀ ꙗ҆́рости, страстоте́рпче мїхаи́ле.
Ѿ свѧтꙋ́ю бокꙋ̀ бг҃омꙋ́дрыѧ ѯе́нїи, блаже́нне, роди́лсѧ є҆сѝ, съ не́юже тѧ̀ блажи́мъ, страда́льче прехва́льне, спасѝ гра́дъ тво́й, и҆ лю́ди, пою́щыѧ тѧ̀.
Заколе́нъ бы́лъ є҆сѝ ѿ непра́ведныхъ твои́хъ ᲂу҆бі́йцъ, и҆ вопїѧ́лъ є҆сѝ влⷣцѣ хрⷭ҇тꙋ̀: прїимѝ дꙋ́хъ мо́й, влⷣко, на тѧ́ бо ᲂу҆пова́нїе моѐ возложи́хъ, гдⷭ҇и.
Бг҃оро́диченъ:
Глаго́лы проповѣ̑дникъ бг҃огла́сныхъ и҆сполнѧ́ютсѧ, сего̀ родѝ дв҃а но́ваго млⷣнца, а҆да́ма старѣ́йша, и҆ сопресто́льна роди́телю.
И҆́нъ. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Весе́лїемъ весели́тсѧ хрⷭ҇то́ва цр҃ковь въ па́мѧть твою̀ свѧ́те, и҆ творцꙋ̀ вопїе́тъ: ты̀ моѧ̀, гдⷭ҇и, крѣ́пость, и҆ прибѣ́жище и҆ ᲂу҆твержде́нїе.
До́блѧго вѣне́чника, и҆ страда́льца хрⷭ҇то́ва восхва́лимъ свѣ́тлѡ, наꙋчи́вшаго на́съ хрⷭ҇тꙋ̀ вопи́ти: свѧ́тъ є҆сѝ, гдⷭ҇и.
Ни ца́рства жела́нїе, ни пи́щи наслажде́нїе, ни сребра̀, ни зла́та возжелѣ́въ, но хрⷭ҇тꙋ̀ є҆ди́номꙋ вопїѧ́ше: свѧ́тъ є҆сѝ, гдⷭ҇и, и҆но́гѡ бо ра́звѣ тебє̀ не зна́ю.
Бг҃оро́диченъ:
И҆збавлѧ́ющаго человѣ́ки преслꙋша́нїѧ, и҆ лю́тагѡ паде́нїѧ, всемꙋ̀ вино́внаго, чⷭ҇таѧ и҆ всенепоро́чнаѧ, родила̀ є҆сѝ.
Конда́къ пра́здника:
И҆ сѣда́ленъ ст҃а́гѡ, гла́съ и҃. Подо́бенъ: Премꙋ́дрости:
Мꙋ́дростїю бж҃їею ᲂу҆разꙋмѣ́лъ є҆сѝ мимоходѧ́щꙋю жи́знь, и҆ ѡ҆ кнѧже́нїи небре́гъ, но на нбⷭ҇ное црⷭ҇тво прите́клъ є҆сѝ, повинꙋ́ѧсѧ сыновствꙋ̀, ꙗ҆́кѡ ѻ҆вча̀ неѕло́биво, безъ пра́вды ноже́мъ закала́емь бы́лъ є҆сѝ: ꙗ҆́кѡ бо свирѣ́пїи ѕвѣ́рїе, безѕло́бива а҆́гнца безъ вины́ тѧ ᲂу҆бива́хꙋ. тѣ́мъ и҆ со а҆́гг҃лы веселѧ́сѧ, мїхаи́ле свѧ́те, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ наде́ждꙋ, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными мольба́ми твои́ми.
Пѣ́снь д҃. І҆рмо́съ:
Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.
Прїи́демъ, бра́тїе, къ честнѣ́й ра́цѣ во́ина хрⷭ҇то́ва и҆ мꙋ́ченика мїхаи́ла, и҆ ѡ҆блобыза́емъ серде́чными ᲂу҆стна́ми, прїе́млюще неѡскꙋ̑дныѧ да́ры ѿ трꙋдополо́жника хрⷭ҇та̀, и҆ сп҃са дꙋ́шъ на́шихъ.
Бж҃їимъ про́мысломъ, и҆ ст҃а́гѡ дх҃а дѣ́телїю, твоѐ ст҃о́е тѣ́ло ѿ гꙋби́тельныѧ страны̀ принесено̀ бы́сть, и҆сточа́ющее на́мъ рѣ́ки и҆сцѣле́нїй, стрꙋѧ́ми крове́й твои́хъ, мїхаи́ле.
Послѣ́довалъ є҆сѝ хрⷭ҇тꙋ̀, и҆ мꙋ́цѣ є҆гѡ̀ ᲂу҆подо́билсѧ є҆сѝ, пребл҃же́нне бг҃оно́се мїхаи́ле, пѣвцы̀ твоѧ̑ сохранѧ́й, и҆ гра́дъ на́шъ застꙋпѝ ѿ нахожде́нїѧ пога́ныхъ, и҆ ѿ всѣ́хъ бѣ́дъ бг҃опрїѧ́тными твои́ми моли́твами.
Бг҃оро́диченъ:
Просвѣтѝ, чⷭ҇таѧ, дꙋшѝ моеѧ̀ ѻ҆́чи, свѣ́тъ роди́вшаѧ, да не пости́гнетъ менѐ грѣхо́внаѧ тма̀ тѧ́жкаѧ, и҆ глꙋбина̀ ѿча́ѧннаѧ покры́етъ мѧ̀: но сама́ мѧ спасѝ, и҆ напра́ви къ тишинѣ̀ бжⷭ҇твеннагѡ хотѣ́нїѧ.
И҆́нъ. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Бл҃года́тїю и҆змла́да въ вѣ́рѣ чи́стѣ воспита́нъ, ча́стыми трꙋды̑ и҆ любо́вїю влⷣцѣ послѣ́довалъ є҆сѝ, и҆ наде́ждею є҆гѡ̀ льсти́ваго врага̀ посрами́лъ є҆сѝ.
Врачевство̀ неистощи́мое ра́ка твоѧ̀ показа́сѧ, бл҃же́нне, и҆ приста́нище небꙋ́рное: всѝ вѣ́рою притека́ющїи ѡ҆брѣта́емъ ѿ ѕлы́хъ и҆збавле́нїе.
Любо́вїю ко хрⷭ҇тꙋ̀ привѧза́емь, тѣ́мъ и҆ да́ра сподо́бльсѧ, стра̑сти разли̑чныѧ и҆сцѣлѧ́ти. сего̀ ра́ди твоѐ соверша́емъ пра́зднество, бг҃омꙋ́дре.
Бг҃оро́диченъ:
Просвѣти́ мѧ, пречⷭ҇таѧ гпⷭ҇жѐ, ѡ҆мраче́ннаго грѣхо́вными страстьмѝ, въ тлѣ́нїи лежа́ща, моли́твами твои́ми свободѝ.
Пѣ́снь є҃. І҆рмо́съ:
Гдⷭ҇и бж҃е на́шъ, ми́ръ да́ждь на́мъ, гдⷭ҇и, бж҃е на́шъ, стѧжи́ ны: гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.
Гдⷭ҇и бж҃е мо́й, мїхаи́лъ вопїѧ́ше, ты̀ ᲂу҆́бѡ, гдⷭ҇и, на́съ ра́ди сме́рти вкꙋси́лъ є҆сѝ, и҆ спа́слъ є҆сѝ ро́дъ человѣ́ческїй твое́ю кро́вїю, хрⷭ҇тѐ бж҃е.
Гдⷭ҇и бж҃е мо́й, сподо́би мѧ̀ прїѧ́ти нбⷭ҇нагѡ селе́нїѧ, и҆ сла́вы неизрече́нныѧ, и҆ въ тлѣ́нныхъ мѣ́стѡ нетлѣ̑ннаѧ пода́ждь, влⷣко, вопїѧ́лъ є҆сѝ, бг҃ови́дче.
Тезоимени́те вы́шнѧгѡ воево́ды, мїхаи́ле, ѻ҆гнезра́чнагѡ, съ ни́мже ᲂу҆молѝ хрⷭ҇та̀ пода́ти ми́ръ наро́дꙋ на́шемꙋ и҆ ᲂу҆тиши́ти вра̑жїѧ стремлє́нїѧ.
Бг҃оро́диченъ:
Оу҆крѣпѝ, влⷣчце, сла́вѧщихъ тѧ̀ на проти̑вныѧ врагѝ, ꙗ҆́кѡ дв҃да на голїа́ѳа, да тебѐ веселѧ́щесѧ воспѣва́емъ: ра́дꙋйсѧ, покро́ве ст҃ы́й, и҆ застꙋ́пнице ро́да на́шегѡ.
И҆́нъ. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Наста̀ всечестны́й пра́здникъ, и҆ свѧще́нное торжество̀ мїхаи́ла сла́внагѡ, носѧ́щагѡ на́мъ ра́дость вѣ́чнꙋю, въ не́йже сла́вимъ гдⷭ҇а просла́вльшаго є҆го̀.
Добродѣ́телей ᲂу҆кра́шенный благолѣ́пїемъ, свѣ́тлый мїхаи́ле, страда́нїемъ вѣнча́всѧ, врага́ же и҆ ꙾сыновца̀[[племянника или внука, в данном случае племянника Георгия Даниловича. Прим. orthlib]] посрами́въ, по хрⷭ҇тѣ̀ прїе́млѧ заколе́нїе.
Слы́шано бы́сть во все́мъ мі́рѣ честно́е и҆ свѧще́нное страда́нїе твоѐ, и҆ всѧ́къ ѧ҆зы́къ составлѧ́етъ сла́вити хрⷭ҇та̀, тебѐ просла́вльшаго.
Бг҃оро́диченъ:
Преста̀ ᲂу҆́бѡ тлѣ́нїе, дв҃а бо родѝ нетлѣ́ннѡ бг҃а сло́ва, па́че є҆стества̀ и҆ сло́ва, дв҃а и҆ по ржⷭ҇твѣ̀ пребы́вши.
Пѣ́снь ѕ҃. І҆рмо́съ:
Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ человѣколю́бецъ, и҆ ᲂу҆пра́ви живо́тъ мо́й, молю́сѧ.
Свѣ́томъ бл҃года́ти ѡ҆зарѧ́емь, страстоте́рпче мꙋ́дре, невозвра́тнѡ ше́ствовалъ є҆сѝ пꙋте́мъ, вводѧ́щимъ къ вы́шнемꙋ і҆ерⷭ҇ли́мꙋ: ст҃ы́й бо дх҃ъ наста́ви тѧ̀, ѡ҆бита́ѧй въ се́рдцѣ твое́мъ, мїхаи́ле.
Тлѣ̑ннаѧ бꙋ́дꙋщими и҆змѣни́лъ є҆сѝ, ꙗ҆́кѡ ме́чь ѻ҆боюдꙋѻ́стръ, воѡрꙋжи́всѧ стра́хомъ хрⷭ҇то́вымъ, го́рькꙋю сме́рть въ ничто́же вмѣни́лъ є҆сѝ, сла́вы вы́шнїѧ жела́ѧ.
Оу҆́мъ тво́й къ бг҃ꙋ впери́въ, наде́ждею и҆ вѣ́рою ᲂу҆крѣпи́всѧ, ꙗ҆́кѡ во́инъ непобѣ́дный, заколе́нїѧ непра́веднагѡ не ᲂу҆боѧ́лсѧ є҆сѝ, мꙋ́дре, бг҃ови́дче мїхаи́ле.
Бг҃оро́диченъ:
Тебѣ̀ припа́дающе, гпⷭ҇жѐ, и҆ вѣ́рою покланѧ́ющесѧ, мо́лимъ тѧ̀: ра́дꙋйсѧ, бг҃облаже́ннаѧ дв҃о, покро́ве и҆ ѡ҆гражде́нїе на́ше, помо́щнице въ бѣда́хъ сꙋ́щымъ, спаси́ ны, не и҆мꙋ́щыѧ по́мощи, на тѧ́ бо надѣ́емсѧ.
И҆́нъ. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Житїѐ вре́менное презрѣ́въ, и҆ ѡ҆ кнѧже́нїи неради́въ свѣ́та сегѡ̀, не воспроти́вльсѧ врагꙋ̀ и҆ сыновцꙋ̀: но па́че на гдⷭ҇а взира́ше мы́слїю.
Свѣ́тлый тво́й пра́здникъ ѡ҆ соверша́ющихъ, бл҃же́нне, моли́сѧ, ѻ҆те́чество твоѐ сохрани́ти ѿ вра̑гъ ненавѣ́тно, и҆ ми́рно строе́нїе дарова́ти наро́дꙋ на́шемꙋ моли́твами твои́ми.
Кнѧже́нїе земно́е, и҆ ца́рское ᲂу҆краше́нїе ѡ҆ста́вивъ, воспрїѧ́лъ є҆сѝ вѣне́цъ и҆зъ бж҃їѧ влⷣчни десни́цы, и҆ со а҆́гг҃лы ликꙋ́еши. молѝ гдⷭ҇а за ны̀, чтꙋ́щыѧ твою̀ па́мѧть.
Бг҃оро́диченъ:
Оу҆сты̀, и҆ по́мысломъ, и҆ се́рдцемъ; пречⷭ҇таѧ, проповѣ́дꙋемъ тѧ̀ веселѧ́щесѧ: тобо́ю бо бг҃ꙋ примири́хомсѧ, ѿринове́ннїи престꙋпле́нїемъ пе́рвѣе пра́ѻтца.
Конда́къ, гла́съ в҃. Подо́бенъ: Вы́шнихъ и҆щѧ̀:
Вы́шнихъ и҆щѧ̀, и҆ земнꙋ́ю сла́вꙋ презрѣ́въ, цр҃ковь бж҃їю ѡ҆багри́лъ є҆сѝ твое́ю кро́вїю, за ню́же и҆ пострада́лъ є҆сѝ, свѧ́те мїхаи́ле, заколе́нїе непра́ведное прїе́мь веселѧ́сѧ. тѣ́мже со а҆́гг҃лы предстоѧ̀ хрⷭ҇тꙋ̀ бг҃ꙋ, молѝ непреста́ннѡ за всѧ̑ ны̀.
І҆́косъ:
Сла́вꙋ возненави́дѣлъ є҆сѝ тлѣ́ннꙋю и҆ мимотекꙋ́щꙋю, и҆ добродѣ́тели ꙗ҆ви́лсѧ є҆сѝ сосꙋ́дъ, сла́вне, ѿ ю҆́ности: и҆ зако́нъ бж҃їй ѿ дꙋшѝ возлюби́въ, и҆ зрѣ́нїе къ жи́зни грѧдꙋ́щей, ѡ҆ че́сти земнѣ́й и҆ сла́сти небре́гъ, нетлѣ́нное црⷭ҇тво воспрїѧ́лъ є҆сѝ: хрⷭ҇то́вѣ за́повѣди послѣ́дꙋѧ, положи́лъ є҆сѝ дꙋ́шꙋ твою̀ за ны̀, и҆ хрⷭ҇то́вѣ стрⷭ҇ти ᲂу҆подо́билсѧ є҆сѝ заколе́на въ ре́бра, и҆ кро́вїю твое́ю и҆зба́вилъ є҆си́ ны пога́ныхъ наше́ствїѧ и҆ го́рькїѧ сме́рти. сегѡ̀ ра́ди вопїе́мъ тѝ: страстоте́рпче мїхаи́ле, со а҆́гг҃лы предстоѧ̀, моли́сѧ за всѧ̑ ны̀.
Пѣ́снь з҃. І҆рмо́съ:
Халде́йскаѧ пе́щь, ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Вели́чїе на́ше и҆ похвала̀, ты̀ є҆сѝ, мїхаи́ле бг҃омꙋ́дре: тобо́ю бо ѿ пога́нскїѧ рабо́ты свободи́хомсѧ. и҆ ны́нѣ молѝ за ро́дъ тво́й и҆ лю́ди, вопїю́щыѧ: бл҃гослове́нъ бг҃ъ ѻ҆тє́цъ на́шихъ.
Ты̀ ᲂу҆подо́билсѧ є҆сѝ мѡѷсе́ю бг҃ови́дцꙋ, сокрꙋше́ннымъ се́рдцемъ молѧ́сѧ ѡ҆ ста́дѣ твое́мъ, и҆зба́вити гра́дъ тво́й и҆ лю́ди ѿ вра́жїѧ рабо́ты, вопїю́щыѧ: бл҃гослове́нъ бг҃ъ ѻ҆тє́цъ на́шихъ.
Всехва́льный гла́съ, и҆ мольбꙋ̀ тебѣ̀ возсыла́емъ, къ ра́цѣ моще́й твои́хъ приходѧ́ще, бл҃же́нне мїхаи́ле: просѝ ми́ра наро́дꙋ на́шемꙋ и҆ дꙋша́мъ на́шымъ ѡ҆ставле́нїѧ грѣхѡ́въ, пою́щымъ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Неиспи́саннаѧ мно́гими прⷪ҇рѡ́ки, не свѣ́дома же бы́сть, дв҃о, нбⷭ҇ными слꙋжа́щими бг҃ꙋ а҆́гг҃лы: ны́нѣ же, тѧ̀ всѝ вѣ́дꙋще бцⷣꙋ, твоеѧ̀ тре́бꙋемъ по́мощи и҆ застꙋпле́нїѧ, бл҃гослове́ннаѧ.
И҆́нъ. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Ле́стїю прелꙋка́вагѡ дре́вле, ѡ҆червлена̀ бы́сть землѧ̀ кро́вїю а҆́велѧ братоꙋбі́йственною рꙋко́ю ка́їна: ны́нѣ же кро́вїю твое́ю ѡ҆кропи́вшисѧ, благоꙋха́нїѧ же́ртвꙋ хрⷭ҇тꙋ̀ приноша́етъ, вопїю́щи: бл҃гослове́нъ бг҃ъ ѻ҆тє́цъ на́шихъ.
Бжⷭ҇твенна и҆ пресвѣ́тлаѧ па́мѧть твоѧ̀, ꙗ҆́кѡ не́бо свѣтоза́рно показа́сѧ, ꙗ҆́кѡ со́лнце свѣтоно́сно просвѣща́ѧ, безъ сꙋмнѣ́нїѧ хрⷭ҇тꙋ̀ вопїю́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.
Кто̀ не ᲂу҆диви́тсѧ, и҆ кто̀ не воспое́тъ и҆ просла́витъ вѣ́рнѡ пресла́внаго мꙋ́ченика хрⷭ҇то́ва мїхаи́ла, хрⷭ҇то́ва ра́ди смире́нїѧ возненави́дѣвша дїадѵ́мꙋ и҆ ца́рство;
Бг҃оро́диченъ:
Тобо́ю на́мъ, дв҃о, свѣ́тъ возсїѧ̀ тє́мнымъ, и҆ ѿпꙋ́стъ плѣнє́ннымъ: ты́ бо родила̀ є҆сѝ зижди́телѧ всѣ́хъ бг҃а, ᲂу҆ негѡ́же и҆спросѝ, пречⷭ҇таѧ, посла́ти вѣ̑рнымъ ве́лїю ми́лость.
Пѣ́снь и҃. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Въ наро́читый де́нь ст҃а́гѡ преставле́нїѧ ра́достнѡ пра́зднꙋемъ, пѣ́снь моле́бнꙋю хрⷭ҇тꙋ̀ возсыла́юще, нетлѣ́ннымъ вѣнце́мъ вѣнча́вшꙋ тѧ̀, прехва́льне мїхаи́ле: просѝ на́мъ ѡ҆ставле́нїѧ грѣхѡ́въ, сла́вѧщымъ тѧ̀ вѣ́рнѡ.
Похва̑льныѧ цвѣ́ты, ꙗ҆́кѡ ца́рскїй вѣне́цъ бг҃омꙋ́дрѣй твое́й главѣ̀ въ па́мѧть прино́симъ, ю҆́же хрⷭ҇то́съ нетлѣ́нїемъ вѣнча̀, преблаже́нне мїхаи́ле: моли́сѧ ѡ҆ ста́дѣ твое́мъ, и҆зба́витисѧ гра́дꙋ твоемꙋ̀ ѿ всѧ́кїѧ бѣды̀.
Лїва́нъ ли го́рꙋ нарече́мъ тѧ̀, бг҃омꙋ́драѧ ѯе́нїе, и҆лѝ фїсѡ́нъ рѣкꙋ̀, добрѣ́йши сапфі́ра, и҆ ка́менїѧ честна́гѡ, блаже́ннаго мїхаи́ла ро́ждшꙋю, и҆́мже просвѣти́сѧ рѡссі́йскаѧ страна̀, и҆́же и҆ мо́литсѧ за на́съ ко гдⷭ҇ꙋ;
Бг҃оро́диченъ:
Горды́ню и҆ шата̑нїѧ низложѝ, и҆ совѣ́ты непра́вєдныѧ кнѧзе́й разорѝ, и҆ зачина́ющыѧ ра́ть погꙋбѝ, ѽ мт҃и бж҃їѧ, пречⷭ҇таѧ дв҃о! вѣ́рныхъ люде́й ро́гъ возвы́си, да тво́й, пречⷭ҇таѧ, пра́здникъ сла́вимъ, бцⷣе дв҃о, во вѣ́ки всѧ̑.
И҆́нъ. І҆рмо́съ:
И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Просїѧ́вши дне́сь пресвѣ́тлаѧ па́мѧть твоѧ̀, пребл҃же́нне, вѣ̑рныѧ созыва́етъ ны̀ на торжество̀, просла́вити терпѣ̑нїѧ твоѧ̑, хрⷭ҇тꙋ́ же вопи́ти: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Тѣ́ло твоѐ ст҃о́е и҆ пребл҃же́нное прїи́мши ст҃а́ѧ цр҃ковь, дне́сь весели́тсѧ съ вѣ́рными, преди̑внаѧ чꙋдеса̀ ви́дѧщи, хрⷭ҇та̀ превозно́симъ во вѣ́ки.
Бг҃оѧвле́нный но́вый страда́лецъ тебѐ, хрⷭ҇тѐ, є҆ди́наго возлюбѝ, и҆ лю́ди наста́ви пѣ́ти тѧ̀, творца̀ всѣ́хъ: благослови́те и҆ превозноси́те є҆го̀ во вѣ́ки.
Бг҃оро́диченъ:
Свѣ́тъ и҆ свѣтода́вца сло́во зачала̀ є҆сѝ, и҆ неизрече́ннѡ родила̀ є҆сѝ пресꙋ́щнаго: дх҃ъ бж҃їй, дв҃о, въ тѧ̀ всели́сѧ. тѣ́мъ тѧ̀ пое́мъ, чⷭ҇таѧ, во вѣ́ки всѧ̑.
Пѣ́снь ѳ҃. І҆рмо́съ:
Чꙋ́жде ма́теремъ дѣ́вство, и҆ стра́нно дѣ́вамъ дѣторожде́нїе: на тебѣ̀, бцⷣе, ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ не преста́ннѡ велича́емъ.
Прїимѝ похвалꙋ̀ ѿ ра̑бъ недосто́йныхъ, и҆ моли́твꙋ ѡ҆ на́съ сотворѝ къ бг҃ꙋ, че́стнѡ творѧ́щихъ твою̀ па́мѧть, да ѿ бѣ́дъ и҆ печа́лей и҆ грѣ̑хъ лю́тыхъ свободи́мсѧ, тѧ̀ велича́юще.
Ꙗ҆́кѡ голꙋби́ца цѣломꙋ́драѧ, на фі́нїѯъ добродѣ́тели возше́лъ є҆сѝ, кри́ла и҆мꙋ́щи свѧщє́нна и҆ позлащє́нна, и҆́миже возлетѣ́въ, въ ра́йстѣй пи́щи водворѧ́ешисѧ, пребл҃же́нне.
Предстоѧ̀ ᲂу҆ престо́ла всѣ́хъ влⷣки, бг҃ови́дче мїхаи́ле, ѡ҆ творѧ́щихъ чⷭ҇тно́е твоѐ пра́зднество, гра́дꙋ на́шемꙋ и҆зба́витисѧ ѿ напа́стей и҆ бѣ́дъ, здра́вїе и҆ побѣ́дꙋ всѣ̑мъ правѡсла́внымъ хрⷭ҇тїа́нѡмъ на проти̑вныѧ врагѝ, и҆спросѝ моли́твами твои́ми.
Бг҃оро́диченъ:
Высо́кїй цр҃ю̀, со ѻ҆ц҃е́мъ сѣдѧ́й, и҆ ѿ серафі̑мъ пое́мый, при́зри на мольбꙋ̀ ма́терню, ю҆́же тѝ за ны̀ дне́сь прино́ситъ. ѡ҆чи́сти грѣхѝ на́шѧ, и҆ спасѝ гра́дъ, и҆ лю́ди ᲂу҆мно́жи, и҆ да́ждь на́мъ здра́вїе тѣлесѝ, и҆ на пога̑ныѧ побѣ́дꙋ, моли́твами ро́ждшїѧ тѧ̀.
И҆́нъ. І҆рмо́съ:
Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Оу҆кра́шенъ бы́въ бжⷭ҇твенными добро́тами, страда̑нїи твои́ми къ бг҃ꙋ восте́клъ є҆сѝ, вѣне́цъ побѣ́ды ѿ негѡ̀ прїе́мь. тѣ́мъ твоѧ̑ пѣвцы̀ помина́й, да тѧ̀ непреста́ннѡ велича́емъ.
Ѿ мла́да во́зраста ѡ҆свѧти́ тѧ вседѣ́тель бг҃ъ, и҆ ко́рмчїѧ и҆зрѧ́дна пла́вающымъ въ мо́ри житїѧ̀ показа́въ. тѣ́мъ согла́снѡ почита́емъ па́мѧть твою̀.
Прїи́мъ бл҃же́нный поко́й, не преста́й молѧ́сѧ, пресла́вне, ст҃ы́хъ бл҃же́нствꙋ причасти́тисѧ на́мъ, чтꙋ́щымъ па́мѧть твою̀, мїхаи́ле, пресла́внꙋю.
Бг҃оро́диченъ:
Бцⷣе дв҃о, ро́ждшаѧ сло́во, па́че словесѐ, зижди́телѧ твоегѡ̀, того̀ молѝ за ны̀, съ си́мъ бл҃же́ннымъ мїхаи́ломъ, вѣ́рнѡ чтꙋ́щыѧ тебѐ, бцⷣе.
Свѣти́ленъ:
Свѣти́ло на́мъ просїѧ́вшее въ послѣ́днее вре́мѧ, просвѣти́ ны, твоѧ̑ пѣвцы̀, ст҃ы́й великомꙋ́чениче мїхаи́ле, и҆ молѝ за ны̀ гдⷭ҇а, чтꙋ́щыѧ па́мѧть твою̀.
Два́жды.
Сла́ва, и҆ ны́нѣ, пра́здника.
На хвали́техъ стїхи̑ры, пра́здника, г҃. И҆ ст҃о́мꙋ, г҃. Гла́съ а҃.
Подо́бенъ: Нбⷭ҇ныхъ чинѡ́въ:
Свѣтоза́рна и҆ свѧ́та, и҆ благоѻбра́зна, ꙳ кнѧ́зѧ же и҆ мч҃ника ꙳ всепра́зднственнаѧ па́мѧть, ꙳ ꙗ҆́же всю̀ зе́млю просвѣща́ющи, ꙳ и҆ мра́къ грѣхо́вный ѿгонѧ́ющи, ꙳ врачева́нїй благода́ть и҆сточа́етъ.
Ка́плѧми крове́й ст҃ы́ми, ꙳ ѡ҆червлени́въ ри̑зы твоѧ̑, свѧ́те мїхаи́ле. ꙳ тѣ́мъ весе́лымъ се́рдцемъ ꙳ па́мѧть твою̀ пра́зднꙋюще, ꙳ мо́лимсѧ непреста́ннѡ, ꙳ да мо́лишисѧ за всѧ̑ ны̀.
Ꙗ҆́кѡ ѕвѣзда̀ свѣ́тлаѧ мі́ръ просвѣща́еши, ꙳ чꙋде́сными блиста́ньми, ꙳ страстоте́рпче мїхаи́ле, ꙳ мра́къ грѣхо́вный ѿгонѧ̀. ꙳ тѣ́мъ восхвалѧ́емъ ра́достнѡ, ꙳ похвалѧ́юще твою̀ па́мѧть.
Сла́ва, гла́съ и҃:
Прїиди́те, дне́сь, собо́ри рѡссі́йстїи, и҆ ви́дите, ꙗ҆́кѡ сꙋ́дъ безъ вины̀ прїе́млетъ мꙋ́ченикъ мїхаи́лъ, ꙗ҆́кѡ а҆́гнецъ безѕло́бивъ заколе́нъ бы́сть ѿ ѻ҆каѧ́ннагѡ кавгады́ѧ, и҆ пове́ржено бы́сть тѣ́ло є҆гѡ̀ на землѝ, и҆ ники́мже врежде́но бы́сть. и҆ се́й ᲂу҆́бѡ вѣнча́сѧ, то́й же безъ па́мѧти поги́бе: и҆ се́й въ мі́рѣ сла́вимый є҆́сть, ѻ҆́нъ же въ гее́ннѣ мꙋ́читсѧ, се́й же хрⷭ҇та̀ бг҃а мо́литъ ѡ҆ дꙋша́хъ на́шихъ.
И҆ ны́нѣ, пра́здника. Славосло́вїе вели́кое, и҆ ѿпꙋ́стъ.
На лїтꙋргі́и: Бл҃жє́нна ѿ канѡ́на пра́здника, пѣ́снь а҃: и҆ свѧта́гѡ, пѣ́снь ѕ҃. Прокі́менъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ къ ри́млѧнѡмъ, зача́ло ч҃ѳ. А҆ллилꙋ́їа. Пра́ведникъ, ꙗ҆́кѡ фі́нїѯъ, процвѣте́тъ: Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.