← претходни дан | Минеј — Новембар | следећи дан →
15 ноября: Святых мучеников и исповедников Гурия, Самона и Авива
Мѣ́сѧца тогѡ́же въ є҃і-й де́нь.
Ст҃ы́хъ мч҃никъ и҆ и҆сповѣ̑дникъ, гꙋ́рїа, самѡ́на и҆ а҆ві́ва.
И҆ прпⷣбнагѡ паі́сїѧ нѧ́мецкагѡ. Слꙋ́жба є҆гѡ̀ пи́сана въ приложе́нїи.
А҆ллилꙋ́їа.
Вѣ́стно бꙋ́ди, ꙗ҆́кѡ а҆́ще слꙋчи́тсѧ нача́ло поста̀ сегѡ̀ въ сꙋббѡ́тꙋ: Въ пѧто́къ ве́чера, на Гдⷭ҇и, воззва́хъ, стїхи̑ры ст҃ы́хъ, на ѕ҃. А҆́ще ли въ недѣ́лю, стїхи̑ры пре́жде ѻ҆ктѡ́иха: и҆ ст҃ы́хъ, г҃. Сла́ва, ст҃ы́хъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха: Сла́ва, ст҃ы́хъ, И҆ ны́нѣ, бг҃оро́диченъ. Ве́черъ, и҆ на ᲂу҆́трени, на Бг҃ъ гдⷭ҇ь, тропа́рь ст҃ы́хъ. Сла́ва, и҆ ны́нѣ, бг҃оро́диченъ.
Въ про́чыѧ же дни̑, ѿ понедѣ́льника до пѧтка̀, пое́мъ а҆ллилꙋ́їа, по́чести ра́ди нача́ла ст҃а́гѡ поста̀. На Гдⷭ҇и, воззва́хъ, пое́мъ стїхи̑ры пре́жде бцⷣы г҃, и҆ ст҃ы́хъ г҃. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Вмѣ́стѡ прокі́мена, пое́мъ а҆ллилꙋ́їа, на гла́съ ѕ҃. На стїхо́внѣ ѻ҆ктѡ́иха. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени вмѣ́стѡ, Бг҃ъ гдⷭ҇ь: пое́мъ А҆ллилꙋ́їа, и҆ трⷪ҇чны: а҆ по ѕ҃-й пѣ́сни конда́къ ст҃ы́хъ.
На Гдⷭ҇и, воззва́хъ, стїхи̑ры, гла́съ д҃. Поⷣ: Да́лъ є҆сѝ зна́менїе:
А҆ві́въ всемꙋ́дрый, ꙳ и҆ самѡ́нъ чꙋ́дный, ꙳ и҆ гꙋ́рїй сла́вный, ꙳ ѻ҆́бщїй соста́вивше вѣ̑рнымъ ли́къ, ꙳ въ ра́дости ны́нѣ сликовствꙋ́ютъ на́мъ страстоте́рпцы и҆ свеселѧ́тсѧ: ꙳ дꙋша́мъ бо мꙋ́ченичєскимъ ꙳ ѿ бг҃а сїѐ даде́сѧ, ꙳ здѣ̀ быва́ємаѧ разꙋ́мнѡ зрѣ́ти.
Болѣ̑зни претерпѣ́вше, ꙳ нестерпи́мыхъ мꙋ́къ, и҆ до́блественнѡ пострада́вше, ꙳ трⷪ҇цы равночи́сленнїи, ꙳ самѡ́не и҆ а҆ві́ве и҆ гꙋ́рїе бг҃омꙋ́дре, ꙳ вѣ́чнагѡ и҆ кра́снагѡ насыща́етесѧ ны́нѣ наслажде́нїѧ, ꙳ трꙋдѡ́въ воздаѧ́нїе возмѣрѧ́ющꙋ ва́мъ хрⷭ҇тꙋ̀, ꙳ є҆го́же те́плѣ моли́те, ꙳ спасти́сѧ дꙋша́мъ на́шымъ.
Ко приста́нищꙋ нево́лненномꙋ, и҆ къ жи́зни немѧте́жнѣй, ꙳ и҆ зати́шїю благоꙋти́шномꙋ, ꙳ страстоте́рпцы мч҃ницы приста́вше ꙳ превѣ́чнꙋющемꙋ безстра́стнагѡ пребыва́нїѧ, ꙳ и҆ до́льнее ны́нѣ и҆змѣни́сте, ꙳ трꙋдѡ́въ воздаѧ̑нїѧ и҆ болѣ́зней, ꙳ по́чєсти ѿ бг҃а прїи́мше ꙳ досто́йнѣ, бл҃же́ннїи.
И҆́ны стїхи̑ры бцⷣы, гла́съ и҆ подо́бенъ то́йже. А҆́ще ли а҆ллилꙋ́їа пое́мъ сі́и стїхи̑ры пре́жде:
Ѡ҆дождѝ мнѣ̀, влⷣчце, ꙳ твоеѧ̀ ми́лости бе́зднꙋ, ꙳ и҆ ѡ҆па́льшеесѧ зно́емъ страсте́й се́рдце моѐ, ꙳ ꙗ҆́кѡ ми́лостива напо́й, ѻ҆трокови́це, ꙳ и҆ ᲂу҆миле́нїѧ ка̑пли точи́ти ꙳ непреста́ннѡ сотворѝ, молю́сѧ, ꙳ и҆́миже ᲂу҆тѣше́нїѧ сподо́блюсѧ, чⷭ҇таѧ, ꙳ є҆́же полꙋчи́ти и҆́мꙋтъ, и҆̀же и҆́скреннѡ пла́кавшїисѧ.
Де́мѡнскими коле́блема прилѡ́ги, ꙳ и҆ въ ро́въ поги́бели рѣ́ема ꙳ ᲂу҆ще́дри, влⷣчце, ꙳ и҆ ᲂу҆тверди́ мѧ на ка́мени добродѣ́телей, ꙳ и҆ совѣ́ты врагѡ́въ разори́вши, ꙳ сподо́би мѧ̀ твори́ти повелѣ̑нїѧ ꙳ твоегѡ̀ сн҃а и҆ бг҃а на́шегѡ, ꙳ ꙗ҆́кѡ да полꙋчꙋ̀ ѡ҆ставле́нїе ꙳ въ де́нь сꙋда̀.
Скве́рнꙋ ѡ҆мы́й ꙳ ѻ҆каѧ́ннагѡ се́рдца моегѡ̀, бцⷣе всепѣ́таѧ, ꙳ и҆ всѧ̑ ᲂу҆ѧзвлє́нїѧ, и҆ гноє́нїѧ, ꙳ ꙗ҆̀же ѿ грѣха̀, ѡ҆чи́сти, чⷭ҇таѧ, ꙳ и҆ ᲂу҆ма̀ моегѡ̀ ᲂу҆тишѝ нестоѧ́нїе, ꙳ ꙗ҆́кѡ да си́лꙋ твою̀ ꙳ и҆ вели́кое защище́нїе велича́ю стра́стный ꙳ и҆ неключи́мый ра́бъ тво́й.
Сла́ва, и҆ ны́нѣ, бг҃оро́диченъ:
Сла́бость и҆ ᲂу҆ны́нїе, ꙳ дв҃ома́ти всенепоро́чнаѧ, ꙳ дꙋшѝ моеѧ̀ преложѝ въ здра́вїе и҆ си́лꙋ, ꙳ стра́хомъ и҆ любо́вїю ꙳ твори́ти же и҆ дѣ́ѧти ѡ҆правда̑нїѧ хрⷭ҇тѡ́ва: ꙳ ꙗ҆́кѡ да и҆збѣ́гнꙋ ѻ҆гнѧ̀ нестерпи́магѡ, ꙳ и҆ жре́бїй нбⷭ҇ный, ꙳ и҆ жи́знь непрехо́днꙋю ꙳ тобо́ю воспрїимꙋ̀, веселѧ́сѧ всегда̀.
А҆́ще въ сре́дꙋ, и҆лѝ въ пѧто́къ, крⷭ҇тобг҃оро́диченъ. Поⷣ: Ꙗ҆́кѡ до́блѧ:
Распина́ема хрⷭ҇та̀ чл҃вѣколю́бца ꙳ ви́дѧщи, пречⷭ҇таѧ, ꙳ и҆ ре́бра и҆скопава́ема копїе́мъ, ꙳ пла́чꙋщи, вопїѧ́ше: ꙳ что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ; и҆ тщи́шисѧ безча́дствовати мѧ̀, вселюбе́знѣйшїй: ᲂу҆дивлѧ́юсѧ, бл҃гоꙋтро́бне, твоемꙋ̀ во́льномꙋ распѧ́тїю.
А҆́ще ли Бг҃ъ гдⷭ҇ь: Сла́ва, гла́съ в҃. Самогла́сенъ:
Є҆де́съ весели́тсѧ, ꙗ҆́кѡ ра́кою ст҃ы́хъ ѡ҆богати́сѧ, гꙋ́рїа, самѡ́на и҆ а҆ві́ва, и҆ хрⷭ҇толюби́вꙋю па́ствꙋ созыва́ѧ, вопїе́тъ: прїиди́те, мꙋчениколю́бцы, просвѣти́тесѧ въ па́мѧти свѣ́тлѣй: прїиди́те ᲂу҆́бѡ, празднолю́бцы, возвесели́тесѧ. прїиди́те и҆ ви́дите свѣти̑ла нбⷭ҇наѧ, на землѝ жи́тельствовавшыѧ. прїиди́те, и҆ ᲂу҆слы́шите, каковꙋ̀ сме́рть го́рькꙋю до́блїи а҆дама́нти под̾ѧ́ша, безконе́чныѧ ра́ди жи́зни. тѣ́мже порꙋ̑чницы сꙋ́ще и҆́стины, дѣви́цꙋ спасо́ша, жи́вꙋ во гро́бъ вве́рженꙋ, и҆ тѣ́хъ небре́гшаго всескве́рнаго па́гꙋбѣ преда́ша, ꙗ҆́кѡ ᲂу҆бі́йцꙋ и҆ неми́лостивна. и҆ прилѣ́жнѡ мо́лѧтъ ст҃ꙋ́ю трⷪ҇цꙋ и҆зба́витисѧ ѿ тлѝ и҆ и҆скꙋше́нїй, и҆ всѧ́ческихъ бѣ́дъ, вѣ́рою творѧ́щымъ па́мѧть и҆́хъ.
И҆ ны́нѣ, бг҃оро́диченъ:
На стїхо́внѣ ѻ҆ктѡ́иха. Сла́ва, гла́съ в҃. Самогла́сенъ:
Прїиди́те, мꙋчениколю́бцы всѝ, хрⷭ҇то́вы ѻ҆рꙋ́жники пѣ́сньми почти́мъ, гꙋ́рїа и҆ а҆ві́ва и҆ самѡ́на, ꙗ҆́кѡ пресла́внѡ дѣ́йствꙋютъ чꙋдеса̀: клѧ́твы бо не презрѣ́ша предста́вити ѻ҆трокови́цꙋ, но, и҆сполнѧ́юще проше́нїе, дѣви́цꙋ спасо́ша, пребеззако́нномꙋ го́тѳинꙋ мще́нїе сотвори́вше. тѣ́хъ моли́твами, хрⷭ҇тѐ бж҃е, спаси́ ны, ꙗ҆́кѡ бла́гъ и҆ чл҃вѣколю́бецъ.
И҆ ны́нѣ, бг҃оро́диченъ. Тропа́рь, гла́съ є҃:
Чꙋдеса̀ ст҃ы́хъ твои́хъ мч҃никъ, стѣ́нꙋ неѡбори́мꙋ на́мъ дарова́вый, хрⷭ҇тѐ бж҃е: тѣ́хъ моли́твами совѣ́ты ꙗ҆зы́кѡвъ разорѝ, цр҃ковь ст҃ꙋ́ю ᲂу҆крѣпѝ, ꙗ҆́кѡ є҆ди́нъ бл҃гъ и҆ чл҃вѣколю́бецъ.
На ᲂу҆́трени ѻ҆́ба канѡ́на ѻ҆ктѡ́иха:
И҆ ст҃ы́хъ канѡ́нъ на д҃, є҆гѡ́же краегране́сїе:
Трѝ кꙋ́пнѡ глаго́лющыѧ хвалю̀ премꙋ́дреннѡ. Творе́нїе ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Трⷪ҇цы є҆динонача́лїе, ст҃і́и, бг҃осло́вѧще че́стнѡ, многонача́лїѧ нестоѧ́ннꙋю мглꙋ̀ ᲂу҆до́бнѡ разрꙋши́сте, восто́ка многосвѣ́тлїи ꙗ҆́коже ѕвѣ́зды возсїѧ́вше.
Трїѐ и҆сповѣ̑дницы, бл҃года́тїю просвѣща́еми нача́льныѧ трⷪ҇цы ꙗ҆́вственнѡ, ле́сть многобо́жнꙋю, терпѣли́внѡ противле́нїе ꙗ҆влѧ́юще, и҆стреби́ша.
Ва́съ ᲂу҆́бѡ сыноположи́въ, сла́внїи, любо́вїю є҆сте́ственный сы́нъ, ны́нѣ є҆мꙋ̀ наслѣ́дїю дае́мꙋ ꙗ҆́вѣ, ꙗ҆́кѡ бл҃гоꙋтро́бенъ, снаслѣ́дники показа̀, и҆ црⷭ҇твїѧ соприча́стники.
Бг҃оро́диченъ:
Мꙋ́дрости премꙋ́дростныѧ ски́нїѧ была̀ є҆сѝ, всенепоро́чнаѧ: сво́й бо хра́мъ ѿ твои́хъ пречⷭ҇тыхъ крове́й, чⷭ҇таѧ, созда́ти благоволѝ на спасе́нїе дꙋ́шъ на́шихъ.
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Тѣ́ло мꙋ́камъ во́лею и҆ лю̑тымъ ра́намъ преда́ша хрⷭ҇тѡ́вы и҆сповѣ̑дницы и҆ ᲂу҆гѡ́дницы.
И҆зба́витисѧ ѿ лю́тыхъ грѣхо́вныхъ пѡ́мыслъ, ст҃і́и, ва́шꙋ па́мѧть вѣ́рою соверша́ющымъ ᲂу҆моли́те.
На дре́вѣ терпѣли́внѡ воздви́жени честні́и свидѣ́телїе, всеблагоче́стнѡ невре́днѡ и҆сповѣ́данїе соблюдо́ша.
Бг҃оро́диченъ:
Цѣле́нїй тѧ̀ и҆сто́чникъ въ твою̀ ᲂу҆тро́бꙋ вше́дый показа̀, мт҃и бж҃їѧ пречⷭ҇таѧ: мою̀ ᲂу҆́бѡ дꙋ́шꙋ и҆сцѣлѝ.
Сѣда́ленъ, гла́съ и҃. Подо́бенъ: Премꙋ́дрости:
Крⷭ҇то́мъ воѡрꙋжи́вшесѧ хрⷭ҇то́вымъ, въ не́мъ мꙋчи́телей всю̀ крѣ́пость мꙋ́жески низложи́сте, ꙗ҆́кѡ вѣ́ры побѡ́рницы: безбо́жїе всѐ і҆́дѡльское ѡ҆бличи́сте, и҆ трⷪ҇цꙋ, ст҃і́и, ᲂу҆се́рднѡ проповѣ́давше. тѣ́мъ досто́йнѡ ѿ неѧ̀ вѣнцы̀ побѣ́ды прїѧ́сте, ꙗ҆́кѡ зако́ннѡ пострада́вше, страстоте́рпцы всесла́внїи, моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти пра́зднꙋющымъ любо́вїю свѧтꙋ́ю па́мѧть ва́шꙋ.
Сла́ва, и҆́нъ, гла́съ и҃. Подо́бенъ то́йже:
Хрⷭ҇тꙋ̀ порабо́тавше мꙋ́ченически, порабо́тисте ле́сть мꙋчи́тельскꙋю, непорабоще́ннꙋ и҆мꙋ́ще дꙋ́шꙋ и҆ мꙋ́дрость. и҆́бо трⷪ҇чною вѣ́рою ᲂу҆ѧзви́вшесѧ, прехва́льнїи, многобо́жїѧ сла́вꙋ несла́внꙋю ѡ҆бличи́сте. тѣ́мъ, ꙗ҆́кѡ ѕвѣ́зды, свѣ́тлѡ въ мі́рѣ блиста́нїемъ сїѧ́ете чꙋде́съ, бл҃же́ннїи, страстоте́рпцы всехва́льнїи: моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть ва́шꙋ.
И҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Трⷪ҇цы равночи́сленнїи вѣнє́чницы, трисїѧ́нною свѣще́ю, ны́нѣ соверша́ющыѧ па́мѧть, всесщ҃е́ннꙋю тѣ́хъ ѡ҆зарѧ́ютъ, всѣ̑мъ и҆сцѣлє́нїѧ подаю́ще.
Съ благоговѣ́нїемъ претеце́мъ къ свѣтоно́снѣй и҆ свѣтоза́рнѣй, бг҃омꙋ́дрїи, ра́цѣ мч҃никъ. то́читъ бо врачева̑нїѧ вѣ́рою зовꙋ́щымъ: сла́ва си́лѣ твое́й, гдⷭ҇и.
И҆сповѣ́дающе бжⷭ҇твенное строе́нїе и҆ па́че ᲂу҆ма̀ та́инство, бг҃осло́вными, ѧ҆зы̑ки всѐ безбо́жїе мꙋчи́телей бж҃е́ственнїи и҆ всемꙋ́дрїи и҆сповѣ̑дницы попра́ша.
Бг҃оро́диченъ:
Па́че ᲂу҆ма̀ родила̀ є҆сѝ, ѽ дв҃о! и҆ по ржⷭ҇твѣ̀ ꙗ҆ви́ласѧ є҆сѝ двⷭ҇твꙋющи па́ки. тѣ́мъ немо́лчными гла̑сы, ра́дꙋйсѧ, тебѣ̀, влⷣчце, вѣ́рою несомнѣ́нною вопїе́мъ.
Пѣ́снь є҃. І҆рмо́съ:
Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Свѣ́тлостїю ꙗ҆́вѣ подвигѡ́въ сїѧ́юще, посрами́ша мꙋчи́телей свирѣ́пый нра́въ, вѣ́ры побѡ́рницы.
Во всѧ̑ ꙗ҆́вственнѡ вселе́нныѧ концы̀ чꙋдеса̀ мч҃никъ проповѣ́дашасѧ, и҆ всѧ̑ вѣ́рою ᲂу҆тверди́ша.
Ꙗ҆́коже землѧ̀ блага́ѧ, благода́ти сѣ́мена прїе́мши, житїе́мъ трꙋдолю́бнѡ бога́тство, блаже́ннїи, содѣ́ѧша.
Бг҃оро́диченъ:
Є҆ди́нъ благі́й, пꙋчи́ною благосты́ни всѧ́чєскаѧ, бг҃омт҃и, содержа́й, твои́ми ѻ҆б̾ѧ̑тїи держа́тисѧ сподо́би.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Зако́ннѡ, ꙗ҆́кѡ до́брїи во́ини, бг҃омꙋ́дрїи, ᲂу҆держа́вше всѧ̑, и҆ ꙗ҆́снѡ вѣ́рꙋ соблю́дше, бжⷭ҇твенныѧ пра́вды прїѧ́сте вѣнцы̀.
Пре́жде ᲂу҆́бѡ а҆ввакꙋ́мъ высо́цѣ возвыша́етсѧ влⷣчнимъ повелѣ́нїемъ: чре́зъ ва́съ же ѻ҆трокови́ца мꙋ́чима, бг҃оглаго́ливїи, къ воспита́вшей возврати́сѧ.
Сїѧ́етъ ра́ка мч҃никъ чꙋдєсы̀, и҆ рѣ́ки и҆сточа́етъ и҆сцѣле́нїй всѣ̑мъ, приходѧ́щымъ вѣ́рою, и҆ тѣ́хъ терпѣ́нїю дивѧ́щымсѧ.
Бг҃оро́диченъ:
Тѧ̀ є҆ди́нꙋ посредѣ̀ те́рнїѧ ѡ҆брѣ́тъ, ꙗ҆́кѡ чистѣ́йшїй крі́нъ, и҆ во ᲂу҆до́лїихъ цвѣ́тъ, ѽ бг҃ома́ти, жени́хъ ᲂу҆́мный въ тѧ̀ всели́сѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Съ высоты̀, мꙋ́дрїи, бл҃года́ть прїе́мше, сꙋ́щымъ во и҆скꙋше́нїихъ предстоитѐ, всехва́льнїи: тѣ́мже ѻ҆трокови́цꙋ, ст҃і́и, ѿ сме́рти го́рькїѧ и҆зба́висте: вы́ бо вои́стиннꙋ є҆стѐ є҆де́сꙋ сла́ва и҆ мі́рꙋ ра́дость.
І҆́косъ:
Вра́жїѧ мѧ̀ рабо́ты и҆зба́ви, і҆и҃се жизнода́вче, твои́хъ страда́лєцъ мольба́ми ᲂу҆молѧ́емь, ꙗ҆́кѡ да непорабоще́ннꙋ стѧжа́въ ѿ страсте́й дꙋ́шꙋ мою̀ и҆ тѣ́ло, восхвалю̀ тѣ́хъ скорѣ́йшꙋю по́мощь, ꙗ҆́коже во гро́бѣ затворе́ннаѧ мꙋ́жа лꙋка́вствїемъ, и҆ сїю̀ ско́рѡ предвари́вше ѿ сме́рти и҆зба́виша, зовꙋ́щꙋ: є҆де́сꙋ сла́ва, и҆ мі́рꙋ ра́дость.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
А҆враа̑мскїѧ въ пещѝ дѣ́ти и҆зба́вивый, сы́й и҆ стра́ннꙋю ѻ҆трокови́цꙋ лю́тагѡ ѡ҆бстоѧ́нїѧ спасѐ, хода́тайствомъ ны́нѣ ст҃ы́хъ ᲂу҆гѡ́дникъ, ꙗ҆́кѡ бл҃гоꙋтро́бенъ.
Сꙋро́вѣйшагѡ безчеловѣ́чїѧ мꙋ́кꙋ да́вый, всѣ́хъ ѕѡ́лъ а҆́бїе и҆стѧ́занъ ᲂу҆бі́йца ѕлоимени́тый сꙋдо́мъ пра́веднымъ твои́мъ, сло́ве бж҃їй, мꙋ́дросте и҆ си́ла.
Оу҆крѣплѧ́ема къ ва́мъ наде́ждею, сла́внїи, ѻ҆трокови́ца, заключе́ннаѧ во гро́бѣ съ ме́ртвыми, ча́ѧнїѧ не погрѣшѝ, зовꙋ́щи: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Бг҃оро́диченъ:
Ꙗ҆́кѡ новосмѣше́ное и҆ свѣтоза́рное пꙋща́ѧ зерца́ло, зарю̀ бжⷭ҇твеннагѡ, дв҃о, сїѧ́нїѧ, приложи́вшꙋюсѧ тебѣ̀ вмѣсти́ла є҆сѝ. бл҃гослове́нна ты̀ въ жена́хъ, всенепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Всемі́рный дне́сь на́мъ наста̀ пра́здникъ мч҃никъ хрⷭ҇то́выхъ, ѡ҆зарѧ́ющъ благода́тїю чꙋде́съ преходѧ́щыѧ вѣ́рою и҆ ра́достїю дꙋхо́вною, и҆ любо́вїю зовꙋ́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Оу҆до́бнѡ и҆сповѣ̑дницы твоегѡ̀ бжⷭ҇тва̀ всѐ ᲂу҆праздни́ше безбо́жїе, влⷣко, мꙋчи́телей не ᲂу҆боѧ́вшесѧ преще́нїй ѕлоꙋ́мныхъ, вѣ́рою ᲂу҆крѣплѧ́еми, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Всемꙋ́дрїи и҆сповѣ̑дницы, предстоѧ́ще бжⷭ҇твенномꙋ повелѣ́нїю, врагѡ́въ полкѝ побѣжда́ющїи, мече́мъ закала́еми, побѣ́дꙋ пресла́внѡ ꙗ҆́вѣ и҆ пресїѧ́ющꙋ показа́ша: па́дающе бо проти̑вныѧ побѣди́ша.
Бг҃оро́диченъ:
Є҆стествы̀ ви́димаго двѣма̀ хрⷭ҇та̀ родила̀ є҆сѝ, є҆ди́нꙋ носѧ́ща ꙗ҆́вѣ ѵ҆поста́сь сло́жнꙋ бжⷭ҇тва̀ и҆ человѣ́чества, сте́кшꙋсѧ є҆сте́ственномꙋ и҆́стиннѡ по соедине́нїю: тѣ́мъ тѧ̀ благослови́мъ, марі́е бг҃оневѣ́стнаѧ.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Словесє́мъ послѣ́дꙋюще бжⷭ҇твєннымъ и҆ бг҃одохновє́ннымъ хрⷭ҇тѡ́вымъ, и҆сповѣ̑дницы бг҃освѣ́тлїи, крⷭ҇тъ на ра́мена, ра́дꙋющесѧ, взѧ́сте, жизнонѡ́снымъ стопа́мъ послѣ́дꙋюще, достосла́внїи.
Всемꙋ̀ свѣ́тꙋ трⷪ҇цы съ весе́лїемъ до́блїи и҆сповѣ̑дницы вмѣ́щшесѧ, подвигѡ́въ чє́сти воспрїима́ютъ, безпло́тныхъ чинѡ́въ сподо́бльшесѧ соводворе́нїѧ.
Ны́нѣ не въ зерца́лѣ зритѐ бл҃же́нныхъ надє́жды, и҆сповѣ̑дницы сп҃сѡвы: и҆́стины же па́че, всемꙋ́дрїи, добро́тꙋ зритѐ, вѣнцено́сцы всечестні́и.
Ꙗ҆́кѡ пребжⷭ҇твенныѧ трⷪ҇цы ꙗ҆́вѣ равночи́сленнїи ꙗ҆́вльшесѧ, и҆сповѣ̑дницы бг҃оглаго́лїи, тоѧ̀ зарѧ́ми просвѣща́етесѧ, ꙗ҆́кѡ тоѧ̀ ра́ди пострада́вше, жи́зни нетлѣ̑нныѧ ны́нѣ ᲂу҆лꙋчи́ша.
Бг҃оро́диченъ:
Пло́тїю прїитѝ восхотѣ́въ ᲂу҆краси́вый всѧ̑ сло́во, въ тѧ̀ всели́сѧ, є҆ди́нꙋ ст҃ѣ́йшꙋ всѣ́хъ ѡ҆брѣ́тъ, и҆ бцⷣꙋ вои́стиннꙋ ꙗ҆вѝ, мт҃и дв҃о.
Свѣти́ленъ. Подо́бенъ: Нб҃о ѕвѣзда́ми:
И҆́же ѿ гро́ба ѻ҆трокови́цꙋ и҆зба́вльше дре́вле, гꙋ́рїе, и҆ самѡ́не, и҆ а҆ві́ве: мч҃ницы хрⷭ҇то́вы, предвари́те, ꙗ҆́кѡ ѿ гро́ба прегрѣше́нїй ны̀ и҆збавлѧ́юще.
Бг҃оро́диченъ:
Крѣ́пкимъ твои́мъ покро́вомъ ѿ навѣ̑тъ вра́жїихъ ны̀, чⷭ҇таѧ, твоѧ̑ рабы̑ сохранѝ невреди̑мы, тѧ́ бо стѧжа́хомъ є҆ди́нꙋ прибѣ́жище въ бѣда́хъ.
На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆пⷭ҇лъ ко є҆фесе́ѡмъ, зача́ло сл҃г. А҆ллилꙋ́їа, гла́съ д҃. Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе лꙋкѝ, зача́ло ѯ҃д. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.