← претходни дан | Минеј — Новембар | следећи дан →
9 октября: Святых мучеников Онисифора и Порфирия, и преподобной матери нашей Матроны. Преподобной Феоктисты Лезвийской
Мѣ́сѧца тогѡ́же въ ѳ҃-й де́нь.
Ст҃ы́хъ мч҃никъ, ѻ҆нисі́фора и҆ порфѵ́рїа: и҆ прпⷣбныѧ ма́тере на́шеѧ матрѡ́ны:
И҆ прпⷣбныѧ ѳеокті́сты, ꙗ҆́же ѿ ле́звы.
И҆ пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ нарица́емыѧ скоропослꙋ́шница.
Слꙋ́жба є҆ѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры мч҃никѡвъ. Гла́съ и҃.
Подо́бенъ: Ѽ пресла́внагѡ чꙋдесѐ!
Мч҃ниче страда́льче, ꙳ блаже́нне ѻ҆нисі́форе, ꙳ хрⷭ҇та̀ бг҃а и҆сповѣ́далъ є҆сѝ, ꙳ стражда̀ крѣпча́йше, ꙳ беззако́ннꙋющихъ предъ сꙋди́щемъ, ꙳ ра̑ны ꙗ҆́звъ претерпѣ́въ ꙳ и҆ пожже́нїѧ всегѡ̀ тѣлесѐ. ꙳ тѣ́мже вѣнча́лсѧ є҆сѝ побѣ́ды вѣнце́мъ, ꙳ живонача́льнѣйшею рꙋко́ю, всехва́льне.
Мч҃ниче страда́льче порфѵ́рїе, ꙳ крове́й ѡ҆багре́ньми себѣ̀ пома́залъ є҆сѝ порфѵ́рꙋ, ꙳ бл҃года́тїю и҆ си́лою дх҃а, ꙳ въ ню́же ѡ҆дѣ́ѧвсѧ, ꙗ҆ви́лсѧ є҆сѝ свѣтлѣ́йшїй, ꙳ сца́рствꙋѧ ца́рствꙋющемꙋ, ꙳ є҆ди́номꙋ бг҃ꙋ на́шемꙋ во вѣ́ки, сла́вне: ꙳ є҆го́же прилѣ́жнѡ всегда̀ молѝ, ꙳ є҆́же спасти́сѧ всѣ̑мъ на́мъ.
Мч҃ницы достосла́внїи, ꙳ за всѣ́хъ жи́знь ꙳ свѧще́ннѡ ᲂу҆мерщвлѧ́еми, ꙳ на сковрадѣ̀ ра́дꙋющесѧ ꙳ разжже́ннѣй простро́стесѧ, ꙳ и҆ привѧ́зани ко́ньми влачи́ми, бл҃же́нный коне́цъ прїѧ́сте. ꙳ тѣ́мъ прославлѧ́етесѧ и҆ ᲂу҆бл҃жа́етесѧ, ѡ҆ на́съ всегда̀ молѧ́щесѧ, приснобл҃же́ннїи. ꙳
И҆́ны стїхи̑ры прпⷣбныѧ, гла́съ д҃: Подо́бенъ: Ꙗ҆́кѡ до́блѧ:
Пло́ти и҆гра̑нїѧ ꙳ по́стными пѡ́двиги ꙳ дꙋшѝ любоче́стнѣ покори́ла є҆сѝ, ꙳ и҆ хрⷭ҇тꙋ̀ послѣ́довала є҆сѝ, ꙳ и҆ посредѣ̀ по́стникѡвъ всели́ласѧ є҆сѝ всеговѣ́йнѡ, ѽ матрѡ́но, ꙳ ᲂу҆гаша́ющи распалє́нїѧ сластна̑ѧ ꙳ бж҃е́ственными тꙋ́чами сле́зъ, ꙳ и҆ ѕѣ́льнѣйшее жела́нїе ꙳ къ зижди́телю возжига́ющи.
Свѧще́нное жили́ще ꙳ во мно́гихъ по́льзꙋ бг҃ꙋ воздви́гла є҆сѝ, ꙳ бы́вши хра́мъ дх҃а, всемꙋ́драѧ, ꙳ чистото́ю дꙋше́вною, ꙳ и҆ пꙋтево́дствила є҆сѝ дꙋ́шы ꙳ къ полє́знымъ подвигѡ́мъ пѡ́стнымъ, ꙳ и҆ привела̀ є҆сѝ сїѧ̑, ꙗ҆́коже вѣ́но спасє́ны, ꙳ ѽ матрѡ́но, влⷣцѣ: ꙳ съ ни́миже вѣ́рою тѧ̀ почита́емъ.
Ѻ҆трокѡви́цы возлюби́ша ꙳ невѣ́стника и҆ гдⷭ҇а, ꙳ ᲂу҆че́нїю твоемꙋ̀ покарѧ́ющыѧсѧ, ꙳ и҆ плотскꙋ́ю презрѣ́вше сла́бость въ дꙋ́сѣ, ꙳ ᲂу҆се́рдїемъ стра̑сти благоче́стнѡ ᲂу҆держа́ша, ꙳ и҆ введо́шасѧ съ тобо́ю, ꙳ ѽ матрѡ́но, ꙳ въ черто́гъ нбⷭ҇ный и҆ бжⷭ҇твенный, ꙳ всегда̀ веселѧ́щесѧ.
Сла́ва, и҆ ны́нѣ, бг҃оро́диченъ. Подо́бенъ: то́йже:
Ꙗ҆́же бг҃а невмѣсти́маго ꙳ во чре́вѣ твое́мъ вмѣсти́вшаѧ, ꙳ чл҃вѣколю́бнѡ чл҃вѣ́ка бы́вша, ꙳ и҆ на́ше смѣше́нїе и҆зъ тебє̀ прїи́мша ꙳ и҆ ѡ҆божи́вша ꙗ҆́вѣ, не пре́зри менє̀, всечⷭ҇таѧ, ны́нѣ скорбѧ́ща: ꙳ но ᲂу҆ще́дри ско́рѡ, ꙳ и҆ разли́чныѧ вражды́ же и҆ вре́да лꙋка́вагѡ свободѝ.
Крⷭ҇тобг҃оро́диченъ. Подо́бенъ:
На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́ннѣйше; ꙳ сїѧ̑ тѝ невѣ́рный собо́ръ воздадѐ пребеззако́нный, ꙳ и҆́же мно́гихъ твои́хъ чꙋде́съ наслади́выйсѧ; ꙳ но сла́ва неизглаго́ланномꙋ соше́ствїю твоемꙋ̀, влⷣко.
Тропа́рь мч҃никѡвъ, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Сла́ва, прпⷣбныѧ, гла́съ и҃:
Въ тебѣ̀, ма́ти, и҆звѣ́стнѡ спасе́сѧ є҆́же по ѻ҆́бразꙋ: прїи́мши бо кре́стъ послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ, презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ, ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, прпⷣбнаѧ матрѡ́но, дꙋ́хъ тво́й.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Прпⷣбныѧ ѳеокті́сты вослѣ́дованїе пое́тсѧ на повече́рїи.
Канѡ́нъ,
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.
Ꙗ҆́кѡ чꙋ́дна твоѧ̀ жи́знь и҆ житїѐ, а҆́гг҃лѡмъ каса́ющисѧ невеще́ствєннымъ, но́вымъ и҆ неѻбы́чнымъ нра́вомъ, тѣсното́ю па́че є҆стества̀, ѳеокті́сто, жи́тельства твоегѡ̀.
Ѿ младе́нства мїрскꙋ́ю пи́щꙋ ѿню́дъ возненави́дѣла є҆сѝ и҆ плотскꙋ́ю сла́сть, по́стъ возлюби́вши, и҆́мже ѡ҆бꙋзда́ла є҆сѝ стремлє́нїѧ всѧ̑ тѣлє́снаѧ.
Благꙋ́ю зе́млю дꙋшѝ твоеѧ̀ во мла́дости неѕло́бїѧ ѡ҆брѣ́те сѣ́ѧтель благи́хъ, и҆ вложѝ сѣ́мѧ жи́зни, собра̀ пло́дъ стори́чествꙋющїй.
Бг҃оро́диченъ:
Тѧ̀, пречⷭ҇тꙋю ѻ҆трокови́цꙋ, и҆ вѣ̑рнымъ крѣ́пкое застꙋпле́нїе, ѳеокті́ста, ѿ дꙋшѝ и҆здѣ́тска возлюби́вши, всѣ̑мъ добродѣ́телемъ па́че є҆стества̀ прїѧ́телище бы́сть.
Пѣ́снь г҃. І҆рмо́съ:
Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Не ᲂу҆таи́сѧ лꙋка́вагѡ, бг҃оꙋго́днѣ живꙋ́щи: сегѡ̀ ра́ди содѣва́етъ на плещѝ твоѝ ѕла̑ѧ, и҆ мно́жество а҆ра́влѧнъ наво́дитъ ле́звѣ, ѻ҆те́чествꙋ твоемꙋ̀.
Плѣне́нꙋ тѧ̀ враги̑, пра́ведныхъ вра́гъ преда́ти тщи́тсѧ: но бли́зъ и҆зба́витель, и҆́же, а҆́бїе ѿ ме́рзскихъ и҆схи́тивъ, чи́стꙋ себѣ̀ соблюдѐ.
Въ па́рѣ ѻ҆́стровѣ врагѡ́въ и҆збѣ́гши рꙋкѝ, и҆зво́лила є҆сѝ мона́шествовати, ꙗ҆́кѡ пти́ца въ не́мъ, и҆ въ та́мѡ сꙋ́щемъ хра́мѣ приснодв҃ы бг҃ома́тере, ꙗ҆́кѡ слꙋже́бница пребыва́ющи всегда̀.
Бг҃оро́диченъ:
Всю̀ наде́ждꙋ на тѧ̀ ѳеокті́ста возложи́вши, мт҃и дв҃о ѻ҆трокови́це, и҆ тѧ̀ покро́въ и҆ пи́щꙋ и҆ питїѐ, и҆ крѣ́пкое застꙋпле́нїе въ лю́тыхъ стѧжа̀.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.
Та́й ѿше́дши во внꙋ́трєннѧѧ и҆ веще́ствєннаѧ ѻ҆́строва, ви́димыхъ врагѡ́въ и҆збѣ́гла є҆сѝ, неви́димыхъ же ѕѣ́льна приложи́сѧ тебѣ̀ ра́ть.
Кто̀ возмо́жетъ твоѧ̑, прпⷣбнаѧ, ѿню́дъ и҆зрещѝ по́двиги, ꙗ҆̀же и҆мѣ́ла є҆сѝ къ нача́льникѡмъ тмы̀, стра́ждꙋщи; и҆́хже и҆ стрѣ́лы пла́мєнны, и҆ словеса̀ неꙋдобопости̑жна.
Ѽ и҆́же хранѧ́щїѧ тѧ̀ бжⷭ҇твенныѧ благода́ти! ка́кѡ и҆ є҆ди́на и҆ млада̀, разꙋ́мныхъ є҆ѳїѡ́плѧнъ ѡ҆полче́нїе, въ же́нстѣмъ є҆стествѣ̀ побѣди́вши, посрами́ла є҆сѝ.
Бг҃оро́диченъ:
Соверше́ннымъ ра́зꙋмомъ въ ю҆́ности тѣлесѐ ѳеокті́ста пожи́вши, къ твое́й мт҃ри, бж҃е, ᲂу҆твердѝ всѐ ᲂу҆пова́нїе своѐ, и҆ приспѣ̀ въ ста́рость до́брꙋю.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Оу҆́мъ возвы́сивши къ бг҃ꙋ, всѧ̑ прешла̀ є҆сѝ жела́ємаѧ паде́нїй и҆ нꙋ́жнаѧ тѣлесѐ. тѣ́мъ ни гла́дъ тѧ̀, ни жа́жда, сла́внаѧ, ни мра́зъ, ни нагота̀, ни зно́й побѣдѝ.
Стра́нное твоѐ житїѐ вра́гъ ви́дѧ, ꙗ҆рѧ́сѧ за́вистїю, смꙋща́ѧ тѧ̀ и҆ и҆скꙋша́ѧ козньмѝ всѧ́кими, но не возмо́же запѧ́ти, непоро́чнаѧ, стѡпы̀ твоѧ̑.
Стрѣ́лы младе́нєцъ, лꙋка́вагѡ всѧ́ко приложе́нїй вмѣни́вши, невозвра́тнѡ соверши́ла є҆сѝ но́вое поще́нїѧ твоегѡ̀ ѡ҆бхожде́нїе, и҆ посрами́ла є҆сѝ сегѡ̀ тще́е шата́нїе.
Бг҃оро́диченъ:
Ꙗ҆́кѡ блаже́ннаѧ въ жена́хъ, тѧ̀, преблаже́ннаѧ бцⷣе, разꙋ́мное застꙋпле́нїе себѣ̀ положѝ, ѡ҆ тебѣ̀ сотво́рши си́лꙋ, ѡ҆скорблѧ́ющыѧ же и҆зничто́жи.
Пѣ́снь ѕ҃. І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Оу҆ста́вы є҆сте́ствєнныѧ превзы́де, кромѣ̀ потре́бныхъ жи́вши. тѣ́мъ, ꙗ҆́кѡ прикаса́ющисѧ, во пло́ти безвеще́ственна пребыва́ше, и҆́мже хотѧ́ше, сꙋ́щихъ неви́димыхъ.
Проꙋвѣ́дѣла є҆сѝ дх҃омъ ст҃ы́мъ твою̀ кончи́нꙋ прибли́жившꙋсѧ. тѣ́мъ и҆ ви́дѣна была̀ є҆сѝ ловце́мъ, бг҃ꙋ благоволи́вшꙋ, ꙗ҆́кѡ да не ᲂу҆таи́тсѧ твоѐ житїѐ странноѻбра́зное.
Ꙗ҆́кѡ ви́дѣ тѧ̀, прпⷣбнаѧ, въ це́ркви лове́цъ, зра́къ зе́мленъ и҆мꙋ́щꙋ кромѣ̀ пло́ти и҆ кро́ве, ᲂу҆ди́вльсѧ мечта́нїе зрѣ́ти мнѧ́ше, въ толи́кѡ и҆ста́ѧвшꙋ, ѽ чꙋдесѐ!
Бг҃оро́диченъ:
Пречⷭ҇таѧ влⷣчце, не ѿри́ни менє̀, лю́тыѧ нечистоты̀ по́лна сꙋ́ща: но ми́лостива бꙋ́ди мнѣ̀ и҆ ᲂу҆вѣ́тлива, прїимѝ приносѧ́щаго твоеѧ̀ ѳеокті́сты въ моли́твы моле́нїе.
Сѣда́ленъ, гла́съ а҃. Подо́бенъ: Гро́бъ тво́й сп҃се:
И҆змла́да бг҃ꙋ, ѳеокті́сто, вдана̀ бы́вши, ꙗ҆́кѡ зда́нїе благо́е, и҆ созда́вшемꙋ подо́бно, ᲂу҆се́рднѡ и҆́го є҆гѡ̀ благо́е ѿ ю҆́ности взе́мши, не вкꙋси́ла є҆сѝ мѧте́жа жите́йскагѡ, хранѧ́щи всѧ̑ чꙋ̑вства. тѣ́мъ ꙗ҆́кѡ безпло́тна, стра́ннѡ на землѝ жи́тельствоваше.
Сла́ва, и҆ ны́нѣ, бг҃оро́диченъ:
Безневѣ́стнаѧ, чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ наде́ждꙋ, ѻ҆трокови́це, и҆мꙋ́щыѧ: и҆ дꙋ́шы на́шѧ спасѝ бжⷭ҇твенными моли́твами твои́ми.
И҆лѝ крⷭ҇тобг҃оро́диченъ:
Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе и҆ вѡ́льныѧ стрⷭ҇ти, бж҃е пребл҃гі́й;
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Ско́рѡ разрѣши́ла є҆сѝ ᲂу҆страши́вшемꙋсѧ видѣ́нїѧ твоегѡ̀ боѧ́знь, ѡ҆б̾ѧви́вши приклю̑чшаѧсѧ тебѣ̀ по бжⷭ҇твенномꙋ про́мыслꙋ, чи́стаѧ, ѡ҆ ни́хже и҆ предъ ни́мъ дала̀ є҆сѝ сла́вꙋ бг҃ꙋ благода́рственнѡ.
За ше́сть лѣ́тъ и҆ три́десѧть пости́вшесѧ, спаси́тельнагѡ тѣ́ла и҆ кро́ве причасти́тисѧ не и҆мꙋ́щи, про́сиши приклю́чшемꙋсѧ тѝ, ѿ негѡ̀ ча́сть є҆ди́нꙋ благоговѣ́йнѡ принестѝ къ тебѣ̀.
Прїи́де, носѧ̀ жела́емое, и҆ вложѝ всеговѣ́йнѡ въ рꙋ́кꙋ твою̀: є҆́же и҆ прїе́мши, и҆ веселѧ́щисѧ глаго́лала є҆сѝ къ бг҃ꙋ: ны́нѣ ѿпꙋща́еши мѧ̀ твою̀, влⷣко, рабꙋ̀ ми́лостивнѡ, по глаго́лꙋ твоемꙋ̀.
Бг҃оро́диченъ:
Благоꙋго́днѡ тебѣ̀ пожи́вшꙋю, всепѣ́таѧ, прїѧ́ла є҆сѝ слꙋже́бницꙋ твою̀, и҆ сподо́била є҆сѝ неизрече́нныхъ бжⷭ҇твенныхъ бла̑гъ: тоѧ̀ моли́твами и҆ на́съ прича́стники сотворѝ, чⷭ҇таѧ, нетлѣ́нныѧ пи́щи.
Пѣ́снь и҃. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки.
Стра́шныхъ та̑инъ причасти́вшисѧ вѣ́рнѡ, ꙗ҆́коже жела́ла є҆сѝ, ма́ти прпⷣбнаѧ, ѡ҆ста́вила є҆сѝ пе́рсть ᲂу҆́бѡ пе́рсти, честны́й же дꙋ́хъ тво́й а҆́гг҃ли че́стнѡ принесо́ша гдⷭ҇ꙋ.
Пристꙋпи́въ къ тебѣ̀ и҆ па́ки лове́цъ вѣ́рный, благослове́нїѧ ꙗ҆́кѡ полꙋчи́ти ѿ тебє̀ ше́дъ, ѡ҆брѣ́те ме́ртвꙋ лежа́щꙋ тѧ̀ зако́номъ є҆сте́ственнымъ, и҆ дивлѧ́шесѧ, что̀ подо́бно є҆мꙋ̀ содѣ́ѧти.
Помышле́нїемъ ꙗ҆́кѡ мнѧ́ше, и҆́же не навы́къ до́брагѡ, бг҃оꙋго́днѡ взе́мъ твою̀ де́рзостнѡ рꙋ́кꙋ честнꙋ́ю, ѡ҆бѣща́сѧ прїѧ́ти на че́сть ст҃ы́ѧ твоеѧ̀ па́мѧти, блаже́ннаѧ, и҆ житїѧ̀ соблюде́нїе и҆мѣ́ти.
Бг҃оро́диченъ:
Добродѣ́тєли ст҃ы́хъ почита́ю, влⷣчце, добродѣ́тели же дѣ́ланїѧ ѿню́дъ не стѧжа́хъ: но, ꙗ҆́кѡ ми́лостива, ᲂу҆ще́дри моѧ̑ чꙋ̑вствїѧ, и҆ и҆зба́ви мѧ̀ всеѕло́бнагѡ ѻ҆бы́чаѧ.
Пѣ́снь ѳ҃. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Рꙋ́кꙋ ᲂу҆кра́денꙋ взе́мшаго, съ корабле́мъ и҆ бре́менемъ и҆ пловꙋ́щими ᲂу҆держа́ла є҆сѝ, пребыва́ти во ѻ҆́стровѣ па́рѣ, до́ндеже ᲂу҆разꙋмѣ́въ ѻ҆́нъ, носѧ̀ сїю̀, положѝ съ мольбо́ю къ про́чемꙋ честно́мꙋ твоемꙋ̀ тѣлесѝ.
Ѿпꙋще́ннїи и҆ ᲂу҆держа́ннїи, сꙋ́щїѧ въ тебѣ̀ си́лы во и҆скꙋ́сѣ бы́вше, кꙋ́пнѡ всѝ притеко́ша къ моще́мъ твои̑мъ, до́брѣ поклони́тисѧ и҆ ѡ҆б̾ѧ́ти, ничто́же ѡ҆брѣто́ша: неви́дима бо бы́вши ѻ҆́бразомъ, и҆́мже вѣ́сть бг҃ъ.
Вели́кихъ болѣ́зней и҆змѣне́нїе, бо́льшимъ ѿ хрⷭ҇та̀, прпⷣбнаѧ, прїе́мши, и҆ и҆мꙋ́щи дерзнове́нїе вели́ко моли́тисѧ є҆мꙋ̀, помѧнѝ почита́ющыѧ бжⷭ҇твеннꙋю па́мѧть твою̀, и҆ и҆спросѝ на́мъ грѣхѡ́въ ѡ҆чище́нїе и҆ житїѧ̀ и҆справле́нїе.
Бг҃оро́диченъ:
Всѧ̑ хотѧ̀ спастѝ гдⷭ҇ь, тѧ̀ себѣ̀ мт҃рь и҆збра́въ, положѝ вѣ̑рнымъ винꙋ̀ всѧ́кагѡ бла́га: сегѡ̀ беззако́нїемъ ѡ҆горчи́вши, тобо́ю ᲂу҆пова́емъ ѡ҆брѣстѝ ми́лость, ми́лостиваѧ влⷣчце.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Вѣ́чныхъ жела́ющи полꙋчи́ти бла̑гъ, тлѣ́ющихъ всѐ сладостра́стїе, ѕло́е мнѣ́ла є҆сѝ кꙋ́плю, и҆ пи́щꙋ страсте́й разжже́нїе. тѣ́мъ и҆здѣ́тска ли́кꙋ мона́шествꙋющихъ сочета́ласѧ є҆сѝ, чⷭ҇таѧ.
Нечи́стыхъ дꙋхѡ́въ не невѣ́дѧщи ко́зней всѣ́хъ, проти́виласѧ є҆сѝ до́блественнѡ, и҆зъ ко́рене и҆стерза́ющи стра̑стнаѧ возращє́нїѧ, и҆ младе́нцы ѕло́бы держа́щи дв҃дски, и҆ разбива́ющи къ ка́мени хрⷭ҇тꙋ̀.
Ма́нїемъ бж҃їимъ и҆збѣ́гши ра́тныхъ рꙋ́къ, водвори́ласѧ є҆сѝ въ пꙋсты́ни, хрⷭ҇та̀ и҆́щꙋщи, претекла̀ є҆сѝ разꙋ́мнѡ мїрско́е страсте́й мо́ре житїѧ̀, и҆ въ приста́нищи вы́шнѧгѡ ѡ҆ти́шїѧ, є҆го́же возжелѣ́ла є҆сѝ, хрⷭ҇та̀ зри́ши.
Сла́ва, и҆ ны́нѣ, бг҃оро́диченъ.
Ра́дꙋйсѧ, тꙋ́чнаѧ горо̀: ра́дꙋйсѧ, сѣда́лище бж҃їе: ра́дꙋйсѧ, бжⷭ҇твеннаѧ держа́во: ра́дꙋйсѧ, неѡпали́маѧ кꙋпино̀: ра́дꙋйсѧ, бцⷣе: ра́дꙋйсѧ, черто́же: ра́дꙋйсѧ, лѣ́ствице небе́снаѧ: ра́дꙋйсѧ, хра́ме: ра́дꙋйсѧ, рꙋ́чко, ра́дꙋйсѧ, ски́нїе: ра́дꙋйсѧ, непрестаю́щаѧ мі́рꙋ ра́дость.
Крⷭ҇тобг҃оро́диченъ:
Воздви́жена ꙗ҆́кѡ ви́дѣ на крⷭ҇тѣ̀ а҆́гнца, непоро́чнаѧ дв҃а, пла́чꙋщи вопїѧ́ше: сла́дкое моѐ ча́до, что̀ но́вое и҆ пресла́вное видѣ́нїе; ка́кѡ содержа́й всѧ́чєскаѧ го́рстїю, на дре́вѣ пригвожда́ешисѧ пло́тїю;
Канѡ́нъ ѻ҆ктѡ́иха є҆ди́нъ, и҆ ст҃ы́хъ, два̀. Канѡ́нъ мч҃никѡвъ, є҆гѡ́же краегране́сїе: Но́сиши по́льзꙋ твои̑мъ похва́льникѡмъ, бл҃же́нне. І҆ѡ́сифъ.
Гла́съ д҃. Пѣ́снь а҃. І҆рмо́съ:
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́нѡвы и҆ си́лꙋ.
Носѧ́щи вѣ́рою благохва́лѧщымъ по́льзꙋ бжⷭ҇твеннꙋю, честна́ѧ наста̀ па́мѧть твоѧ̀, въ не́йже тѧ̀ мо́лимъ, блаже́нне: всѣ́хъ на́съ помѧнѝ.
И҆мѣ́ѧ дерзнове́нїѧ и҆спо́лнено твоѐ до́блественное помышле́нїе, безслове́снагѡ повелѣ́нїѧ небре́глъ є҆сѝ, бг҃одохнове́нне, и҆ ра́дꙋѧсѧ, бл҃же́нне, страда́лъ є҆сѝ.
Си́лою возмога́емь нбⷭ҇ною, ѻ҆нисі́форе, къ лю̑тымъ ᲂу҆стреми́лсѧ є҆сѝ мꙋ́камъ, и҆ всю̀ побѣди́лъ є҆сѝ крѣ́пость ра́тꙋющагѡ.
Бг҃оро́диченъ:
Оу҆ста́вила є҆сѝ сме́рти мꙋчи́тельство, безсме́ртнꙋю жи́знь созда́телѧ ро́ждши, хрⷭ҇та̀ и҆зба́вителѧ на́шего, дв҃о неискꙋсобра́чнаѧ.
И҆́нъ канѡ́нъ прпⷣбныѧ,
є҆гѡ́же краегране́сїе: Матрѡ́ны подо́бнѡ пою̀ сла́вꙋ. І҆ѡ́сифъ.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.
Съ чи̑ны нбⷭ҇ными всегда̀ сꙋ́щи, и҆ прича́стїемъ бжⷭ҇твеннымъ ѡ҆божа́ема, чтꙋ́щыѧ тѧ̀ спаса́й моли́твами твои́ми.
Всѧ̀ бжⷭ҇твеннымъ жела́нїемъ распала́емаѧ, разжжє́нїѧ сласте́й дꙋшетлѣ́нныхъ воздержа́нїѧ тꙋ́чами ᲂу҆гаси́ла є҆сѝ.
Че́стенъ влⷣки сосꙋ́дъ ꙗ҆ви́ласѧ є҆сѝ, ѡ҆чи́стивши се́рдце, матрѡ́но, страсте́й плотски́хъ поще́нїемъ.
Бг҃оро́диченъ:
Ѡ҆бра́дованнаѧ, и҆зъ тебє̀ роди́тисѧ благоволи́вшаго па́че є҆стества̀ молѝ, ᲂу҆мири́ти и҆ спастѝ всѧ́чєскаѧ.
Пѣ́снь г҃. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Ра́вно ѻ҆ц҃ꙋ̀ и҆ дх҃ꙋ сло́во на три́знищи и҆сповѣ́дающе, мч҃ницы, треволнє́нїѧ мꙋ́къ мꙋ́жески ѿрази́ша.
Поста́вивъ тве́рдѡ но́ги твоѧ̑, мꙋ́чениче, на ка́мени и҆сповѣ́данїѧ и҆ вѣ́ры, вѣ̑тры, ѻ҆нисі́форе, ра́нъ не поколеба́лсѧ є҆сѝ.
Всѣ́мъ ᲂу҆мо́мъ, бл҃же́нне мꙋ́чениче, и҆зстꙋпи́въ ко хрⷭ҇тꙋ̀ жела́емомꙋ, не чꙋ́вствовалъ є҆сѝ и҆̀же ѿ ра́нъ болѣ́зней, всеблаже́нне.
Бг҃оро́диченъ:
При́зри, пречⷭ҇таѧ, спасти́ мѧ: и҆́бо бжⷭ҇твеннымъ ма́нїемъ всѐ стро́ѧщаго воплоти́ла є҆сѝ бг҃а сло́ва, па́че сло́ва и҆ помышле́нїѧ.
И҆́нъ. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Жезло́мъ бжⷭ҇твенныѧ вѣ́ры страсте́й пресѣкла̀ є҆сѝ мо́ре, бжⷭ҇твеннѣ дꙋша́мъ предпꙋтетворѧ́щи пра́вое прехожде́нїе.
Ꙗ҆ви́ласѧ є҆сѝ ᲂу҆добре́нїе є҆ди́нствꙋющихъ ꙗ҆́вѣ, всечестна́ѧ, и҆ мона́хѡвъ житїѐ стѧжа́вши чи́стое и҆ непоро́чное.
Ме́ртвости совлекла́сѧ є҆сѝ тлетво́рныхъ страсте́й, сла́внаѧ, и҆ врага̀ житїе́мъ благоче́стнымъ ѡ҆бнажи́ла є҆сѝ.
Бг҃оро́диченъ:
Соедини́сѧ во ᲂу҆тро́бѣ твое́й созда́тель пло́ти, пречⷭ҇таѧ, пребы́въ, є҆́же бѣ̀, ꙗ҆́кѡ да, є҆́же бла́го бы́ти, человѣ́кѡмъ да́рꙋетъ.
Конда́къ прпⷣбныѧ, гла́съ в҃. Подо́бенъ: Бл҃года́ти прїи́мше:
За любо́вь гдⷭ҇ню, прпⷣбнаѧ матрѡ́но, поко́ѧ жела́нїе возненави́дѣла є҆сѝ, поще́нїемъ дꙋ́хъ тво́й просвѣти́вши. но твои́ми моли́твами и҆ проти́вныхъ шата̑нїѧ разорѝ: крѣ́пкѡ бо ѕвѣ́ри побѣди́ла є҆сѝ.
І҆́косъ:
Стрꙋю̀ мнѣ̀ сло́ва да́ждь, бж҃е мо́й, и҆ и҆сто́чникъ благочи́нїѧ сотворѝ мо́й ᲂу҆́мъ, и҆ благословѝ ѧ҆зы́къ мо́й, да воспою̀ твою̀ а҆́гницꙋ, ю҆́же вѣнча́лъ є҆сѝ ты̀ бл҃гостїю твое́ю: а҆́ще бо са́мъ не да́си мнѣ̀ сло́во досто́йное, ка́кѡ принесꙋ̀ да́ръ ни́щїй бога́тнѣй въ словесѣ́хъ и҆ дѣѧ́нїихъ; тѣ́мъ пода́ждь мнѣ̀ си́лꙋ, и҆сповѣ́дати є҆ѧ̀ натрижнє́нїѧ: крѣ́пкѡ бо ѕвѣ́ри побѣди́ла є҆́сть.
Сѣда́ленъ мч҃никѡвъ, гла́съ а҃. Подо́бенъ: Гро́бъ тво́й, сп҃се:
Ѻ҆гне́мъ бжⷭ҇твеннагѡ распала́еми жела́нїѧ, ѻ҆гнѧ̀ чꙋ́вственнагѡ прикоснове́нїемъ ѿню́дъ не ѡ҆пали́стесѧ, блаже́ннїи, пре́лесть же пожго́сте, и҆ влеко́ми неми́лостивнѡ, страстоте́рпцы, приснопа́мѧтный прїѧ́сте коне́цъ, и҆ сла́вꙋ полꙋчи́сте.
Сла́ва, прпⷣбныѧ, гла́съ и҃. Подо́бенъ: Повелѣ́нное:
Пред̾избра́ннаѧ ѿ бг҃а ма́ти, къ приста́нищꙋ жи́зни наставлѧ́ема, безъ волне́нїѧ житїѧ̀ бꙋ́рю претекла̀ є҆сѝ, со а҆́гг҃лы пѣсносло́вѧщи и҆зба́вителѧ, и҆ молѧ́щисѧ непреста́ннѡ ѡ҆ на́съ, ꙗ҆́кѡ да благода́ть и҆ ми́лость хрⷭ҇то́съ да́рꙋетъ на́мъ, сохранѧ́ющи па́ствꙋ, ю҆́же болѣ́знїю соста́вила є҆сѝ.
И҆ ны́нѣ, бг҃оро́диченъ:
Непремѣ́ннаго бг҃а поро́ждшаѧ, премѣнѧ́емое при́снѡ се́рдце моѐ грѣхо́мъ и҆ лѣ́ностїю, прило́гами льсти́вагѡ, ᲂу҆твердѝ, бл҃га́ѧ, моли́твами мт҃рними твои́ми: ꙗ҆́кѡ да и҆ а҆́зъ благода́рнѡ сла́влю тѧ̀, бг҃ороди́тельнице марі́е, поми́лꙋй ста́до твоѐ є҆́же стѧжа́ла є҆сѝ, всенепоро́чнаѧ.
Крⷭ҇тобг҃оро́диченъ:
Сн҃а твоегѡ̀ и҆ бг҃а крⷭ҇то́мъ, дв҃о, сохранѧ́еми при́снѡ, де́мѡнскїѧ прило́ги и҆ кѡ́зни побѣжда́емъ, сꙋ́щꙋю бцⷣꙋ тѧ̀ и҆́стиннѡ воспѣва́юще: и҆ любо́вїю всѝ ро́ди блажи́мъ, пречⷭ҇таѧ, ꙗ҆́коже прорекла̀ є҆сѝ. тѣ́мже согрѣше́нїй на́шихъ ѡ҆ставле́нїе моли́твами твои́ми да́рꙋй.
Пѣ́снь д҃. І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.
Ѡ҆блиста́ющее свѣтозаре́нїе болѣ́зней твои́хъ, ѻ҆нисі́форе мч҃ниче, привлечѐ любо́вїю, блаже́нне, спострада́ти тебѣ̀ блаже́ннаго порфѵ́рїа.
Возложи́вше на сковрадꙋ̀ разжже́ннꙋю, протѧза́ютъ мꙋчи́тели кꙋ́пнѡ хрⷭ҇тѡ́вы во́ины, ра́дꙋющыѧсѧ и҆ горѧ́щыѧ дꙋ́хомъ.
Заколе́нїе ꙗ҆́кѡ соверше́нно, страстоте́рпцы, и҆ чи̑стыѧ жє́ртвы влⷣцѣ всѣ́хъ, ра́дꙋющесѧ, приведо́стесѧ, тѣ́мъ блажи́ми є҆стѐ.
Разꙋ́мнѡ тѧ̀ возложе́ннаго влⷣцѣ, льсти̑выѧ бесѣ̑ды прельсти́ти ѿню́дъ не возмого́ша, порфѵ́рїе бг҃омꙋ́дре, всемꙋ́дре и҆ всебога́те.
Бг҃оро́диченъ:
Воплоща́ема родила̀ є҆сѝ бг҃а сло́ва, ᲂу҆подо́битисѧ, ѻ҆трокови́це, за милосе́рдїе ми́лости всѣ̑мъ благоволи́вша, всенепоро́чнаѧ влⷣчце.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Ка́плѧми сле́зъ твои́хъ напои́вши се́рдце твоѐ, и҆ воздѣ́лала є҆сѝ добродѣ́телей стори́чествꙋющїй, ѽ матрѡ́но! кла́съ бжⷭ҇твенною благода́тїю.
По хрⷭ҇тꙋ̀ возве́ргши помышле́нїѧ степє́ни, пребы́сть напа́стьми непревра́тна лꙋка́выхъ де́мѡнѡвъ, достосла́внаѧ.
До́блественною мꙋ́дростїю сопрꙋ́га ѡ҆ста́вивши и҆ житїѧ̀ мѧте́жъ, и҆́го хрⷭ҇то́во возлюби́ла є҆сѝ, и҆ тогѡ̀ въ слѣ́дъ послѣ́довала є҆сѝ.
Бг҃оро́диченъ:
Не ѡ҆ста́вивъ нбⷭ҇ныхъ, пречⷭ҇таѧ, бг҃ъ, и҆стощава́етсѧ во ᲂу҆тро́бѣ твое́й, и҆ мѣ́ритсѧ безмѣ́рный, безмѣ̑рнаѧ мі́ра разрѣши́въ прегрѣшє́нїѧ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Столпѝ хрⷭ҇то́вы цр҃кве непоколеби́мїи, колеба́ньми мꙋ́къ непревра́тни крѣ́постїю дꙋ́ха ꙗ҆ви́стесѧ.
Кꙋми́ры богѡ́въ скве́рныхъ и҆стни́сте, и҆ ꙗ҆ви́стесѧ благоче́стїѧ и҆ мꙋ́жества ѻ҆́бразы, честні́и великомꙋ́чєницы.
Во́инствомъ и҆́стиннымъ ѿ бг҃а препоѧ́састесѧ, привре́менное могꙋ́тство ѡ҆ста́вивше вѣ́рою, ра́дꙋющесѧ пострада́сте.
Бг҃оро́диченъ:
Всели́сѧ въ тѧ̀, вмѣсти́всѧ, невмѣ́стный, и҆ показа́ тѧ нб҃съ ши́ршꙋю, дв҃о. тѣ́мъ тѧ̀ ᲂу҆блажа́емъ.
И҆́нъ. І҆рмо́съ:
Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ ра́звѣ тебє̀ и҆но́гѡ не вѣ́мы.
Ѡ҆дѣ́ѧвшисѧ во ѻ҆́бразъ ст҃ы́й, ѽ матрѡ́но! врага̀ ѕлотво́рнаго въ стꙋ́дъ ѡ҆дѣ́ѧла є҆сѝ.
Текꙋ́щими и҆змѣни́ла є҆сѝ бꙋ̑дꙋщаѧ, и҆ сопрꙋ́жникомъ жениха̀ безсме́ртнаго, невѣстоводи́телѧ дꙋ́шъ на́шихъ.
Всено́щнꙋю приносѧ́щи хвалꙋ̀ влⷣцѣ, матрѡ́но, ᲂу҆спи́ла є҆сѝ сла̑сти тѣлє́сныѧ.
Бг҃оро́диченъ:
Ме́ртвыхъ и҆ живы́хъ влⷣкꙋ родила̀ є҆сѝ, стра̑сти, всенепоро́чнаѧ, се́рдца моегѡ̀ ᲂу҆мертвѝ.
Пѣ́снь ѕ҃. І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Болѣ̑зни ра̑нъ претерпѣ́лъ є҆сѝ, ѻ҆нисі́форе мч҃ниче, тече́нїе соверши́въ свидѣ́тельства, и҆ побѣди́тель бы́въ, прїѧ́лъ є҆сѝ по́чєсти небє́сныѧ.
Дрꙋ́гъ дрꙋ́гꙋ содержа́щесѧ вѣ́рою, привѧза́еми кꙋ́пнѡ и҆ влеко́ми, разрѣше́нїе тѣлесѐ, ꙗ҆́кѡ крѣ́пцыи страда́льцы, прїѧ́сте, гдⷭ҇ꙋ совокꙋплѧ́еми.
Къ ко́нємъ привѧ́зани, и҆ нꙋ́жднѡ влеко́ми, нра́вомъ сꙋдѧ́щагѡ лютѣ́йшимъ, благосла́внїи мч҃ницы гдⷭ҇ни, бжⷭ҇твеннагѡ конца̀ сподо́бистесѧ.
Бг҃оро́диченъ:
Зако́нѡвъ кромѣ̀ є҆сте́ственныхъ, дв҃о, законода́вца ражда́еши, ѡ҆бновлѧ́ющаго сокрꙋше́нное є҆стество̀ на́ше: є҆го́же молѝ спасти́ мѧ, грѣхи̑ сокрꙋше́ннаго.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ꙗ҆́кѡ пти́ца добропѣ́снива въ лꙋ́зѣ по́стничества сла́дкѡ возглаша́ющи, ꙗ҆́кѡ ᲂу҆́мныѧ привлекла̀ є҆сѝ вра́бїи, свѧще́ннѣйшихъ же́нъ собо́ръ мре́жь, вра́жїихъ и҆збѣ́гши, матрѡ́но, дꙋ́хомъ.
Пло́ть ᲂу҆́бѡ любомꙋ́дрїемъ держа́щи, и҆ ѡ҆бꙋздова́ющи стра̑сти, прпⷣбнаѧ, дꙋши́ же краснѣ́йшꙋю добро́тꙋ свѣ́тлѡ хрⷭ҇тꙋ̀ бл҃гоꙋкраша́ющи, красна́ же и҆ благолѣ́пна, матрѡ́но, дꙋ́хомъ позна́ласѧ є҆сѝ.
А҆́гг҃льское жи́тельство на землѝ возлюби́ла є҆сѝ, пою́щи непреста́ннѡ, на́съ ра́ди ѿ ст҃ы́ѧ дв҃ы за мно́жество бла́гости воплоти́вшасѧ, и҆ є҆стество̀ же́нское на врага̀ лꙋка́ваго ᲂу҆крѣпи́вша.
Бг҃оро́диченъ:
Порабо́тисѧ грѣхо́мъ є҆стество̀ человѣ́ческое: но сїѐ и҆зба́вила є҆сѝ, бцⷣе, лꙋка́выѧ рабо́ты, всѧ́ческихъ влⷣкꙋ ро́ждши, показа́вшаго на́мъ жи́зни вхо́ды, всенепоро́чнаѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Мч҃никъ дво́ица пострада́вше крѣ́пкѡ, вра́жїю горды́ню на зе́млю низложи́сте, ѡ҆зари́вшесѧ бл҃года́тїю несозда́нныѧ трⷪ҇цы, сла́внїи, ѻ҆нисі́форе и҆ порфѵ́рїе, моли́тесѧ непреста́ннѡ ѡ҆ всѣ́хъ на́съ.
І҆́косъ:
Возмого́ша бжⷭ҇твенною крѣ́постїю, ᲂу҆тве́рждшесѧ хрⷭ҇то́вы во́ини, низложи́ти вра̑жїѧ совѣ́ты и҆ ᲂу҆хищрє́нїѧ, къ свирѣ̑пымъ ко́нємъ кꙋ́пнѡ привѧ́зани, и҆ стра́ждꙋще зако́ннѡ, на́мъ про́сѧтъ ѿ бг҃а долгѡ́въ проще́нїѧ, и҆ разрѣше́нїѧ грѧдꙋ́щихъ и҆скꙋше́нїй, и҆ лю́тыхъ и҆збавле́нїѧ. тѣ́мъ ты́ѧ хва́лимъ при́снѡ, ꙗ҆́кѡ при̑сныѧ къ бг҃ꙋ ᲂу҆го́дники, молѧ́щыѧсѧ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Бл҃горо́днѣйшїѧ твоеѧ̀ дꙋшѝ благорѡ́дныѧ твоѧ̑ нра́вы ꙗ҆влѧ́ѧ, и҆сповѣ́далъ є҆сѝ предъ мꙋчи́тєли, ѻ҆нисі́форе мꙋ́чениче, бг҃а воплоще́нна.
Вѣ́чнꙋю бжⷭ҇твеннꙋю свобо́дꙋ любѧ̀ твоемꙋ̀ влⷣчцѣ, ꙗ҆́кѡ благопослꙋшли́въ ра́бъ, спострада́лъ є҆сѝ, и҆ съ ни́мъ ликꙋ́еши, порфѵ́рїе всеблаже́нне.
Бжⷭ҇твенными кровьмѝ ва́шими, разжже́нный пла́мень безбо́жїѧ ᲂу҆гаси́вше, вопїе́те, всехва́льнїи: ѻ҆тє́цъ на́шихъ бж҃е, бл҃гослове́нъ є҆сѝ.
Да блаже́нныѧ и҆ безсме́ртныѧ сла́вы сподо́битесѧ, блаже́ннꙋю пострада́сте сме́рть, бг҃освѣ̑тлыѧ ѕвѣ́зды мы́сленнагѡ сл҃нца.
Бг҃оро́диченъ:
Воплоще́нно сло́во ѿ твои́хъ крове́й ражда́еши, земны̑ѧ ѡ҆божи́ти благоволи́вшаго, дв҃о, воспѣва́ющыѧ. ѻ҆тє́цъ на́шихъ бж҃е, бл҃гослове́нъ є҆сѝ.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е во вѣ́ки.
Ꙗ҆́кѡ го́рлица краснѣ́йша, соблюла̀ є҆сѝ бг҃ꙋ цѣломꙋ́дрїѧ благоча́дїе, страсте́й непло́дствомъ, блаже́ннаѧ, вопїю́ще: и҆́стиннѡ ѡ҆богати́вши, тобо́ю спаса́ємыѧ.
Мі́ръ, честна́ѧ, и҆ ꙗ҆̀же въ мі́рѣ ѡ҆ста́вивши въ бж҃їей наде́жди, премі́рное ны́нѣ наслѣ́довала є҆сѝ наслѣ́дїе, є҆ди́нствꙋющихъ сꙋ́щаѧ и҆́стиннѡ, матрѡ́но, красота̀.
Бг҃оро́диченъ:
Разрѣша́ѧ є҆́ѵинꙋ клѧ́твꙋ, въ пренепоро́чнꙋю всели́сѧ дв҃и́цꙋ, бл҃гослове́нїѧ и҆сто́чникъ и҆сточа́ѧ вопїю́щымъ: бл҃гослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃. І҆рмо́съ:
На крⷭ҇тѣ̀ пло́тїю пригвожде́ннаго, и҆ показа́вшаго на́мъ ѻ҆рꙋ́жїе во спасе́нїе, ѻ҆́троцы, превозноси́те хрⷭ҇та̀ бг҃а на́шего во вѣ́ки.
Оу҆деса̀ терза́нїємъ преда́вше, растерза́сте врага̀ несмы́сленное се́рдце, пребы́вше непоколе́блени ᲂу҆мо́мъ, великоимени́тїи вѣнцено́сцы.
Кровьмѝ ва́шими ѻ҆́гнь ᲂу҆гасѐ невѣ́дѣнїѧ, страда́льцы, вѣ́рныхъ же напои́сте всѣ́хъ и҆ сердца̀ и҆ дꙋ́шы возраще́нїемъ бг҃озна́нїѧ.
Во́лны лю́тыхъ мꙋче́нїй ѡ҆кормле́нїемъ хрⷭ҇то́вымъ преидо́сте, и҆ къ приста́нищꙋ бжⷭ҇твеннагѡ црⷭ҇твїѧ нбⷭ҇нагѡ приста́сте въ нетлѣ́нїе.
Оу҆́глїе ѻ҆гне́мъ паракли́та распалѧ́еми, ꙗ҆́вѣ мч҃ницы ꙗ҆́вльшесѧ, пожго́ша ле́сть вра́жїю, и҆ просвѣти́ша вселе́ннꙋю.
Бг҃оро́диченъ:
Цвѣ́тъ и҆збра́нный во ᲂу҆до́лїихъ, ѻ҆трокови́це, житїѧ̀ ѡ҆брѣ́тъ, возжелѣ̀ твоеѧ̀ добро́ты сло́во бж҃їе, и҆ воплоти́всѧ, ѡ҆благово́нстви вселе́ннꙋю.
И҆́нъ. І҆рмо́съ:
Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.
Благоче́стїѧ нра́вы дꙋ́шꙋ ᲂу҆краси́вши, матрѡ́но, дх҃омъ бжⷭ҇твеннымъ бг҃ꙋ привела̀ є҆сѝ, чи́стаѧ, ли́къ дѣ́въ, пою́щїи: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Твои́хъ по́тѡвъ тꙋ́чы бжⷭ҇твенною благода́тїю, страсте́й тꙋ́чы, матрѡ́но, мꙋ̑тныѧ и҆зсꙋша́ютъ: сердца́ же вѣ́рнѡ приходѧ́щихъ всегда̀ напаѧ́ютъ. тѣ́мъ тѧ̀ почита́емъ во всѧ̑ вѣ́ки.
Тебѐ самꙋ́ю ѻ҆рꙋ̑жїи вѣ́ры воѡрꙋжи́вши воздержа́нїѧ, не ᲂу҆ѧзви́ласѧ є҆сѝ стрѣло́ю сла́сти, пребыва́ющи посредѣ̀ мꙋже́й: и҆ дре́вле є҆́ѵꙋ ᲂу҆ѧзви́вшаго ᲂу҆ѧзви́ла є҆сѝ копїе́мъ цѣломꙋ́дрїѧ, матрѡ́но блаже́ннаѧ.
Бг҃оро́диченъ:
Сѐ дв҃а, ꙗ҆́кѡ глаго́летъ дх҃омъ и҆са́їа, и҆мѣ̀ во чре́вѣ и҆зба́вльшаго ны̀ ѿ а҆́дова чре́ва, благоче́стнѡ вопїю́щыѧ: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ, клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Возмого́ша, си́лою хрⷭ҇то́вою вжилѧ́еми, безплѡ́тныѧ съ тѣ́ломъ побори́ти, до́блїи а҆дама́нти, столпѝ вѣ́ры, и҆ ны́нѣ на нб҃сѣ́хъ веселѧ́тсѧ ѿ вѣ́ка съ пострада́вшими.
Ꙗ҆́кѡ колесни́ца словесѐ свѧще́ннаѧ бы́вше, къ безсловє́снымъ привѧ́зани бы́сте, бжⷭ҇твеннїи мч҃ницы, и҆ къ приста́нищꙋ нбⷭ҇номꙋ достиго́сте, ра́дꙋющесѧ, и҆ побѣ́ды по́чєсти прїѧ́сте. тѣ́мъ досто́йнѡ блажи́ми є҆стѐ.
Тѣлеса̀ ва̑ша пангеа́нѡвъ сла́вный ны́нѣ и҆́мать гра́дъ, мч҃ницы бжⷭ҇твеннїи, ѡ҆бога́щсѧ застꙋ̑пники ва́ми, и҆ врачи̑, цѣлѧ́щими тѣле́съ и҆ дꙋ́шъ недꙋ́ги, приходѧ́щихъ вѣ́рою всегда̀.
Бжⷭ҇твеннаѧ дво́ица и҆ свѣтоза́рнаѧ, порфѵ́рїе страстоте́рпче присносла́вный и҆ ѻ҆нисі́форе доблемꙋ́дрый, трⷪ҇цѣ прест҃ѣ́й моли́тесѧ, ми́ръ и҆ лю́тыхъ и҆збавле́нїе пода́ти дꙋша́мъ на́шымъ.
Бг҃оро́диченъ:
Ѡ҆дѣ́ѧвсѧ во всего́ мѧ во́лею влⷣка, ѿ твои́хъ происхо́дитъ, всенепоро́чнаѧ, бжⷭ҇твенныхъ чре́слъ, ꙗ҆́кѡ жени́хъ: и҆ млеко́мъ пита́етсѧ, и҆́же всю̀ тва́рь пита́ѧй ма́нїемъ, бл҃гослове́ннаѧ приснодв҃о.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Ꙗ҆́кѡ бжⷭ҇твеннаѧ ты̀ голꙋби́ца, добродѣ́телей позлаще́нными кри́лы, матрѡ́но сла́внаѧ, вы́спрь возлетѣ́ла є҆сѝ, и҆ ны́нѣ воспочива́еши, и҆дѣ́же прпⷣбныхъ ли́цы, и҆ пра́ведныхъ чи́ни, и҆ вѣ́чное весе́лїе, и҆ ра́дость неизглаго́ланнаѧ.
Лю́бѧщи ѿ жены̀ за ᲂу҆тро́бы щедро́тъ возсїѧ́вшаго, незаходи́маго сл҃нца разжже́ннꙋю и҆ неꙋдо́бь прохо́днꙋю, ᲂу҆до́бнѡ про́йде чи́стаѧ стезю̀ по́стнꙋю, де́мѡны попалѧ́ющи, и҆ стра̑сти плотскі̑ѧ и҆зсꙋша́ющи.
Бжⷭ҇твеннаѧ па́мѧть твоѧ̀ на́мъ свѣтлѣ́йши со́лнца возсїѧ̀, просвѣща́ющи на̑ша сердца̀ и҆ помышлє́нїѧ: въ ню́же помина́й на́съ, вѣ́рою творѧ́щихъ ю҆̀, матрѡ́но сла́внаѧ, дерзнове́нїе къ бг҃ꙋ и҆́стиннѡ и҆мꙋ́щи.
Бг҃оро́диченъ:
Носѧ́щи, ѻ҆трокови́це, рꙋка́ми, всѧ́чєскаѧ ма́нїемъ носѧ́щаго, рꙋки́ мѧ и҆зба́ви чꙋжда́гѡ хода́тайствомъ твои́мъ: и҆ свѣ́томъ твои́мъ моѐ помышле́нїе просвѣтѝ, и҆ ѿчꙋждѝ страсте́й неѡсла́бнѡ борю́щихъ мѧ̀.
Свѣти́ленъ. Подо́бенъ: Жєны̀ ᲂу҆слы́шите:
Мꙋ́ченики почти́мъ, страда̑нїи возсїѧ́вшихъ, и҆ ѡ҆зари́вшихъ мі́ръ мꙋ́ченическими свѣтлостьмѝ, ѻ҆нисі́фора сла́внаго, и҆ съ ни́мъ порфѵ́рїа: и҆́бо сі́и мо́лѧтсѧ ѡ҆ на́съ, любо́вїю соверша́ющихъ па́мѧть и҆́хъ.
Сла́ва, прпⷣбныѧ:
Посредѣ̀ мꙋже́й всели́ласѧ є҆сѝ, матрѡ́но присносла́внаѧ, прїе́мши ѻ҆́бразъ, ѽ стра́нно чꙋ́до! прпⷣбнаѧ, ка́кѡ ᲂу҆таи́ласѧ є҆сѝ мꙋчи́телѧ, тве́рдѡ при́снѡ ѡ҆горча́ющасѧ; поще́нїемъ и҆ моли́твами и҆ бдѣ̑нїи непреста́нными сегѡ̀ главꙋ̀ сокрꙋши́ла є҆сѝ.
И҆ ны́нѣ, бг҃оро́диченъ:
Ра́дꙋйсѧ, бж҃їѧ пала́то: ра́дꙋйсѧ, горо̀ ѡ҆сѣне́ннаѧ: ра́дꙋйсѧ, неѡпали́маѧ кꙋпино̀: ра́дꙋйсѧ, прⷭ҇то́ле сла́вы: ра́дꙋйсѧ, бжⷭ҇твеннаѧ трапе́зо: ра́дꙋйсѧ, ста́мно всезлата́ѧ: ра́дꙋйсѧ, свѣ́щниче всесвѣ́тлый: ра́дꙋйсѧ, ле́гкїй ѻ҆́блаче, дв҃ома́ти марі́е.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.