← претходни дан | Минеј — Новембар | следећи дан →
2 ноября: Святых мучеников Акиндина, Пигасия, Аффония, Елпидифора и Анемподиста
Мѣ́сѧца тогѡ́же во в҃-й де́нь.
Ст҃ы́хъ мч҃никъ: а҆кїндѵ́на, пїга́сїа, а҆фѳо́нїа, є҆лпїдїфо́ра и҆ а҆немподі́ста.
На Гдⷭ҇и, воззва́хъ, стїхи̑ры гла́съ д҃. Подо́бенъ: Ꙗ҆́кѡ до́блѧ:
Пѧточи́сленное сочета́нїе мч҃никѡвъ воспои́мъ, ꙳ мꙋ́драго а҆кїндѵ́на, ꙳ пїга́сїа, є҆лпїдїфо́ра, ꙳ а҆фѳо́нїа и҆ а҆немподі́ста, ꙳ дѡ́блїѧ страда́льцы ꙳ и҆ тє́плыѧ защи́тники, ꙳ точа́щыѧ невозбра́ннꙋю благода́ть, ꙳ и҆ наде́ждꙋ незави́стнꙋ ꙳ безбѣ́днѡ благочести̑вымъ подаю́щыѧ.
Ни гла́дъ, нижѐ бѣда̀, ꙳ ни жи́знь, нижѐ сме́рть, ꙳ ни коно́бѡвъ врѣ̑нїѧ, ꙳ ни земны̑ѧ прѡ́пасти, нижѐ ѕвѣре́й ᲂу҆ста̀ ꙳ разлꙋчи́ти возмого́ша ѿ любвѐ хрⷭ҇то́вы ꙳ ва́шѧ терпѣливомꙋ̑дрыѧ до́блєсти: ꙳ къ немꙋ́ бо непреста́ннѡ взира́юще, ꙳ и҆ того̀ є҆ди́наго жела́юще, ꙳ враждꙋ́ющыѧ побѣди́сте.
Сла́дости насыща́ющесѧ, ꙳ и҆ свѣ́та и҆сполнѧ́еми, ꙳ и҆ жи́знь вѣ́чнꙋю наслѣ́довавше, ꙳ къ ва́мъ прибѣга́ющыѧ ѿ бѣ́дъ и҆зба́вите, ꙳ и҆ ᲂу҆́зъ и҆ темни́цы, ꙳ на мѣ́стѣ ѡ҆ѕлобле́нїѧ, бг҃омꙋ́дрїи, ꙳ къ бг҃ꙋ дерзнове́нїе и҆мꙋ́ще, ꙳ и҆ милосе́рдїе ꙗ҆влѧ́юще, ꙳ ꙗ҆́кѡ и҆́стиннѡ хрⷭ҇топодража́телє.
Сла́ва, гла́съ ѕ҃:
Дне́сь пѧтоза́рный мч҃никѡвъ ли́къ, ꙗ҆́кѡ свѣтоно́сныхъ ѕвѣ́здъ схожде́нїе, вѣ̑рныѧ просвѣща́ющь къ та́инственномꙋ весе́лїю призва̀. дне́сь и҆̀же разꙋ́мнагѡ сл҃нца слꙋжи́телїе, и҆ пе́рсскихъ потреби́телїе преда́нїй, чꙋ́вственное со́лнце че́ствовавшыѧ, и҆ покланѧ́ющыѧсѧ ѻ҆гню̀, рꙋково́дствоваша ко благоче́стїю. поче́рпше же ѻ҆би́льнѣ страстоте́рпческꙋю и҆́хъ ча́шꙋ, и҆ хрⷭ҇та̀ ра́ди и҆злїѧ́вшимисѧ кровьмѝ вѣнча́шасѧ, на́съ призыва́юще, благоче́стїѧ рачи́тели, прїиди́те, глаго́люще, пѡ́двиги на́шими ᲂу҆чреди́тесѧ, и҆ вѣнцы̀ и҆ чє́сти зри́те: претерпѣ́вый бо до конца̀, то́й спасе́тсѧ, хрⷭ҇то́съ и҆́стина и҆зречѐ: да ѻ҆́бщницы бꙋ́дете вѣнцє́въ на́шихъ, и҆ моли́твенники ны̀ ко гдⷭ҇ꙋ и҆́мате.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Лю́ди беззако́ннѣйшыѧ безъ пра́вды пригвожда́ющыѧ тѧ̀ на дре́вѣ, дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ.
На стїхо́внѣ ѻ҆ктѡ́иха: и҆ ст҃ы́хъ стїхи́ра, гла́съ а҃:
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Лꙋчы̀ возсїѧ́ша мч҃никѡвъ пѧтоза̑рныѧ, дѣ́вамъ равночи́слєнны, воѡбражє́нїѧ бо и҆́хъ зрѧ́ще, ѡ҆зарѧ́емсѧ па́мѧтемъ и҆́хъ приѡбща́ющесѧ. тѣ́мъ, моли́твами и҆́хъ, хрⷭ҇тѐ бж҃е, безбѣ́днѣ спаса́й ѿ вра̑гъ дꙋ́шы на́шѧ, и҆ мольба́ми и҆́хъ неѡскꙋ́днꙋ жи́знь на́шꙋ соблюдѝ: ꙗ҆́кѡ и҆сточа́еши ми́лѡсти твоѧ̑ бога̑тыѧ непреста́ннѡ, безпреткнове́ннѡ тѧ̀ сла́вѧщымъ: ᲂу҆пова́нїе же и҆мꙋ́щымъ въ тѧ̀, моли́твами и҆́хъ да́рꙋй дꙋша́мъ на́шымъ ве́лїю ми́лость.
Сла́ва, гла́съ в҃. Самогла́сенъ:
Прїиди́те, возра́дꙋемсѧ гдⷭ҇ꙋ, въ па́мѧти дне́сь страстоте́рпцєвъ, ѽ празднолю́бцы! прїиди́те, восхва́лимъ и҆́хъ, та́йнѡ похвалѧ́юще: ра́дꙋйсѧ, а҆кїндѵ́не, ра́дꙋйсѧ, пїга́сїе, ра́дꙋйсѧ, а҆немподі́сте, ра́дꙋйсѧ, є҆лпїдїфо́ре, ра́дꙋйсѧ, а҆фѳо́нїе, и҆̀же ле́сть і҆́дѡльскꙋю въ про́пасть погрꙋзи́вше, и҆ хрⷭ҇та̀ гдⷭ҇а посредѣ̀ три́знища ꙗ҆́снѡ проповѣ́давше. тѣ́мъ, всеблаже́ннїи и҆ многострада́льнїи, непреста́ннѡ моли́тесѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Дре́вꙋ крⷭ҇тномꙋ тѧ̀, і҆и҃се, пригвожде́на зрѧ́щи неискꙋсобра́чнаѧ, пла́чꙋщи, глаго́лаше: ча́до сладча́йшее, почто̀ ѡ҆ста́вилъ є҆сѝ менѐ, ро́ждшꙋю тѧ̀ є҆ди́нꙋ, свѣ́те непристꙋ́пный пребезнача́льнагѡ ѻ҆ц҃а̀; потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, бжⷭ҇твєнныѧ стрⷭ҇ти твоѧ̑ сла́вѧщїи.
Тропа́рь, гла́съ в҃:
Страстоте́рпцы гдⷭ҇ни, бл҃же́нна землѧ̀, напи́вшаѧсѧ кровьмѝ ва́шими, и҆ свѧ́та селє́нїѧ, прїи́мшаѧ тѣлеса̀ ва̑ша: въ три́знищи бо врага̀ побѣди́сте, и҆ хрⷭ҇та̀ со дерзнове́нїемъ проповѣ́дасте: того̀, ꙗ҆́кѡ бла́га, моли́те, спасти́сѧ, мо́лимсѧ, дꙋша́мъ на́шымъ.
На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́хъ на д҃, є҆гѡ́же краегране́сїе: Твои́хъ мольба́ми мѧ̀ мч҃никѡвъ мно́жества покрыва́й.
Ѳеофа́нъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Сл҃нца и҆мꙋ́ще пра́вды незаходи́ма, хрⷭ҇та̀ бг҃а на́шего, просвѣща́юща ва́съ, ст҃і́и, невеще́ственнымъ свѣ́томъ, ѻ҆́блаки разори́те невѣ́дѣнїѧ моегѡ̀.
Безбѣ́днꙋю, ст҃і́и, безпрепо́ннѡ и҆сточа́юще бл҃года́ть, подава́ете приходѧ́щымъ вѣ́рою, всѧ́кꙋ бѣдꙋ̀, и҆ всѧ́кое ᲂу҆ны́нїе, и҆ бꙋ́рю и҆ мѧте́жь ᲂу҆ставлѧ́юще.
Крѣ́постїю непобѣди́мою препоѧ́савшесѧ, ст҃і́и, плотскі́ѧ не́мощи не помы́слисте: но безбоѧ́зненнѡ мꙋдрова́нїе ꙗ҆влѧ́юще, на ѻ҆́гнь и҆ мꙋче́нїе дерзнꙋ́сте.
Бг҃оро́диченъ:
Ты̀, є҆ди́на бг҃оневѣ́сто, въ высоча́йшихъ сѣдѧ́щаго на ѡ҆б̾ѧ́тїихъ носи́ла є҆сѝ, пло́ть бы́вша: ты́ бо ꙗ҆ви́ласѧ є҆сѝ ѿ всѣ́хъ вѣ̑къ прїѧ́телище досто́йное вседержи́телѧ.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ, па́че тебє̀, человѣколю́бче.
Оу҆тверди́вшесѧ хрⷭ҇то́вою си́лою, всеизѧ́щнѣйшїи, по́мысломъ крѣ́пкимъ, сквозѣ̀ ѻ҆́гнь же и҆ во́дꙋ, стра́ждꙋще, преидо́сте къ нбⷭ҇нымъ.
Нерасте́рзною бꙋ́дꙋщихъ наде́ждею ствержда́еми, настоѧ́щихъ болѣ́зней, мꙋ́жественнѣйшимъ смы́сломъ, всесла́внїи мч҃ницы, небрего́сте.
Равномꙋ́дрствꙋюще тре́мъ ю҆́ношамъ, всехва́льнїи, безꙋ́мїѧ пе́рсскагѡ ѻ҆́гнь ᲂу҆гаша́юще ꙗ҆ви́стесѧ, росо́ю дх҃а ѡ҆кроплѧ́еми.
Бг҃оро́диченъ:
Тѧ̀ предста́тельницꙋ и҆звѣ́стнꙋ, бг҃ома́ти, стѧжа́вшїи, надє́жды на тѧ̀ возлага́юще, спаса́емсѧ, и҆, къ тебѣ̀ прибѣга́юще, сохранѧ́емсѧ.
Сѣда́ленъ, гла́съ и҃. Подо́бенъ: Премꙋ́дрости:
Безбѣ́днѡ тече́нїе благочести́вное въ по́двизѣ стра́ждꙋще, благосла́внїи, наде́ждею проидо́ша, вѣнцы̑ ᲂу҆крѣплѧ́еми: сопроти̑вныѧ бо до конца̀ погꙋби́вше, безпрепо́ннѡ побѣ́дꙋ свою̀ соверши́ша. тѣ́мъ и҆ ѻ҆би́льнѡ просѧ́щымъ вѣ́рою и҆сточа́ютъ всегда̀ мно́жество и҆сцѣле́нїй. и҆̀мже согла́снѡ возопїи́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти чествꙋ́ющымъ любо́вїю свѧтꙋ́ю па́мѧть ва́шꙋ.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Просвѣща́еми добро́тою и҆зѧ́щнѣйшагѡ страда́нїѧ, свѣ́тлїи свѣти́льницы, мч҃ницы хрⷭ҇то́вы ꙗ҆ви́стесѧ, свѣтлѣ́йшими лꙋча́ми ѡ҆зарѧ́юще зовꙋ́щыѧ: сла́ва, хрⷭ҇тѐ, си́лѣ твое́й.
Ѡ҆чище́нїе кро́вь мꙋ́ченикѡвъ бы́сть, и҆ благово́ннѣйшее и҆́стиннѡ приноше́нїе бг҃ꙋ, безпрепо́ннѡ даю́щи, и҆ безбѣ́дный и҆сточа́ющи всѣ̑мъ и҆сто́чникъ врачева́нїѧ.
Разли́чныхъ напа́стей и҆ бѣ́дъ нахожде́нїе, ва́шими моли́твами сꙋ́щими ко хрⷭ҇тꙋ̀ ѿрази́сте, соверша́ющихъ ᲂу҆се́рднѡ всесвѧще́ннꙋю, и҆ всепра́зднственнꙋю па́мѧть ва́шꙋ, досточꙋ́днїи.
И҆спрове́ргше пре́лести і҆́дѡльское безбо́жїе, бг҃а всѣ́хъ животворѧ́щее дѣ́йство дѣ́лы ꙗ҆влѧ́юще, зва́сте, преблаже́ннїи: сла́ва, хрⷭ҇тѐ, си́лѣ твое́й.
Бг҃оро́диченъ:
Крѣпча́йшее тѧ̀ ѻ҆рꙋ́жїе на врагѝ предлага́емъ, ско́рби всѧ́кїѧ и҆ лю́тыхъ ѡ҆бстоѧ́нїй ѿрѣва́емъ вре́дъ, и҆ возмꙋще́нїй є҆реті́ческихъ, мт҃и бж҃їѧ, и҆збѣга́емъ.
Пѣ́снь є҃. І҆рмо́съ:
Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ: но мы́ тѧ, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Тѧ̀ сама́го, а҆фѳо́нїе, приве́лъ є҆сѝ хрⷭ҇тꙋ̀, крѣ́пцѣ мꙋчи́тельскꙋю, сла́вне, ѡ҆бличи́въ ѕло́бꙋ безбо́жнꙋю, и҆ къ свѣ́тꙋ прите́клъ є҆сѝ вѣ́ры веселѧ́сѧ.
Подо́бѧсѧ, а҆фѳо́нїе, стрⷭ҇ти хрⷭ҇то́вѣ, тогѡ̀ ра́ди твоѧ̀ глава̀ ѿсѣче́сѧ и҆зѧ́щнѣ: къ неизмѣ́нномꙋ бо весе́лїю потща́лсѧ є҆сѝ, и҆ безсме́ртномꙋ поко́ищꙋ.
На недви́жимѣй наде́жди ᲂу҆тверди́всѧ, и҆ кра̑снаѧ, ꙗ҆̀же на землѝ, ѡ҆плева́въ, всемꙋ́дре є҆лпїдїфо́ре, неꙋкло́ннѡ бо ты̀ прете́клъ є҆сѝ по́прище страда́нїѧ.
Бг҃оро́диченъ:
Возсїѧ́въ и҆зъ тебє̀ сл҃нце мы́сленное, свѣ̑тлыѧ лꙋчы̀ своегѡ̀ бжⷭ҇тва̀ всѣ̑мъ прострѐ, бцⷣе влⷣчце: тѣ́мъ всѝ тѧ̀ сла́вимъ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Текꙋ́щихъ тлѣ̑ннаѧ презрѣ́вше, нетлѣ̑ннаѧ сподо́бистесѧ зрѣ́ти. и҆скꙋше́нїй ᲂу҆́бѡ и҆зба́вите и҆ бѣ́дъ, вѣ́рою ва́съ призыва́ющыѧ, всехва́льнїи.
Трⷪ҇цꙋ безнача́льнꙋю, пресла́внїи мч҃ницы, лю́тѡ свѧ̑занныѧ и҆ въ темни́цахъ неѡсла́бнѡ держи̑мыѧ разрѣши́ти, ва́шими мольба́ми, ᲂу҆милосе́рдите.
За тѧ̀ себѐ преда́вше на сме́рть, безсме́ртїе, сп҃се мо́й, до́блїи полꙋчи́ша, и҆ спаси́телїе сꙋ́щихъ въ бꙋ́ри и҆ напа́стехъ и҆ ско́рбехъ бы́ша.
Бг҃оро́диченъ:
Расто́ргни мои́хъ прегрѣше́нїй, ѻ҆трокови́це, рꙋкописа́нїе, и҆ содержа́щїѧ мѧ̀ печа́ли и҆ страсте́й разрѣше́нїе да́рꙋющи, и҆ соблюда́ющи вы́нꙋ неврежде́нна, влⷣчце.
Конда́къ, гла́съ в҃. Подо́бенъ: Твє́рдыѧ:
Благочести̑выѧ и҆ бг҃онѡ́сныѧ мꙋ́ченики, ꙗ҆́кѡ на землѝ ѡ҆ста́вльшыѧ всѧ̑, прїѧ́лъ є҆сѝ въ наслажде́нїе бл҃ги́хъ твои́хъ, и҆ ᲂу҆покое́нїе, а҆кїндѵ́на, пїга́сїа, а҆немподі́ста, съ ни́миже а҆фѳо́нїа и҆ є҆лпїдїфо́ра же, є҆ди́не сы́й пребл҃гі́й.
І҆́косъ:
Ѿве́рзи мѝ ᲂу҆ста̀, хрⷭ҇тѐ мо́й, воспѣ́ти и҆ похвали́ти че́стнѡ по́двиги страстоте́рпєцъ твои́хъ, гдⷭ҇и: сі́и бо всѧ̑ ѡ҆ста́вльше и҆ возлюби́вше тебѐ, созда́телѧ всѣ́хъ, сꙋ̑щаѧ на землѝ всѧ̑, ꙗ҆́кѡ тлѣ̑ннаѧ вмѣни́ша. и҆ та́кѡ, честны́й ѻ҆́бразъ живоно́снагѡ твоегѡ̀ крⷭ҇та̀ сотвори́вше, ᲂу҆се́рднѡ предста́ша цр҃ю̀, ꙗ҆́кѡ ѻ҆рꙋ̑жницы, мꙋ́чєницы до́блїи, вопїю́ще тѝ: є҆ди́не сы́й пребл҃гі́й.
Пѣ́снь з҃. І҆рмо́съ:
Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Ꙗ҆́кѡ и҆зба́вилъ є҆сѝ, и҆зъ пла́мене трѝ благочести̑выѧ ѻ҆́троки, си́це и҆ ны́нѣ страда́льцы въ пещѝ ѻ҆́гненнѣй сохрани́лъ є҆сѝ, вопїю́щыѧ тѝ бг҃омꙋ́дреннѡ: ѻ҆тє́цъ на́шихъ бж҃е, бл҃гослове́нъ є҆сѝ.
Дае́ши ѻ҆би̑льныѧ да́ры и҆ чꙋдодѣѧ́нїе и҆сточа́еши, страстотє́рпцы твои́ми, хрⷭ҇тѐ, содѣва́ѧ и҆ содѣ́йствꙋѧ, ꙗ҆́кѡ милосе́рдъ, и҆ ꙗ҆влѧ́ѧ пою́щымъ тѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
Мно́жество мꙋ́чєникъ, нело́жнѡ со́браннїи вѣ́рою, приведо́стесѧ хрⷭ҇тꙋ̀, пресла́вныхъ чꙋде́съ ꙗ҆вле́нїе дѣ́йствꙋюще, и҆ пою́ще: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
И҆зба́вленнїи тобо́ю пра́дѣднїѧ клѧ́твы, и҆ къ присносꙋ́щнѣй пи́щи преше́дше, ра́дꙋйсѧ, зове́мъ тебѣ̀, препросла́вленнаѧ влⷣчце, ꙗ҆́же бг҃а на́мъ воплоще́ннаго ро́ждшаѧ.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Благочести́вѣйшее мч҃никѡвъ торжество̀ ра́достнѡ прїи́де, мі́ръ ѡ҆зарѧ́ющее всѧ̑ возвеселѝ, и҆ свѣ́тлѡ ᲂу҆краша́ющее вѣ́рою пою́щыѧ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
На ѕвѣ́ри, и҆ ро́вы, и҆ мꙋ̑ки лю̑тыѧ дерзнꙋ́сте, преизѧ́щнїи, и҆мꙋ́ще помо́щника непобѣди́ма, сла́вы гдⷭ҇а. є҆мꙋ́же ны́нѣ зове́мъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
Ва́съ, дѡ́блїѧ страда́льцы, а҆кїндѵ́на, пїга́сїа, и҆ а҆немподі́ста, па́ки же а҆фѳо́нїа и҆ приснопа́мѧтнаго є҆лпїдїфо́ра, и҆мꙋ́ще стѣ́нꙋ крѣ́пкꙋю, гдⷭ҇а пое́мъ и҆ превозно́симъ во вѣ́ки.
Вѣнце́мъ побѣ́ды ᲂу҆краси́вшесѧ, и҆ добро́ты дїади́мою свѣтѧ́щесѧ, зарю̀ невече́рнюю коне́чнѡ, бл҃же́ннїи, на нб҃сѣ́хъ прїѧ́ли є҆стѐ, мч҃ницы, зовꙋ́ще: гдⷭ҇а по́йте дѣла̀, и҆ превозноси́те є҆го̀ во вѣ́ки.
Бг҃оро́диченъ:
Оу҆сты̀ и҆ ра́зꙋмомъ бцⷣꙋ мꙋ́дрствꙋюще, пѣсносло́вимъ тѧ̀, пренепоро́чнаѧ: породила́ бо є҆сѝ, пречⷭ҇таѧ, пло́тїю ѡ҆бложе́ннаго творца̀ и҆ бг҃а и҆ цр҃ѧ̀ хрⷭ҇та̀. тѣ́мъ тѧ̀, дв҃о, пое́мъ и҆ превозно́симъ во вѣ́ки.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Трꙋды̀ ва́шѧ на землѝ небе́сное весе́лїе прїѧ́ше, и҆дѣ́же мꙋ́ченикѡвъ ли́цы и҆ бжⷭ҇твенныхъ вѡ́инства, и҆ всѐ перворо́дныхъ сра́дꙋетсѧ торжество̀, всебл҃же́ннїи.
Ѿ ᲂу҆́зъ лю́тыхъ, всебл҃же́ннїи, и҆ бѣ́дъ и҆зба́вите всѧ̑, вѣ́рою ст҃о́е торжество̀ ва́ше пра́зднꙋющыѧ, ми́ръ же и҆ тишинꙋ̀ просѧ́ще, и҆ спасе́нїе, бл҃же́ннїи.
Бога́тымъ ѡ҆зарѧ́еми свѣ́томъ, и҆ бл҃года́тїю, страстоте́рпцы, сїѧ́юще, согрѣше́нїй разрѣше́нїе и҆ печа́лей кꙋ́пнѡ съ ва́ми подви́гшимисѧ, да́ти къ ва́мъ прибѣга́ющымъ, бл҃годѣ́телѧ ᲂу҆моли́те.
Бг҃оро́диченъ:
Є҆́ѵа ᲂу҆́бѡ дре́ва жи́зненнагѡ и҆згна́сѧ, возбрани́вшисѧ причаще́нїѧ: ты́ же, дв҃о бцⷣе, жи́знь превѣ́чнꙋю родила̀ є҆сѝ, мі́рꙋ живоно́сное дѣ́йство да́рꙋющи вѣ́рою.
Свѣти́ленъ. Подо́бенъ: Жєны̀ ᲂу҆слы́шите:
А҆кїндѵ́на, и҆ пїга́сїа, и҆ є҆лпїдїфо́ра вѣнча́емъ, со а҆фѳо́нїемъ, пѣ́сньми, кꙋ́пнѡ и҆ а҆немподі́ста: и҆́бо пе́рсскꙋю ле́сть ѡ҆бличи́вше сꙋемꙋ́дреннꙋю, и҆ бїє́нїѧ и҆ ра̑ны за хрⷭ҇та̀ претерпѣ́вше, неизречє́нныѧ сла̑вы полꙋчи́ша.
Бг҃оро́диченъ:
Ра́дꙋйсѧ, бж҃їѧ пала́то: ра́дꙋйсѧ, горо̀ ѡ҆сѣнѧ́ема: ра́дꙋйсѧ, кꙋпино̀ неѡпали́маѧ: ра́дꙋйсѧ, прⷭ҇то́ле сла́вы: ра́дꙋйсѧ, бжⷭ҇твеннаѧ трапе́зо: ра́дꙋйсѧ, рꙋ́чко всезлата́ѧ: ра́дꙋйсѧ, свѣ́щниче ѻ҆гнезра́чный: ра́дꙋйсѧ, ле́гкїй ѻ҆́блаче, дв҃о мт҃и марі́е.
На стїхо́внѣ ѻ҆ктѡ́иха, и҆ ст҃ы́хъ стїхи́ра, гла́съ в҃.
Сті́хъ: Мнѡ́ги скѡ́рби првⷣнымъ, и҆ ѡ҆ всѣ́хъ и҆́хъ и҆зба́витъ ѧ҆̀ гдⷭ҇ь.
Кро́вными тѡ́ки тѣ́ло ѡ҆багри́въ, безбѣ́днѣ проше́лъ є҆сѝ пꙋ́ть мꙋче́нїѧ, страстоте́рпче а҆кїндѵ́не: тѣ́мъ и҆ крѣ́постїю бжⷭ҇твенною препоѧ́савсѧ, вра̑жїѧ и҆зсѣ́клъ є҆сѝ кознѡдѣ́йства. хрⷭ҇та̀ бг҃а молѝ ѡ҆ на́съ, спасти́сѧ дꙋша́мъ на́шымъ.
Сла́ва, гла́съ д҃:
Пѧтоза́рнаѧ страда́лєцъ свѣща̀, ꙗ҆́кѡ въ дꙋбра́вѣ дре́въ сѣки́рою, дв҃дски и҆зсѣчѐ ле́сть вра́жїю, и҆сповѣ́давше хрⷭ҇та̀ предъ цари̑, непреста́ннѡ мо́лѧтъ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Поⷣ: Ꙗ҆́кѡ до́блѧ:
На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́ннѣйше; ꙳ сїѧ̑ тѝ невѣ́рный собо́ръ воздадѐ пребеззако́нный, ꙳ и҆́же мно́гихъ твои́хъ чꙋде́съ наслади́выйсѧ: ꙳ но сла́ва неизгл҃го́ланномꙋ ꙳ соше́ствїю твоемꙋ̀, влⷣко.
На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆пⷭ҇лъ ко є҆фесе́ємъ, зача́ло сл҃г. А҆ллилꙋ́їа, гла́съ д҃. Воззва́ша пра́веднїи: Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе матѳе́а, зача́ло л҃ѕ: Прича́стенъ: Ра́дꙋйтесѧ пра́веднїи:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.