← претходни дан | Минеј — Октобар | следећи дан →
28 октября: Преподобного Иова, игумена Почаевского
Мѣ́сѧца тогѡ́же въ к҃и-й де́нь.
Слꙋ́жба прпⷣбномꙋ ѻ҆тцꙋ̀ на́шемꙋ і҆́ѡвꙋ, поча́евскомꙋ чꙋдотво́рцꙋ.
На ма́лѣй вече́рни,
на Гдⷭ҇и воззва́хъ, стїхи̑ры на д҃, гла́съ з҃:
Ꙗ҆ви́сѧ де́нь бл҃говоле́нїѧ бж҃їѧ и҆ пра́здникъ весе́лїѧ: стеце́мсѧ ᲂу҆̀бо, вѣ́рнїи, на го́рꙋ поча́евскꙋю, и҆ воспои́мъ всебл҃же́ннаго і҆́ѡва, честнꙋ́ю па́мѧть тогѡ̀ соверша́юще.
Дрема́нїѧ вѣ́ждома, нижѐ сна̀ ѻ҆чи́ма твои́ма да́лъ є҆сѝ, прпⷣбне, бо́дренными мл҃твами и҆ по́стническимъ житїе́мъ гдⷭ҇еви ᲂу҆гожда́ѧ: тѣ́мже ра́достнѡ соверша́емъ па́мѧть твою̀, всече́стне.
Прїиди́те, вѣ́рнїи, на ст҃ꙋ́ю го́рꙋ поча́евскꙋю, и҆дѣ́же ᲂу҆го́дникъ бж҃їй подвиза́сѧ въ житїѝ свое́мъ, и҆ ѿ си́лы въ си́лꙋ восхожда́ше: и҆ томꙋ̀ ны́нѣ помо́лимсѧ, да во ѻ҆би́телехъ нбⷭ҇ныхъ водвори́всѧ, мо́литсѧ ко гдⷭ҇ꙋ ѡ҆ сп҃се́нїи дꙋ́шъ на́шихъ.
Не мо́жетъ гра́дъ ᲂу҆кры́тисѧ верхꙋ̀ горы̀ стоѧ̀: ты́ же, прпⷣбне, а҆́ще и҆ въ те́мнѣй ка́меннѣй пеще́рѣ почива́еши нетлѣ́ннымъ тѣ́ломъ твои́мъ, ѻ҆ба́че всѣ́хъ призыва́еши на го́рꙋ поча́евскꙋю, свѣ́тлагѡ ра́ди пра́здника твоегѡ̀, молѧ̀ хрⷭ҇та̀ бг҃а сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, гла́съ ѕ҃:
Всест҃а́ѧ бцⷣе, во вре́мѧ живота̀ моегѡ̀ не ѡ҆ста́ви менє̀, человѣ́ческомꙋ предста́тельствꙋ не ввѣ́ри мѧ̀, но сама̀ застꙋпѝ и҆ поми́лꙋй мѧ̀.
На стїхо́внѣ стїхи̑ры, гла́съ ѕ҃:
Па́мѧть твою̀ дне́сь пра́зднꙋюще, прпⷣбне ѻ҆́тче на́шъ і҆́ѡве, вопїе́мъ тѝ: со а҆́гг҃лы предстоѧ̀ въ дерзнове́нїи мно́зѣ, ѡ҆ всѣ́хъ на́съ, ѻ҆́тче, моли́сѧ ко влⷣцѣ хрⷭ҇тꙋ̀.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Оу҆́тро и҆ де́нь свѣ́телъ, тво́й пра́здникъ ꙗ҆ви́сѧ, просвѣща́ѧ на́ша сердца̀, вѣ́рою хва́лѧщихъ честны́ѧ твоѧ̀ по́двиги, ѻ҆́тче на́шъ і҆́ѡве.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ꙗ҆́кѡ со́лнце на землѝ ѡ҆брѣ́тъ всечестнꙋ́ю і҆кѡ́нꙋ бж҃їѧ мт҃ре на горѣ̀ поча́евстѣй, всесвѣ́тлаѧ ѕвѣзда̀ тоѧ̀ показа́лсѧ є҆сѝ: тѣ́мже и҆ на́съ, пою́щихъ тѧ̀, свѣ́томъ бг҃оразꙋ́мїѧ ѡ҆зарѝ, мл҃твами бцⷣы, і҆́ѡве ѻ҆́тче на́шъ.
Сла́ва, и҆ ны́нѣ, гла́съ то́йже:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
Тропа́рь, гла́съ д҃:
Многострада́льнагѡ пра́ѻтца долготерпѣ́нїе стѧжа́въ, крⷭ҇ти́телевꙋ воздержа́нїю ᲂу҆подоблѧ́ѧсѧ, бж҃е́ственныѧ же ре́вности ѻ҆бою̀ прїѻбща́ѧсѧ, тѣ́хъ и҆мена̀ досто́йнѡ прїѧ́ти сподо́билсѧ є҆сѝ, и҆ и҆́стинныѧ вѣ́ры бы́лъ є҆сѝ проповѣ́дникъ безбоѧ́зненъ: тѣ́мже мона́хѡвъ мно́жєства ко хрⷭ҇тꙋ̀ приве́лъ є҆сѝ, и҆ всѧ̑ лю́ди въ правосла́вїи ᲂу҆тверди́лъ є҆сѝ, і҆́ѡве прпⷣбне ѻ҆́тче на́шъ, молѝ сп҃сти́сѧ дꙋша́мъ на́шымъ.
Сла́ва, и҆ ны́нѣ: Є҆́же ѿ вѣ́ка ᲂу҆тае́нное:
На вели́цѣй вече́рни,
на Гдⷭ҇и воззва́хъ, стїхи̑ры на и҃, гла́съ а҃:
Прїи́де де́нь па́мѧти твоеѧ̀, і҆́ѡве пресла́вне, и҆ волы́нскаѧ землѧ̀ ра́дости и҆сполнѧ́етсѧ, ꙗ҆́кѡ твои́мъ наꙋче́нїемъ во правосла́вїи ᲂу҆тверди́вшисѧ и҆ твои́ми пѡ́двиги бл҃гоче́стїю наꙋчи́вшисѧ, на твоѧ̑ же мл҃твы ᲂу҆пова́ющи: и҆́миже, ѻ҆́тче прпⷣбне, и҆спросѝ мі́рови ми́ръ и҆ дꙋша́мъ на́шымъ ве́лїю млⷭ҇ть.
Два́жды.
Во сла́внѣй па́мѧти твое́й, ᲂу҆го́дниче хрⷭ҇то́въ, мона́шестїи собо́ри ликовствꙋ́ютъ, и҆ ѡ҆ бг҃оꙋго́днѣмъ житїѝ ре́вностїю распала́ютсѧ, твои̑мъ же нетлѣ̑ннымъ моще́мъ покланѧ́ющесѧ, ꙗ҆́кѡ живꙋ́щемꙋ тѝ съ на́ми восклица́ютъ: ѻ҆́тче і҆́ѡве, млⷭ҇тиве и҆ бг҃оꙋвѣ́тливе, и҆спросѝ ᲂу҆ гдⷭ҇а мі́рови ми́ръ и҆ дꙋша́мъ на́шымъ ве́лїю млⷭ҇ть.
Кто̀ не подиви́тсѧ твоемꙋ̀ долготерпѣли́вомꙋ житїю̀, ѻ҆́тче прпⷣбне; во трїе́хъ бо ѻ҆би́телехъ твоѧ̑ пресла̑внаѧ дѣѧ̑нїѧ проповѣ́дашасѧ, по́стъ же и҆ сле́зы и҆ бдѣ́нїе, въ пеще́рѣ себє̀ заключе́нїе и҆ во все́мъ себє̀ непощадѣ́нїе, но ко бра́тїи любо́вь ми́лꙋющаѧ, та́темъ проще́нїе и҆ всѣ̑мъ лю́демъ до́брое наꙋче́нїе.
И҆́ны стїхи̑ры, гла́съ в҃:
Кі́ими похва́льными вѣнцы̀ ᲂу҆вѧзе́мъ прпⷣбнаго і҆́ѡва, вѣ́ры правосла́вныѧ ᲂу҆чи́телѧ и҆ ратобо́рца, бж҃е́ственныхъ писа́нїй глаша́таѧ, ѻ҆те́ческихъ же преда́нїй списа́телѧ, но и҆ тѧ́жкихъ слꙋ́жбъ и҆сполни́телѧ, землѝ копа́нїемъ и҆ древе́съ сажде́нїемъ себѐ смирѧ́вшаго и҆ всѣ̑мъ ѻ҆́бразъ послꙋша́нїѧ бы́вшаго; сего̀ ны́нѣ нетлѣ́нною сла́вою вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть.
Два́жды.
Кі́ими досто́йными бл҃годаре́ньми просла́вимъ і҆́ѡва, поча́евскꙋю похвалꙋ̀ и҆ всеѧ̀ страны̀ рѡссі́йскїѧ ᲂу҆краше́нїе; то́й бо мл҃твами свои́ми нбⷭ҇ный свѣ́тъ въ пеще́рꙋ низведѐ, то́й и҆ по преставле́нїи свое́мъ съ нб҃сѐ ꙗ҆влѧ́етсѧ и҆ мл҃твꙋ возно́ситъ ѡ҆ напа́ствꙋемыхъ лю́дехъ. та́мѡ во сла́вою вѣнча́етъ є҆го̀ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть.
Кі́ими ᲂу҆миле́нными слеза́ми сокрꙋши́мъ растлѣ̑ннаѧ сердца̀ на̑ша, зрѧ́ще і҆́ѡва нетлѣ́нное тѣ́ло, є҆́же по сме́рти а҆́ки жи́во сохранѧ́етсѧ, но во вре́мѧ житїѧ̀ є҆гѡ̀ а҆́ки ме́ртво пребыва́ше, посто́мъ и҆ бдѣ́нїемъ и҆знꙋрѧ́емо; тогѡ̀ ᲂу҆̀бо подвигѡ́мъ подража́ти потщи́мсѧ, да и҆ на́съ во грѧдꙋ́щемъ житїѝ поми́лꙋетъ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть.
Сла́ва, гла́съ г҃:
Твои̑мъ словесє́мъ, гдⷭ҇и, послѣ́довавъ і҆́ѡвъ прпⷣбный, всѧ̑ кра̑снаѧ мі́ра сегѡ̀ во ᲂу҆ме́ты вмѣни́лъ є҆́сть, и҆ ѡ҆ ю҆́ности свое́й неради́въ, и҆з̾мла́да мона́шескомꙋ послꙋша́нїю вдаде́сѧ: тѣ́мже де́мѡнскїѧ кѡ́зни побѣди́въ, а҆дама́нтъ крѣ́покъ правосла́внагѡ бл҃гоче́стїѧ ꙗ҆ви́лсѧ є҆́сть, всю́ же странꙋ̀ сїю̀ свои́ми пѡ́двиги просвѣща́етъ. тогѡ̀ мл҃твами дꙋ́шы на́шѧ пощадѝ, и҆ да́рꙋй на́мъ по́мыслъ до́брый є҆́же пре́жде конца̀ покаѧ́нїѧ.
И҆ ны́нѣ, бг҃оро́диченъ: Ка́кѡ не диви́мсѧ:
Вхо́дъ, и҆ чтє́нїѧ г҃ [пи̑саны въ се́й кни́зѣ на ѡ҆боро́тѣ листа̀ ѳ҃і]
На лїті́и стїхи́ра хра́ма и҆ ст҃а́гѡ двѣ̀, гла́съ и҃:
Прїиди́те, всѝ слове́нстїи собо́ри, просла́вимъ ѻ҆́бщагѡ сп҃се́нїѧ рачи́телѧ и҆ є҆́реси безбоѧ́зненнаго ѡ҆бличи́телѧ, ни́щихъ пита́телѧ и҆ грѣ́шникѡвъ кро́ткаго вразꙋми́телѧ, па́ѵловꙋ ре́вность ѡ҆ лю́дехъ ꙗ҆ви́вшаго и҆ дерзнове́нїе ве́лїе ко гдⷭ҇ꙋ стѧжа́вшаго: то́й бо и҆ по преставле́нїи свое́мъ болѧ́щыѧ и҆сцѣлѧ́етъ и҆ дерзновє́ннаѧ нашє́ствїѧ ва̑рваръ ѿгонѧ́етъ, на́съ же ᲂу҆миле́нными пѡ́мыслы и҆сполнѧ́етъ и҆ мо́литсѧ при́снѡ ѡ҆ сп҃се́нїи дꙋ́шъ на́шихъ.
Сла́ва, гла́съ в҃:
Дне́сь ликꙋ́етъ твоѧ̀ ла́ѵра, прпⷣбне ѻ҆́тче і҆́ѡве, и҆ всѝ лю́дїе твоѧ̑ мо́щи лобыза́ти подвиза́ютсѧ, де́мони твоеѧ̀ бл҃года́ти трепе́щꙋтъ, и҆ а҆́гг҃ли ѡ҆ твое́мъ застꙋпле́нїи ра́дꙋютсѧ. мы́ же непреста́ннѡ вопїе́мъ: ᲂу҆твердѝ твои́ми мл҃твами правосла́вныхъ вѣ́рꙋ, житїѐ на́ше и҆спра́ви и҆ сп҃се́нїе и҆спросѝ дꙋша́мъ на́шымъ.
И҆ ны́нѣ:
Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.
На стїхо́внѣ стїхи̑ры, гла́съ є҃:
Ра́дꙋйсѧ, сщ҃е́ннаѧ главо̀, і҆́ѡве, волы́нскїѧ страны̀ ᲂу҆краше́нїе, тꙋ́ю бо зри́ши въ правосла́внѣй вѣ́рѣ ᲂу҆твержда́емꙋ, тебѣ̀ ꙗ҆́кѡ жи́вꙋ сꙋ́щꙋ молѧ́щꙋюсѧ и҆ застꙋпле́нїѧ на де́моны просѧ́щꙋю: є҆́йже бꙋ́ди застꙋ́пникъ неѡбори́мый и҆ ѡ҆ все́мъ мі́рѣ моли́твенникъ.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, сщ҃е́ннаѧ главо̀, прпⷣбне і҆́ѡве, ѕвѣздо̀ ѿ га́лицкїѧ землѝ къ восто́кꙋ прише́дшаѧ и҆ немощны́хъ дꙋ́шы ѡ҆бо́дрившаѧ, во смире́нїи свое́мъ дерзнове́нїю проти́вꙋ є҆́реси лю́ди рѡссі́йскїѧ наста́вившаѧ и҆ къ нбⷭ҇номꙋ црⷭ҇твїю приве́дшаѧ: є҆гѡ́же и҆ на́съ сподо́би предста́тельствомъ твои́мъ, и҆ ѡ҆ все́мъ мі́рѣ бꙋ́ди моли́твенникъ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ра́дꙋйсѧ, сщ҃е́ннаѧ главо̀, над̾ волы́нскою страно́ю гдⷭ҇емъ вознесе́ннаѧ, є҆́йже повинꙋ́шасѧ кнѧ́зи и҆ лю́дїе: мы́ же, дꙋхѡ́внаѧ твоѧ̑ ча̑да, се́рдцемъ сокрꙋше́ннымъ къ тебѣ̀ припа́дающе, про́симъ ко ѡ҆долѣ́нїю страсте́й твоеѧ̀ по́мощи, въ ско́рбехъ бл҃годꙋ́шїѧ, и҆ ѡ҆ сме́ртномъ часѣ̀ па́мѧти непреста́нныѧ, и҆ ѡ҆ все́мъ мі́рѣ мл҃твъ твои́хъ. і҆́ѡве прпⷣбне.
Сла́ва, гла́съ и҃:
Мона́хѡвъ мно́жєства наста́вника тѧ̀ почита́емъ, ѻ҆́тче на́шъ і҆́ѡве: твое́ю бо стезе́ю вои́стиннꙋ пра́вѡ ходи́ти позна́хомъ. бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче и҆ прпⷣбныхъ соприча́стниче и҆ првⷣныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: Безневѣ́стнаѧ дв҃о:
Тропа́рь, гла́съ д҃: Многострада́льнагѡ пра́ѻтца долготерпѣ́нїе стѧжа́въ: два́жды [пи́санъ на ма́лѣй вече́рни]: и҆ Бцⷣе дв҃о: є҆ди́ножды.
На ᲂу҆́трени,
на Бг҃ъ гдⷭ҇ь, тропа́рь прпⷣбномꙋ, два́жды.
Сла́ва, и҆ ны́нѣ: бг҃оро́диченъ.
По а҃-й каѳі́смѣ сѣда́ленъ, гла́съ д҃:
Зва́нїю гдⷭ҇ню послѣ́довавъ, роди́тельскїй до́мъ ѡ҆ста́вилъ є҆сѝ, и҆ ѿ тѣ́снагѡ житїѧ̀ на тѣснѣ́йшее преходи́лъ є҆сѝ, но се́рдце твоѐ всѧ̀ притека́ющыѧ къ тебѣ̀ не тѣ́снѡ вмѣща́ше: тѣ́мже дꙋхѡ́внаѧ ча̑да твоѧ̑ ᲂу҆мно́жишасѧ и҆ ѡ҆ гдⷭ҇ѣ возвесели́шасѧ. є҆го́же молѝ, ѻ҆́тче на́шъ і҆́ѡве, сп҃сти́сѧ вѣ́рою чтꙋ́щымъ ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бж҃е́ственнымъ ржⷭ҇тво́мъ твои́мъ и҆стлѣ́вшее страстьмѝ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ жи́зни нетлѣ́нїѧ. тѣ́мже тѧ̀ по до́лгꙋ бл҃жи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
По в҃-й каѳі́смѣ сѣда́ленъ, гла́съ є҃:
Пеще́рнаго затво́рника и҆ бдѣ́ннаго моли́твенника почти́мъ прпⷣбнаго і҆́ѡва, ѿ младе́нства до ста́рости себѐ смирѧ́вшаго и҆ ст҃ꙋ́ю цр҃ковь просла́вльшаго, та̑ти и҆ ѕлодѣ̑и къ покаѧ́нїю приве́дшаго и҆ те́плѣ молѧ́щасѧ ѡ҆ дꙋша́хъ на́шихъ.
Два́жды.
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ и҆ несказа́ненъ ѻ҆́бразъ ржⷭ҇тва̀ въ тебѣ̀ позна́сѧ, приснодв҃о чⷭ҇таѧ, ᲂу҆жаса́етъ мо́й ᲂу҆́мъ и҆ ᲂу҆дивлѧ́етъ помышле́нїе: сла́ва твоѧ̀, бцⷣе, всѣ̑мъ простре́сѧ, во сп҃се́нїе дꙋ́шъ на́шихъ.
Ѱало́мъ и҆збра́нный прпⷣбномꙋ.
По полѷеле́и сдѣда́ленъ, гла́съ и҃:
Па́стырскꙋю мꙋ́дрость смиреномꙋ́дрїемъ стѧжа́въ, мнѡ́гимъ бы́лъ є҆сѝ ᲂу҆чи́тель, мона́хѡмъ ѻ҆те́цъ и҆ скорбѧ́щымъ ᲂу҆тѣ́шитель и҆ мл҃твы і҆и҃совы неꙋмолка́ѧй ѻ҆рга́нъ: тѣ́мже моще́й нетлѣ́нїемъ просла́ви тѧ̀ мздовоздаѧ́тель гдⷭ҇ь, є҆го́же непреста́ннѡ молѝ, прегрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Нбⷭ҇нꙋю две́рь и҆ кївѡ́тъ, всест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́й содѣ́ласѧ мі́рꙋ, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти бл҃гоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Є҆ѵⷢ҇лїе ѿ матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́тче, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ без̾ поро́ка поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ бцⷣѣ на ѕ҃: и҆ прпⷣбномꙋ на и҃, по а҆́збꙋцѣ.
Канѡ́нъ прпⷣбномꙋ и҆ бг҃оно́сномꙋ і҆́ѡвꙋ, поча́евскомꙋ чꙋдотво́рцꙋ.
Гла́съ и҃.
Пѣ́снь а҃.
І҆рмо́съ: Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль. пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
А҆́гг҃ла земна́го и҆ нбⷭ҇наго человѣ́ка, і҆́ѡва прпⷣбнаго, волы́нскꙋю похвалꙋ̀, досто́йнѡ воспѣ́ти помози́ ми, сло́ве бж҃їй, презира́ѧ моѧ̑ прегрѣшє́нїѧ и҆ подава́ѧ сло́во ᲂу҆стѡ́мъ мои̑мъ.
Бы́лъ є҆сѝ, прпⷣбне, вои́стиннꙋ мі́рꙋ свѣти́льникъ пресвѣ́телъ, всѣ̑мъ пꙋ́ть сп҃се́нїѧ показꙋ́ѧй: тѣ́мже и҆ мнѣ̀ бꙋ́ди помо́щникъ во є҆́же просла́вити житїѐ твоѐ и҆ ᲂу҆миле́нїе стѧжа́ти.
Въ домꙋ̀ роди́телей твои́хъ пе́рвѣе позна́лъ є҆сѝ гдⷭ҇а, і҆́ѡве сла́вне, и҆ ѻ҆́трокъ сы́й, ра́зꙋмъ соверше́нъ показа́лъ є҆сѝ, є҆гда̀ мона́шеское житїѐ и҆зво́лилъ є҆сѝ, всѧ̑ же житє́йскаѧ преѡби́дѣвъ, є҆ди́наго бг҃а возлюби́лъ є҆сѝ.
Горѣ̀ ѻ҆́чи твоѝ и҆ дꙋ́шꙋ возносѧ̀, во ѻ҆би́тели ᲂу҆го́рництѣй бра́тїю въ бг҃оꙋго́днѣмъ житїѝ ско́рѡ превозше́лъ є҆сѝ, хꙋ́ждша всѣ́хъ себѐ помышлѧ́ѧ и҆ тѣ́мъ лꙋ́чшїй і҆и҃сꙋ ꙗ҆влѧ́ѧсѧ, ста́рцємъ же и҆ ю҆́нымъ ѻ҆́бразъ бы́въ прелюбе́знѣйшїй.
До́брѣ тѧ̀ на дїа́волы во́инствовавша помышлѧ́ѧ, прпⷣбне, своеѧ̀ стыждꙋ́сѧ лѣ́ности, и҆ мно́жества грѣхѡ́въ мои́хъ ᲂу҆жаса́юсѧ: но твои́ми, ст҃е, мл҃твами да́рꙋй мѝ жела́нїе бл҃го́е, во є҆́же про́чее вре́мѧ житїѧ̀ моегѡ̀ въ покаѧ́нїи сконча́ти.
Бг҃оро́диченъ:
Ꙗ҆́кѡ бж҃їѧ мт҃и дерзнове́нїе и҆мꙋ́щи къ ро́ждшемꙋсѧ и҆з̾ тебє̀, є҆диноро́дномꙋ сло́вꙋ, и҆ ѻ҆ц҃ꙋ̀ собезнача́льномꙋ, и҆ соесте́ственномꙋ дх҃ꙋ, молѧ́щи не преста́й ѿ бѣ́дъ сп҃стѝ, всенепоро́чнаѧ, тѧ̀ бцⷣꙋ сла́вѧщыѧ.
Катава́сїа по ᲂу҆ста́вꙋ.
Пѣ́снь г҃.
І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.
Є҆́сть во мнѣ̀, ѻ҆́тче прпⷣбне, до́брагѡ и҆справле́нїѧ жела́нїе, но и҆скꙋше́нїѧ лѣ́ности побѣжда́ти не навыко́хъ, ᲂу҆вы̀ мнѣ̀. ѻ҆ба́че на по́мощь твою̀ надѣ́ѧсѧ, ᲂу҆ны́нїѧ по́мыслы ѿгонѧ́ю, на твоѧ̑ же взира́ю сла̑вныѧ по́двиги.
Желѣ́зо нарече́сѧ ро́дъ тво́й, і҆́ѡве прпⷣбне, крѣ́пость дꙋшѝ твоеѧ̀ пред̾ꙋказꙋ́ѧ: въ пеще́рѣ же ка́меннѣ заключи́всѧ, ꙗ҆́кѡ зла́то сокрове́но, ѡ҆ст҃и́лъ є҆сѝ мѣ́сто пѡ́двигъ твои́хъ, и҆ го́рꙋ поча́евскꙋю ꙗ҆́кѡ стѣ́нꙋ мѣ́дѧнꙋ проти́вꙋ врагѡ́въ правосла́вїѧ ꙗ҆ви́лъ є҆сѝ.
Ѕѣлѡ̀ ᲂу҆глꙋби́шасѧ помышлє́нїѧ твоѧ̑, ꙗ҆̀же ѡ҆ нбⷭ҇нѣмъ црⷭ҇твїи, є҆гда̀, є҆щѐ ѻ҆́трокъ сы́й, а҆́гг҃льскїй ѻ҆́бразъ воспрїѧ́лъ є҆сѝ: тѣ́мже и҆ сщ҃е́нникъ бы́въ бг҃ꙋ вѣ́ренъ, да́же ны́нѣ молє́нїѧ ѡ҆ лю́дехъ возно́сиши, і҆́ѡве прпⷣбне.
Землѧ̀ га́лицкаѧ ю҆́ностїю твое́ю сла́витсѧ, и҆ дꙋ́бенскаѧ ѻ҆би́тель мꙋ́жєскїѧ по́двиги твоѧ̑ бл҃говѣствꙋ́етъ, ѻ҆би́тель же поча́евскаѧ ста́ростїю твое́ю хва́литсѧ и҆ бл҃же́нною кончи́ною весели́тсѧ, всѧ́ же вселе́ннаѧ ѡ҆ чꙋдесѣ́хъ твои́хъ ра́дꙋетсѧ и҆ ликовствꙋ́етъ.
И҆́же подае́ши бл҃га̑ѧ всѣ̑мъ молѧ́щымсѧ тебѣ̀, и҆ менѐ припа́дающа не ѿри́ни, свѧ́тче, но покаѧ́нїе моѐ зрѧ̀, да́ждь мѝ житїѧ̀ и҆справле́нїе, ре́вность же вдохнѝ, є҆́же подража́ти твои̑мъ бг҃олюби̑вымъ дѣѧ́нїємъ.
Бг҃оро́диченъ:
Оу҆мерщвле́нный мо́й ᲂу҆́мъ, живо́тнымъ дѣ́йствомъ и҆з̾ тебє̀ ꙗ҆́вльшимсѧ мі́рꙋ, воздви́гни, чтⷭ҇аѧ, и҆ къ жи́зни наста́ви, ꙗ҆́же сме́рти двє́ри разо́ршаѧ є҆ди́на ржⷭ҇тво́мъ твои́мъ.
Сѣда́ленъ, гла́съ и҃:
Дне́сь и҆сполнѧ́етсѧ ра́дости ѻ҆би́тель поча́евскаѧ, твоѐ бг҃олюби́вое житїѐ прославлѧ́ющи: дне́сь хрⷭ҇тоимени́тїи лю́дїе ре́вностїю сп҃се́нїѧ просвѣща́ютсѧ, зрѧ́ще нетлѣ́нїемъ просла́влєнныѧ мо́щи твоѧ̑, прпⷣбне: дне́сь грѣхѡ́вныѧ ѿгонѧ́ютсѧ стра̑сти, и҆ по́мыслы покаѧ́нїѧ дꙋ́шы на́шѧ ѡ҆б̾е́млютъ, въ ни́хже ᲂу҆твердѝ всѣ́хъ, пресла́вне, вѣ́рнѡ почита́ющихъ па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́ста творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, всепѣ́таѧ, беззако́нїѧ мѧ̀ сꙋ́ща скве́рное ѻ҆би́телище, и҆ де́монѡвъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ: ѿженѝ ѡ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, мл҃твами твои́ми.
Пѣ́снь д҃.
І҆рмо́съ: Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.
І҆́ѡве прпⷣбне, ѡ҆ всѣ́хъ моли́твенникъ бꙋ́ди те́плый, твоемꙋ̀ застꙋпле́нїю вѣ́рꙋющихъ, свое́ же ѡ҆каѧва́ющихъ житїѐ и҆ на бж҃їе милосе́рдїе ᲂу҆пова́ющихъ, а҆́ще и҆ прельще́ньми житїѧ̀ сегѡ̀ вла́ющихсѧ.
Кто̀ ѿ человѣ̑къ не подиви́тсѧ долготерпѣли́вомꙋ житїю̀ твоемꙋ̀, ѻ҆́тче; кто́ ли не просла́витъ твоеѧ̀ ѡ҆ правосла́вїи ре́вности; ты́ бо, ꙗ҆́кѡ а҆дама́нтъ крѣ́покъ, є҆ретїкѡ́мъ противоста́лъ є҆сѝ, и҆ и҆́стинныѧ вѣ́ры проповѣ́данїе, словесы́ же и҆ писа́ньми всѣ̑мъ препо́далъ є҆сѝ.
Льва̀ рыка́юща и҆ и҆́щꙋща поглоти́ти дꙋ́шъ сп҃са́емыхъ мл҃твою твое́ю побѣди́лъ є҆сѝ, ѻ҆́тче, но и҆ томꙋ̀ слꙋжа́щыѧ лю́ди въ покаѧ́нїе приводи́лъ є҆сѝ, та̑ти милосе́рдїемъ твои́мъ постыжда́ѧ и҆ вразꙋмлѧ́ѧ, граби́тєли же ѡ҆бличе́ньми ᲂу҆страша́ѧ и҆ всѧ̑ наꙋча́ѧ сп҃си́тельномꙋ покаѧ́нїю.
Мра́къ дꙋшѝ моеѧ̀, ѻ҆́тче, предста́тельствомъ твои́мъ разсѣ́й, и҆ свѣ́томъ за́повѣдей гдⷭ҇нихъ просвѣтѝ моѐ ѡ҆каѧ́нное се́рдце, да и҆ а҆́зъ твои̑мъ ᲂу҆ченикѡ́мъ послѣ́дꙋѧ, тѣ́хъ ча́сти лише́нъ не пребꙋ́дꙋ, твою̀ восхвалѧ́ѧ ст҃ꙋ́ю па́мѧть.
Бг҃оро́диченъ:
Бг҃а и҆з̾ тебє̀ воплоще́ннаго молѝ, непрело́жнѡ, є҆́же бѣ̀, пребы́вша, и҆ є҆сте́ственнѡ ра́вна ѻ҆ц҃ꙋ̀, и҆ дх҃ꙋ сопресто́льна, проще́нїе прегрѣше́нїй и҆ дꙋ́шъ сп҃се́нїе пою́щымъ тѧ̀ вѣ́рою дарова́ти.
Пѣ́снь є҃.
І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.
На́шъ є҆сѝ вои́стиннꙋ предста́тель и҆ чꙋдотво́рецъ пресвѣ́тлый, взыва́ше дїонѵ́сїй, ѡ҆брѣты́й мо́щи твоѧ̑ тлѣ́нїю неприча̑стны. мы́ же, сїѧ̑ лобыза́юще, вопїе́мъ: на́шихъ скве́рнъ не возгнꙋша́йсѧ, ᲂу҆го́дниче бж҃їй, но твои́ми мл҃твами сїѧ̀ ѡ҆чи́сти.
Ѡ҆правда́нїємъ бж҃їимъ ѿ ю҆́ности, ѻ҆́тче, наꙋча́емь, сꙋеты̀ жите́йскїѧ ᲂу҆клони́тисѧ крѣ́пкѡ возжела́лъ є҆сѝ, безмо́лвїе же возлюби́лъ є҆сѝ: ѻ҆ба́че велѣ́нїю хрⷭ҇то́вꙋ не противлѧ́ѧсѧ, притека́ющыѧ къ тебѣ̀ пра́вомꙋ и҆сповѣ́данїю и҆ є҆ѵⷢ҇льскомꙋ житїю̀ наꙋча́лъ є҆сѝ.
Предста́тель ꙗ҆ви́лсѧ є҆сѝ и҆ по преставле́нїи твое́мъ стра́ждꙋщымъ и҆ скорбѧ́щымъ человѣ́кѡмъ: та́кѡ бо тѧ̀ ви́дѣша лю́дїе и҆з̾ гро́ба твоегѡ̀ и҆сходѧ́ща и҆ со а҆́гг҃лы посредѣ̀ це́ркве молѧ́щасѧ! ѽ чꙋ́до пресла́вное вои́стиннꙋ! ѽ ра́дость вѣ̑рнымъ и҆ ᲂу҆твержде́нїе!
Рачи́тель бы́въ нбⷭ҇нагѡ црⷭ҇твїѧ, ѡ҆ свое́мъ та́мѡ вхожде́нїи и҆звѣствꙋ́ешисѧ, и҆ кромѣ̀ болѣ́зни и҆ стра́ха пресе́льникъ ꙗ҆влѧ́ешисѧ лꙋ́чшїѧ жи́зни, бра́тїи же твоеѧ̀ ᲂу҆чи́тель и҆ ᲂу҆пова́нїе.
Сопꙋ́тникъ житїю̀ моемꙋ̀ бꙋ́ди, ѻ҆́тче і҆́ѡве, мл҃твою твое́ю ѡ҆гражда́й многомѧте́жнꙋю мою̀ дꙋ́шꙋ, и҆ введѝ ю҆̀ въ нбⷭ҇ное црⷭ҇тво, твои́ми ᲂу҆миле́ннꙋю пѡ́двиги, хрⷭ҇тꙋ́ же покаѧ́нныѧ приносѧ́щꙋю сле́зы.
Бг҃оро́диченъ:
Тѧ̀ стѣ́нꙋ и҆мꙋ́ще и҆ предста́тельствомъ твои́мъ соблюда́еми, твое́ю бж҃е́ственною сла́вою хва́лѧщесѧ, тѧ̀ бл҃жи́мъ: ты́ бо, всечⷭ҇таѧ, дꙋша́мъ на́шымъ и҆сточа́еши весе́лїе и҆ ра́дованїе.
Пѣ́снь ѕ҃.
І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же свѧ́зана мре́жами вра́жїими, ꙗ҆́кѡ ѿ тлѝ ѻ҆́наго, сп҃сѝ.
Тве́рдое ᲂу҆пова́нїе на предста́тельство твоѐ возлага́ю, прпⷣбне, и҆ вѣ́рою молю́сѧ: да́ждь мѝ страсте́й лю́тыхъ ѡ҆долѣ́нїе, сме́рти же непреста́ннꙋю па́мѧть и҆ бл҃же́нства жела́нїе грѧдꙋ́щагѡ вѣ́ка.
Оу҆твержда́етсѧ тобо́ю, прпⷣбне, ст҃а́ѧ цр҃ковь, є҆́ресь же всѧ́каѧ посрамлѧ́етсѧ, ѡ҆бличе́нїе и҆мꙋ́щи твоѧ̑ многоцѣлє́бныѧ мо́щи, и҆ житїѧ̀ твоегѡ̀ столѣ́тнѧгѡ трꙋды̀, и҆ болѣ̑зни, и҆ сле́зы, и҆ по́стъ, и҆ пло́ти ѿ косте́й ѿпаде́нїе.
Фараѡ́на мы́сленнаго побѣжда́ше і҆́ѡвъ прпⷣбный, послꙋша́нїю всегда̀ прилѣжѧ̀ и҆ ѡ҆бꙋрева́ємымъ на по́мощь приходи́ти не ѿрица́ѧсѧ: и҆ та́кѡ трѝ ѻ҆би́тєли ᲂу҆че́нїемъ свои́мъ просвѣти́въ и҆ пѡ́двиги мно́гими просла́вивъ, веселѧ́ше сп҃са всѣ́хъ, чл҃вѣколю́бца.
Хрⷭ҇то́вꙋ смире́нїю подража́ше і҆́ѡвъ, є҆гда̀ нача́льство, ꙗ҆́кѡ слꙋже́нїе всѣ̑мъ, прїѧ́тъ, и҆ и҆гꙋ́менъ сы́й, въ тѧ́жкихъ слꙋ́жбахъ подвиза́шесѧ, бра́тїи же бѧ́ше ѻ҆́бразъ кро́тости и҆ трꙋдолю́бїѧ пра́вило и҆ ѡ҆ мл҃твѣ при́сное напомина́нїе.
Ѿ скве́рныхъ и҆зба́ви мѧ̀ страсте́й твои́ми мл҃твами, тѣ́хъ ѡ҆долѣ́нїе мнѣ̀ подава́ѧ бж҃е́ственныѧ по́мощи при́снымъ призыва́нїемъ, и҆ на себѐ ненадѣ́ѧнїемъ, и҆ бра́та моегѡ̀ неѡсꙋжде́нїемъ.
Бг҃оро́диченъ:
Вознесла̀ є҆сѝ всеи́стиннѡ па́дшеесѧ человѣ́ческое сꙋщество̀, во зра́цѣ бж҃е́ственнѣмъ, и҆ ѻ҆ц҃а̀ въ ра́венствѣ, ви́димаго сн҃а неизмѣ́ннаго, бг҃ома́ти, без̾ сѣ́мене во чре́вѣ поноси́вши.
Конда́къ, гла́съ д҃.
Подо́бенъ: Ꙗ҆ви́лсѧ є҆сѝ дне́сь вселе́ннѣй:
Ꙗ҆ви́лсѧ є҆сѝ и҆́стинныѧ вѣ́ры сто́лпъ, є҆ѵⷢ҇льскихъ же за́повѣдей ревни́тель, горды́ни ѡ҆бличе́нїе, смирє́ннымъ же предста́тель и҆ наꙋче́нїе: тѣ́мже и҆ ᲂу҆блажа́ющымъ тѧ̀ грѣхѡ́въ ѿпꙋще́нїе и҆спросѝ, и҆ ѻ҆би́тель твою̀ невреди́мꙋ сохранѝ, і҆́ѡве ѻ҆́тче на́шъ, многострада́льномꙋ подо́бный.
І҆́косъ:
Ѿве́рзи ᲂу҆ста̀ твоѧ̑, пеще́ро ка́меннаѧ, и҆ рцы̀ на́мъ, колькра́ты тѡ́ки сле́зъ і҆́ѡвлихъ ѡ҆мочи́ласѧ є҆сѝ. ка́кѡ тогѡ̀ воздыха̑нїѧ твои́хъ стѣ́нъ не расторго́ша, ка́кѡ свѣ́тъ бж҃е́ственный тебє̀ не сожжѐ, ка́кѡ а҆́гг҃ли бдѣ̑ннымъ подвигѡ́мъ і҆́ѡвлимъ диви́шасѧ, тѣ́ми бо ѡ҆ст҃и́сѧ землѧ̀ га́лицкаѧ и҆ волы́нскаѧ; мы́ же сїѧ̑ всѧ̑ помышлѧ́юще, слеза́ми ᲂу҆миле́нїѧ ѻ҆́чи на́ши и҆сполнѧ́емъ: є҆́сть бо прпⷣбный і҆́ѡвъ ᲂу҆го́дникъ ди́вный, многострада́льномꙋ подо́бный.
Пѣ́снь з҃.
І҆рмо́съ: На по́ли деи́рѣ и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ, въ не́йже трїѐ ѻ҆́троцы пѣсносло́вѧхꙋ є҆ди́наго бг҃а, тро́ичнѡ воспѣва́хꙋ, глаго́люще: ѻ҆тцє́въ бж҃е, бл҃гослове́нъ є҆сѝ.
Лю́ди правосла̑вныѧ, тѧ̀ блажа́щыѧ, прпⷣбне і҆́ѡве, ᲂу҆крѣпѝ на врагѝ, и҆ ѡ҆ цр҃кви ми̑рнаѧ глаго́ли въ се́рдце и҆́хъ: всѣ̑мъ є҆диномы́слїе и҆спросѝ ᲂу҆ бг҃а, и҆ дрꙋ́гъ ко дрꙋ́гꙋ любо́вь, и҆ ѡ҆ правосла́вїи ре́вность.
Ча́шꙋ житїѧ̀ твоегѡ̀ пи́ти, гдⷭ҇и, не могꙋ̀ а҆́зъ ѡ҆каѧ́нный, боѧ́знїю скорбе́й ѡ҆бꙋрева́емь и҆ страсте́й сплета́емь те́рнїемъ. ѻ҆ба́че молю́сѧ: і҆́ѡва, твоегѡ̀ ᲂу҆го́дника, мл҃твами поми́лꙋй мѧ̀, и҆ помози́ ми грѣхо́внꙋю ѡ҆трѧстѝ лѣ́ность.
Широ́кїй пꙋ́ть, поги́бель дꙋшѝ предносѧ́щїй, возненави́дѣвъ, і҆́ѡве прпⷣбне, въ тѣ́снѣй пеще́рѣ заключи́лсѧ є҆сѝ, и҆ тѣ́снагѡ пꙋтѝ жи́зни въ нача́льствѣ твое́мъ не ᲂу҆клони́лсѧ є҆сѝ, де́нь и҆ но́щь въ мл҃твѣ и҆ трꙋдѣ́хъ пребыва́ѧ и҆ наꙋче́нїе здра́вое всѣ̑мъ приходѧ́щымъ къ тебѣ̀ подава́ѧ.
Ще́дръ бы́лъ є҆сѝ ни́щымъ, ка́ющымсѧ же ми́лостивъ, и҆ наꙋче́нїѧ тре́бꙋющымъ ᲂу҆чи́тель кро́токъ, бж҃е́ственныѧ же мꙋ́дрости люби́тель, и҆ є҆ѵⷢ҇льскихъ за́повѣдей проповѣ́дникъ, кни́гъ же бж҃е́ственныхъ и҆зда́тель, и҆ є҆́реси безбоѧ́зненный ѡ҆бличи́тель.
Бг҃оро́диченъ:
Мр҃і́ю пречⷭ҇тꙋю и҆ всест҃ꙋ́ю восхва́лимъ: то́ю бо бл҃года́ть на́мъ и҆сточа́етсѧ па́че ᲂу҆ма̀ дарѡ́въ, ꙗ҆́кѡ ѿ пото́ка бж҃е́ственныѧ бл҃гости: ю҆́же бл҃гочести́вымъ по́мысломъ ны́нѣ ᲂу҆блажа́емъ.
Пѣ́снь и҃.
І҆рмо́съ: Покрыва́ѧй вода́ми превы́спрєннаѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̀, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Ѣ҆́дꙋщымъ и҆ и҆дꙋ́щымъ во ѡ҆би́тель твою̀ безчи́слєннымъ лю́демъ, ко твои̑мъ же моще́мъ припа́дающымъ, бꙋ́ди дарова́нїй дх҃о́вныхъ пода́тель, тѣле́сныхъ же болѣ́зней цѣли́тель и҆ пред̾ сп҃сомъ те́плый ѡ҆ всѣ́хъ предста́тель, і҆́ѡве, землѝ волы́нскїѧ сла́во и҆ ᲂу҆краше́нїе.
Ю҆́ноша тѣ́ломъ, но ста́рецъ ᲂу҆мо́мъ въ нача́лѣ мона́шескагѡ житїѧ̀ твоегѡ̀ бы́лъ є҆сѝ, ѻ҆́тче: соста́рѣвсѧ же пло́тїю, ю҆́ношескꙋю бо́дрость въ трꙋдѣ́хъ ꙗ҆влѧ́лъ є҆сѝ, землѝ копа́нїемъ и҆ древе́съ насажде́нїемъ ѻ҆́бразъ всѣ̑мъ смиреномꙋ́дрїѧ подава́ѧ.
Ꙗ҆вле́нїе твоѐ со а҆́гг҃лы вкꙋ́пѣ смире́ннꙋю дѣ́вꙋ ᲂу҆жаса́ше, здра́вїе же ᲂу҆ченикꙋ̀ твоемꙋ̀ подава́ше, и҆ всѧ̑ лю́ди на славосло́вїе бг҃ови воздвиза́ше, и҆́стиннꙋю же ᲂу҆твержда́ше въ ни́хъ вѣ́рꙋ, и҆ є҆реті́чєскаѧ ѿрѣва́ше нападє́нїѧ.
Ѳѷмїа́момъ мл҃твъ твои́хъ и҆ менѐ ѡ҆бл҃гоꙋха́й, і҆́ѡве пресла́вне, мои́хъ грѣхѡ́въ ѕлосмра́дїе тѣ́мъ ѿгонѧ́ѧ и҆ ᲂу҆пова́нїе на гдⷭ҇а вселѧ́ѧ въ мою̀ смра́днꙋю дꙋ́шꙋ, да. бл҃года́тїю бж҃їею ѡ҆чища́емь, воспою̀ твоѐ, пребл҃же́нне, крѣ́пкое застꙋпле́нїе.
Бг҃оро́диченъ:
Бг҃ороди́тельнице всечⷭ҇таѧ, дꙋшѝ моеѧ̀ ꙗ҆́звы и҆ грѣхѡ́вныѧ стрꙋ́пы ѡ҆чи́сти, и҆сто́чникомъ ѡ҆мыва́ющи сꙋ́щимъ и҆з̾ ре́бръ сн҃а твоегѡ̀, и҆ поте́кшими и҆з̾ тѣ́хъ ѡ҆чища́ющи стрꙋѧ́ми: къ тебѣ̀ прибѣга́ю, и҆ тѧ̀ призыва́ю бг҃облагода́тнꙋю.
Пѣ́снь ѳ҃.
І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ въ домꙋ̀ дв҃довѣ, ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Ѵ҆ссѡ́помъ бл҃года́ти бж҃їѧ ѡ҆кропѝ сердца̀ на̑ша, і҆́ѡве прпⷣбне, твои̑мъ ст҃ы̑мъ моще́мъ покланѧ́ющихсѧ, да твоеѧ̀ ре́вности ѡ҆ вѣ́рѣ причасти́вшесѧ, ко и҆сполне́нїю за́повѣдей хрⷭ҇то́выхъ до́брѣ потщи́мсѧ.
Ѱало́мски взыва́ти къ бг҃ꙋ на землѝ не престава́лъ є҆сѝ, и҆ дѣ́вства твоегѡ̀ сосꙋ́дъ соблю́лъ є҆сѝ: тѣ́мже на нб҃сѝ ра̑йскїѧ воспѣва́еши ны́нѣ пѣ̑сни со а҆́гг҃лы и҆ всѣ́ми ст҃ы́ми, лю́ди же на землѝ трꙋдѧ́щыѧсѧ ѿ вы́шнихъ назира́еши.
Ѽ коли́ка житїѧ̀ твоегѡ̀ нетлѣ́ннаѧ красота̀, ѽ коли́ка по сме́рти твое́й чꙋдеса̀ и҆ и҆сцѣлє́нїѧ! се́ бо земна̑ѧ ѡ҆ста́вивъ, вои́стиннꙋ стори́цею нбⷭ҇наѧ бл҃га є҆щѐ въ житїѝ, па́че же во грѧдꙋ́щемъ, по глаго́лꙋ хрⷭ҇то́вꙋ стѧжа́лъ є҆сѝ.
Ѽ коли́ко грѣхѡ́въ на́шихъ мно́жество! но сїѧ̑ превосхо́дитъ твои́хъ мл҃твъ крѣ́пость, и҆́хже не лишѝ на́съ, ѻ҆́тче прпⷣбне і҆́ѡве, дрꙋ́же хрⷭ҇то́въ и҆ ст҃ы́хъ всѣ́хъ соприча́стниче, цр҃ко́вный сто́лпе и҆ ѡ҆ дꙋша́хъ человѣ́ческихъ предста́телю теплѣ́йшїй.
Бг҃оро́диченъ:
Зачала̀ є҆сѝ, дв҃о, без̾ сѣ́мене, всѧ́чєскаѧ созда́вшаго сло́во бж҃їе, кромѣ̀ хотѣ́нїй плотски́хъ: и҆ без̾ и҆стлѣ́нїѧ родила̀ є҆сѝ, без̾ болѣ́зней ма́тернихъ. тѣ́мъ тѧ̀ бцⷣꙋ, и҆ ѧ҆зы́комъ и҆ се́рдцемъ и҆сповѣ́дающе, велича́емъ.
Свѣти́ленъ.
Подо́бенъ: Свѣ́те неизмѣ́нный:
І҆́ѡвъ прпⷣбный дне́сь да восхва́литсѧ, ꙗ҆́кѡ хрⷭ҇то́въ во́инъ и҆ ѡ҆ лю́дехъ моли́твенникъ, вѣ́ры проповѣ́дникъ, є҆́реси ѡ҆бличи́тель и҆ цр҃кве ᲂу҆краше́нїе.
Два́жды.
Сла́ва, и҆ ны́нѣ:
Тѧ̀ пѣ́сньми немо́лчными ᲂу҆бл҃жа́емъ, дв҃о, ꙗ҆́кѡ ѿ трⷪ҇цы є҆ди́наго родила̀ є҆сѝ, бцⷣе, и҆ носи́ла є҆сѝ на бж҃е́ственныхъ ѡ҆б̾ѧ́тїихъ пресꙋ́щественное сло́во, невра́щно и҆ неизмѣ́нно.
На хвали́техъ стїхи̑ры на д҃, гла́съ д҃:
Просїѧ́ша по́двизи твоѝ во странѣ̀ га́лицтѣй, ѻ҆́тче і҆́ѡве: тѣ́мже правосла́вїѧ ревни́тєли въ зе́млю волы́нскꙋю тебѐ глаша́ютъ, и҆ ѻ҆би́тель дꙋ́бенскаѧ твои́мъ преподо́бнымъ житїе́мъ ᲂу҆краша́етсѧ: но тогѡ̀ соверше́нїе поча́евскаѧ ла́ѵра прїе́млетъ, всѧ́ же страна̀ сїѧ̀ ᲂу҆че́ньми твои́ми просвѣща́етсѧ.
Два́жды.
Братолюби́вое твоѐ се́рдце, прпⷣбне, мона́хѡвъ мно́жєства на го́рꙋ поча́евскꙋю привлечѐ, и҆́хже сп҃се́нїѧ бы́лъ є҆сѝ ревни́тель: тѣ́мже и҆ мы̀ а҆пⷭ҇льскїй глаго́лъ вѣ́дꙋще, ꙗ҆́кѡ никогда́же престае́тъ дх҃о́внаѧ любы̀, твоемꙋ̀ чꙋде́сномꙋ попече́нїю дꙋ́шы на́шѧ ввѣрѧ́емъ, ꙗ҆̀же приведѝ ко і҆и҃сꙋ чл҃вѣколю́бцꙋ.
Не смѣ́ѧше тлѣ́нїе коснꙋ́тисѧ ме́ртвагѡ тѣлесѐ твоегѡ̀, прпⷣбне, є҆́же чрез̾ всѐ житїѐ ᲂу҆мерщвлѧ́лъ є҆сѝ: дꙋша́ же твоѧ̀, живꙋ́щи со а҆́гг҃лы, всѧ̑ притека́ющыѧ къ тебѣ̀ въ свою̀ любо́вь прїе́млетъ. тѣ́мже и҆ на́шѧ дꙋ́шы приведѝ ко і҆и҃сꙋ чл҃вѣколю́бцꙋ.
Сла́ва, гла́съ и҃:
Не довлѣ́ютъ словеса̀ на̑ша къ восхвале́нїю пѡ́двигъ твои́хъ, прпⷣбне і҆́ѡве: кто́ бо и҆зочте́тъ твои́хъ добродѣ́телей полнотꙋ̀, кто̀ ᲂу҆разꙋмѣ́етъ безмо́лвное твоѐ къ бг҃ꙋ собесѣ́дованїе; но не ѿри́ни твоѧ̑ пѣвцы̀ и҆ дꙋхѡ́внаѧ ча̑да, твоегѡ̀ застꙋпле́нїѧ просѧ́щыѧ и҆ ѡ҆ твое́мъ ст҃ѣ́мъ житїѝ ᲂу҆милѧ́ющыѧсѧ и҆ во твое́й па́мѧти веселѧ́щыѧсѧ.
И҆ ны́нѣ: Влⷣчце, прїимѝ:
Славосло́вїе вели́кое. Є҆ктєнїѝ, и҆ ѿпꙋ́стъ.
На лїтꙋргі́и слꙋ́жба всѧ̀ прпⷣбническаѧ.
Вѣ́домо бꙋ́ди, ꙗ҆́кѡ па́мѧть прпⷣбнагѡ і҆́ѡва соверша́етсѧ въ де́нь бл҃же́нныѧ кончи́ны є҆гѡ̀, ѻ҆ктѡ́врїа въ к҃и-й де́нь, и҆ въ де́нь ѡ҆брѣ́тенїѧ ст҃ы́хъ моще́й є҆гѡ̀, а҆́ѵгꙋста въ к҃и-й де́нь, є҆гда̀ во ст҃ѣ́й поча́евстѣй ла́ѵрѣ ст҃ы̑ѧ мо́щи є҆гѡ̀ и҆зно́сѧтсѧ въ вели́кꙋю цр҃ковь. А҆́ще ᲂу҆́бѡ па́мѧть прпⷣбнагѡ слꙋчи́тсѧ въ недѣ́лю, соверша́емъ всю̀ слꙋ́жбꙋ є҆гѡ̀ по г҃-й главѣ̀ тѷпїко́на: а҆́ще же въ сꙋббѡ́тꙋ, по є҃і-й ѿ зрѝ неизмѣ́ннѡ. Трети́цею же твори́мъ па́мѧть прпⷣбнагѡ і҆́ѡва ма́їа въ ѕ҃-й де́нь. Въ се́й де́нь на повече́рїи пое́мъ слꙋ́жбꙋ ст҃а́гѡ і҆́ѡва многострада́льнагѡ, про́чее же совокꙋплѧ́емъ слꙋ́жбꙋ прпⷣбнагѡ съ трїѡ́дїю, ꙗ҆́коже во главѣ̀ і҆ѡа́нна бг҃осло́ва ᲂу҆каза́сѧ, є҆́же зрѝ мцⷭ҇а тогѡ́жде во и҃-й де́нь.
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.