← претходни дан | Минеј — Октобар | следећи дан →
25 октября: святых мучеников Маркиана и Мартирия
Мѣ́сѧца тогѡ́же въ к҃є-й де́нь.
Ст҃ы́хъ мч҃никъ и҆ нотарі́й, маркїа́на и҆ мартѵ́рїа.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:
Тече́нїе соверши́вше, ꙳ и҆ вѣ́рꙋ соблю́дше, ꙳ мꙋче́нїѧ вѣнце́мъ ᲂу҆вѧзо́стесѧ, ꙳ маркїа́не и҆ мартѵ́рїе, ꙳ столпѝ непоколеби́мїи цр҃кве, ꙳ сосцы̀, млеко̀ неле́стное и҆сточа́юще, ꙳ свѣ́тлїи би́серы, ꙳ свѣти́льницы, и҆́же тва́рь свѣтлостьмѝ ꙳ благоче́стїѧ просвѣща́юще.
Є҆ди́нъ ра́зꙋмъ вносѧ́ще, ꙳ и҆ є҆ди́но соглаша́юще, ꙳ дво́ица бжⷭ҇твеннаѧ, ꙳ раздѣле́нїе а҆́рїево разрꙋши́ли є҆стѐ, ꙳ наꙋча́юще чествова́ти соприсносꙋ́щна ѻ҆ц҃ꙋ̀ сн҃а, ꙳ и҆ собезнача́льна, и҆ дх҃ꙋ, ꙳ во є҆ди́ницѣ трⷪ҇цꙋ, ꙳ и҆ трⷪ҇цꙋ во є҆ди́ницѣ, ꙳ є҆ди́но є҆стество̀ тремѝ ли́цы нераздѣ́льно.
Послѣ́дователїе и҆ є҆динонра́внїи, ꙳ подо́бницы и҆ є҆диноревни́телїе, ꙳ свѧщеннопроповѣ́дника па́ѵла ꙗ҆ви́стесѧ, ꙳ и҆злїѧ́нїемъ кро́ве, ꙳ врагѝ потопи́сте, ꙳ и҆ лю́тыхъ є҆ресе́й и҆зсꙋши́сте пото́къ, и҆ ꙗ҆ви́стесѧ рѣка̀ благоче́стїѧ, ꙳ напаѧ́ющаѧ цр҃ковь хрⷭ҇то́вꙋ, ꙳ маркїа́не и҆ мартѵ́рїе.
Сла́ва, гла́съ а҃. Ге́рманово:
Оу҆ч҃ницы̀ и҆ послѣ́дователїе бы́вше є҆диносꙋ́щныѧ трⷪ҇цы проповѣ́дника и҆ и҆сповѣ́дника, и҆ съ ни́мъ за ню̀ гони́ми бл҃же́ннїи, ме́чнꙋю сме́рть є҆реті́ческихъ ѧ҆зыкобо́лїй предсꙋди́сте. тѣ́мъ и҆ мꙋ́ченическими вѣнцы̑ ᲂу҆краси́вшесѧ ѿ бг҃а, и҆ дерзнове́нїе прїе́мше, моли́те и҆зба́витисѧ ѿ бѣ́дъ чтꙋ́щымъ па́мѧть ва́шꙋ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Поⷣ: Всехва́льнїи мч҃ницы:
А҆́гнца, а҆́гница и҆ всенепоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣвши, ꙳ зра́ка не и҆мꙋ́ща, ни добро́ты, ꙳ ᲂу҆вы̀ мнѣ̀, пла́чꙋщи, гл҃го́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе; ꙳ гдѣ̀ бл҃года́ть сїѧ́ющаѧ ꙳ ѻ҆́браза твоегѡ̀, ꙳ сн҃е мо́й любе́знѣйшїй;
На стїхо́внѣ ѻ҆ктѡ́иха. Сла́ва, гла́съ г҃:
Разꙋ́мнїи цр҃кве свѣти̑льницы, и҆ трⷪ҇цѣ побѡ́рницы, маркїа́нъ и҆ мартѵ́рїй щито́мъ вѣ́ры є҆́рєси низложи́вше, правосла́вїѧ свѣ́томъ мі́ръ просвѣти́ша. па́ѵлꙋ повинꙋ́ющесѧ, равноапо́столꙋ, па́стырю и҆ ᲂу҆чи́телю и҆́стиннѡ догма́тѡвъ, а҆́рїево и҆ несто́рїево низложи́ша раздѣле́нїе, саве́ллїево и҆ севи́рово сли́тїе ѿража́юще. трⷪ҇чески бг҃осло́вѧще є҆ди́ницꙋ, и҆ ѿ дв҃ы вопло́щшасѧ бг҃а, во двою̀ сꙋщєствꙋ̀ є҆ди́наго хрⷭ҇та̀ благоче́стнѡ всѣ̑мъ воспѣва́ти, всехва́льнїи, проповѣ́даша. тѣ́мъ вѣнцы̀ побѣ́ды съ нб҃сѐ прїе́мше, бг҃оглаго́ливїи, про́сѧтъ на́мъ ве́лїѧ ми́лости.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:
Ѻ҆рꙋ́жїе се́рдце твоѐ про́йде, пречⷭ҇таѧ, є҆гда̀ сн҃а твоего̀ на крⷭ҇тѣ̀ ви́дѣла є҆сѝ и҆ вопїѧ́ла є҆сѝ: не безча́днꙋ мѧ̀ покажѝ, сн҃е мо́й и҆ бж҃е мо́й, соблюды́й мѧ̀ по ржⷭ҇твѣ̀ дв҃ꙋ.
Тропа́рь, гла́съ д҃.
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
На ᲂу҆́трени ѻ҆́ба канѡ́на ѻ҆ктѡ́иха. И҆ ст҃ы́хъ канѡ́нъ на д҃, є҆гѡ́же краегране́сїе: Двꙋ́мъ приношꙋ̀ мч҃никѡмъ пѣ̑нїѧ.
І҆ѡ́сифъ.
Гла́съ д҃. Пѣ́снь а҃. І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Превесьма̀ свѣ́томъ ст҃ы́ѧ трⷪ҇цы ѡ҆сїѧ́еми при́снѡ, свѣти̑льницы непреле́стнїи быва́ете, ст҃і́и: тѣ́мъ, вѣ́рою свѣтоно́сный пра́здникъ ва́шъ дне́сь соверша́юще, свѣ́тлѡ весели́мсѧ.
Ви́дѣти на землѝ возсїѧ́вшее сло́во и҆зъ дв҃ы на́съ ра́ди жела́юще, страда́льцы, ѻ҆ц҃ꙋ̀ є҆диносꙋ́щна сего̀ и҆сповѣ́дающе, нꙋ́жднѣйшꙋю сме́рть по́мысломъ крѣпча́йшимъ пострада́сте.
Па́ѵла мꙋ́драгѡ, бг҃оглаго́льницы, ꙗ҆́вльшесѧ послѣ́дователє и҆ ᲂу҆ч҃ницы̀, є҆диноче́стна ѻ҆ц҃ꙋ̀ сн҃а проповѣ́дасте: тѣ́мъ, мечи̑ ссѣче́ни бы́вше, и҆злїѧ́нїемъ кро́ве, страстоте́рпцы, зе́млю ѡ҆свѧти́сте.
Бг҃оро́диченъ:
Безнача́льнаго сн҃а бж҃їѧ заче́нши воплоти́ла є҆сѝ, чⷭ҇таѧ, быва́ема чл҃вѣ́ка за ми́лость неизглаго́ланнꙋю: тѣ́мъ, томꙋ̀ покланѧ́ющесѧ, благоче́стнѡ тѧ̀ сла́вимъ, винꙋ̀ всѣ́хъ ѡ҆боже́нїѧ.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Правосла́вїѧ просвѣща́емъ бжⷭ҇твенными дх҃омъ, а҆́рїево ѡ҆мраче́нїе ѿню́дъ прогна́сте, свидѣ́тели бы́вше вседержи́телѧ.
Ра́вно сло́во ѻ҆ц҃ꙋ̀ догма́тствꙋюще, ст҃і́и, разсꙋди́сте ᲂу҆мре́ти, маркїа́не и҆ мартѵ́рїе, и҆ къ безконе́чнѣй жи́зни преидо́сте.
Воинствосло́вїемъ свѧще́ннымъ а҆́гг҃лѡмъ сочисли́стесѧ и҆ мч҃никъ ликѡ́мъ пресвѣ́тлѡ совокꙋпи́стесѧ: тѣ́мъ честнꙋ́ю ва́шꙋ па́мѧть похвалѧ́емъ.
Бг҃оро́диченъ:
Оу҆пещре́на рѧ̑сны златы́ми ꙗ҆́кѡ цр҃и́ца, цр҃ѧ̀ и҆ бг҃а ѡ҆деснꙋ́ю ны́нѣ предстои́ши, влⷣчце, молѧ́щи ѡ҆ рабѣ́хъ твои́хъ.
Сѣда́ленъ, гла́съ г҃. Поⷣ: Бжⷭ҇твенныѧ вѣ́ры:
Повелѣ́нїе бжⷭ҇твенное и҆сповѣ́дающе да́же до кро́ве, є҆́же ѡ҆ не́мъ прїѧ́сте мч҃ницы сла́внїи, ѕловѣ́рныхъ пре́лесть ѡ҆бличи́вше, и҆ правосла́внꙋю вѣ́рꙋ соблю́дше: но моли́тесѧ хрⷭ҇тꙋ̀ бг҃ꙋ непреста́ннѡ дарова́ти на́мъ ве́лїю ми́лость.
Сла́ва, и҆ ны́нѣ, бг҃оро́диченъ:
Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ бо чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь. того̀ прилѣ́жнѡ молѝ, дарова́ти на́мъ ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ. сла́ва, хрⷭ҇тѐ, си́лѣ твое́й.
До́блимъ по́мысломъ, и҆ соверше́нною мꙋ́дростїю правосла́вїѧ мч҃ницы гдⷭ҇ни ᲂу҆тверди́всѧ, мч҃нически по́двигъ соверши́сте, є҆реті́ческꙋю тмꙋ̀ ѿгна́ли є҆стѐ.
И҆́же сло́ва не проповѣ́давъ ѻ҆ц҃ꙋ̀ є҆диносꙋ́щна, разгнѣ́вавсѧ несмы́сленнѡ на мч҃ники, ᲂу҆дави́сѧ жи́лами свѧще́нныхъ ва́шихъ пѡ́двигъ, и҆ погрꙋзи́сѧ кро́вными тече́ньми, бж҃їею бл҃года́тїю.
Во́инствовавше гдⷭ҇ꙋ вѣ́рою, ст҃і́и, и҆ пострада́вше, нбⷭ҇нымъ во́инствѡмъ сочисли́стесѧ: тѣ́мъ ᲂу҆блажа́етесѧ, ᲂу҆крѣпле́нїе на́ше и҆ просвѣще́нїе быва́юще.
Сосцы̀ цр҃ко́внїи, млеко̀ и҆сточа́ющїи правосла́вїѧ, и҆ благочести̑выѧ пита́ющїи, маркїа́нъ до́блїй и҆ мартѵ́рїй, да похва́лѧтсѧ ра́достными пѣснопѣ̑нїи.
Бг҃оро́диченъ:
Свѧще́нный дре́вле прⷪ҇ро́къ го́рꙋ бжⷭ҇твеннꙋю наречѐ, добродѣ́тельми, дв҃о пречⷭ҇таѧ, весьма̀ ѡ҆сѣне́нꙋ: и҆зъ неѧ́же сло́во спаси́тельное ꙗ҆ви́сѧ, на ѡ҆бновле́нїе и҆ просвѣще́нїе дꙋша́мъ на́шымъ.
Пѣ́снь є҃. І҆рмо́съ:
Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ. но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.
Премꙋ́дрыхъ ꙗ҆ви́стесѧ догма́тѡвъ послѣ́дователи, па́ѵла свѧщеннодѣ́телѧ бжⷭ҇твеннагѡ: є҆гѡ́же нра́вы, мꙋ́ченицы, подража́вше, терпѣли́внѡ пострада́сте, и҆ зако́ннѡ вѣнча́стесѧ.
Ꙗ҆́кѡ ѕвѣ́зды сїѧ́ете на высотѣ̀ честны́ѧ цр҃кве свѣ́тлѡ, тмꙋ̀ глꙋбоча́йшꙋю ѿгонѧ́юще а҆́рїевы є҆́реси, мꙋ́чєницы до́блественнѣйшїи.
Оу҆дали́вшесѧ, ст҃і́и, житїѧ̀ красо́тъ, прибли́жистесѧ хрⷭ҇тꙋ̀: малѣ́йшею же кро́вїю недви́жимое ца́рство, сла́внїи страстоте́рпцы, наслѣ́довасте.
Бг҃оро́диченъ:
И҆́стинна родила̀ є҆сѝ сн҃а на землѝ, є҆диносꙋ́щна ѻ҆ц҃ꙋ̀ и҆ бжⷭ҇твенномꙋ дх҃ꙋ, бг҃ороди́тельнице: є҆го́же непреста́ннѡ молѝ, ᲂу҆ще́дрити дꙋ́шы на́шѧ.
Пѣ́снь ѕ҃. І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Глаго́лѡмъ послѣ́дꙋюще па́стырѧ премꙋ́драгѡ па́ѵла, правосла́внꙋю вѣ́рꙋ соблюдо́сте, и҆ ꙗ҆́кѡ а҆́гнцы кровопі́ицъ мечи̑ закала́етесѧ, ра́дꙋющесѧ.
Честна̀ предъ гдⷭ҇емъ, благосла́внїи, ва́ша сме́рть ꙗ҆ви́сѧ, мꙋ́дрїи ѡ҆рꙋ̑жницы: тѣ́мъ почестьмѝ лѣ́тними, ст҃і́и, ѿ всѣ́хъ ᲂу҆блажа́етесѧ.
Ва́съ дѡ́блїѧ страстоте́рпцы, маркїа́не всебл҃же́нне и҆ мартѵ́рїе, и҆сто́чникъ чꙋде́съ хрⷭ҇то́ва цр҃ковь и҆мꙋ́щи, вѣ́чнѡ весели́тсѧ.
Бг҃оро́диченъ:
Оу҆сты̀ и҆ ѧ҆зы́комъ, мт҃рь тѧ̀ всеи́стиннѡ, дв҃о, бг҃а на́шегѡ и҆сповѣ́дꙋемъ. того̀, чⷭ҇таѧ, прилѣ́жнѡ молѝ, спасти́сѧ дꙋша́мъ на́шымъ.
Конда́къ гла́съ д҃: Подо́бенъ: Вознесы́йсѧ:
Подви́гшесѧ до́брѣ ѿ младе́нства, маркїа́не съ мꙋ́дрымъ мартѵ́рїемъ, ѿстꙋ́пника а҆́рїа низложи́сте, невре́днѡ сохра́нше правосла́внꙋю вѣ́рꙋ, па́ѵлꙋ послѣ́дꙋюще, мꙋ́дромꙋ ᲂу҆чи́телю: тѣ́мже съ ни́мъ ѡ҆брѣто́сте живо́тъ, ꙗ҆́кѡ трⷪ҇цы побѡ́рницы и҆зрѧ́днѣйшїи.
І҆́косъ:
Ꙗ҆́кѡ слꙋжи́телїе благоче́стїѧ бг҃а чл҃вѣколю́бца, дво́ице благослове́ннаѧ, предвари́те мѧ̀ ско́рѡ, и҆ лю́тыхъ и҆зба́вите, сло́во мѝ мꙋ́дрости подаю́ще, ва́ше похвали́ти страда́нїе, є҆́же за вѣ́рꙋ, ст҃і́и, нра́вомъ несомнѣ́ннымъ пострада́вше, вѣнцы̀ прїѧ́сте нбⷭ҇ныѧ. ликѡ́мъ страда́льцєвъ, и҆ а҆пⷭ҇лѡвъ, и҆ ᲂу҆чи́телей, и҆ честны́хъ а҆рхїере́євъ свесели́тесѧ, ꙗ҆́кѡ проповѣ́дницы бж҃їѧ сло́ва, и҆ трⷪ҇цы побѡ́рницы и҆зрѧ́днѣйшїи.
Пѣ́снь з҃. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Послѣ́дꙋюще до́брѣ свѧще́ннагѡ па́стырѧ, правосла́вїемъ ᲂу҆добрѧ́еми, рꙋка́ми закла́ни бы́сте ѕлосла́вныхъ всꙋ́е, пресла́внїи ѻ҆рꙋ̑жницы.
Законоположе́нїе бж҃їе невреди́мо вѣ́рнѡ сохра́нше, мч҃ницы бжⷭ҇твеннїи, зако́ннѡ пострада́сте, ѿ рꙋ́къ беззако́нныхъ, кꙋ́пнѡ закла́ни бы́вше.
По погребе́нїи свѧще́ннѣмъ, приходѧ́щымъ съ вѣ́рою ко гро́бꙋ ва́шемꙋ, недꙋ́ги погреба́ете, ст҃і́и, є҆́же къ жизнода́телю, ст҃ы́мъ хода́тайствомъ ва́шимъ.
Ѿ и҆сто́чникѡвъ та́инственнѡ свѧще́нныхъ почерпа́юще бжⷭ҇твеннꙋю благода́ть цѣле́нїй, вѣ̑рныѧ напоѧ́ете, недꙋ̑гъ всѧ́кое и҆зсꙋша́юще ᲂу҆множе́нїе.
Бг҃оро́диченъ:
И҆зба́вленнїи твои́мъ рождество́мъ, бг҃ома́ти, вѣ́чнагѡ ѡ҆сꙋжде́нїѧ, ра́дꙋйсѧ, зове́мъ тѝ, при́снѡ бл҃гослове́ннаѧ и҆ ѡ҆бра́дованнаѧ.
Пѣ́снь и҃. І҆рмо́съ:
И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.
Ꙗ҆́коже два̀ а҆́гнца закала́етесѧ, а҆́гнца бж҃їѧ є҆диносꙋ́щна ѻ҆ц҃ꙋ̀ проповѣ́дающе, и҆ трапе́зѣ вы́шнѣй принесе́ни бы́вше, страда́льцєвъ собо́рꙋ сочетава́етесѧ.
Оу҆крѣплѧ́еми си́лою дх҃а, и҆скорени́сте пре́лести свирѣ́пство, и҆ крѣ́пкѡ пострада́вше, лю́тѣ ѡ҆сла́блєнныѧ и҆ немощьмѝ, мꙋ́дрїи и҆сцѣлѧ́ете мч҃ницы.
Вра́чеве страсте́й бы́вше дꙋ́шъ на́шихъ, ст҃і́и мч҃ницы, лю̑тыѧ недꙋ́ги и҆ привоста̑нїѧ проти̑внаѧ разрѣши́те, бжⷭ҇твенными моли́твами.
Воспѣва́емъ ѻ҆ц҃а̀ нерожде́ннаго, и҆ сн҃а, и҆ дх҃а ст҃а́го: є҆ди́но сꙋщество̀ несозда́нно, и҆ бжⷭ҇тво̀ є҆ди́но, и҆ вопїе́мъ согла́снѡ: всѧ̑ дѣла̀ бл҃гослови́те гдⷭ҇нѧ гдⷭ҇а.
Бг҃оро́диченъ:
Оу҆мерщвлє́нныѧ ны̀ ѡ҆живи́ла є҆сѝ, жи́знь всѣ́хъ ро́ждшаѧ, бг҃ороди́тельнице, влⷣчце мч҃никѡвъ сла́ва, и҆ пра́ведныхъ, и҆ прегрѣше́нїй те́плое ѡ҆чисти́лище.
Пѣ́снь ѳ҃. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Крѣ́постїю вжилѧ́еми бжⷭ҇твенною, сме́рти, страстоте́рпцы не ᲂу҆боѧ́стесѧ, но ᲂу҆се́рднѡ подло́жше мечє́мъ вы̑и, и҆спо́лнисте до́блественнѡ по́двигъ бжⷭ҇твенный: тѣ́мъ досто́йнѡ блажите́сѧ.
Ꙗ҆́кѡ два̀ свѣти̑льника свѣ̑тла, просвѣща́ете вселе́нныѧ и҆сполнє́нїѧ бжⷭ҇твенными страда́нїй свѣтлостьмѝ, маркїа́не мꙋ́дре и҆ мартѵ́рїе, тмꙋ̀ мра́чныѧ є҆́реси а҆́рїевы ѿгонѧ́ще.
Вѣнцы̀ сла́вы ѿ бг҃а, побѣди́вше слѣпоꙋ́мнаго македо́нїа, прїѧ́сте досто́йнѡ: и҆ прⷭ҇то́лꙋ влⷣчню предстоѧ́ще, прегрѣше́нїй на́мъ проси́те разрѣше́нїе соверше́нно, достосла́внїи.
Па́мѧть бжⷭ҇твеннаѧ ва́ша возсїѧ̀ со́лнца свѣтлѣ́йши, всѣ́хъ просвѣща́ющи сердца̀ сїю̀ соверша́ющихъ, блаже́ннїи, въ не́йже ᲂу҆моли́те гдⷭ҇а, тмы̀ согрѣше́нїй на́съ и҆зба́вити.
Бг҃оро́диченъ:
Свѣ́та жили́ще, чⷭ҇таѧ, сꙋ́щи, дꙋшѝ моеѧ̀ зѣ̑ницы просвѣтѝ, ѡ҆чернѣ́вшыѧ небреже́нїемъ, и҆ тмо́ю невѣ́дѣнїѧ глꙋбоча́йшею всегда̀ ѡ҆держи̑мыѧ, всенепоро́чнаѧ: ꙗ҆́кѡ да вѣ́рою ᲂу҆блажа́ю тѧ̀.
Свѣти́ленъ. Подо́бенъ: Дх҃омъ:
Па́ѵла всебл҃же́ннагѡ послѣ́дователи бы́вше, тече́нїе соверши́сте, хрⷭ҇то́ва црⷭ҇твїѧ и҆ сла́вы безсме́ртныѧ съ ни́мъ полꙋчи́сте, со всѣ́ми ст҃ы́ми, и҆ предстоитѐ кꙋ́пнѡ трⷪ҇цѣ чⷭ҇тнѣ́й, славосло́вѧще ю҆̀ досто́йнѡ.
Сла́ва, и҆ ны́нѣ, бг҃оро́диченъ:
Похвалѧ́ютъ ржⷭ҇тво̀ твоѐ безпло́тныхъ чи́ни, ра́дости бо сꙋ́щыѧ на землѝ ты̀ и҆спо́лнила є҆сѝ є҆ди́на: тѣ́мъ тѧ̀ пренепоро́чнꙋю вѣ́рнїи сла́вимъ, пѣ́сньми славосло́вѧще. свѣ́тъ бо сꙋ́щымъ во тмѣ̀ возсїѧ́ла є҆сѝ, ꙗ҆́кѡ ᲂу҆́тро возсїѧва́ющее де́нь.
На лїтꙋргі́и Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. А҆пⷭ҇лъ къ є҆фесе́ємъ зача́ло ск҃д, ѿ полꙋ̀. А҆ллилꙋ́їа, гла́съ д҃: Воззва́ша пра́веднїи: Є҆ѵⷢ҇лїе матѳе́а, зача́ло л҃д, ѿ полꙋ̀. Прича́стенъ: Ра́дꙋйтесѧ пра́веднїи:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.