← претходни дан | Минеј — Октобар | следећи дан →
20 октября: Святого великомученика Артемия
Мѣ́сѧца тогѡ́же въ к҃-й де́нь.
Ст҃а́гѡ великомꙋ́ченика а҆рте́мїа.
На Гдⷭ҇и, воззва́хъ, стїхи̑ры на ѕ҃, гла́съ д҃. Поⷣ: Ꙗ҆́кѡ до́блѧ:
Многоѻбра́зными мꙋ́ками лю́тыхъ ра́нъ, ꙳ преда́въ казни́ти многострада́льное ꙳ и҆ терпѣли́вѣйшее тѣ́ло твоѐ, ꙳ бг҃омꙋ́дре а҆рте́мїе, ꙳ не ѿве́рглсѧ є҆сѝ хрⷭ҇та̀, ꙳ ни кꙋмі́рѡмъ поже́рлъ є҆сѝ: ꙳ но терпѣ́лъ є҆сѝ, ꙗ҆́коже и҆но́мꙋ стра́ждꙋщꙋ, ꙳ ѡ҆жида́ѧ бꙋ́дꙋщихъ воздаѧ́нїй, ꙳ и҆ безсме́ртнагѡ благосла́вїѧ.
Повѣ́шенъ стрꙋ́жемь, ꙳ и҆ ка́менїемъ сдроблѧ́емь, ꙳ и҆ желѣ́зомъ ѿвсю́дꙋ и҆знꙋрѧ́емь, ꙳ и҆ мече́мъ ᲂу҆сѣка́емь, ꙳ непоколеби́мь пребы́лъ є҆сѝ, ꙳ на ка́мени мы́сленнѣмъ водрꙋзи́въ дꙋшѝ твоеѧ̀ стѡпы̀, сла́вне. ꙳ сеѧ̀ ра́ди побѣ́ды, ꙳ а҆́гг҃лѡмъ и҆ мч҃никѡмъ сочета́лсѧ є҆́й, ꙳ свѣ́та неизрече́ннагѡ и҆сполнѧ́емь.
И҆сцѣле́нїй бл҃года̑ти ꙳ лю́бѧщымъ тѧ̀ всегда̀ ꙳ и҆сточа́ютъ, сла́вне, твоѧ̑ мо́щи, ꙳ и҆ потоплѧ́ютъ стра̑сти, ꙳ и҆ недꙋ́ги, а҆рте́мїе, ꙳ и҆ прого́нѧтъ лꙋка́выхъ де́мѡнѡвъ полкѝ: ꙳ напаѧ́ютъ же вѣ́рныхъ сердца̀ ꙳ прозѧба̑ющаѧ добродѣ́телей плоды̀ бжⷭ҇твєнныѧ, ꙳ и҆ благоче́стїѧ зна́нїе.
Сла́ва, гла́съ в҃. Стꙋді́тово:
Разꙋ́мнаго свѣти́льника вѣ́ры, а҆рте́мїа почти́мъ, ꙗ҆́кѡ ѡ҆бличѝ царѧ̀ ме́рзскаго, и҆ кро́вїю мꙋче́нїѧ є҆гѡ̀ цр҃ковь бг҃ъ ѡ҆багрѝ. тѣ́мъ и҆ прїѧ́тъ и҆сцѣле́нїй бл҃года́ть незави́стнꙋю, и҆сцѣлѧ́ти недꙋ́ги, вѣ́рнѡ приходѧ́щихъ къ ра́цѣ моще́й є҆гѡ̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше. безча́дствовати тѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ. сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.
На стїхо́внѣ ѻ҆ктѡ́иха. Сла́ва, гла́съ ѕ҃:
За хрⷭ҇та̀ зако́ннѡ пострада́въ, а҆рте́мїе, и҆ съ чꙋ́вственнымъ царе́мъ ᲂу҆́мнаго низложи́въ врага̀, досто́йнѡ прїѧ́лъ є҆сѝ ѿ страстополо́жника сп҃са вѣне́цъ: и҆ ны́нѣ на нб҃сѣ́хъ со а҆́гг҃льскими ра́дꙋешисѧ чи́ны, вы́шнѧгѡ свѣтоли́тїѧ наслажда́ѧсѧ ꙗ҆́снѡ, и҆ трїѷпоста́сномꙋ и҆ пе́рвомꙋ свѣ́тꙋ причаща́ѧсѧ ѻ҆би́льнѡ. тѣ́мже и҆ мы̀ благовѣ́рнїи лю́дїе и҆ любомꙋ́чєницы, пѣ́сньми вопїе́мъ тѝ: ра́дꙋйсѧ, а҆дама́нте непобѣди́мый дꙋше́ю, и҆ крѣ́пкїй ѻ҆рꙋ́жниче хрⷭ҇то́въ: ра́дꙋйсѧ, ле́сти і҆́дѡльскїѧ потреби́телю, и҆ и҆́стины побо́рниче свѣ́тлый. но моли́сѧ гдⷭ҇ꙋ, и҆ на́мъ житїе́мъ бг҃олюби́вымъ, съ тобо́ю полꙋчи́ти стоѧ́нїе при прⷭ҇то́лѣ вели́чествїѧ є҆гѡ̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;
Тропа́рь, гла́съ д҃:
Мꙋ́ченикъ тво́й, гдⷭ҇и, а҆рте́мїй, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени ѻ҆́ба канѡ́на ѻ҆ктѡ́иха, безъ мч҃ничнѡвъ. И҆ ст҃а́гѡ канѡ́нъ на ѕ҃, є҆гѡ́же краегране́сїе:
Твою̀ пода́ждь мѝ бога́тнꙋю благода́ть, бл҃же́нне. І҆ѡ́сифъ.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
По́двигомъ, мꙋ́чениче, до́брымъ ꙗ҆́кѡ подвиза́всѧ, и҆ свѣ̑тлыѧ вѣнцы̀ прїи́мъ, свѣ́тꙋ предстои́ши просвѣща́емь, по прича́стїю невеще́ственномꙋ. тѣ́мъ мо́лимъ тѧ̀: просвѣтѝ на́съ моли́твами твои́ми.
Свѣ́тлый тво́й, мꙋ́чениче, пра́здникъ всѧ̑ созва̀ ра́достнѡ на трапе́зꙋ дне́сь, предложи́въ страда́нїй твои́хъ борє́нїѧ, мꙋ́жество и҆ противле́нїе: и҆́миже насы́щшесѧ, вѣ́рою тѧ̀ и҆ любо́вїю ᲂу҆блажа́емъ.
Оу҆мерщвле́на на крⷭ҇тѣ̀, пребл҃же́нне, недомы́сленнаго пло́тїю поразꙋмѣ́лъ є҆сѝ гдⷭ҇и, жи́зни вино́вника, во́льнꙋю возлюби́лъ є҆сѝ ме́ртвость ю҆́же ѿ страда́нїй: тѣ́мъ безсме́ртнꙋю сла́вꙋ полꙋчи́лъ є҆сѝ.
Бг҃оро́диченъ:
Воплоти́всѧ и҆зъ тебє̀ бг҃олѣ́пнѡ сло́во безпло́тное, премно́жествомъ чл҃вѣколю́бїѧ, пречⷭ҇таѧ, къ страсте́мъ прибли́жисѧ, и҆ безстра́стїе человѣ́кѡмъ и҆сточѝ препросла́вленный гдⷭ҇ь, сла́внѡ бо просла́висѧ.
Пѣ́снь г҃. І҆рмо́съ:
Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.
Мч҃ническими ᲂу҆краси́тисѧ вѣнцы̑, сла́вне, жела́ѧ, ꙗ҆́звы поне́слъ є҆сѝ и҆ растерза̑нїѧ го́рькихъ болѣ́зней, бж҃е́ственною бл҃года́тїю.
Не потрѧсѐ столпа̀ твоегѡ̀ се́рдца, всемꙋ́дре, лютѣ́йшее приложе́нїе мꙋ́къ: ᲂу҆тверди́сѧ бо на разꙋ́мнѣмъ ка́мени неподви́жнѣмъ.
На дре́вѣ повѣ́шенъ, и҆ ча́стыми ѿвсю́дꙋ терза̑нїи ѡ҆крꙋжа́емь, твои́ми ѻ҆чесы̀ къ могꙋ́щемꙋ спастѝ взира́лъ є҆сѝ, достосла́вне.
Бг҃оро́диченъ:
Вопло́щсѧ хотѣ́нїемъ ѿ крове́й, влⷣчце, твои́хъ пречⷭ҇тыхъ, гдⷭ҇ь, спаса́етъ человѣ́чество, и҆ мно́жєства мꙋ́ченикѡвъ собра̀.
Сѣда́ленъ, гла́съ и҃. Подо́бенъ: Премꙋ́дрости:
Цр҃ю̀ вѣкѡ́въ ᲂу҆гожда́ѧ, царѧ̀ беззако́ннагѡ всѧ́кїй совѣ́тъ ѿрази́лъ є҆сѝ, сла́вне, и҆ и҆стꙋка̑ннымъ не поже́рлъ: тогѡ̀ ра́ди же́ртвꙋ тебѐ сама́го прине́слъ є҆сѝ пожре́нномꙋ сло́вꙋ, пострада́въ крѣ́пкѡ. тѣ́мъ и҆ чꙋде́съ и҆сточа́еши стрꙋи̑, стра̑сти и҆сцѣлѧ́ѧ вѣ́рнѡ приходѧ́щихъ къ тебѣ̀, страстоте́рпче а҆рте́мїе, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Оу҆подо́бивсѧ распѧ́томꙋ, на дре́вѣ во́лею возвы́силсѧ є҆сѝ протѧза́емь, и҆ сꙋро́вѣйше стрꙋ́жемь, совлача́ѧсѧ ко́жныхъ ри́зъ ᲂу҆мерщвле́нїѧ.
Болѣ̑зни твоѧ̑ плотскі̑ѧ и҆ лю́тыхъ просте́ртїе, неболѣ́зненный поко́й, мꙋ́чениче, ꙗ҆́вѣ тебѣ̀ и҆схода́таиша: є҆гѡ́же ны́нѣ насыща́ѧсѧ, всѧ́кꙋ болѣ́знь ѡ҆блегча́еши ѿ ѿ дꙋ́шъ на́шихъ.
Равноа́гг҃льнꙋ бы́вшꙋ тебѣ̀ страда́нїй свѣ́тлостьми, рꙋко́ю а҆́гг҃ловою посыла́етъ тебѣ̀ пи́щꙋ нбⷭ҇ный хлѣ́бъ жи́знь на́ша, ᲂу҆крѣплѧ́ющꙋю тѧ̀, мч҃ниче достосла́вне.
Бога́тыми тѧ̀ ᲂу҆красѝ бл҃года́ть дх҃а дарова̑нїи, всемꙋ́дре: тѣ́мъ всѧ́чєскїѧ недꙋ́ги, мꙋ́чениче всече́стне, ѿго́ниши, вѣ́рою прибѣга́ющихъ тѝ.
Бг҃оро́диченъ:
Дв҃ꙋ тѧ̀ по ржⷭ҇твѣ̀, нескве́рнаѧ, нетлѣ́ннꙋ хрⷭ҇то́съ соблюдѐ, благоволи́вый во ᲂу҆тро́бѣ твое́й, всего́ мѧ человѣ́ка воспрїѧ́ти, кра́йнею бл҃гостїю.
Пѣ́снь є҃. І҆рмо́съ:
Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.
Свѣща̀ свѣтоза́рнаѧ ви́дѣнъ бы́лъ є҆сѝ дх҃омъ, а҆рте́мїе, вѣ̑рныѧ просвѣща́ющи, и҆ лꙋка̑вствїѧ разгонѧ́ющи мра́чныхъ и҆ тмы̀ и҆спо́лненныхъ дꙋхѡ́въ.
На ка́мени живо́тнѣмъ дꙋшє́вныѧ стѡпы̀ водрꙋзи́въ, ка́менїемъ сгнѣта́емь, и҆ болѣ́зньми ѡ҆крꙋжа́емь, и҆́стинный страстоте́рпецъ, непрекло́ненъ пребы́лъ є҆сѝ.
Ты̀ честны́ми воѡрꙋже́нъ дх҃а си́лами, трезꙋ́бцєвъ ѻ҆строты̀, мꙋ́чениче доблемꙋ́дренне, небре́глъ є҆сѝ, въ ни́хже спопра́въ жа̑ла вра̑жїѧ.
Бг҃оро́диченъ:
Крⷭ҇тъ и҆ погребе́нїе и҆зъ тебє̀ во́лею на́съ ра́ди рожде́йсѧ, претерпѣ́въ влⷣчце, свидѣ́телѧ крѣпча́йша а҆рте́мїа свои́хъ страда́нїй ꙗ҆́кѡ крѣ́пкїй содѣ́лалъ є҆́сть.
Пѣ́снь ѕ҃. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ. ѿ тлѝ, бж҃е, мѧ̀ возведѝ.
А҆́гнецъ и҆ заколе́нїе всецѣ́лое, мꙋ́чениче, прине́слсѧ є҆сѝ, а҆рте́мїе, во́льное распѧ́тїе въ на́ше прїи́мшемꙋ воззва́нїе.
Неѡсла́бными ꙗ҆́звами сокрꙋша́емо тѣ́ло твоѐ, а҆рте́мїе, терпѣли́вѣйшее, дꙋше́вное благоро́дїе соблю́лъ є҆сѝ, вѣ́рою неврежде́нное.
Недꙋ́гѡвъ на́съ и҆зба́ви, мꙋ́чениче, и҆скꙋше́нїй, и҆ страсте́й же и҆ скорбе́й, къ тебѣ̀ притека́ющыѧ, подража́телю сп҃совъ, а҆рте́мїе.
Бг҃оро́диченъ:
Ѡ҆бꙋрева́емаго въ пꙋчи́нѣ скорбе́й, и҆ потоплѧ́ема наше́ствїѧми треволне́нїй, спасѝ бцⷣе дв҃о, раба̀ твоего̀.
Конда́къ, гла́съ в҃. Подо́бенъ: Твє́рдыѧ:
Благочести́ваго и҆ вѣнцено́снаго мꙋ́ченика, на врагѝ побѣ́ды взе́мшаго ѡ҆долѣ́нїе, соше́дшесѧ досто́йнѡ пѣ́сньми восхва́лимъ а҆рте́мїа, превели́каго въ мꙋ́ченицѣхъ, чꙋде́съ же да́телѧ пребога́таго, мо́литсѧ бо гдⷭ҇ꙋ ѡ҆ всѣ́хъ на́съ.
І҆́косъ:
Кто̀ по́двиги твоѧ̑ довлѣ́етъ и҆зглаго́лати, страстоте́рпче, и҆лѝ болѣ̑зни твоѧ̑, ꙗ҆̀же мꙋ́жески претерпѣ́лъ є҆сѝ за вѣ́рꙋ гдⷭ҇ню, и҆ дарова̑нїѧ, и҆̀хже сподо́билсѧ є҆сѝ; не довлѣ́ютъ ᲂу҆ста̀ человѣ́чєскаѧ повѣ́дати: мꙋ́дростїю бо ᲂу҆кра́шенъ и҆ мꙋ́жествомъ, бога́тство возненави́дѣвъ, и҆ досто́инство привре́менное, во́инъ ꙗ҆ви́лсѧ є҆сѝ и҆́скреннѣйшїй, молѧ́сѧ ᲂу҆́бѡ гдⷭ҇ꙋ ѡ҆ всѣ́хъ на́съ.
Пѣ́снь з҃. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть. хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.
Непобѣди́мь смы́слъ нерꙋши́мою дꙋшѝ тве́рдостїю, а҆рте́мїе, стѧжа́въ, вра̑жїѧ кова̑рства, мч҃ниче, ᲂу҆праздни́лъ є҆сѝ, поѧ̀ и҆зрѧ́днѣйше: сы́й бл҃гослове́нъ и҆ препросла́вленъ.
Стрꙋѧ́ми крове́й твои́хъ возвы́шенный мꙋ́къ ѻ҆́гнь ᲂу҆гаси́лъ є҆сѝ, бл҃же́нне, и҆ росо́ю дх҃а ѡ҆блїѧ́емь, ра́дꙋѧсѧ взыва́лъ є҆сѝ: сы́й бл҃гослове́нъ и҆ препросла́вленъ.
И҆сцѣле́нїй дарова̑нїѧ и҆сточа́ѧ, страсте́й разжжє́нїѧ ᲂу҆гаша́еши бжⷭ҇твенною благода́тїю, ѿгонѧ́еши же дꙋ́хи присѣще́нїемъ твои́мъ, воспѣва́ѧ присносло́вый: сы́й бл҃гослове́нъ и҆ препросла́вленъ.
Бг҃оро́диченъ:
Мє́ртвымъ и҆сточи́вшаго безсме́ртїе, дв҃о всенепоро́чнаѧ, бг҃олѣ́пнѡ родила̀ є҆сѝ. того̀ ᲂу҆́бѡ молѝ, ᲂу҆мертви́ти на́шѧ стра̑сти тѣлє́сныѧ, чⷭ҇таѧ, и҆ вѣ́чныѧ сподо́битисѧ жи́зни.
Пѣ́снь и҃. І҆рмо́съ:
Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Ꙗ҆́звами лю́тыми тѣ́ло твоѐ, трезꙋ́бцы же и҆знꙋрѧ́емо претерпѣ́лъ є҆сѝ, взира́ѧй на воздаѧ́нїе бꙋ́дꙋщее, є҆́же подае́тъ тебѣ̀ зовꙋ́щꙋ, сла́вне, всѧ́ческихъ бг҃ъ, влⷣка же и҆ гдⷭ҇ь.
Кровьмѝ твои́ми землѧ̀ ѡ҆свѧти́сѧ, и҆ врачевство̀ ꙗ҆ви́сѧ тѣ́ло твоѐ многострада́льное, всѧ́кїй недꙋ́гъ, всѧ́ко ѡ҆ѕлобле́нїе, и҆ всѧ́кїй де́мѡнскїй всегда̀ вре́дъ ѿгонѧ̀ ѿ вѣ́рнѡ прибѣга́ющихъ въ тебѣ̀.
Оу҆краше́нїе страда́льцєвъ ꙗ҆ви́лсѧ є҆сѝ, ꙗ҆̀же въ мі́рѣ благочестномꙋ́дреннѡ ѿри́нꙋвъ, и҆ па́че премі̑рнаѧ хꙋдѣ́йшимъ и҆скꙋпꙋ́ѧ, честно́ю же, прехва́льне, кро́вїю, воспѣва́ѧ: благослови́те всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
И҆сте́кшыѧ ны̀ го́рькимъ дре́ва вкꙋше́нїемъ, и҆ па́дшыѧ поползнове́нїемъ возста́вила є҆сѝ, пречⷭ҇таѧ, содѣ́телѧ ро́ждши сло́во ѵ҆поста́сное, чⷭ҇таѧ. є҆мꙋ́же вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Ви́дѣти восхотѣ́въ добрѡ́ты небє́сныѧ, ви̑димыѧ добрѡ́ты мі́ра прете́клъ є҆сѝ, и҆ добротворе́ньми страда́льцєвъ ᲂу҆краси́всѧ, мꙋ́чениче доблемꙋ́дренне, до́брыхъ кра́йнѣйшее веселѧ́сѧ воспрїѧ́лъ є҆сѝ.
Ꙗ҆́кѡ ᲂу҆́тро, ꙗ҆́кѡ со́лнце, па́мѧть твоѧ̀ просвѣща́ющи вѣ́рныхъ сердца̀, бл҃же́нне, возсїѧ̀: ты́ бо и҆ свѣ́та и҆ днѐ свѣтови́дный ꙗ҆ви́лсѧ є҆сѝ наслѣ́дникъ, разорѧ́ѧй, а҆рте́мїе, мглꙋ̀ дꙋ́шъ на́шихъ.
Взыгра́имъ человѣ́цы, дꙋхо́внѡ ликовствꙋ́юще, а҆рте́мїа па́мѧть бжⷭ҇твеннагѡ мч҃ника, пое́мъ бг҃ꙋ съ похвало́ю, чꙋ́дномꙋ сꙋ́щꙋ во ст҃ы́хъ, и҆ ѡ҆свѧща́ющꙋ вѣ́рою того̀ чествꙋ́ющыѧ.
Ра́ка твоѧ̀ точа́щи непреста́ннѡ и҆сцѣлє́нїѧ, вѣ̑рныѧ созыва́етъ любо́вїю почерпа́ти, на тѣле́сное здра́вїе, и҆ дꙋше́вное и҆́стиннѡ спасе́нїе, всебл҃же́нне а҆рте́мїе, моли́твенниче ѡ҆ благохва́лѧщихъ тѧ̀.
Бг҃оро́диченъ:
Свѣ́томъ мѧ̀ просвѣтѝ лица̀ твоегѡ̀, гдⷭ҇и, ᲂу҆ны́нїѧ тмо́ю покрове́ннаго, и҆мѣ́ѧ молѧ́щꙋю тѧ̀, сло́ве, и҆́стиннꙋю чⷭ҇тꙋю мт҃рь твою̀, и҆ а҆́гг҃льскїѧ си̑лы, и҆ пресла́внаго а҆рте́мїа.
Свѣти́ленъ. Подо́бенъ: Свѣ́те неизмѣ́нный:
Свѣ́тъ въ се́рдцы твое́мъ возсїѧ́въ, а҆рте́мїе страстоте́рпче, горча́йшыѧ мꙋ̑ки претерпѣ́вшꙋ мꙋ́жественнѡ: и҆ и҆сцѣле́нїй бл҃года́ть прїѧ́лъ є҆сѝ свы́ше, немощны̑ѧ и҆сцѣлѧ́ти всегда̀.
Крⷭ҇тобг҃оро́диченъ:
Свѣ́тъ просїѧ́вый безлѣ́тнѡ и҆зъ ѻ҆ц҃а̀ пре́жде вѣкѡ́въ, въ лѣ́то ны́нѣ напослѣ́докъ и҆зъ тебє̀, дв҃о, прозѧбѐ на спасе́нїе мі́ра, къ немꙋ́же не ѡ҆ста́ви ѡ҆ мі́рѣ моли́тисѧ.
На стїхо́внѣ ѻ҆ктѡ́иха. Сла́ва, гла́съ ѕ҃:
Дне́сь вселе́ннаѧ всѧ̀, стрⷭ҇тоте́рпца просвѣща́етсѧ зарѧ́ми, и҆ бж҃їѧ цр҃ковь цвѣ̑ты ᲂу҆краша́ема, а҆рте́мїе, вопїе́тъ тѝ: ᲂу҆го́дниче хрⷭ҇то́въ, и҆ предста́телю те́плый, не преста́й молѧ́сѧ ѡ҆ рабѣ́хъ твои́хъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;
На лїтꙋргі́и: Бл҃жє́нна, ѻ҆ктѡ́иха на д҃: и҆ мꙋ́ченика пѣ́снь г҃-ѧ, на д҃. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши бж҃е гла́съ мо́й, внегда̀ моли́тимисѧ къ тебѣ̀. А҆пⷭ҇лъ къ тїмоѳе́ю, зача́ло сч҃в. А҆ллилꙋ́їа, гла́съ д҃: Пра́ведникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.