← претходни дан | Минеј — Октобар | следећи дан →
18 октября: Святого апостола и евангелиста Луки
Мѣ́сѧца тогѡ́же въ и҃і-й де́нь.
Ст҃а́гѡ а҆пⷭ҇ла и҆ є҆ѵⷢ҇лі́ста лꙋкѝ.
И҆ прпⷣбнагѡ і҆ѡ́сифа волоцка́гѡ.
Слꙋ́жба є҆гѡ̀ пи́сана септе́мврїа, ѳ҃ днѧ̀.
На вече́рни пое́мъ: Блаже́нъ мꙋ́жъ, а҃ а҆нтїфѡ́нъ.
На Гдⷭ҇и, воззва́хъ, стїхи̑ры, на и҃.
Гла́съ и҃. Подо́бенъ: Что̀ ва́съ нарече́мъ:
Что́ тѧ ны́нѣ нарекꙋ̀, а҆пⷭ҇ле; ꙳ не́бо, ꙗ҆́кѡ сла́вꙋ бж҃їю повѣ́далъ є҆сѝ: ꙳ блиста́нїе, ꙗ҆́кѡ мі́ръ ѡ҆зарѧ́еши свѣ́томъ: ꙳ ѻ҆́блакъ, ѡ҆дождѧ́ющь бжⷭ҇твєнныѧ во́ды: ча́шꙋ мꙋ́дрости бжⷭ҇твеннѣйшꙋю, ꙳ вїно̀ на́мъ и҆сточа́ющꙋю, ꙳ сердца̀ веселѧ́щее: ꙳ молѝ спасти́сѧ дꙋша́мъ на́шымъ.
Два́жды.
Что́ тѧ ны́нѣ нарекꙋ̀, бг҃опрїѧ́тне; ꙳ кївѡ́тъ златы́й завѣ́та, ꙳ є҆го́же завѣща̀ хрⷭ҇то́съ: ꙳ рѣкꙋ̀, и҆зъ раѧ̀ и҆стека́ющꙋю на́мъ: ꙳ свѣти́ло, ᲂу҆́мный свѣ́тъ просїѧва́ющее: ꙳ свѣти́льникъ, цр҃ковь всю̀ ѡ҆сїѧва́ющїй: ꙳ хлѣ́бъ жи́зни бжⷭ҇твенныѧ трапе́зы: ꙳ крати́ръ дꙋхо́внагѡ пи́ва, ꙳ молѝ спасти́сѧ дꙋша́мъ на́шымъ.
Два́жды.
Что́ тѧ ны́нѣ, бг҃ови́дче, нарече́мъ; ꙳ слꙋжи́телѧ та̑инъ дѣ́лательнѣйшаго хрⷭ҇то́выхъ: ꙳ ски́нїи мы́сленныѧ ꙳ началохꙋдо́жника мꙋ́дра, ꙳ скрижа̑ли и҆зсѣка́ющаго бл҃года́ти: ꙳ зако́нъ написа́вшаго новѣ́йшїй, ꙳ ѿ сїѡ́на происходѧ́щїи, ꙳ и҆ тобо́ю проповѣ́дꙋемый. ꙳ молѝ спасти́сѧ дꙋша́мъ на́шымъ.
Что́ тѧ ны́нѣ нарече́мъ, сла́вне; ꙳ сокро́вище нбⷭ҇ныхъ дарѡ́въ тве́рдное, ꙳ врача̀ дꙋ́шъ и҆ тѣле́съ и҆звѣ́стна, ꙳ па́ѵлова содѣ́йственника, ꙳ и҆ соше́ственника, дѣѧ̑нїѧ а҆пⷭ҇льскаѧ и҆зглага́юща: ꙳ мнѡ́гаѧ лꙋко̀, и҆мена̀, ꙳ добродѣ́тель тебѣ̀ сотворѝ. ꙳ молѝ спасти́сѧ дꙋша́мъ на́шымъ.
Что́ тѧ, ны́нѣ бг҃оглаго́ливе, провѣща́ю; ꙳ ᲂу҆ч҃ника̀, ꙗ҆́кѡ на́мъ благовѣствова́лъ є҆сѝ хрⷭ҇та̀: ꙳ врача̀, ꙗ҆́кѡ стра̑сти и҆сцѣлѧ́еши дꙋшє́вныѧ: ꙳ свѣти́льника, ᲂу҆́мный свѣ́тъ ѡ҆блиста́вшаго: ꙳ степе́нь и҆ ѡ҆снова́нїе вѣ́ры: ꙳ ты́ бо на́мъ написа́лъ є҆сѝ ꙳ всечⷭ҇тно́е є҆ѵⷢ҇лїе. ꙳ молѝ спасти́сѧ дꙋша́мъ на́шымъ.
Что́ тѧ ны́нѣ, нарекꙋ̀, чꙋ́дне; ꙳ зри́телѧ мꙋ́дрости ᲂу҆че́нїй нелжи́ва: ꙳ списа́телѧ дѣѧ́нїй а҆пⷭ҇льскихъ ᲂу҆че́нїй: ꙳ и҆лѝ столпа̀ благоче́стїѧ непоколеби́ма: ꙳ и҆лѝ стѣ́нꙋ цр҃кве неразрꙋши́мꙋю: ꙳ мнѡ́гаѧ, твоѧ̑, лꙋко̀, и҆мена̀, ꙳ и҆ бѡ́льшаѧ дарова̑нїѧ. ꙳ молѝ спасти́сѧ дꙋша́мъ на́шымъ.
Сла́ва, гла́съ ѕ҃: А҆нато́лїа:
А҆пⷭ҇ле хрⷭ҇то́въ и҆ бжⷭ҇твенныхъ догма̑тъ списа́телю, и҆ цр҃ко́вное ᲂу҆твержде́нїе: ты̀ ꙗ҆́кѡ и҆́стиннѡ, сꙋ́щыѧ во мра́цѣ невѣ́дѣнїѧ сердца̀, зашє́дшаѧ во глꙋбинꙋ̀ ѿча́ѧнїѧ, ᲂу҆врачи́лъ є҆сѝ бг҃овѣща́ньми, и҆ спа́слъ є҆сѝ ꙗ҆́кѡ ѿ бꙋ́ри треволне́нїѧ, послѣ́дователь бы́въ сосꙋ́да и҆збра́ннагѡ па́ѵла, и҆ ᲂу҆ч҃ни́къ. тѣ́мъ мо́лимъ тѧ̀, лꙋко̀ досточꙋ́дне, а҆нтїохі́анѡмъ ᲂу҆добре́нїе, моли́сѧ сп҃сꙋ и҆ бг҃ꙋ, ѡ҆ и҆̀же вѣ́рою соверша́ющихъ при́снѡ честнꙋ́ю па́мѧть твою̀.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ, и҆ чтє́нїѧ трѝ, и҆ лїті́а: и҆щѝ сегѡ̀ мѣ́сѧца въ ѕ҃ де́нь.
На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ по́стникѡвъ:
Бл҃года́ть ᲂу҆стна́мъ твои̑мъ, лꙋко̀, ѻ҆́гненнымъ ѧ҆зы́комъ и҆злїѧ́сѧ, а҆пⷭ҇ле, и҆ ѧ҆зы́къ ѻ҆́гненный показа́лсѧ є҆сѝ, словеса̀ и҆спꙋща́ѧ свѣ́та, свѣ́та досто́йнымъ проповѣ́данїемъ: стрѣ́лы же палѧ́щыѧ тмы̀ жела́ющымъ, пишѧ̀ и҆ ᲂу҆чѧ̀ честно́е є҆ѵⷢ҇лїе: и҆ вонѧ̀ жи́зненнаѧ, жи́зни вои́стиннꙋ хотѧ́щымъ ꙗ҆ви́лсѧ є҆сѝ, ꙗ҆́коже па́ѵелъ речѐ, є҆го́же и҆мѣ́лъ є҆сѝ ᲂу҆чи́телѧ: вонѧ́ же сме́рти па́ки жи́знь не возлюби́вшымъ. но на́мъ ми́ръ и҆ жи́знь и҆ свѣ́тъ пода́ждь, и҆ ве́лїю ми́лость.
Сті́хъ: Небеса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.
Позна́хомъ ѿ слове́съ твои́хъ, ꙗ҆́коже ре́клъ є҆сѝ, слове́съ ᲂу҆твержде́нїе, ꙗ҆̀же ре́клъ є҆сѝ бжⷭ҇твеннѣ, таи́нниче, поне́же писа́ти на́мъ ѡ҆ ве́щехъ на́чалъ є҆сѝ, ѡ҆ ни́хже и҆звѣще́нъ бы́лъ є҆сѝ, и҆ ꙗ҆́коже тебѣ̀ преда́ша, и҆́же и҆спе́рва самови́дцы: и҆̀мже и҆ ты̀ ра́венъ бы́лъ є҆сѝ слꙋжи́тель сло́ва воплоще́нїѧ, є҆го́же по воста́нїи во є҆ммаꙋ́сѣ ви́дѣлъ є҆сѝ, и҆ горѧ́щимъ се́рдцемъ съ клеѡ́пою хлѣ́бъ ꙗ҆́лъ є҆сѝ. тогѡ̀ бжⷭ҇твенныѧ теплоты̀ и҆ на́шѧ, чтꙋ́щихъ тѧ̀, дꙋ́шы и҆спо́лни.
Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.
Ра́дꙋйсѧ, є҆ди́нъ написа́вый на́мъ, є҆́же ра́дꙋйсѧ, ра́дꙋѧсѧ, чⷭ҇тыѧ благовѣ́щенїе: и҆ сїю̀ гдⷭ҇ороди́тельницꙋ, ре́кша крⷭ҇ти́телѧ и҆зъ чре́ва, є҆гѡ́же написа́въ и҆ зача́тїе, и҆ сло́ва воплоще́нїе. и҆скꙋшє́нїѧ же и҆ чꙋдеса̀, словеса̀ и҆ стрⷭ҇ти: крⷭ҇тъ и҆ сме́рть, и҆ воста́нїе, є҆́же ви́дѣлъ є҆сѝ и҆ восхо́дъ: дх҃а же соше́ствїе, проповѣ̑дникъ же дѣѧ̑нїѧ, и҆ и҆зрѧ́днѣе же па́ѵлова, є҆гѡ́же показа́лсѧ є҆сѝ соше́ственникъ, вра́чь же и҆ таи́нникъ, и҆ свѣти́льникъ цр҃кве, ю҆́же соблюда́й всегда̀.
Сла́ва, гла́съ ѕ҃:
Всемꙋ́дрый ло́вче, ст҃ы́й ᲂу҆ч҃ничѐ, дѣ́лателю сп҃совъ, и҆ проповѣ́дниче тогѡ̀ стрⷭ҇те́й, и҆́же тва́рь вѣ́рою претекі́й, и҆ ѿ пре́лести ꙗ҆зы́ки собра́въ, и҆ бг҃ꙋ приве́дъ ꙗ҆́кѡ воню̀ добрꙋ̀, на нб҃са̀ пости́глъ є҆сѝ. тѣ́мъ предстоѧ̀ сꙋдїѝ всѣ́хъ, моли́сѧ и҆зба́вити ны̀ ѿ беззако́нїй на́шихъ, и҆ въ де́нь сꙋда̀ свободи́тисѧ ѿ мꙋ́ки.
И҆ ны́нѣ, бг҃оро́диченъ воскре́сенъ: Творе́цъ и҆ и҆зба́витель мо́й:
Тропа́рь, гла́съ г҃:
А҆пⷭ҇ле ст҃ы́й и҆ є҆ѵⷢ҇лі́сте лꙋко̀, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
И҆лѝ се́й, гла́съ є҃:
А҆пⷭ҇тольскихъ дѣѧ́нїй сказа́телѧ, и҆ є҆ѵⷢ҇лїа хрⷭ҇то́ва свѣ́тла списа́телѧ, лꙋкꙋ̀ препѣ́таго неиспи́санна сꙋ́ща хрⷭ҇то́вѣ цр҃кви, пѣ́сньми свѧще́нными ст҃а́го а҆пⷭ҇ла похва́лимъ, ꙗ҆́кѡ врача̀ сꙋ́ща, человѣ́чєскїѧ не́мѡщи, є҆стества̀ недꙋ́ги, и҆ ꙗ҆́зи дꙋ́шъ и҆сцѣлѧ́юща, и҆ молѧ́щасѧ непреста́ннѡ за дꙋ́шы на́шѧ.
Сла́ва, и҆ ны́нѣ, бг҃оро́диченъ воскре́сенъ.
На ᲂу҆́трени, на Бг҃ъ гдⷭ҇ь, тропа́рь два́жды.
Сла́ва, и҆ ны́нѣ, бг҃оро́диченъ:
По а҃-й стїхоло́гїи, сѣда́ленъ, гла́съ г҃:
Прїиди́те всѝ, а҆пⷭ҇ла лꙋкꙋ̀ восхва́лимъ, ꙗ҆́кѡ ко́рмчїѧ: і҆́дѡльскꙋю бо ле́сть ᲂу҆празднѝ, и҆ къ свѣ́тꙋ жи́зни возведѐ, и҆ въ трⷪ҇цꙋ вѣ́ровати наꙋчѝ. тѣ́мже дне́сь благоче́стнѡ того̀ почита́юще, вѣ́рнїи, сла́вимъ хрⷭ҇та̀ бг҃а на́шего.
Два́жды.
Сла́ва, и҆ ны́нѣ, бг҃оро́диченъ:
Ра́дꙋйсѧ, марі́е дв҃о мт҃и, горо̀ ст҃а́ѧ, є҆де́мскїй раю̀, и҆зъ неѧ́же роди́сѧ хрⷭ҇то́съ бг҃ъ безсѣ́менное сло́во, и҆́мже жи́знь мі́рови прозѧбѐ.
По в҃-й стїхоло́гїи сѣда́ленъ, гла́съ г҃. Поⷣ: Красотѣ̀ дѣ́вства:
Пꙋтеше́ствовавъ ты̀ по воста́нїи, лꙋко̀ всесвѧще́нне, съ клеѡ́пою про́чее во гра́дъ є҆ммаꙋ́съ, вопроше́нїе творѧ́щꙋ тѝ, предста̀ гдⷭ҇ь ѻ҆́бразомъ прикрове́нъ, а҆́бїе же прїе́мъ хлѣ́ба пода́нїе, позна́лъ є҆сѝ сп҃са: є҆го́же молѝ дарова́ти на́мъ ве́лїю ми́лость.
Два́жды.
Сла́ва, и҆ ны́нѣ, бг҃оро́диченъ:
Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющь на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, ѡ҆бра́дованнаѧ.
По полѷеле́и сѣда́ленъ, гла́съ д҃:
Премꙋ́дрости лови́тельною тро́стїю, ᲂу҆́мнагѡ мо́рѧ глꙋбинꙋ̀ возчерпа́ѧ, и҆зъ смертоно́сныѧ глꙋбины̀, вѣ́рныхъ: дꙋ́шы живоꙋлови́лъ є҆сѝ, лꙋко̀ всебл҃же́нне. тѣ́мже ѿ па́ѵла наꙋче́нъ, всѐ ѡ҆чи́стилъ є҆сѝ твоѐ се́рдце ѡ҆сїѧ́нїемъ дх҃а, и҆ догма́тами твои́ми ꙗ҆зы́ки просвѣти́лъ є҆сѝ, страсте́й недꙋ́гѡванїѧ чꙋдесы̀ и҆сцѣли́лъ є҆сѝ, хрⷭ҇та̀ бг҃а за ны̀ при́снѡ молѧ̀, спасти́сѧ дꙋша́мъ на́шымъ.
Два́жды.
Сла́ва, и҆ ны́нѣ, бг҃оро́диченъ:
И҆мꙋ́ще тѧ̀, бцⷣе, ᲂу҆пова́нїе и҆ предста́тельство, вра́жїихъ навѣ̑тъ не ᲂу҆бои́мсѧ, ꙗ҆́кѡ спаса́еши дꙋ́шы на́шѧ.
Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю. Сті́хъ: Небеса̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна зача́ло ѯ҃з. По н҃-мъ ѱалмѣ̀ стїхи́ра, гла́съ г҃:
Пꙋтеходи́въ ты̀ по воста́нїи, лꙋко̀ всесвѧще́нне, со клеѡ́пою, во гра́дъ ᲂу҆́бѡ є҆ммаꙋ́съ, совопроше́нїе творѧ́щꙋ тѝ предста̀ гдⷭ҇ь, зра́комъ непознава́емый: а҆́бїе же прїе́мъ хлѣ́бъ подаѧ́нїе, позна́лъ є҆сѝ сп҃си́телѧ. є҆мꙋ́же моли́сѧ дарова́ти на́мъ ве́лїю ми́лость.
Канѡ́нъ бцⷣы со і҆рмосо́мъ на ѕ҃, и҆ а҆пⷭ҇ла на и҃.
Гла́съ и҃. Пѣ́снь а҃. І҆рмо́съ:
Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.
Колесни́ца бж҃їѧ пресвѣ́тлаѧ бы́лъ є҆сѝ, всест҃о́е носѧ̀ и҆́мѧ предъ человѣ́ки, лꙋко̀ всече́стное, колесни̑цы и҆ триста́ты пре́лести погрꙋжа́ѧ крѣ́пкѡ.
Стрꙋю̀ прїи́мъ жи́зни: зно́емъ и҆зсыха́емый безбо́жїѧ напои́лъ є҆сѝ мі́ръ, лꙋко̀ всебл҃же́нне, тꙋ́чами бг҃оразꙋ́мїѧ, и҆зъ чре́ва твоегѡ̀ и҆зска́чꙋщими.
Блиста́нїемъ дх҃а, лꙋко̀, и҆ житїѧ̀ чистото́ю ѡ҆зарѧ́емь, ꙗ҆́кѡ мо́лнїѧ, требл҃же́нне, бг҃ода́ннѡ сїѧ́лъ є҆сѝ все́й вселе́ннѣй, просвѣща́ѧ вѣ́рныхъ сердца̀.
Бг҃оро́диченъ:
Ра́дꙋйсѧ, всест҃ы́й хра́ме, рꙋно̀ бг҃оро́сное, запеча́танный и҆сто́чниче безсме́ртныѧ стрꙋѝ: ста́до твоѐ, влⷣчце, сохранѧ́й ѿ всѣ́хъ ра́тныхъ неплѣни́мо.
Ката́васїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Нѣ́сть свѧ́тъ ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.
Возсїѧ́въ ꙗ҆́кѡ со́лнце проповѣ́данїемъ, цр҃кве ᲂу҆краси́лъ є҆сѝ, лꙋко̀, ᲂу҆твержде́нїе, пре́лести мглꙋ̀ теплото́ю вѣ́ры и҆ста́ивъ, всебл҃же́нне.
Скрижа̑ли и҆зсѣ́клъ є҆сѝ бг҃олѣ̑пныѧ ѿ ка́мене, пребога́те, бж҃їѧ воплоще́нїѧ, ѻ҆ско́рдъ и҆мѣ́ѧ бжⷭ҇твенный ѧ҆зы́къ тво́й, и҆ ᲂу҆ста̀ бг҃одохновє́ннаѧ.
Во ѻ҆́блакъ всесвѣ́тлый входѧ́й, и҆ ѻ҆́блакомъ покрыва́емь, прїѧ́лъ є҆сѝ, премꙋ́дре, но́вый зако́нъ, пе́рстомъ дх҃а пи́санный на се́рдцы твое́мъ.
Бг҃оро́диченъ:
Нѣ́сть непоро́чныѧ ꙗ҆́кѡ ты̀, влⷣчце, и҆ нѣ́сть пречⷭ҇ты па́че тебє̀, всенепоро́чнаѧ: во чре́вѣ бо бг҃а сло́ва вмѣсти́ла є҆сѝ, є҆ди́наго многоми́лостиваго.
Сѣда́ленъ, гла́съ и҃. Подо́бенъ: Премꙋ́дрости:
Ꙗ҆́кѡ соше́ственникъ па́ѵловъ ꙗ҆ви́всѧ, разли̑чныѧ бѣды̑ терпѣли́внѣ претерпѣ́лъ є҆сѝ, всехва́льне гдⷭ҇ень а҆пⷭ҇ле, и҆ тече́нїе страда́нїемъ соверши́въ вѣ́ры. съ ни́мъ въ вы́шнихъ весели́шисѧ, блаже́нне. тѣ́мъ и҆ мі́рꙋ хрⷭ҇то́во є҆ѵⷢ҇лїе проповѣ́давъ, просвѣти́лъ є҆сѝ подсо́лнечнꙋю всю̀, лꙋко̀ всече́стне. молѝ хрⷭ҇та̀ бг҃а, грѣхѡ́въ составле́нїе пода́ти, пра́зднꙋющымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й.
Пѣ́снь д҃. І҆рмо́съ:
И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.
Мо́ре ꙗ҆зы́кѡвъ смꙋти́лъ є҆сѝ, бг҃омꙋ́дре, ко́нь бы́въ всецр҃ѧ̀, сла́вное невѣ́рствїе со́лїю бжⷭ҇твенною ѡ҆слажда́ѧ, присносла́вне.
Лꙋ́къ хрⷭ҇то́съ напрѧ́гъ, пꙋстѝ стрѣлꙋ̀ тѧ̀, лꙋко̀, свѣ́тлѡ ѡ҆бощре́нꙋ, лꙋча́ми сїѧ́юща благоче́стїѧ, и҆ просвѣща́юща на́шѧ дꙋ́шы.
Стра̑сти дꙋ́шъ кꙋ́пнѡ и҆ тѣле́съ твои́хъ пѣвцє́въ ᲂу҆врачѝ, всеблаже́нне, та́инственнымъ рꙋкодѣ́ланїемъ, грѣха̀ гни́лость и҆зрѣ́зꙋѧ, всемꙋ́дре.
Бг҃оро́диченъ:
Невѣ́сто бж҃їѧ, марі́е бг҃ороди́тельнице, и҆зба́ви мѧ̀ лю́тыхъ прегрѣше́нїй и҆ бѣ́дъ, и҆ къ тишины̀ приста́нищꙋ и҆ спасе́нїѧ твои́ми моли́твами напра́ви.
Пѣ́снь є҃. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Ꙗ҆́кѡ роса̀ съ нб҃съ спа́дающи ꙗ҆ви́лсѧ є҆сѝ, пре́лести зно́й разорѧ́ѧ словесы̀ твои́ми.
Стра́хъ во чре́вѣ твое́мъ бжⷭ҇твенный заче́нъ, спасе́нїе породи́лъ є҆сѝ заблꙋ́ждшымъ, а҆пⷭ҇ле.
На го́рꙋ возше́дъ, всебл҃же́нне, добродѣ́телей, всѣ̑мъ є҆ѵⷢ҇лїе црⷭ҇твїѧ проповѣ́далъ є҆сѝ.
Бг҃оро́диченъ:
Марі́е бцⷣе безневѣ́стнаѧ, надє́жды врагѡ́въ сꙋ́єтны сотворѝ, и҆ пою́щыѧ тѧ̀ возвеселѝ.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многоми́лостиве хрⷭ҇тѐ бж҃е на́шъ.
Мꙋ́дрости ча́шꙋ и҆спи́въ, напои́лъ є҆сѝ всѣ́хъ позна́нїѧ сп҃са хрⷭ҇та̀, лꙋко̀ всемꙋ́дре.
Па́ѵлꙋ соисхо́дникъ и҆збра́всѧ, лꙋко̀ всебл҃же́нне, ꙗ҆зы́ки ᲂу҆лови́лъ є҆сѝ мре́жею, бг҃оглаго́льниче, догма́тѡвъ твои́хъ.
Ѻ҆́блакъ, тꙋ́чꙋ жи́зни на́мъ ѡ҆дождѧ́ющь, ꙗ҆ви́лсѧ є҆сѝ а҆пⷭ҇ле, ѿ и҆стѡ́чникъ спасе́нїѧ и҆стека́ющꙋю.
Бг҃оро́диченъ:
Кꙋми́рѡвъ разрꙋши́тель, ꙗ҆́кѡ бг҃ъ, бы́вшее рождество̀ твоѐ, марі́е бг҃оневѣ́сто, покланѧ́емо є҆́сть со ѻ҆ц҃е́мъ и҆ дх҃омъ.
Конда́къ, гла́съ в҃. Подо́бенъ: Твє́рдыѧ:
И҆́стиннаго благоче́стїѧ проповѣ́дника, и҆ та̑инъ неизрече́нныхъ ри́тора, ѕвѣздꙋ̀ цр҃ко́внꙋю, лꙋкꙋ̀ бжⷭ҇твеннаго восхва́лимъ: сло́во бо є҆го̀ и҆збра̀, съ па́ѵломъ мꙋ́дрымъ ꙗ҆зы́кѡвъ ᲂу҆чи́телѧ, є҆ди́нъ вѣ́дый сердє́чнаѧ.
І҆́косъ:
Зна́нїемъ ѡ҆богати́всѧ го́рнѣйшимъ ѿ рꙋкѝ влⷣчни, врꙋче́нъ бы́лъ є҆сѝ ꙗ҆зы́кѡвъ жребїоимꙋ́ществꙋ всехва́льне. тѣ́мъ житїѐ распали́въ сло́вомъ, страна́мъ законополо́жникъ, лꙋко̀, ꙗ҆ви́лсѧ є҆сѝ па́че мѡѷсе́а: пе́рстомъ бж҃їимъ, ꙗ҆́кѡ скрижа̑ли бг҃оначерта̑нныѧ, тобо́ю сложи́вшасѧ дх҃омъ, бжⷭ҇твеннꙋю ᲂу҆ѧсни́лъ є҆сѝ вѣ́рꙋ. тѣ́мъ и҆ хрⷭ҇то́съ тѧ̀ просла́ви, є҆ди́нъ вѣ́дый сердє́чнаѧ.
Пѣ́снь з҃. І҆рмо́съ:
Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
Оу҆ч҃ни́къ неизрече́нныхъ та̑инъ хрⷭ҇та̀ бг҃а вѣ́ренъ бы́въ, є҆ѵⷢ҇лїе сегѡ̀ бжⷭ҇твенное проповѣ́далъ є҆сѝ вѣ̑рнымъ, всемꙋ́дре, глаго́лющымъ: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
Оу҆творє́нїи добродѣ́телей ᲂу҆кра́шенъ ꙗ҆ви́лсѧ є҆сѝ, лꙋко̀ всебл҃же́нне, бжⷭ҇твеннагѡ благолѣ́пїѧ зарѧ́ми просвѣща́емь, и҆ вопїѧ̀ непреста́ннѡ творцꙋ̀ твоемꙋ̀: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
И҆спꙋща́ѧ свѣтонѡ́сныѧ лꙋчѝ, ꙗ҆́коже въ нощѝ зарѧ̀ ꙗ҆влѧ́емь, пре́лести тмꙋ̀ сїѧ́нїемъ слове́съ твои́хъ, благоче́стнѡ взыва́ѧ ѿгна́лъ є҆сѝ: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.
Бг҃оро́диченъ:
И҆мѣ́ѧ житїѐ, сло́вомъ, бг҃ови́дче, мꙋ́дрости просвѣще́но, лꙋко̀, дв҃ы ржⷭ҇тво̀ ꙗ҆́вственнѡ и҆списа́лъ є҆сѝ, и҆ і҆кѡ́нами любе́знѡ воѡбрази́лъ є҆сѝ: є҆́йже покланѧ́емсѧ вѣ́рнѡ, хрⷭ҇та̀ сла́вѧще.
Пѣ́снь и҃. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Росода́тельною мꙋ́дростїю слове́съ твои́хъ, и҆ тꙋ́чами бл҃года́ти бжⷭ҇твенныѧ, пре́лести пе́щь погаси́лъ є҆сѝ, вѣ́стникъ гдⷭ҇ень, и҆ свѧщеннопроповѣ́дникъ, бг҃омꙋ́дре, бы́въ.
Ꙗ҆́кѡ кра̑сныѧ но́ги твоѧ̑, всеблаже́нне, ми́ръ благовѣствꙋ́ющагѡ, всѧ́къ ᲂу҆́мъ преизвѣ́стнѡ преимꙋ́щь: є҆го́же превозно́симъ и҆ славосло́вимъ во вѣ́ки всѧ̑.
Свѣ́тъ мі́ра, просвѣща́ти во тмѣ̀ сѣдѧ́щыѧ, ꙗ҆ви́ тѧ хрⷭ҇то́съ, ѻ҆́ч҃а сꙋщества̀ сїѧ́нїе, гдⷭ҇и сла́вы, є҆го́же превозно́симъ во вѣ́ки.
Бг҃оро́диченъ:
Во ᲂу҆тро́бѣ всели́вшагосѧ дв҃ы, и҆ ѿ неѧ̀ стра́шнѡ и҆ па́че сло́ва, дре́внѧго а҆да́ма ѡ҆бнови́вшаго гдⷭ҇а, пое́мъ и҆ славосло́вимъ во вѣ́ки.
Пѣ́снь ѳ҃. І҆рмо́съ:
Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.
Проповѣ́дникъ бы́лъ є҆сѝ всемі́рнагѡ спасе́нїѧ, є҆ѵⷢ҇льскимъ проповѣ́данїемъ: свѧще́ннаѧ же и҆ благознамени́таѧ трꙋба̀, вдохнове́нїемъ ды́шꙋщи дх҃а показа́лсѧ є҆сѝ, свѧщенноглаго́льниче всече́стне.
Дѣѧ̑нїи ᲂу҆краша́емь сп҃совыхъ а҆пⷭ҇лѡвъ, сїѧ̑ ѿ бг҃а подви́жимь вѣ̑рнымъ написа́лъ є҆сѝ, ꙗ҆́коже ѻ҆́бразъ ѡ҆дꙋшевле́нный при́снѡ пребыва́ющь ѡ҆б̾ѧви́въ, свѧщеннопроповѣ́дниче всесла́вне.
Ста́лъ є҆сѝ ᲂу҆́бѡ лꙋко̀, ꙗ҆́коже пости́гъ бг҃онача́льниче жела́нїй кра́йнѣйшее: хрⷭ҇тꙋ́ бо предста́лъ є҆сѝ, подае́магѡ ѿ негѡ̀ насыща́ѧсѧ бг҃овидѣ́нїѧ. тѣ́мже тѧ̀ всѝ ᲂу҆блажа́емъ.
Бг҃оро́диченъ:
Тѧ̀ непристꙋ́пнаго бг҃а носи́вшꙋю на ѡ҆б̾ѧ́тїихъ, на нб҃сѣ́хъ пое́маго ѿ всѧ́кїѧ си́лы, и҆ тобо́ю на́мъ да́рꙋюща всегда̀ спасе́нїе, бг҃ома́ти, велича́емъ.
Свѣти́ленъ. Подо́бенъ: Со ᲂу҆ченикѝ:
Лꙋко̀ хрⷭ҇то́въ а҆пⷭ҇ле, таи́нниче неизрече́нныхъ, и҆ ꙗ҆зы́кѡвъ ᲂу҆чи́телю, съ па́ѵломъ бжⷭ҇твеннымъ, и҆ пречⷭ҇тою бцⷣею, є҆ѧ́же бжⷭ҇твеннꙋю і҆кѡ́нꙋ ѿ любвѐ и҆з̾ѡбрази́лъ є҆сѝ: молѝ бг҃ови́дче, ѡ҆ на́съ блажа́щихъ тѧ̀, и҆ соверша́ющихъ свѧще́нное твоѐ ᲂу҆спе́нїе, всемꙋ́дре тайноглаго́льниче.
Сла́ва, и҆́нъ. Подо́бенъ: Дх҃омъ во ст҃и́лищи:
Ꙗ҆́кѡ ᲂу҆ч҃ника̀ бл҃года́ти, и҆ спослѣ́дователѧ па́ѵлова, и҆ словопи́сца и҆зѧ́щнѣйша бжⷭ҇твеннагѡ є҆ѵⷢ҇лїа, похва́лимъ: сло́ва бо воплоще́нїе и҆ вочл҃вѣ́ченїе, и҆ стрⷭ҇ти, блаже́нне, проповѣ́далъ є҆сѝ. тѣ́мъ соше́дшесѧ вѣ́рнѡ, лꙋко̀, досто́йнѡ тѧ̀ почита́емъ.
И҆ ны́нѣ, бг҃оро́диченъ:
Неизрече́ннѡ бы́сть рожде́нїе пренепоро́чныѧ невѣ́сты, ꙗ҆́кѡ бы́вши чистѣ́йшїй, хра́мъ бцⷣе, совѣ́томъ бо превѣ́чнымъ въ тѧ̀ все́льшасѧ, родила̀ є҆сѝ бг҃а сло́ва. тѣ́мъ пою́ще ржⷭ҇тво̀ твоѐ, велича́емъ досто́йнѡ, всенепоро́чнаѧ.
На хвали́техъ стїхи̑ры на д҃, гла́съ. Поⷣ: Ѻ҆́блакъ тѧ̀ свѣ́та:
Хрⷭ҇то́ва ᲂу҆ч҃ника̀, є҆ѵⷢ҇лїа списа́телѧ мꙋдрѣ́йша, сосꙋ́да и҆збра́нна кра́сна, ѻ҆́бразъ ѡ҆дꙋшевле́нъ вѣ́рнїи, є҆гѡ́же во всѣ́хъ цр҃квахъ похвала̀, лꙋкꙋ̀ а҆пⷭ҇ла въ пѣ́снехъ почти́мъ: то́й бо проповѣ́да бж҃їѧ пресла̑внаѧ чꙋдеса̀, просвѣти́въ ꙗ҆̀же на землѝ, бг҃осло́вїѧ лꙋча́ми, бл҃гости ра́ди.
Дꙋ́шъ врачевствꙋ̀, па́че тѣле́съ наꙋчи́всѧ хи́трости, мꙋ́дре, и҆ ѻ҆бою́дꙋ вседо́бръ показа́лсѧ є҆сѝ, бж҃їею мꙋ́дростїю вдохнове́нъ: є҆́юже врачꙋ́ѧ дꙋ́шы же и҆ тѣлеса̀, лꙋко̀ всебл҃же́нне, призыва́еши къ позна́нїю, восперѧ́еши къ жела́нїю бж҃їю, человѣ́ки всегда̀ возво́диши на нб҃о, и҆ ѡ҆ всѣ́хъ мо́лишисѧ восхвалѧ́ющихъ тѧ̀.
Оу҆́дицею слове́сною, ꙗ҆̀же во глꙋбинѣ̀ невѣ́дѣнїѧ, ꙗ҆́кѡ ры̑бы внꙋ́трь вше́дшыѧ, привле́клъ є҆сѝ къ позна́нїю бж҃їю: хрⷭ҇тꙋ̀ пи́щꙋ добрꙋ̀ прине́слъ є҆сѝ, всеблаже́нне, че́сть достодо́лжнꙋю, жи́знь нетлѣ́ннꙋю, лꙋко̀ свѧще́ннѣйшїй. тѣ́мъ и҆ а҆пⷭ҇лъ хрⷭ҇то́въ бы́лъ є҆сѝ, мꙋ́дрый благовѣ́стникъ, сказа́тель дѣ́ѧтельныхъ дѣ́лъ бл҃года́ти.
Гла́съ и҃. Лео́нта магі́стра:
Прїиди́те, всѧ̀ тва́рь, и҆́стиннѡ врача̀ дꙋхо́внаго, и҆ сп҃сова ᲂу҆ч҃ника̀, лꙋкꙋ̀ приснопа́мѧтнаго, пѣ́сньми похва́лимъ: се́й бо безбо́жїѧ недꙋ́гъ, пома́занїемъ хрⷭ҇то́вы кꙋпѣ́ли, ᲂу҆врачева̀, и҆ рѣка́ми бг҃ото́чныхъ во́дъ ѿ ᲂу҆́стъ, ѡ҆дꙋшевлє́ннаѧ се́ла є҆ѵⷢ҇лїа напоѝ. тѣ́мъ и҆зы́де проро́чески вѣща́нїе є҆гѡ̀ во вселе́ннꙋю, и҆ мо́литсѧ спасти́сѧ дꙋша́мъ на́шымъ.
Сла́ва, гла́съ то́йже:
Дв҃дски соше́дшесѧ, вѣ́рнїи, въ пѣ́снехъ та́йномꙋ виті́и сло́ва, лꙋцѣ̀ воззове́мъ: ѧ҆зы́къ тво́й тро́сть пи́сменника ꙗ҆ви́сѧ, хрⷭ҇та̀ скоропи́сца ᲂу҆краша́ѧ зра́ки, къ ра́зꙋмꙋ ꙗ҆зы́кѡвъ бжⷭ҇твеннагѡ позна́нїѧ: въ не́мже проповѣ́далъ є҆сѝ є҆ѵⷢ҇лїе, и҆ кꙋ́пнѡ а҆пⷭ҇лѡвъ дѣѧ̑нїѧ списа́въ. тѣ́мъ предстоѧ̀ трⷪ҇цѣ и҆ бг҃ꙋ, моли́сѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ:
Влⷣчце, прїимѝ моли̑твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
Славосло́вїе вели́кое, и҆ ѿпꙋ́стъ.
На лїтꙋргі́и бл҃жє́нна, ѿ канѡ́на а҆пⷭ҇тола пѣ́снь г҃-ѧ, и҆ ѕ҃-ѧ. Прокі́менъ, гла́съ и҃. Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю: А҆пⷭ҇лъ къ колосса́ємъ, зача́ло с҃ѯ, ѿ полꙋ̀. А҆ллилꙋ́їа, гла́съ а҃: И҆сповѣ́дѧтъ небеса̀ чꙋдеса̀ твоѧ̑, гдⷭ҇и. Є҆ѵⷢ҇лїе лꙋкѝ, зача́ло н҃а. Прича́стенъ: Во всю̀ зе́млю и҆зы́де вѣща́нїе и҆́хъ:
Извор: Ponomar Project (библиотека богослужбених књига, текстови под Creative Commons лиценцом). Слова: Slavonic Computing Initiative.